កីឡា

ប្រតិភូកីឡាប៉ារ៉ាឡាំពិកកម្ពុជា នឹងមកដល់មាតុភូមិវិញនាថ្ងៃស្អែកនេះ

បានផុស

៣ years មុន

នៅ

ថ្ងៃអង្គារ ៧ កញ្ញា ២០២១

ដោយ

ប្រតិភូប៉ារ៉ាឡាំពិកកម្ពុជា នឹងមកដល់មាតុប្រទេសវិញនៅថ្ងៃទី៨កញ្ញាស្អែក។ នេះបើតាមការអះអាងឲ្យដឹងពីលោក យី សុភក្ត្រា ដែលជានាយបេសកកម្មកម្ពុជា សម្រាប់ព្រឹត្តិការណ៍កីឡាប៉ារ៉ាឡាំពិកនៅតូក្យូ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក យី សុភក្ត្រា បានបញ្ជាក់តាមរយៈសារអេឡិចត្រូនិកថា ពិធីបិទព្រឹត្តិការណ៍ខាងលើ បានធ្វើឡើងកាលពីយប់ថ្ងៃទី៥កញ្ញាហើយ នៅវេលាម៉ោង២២និង៥៥នាទី ថ្ងៃទី៧កញ្ញា(ម៉ោងនៅទីក្រុងតូក្យូ) ប្រតិភូកម្ពុជានឹងចាក់ចេញពីទីនោះ ហើយនឹងគ្រោងមកដល់កម្ពុជាវេលាម៉ោង១៧និង៣០នាទីថ្ងៃទី៨កញ្ញា ហើយពួកគេនឹងធ្វើចត្តាឡីស័ក១៤ថ្ងៃ តាមវិធានការរបស់ក្រសួងសុខាភិបាល។

ព្រឹត្តិការណ៍ប៉ារ៉ាឡាំពិកហ្គេមកីឡាករ វ៉ាន វ៉ុន ប្រកួតផ្ដាច់ព្រ័ត្របានចំណាត់ថ្នាក់លេខ៧។កីឡាករកម្ពុជារូបនេះ ប្រជែងមិនបានមេដាយមែន តែគេបានបង្កើតនូវកំណត់ត្រាថ្មីដោយចម្ងាយ១០០ម៉ែត្រគេប្រើថិរវេលាត្រឹមតែ១៤,២១វិនាទីប៉ុណ្ណោះ ។ ចំពោះមេដាយមាសបានទៅលើ កីឡាករថៃឈ្មោះ Athiwat Paeng-Nuea ដែលប្រើថិរវេលា១៣,៧៦វិនាទី មេដាយប្រាក់បានទៅអតីតម្ចាស់មេដាយមាសទីក្រុងរីយ៉ូ ប្រទេសប្រេស៊ីល ឆ្នាំ២០១៦ឈ្មោះ Lao Pekka Tahti មកពីប្រទេសហ្វាំងឡង់ ដោយប្រើថិរវេលា១៣,៨៥វិនាទីនិងមេដាយសំរិទ្ធ បានទៅកីឡាករម៉ិកស៊ីកូឈ្មោះ Juan Pablo Garcia ដែលប្រើថិរវេលា១៣,៨៧វិនាទី ។

កីឡាករ វ៉ាន វ៉ុន បានបំបែកថិរវេលាចាស់របស់ខ្លួនដែលធ្វើក្នុងវគ្គជម្រុះកាល(Heat-1)ដែលធ្វើពីព្រឹកដោយប្រើថិរវេលា១៤,៣៩វិនាទី ចំពោះកីឡាករដែលជាប់ចំណាត់ថ្នាក់ក្រោយគេក្នុងវគ្គផ្ដាច់ព្រ័ត្រ គឺកីឡាករមកពីហូល្លង់ឈ្មោះKenny Van Weeghel ដែលធ្វើក្នុងថិរវេលា១៤,៥៣វិនាទី ។

លោក យី វាសនា ដែលជាអគ្គលេខាធិការគណៈកម្មាធិការជាតិប៉ារ៉ាឡាំពិកកម្ពុជា បានបង្ហាញនូវការដឹងគុណដ៏ជ្រាលជ្រៅបំផុត ជូនចំពោះប្រមុខរាជរដ្ឋាភិបាលកម្ពុជា សម្តេចតេជោ ហ៊ុន សែន ប្រធានគណៈកម្មាធិការជាតិប៉ារ៉ាឡាំពិកកម្ពុជា ដែលបានឧបត្ថម្ភទាំងស្រុង ដល់ក្រុមប្រតិភូកីឡាពិការកម្ពុជា សម្រាប់បេសកកម្មជាប្រវត្តិសាស្ត្រ ប៉ារ៉ាឡាំពិក នៅប្រទេសជប៉ុនលើកនេះ។

សូមបញ្ជាក់ថា ព្រឹត្តិការណ៍ប្រកួតកីឡាប៉ារ៉ាឡាំពិក នៅទីក្រុងតូក្យូ ប្រទេសជប៉ុន ឆ្នាំ២០២០ កម្ពុជាបានបញ្ជូនអត្តពលិក ១រូប និងប្រតិភូ ១រូបចូលរួម គឺកីឡាករ វ៉ាន វ៉ុន និងលោក យី សុភក្ត្រា ជាប្រតិភូ៕

អត្ថបទ៖ វិសិទ្ធ