កីឡា

សង្វៀន«គុនខ្មែរអលស្តារ»ត្រួសត្រាយផ្លូវទៅកាន់ឆាកអន្តរជាតិ

បានផុស

២ years មុន

នៅ

ថ្ងៃសុក្រ ២៩ តុលា ២០២១

ដោយ

កម្មវិធីប្រដាល់ថ្មី«គុនខ្មែរអលស្តារ»អាចត្រូវបានចាត់ទុកជាការត្រួសត្រាយផ្លូវសម្រាប់អ្នកលេងគុនខ្មែរចេញទៅប្រកួតនៅលើឆាកអន្តរជាតិទាំងកម្មវិធីថ្នាក់តំបន់ និងកម្មវិធីឯកជន។

ថ្វីបើប្រដាល់គុនខ្មែរមិនមានឈ្មោះប្រកួតផ្លូវការនៅព្រឹត្តិការណ៍កីឡាស៊ីហ្គេម ថ្នាក់តំបន់ ឬកម្មវិធីប្រដាល់អន្តរជាតិធំៗ ប៉ុន្តែនៅស៊ីហ្គេមមានមួយថៃ និងឃីកបុកសីង ហើយនៅសង្វៀនអន្តរជាតិដូចជា ONE Championship មានប្រដាល់មួយថៃ និងឃីកបុកសីងដែរ ដូច្នេះជំនាញទាំងនេះដូចគុនខ្មែរដែរ។

ឯកឧត្តម ខៀវ កាញារិទ្ធ បំពាក់កម្រផ្កាដល់កីឡាករក្នុងកម្មវិធីប្រដាល់គុនខ្មែរអលស្តារ (រូបថត៖ យឹម វឌ្ឍនា)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប៉ុន្តែអ្វីដែលគួរឲ្យកត់សំគាល់គឺគោលការណ៍ប្រកួត និងទម្លាប់នៃការប្រកួតរបស់កីឡាទាំងនោះមានលក្ខណៈខុសគ្នាខ្លះៗពីគុនខ្មែរ ដូច្នេះហើយជាជើងខ្លាំងគុនខ្មែរចេញទៅវ៉ៃនៅក្រៅប្រទេសកម្រទទួលបានជោគជ័យ។ សម្រាប់គុនខ្មែរដើម្បីឲ្យទទួលបានជោគជ័យ និងល្បីល្បាញលើឆាកអន្តរជាតិត្រូវកែប្រែទម្លាប់ និងរបៀបនៃការប្រកួត។

ឡៅ ចិត្រា និង ផល សោភ័ណ្ឌ ប្រកួតដោយរុំអំបោះឆៅដៃ

ចំណុចទី១៖ ទម្លាប់ និងរបៀបនៃការប្រកួតគឺគុនខ្មែរត្រូវរៀនវ៉ៃ៣ទឹកសម្រាប់មិត្តភាព និង៥ទឹកសម្រាប់ខ្សែក្រវាត់។ ហេតុអ្វីវ៉ៃ៣ទឹក? ចម្លើយគឺថា បើប្រកួត៣ទឹកគឺវ៉ៃលឿន រហ័ស មិនស្ទាបស្ទង់និងមិនសម្តែងរេរាំ។ ការប្រកួតគុនខ្មែររយៈពេល៥ទឹកគឺកីឡាករភាគច្រើនវ៉ៃមួយៗហើយចេញរបៀបរាំតាមចង្វាក់ភ្លើង ដូច្នេះពេលចេញវ៉ៃនៅក្រៅប្រទេសទម្លាប់បែបនេះគឺយឹត។

គូប្រកួតប្រដាល់សកល (រូបថត៖ Khemrith Reach)

ចំណុចទី២៖ ផ្លាស់ប្តូរហ្គង់ដៃ សង្វៀននៅខ្មែរមិនទាន់មានប្រើអំបោះឆៅរុំដៃឡើយ។ ដូច្នេះអ្នកលេងគុនខ្មែរត្រូវរៀនរុំ រៀនវ៉ៃ និងរៀនប្រើអំបោះឆៅលើដៃដើម្បីសាំនឹងទម្លាប់បែបនេះពេលចេញទៅក្រៅប្រទេស។ ជាក់ស្តែងឃើញកីឡាករគុនខ្មែរខ្លះបានឱកាសចេញទៅប្រកួតនៅក្រៅប្រទេសគឺវ៉ៃប្រើអំបោះឆៅ ដូច្នេះអត់ធ្លាប់សោះ។

ចំណុចទី៣៖ ប្រដាល់ឃីកបុកសីងមិនធ្លាប់មានប្រកួតនៅក្នុងស្រុកទេ ប៉ុន្តែកម្ពុជាបានបញ្ជូនកីឡាករគុនខ្មែរទៅប្រកួតនៅស៊ីហ្គេម ហើយពួកគាត់មួយចំនួនច្រឡំប្រើកែង និងជង្គង់ជាដើម ពីព្រោះពួកគាត់មិនធ្លាប់ប្រកួតឃីកបុកសីង ដូច្នេះចាំបាច់ត្រូវមានការប្រកួតឲ្យបានច្រើន និងញឹកញាប់ទើបចេញទៅប្រកួតយល់ពីបច្ចេកទេស និងច្បាប់កីឡានេះ។

ចំណុចទី៤៖ ការប្រកួតប្រដាល់សកលស្ទើរគ្រប់សង្វៀននៅភ្នំពេញបានឈប់ដាក់កីឡាករឡើងប្រកួតអស់ហើយ។ ប្រដាល់សកលមានក្នុងការប្រកួតផ្លូវការដូចជាស៊ីហ្គេមជាដើម ហើយកម្ពុជាក៏បញ្ជូនទៅប្រកួតរាល់លើកដែរ ប៉ុន្តែមិនសូវបានលទ្ធផលល្អឡើយ។ បើក្នុងស្រុកមិនមានកម្មវិធីប្រកួតប្រដាល់សកលច្រើន តែបែរជាបញ្ជូនទៅប្រកួតនៅស៊ីហ្គេម តើឲ្យទទួលបានលទ្ធផលល្អដូចម្តេចទៅ។

និយាយចំគឺ ហាត់ច្រើន អនុវត្តច្រើន ទើបមានលទ្ធផល។ អ្វីដែលគួរឲ្យកត់សំគាល់ទៀតនោះ ពេលនេះសហព័ន្ធកីឡាប្រដាល់សកលកម្ពុជាបានរៀបចំការប្រកួតសកលប្រចាំសប្តាហ៍ហើយដើម្បីត្រៀមស៊ីហ្គេមនៅវៀតណាមឆ្នាំ២០២២ និងកម្ពុជាឆ្នាំ២០២៣។

សរុបសេចក្តីមក កម្មវិធីប្រដាល់«គុនខ្មែរអលស្តារ ឬ Kun Khmer All Star»បានបង្ហាញនូវចំណុចទាំង៤ខាងលើដែលជាផ្នែកជួយអភិវឌ្ឍសមត្ថភាព ជំរុញការអនុវត្ត និងបង្កើនបទពិសោធដល់អ្នកលេងគុនខ្មែរអាចចេញទៅប្រកួតនៅក្រៅប្រទេសបានដូចព្រឹត្តិការណ៍កីឡាស៊ីហ្គេម និង ONE Championship ជាដើម៕

អត្ថបទ៖ វីរបុត្រ

Related Topics:កីឡាប្រដាល់គុនខ្មែរ