ផ្លូវការ! កម្ពុជា ឈរលេខ​៤ ជាប្រទេស​បញ្ជូនអត្តពលិក​ច្រើន​បំផុត ទៅប្រកួតស៊ីហ្គេមនៅ ថៃ

ការប្រកួតកីឡាស៊ីហ្គេម លើកទី ៣៣ នៅប្រទេស ថៃ នាចុងឆ្នាំ ២០២៥ កាន់តែខិតជិតមកដល់ ខណៈចំនួនអត្តពលិក ដែលត្រូវចូលរួមប្រកួតរបស់ប្រទេស​ទាំង ១១ ប្រទេសក៏បានបង្ហាញជាផ្លូវការរួចរាល់ហើយដែរ។

កីឡាស៊ីហ្គេមឆ្នាំ លើកទី ៣៣ ម្ចាស់​ផ្ទះ​ថៃបានកំណត់យកប្រភេទកីឡាចំនួន ៥០ ដើម្បីដាក់ប្រកួតប្រជែងដណ្តើមមេដាយ ចាប់ពីថ្ងៃទី ៩ ដល់ថ្ងៃទី ២០ ខែ ធ្នូ ឆ្នាំ ២០២៥។

យោងតាមវែបសាយផ្លូវការរបស់ ថៃ បានបង្ហាញថា ឆ្នាំ ២០២៥ នេះមានអត្តពលិកសរុបចំនួន ១២,៥០៦ នាក់ មកពី ១១ ប្រទេសចូលរួមប្រកួតប្រជែង។ ក្នុងនោះ ថៃ មានអត្តពលិកច្រើនជាងគេ គឺចំនួន ១,៨០៧ នាក់។ បន្ទាប់មក ម៉ាឡេស៊ី មានចំនួន ១,៥៨០ នាក់ និង​ ឥណ្ឌូណេស៊ី មានចំនួន ១,៥៤៨ នាក់។

ចំណែក កម្ពុជា មានចំនួន ១,៥១៥ នាក់ ដែល​ស្ថិត​នៅ​ចំណាត់​ថ្នាក់​លេខ​៤។ ហ្វីលីពីន មានចំនួន ១,៤៩៩ នាក់។ សិង្ហបុរី មានចំនួន ១,៤៨១ នាក់។ មីយ៉ាន់ម៉ា មានចំនួន ១,០៧៧ នាក់។ វៀតណាម មានចំនួន ១,០១៩ នាក់។ ឡាវ មានចំនួន ៥៩៨ នាក់។ ប៊្រុយណេ មានចំនួន ២៥០ នាក់ និងចុងក្រោយ ទីម័រ មានចំនួន ១៣២ នាក់។

គួរឱ្យដឹងថា តាមរយៈចំនួនអត្តពលិកនឹងចូលរួម ដែលបង្ហាញដោយខាងវែបសាយរបស់ ថៃ ខាងលើ នេះគឺជាលើកទី ១ ហើយ ដែល កម្ពុជា បញ្ជូនអត្តពលិកចូលរួមប្រកួតក្នុងកីឡាស៊ីហ្គេមច្រើនបែបនេះ។ ស្របពេលក្នុងឆ្នាំ ២០២៣ ដែល កម្ពុជា ខ្លួនឯងធ្វើជាម្ចាស់ផ្ទះ ពេលនោះមានអត្តពលិកចូលរួមប្រកួតត្រឹម ៨៩៦ នាក់ប៉ុណ្ណោះ៕

អត្ថបទ៖ កុសល