បើតាមស្ថានតំណាងអចិន្ត្រៃយ៍កម្ពុជាប្រចាំនៅអង្គការសហប្រជាជាតិ កងកម្លាំងរក្សាសន្តិភាពកម្ពុជាទាំង៣រូបនេះ បានពលីជីវិតក្នុងអំឡុងពេលបំពេញបេសកកម្មរក្សាសន្តិភាព នៅប្រទេសស៊ូដង់ខាងត្បូង និងអាហ្វ្រិកកណ្តាល ក្នុងឆ្នាំ២០២៥ ដែលរួមមាន៖ អនុសេនីយ៍ឯក ដួង ម៉ាហ្គាលី អនុសេនីយ៍ទោ ផាត មុន្នី និងអនុសេនីយ៍ត្រី ប្រាក់ ដា។

មេដាយនេះត្រូវបានប្រគល់ឱ្យលោក កែវ ឈា តំណាងអចិន្រ្តៃយ៍កម្ពុជាប្រចាំនៅអង្គការសហប្រជាជាតិ ជំនួសមុខឱ្យគ្រួសាររបស់កងកម្លាំងរក្សាសន្តិភាពកម្ពុជាទាំង៣រូប ដែលបានប្រារព្ធធ្វើឡើងនៅទីស្នាក់ការអង្គការសហប្រជាជាតិ ក្នុងទីក្រុងញូវយ៉ក ក្រោមវត្តមានរបស់លោកអគ្គលេខាធិការ អាន់​តូ​នី​ញ៉ូ ហ្គូ​តេ​រ៉េ​ស កាលពីព្រឹកថ្ងៃទី០៥ ខែមិថុនា ឆ្នាំ២០២៦។

ជាកត់សម្គាល់ ពិធីនេះត្រូវបានរៀបចំឡើងជារៀងរាល់ឆ្នាំ ដើម្បីប្រគល់មេដាយដល់កងកម្លាំងសន្តិភាពឆ្នើមក្នុងការបំពេញភារកិច្ច និងដើម្បីជាការសម្តែងការចូលរួមរំលែកទុក្ខ និងដឹងគុណដល់កងកម្លាំងរក្សាសន្តិភាព និងបុគ្គលិកស៊ីវិលរបស់អង្គការសហប្រជាជាតិ ដែលបានពលីជីវិតក្នុងអំឡុងពេលបំពេញបេសកកម្មរក្សាសន្តិភាព៕

The post កងកម្លាំងកម្ពុជា៣រូប ដែលពលីជីវិតក្នុងបុព្វហេតុរក្សាសន្តិភាព ទទួលបានមេដាយពី UN appeared first on Kampuchea Thmey Daily.

ការបញ្ជូនសម្ភារៈមធ្យោបាយគ្រឿងបំពាក់នេះជាប្រភេទវិស្វកម្មធន់ធ្ងន់ តបតាមការស្នើសុំបន្ថែមពីអង្គការសហប្រជាជាតិ ដែលបានធ្វើឡើងនាព្រឹកថ្ងៃទី២៥ ខែកញ្ញា ឆ្នាំ២០២៤ តាមរយៈគណៈកម្មាធិការជាតិសម្របសម្រួលកិច្ចការបញ្ជូនកងកម្លាំងចូលរួមបេសកកម្មអង្គការសហប្រជាជាតិ និងក្រសួងការពារជាតិកម្ពុជា។

ពិធីបញ្ជូនរថយន្ត គ្រឿងចក្រ និងសម្ភារៈគ្រឿងបំពាក់ចំនួន២២គ្រឿងទៅកាន់អាហ្វ្រិកកណ្តាលនេះ រៀបចំនៅសាលាហ្វឹកហ្វឺនកងកម្លាំងរក្សាសន្តិភាពពហុសាសន៍ នាស្រុកភ្នំស្រួច ខេត្តកំពង់ស្ពឺ ក្រោមវត្តមានលោកនាយឧត្តមសេនីយ៍ សែម សុវណ្ណនី អនុប្រធានទី១គណៈកម្មាធិការជាតិ និងជាអគ្គនាយកមជ្ឈមណ្ឌលជាតិរក្សាសន្តិភាព។

លោកនាយឧត្តមសេនីយ៍ សែម សុវណ្ណនី បានលើកឡើងថា ការបញ្ជូនរថយន្ត គ្រឿងចក្រ និងសម្ភារៈដាក់ក្នុងទូកុងទឺន័រ ចេញពីកំពង់ផែស្វយ័តអន្តរជាតិក្រុងព្រះសីហនុ ដើម្បីបន្តដឹកតាមនាវាទៅកាន់អាហ្វ្រិកកណ្តាល ដោយមានការអនុញ្ញាតយល់ព្រមពីសម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា ឧបនាយករដ្ឋមន្ត្រី ទៀ សីហា រដ្ឋមន្ត្រីក្រសួងការពារជាតិ និងឧបនាយករដ្ឋមន្ត្រី សុខ ចិន្តាសោភា រដ្ឋមន្ត្រីក្រសួងការបរទេស និងជាប្រធានគណៈកម្មាធិការជាតិ។

រថយន្ត គ្រឿងចក្រ និងសម្ភារៈ រួមមាន រថយន្តប្រភេទរថពាសដែក (MPV) រថយន្តសាំង រថយន្តទឹក គ្រឿងចក្រប្រភេទអេស្កាវឺទ័រ គ្រឿងចក្រប្រភេទសាសឺ គ្រឿងចក្រនីវ៉ាល័រ រថយន្តតូច និងសម្ភារៈបំពាក់ចំនួន៤កុងទឺន័រ ទាំងអស់២២គ្រឿងនឹងចេញទៅអាហ្វ្រិកកណ្តាល តាមនាវា នៅដើមខែតុលា ឆ្នាំ២០២៤ខាងមុខនេះ ដោយប្រើរយៈពេល៩០ថ្ងៃ នឹងទៅដល់គោលដៅ៕

The post កម្ពុជាបញ្ជូនគ្រឿងចក្របន្ថែមសម្រាប់បម្រើឱ្យបេសកកម្មអង្គការសហប្រជាជាតិ នៅអាហ្វ្រិកកណ្ដាល appeared first on Kampuchea Thmey Daily.

ដំណើរមកដល់របស់កងកម្លាំងមួកខៀវកម្ពុជា នាព្រឹកនេះ ត្រូវបានទទួលស្វាគមន៍ពីសំណាក់លោកនាយឧត្តមសេនីយ៍ សែម សុវណ្ណនី អនុប្រធានទី១ គណៈកម្មាធិការជាតិ និងជាអគ្គនាយកមជ្ឈមណ្ឌលជាតិរក្សាសន្តិភាពកម្ពុជា។ កម្លាំងដែលធ្វើមាតុភូមិនិវត្តន៍នាពេលនេះ ជាកងទី១១ ដែលបានបំពេញបេសកកម្មក្រោមឆត្រអង្គការសហប្រជាជាតិ​ នៅប្រទេសស៊ូដង់ខាងត្បូង មានចំនួនសរុប៧៣នាក់ (នារីចំនួន៣៣នាក់) ហើយនេះជាកងមានកម្លាំងជានារីច្រើនជាងគេបង្អស់។

តាមរយៈការសម្រេចចិត្តបញ្ចូនកងកម្លាំងជានារីនេះ គឺបានឆ្លុះបញ្ចាំងពីការប្តេជ្ញាចិត្តរបស់រាជរដ្ឋាភិបាលកម្ពុជាក្នុងការបង្កើនការចូលរួមរបស់នារីក្នុងបេសកកម្មអន្តរជាតិ។

បើតាមលោកនាយឧត្តមសេនីយ៍ សែម សុវណ្ណនី កងអនុសេនាធំអាវុធហត្ថលេខ១៧១ បានអនុវត្តភារកិច្ចដូចកង​កម្លាំងមុនៗ​ ខណៈយោធិននារី ក៏មានឱកាសចូលរួមសកម្មភាពការងារ​យ៉ាង​សកម្មជូនជាតិមាតុភូមិ និងនៅលើឆាកអន្តរជាតិដូចបុរសដែរ ទោះបីជាស្ថិតក្នុង​ស្ថាន​​ភាពអសន្តិសុខក៏ដោយ ដែលនេះជាការ​បង្ហាញ​ពីវីរភាពរបស់កងយោធពល​ខេមរភូមិន្ទ។

កម្ពុជា បានបញ្ជូនកងកម្លាំងមួកខៀវរបស់ខ្លួនចូលរួមបេសកកម្មរក្សាសន្តិភាពក្រោមឆត្រអង្គការសហប្រជាជាតិនៅក្នុងចំណោម៦៣ប្រទេស ដែលបានបញ្ជូនកងកម្លាំង នាខែមេសា ឆ្នាំ២០១២។ កងកម្លាំងមួកខៀវកម្ពុជា បានពង្រាយកម្លាំង និងបោះទីតាំងឈរជើងនៅ ៧គោលដៅ ក្នុង៦រដ្ឋ ដែលជាកងផ្តល់ការពារដល់ជនស៊ីវិល ធ្វើការល្បាតថ្មើរជើង និងតាមរថយន្តរយៈពេលខ្លី មធ្យម និងវែង។ ជាមួយគ្នានេះ កម្លាំងកម្ពុជា ក៏បានស៊ើបអង្កេតលើគ្រោះថ្នាក់ចរាចរណ៍ បទឧក្រិដ្ឋ និងអំពើហិង្សានានា និងអនុវត្តភារកិច្ចតាមបទបញ្ជានៃបេសកកម្មផ្សេងៗ ព្រមទាំងបានការពារក្បួនជូនឥស្សរជនជាន់ខ្ពស់មកពីអង្គការសហប្រជាជាតិ និងបណ្តាប្រទេសបរិច្ចាគកម្លាំងក្នុងបានចុះទស្សនកិច្ចកងកម្លាំងរក្សាសន្តិភាពក្នុងតំបន់បេសកកម្ម ជាដើម៕

The post កម្លាំងមួកខៀវកម្ពុជាជាង៧០នាក់ បានវិលចូលប្រទេសវិញ ក្រោយចប់បេសកកម្មនៅស៊ូដង់ខាងត្បូង appeared first on Kampuchea Thmey Daily.

របាយការណ៍របស់ក្រសួងការពារជាតិ បានឲ្យដឹងថា កងកម្លាំងរក្សាសន្តិភាពរបស់កម្ពុជា បានទៅបំពេញការងារនៅប្រទេសស៊ូដង់ខាងត្បូង ឆាដ លីបង់ ម៉ាលី អាហ្វ្រិកកណ្ដាល សាយព្រឺស ស៊ីរី និងប្រទេសយេមែន។ បេសកកម្មនេះ គឺផ្អោតលើជំនាញបោសសម្អាត មីន កម្ទេចគ្រាប់មិនទាន់ផ្ទុះ អាវុធហត្ថ វិស័យសុខាភិបាល វិស្វកម្មសំណង់ វិស្វកម្មព្រលានយន្តហោះ ជំនាញសេនាធិការ និងសង្កេតការណ៍ ជាដើម។ ដោយឡែក បើគិតពីឆ្នាំ២០១៨ កងកម្លាំងកម្ពុជាដែលបានបញ្ជូនទៅបំពេញបេសកកម្មមានចំនួន ៣ ៣១២នាក់ នារីចំនួន ៣៥០នាក់ នៅប្រទេសចំនួន ៥ គឺ ស៊ូដង់ ស៊ូដង់ខាងត្បូង លីបង់ ម៉ាលី និងអាហ្វ្រិកកណ្ដាល។

ចំណែក លោក ឈុំ សុជាត អ្នកនាំពាក្យក្រសួងការពារជាតិ បានលើកឡើងថា ពេលបច្ចុប្បន្ននេះ កម្លាំងនៃកងយោធពលខេមរភូមិន្ទចំនួនប្រមាណ ៨០១នាក់ កំពុងបំពេញបេសកកម្មរក្សាសន្តិភាពនៅក្រៅប្រទេស ដោយមិនខ្លាចនឿយហត់ក្រោមអាកាសធាតុក្ដៅហួតហែងរហូតដល់ ៥៣អង្សានៅទ្វីបអាហ្វ្រិក និងអាកាសធាតុចុះត្រជាក់ក្រោមសូន្យអង្សានៅតំបន់មជ្ឈឹមបូព៌ា។ លោក បានគូសបញ្ជាក់ថា តំបន់ដែលកងកម្លាំងកម្ពុជាកំពុងបំពេញភារកិច្ច គឺមិនមានហេដ្ឋារចនាសម្ព័ន្ធផ្លូវគមនាគមន៍ទេ ជាតំបន់ភ្នំ ខ្ពង់រាប ព្រមទាំងជាតំបន់ប្រឈមនឹងការគំរាមកំហែងផ្នែកសន្តិសុខ ដូចជា ការវាយប្រហារពីក្រុមភេរវករ ព្យុះខ្សាច់ ការផ្ទុះមីន និងគ្រឿងផ្ទុះកែច្នៃ ជាដើម។

បើតាមមន្ត្រីនាំពាក្យរូបនេះ គឺកាលពីឆ្នាំ២០២១ អង្គការសហប្រជាជាតិបានវាយតម្លៃថា កម្ពុជាជាប់លំដាប់ថ្នាក់លេខ ២៨ លើ ១២២ប្រទេស ដែលបានបញ្ជូនកងកម្លាំងរក្សាសន្តិភាពច្រើនជាងគេ ហើយជាប្រទេសលំដាប់លេខទី១៣ ដែលបានបញ្ជូនកងកម្លាំងជានារី និងទទួលបានលំដាប់លេខ ៣ បើប្រៀបធៀបនៅក្នុងប្រទេសអាស៊ាន៕

ដោយ៖ ធឿន វ៉ាន់សុង

The post ក្រសួងការពារជាតិ៖ កម្ពុជា បានបញ្ជូនកង​ទ័ព​មួកខៀវជាង៨ពាន់នាក់ហើយទៅប្រទេសចំនួន៩ appeared first on Kampuchea Thmey Daily.

លោកនាយឧត្តមសេនីយ៍ សែម សុវណ្ណនី បានបន្តថា កម្ពុជា គឺស្ថិតនៅក្នុងលំដាប់ទី ២ នៃប្រទេស ដែលបានបញ្ជូនស្ត្រី ជាកងកម្លាំងរក្សាសន្តិភាព នៅក្នុងចំណោមបណ្តាប្រទេសសមាជិកអាស៊ានហើយក្នុងស្មារតី ប្តេជ្ញាចិត្តខ្ពស់ ដើម្បីឈានឆ្ពោះឲ្យសម្រេចបាននូវសមភាពយេនឌ័រ កម្ពុជាគ្រោងបញ្ជូនកងទ័ពមួកខៀវនារីឲ្យបាន ២០ភាគរយ នៅត្រឹមឆ្នាំ ២០២៤ខាងមុខ។

ជាមួយគ្នានេះដែរមូលនិធិ Elsie Initiative របស់អង្គការសហប្រជាជាតិ បានគាំទ្រសម្រាប់ការបញ្ជួនកងកម្លាំងមួកខៀវស្ត្រី ក្នុងប្រតិបត្តិការរក្សាសន្តិភាពរបស់អង្គការសហប្រជាជាតិ។ មូលនិធិ Elsie Initiative (EIF) បង្កើតឡើងដោយអង្គការសហប្រជាជាតិនៅឆ្នាំ ២០១៩ មូលនិធិនេះ គឺជាមូលនិធិពហុភាគី ដែលបានរួមចំណែកពីរដ្ឋាភិបាលប្រទេស អូស្ត្រាលី កាណាដា ដាណឺម៉ាក ហ្វាំងឡង់ អាល្លឺម៉ង់ ន័រវែស សាធារណៈរដ្ឋកូរ៉េ និងអង់គ្លេស ក្នុងគោលបំណងបង្កើនល្បឿនវឌ្ឍនភាព ឆ្ពោះទៅទទួលបាននូវគោលដៅសូចនាករយេនឌ័រ ដែលស្របជាមួយសេចក្ដីសម្រេចរបស់ក្រុមប្រឹក្សាសន្តិសុខអង្គការសហប្រជាជាតិ និងយុទ្ធសាស្ត្រកាត់បន្ថយគម្លាតយេនឌ័រ នៅក្នុងកងកម្លាំង របស់អង្គការសហប្រជាជាតិ ២០១៨ ២០២៨។

ប្រទេសកម្ពុជា ស្ថិតនៅក្នុងលំដាប់ទី ២៥ ដែលបានបញ្ជូនកងកម្លាំងចូលរួមច្រើនជាងគេបង្អស់ នៅក្នុងការរក្សាសន្តិភាព របស់អង្គការសហប្រជាជាតិ។ បច្ចុប្បន្នកម្ពុជា មានកងកម្លាំងចំនួន ៧៦៦រូប ដែលមាន ១៤ភាគរយ ជាស្ត្រីស្ថិតនៅក្នុងកិច្ចប្រតិបត្តិការ។

លោកស្រី Sarah Knibbs ប្រធានស្តីទី នៃការិយាល័យតំបន់ របស់ទីភ្នាក់ងារសហប្រជាជាជាតិ UN Women សម្រាប់អាស៊ីប៉ាស៊ីហ្វិច បានលើកឡើងថា គម្រោងនេះ គឺជាចំនុចគោលមួយក្នុងការគាំទ្រកិច្ចខិតខំប្រឹងប្រែងរបស់កម្ពុជា បង្កើននូវការចូលរួមរបស់ស្ត្រី ប្រកបដោយអត្ថន័យនៅក្នុងប្រតិបត្តិការរក្សាសន្តិភាព របស់អង្គការសហប្រជាជាតិ។

លោកស្រីសង្ឃឹមថា គម្រោងផែនការនេះ ក៏ជំរុញលើកទឹកចិត្តដល់បណ្តាសមាជិកអាស៊ានផ្សេងទៀត ក្នុងការបញ្ជូនកម្លាំងស្រ្តីទៅក្នុងបេសកកម្មរក្សាសន្តិភាព៕

អត្ថបទ៖ សំអឿន

The post កម្ពុជាស្ថិតក្នុងលំដាប់ទី ២ នៅតំបន់អាស៊ាន ដែលបានបញ្ជូនស្ត្រី ជាកងកម្លាំងរក្សាសន្តិភាព appeared first on Kampuchea Thmey Daily.

នៅក្នុងជំនួបជាមួយ លោកនាយឧត្តមសេនីយ៍ យ៉ាម៉ាសាគិ កូជិ អគ្គសេនាធិការចម្រុះ នៃកងកម្លាំងស្វ័យការពារជប៉ុន កាលពីរសៀលថ្ងៃទី ២៩ ខែមេសា លោកនាយឧត្តមសេនីយ៍ សែម សុវណ្ណនី អគ្គនាយកមជ្ឈមណ្ឌលជាតិ គ្រប់គ្រងកម្លាំងរក្សាសន្តិភាព បានមានប្រសាសន៍ថា នៅឆ្នាំ ២០២៤ខាងមុខនេះ កម្ពុជានឹង​ធ្វើជាម្ចាស់​ផ្ទះរៀបចំលំហាត់​ហ្វឹកហ្វឺន ​កងកម្លាំងរក្សាសន្តិភាពត្រីភាគីកម្ពុជា ​អង្គការសហប្រជាជាតិ និងជប៉ុន ដែលមាន​និងថ្នាក់ដឹកនាំ ​សិក្ខាកាមកងរក្សាសន្តិភាព មកពីបណ្តាប្រទេសតំបន់អាស៊ាន មក​ពី​តំបន់នានា​ទៀតអញ្ជើញចូលរួម ​ខណៈ គម្រោងធ្វើលំហាត់ហ្វឺកហ្វឺនត្រីភាគីនេះ ដំបូងឡើយ គឺបាន​ផ្តួចផ្តើម​រៀបចំដោយ​អតីតនាយករដ្ឋមន្ត្រីជប៉ុន ​លោក ស៊ីនស៊ូ អាបេ។

លោកនាយឧត្តមសេនីយ៍ សែម សុវណ្ណនី បានបន្តថា រដ្ឋាភិបាលជប៉ុន ​បានផ្តល់ជំនួយមកកម្ពុជា ​ដើម្បីរៀបចំដំណើរការសាងសង់ ហេដ្ឋា​រចនា​សម្ព័ន្ធ មានដូចជាផ្លូវ របង ​សង់សំណង់អគារសាលប្រជុំ ​នៅក្នុងសាលា​ហ្វឹកហ្វឺន​ពហុសាសន៍ ACO គឺបាននិងកំពុងដំណើរការសាងសង់ជាបណ្តើរៗហើយដើម្បីជាការប្រុងប្រៀប ត្រៀមរៀបចំលំហាត់ហ្វឹកហ្វឺន កងកម្លាំងរក្សាសន្តិភាពត្រីភាគីកម្ពុជា UNនិង ជប៉ុន។

នៅក្នុងជំនួបពិភាក្សាការងារ លោកនាយឧត្តមសេនីយ៍ យ៉ាម៉ាសាគិ កូជិ បានថ្លែងថា ​រដ្ឋាភិបាលជប៉ុន នឹង​បង្កើន​ការផ្តល់​ជំនួយមកកម្ពុជា ​លើផ្នែក​ហ្វឹកហ្វឺន​កងម្លាំងរក្សាសន្តិភាពកម្ពុជា​ ជំនាញ​វិស្វកម្ម ដើម្បី​បញ្ជូន​ចូលរួបប្រតិបត្តិការថែរក្សាសន្តិភាពUN ​នៅតាមបណ្តាប្រទេសផ្សេងៗ​ ខណៈដែលបច្ចុប្បន្ន ភាគីជប៉ុនបាន និងកំពុងរៀបចំឯកសាការបណ្តុះបណ្តាល លើជំនាញវិស្វកម្មជាច្រើន ដើម្បី​ត្រៀមជួយបណ្តុះបណ្តាល​ជំនាញ វិស្វកម្មជូនទ័ពមួកខៀវកម្ពុជាផ្សេងៗទៀត។

លោកនាយឧត្តមសេនីយ៍ យ៉ាម៉ាសាគិ កូជិ បានបញ្ជាក់ថា តាមរយៈដំណើរ​ទស្សនកិច្ចប្រតិភូ​ កងកម្លាំង​ស្វ័យ​ការពារ​ជប៉ុនមកកម្ពុជា ​មក​សាលា​ហ្វឹកហ្វឺន​ពហុសាសន៍ ACO នាពេលនេះ នឹងជំរុញ​ប្រទេស​យើង​ទាំងពីរកម្ពុជា ​មាន​ចំណងកិច្ចសហប្រតិបត្តិការ ផ្នែកយោធាកាន់​តែរឹងម៉ាំថែមទៀត៕

អត្ថបទ៖ សំអឿន

The post កម្ពុជានឹងធ្វើម្ចាស់ផ្ទះរៀបចំលំហាត់ហ្វឹកហ្វឺន កងកម្លាំងរក្សាសន្តិភាពត្រីភាគីកម្ពុជា UN និងជប៉ុន appeared first on Kampuchea Thmey Daily.