កងទ័ពការពារព្រំដែន Archives - Kampuchea Thmey Daily

លោកជំទាវបណ្ឌិត ពេជ ចន្ទមុន្នី ហ៊ុន ម៉ាណែត អញ្ជើញគោរពវិញ្ញាណក្ខន្ធ វីរយុទ្ធជនពលីក្នុងសមរភូមិការពារទឹកដី

Sous Sith — Sat, 02 May 2026 07:17:20 +0000

កាលពីថ្ងៃទី១ ខែឧសភា ឆ្នាំ២០២៦ លោកជំទាវបណ្ឌិត ពេជ ចន្ទមុន្នី ហ៊ុន ម៉ាណែត បានអញ្ជើញទៅគោរពវិញ្ញាណក្ខន្ធវីរយុទ្ធជនដែលបានពលីក្នុងសមរភូមិការពារបូរណភាពទឹកដី និងចូលរួមរំលែកមរណទុក្ខយ៉ាងក្រៀមក្រំជាមួយក្រុមគ្រួសារយុទ្ធជន ដែលរស់នៅក្នុងខេត្តកំពង់ធំ និងគ្រួសារវីរយុទ្ធជនចំនួន ១៨ គ្រួសារមកពីខេត្តព្រះវិហារ។

អញ្ជើញចូលរួមដោយអារម្មណ៍សោកសង្រេង លោកជំទាវបណ្ឌិត បានពាំនាំប្រសាសន៍ចូលរួមរំលែកមរណទុក្ខដ៏ក្រៀមក្រំបំផុត និងប្រសាសន៍សួរសុខទុក្ខពី សម្តេចអគ្គមហាសេនាបតីតេជោ ហ៊ុន សែន សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន រួមទាំងសម្តេចមហាបវរធិបតី ហ៊ុន ម៉ាណែត ជូនដល់ក្រុមគ្រួសារនៃសពវីរយុទ្ធជន ថែមទាំងអរគុណដល់សមាជិកក្រុមគ្រួសារវីរយុទ្ធជនដែលជាកម្លាំងគាំទ្រជួរក្រោយ ជួយទ្រទ្រង់គ្រួសារ និងធ្លាប់បានផ្តល់កម្លាំងចិត្តដល់វីរកងទ័ពឱ្យចូលរួមប្រយុទ្ធការពារបូរណភាពដែនដីយ៉ាងអង់អាចក្លាហាន។

ទន្ទឹមនឹងនេះ លោកជំទាវបណ្ឌិតថែមទាំងបាននាំយកមកជាមួយនូវអំណោយរបស់សម្តេចធិបតី និងលោកជំទាវបណ្ឌិត មានដូចជាថវិកា សម្ភារៈបរិក្ខារសម្រាប់ប្រើប្រាស់ និងគ្រឿងឧបភោគបរិភោគ ជូនដល់ក្រុមគ្រួសារនៃសព ដើម្បីជួយសម្រួលដល់ជីវភាពរស់នៅប្រចាំថ្ងៃ។

រាជរដ្ឋាភិបាលកម្ពុជាក្រោមការដឹកនាំដ៏ឈ្លាសវៃរបស់ សម្តេចមហាបវរធិតបី ហ៊ុន ម៉ាណែត ជានាយករដ្ឋមន្ត្រី បានកំពុងគិតគូរដល់ជីវភាពរស់នៅរបស់ក្រុមគ្រួសារវីរយុទ្ធជនទាំងបច្ចុប្បន្ន និងអនាគតដូចជាការផ្តល់ជូននូវទីស្នាក់អាស្រ័យ ការគិតគូរអំពីស្ថានភាពបំណុល ការរៀបចំមូលនិធិទ្រទ្រង់គ្រួសារយុទ្ធជន ការគិតគូរអំពីមុខរបរចិញ្ចឹមជីវិត និងការផ្តល់ជូននូវអាហារូបករណ៍សម្រាប់កូនៗរបស់វីរយុទ្ធជនជាដើម។

បន្ថែមពីការគិតគូរដល់ជីវភាពរបស់គ្រួសារវីរយុទ្ធជន រាជរដ្ឋាភិបាលក៏បានរៀបចំជាផ្ទះបណ្តោះអាសន្នសម្រាប់ជនភៀសសឹកស្នាក់អាស្រ័យដោយមានគិតគូរអំពីមុខរបរចិញ្ចឹមជីវិត ហើយគ្រោងនឹងប្រគល់ជូនជនភៀសសឹកនៅពេលដែលគាត់ត្រឡប់ទៅកាន់ទីលំនៅដើមវិញ ក្រោយពីការដោះស្រាយបញ្ហាព្រំដែនតាមរយៈយន្តការការទូត៕

The post លោកជំទាវបណ្ឌិត ពេជ ចន្ទមុន្នី ហ៊ុន ម៉ាណែត អញ្ជើញគោរពវិញ្ញាណក្ខន្ធ វីរយុទ្ធជនពលីក្នុងសមរភូមិការពារទឹកដី appeared first on Kampuchea Thmey Daily.

ភរិយាសម្ដេច ហ៊ុន ម៉ាណែត អរគុណយោធិនដែលលះបង់គ្រប់យ៉ាង យកជីវិតពាំងការពារអ្នកនៅជួរក្រោយ និងសង្ឃឹមថាពេលមានសន្តិភាព កងកម្លាំងត្រឡប់មកជួបជុំគ្រួសារវិញ

Ngoeul Narath — Thu, 09 Apr 2026 10:12:22 +0000

តាមរយៈគំនិតផ្ដួចផ្ដើមសរសេរសារជូនអ្នកនៅជួរមុខ ដែលកំពុងឈរជើងការពារទឹកដី ប្រជាជន ឃ្លាតឆ្ងាយ មិនបានជួបជុំគ្រួសារក្នុងពិធីបុណ្យចូលឆ្នាំថ្មី លោកជំទាវបណ្ឌិត ពេជ ចន្ទមុន្នី ហ៊ុន ម៉ាណែត បានសរសេរសារជូនកងកម្លាំង ដោយប្រើបេះដូង បង្កប់នូវពាក្យពេចន៍ដ៏មានអត្ថន័យ។ លោកជំទាវបានអរគុណកងកម្លាំងគ្រប់រូបដែលឈរជើងនៅជួរមុខ សម្រាប់ការលះបង់គ្រប់បែបយ៉ាងយកជីវិតទៅពាំងគ្រាប់ ដើម្បីការពារពលរដ្ឋរស់នៅខាងក្រោយ។ ស្ត្រីទី១ បានដាក់ក្ដីសង្ឃឹមថា នៅពេលកម្ពុជាមានសន្តិភាពពេញលេញឡើងវិញនោះ កងកម្លាំងគ្រប់រូបអាចវិលមកជួបជុំក្រុមគ្រួសារឡើងវិញ ប្រកបដោយសុភមង្គល។

ក្នុងសារសរសេរជូនកងកម្លាំងនៅជួរមុខ លោកជំទាវ ពេជ ចន្ទមុន្នី ហ៊ុនម៉ាណែត បានសរសេរដូច្នេះ៖«ជូនចំពោះបងៗ និងប្អូនៗកងទ័ព និងប៉ូលិសនៅជួរមុខ។ ជាដំបូងបងសូមអរគុណដល់បងៗ និងប្អូនៗទាំងអស់ ដែលបានលះបង់ ចាកឆ្ងាយពីក្រុមគ្រួសារ ដើម្បីការពារប្រជាពលរដ្ឋ ការពារទឹកដី និងប្រទេសមួយនេះ។ អរគុណចំពោះការលះបង់គ្រប់យ៉ាង យកជីវិតឈរពាំងការពារពួកយើងដែលនៅជួរក្រោយ។ បងសូមផ្ញើការនឹករលឹក ការស្រឡាញ់ដល់បងប្អូន ដែលនៅជួរមុខទាំងអស់។ មានពាក្យពេចន៍ជាច្រើន ដែលបងស្រីម្នាក់នេះ ចង់អរគុណដល់បងប្អូនទាំងអស់គ្នា។ បងសង្ឃឹមថា ពេលដែលប្រទេសយើងមានសុខសន្តិភាពវិញ បងប្អូនត្រឡប់មកជួបជុំគ្រួសារវិញ។ យើងអាចនឹងជួបគ្នា ហើយពាក្យពេចន៍ទាំងនោះ បងអាចប្រាប់បងប្អូនដោយផ្ទាល់។ សូមឱ្យទេវតាឆ្នាំថ្មី តាមថែរក្សាបងប្អូនឱ្យមានសុវត្ថិភាព ឆាប់បានត្រឡប់មកជួបជុំគ្រួសារវិញ។»។

សាររបស់លោកជំទាវស្រ្តីទីមួយ បានទៅដល់របស់កងកម្លាំងដែលឈរជើងនៅជួរមុខហើយ នៅថ្ងៃទី៩ ខែមេសា នេះ។ យោធិនដែលឈរជើងនៅទិសព្រះវិហារ ឈ្មោះ វី រស្មី ឱ្យដឹងតាមរយៈគណនីហ្វេសប៊ុក ថា លោកបានទទួលសំបុត្រពីលោកជំទាវ ពេជ ចន្ទមុន្នី ដែលជាសារដ៏មានអត្ថន័យ នឹករឭក និងពាក្យពេចន៍ជូនពរដល់កងកម្លាំងទាំងអស់គ្នា។ យោធិនរូបនេះ អះអាងថា បន្ទាប់ពីអានសាររបស់លោកជំទាវបណ្ឌិត ពេជ ចន្ទមុន្នី ហើយលោករំភើប ក្តុកក្តួលខ្លាំងណាស់។

យោធិន វី រស្មី បានអរគុណ និងគោរពជូនពរលោកជំទាវ ពេជ ចន្ទមុន្នី និងសម្តេច ហ៊ុន ម៉ាណែត ព្រមទាំងក្រុមគ្រួសារ និងក្រុមការងារទាំងអស់ ឱ្យជួបតែសុខសុវត្ថិភាពគ្រប់ពេលវេលា និងពរទាំងអស់បួនប្រការ អាយុ វណ្ណៈ សុខៈពលៈ។

យោធិនរូបនេះ បានផ្ដាំផ្ញើមកកាន់ពលរដ្ឋកម្ពុជា ដែលនៅជួរក្រោយថា ៖«កុំបារម្មណ៍អី ជួរមុខនឹងការពារបងប្អូនគ្រប់ៗគ្នា។»៕

ដោយ៖ ង៉ិល ណារ៉ាត់

The post ភរិយាសម្ដេច ហ៊ុន ម៉ាណែត អរគុណយោធិនដែលលះបង់គ្រប់យ៉ាង យកជីវិតពាំងការពារអ្នកនៅជួរក្រោយ និងសង្ឃឹមថាពេលមានសន្តិភាព កងកម្លាំងត្រឡប់មកជួបជុំគ្រួសារវិញ appeared first on Kampuchea Thmey Daily.

អំណោយរបស់ឯកឧត្តម ឌី វិជ្ជា និងលោកជំទាវ ហ៊ុន ម៉ាណា ត្រូវបាននាំយកទៅប្រគល់ជូនកងទ័ពជួរមុខទិសខេត្តព្រះវិហារ

Ken Malis — Sun, 22 Feb 2026 03:25:55 +0000

កាលពីថ្ងៃទី២១ ខែកុម្ភៈ ឆ្នាំ២០២៦ ឯកឧត្តមឧត្ដមសេនីយ៍ឯក ឌី វិជ្ជា អគ្គស្នងការរងនគរបាលជាតិ និងជំទាវ ហ៊ុន ម៉ាណា បានផ្តល់អំណោយចាំបាច់មួយចំនួនធំ ជូនដល់កងទ័ពជួរមុខទិសខេត្តព្រះវិហារ ដែលកំពុងឈរជើងការពារទឹកដី។

អំណោយរបស់ឧត្តមសេនីយ៍ឯក ឌី វិជ្ជា និងលោកជំទាវ ហ៊ុន ម៉ាណា ត្រូវបានលោកឧត្តមសេនីយ៍ទោ ហួត សុធី ស្នងការនគរបាលខេត្តខេត្តសៀមរាប ដឹកជញ្ជូនយកទៅប្រគល់ជូនដល់ដៃកងទ័ពជួរមុខ។ អំណោយទាំងនោះ រួមមាន អង្ករ ៥០ការុង ទឹកបរិសុទ្ធចំនួន ៣០០កេស ភេសជ្ជៈ ៥កេស ធុងទឹកចំនួន១០ ចំណុះ ២០០០លីត្រ ដុំសម្រាប់ប្រើប្រាស់អ៊ីនធឺណិតចំនួន១ និងវិទ្យុទាក់ទងចំនួន១ផងដែរ។

ក្នុងនោះឱកាសនោះដែរ តំណាងកងទ័ពជួរមុខ បានថ្លែងអំណរគុណជ្រាលជ្រៅចំពោះទឹកចិត្តរបស់ឧត្តមសេនីយ៍ឯក ឌី វិជ្ជា និងលោកជំទាវ ហ៊ុន ម៉ាណា ដែលតែងតែងនឹករលឹកដល់សុខទុក្ខរបស់កងទ័ព ក៏ដូចជាកងនគរបាលនៅតាមបន្ទាត់ព្រំដែន ហើយបានផ្តល់អំណោយជាពិសេសទឹកបរិសុទ្ធ ដើម្បីបំពេញការប្រើប្រាស់របស់កងទ័ពនៅក្នុងរដូវក្តៅនេះផងដែរ៕

ដោយ៖ ជុន កុសល

The post អំណោយរបស់ឯកឧត្តម ឌី វិជ្ជា និងលោកជំទាវ ហ៊ុន ម៉ាណា ត្រូវបាននាំយកទៅប្រគល់ជូនកងទ័ពជួរមុខទិសខេត្តព្រះវិហារ appeared first on Kampuchea Thmey Daily.

យោធាថៃចាប់ខ្លួនយុវជនខ្មែរម្នាក់ ចូលទៅយកឯកសារនៅក្នុងផ្ទះរបស់ខ្លួន ដែលថៃឈ្លានពាននៅតំបន់បឹងត្រកួន

កម្ពុជាថ្មី — Wed, 14 Jan 2026 08:09:28 +0000

ប៉ោយប៉ែត៖យោធាថៃបានឃាត់ខ្លួនយុវជនខ្មែរម្នាក់ ដែលចូលទៅក្នុងលំនៅដ្ឋានរបស់ខ្លួនក្នុងដែនដែលថៃបានឈ្លានពានដាក់កុងទីន័រ និងរាយបន្លាលួសហ៊ុំព័ទ្ធយកនៅតំបន់បឹងត្រកួនស្ថិតនៅក្នុងឃុំគោករមៀតស្រុកថ្មពួកខេត្តបន្ទាយមានជ័យ ក្រោយបទឈប់បាញ់នៃជម្លោះព្រំដែនកម្ពុជាថៃក្នុងអំឡុងខែធ្នូ ឆ្នាំ២០២៥។

យុវជនដែលយោធាថៃបានឃាត់ខ្លួនមានឈ្មោះ ផល ប៉ោង ហៅមាស ដាលីន ភេទប្រុស អាយុ២៩ឆ្នាំ រស់នៅភូមិបន្ទាយមានរិទ្ធ ឃុំគោករមៀត ស្រុកថ្មពួក ខេត្តបន្ទាយមានជ័យមានឪពុកឈ្មោះមាស ឡេង ត្រូវបានយោធាថៃចាប់បញ្ជូនទៅកាន់ខេត្តស្រះកែវប្រទេសថៃកាលពីម៉ោង ៨៖០០នាទីថ្ងៃ ទី១៣ ខែមករា ឆ្នាំ២០២៦ នៅចំណុចខាងត្បូងផ្សារបឹងត្រកួន ភូមិផ្លូវបំបែក ឃុំគោករមៀត។តាមបុរស ឈ្មោះ មាស ឡេង ត្រូវជាឪពុកបានឱ្យដឹងថា មុនពេលកើតហេតុរូបគាត់បានដឹកកូនតាមម៉ូតូទៅឈប់ត្រង់រង្វង់មូលផ្លូវចូលច្រកតំបន់បឹងត្រកួន ឱ្យកូនចុះដើរចូលទៅផ្ទះយកឯកសារដោយរូបគាត់មិនហានចូលដោយចាំយូរពេកទើបដឹងថា កូនត្រូវយោធាថៃចាប់។

លោកបានបន្តថា មុនមានសង្រ្គាមរូបគាត់នឹងគ្រួសារប្រពន្ធកូនបានជម្លៀសទៅនៅខេត្តសៀមរាបជាមួយផ្ទះបងប្អូនមិនបានស្នាក់នៅតាមមណ្ឌលភៀសសឹកឡើយ។លុះថ្ងៃទី១៣ខែមករា ឆ្នាំ ២០២៦ក៏មកផ្ទះដែលត្រូវយោធាថៃដាក់កុងទីន័ររាយបន្លាលួសព័ទ្ធយកមិនអាចចូលបានក៏ឱ្យកូនចូល។ ដោយឡែកបើតាមលោក នៃ ពៅ មេឃុំគោករមៀតបានឱ្យដឹងថា ក្រោយទទួលបានព័តមានពីការឃាត់ខ្លួនពលរដ្ឋខ្មែរ ដោយយោធាថៃនៅចំណុចតំបន់បឹងត្រកួនដែលថៃហ៊ុំព័ទ្ធយកលោកបានស្រាវជ្រាវរកគ្រួសារមកសួរនាំបញ្ជក់ថា ពិតជាមានការចាប់មែនលើពលរដ្ឋរបស់គាត់មានផ្ទះនៅក្នុងភូមិបន្ទាយមានរិទ្ធ ហើយអាជ្ញាធរភូមិឃុំស្រុក កំពុងរៀបចំឯកសារដើម្បីឱ្យខាងទំនាក់ទំនងទាក់ទងទៅខាងថៃសុំឱ្យដោះលែងមកវិញ៕

ដោយ៖ អពៅ

The post យោធាថៃចាប់ខ្លួនយុវជនខ្មែរម្នាក់ ចូលទៅយកឯកសារនៅក្នុងផ្ទះរបស់ខ្លួន ដែលថៃឈ្លានពាននៅតំបន់បឹងត្រកួន appeared first on Kampuchea Thmey Daily.

សមាគមអៃរាវត្តា និងសប្បុរសជន ចែកអំណោយជូនពលរដ្ឋ ២០០ គ្រួសារ និងកងទ័ពកម្ពុជា នៅខេត្តព្រះវិហារ

អ៊ិន ពិសី — Sun, 11 Jan 2026 03:39:21 +0000

សមាគមអៃរាវត្តា រួមជាមួយ ក្រុមហ៊ុនមេគង្គណិត MékongNet , សមាគមអាជីវកម្មកម្ពុជា-វៀតណាម (Vietnam-Cambodia Business Association) , សមាគមបារាំង សប្បុរសធម៌បន្ទាន់ Urgence Humanitaire , មូលនិធិសប្បុរសធម៌ទ្រទ្រង់វីរកងទ័ព និងជនភៀសសឹកដោយក្រុមហ៊ុន មុទិតា ត្រេឌីង , ភោជនីយដ្ឋានដើមចំប៉ា ព្រមទាំងសប្បុរសជនជាច្រើនទៀត បានរួមគ្នានាំយកអំណោយចែកជូនប្រជាពលរដ្ឋចំនួន ២០០ គ្រួសារ នៅភូមិធម្មជាតិសម្តេចតេជោ ឃុំស្រអែម ស្រុកជាំក្សាន្ត ខេត្តព្រះវិហារ។

តំណាងឱ្យសប្បុរសធម៌ដែលបានឧបត្ថម្ភទាំងថវិកា និងស្បៀងអាហារ លោកស្រី ខៃ ចិន្តា ប្រធានសមាគមអភិរក្សដំរីខ្មែរ អៃរាវត្តា បាននាំយកអង្ករ និងគ្រឿងឧបភោគបរិភោគសរុបប្រមាណ ១១ តោន ដើម្បីចែកជូនដល់កងទ័ពកម្ពុជានៅជួរមុខ ជនភៀសសឹកក្នុងជំរំ និងប្រជាពលរដ្ឋដែលនៅតែអត់ធ្មត់រស់នៅក្នុងភូមិកំណើត ដោយមិនបានរត់ចេញពីលំនៅឋាន ក្នុងអំឡុងពេលមានការវាយប្រហារពីចោរសៀមឈ្លានពាន កាលពីខែធ្នូ កន្លងទៅ។

នេះជាលើកទី ៣ ហើយ ដែលលោកស្រី ខៃ ចិន្តា បានចុះទៅចែកអំណោយដោយផ្ទាល់នៅតំបន់នេះ។ ក្នុងដំណើរនោះ លោកស្រីមានស្វាមី និងកូនៗ អមដំណើរ រួមជាមួយប្រធានសមាគម Urgence Humanitaire សប្បុរសធម៌បន្ទាន់ ក្រុមការងារតំណាងម្ចាស់ជំនួយ និងសប្បុរសជនផ្សេងៗ។ អំណោយដែលបានចែកជូន រួមមាន ថ្នាំពេទ្យ អង្ករ មី អំបិល ស្ករស ខ្ទឹមស ឆៃប៉ូវ ត្រីប្រឡាក់ ទឹកស៊ីអ៊ីវ ទឹកត្រី ត្រីខ សៀងឆា សាប៊ូ នំស្ករគ្រាប់ បារី ថ្នាំប៉ូវ និងអាហារសម្រាប់ទាហាន ទឹកសុទ្ធ សម្លៀកបំពាក់កុមារ និងសម្ភារៈសិក្សា ជាច្រើនប្រភេទទៀត។

ថ្វីត្បិតតែអំណោយទាំងនេះ មិនអាចប្រៀបធៀបទៅនឹងតម្រូវការពិតប្រាកដរបស់ជនភៀសសឹក និងកងទ័ពកម្ពុជានៅជួរមុខបានទាំងស្រុងក្តី ប៉ុន្តែទឹកចិត្តសប្បុរស និងក្តីស្រឡាញ់ដែលផ្តល់ជូន គឺមានតម្លៃយ៉ាងធំធេង មិនអាចវាស់វែងបាន។

គួររំលឹកថា កាលពីចុងខែធ្នូ កន្លងទៅ សមាគមអៃរាវត្តា ក៏បានឧបត្ថម្ភថវិកាចំនួន ៥,០០០ ដុល្លារអាមេរិក ដើម្បីជួយគាំទ្រដល់សមរភូមិមុខ និងជនភៀសសឹក នៅវិមាន ៧ មករា ផងដែរ។

សមាគមអៃរាវត្តា បានបញ្ជាក់ថា ក្រៅពីបេសកកម្មអភិរក្សសត្វដំរី ដែលជាសត្វកម្រ សមាគម ក៏ចូលរួមសកម្មក្នុងការងារសប្បុរសធម៌សង្គមផងដែរ។ ទោះជាប្រឈមនឹងការលំបាកផ្នែកហិរញ្ញវត្ថុក៏ដោយ សមាគម នៅតែបន្តខិតខំស្វែងរកជំនួយ ដើម្បីគាំទ្រកងទ័ពកម្ពុជា ដែលជាវីរជនដ៏ក្លាហាន បានបូជាជីវិតការពារបូរណភាពទឹកដីជាតិ។

ជាមួយគ្នានេះ សមាគមអៃរាវត្តា ក៏បានអំពាវនាវ និងសូមស្វាគមន៍ដល់សប្បុរសជនទាំងអស់ ដែលមានបំណងចូលរួមជួយឧបត្ថម្ភ និងរួមដៃជាមួយសមាគម ក្នុងការងារមនុស្សធម៌ នាពេលបន្តទៀត៕

The post សមាគមអៃរាវត្តា និងសប្បុរសជន ចែកអំណោយជូនពលរដ្ឋ ២០០ គ្រួសារ និងកងទ័ពកម្ពុជា នៅខេត្តព្រះវិហារ appeared first on Kampuchea Thmey Daily.

ក្នុងស្មារតីរួម «ខ្មែរតែមួយ» ក្រសួងការងារ ប្រគល់អំណោយ ជូនដល់វីរកងទ័ព និងជនភៀសសឹកនៅខេត្តបន្ទាយមានជ័យ

Sous Sith — Sat, 13 Dec 2025 10:03:14 +0000

ក្នុងស្មារតីរួម «ខ្មែរតែមួយ» ជួយគ្នាក្នុងគ្រាអាសន្ន លោក ហេង សួរ រដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈ បានចាត់តាំងក្រុមការងារនាំយកអំណោយ ទៅប្រគល់ជូនរដ្ឋបាលខេត្តបន្ទាយមានជ័យ នៅរសៀលថ្ងៃទី១៣ ខែធ្នូ ឆ្នាំ២០២៥នេះ។

ដូចគ្នានឹងខេត្តឧត្តរមានជ័យដែរ ការបន្តនាំយកជំនួយសប្បុរសធម៌ជូនដល់រដ្ឋបាលខេត្តនាពេលនេះ គឺសម្រាប់ចាត់ចែងចែងជូនដល់ វីរកងទ័ព ដ៏អង់អាចក្លាហាន ដែលកំពុងឈរជើងនៅសមរភូមិជួរមុខ និងបងប្អូនជនភៀសសឹក ដែលរងគ្រោះដោយសារសង្គ្រាមឈ្លានពានដ៏ឃោរឃៅពីសំណាក់យោធាថៃ។

អំណោយទាំងអស់នេះ បានមកពីការចូលរួមចំណែកបរិច្ចាគពីថ្នាក់ដឹកនាំក្រសួង មន្ត្រីរាជការគ្រប់លំដាប់ថ្នាក់ ម្ចាស់រោងចក្រ សហគ្រាស ក្រុមហ៊ុន សហជីព និងបងប្អូនកម្មករនិយោជិត ដែលជាការបង្ហាញនូវកម្លាំងសាមគ្គីជាតិដ៏រឹងមាំ។

ក្នុងជំនួយដ៏សន្ធឹកសន្ធាប់នេះ រួមមាន៖ ខ្ទឹមស ចំនួន ៣ តោន, ថ្នាំ Berocca ចំនួន ៥,០០០ ទីប (សម្រាប់ជំនួយសុខភាព) និង ភេសជ្ជៈ ចំនួន ២,០០០ កេស។

អំណោយទាំងនេះ គឺជាការឆ្លើយតបចំពោះការលំបាក និងការខ្វះខាតជាច្រើនដែលកម្ពុជាកំពុងប្រឈមមុខ ដោយសារការវាយប្រហារពីយោធាថៃ។ តាមរយៈការគិតគូរចំពោះទុក្ខលំបាករបស់វីរកងទ័ព និងជនភៀសសឹកនេះ លោករដ្ឋមន្ត្រី ហេង សួរ បានបង្ហាញនូវ ស្មារតីជាតិនិយម ស្របតាមការអំពាវនាវរបស់ថ្នាក់ដឹកនាំប្រទេស និងប្រជាពលរដ្ឋខ្មែរ ដើម្បីរួមគ្នាបន្ធូរបន្ថយបន្ទុកនៃការរស់នៅប្រចាំថ្ងៃរបស់បងប្អូននៅតំបន់សមរភូមិមុខ៕

The post ក្នុងស្មារតីរួម «ខ្មែរតែមួយ» ក្រសួងការងារ ប្រគល់អំណោយ ជូនដល់វីរកងទ័ព និងជនភៀសសឹកនៅខេត្តបន្ទាយមានជ័យ appeared first on Kampuchea Thmey Daily.

ថៃឈ្លានពានជាថ្មី រដ្ឋបាលរាជធានីអំពាវនាវឱ្យចូលរួមផ្តល់អំណោយជូនវីរកងទ័ពជួរមុខ និងជនភៀសសឹក

Samean Lay — Tue, 09 Dec 2025 04:28:25 +0000

រដ្ឋបាលរាជធានីភ្នំពេញ អំពាវនាវដល់ឯកឧត្តម លោកអ្នកឧកញ៉ា អ្នកឧកញ៉ា ឧកញ៉ា លោកជំទាវ អស់លោក លោកស្រី ជាពាណិជ្ជករ សិប្បករ វិនិយោគិន និងសប្បុរសជន អភិបាលខណ្ឌ ប្រធានមន្ទីរ-អង្គភាពចំណុះ ព្រមទាំងប្រជាពលរដ្ឋទាំងអស់ មេត្តាចូលរួមបរិច្ចាគអំណោយជា ថវិកា ស្បៀងអាហារ គ្រឿងឧបភោគបរិភោគ សម្ភារប្រើប្រាស់ផ្សេងៗ ឬថ្នាំពេទ្យតាមលទ្ធភាព និងសទ្ធាជ្រះថ្លារៀងៗខ្លួន ដើម្បីយកទៅចែកជូនវីរកងទ័ព និងជនភៀសសឹក។

រដ្ឋបាលរាជធានីភ្នំពេញ នឹងរៀបចំទទួលនូវអំណោយគ្រប់ប្រភេទទាំងថវិកា ស្បៀងអាហារ គ្រឿងឧបភោគ បរិភោគ សម្ភារប្រើប្រាស់នានា ព្រមទាំងថ្នាំពេទ្យ ដើម្បីយកទៅចែកជូនដល់វីរកងទ័ពជួរមុខ ដែលបាននឹងកំពុងខិតខំ តស៊ូការពារបន្ទាត់ព្រំដែនកម្ពុជាយ៉ាងអង់អាចក្លាហាន ប្រឆាំងនឹងសត្រូវឈ្លានពាន ប្រកបដោយស្មារតី ស្នេហាជាតិមាតុភូមិ និងចែកជូនជនភៀសសឹកផងដែរ។

សេចក្តីអំពាវនាវរបស់រដ្ឋបាលរាជធានីភ្នំពេញបញ្ជាក់ថា៖« ក្នុងបុព្វហេតុមនុស្សធម៌ដើម្បីចូលរួមគាំទ្រ និងលើកទឹកចិត្តដល់វីរកងទ័ពជួរមុខកម្ពុជា ដែលបាននិងកំពុងប្រយុទ្ធយ៉ាងអង់អាចក្លាហាន ដើម្បីការពារបូរណភាពទឹកដី តតាំងជាមួយកងកម្លាំងប្រដាប់អាវុធថៃ ដែលនៅតែចិញ្ចឹមចិត្តឈ្លានពានមកលើដែនអធិបតេយ្យភាពរបស់កម្ពុជាម្តងហើយម្តងទៀតឥតឈប់ឈរ រដ្ឋបាលរាជធានីភ្នំពេញ នឹងរៀបចំទទួលនូវអំណោយគ្រប់ប្រភេទ»។

រដ្ឋបាលរាជធានីភ្នំពេញ សង្ឃឹមជឿជាក់លើស្មារតី និងទឹកចិត្តសប្បុរសធម៌របស់ប្រជាពលរដ្ឋខ្មែរ ដែលមានវប្បធម៌នៃការចែករំលែកក្នុងស្មារតី ភាតរភាពរបស់ប្រជាជាតិខ្មែរយើងដែលជាខឿនការពារជាតិ។

អំណោយទាំងអស់ សូមមេត្តាយកមកប្រគល់ជូននៅសាលារាជធានីភ្នំពេញ អគារលេខ៦៩ មហាវិថី ព្រះមុនីវង្ស សង្កាត់ស្រះចក ខណ្ឌដូនពេញ រាជធានីភ្នំពេញ រៀងរាល់ថ្ងៃ ឬបង្វែរតាមគណនីធនាគារ ABA របស់រដ្ឋបាលរាជធានីភ្នំពេញ៖ PHNOM PENH CAPITAL HALL លេខ៖ 599 778 899 (KHR) និងលេខ៖ 399 778 899 (USD)។

សូមរំលឹកថា កាលពីថ្ងៃទី ២៩ ខែកក្ដដា ឆ្នាំ២០២៥ រដ្ឋបាលរាជធានីភ្នំពេញ បាននាំយកអំណោយរបស់សប្បុរសជន ជាសម្ភារ បរិក្ខារ គ្រឿងឧបភោគ បរិភោគ ចំនួន៦៥មុខ ប្រគល់ជូនវីរកងទ័ពជួរមុខ និងពលរដ្ឋភៀសសឹក ដែលរងផលប៉ះពាល់ចំនួន៤ស្រុក ស្មើ២៤ឃុំ ជាង១ម៉ឺនគ្រួសារ ស្មើជាង៣ម៉ឺននាក់ ស្ថិតនៅទីតាំងកន្លែងសុវត្ថិភាពស្រុកអន្លង់វែង ខេត្ដឧត្ដមានជ័យ៕

ដោយ៖ ស្រីរ័ត្ន

The post ថៃឈ្លានពានជាថ្មី រដ្ឋបាលរាជធានីអំពាវនាវឱ្យចូលរួមផ្តល់អំណោយជូនវីរកងទ័ពជួរមុខ និងជនភៀសសឹក appeared first on Kampuchea Thmey Daily.

លោក ម៉ប់ សារិន នាំយកអំណោយសម្តេចធិបតី និងលោកជំទាវ ចែកជូនសមាជិកកងទ័ព

Samean Lay — Sun, 23 Nov 2025 03:08:26 +0000

ប្រធានគណៈប្រចាំការគណបក្សប្រជាជនកម្ពុជារាជធានីភ្នំពេញលោក ម៉ប់ សារិន តំណាង លោក ឃួង ស្រេង ប្រធានគណៈកម្មាធិការគណបក្សប្រជាជនកម្ពុជារាជធានីភ្នំពេញ កាលពីព្រឹកថ្ងៃទី២២ ខែវិច្ឆិកា ឆ្នាំ២០២៥នេះ បានអញ្ជើញចុះសួរសុខទុក្ខ និងសំណេះសំណាលជាមួយប្រជាពលរដ្ឋរស់នៅមូលដ្ឋានខណ្ឌកំបូល រាជធានីភ្នំពេញ ដែលជាខណ្ឌទី១៤ មានប្រជាពលរដ្ឋចំនួន ២៨៧ គ្រួសារនិងមានសមាជិកធ្វើកងទ័ពកំពុងឈរជើងប្រយុទ្ធនៅសមរភូមិមុខការពារសត្រូវឈ្លានពានសរុបចំនួន ២៩៦នាក់ ។

នៅក្នុងឱកាសនោះដែរ លោក ម៉ប់ សារិន បាននាំយកអំណោយរបស់សម្ដេចមហាបវរធិបតី ហ៊ុន ម៉ាណែត និងលោកជំទាវបណ្ឌិត ពេជ ចន្ទមុន្នី តាមរយៈលោក ឃួង ស្រេង យកទៅចែកជូនបងប្អូនប្រជាពលរដ្ឋទៅតាមចំនួនសមាជិកគ្រួសារដែលបានចូលធ្វើកងទ័ពក្នុងម្នាក់ៗថវិកា ៤០ម៉ឺនរៀល អង្ករ ៥០គីឡូក្រាម និងមី ២កេស។ លោកម៉ប់ សារិន បានបញ្ជាក់ថា៖« សម្តេចមហាបវរធិបតី ហ៊ុន ម៉ាណែត និងលោកជំទាវបណ្ឌិត តែងតែយកចិត្តទុកដាក់គិតគូរចំពោះ ជីវភាពរស់នៅរបស់កងទ័ពនិងគ្រួសារកងទ័ពនៅសមរភូមិមុខក្នុងការលះបង់ដើម្បីការពារបូរណៈភាពទឹកដី»។

ការផ្តល់អំណោយនេះមិនមែនជាលើកទី១នោះទេ ជាបន្តបន្ទាប់កាលពីព្រឹកថ្ងៃទី២១ ខែវិច្ឆិកា ឆ្នាំ២០២៥លោក ម៉ប់ សារិន បានអញ្ជើញចុះសួរសុខទុក្ខ និងសំណេះសំណាលជាមួយប្រជាពលរដ្ឋរស់នៅមូលដ្ឋានខណ្ឌច្បារអំពៅ ដែលជាខណ្ឌទី១៣ មានចំនួន ៧៤គ្រួសារ ដែលមានសមាជិកធ្វើកងទ័ពកំពុងឈរជើងប្រយុទ្ធនៅសមរភូមិមុខជាមួយកងកម្លាំងឈ្លានពានប្រទេសថៃ សរុបចំនួន ៧៦នាក់ ។

កាលថ្ងៃទី១៩ ខែវិច្ឆិកា ឆ្នាំ២០២៥ លោក ម៉ប់ សារិន បានអញ្ជើញចុះសួរសុខទុក្ខ និងសំណេះសំណាលជាមួយប្រជាពលរដ្ឋរស់នៅមូលដ្ឋានខណ្ឌពោធិ៍សែនជ័យ ដែលជាខណ្ឌទី១២ មានចំនួន ១៣១គ្រួសារ ដែលមានសមាជិកធ្វើកងទ័ពកំពុងឈរជើងប្រយុទ្ធនៅសមរភូមិមុខជាមួយកងកម្លាំងឈ្លានពានប្រទេសថៃ សរុបចំនួន ១៣៨នាក់។

កាលពីរសៀលថ្ងៃទី១៨ ខែវិច្ឆិកា ឆ្នាំ២០២៥ លោក ម៉ប់ សារិន ប្រធានគណៈប្រចាំការគណបក្សប្រជាជនកម្ពុជារាជធានីភ្នំពេញ បានអញ្ជើញចុះសួរសុខទុក្ខ និងសំណេះសំណាលជាមួយប្រជាពលរដ្ឋរស់នៅមូលដ្ឋានខណ្ឌដង្កោ ដែលជាខណ្ឌទី១១ មានចំនួន ៦២គ្រួសារ ដែលមានសមាជិកធ្វើកងទ័ពកំពុងឈរជើងប្រយុទ្ធនៅសមរភូមិមុខជាមួយកងកម្លាំងឈ្លានពានប្រទេសថៃ សរុបចំនួន ៦៨នាក់៕

ដោយ៖ ស្រីរ័ត្ន

The post លោក ម៉ប់ សារិន នាំយកអំណោយសម្តេចធិបតី និងលោកជំទាវ ចែកជូនសមាជិកកងទ័ព appeared first on Kampuchea Thmey Daily.