កញ្ញា ទេព បូព្រឹក្ស Archives - Kampuchea Thmey Daily

ទេព បូព្រឹក្ស ស្រាប់តែប្រកាសថា នឹងមិនធ្វើឱ្យអ្នកគាំទ្រខកបំណងឡើយ បើបានឱកាសថត MV នៅប្រាសាទអង្គរវត្ត

Chan Sotheavy — Tue, 26 Sep 2023 10:09:06 +0000

អ្នកនាង ទេព បូព្រឹក្ស កំពុងចាប់អារម្មណ៍ខ្លាំងពីសាធារណជន បន្ទាប់ពីបានផុសនូវសារខ្លីមួយ ដោយបានរៀបរាប់ថា
“បើសិនជាផ្តល់ឱកាសឱ្យខ្ញុំបានថត MV បទទេវរាជ និង មហានគរ នៅប្រាសាទអង្គវត្តបាន ពួកខ្ញុំនឹងមិនធ្វើឱ្យ អ្នកទាំងអស់គ្នា ខកបំណងឡើយ” ។

បើទោះបីជាមិនទាន់មានការបញ្ជាក់ពីខ្លឹមសារ នៃការផុសខាងលើក៏ដោយ តែសាធារណជន និងបុគ្គលល្បីៗមួយចំនួន បានបង្ហាញការគាំទ្រយ៉ាងពេញទំហឹង តាមរយៈការបញ្ចេញមតិយោបល់ និងចែករំលែក ដោយជឿជាក់ថា តារាប្រុសស្រី ដ៏ល្បីល្បាញលើការផលិតចម្រៀង គឺលោក ជី ដេវីដ និងអ្នកនាង ទេព បូព្រឹក្ស ពិតជាអាចធ្វើបាន។

ក្នុងនោះ មានមតិជាច្រើនលើកឡើងស្រដៀងគ្នា លើការផលិត MV បទ «ទេវរាជ» និង «មហានគរ» ដោយគណនីមួយ ឈ្មោះ Candy បញ្ចេញមតិថា “បទទាំងពីរ មានអត្ថន័យជ្រាលជ្រៅខ្លាំង ដែលបង្ហាញពីមោទនភាពប្រទេសយើង ហេតុនេះខ្ញុំគាំទ្រពេញទំហឹង នូវការផលិតបទនេះ នៅទីតាំងប្រវត្តិសាស្ត្ររបស់កម្ពុជា”។

គួរបញ្ជាក់ថា បទទាំងពីរ ដែលជាស្នាដៃនិពន្ធរបស់លោក ជី ដេវីដ សុទ្ធតែទទួលបានការចាប់អារម្មណ៍ខ្លាំង នៅលើបណ្តាញទំនាក់ទំនងសង្គម និងបទមួយក្នុងចំណោមនោះ ធ្លាប់ក្លាយជាប្រធានបទជជែកវែកញែកដ៏ក្តៅគគុក រវាងបណ្ឌិត និងសាធារណជនមួយចំនួន។ ហើយនៅថ្ងៃនេះ អ្នកនាង ទេព បូព្រឹក្ស ស្រាប់តែផុសសំណេរនេះឡើង បង្កឱ្យមានការចាប់អារម្មណ៍ជាថ្មីម្តងទៀត ប៉ុន្តែមិនមានការបញ្ជាក់ទេថា បទទាំងពីរ នឹងត្រូវបានថតនៅទីតាំងនោះឬអត់៕

The post ទេព បូព្រឹក្ស ស្រាប់តែប្រកាសថា នឹងមិនធ្វើឱ្យអ្នកគាំទ្រខកបំណងឡើយ បើបានឱកាសថត MV នៅប្រាសាទអង្គរវត្ត appeared first on Kampuchea Thmey Daily.

ស្ងាត់ៗតារាចម្រៀងរ៉េប ជី ដេវីត និង ទេព បូព្រឹក្ស លេចវត្តមានក្នុងកម្មវិធី Fashion Week Spring/ Summer 2024 នៅប្រទេសអ៊ីតាលី

Sophal Tuon — Sun, 24 Sep 2023 04:34:24 +0000

លោក ជី ដេវីត និងអ្នកនាង ទេព បូព្រឹក្ស បានលេចវត្តមានក្នុងកម្មវិធី Fashion Week Spring/ Summer 2024 នៅឯទីក្រុងមីឡាន ប្រទេសអ៊ីតាលី។ នេះបើយោងទៅតាមការបង្ហោះនៅលើបណ្ដាញសង្គមរបស់អ្នកទាំងពីរ នៅថ្ងៃទី២៣ ខែកញ្ញា ឆ្នាំ២០២៣។

តារាចម្រៀងរ៉េប ជី ដេវីត និងអ្នកនាង ទេព បូព្រឹក្ស ត្រូវបានប្រេន D&G អញ្ជើញអ្នកទាំងពីរ ជាភ្ញៀវកិត្តិយសឲ្យចូលរួមក្នុងកម្មវិធី Milan Fashion Week Spring/ Summer 2024 ដែលជាកម្មវិធី Fashion ធំបំផុតមួយប្រចាំឆ្នាំ និងមានវត្តមានតារាអន្តរជាតិល្បីៗជាច្រើន ក្នុងរដូវកាលនេះ ដូចជា Cara Delevinge, Emma Watson, Scarlet Jonhansson និង Jade Smith ជាដើម។

គួរបញ្ជាក់ផងដែរថា លោក ជី ដេវីត និងអ្នកនាងទេព បូព្រឹក្ស គឺជាតារាចម្រៀងរ៉េបខ្មែរដំបូងគេ ដែលត្រូវបានអញ្ជើញឲ្យចូលរួមកម្មវិធី Fashion Week Spring/ Summer 2024 នេះ៕

The post ស្ងាត់ៗតារាចម្រៀងរ៉េប ជី ដេវីត និង ទេព បូព្រឹក្ស លេចវត្តមានក្នុងកម្មវិធី Fashion Week Spring/ Summer 2024 នៅប្រទេសអ៊ីតាលី appeared first on Kampuchea Thmey Daily.

អបអរ ទេព បូព្រឹក្ស ត្រឡប់ចូលសិល្បៈវិញ និងក្លាយជាទូតសុច្ឆន្ទៈផ្លូវការរបស់ភេសជ្ជៈប៉ូវកម្លាំងគ្រុឌ និងភេសជ្ជៈវី-អាកទីវ

អ៊ិន ពិសី — Sun, 17 Sep 2023 04:37:53 +0000

ស្វាគមន៍កំពូលសិល្បការិនីចម្រៀងរ៉េបដ៏មានប្រជាប្រិយភាព ទេព បូព្រឹក្ស ក្នុងការត្រឡប់មកចូលវិស័យសិល្បៈវិញ ជាមួយរសអារម្មណ៍តន្ត្រីបែបថ្មី បទចម្រៀងថ្មី ស្តាយ៍ប្លែក និងត្រូវបានប្រកាសជាទូតសុច្ឆន្ទៈផ្លូវការរបស់ភេសជ្ជៈប៉ូវកម្លាំងគ្រុឌ និងភេសជ្ជៈវី-អាកទីវ នៅក្នុងកម្មវិធីប្រគំតន្ត្រី “NEW ERA” ដែលប្រព្រឹត្តទៅនៅ ដឹព្រីមៀម សេនធ័រ សែនសុខ នាល្ងាចថ្ងៃទី ១៦ ខែកញ្ញា ឆ្នាំ ២០២៣។

ពិធីចុះកិច្ចសន្យានេះក៏មានការចូលរួមពីអ្នកឧកញ៉ា សំអាង វឌ្ឍនៈ អគ្គនាយកក្រុមហ៊ុន វឌ្ឍនៈ ប្រ៊ូវើរី សិល្បករ សិល្បការិនី បវរកញ្ញាកម្ពុជា រួមទាំងហ្វេនៗជាច្រើនដែលមានវត្តមានធ្វើជាសក្ខីភាព នៃការចុះហត្ថលេខា ព្រមទាំងមានការចាក់បង្ហាញនូវវីដេអូស្ពតពាណិជ្ជកម្មថ្មីរបស់ភេសជ្ជៈប៉ូវកម្លាំងគ្រុឌ ដែលចូលរួមសម្តែងលើកដំបូងពីសំណាក់សិល្បការិនីចម្រៀងរ៉េប ទេព បូព្រឹក្ស យ៉ាងរស់រវើក និងពោរពេញដោយថាមពល។

ក្នុងឱកាសនោះផងដែរ ទេព បូព្រឹក្ស ក៏បានបង្ហាញនូវអារម្មណ៍ដ៏រំភើបរីករាយ ជាពិសេសដែលបានសហការជាមួយក្រុមហ៊ុន វឌ្ឍនៈ ប្រ៊ូវើរី ដើម្បីបង្កើត និងនាំយកនូវភាពសប្បាយរីករាយអស្ចារ្យក្នុងកម្មវិធីប្រគំតន្ត្រី “NEW ERA” ដែលរៀបចំឡើងជាកិច្ចស្វាគមន៍រូបគាត់ សម្រាប់ការត្រឡប់មកវិញ ក្រោយពេលសម្រាកពីសិល្បៈមួយរយៈ ព្រមទាំងបង្ហាញពីការត្រៀមខ្លួនរួចជាស្រេចសម្រាប់កម្មវិធីដ៏អស្ចារ្យជាច្រើនទៀតជាមួយ វឌ្ឍនៈ ប្រ៊ូវើរី បន្តបន្ទាប់ក្នុងពេលឆាប់ៗខាងមុខនេះ។

ដើម្បីស្វាគមន៍វត្តមានរបស់សិល្បការិនីចម្រៀងរ៉េប ទេព បូព្រឹក្ស ចូលមកកាន់គ្រួសារ វឌ្ឍនៈ ប្រ៊ូវើរី អ្នកឧកញ៉ា សំអាង វឌ្ឍនៈ មានប្រសាសន៍ថា “ទេព បូព្រឹក្ស គឺជាសិល្បការិនីមួយរូប ដែលមានទេពកោសល្យ មានឆន្ទៈមោះមុត មានភាពឆ្លាតវៃ និងចេះអភិវឌ្ឍន៍សមត្ថភាពខ្លួនបានយ៉ាងល្អក្នុងវិថីសិល្បៈ ដែលតែងតែនាំមកនូវភាពអស្ចារ្យ ភាពភ្ញាក់ផ្អើល ភាពច្នៃប្រឌិតថ្មី ប្លែកក្នុងការផលិតបទចម្រៀងទាំងបទបែបមនោសញ្ចេតនា និងបទបែបហ៊ីបហបមកអង្រួនបេះដូងយុវវ័យសម័យថ្មី”។

អ្នកឧកញ៉ា បានបន្តទៀតថា “ទេព បូព្រឹក្ស តែងផ្តោតសំខាន់លើការផលិតបទចម្រៀងដែលមានគុណភាព ដែលឆន្ទៈបែបហ្នឹង គឺស្របតាមឆន្ទៈរបស់ វឌ្ឍនៈ ប្រ៊ូវើរី ដែលតែងតែផលិតនូវផលិតផលដែលមានរសជាតិ និងគុណភាពទទួលស្គាល់លំដាប់ពិភពលោក សម្រាប់អតិថិជនយើងនៅគ្រប់ទិសទី ដូច្នេះហើយការសហការរវាង វឌ្ឍនៈ ប្រ៊ូវើរី និង ទេព បូព្រឹក្ស នឹងនាំអ្វីអស្ចារ្យសម្រាប់រូបគាត់ផ្ទាល់ ក៏ដូចជាភេសជ្ជៈប៉ូវកម្លាំងគ្រុឌ និងភេសជ្ជៈ វី-អាកទីវ របស់យើង”។

គួរបញ្ជាក់ថា ថវិកាទាំងអស់ដែលទទួលបានពីការលក់សំបុត្រចូលរួមក្នុងកម្មវិធីប្រគំតន្ត្រី “NEW ERA” ដែលរៀបចំជាពិសេសដោយក្រុមហ៊ុន វឌ្ឍនៈ ប្រ៊ូវើរី សហការជាមួយសិល្បការិនីចម្រៀងរ៉េប ទេព បូព្រឹក្ស នឹងយកបរិច្ចាគជួយទៅដល់មន្ទីរពេទ្យកុមារអង្គរ ដែលនេះបង្ហាញពីទឹកចិត្តដ៏សប្បុរស និងការចូលរួមដ៏សំខាន់ក្នុងការជួយដល់សង្គមជាតិ ដែលនៅក្រុមហ៊ុន វឌ្ឍនៈ ប្រ៊ូវើរី តែងតែធ្វើនាពេលកន្លងមក៕

The post អបអរ ទេព បូព្រឹក្ស ត្រឡប់ចូលសិល្បៈវិញ និងក្លាយជាទូតសុច្ឆន្ទៈផ្លូវការរបស់ភេសជ្ជៈប៉ូវកម្លាំងគ្រុឌ និងភេសជ្ជៈវី-អាកទីវ appeared first on Kampuchea Thmey Daily.

ទេព បូព្រឹក្ស ប្រកាសបរិច្ចាគថវិកាបានមកពីការលក់សំបុត្រប្រគំតន្ត្រី ជួយមន្ទីរពេទ្យកុមារអង្គរ

អ៊ិន ពិសី — Fri, 08 Sep 2023 09:12:03 +0000

ក្រោយស្ងប់ស្ងាត់បាត់វត្តមានពីវិថីសិល្បៈមួយរយៈធំ តារាចម្រៀងអ្នកនាង ទេព បូព្រឹក្ស ថ្មីៗនេះ បានប្រកាសវិលចូលច្រៀងនៅតាមឆាកប្រគំតន្ត្រីឡើងវិញ ដើម្បីបំពេញការរង់ចាំរបស់មហាជនអ្នកគាំទ្រ។

ការប្រកាសវិលមករកឆាកតន្ត្រីពីសំណាក់អ្នកម៉ាក់វ័យក្មេង ទេព បូព្រឹក្ស នេះដែរ នាងក៏បានបញ្ជាក់ថា នៅថ្ងៃទី ១៦ ខែកញ្ញា ឆ្នាំ ២០២៣ ខាងមុខនេះ នាងនឹងបង្ហាញវត្តមានច្រៀង-សម្ដែងសម្រាប់កម្មវិធីប្រគំតន្ត្រីខ្នាតធំមួយ។ ក្នុងនោះ បូព្រឹក្ស ក៏បានប្រកាសថា ចំពោះថវិកាដែលប្រមូលបានមកពីការលក់សំបុត្រ នាងនឹងបរិច្ចាគជូនទៅមន្ទីរពេទ្យកុមារអង្គរខេត្តសៀមរាប។

តារាចម្រៀង អ្នកនាង ទេព បូព្រឹក្ស បាននិយាយថា «សម្រាប់កម្មវិធីប្រគំតន្ត្រីរបស់ខ្ញុំ នៅថ្ងៃទី ១៦ ខែកញ្ញា ខាងមុខ ដូចដែលបងប្អូនបានដឹងហើយថា ថវិកាដែលខ្ញុំទទួលបានគឺយកទៅបរិច្ចាគជូន មន្ទីរពេទ្យកុមារអង្គរនៅខេត្តសៀមរាប»។ អ្នកនាង ទេព បូព្រឹក្ស បញ្ជាក់ទៀតថា មូលហេតុដោយសារ ដើម្បីការអបអរ នៃការវិលត្រឡប់របស់នាងមកកាន់ការប្រគំតន្ត្រីឡើងវិញផង និងដើម្បីចូលរួមជួយសង្គ្រោះកុមារដែលបានមកព្យាបាលនៅមន្ទីរពេទ្យកុមារអង្គរផង។

ជាមួយគ្នា នៃសកម្មភាពមនុស្សធម៌ដែលតារាចម្រៀងល្បីអ្នកនាង ទេព បូព្រឹក្ស បានប្រកាសថា ថវិកាប្រមូលបានពីការប្រគំតន្ត្រី នឹងយកទៅឧបត្ថម្ភជួយដល់មន្ទីរពេទ្យខាងលើនោះ ក៏មានអ្នកគាំទ្រ និងមហាជនមួយចំនួន បង្ហាញការគាំទ្រ ហើយសរសើរចំពោះទឹកចិត្តរបស់តារាស្រីរូបនេះផងដែរ៕

អត្ថបទ ៖ ចាន់រ៉ា

The post ទេព បូព្រឹក្ស ប្រកាសបរិច្ចាគថវិកាបានមកពីការលក់សំបុត្រប្រគំតន្ត្រី ជួយមន្ទីរពេទ្យកុមារអង្គរ appeared first on Kampuchea Thmey Daily.

តារាចម្រៀង ៣ ដួង រងការប្រមាថមាក់ងាយកិត្តិយសពីសំណាក់បុគ្គលផឹកស៊ីស្រវឹង ក្នុងហាងរាត្រី

អ៊ិន ពិសី — Thu, 10 Aug 2023 00:25:00 +0000

ថ្មីៗនេះមហាជនសង្កេតឃើញថា មានការផ្ទុះនូវរឿងរ៉ាវដ៏រសើប និងហួសចិត្តខ្លាំង ដែលបាននិងកំពុងកើតមានសម្រាប់អ្នកសិល្បៈខ្មែរបច្ចុប្បន្ន ពិសេសអ្នកចម្រៀងធ្វើការនៅតាម ហាង ភោជនីយដ្ឋាន បារ ឬ តាមក្លឹបរាត្រីជាដើម…។

អ្នកចម្រៀងទាំងនោះ រងការប្រមាថកិត្តិយសយ៉ាងធ្ងន់ធ្ងរពីសំណាក់ភ្ញៀវ ឬ បុគ្គលដែលស្រវឹងស្រា បង្កទៅជាហិង្សា និងរឿងជេរប្រមាថមកលើពួកគេ។

កត់សម្គាល់មកដល់ពេលនេះ មានតារាចម្រៀងប្រុស-ស្រី ៣ ដួង មកហើយ ធ្លាប់រងអំពើប្រមាថខាង លើនេះ។ តារាចម្រៀង ៣ រូបនោះ រួមមាន ៖

១.តារាចម្រៀងអ្នកនាង ទេព បូព្រឹក្ស ត្រូវបានបុរសម្នាក់ជះស្រាបៀទៅលើនាង ខណៈកំពុងចម្រៀងលើឆាក ចំណុចភោជនីយដ្ឋានមួយ យីហោ«សមុទ្រ» ស្ថិតនៅជិតមន្ទីរពេទ្យកុមារជាតិ សង្កាត់ទឹកល្អក់ទី ១ ខណ្ឌទួលគោក រាជធានីភ្នំពេញ បង្កឲ្យមានការភ្ញាក់ផ្អើលអស់មហាជនស្ទើរពេញផ្ទៃប្រទេស។

២.លោក ងួន ចាន់ដេវីត ហៅ ជី ដេវីត ក៏ត្រូវបានបុរសស្រវឹងស្រាម្នាក់ គប់ទឹកកកទៅលោកពេលកំពុងច្រៀងលើឆាកក្នុងផាប់មួយកន្លែង នៅទឹកដីខេត្តព្រះសីហនុ កាលពីយប់ថ្ងៃទី ២៩ ឈានចូលថ្ងៃទី ៣០ ខែកក្កដា ឆ្នាំ ២០២៣ កន្លងទៅ បង្កការភ្ញាក់ផ្អើល។

៣.តារាចម្រៀង ស៊ឹម ថៃណា បានរងការជេរប្រមាថធ្ងន់ៗ ពីសំណាក់បុគ្គលម្នាក់ដែលស្រវឹងស្រា ស្ថិតក្នុងហាងរាត្រីមួយកន្លែង កាលពីយប់ថ្ងៃទី ០៦ ខែសីហា ឆ្នាំ ២០២៣ ថ្មីៗនេះផងដែរ។ បន្ទាប់ពីរងការប្រមាថ មកដល់ពេលនេះនាងនៅមិនទាន់ទទួលបានការសុំទោសពីបុគ្គលនោះនៅឡើយទេ។

ជុំវិញករណីតារាចម្រៀង ស៊ឹម ថៃណា រងការជេរប្រមាថធ្ងន់ៗ ពីសំណាក់បុគ្គលម្នាក់ ត្រូវប្រធានសមាគមសិល្បករខ្មែរ អ្នកនាង ចន ច័ន្ទលក្ខិណា ចេញមកអះអាងដោយបញ្ជាក់ថា បើបុគ្គលនោះមិនមកសុំទោស ថៃណា ទេនោះ អ្នកនាង នឹងស្នើទៅក្រសួងកិច្ចការនារី ដើម្បីសុំជំនួយផ្នែកច្បាប់៕

អត្ថបទ ៖ ចាន់រ៉ា

The post តារាចម្រៀង ៣ ដួង រងការប្រមាថមាក់ងាយកិត្តិយសពីសំណាក់បុគ្គលផឹកស៊ីស្រវឹង ក្នុងហាងរាត្រី appeared first on Kampuchea Thmey Daily.

ទេព បូព្រឹក្ស ប្រកាសដំណឹងមានផ្ទៃពោះ ដោយពុំធ្លាប់មានតម្រុយចូលរោងការ

អ៊ិន ពិសី — Sat, 22 Oct 2022 02:25:44 +0000

គិតមកទល់ពេលនេះការសាងចំណងស្នេហារវាងតារាចម្រៀង ទេព បូព្រឹក្ស និងតារារ៉េប G- Devith ផ្តើមឡើងដោយភាពផ្អែមល្ហែម មានរយៈពេលប្រមាណ ៦ ឆ្នាំទៅហើយ។ ប៉ុន្តែអ្នកទាំងពីរ ពុំដែលបង្ហើបពីតម្រុយ នៃការចូលរោងការម្តងណាទេ។

យ៉ាងណាមិញស្រាប់តែពេលនេះជីវិតគូស្នេហ៍តារាចម្រៀងវ័យក្មេង ១ គូនេះ បានធ្វើឲ្យអ្នកគាំទ្រ និងមហាជន មានការភ្ញាក់ផ្អើលគ្រប់គ្នា ក្រោយពេលតារាស្រី ទេព បូព្រឹក្ស ប្រកាសពីដំណឹងមានផ្ទៃពោះជាមួយ G- Devith ដោយគ្មានភាពលាក់លៀមលើបណ្ដាញសង្គមហ្វេសប៊ុកជាសាធារណៈ។

នេះជារឿងដែលអ្នកគាំទ្រស្ទើរនឹកស្មានមិនដល់ថា ពួកគេឈានដល់ដំណាក់កាលក្លាយជាឪពុក-ម្តាយគេឡើយ។

ទេព បូព្រឹក្ស បានបញ្ចេញរូបភាពមានផ្ទៃពោះភ្ជាប់ខ្លឹមសារកាលពីព្រលប់ថ្ងៃទី ២១ ខែតុលា ឆ្នាំ ២០២២ ថា អំណោយដែលមិនអាចកាត់ថ្លៃ អំណោយដោយក្តីអំណរ ជាក្តីប្រាថ្នាដែលកើតមាននៅក្នុងចិត្តស្ត្រី និងមនុស្សគ្រប់រូបដែលប្រាថ្នាក្លាយជាមាតាបិតា ដែលពោរពេញទៅដោយក្តីមេត្តាករុណា និងព្រហ្មវិហារធម៌នោះទើបបានបង្កើតជាឈ្មោះថា មាតាជាព្រះ (Goddess) ដោយកិត្តិយសក៏សូមប្រកាសពីកាដូរពិសេសដែលពួកយើងខ្ញុំទទួលបានពរពីព្រះថា G-DEVITH បានក្លាយជា Handsome Daddy ជាផ្លូវការហើយ។

តារាចម្រៀង ទេព បូព្រឹក្ស បានលើកឡើងបន្តថា ដោយហេតុនេះ ក៏សូមចែករំលែកដំណឹងល្អនេះទៅកាន់អ្នកគាំទ្រ អ៊ំពូមីង លោកតាលោកយាយ ដែលតែងតែស្រលាញ់គាំទ្រដល់នាងខ្ញុំ ទោះជានៅក្នុងកាលៈទេសៈណាក៏ដោយ នាងខ្ញុំក៏រីករាយនឹងចែករំលែកដំណឹងល្អ ក៏ដូចជាភាពសប្បាយរីករាយនៃយើងខ្ញុំ ជាមួយបងប្អូន។ នាងខ្ញុំ នឹងមាន special M/V ដោយមានចំណងជើងថា { GODDESS } នៅក្នុងខែវិច្ឆិកា ខាងមុខនេះ ជាមួយនឹងទស្សនីយភាពថ្មីពីនាងខ្ញុំ។

តាមរយៈដំណឹងនេះ ក៏មានការចូលរួមអបអរសាទរពីសំណាក់អ្នកគាំទ្រនាងផងដែរ៕

អត្ថបទ ៖ ចាន់រ៉ា

The post ទេព បូព្រឹក្ស ប្រកាសដំណឹងមានផ្ទៃពោះ ដោយពុំធ្លាប់មានតម្រុយចូលរោងការ appeared first on Kampuchea Thmey Daily.

មិននឹកស្មានដល់ ពេលដឹងតម្លៃសម្លៀកបំពាក់របស់ ទេព បូព្រឹក្ស ក្នុង MV ថ្មី

Sorn Phanith — Wed, 25 May 2022 08:28:51 +0000

គ្រាន់តែបទចម្រៀងមួយបទ ទេព បូព្រឹក្ស ចំណាយថវិកាជាង ២ ម៉ឺនដុល្លារសម្រាប់សំលៀកបំពាក់ក្នុងបទចម្រៀងថ្មី គឺបទម្ចាស់ក្សត្រី ឬQueen។

គូស្នេហ៍តារាចម្រៀងរ៉េប លោក ជីដេវីត គឺកញ្ញា ទេព បូព្រឹក្ស ទើបតែផុសបទចម្រៀងថ្មីសម្រាប់ហ្វេន និងអ្នកគាំទ្រក្រោយត្រឡប់មកពីប្រទេសបារាំង។ លើសពីនេះ តាមរយៈហ្វេសប៊ុករបស់ Hara YuTH បានបង្ហាញពីសម្ភារៈរួមជាមួយសំលៀកបំពាក់ជាច្រើនឈុត ដែលស្ទើមិនគួរឲ្យជឿថា ទេព បូព្រឹក្ស ហ៊ានចំណាយថវិការហូតដល់ ២០៨៨៥ ដុល្លារ។ ដោយកាលពីជាងមួយខែមុន កញ្ញាបានទៅប្រទេសបារាំងហើយទិញសំលៀកបំពាក់ម៉ាកល្បីៗជាច្រើន ប៉ុន្តែអ្នកនាងមិនបានប្រាប់ឲ្យដឹងទេថាយកមកធ្វើអ្វីនោះ គ្រាន់តែបញ្ជាក់ថាបំពេញក្ដីសុខឲ្យខ្លួនឯងក្រោយបំពេញការងារ។ បើតាមគណនីដដែលបានឲ្យដឹងថា សំលៀកបំពាក់ដែលកញ្ញា ទេព បូព្រឹក្ស ពាក់ទាំងនោះមានដូចជាម៉ាក Gucci, Dust Chunky, Dolce & Gabbana, Chanel ៕

សូមទស្សនាវីដេអូចម្រៀង៖

អត្ថបទ៖ ផានិត

The post មិននឹកស្មានដល់ ពេលដឹងតម្លៃសម្លៀកបំពាក់របស់ ទេព បូព្រឹក្ស ក្នុង MV ថ្មី appeared first on Kampuchea Thmey Daily.

ទេព បូព្រឹក្ស តារាស្រីនៃភាពមិនចុះចាញ់ឧបសគ្គ

Sorn Phanith — Wed, 04 May 2022 09:31:25 +0000

ម្ចាស់បទ វីរនារី កញ្ញា ទេព បូព្រឹក្ស ជាតារាចម្រៀងស្រីដែលមានខ្សែជីវិតជួបឧបសគ្គជាច្រើនស្ទើរងើបមុខមិនរួច តែទោះបីជាយ៉ាងណាកញ្ញានៅតែមានកម្លាំងចិត្តឈរជើងមកដល់បច្ចុប្បន្ននេះ។

ទេព បូព្រឹក្ស កើតនៅឆ្នាំ ១៩៩៣ នៅទីក្រុងភ្នំពេញ ដែលមានប្អូន ២ នាក់។ បូព្រឹក្ស ត្រូវបានគេស្គាល់ថា ជាចៅទួតរបស់លោកយាយ សារាំ ប៉ាក់។ នាងបានចូលប្រឡូកសិល្បៈ តាំងពីអាយុ ៩ ឆ្នាំ មកម្ល៉េះ ហើយនាងធ្លាប់ជាប់ជយលាភីលេខ ១ ក្នុងកម្មវិធីប្រឡងចម្រៀងសម័យរបស់ទូរទស្សន៍ប៉ុស្តិ៍លេខ ៩ ក្នុងកម្មវិធី «តម្លៃនៃទេពកោសល្យ» កាលពីឆ្នាំ២០០០។ នៅអាយុ ១២ ឆ្នាំ ទេព បូព្រឹក្ស បានចូលថតភាពយន្តឲ្យក្រុមហ៊ុនហូលីវូត ដែលមកថតនៅស្រុកខ្មែរ។ នៅឆ្នាំ ២០០៨ ទេព បូព្រឹក្ស ត្រូវបានផលិតកម្មរស្មីស្ទឹងសង្កែ ជ្រើសរើសធ្វើជាតារាថ្មី ជំនួសនាង សួស សេងសប្តាហ៍ ដែលកាលនោះ នាងទើបមានអាយុ ១៦ ឆ្នាំ។ នៅឆ្នាំ ២០០៩ បន្ទាប់ពីចូលរស្មីស្ទឹងសង្កែជិតបាន ១ ឆ្នាំ បូព្រឹក្ស ក៏បានចាកចេញពីទ្រនំដំបូង ដោយនៅឆ្នាំដដែលនោះ ទេព បូព្រឹក្ស បានទៅចូលច្រៀងឲ្យផលិតកម្ម TV Production ដែលមានអ្នកនាង ញឹម ចាន់ថន ជាចាងហ្វាង។ ការបោះជំហានចូលផលិតកម្មថ្មីមិនបានប៉ុន្មានផង ទេព បូព្រឹក្ស ក៏បានប្រកាសផ្អាកពីសិល្បៈ និងបាត់មុខរហូតមក។ ក្រោយបាត់មុខអស់មួយរយៈ លុះដល់ឆ្នាំ ២០១១ នេះ ម្ចាស់បទ My សង្សារ បានលេចមុខនៅផលិតកម្មហង្សមាសតែម្តង ដោយពេលនោះ ទេព បូព្រឹក្ស ត្រូវបានខាងផលិតកម្មឲ្យនាងចាប់ដៃគូជាមួយតារាចម្រៀង ឆន សុវណ្ណរាជ។

ចំណែកជីវិតសិល្បៈនៅក្នុងផលិតកម្មហង្សមាសដែលធំជាងគេនៅប្រទេសកម្ពុជារបស់កញ្ញា ទេព បូព្រឹក្ស ពិតជាមិនងាយស្រួល ព្រោះមានរឿងជាច្រើនបានបោកបក់ចូលមក មិនថារឿងអាស្រូវ ជម្លោះ ការស្លៀកពាក់ស៊ិចស៊ី ការរាំ ហើយរឿងមួយចំនួនទៀតស្ទើរតែធ្វើឲ្យ បូព្រឹក្ស ឈប់ប្រឡូកក្នុងវិស័យចម្រៀងតទៅទៀត។ ដោយក្រោយចាប់ដៃគូជាមួយតារាចម្រៀងរ៉េប G-Devith ទេព បូព្រឹក្ស ក៏រងការរិះគន់មួយចាស់ដៃថា ជាតារាចម្រៀងបែកស្លុយដែលនាំការបំពុលដល់សង្គម និងយុវវ័យ។ នៅឆ្នាំ ២០១៩ កញ្ញា ទេព បូព្រឹក្ស ក៏សម្រេចចិត្តចាកចេញពីផលិតកម្មហង្សមាសតាមដៃគូស្នេហារបស់ខ្លួន គឺលោក G-Devith ដើម្បីធ្វើជាតារាចម្រៀងឯករាជ្យ។ ចៀសមិនផុត បូព្រឹក្ស នៅតែទទួលបានការរិះគន់ ថា ជាតារាធ្លាក់កូត ក្រោយពេលកញ្ញាចាប់ផ្ដើមធ្វើវីដេអូញុំាអីប្រម៉ូតផលិតផលនៅតាមបណ្ដាញសង្គម។ អស់ពីព្យុះភ្លៀងមួយចូលព្យុះភ្លៀងមួយរហូតដល់កម្រិតណាក៏ដោយតែ កញ្ញា ទេព បូព្រឹក្ស នៅតែតស៊ូរឹងមាំ ជម្នះរាល់ឧបសគ្គផ្សេងៗរហូតមកដល់បច្ចុប្បន្ន។ ហេតុផលទាំងនេះហើយទើប ទេព បូព្រឹក្ស ក្លាយជាតារាចម្រៀងស្រីដែលមិនចុះចាញ់ឧបសគ្គ និងបង្ហាញដល់អ្នកគាំទ្រ និងទស្សនិកជនថា បើទោះបីជាខ្លួនធ្លាក់ដល់ចំណុចណាក៏ដោយ ត្រូវតែតស៊ូជម្នះឧបសគ្គ ព្រមទាំងស្រលាញ់ខ្លួនឯងឲ្យបានច្រើន នឹងងើបឡើងដើរឆ្ពោះទៅមុខជានិច្ចកុំរាថយ។

គួររំលឹកថា តាមរយៈការខិតខំប្រឹងប្រែងបានធ្វើឲ្យ កញ្ញា ទេព បូព្រឹក្ស ទទួលបានគាំទ្រខ្លាំងក្រោយចេញបទចម្រៀង Top Of The Lady ឬ វីរនារី ដែលចូលរួមសហការជាមួយ Pleng ផ្ទុះការចូលទស្សនា ២៤ ម៉ោងទទួលបាន ១ M ៕

អត្ថបទ៖ ផានិត

The post ទេព បូព្រឹក្ស តារាស្រីនៃភាពមិនចុះចាញ់ឧបសគ្គ appeared first on Kampuchea Thmey Daily.

កញ្ញា ទេព បូព្រឹក្ស Archives - Kampuchea Thmey Daily

ទេព បូព្រឹក្ស ស្រាប់តែប្រកាសថា នឹងមិនធ្វើឱ្យអ្នកគាំទ្រខកបំណងឡើយ បើបានឱកាសថត MV នៅប្រាសាទអង្គរវត្ត

ស្ងាត់ៗតារាចម្រៀងរ៉េប ជី ដេវីត និង ទេព បូព្រឹក្ស លេចវត្តមានក្នុងកម្មវិធី Fashion Week Spring/ Summer 2024 នៅប្រទេសអ៊ីតាលី

ទេព បូព្រឹក្ស ប្រកាសបរិច្ចាគថវិកាបានមកពីការលក់សំបុត្រប្រគំតន្ត្រី ជួយមន្ទីរពេទ្យកុមារអង្គរ

តារាចម្រៀង ៣ ដួង រងការប្រមាថមាក់ងាយកិត្តិយសពីសំណាក់បុគ្គលផឹកស៊ីស្រវឹង ក្នុងហាងរាត្រី

ទេព បូព្រឹក្ស ប្រកាសដំណឹងមានផ្ទៃពោះ ដោយពុំធ្លាប់មានតម្រុយចូលរោងការ​

មិននឹកស្មានដល់ ពេលដឹងតម្លៃសម្លៀកបំពាក់របស់ ទេព បូព្រឹក្ស ក្នុង MV ថ្មី

ទេព បូព្រឹក្ស តារាស្រីនៃភាពមិនចុះចាញ់ឧបសគ្គ

ទេព បូព្រឹក្ស ប្រកាសដំណឹងមានផ្ទៃពោះ ដោយពុំធ្លាប់មានតម្រុយចូលរោងការ