កន្លែងធ្វើការ Archives - Kampuchea Thmey Daily

៤ ចំណុច មិនគួរនិយាយនៅកន្លែងធ្វើការដាច់ខាត នាំខាតបង់

អ៊ិន ពិសី — Wed, 25 Jan 2023 04:34:07 +0000

ការប្រាស្រ័យទាក់ទងគ្នានៅកន្លែងធ្វើការ ក្រុមហ៊ុន ឬស្ថាប័ន គឺជារឿងល្អដែលគួរតែមាន។ និយាយណែនាំខ្លួនអ្នកទៅកាន់មិត្តរួមការងារ មិនថាចាស់ ថ្មី គឺជាការបង្កើតទំនាក់ទំនងមួយដ៏ល្អ និងជិតស្និទ្ធ ប៉ុន្តែកុំឲ្យហួសព្រំដែន នាំបង្កើតជាផលអវិជ្ជមាននៅថ្ងៃណាមួយ។

ចូរកុំនិយាយចំណុចទាំង ៤ នេះ ជាដាច់ខាត នៅកន្លែងធ្វើការរបស់អ្នក បើមិនចង់នាំទុក្ខដាក់ខ្លួន ៖

១-ប្រាក់ខែ

មិនត្រូវនិយាយប្រាប់ពីប្រាក់បៀវត្សរ៍របស់អ្នកទៅកាន់មិត្តរួមការងារ ឬអ្នកជិតស្និទ្ធដែលធ្វើការនៅក្នុងក្រុមហ៊ុនជាមួយគ្នាឡើយ។ បើអ្នកបានប្រាក់ខែតិចជាងមិត្តរួមការងារនោះ មិនសូវជាមានបញ្ហាចោទទេ ចុះបើបានលើសពួកគាត់ តើនឹងមានអ្វីប្រឈម? នៅពេលដែលនរណាម្នាក់ដឹងពីប្រាក់ខែរបស់អ្នក អាចនឹងនាំមកនូវការអាក់អន់ ឬ មិនសប្បាយចិត្ត ក៏ព្រោះតែការទទួលបានមិនស្មើគ្នា។

មួយវិញទៀតកាន់តែមិនគួរទៀតនោះ អ្នកក៏មិនត្រូវសួរពីប្រាក់បៀវត្សរ៍របស់បុគ្គលិកធ្វើការជាមួយគ្នានោះដែរ។ ការជជីកសួរពីប្រាក់បៀវត្សរ៍របស់នរណាម្នាក់ គឺជារឿងអសីលធម៌បំផុត ហើយក៏នាំមកនូវការខកចិត្តដែរ។

២–ចំណុចអសមត្ថភាពបុគ្គល

នៅក្នុងក្រុមហ៊ុន ឬស្ថាប័នណាក៏ដោយ ក៏មានមនុស្សអសមត្ថភាពដែរ គ្រាន់តែតិច និងច្រើន។ អ្នកមិនចាំបាច់អីទៅចំណាយពេលនិយាយពីបុគ្គលិកបែបនោះឡើយ យូរៗទៅគង់តែថ្នាក់ដឹកនាំដឹងជាមិនខាន។

ការនិយាយពីសមត្ថភាព ឬភាពកម្សោយរបស់នរណាម្នាក់នៅក្នុងក្រុមហ៊ុន ឬស្ថាប័ន បើទោះបីជាការពិតក៏ដោយ ក៏អ្នកដទៃអាចមើលមកអ្នកជាមនុស្សមិនល្អដែរ។ អ្នកធ្វើការនៅក្នុងក្រុមហ៊ុន ឬស្ថាប័ន អាចនឹងគិតថាអ្នកជាមនុស្សច្រណែន ចាក់រុក ឬ អេចអូច ជាមិនខាន។

៣–ការមិនពេញចិត្តនឹងការងារ

កុំនិយាយរអ៊ូរទាំពីការងាររបស់អ្នកដដែលៗ ទៅកាន់នរណាម្នាក់ដែលកំពុងធ្វើការជាមួយគ្នា។ ការតម្អូញតម្អែរជារឿយៗរបស់អ្នក នឹងនាំឲ្យមនុស្សជុំវិញខ្លួនកត់ចំណាំថាអ្នកជាមនុស្សអវិជ្ជមាន។

អ្នកត្រូវបានគេគិតថា កំពុងតែបំផ្លាញទឹកចិត្តក្រុមការងារ ក៏ព្រោះតែភាពរអ៊ូរទាំគួរឲ្យធុញបែបនេះ។ ចៅហ្វាយនាយ ឬ មេរបស់អ្នក នឹងកត់សម្គាល់អ្នកណាម្នាក់ ដែលទាញទម្លាក់ទឹកចិត្តបុគ្គលិកនៅកន្លែងធ្វើការ ហើយនឹងត្រៀមរកមនុស្សស្រលាញ់ការងារពិតប្រាកដ។

៤–រឿងផ្ទាល់ខ្លួន

ចៀសបានគួរចៀសទៅចំពោះការរៀបរាប់ពីរឿងផ្ទាល់ខ្លួន ខ្លួនឯង ទៅឲ្យអ្នកដទៃដឹងនោះ បើរឿងល្អក្នុងជីវិតមិនអីទេ តែបើរឿងអាក្រក់វិញ នឹងនាំឲ្យគេបន្ទាបតម្លៃអ្នក។

មនុស្សណាក៏មានរឿងអាថ៌កំបាំងផ្ទាល់ខ្លួនដែរ គ្រាន់តែអ្នកខ្លះគេមិនចង់បង្ហាញ។ អ្នកកាន់តែនិយាយពីរឿងផ្ទៃក្នុងរបស់អ្នក អ្នកដទៃ នឹងកាន់តែដឹង ហើយចាប់ចំណុចអវិជ្ជមានមកអ្នកកាន់តែច្រើន។ រឿងមិនល្អខ្លះ ទុកក្នុងចិត្តបានហើយ មិនបាច់រៀបរាប់ឲ្យគេឯងដឹងច្រើនទេ ចូរចាំថា គ្មាននរណាម្នាក់អាចជួយយើង ក្រៅពីខ្លួនយើងឡើយ៕

អត្ថបទ ៖ ពិសី

The post ៤ ចំណុច មិនគួរនិយាយនៅកន្លែងធ្វើការដាច់ខាត នាំខាតបង់ appeared first on Kampuchea Thmey Daily.

គ្មានអារម្មណ៍ធ្វើការ គួរធ្វើយ៉ាងណា?

សាង ស្រីល័ក្ខ — Wed, 11 Jan 2023 04:00:00 +0000

ប្រសិនបើយើងមានអារម្មណ៍អស់កម្លាំង មិនថាមកពីធ្វើការ ឬធ្វើដំណើរ ធ្វើឲ្យយើងមានអារម្មណ៍ធុញទ្រាន់រហូតមិនចង់ធ្វើអ្វីឡើយ។ ជាពិសេសបញ្ហាស្ត្រេសដែលឈានដល់ការប៉ះពាល់ដល់សុខភាពផ្លូវកាយ និងផ្លូវចិត្តរបស់យើង ហើយជាមូលហេតុធំមួយទៀត ដែលយើងមិនរីករាយនឹងការងារប្រឈមមុខនឹងបញ្ហាមួយចំនួន នៅកន្លែងធ្វើការជាដើម។

ទាំងអស់គឺជាមូលហេតុចម្បង ដែលមនុស្សភាគច្រើននិយាយថាជាហេតុផលដែលពួកគេមិនចង់ធ្វើការ បើអ្នកមានអារម្មណ៍បែបនេះ តើអ្នកគួរធ្វើដូចម្តេច?

១ ស្វែងយល់ពីមូលហេតុដែលអ្នកមិនចង់ធ្វើការ

ចូរចាប់ផ្ដើមដោយព្យាយាមរកមូលហេតុដែលយើងមិនចង់ធ្វើការ។ តើអារម្មណ៍មិនចង់ធ្វើការមកពីអ្វី? ដើម្បីកែវាឲ្យបានត្រឹមត្រូវ

២ ប្រសិនបើអ្នកមានអារម្មណ៍ថាខ្ជិល ព្យាយាមធ្វើលំហាត់ប្រាណ

អាចស្ដាប់ទៅចម្លែក បើអ្នកមានអារម្មណ៍ថាខ្ជិលមានអារម្មណ៍ធុញ ចូរព្យាយាមរកពេលធ្វើលំហាត់ប្រាណ។ លំហាត់ប្រាណជួយឲ្យយើងមានអារម្មណ៍សប្បាយរីករាយ។ មានថាមពលដើម្បីធ្វើការ ផ្ដោតលើការងារកាន់តែច្រើន។

៣ ព្យាយាមសុំធ្វើការពីកន្លែងផ្សេង

ពិភពលោកបច្ចុប្បន្នបានផ្លាស់ប្ដូរ យើងមិនចាំបាច់ក្នុងការធ្វើការនៅកន្លែងធ្វើការនោះទេ។ ប្រសិនបើក្រុមហ៊ុនអនុញ្ញាតឲ្យយើងព្យាយាមធ្វើការពីផ្ទះពីកន្លែងផ្សេងទៀត វានឹងជួយឲ្យយើងមានអារម្មណ៍ចង់ធ្វើការកាន់តែច្រើន។

៤ ចាប់ផ្តើមជាមួយនឹងកិច្ចការសាមញ្ញ

ចូរចាប់ផ្តើមជាមួយកិច្ចការសាមញ្ញ កិច្ចការតូចមុនគេ នឹងជួយយើងឲ្យមានអារម្មណ៍ថាយើងអាចគ្រប់គ្រងកិច្ចការនោះបន្តិចម្តងៗ។

៥ សម្រាកឲ្យបានញឹកញាប់

ជារៀងរាល់ម៉ោង ព្យាយាមស្វែងរកការសម្រាក ៥-១០ នាទីសម្រាប់ខ្លួនអ្នក ដើម្បីឲ្យខ្លួនឯងមានអារម្មណ៍សម្រាក និងផ្ដោតអារម្មណ៍បន្ថែមទៀតលើការគ្រប់គ្រងកិច្ចការ។ ទីបំផុតរៀបចំផែនការវិស្សមកាល ស្វែងរកសកម្មភាពដែលអ្នកចូលចិត្តបន្ទាប់ពីធ្វើការ។ បែងចែកពេលវេលាការងាររបស់អ្នកឲ្យបានល្អ វានឹងជួយឲ្យអ្នកភ្ញាក់ពីដំណេកនៅថ្ងៃនេះ ហើយចង់ធ្វើការបន្ថែមទៀត៕

ប្រែសម្រួល៖ សាង ស្រីល័ក្ខ

ចុចអាន៖ផ្ដល់កម្លាំងចិត្តឲ្យខ្លួនឯង តាមរបៀប ៥ នេះ បើកំពុងតែរងសំពាធពីការងារ

The post គ្មានអារម្មណ៍ធ្វើការ គួរធ្វើយ៉ាងណា? appeared first on Kampuchea Thmey Daily.

មកសាកល្បងរបៀបធ្វើយូហ្គា ៤វិធី នៅកន្លែងធ្វើការងារផ្ដល់ប្រសិទ្ធិភាពសម្រាប់សុខភាព

អុន ស្រីមាន — Tue, 15 Nov 2022 06:55:19 +0000

ការធ្វើយូហ្គា ឬលំហាត់ប្រាណទាំងផ្នែករាងកាយ និងផ្លូវចិត្តពិតជាសំខាន់ណាស់សម្រាប់សុខភាពរបស់មនុស្សម្នាក់ៗ។ បច្ចុប្បន្ន មនុស្សគ្រប់ៗរូបរវល់ចំពោះការបម្រើការងាររបស់ខ្លនស្ទើរតែ ៨ម៉ោង ឬ លើសពីនេះក្នុងមួយថ្ងៃ ហើយការអង្គុយធ្វើការច្រើនម៉ោងនៅមុខកុំព្យូទ័រនឹងធ្វើឱ្យមនុស្សមានភាពតានតឹង ស្រ្តេស អាចប៉ះពាល់ដល់សុខភាពពួកគេ។

ជាក់ស្តែង នៅពេលដែលអ្នកអង្គុយធ្វើការក្នុងរយៈពេលយូរ នឹងធ្វើឱ្យរាងកាយបាត់បង់ថាមពល ចុករោយស្មា ឬ ចង្កេះ ហើយភាគរយតិចណាស់ដែលមនុស្សម្នាក់ៗនឹងធ្វើលំហាត់ប្រាណយូហ្គា ឬ លំហាត់ប្រាណផ្សេងៗក្រោយចប់ម៉ោងការងារ។ ហេតុអ្វីអ្នកមិនសាកល្បងនូវវិធីសាស្រ្ត ធ្វើយូហ្គាមួយចំនួននៅកន្លែងការងារវិញម្តង?

ខាងក្រោមនេះ គឺជាវិធីសាស្ត្រ ៤វិធី សម្រាប់ធ្វើយូហ្គានៅការិយាល័យ លោកអ្នកអាចសាកល្បងដោយខ្លួនឯងនូវវិធីមួយចំនួន ដែលអាចជួយដល់រាងកាយរបស់អ្នក។

១.ពត់ដៃរបស់អ្នកទៅមុខ

វិធីពត់ដៃទៅខាងមុខ ធ្វើឱ្យម្រាមដៃទាំង១០ និងកដៃរបស់អ្នកកាត់បន្ថយនូវភាពចុករោយ បន្ទាប់ ពីចំណាយពេលរាប់ម៉ោងនៅមុខកុំព្យូទ័រ។ នេះគឺជាវិធីសាស្ត្រមួយដែលមានភាពងាយស្រួល និងលឿនបំផុត តែក៏អាចឱ្យអ្នកមានអារម្មណ៍ថាធូរស្រាលបានខ្លះ។

២.លើកដៃទាំងពីរឡើងលើ

អង្គុយឱ្យត្រង់ខ្លួន រួចលើកដៃទាំងពីររបស់អ្នកឡើងលើផុតក្បាល បន្ទាប់មកព្យាយាមធ្វើចលនាត្រង់ស្មារបស់អ្នកយឺតៗ ដើម្បីកាត់បន្ថយភាពចុករោយ ដោយរាប់លេខកំណត់នៅក្នុងចិត្តយឺតៗ ពី១ ដល់៥។ រួចហើយ អ្នកអាចងើយមុខឡើងទៅលើដើម្បីឱ្យខ្នងរបស់អ្នកកាន់តែត្រង់។

៣.វិធីអង្គុយដាក់កជើងម្ខាងនៅលើភ្លៅម្ខាងទៀត

អង្គុយធ្វើការយូរ អាចឱ្យអ្នកចុកខ្នង ឈឺចង្កេះ ដូច្នេះអ្នកមកសាកនូវវិធីនេះម្តង។ លោកអ្នកអាចអង្គុយលើកៅអីធ្វើការឱ្យត្រង់ខ្លួន បន្ទាប់មកយកកជើងខាងឆ្វេងមកដាក់នៅលើភ្លៅខាងស្តាំ ដោយចាប់ផ្តើមរាប់ពី១ ដល់១០ យឺតៗ។ បន្ទាប់មកអ្នកអាចប្តូរជើង ដោយធ្វើតាមសកម្មភាពដដែល វាជាវិធីមួយជួយដល់ការចុករោយចង្កេះ និងឆ្អឹងខ្នង។

៤.អង្គុយពត់ខ្លួនទៅចំហៀង

វិធីមួយនេះ អ្នកអាចអង្គុយលើកៅអីធ្វើការរបស់ខ្លួន រក្សាលំនឹងឱ្យបានល្អ រួចហើយចាប់ផ្តើមពត់ខ្លួនប្រាណទៅខាងចំហៀង តែជើងរបស់អ្នកត្រូវរក្សាលំនឹងទៅមុខដដែល ពោលគឺ ងាកតែក្បាល ដៃ និងខ្លួនប៉ុណ្ណោះ។ រួចហើយអ្នកអាចរាប់ដល់ ៥ ឬ ១០ បន្ទាប់មកប្តូរទៅម្ខាងទៀតតាមសកម្មភាពដដែល។ អ្នកក៏អាចធ្វើចលនាកទៅមកយឺតៗផងដែរ ដើម្បីកាត់បន្ថយភាពចុករោយនៅស្មា ក និងចង្កេះ៕

អត្ថបទ៖ អុន ស្រីមាន

The post មកសាកល្បងរបៀបធ្វើយូហ្គា ៤វិធី នៅកន្លែងធ្វើការងារផ្ដល់ប្រសិទ្ធិភាពសម្រាប់សុខភាព appeared first on Kampuchea Thmey Daily.

បង្ការជំងឺកូវីដ-១៩ នៅកន្លែងធ្វើការ តាមតិចនិកទាំងនេះ

Sonya — Mon, 26 Jul 2021 06:35:00 +0000

នៅអំឡុងពេលនៃជំងឺរាតត្បាតនេះ មានគ្នាយើងមួយចំនួនធ្វើការពីផ្ទះ ខណៈពេលមួយចំនួនទៀត ត្រូវមកបំពេញការងារនៅក្រុមហ៊ុន។ ពិតណាស់ ទោះបីជាការធ្វើការនៅក្រុមហ៊ុនមានហានិភ័យខ្ពស់នៃការឆ្លងជំងឺកូវីដ-១៩ក៏ពិតមែន ប៉ុន្តែយើងក៏អាចការពារខ្លួនពីជំងឺរាតត្បាតដ៏គ្រោះថ្នាក់នេះបានផងដែរ។

យល់ដឹងពីហានិភ័យនៃការឆ្លងជំងឺកូវីដ-១៩ នៅកន្លែងធ្វើការ

ជំហានដំបូងដើម្បីការពារខ្លួនពីជំងឺកូវីដ-១៩ នៅកន្លែងធ្វើការ គឺត្រូវដឹងថា យើងអាចឆ្លងនៅពេល៖

ធ្វើដំណើរទៅកន្លែងធ្វើការ
នៅក្នុងការិយាល័យ បំពេញការងារ
ធ្វើដំណើរការទៅទីកន្លែងណាមួយដែលត្រូវចាត់តាំង អំឡុងពេលធ្វើការងារ
ត្រលប់ទៅផ្ទះវិញ

ការដឹងច្បាស់ថាយើងអាចឆ្លងនៅក្នុងស្ថានភាពទាំងនេះ អាចឲ្យយើងរៀបចំផែនការល្អប្រសើរ ក្នុងការការពារខ្លួនពីជំងឺកូវីដ-១៩។

យើងការពារខ្លួន ខណៈពេលទៅបំពេញការងារដោយរបៀបណា?

ការសម្អាតម៉ូតូ ឬឡានដោយបាញ់ទឹកអាកុល គឺជារឿងចាំបាច់មួយ ដើម្បីបង្ការហានិភ័យនៃការឆ្លងជំងឺកូវីដ-១៩។ ជាមួយគ្នានេះដែរ យើងគប្បីពាក់ម៉ាសជាប់ជានិច្ច និងត្រូវលាងសម្អាតដៃនៅពេលប៉ះពាល់នឹងអ្នកណាម្នាក់ ឬរបស់អ្វីមួយនៅតាមផ្លូវធ្វើដំណើរទៅធ្វើការ។

ការពារជំងឺកូវីដ-១៩ នៅក្នុងការិយាល័យ

១. លាងសម្អាតដៃឲ្យបានញឹកញាប់

គ្នាយើងគប្បីលាងសម្អាតដៃឲ្យបានយ៉ាងតិច២០វិនាទី ដោយប្រើទឹក ជាមួយនឹងសាប៊ូ។ ប៉ុន្តែប្រសិនបើគ្មានសាប៊ូទេនោះ យើងអាចប្រើទឹកអាកុល ឬជែលលាងសម្អាតដៃជំនួសវិញ។ ជាទូទៅ យើងចាំបាច់ត្រូវលាងសម្អាតដៃ៖

នៅពេលដែលយើងទៅដល់ក្រុមហ៊ុន
បន្ទាប់ពីក្អក កណ្ដាស់ ឬញើសសម្បោរ
នៅពេលដៃកខ្វក់
បន្ទាប់ពីប្រើប្រាស់ទីតាំងរួមគ្នា ដូចជានៅពេលប្រជុំ
នៅពេលប៉ះពាល់វត្ថុផ្សេងៗដូចជាលុយ ឯកសារ ជណ្ដើរយន្ត
មុនពេល និងបន្ទាប់ពីញ៉ាំអាហារ
មុនពេល និងបន្ទាប់ពីប្រើប្រាស់បន្ទប់ទឹក
បន្ទាប់ពីកាន់សំរាម

២. រក្សាគម្លាតពីអ្នកដទៃ

គន្លឹះសំខាន់មួយទៀត ដើម្បីការពារការឆ្លងជំងឺកូវីដ-១៩នៅក្នុងការិយាល័យ គឺត្រូវរក្សាគម្លាតពីគ្នា១ម៉ែត្រកន្លះឡើងទៅ។ ប្រសិនបើមានការប្រជុំ យើងគប្បីរៀបចំកៅអីឲ្យបានត្រឹមត្រូវ។ បន្ថែមពីនេះ យើងគប្បីជៀសវាងប៉ះពាល់នឹងអ្នកដែលមិនស្រួលខ្លួន។

៣. សម្លាប់មេរោគរបស់ប្រើប្រាស់រួមគ្នានៅក្នុងការិយាល័យ

ដើម្បីបញ្ចៀសជំងឺកូវីដ-១៩ យើងគប្បីជូតសម្អាតតុ និងសម្ភារៈដទៃទៀត ដូចជាសម្អាតកុំព្យូទ័រ ឬទូរស័ព្ទ ជាពិសេសនៅពេលដែលប្រើប្រាស់រួមគ្នា។

៤. ពាក់ម៉ាស និងជៀសវាងប៉ះពាល់មុខ

យោងតាមWHO យើងចាំបាច់ពាក់ម៉ាសជាប់ជានិច្ច នៅពេលដែលមិនអាចរក្សាគម្លាតបាន ព្រមទាំងជៀសវាងប៉ះពាល់ផ្ទៃមុខ ជាពិសេសភ្នែក ច្រមុះ និងមាត់។

៥. រៀបចំផែនការ ពេលត្រលប់មកផ្ទះវិញ

បន្ទាប់ពីត្រលប់មកដល់ផ្ទះវិញ យើងគប្បីចាត់វិធានការការពារមួយចំនួន ដូចជា៖

ងូតទឹក និងផ្លាស់ប្ដូរសំលៀកបំពាក់
បោកសំលៀកបំពាក់ ឬដាក់ត្រាំចោលភ្លាមៗ
ទុកស្បែកជើងនៅខាងក្រៅ
សម្លាប់មេរោគចេញពីកាបូប ឬកាតាប ទូរស័ព្ទដៃ និងកាបូបមុនពេលចូលទៅក្នុងផ្ទះ។

យ៉ាងណាមិញ យើងចាំបាច់ចាត់វិធានការមួយចំនួនទៀត ដើម្បីជួយពង្រឹងសុខភាពរបស់យើង ដូចជាញ៉ាំអាហារដែលមានសារធាតុចិញ្ចឹម គេងឲ្យបានគ្រប់គ្រាន់ និងហាត់ប្រាណជាដើម៕

អត្ថបទផ្ដល់សិទ្ធិ៖ Hello គ្រូពេទ្យ

ចុចអាន៖ ធ្វើការពីផ្ទះ ចង់ឲ្យសុខភាពរាងកាយនៅតែមាំមួនល្អ គួរអនុវត្តវិធីទាំងនេះ

ចុចអាន៖ វិធីងាយៗ ៤ យ៉ាង ធ្វើការពីផ្ទះមានប្រសិទ្ធភាពជាងមុន មិនងាយឈឺថ្កាត់ក្នុងអំឡុងរាតត្បាត

The post បង្ការជំងឺកូវីដ-១៩ នៅកន្លែងធ្វើការ តាមតិចនិកទាំងនេះ appeared first on Kampuchea Thmey Daily.

កន្លែងធ្វើការ Archives - Kampuchea Thmey Daily

៤ ចំណុច មិនគួរនិយាយនៅកន្លែងធ្វើការដាច់ខាត នាំខាតបង់

គ្មានអារម្មណ៍ធ្វើការ គួរធ្វើយ៉ាងណា?

មកសាកល្បងរបៀបធ្វើយូហ្គា ៤វិធី នៅកន្លែងធ្វើការងារផ្ដល់ប្រសិទ្ធិភាពសម្រាប់សុខភាព

យល់​ដឹង​ពី​ហានិភ័យ​នៃ​ការ​ឆ្លង​ជំងឺ​​កូវីដ​-១៩​ នៅ​កន្លែង​ធ្វើការ​

​​យើង​ការពារ​ខ្លួន​ ខណៈ​ពេល​ទៅ​បំពេញ​ការងារ​ដោយ​របៀប​ណា​?

​ការពារ​ជំងឺ​កូវីដ-១៩​ នៅ​ក្នុង​ការិយាល័យ​

​១. លាង​សម្អាត​ដៃ​ឲ្យ​បាន​ញឹកញាប់​

២. រក្សា​គម្លាត​ពី​អ្នក​ដទៃ

៣. សម្លាប់​មេរោគ​​​របស់​​ប្រើប្រាស់​​រួម​គ្នា​នៅ​ក្នុង​ការិយាល័យ​

៤. ពាក់​ម៉ាស និង​ជៀសវាង​ប៉ះពាល់​មុខ​

៥. រៀបចំ​ផែនការ​ ​ពេល​ត្រលប់​មក​ផ្ទះ​វិញ​