កម្ពុជា-ប៉ាគីស្ថាន Archives - Kampuchea Thmey Daily

កម្ពុជា-ប៉ាគីស្ថាន ចុះអនុស្សរណៈជំរុញពាណិជ្ជកម្មរវាងប្រទេសទាំងពីរ

Din Thary — Thu, 12 Feb 2026 04:16:00 +0000

ក្រសួងពាណិជ្ជកម្មកម្ពុជា និងសាធារណរដ្ឋឥស្លាមប៉ាគីស្ថាន បានចុះអនុស្សរណៈរួមគ្នាលើឯកសារសំខាន់ៗចំនួន ៣ សំដៅជំរុញពាណិជ្ជកម្មនៃប្រទេសទាំងពីរ ស្របពេលដែលកម្ពុជាកំពុងតែខិតខំក្នុងការពង្រីកទីផ្សារនាំចេញបន្ថែមលើទីផ្សារដែលមានស្រាប់។

ពិធីចុះហត្ថលេខានេះត្រូវបានធ្វើឡើងនៅក្នុងឱកាសសភាគីទាំងពីរ អញ្ជើញជាសហប្រធានដឹកនាំកិច្ចប្រជុំថ្នាក់រដ្ឋមន្រ្តីនៃគណៈកម្មាធិការពាណិជ្ជកម្មចម្រុះកម្ពុជា-ប៉ាគីស្ថាន លើកទី២ នៅថ្ងៃទី១១ ខែកុម្ភៈ ឆ្នាំ២០២៦ នេះ។

ក្នុងឱកាសនោះភាគីទាំងពីរ បានវាយតម្លៃខ្ពស់លើវឌ្ឍនភាពដ៏ល្អលើកិច្ចសហប្រតិបត្តិការតាមវិស័យដែលមានសក្តានុពល និងបានពិភាក្សាផ្លាស់ប្តូរយោបល់គ្នាលើកាលានុវត្តភាពសម្រាប់ការនាំចេញ និងការបើកច្រកទីផ្សារបន្ថែមទៀត ក្នុងគោលដៅជំរុញកំណើនពាណិជ្ជកម្មកម្ពុជា-ប៉ាគីស្ថានឱ្យកាន់តែរីកចម្រើន។

បន្ថែមពីនេះទៀត ភាគីទាំងពីរក៏បានពិភាក្សាលើកិច្ចការបន្ត ដូចជាការរៀបចំអនុស្សរណៈនៃការយោគយល់គ្នាតាមវិស័យមួយចំនួន ដើម្បីជាមូលដ្ឋានសម្រាប់កិច្ចសប្រតិបត្តិការសេដ្ឋកិច្ចស៊ីជម្រៅ និងគ្រប់ជ្រុងជ្រោយ សំដៅផ្ដល់ផលប្រយោជន៍ឱ្យគ្នាទៅវិញទៅមក និងការទទួលបានឧត្តមភាពនៃប្រទេសទាំងពីរ។

ឯកសារសំខាន់ៗចំនួន ៣ រួមមាន ដែលភាគីទាំងពីរកម្ពុជា-ប៉ាគីស្ថាន បានចុះហត្ថលេខារួមគ្នារួមមានទី១កំណត់ហេតុកិច្ចប្រជុំ ទី២សេចក្តីប្រកាសរួមស្តីកិច្ចព្រមព្រៀងអនុគ្រោះពាណិជ្ជកម្មកម្ពុជា-ប៉ាគីស្ថាន និងទី៣ អនុស្សរណៈយោគយល់គ្នាស្តីពីការជំរុញពាណិជ្ជកម្ម៕

The post កម្ពុជា-ប៉ាគីស្ថាន ចុះអនុស្សរណៈជំរុញពាណិជ្ជកម្មរវាងប្រទេសទាំងពីរ appeared first on Kampuchea Thmey Daily.

បទវិភាគ៖ ហេតុអ្វីបានជាកម្ពុជាកំពុងបង្កើនទំនាក់ទំនងយ៉ាងស្អិតល្មួតជាមួយពិភពឥស្លាម?

hun sirivadh — Wed, 11 Feb 2026 06:11:14 +0000

កម្ពុជាកំពុងបង្កើនទំនាក់ទំនងកាន់តែជិតស្និទ្ធជាមួយបណ្ដារដ្ឋឥស្លាមសំខាន់ៗ រួមមាន អារ៉ាប៊ីសាអ៊ូឌីត ប៉ាគីស្ថាន និងតួគី នាប៉ុន្មានឆ្នាំចុងក្រោយនេះ។ ចលនានេះកើតឡើងស្របពេលដែលប៉ូលនយោបាយពិភពលោកថ្មីកំពុងលេចត្រដែតឡើងនៅតំបន់មជ្ឈិមបូព៌ា និងអាស៊ីខាងត្បូង។

សម្ដេចតេជោ ហ៊ុន សែន ស្វាគមន៍ទស្សនកិច្ចរបស់ប្រធានសភាអារ៉ាប៊ីសាអូឌីតលោក អាប់ឌុលឡា ប៊ីន ម៉ូហាម៉េដ ថ្ងៃទី១ កក្កដា ២០២៥

ក្នុងខែកុម្ភៈនេះ សកម្មភាពការទូតរវាងកម្ពុជា និងពិភពឥស្លាមមានភាពមមាញឹកគួរឱ្យកត់សម្គាល់ ដោយមានដំណើរទស្សនកិច្ចរបស់ប្រធានព្រឹទ្ធសភាប៉ាគីស្ថាន លោក ស៊ីយ៉េដ យូសាហ្វ រ៉ាហ្ស៉ា ហ្គីឡានី ហើយក្នុងសប្ដាហ៍នេះប្រធានក្រុមប្រឹក្សាធុរកិច្ចអារ៉ាប៊ីសាអ៊ូឌីតលោក Walleed Nasser Alshehri កំពុងទស្សនកិច្ចនៅកម្ពុជា ខណៈដែលឧបនាយករដ្ឋមន្ត្រី ស សុខា ក៏កំពុងបំពេញទស្សនកិច្ចនៅប្រទេសតួគីផងដែរ។

អ្នកភូមិសាស្ត្រនយោបាយលោកបណ្ឌិត ជ័យ តិច មើលឃើញថាការដែលកម្ពុជាកំពុងបង្កើនទំនាក់ទំនងជាមួយបណ្ដាប្រទេសឥស្លាមនេះ ជារឿងដែលស៊ីជម្រៅដែលលើសពីទំនាក់ទំនងសេដ្ឋកិច្ច ខណៈដែលប៉ូលថ្មីនៃអំណាចពិភពលោកកំពុងកើតឡើងចេញពីពិភពឥស្លាម។

បណ្ឌិត ជ័យ តិច

លោកថា៖ «អារ៉ាបដែលមានជាង៥០ប្រទេសនេះគឺប៉ូលថ្មីនៃពិភពលោកដែលមានសក្ដានុពល។ បច្ចុប្បន្ននេះក្រោមការផ្ដួចផ្ដើមរបស់អារ៉ាប៊ីសាអ៊ូឌីតដែលមានសហប្រតិបត្តិការជាមួយប៉ាគីស្ថានបានបង្កើតឱ្យមានកិច្ចព្រមព្រៀងមួយដែលហៅថា Military Pact គឺកិច្ចព្រមព្រៀងវិស័យយោធាដែលមានដូចណាតូអ៊ីចឹង គឺការពារគ្នាទៅវិញទៅមក។ បានចុះហត្ថលេខានៅឆ្នាំ២០២៥កន្លងទៅនេះដែលមានប៉ាគីស្ថានដែលមានមហាអំណាចនុយក្លេអ៊ែរឥស្លាមតែមួយគត់ក្នុងពិភពលោកចុះហត្ថលេខាជាមួយអារ៉ាប៊ីសាអ៊ូឌីតលើ Military Pact នេះ»។

លោកបណ្ឌិត ជ័យ តិច យល់ថានេះជាឱកាសល្អសម្រាប់កម្ពុជាក្នុងការបង្កើតចំណងមិត្តភាពកាន់តែល្អជាមួយបណ្ដាប្រទេសឥស្លាមទាំងនេះ។ ដែលនឹងអាចទាញប្រយោជន៍ ជំនួយ ព្រមទាំងពាណិជ្ជកម្ម ទេសចរណ៍ និងសន្តិសុខផងដែរ។

លោកថា៖ «មជ្ឈិមបូព៌ាបង្កើតសម្ព័ន្ធយោធាថ្មីនេះបងធំគឺប៉ាគីស្ថានដែលមាននុយក្លេអ៊ែរហើយប៉ាគីស្ថាន ប្រធានព្រឹទ្ធសភាប៉ាគីស្ថានក៏បានមកធ្វើទស្សនកិច្ចនៅកម្ពុជាថ្មីៗនេះដែរ។ នេះជាជំហានដ៏ត្រឹមត្រូវនៃបរិបទភូមិសាស្ត្រនយោបាយពិភពលោកដែលកម្ពុជាបានដើរ»។

សម្ដេចតេជោ ហ៊ុន សែន និងប្រធានព្រឹទ្ធសភាប៉ាគីស្ថានលោក ស៊ីយ៉េដ យូសាហ្វ រ៉ាហ្សា ជីឡានី ថ្ងៃទី៤ កុម្ភៈ ២០២៦

ប្រធានព្រឹទ្ធសភាប៉ាគីស្ថានលោក ស៊ីយ៉េដ យូសាហ្វ រ៉ាហ្ស៉ា ហ្គីឡានី បានធ្វើទស្សនៈកិច្ចនៅកម្ពុជាកាលពីដើមខែកុម្ភៈ ឆ្នាំ២០២៦នេះ ដោយបានជួបពិភាក្សាការងារជាមួយប្រធានព្រឹទ្ធសភាកម្ពុជា សម្ដេចតេជោ ហ៊ុន សែន ប្រធានរដ្ឋសភា សម្ដេចសភាធិបតី ឃួន សុដារី និងនាយករដ្ឋមន្ត្រី សម្ដេចធិបតី ហ៊ុន ម៉ាណែត ដោយក្នុងនោះបានពិភាក្សាគ្នាពីការរឹតចំណងមិត្តភាព បង្កើតជើងហោះហើរត្រង់ បង្កើនកិច្ចសហការសភា ជាពិសេសគឺការស្វាគមន៍កម្ពុជាចូលជាសមាជិកអង្គការសហប្រតិបត្តិការឥស្លាម (OIC) ផងដែរ។

សម្ដេចសភាធិបតី ឃួន សុដារី និងប្រធានព្រឹទ្ធសភាប៉ាគីស្ថានលោក ស៊ីយ៉េដ យូសាហ្វ រ៉ាហ្សា ជីឡានី ថ្ងៃទី៤ កុម្ភៈ ២០២៦

នាយកខុទ្ទកាល័យសម្ដេចប្រធានសភា លោក កែវ ពិសិដ្ឋ ធ្លាប់បានប្រាប់អ្នកយកព័ត៌មានថាការចូលរួមជាសមាជិកអង្គការឥស្លាមនេះបានបង្ហាញពីសុខដុមនីយកម្មនៃសាសនានៅកម្ពុជា និងគាំទ្រដល់អ្នកកាន់សាសនាឥស្លាមនៅកម្ពុជាចូលរួមព្រឹត្តិការណ៍អន្តរជាតិ និងបណ្ដាញអន្តរជាតិឥស្លាមកាន់តែស៊ីជម្រៅផងដែរមិនប៉ះពាល់ដល់ពុទ្ធសាសនាដែលជាសាសនារបស់រដ្ឋទេ។

ដោយឡែកអ្នកជំនាញភូមិសាស្ត្រនយោបាយលោកបណ្ឌិត យង់ ពៅ មានប្រសាសន៍គាំទ្រចំពោះការបង្កើនទំនាក់ទំនងរបស់កម្ពុជាជាមួយបណ្ដារដ្ឋឥស្លាមនេះ ដែលលោកវាយតម្លៃថាជាពិពិធកម្មការទូតថ្មីមួយរបស់កម្ពុជា។

លោកថា៖ «កាលណាយើងមានថាមពលការទូតថ្មីបើកល្វែងការទូតបន្ថែមទៀតនៅបណ្ដាទ្វីបនៅបណ្ដាប្រទេសផ្សេងៗជាច្រើន ដូច្នេះយើងមានមិត្តភ័ក្រច្រើនយើងមានដៃគូរកិច្ចសហប្រតិបត្តិការច្រើនពេលនោះក៏យើងនឹងមានការដោះដូរពាណិជ្ជកម្មទូលំទូលាយ ការដោះដូរទស្សនៈនយោបាយទូលំទូលាយ និងការដោះដូរកិច្ចសហការផ្សេងទៀតដែលធ្វើឱ្យយើងមានលំនឹងកាន់តែរឹងមាំ និងមានឥទ្ធិពលនយោបាយការទូតក្នុងពិភពលោក»។

បណ្ឌិត យង់ ពៅ

លោកបណ្ឌិតបន្ថែមថាបច្ចុប្បន្នពិភពអំណាច និងសេដ្ឋកិច្ចថ្មីគឺកំពុងកើតឡើងនៅពិភពឥស្លាមនេះ ហើយការបង្កើតទំនាក់ទំនងល្អជាមួយតំបន់ឥស្លាមនឹងធ្វើឱ្យកម្ពុជាទាញយកប្រយោជន៍កាន់តែច្រើនបន្ថែមទៀតសម្រាប់ខ្លួន។

លោកថា៖ «ថាមពលការទូតថ្មីនេះនាំឱ្យកម្ពុជាទទួលបានអំណាចទន់បន្ថែមទៀត បើទោះជាយើងប្រៀបធៀបនឹងប្រទេសផ្សេងនៅមានកម្រិតតែយើងត្រូវតែប្រឹងប្រែងដើម្បីឱ្យមានថាមពលថ្មីហើយអំណាចទន់របស់យើងកាន់តែកើនឡើង»។

សម្ដេចធិបតី ហ៊ុន ម៉ាណែត ទទួលស្វាគមន៍ប្រធានព្រឹទ្ធសភាប៉ាគីស្ថានលោក ស៊ីយ៉េដ យូសាហ្វ រ៉ាហ្សា ជីឡានីថ្ងៃទី៣ កុម្ភៈ ២០២៦ នៅវិមានសន្ដិភាព

សរុបមកវិញ ការបង្កើនទំនាក់ទំនងជាមួយពិភពឥស្លាមនៅពេលនេះ មិនមែនជារឿងចៃដន្យឡើយ ប៉ុន្តែវាគឺជាយុទ្ធសាស្ត្រដែលមានចក្ខុវិស័យវែងឆ្ងាយ។ វាជាការបោះជំហានរបស់កម្ពុជាក្នុងការស្វែងរកតុល្យភាពនយោបាយថ្មីមួយ ដែលលើសពីការរឹតចំណងមិត្តភាពធម្មតា ពោលគឺដើម្បីពង្រឹងសន្តិសុខជាតិ និងស្វែងរកកម្លាំងរុញច្រានសេដ្ឋកិច្ចពីប៉ូលអំណាចថ្មីដែលពិភពលោកកំពុងចាប់អារម្មណ៍៕

អត្ថបទដោយ ហ៊ុន សិរីវឌ្ឍន៍

The post បទវិភាគ៖ ហេតុអ្វីបានជាកម្ពុជាកំពុងបង្កើនទំនាក់ទំនងយ៉ាងស្អិតល្មួតជាមួយពិភពឥស្លាម? appeared first on Kampuchea Thmey Daily.

កម្ពុជា-ប៉ាគីស្ថាន ប្ដេជ្ញាពង្រឹង និងពង្រីកកិច្ចសហប្រតិបត្តិការទ្វេភាគីឱ្យកាន់តែខ្លាំងក្លាថែមទៀត

Kang Tola — Tue, 03 Feb 2026 12:48:00 +0000

នារសៀលថ្ងៃទី០៣ ខែកុម្ភៈ ឆ្នាំ២០២៦នេះ សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រកម្ពុជា បានទទួលជួបពិភាក្សាការងារជាមួយ លោក ស៊ីយ៉េដ យូសាហ្វ រ៉ាហ្សា ជីឡានី (H.E. Syed Yousaf Raza Gilani) ប្រធានព្រឹទ្ធសភា នៃសាធារណរដ្ឋឥស្លាមប៉ាគីស្ថាន នៅវិមានសន្តិភាព ក្នុងឱកាសដែលលោកដឹកនាំគណៈប្រតិភូ អញ្ជើញបំពេញទស្សនកិច្ចផ្លូវការ នៅព្រះរាជាណាចក្រកម្ពុជា ពីថ្ងៃទី២ ដល់ថ្ងៃទី៥ ខែកុម្ភៈ ឆ្នាំ២០២៦។

ក្នុងឱកាសនៃជំនួប, លោកប្រធានព្រឹទ្ធសភា បានសម្ដែងនូវក្ដីសោមនស្សរីករាយ និងថ្លែងអំណរគុណយ៉ាងជ្រាលជ្រៅចំពោះការទទួលបដិសណ្ឋារកិច្ចយ៉ាងកក់ក្តៅពីសំណាក់ភាគីកម្ពុជា។ លោកបានរំលឹកថា ឆ្នាំនេះគឺជាខួបលើកទី៧៤ នៃទំនាក់ទំនងការទូតប៉ាគីស្ថាន-កម្ពុជា ដោយក្នុងនោះប៉ាគីស្ថាន គឺជាប្រទេសដំបូងមួយដែរ ដែលបានទទួលស្គាល់ឯករាជ្យភាពរបស់កម្ពុជា។

លោកក៏បានលើកឡើងពីភាពស្រដៀងគ្នាដែលប្រទេសទាំងពីរមាន គឺសក្ដានុពលលើវិស័យកសិកម្ម និងកម្លាំងពលកម្មវ័យក្មេងដ៏សកម្ម។ ជាមួយគ្នានេះ, លោកបានវាយតម្លៃខ្ពស់ចំពោះកិច្ចសហប្រតិបត្តិការទ្វេភាគីកន្លងមក និងបង្ហាញនូវជំនឿជឿជាក់ថាដំណើរទស្សនកិច្ចនេះ នឹងក្លាយជាកម្លាំងចលករថ្មីក្នុងការជំរុញទំនាក់ទំនងរវាងប្រទេសទាំងពីរឱ្យកាន់តែស៊ីជម្រៅ ជាពិសេសទំនាក់ទំនងរវាងស្ថាប័ននីតិប្បញ្ញត្តិនៃប្រទេសទាំងពីរ។

ជាការឆ្លើយតប, សម្ដេចធិបតី បានសម្ដែងនូវការស្វាគមន៍យ៉ាងកក់ក្ដៅជូនចំពោះ លោកប្រធានព្រឹទ្ធសភា និងគណៈប្រតិភូ។ សម្ដេចធិបតីបានគូសបញ្ជាក់ថា វត្តមានរបស់លោកប្រធានព្រឹទ្ធសភា នាពេលនេះ គឺជាសក្ខីភាពឆ្លុះបញ្ចាំងពីការរីកចម្រើននៃទំនាក់ទំនងរវាងព្រឹទ្ធសភានៃប្រទេសទាំងពីរ។ សម្ដេចធិបតីមានជំនឿយ៉ាងមុតមាំថា ដំណើរទស្សនកិច្ចនេះនឹងជួយពង្រឹងកិច្ចសហប្រតិបត្តិការទ្វេភាគីលើវិស័យថ្មីបន្ថែមទៀត ខណៈដែលរាជរដ្ឋាភិបាលកម្ពុជាត្រៀមខ្លួនរួចជាស្រេចក្នុងការផ្ដល់ការគាំទ្រ និងបង្កើនសន្ទុះនៃទំនាក់ទំនងរវាងស្ថាប័ននីតិប្បញ្ញត្តិឱ្យកាន់តែជិតស្និទ្ធបន្ថែមទៀត។

សម្តេចធិបតី និងលោកប្រធានព្រឹទ្ធសភា ក៏បានពិភាក្សាលើការពង្រឹងនិងពង្រីកកិច្ចសហប្រតិបត្តិការលើវិស័យសក្ដានុពលជាច្រើន រួមមាន វិស័យនយោបាយ និងការទូត, សន្តិសុខ និងការពារជាតិ, ពាណិជ្ជកម្ម និងការវិនិយោគ, កសិកម្ម, បច្ចេកវិទ្យា, ធនធានរ៉ែ, កម្មន្តសាល, អប់រំ និងបណ្តុះបណ្តាលវិជ្ជាជីវៈ, វប្បធម៌, ទេសចរណ៍, សុខាភិបាល និងការតភ្ជាប់រវាងប្រជាជន និងប្រជាជន ជាដើម។ សម្តេចធិបតី និងឯកឧត្តមប្រធានព្រឹទ្ធសភា បានលើកទឹកចិត្តឱ្យក្រសួងស្ថាប័នពាក់ព័ន្ធ និងវិស័យឯកជន នៃប្រទេសទាំងពីរ បន្តផ្សារភ្ជាប់ទំនាក់ទំនងគ្នា សំដៅស្វែងរកកាលានុវត្តភាពថ្មីៗបន្ថែមទៀត ក្នុងការជំរុញ ការពង្រឹង និងពង្រីកកិច្ចសហប្រតិបត្តិការ ឱ្យកាន់តែរីកចម្រើន។

សម្តេចធិបតី និងលោកប្រធានព្រឹទ្ធសភា ក៏បានឯកភាពបន្តពង្រឹងកិច្ចសហប្រតិបត្តិការរវាងប្រទេសទាំងពីរ នៅក្នុងវេទិកាតំបន់ និងអន្តរជាតិផងដែរ៕

The post កម្ពុជា-ប៉ាគីស្ថាន ប្ដេជ្ញាពង្រឹង និងពង្រីកកិច្ចសហប្រតិបត្តិការទ្វេភាគីឱ្យកាន់តែខ្លាំងក្លាថែមទៀត appeared first on Kampuchea Thmey Daily.

កម្ពុជា-ប៉ាគីស្ថាន ឯកភាពជំរុញកំណើនទំហំពាណិជ្ជកម្មបន្ថែមទៀត

deth leng — Tue, 03 Feb 2026 02:56:14 +0000

ថ្នាក់ដឹកនាំកម្ពុជា-ប៉ាគីស្ថានឯកភាពជំរុញទំហំពាណិជ្ជកម្មបន្ថែមទៀត ខណៈទំនាក់ទំនងរវាងប្រទេសទាំងពីរមានភាពល្អប្រសើរ។

ការឯកភាពនេះ បានធ្វើឡើងនៅក្នុងជំនួបរវាងសម្ដេចតេជោ ហ៊ុន សែន ប្រធានព្រឹទ្ធសភា ជាមួយ លោក Syed Yusuf Raza Gillani ប្រធានព្រឹទ្ធសភាប៉ាគីស្ថាន នៅរសៀលថ្ងៃទី ០២ ខែកុម្ភៈ ឆ្នាំ ២០២៦ នៅវិមានសាមគ្គីភាព នៃព្រឹទ្ធសភា។

សម្ដេចតេជោ ហ៊ុន សែន និងលោក Syed Yusuf Raza Gillani បានឯកភាពគ្នាលើចំណុចរួមឱ្យរដ្ឋាភិបាលរវាងប្រទេសទាំងពីរជំរុញទំនាក់ទំនងឱ្យកាន់តែរីកចម្រើនបន្ថែមទៀត ខណៈសម្ដេចតេជោ គាំទ្រឱ្យរដ្ឋាភិបាលកម្ពុជាបើកស្ថានទូតនៅប៉ាគីស្ថានជាផ្លូវការ ដើម្បីជំរុញដល់ការគាំទ្រទំនាក់ទំនងកម្ពុជា-ប៉ាគីស្ថាន។

អ្នកនាំពាក្យព្រឹទ្ធសភា លោក ជា ធីរិទ្ធ បានស្រង់សម្ដីរបស់សម្ដេចតេជោ ហ៊ុន សែន ថា សម្រាប់ទំហំពាណិជ្ជកម្មរវាងប្រទេសទាំងពីរ ភាគីទាំងពីរជំរុញពង្រីកទំហំពាណិជ្ជកម្មឱ្យមានកំណើនបន្ថែមទៀត ពីព្រោះខណៈក្របខណ្ឌនយោបាយយើងតែងតែគាំទ្រគ្នាទៅវិញទៅមក។ នៅក្នុងឆ្នាំ ២០២៥ ទំហំពាណិជ្ជកម្មរវាងប្រទេសទាំងពីរមានត្រឹមតែ ៥៣ លានដុល្លារ។

សម្រាប់ទំនាក់ទំនងរវាងប្រជាជន និងប្រជាជនភាគីទាំងពីរចង់ជំរុញការផ្លាស់ប្ដូរប្រជាជន និងប្រជាជនក្នុងការទាក់ទាញទេសចរ ដែលគាំទ្រដល់ការបង្កើតទំនាក់ទំនងល្អរវាងប្រទេសទាំងពីរ៕

អត្ថបទ៖ ឡេង ដេត

The post កម្ពុជា-ប៉ាគីស្ថាន ឯកភាពជំរុញកំណើនទំហំពាណិជ្ជកម្មបន្ថែមទៀត appeared first on Kampuchea Thmey Daily.

ប្រធានព្រឹទ្ធសភាប៉ាគីស្ថាន មកដល់កម្ពុជាហើយ ដើម្បីបំពេញទស្សនកិច្ចផ្លូវការតាមការអញ្ជើញរបស់សម្ដេចតេជោ

Thoeun Vansong — Mon, 02 Feb 2026 02:43:32 +0000

តបតាមការអញ្ជើញរបស់សម្ដេចតេជោ ហ៊ុន សែន ប្រធានព្រឹទ្ធសភាកម្ពុជា លោក ស៊ីយ៉េដ យូសាហ្វ រ៉ាសា ហ្គីឡានី (Syed Yusuf Raza Gillani) ប្រធានព្រឹទ្ធសភារដ្ឋអ៊ីស្លាមប៉ាគីស្ថាន នៅព្រឹកថ្ងៃចន្ទនេះ បានអញ្ជើញមកបំពេញទស្សនកិច្ចផ្លូវការនៅកម្ពុជា។ ទទួលស្វាគមន៍ការមកដល់របស់ប្រធានព្រឹទ្ធសភាប៉ាគីស្ថាន នៅអាកាសយានដ្ឋានអន្តរជាតិតេជោ មានវត្តមានលោក ធន់ វឌ្ឍនា អនុប្រធានទី២ព្រឹទ្ធសភា អមដោយថ្នាក់ដឹកនាំព្រឹទ្ធសភាមួយចំនួនទៀត។

បើតាមព្រឹទ្ធសភា លោក ស៊ីយ៉េដ យូសាហ្វ រ៉ាសា ហ្គីឡានី នឹងបំពេញទស្សនកិច្ចផ្លូវការនៅកម្ពុជា ចាប់ពីថ្ងៃទី២ ដល់ថ្ងៃទី៥ ខែកុម្ភៈ ឆ្នាំ២០២៦ ដោយក្នុងដំណើរទស្សនកិច្ចផ្លូវការនេះ លោកនឹងអញ្ជើញចូលក្រាបបង្គំគាល់ព្រះករុណាព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រកម្ពុជា ព្រមទាំងជួបទ្វេភាគីជាមួយសម្តេចតេជោ ហ៊ុន សែន ប្រធានព្រឹទ្ធសភា និងជួបសម្ដែងការគួរសមចំពោះសម្តេច ឃួន សុដារី ប្រធានរដ្ឋសភា និងសម្តេចធិបតីហ៊ុន ម៉ាណែត នាយករដ្ឋមន្ត្រីកម្ពុជា។

ព្រឹទ្ធសភាកម្ពុជា ចាត់ទុកដំណើរទស្សនកិច្ចផ្លូវការរបស់ប្រធានព្រឹទ្ធសភាប៉ាគីស្ថាន នៅកម្ពុជាពេលនេះ នឹងជំរុញការរឹតចំណងមិត្តភាព ទំនាក់ទំនងទ្វេភាគី និងសហប្រតិបត្តិការសភាកម្ពុជា និងប៉ាគីស្ថាន ឱ្យកាន់តែជិតស្និទ្ធ ជាពិសេស រួមចំណែកដល់ការលើកកម្ពស់របៀបវារៈការទូតសភារបស់កម្ពុជា ក្រោមការដឹកនាំរបស់សម្តេចតេជោ ហ៊ុន សែន ប្រធានព្រឹទ្ធសភា ក្នុងការកសាង និងរក្សាសន្តិភាព ព្រមទាំងការអភិវឌ្ឍប្រកបដោយចីរភាពក្នុងតំបន់ និងពិភពលោក តាមរយៈកិច្ចសន្ទនា និងកិច្ចសហប្រតិបត្តិការអន្តរជាតិ៕

The post ប្រធានព្រឹទ្ធសភាប៉ាគីស្ថាន មកដល់កម្ពុជាហើយ ដើម្បីបំពេញទស្សនកិច្ចផ្លូវការតាមការអញ្ជើញរបស់សម្ដេចតេជោ appeared first on Kampuchea Thmey Daily.

កម្ពុជាពង្រឹងកិច្ចសហប្រតិបត្តិការទ្វេភាគីជាមួយប៉ាគីស្ថាន

Thoeun Vansong — Wed, 12 Nov 2025 03:33:29 +0000

កម្ពុជាពង្រឹងនូវកិច្ចសហប្រតិបត្តិការជាទ្វេភាគីជាមួយរដ្ឋអ៊ីស្លាមប៉ាគីស្ថាន ដើម្បីទាញយកសក្តានុពលទៅវិញទៅមករវាងប្រទេសទាំងពីរ។ កិច្ចសហប្រតិបត្តិការនេះត្រូវបានពង្រឹងតាមរយៈការចុះហត្ថលេខាលើអនុស្សរណៈនៃការយោគយល់គ្នា ស្ដីពីកិច្ចពិគ្រោះយោបល់ និងកិច្ចសហប្រតិបត្តិការរវាងក្រសួងការបរទេសនៃប្រទេសទាំងពីរ កម្ពុជា និងប៉ាគីស្ថាន។

ពិធីចុះហត្ថលេខាលើអនុស្សរណៈនេះ ធ្វើឡើងរវាងលោក អ៊ុន ឃាង រដ្ឋលេខាធិការក្រសួងការបរទេសកម្ពុជា និងលោក ហ្សាហៀរូឌីន បាបា ថាហ៊ីម ឯកអគ្គរដ្ឋទូតប៉ាគីស្ថានប្រចាំកម្ពុជា កាលពីថ្ងៃទី១១ ខែវិច្ឆិកា ឆ្នាំ២០២៥ ដោយមានវត្តមានលោក ប្រាក់ សុខុន ឧបនាយករដ្ឋមន្រ្តី រដ្ឋមន្រ្តីការបរទេសកម្ពុជា។

ភាគីទាំងពីរ បានសម្តែងនូវការពេញចិត្តចំពោះទំនាក់ទំនងមិត្តភាពល្អប្រសើរដែលមានស្រាប់ និងបានគូសបញ្ជាក់ពីសារៈសំខាន់នៃការរៀបចំកិច្ចប្រជុំពិគ្រោះយោបល់ជាទៀងទាត់ ដើម្បីបន្តពង្រឹងកិច្ចសហប្រតិបត្តិការទ្វេភាគី និងការស្វែងរកនូវមធ្យោបាយថ្មីៗបន្ថែមទៀតសម្រាប់ទាញយកសក្តានុពល និងកាលានុវត្តភាពសេដ្ឋកិច្ចដែលមានរវាងប្រទេសទាំងពីរ៕

The post កម្ពុជាពង្រឹងកិច្ចសហប្រតិបត្តិការទ្វេភាគីជាមួយប៉ាគីស្ថាន appeared first on Kampuchea Thmey Daily.

សម្ដេចធិបតី ប្រាប់រដ្ឋមន្ត្រីពាណិជ្ជកម្មប៉ាគីស្ថាន ពីការគាំទ្ររបស់រដ្ឋចំពោះវិស័យឯកជននៅកម្ពុជា

Thoeun Vansong — Tue, 21 Jan 2025 07:43:18 +0000

សម្ដេចធិបតី ហ៊ុន ម៉ាណែត បានប្រាប់ទៅកាន់រដ្ឋមន្ត្រីក្រសួងពាណិជ្ជកម្មរបស់ប៉ាគីស្ថាន ថា វិស័យឯកជនដែលរកស៊ីនៅកម្ពុជា គឺទទួលបានការគាំទ្រជាអាទិភាពច្រើនពីរដ្ឋ។

សម្ដេចធិបតី បានគូសបញ្ជាក់អំពីការគាំទ្រ និងវិធានការនានា ដែលត្រូវបានដាក់ចេញដោយរាជរដ្ឋាភិបាល ដើម្បីធានាដល់ភាពជោគជ័យរបស់វិស័យឯកជននៅកម្ពុជា ដោយសម្ដេចធិបតី បានលើកឡើងថា វិស័យឯកជន ដើរតួនាទីយ៉ាងសំខាន់ដល់ការជំរុញកំណើនសេដ្ឋកិច្ចនៅកម្ពុជា ដែលលេីកកម្ពស់ជីវភាពរស់នៅរបស់ប្រជាពលរដ្ឋ។ ការលើកឡើងរបស់សម្ដេចធិបតីបានធ្វើឡើងក្នុងជំនួបនាព្រឹកថ្ងៃទី២១ ខែមករា ឆ្នាំ២០២៥ ជាមួយលោក ចាំ កាម៉ាល់ ខាន់ (Jam Kamal Khan) រដ្ឋមន្ត្រីពាណិជ្ជកម្មប៉ាគីស្ថាន នៅវិមានសន្ដិភាព។

ក្នុងឱកាសនៃជំនួបនេះ រដ្ឋមន្ត្រីក្រសួងពាណិជ្ជកម្មប៉ាគីស្ថាន បានសម្ដែងនូវការពេញចិត្តចំពោះភាពល្អប្រសើរនៃទំនាក់ទំនងប៉ាគីស្ថាន-កម្ពុជា ហើយលោកបានលើកឡើងថា វឌ្ឍនភាពនេះរួមចំណែកដល់ការពង្រឹងកិច្ចសហប្រតិបត្តិការលើវិស័យជាច្រើនរវាងប្រទេសទាំងពីរ។

លោករដ្ឋមន្ត្រី បានជម្រាបជូនសម្ដេចធិបតី ថា ទស្សនកិច្ចរបស់លោក និងគណៈប្រតិភូនៅកម្ពុជានាពេលនេះ បានផ្ដល់នូវបទពិសោធន៍ល្អៗជាច្រើន ហើយលោកបានសង្កេតឃើញពីភាពប្រហាក់ប្រហែលគ្នានៃវិស័យជាច្រើនរបស់ប៉ាគីស្ថាន និងកម្ពុជា។ លោក បន្ថែមថា គោលបំណងនៃដំណើរទស្សនកិច្ចនេះ ក៏ដើម្បីចូលរួមកិច្ចប្រជុំគណៈកម្មាធិការពាណិជ្ជកម្មចម្រុះកម្ពុជា-ប៉ាគីស្ថាន លើកទី១ នៅកម្ពុជា ដែលកិច្ចប្រជុំនេះនឹងមានជំនួបរវាងសហគមន៍ធុរកិច្ចប៉ាគីស្ថាន និងកម្ពុជា ដែលនឹងចូលរួមចំណែកបង្កើតជាកាលានុវត្តភាពវិនិយោគបន្ថែមទៀតសម្រាប់ធុរជនប្រទេសទាំងពីរ ក៏ដូចជាការពង្រឹងកិច្ចសហប្រតិបត្តិការរវាងប្រទេសទាំងពីរឱ្យកាន់តែរឹងមាំថែមទៀត។

ជាការឆ្លើយតប សម្ដេចធិបតី បានវាយតម្លៃខ្ពស់ និងពេញចិត្តចំពោះទំនាក់ទំនងប្រទេសទាំងពីរ ហើយតាមរយៈកិច្ចប្រជុំគណៈកម្មាធិការពាណិជ្ជកម្មចម្រុះកម្ពុជា-ប៉ាគីស្ថាន លើកទី១ បានឆ្លុះបញ្ចាំងពីការរីកចម្រើននៃទំនាក់ទំនងកម្ពុជា-ប៉ាគីស្ថាន។ ទន្ទឹមនេះ សម្ដេចធិបតី បានគូសបញ្ជាក់ថា កិច្ចប្រជុំនេះមិនត្រឹមតែជួយពង្រីកកាលានុវត្តភាពវិនិយោគប៉ុណ្ណោះទេ ថែមទាំងជួយពង្រីកកិច្ចសហប្រតិបត្តិលើវិស័យសក្ដានុពលផ្សេងៗទៀតរវាងកម្ពុជា និងប៉ាគីស្ថាន។

សម្ដេចធិបតី និងរដ្ឋមន្ត្រីប៉ាគីស្ថាន ក៏បានពិភាក្សាពីការជំរុញការពង្រឹងនិងពង្រីកកិច្ចសហប្រតិបត្តិការលើវិស័យសំខាន់ជាច្រើនរួមមាន ជាអាទិ៍៖ វិស័យសេដ្ឋកិច្ច ពាណិជ្ជកម្ម វិនិយោគ សុខាភិបាល អប់រំ កសិកម្ម បច្ចេកវិទ្យា កម្មន្តសាល ទេសចរណ៍ និងការតភភ្ជាប់រវាងប្រជាជននិងប្រជាជន៕

The post សម្ដេចធិបតី ប្រាប់រដ្ឋមន្ត្រីពាណិជ្ជកម្មប៉ាគីស្ថាន ពីការគាំទ្ររបស់រដ្ឋចំពោះវិស័យឯកជននៅកម្ពុជា appeared first on Kampuchea Thmey Daily.

ប៉ាគីស្ថានប្ដេជ្ញាលើកកម្ពស់ ទំនាក់ទំនងពាណិជ្ជកម្មវិនិយោគជាមួយកម្ពុជា

deth leng — Mon, 20 Jan 2025 06:58:45 +0000

លោក ជែម កាម៉ាល់ ខាន់ (Jam Kamal Khan) រដ្ឋមន្រ្តីក្រសួងពាណិជ្ជកម្មប៉ាគីស្ថានបានប្ដេជ្ញាលើកកម្ពស់ទំនាក់ទំនងពាណិជ្ជកម្មវិនិយោគជាមួយកម្ពុជា តាមរយៈការជំរុញធុរជនប៉ាគីស្ថានមកទស្សនកិច្ចនៅកម្ពុជា ក៏ដូចជាការផ្លាស់ប្តូរធុរជនរវាងប្រទេសទាំងពីរ ដើម្បីឱ្យក្លាយជាមូលដ្ឋាននៃការពង្រឹងទំនាក់ទំនងរវាងប្រជាជន និងប្រជាជន និងរវាងរដ្ឋាភិបាល និងរដ្ឋាភិបាល។

លោករដ្ឋមន្ត្រីបានលើកឡើងក្នុងពេលជួបសម្ដែងការគួរសមជាមួយសម្ដេចតេជោ ហ៊ុន សែន ប្រធានព្រឹទ្ធសភា នៅព្រឹកថ្ងៃទី ២០ ខែមករា ឆ្នាំ ២០២៥ នៅវិមានព្រឹទ្ធសភា រាជធានីភ្នំពេញ។

សម្តេចតេជោ ហ៊ុន សែន មានប្រសាសន៍ថា ទស្សនកិច្ចការងារ និងលទ្ធផលនៃកិច្ចប្រជុំលើកទី១នេះ នឹងរួមចំណែកពង្រឹងទំនាក់ទំនងដ៏យូរអង្វែងរវាងកម្ពុជា-ប៉ាគីស្ថានបន្ថែមទៀត។

សម្តេចតេជោបានលើកឡើងអំពីការកំណត់យកការទូតសភា ជាអាទិភាពការងារមួយរួមចំណែកជាមួយរាជរដ្ឋាភិបាលកម្ពុជានៅក្នុងកិច្ចខិតខំពង្រឹងការងារការទូត នៅក្នុងបរិបទពិភពលោកលោកបច្ចុប្បន្ន ដែលមានការវិវត្តប្រែប្រួលឆាប់រហ័ស ស្មុគស្មាញ មិនប្រាកដប្រជា និងវិលវល់ចុះឡើង។

លោក Jam Kamal Khan បានវាយតម្លៃខ្ពស់ចំពោះតួនាទីដ៏សំខាន់របស់សម្តេចតេជោ ដែលបានជួយរួមចំណែក ដល់ការពង្រីងនិងពង្រីកទំនាក់ទំនងដ៏យូរអង្វែងនៃ ប្រទេសទាំងពីរ។ លោករដ្ឋមន្រ្តី ក៏បានសម្តែងនូវការអបអរសាទរចំពោះភាពរីកចម្រើនអស្ចារ្យរបស់កម្ពុជា ក្រោមការដឹកនាំរបស់ សម្តេចតេជោ។

លោករដ្ឋមន្ត្រីថ្លែងថា៖ «ប៉ាគីស្ថាននឹងខិតខំលើកកម្ពស់កិច្ចសហប្រតិបត្តិការជាមួយតំបន់ រួមទាំងកម្ពុជា ដោយសង្កេតឃើញអំពីកាលានុវត្តភាពជាច្រើនរវាងប្រទេសទាំងពីរ និងផលបច្ច័យសេដ្ឋកិច្ចរបស់តំបន់ ដែលកើតចេញពីគោលនយោបាយសេដ្ឋកិច្ចរបស់ប្រទេសមហាអំណាច»។

លោករដ្ឋមន្រ្តីបន្ថែមថា ប៉ាគីស្ថាននឹងលើកកម្ពស់ទំនាក់ទំនងពាណិជ្ជកម្មវិនិយោគជាមួយកម្ពុជា តាមរយៈការជំរុញធុរជនប៉ាគីស្ថានមកទស្សនកិច្ចនៅកម្ពុជា ក៏ដូចជាការផ្លាស់ប្តូរធុរជនរវាងប្រទេសទាំងពីរ ដើម្បីឱ្យក្លាយជាមូលដ្ឋាននៃការពង្រឹងទំនាក់ទំនងរវាងប្រជាជន និងប្រជាជន និងរវាងរដ្ឋាភិបាល និងរដ្ឋាភិបាល។ ដោយកម្ពុជា និងប៉ាគីស្ថាន ទទួលបានរបបអនុគ្រោះពន្ធ (GSP) នោះ លោករដ្ឋមន្រ្តី បានលើកឡើងបន្ថែមថា កម្ពុជា និងប៉ាគីស្ថាន គួរប្រើប្រាស់ឱ្យអស់លទ្ធភាពនូវរបបអនុគ្រោះពន្ធនេះ។

លោករដ្ឋមន្រ្តី ក៏បានលើកឡើងអំពីភាពស្រដៀងគ្នានៃសេដ្ឋកិច្ចប៉ាគីស្ថាន និងកម្ពុជា ដូចជាការអភិវឌ្ឍលើវិស័យកសិកម្ម វាយនភ័ណ្ឌ និងកាត់ដេរស្បែកជើងជាដើម។

លោករដ្ឋមន្រ្តីបានលើកឡើងអំពីស្ថានភាពសេដ្ឋកិច្ចរបស់ប៉ាគីស្ថាន និងកិច្ចខិតខំប្រឹងប្រែងរបស់ប៉ាគីស្ថាននៅក្នុងការលើកកម្ពស់កិច្ចសហប្រតិបត្តិការពាណិជ្ជកម្មជាមួយបណ្តាប្រទេស និងតំបន់នានា។

ជាការឆ្លើយតប សម្តេចតេជោ បានថ្លែងអំណរគុណលោករដ្ឋមន្រ្តី ចំពោះការលើកឡើងអំពីវឌ្ឍនភាពនៃទំនាក់ទំនង និងកិច្ចសហប្រតិបត្តិការល្អរវាងប្រទេសយើងទាំងពីរ ជាពិសេស ការវាយតម្លៃខ្ពស់លើតួនាទីសំខាន់របស់សម្តេច ក្នុងការពង្រឹងទំនាក់ទំនងរវាងប្រទេសទាំងពីរ។

សម្តេចបានផ្តល់អនុសាសន៍ថា កម្ពុជា-ប៉ាគីស្ថានគួរតែចាប់យកការពង្រឹងទំនាក់ទំនងសេដ្ឋកិច្ច ពាណិជ្ជកម្ម និងវិនិយោគ ជាកំណល់លើកកម្ពស់ទំនាក់ទំនងនយោបាយរវាងប្រទេសទាំងពីរបន្ថែមទៀត។

នៅក្នុងបរិបទេនេះ សម្តេច បានសម្តែងនូវក្តីសង្ឃឹមថា គណៈកម្មាធិការពាណិជ្ជកម្មចម្រុះនៃប្រទេសទាំងពីរនឹងពិភាក្សាគ្នាពិនិត្យលទ្ធភាពជ្រើសរើសយកវិស័យណាដែលប្រទេសទាំងពីរធ្វើកិច្ចសហប្រតិបត្តិការ ជាមួយគ្នាបាន ដើម្បីឱ្យស័ក្តិសមទៅនឹងសក្តានុពលដែលប្រទេសទាំងពីរមាន។

សម្តេចតេជោបានបន្ថែមថា នៅពេលខាងមុខ គណៈកម្មាធិការចម្រុះ គួរធ្វើការពិនិត្យលើ កិច្ចព្រមព្រៀងស្តីពីការគាំពារអ្នកវិនិយោគ និងការមិនយកពន្ធត្រួតស៊ីគ្នាជាដើម ដើម្បីជំរុញការវិនិយោគទ្វេភាគី និងជំរុញការធ្វើសមាហរណកម្មសេដ្ឋកិច្ចរបស់ប្រទេសទាំងពីរទៅក្នុងក្របខណ្ឌតំបន់ និងពិភពលោកបន្ថែមទៀត។

ទន្ទឹមគ្នានេះ សម្តេចតេជោ ក៏បានលើកឡើងដើម្បីជាការគិតគូរពិចារណាផងដែរអំពីភាពប្រហាក់ប្រហែលគ្នា ឬលក្ខណៈស្រដៀងគ្នានៃសេដ្ឋកិច្ចរបស់កម្ពុជា-ប៉ាគីស្ថាន ដែលភាគីទាំងពីរត្រូវធ្វើយ៉ាងណាឱ្យសេដ្ឋកិច្ចកម្ពុជា-ប៉ាគីស្ថាន មានលក្ខណៈបំពេញបន្ថែមឱ្យគ្នា ជាជាងការប្រកួតប្រជែងគ្នា ដើម្បីចៀសវាងនូវការប៉ះពាល់ទៅលើផលប្រយោជន៍នៃប្រទេសទាំងពីរ។

សម្តេចតេជោ ហ៊ុន សែន បានលើកឡើងអំពីការវិវឌ្ឍវិស័យសេដ្ឋកិច្ច និងពាណិជ្ជកម្មរបស់កម្ពុជា ដែលមានការរីកចម្រើនជាលំដាប់ក្នុងរយៈពេលកន្លងមក។

ជាមួយគ្នានេះ សម្តេចតេជោ បានគូសបញ្ជាក់អំពីការខិតខំពង្រឹងភាពធន់នៃសេដ្ឋកិច្ចរបស់កម្ពុជា តបទៅនឹងរបត់នយោបាយសេដ្ឋកិច្ចរបស់ប្រទេសធំៗ និងស្ថានភាពនៃរបបអនុគ្រោះពន្ធផងដែរ។

សម្តេចតេជោ ក៏បានជម្រាបជូនអំពីប្រវត្តិសាស្រ្ត និងការកសាង និងថែរក្សាសន្តិភាព និងស្ថិរភាពកម្ពុជារយៈពេលវែង និងមូលដ្ឋាននៃការផ្ទេរអំណាចរបស់សម្តេច ជូនថ្នាក់ដឹកនាំរាជរដ្ឋាភិបាលជំនាន់ថ្មី។

សម្តេច ក៏បានសម្តែងនូវភាពជឿជាក់ចំពោះសមត្ថភាពរបស់ថ្នាក់ដឹកនាំជំនាន់ថ្មីទាំងនោះ ក្នុងកិច្ចខិតខំលើកកម្ពស់ការអភិវឌ្ឍជូនជាតិមាតុភូមិ។

សម្តេចតេជោបានលើកឡើងផងដែរអំពីស្ថានភាពគោលនយោបាយសេដ្ឋកិច្ចអន្តរជាតិនានា ដូចជាគោលនយោបាយរបស់សហរដ្ឋអាមេរិក តាមរយៈការឡើងកាន់តំណែងសាជាថ្មីរបស់ លោកប្រធានាធិបតី ដូណាល់ ត្រាំ និងការវិវត្តរបស់ក្រុមប្រទេស BRICS ជាដើម៕

The post ប៉ាគីស្ថានប្ដេជ្ញាលើកកម្ពស់ ទំនាក់ទំនងពាណិជ្ជកម្មវិនិយោគជាមួយកម្ពុជា appeared first on Kampuchea Thmey Daily.