យោងតាមសេចក្តីប្រកាសព័ត៌មានរបស់ក្រសួង ក្នុងអំឡុងពេលនៃជំនួបពិភាក្សា រដ្ឋមន្ត្រីក្រសួងអធិការកិច្ច បានសម្តែងការស្វាគមន៍យ៉ាងកក់ក្តៅ និងបានអបអរសាទរចំពោះ លោកអគ្គរដ្ឋទូត ដែលត្រូវបានតែងតាំងជា ឯកអគ្គរដ្ឋទូតវិសាមញ្ញ និងពេញសមត្ថភាពនៃសាធារណរដ្ឋសិង្ហបុរីប្រចាំព្រះរាជាណាចក្រកម្ពុជា។

ទន្ទឹមនេះលោករដ្ឋមន្ត្រី បានបង្ហាញនូវការពេញចិត្តចំពោះចំណងមិត្តភាពដ៏យូរអង្វែង និងកិច្ចសហប្រតិបត្តិការលើគ្រប់វិស័យរវាងកម្ពុជា និងសិង្ហបុរី ដែលបានបង្កើតឡើងតាំងពីឆ្នាំ១៩៦៥ ហើយបាននិងកំពុងបន្តរីកចម្រើនយ៉ាងស៊ីជម្រៅលើវិស័យជាច្រើន រួមមាន៖ ពាណិជ្ជកម្ម វិនិយោគ សន្តិសុខ អប់រំ ទេសចរណ៍ និងនវានុវត្តន៍ឌីជីថល។

ជាមួយគ្នានេះ លោកបានបង្ហាញនូវបំណងក្នុងការសហការយ៉ាងជិតស្និទ្ធជាមួយ លោកឯកអគ្គរដ្ឋទូត ដើម្បីពង្រឹងចំណងមិត្តភាព និងកិច្ចសហប្រតិបត្តិការរវាងប្រទេសទាំងពីរឱ្យកាន់តែរឹងមាំបន្ថែមទៀត ជាពិសេសការជំរុញកិច្ចសហប្រតិបត្តិការក្នុងវិស័យអធិការកិច្ច។

ជាការឆ្លើយតប លោកឯកអគ្គរដ្ឋទូត បានថ្លែងអំណរគុណយ៉ាងជ្រាលជ្រៅចំពោះលោករដ្ឋមន្រ្តី និងបានបញ្ជាក់ពីការគាំទ្រចំពោះគំនិតផ្តួចផ្ដើមយុទ្ធសាស្ត្ររបស់ក្រសួង ព្រមទាំងបាន បញ្ជាក់ពីការប្តេជ្ញាចិត្តក្នុងការពង្រឹងកិច្ចសហប្រតិបត្តិការក្នុងវិស័យអធិការកិច្ច ជាពិសេសកិច្ចសហប្រតិបត្តិការរវាង ក្រសួងអធិការកិច្ច ជាមួយស្ថាប័នពាក់ព័ន្ធនៅប្រទេសសិង្ហបុរី និងបានលើកឡើងអំពីយន្តការអភិបាលកិច្ចក្នុងវិស័យសាធារណៈរបស់ប្រទេសសិង្ហបុរីផងដែរ។

បន្ថែមពីនេះ ភាគីទាំងពីរក៏បានផ្លាស់ប្តូរមតិយោបល់លើបញ្ហាតំបន់ និងសកល ដែលជាក្តីបារម្ភរួមគ្នា និងវឌ្ឍនភាព ក្នុងក្របខណ្ឌនៃកិច្ចសហប្រតិបត្តិការអាស៊ានផងដែរ។

ជាកិច្ចបញ្ចប់ ភាគីទាំងពីរបានបញ្ជាក់ជាថ្មីនូវការប្ដេជ្ញាចិត្តក្នុងការបន្តពង្រឹងកិច្ចសហប្រតិបត្តិការរវាង កម្ពុជា និងសិង្ហបុរី ក្នុងវិស័យអធិការកិច្ច ដើម្បីជាប្រយោជន៍ទៅវិញទៅមកសម្រាប់ប្រទេសទាំងពីរ និងពង្រីកទំនាក់ទំនងរវាងប្រទេសទាំងពីរឱ្យកាន់តែប្រសើរឡើងបន្ថែមទៀត៕

The post កម្ពុជា-សិង្ហបុរី ពង្រឹងចំណងមិត្តភាព និងជំរុញកិច្ចសហប្រតិបត្តិការលើវិស័យអធិការកិច្ច appeared first on Kampuchea Thmey Daily.

ក្នុងជំនួបទ្វេភាគីនៅកោះសេប៊ូ ប្រទេសហ្វីលីពីន ឯក្រៅកិច្ចប្រជុំកំពូលអាស៊ាន កាលពីរសៀលថ្ងៃទី៧ ខែឧសភា សម្ដេចធិបតី ហ៊ុន ម៉ាណែត បានប្រាប់នាយករដ្ឋមន្រ្តីសិង្ហបុរី លោក Lawrence Wong ថា កម្ពុជានឹងចាប់ផ្ដើមអនុវត្តច្បាប់កាតព្វកិច្ចយោធា ក្នុងឆ្នាំ២០២៦នេះ ហើយសម្ដេចសង្ឃឹមថា កម្ពុជានឹងទទួលបានការចែករំលែកបទពិសោធពីប្រទេសសិង្ហបុរីបន្ថែមទៀត ដើម្បីធានានូវភាពរលូនសម្រាប់ការអនុវត្ត។

យោងតាមខ្លឹមសារជំនួប ដែលបង្ហាញលើបណ្ដាញសង្គមផ្លូវការរបស់សម្ដេចនាយករដ្ឋមន្ត្រីកម្ពុជា គឺមិនបានបញ្ជាក់ពីការឆ្លើយតបពីភាគីសិង្ហបុរីនោះទេជុំវិញការលើកឡើងរបស់នាយករដ្ឋមន្ត្រីកម្ពុជាខាងលើ​។ ប៉ុន្តែ ក្នុងជំនួបនោះ លោកនាយករដ្ឋមន្ត្រី Lawrence Wong បានបញ្ជាក់ពីការប្ដេជ្ញាចិត្តរបស់សិង្ហបុរី​ ក្នុងការបន្តជំរុញសន្ទុះនូវទំនាក់ទំនងនិងកិច្ចសហប្រតិបត្តិការដ៏ជិតស្និទ្ធជាមួយកម្ពុជាឱ្យកាន់តែរឹងមាំបន្ថែមទៀត។

គួរកត់សម្គាល់ថា កម្ពុជានឹងត្រៀមអនុវត្តច្បាប់កាតព្វកិច្ចយោធាថ្មី ដោយបុរសអាយុចាប់ពី១៨ឆ្នាំ ដល់២៥ឆ្នាំ ត្រូវបំពេញកាតព្វកិច្ចរយៈពេល២៤ខែ ខណៈអ្នកគេចវេសចំពោះកាតព្វកិច្ចនេះ ច្បាប់បានកំណត់អាចប្រឈមទោសជាប់ពន្ធនាគាររហូតដល់៥ឆ្នាំ។ រីឯស្ត្រី មិនតម្រូវជាកាតព្វកិច្ចឡើយ តែត្រូវបានលើកទឹកចិត្តឱ្យចូលរួមតាមគោលការណ៍ស្ម័គ្រចិត្ត។​

ប៉ុន្តែច្បាប់ថ្មីនេះ មិនទាន់បានចូលជាធរមាននៅឡើយទេ គិតមកពេលនេះ ខណៈសេចក្ដីព្រាងច្បាប់កំពុងស្ថិតក្នុងសមត្ថកិច្ចរបស់សភា ដើម្បីសុំការអនុម័តពីសមាជិកសភាទាំងពីរថ្នាក់ គឺរដ្ឋសភា និងព្រឹទ្ធសភា មុនថ្វាយព្រះមហាក្សត្រឡាយព្រះហស្តលេខាប្រកាសឱ្យប្រើប្រាស់ជាផ្លូវការ។

ច្បាប់នេះ នឹងត្រូវបានប្រកាសជាការប្រញាប់ ដើម្បីជំនួសឱ្យច្បាប់ចាស់ស្ដីពីកាតព្វកិច្ចយោធា ដែលត្រូវបានប្រកាសឱ្យប្រើកាលពីឆ្នាំ២០០៦ ដែលច្បាប់ចាស់នោះ ពុំទាន់គ្របដណ្តប់គ្រប់ជ្រុងជ្រោយនៅឡើយ ដែលតម្រូវឱ្យមានការរៀបចំច្បាប់នេះជាថ្មី។ ការធ្វើបច្ចុប្បន្នភាពច្បាប់នេះគឺជាការចាំបាច់ដើម្បីពង្រឹងខឿនការពារជាតិ ការពារបូរណភាពទឹកដី និងបណ្តុះស្មារតីស្នេហាជាតិដល់យុវជនជំនាន់ក្រោយ។​

សម្ដេចធិបតី ​ហ៊ុន ម៉ាណែត បានចាត់ទុកថា ច្បាប់ស្ដីពីកាតព្វកិច្ចយោធា ជា​ផ្នែក​មួយ​នៃ​ការ​កសាង​កម្លាំង​ទ័ព​នៅ​កម្ពុជា​ ដែល​នឹង​ជួយឱ្យមាន​យោធិន​គ្រប់​គ្រាន់​សម្រាប់​បំពេញ​ការងារ និងជួយ​កសាង​កម្លាំង​ធនធាន​ ដែល​មាន​វិន័យ​ចូល​ក្នុង​សង្គម​ផងដែរ៕

ដោយ៖ ធឿន វ៉ាន់សុង

The post កម្ពុជាសុំបទពិសោធពីសិង្ហបុរីទាក់ទងនឹងការអនុវត្តច្បាប់កាតព្វកិច្ចយោធា appeared first on Kampuchea Thmey Daily.

ឯកអគ្គរដ្ឋទូតសិង្ហបុរី បានវាយតម្លៃខ្ពស់ចំពោះកិច្ចខិតខំប្រឹងប្រែងរបស់រាជរដ្ឋាភិបាលកម្ពុជា ជាពិសេសក្រសួងបរិស្ថាន ដែលបានអនុវត្ត “យុទ្ធសាស្ត្រចក្រាវិស័យបរិស្ថាន” របស់រាជរដ្ឋាភិបាលកម្ពុជា ដើម្បីជំរុញសកម្មភាពលើភាពស្អាត ភាពបៃតង និងការដោះស្រាយបញ្ហាប្រែប្រួលអាកាសធាតុ ដើម្បីជំរុញការអភិវឌ្ឍប្រកបដោយចីរភាព។

ក្នុងឱកាសនេះ លោក អ៊ាង សុផល្លែត បានលើកឡើងអំពីគម្រោងដើម្បីពង្រឹងកិច្ចសហប្រតិបត្តិការលើវិស័យអាទិភាព ដែលរួមមាន ការគ្រប់គ្រងសំណល់ ការទប់ស្កាត់ការបំពុលទឹក និងខ្យល់សាធារណៈ ក្នុងការជំរុញសកម្មភាពឆ្ពោះទៅភាពស្អាត ការកាត់បន្ថយការប្រើប្រាស់ប្លាស្ទិក ការប្រមូលទុកដាក់ និងគ្រងសំរាមនិងសំណល់ប្លាស្ទិកឱ្យបានត្រឹមត្រូវ។ 

ជាមួយគ្នានេះ រដ្ឋមន្រ្តីបរិស្ថាន បានជំរុញកិច្ចសហប្រតិបត្តិការលើការងារទីផ្សារកាបូន រួមទាំងសកម្មភាពកសាងភាពធន់នឹងការប្រែប្រួលអាកាសធាតុ ដើម្បីជំរុញការអភិវឌ្ឍប្រកបដោយចីរភាព និងការពង្រឹងសមត្ថភាពលើការប្រើប្រាស់បច្ចេកវិទ្យា ដើម្បីការពារនិងអភិរក្សាបរិស្ថាននិងធនធានធម្មជាតិរបស់កម្ពុជា។ រដ្ឋមន្រ្តី អ៊ាង សុផល្លែត បានថ្លែងអំណរគុណចំពោះការបង្ហាញការគាំទ្ររបស់ប្រទេស សិង្ហបុរី ដើម្បីពិនិត្យ និងដោះស្រាយលើបញ្ហាបរិស្ថាន រួមទាំងការគ្រប់គ្រងគុណភាពទឹកទន្លេមេគង្គ៕

The post សិង្ហបុរីបង្ហាញការគាំទ្រយ៉ាងសកម្មដល់គម្រោងការពារបរិស្ថាន និងការអភិវឌ្ឍប្រកបដោយចីរភាពនៅកម្ពុជា appeared first on Kampuchea Thmey Daily.

ក្នុងជំនួបនេះ លោក ឆៃ ស៊ីណារិទ្ធ បានជម្រាបជូនអំពីយន្តការ និងលិខិតបទដ្ឋានគតិយុត្តរបស់កម្ពុជា ក្នុងការប្រយុទ្ធប្រឆាំងការឆបោកតាមប្រព័ន្ធបច្ចេកវិទ្យា ជាពិសេសតួនាទីរបស់ គ.ប.ឆ.ប. និងច្បាប់ថ្មីពាក់ព័ន្ធ ដែលជាឧបករណ៍សំខាន់ក្នុងការបង្ក្រាបក្រុមឧក្រិដ្ឋជន ទាំងមេខ្លោង អ្នកសមគំនិត និងអ្នកពាក់ព័ន្ធ ដើម្បីសម្អាតបណ្តាញឧក្រិដ្ឋកម្មឱ្យដល់ឬសគល់ និងទប់ស្កាត់មិនឱ្យកើតឡើងវិញ។

លោកក៏បានលើកឡើងពីទិសដៅបន្ត និងសារៈសំខាន់នៃកិច្ចសហប្រតិបត្តិការជាមួយបណ្តាប្រទេស និងភាគីពាក់ព័ន្ធ ដើម្បីរួមគ្នាស្រាវជ្រាវ ស៊ើបអង្កេត និងបង្ក្រាបបណ្តាញឧក្រិដ្ឋកម្មឆ្លងដែន រួមមាន ការលាងសម្អាតប្រាក់ និងជួញដូរមនុស្ស ឱ្យមានប្រសិទ្ធភាព និងចីរភាព។

ជាការឆ្លើយតប ឯកអគ្គរដ្ឋទូតសិង្ហបុរី បានសម្តែងការកោតសរសើរចំពោះកិច្ចខិតខំប្រឹងប្រែងរបស់រាជរដ្ឋាភិបាលកម្ពុជា និងទទួលស្គាល់ថា ការឆបោកតាមប្រព័ន្ធបច្ចេកវិទ្យា ជាបញ្ហាសកលដែលត្រូវការកិច្ចសហប្រតិបត្តិការយ៉ាងជិតស្និទ្ធ។ លោកក៏បានគាំទ្រការបង្កើត គ.ប.ឆ.ប. និងការអនុវត្តច្បាប់ថ្មី ដែលបង្ហាញពីការតាំងចិត្តច្បាស់លាស់របស់កម្ពុជា។

សិង្ហបុរីក៏បានបញ្ជាក់ពីការត្រៀមខ្លួនក្នុងការគាំទ្រកម្ពុជា តាមរយៈការកសាងសមត្ថភាពមន្ត្រី ការចែករំលែកព័ត៌មាន និងបទពិសោធន៍ ព្រមទាំងការអនុវត្តសកម្មភាពរួមនានា។

ជាទីបញ្ចប់ ភាគីទាំងពីរបានផ្លាស់ប្តូរយោបល់ និងគំនិតផ្តួចផ្តើម ពាក់ព័ន្ធទិសដៅកិច្ចសហប្រតិបត្តិការ ទាំងកម្រិតទ្វេភាគី និងពហុភាគី ក្នុងការប្រយុទ្ធប្រឆាំងការឆបោកតាមប្រព័ន្ធបច្ចេកវិទ្យា៕

The post កម្ពុជា–សិង្ហបុរី ពង្រឹងកិច្ចសហប្រតិបត្តិការប្រឆាំងការឆបោកតាមប្រព័ន្ធបច្ចេកវិទ្យា appeared first on Kampuchea Thmey Daily.

ជំនួបពិភាក្សានេះ ធ្វើឡើងនាថ្ងៃទី ២៧ ខែមេសា ឆ្នាំ ២០២៦ នាឱកាស លោក ប្រាក់ សុខុន បានអញ្ជើញដឹកនាំគណៈប្រតិភូចូលរួមកិច្ចប្រជុំរដ្ឋមន្ត្រីការបរទេសអាស៊ាន-សហភាពអឺរ៉ុប លើកទី២៥ នៅទីក្រុងបានដា ស៊េរីបេហ្កាវ៉ាន់ ពីថ្ងៃទី២៧ ដល់ថ្ងៃទី២៨ ខែមេសា ឆ្នាំ២០២៦ និងអញ្ជើញបំពេញទស្សនកិច្ចផ្លូវការនៅប្រទេសប្រ៊ុយណេដារូស្សាឡាម ពីថ្ងៃទី២៩ ដល់ថ្ងៃទី៣០ ខែមេសា ឆ្នាំ២០២៦។

ក្នុងជំនួបខាងលើនេះ លោកឧបនាយករដ្ឋមន្ត្រី ក៏បានជម្រាបជូនអំពីបច្ចុប្បន្នភាពនៃជម្លោះព្រំដែនកម្ពុជា–ថៃផងដែរ។ គួរឱ្យកត់សម្គាល់ថា រាល់ពេលមានជំនួបជាមួយថ្នាក់ដឹកនាំកំពូលៗនៃប្រទេសមិត្ត ក៏ដូចជាស្ថាប័នអន្តរជាតិ ភាគីកម្ពុជាតែងតែជម្រាបអំពីការវិវត្តនៃស្ថានការណ៍ព្រំដែន ខណៈដែលភាគីថៃនៅតែបន្តសកម្មភាពខុសច្បាប់ ដោយរំលោភលើបទឈប់បាញ់ និងចូលលុកលុយក្នុងដែនអធិបតេយ្យភាពរបស់កម្ពុជា។ ជាពិសេស មានការរារាំងពលរដ្ឋខ្មែរ ដែលរស់នៅតាមបន្ទាត់ព្រំដែន មិនឱ្យត្រឡប់ទៅកាន់លំនៅឋានរបស់ពួកគេវិញ ហើយបន្តស្នាក់នៅក្នុងជម្រកបណ្តោះអាសន្ន។

គួរជម្រាបផងដែរថា ចាប់តាំងពីមានជម្លោះព្រំដែនកម្ពុជា–ថៃ ពោលថៃឈ្លានពានទឹកដីកម្ពុជា បានធ្វើឱ្យមានការបិទច្រកទ្វារព្រំដែនគោកទ្វេភាគី។ ជាមួយគ្នានេះ ការដោះដូរទំនិញរវាងប្រទេសទាំងពីរ បានធ្លាក់ចុះយ៉ាងគំហុកជាង ៤២% នៅដើមឆ្នាំ ២០២៦ បើប្រៀបធៀបទៅនឹងរយៈពេលដូចគ្នានៅឆ្នាំ ២០២៥។ ផ្ទុយទៅវិញ ការដោះដូរទំនិញរវាងកម្ពុជា និងសិង្ហបុរី បានកើនឡើងយ៉ាងគួរឱ្យកត់សម្គាល់។

ផ្អែកតាមទិន្នន័យ​របស់​អគ្គនាយកដ្ឋានគយ ​និងរដ្ឋាករកម្ពុជា ការដោះដូរទំនិញកម្ពុជា-សិង្ហបុរី ​សម្រេច​បាន​នូវទំហំទឹកប្រាក់ជាង ៥៥៥ លានដុល្លារ នៅរយៈពេល ៣ ខែ ឆ្នាំ ២០២៦ កើនឡើង ១៩១% ​ធៀបនឹងរយៈពេលដូចគ្នា ក្នុងឆ្នាំ ២០២៥ ដែលឆ្លុះបញ្ចាំងពីតម្រូវ​ការ​កើន​ឡើងនៃប្រទេសទាំងពីរ ​ខណៈកម្ពុជា​នៅតែបន្តរក្សាបានទីផ្សារសំខាន់ៗ។​
កំណើននេះ គិតត្រឹមពីខែមករា ដល់ខែមីនា ឆ្នាំ ២០២៦ ដោយក្នុងនោះកម្ពុជានាំចេញ​ទៅ​សិង្ហបុរី មានតម្លៃជាង ១៨ លានដុល្លារ កើនឡើង ២៤,២% ចំណែកសិង្ហបុរីនាំចូល​មក​វិញ​មានតម្លៃជាង ៥៣៧ លានដុល្លារ កើន ២០៥%៕

The post កម្ពុជា-សិង្ហបុរី ពេញចិត្តចំពោះការបន្តរីកចម្រើនទំនាក់ទំនង និងប្តេជ្ញារឹតចំណងមិត្តភាពឱ្យស៊ីជម្រៅ appeared first on Kampuchea Thmey Daily.

លោក ផាង ឈីវី លើកឡើងថា ក្នុងអាណត្តិរបស់លោកជាឯកអគ្គរដ្ឋទូត នឹងខិតខំប្រឹងប្រែងកៀងគរអ្នកវិនិយោគសិង្ហបុរីឱ្យមកវិនិយោគនៅកម្ពុជាកាន់តែច្រើនបន្ថែមទៀត។ លោក ក៏បញ្ជាក់ពីការប្ដេជ្ញាចិត្តខិតខំប្រឹងប្រែងក្នុងការពង្រីកលើផ្នែកទំនាក់ទំនងរវាងប្រជាជននិងប្រជាជនឱ្យកាន់តែមានភាពស្អិតល្មួតតាមរយៈបង្កើតនូវផ្នែកទេសចរណ៍ឱ្យប្រជាជនប្រទេសទាំងពីរធ្វើទស្សនាទៅវិញទៅមកកាន់តែច្រើនថែមទៀតផងដែរ។

លោកឯកអគ្គរដ្ឋទូត ក៏បានគូសរំលេចពីទំនាក់ទំនងជាយូរអង្វែងរវាងកម្ពុជា និងសិង្ហបុរី ដែលកាលពីឆ្នាំ២០២៥កន្លងទៅ ប្រទេសទាំងពីរបានប្រារព្ធខួប៦០ឆ្នាំនៃការបង្កើតទំនាក់ទំនងការទូតផ្លូវការជាមួយគ្នា ហើយការផ្លាស់ប្ដូរនៃដំណើរទស្សនកិច្ចទៅវិញទៅមករវាងថ្នាក់ដឹកនាំកំពូលប្រទេសទាំងពីរ ដែលនេះគឺបានបង្ហាញយ៉ាងច្បាស់អំពីទំនាក់ទំនងដ៏រឹងមាំរវាងកម្ពុជា និងសិង្ហបុរី។

សម្តេចតេជោ ហ៊ុន សែន ប្រមុខរដ្ឋស្តីទីកម្ពុជា បានសម្ដែងនូវការពេញចិត្តចំពោះការលើកឡើងរបស់លោកឯកអគ្គរដ្ឋទូតថ្មី ចំពោះការប្ដេជ្ញាចិត្តក្នុងការពង្រីកទំនាក់ទំនងរវាងកម្ពុជា-សិង្ហបុរី ឱ្យកាន់តែរីកចម្រើន។ សម្ដេចតេជោ បានឯកភាពនូវការលើកឡើងរបស់លោក ផាង ឈីវី ចំពោះការផ្លាស់ប្ដូរនៃទស្សនកិច្ចជាញឹកញាប់រវាងថ្នាក់ដឹកនាំប្រទេសទាំងពីរ ដែលបង្ហាញយ៉ាងច្បាស់អំពីចំណងមិត្តភាពដ៏រឹងមាំនៃប្រទេសទាំងពីរ។

ក្នុងជំនួបនោះ សម្ដេចតេជោក៏បានឆ្លៀតលើកឡើងពីបញ្ហាព្រំដែនរវាងកម្ពុជានិងថៃ ហើយក៏អរគុណចំពោះសិង្ហបុរី ដែលបានចូលរួមចំណែក ជាពិសេសការបញ្ជូនអ្នកសង្កេតការណ៍ក្នុងការអង្កេតទៅលើបញ្ហាព្រំដែននេះ។

សម្ដេចតេជោ បានគូសបញ្ជាក់ទៅកាន់ឯកអគ្គរដ្ឋទូតរបស់សិង្ហបុរីនូវជំហររបស់កម្ពុជាក្នុងការដោះស្រាយបញ្ហាព្រំដែនជាមួយថៃ គឺការរក្សានូវបទឈប់បាញ់ឱ្យមានប្រសិទ្ធភាពយូរអង្វែង ហើយកម្ពុជានៅតែរក្សាចំហ ក្នុងការដោះស្រាយបញ្ហាដោយសន្តិវិធី តាមរយៈការចរចា ក្នុងយន្តការដែលមានស្រាប់រវាងប្រទេសទាំងពីរ នាពេលកន្លងមក៕

The post ទូតថ្មីសិង្ហបុរីសន្យាពូនជ្រុំចំណងទាក់ទងកម្ពុជានិងប្រទេសរបស់លោកឱ្យកាន់រីកចម្រើន ក្នុងពេលប្រគល់សារតាំងជូនប្រមុខរដ្ឋស្ដីទី appeared first on Kampuchea Thmey Daily.

ភ្នំពេញ៖ ព្រះរាជាណាចក្រកម្ពុជានិងសាធាររណរដ្ឋសិង្ហបុរីបានដាក់ឱ្យដំណើរការជាផ្លូវការការទូទាត់ឆ្លងដែនតាមយ្យូអរកួតដំណាក់កាលទី២ដែលនឹងសម្រួលឱ្យប្រជាជនសិង្ហបុរីអាចស្តេនទូទាត់ថ្លៃទំនិញ និង សេវាតាមខេអេចយ្យូអរកួតនៃគណនីប្រាក់រៀលរបស់ពាណិជ្ជករប្រមាណជាង ៤,៥ លានកន្លែងនៅ ទូទាំងប្រទេសកម្ពុជាប្រកបដោយភាពងាយស្រួល លឿនរហ័សទាន់ចិត្តនិងសុវត្តិភាព។

ពិធីដាក់ឱ្យដំណើរការជាផ្លូវការការទូទាត់ឆ្លងដែនតាមយ្យូអរកួតដំណាក់កាលទី២នេះបានប្រព្រឹត្តិទៅនៅព្រឹកថ្ងៃទី៣០ខែមីនាឆ្នាំ២០២៦នៅសណ្ឋាគារឡឺរ៉ូយ៉ារាជធានីភ្នំពេញក្រោមអធិបតីភាព លោកស្រីបណ្ឌិត ជា សិរី ទេសាភិបាល ធនាគារជាតិនៃកម្ពុជាដោយមានការអញ្ជើញចូលរួមពីតំណាងស្ថានទូតនៃសាធារណរដ្ឋសិង្ហបុរីប្រចាំ ព្រះរាជាណាចក្រកម្ពុជា ក្រសួងទេសចរណ៍ សមាគមសណ្ឋាគារ សមាគមភោជនីយដ្ឋាន សមាគម ធនាគារនៅកម្ពុជា សមាគមមីក្រូហិរញ្ញវត្ថុកម្ពុជា សមាគមសហព័ន្ធហិរញ្ញវត្ថុនិងបច្ចេកវិទ្យានៃកម្ពុជា ព្រមទាំងគ្រឹះស្ថានធនាគារនិងហិរញ្ញវត្ថុនៃប្រទេសកម្ពុជានិងសិង្ហបុរី សរុបប្រមាណ ១៩០ រូប។

ជាមួយគ្នានេះ លោក Chia Der Jiun នាយកគ្រប់គ្រងនៃអាជ្ញាធររូបិយវត្ថុសិង្ហបុរី ក៏បានចូលរួម តាមប្រព័ន្ធអនឡាញ និងបានបង្ហាញពីការប្តេជ្ញាចិត្តក្នុងការពង្រឹងកិច្ចសហប្រតិបត្តិការហិរញ្ញវត្ថុក្នុង តំបន់អាស៊ាន និងការតភ្ជាប់ប្រព័ន្ធទូទាត់ឌីជីថលឱ្យកាន់តែរឹងមាំ។

យោងតាមសេចក្តីប្រកាសព័ត៍មានបានឱ្យដឹងថាការដាក់ឱ្យដំណើរការជាផ្លូវការការទូទាត់ឆ្លងដែនតាមយ្យអរកួតដំណាក់កាលទី២ (សិង្ហបុរី ស្កេនខេអេចយ្យអរកួតប្រទេសកម្ពុជា) នឹងសម្រួលឱ្យប្រជាជនសិង្ហបុរីអាចស្តេនទូទាត់ថ្លៃទំនិញ និង សេវាតាមខេអេចយ្យអរកួតនៃគណនីប្រាក់រៀលរបស់ពាណិជ្ជករប្រមាណជាង ៤,៥ លានសំន្លែងនៅ ទូទាំងប្រទេសកម្ពុជា ដោយប្រើប្រាស់កម្មវិធីធនាគារចល័តរបស់គ្រឹះស្ថាននិងហិរញ្ញវត្ថុប្រទេសសិង្ហបុរីប្រកបដោយភាពងាយស្រួល រហ័ស និងសុវត្ថិភាពដែលនឹងរួមចំណែកពង្រីកលទ្ធភាពក្នុងការធ្វើអន្តរប្រតិបត្តិការទូទាត់ឆ្លងដែនរវាងប្រទេសទាំងពីរឱ្យកាន់តែទូលំទូលាយ។

គួរបញ្ជាក់ថាសមិទ្ធផលនេះកើតចេញពីគំនិតផ្តួចផ្តើមក្នុងការអភិវឌ្ឍគម្រោងដែលមានធនាគារទំនាក់ទំនង ចំនួន ២ រួមមាន ធនាគារអេស៊ីលីដា ភីអិលស៊ី និងធនាគារហ្វីលីព ភីអិលស៊ី ដែលមានភាគទុនិកមកពី Phillip Group សិង្ហបុរី និងប្រតិបត្តិករ Liquid នៃប្រទេសសិង្ហបុរី ដែលសបញ្ជាក់ពីកិច្ចខិតខំប្រឹងប្រែង រួមគ្នាទាំងវិស័យសាធារណៈនិងវិស័យឯកជន ក្នុងការពង្រឹងកិច្ចសហប្រតិបត្តិការនៃប្រទេសទាំងពីរ ឱ្យកាន់តែជិតស្និទ្ធ។ ការដាក់ឱ្យដំណើរការជាផ្លូវការដំណាក់កាលទី ២ នេះ នឹងរួមចំណែកយ៉ាងសំខាន់ ក្នុងការជំរុញការតភ្ជាប់ការទូទាត់ឆ្លងដែនជាឌីជីថលស្របតាមទស្សនវិស័យរបស់អាស៊ានក្នុងការ អភិវឌ្ឍការធ្វើអន្តរប្រតិបត្តិការទូទាត់ក្នុងតំបន់ លើកកម្ពស់ការប្រើប្រាស់រូបិយវត្ថុជាតិក្នុងការធ្វើ ប្រតិបត្តិការទូទាត់ ដើម្បីជំរុញនិងសម្រួលសកម្មភាពពាណិជ្ជកម្ម វិនិយោគ និងទេសចរណ៍រវាង ប្រទេសក្នុងតំបន់ឱ្យកាន់តែប្រសើរឡើងបន្ថែមទៀត សំដៅគាំទ្រកំណើនសេដ្ឋកិច្ចប្រកបដោយចីរភាព៕

អត្ថបទ៖សំអឿន

The post កម្ពុជា-សិង្ហបុរីដាក់ឱ្យដំណើរការជាផ្លូវការការទូទាត់ឆ្លងដែនតាមយ្យូអរកួតដំណាក់កាលទី២ appeared first on Kampuchea Thmey Daily.

រដ្ឋមន្ត្រីការបរទេសសិង្ហបុរី បានបង្ហោះសារលើទំព័រហ្វេសប៊ុកផ្លូវការ ក្រោយពីជំនួបជាមួយរដ្ឋមន្ត្រីការបរទេសកម្ពុជាដូច្នេះថា៖«យើងសង្ឃឹមថាសមាជិកអាស៊ានទាំងពីរអាចបន្តអនុវត្តលើបទឈប់បាញ់បច្ចុប្បន្ន និងដោះស្រាយភាពខុសគ្នារបស់ពួកគេដោយសន្តិវិធីតាមរយៈការសន្ទនា និងការចរចា។ »។​

គួរកត់សម្គាល់ថា សិង្ហបុរី ប្រទេសដែលមាន​ឥទ្ធិពល​នយោបាយ​​​​​​​​ដ៏​ខ្លាំង​នៅ​​​​​ក្នុងតំបន់អាស៊ាន តែងតែបង្ហាញជំហរប្រយ័ត្នប្រយែងក្នុងការអត្ថាធិប្បាយលើបញ្ហាជម្លោះរវាងកម្ពុជា-ថៃ ចាប់តាំងពីមានករណីយោធាថៃបាញ់សម្លាប់យោធិនកម្ពុជាម្នាក់ ក្នុងថ្ងៃទី២៨ ខែឧសភា ឆ្នាំ២០២៥ នៅតំបន់មុំបីក្នុងទឹកដី និងដែនអធិបតេយ្យកម្ពុជា។   ក្នុងនាមជាសមាជិកអាស៊ាន សិង្ហបុរី តែងតែអំពាវនាវឱ្យកម្ពុជា-ថៃ អត់ធ្មត់ឱ្យបានខ្ពស់បំផុត និងបន្តកិច្ចសន្ទនា ដោះស្រាយបញ្ហាដោយសន្តិវិធី ស្របតាមច្បាប់អន្តរជាតិបែបនេះ យ៉ាងហោចណាស់៥ដងមកហើយ។

កម្ពុជា-ថៃ ឯកភាពឱ្យមានបទឈប់បាញ់ត្រឹមម៉ោង១២៖០០នាទីថ្ងៃត្រង់ ថ្ងៃទី២៧ ខែធ្នូ ឆ្នាំ២០២៥ ក្រោយពីភាគីថៃបើកការវាយប្រហារទ្រង់ទ្រាយធំឈ្លានពាន បង្ខំឱ្យកម្ពុជាប្រើសិទ្ធិការពារខ្លួនឆ្លើយតបដោយអាវុធ ផ្ទុះចេញជាជម្លោះប្រដាប់អាវុធរយៈពេល២១ថ្ងៃ បណ្ដាលឱ្យពលរដ្ឋខ្មែរភៀសសឹកជាង៦៤ម៉ឺននាក់ និងបាត់បង់ជីវិតជាង៣០នាក់ របួសជិត១០០នាក់។

ត្បិតមានបទឈប់បាញ់ ប៉ុន្តែភាគីកម្ពុជា អះអាងថា ភាគីថៃ បានបំផ្លិចបំផ្លាញផ្ទះសម្បែងពលរដ្ឋខ្មែរ ហេដ្ឋារចនាសម្ព័ន្ធស៊ីវិល រាយបន្លាលួស ដាក់ទូកុងតឺន័រ ចូលជ្រៅមកក្នុងទឹកដីកម្ពុជា កាន់កាប់លើទីតាំងយ៉ាងហោចណាស់ចំនួន១៤ ក្នុងខេត្តចំនួន៤ ដូចជាខេត្តពោធិ៍សាត់ បន្ទាយមានជ័យ ឧត្ដរមានជ័យ និងព្រះវិហារ។

កាលពីពាក់កណ្ដាលខែកុម្ភៈ  សម្ដេច ហ៊ុន ម៉ាណែត នាយករដ្ឋមន្ត្រីកម្ពុជា បានប្រាប់ទីភ្នាក់ងារព័ត៌មាន AFP ថាបទឈប់បាញ់រវាងកម្ពុជា-ថៃ នៅតែមានភាព«ផុយស្រួយ»  ពីព្រោះកងទ័ពថៃ  រំលោភ​លើ​អធិបតេយ្យភាព និង​បូរណភាព​ទឹក​ដីរបស់កម្ពុជា រាយបន្លាលួស ដាក់ទូកុងទឺន័រចូលជ្រៅក្នុងទឹកដីកម្ពុជា លើសពីអ្វីដែលភាគីថៃធ្លាប់ទាមទារជាឯកតោភាគីលើខ្សែបន្ទាត់ព្រំដែនទៅទៀត។   សម្ដេច ហ៊ុន ម៉ាណែត ថា «កម្ពុជា មិនចោទប្រកាន់ថៃទេ ប៉ុន្តែវាគឺជាសេចក្ដីថ្លែងការណ៍ពិតដែលកំពុងកើតនៅលើដីជាក់ស្ដែង»។

ចាប់តាំងពីបទឈប់បាញ់បានចូលជាធរមាន កម្ពុជា តែងតែអំពាវនាវឱ្យថៃ ចូលមកដោះស្រាយបញ្ហាព្រំដែនតាមរយៈកិច្ចប្រជុំគណៈកម្មការ​ចម្រុះ​ខណ្ឌ​សីមា​ព្រំដែន​គោក ​ (​JBC) និងស្នើឱ្យចាត់បញ្ជូនក្រុមការងារវាស់វែងចម្រុះដើម្បីចុះធ្វើការងារនៅលើដីជាក់ស្តែងយ៉ាងហោចណាស់៥លើក   ប៉ុន្តែនៅថ្ងៃទី១១ ខែមីនា រដ្ឋមន្ត្រីការបរទេសថៃ Sihasak Phuangketkeow  អះអាងថា ថៃនឹងចូលកិច្ចប្រជុំនេះ ប៉ុន្តែត្រូវរង់ចាំរហូតដល់រដ្ឋាភិបាលថៃថ្មី ចូលកាន់អំណាចសិន៕

ដោយ៖ ង៉ិល ណារ៉ាត់

​

The post សិង្ហបុរីសង្ឃឹមថាកម្ពុជា-ថៃ បន្តអនុវត្តបទឈប់បាញ់ ខណៈបទឈប់បាញ់នៅតែ«ផុយស្រួយ» appeared first on Kampuchea Thmey Daily.