កម្ពុជា-អារ៉ាប៊ីសាអូឌីត Archives - Kampuchea Thmey Daily

បទវិភាគ៖ ហេតុអ្វីបានជាកម្ពុជាកំពុងបង្កើនទំនាក់ទំនងយ៉ាងស្អិតល្មួតជាមួយពិភពឥស្លាម?

hun sirivadh — Wed, 11 Feb 2026 06:11:14 +0000

កម្ពុជាកំពុងបង្កើនទំនាក់ទំនងកាន់តែជិតស្និទ្ធជាមួយបណ្ដារដ្ឋឥស្លាមសំខាន់ៗ រួមមាន អារ៉ាប៊ីសាអ៊ូឌីត ប៉ាគីស្ថាន និងតួគី នាប៉ុន្មានឆ្នាំចុងក្រោយនេះ។ ចលនានេះកើតឡើងស្របពេលដែលប៉ូលនយោបាយពិភពលោកថ្មីកំពុងលេចត្រដែតឡើងនៅតំបន់មជ្ឈិមបូព៌ា និងអាស៊ីខាងត្បូង។

សម្ដេចតេជោ ហ៊ុន សែន ស្វាគមន៍ទស្សនកិច្ចរបស់ប្រធានសភាអារ៉ាប៊ីសាអូឌីតលោក អាប់ឌុលឡា ប៊ីន ម៉ូហាម៉េដ ថ្ងៃទី១ កក្កដា ២០២៥

ក្នុងខែកុម្ភៈនេះ សកម្មភាពការទូតរវាងកម្ពុជា និងពិភពឥស្លាមមានភាពមមាញឹកគួរឱ្យកត់សម្គាល់ ដោយមានដំណើរទស្សនកិច្ចរបស់ប្រធានព្រឹទ្ធសភាប៉ាគីស្ថាន លោក ស៊ីយ៉េដ យូសាហ្វ រ៉ាហ្ស៉ា ហ្គីឡានី ហើយក្នុងសប្ដាហ៍នេះប្រធានក្រុមប្រឹក្សាធុរកិច្ចអារ៉ាប៊ីសាអ៊ូឌីតលោក Walleed Nasser Alshehri កំពុងទស្សនកិច្ចនៅកម្ពុជា ខណៈដែលឧបនាយករដ្ឋមន្ត្រី ស សុខា ក៏កំពុងបំពេញទស្សនកិច្ចនៅប្រទេសតួគីផងដែរ។

អ្នកភូមិសាស្ត្រនយោបាយលោកបណ្ឌិត ជ័យ តិច មើលឃើញថាការដែលកម្ពុជាកំពុងបង្កើនទំនាក់ទំនងជាមួយបណ្ដាប្រទេសឥស្លាមនេះ ជារឿងដែលស៊ីជម្រៅដែលលើសពីទំនាក់ទំនងសេដ្ឋកិច្ច ខណៈដែលប៉ូលថ្មីនៃអំណាចពិភពលោកកំពុងកើតឡើងចេញពីពិភពឥស្លាម។

បណ្ឌិត ជ័យ តិច

លោកថា៖ «អារ៉ាបដែលមានជាង៥០ប្រទេសនេះគឺប៉ូលថ្មីនៃពិភពលោកដែលមានសក្ដានុពល។ បច្ចុប្បន្ននេះក្រោមការផ្ដួចផ្ដើមរបស់អារ៉ាប៊ីសាអ៊ូឌីតដែលមានសហប្រតិបត្តិការជាមួយប៉ាគីស្ថានបានបង្កើតឱ្យមានកិច្ចព្រមព្រៀងមួយដែលហៅថា Military Pact គឺកិច្ចព្រមព្រៀងវិស័យយោធាដែលមានដូចណាតូអ៊ីចឹង គឺការពារគ្នាទៅវិញទៅមក។ បានចុះហត្ថលេខានៅឆ្នាំ២០២៥កន្លងទៅនេះដែលមានប៉ាគីស្ថានដែលមានមហាអំណាចនុយក្លេអ៊ែរឥស្លាមតែមួយគត់ក្នុងពិភពលោកចុះហត្ថលេខាជាមួយអារ៉ាប៊ីសាអ៊ូឌីតលើ Military Pact នេះ»។

លោកបណ្ឌិត ជ័យ តិច យល់ថានេះជាឱកាសល្អសម្រាប់កម្ពុជាក្នុងការបង្កើតចំណងមិត្តភាពកាន់តែល្អជាមួយបណ្ដាប្រទេសឥស្លាមទាំងនេះ។ ដែលនឹងអាចទាញប្រយោជន៍ ជំនួយ ព្រមទាំងពាណិជ្ជកម្ម ទេសចរណ៍ និងសន្តិសុខផងដែរ។

លោកថា៖ «មជ្ឈិមបូព៌ាបង្កើតសម្ព័ន្ធយោធាថ្មីនេះបងធំគឺប៉ាគីស្ថានដែលមាននុយក្លេអ៊ែរហើយប៉ាគីស្ថាន ប្រធានព្រឹទ្ធសភាប៉ាគីស្ថានក៏បានមកធ្វើទស្សនកិច្ចនៅកម្ពុជាថ្មីៗនេះដែរ។ នេះជាជំហានដ៏ត្រឹមត្រូវនៃបរិបទភូមិសាស្ត្រនយោបាយពិភពលោកដែលកម្ពុជាបានដើរ»។

សម្ដេចតេជោ ហ៊ុន សែន និងប្រធានព្រឹទ្ធសភាប៉ាគីស្ថានលោក ស៊ីយ៉េដ យូសាហ្វ រ៉ាហ្សា ជីឡានី ថ្ងៃទី៤ កុម្ភៈ ២០២៦

ប្រធានព្រឹទ្ធសភាប៉ាគីស្ថានលោក ស៊ីយ៉េដ យូសាហ្វ រ៉ាហ្ស៉ា ហ្គីឡានី បានធ្វើទស្សនៈកិច្ចនៅកម្ពុជាកាលពីដើមខែកុម្ភៈ ឆ្នាំ២០២៦នេះ ដោយបានជួបពិភាក្សាការងារជាមួយប្រធានព្រឹទ្ធសភាកម្ពុជា សម្ដេចតេជោ ហ៊ុន សែន ប្រធានរដ្ឋសភា សម្ដេចសភាធិបតី ឃួន សុដារី និងនាយករដ្ឋមន្ត្រី សម្ដេចធិបតី ហ៊ុន ម៉ាណែត ដោយក្នុងនោះបានពិភាក្សាគ្នាពីការរឹតចំណងមិត្តភាព បង្កើតជើងហោះហើរត្រង់ បង្កើនកិច្ចសហការសភា ជាពិសេសគឺការស្វាគមន៍កម្ពុជាចូលជាសមាជិកអង្គការសហប្រតិបត្តិការឥស្លាម (OIC) ផងដែរ។

សម្ដេចសភាធិបតី ឃួន សុដារី និងប្រធានព្រឹទ្ធសភាប៉ាគីស្ថានលោក ស៊ីយ៉េដ យូសាហ្វ រ៉ាហ្សា ជីឡានី ថ្ងៃទី៤ កុម្ភៈ ២០២៦

នាយកខុទ្ទកាល័យសម្ដេចប្រធានសភា លោក កែវ ពិសិដ្ឋ ធ្លាប់បានប្រាប់អ្នកយកព័ត៌មានថាការចូលរួមជាសមាជិកអង្គការឥស្លាមនេះបានបង្ហាញពីសុខដុមនីយកម្មនៃសាសនានៅកម្ពុជា និងគាំទ្រដល់អ្នកកាន់សាសនាឥស្លាមនៅកម្ពុជាចូលរួមព្រឹត្តិការណ៍អន្តរជាតិ និងបណ្ដាញអន្តរជាតិឥស្លាមកាន់តែស៊ីជម្រៅផងដែរមិនប៉ះពាល់ដល់ពុទ្ធសាសនាដែលជាសាសនារបស់រដ្ឋទេ។

ដោយឡែកអ្នកជំនាញភូមិសាស្ត្រនយោបាយលោកបណ្ឌិត យង់ ពៅ មានប្រសាសន៍គាំទ្រចំពោះការបង្កើនទំនាក់ទំនងរបស់កម្ពុជាជាមួយបណ្ដារដ្ឋឥស្លាមនេះ ដែលលោកវាយតម្លៃថាជាពិពិធកម្មការទូតថ្មីមួយរបស់កម្ពុជា។

លោកថា៖ «កាលណាយើងមានថាមពលការទូតថ្មីបើកល្វែងការទូតបន្ថែមទៀតនៅបណ្ដាទ្វីបនៅបណ្ដាប្រទេសផ្សេងៗជាច្រើន ដូច្នេះយើងមានមិត្តភ័ក្រច្រើនយើងមានដៃគូរកិច្ចសហប្រតិបត្តិការច្រើនពេលនោះក៏យើងនឹងមានការដោះដូរពាណិជ្ជកម្មទូលំទូលាយ ការដោះដូរទស្សនៈនយោបាយទូលំទូលាយ និងការដោះដូរកិច្ចសហការផ្សេងទៀតដែលធ្វើឱ្យយើងមានលំនឹងកាន់តែរឹងមាំ និងមានឥទ្ធិពលនយោបាយការទូតក្នុងពិភពលោក»។

បណ្ឌិត យង់ ពៅ

លោកបណ្ឌិតបន្ថែមថាបច្ចុប្បន្នពិភពអំណាច និងសេដ្ឋកិច្ចថ្មីគឺកំពុងកើតឡើងនៅពិភពឥស្លាមនេះ ហើយការបង្កើតទំនាក់ទំនងល្អជាមួយតំបន់ឥស្លាមនឹងធ្វើឱ្យកម្ពុជាទាញយកប្រយោជន៍កាន់តែច្រើនបន្ថែមទៀតសម្រាប់ខ្លួន។

លោកថា៖ «ថាមពលការទូតថ្មីនេះនាំឱ្យកម្ពុជាទទួលបានអំណាចទន់បន្ថែមទៀត បើទោះជាយើងប្រៀបធៀបនឹងប្រទេសផ្សេងនៅមានកម្រិតតែយើងត្រូវតែប្រឹងប្រែងដើម្បីឱ្យមានថាមពលថ្មីហើយអំណាចទន់របស់យើងកាន់តែកើនឡើង»។

សម្ដេចធិបតី ហ៊ុន ម៉ាណែត ទទួលស្វាគមន៍ប្រធានព្រឹទ្ធសភាប៉ាគីស្ថានលោក ស៊ីយ៉េដ យូសាហ្វ រ៉ាហ្សា ជីឡានីថ្ងៃទី៣ កុម្ភៈ ២០២៦ នៅវិមានសន្ដិភាព

សរុបមកវិញ ការបង្កើនទំនាក់ទំនងជាមួយពិភពឥស្លាមនៅពេលនេះ មិនមែនជារឿងចៃដន្យឡើយ ប៉ុន្តែវាគឺជាយុទ្ធសាស្ត្រដែលមានចក្ខុវិស័យវែងឆ្ងាយ។ វាជាការបោះជំហានរបស់កម្ពុជាក្នុងការស្វែងរកតុល្យភាពនយោបាយថ្មីមួយ ដែលលើសពីការរឹតចំណងមិត្តភាពធម្មតា ពោលគឺដើម្បីពង្រឹងសន្តិសុខជាតិ និងស្វែងរកកម្លាំងរុញច្រានសេដ្ឋកិច្ចពីប៉ូលអំណាចថ្មីដែលពិភពលោកកំពុងចាប់អារម្មណ៍៕

អត្ថបទដោយ ហ៊ុន សិរីវឌ្ឍន៍

The post បទវិភាគ៖ ហេតុអ្វីបានជាកម្ពុជាកំពុងបង្កើនទំនាក់ទំនងយ៉ាងស្អិតល្មួតជាមួយពិភពឥស្លាម? appeared first on Kampuchea Thmey Daily.

កម្ពុជា-អារ៉ាប៊ីសាអូឌីត បេជ្ញាបន្តពង្រឹងពាណិជ្ជកម្មទ្វេភាគីរវាងប្រទេសទាំងពីរឱ្យកាន់តែមានប្រសិទ្ធភាព

Din Thary — Mon, 09 Feb 2026 07:23:49 +0000

កម្ពុជា និងអារ៉ាប៊ីសាអូឌីត បានបេជ្ញារួមគ្នាបន្តពង្រឹងនូវកិច្ចសហប្រតិបត្តិការពាណិជ្ជកម្មទ្វេភាគីរវាងប្រទេសទាំងពីរឱ្យកាន់តែមានប្រសិទ្ធភាពបន្ថែមទៀតតាមរយៈការបង្កើតក្រុមប្រឹក្សាធុរកិច្ចអារ៉ាប៊ីសាអូឌីត-កម្ពុជា សហគមន៍ធុរកិច្ច។

នៅក្នុងជំនួបទ្វេភាគី កាលពីថ្ងៃទី០៨ ខែកុម្ភៈ ឆ្នាំ២០២៦ លោកស្រីរដ្ឋមន្រ្តី ចម និម្មល បានលើកឡើងពីបច្ចុប្បន្នភាពថ្មីៗពាក់ព័ន្ធនឹងគោលនយោបាយសេដ្ឋកិច្ច និងពាណិជ្ជកម្មរបស់កម្ពុជា និងកិច្ចខិតខំប្រឹងប្រែងរបស់រាជរដ្ឋាភិបាលកម្ពុជា ដែលមានក្រសួងពាណិជ្ជកម្មជាសេនាធិការ ក្នុងការកែលម្អបរិយាកាសធុរកិច្ចឱ្យកាន់តែល្អប្រសើរបន្ថែមទៀត ដើម្បីទាក់ទាញវិនិយោគិនបរទេស និងបង្កើនភាពប្រកួតប្រជែង។

លោកស្រីក៏បានអញ្ជើញគណៈប្រតិភូធុរកិច្ចអារ៉ាប៊ីសាអូឌីត ពិចារណាវិនិយោគនៅតំបន់សេដ្ឋកិច្ចពិសេស សម្រាប់ផលិតផលហាឡាល។

លោក Waleed Nasser Alsheri ប្រធានក្រុមប្រឹក្សាធុរកិច្ចអារ៉ាប៊ីសាអូឌីត-កម្ពុជា បានកត់សម្គាល់ពីភាពរីកចម្រើននៃវិស័យពាណិជ្ជកម្មរបស់កម្ពុជា និងលោកឡើងអំពីបំណងរបស់ខ្លួនក្នុងការរៀបចំដំណើរទស្សនកិច្ចផ្លូវការរបស់គណៈប្រតិភូធុរកិច្ចអារ៉ាប៊ីសាអូឌីតនៅកម្ពុជា នាពេលអនាគតផងដែរ។

ជាមួយគ្នានោះដែរ លោក Waleed Nasser Alsheri ក៏បានអរគុណចំពោះការស្វាគមន៍របស់កម្ពុជា និងបានគូសបញ្ជាក់ថាកម្ពុជា គឺជាច្រកដ៏សំខាន់សម្រាប់ការធ្វើសមាហរណកម្មពាណិជ្ជកម្មក្នុងតំបន់អាស៊ាន និងមានចក្ខុវិស័យអភិវឌ្ឍស្របតាម Saudi Vision 2030។

ជាកិច្ចបញ្ចប់ ភាគីទាំងពីរ បានប្តេជ្ញាចិត្តយ៉ាងមោះមុតក្នុងការអនុវត្តផែនការសកម្មភាពការងារក្រោមក្របខណ្ឌអនុស្សរណៈនៃការយោគយល់គ្នាស្តីពីការជំរុញទំនាក់ទំនងពាណិជ្ជកម្ម រវាងក្រសួងពាណិជ្ជកម្មកម្ពុជា និងអាជ្ញាធរទទួលបន្ទុកពាណិជ្ជកម្មក្រៅប្រទេស (GAFT) នៃប្រទេសអារ៉ាប៊ីសាអូឌីតប្រកបដោយប្រសិទ្ធិភាព។

ភាគីទាំងពីរ ក៏មានសុទិដ្ឋិនិយមថា តាមរយៈការបង្កើតក្រុមប្រឹក្សាធុរកិច្ចអារ៉ាប៊ីសាអូឌីត-កម្ពុជា សហគមន៍ធុរកិច្ចនៃប្រទេសទាំងពីរនឹងផ្សាភ្ជាប់ទំនាក់ទំនងកាន់តែជិតស្និទ្ធិ ដែលនឹងផ្តល់ភាពងាយស្រួលក្នុងការពង្រីកប្រតិបត្តិការពាណិជ្ជកម្ម និងវិនិយោគ៕

The post កម្ពុជា-អារ៉ាប៊ីសាអូឌីត បេជ្ញាបន្តពង្រឹងពាណិជ្ជកម្មទ្វេភាគីរវាងប្រទេសទាំងពីរឱ្យកាន់តែមានប្រសិទ្ធភាព appeared first on Kampuchea Thmey Daily.

កម្ពុជា-អារ៉ាប៊ីសាអូឌីតប្តេជ្ញាជំរុញកិច្ចសហប្រតិបត្តិការ និងបង្កើនភ្ញៀវទេសចររវាងប្រទេសទាំងពីរ

Din Thary — Fri, 14 Nov 2025 07:23:08 +0000

ប្រទេសកម្ពុជា-អារ៉ាប៊ីសាអូឌីត ប្តេជ្ញាជំរុញកិច្ចសហប្រតិបត្តិការទេសចរណ៍ និងបង្កើនភ្ញៀវទេសចររវាងប្រទេសទាំងពីរឱ្យបានកាន់តែច្រើនឡើងបន្ថែមទៀត សំដៅធ្វើយ៉ាងជំរុញឱ្យប្រជាពលរដ្ឋកម្ពុជា និងប្លុកអារ៉ាប់កាន់អាចធ្វើការផ្លាស់ប្តូរការទស្សនាទៅកាន់រមណីដ្ឋានប្រវត្តិសាស្រ្ត វប្បធម៌ និងធម្មជាតិនានា។

នាឱកាសដឹកនាំគណៈប្រតិភូជាន់ខ្ពស់ក្រសួងទេសចរណ៍ ចូលរួមមហាសន្និបាតលើកទី២៦ នៃអង្គការទេសចរណ៍សហប្រជាជាតិ (UN Tourism- 26th General Assembly) នៅរាជធានីរីយ៉ាដ លោក ហួត ហាក់ រដ្ឋមន្ត្រីក្រសួងទេសចរណ៍ បានជួបពិភាក្សាការងារកម្រិតខ្ពស់ជាមួយ លោក Ahmed Al-Khateeb រដ្ឋមន្រ្តីក្រសួងទេសចរណ៍អារ៉ាប៊ីសាអូឌីតអំពីកិច្ចសហប្រតិបត្តិលើវិស័យទេសចរណ៍រវាងកម្ពុជា និងអារ៉ាប៊ីសាអូឌីត។

ក្នុងជំនួបកម្រិតខ្ពស់ និងប្រកបដោយផ្លែផ្កា ភាគីទាំងពីរ បានឯកភាពគ្នាពង្រឹង និងពង្រីកកិច្ចសហប្រតិបត្តិការលើវិស័យទេសចរណ៍ឱ្យកាន់តែស៊ីជម្រៅ និងសកម្មបន្ថែមទៀត តាមរយៈការពន្លឿនការចុះអនុស្សរណៈនៃការយោគយល់គ្នា ការរៀបចំព្រឹត្តិការណ៍ជំរុញទេសចរណ៍ ការពិនិត្យលទ្ធភាពតភ្ជាប់ជើងហោះហើរត្រង់រវាងរាជធានីរីយ៉ាដ និងរាជធានីភ្នំពេញ និងការរៀបចំ FAM Trip ជាដើម។

ឆ្លៀតក្នុងឱកាសនេះដែរ រដ្ឋមន្រ្តីទេសចរណ៍កម្ពុជា បានអញ្ជើញរដ្ឋមន្រ្តីទេសចរណ៍អារ៉ាប៊ីសាអ៊ូឌីតមកធ្វើទស្សនកិច្ចនៅព្រះរាជាណាចក្រកម្ពុជានាពេលឆាប់ៗនេះ៕

The post កម្ពុជា-អារ៉ាប៊ីសាអូឌីតប្តេជ្ញាជំរុញកិច្ចសហប្រតិបត្តិការ និងបង្កើនភ្ញៀវទេសចររវាងប្រទេសទាំងពីរ appeared first on Kampuchea Thmey Daily.

អារ៉ាប៊ីសាអូឌីតអញ្ជើញប្រធានសភាកម្ពុជាទៅធ្វើទស្សនកិច្ច

hun sirivadh — Wed, 02 Jul 2025 07:52:54 +0000

ប្រធានសភាអារ៉ាប៊ីសាអូឌីតលោក អាប់ឌុលឡា ប៊ីន ម៉ូហាម៉េដ ប៊ីន អ៊ីប្រាហ៊ីមអាល-សេក្ខ (Abdullah Bin Mohammed Bin Ibrahim Al-Sheikh) បានអញ្ជើញប្រធានសភាកម្ពុជា សម្ដេចសភាធិបតី ឃួន សុដារី ទៅធ្វើទស្សនកិច្ចនៅប្រទេសមជ្ឈឹមបូព៌ាមួយនេះនាពេលខាងមុខ។ លោកអាប់ឌុលឡា មានប្រសាសន៍ថានេះគឺជាការអញ្ជើញពិសេសពីសំណាក់ព្រះរាជណាចក្រអារ៉ាប៊ីសាអូឌីតចំពោះព្រះរាជាណាចក្រកម្ពុជា។

ថ្លែងក្នុងជំនួបជាមួយនាយករដ្ឋមន្ត្រី សម្ដេចធិបតី ហ៊ុន ម៉ាណែត នៅព្រឹកថ្ងៃទី២ ខែកក្កដា ឆ្នាំ២០២៥នេះ នាវិមានសន្ដិភាព លោក អាប់ឌុលឡា ថាដំណើរទស្សនកិច្ចរបស់លោកមកកម្ពុជានេះជាលើកទី១ ដែលបានទទួលលទ្ធផលផ្លែផ្កាជាច្រើន ពិសេសលោកបានមើលឃើញថាកម្ពុជាជាប្រទេសដែលមានសក្តានុពល មានចក្ខុវិស័យវែងឆ្ងាយក្នុងគោលដៅធានានូវកំណើនប្រកបដោយចីរភាព និងបរិយាប័ន្ន ជាពិសេស ការឈានទៅសម្រេចបាននូវចក្ខុវិស័យកម្ពុជាឆ្នាំ២០៥០។ លោកសង្ឃឹមថាដំណើរទស្សនកិច្ចផ្លូវការរបស់លោកនឹងជំរុញទំនាក់ទំនង និងកិច្ចសហប្រតិបត្តិការរវាងស្ថាប័ននីតិប្បញ្ញត្តិនៃប្រទេសទាំងពីរ ឱ្យកាន់តែរីកចម្រើន និងរឹងមាំ។

លោកប្រធានសភាក៏បានជម្រាបសម្ដេចធិបតីផងដែរថា សភានៃព្រះរាជាណាចក្រអារ៉ាប់ប៊ីសាអូឌីត បានអញ្ជើញ សម្តេចប្រធានរដ្ឋសភា កម្ពុជា បំពេញទស្សនកិច្ចផ្លូវការនៅអារ៉ាប់ប៊ីសាអូឌីត ដែលនេះ«ជាការអញ្ជើញជាពិសេសរបស់ព្រះរាជាណាចក្រអារ៉ាប់ប៊ីសាអូឌីតចំពោះព្រះរាជាណាចក្រកម្ពុជា»។

សម្តេចបវរធិបតី ហ៊ុន ម៉ាណែត បានលើកឡើងថារាជរដ្ឋាភិបាលកម្ពុជា នីតិកាលទី៧ នៃរដ្ឋសភា បានដាក់ចេញនូវគោលនយោបាយពង្រីកទំនាក់ទំនងជាមួយបណ្តាប្រទេសនានានៅមជ្ឈិមបូព៌ា ដែលក្នុងនោះ រួមមានទាំងប្រទេសអារ៉ាប់ប៊ីសាអូឌីត។ សម្ដេចថាការផ្លាស់ប្តូរទស្សនកិច្ចកម្រិតខ្ពស់ រវាងថ្នាក់ដឹកនាំ គឺបានបង្ហាញពីវឌ្ឍនភាពដ៏ល្អនៃទំនាក់ទំនង និងចូលរួមចំណែកដល់ការ ពង្រឹង និង ពង្រីក កិច្ចសហប្រតិបត្តិការ រវាងប្រទេសទាំងពីរ។

នាយខុទ្ទកាល័យ និងជាអ្នកនាំពាក្យប្រធានរដ្ឋសភា លោក កែវ ពិសិដ្ឋ បានប្រាប់ក្រុមអ្នកយកព័ត៌មានកាលពីថ្ងៃទី១ ខែកក្កដា បន្ទាប់ពីប្រធានរដ្ឋសភាទទួលបដិសណ្ឋារកិច្ច ពិភាក្សាការងារជាមួយ លោក អាប់ឌុលឡា ប៊ីន ម៉ូហាម៉េដ ប៊ីន អ៊ីប្រាហ៊ីមអាល-សេក្ខ រួចមកថាពិតជាមានការអញ្ជើញសម្ដេចសភាធិបតីទៅធ្វើទស្សនកិច្ចនៅអារ៉ាប៊ីសាអូឌីតមែន ដោយសម្ដេចសភាធិបតីបានទទួលយកការអញ្ជើញ ព្រមទាំងបញ្ជាក់ថានឹងបំពេញទស្សនកិច្ចនៅពេលវេលាសមស្របមួយនាពេលខាងមុខ។

គួរឱ្យដឹងដែរថា ទំនាក់ទំនងរវាងកម្ពុជា និងអារ៉ាប៊ីសាអូឌីតចាប់ផ្ដើមកសាងឡើងពីខែតុលា ឆ្នាំ២០១០ ខណៈអារ៉ាប៊ីសាអូឌីតក៏បញ្ជាក់ជំហរក្នុងការបើកស្ថានទូតរបស់ខ្លួននៅកម្ពុជាក្នុងពេលខាងមុខផងដែរ ដែលនឹងពង្រឹងដល់ទំនាក់ទំនងទ្វេភាគី សេដ្ឋកិច្ចពាណិជ្ជកម្ម និងទេសចរណ៍។

ការធ្វើដំណើរមកកម្ពុជាជាលើកដំបូងរបស់ប្រធានសភាអារ៉ាប៊ីសាអូឌីតគឺបន្ទាប់ពីមានការអញ្ជើញពីសម្ដេចប្រធានសភាកម្ពុជា ដែលជាសញ្ញាបង្ហាញពីការជឿទុកចិត្តពីសំណាក់ប្រទេសអារ៉ាប៊ីសាអូឌីតចំពោះកម្ពុជា ខណៈលោក អាប់ឌុលឡា មានប្រសាសន៍ថាជនជាតិកម្ពុជាជាជនជាតិដែលមានភាព ថ្លៃថ្នូរ និងក្រមសីលធម៌ខ្ពស់៕

អត្ថបទដោយ ហ៊ុន សិរីវឌ្ឍន៍

The post អារ៉ាប៊ីសាអូឌីតអញ្ជើញប្រធានសភាកម្ពុជាទៅធ្វើទស្សនកិច្ច appeared first on Kampuchea Thmey Daily.

សម្ដេចសភាធិបតី ថាដំណើរទស្សនកិច្ចរបស់ប្រធានសភាអារ៉ាប៊ីសាអូឌីតឆ្លុះបញ្ចាំងពីការជឿទុកចិត្តមកលើកម្ពុជា

hun sirivadh — Wed, 02 Jul 2025 03:12:22 +0000

ប្រធានសភាកម្ពុជា សម្ដេចសភាធិបតី ឃួន សុដារី បានលើកឡើងថាដំណើរទស្សនកិច្ចរបស់ប្រធានសភាអារ៉ាប៊ីសាអូឌីត ឆ្លុះបញ្ចាំងឱ្យឃើញពីទំនាក់ទំនង និងកិច្ចសហប្រតិបត្តិការ ផ្អែកលើការជឿទុកចិត្តគ្នា យកប្រជាពលរដ្ឋជាធំ និងកិច្ចសន្ទនាអន្តរអារ្យធម៌ ដែលជាមូលដ្ឋានគ្រឹះដ៏សំខាន់នៃសន្តិភាព និងវិបុលភាព។

ថ្លែងក្នុងពិធីលៀងសាយភោជន៍ជូនលោកប្រធានសភាអារ៉ាប៊ីសាអូឌីតនៅយប់ថ្ងៃទី១ ខែកក្កដា នៅសណ្ឋាគាររ៉ូសវូឌ រាជធានីភ្នំពេញ សម្ដេចសភាធិបតី ឃួន សុដារី ថ្លែងថាដំណើរទស្សនកិច្ចរបស់លោក អាប់ឌុលឡា ប៊ីន ម៉ូហាម៉េដ ប៊ីន អ៊ីប្រាហ៊ីម អាល-សេក្ខ (Abdullah bin Mohammed bin Ibrahim AI-Sheikh) មកកម្ពុជាជាលើកដំបូងនេះនឹងរួមចំណែកសំខាន់ក្នុងការលើកកម្ពស់កម្រិតទំនាក់ទំនងឈានដល់កម្រិតថ្មីមួយដែលនឹងនាំមកនូវផលប្រយោជន៍សម្រាបប្រជាជាតិទាំងពីរបន្តទៀត។

ប្រធានសភាអារ៉ាប៊ីសាអូឌីតលោក អាប់ឌុលឡា ប៊ីន ម៉ូហាម៉េដ ប៊ីន អ៊ីប្រាហ៊ីម អាល-សេក្ខ បានអញ្ជើញមកធ្វើទស្សនកិច្ចផ្លូវការរយៈពេល៥ថ្ងៃនៅកម្ពុជា ដើម្បីពង្រឹងចំណងមិត្តភាព កិច្ចសហប្រតិបត្តិការរវាងប្រទេសទាំងពីឱ្យកាន់តែរឹងមាំបន្ថែមទៀតទាំងស្ថាប័ននីតិបញ្ញាត្តិ និងនីតិប្រតិបត្តិ។

ក្នុងឱកាសលផងសាយភោជន៍នោះ លោក អាប់ឌុលឡា បានបង្ហាញការពេញចិត្តចំពោះលទ្ធផលនៃជំនួបជាមួយប្រធានរដ្ឋសភា និងព្រឹទ្ធសភាកម្ពុជា ដែលបានប្ដេជ្ញាបន្តពូនជ្រុំ ថែរក្សានូវទំនាក់ទំនងល្អ ព្រមទាំងខិតខំបន្ថែមទៀតដើម្បីលើកកម្ពស់ទំនាក់ទំនងទ្វេភាគីឱ្យកាន់តែប្រសើរ។

លោកថា៖ «លទ្ឋផលនៃជំនួបពិភាក្សាជាមួយសម្តេចប្រធានរដ្ឋសភានិងសម្តេចប្រធានព្រឹទ្ឋសភាកម្ពុជា ថ្ងៃនេះ នឹងចេញលទ្ឋផល ជាក់ស្តែង ជូនប្រទេសជាតិនិងពលរដ្ឋយើងទំាងពីរ ក្នុងពេលខាងមុខនេះ»។

ទំនាក់ទំនងរវាងកម្ពុជា និងអារ៉ាប៊ីសាអូឌីតចាប់ផ្ដើមកសាងឡើងពីខែតុលា ឆ្នាំ២០១០ ខណៈអារ៉ាប៊ីសាអូឌីតក៏បញ្ជាក់ជំហរក្នុងការបើកស្ថានទូតរបស់ខ្លួននៅកម្ពុជាក្នុងពេលខាងមុខផងដែរ ដែលនឹងពង្រឹងដល់ទំនាក់ទំនងទ្វេភាគី សេដ្ឋកិច្ចពាណិជ្ជកម្ម និងទេសចរណ៍៕

អត្ថបទដោយ ហ៊ុន សិរីវឌ្ឍន៍

The post សម្ដេចសភាធិបតី ថាដំណើរទស្សនកិច្ចរបស់ប្រធានសភាអារ៉ាប៊ីសាអូឌីតឆ្លុះបញ្ចាំងពីការជឿទុកចិត្តមកលើកម្ពុជា appeared first on Kampuchea Thmey Daily.

ប្រធានសភាអារ៉ាប៊ីសាអូឌីតសង្ឃឹមថាប្រទេសលោកនឹងអាចបង្កើនទំនាក់ទំនងកាន់តែច្រើនជាមួយកម្ពុជា

hun sirivadh — Tue, 01 Jul 2025 11:16:46 +0000

ប្រធានសភាអារ៉ាប៊ីសាអូឌីត លោក អាប់ឌុលឡា ប៊ីន ម៉ូហាម៉េដ ប៊ីន អ៊ីប្រាហ៊ីម អាល សេក្ខ (Abdullah Bin Mohammed Bin Ibrahim Al-Sheikh) បានបង្ហាញក្ដីសង្ឃឺមថាប្រទេសលោកនឹងបង្កើនទំនាក់ទំនងកាន់តែច្រើនបន្ថែមទៀតជាមួយកម្ពុជាជាពិសេសលើការវិនិយោគ ទេសចរណ៍ និងកសិកម្ម។

ថ្លែងក្នុងជំនួបជាមួយប្រធានព្រឹទ្ធសភាកម្ពុជា សម្ដេចតេជោ ហ៊ុន សែន នៅរសៀលថ្ងៃទី១ ខែកក្កដា ឆ្នាំ២០២៥នេះលោក អាប់ឌុលឡា ថាលោកចង់ឃើញទំនាក់ទំនងរវាងអារ៉ាប៊ីសាអូឌីត និងកម្ពុជាកាន់តែល្អប្រសើរតាមរយៈការផ្លាស់ប្ដូរដំណើរទស្សនកិច្ចនៃថ្នាក់ដឹកនាំ ទន្ទឹមនឹងនេះក៏ចង់ជំរុញទំនាក់ទំនងលើវិស័យសេដ្ឋកិច្ចពាណិជ្ជកម្ម និងការវិនិយោគ។

បើតាមអ្នកនាំពាក្យព្រឹទ្ធសភា លោក ជា ធីរិទ្ធ បានឱ្យដឹងថាលោក អាប់ឌុលឡា ក៏បានគូសរំលេចពីបំណងក្នុងការជំរុញជើងហោះហើរ និងទេសចរណ៍ជាមួយកម្ពុជាផងដែរ។

ក្នុងជំនួបនោះសម្ដេចតេជោ ហ៊ុន សែន បានរំលេចពីសក្ដានុពលរបស់កម្ពុជាដែលអ្នកវិនិយោគអារ៉ាប៊ីសាអូឌីតគួរតែវិនិយោគគឺវិស័យកសិកម្ម ដែលជាផ្នែកដ៏សំខាន់ និងជួយឱ្យទំនាក់ទំនងប្រទេសទាំងពីរបន្ថែមផងដែរ។ សម្ដេចបន្ថែមទាក់ទងនឹងវិស័យទេសចរណ៍ដែលចង់ឱ្យអារ៉ប៊ីសាអូឌីតមានជើងហោះហើរត្រង់មកកម្ពុជាដើម្បីផ្នែកមួយសម្រួលដល់ការធ្វើដំណើររបស់ប្រជាជន និងកិច្ចសហប្រតិបត្តិការរវាងប្រទេសទាំងពីរផងដែរ។

ក្នុងជំនួបនោះសម្ដេចតេជោបានចែករំលែកពីបញ្ហាព្រំដែនកម្ពុជា-ថៃ ដល់ប្រធានសភាអារ៉ាប៊ីសាអូឌីតផងដែរ ខណៈលោក អាប់ដុលឡា បានថ្លែងអំណរគុណចំពោះការលើកឡើងរបស់សម្ដេចតេជោ និងសង្ឃឺមថាទំនាក់ទំនងរវាងប្រទេសអារ៉ាប៊ីសាអូឌីតនឹងកាន់តែរីកចម្រើន។

គួរឱ្យដឹងផងដែរថាប្រធានសភាអារ៉ាប៊ីសាអូឌីត អាប់ឌុលឡា ប៊ីន ម៉ូហាម៉េដ ប៊ីន អ៊ីប្រាហ៊ីម អាល សេក្ខ នឹងធ្វើទស្សនកិច្ចរយៈពេល៥ថ្ងៃនៅកម្ពុជាចាប់ពីថ្ងៃទី៣០ ខែមិថុនា ដល់ថ្ងៃទី៤ ខែកក្កដា ឆ្នាំ២០២៥ ដើម្បីពង្រឹងកិច្ចសហប្រតិបត្តិការរដ្ឋសភានៃប្រទេសទាំងពីឱ្យកាន់តែរឹងមាំ និងស៊ីជម្រៅបន្ថែមទៀតទាំងក្នុងក្របខណ្ឌទ្វេភាគី និងពហុភាគី។ ក្រៅពីជួបជាមួយឥស្សរជនសំខាន់ៗនៅកម្ពុជា លោកនឹងដឹកនាំប្រតិភូធ្វើទស្សនកិច្ចនៅតាមទីតាំងសំខាន់ៗមួយចំនួននៅរាជធានីភ្នំពេញផងដែរ៕

អត្ថបទដោយ ហ៊ុន សិរីវឌ្ឍន៍

The post ប្រធានសភាអារ៉ាប៊ីសាអូឌីតសង្ឃឹមថាប្រទេសលោកនឹងអាចបង្កើនទំនាក់ទំនងកាន់តែច្រើនជាមួយកម្ពុជា appeared first on Kampuchea Thmey Daily.

ប្រធានសភាអារ៉ាប៊ីសាអូឌីតថាកម្ពុជាមានភាពថ្លៃថ្នូរ និងក្រមសីលធម៌ខ្ពស់

hun sirivadh — Tue, 01 Jul 2025 08:54:34 +0000

ប្រធានសភាអារ៉ាប៊ីសាអូឌីតលោក អាប់ឌុលឡា ប៊ីន ម៉ូហាម៉េដ ប៊ីន អ៊ីប្រាហ៊ីម អាល សេក្ខ (Abdullah Bin Mohammed Bin Ibrahim Al-Sheikh) លើកឡើងថាក្នុងដំណើរទស្សនកិច្ចជាលើកដំបូងមកកម្ពុជាធ្វើឱ្យលោកបានជ្រាបច្បាស់ពីកម្ពុជា និងបានវាយតម្លៃថាប្រជាជនកម្ពុជាមានសីលធម៌ខ្ពស់ មានភាពថ្លៃថ្នូរ ដែលជាជាតម្លៃសម្រាប់ការបង្កើននូវទំនាក់ទំនង និងការតភ្ជាប់រវាងប្រទេសទាំងពីរ។

លោក អាប់ឌុលឡា ប៊ីន ម៉ូហាម៉េដ បានលើកឡើងក្នុងជំនួបជាមួយប្រធានសភាកម្ពុជាសម្ដេចសភាធិបតី ឃួន សុដារី នៅវិមានរដ្ឋសភាកម្ពុជាព្រឹកថ្ងៃទី១ ខែកក្កដា ឆ្នាំ២០២៥នេះថា ភាពថ្លៃថ្នូររបស់ប្រជាជនកម្ពុជាមានសារៈសំខាន់ណាស់ដល់ការតភ្ជាប់ទំនាក់ទំនងរវាងប្រជាជន និងវប្បធម៌ ប្រទេសកម្ពុជា-អារ៉ាប៊ីសាអូឌីត។

ក្នុងជំនួបនោះប្រធានសភាអារ៉ាប៊ីសាអូឌីតបានប្ដេជ្ញាជំរុញឱ្យមានការបង្កើតការវិនិយោគពីអារ៉ាប៊ីសាអីឌីតមកកម្ពុជា ខណៈអារ៉ាប៊ីសាអូឌីតកំពុងរៀបចំបើកស្ថានទូតនៅកម្ពុជាងផងដែរ។

ការលើកឡើងរបស់លោក អាប់ឌុលឡា ប៊ីន ម៉ូហាម៉េដ គឺបន្ទាប់ពីសម្ដេចប្រធានសភា ឃួន សុដារី បានជម្រាបពីស្ថានការណ៍របស់កម្ពុជា សេដ្ឋកិច្ច និងជាពិសេសពីបញ្ហាព្រំដែនរបស់កម្ពុជាដែលទទួលរងពីការបង្ករឿងពីថៃមួយរយៈចុងក្រោយនេះ។

សម្ដេចសភាធិបតី ឃួន សុដារី មានប្រសាសន៍ថាដំណើរទស្សនកិច្ចរបស់ប្រធានសភាអារ៉ាប៊ីសាអូឌីតនាពេលនេះពិតជាមានសារៈសំខាន់ និងជាជំហានថ្មីមួយទៀតលើកកម្ពស់ទំនាក់ទំនងទ្វេភាគីកម្ពុជា-អារ៉ាប៊ីសាអូឌីត ដែលបានកសាងឡើងចាប់តាំងពីខែតុលា ឆ្នាំ២០១០ ឱ្យកាន់តែជិតស្និទ្ធ និងស៊ីជម្រៅជាពិសេសរវាងស្ថាប័ននីតិប្បញ្ញត្តិ នៃប្រទេសទាំងពីរ។

សម្ដេចបានបង្ហាញក្ដីសង្ឃឹមថា ទំនាក់ទំនងទ្វេភាគីរវាងប្រទេសទាំងពីរ កម្ពុជា-អារ៉ាប៊ីសាអូឌីត នឹងជំរុញដល់ការវិនិយោគ ពាណិជ្ជកម្ម និងទេសចរណ៏ ពីរព្រះរាជាណាចក្រ អារ៉ាប៊ីសាអូឌីតមកកាន់កម្ពុជាកាន់តែច្រើនឡើង។

គួរឱ្យដឹងផងដែរថាប្រធានសភាអារ៉ាប៊ីសាអូឌីត អាប់ឌុលឡា ប៊ីន ម៉ូហាម៉េដ ប៊ីន អ៊ីប្រាហ៊ីម អាល សេក្ខ នឹងធ្វើទស្សនកិច្ចរយៈពេល៥ថ្ងៃនៅកម្ពុជាចាប់ពីថ្ងៃទី៣០ ខែមិថុនា ដល់ថ្ងៃទី៤ ខែកក្កដា ឆ្នាំ២០២៥ ដើម្បីពង្រឹងកិច្ចសហប្រតិបត្តិការរដ្ឋសភានៃប្រទេសទាំងពីឱ្យកាន់តែរឹងមាំ និងស៊ីជម្រៅបន្ថែមទៀតទាំងក្នុងក្របខណ្ឌទ្វេភាគី និងពហុភាគី។ ក្រៅពីជួបជាមួយប្រធានសភាកម្ពុជា លោកក៏នឹងជួបប្រធានព្រឹទ្ធសភា និងនាយករដ្ឋមន្ត្រីកម្ពុជា ព្រមទាំងដឹកនាំប្រតិភូធ្វើទស្សនកិច្ចនៅតាមទីតាំងសំខាន់ៗមួយចំនួននៅរាជធានីភ្នំពេញផងដែរ៕

អត្ថបទដោយ ហ៊ុន សិរីវឌ្ឍន៍

The post ប្រធានសភាអារ៉ាប៊ីសាអូឌីតថាកម្ពុជាមានភាពថ្លៃថ្នូរ និងក្រមសីលធម៌ខ្ពស់ appeared first on Kampuchea Thmey Daily.

សម្ដេចសភាធិបតីប្រាប់ប្រធានសភាអារ៉ាប៊ីសាអូឌីតពីការបង្ករឿងរបស់ថៃលើបញ្ហាព្រំដែន

hun sirivadh — Tue, 01 Jul 2025 08:20:59 +0000

ប្រធានសភាកម្ពុជា សម្ដេចសភាធិបតី ឃួន សុដារី បានបន្តប្រើនយោបាយការទូតជម្រាបដល់ភ្ញៀវជាមិត្តពីការបង្ករឿងរបស់ថៃលើបញ្ហាព្រំដែនជាមួយកម្ពុជា។ ការលើកនេះគឺក្នុងពេលដែលសម្ដេច ជួបពិភាក្សាការងារជាមួយប្រធានសភាប្រទេសអារ៉ាប៊ីសាអូឌីតលោក អាប់ឌុលឡា ប៊ីន ម៉ូហាម៉េដ ប៊ីន អ៊ីប្រាហ៊ីម អាល សេក្ខ (Abdullah Bin Mohammed Bin Ibrahim Al-Sheikh) នៅវិមានរដ្ឋសភា ព្រឹកថ្ងៃទី១ ខែកក្កដា ឆ្នាំ២០២៥នេះ។

នាយកខុទ្ទកាល័យ និងជាអ្នកនាំពាក្យប្រធានសភាលោក កែវ ពិសិដ្ឋ បានប្រាប់អ្នកយកព័ត៌មានថាការបន្តប្រើនយោបាយការទូតដើម្បីជម្រាបពីការបង្ករឿងរបស់ថៃនេះ ជាការឆ្លើយតបនឹងការលាបព័ណ៌របស់ថៃលើកម្ពុជា ដែលថៃជាអ្នកបង្ករឿងហើយបែរជាតាំងខ្លួនជាជនរងគ្រោះទៅវិញនោះ។

លោកថា៖ «វាជាឱកាសដែលសម្ដេចអាចរាយការណ៍ឱ្យដៃគូរបានដឹងពីរឿងកើតមានឡើងរវាងកម្ពុជានិងថៃ។ ព្រោះក្នុងសារព័ត៌មានអន្តរជាតិជាច្រើនថៃតែងតែធ្វើខ្លួនឯងជាជនរងគ្រោះនៃបញ្ហាដែលខ្លួនបង្កើតឡើង អ៊ីចឹងគ្រប់ឱកាសជំនួបទាំងអស់គឺជាឱកាសដែលថ្នាក់ដឹកនាំតែងតែបញ្ជាក់ឱ្យបានច្បាស់អំពីរឿងពិតដែលកើតមានឡើង»។

ក្នុងជំនួបនោះ សម្ដេចសភាធិបតី ឃួន សុដារី បានជម្រាបប្រធានសភាអារ៉ាប៊ីសាអូឌីតពីការឈ្លានពានរបស់ថៃប្រើប្រាស់ផែនទីរំលោភលើសន្និសញ្ញាបារាំង-សៀម ការលួចចូលដីខ្មែរបាញ់សម្លាប់ទាហានខ្មែរ បិទព្រំដែនដោយឯកតោភាគី មិនគោរពសេចក្ដីសម្រេចរបស់តុលាការយុត្តិធម៌អន្តរជាតិឆ្នាំ១៩៦២ជាដើម។ សម្ដេចបញ្ជាក់ថាកម្ពុជាស្រលាញ់សន្ដិភាពនិងបានជ្រើសរើសការដោះស្រាយទំនាស់នេះទៅកាន់តុលាការយុត្តិធម៌អន្តរជាតិ។

បើតាមលោក កែវ ពិសិដ្ឋ ក្រោយពីសម្ដេចសភាធិបតីបានជម្រាបមក ប្រធានសភាអារ៉ាប៊ីសាអូឌីតបានទទួលយក និងបានកោតសរសើរប្រជាជនកម្ពុជាពីភាពថ្លៃថ្នូរ និងក្រមសីលធម៌ផងដែរ។

លោក អាប់ឌុលឡា ប៊ីន ម៉ូហាម៉េដ ប៊ីន អ៊ីប្រាហ៊ីម អាល សេក្ខ បានលើកឡើងក្នុងជំនួបនោះថាដំណើរទស្សនកិច្ចនៅកម្ពុជាពេលនេះបានធ្វើឱ្យបានស្គាល់ច្បាស់ពីប្រទេសកម្ពុជា រួមជាមួយភាពស្មោះត្រង់ ថ្លៃថ្នូរ និងក្រមសីលធម៌ខ្ពស់របស់ប្រជាជនកម្ពុជាផងដែរ ដែលមានតម្លៃសម្រាប់ការបង្កើនទំនាក់ទំនង និងការតភ្ជាប់មិត្តភាពរវាងប្រទេសទាំងពីរ។

គួរឱ្យដឹងផងដែរថាប្រធានសភាអារ៉ាប៊ីសាអូឌីតលោក អាប់ឌុលឡា ប៊ីន ម៉ូហាម៉េដ ប៊ីន អ៊ីប្រាហ៊ីម អាល សេក្ខ មកបំពេញទស្សនកិច្ចរយៈពេល៥ថ្ងៃនេះកម្ពុជាចាប់ពីថ្ងៃទី៣០ ខែមិថុនា ដល់ថ្ងៃទី៤ ខែកក្កដា តបតាមការអញ្ជើញរបស់ប្រធានសភាកម្ពុជា។ ក្រៅពីជួបប្រធានរដ្ឋសភានៅថ្ងៃនេះលោកក៏នឹងមានជំនួបជាប្រធានព្រឹទ្ធសភាសម្ដេចតេជោ ហ៊ុន សែន និងនាយករដ្ឋមន្ត្រីកម្ពុជា សម្ដេចធិបតី ហ៊ុន ម៉ាណែត ផងដែរ៕

អត្ថបទដោយ ហ៊ុន សិរីវឌ្ឍន៍

The post សម្ដេចសភាធិបតីប្រាប់ប្រធានសភាអារ៉ាប៊ីសាអូឌីតពីការបង្ករឿងរបស់ថៃលើបញ្ហាព្រំដែន appeared first on Kampuchea Thmey Daily.

កម្ពុជា-អារ៉ាប៊ីសាអូឌីត Archives - Kampuchea Thmey Daily

បទ​វិភាគ៖ ​ហេតុអ្វី​បានជា​កម្ពុជា​កំពុង​បង្កើន​ទំនាក់ទំនង​យ៉ាង​ស្អិតល្មួត​ជាមួយ​ពិភពឥស្លាម?

កម្ពុជា-អារ៉ាប៊ីសាអូឌីត បេជ្ញាបន្តពង្រឹងពាណិជ្ជកម្មទ្វេភាគីរវាងប្រទេសទាំងពីរឱ្យកាន់តែមានប្រសិទ្ធភាព

កម្ពុជា-អារ៉ាប៊ីសាអូឌីតប្តេជ្ញាជំរុញកិច្ចសហប្រតិបត្តិការ និងបង្កើនភ្ញៀវទេសចររវាងប្រទេសទាំងពីរ

អារ៉ាប៊ីសាអូឌីតអញ្ជើញ​ប្រធានសភាកម្ពុជាទៅធ្វើទស្សនកិច្ច

សម្ដេចសភាធិបតី ថាដំណើរទស្សនកិច្ច​របស់ប្រធានសភាអារ៉ាប៊ីសាអូឌីតឆ្លុះបញ្ចាំងពីការ​ជឿទុកចិត្តមកលើកម្ពុជា

ប្រធានសភាអារ៉ាប៊ីសាអូឌីតសង្ឃឹម​ថា​ប្រទេស​លោក​នឹង​អាច​បង្កើន​ទំនាក់ទំនង​កាន់​តែច្រើនជាមួយ​កម្ពុជា

ប្រធានសភាអារ៉ាប៊ីសាអូឌីតថាកម្ពុជាមានភាព​ថ្លៃថ្នូរ និងក្រមសីលធម៌ខ្ពស់

សម្ដេច​សភាធិបតីប្រាប់ប្រធានសភាអារ៉ាប៊ីសាអូឌីតពីការ​បង្ករឿងរបស់ថៃលើបញ្ហាព្រំដែន

បទវិភាគ៖ ហេតុអ្វីបានជាកម្ពុជាកំពុងបង្កើនទំនាក់ទំនងយ៉ាងស្អិតល្មួតជាមួយពិភពឥស្លាម?

អារ៉ាប៊ីសាអូឌីតអញ្ជើញប្រធានសភាកម្ពុជាទៅធ្វើទស្សនកិច្ច

សម្ដេចសភាធិបតី ថាដំណើរទស្សនកិច្ចរបស់ប្រធានសភាអារ៉ាប៊ីសាអូឌីតឆ្លុះបញ្ចាំងពីការជឿទុកចិត្តមកលើកម្ពុជា

ប្រធានសភាអារ៉ាប៊ីសាអូឌីតសង្ឃឹមថាប្រទេសលោកនឹងអាចបង្កើនទំនាក់ទំនងកាន់តែច្រើនជាមួយកម្ពុជា

ប្រធានសភាអារ៉ាប៊ីសាអូឌីតថាកម្ពុជាមានភាពថ្លៃថ្នូរ និងក្រមសីលធម៌ខ្ពស់

សម្ដេចសភាធិបតីប្រាប់ប្រធានសភាអារ៉ាប៊ីសាអូឌីតពីការបង្ករឿងរបស់ថៃលើបញ្ហាព្រំដែន