ការបញ្ជាក់ និងការអំពាវនាវរបស់កម្ពុជាធ្វើឡើង ស្របពេលនៅឯតាមព្រំដែនកម្ពុជា-ថៃ នៅតែមានភាពតានតឹង បទឈប់បាញ់មានភាពផុយស្រួយ  ខណៈកន្លងទៅថៃយកលេសបង្ក្រាបការឆបោកតាមអនឡាញលើអធិបតេយ្យ និងបូរណភាពទឹកដីកម្ពុជា ដោយប្រើប្រាស់កងកម្លាំងប្រដាប់អាវុធ ដើម្បីបិទបាំងទង្វើបើកការវាយប្រហារខុសច្បាប់ និងវាតទី កាន់កាប់ទឹកដីកម្ពុជា បំពានខ្សែរព្រំដែនដែលមានការទទួលស្គាល់ជាអន្តរជាតិ។

ក្នុងបទអន្តរាគមន៍ កិច្ចប្រជុំក្រុមប្រឹក្សាសហគមន៍នយោបាយ-សន្តិសុខអាស៊ាន (APSC) លើកទី៣១ នៅទីក្រុងសេប៊ូ ប្រទេសហ្វីលីពីន នៅថ្ងៃទី៧ ខែឧសភា ឆ្នាំ២០២៦ ឧបនាយករដ្ឋមន្ត្រី ប្រាក់ សុខុន បានបញ្ជាក់ជាថ្មីនូវការប្តេជ្ញាចិត្តរបស់កម្ពុជា ចំពោះការដោះស្រាយជម្លោះដោយសន្តិវិធី ការគោរពអធិបតេយ្យ និងការមិនប្រើកម្លាំង ស្របតាមច្បាប់អន្តរជាតិ។ ប្រមុខការទូតកម្ពុជា សង្កត់ធ្ងន់ថា អាស៊ាននៅតែបន្តដើរតួនាទីយ៉ាងសំខាន់ ដែលជាកម្លាំងចលករសម្រាប់សន្តិភាព ស្ថិរភាព និងការជឿទុកចិត្តគ្នា នៅក្នុងតំបន់ និងពិភពលោក។

ក្រសួងការបរទេស និងសហប្រតិបត្តិការអន្តរជាតិ ក្នុងកិច្ចប្រជុំ ឧបនាយករដ្ឋមន្ត្រី ប្រាក់ សុខុន ថ្លែងថា៖«នៅចំពោះមុខការកើនឡើងនៃភាពស្មុគស្មាញស្តីពីបញ្ហាឧក្រិដ្ឋកម្មឆ្លងដែន ជាពិសេសការគំរាមកំហែងតាមប្រព័ន្ធបច្ចេកវិទ្យា កម្ពុជាអំពាវនាវឱ្យមានការបង្កើនកិច្ចសហការក្នុងតំបន់ និងការចូលរួមយ៉ាងសកម្មជាមួយដៃគូ ដើម្បីរួមគ្នាប្រយុទ្ធប្រឆាំងនឹងបទល្មើសទាំងនេះឱ្យមានប្រសិទ្ធភាព។ »។

ក្នុងការប្រយុទ្ធប្រឆាំងការឆបោកតាមប្រព័ន្ធបច្ចេកវិទ្យាដែលមានលក្ខណៈឆ្លងដែន កន្លងទៅ កម្ពុជាបានអះអាងថា បានពង្រឹង និងពង្រីកកិច្ចសហប្រតិបត្តិការជាមួយដៃគូ អង្គការអន្តរជាតិ និងយន្តការពហុភាគីពាក់ព័ន្ធ ដើម្បីផ្លាស់ប្តូរព័ត៌មាន និងបច្ចេកទេសរួមគ្នា។ កម្ពុជាបានសហការយ៉ាងសកម្មក្នុងការស្រាវជ្រាវ បង្ក្រាប និងបញ្ជូនជនសង្ស័យ ព្រមទាំងការជួយសង្គ្រោះជនរងគ្រោះ ដែលពាក់ព័ន្ធនឹងបណ្តាញ ឧក្រិដ្ឋកម្មតាម ប្រព័ន្ធបច្ចេកវិទ្យា។

រាជរដ្ឋាភិបាល កម្ពុជា ក៏អំពាវនាវឱ្យមានការសហការពីអន្តរជាតិបន្ថែម ដោយផ្អែកលើគោលការណ៍ទំនួលខុសត្រូវរួម និងការចែករំលែកព័ត៌មានឱ្យបានទាន់ពេលវេលា ដើម្បីបង្កើនប្រសិទ្ធភាពក្នុងការប្រយុទ្ធប្រឆាំងការឆបោកតាមប្រព័ន្ធបច្ចេកវិទ្យា ដែលជាបញ្ហារួមរបស់តំបន់។ កម្ពុជា ក៏បានបញ្ជាក់ជាថ្មីថា ការប្រយុទ្ធប្រឆាំងនឹងការឆបោកតាមប្រព័ន្ធបច្ចេកវិទ្យា គឺជាការប្រយុទ្ធប្រឆាំងរយៈពេលវែង ដែលត្រូវការចូលរួមពីគ្រប់ភាគីទាំងក្នុងប្រទេស និងអន្តរជាតិ៕

ដោយ៖ ង៉ិល ណារ៉ាត់

The post កម្ពុជាបញ្ជាក់ជាថ្មីពីការមិនប្រើកម្លាំងដោះស្រាយបញ្ហា និងអំពាវនាវឱ្យអាស៊ានបង្កើនកិច្ចសហការប្រឆាំងឧក្រិដ្ឋកម្មឆ្លងដែន appeared first on Kampuchea Thmey Daily.

ក្រសួងការបរទេស សរសេរក្នុងសេចក្តីប្រកាសព័ត៌មានថា ៖«ក្រោមមូលបទ “ដំណើរឆ្ពោះទៅកាន់អនាគតរួមគ្នា” កិច្ចប្រជុំកំពូលនឹងផ្តល់ជាវេទិកាសម្រាប់ថ្នាក់ដឹកនាំ អាស៊ាន ដើម្បីពិភាក្សាលើបញ្ហាសំខាន់ៗទាក់ទងនឹងការកសាងសហគមន៍អាស៊ាន និងមាគ៌ាឆ្ពោះទៅមុខ ដោយ ផ្តោតលើ៖ ១) ការធានាសន្តិសុខថាមពលក្នុងតំបន់ និងភាពធន់ ២) ស្ថិរភាពសន្តិសុខស្បៀង ៣) សុវត្ថិភាព នៃពលរដ្ឋអាស៊ាន ក៏ដូចជាផ្លាស់ប្តូរទស្សនៈគ្នាលើបញ្ហាតំបន់ និងអន្តរជាតិ ក្នុងគោលបំណងជំរុញអនាគតមួយ ប្រកបដោយសន្តិភាព វិបុលភាព បរិយាបន្ន និងភាពធន់។ »។

តាមក្រសួងការបរទេស ក្នុងឱកាសនៃកិច្ចប្រជុំកំពូលនេះ សម្តេចធិបតីនាយករដ្ឋមន្ត្រី ក៏នឹងមានជំនួបទ្វេភាគីជាមួយថ្នាក់ ដឹកនាំអាស៊ាន ដើម្បីពង្រឹងបន្ថែមទៀតនូវកិច្ចសហប្រតិបត្តិការដែលផ្តល់អត្ថប្រយោជន៍ទៅវិញទៅមក និងផល ប្រយោជន៍រួម។

បើតាមក្រសួងការបរទេស ឧបនាយរដ្ឋមន្ត្រី ប្រាក់ សុខុន រដ្ឋមន្ត្រីការបរទេស និងសហប្រតិបត្តិការអន្តរជាតិ រួមជាមួយ ឧបនាយករដ្ឋមន្ត្រី រដ្ឋមន្ត្រី និងមន្ត្រីជាន់ខ្ពស់រាជរដ្ឋាភិបាល ព្រមទាំងតំណាងធុរកិច្ចមកពីសភាពាណិជ្ជកម្មកម្ពុជា និងសមាគមឧកញ៉ាកម្ពុជា នឹងអមដំណើរសម្តេចធិបតីនាយករដ្ឋមន្ត្រី និងលោកជំទាវបណ្ឌិត ពេជ ចន្ទមុន្នី ហ៊ុនម៉ាណែត ទៅចូលរួមកិច្ចប្រជុំនេះ៕

ដោយ៖ ង៉ិល ណារ៉ាត់

The post នាយករដ្ឋមន្ត្រីកម្ពុជា នឹងចូលរួមកិច្ចប្រជុំកំពូលអាស៊ាន២ថ្ងៃនៅហ្វីលីពីន ពិភាក្សាលើសន្តិសុខថាមពល ស្បៀង សុវត្ថិភាពពលរដ្ឋអាស៊ាន appeared first on Kampuchea Thmey Daily.

​យោង​តាម​ក្រសួង​ពាណិជ្ជកម្ម​ គិត​ចាប់​ពី​ខែ​មករា​ដល់​ខែកញ្ញាឆ្នាំ​២០២៥ កម្ពុជា​បាន​នាំ​ចេញ​ទំនិញមានតម្លៃ ​៤,៤៧ ពាន់លានដុល្លារ ​ទៅកាន់បណ្ដាប្រទេសជាសមាជិក ASEAN ​រួមមាន ប្រទេស​ឥណ្ឌូនេស៊ី ម៉ាឡេស៊ី ហ្វីលីពីន សឹង្ហបុរី ថៃ ប៊្រុយនេ វៀតណាម ឡាវ និង​ប្រទេស​ភូមា។ ​ទន្ទឹមនឹងនេះ ​ការនាំ​ចូលប្រទេស​ជាសមាជិក​មានទឹកប្រាក់ប្រមាណ ៧,៨០ ពាន់លានដុល្លារ ធ្លាក់​ចុះ ១,៣៥ ភាគរយ។​

​លោក ប៉ែន ​សុវិជាតិ អ្នក​នាំ​ពាក្យ​ក្រសួង​ពាណិជ្ជ​កម្ម មានប្រសាសន៍ថា ​ការ​កើន​ឡើង​នៃ​ការដោះ​ដូរ​ទំនិញ​របស់​កម្ពុជា​ជាមួយ​ប្រទេស​សមាជិក​អាស៊ាន​ឆ្លុះ​បញ្ជាំង​ពី​ការងើប​ឡើងវិញ​នៃ​តម្រូវ​ការ​ក្នុង ​​ក្នុង​តំបន់ និង​ពិភពលោក​។​

​លោក​បណ្ឌិត ជ័យ តិច អ្នក​ស្រាវ​ជ្រាវ​ការ​អភិវឌ្ឍសង្គម-សេដ្ឋកិច្ច ប្រាប់​កម្ពុជា​ថ្មី​នៅ​ថ្ងៃ​អង្គារ៍​ទី ២១ ខែ តុលា ឆ្នាំ ២០២៥ ថា កម្ពុជា​មាន​ការ​តភ្ជាប់​ពោល​គឺ​ទើប​តែ​ដាក់​ឱ្យ​ដំណើរ​ការ​ព្រលាន​អន្តរជាតិ​តេជោ ​និង​ការ​ចុះ​កិច្ចព្រមព្រៀង​ពាណិជ្ជ​កម្មសេរី ជាមួយតំបន់ និងអន្តរជាតិជាច្រើន ធ្វើឱ្យ​ពាណិជ្ជ​កម្ម​របស់​កម្ពុជា​មាន​ភាព​ល្អប្រសើរ​។​

​កម្ពុជា​បាន​នាំចេញ​កសិផល សម្លៀក​បំពាក់ ស្បែក​​ជើង កាបូប គ្រឿង​អេ​ឡិច​​ត្រូ​និក និង​ កង់ ទៅកាន់​ប្រទេស​អាស៊ាន ខណៈដែល​ការនាំ​​ចូល​មានដូចជា​ចំណីអាហារ ភេសជ្ជៈ ឧបករណ៍​អគ្គិសនី និង​អេឡិចត្រូនិក សម្ភារ​សំ​​ណង់ គ្រឿង​យន្ត​កសិកម្ម និង​យានជំនិះ​៕

អត្ថបទ៖ ឡេង ដេត

The post ​ការ​ដោះដូរ​ទំនិញ​រវាង​កម្ពុជា-អាស៊ាន​ សម្រេច​បាន​ទឹកប្រាក់​ជាង ១២ ពាន់​លាន​ដុល្លារ​ នៅ​ក្នុង​រយៈ​ពេល ៩ ខែ​ appeared first on Kampuchea Thmey Daily.

សារព័ត៌មានThe Straitstimes របស់សិង្ហបុរី បានចុះផ្សាយថា អគ្គលេខាធិការអាស៊ាន លោក Kao Kim Hourn បានគូសបញ្ជាក់ថា ការសម្រេចចិត្តដ៏ម៉ឺងម៉ាត់របស់ប្រធានប្តូរវេនអាស៊ាន គឺប្រទេសម៉ាឡេស៊ី ក្នុងការជួយអន្តរាគមន៍នៅក្នុងជម្លោះដោយអាវុធរវាងកម្ពុជា និងថៃ គឺជារឿងដ៏គួរឱ្យកោតសរសើរណាស់។ តាមលោក  Kao Kim Hourn ដោយសារតែការជួយអន្តរាគមន៍សម្របសម្រួលពីសំណាក់ម៉ាឡេស៊ីនេះហើយ ទើបឈានទៅដល់ការមានកិច្ចប្រជុំជជែកពិភាក្សាគ្នារវាងរដ្ឋមន្រ្តីការពារជាតិនៃប្រទេសទាំង២កម្ពុជា-ថៃ ដែលដំណើរការទៅនៅក្នុងទីក្រុង Kuala Lumpur ប្រទេសម៉ាឡេស៊ី។

គួរជម្រាបជូនថា នៅក្នុងប្រទេសម៉ាឡេស៊ី ប្រតិភូក្រុមលេខាធិការគណៈកម្មាធិការព្រំដែនទូទៅកម្ពុជា-ថៃ(GBC) បាន និងកំពុងបើកកិច្ចប្រជុំផ្ទៃក្នុង ដើម្បីពិភាក្សាក្នុងការជំរុញប្រសិទ្ធភាព និងភាពជឿជាក់អំពីការអនុវត្តកិច្ចព្រមព្រៀងបទឈប់បាញ់ និងការកសាងទំនុកចិត្តគ្នាជាមួយភាគីថៃ។ កិច្ចប្រជុំក្រុមលេខាGBC បានចាប់ផ្តើមតាំងពីថ្ងៃទី៤ ដល់ទី៦  ខែសីហា ឆ្នាំ២០២៥ និងកិច្ចប្រជុំវិសាមញ្ញគណៈកម្មាធិការព្រំដែនទូទៅកម្ពុជា-ថៃ (GBC) នឹងប្រព្រឹត្តនាថ្ងៃទី៧ ខែសីហា ឆ្នាំ២០២៥ ដោយមានការចូលរួមពីរដ្ឋមន្រ្តីក្រសួងការពារជាតិ អគ្គមេបញ្ជាការ ក៏ដូចជា​ មេទ័ពជើងគោកនៃប្រទេសទាំង២។ ជាមួយគ្នានេះ ក៏មានដែរការចូលរួមសង្កេតការណ៍ពីសំណាក់តំណាងសហរដ្ឋអាមេរិក ចិន និងម៉ាឡេស៊ី។

ម៉ាឡេស៊ី បានដើរតួនាទីសំខាន់នៅក្នុងការសម្របសម្រួលឱ្យមានការចរចារវាងកម្ពុជា និងថៃ និងឈានទៅរកបទឈប់បាញ់មួយកាលពីថ្ងៃទី២៨ ខែកក្កដា ឆ្នាំ២០២៥។ នៅថ្ងៃទី០៥ ខែសីហា ម្សិលមិញនេះ នាយករដ្ឋមន្រ្តីម៉ាឡេស៊ី និងជាប្រធានប្តូរវេនអាស៊ាននៅឆ្នាំនេះ លោក Anwar Ibrahim បានរៀបចំដោយគ្រោងបញ្ជូនក្រុមសង្កេតការណ៍មកកាន់ព្រំដែនកម្ពុជា-ថៃ ដើម្បីតាមដានត្រួតពិនិត្យការគោរព និងអនុវត្តបទឈប់បាញ់កម្ពុជា-ថៃ។ ប៉ុន្តែ ក្នុងពេលជាមួយគ្នានេះ ម៉ាឡេស៊ី ក៏កំពុងប្រើប្រាស់ប្រព័ន្ធផ្កាយរណប ដើម្បីតាមដានឃ្លាំមើលលើការគោរព និងអនុវត្តបទឈបប់បាញនេះផងដែរ៕

The post អគ្គលេខាធិការអាស៊ាន៖ ជាប្រធានប្តូរវេនអាស៊ានឆ្នាំនេះ ម៉ាឡេស៊ី តួនាទីយ៉ាងសំខាន់ក្នុងការកាត់បន្ថយភាពតានតឹងកម្ពុជា-ថៃ appeared first on Kampuchea Thmey Daily.

សមយុទ្ធនេះ រៀបចំឡើងក្រោមកិច្ចសហការជាមួយ មជ្ឈមណ្ឌលសម្របសម្រួលអាស៊ានសម្រាប់ជំនួយមនុស្សធម៌ក្នុងការគ្រប់គ្រងគ្រោះ មហន្តរាយ (មជ្ឈមណ្ឌល-អាហា) ដែលមានការចូលរួមពីប្រទេសថៃ និងប​ណ្ដាប្រទេសជាសមាជិករបស់អាស៊ាន ប្រទេសទីម័រឡេស្តេ ដៃគូសន្ទនាអាស៊ាន អគ្គលេខាធិការអាស៊ាន នាយកប្រតិបត្តិមជ្ឈមណ្ឌល-អាហា ឯកអគ្គរាជទូត ឯកអគ្គរដ្ឋទូត និងអនុព័ន្ធយោធាបរទេសប្រចាំកម្ពុជា ក្រសួងស្ថាប័នជំនាញ កងប្រតិបត្តិការរុករក និងសង្គ្រោះ អភិបាលរាជធានី-ខេត្ត ដៃគូអភិវឌ្ឍន៍ ភ្នាក់ងារ សហប្រជាជាតិ អង្គការអន្តរជាតិ និងវិស័យឯកជន សរុបប្រមាណ ៦៥០នាក់។ នេះបើតាមសេចក្ដីប្រកាសព័ត៌មានដដែល។

គណៈកម្មាធិការជាតិគ្រប់គ្រងគ្រោះមហន្តរាយ គូសបញ្ជាក់ថា ARDEX-25 ជាលំហាត់សមយុទ្ធពេញលេញ ដែលរៀបចំឡើងរៀងរាល់ពីរឆ្នាំម្តង ដើម្បីធ្វើតេស្តសាកល្បង និង វាយតម្លៃយន្តការត្រៀមបង្ការ និងឆ្លើយតបសង្គ្រោះបន្ទាន់គ្រោះមហន្តរាយរបស់អាស៊ាន ដោយរួមបញ្ចូលដំណើរការ ត្រៀមរៀបចំ ការរុករកនិងសង្គ្រោះ ការប៉ាន់ប្រមាណផលប៉ះពាល់ និងយុទ្ធសាស្ត្រឆ្លើយតបបន្ទាន់កម្រិតប្រទេសដែល ផ្សារភ្ជាប់នឹងអាស៊ាន ក្នុងគោលបំណងសង្គ្រោះអាយុជីវិតជនរងគ្រោះដោយគ្រោះមហន្តរាយ រោះដោយគ្រោះមហន្តរាយ តាមរយៈការរុករកនិងសង្គ្រោះ នៅក្នុងនាមជាអ្នកសម្របសម្រួលជំនួយមនុស្សធម៌ ការផ្តល់នូវសេវាសុខាភិបាល ការផ្តល់ជម្រកស្នាក់នៅបណ្តោះអាសន្ន ការផ្តល់ស្បៀងអាហារ និងអនាម័យទឹកស្អាត ជា ដើម។

តាមគណៈកម្មាធិការជាតិគ្រប់គ្រងគ្រោះមហន្តរាយ លំហាត់សមយុទ្ធនេះក៏នឹងរួមបញ្ចូលការធ្វើតេស្តសាកល្បងនីតិវិធីប្រតិបត្តិស្តង់ដាអាស៊ានសម្រាប់ការត្រៀមរៀបចំ ក្នុងតំបន់ (SASOP) និងលក្ខខណ្ឌការងាររបស់អគ្គលេខាធិការអាស៊ានក្នុងនាមជាអ្នកសម្របសម្រួលជំនួយមនុស្សធម៌ អាស៊ានផងដែរ។ វិធានដែលនឹងត្រូវប្រើប្រាស់សម្រាប់ ARDEX-25 រួមមាន៖ លំហាត់លើតុ (TTX) លំហាត់ប៉ុស្តិ៍បញ្ជាការ (CPX) និងលំហាត់ហ្វឹកហ្វឺននៅទីវាល (FTX)។

ពិធីបើកលំហាត់សមយុទ្ធ នឹងប្រព្រឹត្តទៅនាថ្ងៃទី២២ ខែកក្កដា ឆ្នាំ២០២៥ នៅបញ្ជាការដ្ឋានទ័ពពិសេស កងទ័ព ជើងគោក ក្រោមអធិបតីភាព ទេសរដ្ឋមន្ត្រី គន់ គីម អនុប្រធានទី១ គ.ជ.គ.ម. និងជា ប្រធានកិច្ចប្រជុំថ្នាក់រដ្ឋមន្ត្រីអាស៊ានទទួលបន្ទុកការគ្រប់គ្រងគ្រោះមហន្តរាយ។ ចំណែកពិធីបិទលំហាត់សមយុទ្ធ នឹងប្រព្រឹត្តទៅនាថ្ងៃទី២៤ ខែកក្កដា ឆ្នាំ២០២៥ នៅបញ្ជាការដ្ឋានទ័ពពិសេស កងទ័ព ជើងគោក ក្រោមអធិបតីភាព នាយឧត្តមសេនីយ៍ ទៀ សីហា ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ៕

The post កម្ពុជា នឹងធ្វើសមយុទ្ធឆ្លើយតបគ្រោះអាសន្នមហន្តរាយ ដែលមានថៃ សមាជិកអាស៊ាន ទីម័រ និងភាគីពាក់ព័ន្ធចូលរួម appeared first on Kampuchea Thmey Daily.

គួរជ្រាបថា មុនទៅចូលកិច្ចប្រជុំកំពូលអាស៊ាននៅម៉ាឡេស៊ី សម្ដេចនាយករដ្ឋមន្ត្រីកម្ពុជា បានជួបសន្ទនា ជាមួយនាយករដ្ឋមន្ត្រីម៉ាឡេស៊ី តាមរយៈតាមខ្សែទូរសព្ទ កាលពីថ្ងៃទី២៩ ខែមេសា ឆ្នាំ២០២៥ កន្លងទៅថ្មីៗនេះ។ កាលណោះ សម្ដេចនាយករដ្ឋមន្ត្រីកម្ពុជា និងនាយករដ្ឋមន្ត្រីម៉ាឡេស៊ី បានជជែកគ្នាពាក់ព័ន្ធនឹងតួនាទីរបស់អាស៊ានក្នុងការជួយរកដំណោះស្រាយវិបត្តិនៅប្រទេសមីយ៉ាន់ម៉ា, វិធានការពន្ធរបស់សហរដ្ឋអាមេរិក និងការចូលជាជាសមាជិករបស់ប្រទេសទីម័រខាងកើតក្នុងសហគមន៍អាស៊ាន។

តាមក្រសួងការបរទេស និងសហប្រតិបត្តិការអន្តរជាតិ ប្រតិភូជាន់ខ្ពស់ ដែលអញ្ជើញអមដំណើរ សម្តេចធិបតី និង លោកជំទាវបណ្ឌិត ពេជ ចន្ទមុន្នី ហ៊ុនម៉ាណែត រួមមានឧបនាយករដ្ឋមន្ត្រី និងជារដ្ឋមន្ត្រីការបរទេស និងសហប្រតិបត្តិការអន្តរជាតិលោក​ ប្រាក់ សុខុន និងរដ្ឋមន្ត្រី និងមន្ត្រីសំខាន់ៗនៃរាជរដ្ឋាភិបាល ព្រមទាំងតំណាងពីសភាពាណិជ្ជកម្មកម្ពុជា។

កិច្ចប្រជុំកំពូលអាស៊ាន ដែលម៉ាឡេស៊ីធ្វើជាម្ចាស់ផ្ទះ គឺក្រោមប្រធានបទ “បរិយាបន្ន និងចីរភាព” កិច្ចប្រជុំកំពូលនឹងផ្តោតលើការជំរុញការកសាង សហគមន៍អាស៊ាន និងអនុម័តចក្ខុវិស័យសហគមន៍អាស៊ានឆ្នាំ២០៤៥ ដែលជាព្រឹត្តិការណ៍ដ៏សំខាន់ មួយក្នុងការបញ្ជាក់ឡើងវិញពីការលើកកម្ពស់ការប្តេជ្ញាចិត្តរួមគ្នារបស់តំបន់អាស៊ានដែលប្រកបដោយ ភាពធន់ នវានុត្តន៍ ថាមវន្ត និងផ្តោតលើប្រជាជនជាចម្បង។

កិច្ចប្រជុំកំពូលពាក់ព័ន្ធនឹងផ្តល់វេទិកាសម្រាប់អាស៊ានក្នុងការពង្រឹង និងពង្រីកទំនាក់ទំនង ជាមួយក្រុមប្រឹក្សាសហប្រតិបត្តិការឈូងសមុទ្រ (GCC) ក៏ដូចប្រាស្រ័យទាក់ទងជាមួយ GCC និង ប្រទេសចិន លើកិច្ចសហប្រតិបត្តិការសេដ្ឋកិច្ច នៅចំពោះមុខការប្រែប្រួលទិដ្ឋភាពភូមិសាស្ត្រ នយោបាយ និងសេដ្ឋកិច្ច។

ក្រសួងការបរទសកម្ពុជា ឱ្យដឹងថា ក្នុងអំឡុងពេលស្នាក់នៅទីក្រុងគូឡាឡាំពួ សម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា  ក៏នឹងមានជំនួបទ្វេភាគីជាមួយថ្នាក់ ដឹកនាំអាស៊ាន និងពិភពលោកមួយចំនួនផងដែរ ដើម្បីពង្រឹង និងធ្វើឱ្យកាន់តែស៊ីជម្រៅនូវទំនាក់ ទំនងទ្វេភាគីលើបញ្ហាដែលមានផលប្រជាជន និងក្តីបារម្ភរួម។  ក្នុងន័យនេះ ក្រោយបញ្ចប់កិច្ចប្រជុំកំពូលអាស៊ាន សម្ដេចធិបតី នាយករដ្ឋមន្ត្រីកម្ពុជា ទំនងជានឹងចាកចេញពីប្រទេសម៉ាឡេស៊ី បន្តដំណើរទៅប្រទេសជប៉ុនបន្តទៀត ដើម្បីបំពេញទស្សនកិច្ច។

សូមជម្រាបប្រិយមិត្តឱ្យដឹងថា បើតាមក្រសួងការបរទេសជប៉ុន ចាប់ពីថ្ងៃទី២៨ ខែឧសភា ដល់ទី៣១ ខែឧសភា ឆ្នាំ២០២៥ សម្តេចធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា និងលោកជំទាវបណ្ឌិត ពេជ ចន្ទមុនី នឹងដឹកនាំគណៈប្រតិភូកម្ពុជា អញ្ជើញទៅបំពេញទស្សនកិច្ចជាលើកទី២ក្នុងឋានៈជានាយករដ្ឋមន្រ្តីកម្ពជានៅប្រទេសជប៉ុន។

ក្រសួងការបរទេសជប៉ុន បានបញ្ជាក់ឱ្យដឹងថា នៅក្នុងអំឡុងពេលស្នាក់នៅក្នុងប្រទេសជប៉ុន សម្តេចធិបតី នាយករដ្ឋមន្រ្តីជប៉ុនកម្ពុជា នឹងជួបពិភាក្សាការងារជាមួយនាយករដ្ឋមន្រ្តីជប៉ុន លោក ISHIBA Shigeru ដោយនឹងផ្លាស់ប្តូរយោបល់គ្នាលើបញ្ហាទំនាក់ទំនងទ្វេភាគីកម្ពុជា-ជប៉ុន ក៏ដូចជា បញ្ហានៅក្នុងតំបន់ និងពិភពលោក។

សម្តេចធិបតី​ ហ៊ុន ម៉ាណែត ក៏នឹងចូលរួមសន្និសីទអន្តរជាតិលើកទី៣០ស្ដីពី “អនាគតរបស់អាស៊ី” នៅទីក្រុងតូក្យូ ដែលរៀបចំឡើងក្រុមហ៊ុន​ Nikkei ផងដែរ។ ក្រសួងការបរទេសជប៉ុន បានអះអាងថា ដំណើរទស្សនកិច្ចរបស់នាយករដ្ឋមន្ត្រីកម្ពុជានេះ ត្រូវបានរំពឹងថា នឹងធ្វើឱ្យស៊ីជម្រៅបន្ថែមទៀតនូវ«ភាពជាដៃគូយុទ្ធសាស្ត្រគ្រប់ជ្រុងជ្រោយ»រវាងប្រទេសជប៉ុន និងប្រទេសកម្ពុជា។

សម្រាប់សម្តេចធិបតី ហ៊ុន ម៉ាណែត នេះ គឺជាលើកទី២ហើយដែលសម្តេចធ្វើទស្សនកិច្ចនៅក្នុងប្រទេសជប៉ុន ដោយកាលពីលើកទី១ក្នុងឋានៈជានាយករដ្ឋមន្រ្តីកម្ពុជា សម្តេចធិបតី បានធ្វើទស្សនកិច្ចនៅប្រទេសជប៉ុននៅខែធ្នូ ចុងឆ្នាំ២០២៣ ដែលនៅពេលនោះ សម្តេច នាយករដ្ឋមន្រ្តី បានជួបពិភាក្សាការងារជាមួយនាយករដ្ឋមន្រ្តីជប៉ុន លោក Kishida Fumio។ ចំណែក លើកនេះវិញ វា គឺជាលើកទី១ដែលសម្តេចធិបតី ហ៊ុន ម៉ាណែត នឹងជួបពិភាក្សាការងារជាមួយលោក ISHIBA Shigeru នាយករដ្ឋមន្រ្តីជប៉ុនបច្ចុប្បន្ន៕

The post នាយករដ្ឋមន្ត្រីកម្ពុជា នឹងចូលរួមកិច្ចប្រជុំកំពូលអាស៊ានលើកទី៤៦ និងកិច្ចប្រជុំកំពូលពាក់ព័ន្ធ នៅម៉ាឡេស៊ី appeared first on Kampuchea Thmey Daily.

តាមសេចក្តីប្រកាសព័ត៌មានកិច្ចប្រជុំនឹងប្រព្រឹត្តទៅក្រោមមូលបទ «នវានុវត្តន៍សម្រាប់ការផ្តល់សេវាសាធារណៈឱ្យកាន់តែប្រសើរឡើង» ដោយ មានសមាសភាពចូលរួមជាមន្ត្រីជាន់ខ្ពស់ដែលពាក់ព័ន្ធកិច្ចការមុខងារសាធារណៈ នៃបណ្តាប្រទេសអាស៊ាន និងប្រទេស ដែលជាដៃគូសន្ទនា។ កិច្ចប្រជុំខាងលើនឹងទទួលបានការអញ្ជើញជាអធិបតីដ៏ខ្ពង់ខ្ពស់ក្នុងពិធីបើកដោយ ឯកឧត្តម ហ៊ុន ម៉ានី ឧបនាយករដ្ឋមន្ត្រី រដ្ឋមន្ត្រីក្រសួងមុខងារសាធារណៈ។

បើតាមក្រសួងមុខងារសាធារណៈ កាលពីឆ្នាំឆ្នាំ២០០៥ ស្ថាប័នមុខងារសាធារណៈនៃប្រទេសកម្ពុជាធ្លាប់បានធ្វើជាប្រធានប្តូរវេន និង ជាម្ចាស់ផ្ទះរៀបចំកិច្ចប្រជុំ ACCSM លើកទី១៣ ជាលើកទី១។ចំណែក នៅឆ្នាំ២០២៥ នេះ ពោលគឺក្នុងរយៈកាល២០ឆ្នាំក្រោយមក ក្រសួងមុខងារសាធារណៈកម្ពុជាទទួលធ្វើជាម្ចាស់ផ្ទះជាលើកទី២ រៀបចំកិច្ចប្រជុំ ACCSM លើកទី២៣ និង កិច្ចប្រជុំ ACCSM+3 លើកទី៨។

តាមសេចក្តីប្រកាសព័ត៌មាន បន្ថែមលើកិច្ចប្រជុំខាងលើ ប្រតិភូដែលចូលរួមកិច្ចប្រជុំ នឹងត្រូវបានអញ្ជើញចូលរួមដំណើរទស្សនកិច្ចនៅក្រុង កោះរ៉ុង ដែលជាតំបន់ទេសចរឆ្នេរសមុទ្រដ៏ស្រស់ស្អាតរបស់កម្ពុជា៕

The post កម្ពុជា នឹងធ្វើជាប្រធាន ដឹកនាំកិច្ចប្រជុំកិច្ចសហប្រតិបត្តិការអាស៊ាន ស្តីពីកិច្ចការមុខងារសាធារណៈ ពីថ្ងៃទី១៩-២០ ខែឧសភា appeared first on Kampuchea Thmey Daily.

រដ្ឋមន្ត្រី នេត្រ ភក្ត្រា  ក៏បានលើកឡើងជូនថ្នាក់ដឹកនាំមកពីបណ្តាលប្រទេសអាស៊ាន និងប្រទេសទីម័រខាងកើត ពីហានិភ័យនៃការកើនឡើងនៃព័ត៌មានកែ្លងក្លាយដែលបង្កើតឡើងដោយបញ្ញាសិប្បនិម្មិត (AI) និងបានអំពាវនាវដល់កិច្ចប្រជុំឱ្យពិនិត្យពិចារណាលើការរៀបចំរចនាសម្ព័ន្ធក្រុមការងារប្រព័ន្ធផ្សព្វផ្សាយអាស៊ាន ដើម្បីផ្តល់អាទិភាពដល់កិច្ចខិតខំប្រឹងប្រែងលើការប្រយុទ្ធប្រឆាំងនឹងព័ត៌មានក្លែងក្លាយ។

ឆ្លៀតក្នុងឱកាសនេះ រដ្ឋមន្ត្រីក្រសួងព័ត៌មានកម្ពុជា ក៏បានបង្ហាញរបាយការណ៍ស្តីពីសេរីភាពសារព័ត៌មានឆ្នាំ ២០២៥ របស់កម្ពុជា ដោយកត់សម្គាល់ថា អ្នកសារព័ត៌មានជាង ៨១% បានចាត់ទុកសេរីភាពសារព័ត៌មានមាននៅកម្ពុជាមានលក្ខណៈល្អប្រសើរ។ ជាមួយគ្នានេះ រដ្ឋមន្ត្រីក្រសួងព័ត៌មានកម្ពុជាត្រៀមខ្លួនក្នុងការចែករំលែកបទពិសោធលើការរៀបចំរបាយការណ៍ស្តីពីស្ថានភាពសេរីភាពសារព័ត៌មាន និងបានស្នើឱ្យសមាជិកអាស៊ានពិចារណារៀបចំរបាយការណ៍ស្តីពីស្ថានភាពសេរីភាពសារព័ត៌មាននៅក្នុងតំបន់ ដើម្បីបង្ហាញពីបរិស្ថានបច្ចុប្បន្ននៃលំហសេរីភាពសារព័ត៌មានក្នុងបណ្តាប្រទេសរៀងៗខ្លួន។  

គួរគូសបញ្ជាក់ថា កិច្ចប្រជុំរដ្ឋមន្ត្រីទទួលបន្ទុកព័ត៌មានអាស៊ានលើកទី១៧ ត្រូវបានរៀបចំប្រព្រឹត្តិធ្វើឡើងក្រោមប្រធានបទ «ប្រព័ន្ធផ្សព្វផ្សាយជំរុញការយល់ដឹងរួម៖ ការផ្លាស់ប្តូរតួនាទីរបស់ប្រព័ន្ធផ្សព្វផ្សាយក្នុងការជំរុញកិច្ចសហប្រតិបត្តិការ និងការយល់ដឹងគ្នាទៅវិញទៅមកនៅក្នុងអាស៊ាន MAJU» ដែលសង្កត់ធ្ងន់ទៅលើតួនាទីវិវត្តនៃប្រព័ន្ធផ្សព្វផ្សាយក្នុងការពង្រឹងកិច្ចសហប្រតិបត្តិការក្នុងតំបន់ អត្តសញ្ញាណ និងការយោគយល់គ្នាទៅវិញទៅមក។ កិច្ចប្រជុំនេះ មានការចូលរួមពីសំណាក់រដ្ឋសមាជិកអាស៊ានទាំងអស់ ប្រទេសទីម័រខាងកើត ប្រទេសចិន ជប៉ុន សាធារណៈរដ្ឋកូរ៉េ និងលេខាធិការដ្ឋានអាស៊ាន៕

The post កម្ពុជាផ្តួចផ្តើម និងប្តេជ្ញាចិត្តជំរុញកិច្ចសហការប្រព័ន្ធផ្សព្វផ្សាយក្នុងតំបន់ និងអន្តរជាតិឱ្យមានប្រសិទ្ធភាព និងប្រសិទ្ធផល appeared first on Kampuchea Thmey Daily.