កម្មវិធី ល្ខោនខ្មែរ Archives - Kampuchea Thmey Daily

កម្មវិធីល្ខោនខ្មែរវគ្គផ្ដាច់ព្រ័ត្ររកឃើញម្ចាស់ជ័យលាភីហើយ ក្នុងរដូវកាលទី១

Thoeun Vansong — Fri, 23 Dec 2022 06:48:55 +0000

ឆ្លងកាត់ការប្រកួតប្រជែងដ៏វែងឆ្ងាយ ចាប់តាំងពីថ្ងៃទី៩ ខែកក្កដា ឆ្នាំ២០២២ កម្មវិធីល្ខោនខ្មែរ រដូវកាលទី១ បានបិទបញ្ចប់វគ្គផ្ដាច់ព្រ័ត្រហើយ កាលពីល្ងាចថ្ងៃទី២២ ខែធ្នូ ឆ្នាំ២០២២ ដែលបានប្រព្រឹត្តទៅនៅស្ថានីយ៍ទូរទស្សន៍ BTV ស្ទឹងមានជ័យ។

វគ្គផ្ដាច់ព្រ័ត្រនេះ បានធ្វើឡើងក្រោមអធិបតីភាពរបស់ឯកឧត្តម ហ៊ុន ម៉ានី ប្រធានគណៈកម្មការទី៧ នៃរដ្ឋសភា និងជាប្រធានសហភាពសហព័ន្ធយុវជនកម្ពុជា លោកជំទាវ ភឿង សកុណា រដ្ឋមន្ត្រីក្រសួងវប្បធម៌ និងវិចិត្រសិល្បៈ ឯកឧត្តម ឌី វិជ្ជា ប្រធានសហភាពសហព័ន្ធយុវជនកម្ពុជាខេត្តស្វាយរៀង ព្រមទាំងភ្ញៀវកិត្តិយសជាច្រើនរូបទៀត។

ក្រោយពីការយកចិត្តទុកដាក់ផ្ដល់ពិន្ទុដ៏សុក្រឹតពីសំណាក់គណៈកម្មការមេប្រយោគ គឺលទ្ធផលបានរកឃើញជ័យលាភីទាំង ៣ក្រុម គឺ ជ័យលាភីលេខ១ បានទៅលើក្រុមយុវជនមន្ទីរវប្បធម៌ និងវិចិត្រសិល្បៈ រាជធានីភ្នំពេញ ទទួលបានទឹកប្រាក់ចំនួន ១២លានរៀល ,ជ័យលាភីលេខ២ បានទៅលើក្រុមមន្ទីរវប្បធម៌ និងវិចិត្រសិល្បៈខេត្តសៀមរាប ទទួលបានទឹកប្រាក់ចំនួន ៨លានរៀល និងជ័យលាភីលេខ៣ បានទៅលើក្រុមខ្ញុំស្រឡាញ់វប្បធម៌នៃ ស.ស.យ.ក ខេត្តកំពង់ស្ពឺ ទទួលបានទឹកប្រាក់ចំនួន ៤រៀល។

ទន្ទឹមនេះ នៅក្នុងកម្មវិធីបិទ ក៏មានផ្ទាំងសិល្បៈទស្សនីយភាពនានា ដើម្បីជាការចូលរួមអបអរសាទរជាមួយកម្មវិធីល្ខោនខ្មែរ រដូវកាលទី១ និងដើម្បីញ៉ាំងឲ្យកម្មវិធីក្នុងវគ្គផ្ដាច់ព្រ័ត្រនេះកាន់តែអធិកអធម និងឱឡារិកផងដែរ។ ទស្សនីយភាពទាំងនេះ រួមមាន៖ របាំកូរសមុទ្រទឹកដោះ សម្ដែងដោយនាដកានៃក្រសួងវប្បធម៌ និងវិចិត្រសិល្បៈ និងការសម្ដែងពិសេស ល្ខោនខោល និងល្ខោនស្បែកធំ នៃសមាគមសិល្បៈសុវណ្ណភូមិ រឿងរាមកេរ្តិ៍។

សូមបញ្ជាក់ដែរថា កម្មវិធីល្ខោនខ្មែរ រដូវកាលទី១ បានបែងចែកជា ៩ដំណាក់កាល ដូចជា៖ ១.ដំណាក់កាលផ្សព្វផ្សាយកម្មវិធីល្ខោនខ្មែរ និងកិច្ចសម្ភាសន៍ពិសេសណៈកម្មការទាំង៤ ២.ការដាក់ពាក្យចូលរួមប្រកួត បិទទទួលពាក្យ និងវីដេអូប្រកួត ៣.វគ្គជម្រើសដោយគណៈកម្មការ ៤.វគ្គតម្រង់ទិស ៥.ល្ខោនខ្មែរ វគ្គទី១ និងជំនួបជាមួយគណៈកម្មការ (ការចាប់គ្រូបង្វឹក) ៦.ល្ខោនខ្មែរ វគ្គទី២ ការប្រកួតកូនក្រុមរបស់គណៈកម្មការទាំង៤រូប ៧.ការប្រកួតវគ្គពាក់កណ្តាលផ្តាច់ព្រ័ត្រ ៨.វគ្គវេទិការបស់ខ្ញុំ ការបោះឆ្នោតរបស់ទស្សនិកជនតាមរយៈវីដេអូរបស់ក្រុមប្រកួតលើទំព័រហ្វេសប៊ុកផ្លូវការសហភាពសហព័ន្ធយុវជនកម្ពុជាខេត្តស្វាយរៀង ដែលពិន្ទុពីទស្សនិកជនទទួលបាន៤០% និង៦០%ទៀតពីគណៈកម្មការ និងដំណាក់កាលទី៩.វគ្គផ្តាច់ព្រ័ត្រ។

ចាប់តាំងពីវគ្គដំបូងបង្អស់ រហូតដល់ពេលនេះ រាល់ការវិនិច្ឆ័យក្រុមបេក្ខភាពប្រឡងនីមួយៗ ត្រូវបានវាយតម្លៃយ៉ាងសុក្រឹត ដោយគណៈកម្មការមេប្រយោគទាំង ៤រូប ដែលសុទ្ធដឹងជាវីរៈសិល្បករពោរពេញដោយបទពិសោធន៍ និងជំនាញឯកទេសយូរឆ្នាំក្នុងវិស្ស័យសិល្បៈបុរាណខ្មែរ រួមមាន៖ លោកសាស្ដ្រាចារ្យ ព្រឿង ឈៀង លោកស្រីព្រឹទ្ធាចារ្យ ប៉ែន សុខហួន លោកស្រីសាស្ដ្រាចារ្យ សុទ្ធ សុម៉ាលី និងលោកស្រីសាស្ត្រាចារ្យ សំ សត្យា។

កម្មវិធីល្ខោនខ្មែរ រដូវកាលទី១នេះ បានរៀបចំឡើងក្នុងគោលបំណងចូលរួមលើកស្ទួយ ថែរក្សា ការពារសិល្បៈ ទំនៀមទម្លាប់ប្រពៃណី វប្បធម៌ដែលជាអត្តសញ្ញណជាតិ លើកកម្ពស់ និងផ្សព្វផ្សាយអំពីល្ខោនបុរាណចម្រុះរបស់ខ្មែរទៅកាន់ប្រជាពលរដ្ឋ ជាពិសេសយុវជនជំនាន់ក្រោយ និងបរទេសបានស្គាល់ឲ្យកាន់តែច្រើន៕

The post កម្មវិធីល្ខោនខ្មែរវគ្គផ្ដាច់ព្រ័ត្ររកឃើញម្ចាស់ជ័យលាភីហើយ ក្នុងរដូវកាលទី១ appeared first on Kampuchea Thmey Daily.

ភាពរស់រវើក នៃរឿងព្រះវរឈុន មុនីមេខលា សម្ដែងដោយក្រុមពន្លកថ្មី នៃវប្បធម៌ ក្នុងវគ្គពាក់កណ្ដាលផ្ដាច់ព្រ័ត្រ

អ៊ិន ពិសី — Mon, 05 Dec 2022 07:37:01 +0000

កម្មវិធីល្ខោនខ្មែរ រដូវកាលទី ១ ក្រោមវិញ្ញាសា ទម្រង់របាំក្បាច់បុរាណខ្មែរ បានឈានមកដល់វគ្គពាក់កណ្ដាលផ្ដាច់ព្រ័ត្រ សប្ដាហ៍ទី ២ ហើយ។ ក្រុមពន្លកថ្មី នៃវប្បធម៌ ដែលជាកូនក្រុមរបស់អ្នកគ្រូ សុទ្ធ សុម៉ាលី បានសម្ដែងរឿងព្រះវរឈុន មុនីមេខលា ក្នុងការប្រកួតពាក់កណ្ដាលផ្ដាច់ព្រ័ត្រ ប្រកបដោយភាពជឿជាក់ និងថាមពល។

ការដុតដៃដុតជើងបង្ហាញសមត្ថភាព ពិតជាទទួលបានការចាប់អារម្មណ៍ពីបងប្អូនទស្សនិកជន និងទទួលស្គាល់ពីគណៈកម្មការដាក់ពិន្ទុ សមស្របទៅនឹងកម្លាំងកាយចិត្តដែលសិល្បករបានលះបង់ពិតប្រាកដមែន។ សិល្បករទាំងនេះ គឺជាគ្រាប់ពេជ្រដ៏មានតម្លៃ ក្នុងវិស័យវប្បធម៌ ដែលនេះស័ក្ដិសមនឹងពាក្យស្លោករបស់កម្មវិធី “មិនត្រឹមតែជាការចូលរួមប្រកួត តែយើងទាំងអស់គ្នា ចូលរួមគាំទ្រ អភិរក្ស និងលើកស្ទួយសិល្បៈបុរាណខ្មែរ”៕

សូមអញ្ជើញទស្សនាការបញ្ចេញសមត្ថភាពរបស់ក្រុមតាមរយៈតំណវីដេអូនេះ ៖ https://fb.watch/h9UjkYeN8D/

The post ភាពរស់រវើក នៃរឿងព្រះវរឈុន មុនីមេខលា សម្ដែងដោយក្រុមពន្លកថ្មី នៃវប្បធម៌ ក្នុងវគ្គពាក់កណ្ដាលផ្ដាច់ព្រ័ត្រ appeared first on Kampuchea Thmey Daily.

បេក្ខជន៨ក្រុមនៃល្ខោនខ្មែររដូវកាលទី១ ដែលអាចឆ្ពោះទៅវគ្គពាក់កណ្ដាលផ្ដាច់ព្រ័ត្រ

Sokhom Khon — Tue, 15 Nov 2022 08:43:05 +0000

កម្មវិធីល្ខោនខ្មែរ រដូវកាលទី១ ដែលរៀបចំឡើងដោយ ស.ស.យ.ក ខេត្តស្វាយរៀង គាំទ្រដោយក្រសួងវប្បធម៌ និងវិចិត្រសិល្បៈ ឥឡូវនេះបានឈានមកដល់វគ្គពាក់កណ្ដាលផ្ដាច់ព្រ័ត្រ។

បេក្ខជនដែលជាប់ពីល្ខោនខ្មែរ វគ្គទី២ គឺត្រូវបានចម្រាញ់តាមរយៈការប្រកួតរវាងក្រុមរួមគ្រូបង្វឹក និងការជ្រើសរើសពីគណៈកម្មការដែលជាគ្រូបង្វឹកនោះដោយផ្ទាល់។ បេក្ខជននីមួយៗបានដាក់កម្លាំងកាយ កម្លាំងចិត្តយ៉ាងគាប់ប្រសើរ នូវរាល់ដំណាក់កាលប្រកួត ដោយមិនរាថយ ទើបធ្វើឱ្យពួកគេមានថ្ងៃនេះ។

សមាសភាពក្រុមដែលនឹងបញ្ចេញសមត្ថភាពថ្ងៃពាក់កណ្ដាលផ្ដាច់ព្រ័ត្រ រួមមាន៖
១. លោកគ្រូ ព្រឿង ឈៀង៖ ក្រុមខ្ញុំស្រឡាញ់វប្បធម៌នៃ ស ស យ ក ខេត្តកំពង់ស្ពឺ ក្រុមមន្ទីរវប្បធម៌ និងវិចិត្រសិល្បៈខេត្តសៀមរាប
២. អ្នកគ្រូ ប៉ែន សុខហួន៖ ក្រុមនារីអង្គរ និងក្រុមក្លិបបណ្ដុះបណ្ដាលសិល្បៈវប្បធម៌ខ្មែរអង្គរខេត្តសៀមរាប
៣. អ្នកគ្រូ សុទ្ធ សុម៉ាលី៖ ក្រុមពន្លកថ្មីនៃវប្បធម៌ និងក្រុមយុវជនមន្ទីរវប្បធម៌ និងវិចិត្រសិល្បៈរាជធានីភ្នំពេញ
៤. អ្នកគ្រូ សំ សត្យា៖ ក្រុមមន្ទីរវប្បធម៌ និងវិចិត្រសិល្បៈ ខេត្តបន្ទាយមានជ័យ និងក្រុមក្រឹស្ណរៈ បើចង់ដឹងថាតើទេពកោសល្យអ្វី ចំណុចលេចធ្លោអ្វីដែលមាននៅក្នុងក្រុមប្រកួតនីមួយៗ សាធារណជនអាចអញ្ជើញមកទស្សនាផ្ទាល់វគ្គពាក់កណ្ដាលផ្ដាច់ព្រ័ត្ន នៅស្ទូឌីយោបាយ័នស្ទឹងមានជ័យ នាថ្ងៃទី១៧ ខែវិច្ឆិកា ឆ្នាំ២០២២ វេលាម៉ោង ១:០០ រសៀល៕

The post បេក្ខជន៨ក្រុមនៃល្ខោនខ្មែររដូវកាលទី១ ដែលអាចឆ្ពោះទៅវគ្គពាក់កណ្ដាលផ្ដាច់ព្រ័ត្រ appeared first on Kampuchea Thmey Daily.

ដឹងពីអត្ថន័យដ៏ជ្រាលជ្រៅនៃក្បាច់កាយវិការ ទាំង ៨ តែងឃើញក្នុងរបាំបុរាណ កូនខ្មែរមួយចំនួនមិនធ្លាប់ដឹង

Sorn Phanith — Tue, 19 Jul 2022 08:03:12 +0000

គ្រប់ទម្រង់ក្បាច់កាយវិការ ដែលបង្ហាញនៅក្នុងរបាំបុរាណខ្មែរសុទ្ធតែបង្កប់នូវអត្ថន័យយ៉ាងជ្រាលជ្រៅ តាមរយៈការបង្ហាញពីសំណាក់សិល្បករ-សិល្បការិនី ដែលជាតួអង្គសម្ដែងក្នុងរបាំនីមួយៗ។ ក្បាច់ពត់ពែន ល្វតល្វន់នៅក្នុងរបាំខ្មែរ មានច្រើនបែប ច្រើនយ៉ាង និងច្រើនទម្រង់ណាស់ ប៉ុន្តែថ្ងៃនេះយើងមកស្វែងយល់ទាំងអស់គ្នាពីភាសាក្បាច់មួយចំនួន ដែលបង្កប់អត្ថន័យផ្សារភ្ជាប់នឹងជីវិតរស់នៅប្រចាំថ្ងៃរបស់ប្រជាជន។ បើតាមកិច្ចសម្ភាសជាមួយលោកជំទាវសាស្ត្រាចារ្យ សុទ្ធ សុម៉ាលី អនុរដ្ឋលេខាធិការក្រសួងវប្បធម៌ និងវិចិត្រសិល្បៈបានអធិប្បាយបង្ហាញពីអត្ថន័យភាសាក្បាច់មួយចំនួន និងកាយវិការប្រអប់ដៃ ក្នុងរបាំបុរាណខ្មែរដូចខាងក្រោម៖

១.ក្បាច់ស្រលាញ់

ដៃទាំងពីរត្រូវដាក់ខ្វែងគ្នាជាប់ទ្រូង មានន័យថាដូចឱបជាប់ទ្រូង។

២.ក្បាច់សប្បាយ

យកដៃពីរផ្ទំគ្នាហើយយកដាក់ត្រឹមមាត់ រួចលាដៃមកមុខជាបែបរបាំ គឺស្មើនឹងក្បាច់សើច មានន័យថាសប្បាយ។

៣.ក្បាច់យំ

យកដៃឆ្វេងជ្រងក្បាលរួចប្រើក្បាច់ជូតទឹកភ្នែក។

លោកជំទាវក៏បានបន្ថែមទៀតផងដែរថា ក្បាច់ខ្មែរប្រៀបដូចជារុក្ខជាតិមួយ ដែលបន្ដដុះចលនាចាប់ផ្ដើមពីលូតលាស់រហូតដល់ផ្លែផ្ការួចជ្រុះមកវិញ ហើយបន្តលូតលាស់ជាបន្តបន្ទាប់ទៀតដូចមានខាងក្រោម៖

៤.ក្បាច់ចង្អុល

ដោយប្រើដៃឆ្វេងយកម្រាមចង្អុលដៃចង្អុលទៅមុខរួចយកម្រាមទាំងបី មកផ្ទប់ជាមួយមេដៃមានន័យថា ចង្អុលជិតចង្អុលឆ្ងាយបើប្រៀបធៀបជាមួយរុក្ខជាតិមានន័យថា លាស់ត្រួយ ដែលកើតពីការដាំដុះមក។

៥.ក្បាច់លា

យកម្រាមដៃទាំងបួនលាហើយយកមេដៃចង្អុលមកមុខ ដើម្បីជាសោភ័ណហើយជាតំណាងឲ្យស្លឹក។

៦.ក្បាច់ជីប

យកមេដៃ និងចង្អុលដៃផ្គុំគ្នា រួចម្រាមដៃទាំងបីទៀតដាក់លាទៅមុខបញ្ច្រាសគ្នា។ ក្បាច់នេះមានន័យថាក្បាច់ផ្កា ផ្ការីកឬផ្កាក្រពុំ ។

៧.ក្បាច់ផ្លែ

យកមេដៃ និងម្រាមដៃកណ្ដាលផ្គុំគ្នារួចលាម្រាមដៃទាំងបីទៅមុខហើយផ្កាប់ដៃទៅមុខឡើងលើ។

៨.ក្បាច់ជ្រុះ

យកមេដៃ និងម្រាមដៃកណ្ដាលផ្គុំគ្នារួចលាម្រាមដៃទាំងបីទៅមុខហើយផ្ងារដៃឡើងមកលើវិញ។

លោកជំទាវបានសង្កត់ធ្ងន់ទៀតថា របាំក្បាច់បុរាណខ្មែរនៅតែបន្តដុះ បាត់ទៅហើយ ដុះឡើងវិញ ប្រៀបបីដូចជាការបន្តវេនពីយុវជនជំនាន់ក្រោយ ក្នុងការថែរក្សាសិល្បៈបុរាណខ្មែរ បើសិនជាយើងនៅរក្សាដុះពន្លក រហូតមានផ្លែជ្រុះទុំទៅវិញ ហើយនិងដុះច្រើនមកវិញថែមទៀត។

ដើម្បីចូលរួមលើកតម្កើនសិល្បៈ វប្បធម៌ របាំបុរាណខ្មែរ ក្រុមយុវជន ស.ស.យ.ក. ខេត្តស្វាយរៀង បានសហការជាមួយស្ថានីយទូរទស្សន៍បាយ័ន ដោយមានការគាំទ្រពីក្រសួងវប្បធម៌ និងវិចិត្រសិល្បៈ បានរៀបចំកម្មវិធីប្រឡងផ្នែកសិល្បៈបុរាណខ្មែរដ៏ធំមួយក្នុងឆ្នាំ ២០២២ នេះ។ កម្មវិធីប្រឡងក្នុងទម្រង់ សិល្បៈបុរាណខ្មែរនេះ នឹងប្រកាសជាផ្លូវការក្នុងពេលឆាប់ៗខាងមុខនេះហើយ៕

The post ដឹងពីអត្ថន័យដ៏ជ្រាលជ្រៅនៃក្បាច់កាយវិការ ទាំង ៨ តែងឃើញក្នុងរបាំបុរាណ កូនខ្មែរមួយចំនួនមិនធ្លាប់ដឹង appeared first on Kampuchea Thmey Daily.