កយកា-KOICA Archives - Kampuchea Thmey Daily

មន្ត្រីរដ្ឋាភិបាលកម្ពុជា ១៥ រូប ត្រៀមចេញទៅសិក្សានៅសាធារណរដ្ឋកូរ៉េ ចុងសប្ដាហ៍នេះ

អ៊ិន ពិសី — Tue, 03 Jun 2025 07:40:24 +0000

មន្ត្រីរដ្ឋាភិបាលកម្ពុជាមកពីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្ដន៍ និងក្រសួងពាណិជ្ជកម្ម ចំនួន ១៥ រូប គ្រោងនឹងចេញដំណើរទៅបន្តការសិក្សានៅសាធារណរដ្ឋកូរ៉េ ចាប់ពីថ្ងៃទី ៨ ដល់ថ្ងៃទី ២១ ខែមិថុនា ឆ្នាំ ២០២៥ ក្នុងកម្មវិធីស្តីពី”ការកសាងសមត្ថភាពសម្រាប់កម្មសិទ្ធិបញ្ញា និងប្រព័ន្ធកម្មវិធីទទួលស្គាល់ប្រកាសនីយបត្រតក្កកម្មនៅកម្ពុជាសម្រាប់ឆ្នាំ ២០២៣ ដល់ឆ្នាំ ២០២៥”។

នៅក្នុងវគ្គតម្រង់ទិសមុនចេញដំណើរ សម្រាប់មន្ត្រីរដ្ឋាភិបាលកម្ពុជាមកពីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្ដន៍ និងក្រសួងពាណិជ្ជកម្ម មុនចូលរួមវគ្គបណ្តុះបណ្តាលនៅសាធារណរដ្ឋកូរ៉េ កាលពីថ្ងៃទី ២ មិថុនា លោកស្រី សេជីន លី (Ms. Sejin Lee) នាយិការង នៃការិយាល័យកយកា-KOICA ប្រចាំប្រទេសកម្ពុជា បានលើកឡើងថា វគ្គបណ្ដុះបណ្ដាលនេះ នឹងប្រព្រឹត្តទៅនៅសាធារណរដ្ឋកូរ៉េ ចាប់ពីថ្ងៃទី ៨ ដល់ថ្ងៃទី ២១ ខែមិថុនា ឆ្នាំ ២០២៥ ដែលជាផ្នែកមួយ នៃកិច្ចសហប្រតិបត្តិការទូលំទូលាយរបស់ទីភ្នាក់ងារសហប្រតិបត្តិការអន្តរជាតិកូរ៉េ(កយកា-KOICA) ជាមួយកម្ពុជា ដើម្បីពង្រឹងមូលដ្ឋានគ្រឹះសេដ្ឋកិច្ចរបស់ប្រទេសកម្ពុជាតាមរយៈការអភិវឌ្ឍធនធានមនុស្ស ដោយផ្តោតលើការច្នៃប្រឌិត និងសិទ្ធិកម្មសិទ្ធិបញ្ញា។

លោកស្រី បានបន្តថា បន្ទាប់ពីវគ្គបណ្ដុះបណ្ដាលឆ្នាំទី ១ និងទី ២ កម្មវិធីឆ្នាំនេះ នឹងមានសិក្ខាកាមចូលរួមចំនួន ១៥ នាក់ ដែលនឹងទទួលបានការបណ្ដុះបណ្ដាលជាក់ស្ដែងស្ដីពីម៉ាក (trademarks) ម៉ាកសម្គាល់ភូមិសាស្ត្រទំនិញ (geographical indication-GI) គំនូរឧស្សាហកម្ម និងយុទ្ធសាស្ត្រសម្រាប់ពាណិជ្ជកម្ម និងការគ្រប់គ្រងបច្ចេកវិទ្យា។ កម្មវិធីនេះ មានគោលបំណងលើកកម្ពស់សមត្ថភាពរបស់កម្ពុជាក្នុងការបង្កើត និងប្រើប្រាស់កម្មសិទ្ធិបញ្ញា(intellectual property-IP) ដោយហេតុនេះគាំទ្រដល់កំណើនសេដ្ឋកិច្ចប្រកបដោយនិរន្តរភាព និងការបង្កើតឱកាសថ្មីៗ តាមរយៈការការពារប្រកបដោយប្រសិទ្ធភាព និងការអនុវត្ត កម្មសិទ្ធិបញ្ញា។

លោកស្រី សេជីន លី បានអបអរសាទរដល់សិក្ខាកាមចូលរួមទាំងអស់ដែលត្រូវបានជ្រើសរើសឱ្យចូលរួមវគ្គបណ្ដុះបណ្ដាល និងបានសង្កត់ធ្ងន់ថា ការបណ្តុះបណ្តាលនេះត្រូវបានរៀបចំឡើងដើម្បីឆ្លើយតបទៅនឹងតម្រូវការដែលកំពុងកើនឡើងរបស់កម្ពុជា សម្រាប់វឌ្ឍនភាពក្នុងវិស័យកម្មសិទ្ធិបញ្ញា។

លោកស្រី បានបន្ថែមថា គំនិតផ្ដួចផ្ដើមនេះឆ្លុះបញ្ចាំងពីការប្ដេជ្ញាចិត្តយ៉ាងមុតមាំរបស់រដ្ឋាភិបាលកូរ៉េ ក្នុងការគាំទ្រដល់ការអភិវឌ្ឍសេដ្ឋកិច្ចសង្គមរបស់កម្ពុជា តាមរយៈការពង្រឹងធនធានមនុស្សនៅក្នុងវិស័យសំខាន់នេះ។

លោកស្រី លី ក៏បានកត់សម្គាល់ផងដែរថា កិច្ចសហប្រតិបត្តិការរបស់ កយកា-KOICA ជាមួយកម្ពុជា បានពង្រីកលើសពីកម្មសិទ្ធិបញ្ញា ដោយ កយកា-KOICA បានជួយដល់វិស័យផ្សេងៗ ទៀត រួមទាំង សុខភាពសាធារណៈ ការអប់រំ និងកសិកម្ម។ ចាប់តាំងពីឆ្នាំ ១៩៩៤ មក កយកា-KOICA បាននិងកំពុងផ្តល់ទាំងកម្មវិធីបណ្តុះបណ្តាលរយៈពេលខ្លី និងថ្នាក់បរិញ្ញាបត្រជាន់ខ្ពស់ តាមរយៈកម្មវិធីការកែលម្អសមត្ថភាព និងវឌ្ឍនភាពសម្រាប់ថ្ងៃស្អែក(CIAT) ឬកម្មវិធីបណ្តុះបណ្តាលដល់មន្ត្រីរដ្ឋាភិបាលកម្ពុជានៅទូទាំងវិស័យជាច្រើន។

លោក ពេជ អង្គ ប្រធានក្រុមការងារច្បាប់ពាណិជ្ជកម្ម និងជាសមាជិកក្រុមប្រឹក្សាអ្នកច្បាប់អមទីស្តីការគណៈរដ្ឋមន្ត្រី ក៏បានចូលរួមក្នុងវគ្គតម្រង់ទិសមុនចេញដំណើរក្នុងនាមជាអតីតកម្មសិក្សាការីដែលបានចូលរួមវគ្គបណ្តុះបណ្តាលនេះកាលពីឆ្នាំ ២០២៤។

លោកបានចែករំលែកការឆ្លុះបញ្ចាំងអំពីរបៀបដែលវគ្គបណ្តុះបណ្តាលបានរួមចំណែកដល់ទំនួលខុសត្រូវប្រកបដោយវិជ្ជាជីវៈរបស់គាត់ ហើយបានផ្តល់ដំបូន្មានជាក់ស្តែង និងការលើកទឹកចិត្ត ដោយផ្អែកលើបទពិសោធរស់នៅ និងការសិក្សារបស់គាត់នៅប្រទេសកូរ៉េផងដែរ។

គួរបញ្ជាក់ថា សិក្ខាកាមដែលបានជ្រើសរើស បានបង្ហាញពីការដឹងគុណរបស់ពួកគេចំពោះ កយកា-KOICA និងរដ្ឋាភិបាលកូរ៉េ សម្រាប់ការគាំទ្រ ហើយពួកគេបានបង្ហាញភាពរំភើបរីករាយ និងការប្ដេជ្ញាចិត្ត ដើម្បីលើកកម្ពស់ការកសាងជំនាញវិជ្ជាជីវៈ ដើម្បីធ្វើឱ្យយល់ដឹងកាន់តែទូលំទូលាយនៅក្នុងកម្មវិធីអំពីកម្មសិទ្ធិបញ្ញា និងការទទួលស្គាល់ប្រកាសនីយបត្រតក្កកម្ម៕

អត្ថបទ ៖ សំអឿន

The post មន្ត្រីរដ្ឋាភិបាលកម្ពុជា ១៥ រូប ត្រៀមចេញទៅសិក្សានៅសាធារណរដ្ឋកូរ៉េ ចុងសប្ដាហ៍នេះ appeared first on Kampuchea Thmey Daily.

គិតត្រឹមឆ្នាំ ២០២៥ សាធារណរដ្ឋកូរ៉េ បានបញ្ជូនអ្នកស្ម័គ្រចិត្តជាង ១ ពាន់នាក់ មកជួយពង្រឹងសមត្ថភាពស្ថាប័ននៅកម្ពុជា

អ៊ិន ពិសី — Sat, 10 May 2025 02:33:42 +0000

គិតត្រឹមឆ្នាំ ២០២៥ នេះ សាធារណរដ្ឋកូរ៉េ តាមរយៈទីភ្នាក់ងារសហប្រតិបត្តិការអន្តរជាតិកូរ៉េ (កយកា) ប្រចាំប្រទេសកម្ពុជា បានបញ្ជូនអ្នកស្ម័គ្រចិត្តប្រមាណជាង ១ ពាន់នាក់ មកជួយពង្រឹងសមត្ថភាពស្ថាប័ននៅកម្ពុជា ក្នុងនោះរួមមាន វិស័យអប់រំ វិស័យថែទាំសុខភាព និងការអភិវឌ្ឍជនបទ។

នៅក្នុងកិច្ចប្រជុំប្រចាំឆ្នាំ នៃស្ថាប័នអ្នកស្ម័គ្រចិត្តកូរ៉េ ឆ្នាំ ២០២៥ កាលពីថ្ងៃទី ៩ ឧសភា លោកស្រី ឆយ មូនជុង នាយកប្រចាំប្រទេស នៃការិយាល័យកយកា បានមានប្រសាសន៍ថា ចាប់តាំងពីមានវត្តមាន កម្មវិធីអ្នកស្ម័គ្រចិត្តកូរ៉េនៅកម្ពុជា ជាលើកដំបូងក្នុងឆ្នាំ ២០០៣ កម្មវិធីនេះបានរីកចម្រើនយ៉ាងខ្លាំង ដោយរហូតមកដល់បច្ចុប្បន្នអ្នកស្ម័គ្រចិត្តកូរ៉េសរុបប្រហែល ១,១០៣ នាក់ បានបញ្ជូនមកកម្ពុជា ខណៈបច្ចុប្បន្ននេះ អ្នកស្ម័គ្រចិត្តកូរ៉េ ចំនួន ១៧ នាក់ កំពុងចូលរួមចំណែកក្នុងការអភិវឌ្ឍវិស័យដូចជា សារព័ត៌មាន និងការផ្សាយ បច្ចេកវិទ្យារថយន្ត ការអប់រំភាសាកូរ៉េ ការអប់រំកុមារតូច និងព័ត៌មានវិទ្យា។ លើសពីនេះ អ្នកស្ម័គ្រចិត្តក្រុមគម្រោងចំនួន ១៣ នាក់ កំពុងបម្រើការក្នុងផ្នែកថែទាំសុខភាព និងការអប់រំ។

លោកស្រី ឆយ មូនជុង ក៏បានលើកឡើងពីសមិទ្ធផលដ៏ល្អក្នុងឆ្នាំ ២០២៤ រួមទាំងការវាយតម្លៃពេញចិត្តពីស្ថាប័នដៃគូ និងគម្រោងដែលមានឥទ្ធិពលដូចជាយុទ្ធនាការ “Clean Up Cambodia” និងសកម្មភាពសង្គមក្នុងខេត្តកំពង់ឆ្នាំង ដែលបានផ្តល់អត្ថប្រយោជន៍ដល់មនុស្សជាង ៥,៨០០ នាក់។

លោកស្រី ក៏បានណែនាំកម្មវិធីអ្នកស្ម័គ្រចិត្តគម្រោងថ្មីនៅមន្ទីរពេទ្យកុមារជាតិ ជាគំរូសម្រាប់កិច្ចសហប្រតិបត្តិការកាន់តែស៊ីជម្រៅ និងបានបញ្ជាក់ជាថ្មីពីការប្តេជ្ញាចិត្តរបស់ កយកា ក្នុងការពង្រីកភាពជាដៃគូ និងពង្រឹងតួនាទីអ្នកស្ម័គ្រចិត្តក្នុងការអភិវឌ្ឍប្រកបដោយចីរភាពរបស់កម្ពុជា។

លោកស្រី ផាណា វ៉ឺនីដា អគ្គលេខាធិការរងគណៈកម្មាធិការសហប្រតិបត្តិការអភិវឌ្ឍន៍កម្ពុជា នៃក្រុមប្រឹក្សាអភិវឌ្ឍន៍កម្ពុជា បានកោតសរសើរចំពោះការរួមចំណែកយ៉ាងសំខាន់របស់អ្នកស្ម័គ្រចិត្តកូរ៉េជាង ១,១0៣ នាក់ ក្នុងការពង្រឹងសមត្ថភាពស្ថាប័នក្នុងការអប់រំ វិស័យថែទាំសុខភាព និងការអភិវឌ្ឍជនបទជាមួយគ្នា ផលវិជ្ជមានលើធនធានមនុស្ស ការផ្តល់សេវាកម្ម និងការពង្រឹងសហគមន៍។

លោកស្រី បានលើកទឹកចិត្តដល់ការបន្តពង្រីកកម្មវិធីអ្នកស្ម័គ្រចិត្ត ដើម្បីគាំទ្រដល់ចក្ខុវិស័យឆ្នាំ ២០៥០ របស់កម្ពុជា ការផ្លាស់ប្តូរឌីជីថល និងអភិវឌ្ឍន៍ជាតិប្រកបដោយចីរភាព។

លោកស្រី ឆយ មូនជុង បានសន្យាថា ការិយាល័យកយកាកម្ពុជា នឹងបន្តធ្វើការយ៉ាងជិតស្និទ្ធជាមួយដៃគូរបស់ខ្លួន ដើម្បីពង្រីកគម្រោងអ្នកស្ម័គ្រចិត្តដែលមានផលវិជ្ជមានខ្ពស់ និងពង្រឹងបន្ថែមលើកម្មវិធីស្ម័គ្រចិត្ត ដែលជាមូលដ្ឋានគ្រឹះ នៃទំនាក់ទំនងមិត្តភាពកូរ៉េ-កម្ពុជា និងកិច្ចសហប្រតិបត្តិការអភិវឌ្ឍន៍ប្រកបដោយចីរភាព។

គួរបញ្ជាក់ថា កិច្ចប្រជុំឆ្នាំនេះផ្តោតលើការពង្រឹងនិរន្តរភាព វិសាលភាព នៃកម្មវិធីស្ម័គ្រចិត្តកូរ៉េ ការពង្រឹងភាពជាដៃគូ និងការវាយតម្លៃពេញចិត្ត ជាមួយស្ថាប័នដៃគូ ព្រមទាំងបញ្ជាក់ពីការប្តេជ្ញាចិត្តរបស់កយកា ចំពោះការសហការនាពេលអនាគតក្នុងការគាំទ្រវិស័យអាទិភាពអភិវឌ្ឍន៍ជាតិរបស់កម្ពុជា។ លើសពីនេះ ក្នុងការទទួលស្គាល់កិច្ចសហការល្អ ការទំនាក់ទំនងល្អ និងកិច្ចខិតខំប្រឹងប្រែងបន្តរបស់ស្ថាប័នដៃគូ កយកា បានប្រគល់ពានរង្វាន់ដល់ស្ថាប័នឆ្នើមចំនួន ៣ គឺ សាលាមធ្យមសិក្សាគរុកោសល្យមត្តេយ្យមជ្ឈិមភ្នំពេញ សាកលវិទ្យាល័យជាតិបាត់ដំបង និងមន្ទីរអប់រំខេត្តមានជ័យ៕

អត្ថបទ ៖ សំអឿន

The post គិតត្រឹមឆ្នាំ ២០២៥ សាធារណរដ្ឋកូរ៉េ បានបញ្ជូនអ្នកស្ម័គ្រចិត្តជាង ១ ពាន់នាក់ មកជួយពង្រឹងសមត្ថភាពស្ថាប័ននៅកម្ពុជា appeared first on Kampuchea Thmey Daily.

កម្ពុជា និង KOICA រួមគ្នាលើកស្ទួយកេរ្តិ៍ឈ្មោះម៉ាកផលិតផលរបស់កម្ពុជា ទាំងក្នុងស្រុក និងលើឆាកអន្តរជាតិ

អ៊ិន ពិសី — Sat, 23 Nov 2024 04:02:44 +0000

ក្រសួងពាណិជ្ជកម្មកម្ពុជា និងទីភ្នាក់ងារសហប្រតិបត្តិការអន្តរជាតិកូរ៉េ (កយកា-KOICA) បានរួមគ្នាលើកស្ទួយកេរ្តិ៍ឈ្មោះម៉ាកផលិតផលរបស់កម្ពុជាទាំងនៅក្នុងស្រុក និងនៅលើឆាកអន្តរជាតិ។

នៅក្នុងកិច្ចប្រជុំស្ដីពីការសិក្សាជាបឋម នៃគម្រោង “មជ្ឈមណ្ឌលគ្រប់គ្រងម៉ាកពាណិជ្ជកម្មជាតិរបស់កម្ពុជា និងការអភិវឌ្ឍប្រព័ន្ធព័ត៌មានអាជីវកម្មកម្មសិទ្ធិបញ្ញា”ចាប់ពីថ្ងៃទី១៨ ដល់ថ្ងៃទី ២២ ខែវិច្ឆិកា ឆ្នាំ ២០២៤ លោកស្រី ឆយ មូន ជុង (Ms. CHOI Moon Jung) នាយិកា ទីភ្នាក់ងារសហប្រតិបត្តិការអន្តរជាតិកូរ៉េ (កយកា-KOICA) ប្រចាំប្រទេសកម្ពុជា បានឱ្យដឹងថា គម្រោង “មជ្ឈមណ្ឌលគ្រប់គ្រងម៉ាកពាណិជ្ជកម្មជាតិរបស់កម្ពុជា និងការអភិវឌ្ឍប្រព័ន្ធព័ត៌មានអាជីវកម្មកម្មសិទ្ធិបញ្ញា”នេះមានគោលបំណងជំរុញប្រព័ន្ធកម្មសិទ្ធិបញ្ញារបស់កម្ពុជា តាមរយៈការរួមបញ្ចូលទិន្នន័យអាជីវកម្ម ទៅនឹងប្រព័ន្ធចុះបញ្ជីម៉ាក និងម៉ាកសម្គាល់ភូមិសាស្ត្រទំនិញ geographical indication (GI) និងអភិវឌ្ឍន៍មុខងារសេវាសាធារណៈ។ គម្រោងនេះ នឹងជួយពង្រឹងសមត្ថភាពគ្រប់គ្រងម៉ាកពាណិជ្ជកម្ម និងការកសាងកេរ្តិ៍ឈ្មោះម៉ាករបស់កម្ពុជា ជំរុញការចុះបញ្ជីម៉ាកសម្គាល់ភូមិសាស្ត្រទំនិញកម្ពុជា និងលើកកម្ពស់ការការពារកម្មសិទ្ធិបញ្ញា។

លោកស្រីបានបន្តទៀតថា គំនិតផ្ដួចផ្ដើមនេះ គឺជាផ្នែកមួយ នៃកិច្ចខិតខំប្រឹងប្រែងជាបន្តបន្ទាប់របស់ទីភ្នាក់ងារកយកា-KOICA ក្នុងការជួយដល់ប្រទេសកម្ពុជាក្នុងការកសាងអនាគតប្រកបដោយនិរន្តរភាព និងឌីជីថល។

លោកស្រីបានបន្ថែមថា ក្នុងនាមជាដៃគូសំខាន់របស់កម្ពុជា ទីភ្នាក់ងារកយកា-KOICA បានប្តេជ្ញាចិត្តក្នុងការពង្រឹងការអភិវឌ្ឍប្រទេសកម្ពុជា តាមរយៈកម្មវិធីផ្សេងៗ ដែលលើកកម្ពស់វិបុលភាពរវាងប្រទេសទាំងពីរ។

លោក អ៊ុក ប្រជា រដ្ឋលេខាធិការក្រសួងពាណិជ្ជកម្ម បានថ្លែងអំណរគុណចំពោះ ទីភ្នាក់ងារកយកា-KOICA ដែលបានបន្តគាំទ្រ និងបានសង្កត់ធ្ងន់លើសារៈសំខាន់ នៃគម្រោងនេះ ក្នុងការជំរុញភាពធន់នឹងសេដ្ឋកិច្ចរបស់កម្ពុជា និងការប្រកួតប្រជែងជាសកល។

លោកបានគូសបញ្ជាក់ថា គំនិតផ្ដួចផ្ដើមនេះ នឹងចូលរួមចំណែកលើកស្ទួយកេរ្តិ៍ឈ្មោះម៉ាករបស់ផលិតផលកម្ពុជាទាំងក្នុង និងក្រៅប្រទេស។

លោកស្រី ឆយ មូន ជុង បានលើកឡើងថា ទីភ្នាក់ងារកយកា-KOICA នៅតែប្តេជ្ញាចិត្តក្នុងការជួយដល់ការអភិវឌ្ឍរបស់កម្ពុជា និងបន្តពង្រីកចំណងមិត្តភាពដ៏យូរអង្វែងរវាងប្រជាជាតិទាំងពីរ។ ទីភ្នាក់ងារនេះ ទន្ទឹងរង់ចាំធ្វើការយ៉ាងជិតស្និទ្ធជាមួយក្រសួងពាណិជ្ជកម្ម និងអ្នកពាក់ព័ន្ធផ្សេងទៀត ដើម្បីធានាបាននូវភាពជោគជ័យ នៃគម្រោងដ៏សំខាន់នេះ៕

អត្ថបទ ៖ សំអឿន

The post កម្ពុជា និង KOICA រួមគ្នាលើកស្ទួយកេរ្តិ៍ឈ្មោះម៉ាកផលិតផលរបស់កម្ពុជា ទាំងក្នុងស្រុក និងលើឆាកអន្តរជាតិ appeared first on Kampuchea Thmey Daily.

ក្រសួងអប់រំ និង KOICA កសាងសមត្ថភាពបច្ចេកវិទ្យាព័ត៌មាន នៅមធ្យមសិក្សាបឋមភូមិ

KC Virak — Thu, 06 Jun 2024 04:20:17 +0000

នាព្រឹក ថ្ងៃទី០៦ ខែមិថុនា ឆ្នាំ២០២៤ នៅវិទ្យាស្ថានជាតិអប់រំ បណ្ឌិតសភាចារ្យ ណាត ប៊ុនរឿន រដ្ឋលេខាធិការ ក្រសួងអប់រំ យុវជន និងកីឡា បានដឹកនាំកិច្ចប្រជុំគម្រោងកសាងសមត្ថភាពបច្ចេកវិទ្យាព័ត៌មានសម្រាប់ការអប់រំនៅមធ្យមសិក្សាបឋមភូមិនៅកម្ពុជា។

កិច្ចប្រជុំគម្រោងកសាងសមត្ថភាពនេះ គាំទ្រដោយទីភ្នាក់ងារសហប្រតិបត្តិការអន្តរជាតិកូរ៉េ (KOICA) ដោយមានការចូលរួមពីភាគីកូរ៉េ និងអង្គភាពពាក់ព័ន្ធក្រោមឱវាទក្រសួងអប់រំ យុវជន និងកីឡា។

គោលបំណងនៃកិច្ចប្រជុំនេះ ដើម្បីពិភាក្សាលើ ៥ ចំណុចដូចខាងក្រោម៖

១. ការរៀបចំក្នុងការបោះពុម្ពសៀវភៅសិក្សាគោល ICT ថ្នាក់ទី៧ ថ្នាក់ទី៨ និងថ្នាក់ទី៩ ចំនួន ៥ ០០០ ក្បាល និងសៀវភៅគ្រូមុខវិជ្ជា ICT ចំនួន ៥០០ ក្បាល ក្នុងខែកញ្ញា ឆ្នាំ២០២៤

២. ការរៀបចំសិក្ខាសាលាបំប៉នសមត្ថភាពលើកទី២ សម្រាប់គ្រូឧទ្ទេស ឯកទេស ICT នៃមជ្ឈមណ្ឌលគរុកោសល្យភូមិភាគ និងមន្ត្រីអប់រំចំនួន ៣០ នាក់ ក្នុងខែសីហា ឆ្នាំ២០២៤

៣. ការផ្ដល់អាហារូបករណ៍សម្រាប់គរុសិស្សឯកទេស ICT តាមប្រព័ន្ធ ១២+២ ចំនួន ២០ នាក់ដែលនឹងចាប់ផ្ដើមសិក្សាក្នុងឆ្នាំសិក្សាថ្មីខាងមុខនេះ ជាមួយគ្នានេះដែរគម្រោង និងផ្ដល់ថវិកាដំណើរការបន្ទប់កុំព្យូទ័ររបស់គម្រោង តាមមជ្ឈមណ្ឌលកោសល្យភូមិភាគទាំង៤ តាមរយៈការវាយតម្លៃផ្អែកលើលទ្ធផល

៤. ការវាយតម្លៃពាក់កណ្ដាលអាណត្តិ នៃការអនុវត្តគម្រោង ក្នុងខែសីហា ឆ្នាំ២០២៤

៥. ការរៀបចំវគ្គបំប៉នសមត្ថភាពសម្រាប់ការរៀន និងបង្រៀនដោយប្រើប្រាស់សៀវភៅសិក្សាគោល និងសៀវភៅគ្រូមុខវិជ្ជា ICT ថ្នាក់ទី៧ ថ្នាក់ទី៨ នៃសាលារៀនគាំទ្រដោយគម្រោង ចំនួន ២០ នាក់ នៅប្រទេសកូរ៉េរយៈពេល ២សប្តាហ៍៕

The post ក្រសួងអប់រំ និង KOICA កសាងសមត្ថភាពបច្ចេកវិទ្យាព័ត៌មាន នៅមធ្យមសិក្សាបឋមភូមិ appeared first on Kampuchea Thmey Daily.

២ ទីតាំង នៃព្រះលានជល់ដំរី ទទួលការជួសជុល ក្រោម មូលនិធិ កូរ៉េ KCHF

KC Virak — Mon, 15 Jan 2024 07:13:26 +0000

ក្រុមអ្នកជំនាញ នៃអាជ្ញាធរជាតិអប្សរា ដែលសហការជាមួយ ទីភ្នាក់ងារសហប្រតិបត្តិការអន្តរជាតិកូរ៉េ (KOICA) តាមរយៈមូលនិធិបេតិកភណ្ឌកូរ៉េ (KCHF) កំពុងដំណើរការជួសជុលរចនាសម្ពន្ធមួយចំនួនរបស់ព្រះលានជល់ដំរី ដែលរងការខូចខាត ឱ្យប្រសើរឡើងវិញ។

លោក PARK JIMIN អ្នកគ្រប់គ្រងគម្រោងមូលនិធិបេតិកភណ្ឌកូរ៉េ មានប្រសាសន៍ថា ការជួសជុលព្រះលានជល់ដំរីកំពុងធ្វើនៅទីតាំងចំនួន ២ផ្សេងគ្នា គឺមួយស្ថិតនៅផ្នែកខាងជើង ប្រវែង ២០ម៉ែត្រ និងមួយទៀត នៅផ្នែកខាងត្បូង ប្រវែង ១៥ម៉ែត្រ។ ក្នុងដំណើរការជួសជុល ក្រុមអ្នកបច្ចេកទេសផ្តោតការអនុវត្តលើការងារសំខាន់ៗមួយចំនួនដូចជា ពង្រឹងគ្រឹះ ពង្រឹងរចនាសម្ពន្ធពាក់ព័ន្ធផ្នែកខាងក្នុង និងខាងក្រោម ព្រមទាំងរៀបផ្គុំជញ្ជាំងនៃខឿនដែលទ្រេត និងថ្មពុកផុយឱ្យល្អឡើងវិញទៅតាមទម្រង់ដើម។

លោក PARK JIMIN បានឱ្យដឹងទៀតថា តាមការរកឃើញនៅទីតាំងទាំងពីរនេះ មានសភាពប្រហាក់ប្រហែលគ្នា គឺផ្ទៃជញ្ជាំងបានទ្រេតខ្លាំង អាចនឹងរលំ ព្រមទាំងថ្មបាយក្រៀម និងថ្មភក់ខ្លះបានពុកផុយបណ្ដាលមកពីអាយុកាល និងទឹកភ្លៀងហូរច្រោះខាងក្រោមធ្វើឱ្យគ្រឹះខាងក្រោមបាតបង់លំនឹង។

លោក ព្រំ ទិត្យឆពណ្ណរិទ្ធ ស្ថាបត្យករ និងជាក្រុមការងារបច្ចេកទេសនាយកដ្ឋានអភិរក្សប្រាសាទ និងបុរាណវិទ្យា នៃអាជ្ញាធរជាតិអប្សរា មានប្រសាសន៍ថា មូលហេតុសំខាន់ៗមួយចំនួនដែលធ្វើឱ្យគ្រឹះជញ្ជាំងស្រុត និងទ្រេតខ្លាំង ដោយសារតែគ្រឹះខាងក្រោមមានកន្លែងខ្លះស្រុត បណ្ដាលមកពីឬសឈើដុះចាក់ចូលទៅក្នុងរចនាសម្ពន្ធ ធ្វើឱ្យថ្មមួយចំនួនរំកិលចេញពីទីតាំងដើម បង្កើតបានជាប្រហោងនៅតាមចន្លោះថ្ម ជាហេតុធ្វើឱ្យទឹកហូរច្រោះចូលទៅតាមប្រហោងថ្មនាំល្បាយដីខ្សាច់ចេញមកក្រៅជាដើម។

ជាច្រើនខែមកនេះ ក្រុមអ្នកជំនាញបានរើថ្មកម្រាល និងជញ្ជាំងខឿនមួយផ្នែកដែលក្រៀកចេញ ដើម្បីពិនិត្យមើលស្ថានភាពជញ្ជាំងថ្មបាយក្រៀម និងរៀបថ្មភក់ ថ្មបាយក្រៀមទាំងនោះទៅតាមកន្លែងដើមឡើងវិញ ហើយចំពោះកន្លែងខ្លះដែលថ្មខូច គឺព្យាយាមជួសជុល ប៉ុន្តែបើនៅតែមិនអាចជួសជុលបានទេ គឺត្រូវដាក់ថ្មថ្មីតិចតួចដើម្បីជំនួស៕

The post ២ ទីតាំង នៃព្រះលានជល់ដំរី ទទួលការជួសជុល ក្រោម មូលនិធិ កូរ៉េ KCHF appeared first on Kampuchea Thmey Daily.

KOICA និងក្រសួងសុខាភិបាល រួមគ្នាពង្រឹងសុខភាពមាតា និងទារកនៅតំបន់ឦសាន

KC Virak — Wed, 15 Nov 2023 08:31:59 +0000

ទីភ្នាក់ងារសហប្រតិបត្ដិការអន្ដរជាតិកូរ៉េ (KOICA) សហការជាមួយ ក្រសួងសុខាភិបាល បានធ្វើសន្និសីទចែករំលែកសមិទ្ធផលរបស់ ”គម្រោងពង្រឹងសុខភាពមាតា និងទារកនៅតំបន់ឦសាន នៃប្រទេសកម្ពុជា” នៅថ្ងៃទី១៥ វិឆ្ឆិកានេះ នៅសណ្ឋាគារហាយ៉ាតរីជែនស៊ី ភ្នំពេញ។ សន្និសីទនេះ ត្រូវបានរៀបចំឡើង ក្រោមអធិបតីភាព លោកស្រី Moonjung CHOI នាយិកាប្រចាំប្រទេសនៃទីភ្នាក់ងារ កយកា (KOICA) រួមជាមួយ លោកវេជ្ជបណ្ឌិត ស៊ុង វីនតាក់ រដ្ឋលេខាធិការ នៃក្រសួងសុខាភិបាល។

លោកស្រី Moonjung CHOI នាយកប្រចាំប្រទេស នៃទីភ្នាក់ងារ កយកា (KOICA) មានប្រសាសន៍ថា តាមរយៈសន្និសីទនេះ គម្រោងពង្រឹងសុខភាពមាតា និងទារកនៅតំបន់ឦសាន នៃប្រទេសកម្ពុជា ត្រូវបានអនុវត្តក្រោមជំនួយឥតសំណងរបស់សាធារណរដ្ឋកូរ៉េ តាមរយៈទីភ្នាក់ងារ កយកា ជាមួយនឹងថវិកា ៧,៧ លានដុល្លារ។ ក្នុងរយៈពេល ៤ឆ្នាំនេះ គម្រោងបានសម្រេចនូវសមិទ្ធផលជាច្រើនរួមមាន អគារថែទាំទាមាតា និងទារក ៥កន្លែង បានដាក់ដំណើរការ បុគ្គលិកសុខាភិបាលថ្នាក់ក្រោមជាតិចំនួន ៦០៤នាក់ ទទួលបានវគ្គពង្រឹងសមត្ថភាពបន្ថែម ក្រុមទ្រទ្រង់សុខភាពភូមិចំនួន ២ ៤១០ នាក់ បានទទួលវគ្គមូលដ្ឋានគ្រិះ រឺវគ្គរំលឹក នៃការថែទាំសុខភាពមាតា និងទារក ការចុះផ្ដល់សេវាសុខភាពនៅមូលដ្ឋានបាន ៧៤ ៣៧៥ នាក់ សម្រាប់ស្រ្ដីមានផ្ទៃពោះ និងក្មេងក្រោម៥ឆ្នាំ។ ប្រជាជន ១៤១ ២៦២ នាក់ បានទទួលការលើកកម្ពស់ការយល់ដឹងតាមរយៈការផ្សព្វផ្សាយអប់រំរបស់គម្រោង ជាពិសេស គម្រោងក៏បានគាំទ្រប្រព័ន្ធបញ្ជូនអ្នកជំងឺ មានឡានសង្រ្គោះបន្ទាន់ ទូក និងផ្ដល់សំម្ភារៈបរិក្ខាពេទ្យដល់ ៤ មន្ទីរពេទ្យបង្អែក និង ៤៤ មណ្ឌលសុខភាព។

លោកស្រី Moonjung CHOI បានបន្តថា គម្រោងនេះស្របតាមចក្ខុវិស័យរបស់ប្រទេសកម្ពុជាក្នុងការផ្តល់សេវាកាន់តែប្រសើរដល់មនុស្សគ្រប់គ្នា ជាពិសេសនៅតាមខេត្ត។ KOICA បានខិតខំជួយដល់វិស័យសុខាភិបាលកម្ពុជាដើម្បីលើកកម្ពស់សុខភាព និងសុខុមាលភាពរបស់ប្រជាជនកម្ពុជា ហើយនឹងបន្តពង្រីកការគាំទ្រក្នុងវិស័យ សុខាភិបាលសម្រាប់កម្ពុជា។

លោកវេជ្ជបណ្ឌិត ស៊ុង វីនតាក់ រដ្ឋលេខាធិការ ក្រសួងសុខាភិបាល បានថ្លែងអំណរគុណចំពោះ KOICA ក៏ដូចជាប្រជាជនសាធារណរដ្ឋកូរ៉េ ដែលបានគាំទ្រគម្រោងនេះ។ គម្រោងនេះបានធ្វើឱ្យប្រសើរឡើងនូវគុណភាព នៃសេវាសុខភាពមាតា និងទារក តាមរយៈការកសាងសមត្ថភាពបុគ្គលិកសុខាភិបាល និងការផ្តល់ហេដ្ឋារចនាសម្ព័ន្ធដូចជា អគារថែទាំទាមាតា និងទារក (MCHCU) និងឧបករណ៍វេជ្ជសាស្ត្រផ្សេងៗទៀត។

គួរបញ្ជាក់ថា នៅក្នុងកម្មវិធីនេះក៏មានការអញ្ជើញចូលរួមដោយ លោកស្រី ញាន ទិត្យចិន្ដា អភិបាល នៃគណអភិបាលរងខេត្ដរតនគិរី លោកស្រី វិន ស៊ីធួន អភិបាល នៃគណអភិបាលរងខេត្ដមណ្ឌលគិរី និងគណៈកម្មាធិការសម្របសម្រួលថ្នាក់ជាតិទាំងអស់ ដូចជាមន្ទីរសុខាភិបាលខេត្តមណ្ឌលគិរី និងរតនគិរី មជ្ឈមណ្ឌលជាតិគាំពារមាតា និងទារក (NMCHC) មជ្ឈមណ្ឌលជាតិលើកកម្ពស់សុខភាព (NCHP) និងមន្ត្រីពាក់ព័ន្ធគម្រោង ដើម្បីធ្វើការចែករំលែកនូវសមិទ្ធផលរបស់គម្រោងដែលបានអនុវត្ដក្នុងរយៈពេល ៤ឆ្នាំ ពីឆ្នាំ ២០១៩ ដល់ ២០២៣៕

អត្ថបទ៖ សំអឿន

The post KOICA និងក្រសួងសុខាភិបាល រួមគ្នាពង្រឹងសុខភាពមាតា និងទារកនៅតំបន់ឦសាន appeared first on Kampuchea Thmey Daily.

២០ ឆ្នាំនេះ KOICA ជួយគាំទ្រដល់កម្ពុជា តាមរយៈកម្មវិធីផ្សេងៗ មានទឹកប្រាក់ជាង ៣៦០ លានដុល្លារ

អ៊ិន ពិសី — Fri, 01 Sep 2023 04:22:09 +0000

នៅក្នុងរយៈពេល ២០ ឆ្នាំនេះ ទីភ្នាក់ងារសហប្រតិបត្តិការអន្តរជាតិកូរ៉េ (កយកា-KOICA) បានជួយគាំទ្រដល់រាជរដ្ឋាភិបាលកម្ពុជា និងប្រជាជន តាមរយៈកម្មវិធីផ្សេងៗ ដែលមានតម្លៃប្រហែល ៣៦៦,៥ លានដុល្លារអាមេរិក។

ក្នុងសេចក្ដីប្រកាសព័ត៌មានរបស់ កយកា-KOICA ចេញផ្សាយនៅថ្ងៃទី ១ កញ្ញានេះ បានឲ្យដឹងថា ឆ្នាំនេះជាខួបលើកទី ២០ របស់ការិយាល័យ កយកា-KOICA ប្រចាំនៅប្រទេសកម្ពុជា បន្ទាប់ពីការបង្កើតឡើងដំបូងក្នុងឆ្នាំ ១៩៩១ ក្រោមក្រសួងការបរទេស KOICA បានចាប់ផ្តើមកម្មវិធីកិច្ចសហប្រតិបត្តិការជាមួយនឹងការផ្តល់ឧបករណ៍នៅក្នុងប្រទេសកម្ពុជា។ KOICA បានពង្រីក និងធ្វើពិពិធកម្មទម្រង់ជំនួយដល់កម្មវិធីពង្រឹងសមត្ថភាព កម្មវិធីភាពជាដៃគូសាធារណៈ និងឯកជន គម្រោងភាពជាដៃគូប្រទេស និងកម្មវិធីបញ្ជូនអ្នកស្ម័គ្រចិត្ត។ ជាច្រើនឆ្នាំមកនេះ KOICA បានជួយគាំទ្រដល់រាជរដ្ឋាភិបាលកម្ពុជា និងប្រជាជនតាមរយៈកម្មវិធីផ្សេងៗ ដែលមានតម្លៃប្រហែល ៣៦៦,៥ លានដុល្លារអាមេរិក។

គម្រោងដែលលេចធ្លោជាងគេនៅក្នុងរាជធានី នៃប្រទេសកម្ពុជា គឺ មន្ទីរពេទ្យព្រះអង្គឌួង។ កយកា-KOICA បានសាងសង់ទាំងមជ្ឈមណ្ឌលចក្ខុរោគមិត្តភាពកម្ពុជា-កូរ៉េ និង អគារមជ្ឈមណ្ឌលត្រចៀក ច្រមុះ បំពង់ក ក្នុងមន្ទីរពេទ្យព្រះអង្គឌួង។ ប្រជាជនកម្ពុជា ហៅ មន្ទីរពេទ្យព្រះអង្គឌួង ថាជា មន្ទីរពេទ្យកូរ៉េ។

ជាមួយនឹងអគារថ្មី និងបរិក្ខារពេទ្យទំនើបៗ ឥឡូវនេះមន្ទីរពេទ្យព្រះអង្គឌួង អាចធ្វើរោគវិនិច្ឆ័យ និងព្យាបាលអ្នកជំងឺដែលមកពីគ្រប់ខេត្តបានប្រសើរជាងមុន រួមទាំងប្រតិបត្តិការវះកាត់ដែលពិបាករកបាន មុនពេលមានគម្រោងរបស់កយកា-KOICA។

មានមន្ត្រីរដ្ឋាភិបាលកម្ពុជាជាង ៣៥២៩ នាក់ ដែលត្រូវបានអញ្ជើញទៅប្រទេសកូរ៉េ និងចូលរួមក្នុងកម្មវិធីបណ្ដុះបណ្ដាល រួមទាំងកម្មវិធីអាហារូបករណ៍ដែលផ្តល់មូលនិធិពេញលេញផងដែរ។ អតីតនិស្សិត និងកម្មសិក្សាការី នៃកម្មវិធីបណ្ដុះបណ្ដាលរបស់ កយកា-KOICA ដែលហៅថា សមាគមអតីតកម្មសិក្សាការីកម្ពុជា-កូរ៉េ (CAMKAA) មានភាពសកម្មក្នុងការផ្សព្វផ្សាយចំណេះដឹងដែលទទួលបានពីការបណ្ដុះបណ្ដាល និងក្នុងការអនុវត្តសកម្មភាពសង្គមនៅតាមបណ្ដាខេត្ត។

ក្រៅពីនេះ KOICA បានបញ្ជូនអ្នកស្ម័គ្រចិត្ត និងអ្នកជំនាញជាង ៨៩២ នាក់ ទៅកាន់បណ្ដាខេត្តនានា ក្នុងវិស័យដូចជា សុខាភិបាល និងការអប់រំ ជាពិសេសសម្រាប់ភាសា(កូរ៉េ)/បច្ចេកវិទ្យាព័ត៌មាន និងទូរគមនាគមន៍ (ICT) /កុមារតូច(មត្តេយ្យ)/តន្ត្រី/ការអប់រំកាយ រួមទាំងការបណ្តុះបណ្តាលតេក្វាន់ដូផងដែរ។ ពីរាជធានីទៅគ្រប់ខេត្តទាំងអស់ មានស្លាកសញ្ញា និងកេរដំណែលអ្នកស្ម័គ្រចិត្តរបស់ កយកា-KOICA នៅគ្រប់ទីកន្លែង។

សម្រាប់ការអភិវឌ្ឍសេដ្ឋកិច្ចសង្គមរបស់កម្ពុជា កយកា-KOICA បានសហការជាដៃគូយុទ្ធសាស្ត្រជាមួយសហគ្រាសកូរ៉េ និងអង្គការក្រៅរដ្ឋាភិបាលដែលមានមូលដ្ឋាននៅក្នុងប្រទេសកម្ពុជាផងដែរ។ ក្រុមហ៊ុន Hesed Agriculture Trading Co., Ltd. ដែលជាសហគ្រាសសង្គមអាជីវកម្មកសិកម្ម គាំទ្រកសិករក្នុងខេត្តកំពង់ស្ពឺ និងកំពង់ឆ្នាំង ដើម្បីផលិតផលិតផលស្ករត្នោតធម្មជាតិ។ Good Neighbours ដែលជាអង្គការក្រៅរដ្ឋាភិបាលដ៏សកម្មនៅទូទាំងប្រទេសកម្ពុជា បានធ្វើការបណ្ដុះបណ្ដាលអ្នករត់រ៉ឺម៉កកង់បីក្នុងខណ្ឌដង្កោ ឲ្យមានស្ថិរភាពហិរញ្ញវត្ថុ និងឯករាជ្យ ព្រមទាំងគាំទ្រវិទ្យាស្ថានអប់រំបណ្ដុះបណ្ដាលបច្ចេកទេស និងវិជ្ជាជីវៈ ក្នុងខេត្តបាត់ដំបង ឲ្យមានបរិយាកាសសិក្សាកាន់តែប្រសើរឡើង ដើម្បីឲ្យសិស្សានុសិស្សអាចរៀន ក្លាយជាអ្នកបច្ចេកទេស ផ្នែកអេឡិចត្រូនិក និងវិស្វកម្មអគ្គិសនី។

តាងនាមឲ្យរដ្ឋាភិបាល នៃសាធារណរដ្ឋកូរ៉េ កយកា-KOICA បានប្ដេជ្ញាប្រគល់ភារកិច្ចទទួលខុសត្រូវ ក្នុងការពង្រឹងភាពជាដៃគូរវាងប្រទេសទាំងពីរ និងធ្វើឲ្យប្រជាជនកាន់តែមានភាពជិតស្និទ្ធ។ ដូចសុភាសិតខ្មែរពោលថា «ចង្កឹះមួយបាច់កាច់មិនបាក់» កិច្ចខិតខំប្រឹងប្រែងរួមពីរដ្ឋាភិបាលទាំងពីរ ដោយឈរលើភាពជាដៃគូល្អ និងដ៏រឹងមាំ នឹងត្រូវបានបន្តដូចដែលមានអស់រយៈពេល ២០ ឆ្នាំ ចុងក្រោយនេះ៕

អត្ថបទ ៖ សំអឿន

The post ២០ ឆ្នាំនេះ KOICA ជួយគាំទ្រដល់កម្ពុជា តាមរយៈកម្មវិធីផ្សេងៗ មានទឹកប្រាក់ជាង ៣៦០ លានដុល្លារ appeared first on Kampuchea Thmey Daily.

មន្ត្រីកយកា៖ ការបញ្ជូនអ្នកស្ម័គ្រចិត្តកូរ៉េមកកម្ពុជាដើម្បីជួយលើកកម្ពស់ជីវភាពរស់នៅពលរដ្ឋកាន់តែប្រសើរ

Sokhom Khon — Wed, 28 Jun 2023 09:09:39 +0000

លោក ស៊ីន យ៉ុងហ្វា នាយករងប្រចាំប្រទេសកម្ពុជា ដែលទទួលបន្ទុកកម្មវិធីអ្នកស្ម័គ្រចិត្តរបស់ទីភ្នាក់ងារសហប្រតិបត្តិការអន្តរជាតិកូរ៉េ (កយកា-KOICA)បានលើកឡើងថា ការបញ្ជូនអ្នកស្ម័គ្រចិត្តជនជាតិកូរ៉េដែលមានវិជ្ជាជីវៈមកកម្ពុជាដើម្បីចែករំលែកនូវបទពិសោធន៍ ចំណេះដឹង និងជំនាញដើម្បីធ្វើឱ្យប្រសើរឡើងនូវការរស់នៅ និងជីវភាពរបស់ប្រជាជន
និងដើម្បីរឹតចំណងមិត្តភាពរវាងប្រទេសទាំងពីរឱ្យកាន់តែរឹងមាំ។

ថ្លែងក្នុងកិច្ចប្រជុំពិភាក្សាអំពីកម្មវិធីអ្នកស្ម័គ្រចិត្ត កយកា ប្រចាំឆ្នាំ២០២៣ ជាមួយដៃគូកាលពីថ្ងៃទី២៧ មិថុនា នៅសណ្ឋាគារភ្នំពេញ លោកបានបន្តថា ការិយាល័យ កយកា នៅកម្ពុជា គឺជាទីភ្នាក់ងារអនុវត្តរបស់កម្មវិធីមិត្តភាពពិភពលោកកូរ៉េ World Friend Korea ដែលបញ្ជូនអ្នកស្ម័គ្រចិត្តជនជាតិកូរ៉េទៅទូទាំងពិភពលោក។ ចាប់តាំងពីឆ្នាំ
២០០៣ មកបច្ចុប្បន្ន កយកា មានអ្នកស្ម័គ្រចិត្តដែលកំពុងតែបម្រើការងារនៅតាមបណ្ដារាជធានី ខេត្ដមួយចំនួននៅក្នុងប្រទេសកម្ពុជា ដែលមានដូចជារាជធានីភ្នំពេញ ខេត្តកណ្ដាល ព្រៃវែង កំពង់ចាម បាត់ដំបង និងបន្ទាយមានជ័យ ទៅលើជំនាញផ្សេងៗគ្នា។

លោកបានបន្តថា កិច្ចប្រជុំនេះមានគោលបំណងណែនាំអំពីកម្មវិធីអ្នកស្ម័គ្រចិត្ត និងពិភាក្សាអំពីសន្ដិសុខ សុវត្ថិភាព ការគ្រប់គ្រងអ្នកស្ម័គ្រចិត្ដការគាំទ្រគម្រោងខ្នាតតូច និងសមត្ថភាពរបស់អ្នកស្ម័គ្រចិត្តនៅក្នុងការបំពេញការងារ។ វាគឺជាឱកាសដ៏ល្អដែលអនុញ្ញាតឱ្យស្ថាប័នដៃគូទាំងអស់បានយល់កាន់តែច្បាស់អំពីកម្មវិធីអ្នកស្ម័គ្រចិត្តកយកា នៅក្នុងប្រទេសកម្ពុជា ជាពិសេសបានធ្វើឱ្យដៃគូទាំងអស់មានឱកាសនៅក្នុងការផ្លាស់ប្ដូរគំនិត យោបល់ និងបានពិភាក្សាគ្នាលំអិតអំពីសារៈសំខាន់ក៏ដូចជាការធ្វើឱ្យប្រសើរឡើងនូវគុណភាពនៃការងារស្ម័គ្រចិត្តផងដែរ។

លោកបានបន្តទៀតថា ម៉្យាងវិញទៀតវាបានលើកកម្ពស់ការយល់ដឹងពីគ្នាទៅវិញទៅមក និងជំរុញភាពជាដៃគូប្រកបដោយនិរន្តរភាពរវាង កយកា និងដៃគូនីមួយៗ និងដើម្បីផ្តល់នូវការរួមចំណែកយូរអង្វែង និងកាន់តែស៊ីជម្រៅក្នុងការអភិវឌ្ឍន៍នៅកម្ពុជា។ លើសពីនេះ កយកា ក៏បានជ្រើសរើសស្ថាប័នដៃគូឆ្នើមរបស់ខ្លួនសម្រាប់ឆ្នាំ ២០២៣ ផងដែរ
ដែលស្ថាប័នទីមួយនោះ គឺសាកលវិទ្យាល័យជាតិមានជ័យ និងទីពីរគឺសាកលវិទ្យាល័យជាតិបាត់ដំបង។

លោក ស៊ីន យ៉ុងហ្វា បានកោតសរសើរចំពោះដៃគូទាំងអស់ដែលបានចូលរួម និងចែករំលែកធាតុចូលជាច្រើននៅក្នុងការកែលម្អកម្មវិធីអ្នកស្ម័គ្រចិត្ត។ លោកបានបន្ថែមទៀតថា ការប្រាស្រ័យទាក់ទងរវាង កយកា ស្ថាប័នដៃគូ និងអ្នកស្ម័គ្រចិត្ដ គឺជាមធ្យោបាយដ៏ល្អបំផុតដើម្បីទទួលបានដំណោះស្រាយកាន់តែប្រសើរ នៅពេលដែលយើងមានបញ្ហា។ កយកានឹងស្តាប់ដោយយកចិត្តទុកដាក់ ហើយពិចារណាយ៉ាងសកម្មនូវរាល់ធាតុចូល និងបញ្ហាប្រឈមនានាដើម្បីកែលម្អការអនុវត្តកម្មវិធីរបស់ខ្លួននៅកម្ពុជាឱ្យកាន់តែមានប្រសិទ្ធភាព។

គួរបញ្ជាក់ថា នៅក្នុងកិច្ចប្រជុំនោះដែរមានការចូលរួមពីលោក អ៉ឹម សួរ អគ្គលេខាធិការរងនៃគណៈកម្មាធិការនិតីសម្បទា
និងអភិវឌ្ឍន៍នៃក្រុមប្រឹក្សាអភិវឌ្ឍន៍កម្ពុជា លោកស្រី ស៊ីន ជុងយ៉ុន នាយិការង លោក ស៊ីន យ៉ុងហ្វា នាយករងប្រចាំប្រទេសរបស់ កយកា និងស្ថាប័នដៃគូរបស់ខ្លួនយ៉ាងហោចណាស់ចំនួន១១ ស្ថាប័នផងដែរ៕

អត្ថបទ៖ សំអឿន

The post មន្ត្រីកយកា៖ ការបញ្ជូនអ្នកស្ម័គ្រចិត្តកូរ៉េមកកម្ពុជាដើម្បីជួយលើកកម្ពស់ជីវភាពរស់នៅពលរដ្ឋកាន់តែប្រសើរ appeared first on Kampuchea Thmey Daily.

កយកា-KOICA Archives - Kampuchea Thmey Daily

មន្ត្រីរដ្ឋាភិបាលកម្ពុជា ១៥ រូប ត្រៀមចេញទៅសិក្សានៅសាធារណរដ្ឋកូរ៉េ ចុងសប្ដាហ៍នេះ

កម្ពុជា និង KOICA រួមគ្នាលើកស្ទួយកេរ្តិ៍ឈ្មោះម៉ាកផលិតផលរបស់កម្ពុជា ទាំងក្នុងស្រុក និងលើឆាកអន្តរជាតិ

ក្រសួងអប់រំ និង KOICA កសាងសមត្ថភាពបច្ចេកវិទ្យាព័ត៌មាន នៅមធ្យមសិក្សាបឋមភូមិ

២ ទីតាំង នៃព្រះលានជល់ដំរី ទទួលការជួសជុល ក្រោម មូលនិធិ កូរ៉េ KCHF

KOICA និងក្រសួងសុខាភិបាល រួមគ្នាពង្រឹងសុខភាពមាតា និងទារកនៅតំបន់ឦសាន

២០ ឆ្នាំនេះ KOICA ជួយគាំទ្រដល់កម្ពុជា តាមរយៈកម្មវិធីផ្សេងៗ មានទឹកប្រាក់ជាង ៣៦០ លានដុល្លារ

មន្ត្រីកយកា៖ ការបញ្ជូនអ្នកស្ម័គ្រចិត្តកូរ៉េមកកម្ពុជា​ដើម្បីជួយលើកកម្ពស់ជីវភាពរស់នៅពលរដ្ឋកាន់តែប្រសើរ

មន្ត្រីកយកា៖ ការបញ្ជូនអ្នកស្ម័គ្រចិត្តកូរ៉េមកកម្ពុជាដើម្បីជួយលើកកម្ពស់ជីវភាពរស់នៅពលរដ្ឋកាន់តែប្រសើរ