ករណីចោរឆក់ Archives - Kampuchea Thmey Daily

នគរបាលឃាត់ខ្លួនជនសង្ស័យ២នាក់ ឆក់កាបូបស្ត្រីជនបរទេសនៅខណ្ឌចំការមន

Kang Tola — Wed, 30 Apr 2025 12:35:29 +0000

ភ្នំពេញ ៖ ជនសង្ស័យចំនួន២នាក់ ត្រូវបានកម្លាំងនគរបាលព្រហ្មទណ្ឌកម្រិតស្រាល នៃស្នងការរដ្ឋាននគរបាលរាជធានីភ្នំពេញ ស្រាវជ្រាវឃាត់បានជាបន្តបន្ទាប់ ក្រោយពីពួកគេ មានគ្នា៣នាក់ ធ្វើសកម្មភាពឆក់កាបូបពីស្ត្រីជនបរទេសម្នាក់កំពុងដើរតាមផ្លូវជាមួយមិត្តភក្តិ កាលពីព្រឹកថ្ងៃទី២៦ ខែមេសា ឆ្នាំ ២០២៥ វេលាម៉ោង ៥និង៤៦នាទី ចំណុចផ្លូវ២១ សង្កាត់ ទន្លេបាសាក់ ខណ្ឌចំការមន រាជធានីភ្នំពេញ។

ជនសង្ស័យទាំង២នាក់ទី១មាន ១-ឈ្មោះ សេង សុនី ហៅ ធិ ភេទប្រុស អាយុ១៨ឆ្នាំ ២-ឈ្មោះ សារុន ចាន់រះ ហៅ រះ ភេទប្រុស អាយុ១៨ឆ្នាំ ចំណែកបក្ខពួកម្នាក់ទៀតកំពុងរត់គេចខ្លួន។

នគរបាលបានឱ្យដឹងថា ក្រោមការបញ្ជាពីលោកស្នងការរង ប៊ុន សត្យា ទទួលផែនការងារព្រហ្មទណ្ឌ រាជធានីភ្នំពេញ លោកប្រធានការិយាល័យនគរបាលព្រហ្មទណ្ឌកំរិតស្រាលបានសហការជាមួយកម្លាំងជំនាញព្រហ្មទណ្ឌ នៃអធិការដ្ឋានខណ្ឌទួលគោក និង ប៉ុស្តិ៍មូលដ្ឋានទន្លេបាសាក់ បង្ក្រាបដោយផ្ទាល់ នឹងបានឃាត់ខ្លួន ជនសង្ស័យចំនួន២ នាក់ ជាបន្តបន្ទាប់។

សូមរំលឹកថា កាលពីថ្ងៃទី២៦ ខែមេសា ឆ្នាំ ២០២៥ វេលាម៉ោង៥និង៤៦នាទី ព្រឹក នៅចំណុចផ្លូវ២១ បាសាក់លេន សង្កាត់ទន្លេបាសាក់ ខណ្ឌចំការមន ជនសង្ស័យមានគ្នាចំនួន៣នាក់ ជិះម៉ូតូ២គ្រឿងបានធ្វើសកម្មភាព ឆក់កាបូបបានសម្រេចពីស្ត្រីជនបរទេសម្នាក់ កំពុងដើរជាមួយមិត្តភក្តិ រួចជនសង្ស័យបានគេចខ្លួនបាត់។ លុះនៅថ្ងៃទី ២៩ ខែមេសា ឆ្នាំ២០២៥ នគរបាលព្រហ្មទណ្ឌកម្រិតស្រាល បានស្រាវជ្រាវឈានដល់កំណត់មុខសញ្ញាបាន និងឃាត់ខ្លួនជនសង្ស័យ២នាក់ខាងលើតែម្តង។

សូមបញ្ជាក់ថា កម្លាំងការិយាល័យ ជំនាញកំពុងស្រាវជ្រាវបន្តយកបក្ខពួកសេសសល់បន្តទៀត។ ចំពោះមុខសញ្ញាសេសសល់ និងរត់គេចខ្លួន សមត្ថកិច្ចនិងតាមបង្ក្រាបឱ្យដល់ឬសគល់ដោយមិនយោគយល់នោះឡើយ។

បច្ចុប្បន្នជនសង្ស័យ និងវត្ថុតាងខាងលើ កម្លាំងជំនាញការិយាល័យ កសាងសំណុំរឿងបញ្ជូនទៅសាលាដំបូងរាជធានីភ្នំពេញ ដើម្បីចាត់ការតាមនីតិវិធី៕

ដោយ ៖ សំណាង

The post នគរបាលឃាត់ខ្លួនជនសង្ស័យ២នាក់ ឆក់កាបូបស្ត្រីជនបរទេសនៅខណ្ឌចំការមន appeared first on Kampuchea Thmey Daily.

សមត្ថកិច្ចខេត្តធ្វើការបង្ហាញមុខក្រុមចោរឆក់ចំនួន៨នាក់ លួចម៉ូតូក្នុងក្រុងសៀមរាប

Kang Tola — Sat, 28 Jan 2023 13:12:01 +0000

សៀមរាប ៖ ថ្ងៃទី ២៨ ខែ មករា ឆ្នាំ២០២៣ នៅអធិការដ្ឋាននគរបាលក្រុងសៀមរាប មានធ្វើសន្និសីទកាសែត មួយស្ដីអំពី ការគ្រប់គ្រងសន្តិសុខ សុវត្ថិភាព និងសណ្ដាប់ធ្នាប់ទូទៅនៅក្នុងខេត្ត និង ការបង្ហាញមុខក្រុមចោរលួចម៉ូតូយ៉ាងសកម្មមួយក្រុម មានគ្នា០៩នាក់ ហើយត្រូវឃាត់ខ្លួនបានជនសង្ស័យ ចំនួន ៨នាក់ ហើយម្នាក់ទៀតបានកំពុងស្រាវជ្រាវបន្ត ព្រមទាំងបានដកហូតនូវវត្ថុតាង មានម៉ូតូ ០៦គ្រឿង និង ឧបករណ៍សម្ភារៈកែច្នៃមួយចំនួនទៀត។

អង្គសន្និសីទកាសែតនេះ បានធ្វើឡើងក្រោមវត្តមានរបស់លោកឧត្តមសេនីយ៍ត្រី ភឹង ចិន្តារ៉េត ស្នងការរងទទួលផែនព្រហ្មទណ្ឌ នៃស្នងការដ្ឋាននគរបាលខេត្តសៀមរាប និង លោកវរសេនីយ៍ឯក ដា ចំរើន អធិការក្រុងសៀមរាប រួមទាំងមន្ត្រីនគរបាលជំនាញផងដែរ។

តាមការបញ្ជាក់របស់លោកឧត្តមសេនីយ៍ត្រី ភឹង ចិន្តារ៉េត ស្នងការរងខេត្ត ស្តីអំពីការងារសន្តិសុខនូវទូទាំងខេត្ត គឺ បានផ្តល់នូវភាពល្អប្រសើរឡើង បើប្រៀបធៀបទៅក្នុងទស្សវត្សឆ្នាំ១៩៩០ គឺនាពេលបច្ចុប្បន្ននេះពុំមានករណីចោរប្លន់ នោះឡើយ។

លោកបានបន្តទៀតថា ដោយខេត្តសៀមរាប គឺជាតំបន់គោលដៅទេសចរណ៍ របស់ភ្ញៀវជាតិ អន្តរជាតិ ចូលមកទស្សនាកម្សាន្ត ហើយក៏ត្រូវបានប្រមុខរាជរដ្ឋាភិបាល បានយកចិត្តទុកដាក់ខ្ពស់ ព្រមទាំងបានផ្តល់ផ្លូវដ៏ស្រស់ ស្អាតចំនួន៣៨ខ្សែ ដល់ក្រុងសៀមរាប ក្នុងពេលដែលប្រទេសជាតិកំពុងជួបវិបត្តិជំងឺកូវីដ១៩។

លោកបានបន្តទៀតថា ដោយកត្តានេះហើយ គណៈបញ្ជាការឯកភាពរដ្ឋបាលខេត្តសៀមរាប បានយកចិត្តទុកដាក់ខ្ពស់លើការងារសន្តិសុខ សណ្តាប់ធ្នាប់ និង សុវត្ថិភាពជូនប្រជាពលរដ្ឋ និងភ្ញៀវទេសចរជាតិ អន្តរជាតិ ដែលបានមកស្នាក់នៅកម្សាន្ត ទស្សនានៅតាមប្រាង្គប្រាសាទបូរាណ និង រមណីយដ្ឋានធម្មជាតិក្នុងខេត្តសៀមរាប ។

លោកឧត្តមសេនីយ៍ត្រី ភឹង ចិន្តារ៉េត ក៏បាន លើកផងដែរ អំពីលទ្ធផលដែលកងកម្លាំងនៃស្នងការដ្ឋាននគរបាលខេត្ត បានសហការល្អជាមួយស្នងការដ្ឋាននគរបាល ខេត្តកំពង់ធំ និង អធិការដ្ឋាននគរបាលក្រុងសៀមរាប និង ស្រុកមួយចំនួន ក្នុងការចុះធ្វើការស្រាវជ្រាវនូវសញ្ញាយ៉ាងសកម្ម ក្នុងការលួចម៉ូតូនៅក្រុងសៀមរាប រហូតទទួលបានលទ្ធផល ដោយបានបំបែកនូវសំបុកចោរមួយក្រុម ដែលមានបក្ខពួក០៩នាក់ ត្រូវបានឃាត់ខ្លួន ០៨នាក់ នៅទីកន្លែងផ្សេងគ្នា និង ម្នាក់ទៀតបានកំពុងរត់គេចខ្លួន។

លោកក៏បានបញ្ជាក់ថា ករណីចោរឆក់ និង លួច បើធៀបពីឆ្នាំ២០២១ និងឆ្នាំ២០២២មានការថយចុះ ដោយកម្លាំងយើងបានធ្វើការល្បាតបានជាប្រចាំ ទាំងយប់ទាំងថ្ងៃក្នុងក្រុងនិងតាមមូលដ្ឋាន សំខាន់នៅក្នុងតំបន់រមណីយដ្ឋាននានា ព្រមទាំងបានកំណត់និងគ្រប់គ្រងនូវមុខសញ្ញាជនបង្ក ដែលទើបចេញពីមណ្ឌលកែប្រែ ព្រមទាំងដោយមានការចូលរួមពីប្រជាពលរដ្ឋ និង ស្ថាប័នពាក់ព័ន្ធ បានចូលរួមអនុវត្តលើផែនសន្តិសុខ ព្រមទាំងបានប្រើប្រាស់វិធានការជំនាញច្បាស់លាស់។

ក្នុងនោះលោកស្នងការរង ក៏បានលើកនូវវិធានការមួយចំនួន ជូនដល់ប្រជាពលរដ្ឋ និង គ្រប់ស្ថាប័ន ចូលរួមទាំងអស់គ្នាអនុវត្ត ដែលជាគោលការចំបង ដើម្បីកាត់បន្ថយនូវរាល់បទល្មើស ព្រមទាំងត្រូវ លុបបំបាត់នូវបទល្មើសដែលបង្កឡើងដោយខ្លួនឯង ដែលធ្វើឲ្យបំពុលដល់សង្គម ។ ម្យ៉ាងទៀត ក៏ត្រូវចូលរួមទាំងអស់គ្នា ក្នុងការការពារទ្រព្យសម្បត្តិរបស់ខ្លួន និង ផ្តល់ព័ត៌មានដល់អាជ្ញាធរមូលដ្ឋាន ហើយចំពោះជនដែលប្រឌិតបទល្មើសនឹងត្រូវ ទទួលទោសទៅតាមច្បាប់។

ក្នុងឱកាសនោះដែរ បងប្អូនប្រជាពលរដ្ឋ ដែលរងគ្រោះបាត់ម៉ូតូ ដោយក្រុមជនសង្ស័យទាំង០៨នាក់លួចយកកន្លងមក នៅក្នុងភូមិសាស្ត្រខេត្តសៀមរាប ត្រូវបានលោកវរសេនីយ៍ឯក ដា ចំរើន អធិការក្រុងសៀមរាប ធ្វើការប្រគល់ជូនបងប្អូន ព្រមទាំងអំពាវនាវដល់បងប្អូនបាត់ម៉ូតូ មកពិនិត្យមើលម៉ូតូរបស់ខ្លួន នៅអធិការដ្ឋាននគរបាលក្រុងសៀមរាបផងដែរ៕

ដោយ ៖ គឿនវេត

The post សមត្ថកិច្ចខេត្តធ្វើការបង្ហាញមុខក្រុមចោរឆក់ចំនួន៨នាក់ លួចម៉ូតូក្នុងក្រុងសៀមរាប appeared first on Kampuchea Thmey Daily.

ស្ត្រីម្នាក់ឈប់ម៉ូតូចាំយកលុយកូនតុងទីន ត្រូវចោរឆក់ខ្សែកបានសម្រេច

Kang Tola — Fri, 09 Dec 2022 15:12:53 +0000

ភ្នំពេញ ៖ ស្ត្រីម្នាក់ខណៈឈប់ម៉ូតូអង្គុយចាំយកលុយកូនតុងទីន ស្រាប់តែមានជនសង្ស័យ២នាក់ជិះម៉ូតូមកក្បែរធ្វើសកម្មភាពឆក់យកខ្សែកបានសម្រេចរួចគេចខ្លួនបាដោយសុវត្ថិភាព បង្កការភ្ញាក់ផ្អើលកាលពីវេលាម៉ោង៧និង១០នាទីយប់ ថ្ងៃទី៩ ខែធ្នូ ឆ្នាំ២០២២ នៅផ្លូវបេតុង ភូមិត្រពាំងល្វា សង្កាត់កាកាបទី១ ខណ្ឌពោធិ៍សែនជ័យ។

ជនរងគ្រោះឈ្មោះសា នី អាយុ៣០ជាង ស្នាក់នៅម្ដុំផ្សារសេនជូរី សង្កាត់កាកាបទី១ ខណ្ឌពោធិ៍សែនជ័យ។ សម្ភារៈដែលត្រូវជនសង្ស័យឆក់យកនោះ ខ្សែកផ្លាកទីនមួយខ្សែ តម្លៃ៣០០ដុល្លារ។

តាមប្រភពព័ត៌មានបានឲ្យដឹងថា មុនពេលកើតហេតុជនរងគ្រោះជិះម៉ូតូមកឈប់នៅលើចិញ្ចើមផ្លូវចាំយកលុយកូនតុងទីនបន្ទាប់មក ស្រាប់តែមានជនសង្ស័យ២នាក់ជិះម៉ូតូមួយគ្រឿងមិនចាំស្លាកលេខមកធ្វើសកម្មភាពឆក់យកខ្សែកបានសម្រេចរួចគេចខ្លួនបាត់ដោយសុវត្ថិភាព។

ក្រោយកើតហេតុជនរងគ្រោះមិនបានទៅដាក់ពាក្យបណ្តឹងនៅប៉ុស្តិ៍នគរបាលកាកាបទី១ទេ ព្រោះគិតថា បានត្រឹមដាក់ពាក្យបណ្តឹងមិនដែលឃើញចាប់បានចោរម្តងណាផងហើយក៏ជិះម៉ូតូទៅផ្ទះវិញទាំងអស់សង្ឃឹម៕

ដោយ ៖ សុខា

The post ស្ត្រីម្នាក់ឈប់ម៉ូតូចាំយកលុយកូនតុងទីន ត្រូវចោរឆក់ខ្សែកបានសម្រេច appeared first on Kampuchea Thmey Daily.

ករណីចោរឆក់កាបូបបង្កឱ្យបាត់បង់ជីវិតក្មេងស្រីម្នាក់ និងម្តាយរបួសធ្ងន់ប្រឈមជាប់គុកពី ១៥-៣០ឆ្នាំ

Sophal Tuon — Tue, 22 Nov 2022 09:42:20 +0000

កណ្តាល៖ លោក ឯក ស៊ុនរស្មី ព្រះរាជអាជ្ញារង និងជាអ្នកនាំពាក្យរបស់អយ្យការអមសាលាដំបូងខេត្តកណ្តាល បានប្រាប់ឱ្យដឹងនៅរសៀលថ្ងៃទី២២ ខែវិច្ឆិការ ឆ្នាំ២០២២ថា ចោរឆក់កាបូបម្នាក់ និងបក្ខពួកដែលកំពុងរត់គេចខ្លួន បណ្តាលឱ្យក្មេងស្រីធ្លាក់លើម៉ូតូ ត្រូវរថយន្តកិនស្លាប់ និងម្តាយរងរបួសធ្ងន់ អាចប្រឈមជាប់ពន្ធនាគារពី១៥ឆ្នាំ ទៅ៣០ឆ្នាំ។

សំណុំរឿងនេះលោកតំណាងអយ្យការបានធ្វើការចោទប្រកាន់ពីបទ “លួចមានស្ថានទម្ងន់ទោស ដោយសារមរណភាពនៃជនរងគ្រោះ ” តាមមាត្រា៣៥៣ , ៣៦០ នៃក្រមព្រហ្មទណ្ឌ ។

បទល្មើសនេះត្រូវផ្តន្ទាទោសដាក់ពន្ធនាគារពី១៥(ដប់ប្រាំ) ឆ្នាំ ទៅ៣០(សាបសិប) ឆ្នាំ ប្រសិនអំពើនេះប្រព្រឹត្តមុនពេល ក្នុងពេល ឬក្រោយពេលធ្វើអំពើហិង្សា ដែលបណ្តាលឱ្យជនរងគ្រោះស្លាប់ ដោយគ្មានចេតនាសម្លាប់។ សំណុំរឿង ត្រូវបានបញ្ជូនទៅលោកចៅក្រមស៊ើបសួរចំណាត់ការបន្តរតាមនីតិវិធីច្បាប់ ។

តាមរបាយការណ៍សមត្ថកិច្ច ជនត្រូវចោទចំនួន០២នាក់ ទី១ឈ្មោះ សុខខឿន ស៊ីផាត ភេទប្រុស អាយុ២១ឆ្នាំ ជនជាតិខ្មែរ មុខរបរមិនពិតប្រាកដ មានទីលំនៅភូមិតាលន់ ឃុំតាលន់ ស្រុកស្អាង ខេត្តកណ្ដាល(ឃាត់ខ្លួន) និងទី២ឈ្មោះ ផា សុភ័ណ្ឌ ភេទប្រុស អាយុ២៨ ឆ្នាំជនជាតិខ្មែរ មុខរបរមិនពិតប្រាកដ មានទីលំនៅភូមិតាលន់ ឃុំតាលន់ ស្រុកស្អាង ខេត្តកណ្ដាល កំពុងរត់គេចខ្លួន។

គួររំលឹកថា ក្នុងប្រតិបត្តិការចុះបង្ក្រាបនេះដឹកនាំបញ្ជាផ្ទាល់ពីលោកវរសេនីយ៍ឯក ឡាក់ ម៉េងធី ស្នងការរងទទួលផែនព្រហ្មទណ្ឌ ដោយមានការបញ្ជាយ៉ាងម៉ឺងម៉ាត់ពីសំណាក់លោកឩត្តមសេនីយ៍ទោ ឈឿន សុចិត្ត ស្នងការនគរបាលខេត្តកណ្តាល ។

ហេតុការណ៌នេះបានកើតឡើងនៅថ្ងៃទី១៩ ខែវិច្ឆិកា ឆ្នាំ២០២២ វេលាម៉ោង១៦ និង៣០នាទី នៅចំណុចលើផ្លូវជាតិលេខ២១ ស្ថិតក្នុងភូមិដើមព្រីង ឃុំកោះខែល ស្រុកស្អាង ខេត្តកណ្តាល ។

លោកវរសេនីយ៍ លន ចន្ថា អធិការរងស្រុកស្អាងទទួលផែនព្រហ្មទណ្ឌបានឱ្យដឹងថា ជនរងគ្រោះ ចំនួន០២នាក់ ទី១ឈ្មោះ រឿន អារីកា ភេទស្រី អាយុ៤ឆ្នាំ ជនជាតិ ខ្មែរ មុខរបរបន្ទុកគ្រួសារ (ស្លាប់នៅកន្លែងកើតហេតុ) ទី២ឈ្មោះ ស៊ឹម រស្មី ភេទស្រី អាយុ៣២ឆ្នាំ ជនជាតិខ្មែរ (រងរបួសស្រាល) ទាំងពីរនាក់ ត្រូវជាម្ដាយនិងកូន មានទីលំនៅភូមិព្រែកតាឡៃ ឃុំព្រែកអំបិល ស្រុកស្អាង ខេត្តកណ្ដាល។

លោកអធិការរងបានបន្ថែមទៀតថា នៅវេលាម៉ោងកើតហេតុ ជនរងគ្រោះឈ្មោះ ស៊ឹម រស្មី បានបើកបរម៉ូតូលើផ្លូវជាតិលេខ២១ ក្នុងទិសដៅពីត្បូងទៅជើង ឌុបជនរងគ្រោះឈ្មោះ អារីកា ត្រូវជាកូន ។ លុះពេលធ្វើដំណើរមកដល់ចំណុចកើតហេតុ ខណៈពេលដែលជនរងគ្រោះកំពុងបើកបរម៉ូតូស្របទិសដៅគ្នាមកដល់ទន្ទឹមនឹងរថយន្ដប្រភេទដឹកទំនិញ ៥តោន។ ជនសង្ស័យឈ្មោះ ផា សុភ័ណ្ឌ អ្នកបើកម៉ូតូ ឈ្មោះ សុខខឿន សុផាត ជិះពីក្រោយអ្នកធ្វើសកម្មភាពឆក់កាបូបជនរងគ្រោះឈ្មោះ ស៊ឹម រស្មី បណ្ដាលឱ្យដួលម៉ូតូខ្ទាតជនរងគ្រោះឈ្មោះ អារីកា ចូលទៅក្រោមរថយន្ត កិនស្លាប់នៅនឹងកន្លែងកើតហេតុ។ ក្រោយកើតហេតុភ្លាមៗជនសង្ស័យ បានបើកម៉ូតូគេចខ្លួនបាត់ ។ បច្ចុប្បន្នសមត្ថកិច្ចកំពុងស្រាវជ្រាវចាត់ការតាមនីតិវិធីច្បាប់។ អត្ថបទ៖ ឆៃ យ៉ា

The post ករណីចោរឆក់កាបូបបង្កឱ្យបាត់បង់ជីវិតក្មេងស្រីម្នាក់ និងម្តាយរបួសធ្ងន់ប្រឈមជាប់គុកពី ១៥-៣០ឆ្នាំ appeared first on Kampuchea Thmey Daily.

ជនសង្ស័យមួយក្រុម ធ្វើសកម្មភាពឆក់កាបូបពីស្ត្រីម្នាក់បានសម្រេច

Sorn Phanith — Wed, 04 May 2022 04:56:59 +0000

ជនសង្ស័យមួយក្រុមមានគ្នា ៤ នាក់ ជិះម៉ូតូ ២ គ្រឿង បានធ្វើសកម្មភាពឆក់កាបូបពីស្ត្រីនាក់កំពុងជិះម៉ូតូតាមដងផ្លូវបានសម្រេច រួចនាំគ្នាគេចខ្លួនដោយសុវត្ថិភាព កាលពីវេលាម៉ោង ០៨ និង ១០ នាទីយប់ថ្ងៃទី ០៣ ខែឧសភា ឆ្នាំ ២០២២ នៅតាមបណ្តោយផ្លូវព្រះមុនីរ៉េត ចំណុចគល់ស្ពានអាកាសស្ទឹងមានជ័យ ស្ថិតក្នុងសង្កាត់បឹងសាឡាង ខណ្ឌទួលគោករាជធានីភ្នំពេញ។

ជនរងគ្រោះមានឈ្មោះ ដា ណា ភេទស្រី អាយុ ៣៨ ឆ្នាំ មុខរបរបុគ្គលិកពេទ្យឯកជនមួយកន្លែង ស្នាក់នៅក្នុងបុរីពិភពថ្មីចំការដូង មានស្រុកកំណើតនៅឯខេត្តពោធិ៍សាត់។ សម្ភារៈដែលបាត់បង់រួមមាន កាបូប កាតគ្រីម៉ូតូ ១ សន្លឹក អត្តសញ្ញាណប័ណ្ណ ១ សន្លឹក កាតចាក់វ៉ាក់សាំង ១ សន្លឹក លុយ១០ ម៉ឺនរៀល និងឯកសារមួយចំនួន។

តាមការរៀបរាប់ពីជនរងគ្រោះបានប្រាប់ឲ្យដឹងថា មុនកើតហេតុរូបគាត់ជិះម៉ូតូមួយគ្រឿងម៉ាកហុងដាវ៉េវពណ៌ក្រហម ពាក់ស្លាកលេខភ្នំពេញ 1HE-5998 ចេញពីម្តុំពេទ្យសម្ដេចឪ គោលបំណងទៅកន្លែងស្នាក់នៅវីញនៅបុរីពិភពថ្មីចំការដូង ដោយការបូករបស់គាត់បានដាក់នៅរានម៉ូតូ ដោយធ្វើដំណើរទៅដៅពីកើតទៅលិច លុះមកដល់ចំណុចកើតហេតុខាងលើ ក៏លេចមុខជនសង្ស័យ ៤ នាក់ ជិះម៉ូតូ ២ គ្រឿងមិនស្គាល់ម៉ាក ធ្វើដំណើរមកពីក្រោយហើយជនសង្ស័យ ២ នាក់ ជិះម៉ូតូមួយគ្រឿងបានធ្វើសកម្មភាពឆក់កាបូបគាត់បានសម្រេច ចំណែកជនសង្ស័យ ២ នាក់ទៀត ជិះម៉ូតូមួយគ្រឿង បិទគូទពីក្រោយ ក្រោយពីសកម្មភាពឆក់បានសម្រេចហើយពួកគេទាំង ៤ នាក់នាំគ្នាជិះម៉ូតូគេចខ្លួនបាត់ស្រមោល។ ភ្លាមៗនោះរូបគាត់ក៏បានស្រែកចោរៗដែរតែគ្មានអ្នកជួយ ទើបបង្កឲ្យមានការភ្ញាក់ផ្អើលដល់សមត្ថកិច្ចនគរបាលស្ទឹងមានជ័យទី១ កំពុងល្បាត បាននាំជនរងគ្រោះទៅប៉ុស្តិ៍នគរបាលធ្វើការសួរនាំ និងបាននាំជនរងគ្រោះមកពិនិត្យជាក់ស្តែងនៅកន្លែងកើតហេតុ បន្ទាប់មកសមត្ថកិច្ចបានប្រាប់ជនរងគ្រោះថា នៅចំណុចកើតហេតុខាងលើនេះ គឺនៅក្នុងមូលដ្ឋានសង្កាត់បឹងសាឡាងហើយសមត្ថកិច្ចបានប្រាប់ជនរងគ្រោះថា ឲ្យទៅដាក់ពាក្យបណ្ដឹងនៅសង្កាត់បឹងសាឡាង។

បន្ទាប់មកជនរងគ្រោះ បានទំនាក់ទំនងទៅសាច់ញាតិមកទទួលរួចនាំគ្នាទៅប៉ុស្តិ៍នគរបាលរដ្ឋបាលបឹងសាឡាង បន្ទាប់ពីទៅដល់ប៉ុស្តិ៍នគរបាលភ្លាមជនរងគ្រោះបានប្រាប់សមត្ថកិច្ចថា សូមទៅផ្ទះវិញសិន ដោយជនរងគ្រោះមិនស្រួលខ្លួន រង់ចាំថ្ងៃស្អែកទើបមកដាក់ពាក្យបណ្ដឹង ដើម្បីឲ្យសមត្ថកិច្ចជួយស្រាវជ្រាវរកមុខជនសង្ស័យយកមកផ្តន្ទាទោសទៅតាមផ្លូវច្បាប់៕

អត្ថបទ៖ សុខា

The post ជនសង្ស័យមួយក្រុម ធ្វើសកម្មភាពឆក់កាបូបពីស្ត្រីម្នាក់បានសម្រេច appeared first on Kampuchea Thmey Daily.

នារីម្នាក់ត្រូវក្រុមជនសង្ស័យឆក់កាបូបបានសម្រេច គេចខ្លួនបាត់ដោយសុវត្ថិភាព

Kang Tola — Fri, 11 Mar 2022 14:42:44 +0000

ភ្នំពេញ ៖ ជនសង្ស័យមួយក្រុម បានធ្វើសកម្មភាពឆក់កាបូបពីនារីម្នាក់កំពុងធ្វើដំណើរតាមផ្លូវបានសម្រេច កាលពីវេលាម៉ោង៨ និង១០នាទីយប់ ថ្ងៃទី១១ ខែមីនា ឆ្នាំ២០២២ នៅចំណុចក្បែរស្ពានអាកាសស្ទឹងមានជ័យ តាមបណ្ដោយផ្លូវព្រះមុន្នីរ៉េត ស្ថិតក្នុងសង្កាត់បឹងសាឡាង ខណ្ឌទួលគោក រាជធានីភ្នំពេញ។

នារីរងគ្រោះ មានឈ្មោះ ហេង ពេជ្រ មុនី នាថ អាយុ២៦ឆ្នាំ មុខរបរ ផ្នែក គណនេយ្យ នៅ ក្រុមហ៊ុនមួយស្នាក់នៅក្នុងសង្កាត់ដង្កោ ខណ្ឌដង្កោ។

បើតាមសម្ដីនារីរងគ្រោះបានរៀបរាប់ប្រាប់ឲ្យដឹងថា មុនពេលកើតហេតុ រូបនាងបានជិះម៉ូតូម៉ាក SUZUKI Nek ពណ៌ស ពាក់ស្លាកលេខភ្នំពេញ 1BK-4909 ចេញពីរៀនគួរនៅក្បែរវិទ្យាល័យ ជា ស៊ីម សន្ធរម៉ុក រួចត្រឡប់ទៅផ្ទះវិញនៅម្ដុំចំការដូង ខណ្ឌដង្កោ ខណៈធ្វើដំណើរមកដល់ចំណុចកើតហេតុ ស្រាប់តែមានជនសង្ស័យ២នាក់ជិះម៉ូតូមួយគ្រឿងមិនចាំម៉ាក បានឆក់កាបូបរបស់នាងដែរភ្ជួរនៅខាងមុខបានសម្រេច ហើយនាងក៏ឈប់ម៉ូតូភ្លាមៗក៏មានបក្ខពួកក្រុមជនសង្ស័យម្នាក់ទៀតមកកាច់សោម៉ូតូដកយកទៅបន្ថែមទៀត ទើបធ្វើឲ្យរូបនាងជិះម៉ូតូដេញតាមមិនកើត។

នារីរងគ្រោះបានឲ្យដឹងទៀតថា ក្នុងកាបូបរបស់នាង ដែលត្រូវក្រុមចោរឆក់យកទៅនោះ មានទូរសព្ទមួយគ្រឿងម៉ាក Samsung ,កាតចាក់វ៉ាក់សាំង , កាតធានាគារ និងអត្តសញ្ញាប័ណ្ណ។

ក្រោយកើតហេតុ សមត្ថកិច្ចមូលដ្ឋានបានចុះមកដល់កន្លែងកើតហេតុ និងនាំនារីរងគ្រោះទៅកាន់ប៉ុស្ដិ៍នគរបាលរដ្ឋបាល បឹងសាឡាង ដើម្បីសួរនាំ និងធ្វើកំណត់ហេតុកំណត់មុខសញ្ញា៕

ដោយ ៖ សុខា

The post នារីម្នាក់ត្រូវក្រុមជនសង្ស័យឆក់កាបូបបានសម្រេច គេចខ្លួនបាត់ដោយសុវត្ថិភាព appeared first on Kampuchea Thmey Daily.

ឆក់កាបូបបានសម្រេច ២ លើក ទីបំផុតជាប់ខ្នោះប៉ូលិសទាំងអស់

Sorn Phanith — Wed, 01 Dec 2021 06:29:55 +0000

មុខសញ្ញាសង្ស័យចំនួន៣នាក់ ត្រូវបានកម្លាំងសមត្ថកិច្ច នៃអធិការដ្ឋាននគរបាលស្រុកថ្មគោល តាមស្រាវជ្រាវរហូតឈានដល់ការឃាត់ខ្លួន បន្ទាប់ពីពួកគេបានធ្វើសកម្មភាពឆក់កាបូបបានសម្រេចចំនួន២លើក រួចមក។

គួរបញ្ជាក់ថា កាលពីថ្ងៃទី ២៦ ខែវិច្ឆិកា ឆ្នាំ២០២១ វេលាម៉ោង ៧ និង ២០ នាទីយប់ នៅចំណុចក្រុមទី ១៧ ភូមិឆ្កែកូន ឃុំគោកឃ្មុំ ស្រុកថ្មគោល មានករណីឆក់កាបូបលុយមួយបានកើតឡើងបង្កដោយជនសង្ស័យមិនស្គាល់សញ្ញាណ បានជិះម៉ូតូ០១គ្រឿងម៉ាកហុងដាឌ្រីម ពណ៌ខ្មៅ ពាក់ស្លាកលេខ1AJ.9243 បានធ្វើសកម្មភាពឆក់កាបូបលុយរបស់ជនរងគ្រោះឈ្មោះ កែវ នាងតេនៈ ភេទស្រី អាយុ ២២ ឆ្នាំ រស់នៅភូមិឆ្កែកូន ឃុំគោកឃ្មុំ ស្រុកថ្មគោល យកអស់ទ្រព្យសម្បត្តិរួមមាន លុយខ្មែរចំនួន ៤៧ ម៉ឺនរៀល និងលុយបាតចំនួន ១ ម៉ឺនបាត ក្រោយពីធ្វើសកម្មភាពរួចជនសង្ស័យបានជិះម៉ូតូគេចខ្លួនបាត់។

លុះដល់ថ្ងៃទី២៩ ខែឆ្នាំ ដដែល វេលា ម៉ោង ៥ ទៀបភ្លឺ នៅចំណុចក្រុមទី ១០ ភូមិកៀនកែស ១ ឃុំគោកឃ្មុំ ស្រុកថ្មគោល ក៏មានករណីឆក់កាបូបលុយចំនួន០១លើកទៀត បង្កឡើងដោយជនសង្ស័យមិនស្គាល់សញ្ញាណចំនួន ០២ នាក់ ជិះម៉ូតូ ០១ គ្រឿង មិនស្គាល់ម៉ាកនិងស៊េរីបានធ្វើសកម្មភាពឆក់កាបូបលុយរបស់ជនរងគ្រោះឈ្មោះ គឹម សុឃឿន ភេទស្រី អាយុ ៣៩ ឆ្នាំ រស់នៅភូមិកៀនកែស២ ឃុំគោកឃ្មុំ ស្រុកថ្មគោល យកអស់ទ្រព្យសម្បត្តិរួមមាន ប្រាក់ខ្មែរចំនួន ៦០ ម៉ឺនរៀល ប្រាក់ដុល្លារចំនួន ២០០ ដុល្លារ កាតទូរស័ព្ទចំនួន ៣០ ដុល្លារ ទូរស័ព្ទដៃចំនួន ១ គ្រឿងអត្តសញ្ញាណប័ណ្ណសញ្ជាតិខ្មែរចំនួន ០១ សន្លឹក និងប័ណ្ណចាក់វ៉ាក់សាំងចំនួន ០១ សន្លឹក។

ក្រោយពេលកើតហេតុកម្លាំងជំនាញសហការជាមួយកម្លាំងការិយាល័យនគរបាលព្រហ្មទណ្ឌកម្រិតធ្ងន់ បានធ្វើការស៊ើបអង្កេតស្រាវជ្រាវ រហូតដល់ថ្ងៃទី៣០ ខែឆ្នាំ ដដែល វេលាម៉ោង ៩ និង ៣០នាទី យប់ជំនាញបានធ្វើការឃាត់ខ្លួនមុខសញ្ញាជនសង្ស័យចំនួន ០១ នាក់ឈ្មោះ ឆុំ ចិត្រា ភេទប្រុស អាយុ ២០ ឆ្នាំ រស់នៅភូមិអូរតានប់ សង្កាត់ក្តុលដូនទាវ ក្រុងបាត់ដំបង និងដកហូតបានសម្ភារៈរួមមានម៉ូតូ ០១ គ្រឿងម៉ាកហុងដាឌ្រីម ពណ៌ខ្មៅ ស៊េរី ២០១៥ ពាក់ស្លាកលេខបាត់ដំបង1AJ. 9243 កាតទូរស័ព្ទ metfone៥០០០៛ ចំនួន ៤សន្លឹក, កាតទូរស័ព្ទ metfone ១ ដុល្លារចំនួន ២សន្លឹក កាតទូរស័ព្ទស្មាត ១ ដុល្លារចំនួន ០១ សន្លឹក និងបានបញ្ជូនមកកាន់អធិការដ្ឋាននគរបាលស្រុកថ្មគោលដើម្បីធ្វើការសាកសួរស្រាវជ្រាវ ។

ក្រោយពេលសាកសួរ កម្លាំងបានបន្តឃាត់ខ្លួនជនសង្ស័យចំនួន០២នាក់ទៀត ឈ្មោះ សួន ណារ័ត្ន ហៅ ប៉ាវ ភេទប្រុស អាយុ១៧ឆ្នាំ រស់នៅភូមិអន្លង់វិល ឃុំអន្លង់វិល ស្រុកសង្កែ និង ឈ្មោះ រុន ស្រីល័ក្ខ ភេទស្រី អាយុ២២ឆ្នាំ រស់នៅភូមិក្បាលព្រលាន សង្កាត់ក្បាលព្រលាន ក្រុងប៉ៃលិន។ បច្ចុប្បន្នជនសង្ស័យជំនាញឃាត់ខ្លួននៅក្នុងអធិការដ្ឋានដើម្បីកសាងសំណុំរឿងចាត់ការតាមនីតិវិធី ៕

អត្ថបទ៖ សោ និយមរ័ត្ន

The post ឆក់កាបូបបានសម្រេច ២ លើក ទីបំផុតជាប់ខ្នោះប៉ូលិសទាំងអស់ appeared first on Kampuchea Thmey Daily.

អ្នកសារព័ត៌មាន ម្នាក់ត្រូវចោរឆក់ទូរសព្ទម៉ាកIphone 11 pro max យកទៅបាត់

Sorn Phanith — Fri, 21 May 2021 03:45:25 +0000

លោក សន រដ្ឋា អ្នកសារព័ត៌មានល្បីឈ្មោះមួយរូបប្រចាំទូរទស្សន៍ PNN ត្រូវចោរឆក់ទូរសព្ទ Iphone 11 pro max ខណៈហេតុការណ៍នេះបានកើតឡើងកាលពីវេលាម៉ោងជាង៧យប់ ថ្ងៃទី១៨ ខែឧសភា ឆ្នាំ២០២១កន្លងមកនៅលើផ្លូវ២៧១ ក្នុងសង្កាត់ទឹកល្អក់ទី៣ ខណ្ឌ ទួលគោកពេលដែលលោកបានឈប់ម៉ូតូនៅស្ងៀមនឹងបានប្រើប្រាស់ទូរសព្ទ។

លោកបានដាក់ពាក្យបណ្ដឹងនៅប៉ុស្តិ៍ នគរបាលរដ្ឋបាលទឹកល្អក់ទី៣ ក្នុងខណ្ឌទួលគោករាជធានីភ្នំពេញរួចហើយ និងបានលើកឡើងថា នេះជាបទពិសោធន៍ដំបូងមួយដែលមិនដែលជួបក្នុងជីវិតរយៈពេល ១១ឆ្នាំនៅលើទឹកដីរាជធានីភ្នំពេញ។ “ខ្ញុំពិតជាសោកស្ដាយ ចំពោះទូរសព្ទ ដែលបាត់បង់ ហើយអ្វីដែលរឹតតែសោកស្តាយបំផុតគឺ រូបភាពអនុស្សាវរីយ៍ជាច្រើនជាមួយមិត្តភក្ដិជុំវិញខ្លួន ឯកសារការងារ និងឯកសារមេរៀនជាដើម”។

លោកទទួលស្គាល់ថា ហេតុការណ៍នេះ កើតឡើងពីការធ្វេសប្រហែស មិនប្រុងប្រយ័ត្នរបស់លោក ហើយនេះក៏ជាបទសោធន៍មួយសម្រាប់បងប្អូន សុំមានការប្រុងប្រយ័ត្នឱ្យបានខ្ពស់មុននឹងសម្រេច ចិត្តប្រើប្រាស់ទូរស័ព្ទនៅទីសាធារណៈ។

លោកមិនសង្ឃឹមថា នឹងបានរបស់ដែលបាត់បង់នេះមកវិញនោះទេ ប៉ុន្តែលោករំពឹងថា ជនល្មើសនឹងត្រូវបានស្រាវជ្រាវ ចាប់ខ្លួនយកមកផ្ដន្ទាទោសតាមផ្លូវច្បាប់ ព្រោះថា នៅកន្លែងកើតហេតុគឺនៅក្រោមកាមេរ៉ាសុវត្ថិភាពរបស់សាលារាជធានីភ្នំពេញ និងមានកាំមេរ៉ាសុវត្ថិភាពតាមផ្ទះរបស់ប្រជាពលរដ្ឋបន្ថែមទៀត ដែលអាចកំណត់ពីអត្តសញ្ញាណ ជនល្មើស ស្លាកលេខម៉ូតូកាន់តែច្បាស់៕

សូមទស្សនាវីដេអូ

The post អ្នកសារព័ត៌មាន ម្នាក់ត្រូវចោរឆក់ទូរសព្ទម៉ាកIphone 11 pro max យកទៅបាត់ appeared first on Kampuchea Thmey Daily.

ករណីចោរឆក់ Archives - Kampuchea Thmey Daily

នគរបាល​ឃាត់ខ្លួនជនសង្ស័យ២នាក់ ឆក់​កាបូប​ស្ត្រីជនបរទេស​នៅ​ខណ្ឌចំការមន

សមត្ថកិច្ច​ខេត្ត​ធ្វើការ​បង្ហាញមុខ​ក្រុមចោរឆក់​ចំនួន៨នាក់​ លួច​ម៉ូតូ​ក្នុង​ក្រុង​សៀមរាប

ស្ត្រីម្នាក់​ឈប់​ម៉ូតូ​ចាំ​យក​លុយ​កូន​តុងទីន​ ត្រូវ​ចោរឆក់​ខ្សែក​បានសម្រេច​