កាន់ ម៉េងហុង Archives - Kampuchea Thmey Daily

កាន់ ម៉េងហុង ធ្វើការធ្ងន់នៅបារាំង ដណ្តើមខ្សែក្រវាត់ WKN ប៉ះម្ចាស់ផ្ទះម្ចាស់ខ្សែក្រវាត់៣ស្ថាប័ន

Kosal Sem — Tue, 14 Oct 2025 09:09:02 +0000

កីឡាករគុនខ្មែរ កាន់ ម៉េងហុង ទទួលបានឱកាសថ្មី ដោយក្លាយជាកីឡាករ កម្ពុជា ដំបូងគេ នឹងត្រូវចេញទៅប្រទេស បារាំង ដើម្បីដណ្តើមខ្សែក្រវាត់ពិភពលោក WKN World Bantamweight នៅថ្ងៃ ទី ២២ ខែ វិច្ឆិកា ឆ្នាំ ២០២៥។

កីឡាករគុនខ្មែរកាន់ ម៉េងហុង

ស្ថាប័ន WKN បានប្រកាសជាផ្លូវការកាលពីថ្ងៃ ចន្ទ ទី ១៣ ខែ តុលា ឆ្នាំ ២០២៥ ថា កីឡាកររបស់ក្លិប KKIF កាន់ ម៉េង ហុង នឹងត្រូវឆ្លងទ្វីបទៅប្រទេស បារាំង ដើម្បីប្រកួតដណ្តើមខ្សែក្រវាត់ពិភពលោក WKN World Champions ទម្ងន់ស្រាល ទល់នឹងកីឡាករសញ្ជាតិ បារាំង Akram Hamidi។

តាមរយៈប្រវត្តិត្រួសៗ កីឡាករបារាំង Akram Hamidi អាចត្រូវបានគេចាត់ទុកជាកីឡាករជើងខ្លាំងម្នាក់នៅក្នុងប្រភេទទម្ងន់ក្រោម ៥៥ គីឡូក្រាម។ បច្ចុប្បន្ន កីឡាករមានវ័យ ២៦ ឆ្នាំ និងកម្ពស់ ១.៧០ ម៉ែត្រ កំពុងគ្រងខ្សែក្រវាត់ពិភពលោក ៣ ស្ថាប័នធំៗ ក្នុងនោះមានខ្សែក្រវាត់ស្ថាប័ន WKN ២ ខ្សែ រួមមានខ្សែក្រវាត់ WKN European Oriental Rules និង WKN World K-1 Flyweight។ ដោយឡែក ២ ស្ថាប័នទៀតរួមមាន WBC អន្តរជាតិ និង ISKA World Flyweight។

ខិត្តប័ណ្ណប្រកួត

Akram Hamidi ជាកីឡាករម្នាក់ មានជំនាញលើការប្រកួតលក្ខណៈឃីកបុកស៊ីង។ រូបគេធ្លាប់ឆ្លងកាត់ការប្រកួតអាជីពចំនួន ៣៨ ដង ឈ្នះ ៣២ ដង (ផ្តួលដៃគូឱ្យសន្លប់ ២០ ដង) ចាញ់ ៥ ដង និងស្មើ ១ ដង។ ក្នុងចំណោមការប្រកួតទាំងនោះរូបគេធ្លាប់ប្រកួតនៅសង្វៀន ONE ៤ លើក ហើយជាលទ្ធផល គឺឈ្នះ ២ និងចាញ់ ២។ ក្រៅអំពីការប្រកួត ឃីគបុកស៊ីង រូបគេក៏ធ្លាប់ប្រកួតសកលបាន ១ ដងផងដែរ ក្នុងនោះរូបគេទទួលជ័យជម្នះដោយពិន្ទុ។

កីឡាករ Akram Hamidi

ក្រឡេកមកកាន់កីឡាករ កាន់ ម៉េងហុង វិញ បច្ចុប្បន្ន ជាកីឡាករលំដាប់ A ម្នាក់របស់ កម្ពុជា ក្នុងទម្ងន់ ៥៤ គីឡូក្រាម។ កីឡាកររបស់ក្លិប KKIF រូបនេះ ក៏ធ្លាប់ចេញទៅប្រឡូកនៅក្រៅប្រទេសច្រើនផងដែរ ក្នុងនោះមានទាំងឈ្នះ និងចាញ់ ប៉ុន្តែការប្រកួតដែលចាប់អារម្មណ៍ គឺ ម៉េងហុង ធ្លាប់ប្រកួតនៅសង្វៀន K-1 ដែលជាសង្វៀនដ៏ធំរបស់ ជប៉ុន កាលពីខែ សីហា ឆ្នាំ ២០២៤ ដែលពេលនោះរូបគេបានចាញ់កីឡាករម្ចាស់ផ្ទះ ជប៉ុន Akihiro Kaneko ដោយសន្លប់ទឹកទី ៣។

យ៉ាងណា នេះជាឱកាសថ្មីមួយទៀតសម្រាប់កីឡាករគុនខ្មែរម្ចាស់ខ្សែក្រវាត់ស្ថាប័ន IPCC Kun Khmer ដែលត្រូវចេញទៅប្រកួតនៅ អឺរ៉ុប ជាលើកដំបូង ដើម្បីដកស្រង់បទពិសោធថ្មី ក៏ដូចជាស្តារប្រជាប្រិយភាពរបស់ខ្លួននៅទីនោះ ក្នុងនាមជាកីឡាករគុនខ្មែរតំណាងឱ្យ កម្ពុជា ម្នាក់៕

កីឡាករគុនខ្មែរកាន់ ម៉េងហុង

អត្ថបទ៖ សេម កុសល

The post កាន់ ម៉េងហុង ធ្វើការធ្ងន់នៅបារាំង ដណ្តើមខ្សែក្រវាត់ WKN ប៉ះម្ចាស់ផ្ទះម្ចាស់ខ្សែក្រវាត់៣ស្ថាប័ន appeared first on Kampuchea Thmey Daily.

កាន់ ម៉េងហុង បេក្ខភាពគួរឲ្យចាប់អារម្មណ៍ម៉ារ៉ាតុងដណ្ដើមប្រាក់លាននៅសង្វៀនបាយ័ន

Sina Noun — Fri, 26 Sep 2025 02:13:26 +0000

បេក្ខភាពម៉ារ៉ាតុងដណ្ដើមប្រាក់លានលើសង្វៀនបាយ័ន ស្អែកនេះល្អៗគួរឲ្យចាប់អារម្មណ៍មាន កាន់ ម៉េងហុង គឿម សុវណ្ណឃីម ច្បាស់ណាស់នឹងកក្រើកការប្រកួតមួយនេះហើយ។

កីឡាករ កាន់ ម៉េងហុង

ម៉ារ៉ាតុងដណ្ដើមប្រាក់លានលើប្រភេទទម្ងន់ ៥៤គីឡូក្រាមនេះមានបេក្ខភាពកម្ពុជា ២រូបគឺ កាន់ ម៉េងហុង គឿម សុវណ្ណឃីម ខណៈបរទេសមានមកពី ប្រេស៊ីល និងកីឡាករមកពីប្រទេសឡាវ។

ទម្ងន់ ៥៤គីឡូក្រាមនេះ កាន់ ម៉េងហុង ចាត់ចូលជាកីឡាករជួរមុខមួយរូបនៅកម្ពុជាផងដែរ។ រូបគេជាកីឡាករវាយក្បាច់ និងមានអាវុធអាចប្រើប្រាស់បានទាំងអស់ ទាត់ កែង ជង្គង់ ម៉ាត់ និងធាក់។ ប៉ុន្តែអ្នកប្រដាល់រូបនេះមិនសូវវាយកាច ឬសម្រុកផ្ដួលដៃគូឲ្យសន្លប់នោះឡើយ ពោលវាយតាមដំណើរវាយបែបសប្បាយៗ។

កម្មវិធីប្រកួត

ចំណែកកីឡាករកម្ពុជាមួយរូបទៀតគឺ គឿម សុវណ្ណឃីម វិញក៏មិនធម្មតាដែរកំពុងមានកេរ្តិ៍ឈ្មោះល្បីឈ្នះខ្សែក្រវាត់ជាបន្តបន្ទាប់។ បើទោះជារូបគេនៅក្មេងខ្ចីបន្តិចមែន ប៉ុន្តែផ្លែវាយចេញល្អច្បាស់ និងវាយកាចប្រកបដោយគ្រោះថ្នាក់ទៀតផង។ ម៉ារ៉ាតុងនេះប្រសិនបើកម្ពុជាប៉ះគ្នានៅវគ្គផ្ដាច់ព្រ័ត្រគឺនឹងតានតឹងហើយល្អមើលតែម្ដង ព្រោះទាំង ម៉េងហុង និង សុវណ្ណឃីម សុទ្ធតែអ្នកល្អដូចគ្នា។

គឿម សុវណ្ណឃីម និងគ្រូ

កុំភ្លេចរង់ចាំទស្សនាការប្រកួតម៉ារ៉ាតុងដណ្ដើមប្រាក់លានលើប្រភេទទម្ងន់ ៥៤គីឡូក្រាមនេះនៅថ្ងៃសៅរ៍ ទី២៧ ខែកញ្ញា ឆ្នាំ២០២៥ នៅសង្វៀនបាយ័ន ចាប់ពីម៉ោង ៥កន្លះល្ងាចតទៅក្នុងកម្មវិធី «អ្នកចម្បាំងកម្លាំងកម្ពុជា»៕

អត្ថបទដោយ៖ នួន ស៊ីណា

The post កាន់ ម៉េងហុង បេក្ខភាពគួរឲ្យចាប់អារម្មណ៍ម៉ារ៉ាតុងដណ្ដើមប្រាក់លាននៅសង្វៀនបាយ័ន appeared first on Kampuchea Thmey Daily.

កុំភ្លេច! យប់នេះ កាន់ ម៉េងហុង បានឱកាសសងសឹកជើងខ្លាំង យ៉ាស៊ីន នៅបាយ័ន

Kosal Sem — Thu, 03 Jul 2025 08:45:53 +0000

អ្នកប្រដាល់គុនខ្មែរកាន់ ម៉េងហុង ទទួលបានឱកាសជួបកីឡាករ ប៉ែនកាក់ យ៉ាស៊ីន ជាលើកទី ២ ដោយថ្ងៃ ព្រហស្បតិ៍ ទី ៣ ខែ កក្កដា ឆ្នាំ ២០២៥ យប់នេះអ្នកទាំង ២ នឹងត្រូវជួបគ្នាដណ្តើមខ្សែក្រវាត់ម៉ារ៉ាតុង ហនុមានគុនខ្មែរ ទម្ងន់ ៥៤ គីឡូក្រាម នៅសង្វៀនស្ថានីយទូរទស្សន៍ បាយ័ន។

យ៉ាស៊ីន និងកាន់ ម៉េងហុង

មុនទទួលបានកៅអីឡើងមកកាន់វគ្គផ្តាច់ព្រ័ត្រ ដណ្តើមខ្សែក្រវាត់ ហនុមានគុនខ្មែរ ទម្ងន់ ៥៤ គីឡូក្រាមនេះ យ៉ាស៊ីន បានយកឈ្នះលើកីឡាករ ធន់ បុរី និង មហាឆ្លាត។ ចំណែកកាន់ ម៉េងហុង វិញ បានយកឈ្នះលើកីឡាករ បាន កាណុន និង ម៉ន វណ្ណី។

រម្លឹកថា កាន់ ម៉េងហុង និង យ៉ាស៊ីន ធ្លាប់បានជួបគ្នារួចម្តងហើយ កាលពីថ្ងៃទី ៨ ខែ មីនា ឆ្នាំ ២០២៥។ លទ្ធផលនៅពេលនោះ កាន់ ម៉េងហុង ដែលមកពីក្លិប KKIF បានចាញ់ យ៉ាស៊ីន កូនសិស្សលោកគ្រូសេន ប៊ុនថេន ដោយពិន្ទុ។ បន្ទាប់ពីការប្រកួតនោះបញ្ចប់ ម៉េងហុង ហាក់មិនអស់ចិត្តនឹងលទ្ធផលនេះនោះទេ ដោយគេបានចិញ្ចឹមចិត្តចង់ជួប យ៉ាស៊ីន ម្តងទៀត ដើម្បីសងសឹក។

គួរបញ្ជាក់បន្ថែមថា នៅក្នុងកម្មវិធីនេះ ក្រៅអំពីគូផ្តាច់ព្រ័ត្រខាងលើ គឺមានការប្រកួត ៤ គូទៀត គឺជំនួបដណ្តើមលេខ ៣ រវាង់មហា ឆ្លាត និងម៉ន វណ្ណី។ ការប្រកួតមិត្តភាព រវាងបឺត សង្ឃឹម និងកីឡាករចិន ចាងស្វួយ, អ៊ួច ធារិទ្ធ និងកីឡាករឡាវ ផេតណងប៊ូ, ពេជ្រ កងចក្រ និង ថេន អាត្នោត៕

សមាសភាពគូប្រកួតនីមួយៗនៅ បាយ័ន ល្ងាចនេះ

អត្ថបទ៖ សេម កុសល

The post កុំភ្លេច! យប់នេះ កាន់ ម៉េងហុង បានឱកាសសងសឹកជើងខ្លាំង យ៉ាស៊ីន នៅបាយ័ន appeared first on Kampuchea Thmey Daily.

មើលទៅទំនងប៉ះគ្នា! កាន់ ម៉េងហុង និង យ៉ា ស៊ីន ក្រោយបើកភ្លើងខៀវពីឧកញ៉ា ស្រី ចាន់ថន

Sina Noun — Tue, 04 Mar 2025 06:40:29 +0000

អ្នកលេងគុនខ្មែរ កាន់ ម៉េងហុង បង្ហោះសារលើហ្វេសបុកផេកផ្ទាល់ខ្លួនថា «បើសិនជាការប្រកួតរបស់ខ្ញុំ និង យ៉ា ស៊ីន កើតឡើងមែនគួរតែរៀបចំឲ្យធំទៅ ព្រោះមួយឆ្នាំពេញហើយដែលខ្ញុំមិនបានលេងកម្មវិធីធំ ខ្ញុំនិយាយចេញពីចិត្ត»។ នេះជាការស្នើសុំមួយផ្នែកផង និងជាការកម្រប៉ះគ្នារវាងជើងខ្លាំងទាំងពីរ។

រូបភាពហ្វេសបុក កាន់ ម៉េងហុង

តាមរយៈការបង្ហោះលើបណ្ដាញសង្គមរបស់កីឡាករ កាន់ ម៉េងហុង បែបនេះក៏មានការឆ្លើយតបមកវិញភ្លាមផងដែរពីលោក សេន ប៊ុនថេន គ្រូរបស់កីឡាករ យ៉ា ស៊ីន។ ដោយការឆ្លើយតបនេះដែរគឺក្នុងន័យថា យល់ព្រមចំពោះការប្រកួតមួយនេះ និងចង់ឲ្យមានការរៀបចំជាកម្មវិធីធំ ឬរង្វាន់លើកទឹកចិត្តច្រើន។

រូបភាពហ្វេសបុកលោក សេន ប៊ុនថេន

ទាក់ទិនទៅនឹងរឿងនេះ លោកឧកញ៉ា ស្រី ចាន់ថន ម្ចាស់ក្លឹប KKIF និងជាអ្នកគ្រប់គ្រងលើកីឡាករ កាន់ ម៉េងហុង ផងនោះបានបង្ហោះឆ្លើយតបទៅកាន់កូនសិស្សខ្លួនថា «បងជូនតាមសំណើលោកប្អូន»។ យោងតាមការឆ្លើយឆ្លងខាងលើនេះរវាងកីឡាករ កាន់ ម៉េងហុង និង យ៉ា ស៊ីន អាចនឹងប៉ះគ្នានៅពេលវេលាសមស្របណាមួយនាឱកាសខាងមុខនេះ។

បញ្ជាក់ដែរថា យ៉ា ស៊ីន ដែលជាជនជាតិប៉ាគីស្ថាន និងកំពុងហ្វឹកហាត់ជាមួយលោកគ្រូ សេន ប៊ុនថេន កំពុងសាងភាពល្បីល្បាញជាខ្លាំងនៅក្នុងវិស័យគុនខ្មែរ បន្ទាប់ពីឈ្នះកីឡាករកម្ពុជា និងបង្ហាញទម្រង់វាយយ៉ាងល្អរួចមក។ ៣ប្រកួតរបស់ យ៉ា ស៊ីន នៅកម្ពុជា ឈ្នះ ប៊ុន សុធា, ចាញ់ពិន្ទុ ហ៊ឹម គឹមរៀង និងចាញ់ពិន្ទុ សែន រ៉ាដេត៕

អត្ថបទ៖ នួន ស៊ីណា

The post មើលទៅទំនងប៉ះគ្នា! កាន់ ម៉េងហុង និង យ៉ា ស៊ីន ក្រោយបើកភ្លើងខៀវពីឧកញ៉ា ស្រី ចាន់ថន appeared first on Kampuchea Thmey Daily.

ពេជ្រ សម្បត្តិ ប៉ះ កាន់ ម៉េងហុង ដណ្តើមមេដាយមាស កីឡាជាតិថ្ងៃនេះ

chean virakbot — Wed, 06 Nov 2024 01:29:45 +0000

ជំនួបដណ្តើមមេដាយមាស កីឡាជាតិ រវាងជើងខ្លាំង ពេជ្រ សម្បត្តិ និង កាន់ ម៉េងហុង សម្រាប់គុនខ្មែរទម្ងន់៦០គីឡូក្រាមបានក្លាយជាគូដែលអ្នកគាំទ្រចាប់អារម្មណ៍បំផុតនៅថ្ងៃទី៦ ខែតុលា ឆ្នាំ២០២៤ នៅស្តាតចាស់។

មុនពេលជើងខ្លាំងទាំងពីរឡើងជួបគ្នាវគ្គផ្តាច់ព្រ័ត្រ អ្នកទាំងពីរធ្វើបានល្អដូចគ្នាក្នុងជម្រុះ។ ពេជ្រ សម្បត្តិ បានយកឈ្នះពិន្ទុ គង់ ហូវ ដើម្បីឡើងទៅកាន់វគ្គពាក់កណ្តាលផ្តាច់ព្រ័ត្រ ខណៈ កាន់ ម៉េងហុង បានយកឈ្នះកីឡាករ យាន ចាវ ក្នុងទឹកទី២ដើម្បីឡើងទៅកាន់វគ្គពាក់កណ្តាលផ្តាច់ព្រ័ត្រដែរ។

នៅវគ្គពាក់កណ្តាលផ្តាច់ព្រ័ត្រ កីឡាករទាំងពីរមិនបានចំណាយកម្លាំងឡើយដោយបានឡើងទៅកាន់វគ្គផ្តាច់ព្រ័ត្រដោយស្វ័យប្រវត្តិ បន្ទាប់ពីដៃគូបានបោះបង់ចោលការប្រកួតរៀងៗខ្លួន។ ក្នុងនោះកីឡាករ សិទ្ធ រ៉ាថេន ដៃគូរបស់ ពេជ្រ សម្បត្តិ បានបោះបង់ចោលការប្រកួត ហើយកីឡាករ ភក្តី ដាលីន ដៃគូរបស់ កាន់ ម៉េងហុង បានបោះបង់ចោលការប្រកួតដែរ។

ជំនួបវគ្គផ្តាច់ព្រ័ត្រដណ្តើមមេដាយមាសត្រូវបានអ្នកគាំទ្រចាប់អារម្មណ៍ខ្លាំងបំផុត។ ពេជ្រ សម្បត្តិ ជាកីឡាករប្រើកម្លាំងស៊ុហ្វខ្លាំងក្នុងការប្រកួត ហើយកណ្តាប់ដៃគឺជាអាវុធពិឃាតរបស់ខ្លួន។ ចំណែក កាន់ ម៉េងហុង ជាកីឡាករប្រើក្បាច់ និងបច្ចេកទេស ហើយអាវុធប្រើបានទាំងព្រមគឺកណ្តាប់ដៃ ទាត់ និងជង្គង់។ នេះក៏ជាឱកាសសម្រាប់ កាន់ ម៉េងហុង សាងកេរ្តិ៍ឈ្មោះបន្ថែមទៀត នៅពេលជួបជើងខ្លាំងដែលអ្នកគាំទ្រប្រាថ្នាចង់ជួប។

ទោះបីជាយ៉ាងណា អ្នកគាំទ្រទំនងជាជឿជាក់លើ ពេជ្រ សម្បត្តិ ច្រើនជាង ពីព្រោះរូបគេជាកីឡាករលំដាប់កំពូលសម្រាប់ទម្ងន់៦០គីឡូក្រាម និងជាកីឡាករមិនងាយបាក់ស្រុតឡើយ។

ចាំមើលថាតើ អ្នកលេងកម្លាំងបាយ ប៉ះអ្នកលេងក្បាច់ នរណាជាម្ចាស់មេដាយមាស ក្នុងព្រឹត្តិការណ៍កីឡាជាតិ លើកទី៤ ឆ្នាំ២០២៤នេះ។

នៅថ្ងៃចុងក្រោយនេះ ក៏មានកីឡាករ កីឡាការិនីគុនខ្មែរល្បីៗជាច្រើនប្រកួតវគ្គផ្តាច់ព្រ័ត្រ។ សូមកុំភ្លេចចូលរួមទស្សនាឲ្យបានច្រើនកុះករនៅស្តាតចាស់ចាប់ពីវេលាម៉ោង២រសៀលតទៅ៕

អត្ថបទ៖ វីរបុត្រ

The post ពេជ្រ សម្បត្តិ ប៉ះ កាន់ ម៉េងហុង ដណ្តើមមេដាយមាស កីឡាជាតិថ្ងៃនេះ appeared first on Kampuchea Thmey Daily.

សមត្ថភាពមិនធម្មតា Akihiro ដៃគូរបស់ កាន់ ម៉េងហុង ជាម្ចាស់ខ្សែក្រវាត់៣ខ្សែ

chean virakbot — Thu, 04 Jul 2024 02:36:44 +0000

កាន់ ម៉េងហុង បានចេញដំណើរទៅប្រទេសជប៉ុននៅព្រឹកថ្ងៃព្រហស្បតិ៍ ទី៤ ខែកក្កដា ដើម្បីប្រកួតដណ្តើមខ្សែក្រវាត់ឃីកបុកស៊ីងពិភពលោកទម្ងន់៥៥គីឡូក្រាម K-1 Super Bantamweight វគ្គ៨នាក់ដំបូង នៅថ្ងៃអាទិត្យ ទី៧ ខែកក្កដា ឆ្នាំ២០២៤ នៅទីក្រុងតូក្យូ ប្រទេសជប៉ុន។

នេះជាឱកាសទី១របស់កីឡាករប្រដាល់គុនខ្មែរដែលចូលរួមប្រកួតក្នុងស្ថាប័នប្រដាល់ឃីកបុកស៊ីងពិភពលោក K-1 ដែលអ្នកគាំទ្រធ្លាប់តែឃើញកីឡាករប្រទេសផ្សេងៗប្រកួត ប៉ុន្តែពេលនេះមានវត្តមានកីឡាករគុនខ្មែរហើយ។

កាន់ ម៉េងហុង ស្ថិតក្នុងចំណោមបេក្ខភាព៨រូបដែលត្រូវប្រជែងខ្សែក្រវាត់ K-1 ទម្ងន់៥៥គីឡូក្រាមដែលមានកីឡាករម្ចាស់ផ្ទះជប៉ុន៤រូបគឺ Akihiro Kaneko, Masahi Kumura, Riamu, Rui Okubo និងកីឡាករបរទេស៤រូបគឺកីឡាករអេស្ប៉ាញ Antonio Orden, កីឡាករក្រិក Angelos Martinos, កីឡាករចិន Zhao Zhendong និងកីឡាករកម្ពុជា កាន់ ម៉េងហុង។

ការផ្គូផ្គងដៃគូធ្វើរួចរាល់ហើយដោយ កាន់ ម៉េងហុង ជួបកីឡាករជប៉ុន Akihiro Kaneko, កីឡាករក្រិក Angelos Martinos ជួប Riamu, កីឡាករអេស្ប៉ាញ Antonio Orden ជួប Maasashi Kumura និងកីឡាករចិន Zhao Zhendong ជួប Rui Okubo។

និយាយពីដៃគូរបស់កីឡាករកម្ពុជាគឺកីឡាករជប៉ុន Akihiro Kaneko ជាជើងខ្លាំងជំនាញឃីកបុកស៊ីងដែលស្ថិតនៅលំដាប់ជួរមុខក្នុងទម្ងន់ស្រាលនៅប្រទេសជប៉ុន។ រូបគេអាយុ២៧ឆ្នាំបានចាប់ផ្តើមប្រឡូកប្រដាល់ឃីកបុកស៊ីងកាលពីឆ្នាំ២០១៤។ រហូតដល់ពេលនេះ រូបគេមានបទពិសោធឡើងសង្វៀនចំនួន៣៨ដង ក្នុងនោះឈ្នះ៣៥ដង និងចាញ់តែ៣ដង។

Akihiro Kaneko កំពុងគ្រប់គ្រងខ្សែក្រវាត់ឃីកបុកស៊ីងចំនួន៣ខ្សែគឺខ្សែក្រវាត់ Krush Bantamweight ឆ្នាំ២០១៨, ខ្សែក្រវាត់ K-1 Super Bantamweight ឆ្នាំ២០២២ និងខ្សែក្រវាត់ K-1 World GP Super Bantamweight ឆ្នាំ២០២២។ រូបគេក៏បានឈ្នះជើងឯកចំនួន៤ទៀតក្នុងពេលប្រកួតលក្ខណៈស្ម័គ្រចិត្ត។

ជាមួយគ្នានេះ Akihiro ធ្លាប់ទទួលបានពានរង្វាន់ K-1 Awards Rookie of the Year ប្រចាំឆ្នាំ២០១៨, ពានរង្វាន់ K-1 Awards Fight of the Year ប្រចាំឆ្នាំ២០២១, ពានរង្វាន់កីឡាករឆ្នើម K-1 Awards Fighter of the Year ប្រចាំឆ្នាំ២០២៣ និងពានរង្វាន់ Beyong Kickboxing Fight of the Year ប្រចាំឆ្នាំ២០២៣។

ចំពោះកីឡាករជប៉ុន៣នាក់ផ្សេងទៀតមិនសូវជាល្អប៉ុន្មានទេ បើប្រៀបធៀបនឹងដៃគូរបស់ កាន់ ម៉េងហុង។ កីឡាករ Masahi Kumura ធ្លាប់ប្រកួត២៩ដង ឈ្នះ២៣ដង និងចាញ់១១ដង និងមានខ្សែក្រវាត់ Krush Super Bantamweight ឆ្នាំ២០១៩។

កីឡាករ Riamu ទើបប្រកួត១៦ដង ក្នុងនោះឈ្នះ១៣ដង ចាញ់៣ដង។ រូបគេជាម្ចាស់ខ្សែក្រវាត់ Krush Super Bantamweight ឆ្នាំ២០២១។ កីឡាករ Rui Okubo ទើបទើបប្រកួតបាន៧ដងគឺឈ្នះ៦ និងចាញ់១។ រូបគេបានឈ្នះខ្សែក្រវាត់ Krush Flyweight ទម្ងន់៥១គីឡូក្រាមកាលពីឆ្នាំ២០២២។

និយាយពីកីឡាករគុនខ្មែរ កាន់ ម៉េងហុង ក៏មានបទពិសោធច្រើនសម្រាប់ការប្រកួតអន្តរជាតិ ប៉ុន្តែរូបគេភាគច្រើនប្រកួតគុនខ្មែរ។ រូបគេជាម្ចាស់មេដាយប្រាក់កីឡាស៊ីហ្គេម ឆ្នាំ២០២២ នៅប្រទេសវៀតណាម ផ្នែកកីឡាឃីកបុកស៊ីង ប៉ុន្តែស៊ីហ្គេម ឆ្នាំ២០២៣ នៅកម្ពុជារូបគេប្រកួតគុនខ្មែរវិញដោយបានឈ្នះមេដាយមាសវិញ្ញាសាសម្តែង។

តាមរូបមន្តនៃការប្រកួត កីឡាករដែលទទួលបានជ័យជម្នះ៤នាក់នឹងឡើងទៅកាន់វគ្គពាក់កណ្តាលផ្តាច់ព្រ័ត្រ ដែលនឹងរៀបចំការប្រកួតនៅថ្ងៃក្រោយ ខណៈអ្នកចាញ់អស់ឱកាសឡើងវគ្គបន្ត។ ប្រសិនបើ កាន់ ម៉េងហុង ទទួលបានជ័យជម្នះក្នុងជុំដំបូងនេះ រូបគេនឹងមានឱកាសទៅប្រកួតវគ្គបន្តទៀត៕

អត្ថបទ៖ វីរបុត្រ

The post សមត្ថភាពមិនធម្មតា Akihiro ដៃគូរបស់ កាន់ ម៉េងហុង ជាម្ចាស់ខ្សែក្រវាត់៣ខ្សែ appeared first on Kampuchea Thmey Daily.

គុនខ្មែរលំដាប់ជួរមុខ៣រូបទៀតទៅអង្រួនសង្វៀនជប៉ុន

chean virakbot — Tue, 04 Jun 2024 01:48:16 +0000

នាពេលខាងមុខនេះ កីឡាករគុនខ្មែរលំដាប់ជួរមុខ៣រូបទទួលបានឱកាសទៅប្រកួតនៅសង្វៀនធំរបស់ជប៉ុន។ ម្ចាស់មេដាយមាសស៊ីហ្គេម កាន់ ម៉េងហុង ទៅប្រកួតដណ្តើមខ្សែក្រវាត់ K-1 ទម្ងន់៥៥គីឡូក្រាម។ ម្ចាស់មេដាយមាសស៊ីហ្គេមទើបតែឈ្នះខ្សែក្រវាត់នៅប្រទេសបារាំងថ្មីៗ ឈុត សេរីវ៉ាន់ថង និង អេ អាំម៉ារីនភូថង ទៅប្រកួតនៅសង្វៀន Knock Out នៅថ្ងៃទី៤ ខែសីហា ឆ្នាំ២០២៤។

កីឡាករ កាន់ ម៉េងហុង ត្រូវប្រកួតជាមួយកីឡាករជប៉ុន Akihiro Kaneko ជុំដំបូង នៅថ្ងៃទី៧ ខែកក្កដា ឆ្នាំ២០២៤ ដែលមានបេក្ខភាព៨រូប។ កីឡាករជប៉ុនមានអាយុ២៧ឆ្នាំ និងបានចាប់ផ្តើមប្រឡូកប្រដាល់ឃីកបុកស៊ីងតាំងពីឆ្នាំ២០១៤។ រូបគេធ្លាប់ប្រកួតបាន២៣ដង ក្នុងនោះឈ្នះ២១ដង និងចាញ់២ដង ហើយធ្លាប់ផ្តួលដៃគូឲ្យសន្លប់១១ដង។

កីឡាករជប៉ុនរូបនេះមានខ្សែក្រវាត់ឃីកបុកស៊ីង៣ខ្សែគឺខ្សែក្រវាត់ Krush Bantamweight ឆ្នាំ២០១៨, ខ្សែក្រវាត់ K-1 Super Bantamweight ឆ្នាំ២០២២ និងខ្សែក្រវាត់ K-1 World GP Super Bantamweight ឆ្នាំ២០២២។

ចំណែក ឈុត សេរីវ៉ាន់ថង ប៉ះដៃគូដ៏ល្អម្នាក់គឺកីឡាករជប៉ុន Hisai Taimu ដែលធ្លាប់ប្រកួតឈ្នះកីឡាករកម្ពុជា ឯម សុធី និងចាញ់ពិន្ទុកីឡាករ ពេជ្រ សម្បត្តិ។ ដូច្នេះរូបគេត្រូវជួបកីឡាករកម្ពុជាទី៣នៅទឹកដីកំណើតរបស់ខ្លួនវិញម្តងដែលត្រូវបានដាក់ឈ្មោះកម្មវិធីថា Knock Out Kun Khmer។

ក្នុងកម្មវិធីជាមួយ ឈុត សេរីវ៉ាន់ថង នេះដែរ កីឡាករកម្ពស់ខ្ពស់វ័យក្មេង អេ អាំម៉ារីនភូថ ត្រូវប្រកួតជាមួយកីឡាករថៃ Dansiam Weerasakreck ដែលមានបទពិសោធច្រើននៅសង្វៀនឃីកបុកស៊ីងរបស់ជប៉ុន និងមានកម្ពស់១.៧៥ម៉ែត្រដែលទាបជាងកូនប្រុសរបស់លោក អេ ភូថង។

កីឡាករ កីឡាការិនីប្រដាល់គុនខ្មែរកាន់តែមានទីផ្សារបើកធំទូលាយនៅប្រទេសជប៉ុន បន្ទាប់ពីមួយរយៈពេលចុងក្រោយនេះថ្នាក់ដឹកនាំសហព័ន្ធ ក្លិប និងសង្វៀនឯកជនបានសហការជាមួយជប៉ុននាំយកកីឡាករជប៉ុនមកប្រកួត ហើយក៏ទទួលបានឱកាសទៅប្រកួតនៅជប៉ុន។

កាលពីឆ្នាំ២០២២ ជើងខ្លាំងគុនខ្មែរ ធឿន ធារ៉ា បានទៅប្រកួតនៅប្រទេសជប៉ុនចាញ់កីឡាករអាហ្សង់ទីន Ricardo Bravo។ កាលពីថ្ងៃទី២៧ ខែមេសា ឆ្នាំ២០២៤ ភក្តី គុនខ្មែរ បានផ្តួលកីឡាករជប៉ុន Shibata Shingo ក្នុងទឹកទី៣ នៅសង្វៀនធំសង្វៀន Knock Out។ នៅថ្ងៃទី២ ខែមិថុនា នេះ ឡៅ សៃណេត បានផ្តួលកីឡាករជប៉ុនក្នុងទឹកទី១ដើម្បីក្លាយជាកីឡាករខ្មែរទី១ឈ្នះខ្សែក្រវាត់នៅប្រទេសជប៉ុន ហើយក៏មានកីឡាករ អ៊ូច ធារិទ្ធ និងកីឡាការិនី ធន់ ស្រីពេញ ទៅប្រកួតនៅជប៉ុនកាលពីចុងសប្តាហ៍មុនដែរ៕

អត្ថបទ៖ វីរបុត្រ

The post គុនខ្មែរលំដាប់ជួរមុខ៣រូបទៀតទៅអង្រួនសង្វៀនជប៉ុន appeared first on Kampuchea Thmey Daily.

នេះបេក្ខភាពទាំង៨រូបខ្សែក្រវាត់ K-1 កាន់ ម៉េងហុង ជាកីឡាករខ្មែរទី១ចូលរួម

chean virakbot — Thu, 30 May 2024 02:43:16 +0000

កាន់ ម៉េងហុង បានក្លាយជាកីឡាករគុនខ្មែរទី១ទទួលបានឱកាសចូលរួមប្រកួតដណ្តើមខ្សែក្រវាត់ឃីកបុកស៊ីងពិភពលោកទម្ងន់៥៥គីឡូក្រាម K-1 Super Bantamweight នៅថ្ងៃទី៧ ខែកក្កដា ឆ្នាំ២០២៤ នៅទីក្រុងតូក្យូ ប្រទេសជប៉ុន។

វានឹងក្លាយជាឱកាសដ៏ល្អកម្រមានសម្រាប់អ្នកលេងគុនខ្មែរដើម្បីសាងកេរ្តិ៍ឈ្មោះនៅស្ថាប័នប្រដាល់ឃីកបុកស៊ីងពិភពលោក K-1 ដែលអ្នកគាំទ្រធ្លាប់តែឃើញកីឡាករប្រទេសផ្សេងៗប្រកួត ប៉ុន្តែពេលនេះមានវត្តមានកីឡាករគុនខ្មែរហើយ។

ខ្សែក្រវាត់ K-1 Super Bantamweight ទម្ងន់៥៥គីឡូក្រាម ឆ្នាំ២០២៤ ពេលនេះបេក្ខភាពទាំង៨រូបត្រូវបានបង្ហាញផ្លូវការហើយដោយមានកីឡាករម្ចាស់ផ្ទះជប៉ុន៤រូប និងកីឡាករបរទេស៤រូបគឺ Akihiro Kaneko, Masahi Kumura, Riamu, Rui Okubo, កីឡាករអេស្ប៉ាញ Antonio Orden, កីឡាករអ៉ីតាលី Luca Cechetti, កីឡាករចិន Zhao Zhendong និងកីឡាករកម្ពុជា កាន់ ម៉េងហុង។

និយាយពីដៃគូរបស់កីឡាករកម្ពុជាគឺកីឡាករជប៉ុន Akihiro Kaneko អាយុ២៧ឆ្នាំបានចាប់ផ្តើមប្រឡូកប្រដាល់ឃីកបុកស៊ីងតាំងពីឆ្នាំ២០១៤ ដែលរហូតដល់ពេលនេះធ្លាប់ប្រកួតបាន២៣ដង ក្នុងនោះឈ្នះ២១ដង និងចាញ់២ដង ហើយធ្លាប់ផ្តួលដៃគូឲ្យសន្លប់១១ដង។ រូបគេធ្លាប់ឈ្នះខ្សែក្រវាត់ឃីកបុកស៊ីង៣ខ្សែគឺខ្សែក្រវាត់ Krush Bantamweight ឆ្នាំ២០១៨, ខ្សែក្រវាត់ K-1 Super Bantamweight ឆ្នាំ២០២២ និងខ្សែក្រវាត់ K-1 World GP Super Bantamweight ឆ្នាំ២០២២។

កីឡាករជប៉ុន Masahi Kumura អាយុ២៥ឆ្នាំបានចាប់ផ្តើមអាជីពតាំងពីឆ្នាំ២០១៤ដោយធ្លាប់ប្រកួត២៩ដង ឈ្នះ២៣ដង និងចាញ់១១ដង ក្នុងនោះធ្លាប់ផ្តួលដៃគូឲ្យសន្លប់១១ដង។ រូបគេធ្លាប់បានចំណាត់ថ្នាក់លេខ២ពីរដងសម្រាប់ការប្រកួតខ្សែក្រវាត់ពិភពលោក K-1 World GP គឺឆ្នាំ២០១៩ និង២០២២ និងជាម្ចាស់ខ្សែក្រវាត់ Krush Super Bantamweight ឆ្នាំ២០១៩។

កីឡាករជប៉ុន Riamu អាយុ២៣ឆ្នាំទើបចាប់ផ្តើមអាជីពកាលពីឆ្នាំ២០១៨ដោយឆ្លងកាត់លើសង្វៀន១៦ដង ក្នុងនោះឈ្នះ១៣ដង ចាញ់៣ដង និងធ្លាប់ផ្តួលដៃគូឲ្យសន្លប់៥ដង។ រូបគេជាម្ចាស់ខ្សែក្រវាត់ Krush Super Bantamweight ឆ្នាំ២០២១ ហើយការជួបដៃគូជនជាតិអ៉ីតាលី Luca Cechetti គឺជាលើកទី១ដែលរូបគេប្រកួតជាមួយកីឡាករបរទេស។

កីឡាករជប៉ុន Rui Okubo ទើបអាយុ១៩ឆ្នាំ និងទើបប្រកួតបាន៧ដងប៉ុណ្ណោះគឺឈ្នះ៦ និងចាញ់១។ យ៉ាងណា រូបគេបានឈ្នះខ្សែក្រវាត់ Krush Flyweight ទម្ងន់៥១គីឡូក្រាមកាលពីឆ្នាំ២០២២។

កីឡាករគួរឲ្យកត់ចំគាល់ម្នាក់ទៀតនោះគឺកីឡាករអ៉ីតាលី Luca Cechetti អាយុ៣៣ឆ្នាំ មានបទពិសោធឡើងសង្វៀន ៥០ដង ក្នុងនោះឈ្នះ៤៤ដង និងចាញ់តែ៦ដងប៉ុណ្ណោះ។ រូបគេមានបទពិសោធច្រើន និងជាម្ចាស់ខ្សែក្រវាត់ឃីកបុកស៊ីងអាជីព៣ខ្សែគឺជើងឯកអ៉ីតាលីឆ្នាំ២០១៥, ជើងឯកពិភពលោក WAKO Pro K-1 ឆ្នាំ២០១៧ និងខ្សែក្រវាត់ WAKO Pro K-1 ឆ្នាំ២០២២។ កីឡាករបរទេសពីររូបផ្សេងទៀតក៏សុទ្ធតែមានបទពិសោធច្រើនដូចគ្នា។

និយាយរួមខ្សែក្រវាត់ឃីកបុកស៊ីងពិភពលោកនេះពិតជាមានតម្លៃណាស់ និងទាល់តែអ្នកមានសមត្ថភាពពិតប្រាកដទើបយក៕

ការប្រកួតជុំទី១

កីឡាករកម្ពុជា កាន់ ម៉េងហុង vs Akihiro Kaneko
កីឡាករអេស្ប៉ាញ Antonio Orden vs Masahi Kumur
កីឡាករអ៉ីតាលី Luca Cechetti vs Riamu
កីឡាករចិន Zhao Zhendong vs Rui Okubo

អ្នកទទួលបានជ័យជម្នះនៅជុំទី១នឹងឡើងទៅវគ្គពាក់កណ្តាលផ្តាច់ព្រ័ត្រ៕

អត្ថបទ៖ វីរបុត្រ

The post នេះបេក្ខភាពទាំង៨រូបខ្សែក្រវាត់ K-1 កាន់ ម៉េងហុង ជាកីឡាករខ្មែរទី១ចូលរួម appeared first on Kampuchea Thmey Daily.

កាន់ ម៉េងហុង Archives - Kampuchea Thmey Daily

កាន់ ម៉េងហុង ធ្វើ​ការ​ធ្ងន់​នៅ​បារាំង ដណ្តើមខ្សែក្រ​វាត់ WKN ប៉ះម្ចាស់ផ្ទះម្ចាស់ខ្សែក្រ​វាត់​៣ស្ថាប័ន

កាន់​ ម៉េងហុង​ បេក្ខភាព​គួរ​ឲ្យ​ចាប់​អារម្មណ៍​ម៉ារ៉ាតុង​ដណ្ដើម​ប្រាក់​លាន​នៅ​សង្វៀន​បាយ័ន

កុំភ្លេច! យប់នេះ កាន់ ម៉េងហុង បានឱកាសសងសឹកជើង​ខ្លាំង យ៉ាស៊ីន នៅបាយ័ន

មើល​ទៅ​ទំនង​ប៉ះ​គ្នា​!​ កាន់ ម៉េងហុង​ និង យ៉ា ស៊ីន​ ក្រោយ​​បើក​ភ្លើង​ខៀវ​ពី​ឧកញ៉ា ស្រី ចាន់ថន​

ពេជ្រ សម្បត្តិ ប៉ះ កាន់ ម៉េងហុង ដណ្តើម​មេដាយ​មាស កីឡា​ជាតិ​ថ្ងៃនេះ

សមត្ថភាពមិនធម្មតា Akihiro ដៃគូរបស់ កាន់ ម៉េងហុង ជាម្ចាស់ខ្សែក្រវាត់៣ខ្សែ

គុន​ខ្មែរលំដាប់ជួរមុខ៣រូបទៀតទៅអង្រួនសង្វៀន​ជប៉ុន

នេះបេក្ខភាពទាំង៨រូបខ្សែក្រវាត់ K-1 កាន់ ម៉េងហុង ជាកីឡាករខ្មែរទី១ចូលរួម

កាន់ ម៉េងហុង ធ្វើការធ្ងន់នៅបារាំង ដណ្តើមខ្សែក្រវាត់ WKN ប៉ះម្ចាស់ផ្ទះម្ចាស់ខ្សែក្រវាត់៣ស្ថាប័ន

កាន់ ម៉េងហុង បេក្ខភាពគួរឲ្យចាប់អារម្មណ៍ម៉ារ៉ាតុងដណ្ដើមប្រាក់លាននៅសង្វៀនបាយ័ន

កុំភ្លេច! យប់នេះ កាន់ ម៉េងហុង បានឱកាសសងសឹកជើងខ្លាំង យ៉ាស៊ីន នៅបាយ័ន

មើលទៅទំនងប៉ះគ្នា! កាន់ ម៉េងហុង និង យ៉ា ស៊ីន ក្រោយបើកភ្លើងខៀវពីឧកញ៉ា ស្រី ចាន់ថន

ពេជ្រ សម្បត្តិ ប៉ះ កាន់ ម៉េងហុង ដណ្តើមមេដាយមាស កីឡាជាតិថ្ងៃនេះ

គុនខ្មែរលំដាប់ជួរមុខ៣រូបទៀតទៅអង្រួនសង្វៀនជប៉ុន