កាប់គ្នា Archives - Kampuchea Thmey Daily

ជម្លោះគ្រួសារ ប្រពន្ធយកកាំបិតកាប់ប្ដីស្លាប់ក្នុងថ្លុកឈាម

អ៊ិន ពិសី — Sat, 01 Nov 2025 04:59:59 +0000

ស្ត្រីម្នាក់ ត្រូវបានកម្លាំងសមត្ថកិច្ចឃាត់ខ្លួន និងចាត់ការតាមផ្លូវច្បាប់ ក្រោយប្រើហិង្សាយកកាំបិតកាប់ទៅលើប្ដីខ្លួនឯងហូរឈាមរហូតស្លាប់។

ហេតុការណ៍នេះបានកើតឡើងកាលពីវេលាម៉ោង ៧ យប់ ថ្ងៃទី ៣១ ខែតុលា ឆ្នាំ ២០២៥ ស្ថិតនៅចំណុចបន្ទប់ជួលលេខ ៦ ផ្លូវលំ ភូមិត្រពាំងក្រសាំង សង្កាត់ត្រពាំងក្រសាំង ខណ្ឌពោធិ៍សែនជ័យ រាជធានីភ្នំពេញ។

ជនសង្ស័យឈ្មោះ ភឿន សាវន ភេទស្រី អាយុ ៣៩ ឆ្នាំ ជាជនជាតិខ្មែរ មុខរបរនៅផ្ទះ បច្ចុប្បន្នស្នាក់នៅកន្លែងកើតហេតុខាងលើ។ ចំណែកជនរងគ្រោះឈ្មោះ ជិន ជឿន ភេទប្រុស អាយុ ៤៤ ឆ្នាំ ជាជនជាតិខ្មែរ មុខរបរលក់ដូរ បច្ចុប្បន្នស្នាក់នៅកន្លែងកើតហេតុខាងលើ។

តាមប្រភពព័ត៌មានពីឈ្មោះ ជិន ប៊ុនចេង ភេទប្រុស អាយុ ៤១ ឆ្នាំ ត្រូវជាប្អូនប្រុសបង្កើតរបស់សព បានឲ្យដឹងថា មុនពេលកើតហេតុ ជនសង្ស័យ និងប្ដី បានឈ្លោះប្រកែកគ្នាក្នុងបន្ទប់ជួល រហូតឈានទៅដល់ប្រើហិង្សា។ ពេលនោះ ប្រពន្ធ បានយកកាំបិតបុ័ងតោកាប់ប្ដី បណ្ដាលឲ្យរបួសជើងខាងស្ដាំហូរឈាម ហើយជនសង្ស័យក៏រត់គេចខ្លួនបាត់។ បន្ទាប់មក កម្លាំងប៉ុស្តិ៍ បានចុះទៅដល់កន្លែងកើតហេតុធ្វើការស្រាវជ្រាវ និងសហការជាមួយអធិការដ្ឋាននគរបាលស្រុកកោះធំ ខេត្តកណ្ដាល។ បន្ទាប់មកទៀត សមត្ថកិច្ច ក៏បានឃាត់ខ្លួនជនសង្ស័យស្ថិតនៅភូមិថ្មី ឃុំលើកដែក ស្រុកកោះធំ ខេត្តកណ្ដាល និងនាំខ្លួនមកសាកសួរនៅប៉ុស្តិ៍នគរបាលរដ្ឋបាលត្រពាំងក្រសាំង។

ក្រោយពេលសមត្ថកិច្ចសាកសួរ ជនសង្ស័យ បានសារភាពថា ខ្លួនពិតជាបានយកកាំបិតបុ័ងតោ ដងជ័រ ពណ៌ខ្មៅ កាប់ទៅលើជនរងគ្រោះជាប្ដីត្រូវស្មងជើងខាងស្ដាំបណ្ដាលឲ្យរបួសហូរឈាមរហូតដល់ស្លាប់ពិតប្រាកដមែន។

បច្ចុប្បន្ន ជនសង្ស័យ ត្រូវបាននគរបាលកសាងសំណុំរឿងបញ្ជូនទៅផ្នែកនគរបាលយុត្តិធម៌ខណ្ឌពោធិ៍សែនជ័យ ដើម្បីបន្តនីតិវិធី៕

អត្ថបទ ៖ សុខា

The post ជម្លោះគ្រួសារ ប្រពន្ធយកកាំបិតកាប់ប្ដីស្លាប់ក្នុងថ្លុកឈាម appeared first on Kampuchea Thmey Daily.

ជនជាតិឥណ្ឌូនេស៊ី ២ នាក់ ផ្ទុះជម្លោះ ឈានដល់ការកាប់ចាក់គ្នា របួសធ្ងន់ ១ នាក់ និង ស្លាប់ ១ នាក់ នៅបឹងកេងកងទី ១

អ៊ិន ពិសី — Tue, 30 Sep 2025 10:30:34 +0000

ជនជាតិឥណ្ឌូនេស៊ី ចំនួន ២ នាក់ បានឈ្លោះប្រកែកគ្នា រហូតឈានដល់ការកាប់ និង ចាក់គ្នា បណ្តាលឲ្យរបួសធ្ងន់ ១ នាក់ និង ស្លាប់ ១ នាក់ ក្នុងបន្ទប់ នៅបឹងកេងកងទី ១។

ហេតុការណ៍នេះបង្កការភ្ញាក់ផ្អើលកាលពីវេលាម៉ោង ៣ រសៀល ថ្ងៃទី ៣០ ខែកញ្ញា ឆ្នាំ ២០២៥ នៅតាមបណ្ដោយផ្លូវលេខ ២៨២ សង្កាត់បឹងកេងកងទី ១ ខណ្ឌបឹងកេងកង រាជធានីភ្នំពេញ។

ជនជាតិឥណ្ឌូនេស៊ី ទាំង ២ នាក់ មិនទាន់ស្គាល់ឈ្មោះនៅឡើយទេ ដោយម្នាក់ មានអាយុជាង ២០ ឆ្នាំ និង ម្នាក់ទៀត វ័យប្រហែល ៣០ ឆ្នាំ។

តាមប្រភពព័ត៌មានពីអ្នកឃើញហេតុការណ៍បានឲ្យដឹងថា មុនកើតហេតុ ប្រជាពលរដ្ឋបានឮសំឡេងឈ្លោះប្រកែកគ្នាចេញពីបន្ទប់ជួលជាន់ទី ២ យ៉ាងខ្លាំង។ ភ្លាមៗ ប្រជាពលរដ្ឋបានរត់ចេញទៅមើល ក៏ប្រទះឃើញជនជាតិបរទេសទាំង ២ នាក់ ឈរប្រតាយប្រតប់គ្នារហូតបង្កឲ្យបុរសម្នាក់ធ្លាក់ចុះពីជាន់ទី ២ មកលើដំបូលស័ង្កសី។ ស្របពេលនោះ បុរសដែលធ្លាក់មកលើដំបូលស័ង្កសី ក៏បានរត់ចុះមកក្រោម ហើយឡើងតាមកាំជណ្ដើរទៅលើបន្ទប់ជួលវិញ។ លុះមួយសន្ទុះក្រោយមក ក៏មានពលរដ្ឋរត់ឡើងទៅហៅបុរសជនជាតិឥណ្ឌូនេស៊ីដែលទើបតែធ្លាក់ ចុះមកក្រោមវិញ ដើម្បីរាយការណ៍ជូនសមត្ថកិច្ចផងដែរ។

ដោយឡែកតាមប្រភពពីម្ចាស់ផ្ទះជួល បានឲ្យដឹងថា ជនជាតិបរទេសទាំង ២ នាក់ខាងលើ គឺជាជនជាតិឥណ្ឌូនេស៊ីដែលជួលស្នាក់នៅដើម្បីធ្វើការ។

បច្ចុប្បន្ន សមត្ថកិច្ចជំនាញ កំពុងធ្វើការស្រាវជ្រាវ និងត្រួតពិនិត្យសាកសពនៅក្នុងបន្ទប់កើតហេតុខាងលើ៕

អត្ថបទ ៖ រដ្ឋា

The post ជនជាតិឥណ្ឌូនេស៊ី ២ នាក់ ផ្ទុះជម្លោះ ឈានដល់ការកាប់ចាក់គ្នា របួសធ្ងន់ ១ នាក់ និង ស្លាប់ ១ នាក់ នៅបឹងកេងកងទី ១ appeared first on Kampuchea Thmey Daily.

អាវុធហត្ថខណ្ឌមានជ័យ ឃាត់ខ្លួនជនសង្ស័យ ១ នាក់ កាប់ជនរងគ្រោះរបួសដៃ

អ៊ិន ពិសី — Mon, 15 Sep 2025 03:58:04 +0000

ជនសង្ស័យម្នាក់ ត្រូវបានកងរាជអាវុធហត្ថខណ្ឌមានជ័យ ចាប់ភ្លាមៗ ក្រោយធ្វើសកម្មភាពកាប់ជនរងគ្រោះបណ្ដាលឲ្យរងរបួសដៃ។

ហេតុការណ៍នេះបង្កការភ្ញាក់ផ្អើលកាលពីវេលាម៉ោង ៨ ព្រឹក ថ្ងៃទី ១៥ ខែកញ្ញា ឆ្នាំ ២០២៥ នៅចំណុចបណ្ដោយផ្លូវលេខ ៨៥ បេតេ ក្នុងភូមិត្នោតជ្រំ ១ សង្កាត់បឹងទំពន់ទី ២ ខណ្ឌមានជ័យ រាជធានីភ្នំពេញ។

ជនសង្ស័យឈ្មោះ ចាន់ សុមានិត ភេទប្រុស អាយុ ៣២ ឆ្នាំ មុខរបរមិនពិតប្រាកដ ស្នាក់នៅផ្ទះលេខ ៥៨ តាមផ្លូវ ៨៩ បេតេ សង្កាត់បឹងទំពន់ ២ ខណ្ឌមានជ័យ រាជធានីភ្នំពេញ។

តាមប្រភពព័ត៌មានពីមិត្តភ័ក្ដិជនរងគ្រោះ បានឲ្យដឹងថា ជនរងគ្រោះបានមកផឹកស៊ីជាមួយគាត់ នៅក្បែរផ្ទះរបស់ជនបង្ក តាំងពីយប់រហូតដល់មេឃភ្លឺ និងឈ្លោះប្រកែកគ្នាជាមួយអ្នកផ្ទះរបស់ជនសង្ស័យផងដែរ។ លុះមកដល់ព្រឹកឡើង ម៉ោងកើតហេតុ ជនរងគ្រោះ និងមិត្តភ័ក្ដិ ចំនួន ២ នាក់ទៀត កំពុងតែអង្គុយផឹកនៅមុខផ្ទះ មិនដឹងជាជនសង្ស័យមានបញ្ហាអ្វីនោះទេ បានរត់ចេញពីក្នុងផ្ទះ រួចរកហក់វាយជនរងគ្រោះ ទើបធ្វើឲ្យជនរងគ្រោះយកកៅអីបម្រុងវាយត្រឡប់ទៅវិញ។ ភ្លាមៗ ជនសង្ស័យបានរត់ទៅយកដាវដែលទុកខាងក្នុងផ្ទះធ្វើសកម្មភាពកាប់ជនរងគ្រោះ បណ្តាលឲ្យត្រូវរបួស ក.ដៃ ហើយបានរត់ចូលក្នុងផ្ទះបាត់។ បន្ទាប់ពីរបួសភ្លាមៗ ជនរងគ្រោះត្រូវបានបញ្ជូនទៅសង្គ្រោះនៅមន្ទីរពេទ្យមិត្តភាពខ្មែរ-សូវៀត។

ក្រោយកើតហេតុ អាវុធហត្ថខណ្ឌមានជ័យ បានចុះមកដល់ទីតាំងផ្ទះជនសង្ស័យ ឡោមព័ទ្ធ និងចាប់នាំខ្លួនទៅសាកសួរ ដើម្បីបន្តនីតិវិធីច្បាប់៕

អត្ថបទ ៖ រដ្ឋា

The post អាវុធហត្ថខណ្ឌមានជ័យ ឃាត់ខ្លួនជនសង្ស័យ ១ នាក់ កាប់ជនរងគ្រោះរបួសដៃ appeared first on Kampuchea Thmey Daily.

បញ្ជូនជនសង្ស័យកាប់ជនរងគ្រោះកំពុងអង្គុយផឹកស្រាមុខផ្ទះដាច់ក្បាល ទៅកាន់តុលាការ

អ៊ិន ពិសី — Wed, 02 Jul 2025 04:02:05 +0000

នៅព្រឹកថ្ងៃទី ២ ខែកក្កដា ឆ្នាំ ២០២៥ នេះ សមត្ថកិច្ច បានបញ្ជូនជនសង្ស័យម្នាក់ ដែលយកកាំបិតខ្វែវកាប់ជនរងគ្រោះម្នាក់ បណ្ដាលឲ្យដាច់ក្បាលធ្លាក់ដល់ដី ក្នុងវង់ផឹកខាងមុខផ្ទះ ទៅកាន់តុលាការ។

តាមប្រភពពីសមត្ថកិច្ចបានឲ្យដឹងថា ជនរងគ្រោះឈ្មោះ ទុំ ចិន្តា ភេទប្រុស អាយុ ៤១ ឆ្នាំ សញ្ជាតិខ្មែរ ជនជាតិខ្មែរ មានមុខរបរមិនពិតប្រាកដ។ ចំណែកជនដៃដល់ឈ្មោះ ចែម ធារ៉ា ភេទប្រុស អាយុ ៤០ ឆ្នាំ សញ្ជាតិខ្មែរ ជនជាតិខ្មែរ មានមុខរបរមិនពិតប្រាកដ ។ អ្នកទាំង ២ នាក់ រស់នៅក្នុងភូមិក្រូចសើច ឃុំពុកឫស្សី ស្រុកខ្សាច់កណ្ដាល ខេត្តកណ្ដាល ជាអ្នកជិតខាងនឹងគ្នាផងដែរ។

គួររំលឹកផងដែរថា កាលពីវេលាម៉ោង ១៧ និង ០០ នាទី ថ្ងៃទី ១ ខែកក្កដា ឆ្នាំ ២០២៥ ម្សិលមិញ ជនរងគ្រោះបានអង្គុយហូបស្រាថ្នាំជាមួយឈ្មោះ ឈាង និង ឈ្មោះ ណាន នៅលើគ្រែមុខផ្ទះរបស់ឈ្មោះ អន ផៃ ដែលនៅក្បែរផ្ទះរបស់ជនសង្ស័យ។ លុះពេលជនរងគ្រោះកំពុងហូបស្រាថ្នាំលើគ្រែនោះ ស្រាប់តែជនសង្ស័យកាន់កាំបិតខ្វែវដើរចេញពីផ្ទះមកកន្លែងវង់ផឹកស្រារបស់ជនរងគ្រោះ។ ពេលនោះអ្នកក្នុងវង់ហូបស្រាបានសួរជនសង្ស័យថា «ហ្អែងទៅណា?» ជនសង្ស័យ និយាយថា ទៅរកកាប់ចម្ពាម។ និយាយរួច ក៏ដើរចេញបានបន្តិច ស្រាប់តែជនសង្ស័យដើរត្រឡប់មកវិញ យារកាំបិតខ្វែវកាប់សំដៅកជនរងគ្រោះបណ្ដាលឲ្យដាច់ក្បាលចេញពីស្មាធ្លាក់លើគ្រែ ឯខ្លួនធ្លាក់ទៅដី រួចជនសង្ស័យរត់គេចខ្លួន បន្ទាប់មកក៏មានប្រជាពលរដ្ឋរាយការណ៍ប្រាប់សមត្ថកិច្ច។ ភ្លាមៗ សមត្ថកិច្ចប៉ុស្តិ៍នគរបាលរដ្ឋបាលពុកឫស្សី សហការជាមួយកម្លាំងជំនាញផ្នែកនគរបាលយុត្តិធម៌ បានចុះអន្តរាគមន៍ទីកន្លែងកើតហេតុឈានដល់ឃាត់ខ្លួនជនសង្ស័យតែម្ដង។

បច្ចុប្បន្ន ជនសង្ស័យ រួមទាំងវត្ថុតាងខាងលើ ត្រូវបានកម្លាំងសមត្ថកិច្ចជំនាញកសាងសំណុំរឿងបញ្ជូនទៅកាន់តុលាការ៕

អត្ថបទ ៖ ម៉េង

The post បញ្ជូនជនសង្ស័យកាប់ជនរងគ្រោះកំពុងអង្គុយផឹកស្រាមុខផ្ទះដាច់ក្បាល ទៅកាន់តុលាការ appeared first on Kampuchea Thmey Daily.

បង្ហាញមុខជនសង្ស័យ ២៩ នាក់ ពាក់ព័ន្ធករណីក្មេងទំនើង លួច និង កាប់ប្លន់

អ៊ិន ពិសី — Thu, 16 Jan 2025 07:28:38 +0000

ស្នងការដ្ឋាននគរបាលរាជធានីភ្នំពេញ បង្ហាញមុខជនសង្ស័យចំនួន ២៩ នាក់ ជាសាធារណៈ ពាក់ព័ន្ធករណី ក្មេងទំនើង លួច និង កាប់ប្លន់ យ៉ាងសកម្ម នៅខណ្ឌចំនួន ០៦ និងការិយាល័យព្រហ្មទណ្ឌកម្រិតស្រាល ក្នុងភូមិសាស្ត្ររាជធានីភ្នំពេញ។

ការបង្ហាញមុខជាសាធារណៈនេះធ្វើឡើងកាលពីព្រឹកថ្ងៃទី ១៦ ខែមករា ឆ្នាំ ២០២៥ នេះ ក្នុងបរិវេណស្នងការដ្ឋាននគរបាលរាជធានីភ្នំពេញ ដោយមានការចូលរួមមកពីតាមបណ្ដាខណ្ឌចំនួន ០៦ និងការិយាល័យព្រហ្មទណ្ឌកម្រិតស្រាល។

ក្នុងនោះរួមមាន ៖ ខណ្ឌច្បារអំពៅ ០១ ករណី ឃាត់បានជនសង្ស័យចំនួន ០៥ នាក់ , ខណ្ឌ ០៧ មករា ០១ ករណី ឃាត់បានជនសង្ស័យ ០១ នាក់ , ខណ្ឌដង្កោ ០១ ករណី ចាប់បានជនសង្ស័យចំនួន ០២ នាក់ , ខណ្ឌដូនពេញ ០១ ករណី ឃាត់មនុស្សចំនួន ០២ នាក់ , ខណ្ឌពោធិ៍សែនជ័យ ០២ ករណី ឃាត់បានមនុស្សចំនួន ០៩ នាក់ , ខណ្ឌកំបូល ០២ ករណី ឃាត់បានមនុស្សចំនួន ០៣ នាក់ និងកម្លាំងរបស់ការិយាល័យព្រហ្មទណ្ឌកម្រិតស្រាល ០១ ករណី ឃាត់មនុស្សចំនួន ០៧ នាក់។

លោកឧត្ដមសេនីយ៍ត្រី ប៊ុន សត្យា ស្នងការរងទទួលផែនព្រហ្មទណ្ឌ និង លោកវរសេនីយ៍ឯក សំ វិច្ឆិកា អ្នកនាំពាក្យស្នងការដ្ឋានរាជធានី បានបញ្ជាក់ឲ្យដឹងថា ជនសង្ស័យដែលបង្ហាញមុខនាពេលនេះ សរុបចំនួន ២៩ នាក់ ពាក់ព័ន្ធ ១០ ករណី នៅតាមបណ្ដាខណ្ឌនានា ហើយត្រូវសមត្ថកិច្ចបង្ក្រាបបានក្នុងរយៈពេល ០៣ ថ្ងៃ តែប៉ុណ្ណោះ។

បច្ចុប្បន្ន ជនសង្ស័យចំនួន ២៩ នាក់ ខាងលើ ត្រូវបានសមត្ថកិច្ចធ្វើការកសាងសំណុំរឿងបញ្ជូនទៅកាន់សាលាដំបូងរាជធានីភ្នំពេញ ដើម្បីដាក់ទោសតាមផ្លូវច្បាប់៕

អត្ថបទ ៖ រដ្ឋា

The post បង្ហាញមុខជនសង្ស័យ ២៩ នាក់ ពាក់ព័ន្ធករណីក្មេងទំនើង លួច និង កាប់ប្លន់ appeared first on Kampuchea Thmey Daily.

កម្លាំងព្រហ្មទណ្ឌកម្រិតស្រាល បង្ហាញមុខជនសង្ស័យ ១០ នាក់ បង្កហិង្សាដោយចេតនា ស្លាប់ម្នាក់ និងរបួសច្រើននាក់

អ៊ិន ពិសី — Thu, 21 Nov 2024 10:18:20 +0000

កម្លាំងព្រហ្មទណ្ឌកម្រិតស្រាល បង្ហាញមុខជនសង្ស័យចំនួន ១០ នាក់ ដែលបង្កហិង្សាដោយចេតនាកាប់ទៅលើជនរងគ្រោះ បណ្ដាលឲ្យដួលបោកក្បាលស្លាប់ម្នាក់ និងរងរបួសជាច្រើននាក់។

ជាក់ស្ដែងក្រុមក្មេងទំនើងទាំង ១០ នាក់ នេះ ត្រូវបាននគរបាលព្រហ្មទណ្ឌកម្រិតស្រាល នៃស្នងការនគរបាលរាជធានីភ្នំពេញ បង្ហាញមុខជាសាធារណៈ កាលពីវេលាម៉ោង ០២ និង ៣០ នាទីរសៀល ថ្ងៃទី ២១ ខែវិច្ឆិកា ឆ្នាំ ២០២៤ តែម្ដង។

ជនសង្ស័យដែលបង្ហាញមុខរួមមាន ៖ ១-ឈ្មោះ ឈាង លីហួ ភេទប្រុស អាយុ ១៧ ឆ្នាំ មុខរបរ កាត់ដេរ។ ២-ឈ្មោះ ប៉ូ គឹមហុង ភេទប្រុស អាយុ ១៧ ឆ្នាំ។ ៣-ឈ្មោះ ខេង សាវៀត ហៅ វីត ភេទប្រុស អាយុ ១៧ ឆ្នាំ។ ៤-ឈ្មោះ ហាន់ណាហ្វី ម៉ូហាំម៉ាត់តាវហ្វីច ភេទប្រុស អាយុ ១៧ ឆ្នាំ ជាសិស្ស។ ៥-ឈ្មោះ ថា វ៉ាន់ធី ភេទប្រុស អាយុ ១៧ ឆ្នាំ ជនជាតិខ្មែរ ជាសិស្ស។ ៦-ឈ្មោះ ហុក វណ្ណា ភេទប្រុស អាយុ ១៧ ឆ្នាំ មុខរបរជាងជួសជុលរថយន្ត។ ៧-ឈ្មោះ ម៉ែន សិទ្ធិញ្ញាន ភេទប្រុស អាយុ ១៨ ឆ្នាំ ជាសិស្ស។ ៨-ឈ្មោះ ជន ឆារៈឆៃ ភេទប្រុស អាយុ ១៧ ឆ្នាំ មុខរបរកម្មករសំណង់។ ៩-ឈ្មោះ សៅ ជាបម៉េង ភេទប្រុស អាយុ ១៦ ឆ្នាំ ជាសិស្ស និង ១០-ឈ្មោះ អ៊ុង សេងហុង ភេទប្រុស អាយុ ១៧ ឆ្នាំ។

ប្រធានការិយាល័យព្រហ្មទណ្ឌកម្រិតស្រាល នៃស្នងការដ្ឋាននគរបាលរាជធានីភ្នំពេញ បានឲ្យដឹងថា ករណីទី១-កាលពីថ្ងៃទី ១២ ខែតុលា ឆ្នាំ ២០២៤ វេលាម៉ោង ២ និង ០០ នាទី នៅចំណុចផ្លូវបេតុង ភូមិព្រៃព្រីងខាងត្បូង សង្កាត់ចោមចៅទី ៣ ខណ្ឌពោធិ៍សែនជ័យ រាជធានីភ្នំពេញ ធ្វើសកម្មភាពកាប់ម៉ូតូ និងកាប់ជនរងគ្រោះបណ្ដាលឲ្យរងរបួស។ ករណីទី២-កាលពីថ្ងៃទី ១៧ ខែតុលា ឆ្នាំ ២០២៤ នៅចំណុចស្ថានីយប្រេងឥន្ធនៈ តូតាល់ ផ្លូវ ២០០៤ ក្នុងសង្កាត់អូរបែកក្អម ខណ្ឌសែនសុខ រាជធានីភ្នំពេញ ធ្វើសកម្មភាពកាប់បណ្ដាលឲ្យជនរងគ្រោះខូចខាតម៉ូតូ និងរងរបួសដៃជាទម្ងន់។ និងលើកទី៣-នៅចំណុចផ្លូវបេតុង ភូមិចំការឪឡឹក សង្កាត់កាកាបទី ១ ខណ្ឌពោធិ៍សែនជ័យ រាជធានីភ្នំពេញ កាលពីថ្ងៃទី ១៦ ខែតុលា ឆ្នាំ ២០២៤ វេលាម៉ោង ២៣ និង ២៧ នាទី បណ្ដាលឲ្យជនរងគ្រោះ ឈ្មោះ ហ្កិត តូណា មុខរបរលក់ទាខ្វៃ ស្លាប់នៅនឹងកន្លែង និងម្នាក់ទៀតរងរបួសធ្ងន់។

នគរបាលបន្តថា ក្នុងរង្វង់ប្រតិបត្តិការនេះ ឃាត់ខ្លួនជនសង្ស័យជាក់ស្ដែងសរុប ១៤ នាក់។ ក្នុងនោះ ៤ នាក់ មិនពាក់ព័ន្ធ ត្រូវបានធ្វើកិច្ចសន្យាអប់រំឲ្យត្រឡប់ទៅផ្ទះវិញ និងដកហូតម៉ូតូធ្វើសកម្មភាព សរុប ៧ គ្រឿង កាំបិតបុ័ងតោ ១ ដើម។

បច្ចុប្បន្នជនសង្ស័យទាំង ១០ នាក់ រួមទាំងវត្ថុតាង ត្រូវបានសមត្ថកិច្ចបញ្ជូនទៅកាន់សាលាដំបូងរាជធានីភ្នំពេញ ដើម្បីចាត់ការតាមនីតិវិធីច្បាប់។

គួររំលឹកផងដែរថា កាលពីវេលាម៉ោង ១១ និង ៥០ នាទីយប់ ថ្ងៃទី ១៦ ខែវិច្ឆិកា ឆ្នាំ ២០២៤ ខណៈយុវជនរងគ្រោះ ២ នាក់ កំពុងជិះម៉ូតូម៉ាកហុងដា Zoomer-X ១ គ្រឿង ឌុបគ្នា នៅតាមផ្លូវ ស្ថិតក្នុងភូមិចំការឪឡឹកទី ១ សង្កាត់កាកាបទី ១ ខណ្ឌពោធិ៍សែនជ័យ រាជធានីភ្នំពេញ ស្រាប់តែក្រុមបងធំខាងលើ មានគ្នាច្រើននាក់ ជិះម៉ូតូច្រើនគ្រឿង ដេញកាប់ ជាហេតុធ្វើឲ្យជនរងគ្រោះភ័យ បានជិះម៉ូតូរត់ជ្រុលទៅបុកបង្គោលភ្លើង បណ្ដាលឲ្យស្លាប់ម្នាក់ និងរងរបួសធ្ងន់ម្នាក់ បន្ទាប់មកក្រុមជនពាលទាំងនោះបាននាំគ្នាគេចខ្លួនបាត់អស់៕

អត្ថបទ ៖ រដ្ឋា

The post កម្លាំងព្រហ្មទណ្ឌកម្រិតស្រាល បង្ហាញមុខជនសង្ស័យ ១០ នាក់ បង្កហិង្សាដោយចេតនា ស្លាប់ម្នាក់ និងរបួសច្រើននាក់ appeared first on Kampuchea Thmey Daily.

ឃាត់ខ្លួនជនដៃដល់ប្រើកាំបិតកាប់លើបុរសម្នាក់ ក្រោយមានការចែកចាយតាមបណ្ដាញសង្គម

អ៊ិន ពិសី — Mon, 04 Nov 2024 07:28:34 +0000

កម្លាំងនគរបាលព្រហ្មទណ្ឌកម្រិតស្រាល នៃក្រសួងមហាផ្ទៃ បានធ្វើការឃាត់ខ្លួនជនសង្ស័យម្នាក់ ដែលកាប់លើជនរងគ្រោះម្នាក់ បណ្ដាលឲ្យរងរបួសធ្ងន់។

ជនសង្ស័យឈ្មោះ ថា សេន អាយុប្រមាណជាង ២០ ឆ្នាំ ធ្លាប់ជាប់ពន្ធនាគារជាច្រើនលើកមកហើយ ពីបទអំពើហិង្សា កាប់ចាក់ បែបនេះ។

បន្ទាប់ពីមានការចែកចាយវីដេអូ កាមេរ៉ាសុវត្ថិភាព បង្ហាញពីសកម្មភាពរវាងជនសង្ស័យ និង ជនរងគ្រោះ ដោយសារមានរថយន្តប្រមូលសំរាមមកប្រមូលត្រង់ចំណុចជនសង្ស័យឈប់ម៉ូតូ ហើយកំពុងចុចទូរស័ព្ទ ដោយពេលនោះជនរងគ្រោះបានជិះម៉ូតូឌុបស្ត្រីម្នាក់ ដោយស្ទះឡានដឹកសំរាម ម៉ូតូជនរងគ្រោះក៏ជិះមកផ្លូវម្ខាងទៀត សុំផ្លូវម៉ូតូរបស់ជនសង្ស័យ ដើម្បីធ្វើដំណើរទៅមុខទៀត តែជនសង្ស័យមិនព្រមជៀស ហើយក៏មិនខ្វល់ រហូតបង្កជាពាក្យសម្ដី។ បន្ទាប់មក ជនសង្ស័យ ក៏បានធាក់ម៉ូតូជនរងគ្រោះ រហូតបង្កជាករណីអំពើហិង្សា។ ក្នុងនោះ ជនសង្ស័យ បានយកខ្សែក្រវាត់វាយទៅលើជនរងគ្រោះ។ រួចជនរងគ្រោះ ក៏បានតដៃគ្នាទៅវិញទៅមក។ ពេលនោះជនសង្ស័យក៏បានដកកាំបិតបុ័ងតោចេញពីក្នុងកាបូប រួបកាប់លើបុរសជនរងគ្រោះ បណ្ដាលឲ្យរងរបួសដៃ និងចុងដង្ហើម ត្រូវបញ្ជូនទៅកាន់មន្ទីរពេទ្យ។ ចំណែកជនសង្ស័យ បានយកកាំបិតទៅកាប់ចិញ្ច្រាំម៉ូតូជនរងគ្រោះជាច្រើនកាំបិត រួចជិះម៉ូតូគេចខ្លួនបាត់តែម្ដង។

រហូតនៅព្រឹកថ្ងៃទី ៤ ខែវិច្ឆិកា ឆ្នាំ ២០២៤ នេះ កម្លាំងព្រហ្មទណ្ឌកម្រិតស្រាល នៃក្រសួងមហាផ្ទៃ សហការជាមួយកម្លាំងអធិការដ្ឋាននគរបាលខណ្ឌ ៧ មករា តាមឃាត់ខ្លួនជនសង្ស័យបាននៅចំណុចផ្ទះជនសង្ស័យ ក្នុងបុរីកីឡា សង្កាត់វាលវង់ ខណ្ឌ ៧ មករា រាជធានីភ្នំពេញ។

បច្ចុប្បន្ន នគរបាលព្រហ្មទណ្ឌកម្រិតស្រាល បានធ្វើការបញ្ជូនខ្លួនជនសង្ស័យយកទៅសួរនាំ និង ចាត់ការតាមនីតិវិធីច្បាប់៕

អត្ថបទ ៖ រដ្ឋា

The post ឃាត់ខ្លួនជនដៃដល់ប្រើកាំបិតកាប់លើបុរសម្នាក់ ក្រោយមានការចែកចាយតាមបណ្ដាញសង្គម appeared first on Kampuchea Thmey Daily.

គួរដាក់ទោសយ៉ាងណា! ជនមានសតិមិនគ្រប់ទឹក កាប់មេភូមិបណ្តាលឱ្យបាត់បង់ជីវិត

Sophal Tuon — Sun, 24 Sep 2023 02:29:32 +0000

ជនរងគ្រោះម្នាក់បានស្លាប់ក្រោយពេលបញ្ជូនដល់មន្ទីរពេទ្យ ក្រោយពីត្រូវជនវិបល្លាសដែលមានសតិមិនគ្រប់ ប្រើពូថៅដៃកាប់ទាំងកម្រោលរងរបួសជាច្រើនកន្លែង។

ហេតុការណ៍ដ៏រន្ធត់នេះ បានកើតឡើង កាលពីថ្ងៃទី២៣ ខែកញ្ញ ឆ្នាំ២០២៣ វេលាម៉ោង ១១.៣០ នាទី នៅចំណុចក្រុមទី៩ ភូមិស្វាយជាតិ ឃុំរាំងកេសី ស្រុកសង្កែ ខេត្តបាត់ដំបង ដោយមានករណី ហិង្សាដោយចេតនា មានស្ថានទម្ងន់ទោស បណ្ដាលឱ្យជនរងគ្រោះស្លាប់ (យកពូថៅកាប់) បង្កដោយជនសង្ស័យឈ្មោះ ប្រាក់ សុខណា ភេទប្រុស អាយុ៣៦ ឆ្នាំ (វិបល្លាសស្មារតី) មានទីលំនៅភូមិស្វាយជាតិ ឃុំរាំងកេសី ស្រុកសង្កែ ខេត្តបាត់ដំបង ។

យោងតាមសេចក្តីរាយការណ៍ពីកម្លាំងសមត្ថកិច្ចបានឱ្យដឹងថា ជនបង្កដោយមានស្មារតីមិនគ្រប់នេះ ត្រូវបានក្រុមគ្រួសារដាក់ច្រវាក់នៅនឹងផ្ទះអស់រយ:ពេល ៣ឆ្នាំមកហើយ ព្រមទាំងមានឈ្មោះនៅសង្គមកិច្ចត្រូវបញ្ជូនទៅមណ្ឌលថែមទៀតផង ប៉ុន្តែសាច់ញាតិ មិនបានបញ្ជូនទៅណាទាំងអស់។

លុះនៅមុនពេលកើតហេតុ ជនរូបនេះបានរបូតច្រវាក់ហើយក៏បានធ្វើសកម្មភាពយកពូថៅកាប់ទៅលើ ជនរងគ្រោះឈ្មោះ កង ស៊ីណាត់ ភេទប្រុស អាយុ ៥៨ឆ្នាំ ជាមេភូមិ នៅភូមិឃុំ-កើតហេតុខាងលើ បណ្ដាលឱ្យរងរបួសត្រង់ចុងភ្នែកស្ដាំ រយះដល់គុំត្រចៀក ខាងស្ដាំ ១ កន្លែង របួសត្រង់ឆ្អឹងជំនីផុត ១ កន្លែង បណ្ដាលឱ្យរងរបួសធ្ងន់រហូតដល់ស្លាប់ ពេលបញ្ជូនដល់មន្ទីរពេទ្យបង្អែកខេត្ត បាត់ដំបង ។

ករណីនេះ កម្លាំងជំនាញ កំពុងកសាងសំណុំរឿងបញ្ជូនតាមនីតិវិធីច្បាប់ ដោយនៅព្រឹកនេះដែរ លោកព្រះរាជអាជ្ញាបានបញ្ជាឱ្យសមត្ថកិច្ចចុះស្រាវជ្រាវសាវតាជនសង្ស័យឱ្យបានច្បាស់ម្តងទៀត ដើម្បីអនុវត្តបន្ត ៕

អត្ថបទ : សោ និយមរ័ត្ន

The post គួរដាក់ទោសយ៉ាងណា! ជនមានសតិមិនគ្រប់ទឹក កាប់មេភូមិបណ្តាលឱ្យបាត់បង់ជីវិត appeared first on Kampuchea Thmey Daily.

កាប់គ្នា Archives - Kampuchea Thmey Daily

ជម្លោះគ្រួសារ ប្រពន្ធយកកាំបិតកាប់ប្ដីស្លាប់ក្នុងថ្លុកឈាម

ជនជាតិឥណ្ឌូនេស៊ី ២ នាក់ ផ្ទុះជម្លោះ ឈានដល់ការកាប់ចាក់គ្នា របួសធ្ងន់ ១ នាក់ និង ស្លាប់ ១ នាក់ នៅបឹងកេងកងទី ១

អាវុធហត្ថខណ្ឌមានជ័យ ឃាត់ខ្លួនជនសង្ស័យ ១ នាក់ កាប់ជនរងគ្រោះរបួសដៃ

បញ្ជូនជនសង្ស័យកាប់ជនរងគ្រោះកំពុងអង្គុយផឹកស្រាមុខផ្ទះដាច់ក្បាល ទៅកាន់តុលាការ

បង្ហាញមុខជនសង្ស័យ ២៩ នាក់ ពាក់ព័ន្ធករណីក្មេងទំនើង លួច និង កាប់ប្លន់

កម្លាំងព្រហ្មទណ្ឌកម្រិតស្រាល បង្ហាញមុខជនសង្ស័យ ១០ នាក់ បង្កហិង្សាដោយចេតនា ស្លាប់ម្នាក់ និងរបួសច្រើននាក់

ឃាត់ខ្លួនជនដៃដល់ប្រើកាំបិតកាប់លើបុរសម្នាក់ ក្រោយមានការចែកចាយតាមបណ្ដាញសង្គម

គួរដាក់ទោសយ៉ាងណា! ​ជនមានសតិមិន​គ្រប់ទឹក កាប់មេភូមិបណ្តាល​ឱ្យបាត់បង់ជីវិត

គួរដាក់ទោសយ៉ាងណា! ជនមានសតិមិនគ្រប់ទឹក កាប់មេភូមិបណ្តាលឱ្យបាត់បង់ជីវិត