លោក ងួន ស៊ុនគេ តំណាងអ្នកគ្រប់គ្រងរីស៊តឆ្នេរសុភមង្គល ដែលមានមូលដ្ឋានស្ថិតនៅឃុំជ្រោយស្វាយ ស្រុកស្រែអំបិល បានឱ្យដឹងនៅថ្ងៃទី៩ ខែមេសានេះថា ទីតាំងផ្តល់សេវាកម្មស្នាក់នៅហូបចុករបស់លោក ត្រូវបានភ្ញៀវទេស​ចរ​កក់ទុកជាង៧០ភាគរយហើយ ដោយពួកគេនឹងមកស្នាក់នៅលំហែកម្សាន្តអំឡុងពិធីបុណ្យចូលឆ្នាំថ្មី ប្រពៃណីជាតិខ្មែរ។

លោក ងួន ស៊ុនគេ បានបន្តថា បច្ចុប្បន្ន ពួកគាត់កំពុងសម្អាតធ្វើអនាម័យសោភណភាពតុបតែងលម្អបែបប្រពៃណីបង្កើនការទាក់ទាញភ្ញៀវទេសចរ និងសេវាកម្មកម្សាន្តរៀបរាយអស់ហើយ ដើម្បីទទួលភ្ញៀវទេសចរគ្រប់មជ្ឈដ្ឋាន។ បញ្ជាទិញបន្លែត្រីសាច់ មកស្តុកទុកធ្វើអាហារជូនអតិថិជន និងអាហារខ្លះទៀតទិញពីប្រជានេសាទក្នុងមូលដ្ឋានដែលពួកគេចេញទូកទៅនេសាទដោយលើកពីទឹកស្រស់ៗតែម្តង។

បើតាមតំណាងអ្នកគ្រប់គ្រងរីស៊តឆ្នេរសុភមង្គល ទោះបីជាវិបត្តិប្រេងសាំងហក់ឡើងថ្លៃក៏ដោយ ក៏តំបន់ស្នាក់នៅកម្សាន្តរបស់លោក មិនតម្លើងថ្លៃសេវាកម្មនោះទេ ពោលគឺមានតែបញ្ចុះតម្លៃផងដែរ។

ក្នុងនោះបឹងកាឡា១ថ្លៃ៤៥ដុល្លារក្នុង១យប់។ កញ្ចុះអង្គុយលំហែជួល១ ថ្លៃ៥០០០០រៀល ប៉ុន្តែបើហៅម្ហូបអស់ពី​១៥០០០០រៀល ឡើងទៅមិនគិតថ្លៃកញ្ចុះនោះទេ។ រីស៊តឆ្នេរសុភមង្គល មានទេសភាពព្រៃកោងកាងបៃតងខ្ចីគួរឱ្យគយគន់ស្រូបយកខ្យល់អាកាសដ៏បរិសុទ្ធ ជិះទូកកម្សាន្ត ងូតទឹកសមុទ្រខៀវស្រងាត់ និងមានសួនកុមារផងដែរ។

លោក គួយ ឈួន តំណាងអ្នកគ្រប់គ្រងចេង ហេង ប៊ូទិក មានមូលដ្ឋាននៅភូមិនេសាទ ឃុំជ្រោយស្វាយ លើកឡើងដែរថា បឹងកាឡូរបស់លោក មានភ្ញៀវទេសចរកក់ទុកស្នាក់នៅប្រមាណ៦០ភាគរយហើយសម្រាប់មកស្នាក់នៅអំឡុងពិធីបុណ្យចូលឆ្នាំខាងមុខ។

លោក គួយ ឈួន បន្ថែមទៀតថា ការមកស្នាក់នៅកម្សាន្តនៅតំបន់រមណីយដ្ឋានរបស់លោក គឺគ្រប់ភ្ញៀវទេសចរមកចំណីអាហារចូលបានដោយសេរីមិនគិតថ្លៃសេវាកម្មទេ ក្រៅពីការស្នាក់នៅ។ ម៉្យាងទៀតបើភ្ញៀវចង់ទិញអាហារស្រស់ៗអាចទិញពីសហគមន៍នេសាទបាន ដើម្បីមកធ្វើម្ហូបពិសារជួបជុំគ្រួសារ។

មូលដ្ឋានស្រុកស្រែអំបិល អាចចាត់ទុកថាតំបន់សក្តានុពលមួយផ្នែកធំលើវិស័យទេសចរដែលទាក់ទាញអ្នកទេសចរមកលេងកម្សាន្តថ្ងៃបុណ្យទានខ្ទង់ម៉ឺននាក់ឯណោះ ដោយទីតាំងបង្កើនជារីស៊តថ្មីជាច្រើនកន្លែងទៀត។

ចំណែកអ្នកស្រី ស្រីដា និងកញ្ញា ណែត អ្នកទេសចរដែលតែងតែចាប់អារម្មណ៍មកលំហែកាយនៅតំបន់រមណីយដ្ឋានខាងលើ លើកឡើងថា ការដែលពួកគាត់ធ្វើដំណើរមកលេងកម្សាន្តនៅទីនេះជាលក្ខណៈដោយសារតែមានខ្យល់អាកាសបរិសុទ្ធល្អ ងូតទឹកកម្សាន្ត និងពិសារអាហារសមុទ្រស្រស់ៗ។ រីឯតម្លៃវិញទទួលបានមិនថ្លៃខ្លាំងនោះទេ។

អ្នកទេសចរក្នុងស្រុកដដែល យល់ថា រាល់ពេលបានមកលំហែនៅតំបន់ទេសចរណ៍ទាំងនេះបានធ្វើឱ្យអារម្មណ៍រំសាយរាល់ទុក្ខកង្វល់ ដោយជំនួសមកវិញនូវអារម្មណ៍ស្រស់ថ្លាបន្តការងារ និងធ្វើអាជីវកម្មបន្តទៀត៕

អត្តបទៈសិរីវឌ្ឍនៈ

The post ការកក់បន្ទប់ស្នាក់នៅ ក្នុងស្រុកស្រែអំបិល មានជាង ៧០% ក្នុងឱកាសបុណ្យចូលឆ្នាំខ្មែរ appeared first on Kampuchea Thmey Daily.

​អ្នកស្រី ម៉ាលីស ​បញ្ជាក់ថា ​រាល់ថ្ងៃមានភ្ញៀវខ្មែរខលសួរច្រើន ​ប៉ុន្តែទីតាំងអ្នកស្រី​ អត់មាន​កន្លែង​ដាក់ ​ដោយសារ​ពួកគាត់​មកជាក្រុមៗច្រើនគ្នា។​

​បុគ្គលិកសណ្ឋាគារ Rambutan Hotel ​នៅខេត្តសៀមរាប​បាន​ប្រាប់​ដែរថា ​សណ្ឋាគាររបស់លោក​ភាគ​ច្រើន​ទទួល​ភ្ញៀវ​បរទេស មិនផ្ដោតលើភ្ញៀវក្នុងស្រុកនោះទេ ប៉ុន្តែតាមការអង្កេតមាន​ភ្ញៀវក្នុង​ស្រុក​សួរ​នាំច្រើន ពីការ​កក់​បន្ទប់ស្នាក់នៅ។

​បុគ្គលិកសណ្ឋាគារ SARA VOAN នៅខេត្តកំពត ​អ្នកស្រី មុំ បានប្រាប់ថា ​ឆ្នាំនេះ ​មិនសូវ​មានភ្ញៀវ​កក់បន្ទប់​ស្នាក់​នៅ​ក្នុងពេលបុណ្យអុំទូកនោះទេ ដោយថ្ងៃទី ៤ ខែ ១១ អ្នកស្រីមានភ្ញៀវកក់ចំនួន ១៣ បន្ទប់ ក្នុងចំណោម ១៦ ​បន្ទប់។ ក្រៅពីថ្ងៃទី០៤ គឺមិនសូវមានភ្ញៀវកក់នោះទេ។​

​លោក ខៀវ ធី ប្រធាន​សមាគមន៍​មគ្គុទ្ទេសក៏​ទេសចរ​អង្គរជឿជាក់ថា បុណ្យអុំទូកឆ្នាំនេះ ភ្ញៀវទេសចរក្នុងស្រុក នឹង​មក​លេងនៅខេត្តសៀមរាប​ច្រើនដូចឆ្នាំមុនដែរ។

​ការរៀបចំពិធីបុណ្យអុំទូក បណ្តែតប្រទីប និងសំពះព្រះខែ អកអំបុក នៅតាមបណ្តាខេត្ត​នានានៅ​ឆ្នាំ​នេះ​ អាចប្រព្រឹត្តទៅជាធម្មតាតាមទំនៀមទម្លាប់ប្រពៃណី ដែលមានរយៈពេល ៣ ថ្ងៃ ចាប់ពីថ្ងៃទី ០៤-០៦ ខែវិច្ឆិកា ឆ្នាំ ២០២៥៕

អត្ថបទ៖ ឡេង ដេត

The post ការ​កក់​បន្ទប់​ផ្ទះសំណាក់ សណ្ឋាគារ ​តាម​បណ្ដា​ខេត្ត​គោល​ដៅ​ទេស​ចរណ៍​ ចាប់ផ្ដើមកើនឡើង ក្នុងឱកាស​បុណ្យ​អុំទូក​ appeared first on Kampuchea Thmey Daily.

លោក ប៊ុនធឿន បុគ្គលិកផ្នែកលក់នៅសណ្ឋាគារ La Residence Blanc D’Angkor Hotel បានឱ្យដឹងនៅថ្ងៃទី ១១ ខែមេសា ឆ្នាំ ២០២៥ ថា ការកក់បន្ទប់ស្នាក់នៅក្នុងឱកាស​​ព្រឹត្តិ​ការ​​ណ៍​អង្គរ​សង្ក្រាន្ត​ឆ្នាំ ២០២៥ និងពិធីបុណ្យចូលឆ្នាំខ្មែរពេញណែនចាល់ ពោលគឺមានកំណើន​ខ្ពស់​ជាង​​ឆ្នាំ​មុន។

លោកប្រាប់ថា សម្រាប់បន្ទប់គ្រែមួយ តម្លៃ ៤០ ដុល្លារ ក្នុងមួយយប់ ខណៈគ្រែ ២ ឬគ្រែ ៣ តម្លៃ ៥០ ដុល្លារ។

កញ្ញា ម៉ាលិស បុគ្គលិកផ្នែកលក់នៅសណ្ឋាគារ La Palmeraie d’Angkor Charming Hotel ប្រាប់ថា សណ្ឋាគាររបស់ខ្លួនមានភ្ញៀវខ្មែរកក់ពេញហើយ ខណៈមានភ្ញៀវមួយចំនួន​បានចាល់​ទៅ​សណ្ឋាគារផ្សេងៗ។

ដោយឡែក សម្រាប់គោលដៅទេសចរណ៍ខេត្តកែប និងខេត្តព្រះសីហនុ ការកក់បន្ទប់​ស្នាក់នៅ​មិនទាន់ពេញនោះទេ ខណៈបុគ្គលិកផ្នែកលក់បង្ហើបថា ទាល់តែដល់ថ្ងៃតែម្ដង​ទើបភ្ញៀវបុក​ចូលស្នាក់នៅ។

អ្នកនាង ស្រីមុំ បុគ្គលិកនៅសណ្ឋាគារ SARA VOAN ​ក្នុងខេត្តកែប បានប្រាប់ថា កំណើន​កក់ក្នុងឱកាសបុណ្យចូលឆ្នាំខ្មែរមានមធ្យម ពោលគឺមិនទាន់ពេញនោះទេ ខណៈ​តម្លៃឡើង​បន្តិច​ក្នុងថ្ងៃបុណ្យ។

លោក លឹក ដាឡៃ បុគ្គលិកសណ្ឋាគារកំពង់សោមថ្មីប្រាប់ថា៖ «និយាយទៅដូចរាល់ឆ្នាំ មុនបុណ្យ​មិនមានអ្នកកក់ទេ ប៉ុន្តែដល់ថ្ងៃគេមករកពេញតែម្ដង ខណៈតម្លៃឡើងថ្លៃ ៥ ដុល្លារគ្រែ១ និង គ្រែ ២ ឡើង ១០ ដុល្លារ»។

សូមជំរាបថា ពិធីបុណ្យចូលឆ្នាំខ្មែរឆ្នាំនេះនឹងប្រព្រឹត្តទៅរយៈពេល៣ ថ្ងៃ គឺថ្ងៃទី ១៤-១៦ ខែមេសា ឆ្នាំ២០២៥៕

អត្ថបទ៖ ឡេង ដេត

The post ការកក់បន្ទប់ពេញណែននៅសៀមរាប ខណៈគោលដៅទេសចរណ៍ផ្សេងភ្ញៀវបុកចំថ្ងៃចូលឆ្នាំ appeared first on Kampuchea Thmey Daily.

លោក ប៊ុនធឿន បុគ្គលិកផ្នែកលក់នៅសណ្ឋាគារ La Residence Blanc D’Angkor Hotel បានឱ្យដឹងនៅថ្ងៃទី ២៥ ខែមីនា ឆ្នាំ ២០២៥នេះថា ការកក់បន្ទប់ស្នាក់នៅមានកំណើនដែលគិតមកដល់ពេលនេះ ប្រមាណ ៥០% ដែលភាគច្រើនជាភ្ញៀវក្នុងស្រុក ខណៈតម្លៃ ៤០ ដុល្លារ ពោលគឺមិនមានការកើនឡើងនោះទេ។

កញ្ញា ដានី បុគ្គលិកផ្នែកលក់នៅសណ្ឋាគារ La Palmeraie d’Angkor Charming Hotel បង្ហើបប្រាប់ថា នៅក្នុងក្រុងសៀមរាប មានការកក់បន្ទប់ច្រើនហូរហែរ ដែលទំនងជិតពេញហើយ អំឡុងពេលព្រឹត្តិការណ៍អង្គរសង្ក្រាន និងបុណ្យចូលឆ្នាំខ្មែរខាងមុខនេះ។

កញ្ញា ទេវី បុគ្គលិកផ្នែកលក់ នៅសណ្ឋាគារ Rambutan Hotel & Resort in Siem Reap ក៏បានប្រាប់ដូចគ្នាថា កំណើននៃការកក់បន្ទប់ស្នាក់នៅមានការកើនឡើងខ្ពស់ នៅមុនពេលចូលឆ្នាំខ្មែរ ដែលមានទាំងភ្ញៀវបរទេស និងក្នុងស្រុក។

សូមជំរាបថា ព្រឹត្តិការណ៍អង្គរសង្ក្រាន្តឆ្នាំ២០២៥ នឹងត្រូវរៀបចំឡើងក្រោមប្រធានបទ «ញញឹម​សាទរសង្ក្រាន្តឆ្នាំថ្មី» ដែលនឹងលើកយកនូវកេរតំណែលអរិយធម៌ វប្បធម៌ ទំនៀមទម្លាប់ និងស្នាដៃរបស់បុព្វបុរសខ្មែរមករំលេចឡើងជាផ្ទាំងទស្សនីយភាពចម្រុះដ៏សម្បូរបែបនៅលើទឹកដីអង្គររយៈពេល៣ ថ្ងៃ គឺថ្ងៃទី ១៤-១៦ ខែមេសា ឆ្នាំ២០២៥៕

អត្ថបទ៖ ឡេង ដេត

The post ការកក់បន្ទប់ផ្ទះសំណាក់ សណ្ឋាគារ នៅសៀមរាបជិតពេញ នៅមុនពេលអង្គរសង្ក្រាន្ត​ និងបុណ្យចូលឆ្នាំខ្មែរ appeared first on Kampuchea Thmey Daily.

អ្នកនាង ស្រី មុំ បុគ្គលិកនៅសណ្ឋាគារ SARA VOAN ​ក្នុងខេត្តកែប បានឱ្យដឹងនៅថ្ងៃទី ២០ ខែមករា ឆ្នាំ ២០២៥ នេះ​ថា ការកក់​បន្ទប់​ស្នាក់នៅសម្រាប់ទេសចរណ៍ក្នុងស្រុកធ្វើដំណើរកម្សាន្តក្នុងឱកាសបុណ្យចូលឆ្នាំចិន ខាងមុខ​នេះ មិនទាន់មាននោះទេ ទំនងដោយសារប្រជាជនខ្មែរគ្មានទម្លាប់កក់ទុកមុន។

កញ្ញា ម៉ាលីស បុគ្គលិកផ្នែកលក់ នៅសណ្ឋាគារ La Palmeraie d’Angkor Charming Hotel ខេត្តសៀមរាប ប្រាប់ថា៖ «ភ្ញៀវចូលឆ្នាំចិន អត់មានភ្ញៀវខ្មែរណាកក់បន្ទប់ទេ ខណៈមានតែ​ភ្ញៀវ​​បរ​ទេសដែលគាត់មកលេង ព្រោះភ្ញៀវខ្មែរគាត់ចូលចិត្តកក់ភ្លាមមកនៅភ្លាម»។

លោក ធួន ស៊ីណាន ​ប្រធាន​សមាគម​ទេសចរណ៍​អាស៊ី​ប៉ាស៊ីហ្វិក​កម្ពុជា (PATACC) ប្រាប់​កម្ពុជា​​ថ្មីនៅថ្ងៃទី ២០ ខែមករា ឆ្នាំ ២០២៥ ថា ជាទម្លាប់របស់ប្រជាជនកម្ពុជា បុណ្យអ្វីក៏ដោយ នឹងមានភ្ញៀវទេសចរក្នុងស្រុកដើរលេងកម្សាន្តច្រើននៅក្នុងឱកាសបុណ្យចូលឆ្នាំចិនខាងមុខ។

លោក ធួន ស៊ីណាន មានប្រសាសន៍ថា៖ «ជាទម្លាប់របស់ប្រជាជនខ្មែរយើង ជាពិសេសអ្នកដែលដើរលេងក្នុងស្រុក ពុំសូវចាប់អារម្មណ៍ពីការកក់បន្ទប់ស្នាក់នៅអីទេ ជួនកាលទៅដល់ដើរចូលភ្លាមៗ វាជាទម្លាប់របស់ជាតិសាសន៍នីមួយៗ វាមិនមែនតែខ្មែរយើងទេ បរទេសដូចជាចិន វៀតណាម និងប្រទេសនៅក្នុងតំបន់ខ្លះទៀតក៏ដូចគ្នាដែរ វាជាទម្លាប់របស់ប្រជាជន អ្នកខ្លះក៏គិតថាអត់ដើរលេងទេ ស្អែកឡើងប្រពន្ធកូនបបួលក៏ចេញវឹងអញ្ចឹងទៅ ព្រឹកឡើងគ្មានផែនការ អង្គុយ​ញាំបាយថ្ងៃត្រង់ជជែកគ្នា ក៏នឹកឃើញក៏ទៅប្រុយអញ្ចឹងទៅ»។

នៅក្នុងរយៈពេល ៣ ថ្ងៃ នៃពិធីបុណ្យចូលឆ្នាំថ្មីប្រពៃណីចិន កាលពីឆ្នាំមុន (ចាប់ពីថ្ងៃទី ០៩ ដល់ថ្ងៃទី ១១ កុម្ភៈ ២០២៤)​ កម្ពុជាទទួលបានភ្ញៀវទេសចរដើរលេងកម្សាន្តតាមបណ្តាគោលដៅទេសចរណ៍នានា ទូទាំងប្រទេស សរុបចំនួនប្រមាណ ១ លាននាក់ (១ ០៥១ ៤៧២) ក្នុងនោះ អ្នកទេសចរជាតិមានចំនួន ៩៩៣ ៩៩១ នាក់ និងអ្នកទេសចរបរទេសមានចំនួន ៥៧ ៤៨១ នាក់។

ក្នុងនោះខេត្តចំនួន ៥ ទទួបានទេសចរណ៍ច្រើនជាងគេរួមមាន ខេត្តព្រះសីហនុ ជិត ៣០ ម៉ឺននាក់ ខេត្តសៀមរាបជាង ១១ ម៉ឺននាក់ ខេត្តបាត់ដំបងជិត ៩ ម៉ឺននាក់ ខេត្តប៉ៃលិនជិត ៨ ម៉ឺននាក់ និងខេត្តកែបជាង ៧ ម៉ឺននាក់។

សូមជំរាបថា ពិធីបុណ្យចូលឆ្នាំថ្មីប្រពៃណីចិននៅឆ្នាំនេះនឹងត្រូវរៀបចំធ្វើឡើងចាប់ពីថ្ងៃទី ២៨ ខែមករា ដល់ថ្ងៃទី ៣១ ខែមករា ឆ្នាំ ២០២៥៕

អត្ថបទ៖ ឡេង ដេត

The post ការកក់បន្ទប់ស្នាក់នៅ មុនពេលបុណ្យចូលឆ្នាំចិន មិនទាន់មាន ខណៈអ្នកជំនាញអះអាងថា ជាទម្លាប់ប្រជា​ជនមិនចូលចិត្តកក់ទុកមុន appeared first on Kampuchea Thmey Daily.

កញ្ញា ម៉ាលីស បុគ្គលិកផ្នែកលក់ នៅសណ្ឋាគារ La Palmeraie d’Angkor Charming Hotel ខេត្តសៀមរាប បានឱ្យដឹងថា ការកក់បន្ទប់ស្នាក់នៅមានកំណើនពោលគឺមានភ្ញៀវ​ជិតពេញ​សម្រាប់​​​​ដំណាច់ឆ្នាំនេះ និងដើមឆ្នាំ ២០២៥។

កញ្ញា ទេវី បុគ្គលិកនៅសណ្ឋាគារ Rambutan Hotel & Resort បានឱ្យដឹងដែរថា ការកក់​បន្ទប់​ស្នាក់​នៅ សម្រាប់ដំណាច់ឆ្នាំនេះ មានកំណើនច្រើន ដែលមានទាំងភ្ញៀវក្នុងស្រុក​ និង​បរទេស។

ដោយឡែក អ្នកនាង ស្រី មុំ បុគ្គលិកនៅសណ្ឋាគារ SARA VOAN ​ក្នុងខេត្តកែប បានប្រាប់ថា ការកក់បន្ទប់ស្នាក់នៅមានកំណើនគួរសម គ្រាន់តែមិនរវល់ជាប់រហូត អ្នកកក់បន្ទប់មានចម្រុះ​ជាតិសាសន៍ មានទាំងបរទេស និងទេសចរណ៍ក្នុងស្រុក។

យោងតាមក្រសួងទេសចរណ៍ ក្នុងរយៈពេល ១១ ខែ ឆ្នាំ ២០២៤ កម្ពុជាទទួលបានទេសចរអន្តរ​ជាតិសរុបប្រមាណ ៦ លាននាក់ កើន ២២% និងទេសចរជាតិ​បានធ្វើដំណើរកម្សាន្ត​នៅទូទាំង​ប្រទេស​ប្រមាណ ២០ លាននាក់ កើនឡើង ១៩,៧% ក្នុង​​នោះ​​តំបន់ឆ្នេរសមុទ្រ​មានទេសចរជាតិ​ប្រមាណ ៨ លាននាក់ កើន ១២,៥% និងទេសចរបរទេស​ប្រមាណ ៤២ ម៉ឺននាក់ កើន ១០,៦%​ ធៀបនឹងរយៈពេលដូចគ្នាកាលពីឆ្នាំ ២០២៣៕

អត្ថបទ៖ ឡេង ដេត

The post ការកក់បន្ទប់ផ្ទះសំណាក់ សណ្ឋាគារ កើនឡើង នៅចំពេលជិតឆ្លងឆ្នាំថ្មី appeared first on Kampuchea Thmey Daily.

បុគ្គលិកផ្នែកលក់ នៅផ្ទះសំណាក់មណ្ឌលគិរី កញ្ញា លីណា បានប្រាប់ថា ការកក់បន្ទប់ស្នាក់​នៅ​ក្នុង​​ឱកាស​បុណ្យ​ភ្ជុំ​​សម្រាប់ភ្ញៀវទេសចរមានតិចតួច។

ចំណែក អ្នកស្រី ម៉ាលីស បុគ្គលិកនៅសណ្ឋាគារ La Palmeraie d’Angkor Charming Hotel នៅខេត្តសៀមរាប បានឱ្យដឹងដែរថា ការកក់បន្ទប់ស្នាក់នៅសម្រាប់បុណ្យភ្ជុំបិណ្ឌ​សឹងតែគ្មាន​នោះ​ទេ ដោយសារបញ្ហាសេដ្ឋកិច្ច។

ចំណែកបុគ្គលិកផ្នែកលក់នៅខេត្តព្រះសីហនុក៏បានបង្ហើបថា ការកក់បន្ទប់ស្នាក់នៅ​មិនច្រើន​នោះទេ។

លោក ធួន ស៊ីណាន ​ប្រធាន​សមាគម​ទេសចរណ៍​អាស៊ី​ប៉ាស៊ីហ្វិក​កម្ពុជា (PATACC) ប្រាប់​កម្ពុជាថ្មីនៅថ្ងៃទី ២៧ ខែកញ្ញានេះថា ទម្លាប់ភ្ញៀវទេសចរក្នុងស្រុកមិនសូវមានការកក់ទុកមុនទេ ខណៈពួកគាត់អាងថា មិនសូវមានភ្ញៀវទេសចរ។

លោក ធួន ស៊ីណាន បញ្ជាក់ថា បុណ្យភ្ជុំបិណ្ឌ ១៥ ថ្ងៃនេះ ជាបុណ្យប្រពៃណីជាតិ ហើយជា​បុណ្យ​សាសនា ដែលប្រជាជនកម្ពុជាមានទម្លាប់មួយគឺមានលុយ ឬមិនមានលុយ គឺគាត់ត្រូវតែ​បំពេញកិច្ចរបស់គាត់ហើយ ម្យ៉ាងទៀតពួកគាត់តែតែធ្វើដំណើរទៅស្រុកកំណើត​ដើម្បីជួបជុំញាតិ​មិត្តឪពុកម្ដាយ បងប្អូន ជាទម្លាប់ដូចបុណ្យចូលឆ្នាំ ហើយការដើរកម្សាន្ត ទម្លាប់ជនជាតិយើង​គាត់តែងតែដើរ។

លោក ធួន ស៊ីណាន បន្ថែមថា៖ «ខ្ញុំគិតថា ១០០% ប្រាកដជាមានការដើរលេងកម្សាន្ត ប៉ុន្តែ​គ្រាន់​​តែតិច និងច្រើន យើងមិនទាន់អាចស្មានដឹងនៅឡើយ ឆ្នាំ ២០២៤ នេះសេដ្ឋកិច្ចធ្ងន់​ជាង​ឆ្នាំ​មុន អញ្ចឹងពួកគាត់អាចប្ដូរគោលដៅ ដោយដើររយៈពេលខ្លី វិលល្ងាច ដើម្បីទប់​ទល់​ចំណូល​សេដ្ឋ​កិច្ច​របស់ខ្លួន​»៕

អត្ថបទ៖ ឡេង ដេត

The post ការកក់បន្ទប់ស្នាក់នៅតាមគោលដៅទេសចរណ៍មានតិចតួច ក្នុងឱកាសបុណ្យភ្ជុំបិណ្ឌ appeared first on Kampuchea Thmey Daily.

នៅ​ថ្ងៃ​ទី ២១ ខែ​វិច្ឆិកា ឆ្នាំ ២០២៣ នេះ លោក សោម ចិន្តា ប្រធាន​មន្ទីរ​ទេសចរណ៍​ខេត្ត​កែប បាន​ប្រាប់​ឲ្យ​ដឹង​ថា កាន់តែ​កៀក​ថ្ងៃ ក្រសួង​ទេសចរណ៍ និង​រដ្ឋបាល​ខេត្ត​កែប បាន​និង​កំពុង​ពន្លឿន​រៀបចំ​កន្លែង​ទីតាំង​ពិធី​បុណ្យ​សមុទ្រ​លើក​ទី ១០ ជុំ​ទី ៣ នៅ​ក្បែរ​ផ្សារ​ក្តាម ខេត្ត​កែប ឲ្យ​ល្អ​ប្រសើរ។ ទន្ទឹម​នោះ ប្រតិបត្តិ​ករ​លើ​សេវា​ស្នាក់នៅ​មួយ​ចំនួន ក៏បាន​ជំរុញ​ភ្ញៀវ​ទេសចរ ប្រញាប់​រួសរាន់​កក់​បន្ទប់​ឲ្យ​បាន​មុន​ថ្ងៃ​ពិធី​បុណ្យ​សមុទ្រ។

លោក សោម ចិន្តា បាន​បន្ត​ថា យោង​តាម​របាយការណ៍ សម្រាប់​ខេត្ត​កែប មាន​កន្លែង​សេវា​ស្នាក់នៅ​គ្រប់​ប្រភេទ​ជាង ១០០ កន្លែង និង​បន្ទប់​ជាង ៦១,៦០០ បន្ទប់។ ហើយ​សម្រាប់​ពិធី​បុណ្យ​សមុទ្រ​ដែល​ខិត​ជិត​មក​ដល់​នេះ នៅ​តាម​បណ្ដា​ទីតាំង​សេវា​ស្នាក់នៅ​ក្នុង​ខេត្ត​កែប ក៏​ទទួល​បាន​ការ​កក់​ទុក​​មួយ​ចំនួន​ដែរ។

ដោយឡែក អ្នកស្រី លី លី ម្ចាស់ផ្ទះ​សំណាក់ នៃ​ឆ្នេរ ក៏បាន​ឲ្យ​ដឹង​ដែរ​ថា គិត​ត្រឹម​ថ្ងៃនេះ មាន​ភ្ញៀវ​កក់​បន្ទប់​អ្នកស្រី​បាន​ប្រមាណ ៥០% ហើយ។

ចំណែក​ប្រតិបត្តិ​ករ​ទេសចរណ៍ លោក សុផាត ប្រធាន​ផ្នែក​លក់ និង​ទីផ្សារ នៃ​សណ្ឋាគារ សេ​វ៉ា​កា​រ៉ា ក៏បាន​បញ្ជាក់​ផង​ដែរ​ថា សណ្ឋាគារ​លោក​បាន​ទទួល​ការ​កក់​បន្ទប់​ជិត​នឹង​ពេញ​ហើយ សម្រាប់​ថ្ងៃ​ទី ២ នៃ​ពិធី​បុណ្យ​សមុទ្រ។ ដោយឡែក​សម្រាប់​ថ្ងៃ​ទី ១ និង​ថ្ងៃ​ទី ៣ ក៏​កំពុង​ទទួល​ការ​កក់​បន្ទប់​ទុក​ជា​បណ្តើរៗ ហើយ​ដែរ៕

អត្ថបទ ៖ សឹង រ៉ាត់

The post កៀកថ្ងៃបុណ្យសមុទ្រ ប្រតិបត្តិករទេសចរណ៍ អំពាវនាវភ្ញៀវពន្លឿនការកក់បន្ទប់ ខណៈ ខេត្តកែប មានកន្លែងស្នាក់នៅជាង ១០០ កន្លែង appeared first on Kampuchea Thmey Daily.