​ក្រសួងពាណិជ្ជកម្មនៅថ្ងៃទី ០៨ ខែធ្នូ ឆ្នាំ ២០២៥ ​បានកោះប្រជុំសិក្ខាសាលាមួយនៅរាជធានីភ្នំពេញ ដើម្បីធ្វើ​ការ​វាយតម្លៃពាក់​កណ្តាលអាណត្តិលើគោលនយោបាយជាតិស្តីពីស្វាយចន្ទី ២០២២–២០២៧។​

​សារៈសំខាន់នៃការវាយតម្លៃនេះបានកើតឡើង​ក្នុងអំឡុង​ពេល​នៃការផ្លាស់​ប្តូរសកល​យ៉ាង​ឆាប់រហ័ស ដែលត្រូវ​បាន​ជះឥទ្ធិពលដោយឧស្សាហកម្ម ៤.០ សេដ្ឋកិច្ចឌីជីថលខ្សែ​ច្រវាក់ផ្គត់ផ្គង់​ដែល​ផ្លាស់ប្តូរ ការប្រែប្រួល​អាកាសធាតុ និងការស្តារសេដ្ឋកិច្ចដែល​កំពុងដំណើរ​ក្រោយ​វិបត្តិជំងឺកូវីដ-១៩ (COVID-19)។​​

​​រាជរដ្ឋាភិបាលមានគោលបំណងពន្លឿនការអភិវឌ្ឍន៍ឧស្សាហកម្មស្វាយចន្ទីរបស់កម្ពុជា ពង្រឹងសមត្ថភាពកែច្នៃ គាំទ្រកសិករ និងលើកកម្ពស់សមត្ថភាពប្រកួតប្រជែងនៃការនាំចេញ។

រដ្ឋាភិបាលក៏​ផ្តល់ការអនុម័តគម្រោងវិនិយោគដែលមានលក្ខណៈសម្បត្តិគ្រប់គ្រាន់ (QIP) សម្រាប់​រោងច​ក្រ​កែច្នៃ​ស្វាយចន្ទីទាំងនៅខាងក្នុង ​សួនឧស្សាហកម្មស្វាយចន្ទី (CIP) និងនៅតាមបណ្តាខេត្តសក្តានុពលផ្សេងទៀត។

រដ្ឋាភិបាល​តភ្ជាប់សួនឧស្សាហកម្មទៅនឹងហេដ្ឋារចនាសម្ព័ន្ធចាំបាច់ដូចជា ទីលានសម្ងួតឃ្លាំង​សម្រាប់​ស្តុកទុក មន្ទីរពិសោធន៍ និងរោងចក្រកែច្នៃអនុផលពីស្វាយចន្ទី។​ ព្រមទាំងសិក្សា លទ្ធភាព​បញ្ចុះអត្រាថ្លៃអគ្គិសនីសម្រាប់អាជីវកម្មកសិ-ឧស្សាហកម្ម ដែល​ប្រតិបត្តិការនៅក្នុង​ សួនឧស្សាហកម្មស្វាយចន្ទី។ ​

​ក្រៅពីនេះ ​រដ្ឋាភិបាលនឹងបង្កើតយន្តការសេវាច្រកចេញចូលតែមួយ យកគំរូតាមតំបន់​សេដ្ឋកិច្ចពិសេស (SEZs) ដើម្បីសម្រួលនីតិវិធីនាំចេញ និងកាត់បន្ថយការចំណាយ​សម្រាប់​ក្រុម​ហ៊ុនឯកជន។ ​

​ធានាឱ្យសហគ្រាសធុនតូច និងមធ្យម (SMEs) កម្ពុជាក្នុង​វិស័យកែច្នៃ និងនាំ​ចេញស្វាយចន្ទី អាចទទួលបាន និងទាញ​យកផលប្រយោជន៍​ពីសួន​ឧស្សាហកម្ម។ ​សិក្សាលទ្ធភាពនៃការដាក់ចេញនូវកញ្ចប់លើកទឹកចិត្ត​បន្ថែមដែលត្រូវ​បានរៀប​ចំ​ឡើង​ជាពិសេស​សម្រាប់វិស័យស្វាយចន្ទី។

​កញ្ញា ​សឿន ​សុទ្ធនីតា សហស្ថាបនិកសិប្បកម្មកែច្នៃស្វាយចន្ទីស្ទឹងត្រែង ​យល់​ឃើញ​ថា៖​ «នៅ​ពេល​ដែលមាន​សួនឧស្សាហកម្មស្វាយចន្ទីរួម មានភាពងាយស្រួល ពីព្រោះនៅក្នុងសួន យើងអាច​ធ្វើ​អ្វីៗ បានទាំងអស់ មិនថាកែច្នៃ ឬក៏កែច្នៃផលិតផលអ្វីផ្សេងៗទៀត ចេញពីស្វាយចន្ទី»។

​លោក អួន ស៊ីឡុត ប្រធានសមាគមស្វាយចន្ទីកម្ពុជា មានប្រសាសន៍ថា​​ការវាយតម្លៃពាក់​កណ្តាល​អាណត្តិនេះបង្ហាញពីការប្តេជ្ញាចិត្តរបស់រដ្ឋាភិបាលក្នុងការប្រែក្លាយកម្ពុជាទៅជា មជ្ឈមណ្ឌល​កែច្នៃ​ស្វាយ​ចន្ទីក្នុងតំបន់ ដែលមានខ្សែច្រវាក់តម្លៃ​​កាន់តែរឹងមាំ ជីវភាពកសិករកាន់តែប្រសើរឡើង និង​សក្តានុពលនាំចេញកាន់តែខ្ពស់។

យោងតាមក្រសួងពាណិជ្ជកម្ម កម្ពុជា​រកចំណូល​បាន​ជាង ​៨០៧ ​លាន​ដុល្លារ ​ពី​ការ​នាំ​ចេញ​គ្រាប់​ស្វាយ​ចន្ទី ​នៅ​ក្នុង​រយៈពេល ​១០ ខែ ឆ្នាំ ២០២៥ ​កើន​ឡើង ​៦០,៩៣ ​ភាគរយ ​ធៀប​នឹង​រយៈពេល​ដូចគ្នានៅ​ឆ្នាំ ២០២៤៕

អត្ថបទ៖ ឡេង ដេត

The post រដ្ឋាភិបាលពន្លឿន​បង្កើតសួន​ឧស្សាហកម្មស្វាយចន្ទី ​ដើម្បីទាក់ទាញ​រោង​ចក្រកែច្នៃ​ appeared first on Kampuchea Thmey Daily.

លោក ជា ឡង់ឌី ម្ចាស់កសិដ្ឋានតាខ្មៅ បានប្រាប់ កម្ពុជាថ្មី ថា ទម្រាំតែមានកសិដ្ឋានកែច្នៃជីធម្មជាតិ ដូចបច្ចុប្បន្ននេះ លោក​ និងក្រុមគ្រួសារ បានចំណាយដើមទុនសរុបប្រមាណ ៣ម៉ឺនដុល្លារ ដើម្បីបើកសិដ្ឋានខ្នាតតូចមួយនេះឡើងមក។ ម្ចាស់កសិដ្ឋានរូបនេះ បន្តថា លោកបានផ្ដើមការកែច្នៃជីធម្មជាតិ ចាប់តាំងដើមឆ្នាំ ២០១២ មកម្ល៉េះ។

មូលហេតុដែលលោក ចាប់យកការកែច្នៃជីនេះ ក៏ព្រោះតែលោកគិតថា ស្រកីដូងទុំ ប្រសិនបើទុកចោលគ្មានអ្វីក្រៅពីយកទៅដុតចោលនោះទេ ហេតុនេះទើបលោកគិតថា ចង់សាកល្បងយកស្រកីដូងទុំ មកធ្វើជាជីធម្មជាតិ សម្រាប់ប្រើប្រាស់ក្នុងដំណាំផ្សេងៗ និងបានលក់ចេញទៅកាន់ទីផ្សារក្នុងស្រុក ផងដែរ។

លោក ជា ឡង់ឌី បានបន្ថែមទៀតថា សម្រាប់ពេលបច្ចុប្បន្ន លោកអាចលក់ជីធម្មជាតិ ទៅកាន់ទីផ្សារបានចន្លោះពី ៥០ បាវ ក្នុងមួយថ្ងៃ ឬគិតជាខែ បានប្រមាណជាង ៤ ទៅ៥ តោន ក្នុងមួយខែ និងអាចទទួលបានចំណូលពីមុខរបរមួយនេះ បានចន្លោះពី ៣ លានរៀល ទៅ ៤លានរៀល ក្នុងមួយខែ ជាប្រចាំ។

សម្រាប់គោលដៅ ទៅថ្ងៃខាងមុខទៀត លោក ជា ឡង់ឌី គ្រោងនឹងបង្កើនការកែច្នៃជីធម្មជាតិ ឱ្យបានកាន់តែច្រើនជាងនេះទៀត ប្រសិនបើមានការគាំទ្រពីសំណាក់ ប្រជាកសិករ និងម្ចាស់កសិដ្ឋានផ្សេងៗទៀត ផងដែរ។ ជាក់ស្ដែង នៅក្នុង កសិដ្ឋានរបស់លោក នាពេលបច្ចុប្បន្ននេះ មានជីធម្មជាតិ និងជីសរីរាង្គ ជាច្រើនមុខ សុទ្ធសឹងតែជា ជីសម្រាប់ប្រើប្រាស់ក្នុងការដាំដុះ កប់គល់ដំណាំ និង ការជំនួយឱ្យដំណាំលូតលាស់ បានលឿន និងទទួលបានផលយ៉ាងល្អប្រសើរ ថែមទៀត។

លោក ជា ឡង់ឌី បានបន្ថែមទៀតថា ភាគច្រើននៃអ្នកដែលទិញជីស្រកីដូង របស់លោកទៅប្រើប្រាស់ គឺមានដូចជា៖ កសិដ្ឋានដាំបន្លែសុវត្ថិភាព អ្នករស់នៅតាមបុរី និងអ្នកបណ្ដុះកូនឈើ ឬកូនរុក្ខជាតិ ផ្សេងៗ ដែលពួកគាត់យល់ច្បាស់ពី អត្ថប្រយោជន៍ នៃជីធម្មជាតិ ជាជាងការប្រើប្រាស់ជីគីមី ក្នុងការធ្វើកសិកម្ម ប្រចាំថ្ងៃ៕

អត្ថបទ ៖ សួស សិត

The post យុវជនម្នាក់ ចំណាយដើមទុន ៣ម៉ឺនដុល្លារ ដើម្បីប្រមូលទិញស្រកីដូងទុំ កែច្នៃជីធម្មជាតិ appeared first on Kampuchea Thmey Daily.

អ្នកគ្រប់គ្រងទូទៅនៃក្រុមហ៊ុនកែច្នៃសំរាម តុនតូតុន ខេត្តព្រះសីហនុ កញ្ញា សាយ លឹមជូរ បានប្រាប់់ឱ្យកម្ពុជាថ្មីដឹងថា ក្រុមហ៊ុនបានបង្កើតឡើងតាំងពីឆ្នាំ ២០២១ មានទីតាំងស្ថិតនៅខេត្តព្រះសីហនុ ដោយប្រមូល​ទិញ​ប្លាស្ទិកពីប្រជាពលរដ្ឋក្នុង​សហគមន៍យកមកកែច្នៃជាក្តារបន្ទះ និងសម្ភារៈប្រើប្រាស់ផ្សេងៗលក់ចេញទៅកាន់ទីផ្សារវិញ។

មូលហេតុដែលក្រុមហ៊ុនជ្រើសរើសខេត្តព្រះសីហនុជាគោលដៅចម្បង ក៏ព្រោះតែខេត្តនេះជាតំបន់ជាប់មាត់សមុទ្រ និងជាតំបន់ដែលងាយរងការបំផ្លាញបរិស្ថាន ពិសេសគឺការបំពុលទឹក ទើបក្រុមហ៊ុនចង់​ចូលរួមជាមួយរដ្ឋាភិបាលក្នុងការការពារបរិស្ថានតំបន់ដែលជាប់មាត់សមុទ្រ តាមរយៈ​ការ​កែច្នៃសំរាមប្លាស្ទិកដែលប្រមូលទិញពីសហគមន៍ជា​សម្ភារៈប្រើប្រាស់ផ្សេងៗ។

បើតាម​កញ្ញា សាយ លឹមជូរ ក្រុមហ៊ុន​មានម៉ាស៊ីនសម្រាប់កែច្នៃសំរាមនិងប្លាស្ទិក ឱ្យចេញទៅជាសម្ភារៈប្រើប្រាស់ក្នុងគេហដ្ឋាន ក្នុងនោះមាន៖ ក្តារបន្ទះ តុ កៅអី ថូផ្កា និង វត្ថុអនុស្សាវរីយ៍ផ្សេងៗទៀត ដែលកើតចេញពីសំរាមប្លាស្ទិករបស់ប្រជាពលរដ្ឋក្នុងសហគមន៍ក្នុងខេត្តព្រះសីហនុតែម្ដង។

កញ្ញា សាយ លឹមជូរ បានបញ្ជាក់ថា គោលដៅថ្ងៃអនាគត ក្រុមហ៊ុន​​នឹងធ្វើការជាមួយសហគមន៍ដើម្បីពន្យល់ណែនាំពលរដ្ឋ​កុំ​ឲ្យ​បោះចោលសំរាម ឬប្លាស្ទិក ចូលទៅក្នុងទឹកសមុទ្រ ដែលនាំឱ្យជាការបំពុលទឹកនិងធ្វើឱ្យខូចបរិស្ថាន៕

អត្ថបទ ៖ សួស សិត

The post ប្លាស្ទិកមិនមែនជាសំរាម អាចកែច្នៃជាក្ដារបន្ទះ សម្ភារៈផ្ទះបាយ និងវត្ថុអនុស្សាវរីយ៍ appeared first on Kampuchea Thmey Daily.

ក្រុមហ៊ុនជប៉ុន បង្ហាញពីបំណងចង់ចិញ្ចឹមមាន់ផលិតអំបោះធ្វើសម្លៀកបំពាក់នៅកម្ពុជានេះ ធ្វើឡើងនៅក្នុង​ជំនួបជាមួយសម្តេចនាយករដ្ឋមន្រ្តី ហ៊ុន ម៉ាណែត កាលពីពេលថ្មីៗនេះ ខណៈដែលវត្តមានសម្តេច ចូលរួមកិច្ចប្រជុំកំពូលរំឭកខួបអនុស្សាវរីយ៍អាស៊ាន-ជប៉ុន លើកទី៥០ នៅទីក្រុងតូក្យូ ប្រទេសជប៉ុន។

ការបង្ហាញបំណងរបស់ក្រុមហ៊ុនជប៉ុននេះ ស្របជាមួយរាជរដ្ឋាភិបាល ដែលកំពុងជំរុញឱ្យមាន​ការកាត់បន្ថយការ​ប្រើប្រាស់ប្លាស្ទិកក្នុងផលិតកម្មផ្សេងៗ ងាកមកប្រើប្រាស់វត្ថុធាតុដើមដែលងាយនឹងរំលាយទៅវិញ។

ថ្លែងនៅក្នុងពិធី «បិទសន្និបាតបូកសរុបលទ្ធផលការងារបរិស្ថានឆ្នាំ២០២៣ និងលើកទិសដៅការងារឆ្នាំ២០២៤» របស់ក្រសួងបរិស្ថាន កាលពីថ្ងៃទី ២១ ធ្នូ សម្តេច ហ៊ុន ម៉ាណែត បានលើកឡើងដូច្នេះថា«ខ្ញុំសូម​គាំទ្រពេញ​ទំហឹងក្នុងយុទ្ធនាការកាត់ប​ន្ថយការប្រើប្រាស់ប្លាស្ទិក ដែលក្រសួងបរិស្ថានបានដាក់ចេញ នាពេលថ្មីៗនេះ ជាពិសេសយុទ្ធនាការ«ថ្ងៃនេះខ្ញុំមិនប្រើថង់ប្លាស្ទិកទេ» ដែលរួមចំណែកផ្លាស់ប្តូរឥរិយាបទរបស់ប្រជាជន ចូលរួមកាត់បន្ថយការប្រើប្រាស់ប្លាស្ទិកប្រចាំថ្ងៃនៅកម្ពុជា»។

លើសពីនេះទៀត សម្តេច ជំរុញឱ្យបង្កើតជម្រើសល្អ ដែលធ្វើយ៉ាងណាមិនបង្កឱ្យមានផលប៉ះពាល់ដល់បរិស្ថាន និងរួមចំណែកជាមួយពិភពលោក ដើម្បីឆ្លើយតបទៅនឹងការប្រែប្រួលអាកាសធាតុ ក៏ដូចជាការរក្សាភាពបៃតង នៅលើភពផែនដីសម្រាប់អ្នកជំនាន់ក្រោយ។

The post ក្រុមហ៊ុនជប៉ុន ចង់វិនិយោគចិញ្ចឹមមាន់ផលិតអំបោះ​ធ្វើសម្លៀកបំពាក់នៅកម្ពុជា appeared first on Kampuchea Thmey Daily.

សហគ្រាស ហូមថេសហ្វូត បានបង្កើតឡើងកាលពីឆ្នាំ២០១៨ លើការកែច្នៃផលិតផលជលផល ពិសេសកែច្នៃត្រីងៀត ដើម្បីផ្គត់ផ្គត់ទីផ្សារនៅក្នុងខេត្តសៀមរាប ក៏ដូចជាតាមបណ្ដារាជធានី-ខេត្តមួយចំនួនរបស់កម្ពុជា និងនាំចេញទៅក្រៅប្រទេស។ អ្នកស្រី ស៊ឹម សេរីររ័ត្ន ម្ចាស់សហគ្រាសកែច្នៃត្រីងៀត ហូមថេសហ្វូត បានលើកឡើងដូច្នេះថា «មុនទទួលបានវិញ្ញាបនបត្រនិមិត្តសញ្ញាគុណភាពផលផលិតផលជលផលកម្ពុជា (CQS) យើងបានអនុវត្តស្តង់ដាររយៈពេល១ឆ្នាំ ហើយពេលអនុវត្តមានក្រុមសវនករ មកធ្វើសវនកម្មនៅក្នុងសហគ្រាសដែរផង»។ អ្នកស្រីម្ចាស់សហគ្រាស ក៏បានលើកឡើងនូវផលវិបាកនៃការស្នើសុំវិញ្ញាបនបត្រ CQS នេះ ដោយលោកស្រី បញ្ជាក់ថា ការស្នើសុំវិញ្ញាបនបត្រ CQS មានភាពតឹងតែងខ្លាំងណាស់ រហូតលោកស្រីចង់បោះបង់ចោល ព្រោះសហគ្រាសមិនមានធនធានគ្រប់គ្រាន់។

ប៉ុន្តែ ក្រោមគម្រោង CAPFISH ដែលសហការ និងផ្ដល់ការគាំទ្រថវិកាពីសហភាពអឺរ៉ុប និងអង្គការ UNIDO ហើយដឹកនាំអនុវត្តដោយរដ្ឋបាលជលផល គឺសហគ្រាសកែច្នៃត្រីងៀតរបស់អ្នកស្រី បានទទួលការគាំទ្រជាសម្ភារៈ បរិក្ខារ ជំនួយបច្ចេកទេស ក៏ដូចជាការប្រឹក្សាយោបល់លើការគ្រប់គ្រងអាជីវកម្ម រហូតសហគ្រាសទទួលបានវិញ្ញាបនបត្រ CQS នេះ។

បើតាមការបញ្ជាក់ឱ្យដឹងរបស់អ្នកស្រី ស៊ឹម សេរីរ័ត្ន បច្ចុប្បន្ននេះ សហគ្រាស ហូមថេសហ្វូត បានកែច្នៃត្រីរស់ចន្លោះពី ១០០ ទៅ ២០០គីឡូក្រាមក្នុងមួយថ្ងៃ ហើយផលិតផលត្រីងៀតនេះ ក៏បានកំពុងដាក់លក់នៅតាមផ្សារទំនើបធំៗមួយចំនួន ដូចជា ផ្សារទំនើបឡាក់គី ផ្សារអ៊ីអន ផ្សារម៉ាក្រូ ជាដើម។ ជុំវិញការនាំចេញផលិតផលត្រីងៀតនេះទៅកាន់ទីផ្សារបរទេស ត្រូវបានអ្នកស្រី បញ្ជាក់ថា មិនទាន់មានការនាំចេញជាផ្លូវការឡើយ ដោយសព្វថ្ងៃ បានត្រឹមនាំចេញក្រៅផ្លូវការទៅប្រទេសកាណាដា និងអូស្ត្រាលី ក្នុងទំហំតិចតួចបំផុត ចន្លោះពី៣០ ទៅ៤០គីឡូក្រាមប៉ុណ្ណោះ តាមជើងយន្តហោះ ខណៈអ្នកស្រី ក៏កំពុងខិតខំស្វែងរកទីផ្សារផ្លូវការដើម្បីនាំចេញ។

ម្ចាស់សហគ្រាសកែច្នៃត្រីរូបនេះ បានស្នើសុំឱ្យក្រសួងស្ថាប័នពាក់ព័ន្ធជួយសម្របសម្រួលនីតិវិធី ក៏ដូចជាឯកសារនាំចេញ កុំឱ្យតឹងតែងពេក ហើយជាមួយគ្នានោះ អ្នកស្រី ក៏ស្នើភាគីពាក់ព័ន្ធឱ្យជួយដល់អ្នកចិញ្ចឹមត្រី សំដៅធានាស្ថិរភាពក្នុងការចិញ្ចឹមត្រីពេញមួយរដូវ ដើម្បីអាចមានត្រីគ្រប់គ្រាន់សម្រាប់ការកែច្នៃ និងការផ្គត់ផ្គង់ទីផ្សារក្នុងប្រទេស ក៏ដូចជាការនាំចេញទៅទីផ្សារអន្តរជាតិ៕

The post សហគ្រាស ហូមថេសហ្វូត នៅខេត្តសៀមរាប ក្លាយជាសហគ្រាសគំរូលើការកែច្នៃផលិតផលជលផល appeared first on Kampuchea Thmey Daily.

វិស័យទាំងបីនោះ រួមមាន វិស័យកសិកម្ម ការកែច្នៃកសិកម្ម និងវិស័យឧស្សាហកម្ម​​។ លោកបណ្ឌិត គី សេរីវឌ្ឍន៍ អ្នកជំនាញសេដ្ឋកិច្ចនៃរាជបណ្ឌិត្យកម្ពុជា បានលើកឡើងថា វិស័យកសិកម្ម គឺជាវិស័យយុទ្ធសាស្រ្ត ដ៏មានសារសំខាន់ ដែលគ្រប់ប្រទេសទាំងអស់ មិនដែលមើល​រំលងឡើយ។ ដើម្បីធ្វើឱ្យមានប្រសិទ្ធិភាពលើវិស័យកសិកម្ម ទី១ ត្រូវជំរុញ​ផលិត​កសិផលជំនួសឱ្យការនាំចូលឱ្យបាន, ទី២ ជំរុញវិស័យកសិកម្មសម្រាប់នាំចេញ ដូចជាដំណាំកសិឧស្សាហកម្ម កៅស៊ូ ស្វាយចន្ទី មៀន ជាដើម និងទី៣ ត្រូវមានវិធានការទប់ស្កាត់ការក្រឡុកទីផ្សាររបស់ឈ្មួញ ពីប្រទេសជិតខាង។

ទន្ទឹមនឹងផលិតបានហើយ ត្រូវមានការកែច្នៃផលិតផលកសិកម្ម ដែលនៅសេសសល់។ លោកបណ្ឌិត គី សេរីវឌ្ឍន៍ បានបន្ថែមថា រាជរដ្ឋាភិបាល ត្រូវតែលើកទឹកចិត្តឱ្យមានការកែច្នៃ ដើម្បីទប់ទល់ការនាំចូល លក់នៅក្នុងស្រុក និងជំរុញ​ការផលិតសម្រាប់នាំចេញ។

ដោយឡែកចំណុចមួយទៀតនោះគឺ វិស័យឧស្សាហកម្ម។ លោកបណ្ឌិត គី សេរីវឌ្ឍន៍ បានកត់សម្គាល់ឃើញថា កម្ពុជា បានអភិវឌ្ឍវិស័យឧស្សាហកម្មធុនធំបានល្អប្រសើរ មានដូចជា ការដំឡើងរថយន្ត និងកង់ សម្រាប់នាំចេញ​ទៅក្រៅ​ប្រទេស​បានជាច្រើន។ ប៉ុន្តែអ្វីដែលលោក ជំរុញបន្ថែមទៀតនោះ គឺការផលិតគ្រឿងបង្គុំរថយន្ត ឬគ្រឿងបង្គុំកង់​ឱ្យបាន​ច្រើនថែមទៀត នោះកាន់តែប្រសើរ។

លើសពីនេះទៅទៀត លោកបណ្ឌិត គី សេរីវឌ្ឍន៍ មើលឃើញថា ការផ្លាស់ប្តូរមេដឹកនាំ គឺជាការផ្លាស់ប្តូររចនា​សម្ព័ន្ធ​សេដ្ឋ​កិច្ចថ្មី​មួយពី Grow ដែលមានកម្រិត Smooth ឱ្យកាន់តែស្ទុះងើបឡើងមួយកម្រិតថែមទៀត។​ ដោយលោកបាន​ឱ្យតម្លៃទៅលើយុវជន គឺជាកម្លាំងផលិត និងបង្កើតផលិតភាពយ៉ាងសំខាន់សម្រាប់ប្រទេស។ បច្ចុប្បន្ននេះ រាជរដ្ឋាភិបាល បាននិងកំពុងជំរុញការបណ្តុះបណ្តាលវិជ្ជាជីវៈ ដើម្បីបង្កើតសមត្ថភាព​កម្លាំងពលកម្មបន្ថែម។

អ្នកជំនាញសេដ្ឋកិច្ច សង្ឃឹមថា រាជរដ្ឋាភិបាលថ្មី អាចនឹងរៀបចំគោលនយោបាយ​សម្រាប់ជួយវិស័យសហគ្រាសធុនតូច និង មធ្យម SME ឱ្យកាន់តែរឹងមាំថែមទៀត ព្រោះ ៦០ភាគរយ នៃអាជីវកម្មនៅ​ក្នុងប្រទេស គឺជា SME៕

The post ​អ្នកជំនាញសេដ្ឋកិច្ច ៖ វិស័យបី ត្រូវអភិវឌ្ឍជាចាំបាច់​ក្នុងអាណត្តិរដ្ឋាភិបាលថ្មី appeared first on Kampuchea Thmey Daily.

ដល់ឆ្នាំ ១៩៩៩ លោក Bruce បានទិញយន្តហោះ Boeing ៧២៧ ពីអាកាសចរណ៍អូឡាំពិកក្នុងតម្លៃ ១០ ម៉ឺនដុល្លារ ប៉ុន្តែដោយសារបញ្ហាដឹកជញ្ជូនលោកចាំបាច់ត្រូវចំណាយ ១២ ម៉ឺនដុល្លារបន្ថែមទៀត ដូច្នេះយន្តហោះនេះមានតម្លៃសរុប ២២ ម៉ឺនដុល្លារ ។

នៅខាងក្នុងយន្តហោះមានគ្រប់យ៉ាងតាមសេចក្ដីត្រូវការប្រៀបបាននឹងផ្ទះដ៏ពេញលេញមួយដូចជា បង្គន់ ពូកគេង ម៉ាស៊ីនបោកខោអាវ កន្លែងលាងចាន និងចង្ក្រានសម្រាប់ធ្វើម្ហូបផងដែរ ។

ជាក់ស្ដែងកាលពីក្មេង Bruce Campell មានបំណងសាងសង់ផ្ទះធម្មតាប៉ុណ្ណោះ បន្ទាប់ពីគាត់ស្គាល់ជាងកាត់សក់ស្រី Joanne Ussery ដែលទិញយន្តហោះ Boeing ៧២៧ ប្រែក្លាយជាផ្ទះ ទើបគាត់ផ្លាស់ប្ដូរផែនការធ្វើតាមនាងទៅវិញ ៕

ប្រែសម្រួល ៖ វារី

ចុចអាន ៖ បុរសម្នាក់វង្វេងក្នុងព្រៃអាម៉ាហ្សូន ៣១ ថ្ងៃ នៅមានជីវិតដោយសារញ៉ាំដង្កូវជាអាហារ

The post អតីតវិស្វករអគ្គិសនីមួយរូប កែច្នៃយន្តហោះទៅជាផ្ទះដ៏កក់ក្ដៅនៅក្នុងព្រៃ សហរដ្ឋអាមេរិក appeared first on Kampuchea Thmey Daily.

មជ្ឈមណ្ឌលកែច្នៃប្លាស្ទិកឡើងវិញ“Trash is Nice” បានឱ្យដឹងថា មជ្ឈមណ្ឌលមួយនេះ បានដើរប្រមូលកាកសំណល់ប្លាស្ទិកដែលលែងត្រូវការ ប្លាស្ទិកនៅតាមរោងចក្រ និងប្លាស្ទិកផ្សេងៗដែលមនុស្សប្រើប្រាស់ មុននឹងប្លាស្ទិកទាំងនោះត្រូវបានយកទៅចាក់នៅគំនរសំរាម ដើម្បីកែច្នៃជាវត្ថុប្រើប្រាស់ផ្សេងៗ។ សម្ភារៈប្រើប្រាស់ដែលបានកែច្នៃរួចមានដូចជា ក្រាសសិតសក់ បន្តោងសោ ប្រដាប់ដាក់សាប៊ូ ទ្រនាប់កែវទឹក ផើងផ្កាជាដើម។ ពណ៌នីមួយៗដែលមាននៅក្នុងសម្ភារៈទាំងអស់នោះ គឺបានមកពីការលាយបញ្ចូលគ្នារវាងពណ៌នៃប្លាស្ទិកទាំងអស់ ដោយមិនមានបន្ថែមពណ៌អ្វីទៀតឡើយ។ នៅពេលដែលចេញជារូបរាងអាចប្រើប្រាស់បាន គឺយកទៅលក់នៅតាមទីផ្សារផលិតផលខ្មែរ លក់តាមការតាំងពិព័រណ៌ ឬ អង្គការផ្សេងៗ។ សម្ភារៈទាំងនោះ មានដាក់លក់ចាប់ពីតម្លៃ ២ដុល្លារ ទៅ៨ដុល្លារ។

កញ្ញា Alix ដែលជាស្ថាបនិករបស់មជ្ឈមណ្ឌល “Trash is Nice” ប្រាប់មក “កម្ពុជាថ្មី”ថា មជ្ឈមណ្ឌលមួយនេះមានវត្តមាននៅកម្ពុជាជាង ៥ឆ្នាំមកហើយ ចំពោះទីតាំងនៅភ្នំពេញមានប្រហែលជាង១ឆ្នាំហើយនៅក្នុងសួន Treellion Park កោះពេជ្រ។  “Trash is Nice” ត្រូវបានបង្កើតឡើងដោយមានគោលបំណង២ គឺទី១ ដើរប្រមូលប្លាស្ទិក និងកែច្នៃប្លាស្ទិកទាំងនោះឡើងវិញ។ ទី២ គឺការពារបរិស្ថានដោយខិតខំព្យាយាមផ្សព្វផ្សាយអំពីសំណល់ប្លាស្ទិកទៅដល់ក្មេងៗ ប្រជាជនទូទៅ អង្គការនានា ដោយខាង “Trash is Nice” មានជាសៀវភៅសម្រាប់ណែនាំអំពីប្លាស្ទិក និងដំណើរការនៃការផលិតផលិតផលចេញពីប្លាស្ទិករបស់ “Trash is Nice” ផងដែរ។

កញ្ញា Alix បានបន្តថា កាកសំណល់ប្លាស្ទិកដែលបានមក គឺត្រូវរើសដាក់ផ្សេងៗគ្នា ដោយបានបែងចែកតាមប្រភេទនីមួយៗបន្ទាប់មកយកទៅលាងសម្អាត។ បន្ទាប់មកយកប្លាស្ទិកទាំងនោះទៅឈូសជាចំណែកៗ ហើយក៏ដាក់ទៅតាមប្រភេទពណ៌នីមួយៗ។ ក្រោយទៀត ក្នុងដំណាក់កាលកែច្នៃ គឺរំលាយប្លាស្ទិកទាំងនោះដោយម៉ាស៊ីនកំដៅ រួចចាប់ផ្តើមលាយពណ៌ផ្សេងៗតាមការចង់បាន ហើយចាក់ចូលក្នុងពុម្ព។ ចុងក្រោយសង្កាត់វា ទើបចេញជាសមិទ្ធផលវត្ថុប្រើប្រាស់នានាយ៉ាងស្រស់ស្អាត។

ស្ថាបនិករូបនេះ បាននិយាយថា៖ “យើងក៏មានបើកជាសិក្ខាសាលាដល់សិស្ស ឬ មហាជនដែលចង់ស្វែងយល់ពីប្លាស្ទិក និងពីរបៀបកែច្នៃឡើងវិញ”។

រយៈពេល៥ឆ្នាំនៅកម្ពុជា ជាលទ្ធផលឃើញថា ប្រជាជនមានការយល់ដឹងច្រើនពីការប្រើប្រាស់ឡើងវិញរបស់ប្លាស្ទិក បើប្រៀបធៀបនឹង៥ឆ្នាំមុន។ មនុស្ស បានបង្កើតយុទ្ធនាការនានាកាន់តែច្រើនឡើងៗ ដើម្បីការពារបរិស្ថាន និងការប្រើប្រាស់ប្លាស្ទិកនេះ។ នេះបើតាមការលើកឡើងរបស់កញ្ញា Alix។

កញ្ញាក៏បានផ្តាំផ្ញើរបស់ប្រជាជនគ្រប់រូប គួរកាត់បន្ថយការប្រើប្រាស់ប្លាស្ទិកតាមអ្វីដែលអាចធ្វើទៅបាន។ ទោះបីជាការកែច្នៃប្លាស្ទិកឡើងវិញ ជាមធ្យោបាយមួយក្នុងចំណោមដំណោះស្រាយផ្សាយទៀត ប៉ុន្តែ ក៏ត្រូវការពេលវេលាច្រើន ដើម្បីធ្វើវាផងដែរ។ អង្គការផ្សេងៗ ក៏បានបើកសិក្ខាសាលានិយាយពីបញ្ហានេះច្រើន ដូច្នេះ ប្រសិនបើយើងទាំងអស់គ្នារួមគ្នាការពារបរិស្ថានដោយកាត់បន្ថយការប្រើប្រាស់ប្លាស្ទិក នោះ គឺជារឿងប្រសើរបំផុត។

យ៉ាងណាមិញ ជាការឆ្លើយតបជុំវិញនឹងបញ្ហានេះ ក្រសួង និងអង្គការពាក់ពាក់ព័ន្ធបានបង្កើតជាយុទ្ធនាការ សិក្ខាសាលា និងគម្រោងជាបន្តបន្ទាប់ ដើម្បីផ្សព្វផ្សាយពីការប្រើប្រាស់ និងកាត់បន្ថយប្លាស្ទិកទៅដល់សាធារណជន ដើម្បីចូលរួមចំណែកក្នុងកិច្ចការពារបរិស្ថានក្នុងប្រទេសកម្ពុជា និងទូទាំងសកលលោកផងដែរ៕

ដោយ៖ អុន ស្រីមាន

The post “Trash is Nice” ប្រមូលកាកសំណល់ប្លាស្ទិកទៅកែច្នៃធ្វើជាសម្ភារៈប្រើប្រាស់ផ្សេងៗ appeared first on Kampuchea Thmey Daily.