ការនាំចេញទំនិញ Archives - Kampuchea Thmey Daily

ការដោះដូរទំនិញអន្តរជាតិកម្ពុជា មានទំហំជាង ១១ ពាន់លានដុល្លារ

deth leng — Tue, 10 Mar 2026 04:50:34 +0000

ការដោះដូរទំនិញរវាងកម្ពុជា ជាមួយដៃគូអន្តរជាតិសម្រេចបាននូវទំហំទឹកជាង ១១ ពាន់លានដុល្លារ នៅក្នុងរយៈពេល ២ ខែ (មករា-កុម្ភៈ) ឆ្នាំ ២០២៦ កើនឡើង ១៧,៦% ប្រៀបធៀបនឹងរយៈពេលដូចគ្នា នៅឆ្នាំ ២០២៥ ដែលមានទំហំទឹកប្រាក់ ៩,៤ ពាន់លានដុល្លារ។ នេះបើយោងតាមទិន្នន័យរបស់អគ្គនាយកដ្ឋានគយ និងរដ្ឋាករកម្ពុជា (GDCE) ចេញផ្សាយនៅថ្ងៃទី ១០ ខែមីនា ឆ្នាំ ២០២៦។

ទិន្នន័យរបស់ GDCE បង្ហាញថា ចាប់ពីខែមករា ដល់ខែកុម្ភៈ ឆ្នាំ ២០២៦ ការនាំចេញ-នាំចូលទំនិញរវាងកម្ពុជា ជាមួយដៃគូអន្តរជាតិមានទំហំទឹកប្រាក់សរុប ១១,១១ ពាន់លានដុល្លារ កើនឡើង ១៧,៦% ក្នុងនោះកម្ពុជានាំចេញមានតម្លៃ ៥,២២ ពាន់លានដុល្លារ កើនឡើង ១៧,២% ចំណែកឯទំនិញនាំចូលកម្ពុជា មានតម្លៃ ៥,៨៨ ពាន់លានដុល្លារ កើន ១៨%។

អ្នកឧកញ៉ា លឹម ហេង អនុប្រធានសភាពាណិជ្ជកម្មកម្ពុជា មានប្រសាសន៍ថា គម្រោងវិនិយោគនៅកម្ពុជាមានការកើនឡើង បានបង្កើនការផលិត ខណៈកម្ពុជានៅបន្តទទួលបានប្រព័ន្ធអនុគ្រោះពន្ធដូចជា EBA និង GSP ពីបណ្ដាប្រទេសមួយចំនួន ឬក៏កិច្ចព្រមព្រៀងពាណិជ្ជកម្មសេរី កម្ពុជា-ចិន, កម្ពុជា-កូរ៉េ និងបណ្ដាប្រទេសមួយចំនួនទៀត ដែលនាំឱ្យការនាំចេញរបស់កម្ពុជាកើនឡើង។

លោក ប៉ែន សុវិជាតិ រដ្ឋលេខាធិការ និងជាអ្នកនាំពាក្យក្រសួងពាណិជ្ជកម្ម មានប្រសាសន៍ថា កម្ពុជានៅតែរក្សាបានទីផ្សារសំខាន់ៗរបស់ខ្លួន ដែលជាទីផ្សារពិភពលោក ធានាបាននូវការផ្គត់ផ្គង់ បង្កើតសក្ដានុភាព ក្នុងខ្សែច្រវាក់តម្លៃ និងខ្សែច្រវាក់ផ្គត់ផ្គង់ និងរក្សាបាននូវជំនឿចិត្តពីអ្នកបញ្ជាទិញ។

ទំនិញសំខាន់ៗរបស់កម្ពុជា ដែលនាំចេញទៅទីផ្សារអន្តរជាតិ មានសំបកកង់រថយន្ត គ្រឿងបន្លាស់ គ្រឿងបង្គុំគ្រឿងអគ្គិសនី និងសង្ហារឹម ព្រមទាំងសម្លៀកបំពាក់ ស្បែកជើង និងសម្ភារធ្វើដំណើរ។ ដៃគូពាណិជ្ជកម្មសំខាន់ៗរបស់កម្ពុជារួមមាន ចិន អាស៊ាន អាមេរិក សហភាពអឺរ៉ុប ជប៉ុន កាណាដា អង់គ្លេស កូរ៉េខាងត្បូង អូស្ត្រាលី និងឥណ្ឌា។

យោងតាមក្រសួងពាណិជ្ជកម្ម នៅក្នុងឆ្នាំ ២០២៥ ទំហំពាណិជ្ជកម្មអន្តរជាតិរបស់កម្ពុជា សម្រេចបាននូវទំហំទឹកប្រាក់ ៦៥,២៥ ពាន់លានដុល្លារ កើនឡើង ១៨% ធៀបនឹងឆ្នាំ ២០២៤ ក្នុងនោះកម្ពុជានាំចេញទៅទីផ្សារអន្តរជាតិសម្រេចបាន ៣១,២៨ ពាន់លានដុល្លារ កើនឡើង ១៧% និងនាំចូលមកវិញមានតម្លៃ ៣៣,៩៦ ពាន់លានដុល្លារ កើនឡើង ១៨%៕

អត្ថបទ៖ ឡេង ដេត

The post ការដោះដូរទំនិញអន្តរជាតិកម្ពុជា មានទំហំជាង ១១ ពាន់លានដុល្លារ appeared first on Kampuchea Thmey Daily.

ចិនហាមឃាត់ការនាំចេញទំនិញពាក់ព័ន្ធយោធាទៅជប៉ុន ខណៈជម្លោះការទូតកាន់តែក្តៅ

Minea Neu — Tue, 06 Jan 2026 10:14:03 +0000

ប្រទេសចិនបានហាមឃាត់ការនាំចេញទំនិញនានាទាំង វិស័យពាណិជ្ជកម្ម និងយោធា សំដៅដល់អ្នកប្រើប្រាស់ទាំងឡាយរបស់ខ្លួនឱ្យបញ្ចប់ទំនាក់ទំនងនានា ដែលទាក់ទងជាមួយវិស័យយោធារបស់ជប៉ុន ចំពេលមានជម្លោះការទូតអូសបន្លាយរវាងទីក្រុងប៉េកាំង និងតូក្យូ។

លោកស្រី សាណាអេ តាកាអ៊ិឈិ និង លោក ស៊ី។ Reuters

យោងតាមសារព័ត៌មាន South China Morning Post ឱ្យដឹងថា ក្រសួងពាណិជ្ជកម្មចិនបានប្រកាសនៅថ្ងៃអង្គារថាការនាំចេញវត្ថុទាំងឡាយណា ដែលត្រូវបានកត់សម្គាល់ថាជាទំនិញ ប្រើពីរដង ដល់អ្នកប្រើប្រាស់ជប៉ុន ក្នុងគោលបំណងជួយវិស័យយោធា និងរួមចំណែកដល់ការបង្កើនសមត្ថភាពយោធារបស់ប្រទេសជប៉ុន គឺត្រូវហាមឃាត់ជាបន្ទាន់។

ក្រសួងបានលើកឡើងថា អង្គភាពនិងបុគ្គលណាដែលផ្ទេរ ឬផ្គត់ផ្គង់ទំនិញទាំងនេះទៅប្រទេសជប៉ុនដោយរំលោភលើបទប្បញ្ញត្តិថ្មីនេះ នឹងត្រូវទទួលខុសត្រូវតាមផ្លូវច្បាប់។

នាយករដ្ឋមន្រី្តជប៉ុន លោកស្រី សាណាអេ តាកាអ៊ិឈិ បានធ្វើឱ្យទីក្រុងប៉េកាំងខឹងសម្បារ កាលពីថ្ងៃទី៧ ខែវិច្ឆិកា ឆ្នាំ២០២៥ ដោយលើកឡើងថាការវាយប្រហាររបស់ចិនលើកោះតៃវ៉ាន់ អាចបង្កឱ្យមានការឆ្លើយតបពីយោធាជប៉ុន។

តែយ៉ាងណា លោកស្រី Mao Ning អ្នកនាំពាក្យក្រសួងការបរទេសចិនបាននិយាយនៅក្នុងសន្និសីទសារព័ត៌មានកាលពីថ្ងៃអង្គារថា៖ «ប្រទេសចិននឹងរួមដៃគ្នាជាធ្នុងមួយ និងសហការជាមួយប្រជាជនដែលស្រឡាញ់សន្តិភាពនៅជុំវិញពិភពលោក មិនអនុញ្ញាតឱ្យកងកម្លាំងស្តាំនិយមរបស់ជប៉ុនបង្វិលកង់នៃប្រវត្តិសាស្ត្របានឡើយ ហើយក៏មិនអនុញ្ញាតឱ្យរបបយោធាវិលត្រលប់មកវិញដាច់ខាត»។

ប្រែសម្រួល៖ ណឺ មិនា

The post ចិនហាមឃាត់ការនាំចេញទំនិញពាក់ព័ន្ធយោធាទៅជប៉ុន ខណៈជម្លោះការទូតកាន់តែក្តៅ appeared first on Kampuchea Thmey Daily.

គយ អនុញ្ញាតឱ្យជំពាក់ការបំពេញបែបបទយ៉ាងយូរ ៣០ ថ្ងៃ ក្រោយទទួលទំនិញ

Din Thary — Mon, 19 May 2025 07:53:00 +0000

អគ្គនាយកដ្ឋានគយ និងរដ្ឋាករកម្ពុជា អាចអនុញ្ញាតឱ្យជំពាក់បែបបទគយយ៉ាងយូរ ៣០ ថ្ងៃ ក្រោយទទួលទំនិញ ឬគិតចាប់ពីថ្ងៃចុះបញ្ជីកាប្រតិវេទន៍គយ។ នេះបើយោងតាមសេចក្តីប្រកាសព័ត៌មានរបស់ក្រសួងសេដ្ឋកិច្ច និងហិរញ្ញវត្ថុ ស្តីពី «ការអនុញ្ញាតឱ្យយកទំនិញចេញ មុនពេលបញ្ចប់ការបំពេញបែបបទបញ្ចេញទំនិញពីគយ»។

ក្នុងសេចក្តីប្រកាសព័ត៌មានដដែលបានឱ្យដឹងថា ការអនុញ្ញាតឱ្យជំពាក់បែបបទគយ អាចជាកម្មវត្ថុនៃការតម្កល់និមុត្តិធានាជាសាច់ប្រាក់ ឬជាទម្រង់ផ្សេងទៀតតាមការសម្រេចរបស់អគ្គនាយកដ្ឋានគយ និងរដ្ឋាករកម្ពុជា ស្របតាមបទប្បញ្ញត្តិនៃប្រកាសស្តីពីនិមុត្តិធានា។ អគ្គនាយកដ្ឋានគយ ត្រូវដោះបន្ទុកនិមុត្តិធានាឱ្យបានឆាប់តាមដែលអាចធ្វើទៅ បានក្រោយពេលពិនិត្យឃើញថាកាតព្វកិច្ចនានា ត្រូវបានបំពេញរួចរាល់។

ក្នុងនោះ ទំនិញនាំចូលដោយជំពាក់បែបបទគយ អាចជាកម្មវត្ថុនៃការត្រួតពិនិត្យរូបវន្ត។ ករណីរកឃើញ នូវភាពខុសគ្នារវាងទំនិញនាពេលប្រកាសនាំចូល និងទំនិញជាក់ស្តែង ត្រូវជាកម្មវត្ថុនៃការបង់ពន្ធនិងអាករ ពិន័យ និងទោសទណ្ឌផ្សេងទៀតតាមច្បាប់ស្តីពីគយ។

ជាក់ស្តែង ចំពោះការអនុញ្ញាតឱ្យជំពាក់បែបបទគយ ត្រូវបានផ្តល់រយៈពេលយ៉ាងយូរ ៣០ថ្ងៃ ក្រោយពេលទទួលទំនិញ ឬគិតចាប់ពីថ្ងៃចុះបញ្ជីកាប្រតិវេទន៍គយលើកលែងតែទំនិញនាំចូលដែលរង់ចាំវិញ្ញាបនបត្របញ្ជាក់ដើមកំណើតទំនិញត្រូវបានផ្តល់ជូនរយៈពេលយ៉ាងយូរ ៩០ ថ្ងៃ ដើម្បីឱ្យម្ចាស់ទំនិញ ឬតំណាងធ្វើនិយ័តកម្មសងបែបបទគយ។

ជាមួយគ្នានេះដែរ អគ្គនាយកដ្ឋានគយ និងរដ្ឋាករកម្ពុជា អាចពន្យាររយៈពេលជំពាក់បែបបទគយបានចំនួន ១ លើក នៃរយៈពេលដែលត្រូវបានអនុញ្ញាតដំបូង តាមការស្នើសុំជាលាយលក្ខណ៍អក្សររបស់ម្ចាស់ទំនិញ ឬតំណាង ក្នុងករណីមានហេតុផលសមស្របតាមច្បាប់ និងបទប្បញ្ញត្តិជាធរមាន។ ការពន្យាររយៈពេល ជំពាក់បែបបទគយបន្ថែមទៀតសោត ត្រូវមានការអនុញ្ញាតពីក្រសួងសេដ្ឋកិច្ច និងហិរញ្ញវត្ថុ។

សូមបញ្ជាក់ថា អគ្គនាយកដ្ឋានគយកម្ពុជា អាចអនុញ្ញាតឱ្យជំពាក់បែបបទគយមិនលើសពី ៥ ជើងដឹកជញ្ជូន។ ការអនុញ្ញាតឱ្យជំពាក់បែបបទគយបន្តទៀតបានលុះត្រាតែម្ចាស់ទំនិញ ឬតំណាង បានធ្វើនិយ័តកម្មសងបែបបទគយចាប់ពីមួយជើងដឹកជញ្ជូនឡើងទៅជាមុន ឬត្រូវតម្កល់និមុត្តិធានាតាមបទប្បញ្ញត្តិជាធរមាន៕

The post គយ អនុញ្ញាតឱ្យជំពាក់ការបំពេញបែបបទយ៉ាងយូរ ៣០ ថ្ងៃ ក្រោយទទួលទំនិញ appeared first on Kampuchea Thmey Daily.

ទំនិញ ៧ ប្រភេទ អនុញ្ញាតឱ្យជំពាក់បែបបទគយក្នុងការនាំចេញ

Din Thary — Mon, 19 May 2025 04:39:07 +0000

តាមសេចក្តីប្រកាសព័ត៌មានរបស់ក្រសួងសេដ្ឋកិច្ច និងហិរញ្ញវត្ថុ ស្តីពី «ការអនុញ្ញាតឱ្យយកទំនិញចេញ មុនពេលបញ្ចប់ការបំពេញបែបបទបញ្ចេញទំនិញពីគយ» បានគូសបញ្ជាក់ឱ្យដឹងថា មានមុខទំនិញចំនួន ៧ ប្រភេទ ដែលត្រូវបានអនុញ្ញាតឱ្យជំពាក់បែបបទគយសម្រាប់ការនាំចេញ។

យោងតាមតម្រូវការចាំបាច់របស់ក្រសួងសេដ្ឋកិច្ច និងហិរញ្ញវត្ថុ ទំនិញដែលអាចត្រូវបានអនុញ្ញាតឱ្យជំពាក់បែបបទគយទាំង ៧ ប្រភេទ នោះ រួមមាន ១.ទំនិញនាំចូលរបស់ក្រសួង-ស្ថាប័នរដ្ឋ, ២.ទំនិញនាំចូលក្នុងក្របខ័ណ្ឌ ហិរញ្ញប្បទាន និងទំនិញនាំចូលរបស់គម្រោងវិនិយោគសាធារណៈ, ៣.ទំនិញនាំចូលរបស់គម្រោងវិនិយោគមានលក្ខណៈសម្បត្តិគ្រប់គ្រាន់ (គ.ល.គ.) និងសហគ្រាស ធុនតូច និងមធ្យម។ ៤.ទំនិញនាំចូលជាកម្មវត្ថុនៃការបង់ពន្ធអាករដែលមានតម្រូវការបន្ទាន់ឬចាំបាច់ ប៉ុន្តែពុំទាន់ មានការសម្រេចពីមន្ត្រីគយ និងរដ្ឋាករមានសមត្ថកិច្ច លើទិដ្ឋភាពបច្ចេកទេសគយ ដូចជា តម្លៃគិតពន្ធគយ ចំណាត់ថ្នាក់ទំនិញ ឬដើមកំណើតទំនិញជាដើម, ៥.ទំនិញត្រូវរង់ចាំសេចក្តីសម្រេចលើការតវ៉ា ឬទំនិញត្រូវបានឃាត់ទុកបណ្តោះអាសន្ន, ៦.ទំនិញឆាប់ខូចគុណភាពដែលពុំមានហានិភ័យដល់សុខុមាលភាព សន្តិសុខ និងសុវត្ថិភាពសង្គម និង៧.ទំនិញផ្សេងទៀតដែលទទួលបានការអនុញ្ញាតពីក្រសួងសេដ្ឋកិច្ចនិងហិរញ្ញវត្ថុ។

ជាមួយគ្នានោះ ពាក់ព័ន្ធនិងការជំពាក់បែបបទគយ គឺមិនត្រូវបានអនុញ្ញាតចំពោះទំនិញហាមឃាត់ និងទំនិញជាប់កម្រិតកំណត់ លើកលែងតែមានការអនុញ្ញាតឱ្យជំពាក់បែបបទពីក្រសួង-ស្ថាប័នមានសមត្ថកិច្ច។

ដើម្បីទទួលបានការអនុញ្ញាតឱ្យជំពាក់បែបបទគយ ម្ចាស់ទំនិញ ឬតំណាង ត្រូវស្នើសុំជាលាយលក្ខណ៍អក្សរដោយភ្ជាប់ឯកសារពាក់ព័ន្ធមកអគ្គនាយកដ្ឋានគយ និងរដ្ឋាករកម្ពុជា។

ទន្ទឹមនោះ ម្ចាស់ទំនិញ ឬតំណាង ត្រូវធានាពីភាពត្រឹមត្រូវនៃសំណុំឯកសារដែលដាក់ស្នើសុំជំពាក់បែបបទគយ។ ដោយឡែក ការស្នើសុំការអនុញ្ញាតជំពាក់បែបបទគយរបស់អ្នកអភិវឌ្ឍន៍តំបន់ និងវិនិយោគិនក្នុងតំបន់សេដ្ឋកិច្ចពិសេសត្រូវអនុវត្តតាមនីតិវិធីគយពិសេសដែលកំណត់ដោយអគ្គនាយកដ្ឋានគយ និងរដ្ឋាករកម្ពុជា៕

The post ទំនិញ ៧ ប្រភេទ អនុញ្ញាតឱ្យជំពាក់បែបបទគយក្នុងការនាំចេញ appeared first on Kampuchea Thmey Daily.

ការនាំចេញកសិផលកម្ពុជា ឆមាសទី១ កើនឡើងជិត ៦០ ភាគរយ ជាកំណើនមិនធ្លាប់មាន

KC Virak — Sun, 21 Jul 2024 01:50:41 +0000

តាមបណ្ដាញសង្គមតេឡេក្រាមរបស់ សម្ដេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានឱ្យដឹងថា វិស័យកសិកម្ម ក្នុងរយៈពេល ៦ខែ ឆ្នាំ២០២៤ កើនឡើងជិត ៦០ ភាគរយ ជាកំណើនមិនធ្លាប់មាន។

ក្នុងឆមាសទី១ ឆ្នាំ២០២៤ ការនាំចេញកសិផលរបស់កម្ពុជា សម្រេចបានជាង ៦លានតោន កើនឡើងជិត ៦០ភាគរយ ធៀបនឹងឆមាសទី១ ក្នុងឆ្នាំ២០២៣ ដែលជាកំណើនមិនធ្លាប់មាន ក្នុងរយៈពេល ៥ឆ្នាំចុងក្រោយ។ កសិផលប្រមាណ ៦លានតោន បាននាំចេញទៅកាន់ទីផ្សារ គោលដៅចំនួន ៧៧ ប្រទេសទូទាំងពិភពលោក។

៩៤% នៃកសិផលកម្ពុជា គឺឆ្ពោះទៅកាន់ទីផ្សារសំខាន់ៗដូចជា៖ – ប្រទេសចិន៖ ចេក អង្ករ ដំឡូងមី ស្វាយ និងមៀន។ ប្រទេសរៀតណាម៖ ស្រូវ ចន្ទី ដំឡូងមី ស្វាយស្រស់។ ប្រទេសថៃ៖ ដំឡូងមី ស្វាយស្រស់ ម្ទេស កន្ទក់ ។

កសិផលកម្ពុជា ដែលកំពុងមានកំណើនទីផ្សារក្រៅពីស្រូវ ស្វាយចន្ទី និងដំឡូងមី៖ ស្វាយស្រស់ ដំណាប់ស្វាយ ទុរេន គ្រាប់ពោត មៀនស្រស់ ម្រេច និងម្ទេសស្រស់។ គ្រាប់ស្វាយចន្ទីឆៅ៖ មានទំហំនាំចេញជាង ៨០០ លានដុល្លារ ប្រហែល ១ ភាគ ៣ នៃតម្លៃនាំចេញ កសិផលសរុបរបស់កម្ពុជា។

ទំហំទឹកប្រាក់ពីការនាំចេញ៖ កសិផលក្រៅពីស្រូវ-អង្ករ ៖ ជាង ១ ៨០០ លានដុល្លារ។ កសិផលស្រូវ៖ ជាង ៤០០ លានដុល្លារ។ កសិផលអង្ករ៖ ជាង ២០០ លានដុល្លារ។ ប្រភេទដំឡូងមី៖ មានបរិមាណជាង ២,៥០ លានតោន ដែលជាកំណើនខ្ពស់ជាងគេទី១ ក្នុងចំណោមកសិផលសំខាន់ដទៃទៀត ដោយទទួលបានទឹកប្រាក់ចំនួនជាង ៤៥០ លានដុល្លារអាមេរិក៕

The post ការនាំចេញកសិផលកម្ពុជា ឆមាសទី១ កើនឡើងជិត ៦០ ភាគរយ ជាកំណើនមិនធ្លាប់មាន appeared first on Kampuchea Thmey Daily.

មន្ត្រីណែនាំឱ្យពង្រឹងទប់ស្កាត់ការនាំចូលផលិតផលកសិកម្មខុសច្បាប់

Din Thary — Tue, 24 Oct 2023 04:20:20 +0000

មន្ត្រីជាន់ខ្ពស់ក្រសួងកសិកម្ម រុក្ខាប្រមាញ់ និងនេសាទ បានណែនាំឱ្យមន្ត្រីកសិកម្មចូលរួមទប់ស្កាត់ការនាំចូលធាតុចូលកសិកម្មខុសច្បាប់នៅតាមខេត្តជាប់ព្រំដែន និងលក់តាម Online មិនមានចុះបញ្ជីការ ត្រឹមត្រូវ ដែលនាំឱ្យមានការប៉ះពាល់ដល់សុខភាព។

ថ្លែងក្នុងកិច្ចប្រជុំពិភាក្សាការងារស្តីពី ការពង្រឹងការងារគ្រប់គ្រងថ្នាំកសិកម្ម និងជីកសិកម្មកាលពីថ្ងៃទី២៣ ខែតុលា លោក គង់ ច័ន្ទវាសនា រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ បានណែនាំដល់មន្ត្រីត្រូវយកចិត្តទុកដាក់ទប់ស្កាត់ការនាំចូលធាតុចូលកសិកម្មខុសច្បាប់ ជាពិសេសនៅបណ្ដាខេត្តជាប់ព្រំដែន ការលក់ Onlineមិនមានចុះបញ្ជីការ ការក្លែងបន្លំគុណភាព ដែលនាំឱ្យមានការប៉ះពាល់សុខភាពបរិស្ថាន និងបញ្ហាផ្សេងៗ។

លើសពីនេះទៀត ត្រូវពិនិត្យលទ្ធភាពលើសុពលភាពបញ្ជីការឱ្យលើសពី ៣ឆ្នាំផងដែរ និងត្រូវផ្តល់វគ្គបណ្ដុះបណ្ដាលដល់អ្នកលក់ធាតុចូលកសិកម្ម និងពង្រឹងការផ្សព្វផ្សាយដល់កសិករលើការប្រើប្រាស់ធាតុចូលកសិកម្មឱ្យត្រឹមត្រូវតាមបទដ្ឋានបច្ចេកទេស។

លោករដ្ឋលេខាធិការក៏បានណែនាំដល់ អគ្គនាយកដ្ឋានកសិកម្មត្រូវសិក្សាបន្ថែម និងត្រូវការសហការគ្នាឱ្យបានល្អទាំងថ្នាក់ជាតិ និងថ្នាក់ក្រោមជាតិ និងត្រូវមានរបបរបាយការណ៍ប្រចាំខែច្បាស់លាស់ត្រឹមត្រូវ តាមដានការត្រួតពិនិត្យ និងផ្សព្វផ្សាយអំពីច្បាប់និងធាតុចូលកសិកម្មដល់អាជីវករ និងកសិករ អ្នកប្រើប្រាស់ឱ្យបានទូលំទូលាយ ដើម្បីអនុវត្តការងារគ្រប់គ្រងថ្នាំកសិកម្ម និងជីកសិកម្មនេះឱ្យបានល្អបំផុត។

នៅក្នុងឱកាសនោះដែរ លោករដ្ឋលេខាធិការក៏បានគូសបញ្ជាក់អំពីទស្សនាទានកសិកម្ម និងអនុសាសន៍រដ្ឋមន្ត្រីកសិកម្មដែលផ្ដោតសំខាន់លើការធានាសន្តិសុខស្បៀង គុណភាពផលិតផល និងស្ថិរភាពតម្លៃក្នុងខ្សែច្រវាក់តម្លៃល្អ ការជំរុញសហគមន៍កសិកម្មតាមគំរូថ្មី ព្រមទាំងការដាក់ពង្រាយមន្ត្រីផ្សព្វផ្សាយកសិកម្មឃុំ ដើម្បីជួយដល់កសិករក្នុងការកាត់បន្ថយថ្លៃដើមផលិតកម្ម និងបង្កើនប្រាក់ចំណេញ៕

អត្ថបទ៖ សំអឿន

The post មន្ត្រីណែនាំឱ្យពង្រឹងទប់ស្កាត់ការនាំចូលផលិតផលកសិកម្មខុសច្បាប់ appeared first on Kampuchea Thmey Daily.

កម្ពុជា សម្រេចបានថវិកាជាង ១៤ពាន់លានដុល្លារ ពីការនាំចេញទំនិញសំខាន់ៗជាង ២០មុខ

Sophal Tuon — Fri, 18 Aug 2023 07:00:23 +0000

សម្រាប់ទំនិញសំខាន់ៗរបស់កម្ពុជា ដែលបាននាំចេញទៅកាន់ទីផ្សារអន្តរជាតិ មានចំណូលប្រមាណ ១៤ពាន់លានដុល្លារ គិតត្រឹមរយៈពេល ៧ខែ ឆ្នាំ ២០២៣ ហើយចំពោះការនាំចេញនេះ បានរួមចំណែកជួយជំរុញកំណើនសេដ្ឋកិច្ចជាតិ យ៉ាងសំខាន់ផងដែរ។

តាមយោងរបាយការណ៍អគ្គនាយកដ្ឋានគយ និងរដ្ឋាករកម្ពុជា បានចេញផ្សាយក្នុងខែ កក្កដា បានឱ្យដឹងថា សម្រាប់ទំនិញសំខាន់ៗដែលត្រូវបាននាំចេញរួមមាន សម្លៀកបំពាក់ និងគ្រឿងបន្ទាប់បន្សំដែលធ្វើឡើងពីក្រណាត់ មានទឹកប្រាក់ចំនួន ៣ពាន់លានដុល្លារ មានការថយចុះ ២២.៧ ភាគរយ ធៀបនឹងឆ្នាំ ២០២២ មានចំនួន ៩.៩ ពាន់លានដុល្លារ។ សម្រាប់ម៉ាស៊ីន និងឧបករណ៍អគ្គិសនី មានចំនួនទឹកប្រាក់ប្រមាណ ១.៨ ពាន់លានដុល្លារ មានកំណើន ១៣.៧ ភាគរយ ធៀបរយៈពេលដូចគ្នានៅឆ្នាំ ២០២២។

ចំពោះគុជខ្យងធម្មជាតិ ឬចិញ្ចឹម ត្បូងថ្មមានតម្លៃ មានចំនួនទឹកប្រាក់ ៦០៧ លានដុល្លារ កើនឡើង ៤.៥ ភាគរយ ធៀបរយៈពេលដូចគ្នាកាលពីឆ្នាំ ២០២២ ចំនួន ១៦៩ លានដុល្លារ។ ជាមួយគ្នានេះដែរ សម្រាប់ស្បែកជាប់រោម ស្បែកសិប្បនិម្មិត និផលិតផលរបស់វា មានកំណើនប្រមាណ ១.២ ភាគរយ ក្នុងឆ្នាំ ២០២៣ នេះ។

សម្រាប់ប្រដាប់ប្រដារក្មេងលេង ល្បែង និងវត្ថុចាំបាច់សម្រាប់កីឡា មានទំហំទឹកប្រាក់ចំនួន ៩២ លានដុល្លារ មានការកើនឡើង ០.៧ ភាគរយ បើធៀបនឹងឆ្នាំ ២០២២ មាន ៧១លានដុល្លារ រួមមានទំនិញសំខាន់ៗជាច្រើនផ្សេងៗទៀត។

គូរពញ្ជាក់ឱ្យដឹងផងដែរថា កម្ពុជា មានទំហំពាណិជ្ជកម្មជាមួយអន្តរជាតិ សម្រេចបានប្រមាណជាង ២៧,៧ ពាន់លានដុល្លារ រយៈពេល ៧ខែ ឆ្នាំ ២០២៣នេះ ពោលគឺមានការធ្លាក់ចុះជាង ១៥ ភាគរយ បើធៀបនឹងរយៈពេលដូចគ្នាកាលពីឆ្នាំ ២០២២ គឺមានជាង ៣២,៨ពាន់លានដុល្លារ។

អត្ថបទ៖ ផល ធារិត

The post កម្ពុជា សម្រេចបានថវិកាជាង ១៤ពាន់លានដុល្លារ ពីការនាំចេញទំនិញសំខាន់ៗជាង ២០មុខ appeared first on Kampuchea Thmey Daily.

កម្ពុជា បានចំណូលពីការនាំចេញទំនិញសំខាន់ ២០មុខ ជាង ៩.១ពាន់លានដុល្លារ ៥ខែ ឆ្នាំនេះ

Sophal Tuon — Tue, 27 Jun 2023 02:51:49 +0000

ទំនិញសំខាន់ៗរបស់កម្ពុជា ដែលនាំចេញទៅកាន់ទីផ្សារអន្តរជាតិ បានចំណូលប្រមាណ ៩.១ពាន់លានដុល្លារ រយៈពេល ៥ខែ ឆ្នាំ ២០២៣ ដែលការនាំចេញនេះ បានជួយជំរុញកំណើនសេដ្ឋកិច្ចជាតិយ៉ាងសំខាន់ផងដែរ។ នេះបើតាមយោងតាមអគ្គនាយកដ្ឋានគយ និងរដ្ឋាករកម្ពុជា។

បើតាមអគ្គនាយកដ្ឋានគយ ក្នុងចំណោមទំនិញទាំងនោះរួមមាន សម្លៀកបំពាក់ និងគ្រឿងបន្ទាប់បន្សំដែលធ្វើពីក្រណាត់ នាំចេញគិតជាទឹកប្រាក់ចំនួន ១.៨ពាន់លានដុល្លារ មានការថយចុះ ២៦.១% បើធៀបនឹងរយៈពេលដូចគ្នាកាលពីឆ្នាំ ២០២២ មានចំនួនជាង ២.៥ពាន់លានដុល្លារ។ ម៉ាស៊ីន និងឧបករណ៍អគ្គិសនី សម្រេចបានជាង ១.២ពាន់លានដុល្លារ កើនឡើង ៩៦% ធៀបនឹងឆ្នាំ ២០២២ មានចំនួនជាង ៦៣៩លានដុល្លារ។ គុជខ្យងធម្មជាតិ ឬចិញ្ចឹម ត្បូងថ្មមានតម្លៃ ឬតម្លៃមធ្យម សម្រេចបានជាង ៤៧១លានដុល្លារ កើនឡើងជាង ២៦០%។ ផ្លែឈើ គ្រាប់ផ្លែឈើ និងសម្បកឈើ សម្រេចបានការនាំចេញបានទឹកប្រាក់ ៤៧៨លានដុល្លារ កើនឡើងជាង ២០%។ កៅស៊ូ និងផលិតផលធ្វើអំពីកៅស៊ូ នាំចេញទទួលបានទឹកប្រាក់ជាង ២៦០លានដុល្លារ កើនឡើង ៤១.៤ភាគរយ។ វត្ថុធាតុប្លាស្ទិច និងវត្ថុធាតុធ្វើពីប្លាស្ទិចកៅស៊ូ ចំនួនជាង ១២៩លានដុល្លារ ថមចុះ ៣២% រួមទាំងទំនិញសំខាន់មួយចំនួនទៀត។

ប្រទេសដែលមានពាណិជ្ជកម្មទំនិញសំខាន់ជាមួយកម្ពុជា រួមមាន ប្រទេសចិន អាមេរិក វៀតណាម ថៃ ជប៉ុន សិង្ហបុរី ឥណ្ឌូណេស៊ី អាល្លឺម៉ង់ តៃវ៉ាន់ កាណាដា អង់គ្លេស កូរ៉េខាងត្បូង ម៉ាឡេស៊ី អេស្ប៉ាញ អូស្រ្តាលី ឥណ្ឌា និងហុងកុង ជាដើម។

សម្រាប់ការធ្វើពាណិជ្ជកម្មរវាងកម្ពុជា និងអន្តរជាតិ សម្រេចបានប្រមាណជិត ២០ពាន់លានដុល្លារ រយៈពេល ៥ខែ ចាប់ពីខែ មករា ដល់ខែ ឧសភា ឆ្នាំ ២០២៣ ពោលគឺមានការថយចុះ ១៤.១% បើធ្វើនឹងរយៈពេលដូចគ្នាកាលពីឆ្នាំ ២០២២ មានចំនួនជាង ២២ពាន់លានដុល្លារអាមេរិក។ នេះបើតាមយោងតាមអគ្គនាយកដ្ឋានគយ និងរដ្ឋាករកម្ពុជា៕

The post កម្ពុជា បានចំណូលពីការនាំចេញទំនិញសំខាន់ ២០មុខ ជាង ៩.១ពាន់លានដុល្លារ ៥ខែ ឆ្នាំនេះ appeared first on Kampuchea Thmey Daily.

ការនាំចេញទំនិញ Archives - Kampuchea Thmey Daily

​ការ​ដោះដូរ​ទំនិញ​អន្តរជាតិ​កម្ពុជា ​មានទំហំ​ជាង ​១១ ​ពាន់​លានដុល្លារ​

ចិន​ហាមឃាត់​ការ​នាំចេញ​​​​ទំនិញ​ពាក់​ព័ន្ធ​​យោធា​ទៅ​​​​​ជប៉ុន​​ ខណៈ​​ជម្លោះការទូត​​​កាន់​​តែ​​ក្តៅ​

គយ អនុញ្ញាតឱ្យជំពាក់ការបំពេញបែបបទ​យ៉ាងយូរ ៣០ ថ្ងៃ ក្រោយទទួលទំនិញ