នៅពេលមនុស្សនិយាយអំពីការប្រកួតប្រជែងរវាងកម្ពុជា និងថៃ ការពិភាក្សាជាញឹកញាប់តែងតែត្រឡប់ទៅរកប្រធានបទចាស់ៗដូចជា បញ្ហាព្រំដែន ប្រវត្តិសាស្ត្រ ឬការប្រៀបធៀបកម្រិតសម្បត្តិសេដ្ឋកិច្ច។ ប៉ុន្តែការមើលបែបនោះ គឺមើលឃើញតែផ្ទៃខាងក្រៅប៉ុណ្ណោះ ហើយមិនអាចបង្ហាញភាពពិតជ្រាលជ្រៅនៃអ្វីដែលកំពុងកើតមានឡើងនោះទេ។ អ្វីដែលកំពុងកើតឡើងពិតប្រាកដ មិនមែនជាការប្រកួតអំពីទំហំ ឬអំណាចទេ ប៉ុន្តែជាការប្រកួតនៃ “ល្បឿនសេដ្ឋកិច្ច” ដែលបង្ហាញពីថាមពលនៃការផ្លាស់ប្តូរ និងសមត្ថភាពក្នុងការរីកចម្រើន។

ជាទូទៅ ការវាយតម្លៃសេដ្ឋកិច្ចតែងផ្អែកលើសូចនាករដែលឈរ៖ ទំហំ GDP ចំណូលមធ្យមមនុស្សម្នាក់ បរិមាណនាំចេញ ឬទំហំហេដ្ឋារចនាសម្ព័ន្ធ។ ទាំងនេះមានសារៈសំខាន់ ប៉ុន្តែវាប្រាប់ថា “មានអ្វីខ្លះ” មិនមែន “បានមកដល់ទីនេះដោយរបៀបណា” ឬ “កំពុងផ្លាស់ទីលឿនប៉ុនណា” នោះទេ។ ការវាស់វែងសេដ្ឋកិច្ចតាមទ្រព្យសម្បត្តិសរុប គឺដូចជាការវាស់ការប្រកួតរត់មួយ ដោយមើលតែអ្នកឈ្នះចុងក្រោយ ប៉ុន្តែមិនដឹងថាអ្នកណាចាប់ផ្តើមពីណា ឬអ្នកណាកំពុងរត់ឡើងភ្នំ។

ហេតុនេះហើយ គំនិតនៃ “ល្បឿនសេដ្ឋកិច្ច” ក្លាយជាគន្លឹះសំខាន់។ វាមិនសួរថាប្រទេសណាមានច្រើនជាងគេនោះទេ ប៉ុន្តែសួរថា ប្រទេសណាកំពុងកសាងខ្លួនបានលឿនជាងគេ។ វាវាស់ល្បឿននៃការបង្កើតសមត្ថភាព ស្ថាប័ន ជំនាញ និងទំនុកចិត្ត។ វាមើលទៅលើចលនានៃការផ្លាស់ប្តូរ មិនមែនតែចំណុចចុងក្រោយ។

នៅពេលយើងមើលតាមកញ្ចក់នេះ ការប្រៀបធៀបរវាងថៃ និងកម្ពុជា ប្រែរូបរាងទាំងស្រុង។

ប្រទេសថៃមានប្រវត្តិនៃការអភិវឌ្ឍន៍យូរជាង ៣សតវត្សរ៍។  ប្រទេសនេះបានទទួលអត្ថប្រយោជន៍ពីស្ថិរភាពនយោបាយ ការប្រមូលផ្តុំស្ថាប័ន និងការបង្កើតទ្រព្យសម្បត្តិជាបន្តបន្ទាប់។ ជាយូរមកហើយ ថៃបានបង្កើតហេដ្ឋារចនាសម្ព័ន្ធ មនុស្សធនធាន ប្រព័ន្ធឧស្សាហកម្ម និងឥទ្ធិពលតំបន់យ៉ាងរឹងមាំ។ ទោះបីមានភាពរំខាននយោបាយនៅពេលខ្លះក៏ដោយ ប្រទេសថៃនៅតែឈរលើមូលដ្ឋានសេដ្ឋកិច្ចដ៏ជ្រៅជាងគេមួយនៅក្នុងតំបន់។

ផ្ទុយទៅវិញ កម្ពុជា មានប្រវត្តិខុសគ្នាខ្លាំង។ ការចាប់ផ្តើមសម័យទំនើបរបស់កម្ពុជាមិនមែនកើតឡើងមុនសតវត្សរ៍ទេ ប៉ុន្តែទើបតែប្រហែល ២៥ ឆ្នាំប៉ុណ្ណោះ។ ការបំផ្លាញសង្គម សេដ្ឋកិច្ច និងបញ្ញាជាតិ ក្នុងសម័យខ្មែរក្រហម បានបំបាត់មូលដ្ឋានគ្រប់យ៉ាង។ ពេលសន្តិភាពមកដល់ កម្ពុជា មិនមែនកំពុងស្ដារឡើងវិញពីការខូចខាតធម្មតា ប៉ុន្តែកំពុងស្ថាបនា​ជាតិឡើងវិញពីសូន្យ។

ក្នុងបរិបទនេះ ការរីកចម្រើនរបស់កម្ពុជាក្នុងរយៈពេល ២៥ ឆ្នាំចុងក្រោយ មិនមែនជារឿងធម្មតាទេ ប៉ុន្តែជារឿងគួរឱ្យភ្ញាក់ផ្អើល។ ប្រទេសបានសាងសង់ហេដ្ឋារចនាសម្ព័ន្ធ ធ្វើឱ្យទីក្រុងរីកចម្រើន បង្កើតឧស្សាហកម្ម និងបណ្តុះជំនាន់អ្នកជំនាញថ្មី។ កម្ពុជាបានផ្លាស់ប្តូរពីស្ថានភាពរស់រានមានជីវិត មកជាអ្នកចូលរួមសកម្មក្នុងសេដ្ឋកិច្ចពិភពលោក ក្នុងរយៈពេលត្រឹមតែមួយជំនាន់ប៉ុណ្ណោះ — អ្វីដែលប្រទេសជាច្រើនចំណាយពេលរាប់សតវត្សរ៍។

ទោះជាយ៉ាងណា ការប្រៀបធៀបនៅតែបន្ត។ ចំណូលមធ្យមរបស់ថៃនៅតែខ្ពស់​ ​។ ប៉ុន្តែការវាស់វែងបែបនេះមើលរំលងអថេរដ៏សំខាន់មួយគឺ “ពេលវេលា”។ ប្រទេសដែលមានពេល ៣០០ ឆ្នាំសម្រាប់បង្កើតទ្រព្យសម្បត្តិ តែងតែឃើញថាខ្លួនមានអត្ថប្រយោជន៍ជាងប្រទេសដែលមានត្រឹម ២៥ ឆ្នាំ។ សំណួរពិតប្រាកដមិនមែនថា “នរណារកបានច្រើនជាង” ប៉ុន្តែ “នរណាកំពុងខិតជិតលឿនជាងគេ”។

ហើយត្រង់នេះហើយដែលគំនិតអំពី “ល្បឿនសេដ្ឋកិច្ច” ក្លាយជារឿងដែលធ្វើឲ្យមិនស្រួលចិត្ត។ នៅពេលប្រទេសតូចមួយចាប់ផ្តើមរត់លឿន អារម្មណ៍គំរាមកំហែងអាចកើតឡើងចំពោះអ្នកដែលធ្លាប់ស្ថិតនៅជួរមុខ។ ការប្រកួតមិនមែនជារឿងអរូបីទៀតទេ ប៉ុន្តែបង្ហាញខ្លួនក្នុងការវិនិយោគ ពលកម្ម ពាណិជ្ជកម្ម និងឥទ្ធិពលតំបន់។ នៅពេលនោះ ភាពតានតឹងអាចកើតឡើង មិនមែនដោយសារកំហឹង ប៉ុន្តែដោយសារភាពមិនសុខចិត្តចំពោះការផ្លាស់ប្តូរតុល្យភាពអំណាច។

ទស្សនៈនេះបង្ហាញថា ភាពតានតឹងមួយចំនួនរវាងកម្ពុជា និងថៃ អាចមិនមែនកើតពីប្រវត្តិសាស្ត្រប៉ុណ្ណោះទេ ប៉ុន្តែពីការផ្លាស់ប្តូរឌីណាមិកសេដ្ឋកិច្ច។ នៅពេលការប្រកួតកាន់តែជិតស្និទ្ធ សមត្ថភាពក្នុងការទប់ស្កាត់ ឬពន្យារល្បឿនរបស់អ្នកដទៃ ក៏អាចក្លាយជាយុទ្ធសាស្ត្រមួយដែរ។

យ៉ាងណាមិញ នេះគឺជាឱកាសដ៏សំខាន់បំផុតសម្រាប់កម្ពុជា។ ការលូតលាស់លឿនមិនមែនជាការធានានៃជោគជ័យយូរអង្វែងទេ។ ល្បឿនដែលគ្មានទិសដៅ អាចនាំទៅរកការខាតបង់រចនាសម្ព័ន្ធ ភាពមិនស្មើគ្នា និងការរីកចម្រើនមិនស្មើភាព។ ដំណាក់កាលបន្ទាប់សម្រាប់កម្ពុជា គឺមិនមែនបង្ហាញថាអាចរត់លឿនប៉ុណ្ណា ប៉ុន្តែត្រូវបង្ហាញថាអាចបំលែងល្បឿននោះទៅជាស្ថិរភាពបានយ៉ាងដូចម្តេច។

វាមានន័យថា ត្រូវពង្រឹងស្ថាប័នជាតិ ទាំងរដ្ឋ និងឯកជន បង្កើតខ្សែសង្វាក់តម្លៃក្នុងស្រុក បណ្តុះសហគ្រិនជាតិ និងធានាថាការលូតលាស់នាំមកនូវផលប្រយោជន៍សម្រាប់សង្គមទាំងមូល មិនមែនសម្រាប់មនុស្សតិចតួច។ វាត្រូវការភាពជឿជាក់លើខ្លួនឯង និងចក្ខុវិស័យវែងឆ្ងាយ។

នៅចុងក្រោយ សំណួរមិនមែនថា កម្ពុជាអាច “តាមទាន់” ថៃឬអត់ទេ។ សំណួរពិតប្រាកដគឺ ថាតើកម្ពុជាអាចរក្សាល្បឿន បំលែងវាទៅជាស្ថាបត្យកម្មសេដ្ឋកិច្ចរឹងមាំ និងបង្កើតអនាគតដែលមានគុណភាព និងស្ថិរភាពឱ្យប្រជាជនខ្លួនបានឬអត់។

ហើយនៅពេលនោះ ប្រវត្តិសាស្ត្រនឹងមិនចងចាំថា នរណាចាប់ផ្តើមមុនទេ ប៉ុន្តែនឹងចងចាំថា នរណាអាចផ្លាស់ប្តូរខ្លួនឯងបានល្អបំផុត។

​

លោក ដេវីដ វ៉ាន់ (David Van)
ជាអ្នកជំនាញ​ ក្នុងវិស័យការផ្លាស់ប្តូរសេដ្ឋកិច្ច ការអភិវឌ្ឍភាពជាដៃគូរដ្ឋ–ឯកជន (PPP) ការកំណត់យុទ្ធសាស្ត្រនយោបាយសាធារណៈ និងហិរញ្ញវត្ថុចម្រុះ (Blended Finance) ព្រមទាំងការអភិវឌ្ឍសមត្ថភាពធនធានមនុស្ស និងជំនាញវិជ្ជាជីវៈ (TVET)។

លោកមានបទពិសោធន៍ជាង ៤០ ឆ្នាំ ក្នុងការប្រឹក្សា និងដឹកនាំគម្រោងជាមួយរាជរដ្ឋាភិបាល ស្ថាប័នអន្តរជាតិ និងក្រុមហ៊ុនពហុជាតិ ក្នុងការកសាងសេដ្ឋកិច្ចមានភាពធន់ ទំនើប និងមានសមត្ថភាពប្រកួតប្រជែង។

លោកដើរតួនាទីសំខាន់ក្នុងការអភិវឌ្ឍគោលនយោបាយសាធារណៈជាច្រើន រួមមាន កម្មវិធីដៃគូរដ្ឋ–ឯកជន ការកែទម្រង់យុទ្ធសាស្ត្រពាណិជ្ជកម្ម ការលើកកម្ពស់វិនិយោគ និងការផ្លាស់ប្តូររចនាសម្ព័ន្ធសេដ្ឋកិច្ចជាតិ។ លោកក៏ជាអ្នកផ្តល់យោបល់ជាប្រចាំអំពីប្រធានបទសេដ្ឋកិច្ចភូមិសាស្ត្រ ការប្រែប្រួលហិរញ្ញវត្ថុសកល និងយុទ្ធសាស្ត្រអភិវឌ្ឍន៍ប្រកបដោយចីរភាព។

ជាមួយបទពិសោធន៍ធ្វើការជាមួយរដ្ឋាភិបាល ក្រុមហ៊ុនពហុជាតិ និងស្ថាប័នអភិវឌ្ឍន៍អន្តរជាតិ លោក David Van ត្រូវបានទទួលស្គាល់យ៉ាងទូលំទូលាយថាជាសម្លេងសំខាន់មួយក្នុងការបកស្រាយ និងបម្លែងគំនិតសេដ្ឋកិច្ចស្មុគស្មាញឱ្យក្លាយជាយុទ្ធសាស្ត្រអនុវត្តបាន ពិតប្រាកដ និងមានប្រសិទ្ធភាពសម្រាប់ការអភិវឌ្ឍជាតិ៕

The post ល្បឿនសេដ្ឋកិច្ច និងការប្រកួតពិតប្រាកដរវាងកម្ពុជា និងថៃ appeared first on Kampuchea Thmey Daily.

​ទិន្នន័យ​របស់​ក្រសួងពាណិជ្ជកម្ម ​បង្ហាញ​ថា គិត​ចាប់​ពី​ខែ​មករា ដល់​ខែកញ្ញា ឆ្នាំ ២០២៥ ​ទំហំ​ពាណិជ្ជ​កម្ម​ទ្វេ​ភាគី​កម្ពុជា- ​អង់គ្លេស​សរុប ៨២៤ លានដុល្លារ ​ក្នុង​នោះ​កម្ពុជា​​នាំ​ទំនិញ​ចេញ​ទៅ​អង់គ្លេស​មាន​ទំហំទឹក​ប្រាក់​ ៧៨៦ លាន​ដុល្លារ ​កើន​ឡើង ៥,៣៥% ​ចំណែក​អង់គ្លេស​នាំចូល​មកវិញ​មានតម្លៃ ​៣៨,៤៥ ​លាន​ដុល្លារ ​ធ្លាក់​ចុះ​ ៣,១៩ ​ភាគរយ​។

​ផលិតផល​សំខាន់ៗ ​ដែល​កម្ពុជា នាំ​ទៅ​អង់គ្លេសមានដូចជា​សម្លៀកបំពាក់ ស្បែកជើង កង់ជាដើម។

​​លោកស្រី ចម និម្មល រដ្ឋមន្ត្រីក្រសួងពាណិជ្ជកម្ម មានប្រសាសន៍ថា ​កម្ពុជា និង​ចក្រភពអង់​គ្លេស​មានទំនាក់ទំនងជិតស្និទ្ធលើគ្រប់វិស័យ ជាពិសេសក្នុងវិស័យពាណិជ្ជកម្ម និងវិនិយោគ។

​លោក​បណ្ឌិត ជ័យ តិច អ្នក​ស្រាវ​ជ្រាវ​ការ​អភិវឌ្ឍ​សង្គម-សេដ្ឋកិច្ច យល់ឃើញថា ពាណិជ្ជកម្មទ្វេភាគី​កម្ពុជា-អង់គ្លេស មានលក្ខណៈល្អប្រសើរនៅឆ្នាំនេះ ដែលយើទទួលបានការអនុគ្រោះពន្ធពីអង់គ្លេស ពិសេសគឺការនាំចេញវិស័យវាយ​នភណ្ឌ កាត់ដេរ និងគ្រឿងបង្គុំអគ្គិសនី នាំចេញទៅអង់គ្លេក្នុងអត្រាសូន្យភាគរយ។

​នៅឆ្នាំ ២០២៤ ពាណិជ្ជកម្មទ្វេភាគីកម្ពុជា-អង់គ្លេស​សម្រេចបាន​ទឹកប្រាក់​ ១ ពាន់លានដុល្លារ ​កើនឡើង ១៦ ភាគរយ ​ក្នុងនោះកម្ពុជា​នាំចេញ​ទៅ​អង់គ្លេស​មានទំហំ ៩៥៨,៧៥ ​លានដុល្លារ ​កើន ២០,៤ ​ភាគរយ ​និងអង់គ្លេសនាំចូលមកកម្ពុជាវិញ ​មានទំហំទឹកប្រាក់ ​៥៣,៧ ​លានដុល្លារ ​ធ្លាក់ចុះជិត ៣០ ​ភាគរយ៕

អត្ថបទ៖ ឡេង ដេត

​

The post ​ការដោះដូរទំនិញកម្ពុជា-អង់គ្លេស​ សម្រេចបានទឹកប្រាក់ជាង ​៨០០ ​លានដុល្លារ ត្រឹមរយៈពេល ៩ ​ខែ​ appeared first on Kampuchea Thmey Daily.

លោក ឃឹម ហ្វីណង់ អនុរដ្ឋលេខាធិការ និងជាអ្នក​នាំ​ពាក្យ​ក្រសួង​កសិកម្ម​ រុក្ខា​ប្រមាញ់ និង​នេសាទបានលើកឡើងថា ការ​​​នាំ​​​​ចេញ​​​ចេក​ស្រស់​របស់​កម្ពុជា​ទៅ​កាន់​ទីផ្សារ​បរទេស​មាន​ការ​កើនឡើង​​ដោយ​សារ​តែមានតម្រូវ​ការខ្ពស់។

អ្នកស្រី ហេង ដាវី ប្រធាន​គ្រប់គ្រង​ក្រុមហ៊ុន ឡុង ស្រេង ចម្ការ​ចេក​នៅ​ក្នុង​ស្រុក​ស្ទឹងត្រង់បានប្រាប់ឱ្យដឹងថា បច្ចុប្បន្ន​មាន​ទីផ្សារ​​ប្រទេស​ធំ​ពីរ​ដែល​ក្រុមហ៊ុន​បាន​នាំ​ចេញ​មាន​ទីផ្សារ​​ប្រទេស​ចិន និង​ជប៉ុន។

អ្នកស្រី ហេង ដាវី បន្ថែមថា ​ក្នុង​មួយ​ថ្ងៃ​ក្រុមហ៊ុន​ត្រូវ​កាប់​ចេក​ចេញ​ពី​ចម្ការ​ពី ៦ ទៅ ៧ ពាន់​ស្និត​ដើម្បី​វេច​ខ្ចប់​នាំចេញ ដែល​មួយ​ថ្ងៃ​​​យ៉ាងហោចណាស់មានពី​​ ៣ កុងតឺន័រ និង​អាច​ឈាន​ដល់ ១០ កុងតឺន័រ​នៅ​ពេល​មាន​តម្រូវការ​ខ្ពស់ ដែល​ភាគ​ច្រើន​នាំ​ទៅ​ទីផ្សារ​​​ប្រទេស​ចិន​និង​ជប៉ុន ខណៈ​ទីផ្សារ​ក្នុង​ស្រុក​មាន​ចំនួន​តិចតួច​បំផុត។

ក្រុមហ៊ុន ឡុង ស្រេង ចម្ការ​ចេក កំពុង​វិនិយោគ​ការ​ដាំដុះ​ចេក​ពូជ​អំបូង​លឿង​លើ​ផ្ទៃដី​ប្រមាណ ២ ពាន់​ហិកតា​នៅ​ស្រុក​ស្ទឹងត្រង់​ខេត្តកំពង់ចាម និង​កំពុង​ពង្រីក​ការ​ដាំដុះ​រាប់​រយ​ហិកតា​ថែម​ទៀត​។

យោងតាមក្រសួងពាណិជ្ជកម្ម កម្ពុជារកចំណូលបានជាង ១៣៨ លានដុល្លារ ពីការនាំចេញ​ចេក​ស្រស់ នៅឆ្នាំ ២០២៤ ធ្លាក់ចុះជាង ១១% ធៀបនឹងឆ្នាំ ២០២៣។

កម្ពុជាមាន​ផ្ទៃដី​ដាំ​ដុះ​ចេកប្រមាណ​ជាង​ ១៦ ​ពាន់​ហិកតា និង​ផ្ទៃដី​កំពុង​​ប្រមូល​ផល​ជាង​១១​ពាន់​ហិកតា ដោយ​ក្នុងនោះ​ខេត្ត​ដែលមាន​ដាំ​ដុះ​ចេក​ច្រើនជាងគេ រួម​មាន​​ខេត្តរតនគិរី ក្រចេះ ស្ទឹង​ត្រែង កំពត កំពង់ចាម និងខេត្តកំពង់ស្ពឺ​។

យោងតាមអគ្គនាយកដ្ឋានកសិកម្ម នៅឆមាសទី១ ឆ្នាំ ២០២៥នេះ កម្ពុជានាំចេញទំនិញ​កសិផលទៅក្រៅប្រទេស​ចំនួន ៧ ៨៣៣ ១០១ តោន កើនឡើង ២៧,៦៦% គិតជាទំហំទឹកប្រាក់ជាង ២,៨៧ ពាន់លានដុល្លារ កើនឡើង ២២,៦៦% ធៀបនឹងរយៈ ពេលដូចគ្នាកាលពីឆ្នាំ ២០២៤។

កសិផលចម្បងៗ ដែលកម្ពុជានាំចេញរួមមាន ស្រូវជាង ៣,១ លានតោន អង្ករ មានជាង ៣៨ ម៉ឺនតោន ដំឡូងមី គ្រាប់ស្វាយចន្ទី ចេក ស្វាយ ផ្លែមៀន ម្រេច និងកសិផលផ្សេងៗទៀត៕

អត្ថបទ៖ ឡេង​ ដេត

The post កម្ពុជារកចំណូលបានជិត ៩០ លានដុល្លារ ពីការនាំចេញផ្លែចេកស្រស់ appeared first on Kampuchea Thmey Daily.

សម្ដេចនាយករដ្ឋមន្ត្រីបានបញ្ជាក់ថា ៩៧% មិនមែនជាអត្រាពន្ធ ​ដែលទំនិញអា​មេរិក​ចូល​មក​កម្ពុជា នោះទេ ពោលគឺជា អត្រានៃឱនភាពជញ្ជីងពាណិជ្ជកម្ម ដែលកម្ពុជា​នាំចេញ​ទៅ​អា​មេរិក ច្រើនជាងអាមេរិកនាំចូលមក។

តើកម្ពុជាដាក់ពន្ធប៉ុន្មានទៅលើទំនិញនាំចូលរបស់អាមេរិក? សម្ដេចធិបតី ពន្យល់ថា នៅឆ្នាំ ២០០៤ រាជរដ្ឋាភិបាលបានចូលជាសមាជិកអង្គការពាណិជ្ជកម្មពិភពលោក (WTO) ខណៈរាជរដ្ឋាភិបាលបានប្ដេជ្ញាចិត្តមិនយកពន្ធលើសពី ៣៥% មិនថាទំនិញនាំចូលពីអាមេរិក ឬប្រទេសផ្សេង។

សម្ដេចធិបតី បានបញ្ជាក់ថា ជាមធ្យមកម្ពុជាយកពន្ធ ២៩,៤% សម្រាប់ទំនិញនាំចូលមក​ពីអា​មេរិក ខណៈអាមេរិកយកពន្ធពីកម្ពុជា ១១%។

សម្ដេចនាយករដ្ឋមន្ត្រីបានបញ្ជាក់ថា ផលិតផល ១៨៦៨ បន្ទាត់ពន្ធ ក្នុងនោះមាន ២១១ បន្ទាត់ពន្ធដែលទំនិញរបស់អាមេរិករួចពន្ធនាំចូលមក ដូចទូរស័ព្ទដៃយកមកពីអាមេរិក សូន្យ ហើយមានផលិតផលច្រើនទៀត។

បើតាមសម្ដេច ហ៊ុន ម៉ាណែត កម្ពុជាមិនបានច្របាច់កអាមេរិកតាមរយៈការដាក់ពន្ធ រាល់​ទំនិញ​របស់អាមេរិក ៩៧% ដូចគេចោទនោះទេ។

កាលពីថ្ងៃទី ០៤ ខែមេសា ប្រមុខដឹកនាំរាជរដ្ឋាភិបាលកម្ពុជាបានដាក់លិខិតផ្លូវការ ស្នើសុំចរចារជាមួយអាមេរិកជុំវិញការអនុវត្តពន្ធ ៤៩% លើទំនិញនាំចេញពីកម្ពុជាទៅអាមេរិក។

តាមរយៈលិខិតផ្លូវការរបស់សម្ដេចធិបតី លើកឡើងថា ជាការឆ្លើយតបនឹងការប្រកាសរបស់លោក ដូណាល់ ត្រាំ នៅថ្ងៃទី ០២ ខែមេសា ឆ្នាំ ២០២៥ អនុវត្តពន្ធ ៤៩% លើទំនិញកម្ពុជាចាប់ពីថ្ងៃទី ០៩ ខែមេសា ឆ្នាំ ២០២៥ កម្ពុជាស្នើសុំចរចារជាមួយរដ្ឋបាលរបស់លោក ត្រាំ ភ្លាមៗ និងស្នើឱ្យរដ្ឋបាលរដ្ឋរបស់លោកត្រាំ ពន្យាការអនុវត្តពន្ធនាំចូលថ្មីនេះ។

សម្ដេច ហ៊ុន ម៉ាណែត មានប្រសាសន៍ថា៖ «ខ្ញុំសូមជម្រាបជូនឯកឧត្តមផងដែរថា អត្រាពន្ធនាំចូលខ្ពស់បំផុតដែលកម្ពុជាកំពុងអនុវត្តជាទូទៅ​មានត្រឹមតែ ៣៥% ប៉ុណ្ណោះ។ ក្នុងគោលបំណងបង្ហាញនូវសុឆន្ទៈ និងក្នុងស្មារតីនៃការពង្រឹងទំនាក់ទំនងពាណិជ្ជកម្មទ្វេភាគីរបស់យើង, កម្ពុជាប្តេជ្ញាចិត្តខ្ពស់ ក្នុងការជំរុញការនាំចូលទំនិញពីសហរដ្ឋអាមេរិក ជាមួយនឹងការបន្ថយភ្លាមៗនូវអត្រាពន្ធនាំចូលទំនិញ ១៩ ប្រភេទ ពីអត្រាអតិបរមា ៣៥% មកត្រឹមអត្រា ៥%»៕

អត្ថបទ៖ ឡេង ដេត

The post សម្ដេច ហ៊ុន ម៉ាណែត៖ «កម្ពុជាមិនបានដាក់ពន្ធអាមេរិក ៩៧% ដូចគេចោទទេ» appeared first on Kampuchea Thmey Daily.

យោងតាម​ទិន្ន​​ន័យ​របស់អគ្គនាយកដ្ឋាន​គយ និង​​រដ្ឋាករ​កម្ពុជា ​(GDCE) ចេញផ្សាយ​​នៅថ្ងៃ​ទី ១០​ ខែមីនា បង្ហាញថា ទំហំ​ពាណិជ្ជកម្ម​កម្ពុជា-អាមេរិកសម្រេចបានទឹកប្រាក់សរុប ១,៦៧ ពាន់​លានដុល្លារ កើន ២៥,៧ ភាគរយ ក្នុងនោះទំនិញ​របស់កម្ពុជា​នាំចេញ​មាន​​ទំហំទឹកប្រាក់ ១,៦២ ពាន់លានដុល្លារ កើន ២៥,៤ ភាគរយ ចំណែក​ឯទំនិញ​នាំ​ចូល​ពីអាមេរិក មានទំហំទឹកប្រាក់ចំនួន ៤៨,៧៦ លានដុល្លារ កើនង ៣៤,៦ ភាគរយ។

អ្នកឧកញ៉ា លឹម ហេង អនុប្រធានសភាពាណិជ្ជកម្មកម្ពុជាមានប្រសាសន៍ថា នៅឆ្នាំ ២០២៥ ពាណិជ្ជកម្ម្មកម្ពុជានៅ​តែមាន​ភាព​ល្អ​ប្រសើរ ដោយសារការចុះបញ្ជីអ្នកវិនិយោគថ្មី កើនឡើង​រហូត​ដល់ជាង ២០០ ក្រុមហ៊ុន ដែលនាំទៅដល់ការកើនឡើងនូវការផលិត និងការនាំចេញក៏​មាន​ការ​កើន​ឡើង។

អ្នកឧកញ៉ា លឹម ហេងបញ្ជាក់ថា៖ «កត្តាដែលនាំឱ្យអ្នកវិនិយោគ និងការនាំចេញកើនឡើងដោយ​សារ​ស្ថិរភាព​នយោ​បាយ ច្បាប់វិនិយោគថ្មីមាន​ការលើកទឹក​ចិត្ត​ច្រើន ព្រមទាំងកត្តាទីផ្សារដែល​កម្ពុជា​យើងមានទីផ្សារសេរីពាណិជ្ជកម្មកម្ពុជា-ចិន កម្ពុជា-កូរ៉េ ក៏ដូចជា RCEP ទន្ទឹមសង្គ្រាម​ពាណិជ្ជកម្ម​​អាមេរិក-ចិន កំពុងដំឡើងពន្ធដាក់គ្នាក៏ជាឱកាស​សម្រាប់​​កម្ពុជាទាក់ទាញអ្នក​វិនិយោគ​​​ដើម្បី​​ផលិតក្នុងការនាំចេញ»។

លោកស្រីបណ្ឌិត ជា សិរី ទេសាភិបាលធនាគារជាតិ នៃកម្ពុជាមានប្រសាសន៍ថា កំណើន​សេដ្ឋ​កិច្ច​​កម្ពុជា​រំពឹងនឹងសម្រេចបាន ៦,២ ភាគរយ នៅឆ្នាំ ២០២៥​ ​ដែលគាំទ្រ​ជាចម្បង​ដោយកំណើន​ខ្ពស់​នៃការនាំចេញ ជាពិសេសផលិតផលកាត់ដេរ និងការបន្តងើបឡើងជា​លំដាប់​នៃវិស័យ​ទេសចរណ៍។

លោកស្រីបណ្ឌិត ជា សិរី មានប្រសាសន៍ថា៖ «សកម្មភាពសេដ្ឋកិច្ច នឹងបន្តគាំទ្រជា​ចម្បង​ដោយកំណើននៃការនាំចេញផលិតផលក្នុងវិស័យកម្មន្តសាលកាត់ដេរ និងការកើនឡើង នៃផលិត​ផល​កមន្តសាលមិនមែនកាត់ដេរ ស្របពេលដែលវិស័យទេសចរណ៍ និងកសិកម្មបន្តមានវឌ្ឍន​ភាព​ល្អ ទោះជាវិស័យសំណង់ និងអចលនទ្រព្យនៅទន់ខ្សោយ»។

យោងតាមក្រសួងពាណិជ្ជកម្មនៅក្នុងឆ្នាំ ២០២៤ ការដោះដូរទំនិញអន្តរជាតិរបស់កម្ពុជា សម្រេច​បាន​​នូវទំហំទឹកប្រាក់ជាង ៥៤,៧៤ ពាន់លានដុល្លារ មានការកើនឡើង ១៦,៩% ធៀប​នឹងឆ្នាំ ២០២៣។

ការនាំចេញទំនិញ​របស់​កម្ពុជា ​​មានទំហំទឹកប្រាក់ ២៦,១៩ ពាន់លានដុល្លារ កើន​ឡើង ១៥,៧% ចំណែកឯការនាំទំនិញចូល​មកវិញមាន​ទំហំ​ទឹកប្រាក់ ២៨,៥៤ ពាន់លាន​ដុល្លារ កើន ១៨%៕

អត្ថបទ៖ ឡេង ដេត

The post កម្ពុជានាំចេញទៅអាមេរិក សម្រេចបានទឹកប្រាក់ជាង $១,៦២ ពាន់លាន appeared first on Kampuchea Thmey Daily.

យោងតាមរបាយការណ៍​របស់​អគ្គនាយកដ្ឋាន​គយ​ ​និង​រដ្ឋាករ​ការនាំចូល​របស់​កម្ពុជា​ពី​សហភាព​អឺរ៉ុប​ប្រមាណ៧៥៥​លាន​ដុល្លារក្នុងរយៈ៩ខែដូចគ្នាកាលពីឆ្នាំមុន​។​

ខណៈដែរពាណិជ្ជកម្ម​ទ្វេភាគី​សម្រេចបានទឹកប្រាក់ជាង៤ ពាន់​​លាន​ដុល្លារ​បាន​កើន​ឡើងជិត១៤​ ​ភាគរយ​​​ ​។​ ប្រទេស​អាល្លឺម៉ង់ និង​អេស្បាញ​ជា​ដៃគូ​ពាណិជ្ជកម្ម​ធំ​បំផុត​របស់​កម្ពុជា​នៅ​សហភាព​អឺរ៉ុប​ដែល​មាន​ទំហំ​ពាណិជ្ជកម្ម​ទ្វេភាគី​ចំនួនជាង ៧៨៤ លាន​ដុល្លារ និង ​៧២២ លាន​ដុល្លារ​រៀងៗ​ខ្លួន។

​លោក ប៉ែន សុវិជាតិ រដ្ឋលេខាធិការ និង​ជា​អ្នកនាំពាក្យ​ក្រសួង​ពាណិជ្ជកម្ម​បាន​ថ្លែងប្រាប់កម្ពុជាថ្មីកាលពីពេលថ្មីៗនេះថា តួលេខ​ទាំងនេះ​បង្ហាញ​ពី​សារៈសំខាន់​របស់​សហភាព​អឺរ៉ុប​ជា​ទិសដៅ​នាំចេញ​​សម្រាប់​កម្ពុជា​។

លោក​បន្ត​ថា សហភាព​អឺរ៉ុប​ជាប់​ចំណាត់​ថ្នាក់​ក្នុង​ចំណោម​ដៃគូ​ពាណិជ្ជកម្ម​កំពូល​របស់​កម្ពុជា ដោយ​ផ្តល់​ទីផ្សារ​ដ៏​សំខាន់​សម្រាប់​ទំនិញ​កម្ពុជា។ លោកថា «កំណើន​ការ​នាំ​ចេញ​នេះ​បង្ហាញ​ពី​ការ​បង្កើន​ភាព​ប្រកួតប្រជែង​របស់​ទំនិញ​កម្ពុជា​នៅ​ក្នុង​ទីផ្សារ​អឺរ៉ុប»។

លោកបានមានប្រសាសន៍ថា គុណភាពនៃផលិតផលកម្ពុជាមានភាពប្រសើរឡើងក្នុងរយៈពេលប៉ុន្មានឆ្នាំមកនេះ ដោយប្រកាន់ខ្ជាប់នូវស្តង់ដារអន្តរជាតិ។ ការណ៍នេះបានបង្កើនទំនុកចិត្តក្នុងចំណោមអ្នកប្រើប្រាស់អឺរ៉ុប ដែលធ្វើឲ្យការនាំចេញរបស់ព្រះរាជាណាចក្រកម្ពុជាកាន់តែមានភាពទាក់ទាញ។

លោកបានថ្លែងបញ្ជាក់ថា៖«ទោះបីជាការស្ទុះងើបសេដ្ឋកិច្ចដែលកំពុងបន្តរបស់ប្លុកសហភាពអឺរ៉ុបមិនឈានដល់កម្រិតមុនជំងឺកូវីដ១៩ក៏ដោយ ការនាំចេញរបស់យើងទៅកាន់ប្លុកនេះបានកើនឡើងជាលំដាប់។ យើង​នៅ​តែ​ទទួល​បាន​ការ​បញ្ជា​ទិញ​សម្លៀក​បំពាក់ ស្បែកជើង និង​ផលិតផល​កសិកម្ម​ពីអឺរ៉ុប»។

​គួររំលឹកផងដែរនៅ​ឆ្នាំ​២​០​២​០​ ​សហភាព​អឺរ៉ុប​បាន​ដក​ប្រព័ន្ធ​អនុគ្រោះ​ពន្ធ​E​B​A​ ​ប្រហែល​ ​២​០​ភាគរយពី​កម្ពុជា។ ការណ៍នេះ​​មានន័យ​ថា​ផលិតផល​នាំចេញ​ចម្បង​របស់​កម្ពុជា​មួយ​ចំនួនមាន​ដូចជា  ស​ម្លៀ​ក​បំពាក់​ ​ស្បែកជើង​ ​និង​ផលិតផល​ធ្វើដំណើរ​ ​ពេលនេះ​ត្រូវ​​​ជាប់​កាតព្វកិច្ច​ពន្ធគយ​របស់​សហភាព​អឺរ៉ុប​។​

ភាគច្រើន​កម្ពុជា​នាំចេញ​ ​ផលិតផល​វាយនភណ្ឌ​ ​ស្បែកជើង​ ​កង់​ ​គ្រឿងឧបភោគបរិភោគ​ ​អង្ករ​ ​និង​ផលិតផល​កសិកម្ម​ផ្សេងទៀត​ទៅកាន់​សហភាព​អឺរ៉ុប​ ​ក្រោម​ប្រព័ន្ធ​អនុគ្រោះ​ពាណិជ្ជកម្ម​អ្វីៗ​គ្រប់យ៉ាង​លើកលែងតែ​អាវុធ​ (​E​B​A​)​។​

​ពាណិជ្ជកម្ម​សរុប​កម្ពុជា​-​សហភាព​អឺរ៉ុប​មាន​តម្លៃ​៤​,​៦​១​ពាន់​លាន​ដុល្លារ​ក្នុង​ឆ្នាំ​២​០​២​៣​ ​ធ្លាក់ចុះ​ជិត​៥​ភាគរយ​ពី​៤​,​៨​៥​ពាន់​លាន​ដុល្លារ​ក្នុង​ឆ្នាំ​២​០​២​២។​ ​ក្នុង​នោះ​ ​កម្ពុជា​បាន​នាំចេញ​ទំនិញ​ដែល​មាន​ទំហំ​ទឹកប្រាក់​ ​៣​,​៦​៦​ ​ពាន់​លាន​ដុល្លារ​ទៅ​សហភាព​អឺរ៉ុប​ ​ធ្លាក់ចុះ​ ​៩​ ​ភាគរយ​ធៀប​នឹង​ ​៤​,​០​៤​ពាន់​លាន​ដុល្លារ​ក្នុង​ឆ្នាំ​២​០​២​២។ នេះ​បើ​តាម​ក្រសួង​ពាណិជ្ជកម្ម​៕

The post ការនាំចេញរបស់កម្ពុជាទៅកាន់ទីផ្សារអឺរ៉ុបក្នុង​រយៈពេល​៣ត្រីមាស​​​សម្រេចបានជាង៣​​ពាន់លាន​ដុល្លារ appeared first on Kampuchea Thmey Daily.

យោងតាម GDCE ក្នុងនោះកម្ពុជាបាននាំចេញទៅចិនសម្រេចបានជាង ១,២៧៨ លានដុល្លារ ​ កើនឡើង ២០,៨ ភាគរយ​ ​ ខណៈការនាំចូលមានជាង ៩,៨៦៨ ពាន់លានដុល្លារកើនឡើងប្រមាណ២២,៧ភាគរយ។ សម្រាប់តុល្យភាពជញ្ជីងពាណិជ្ជកម្មនៅក្នុងរយៈពេល៩កន្លងមកនេះ គឺកម្ពុជាមានឱនភាព ៨,៥៨៩ ពាន់លានដុល្លារ។

លោក ហុង វណ្ណៈ អ្នកជំនាញ​សេដ្ឋកិច្ច​នៃ​រាជបណ្ឌិត្យសភាកម្ពុជា បាន​ប្រាប់​កម្ពុជាថ្មីកាលពេលថ្មីៗនេះ​ថា រហូតមកទាល់បច្ចុប្បន្ន​ការនាំចេញ​របស់​កម្ពុជា​ទៅ​ប្រទេស​ចិន​កំពុង​កើនឡើងជារៀងរាល់ឆ្នាំ ស្របពេលដែលប្រទេសទាំងពីរបានកំពុងអនុវត្តន៍នូវកិច្ចព្រមព្រៀងពាណិជ្ជកម្មសេរីដែលមុខទំនិញកម្ពុជាកាន់តែច្រើនត្រូវបាននាំចេញទៅកាន់ទីផ្សារដ៏ធំជាងគេនៅអាស៊ីមួយនេះ។​

​​លោកថា​៖«​ស្របពេលដែលកម្ពុជាកំពុងពង្រីកការនាំចេញទៅកាន់ទីផ្សារចិន យើង​ក៏ត្រូវ​ខិតខំ​ពង្រឹងសមត្ថភាព​ផលិតកម្ម​របស់ខ្លួន​ឱ្យបាន​ខ្លាំង និង​កាន់តែសម្បូរបែប ដើម្បី​លើកកម្ពស់ការនាំចេញឱ្យកាន់តែច្រើន​»​។​

​​លោក លឹម ហេង អនុប្រធាន​សភាពាណិជ្ជកម្ម​កម្ពុជា បាន​និយាយថា ពាក់ព័ន្ធនឹងឱនភាពពាណិជ្ជកម្មដែលកម្ពុជាមានច្រើនជាមួយប្រទេសចិន ដោយសារតែប្រទេសចិនជាប្រទេសដែលផ្គត់ផ្គង់វត្ថុធាតុដើមសម្រាប់វិស័យកាត់ដេរនៅតាមបណ្តារោងចក្រនានា ​​។

លោកថា លើសពីនោះទៅទៀត ចិនក៏ជាប្រភពនៃអ្នកផ្គត់ផ្គង់សំភារៈសំណង់ដ៏ធំមួយរបស់កម្ពុជាផងដែរ ស្របពេលដែលផលិតផលចំណីអាហារនិងម្ហូបមួយចំនួនក៏ត្រូវបានកម្ពុជានាំចូលដើម្បីបំពេញសេចក្តីត្រូវការក្នុងស្រុកផងដែរ។

​លោក ឃឹម ហ្វីណង់ រដ្ឋលេខាធិការ និងជាអ្នកនាំពាក្យក្រសួងកសិកម្ម រុក្ខាប្រមាញ់ និងនេសាទ បានឱ្យដឹងថា ផលិត​ផល​កសិផលជាច្រើនត្រូវបាននាំទៅកាន់ទីផ្សារប្រទេសចិន ដូចជាអង្ករ ដំឡូងមី ម្រេច មៀន​ប៉ៃលិន ស្វាយ ចេកជាដើម។ លោក ឃឹម ហ្វីណង់ បញ្ជាក់ថា ការនាំចេញទៅទីផ្សារបរទេសកើនឡើង ដោយ​សារ​កម្ពុជាបើកទីផ្សារថ្មីដូចជាប្រទេសចិនជាដើម។

​ក្នុង​ឆ្នាំ​ ២០២៣ ការផ្លាស់ប្តូរ​ទំនិញ​រវាង​កម្ពុជា​-​ចិន មានទឹក​​ប្រាក់​សរុប ១២,២៦ ​ពាន់​លាន​ដុល្លារ កើន ៥​ ភាគរយ​បើ​ធៀប​ឆ្នាំ​ ២០២២ ក្នុងនោះ​កម្ពុជា​នាំ​ទំនិញ​ទៅ​ប្រទេស​ចិន ១,៤៨​ ពាន់​លាន​ដុល្លារ កើន ១៩,២ ​ភាគរយ និង​ទំនិញ​ចិន​នាំមក​កម្ពុជា ១០,៧៩​ ពាន់​លាន​ដុ​ល្លារ កើន ៣,៣​ ភាគរយ​។ នេះ​បើ​យោងតាម GDCE៕

The post ការដោះដូរពាណិជ្ជកម្មកម្ពុជា-ចិនសម្រេចបានជាង១១ ពាន់លានដុល្លារក្នុងរយៈពេល៩ខែ appeared first on Kampuchea Thmey Daily.

​អាសិប​គឺ​ជា​កិច្ច​ព្រម​ព្រៀង​ពាណិជ្ជ​កម្ម​សេរី​ដ៏​ធំ​បំផុត​លើ​ពិភព​លោក​ដែល​មាន​សមាជិក​ចំនួន ​១៥ ប្រទេស រួម​មាន​សមាជិក​អាស៊ាន ១០ (ប៊្រុយណេ កម្ពុជា ឥណ្ឌូនេស៊ី ឡាវ ម៉ាឡេស៊ី មីយ៉ាន់ម៉ា ថៃ ហ្វីលីពីន វៀតណាម និង​សិង្ហបុរី) និង​ប្រទេស​ដៃគូ​ពាណិជ្ជ​កម្ម​សេរី​អាស៊ាន​ចំនួន ៥ រួមមាន​ អូស្រ្តាលី ចិន ជប៉ុន កូរ៉េខាង​ត្បូង និង​នូវែល​ហ្សេឡង់។ RCEP មាន​សុពល​ភាព​អនុ​វត្ត ចាប់​តាំង​ពី​ថ្ងៃទី​១ ខែ​មករា ឆ្នាំ​២០២២។

របាយការណ៍ដដែលបានឱ្យ​ដឹង​ថា ចន្លោះ​ពី​ខែ​មករា ដល់​ខែសីហា ឆ្នាំ​២០២៤ ប្រទេស​កម្ពុជា​បាន​នាំ​ចេញ​ទំនិញ​មាន​តម្លៃ ៦,០៥​​ពាន់​លាន​ដុល្លារ​ទៅ​កាន់​ប្រទេស​ជា​សមាជិក​នៃ​RCEP​​ ​កើន​ឡើង ១៥ ភាគ​រយ​ពី​ចំនួន ៥,២៦ ​ពាន់​លាន​ដុល្លារ​នា​រយៈ​ពេល​ដូច​គ្នា​ក្នុង​ឆ្នាំ​២០២៣។ ជា​មួយ​គ្នា​នេះ​កម្ពុជា​ក៏​នាំ​ចូល​ទំនិញ​ពី​ក្រុម​ប្រទេស​ជា​សមាជិក​ RCEP ក្នុង​ទឹក​ប្រាក់ជាង​ ១៨ពាន់​លាន​ដុល្លារ​ផង​ដែរ កើនឡើងជិត ១៨ភាគ​រយ​ពី​ចំនួន ១៤,២៩​ពាន់​លាន​ដុល្លារ​។​

​រដ្ឋ​លេខាធិការ និង​ជា​អ្នក​នាំ​ពាក្យ​ក្រសួង​ពាណិជ្ជកម្ម លោក ប៉ែន សុវិជាតិ ​​បានមានប្រសាសន៍​ថា ទោះ​បី​ពេល​នេះ​ការ​គំរាម​កំហែង​ពី​វិបត្តិ​កូ​វីដ​ ១៩ លើ​ពិភព​លោក​បាន​ភាព​ធូរស្រាល ប៉ុន្តែ​វិបត្តិ​សេដ្ឋកិច្ច​សកល​ដែល​ទើប​កើត​មាន​ថ្មីៗ​បណ្តាល​មក​ពី​ជម្លោះ​ភូមិសាស្ត្រ​នយោ​បាយ​រវាង​ប្រទេស​មហាអំណាច​ធំៗ សង្គ្រាម​រវាង​រុស្ស៊ី​-​អ៊ុយ​ក្រែ​ន …​ និង​បញ្ហា​អតិផរណា គឺ​បានធ្វើ​ឱ្យ​កម្លាំង​បញ្ជា​ទិញ​នៅ​លើ​ទីផ្សារ​ធំៗ​ធ្លាក់​ចុះ​ផងដែរ​។ លោក​បន្ត​ថា ទោះ​យ៉ាង​ណា ដោយ​សារ​កម្ពុជា​ជា​សមាជិក​របស់ RCEP ដូច្នេះ​កំណើន​នៃ​ការ​នាំ​ចេញ​គឺ​នឹង​បន្ត​សញ្ញា​វិជ្ជ​មាន​បន្ថែម​ទៀត​។​

លោក​ថ្លែង​ថា​៖​«RCEP បាន​ចូល​រួម​ចំណែក​យ៉ាង​ច្រើន​ក្នុង​ការ​បើក​ទីផ្សារ​នាំ​ចេញ​ផលិត​ផល​កម្ពុជា​ទៅ​ទីផ្សារ​អន្តរជាតិ​»​។​

​លោក សួន សុផល អគ្គលេខាធិការរងគណៈកម្មាធិការវិនិយោគកម្ពុជា (គ.វ.ក.)ដែលជាអ្នកចូលរួមគូសវាសឯកសារកំណត់វិសាលភាពសម្រាប់ប្រើប្រាស់ក្នុងការចរចាជំពូកស្តីពីវិនិយោគក្រោមកិច្ចព្រមព្រៀង​ RCEP កាលពីឆ្នាំ២០១១ បានអញ្ជើញជាវាគ្មិនកិត្តិយសក្នុងវេទិកាកិច្ចសហប្រតិបត្តិការសេដ្ឋកិច្ច និងពាណិជ្ជកម្មនៃ RCEP​ កាលពីថ្ងៃទី៩​ ខែកញ្ញានៅប្រទេសចិនបានលើកឡើង និងចែករំលែកនូវទស្សនទាន ក៏ដូចជាបទពិសោធនៃការចរចាច្រើនជុំរហូតដល់ឆ្នាំ២០១៤ ជាមួយវាគ្មិននៃប្រទេសហត្ថលេខី និងសហគមន៍ធុរកិច្ចដែលបានចូលរួមពិព័រណ៍អន្តរជាតិចិនសម្រាប់ការវិនិយោគ និងពាណិជ្ជកម្ម។

លោកបានគូសរំលេចអំពីសាវតារនៃការចរចា ក៏ដូចជាចំណុចពិសេសនៃជំពូកស្តីពីវិនិយោគបើធៀបនឹងកិច្ចព្រមព្រៀងពាណិជ្ជកម្មសេរីដទៃ។ ជាមួយគ្នានេះ លោកក៏បានគូសបញ្ជាក់អំពីផ្លែផ្កាដែលព្រះរាជាណាចក្រកម្ពុជាបាន និងកំពុងតែប្រមូលផលពីកិច្ចព្រមព្រៀងដ៏មានឧត្តមប្រយោជន៍មួយនេះដោយរាប់បញ្ចូលប៉ុន្តែមិនកម្រិតត្រឹមសកម្មភាពពាណិជ្ជកម្ម និងវិនិយោគ។

​​​សមា​ជិក​អាសិប​ទាំង​អស់​ត្រូវ​បាន​គ្រប​ដណ្តប់​លើ​ប្រជាជន​ប្រមាណ ២,២​ពាន់​លាន​នាក់ ឬ ៣០​ភាគ​រយ​នៃ​ចំនួន​ប្រជាជន​ពិភព​លោក ព្រម​ទាំង​មាន​ផលិត​ផល​ក្នុង​ស្រុក​ប្រមាណ ២៦,២​ទ្រីលាន​ដុល្លារ ឬ ៣០​ភាគ​រយ​នៃ​ផលិត​ផល​ក្នុង​ស្រុក​សរុប​របស់​ពិភព​លោក និង​មាន​ទំហំ​ពាណិជ្ជ​កម្ម​ប្រមាណ ២៨​ភាគ​រយ​នៃ​ទំហំ​ពាណិជ្ជ​កម្ម​ពិភព​លោក​ទាំង​មូល៕

The post ទំហំពាណិជ្ជកម្មរបស់កម្ពុជាជាមួយប្រទេសសមាជិក RCEP មានទឹកប្រាក់ជិត ២៣ពាន់លានដុល្លារ appeared first on Kampuchea Thmey Daily.