ការប្រគំតន្ត្រី Archives - Kampuchea Thmey Daily

G-Devith សុំទោសអ្នកគាំទ្រ ក្រោយច្រៀងចប់ការប្រគំតន្ត្រីធំមួយ

អ៊ិន ពិសី — Mon, 13 Nov 2023 04:15:40 +0000

តារាចម្រៀងរ៉េប លោក ងួន ចាន់ដេវីដ ហៅ G -Devith បានចេញមុខសុំទោសអ្នកគាំទ្ររបស់ខ្លួនភ្លាមៗ បន្ទាប់ពីចប់ការច្រៀងនៅក្នុងកម្មវិធីប្រគំតន្ត្រីធំដែលរៀបចំដោយក្រុមហ៊ុនមួយ កាលពីម្សិលមិញ បង្កការចាប់អារម្មណ៍ដល់មហាជនអ្នកគាំទ្រ។

ជាការពិត G-Devith កាលពីថ្ងៃទី ១២ ខែវិច្ឆិកា ឆ្នាំ ២០២៣ បានបង្ហាញវត្តមានច្រៀង និងសម្តែង នៅលើឆាក នៃកម្មវិធីដ៏ធំមួយនាទីធ្លា OCIC ក្នុងទឹកដីខណ្ឌជ្រោយចង្វារ ដែលមានអ្នកគាំទ្រជាច្រើនចូលរួមទស្សនាចាប់ពីវេលាម៉ោង ២ រសៀល រហូតដល់ម៉ោង ១២ យប់។ ប៉ុន្តែអ្វីដែលចាប់អារម្មណ៍ បន្ទាប់ពីចុះលើឆាក ស្រាប់តែលោក G-Devith បានពោលពាក្យសុំទោសអ្នកគាំទ្រ ព្រោះមានបញ្ហាសុខភាព ច្រៀងមិនសូវបានល្អ ដោយលោកនិយាយខ្លីថា «ខ្ញុំសុំទោស»។

បន្ទាប់ពីឃើញមានការលើកឡើងដូច្នេះ ក៏មានអ្នកគាំទ្រលើកទឹកចិត្តលោកផងដែរ ដោយក្នុងនោះមានការបញ្ចេញមតិថា «សុខភាពមិនអំណោយផល វាមិនប្រាប់យើងមុនទេ ដូច្នេះវាជារឿងចៃដន្យ ១០០០ ភាគរយ វារអាក់រអួល ២ ឬ ៣ មិនជាបញ្ហា»។ ចំណែក លោក G-Devith ក៏បានបង្ហាញការអរគុណចំពោះអ្នកគាំទ្រផងដែរ។

តារារ៉េបលោក G-Devith បានបញ្ជាក់ថា «ទំហំចិត្តដ៏មហិមារបស់អ្នក ទើបធ្វើឲ្យខ្ញុំមានដង្ហើមបន្តនៅលើវិថីនេះ ថ្ងៃនេះទោះបីជាខ្ញុំធ្វើមិនបានពេញលេញ តែក៏ជាជោគជ័យដ៏អស្ចារ្យមួយទៀតនៅក្នុងវិស័យនេះ បុរសម្នាក់នេះ សន្យានឹងនាំមកនូវរសជាតិពិសេសបន្ថែមទៀតនាពេលខាងមុខ ពួកយើងអាចនិយាយយ៉ាងពេញលេញបានថា នេះជាបទពិសោធន៍ នៃការប្រគំតន្ត្រីដ៏អស្ចារ្យមួយ»៕

អត្ថបទ ៖ ចាន់រ៉ា

The post G-Devith សុំទោសអ្នកគាំទ្រ ក្រោយច្រៀងចប់ការប្រគំតន្ត្រីធំមួយ appeared first on Kampuchea Thmey Daily.

B-SIDE មកអង្រួនឆាកតន្ត្រីហ៊ីបហបនៅថ្ងៃសៅរ៍ ទី១២ ខែសីហា ឆ្នាំ២០២៣

Boa Sokunveary — Tue, 15 Aug 2023 09:41:26 +0000

កាលពីថ្ងៃទី ១២ ខែសីហា វេលាម៉ោង ៨ យប់ សប្ដាហ៍មុន ឆាករបស់ B-SIDE និង ឆាកហ៊ីបហបកម្ពុជា មានសិល្បកររបស់ B-SIDE បានបង្ហាញខ្លួនជាសាធារណៈដើម្បីអ្នកនៅក្នុង និងក្រៅស្រុកបានមើលទាំងអស់គ្នា ។

B-SIDE RULES គឺជាវគ្គទីមួយក្នុងបទដ៏វែង ថែមទាំងមានសំឡេងសិល្បករល្បីៗជាច្រើននៅក្នុងតន្ត្រីថ្មីនេះ មិនថាក្នុងស្រុក (MC SEY, 1NE) ឬអន្តរជាតិ (King Aglet, P6ick, Thaowanz ។ល។) ។

B-SIDE ដែលបានបង្កើតជិត ២ ឆ្នាំ បានមកដល់ឆាកហ៊ីបហបនៅភ្នំពេញហើយ ។ B-SIDE បានបង្កើតព្រឹត្តិការណ៍ផ្សាយផ្ទាល់ជាង ២០ ព្រឹត្តិការណ៍ ដោយផ្ដល់ឱកាសឲ្យសិល្បករជាច្រើននាក់ដែលចង់បញ្ចេញសមត្ថភាពនៅទីសាធារណៈ ។

ដូច្នេះសាធារណជនអាចតាមដានពីភាពរីកចម្រើនរបស់អ្នករ៉េប និងការវិវត្តន៍ថ្មីៗ មិនថាតាមរយៈ TIGER GRAFFITI JAMs ដែលបង្កើតដោយ FT Gallery, the Cyphers, ការប្រគំតន្ត្រី Mural for Cambodia, ឬ Flex, ដែលជាការប្រមូលផ្ដុំតារាចម្រៀងថៃល្បីៗ នៅលើឆាកនៃទីក្រុងភ្នំពេញ ។

អ្នកអាចស្ដាប់ភ្លេងតាម Youtube, Spotify, Apple music និងវេទិកាផ្សេងៗទៀតទាំងអស់នៅលើលំហូរនៃ 2MDIE, S.A.N.E, REALLY JING, OG GOLDEN និង SCOTTY DARKNE$$!

អត្ថបទ៖ វារី

ចុចអាន៖ វណ្ណដា ត្រៀមចេញទៅសម្ដែងលើកដំបូងនៅប្រទេសជប៉ុន

The post B-SIDE មកអង្រួនឆាកតន្ត្រីហ៊ីបហបនៅថ្ងៃសៅរ៍ ទី១២ ខែសីហា ឆ្នាំ២០២៣ appeared first on Kampuchea Thmey Daily.

ជួបគ្នាអាទិត្យនេះណា អ្នកខេត្តត្បូងឃ្មុំ ជាមួយនឹងការប្រគំតន្ត្រីទេសចរណ៍ ភេសជ្ជៈប៉ូវកម្លាំង ខារ៉បាវ ២០២៣

Kang Tola — Wed, 25 Jan 2023 10:16:23 +0000

ជួបជាមួយនឹងកំពូលតារាចម្រៀងល្បីៗជាច្រើនរូប ដូចជា អ្នកនាង ឱក សុគន្ធកញ្ញា អ្នកនាង សួស វីហ្សា លោក នី រតនា លោក វង្សតារារតនា កញ្ញា ឈិន ម៉ានិច្ច និងកុមារា សារុំ បញ្ញាស័ក្ត

នៅថ្ងៃអាទិត្យ ទី២៨ ខែមករា ឆ្នាំ២០២៣ នៅបុរីសួងស៊ីធីសិនធ័រ ក្នុងបរិវេណរោងចក្រទឹកកសុខហេង ក្រុងសួង ខេត្តត្បូងឃ្មុំ ចាប់ពីម៉ោង ៦ល្ងាចតទៅ និងតាមរយៈកញ្ចក់ទូរទស្សន៍ ហង្សមាស HDTV ចាប់ពីម៉ោង ៨យប់តទៅ !!

ចូលរួមឲ្យបានច្រើនកុះករ លោកអ្នកក៏អាចមានសំណាងឈ្នះរង្វាន់ជាច្រើនផងដែរ

The post ជួបគ្នាអាទិត្យនេះណា អ្នកខេត្តត្បូងឃ្មុំ ជាមួយនឹងការប្រគំតន្ត្រីទេសចរណ៍ ភេសជ្ជៈប៉ូវកម្លាំង ខារ៉បាវ ២០២៣ appeared first on Kampuchea Thmey Daily.

G-Devith៖ PASSION THE ALBUM Concert អាចនឹងមានមនុស្សចូលរួម ១ ម៉ឺននាក់

Sorn Phanith — Mon, 05 Sep 2022 09:13:57 +0000

G-Devith នឹងធ្វើការប្រគំតន្ដ្រី Solo “PASSION THE ALBUM Concert” ដែលធំជាងគេនៅកម្ពុជាលើកដំបូង ដោយបានរំពឹងទុកថា នឹងមានមនុស្សចូលរួមទស្សនា ១ ម៉ឺននាក់។

លោក G-Devith ដែលគ្រប់គ្នាស្គាល់ថា ជាតារាចម្រៀងរ៉េបជួរមុខដែលពោរពេញទៅដោយសមត្ថភាពខ្ពស់ ក្នុងការរ៉េប និងនិពន្ធបទចម្រៀងបែបកន្ទ្រាក់អារម្មណ៍។ ក្រោយចាកចេញពីផលិតកម្មហង្សមាស លោកក៏បានចាប់ផ្ដើមលើវិថីសិល្បៈឯករាជ្យ ហើយគេសង្កេតឃើញថា G-Devith បានខិតខំផលិតបទចម្រៀងជាច្រើន ដើម្បីបម្រើអារម្មណ៍អ្នកគាំទ្ររបស់ខ្លួន បើទោះបីជាមិនមិនមានការជ្រោមជ្រែងពីផលិតកម្មធំណាក៏ដោយ។

កាលពីពេលថ្មីៗនេះ តារារ៉េប G-Devith បានលើកឡើងថា ខ្លួននឹងរៀបចំការប្រគំតន្ដ្រី Solo ខ្នាតធំជាលើកដំបូងនៅកម្ពុជា គឺ PASSION THE ALBUM Concert ដោយបួករួមជាមួយឆាតដែលមានបច្ចេកវិទ្យាថ្មីប្លែកពិសេស ព្រមទាំងមានទីធ្លាធំទូលាយ ហើយលោកក៏បានរំពឹងទុកថា ការប្រគំតន្ដ្រីលើកនេះ នឹងអាចមានមនុស្សចូលរួមទស្សនារហូតដល់ទៅ ១ ម៉ឺននាក់ ដែលប្រព្រឹត្តឡើងនៅថ្ងៃទី ២៩ ខែតុលា ឆ្នាំ ២០២២ ខាងមុខនេះ។

គួររំលឹកថា កាលពីថ្ងៃទី ២ ខែកញ្ញា ឆ្នាំ ២០២២ លោក G-Devith ក៏បានធ្វើការប្រគំតន្ដ្រី FFF Party Special Edition នឹងមានការចូលរួមដោយតារាចម្រៀងថៃ កញ្ញា Jannine Weigel ដែលធ្វើការលក់អស់រហូតទៅដល់ ១៧០០ សំបុត្រផងដែរ៕

ទស្សនាវីដេអូ៖

អត្ថបទ៖ ផានិត

The post G-Devith៖ PASSION THE ALBUM Concert អាចនឹងមានមនុស្សចូលរួម ១ ម៉ឺននាក់ appeared first on Kampuchea Thmey Daily.

ស្រាបៀរ អង្គរ បានរៀបចំការប្រគំតន្ត្រីអង្គរអបអរអត្តសញ្ញាណយើង ដោយបង្ហាញនូវផ្ទាំងទស្សនីយភាពសិល្បៈជាច្រើនទម្រង់

Sorn Phanith — Tue, 19 Apr 2022 08:44:10 +0000

ស្រាបៀរ អង្គរ មានក្តីសោមនស្សរីករាយ ដែលបានរៀបចំព្រឹត្តិការណ៍ប្រគំតន្ត្រី “អង្គរ អបអរអត្តសញ្ញាណយើង” ដោយបានបង្ហាញនូវការសម្តែង និងផ្ទាំងទស្សនីយភាពសិល្បៈជាច្រើនទម្រង់ដែលសុទ្ធសឹងតែឆ្លុះបញ្ចាំងពីអត្តសញ្ញាណខ្មែរ។ កម្មវិធីនេះបានចាក់ផ្សាយលើកញ្ចក់ទូរទស្សន៍ ហង្សមាស HDTV កាលពីចុងសប្តាហ៍មុន បន្ទាប់ពីយុទ្ធនាការ “ឆ្លុះបញ្ចាំងពីអត្តសញ្ញាណយើង” របស់ ស្រាបៀរអង្គរ នៃក្រុមហ៊ុន ខេមប្រ៊ូវ ទទួលបានជោគជ័យ។

ព្រឹត្តិការណ៍ប្រគំតន្ត្រីអង្គរអបអរអត្តសញ្ញាណយើង បានបង្ហាញនូវផ្ទាំងទស្សនីយភាពជាច្រើនដូចជា៖ ការបង្ហាញក្បាច់រាំ ការសម្តែងល្ខោនស្រមោលស្បែកធំ ក្រមា ដើមត្នោត និងចាប៉ីដងវែង ជាដើម ដោយមានការចូលរួមពីលោកគ្រូ គង់ បូរាណ ដែលជាកូនប្រុសរបស់ព្រឹទ្ធាចារ្យ គង់ ណៃ និងកំពូលតារាចម្រៀងល្បីៗជាច្រើនរូបទៀត ដូចជា៖ លោក ណុប បាយ៉ារិទ្ធ អ្នកនាង ឱក សុគន្ធកញ្ញា កញ្ញា ពេជ្រ សោភា លោក ឆន សុវណ្ណរាជ កញ្ញា ឈឺន រតនៈ លោក គង់ ចំរើន និងក្រុមរាំ The King ក៏ដូចជារំលេចសំលៀកបំពាក់ ដែលបានរចនាឡើងពីអត្តសញ្ញាណខ្មែរប្រកបដោយភាពច្នៃប្រឌិត។

ទាំងការសម្តែង និងបទចម្រៀងមួយចំនួនព្រមទាំងសំលៀកបំពាក់ ដែលត្រូវបានរចនាឡើងយ៉ាងស្រស់ស្អាត របស់សិល្បករ និងសិល្បការិនី សុទ្ធសឹងតែឆ្លុះបញ្ចាំងរំលឹកពីអត្តសញ្ញាណខ្មែរយើងចំនួនបួន ដែលត្រូវបានជ្រើសរើសដោយ ក្រុមហ៊ុន ខេមប្រ៊ូវ សម្រាប់យុទ្ធនាការ “ឆ្លុះបញ្ចាំងពីអត្តសញ្ញាណយើង” ។

លោក សោម ច័ន្ទណារ៉ាត ប្រធានផ្នែកគ្រប់គ្រងពាណិជ្ជសញ្ញាស្រាបៀរ អង្គរ របស់ក្រុមហ៊ុន ខេមប្រ៊ូវ បានលើកឡើងថា «ស្រាបៀរ អង្គរ មានមោទកភាពចំពោះគុណតម្លៃរបស់ខ្លួន ដែលក្លាយជា “ស្រាបៀរយើង”។ ស្រាបៀរអង្គរ បានផ្សារភ្ជាប់ខ្លួនទៅក្នុងការលើកស្ទួយអត្តសញ្ញាណជាតិ ដែលជាផ្នែកមួយនៃការជួយលើកកម្ពស់វប្បធម៌ជាតិយើង។ ចាប់តាំងពីវត្តមានថ្ងៃដំបូង មិនត្រឹមតែតាមរយៈឈ្មោះ និងពាណិជ្ជសញ្ញាដ៏លេចធ្លោរំលេចពីរូបប្រាសាទអង្គរវត្តប៉ុណ្ណោះទេ ស្រាបៀរ អង្គរ តែងមានគោលជំហផ្សាភ្ជាប់ និងបង្កើតទំនាក់ទំនងដ៏រឹងមាំជាមួយនឹងមោទកភាពជាតិ»។

លោក ច័ន្ទណារ៉ាត បានបន្តទៀតថា «គោលបំណងសំខាន់របស់យើង គឺលើកកម្ពស់ការយល់ដឹងដល់យុវជន កម្ពុជាជំនាន់ក្រោយ ក្នុងតួនាទីជាអ្នកចូលរួមថែរក្សា ការពារ អភិរក្សកេរដំណែល និងបេតិកភណ្ឌជាតិដ៏សម្បូរបែបរបស់យើងឱ្យរស់រវើក និងនៅគង់វង្សស្ថិតស្ថេរយូរអង្វែង។ ដូច្នេះហើយ ក្នុងនាមជាពាណិជ្ជសញ្ញាផលិតផលដ៏ពេញនិយមមួយ យើងចង់បង្កើតឲ្យមានភាពច្នៃប្រឌិត ដែលទាក់ទាញ និងជំរុញលើកទឹកចិត្តយើង។ យើងមានមោទកភាពចំពោះអ្វីដែលយើងមាន ហើយយើងកោតសរសើរ និងគោរពឲ្យតម្លៃចំពោះមរតកប្រវត្តិសាស្ត្រ ដែលបន្សល់ទុកធ្វើឲ្យពួកយើងរឹងមាំ»។

សូមបញ្ជាក់ថា យុទ្ធនាការ “ឆ្លុះបញ្ចាំងពីអត្តសញ្ញាណយើង” របស់ស្រាបៀរ អង្គរ បានជ្រើសរើសអត្តសញ្ញាណខ្មែរយើងចំនួនបួន ដោយបានបង្កប់នូវខ្លឹមសារ និងអត្ថន័យសំខាន់ៗដោយឡែកពីគ្នា ដូចជា៖

១.ក្រមា៖ តម្បាញក្រមាដែលញឹកដូចទំនាក់ទំនងដ៏រឹងមាំ

២.ចាប៉ី៖ ចាប៉ីមិនអាចខ្វះខ្សែ ដូចភាពរីករាយមិនអាចខ្វះគ្នា

៣.ដើមត្នោត៖ ដើមត្នោតលូតខ្ពស់ ដូចមិត្តភាពយូរអង្វែង

៤. ល្ខោនស្បែក៖ ពន្លឺឆ្លុះចេញជាស្រមោល ឆ្លុះបញ្ចាំងពីជីវិតដ៏រស់រវើក

ស្រាបៀរ អង្គរ ត្រូវបានផលិតជាលើកដំបូងក្នុងឆ្នាំ ១៩៩២។ ស្រាបៀរ អង្គរ គឺជាផលិតផលលំដាប់កំពូលមួយរបស់ក្រុមហ៊ុន ខេមប្រ៊ូវ ។ ឆ្លងកាត់បទពិសោធន៍ជាច្រើនទស្សវត្ស ស្រាបៀរ អង្គរ បង្ហាញពីការប្តេជ្ញាចិត្តខ្ពស់ ជាស្រាបៀរល្អបំផុត ដែលផលិតដើម្បីឆ្លើយតបនឹងចំណង់ចំណូលចិត្ត ភាពច្នៃប្រឌិត និងផ្តល់នូវបទពិសោធរសជាតិស្រាបៀរដ៏អស្ចារ្យ សម្រាប់អតិថិជនរបស់ខ្លួន។

ស្រាបៀរ អង្គរ ត្រូវបានផលិតឡើងពីគ្រឿងផ្សំដ៏ល្អឥតខ្ចោះ នាំចូលពីអឺរ៉ុប និងផលិតតាមស្តង់ដាររបស់ក្រុមហ៊ុន កាស្ប៊ែរ គ្រុប ដោយប្រើបច្ចេកវិទ្យាចុងក្រោយបង្អស់ និងរក្សាបាននូវរសជាតិដើមដែលប្រជាជនខ្មែរនិយមចូលចិត្ត និងឆ្ងាញ់ពិសាស្របតាមចំណង់ចំណូលចិត្តរបស់ប្រជាជនខ្មែរនាសម័យបច្ចុប្បន្ន៕

ពិសាគ្រឿងស្រវឹង សូមកុំបើកបរ!

The post ស្រាបៀរ អង្គរ បានរៀបចំការប្រគំតន្ត្រីអង្គរអបអរអត្តសញ្ញាណយើង ដោយបង្ហាញនូវផ្ទាំងទស្សនីយភាពសិល្បៈជាច្រើនទម្រង់ appeared first on Kampuchea Thmey Daily.

តារាល្បីៗជាច្រើន ត្រៀមឡើងឆាកនៅលើអាកាស ក្នុងកម្មវិធីប្រគំតន្ត្រីរបស់ក្រុមហ៊ុន Smart

Sorn Phanith — Thu, 30 Dec 2021 09:50:40 +0000

នៅសល់មិនយូរថ្ងៃទៀតទេ ដែលយើងនឹងត្រូវនិយាយពាក្យលាទៅកាន់ឆ្នាំ 2021 ហើយចូលទៅឆ្នាំ 2022។ ប្រិយមិត្តទាំងអស់គ្នា មានគម្រោងប្រារព្ធយប់ដ៏អស្ចារ្យនេះនៅទីណាខ្លះ ? ប្រសិនបើទំនេរ កុំភ្លេចចូលទៅទស្សនា កម្មវិធីប្រគំតន្ត្រីលក្ខណៈ ឌីជីថល របស់ Smart ដែលមានឈ្មោះថា Smart 2022 Virtual Sky-High New Year’s Countdown ដែលនឹងប្រារព្ធឡើងនៅយប់ថ្ងៃទី 31 ធ្នូ ចាក់ផ្សាយផ្ទាល់នៅក្នុង ហ្វេសប៊ុករបស់ Smart Axiata និង Pleng by Smart ចាប់ពីម៉ោង 7:30 យប់តទៅ។

តាមរយៈក្រុមការងារបានឲ្យដឹងថា ការប្រគំតន្ត្រីលើកនេះ មិនមែនធ្វើនៅក្នុងឆាកធម្មតាៗនោះទេ តែជាឆាកដែលនៅលើអាកាសខ្ពស់ត្រដែត ស្ថិតនៅលើសណ្ឋាគារលំដាប់ផ្កាយ សុខា។ ការរៀបចំបែបនេះ នឹងធ្វើឲ្យការសំដែងរបស់សិល្បករ សិល្បការិនីលំដាប់កំពូលៗប្រចាំប្រទេសកាន់តែលេចធ្លោ ប្លែកភ្នែក និងទាក់ទាញ ដែលមិនធ្លាបមានពីមុនមក។ សាកស្រមៃទៅមើលថា យើងបានទស្សនា អាយដលក្នុងដួងចិត្ត ច្រៀង និង រាំបទចម្រៀងដែលយើងពេញចិត្ត ដោយព័ទ្ធជុំវិញទៅដោយទេសភាពដ៏ស្រស់ត្រកាល នាពេលរាត្រី ក្នុងទីក្រុងភ្នំពេញ។

ពិសេសជាងនេះទៅទៀត កម្មវិធីមិនមែនមានត្រឹមតែការសម្តែងពីកំពូលតារាចម្រៀងល្បីៗនោះទេ តែក៏មានការចាប់រង្វាន់ជូនអតិថិជន ដែលមានសំណាងពីការចុះឈ្មោះបញ្ចូលលេខទូរស័ព្ទ ពី SmartNas app ថែមទៀតផង។ បើអតិថិជនមិនទាន់បានចុះឈ្មោះទេ អាចចូលទៅកាន់ SmartNas app បាន ឬ ចុចលើតំណភ្ជាប់នេះ Smartnas.smart.com.kh។

ឈ្នះម្តងហើយ អតិថិជនអាចមានសំណាងឈ្នះសារជាថ្មីម្តងទៀត ព្រោះអំឡុងពេលកំពុងទស្សនា ក្រុមការងារនឹងមានទម្លាក់ជាលេខកាតកោស ជារង្វាន់ដល់អ្នកទស្សនា។

មុនថ្ងៃប្រគំតន្ត្រីមកដល់ ប្រិយមិត្តអាចទៅស្តាប់បទល្បីៗពីអាយដូលទាំង 21 នាក់នៅក្នុង Pleng ឲ្យហើយ ស្រួលដល់ថ្ងៃកម្មវិធី អាចច្រៀងតាមកុំឲ្យភ្លាត់។ តោះចូលទៅ Pleng តាមតំណភ្ជាប់នេះ pleng.smart.com.kh។ TVC Link: www.youtube.comSmartAxiata៕

The post តារាល្បីៗជាច្រើន ត្រៀមឡើងឆាកនៅលើអាកាស ក្នុងកម្មវិធីប្រគំតន្ត្រីរបស់ក្រុមហ៊ុន Smart appeared first on Kampuchea Thmey Daily.

ផ្ទុះឆ្លងកូវីដលើមនុស្សរាប់ពាន់នាក់ក្នុងការប្រគំតន្ត្រីនៅ អេស្ប៉ាញ

Sok Chivon — Thu, 05 Aug 2021 02:45:45 +0000

រដ្ឋាភិបាលក្នុងតំបន់បាននិយាយកាលពីថ្ងៃពុធថា មនុស្សជិត ២,៣០០ នាក់ដែលបានចូលរួមមហោស្រពតន្ត្រីចំនួន ៣ នៅតំបន់កាតាឡូនៀនៃប្រទេសអេស្ប៉ាញ នៅរដូវក្តៅនេះបានឆ្លងជំងឺកូវីដ ១៩ ។

មហោស្រពតន្រ្តី Vida, Canet Rock និង Cruilla ត្រូវបានប្រគុំក្រោយការដាក់ស្លាកថា “មានសុវត្ថិភាពចំពោះកូវីដ” ដែលរួមបញ្ចូលទាំងវិធានការដូចជា ការធ្វើតេស្តរហ័សលើការចូល និងការពាក់ម៉ាសជាដើម ។

ទោះយ៉ាងណាការសិក្សាមួយបានបង្ហាញថា វិធានការសុវត្ថិភាពនៅឯមហោស្រពតន្រ្តីនោះ គឺមិនគ្រប់គ្រាន់ដើម្បីរក្សាការចម្លងរោគនោះទេ ស្របពេលដែលវីរុសកំពុងរីករាលដាលយ៉ាងខ្លាំង ក្នុងចំណោមប្រជាជនវ័យក្មេងរបស់អេស្ប៉ាញ ។

ការសិក្សាដោយរដ្ឋាភិបាលតំបន់កាតាឡូនៀ បានរកឃើញថា មនុស្សប្រមាណ ៥ ម៉ឺននាក់ដែលបានចូលរួមព្រឹត្តិការណ៍នេះមានហានិភ័យឆ្លងជំងឺកូវីដ ១៩ ទ្វេដង ជាងអ្នកដែលមានអាយុប្រហាក់ប្រហែលគ្នានៅក្នុងក្រុមត្រួតពិនិត្យ ។

ទន្ទឹមនោះ លោក Carmen Cabezas មន្រ្តីជាន់ខ្ពស់ផ្នែកសុខភាពសាធារណៈតំបន់កាតាឡូនៀ បាននិយាយថា មហោស្រពនេះកំពុងដើរតួនាទីនៅក្នុងរលកឆ្លងទី ៥ របស់តំបន់ ។

ថ្វីបើមហោស្រពតន្រ្តីខ្លះនៅតែបន្ត បន្ទាប់ពីតំបន់កាតាឡូនៀបានបិទក្លឹបរាត្រី ដើម្បីទប់ស្កាត់ការរីករាលដាលនៃវីរុសក៏ដោយ ក៏ផ្នែកខ្លះនៃការប្រគំតន្ត្រីនោះ ផ្អែកលើគំរូតេស្តដែលរកឃើញថាទទួលបានជោគជ័យនៅក្នុងព្រឹត្តិការណ៍សាកល្បងមុនៗ ។

គួរបញ្ជាក់ថា តំបន់កាតាឡូនៀ គឺជាចំណុចកណ្តាលនៃរលកឆ្លងទី ៥ របស់អេស្ប៉ាញ ដែលជះឥទ្ធិពលធំបំផុតដល់ប្រជាជនដែលមិនទាន់ចាក់វ៉ាក់សាំង របស់ប្រទេសនេះ ៕

ប្រែសម្រួលដោយ ៖ ជីវ័ន្ត

ប្រភព ៖ Anadolu

ចុចអាន ៖ អេស្ប៉ាញ ជាប្រទេសដំបូងបង្អស់នៅអឺរ៉ុប ចាប់ផ្ដើមចាក់វ៉ាក់សាំងតែមួយដូស Johnson & Johnson

The post ផ្ទុះឆ្លងកូវីដលើមនុស្សរាប់ពាន់នាក់ក្នុងការប្រគំតន្ត្រីនៅ អេស្ប៉ាញ appeared first on Kampuchea Thmey Daily.

រំភើបជំនួសណាស់! អង់គ្លេស បើកឲ្យមនុស្សចូលទស្សនាការប្រគំតន្ត្រីខ្នាតយក្សដោយមិនចាំបាច់ពាក់ម៉ាស និងរក្សាគម្លាតសង្គម

Sok Chivon — Tue, 04 May 2021 03:50:24 +0000

មនុស្សប្រមាណ ៥,០០០ នាក់ បានចូលរួមការប្រគំតន្រ្តី នៅចក្រភពអង់គ្លេស ដែលជាផ្នែកមួយ នៃការសាកល្បងរបស់រដ្ឋាភិបាល ក្នុងការរិះរកវិធី ដើម្បីរៀបចំព្រឹត្តិការណ៍ធំៗដោយសុវត្ថិភាព នៅរដូវក្តៅនេះ ហើយវាក៏ជាលើកដំបូងផងដែរ ចាប់តាំងពីការចាប់ផ្តើម ការឆ្លងរាលដាលនៃជំងឺកូវីដ ១៩ ។

អ្នកកាន់សំបុត្រ ត្រូវបង្ហាញលទ្ធផលធ្វើតេស្តអវិជ្ជមាន នៃជំងឺកូវីដ ១៩ មុនពេលពួកគេត្រូវបានអនុញ្ញាត ឲ្យចូលរួមព្រឹត្តិការណ៍នៅឧទ្យាន Sefton Park ក្នុងទីក្រុង Liverpool កាលពីថ្ងៃអាទិត្យ ។

ចំណុចសំខាន់មួយទៀត នៅពេលដែលចូលដល់ខាងក្នុង ពួកគេមិនត្រូវបានតម្រូវឲ្យពាក់ម៉ាស ឬរក្សាគម្លាតសង្គមនោះទេ ។ អ្នកចូលរួមត្រូវបានស្នើសុំ ឲ្យធ្វើតេស្តម្តងទៀតរយៈពេល ៥ ថ្ងៃ បន្ទាប់ពីព្រឹត្តិការណ៍នេះចប់ ហើយត្រូវរាយការណ៍ នូវលទ្ធផលធ្វើតេស្តនោះ ។

ទន្ទឹមនោះ អ្នកចូលរួមអាយុ ១៨ ឆ្នាំម្នាក់និយាយថា វាជារឿងចម្លែក ដែលឃើញមនុស្សមិនពាក់ម៉ាស ប៉ុន្តែវាជាបទពិសោធន៍ល្អ ។

បន្ថែមពីនេះ រដ្ឋាភិបាលគ្រោងនឹង ធ្វើការសាកល្បងបន្ថែមទៀត រួមមានព្រឹត្តិការណ៍កីឡា ដែលអាចអនុញ្ញាតមានអ្នកទស្សនាប្រមាណ ២០,០០០ នាក់ និងការបញ្ចាំងខ្សែភាពយន្ត នៅខាងក្រៅ ដែលអនុញ្ញាតឲ្យមាន អ្នកចូលរួមប្រមាណ ១,០០០ នាក់ ។

ស្របពេលជាមួយគ្នានេះ រដ្ឋមន្ត្រីក្រសួងសុខាភិបាលលោក Matt Hancock បាននិយាយថា រដ្ឋាភិបាល នឹងប្រើប្រាស់ការសាកល្បងនេះ ដើម្បីប្រមូលភស្តុតាងវិទ្យាសាស្ត្រ ដូច្នេះព្រឹត្តិការណ៍ធំៗផ្សេងទៀត អាចកើតឡើងដោយសុវត្ថិភាព នាពេលអនាគត ។

គួររំឭកថា ប្រទេសផ្សេងទៀត ក៏បានធ្វើតេស្តស្រដៀងគ្នានេះដែរ ខណៈមានករណីឆ្លងជំងឺកូវីដ ១៩ ចំនួន ៦ ករណីប៉ុណ្ណោះ ក្នុងចំណោមអ្នកចូលរួមចំនួន ៥,០០០ នាក់ នៃការប្រគំតន្រ្តីសាកល្បងមួយ ដែលធ្វើឡើងនៅទីក្រុងបាសេឡូណា ប្រទេសអេស្ប៉ាញ កាលពីខែមីនា ៕

ប្រែសម្រួលដោយ ៖ ជីវ័ន្ត

ប្រភព ៖ NHK

ចុចអាន ៖ អេស្ប៉ាញ អនុញ្ញាតឲ្យមនុស្សចូលរួមទស្សនាការប្រគំតន្ត្រីជាលើកដំបូង ក្នុងក្តីសង្ឃឹមវិលទៅរកភាពធម្មតាវិញ

The post រំភើបជំនួសណាស់! អង់គ្លេស បើកឲ្យមនុស្សចូលទស្សនាការប្រគំតន្ត្រីខ្នាតយក្សដោយមិនចាំបាច់ពាក់ម៉ាស និងរក្សាគម្លាតសង្គម appeared first on Kampuchea Thmey Daily.