ការវាយប្រហារតាមអាកាស Archives - Kampuchea Thmey Daily

របាយការណ៍ស៊ើបអង្កេត៖ មីស៊ីលអាមេរិកប្រើវាយប្រហារចំសាលាកុមារ សម្លាប់មនុស្ស១៧០នាក់នៅអ៊ីរ៉ង់

Minea Neu — Wed, 18 Mar 2026 10:19:43 +0000

អង្គការលើកលែងទោសអន្តរជាតិ (Amnesty International) លើកឡើងនៅក្នុងការស៊ើបអង្កេតថ្មីមួយថាសហរដ្ឋអាមេរិកទទួលខុសត្រូវ ចំពោះការវាយប្រហារលើសាលាបឋមសិក្សាអ៊ីរ៉ង់សម្លាប់មនុស្សយ៉ាងហោចណាស់ ១៧០នាក់ ដែលភាគច្រើនជាកុមារ។

យោងតាម Al Jazeera ផ្សាយថ្ងៃទី១៦ខែមីនា អង្គការសិទ្ធិមនុស្សកាលពីថ្ងៃចន្ទនិយាយថាមីស៊ីល Tomahawk ដែលផលិតដោយសហរដ្ឋអាមេរិកទំនងជាត្រូវបានប្រើប្រាស់ក្នុងការវាយប្រហារលើសាលានៅភាគខាងត្បូងទីក្រុង Minab នៅថ្ងៃទី ២៨ ខែកុម្ភៈ។

កុមារដែលស្លាប់ដោយការវាយប្រហារនៅអ៊ីរ៉ង់។ រូបភាព៖ EPA

អង្គការនេះ បាននិយាយថា៖ «មីស៊ីល Tomahawk បានប្រើប្រាស់ទាំងស្រុងដោយកងកម្លាំងអាមេរិកនៅក្នុងជម្លោះ ហើយជាមីស៊ីលដែលមានអ្នកដឹកនាំដោយភាពជាក់លាក់»។

ដោយរូបភាពផ្កាយរណប វីដេអូ និងការសម្ភាសន៍ជាមួយអ្នកជំនាញ អង្គការលើកលែងទោសនិយាយថា៖ « ការស៊ើបអង្កេតបង្ហាញថា សាលារៀននេះត្រូវបានវាយប្រហារដោយផ្ទាល់ រួមទាំងរចនាសម្ព័ន្ធរាប់សិបផ្សេងទៀតក្នុងបរិវេណកងឆ្មាំបដិវត្តន៍អ៊ីស្លាម (IRGC) ដែលនៅជាប់គ្នា»។

អង្គការបន្តថា៖ «ទាំងនេះបង្ហាញពីការបរាជ័យរបស់កងកម្លាំងអាមេរិកក្នុងការចាត់វិធានការបង្ការដែលអាចធ្វើទៅបាន ដើម្បីជៀសវាងគ្រោះថ្នាក់ដល់ជនស៊ីវិលក្នុងការអនុវត្តការវាយប្រហារ វាជាការរំលោភបំពានយ៉ាងធ្ងន់ធ្ងរលើច្បាប់មនុស្សធម៌អន្តរជាតិ»។

មិនតែប៉ុណ្ណោះ ក្រុមអ្នកតស៊ូមតិសិទ្ធិមនុស្សចង្អុលបង្ហាញថាការវាយប្រហារនៅទីក្រុង Minab ជាភស្តុតាងនៃឧក្រិដ្ឋកម្មសង្គ្រាមដែលអាចកើតឡើងដោយអ៊ីស្រាអែល និងអាមេរិកក្នុងសង្គ្រាមលើអ៊ីរ៉ង់។ ពួកគេរំលោភលើច្បាប់អន្តរជាតិ។

ខណៈទីក្រុងវ៉ាស៊ីនតោនថាខ្លួនកំពុងស៊ើបអង្កេតឧប្បត្តិហេតុនេះ រដ្ឋបាលប្រធានាធិបតីអាមេរិក ដូណាល់ ត្រាំ បានអំពាវនាវកាន់តែខ្លាំងឡើងដើម្បីធ្វើការស៊ើបអង្កេតយ៉ាងហ្មត់ចត់ និងធានាលើការទទួលខុសត្រូវចំពោះអ្វីដែលបានកើតឡើង។

ចំណែកអ្នកជំនាញអង្គការសហប្រជាជាតិថាការវាយប្រហារនៅសាលារៀនជាការវាយប្រហារយ៉ាងធ្ងន់ធ្ងរលើកុមារ ខណៈសមាជិកសភាប្រជាធិបតេយ្យអាមេរិកជំរុញឱ្យរដ្ឋបាលលោក ត្រាំ ផ្តល់ចម្លើយច្បាស់លាស់ដល់សាធារណជនពីមូលហេតុដែលសោកនាដកម្មនេះបានកើតឡើង៕

ប្រែសម្រួល៖ ណឺ មិនា

The post របាយការណ៍ស៊ើបអង្កេត៖ មីស៊ីលអាមេរិកប្រើវាយប្រហារចំសាលាកុមារ សម្លាប់មនុស្ស១៧០នាក់នៅអ៊ីរ៉ង់ appeared first on Kampuchea Thmey Daily.

អ៊ីស្រាអែលវាយប្រហារនៅហ្គាហ្សាសម្លាប់ជនជាតិប៉ាឡេស្ទីនយ៉ាងហោចណាស់១៣នាក់

Minea Neu — Mon, 16 Mar 2026 04:58:35 +0000

ការវាយប្រហារតាមអាកាសរបស់អ៊ីស្រាអែលកាលពីថ្ងៃអាទិត្យនៅតំបន់ហ្គាហ្សា បានសម្លាប់ជនជាតិប៉ាឡេស្ទីនយ៉ាងហោចណាស់១៣នាក់ រួមទាំងក្មេងប្រុសពីរនាក់ ស្ត្រីមានផ្ទៃពោះម្នាក់ និងមន្ត្រីប៉ូលិស ៩នាក់។

ការវាយប្រហារមួយកាលពីថ្ងៃអាទិត្យបានកំណត់គោលដៅលើកន្លែងស្នាក់នៅមួយក្នុងជំរំជនភៀសខ្លួនក្នុងទីក្រុង Nuseirat កណ្តាលតំបន់ហ្គាហ្សា ដោយបានសម្លាប់មនុស្ស ៤នាក់ រួមទាំងប្តីប្រពន្ធមួយគូ និងកូនប្រុសអាយុ១០ឆ្នាំម្នាក់ផងដែរ។ នេះបើយោងតាមមន្ទីរពេទ្យ Al-Aqsa ក្បែរនោះ ដែលស្រង់ផ្សាយដោយ Al Jazeera ផ្សាយថ្ងៃទី១៥ខែមីនា ឆ្នាំ២០២៦។

តំបន់ហ្គាហ្សា។ រូបភាព៖ Reuters

លោក Mahmoud al-Muhtaseb អ្នកនៅក្បែរតំបន់វាយប្រហារ បានលើកឡើងថា៖«ការវាយប្រហារដោយមីស៊ីលកើតឡើងពេលដែលយើងកំពុងដេកលក់។ ការវាយប្រហារនោះខ្លាំងណាស់ និងមិនមានការព្រមានជាមុនទេ»។

ក្រសួងមហាផ្ទៃនៅតំបន់ហ្គាហ្សា បានឱ្យដឹងថា ការទម្លាក់គ្រាប់បែកនេះបានសម្លាប់មន្ត្រីប៉ូលិសចំនួន៩នាក់ រួមទាំងវរសេនីយ៍ឯក និងមន្ត្រីប៉ូលិសជាន់ខ្ពស់នៅកណ្តាលហ្គាហ្សា។

មន្ទីរពេទ្យ Al-Aqsa ផ្នែកទទួលសាកសព បានបញ្ជាក់ថា មានចំនួនអ្នកស្លាប់១៣នាក់ និងមាន ១៤នាក់ផ្សេងទៀតរងរបួស។

ក្រសួងលើកឡើងថា៖ «យើងថ្កោលទោសឧក្រិដ្ឋកម្មដ៏សាហាវយង់ឃ្នងដែលប្រព្រឹត្តដោយអ៊ីស្រាអែលនៅរសៀលនេះ នៅពេលដែលពួកគេបានទម្លាក់គ្រាប់បែកលើរថយន្តប៉ូលិសមួយគ្រឿង[…] មន្ត្រី និងបុគ្គលិកកំពុងបំពេញកាតព្វកិច្ចរបស់ពួកគេរក្សាសន្តិសុខ និងសណ្តាប់ធ្នាប់ អំឡុងពេលខែដ៏ពិសិដ្ឋនៃបុណ្យរ៉ាម៉ាដាន(Ramadan)»។

យ៉ាងណាមិនមានការអត្ថាធិប្បាយភ្លាមៗពីយោធាអ៊ីស្រាអែលអំពីការវាយប្រហារនេះទេ។

ការស្លាប់នៅថ្ងៃអាទិត្យគឺជាករណីចុងក្រោយបំផុតក្នុងចំណោមប្រជាជនប៉ាឡេស្ទីន នៅតំបន់ឆ្នេរសមុទ្រចាប់តាំងពីកិច្ចព្រមព្រៀងបទឈប់បាញ់រវាងអ៊ីស្រាអែល និងហាម៉ាសព្យាយាមបញ្ឈប់សង្គ្រាមប្រល័យពូជសាសន៍ជាងពីរឆ្នាំរបស់អ៊ីស្រាអែលលើតំបន់ហ្គាហ្សា៕

ប្រែសម្រួល៖ ណឺ មិនា

The post អ៊ីស្រាអែលវាយប្រហារនៅហ្គាហ្សាសម្លាប់ជនជាតិប៉ាឡេស្ទីនយ៉ាងហោចណាស់១៣នាក់ appeared first on Kampuchea Thmey Daily.

អ៊ីស្រាអែលជាប្រទេសសម្លាប់អ្នកកាសែតច្រើនបំផុតក្នុងឆ្នាំ២០២៥៖ CPJ

Minea Neu — Thu, 26 Feb 2026 09:40:41 +0000

អ៊ីស្រាអែលបានសម្លាប់បុគ្គលិកប្រព័ន្ធផ្សព្វផ្សាយនិងអ្នកកាសែតក្នុងមួយតំបន់យ៉ាងហោចណាស់ ៨៤ នាក់ ក្នុងឆ្នាំ ២០២៥ ច្រើនជាងប្រទេសដទៃទៀត និងជាឆ្នាំដែលអ្នកធ្វើការលើប្រព័ន្ធផ្សព្វផ្សាយស្លាប់ច្រើនបំផុតមិនធ្លាប់មានក្នុងប្រវត្តិសាស្រ្ត។

អ្នកកាសែតប៉ាឡេស្ទីន។ រូបភាព៖ Reuters

យោងតាម Al Jazeera ចុះផ្សាយថ្ងៃទី២៥ខែកុម្ភៈ គណៈកម្មាធិការការពារអ្នកកាសែត (CPJ) បានចេញផ្សាយរបាយការណ៍ប្រចាំឆ្នាំនេះនៅថ្ងៃពុធ ហើយបានចង្អុលបង្ហាញអំពី «វប្បធម៌គ្មានទោសពៃរ៍ជាប់លាប់ ចំពោះការវាយប្រហារលើអ្នកសារព័ត៌មានដោយយោធាអ៊ីស្រាអែល»។

គួរបញ្ជាក់ថា បុគ្គលិកប្រព័ន្ធផ្សព្វផ្សាយចំនួន ១២៩នាក់ ត្រូវបានសម្លាប់ នៅកន្លែងផ្សេងៗទៀតក្នុងប្រទេសឬតំបន់តែ១ឆ្នាំ២០២៥ ជាតួលេខខ្ពស់បំផុត ចាប់តាំងពីក្រុមអ្នកឃ្លាំមើលចាប់ផ្តើមកំណត់ត្រានៅឆ្នាំ ១៩៩២។

អ៊ីស្រាអែលទទួលខុសត្រូវចំពោះចំនួនអ្នកស្លាប់តែជាងពីរភាគបី នៃអ្នកទាំងអស់នោះប៉ុណ្ណោះ។

គណៈកម្មការអ្នកកាសែត CPJ និយាយថា បុគ្គលិកប្រព័ន្ធផ្សព្វផ្សាយភាគច្រើនដែលអ៊ីស្រាអែលសម្លាប់គឺជាជនជាតិប៉ាឡេស្ទីន ប៉ុន្តែការវាយប្រហារតាមអាកាសរបស់អ៊ីស្រាអែលក៏បានសម្លាប់បុគ្គលិកចំនួន ៣១នាក់ ក្នុងការិយាល័យកាសែតយេម៉ែន(Yemeni)ផងដែរ។

អ៊ីស្រាអែលធ្វើការវាយប្រហារយ៉ាងខ្លាំង ចំពោះអ្នកកាសែតជាគោលដៅរបស់ពួកគេ។ CPJ ចាត់ថ្នាក់ថា៖«វាជាឃាតកម្ម ដែលអនុវត្តឧប្បត្តិហេតុដ៏សាហាវចំនួន ៣៨ករណី ក្នុងចំណោម៤៧ករណី ត្រូវបានកត់ត្រាទូទាំងពិភពលោកដោយអង្គការ CPJ»។

CPJ លើកឡើងក្នុងសេចក្តីថ្លែងការណ៍មួយថា៖«បច្ចុប្បន្ននេះប្រទេសអ៊ីស្រាអែលបានសម្លាប់អ្នកកាសែតច្រើនជាងរដ្ឋាភិបាលដទៃទៀតចាប់តាំងពី CPJ ចាប់ផ្តើមប្រមូលចងក្រងរបាយការណ៍នៅឆ្នាំ ១៩៩២»។

CPJ ព្រមានទៀតថា ចំនួនពិតប្រាកដនៃអ្នកកាសែតដែលត្រូវបានអ៊ីស្រាអែលកំណត់គោលដៅ និងសម្លាប់អាចមានចំនួនខ្ពស់ជាងនេះទៅទៀត ព្រោះការសម្លាប់មួយចំនួនអាចត្រូវលាក់បាំងដោយការរឹតត្បិតសារព័ត៌មាន និងភាពលំបាកផ្នែកមនុស្សធម៌ ធ្វើឱ្យស្មុគស្មាញដល់ការ ស៊ើបអង្កេត អំឡុងពេលសង្គ្រាមប្រល័យពូជសាសន៍របស់អ៊ីស្រាអែលលើតំបន់ហ្គាហ្សា។

CPJ បន្តថា៖«ដោយមានភស្តុតាងជាច្រើនត្រូវបានបំផ្លាញចោលនាពេលបច្ចុប្បន្ននេះ ចំនួនពិតប្រាកដនៃអ្នកកាសែតប៉ាឡេស្ទីនក្នុងតំបន់ហ្គាហ្សា ត្រូវបានកំណត់គោលដៅដោយចេតនា របស់អ៊ីស្រាអែល អាចនឹងគ្មានអ្នកដឹងឡើយ»៕

ប្រែសម្រួល៖ ណឺ មិនា

The post អ៊ីស្រាអែលជាប្រទេសសម្លាប់អ្នកកាសែតច្រើនបំផុតក្នុងឆ្នាំ២០២៥៖ CPJ appeared first on Kampuchea Thmey Daily.

ក្រោយបោះឆ្នោត ជនស៊ីវិលយ៉ាងហោចណាស់ ១៧នាក់ស្លាប់ និងរបួស ១៤នាក់នៅមីយ៉ាន់ម៉ា

Minea Neu — Thu, 26 Feb 2026 02:39:05 +0000

ការវាយប្រហារតាមអាកាសរបស់យោធាមីយ៉ាន់ម៉ាក្នុងរដ្ឋរ៉ាឃីន(Rakhine) សម្លាប់មនុស្សយ៉ាងហោចណាស់ ១៧ នាក់ និងរបួស១៤នាក់ ជាការសម្លាប់ដ៏ព្រៃផ្សៃចុងក្រោយបំផុតក្នុងសង្គ្រាមស៊ីវិលរយៈពេលប៉ុន្មានសប្តាហ៍នេះ បន្ទាប់ពីជ័យជម្នះនៃការបោះឆ្នោតរបស់គណបក្សកាន់អំណាចគាំទ្រដោយយោធា ត្រូវបានអ្នកសង្កេតការណ៍អន្តរជាតិច្រានចោល និងចោទថា «ជាការក្លែងបន្លំ»។ នេះបើយោងតាមប្រព័ន្ធផ្សព្វផ្សាយក្នុងស្រុក។

យោធាមីយ៉ាន់ម៉ា។ រូបភាព៖ Reuters

Al Jazeera ចុះផ្សាយថ្ងៃ២៤ខែកុម្ភៈ ឆ្នាំ២០២៦ ឱ្យដឹងថា ស្ត្រី និងកុមារស្ថិតក្នុងចំណោមអ្នកដែលបានសម្លាប់ តាមរយៈការវាយប្រហារតាមអាកាស ជាពិសេសបានវាយប្រហារភូមិ Yoengu ក្នុងឃុំ Ponnagyun កាលពីថ្ងៃអង្គារក្នុងសប្តាហ៍នេះ។ នេះបើយោងតាមការចុះផ្សាយរបស់សារព័ត៌មានសំឡេងប្រជាធិបតេយ្យភូមា (DVB)។

ភូមិនេះស្ថិតនៅចម្ងាយប្រហែល ៣៣ គីឡូម៉ែត្រ ពីភាគឦសាននៃទីក្រុង Sittwe រដ្ឋធានីរដ្ឋ Rakhine។ វាត្រូវបានកាន់កាប់ដោយកងទ័ព Arakan (AA) ជាក្រុមប្រដាប់អាវុធជនជាតិភាគតិចក្នុងរដ្ឋ Rakhine វាយប្រឆាំងនឹងយោធាមីយ៉ាន់ម៉ា នៅក្នុងខែមីនា ឆ្នាំ ២០២៤។

សេចក្តីថ្លែងការណ៍របស់ AA បានឱ្យដឹងថា៖ «ជនស៊ីវិលស្លូតត្រង់ចំនួន១៧នាក់ រួមទាំងកុមារបីនាក់ ត្រូវបានសម្លាប់និងមានមនុស្ស ១៥ នាក់រងរបួស នៅក្នុងការវាយប្រហារនេះ។

គួរបញ្ជាក់ថា ប្រទេសមីយ៉ាន់ ធ្លាក់ក្នុងភាពចលាចលនយោបាយចាប់តាំងពីរដ្ឋប្រហារយោធាឆ្នាំ ២០២១ ជាមួយនឹងការបង្ក្រាបការតវ៉ាគាំទ្រលទ្ធិប្រជាធិបតេយ្យដ៏ខ្លាំងក្លា នាំឱ្យមានការបះបោរទូទាំងប្រទេស។

យោងតាមអង្គការសហប្រជាជាតិ មនុស្សរាប់ពាន់នាក់ត្រូវបានសម្លាប់ និងប្រហែល ៣.៦ លាននាក់ត្រូវផ្លាស់ទីលំនៅ។ សង្គ្រាមនេះបង្កឱ្យមានការតស៊ូប្រដាប់អាវុធពីសកម្មជនប្រជាធិបតេយ្យ និងក្រុមជនជាតិភាគតិច ដែលតាំងនៅជាយូរមកហើយ ក្នុងតំបន់ជាយក្រុងនៃប្រទេស៕

ប្រែសម្រួល៖ ណឺ មិនា

The post ក្រោយបោះឆ្នោត ជនស៊ីវិលយ៉ាងហោចណាស់ ១៧នាក់ស្លាប់ និងរបួស ១៤នាក់នៅមីយ៉ាន់ម៉ា appeared first on Kampuchea Thmey Daily.

របាយការណ៍UN៖ មុនបោះឆ្នោត យោធាមីយ៉ាន់ម៉ា បាញ់៤០០លើក សម្លាប់ជនស៊ីវិលយ៉ាងតិច១៧០នាក់

Minea Neu — Sat, 31 Jan 2026 10:00:00 +0000

អង្គការសហប្រជាជាតិ(UN) ថ្លែងកាលពីថ្ងៃសុក្រថា យ៉ាងហោចណាស់ជនស៊ីវិល ១៧០នាក់ ត្រូវបានសម្លាប់នៅក្នុងការវាយប្រហារតាមអាកាសចំនួន ៤០០ លើក របស់របបយោធាប្រទេសមីយ៉ាន់ម៉ា អំឡុងពេលពីរខែមុនការបោះឆ្នោត។

លោក Antonio Guterres អគ្គលេខាធិការអង្គការសហប្រជាជាតិ. Reuters

យោងតាម AFP, ការបោះឆ្នោតបីដំណាក់កាល រយៈពេលមួយខែរបស់ប្រទេសមីយ៉ាន់ម៉ា ដែលបានបញ្ចប់កាលពីថ្ងៃអាទិត្យ។ ជាពិសេសបានដាក់កម្លាំងយោធាចូលអំឡុងពេលបោះឆ្នោត តែអ្នកឃ្លាំមើលក្នុងនាមជាអ្នកប្រជាធិបតេយ្យបានច្រានចោល ថាវាជាការប៉ុនប៉ងក្នុងការប្តូរឈ្មោះ ហើយគ្រប់គ្រងរបស់កងទ័ពដដែល។

មិនតែប៉ុណ្ណោះ ការិយាល័យសិទ្ធិមនុស្សរបស់អង្គការសហប្រជាជាតិ បានរិះគន់យ៉ាងចាស់ដៃ ចំពោះការបោះឆ្នោតនេះ។ នៅថ្ងៃសុក្រ អង្គការសហប្រជាជាតិ បានព្រមានមីយ៉ាន់ម៉ាថា បានបរាជ័យក្នុងការគោរពសិទ្ធិមនុស្សជាមូលដ្ឋាន ហើយធ្វើការវាយប្រហារដោយកម្លាំងយោធាទៅលើប្រជាជនបានបន្តឥតឈប់ឈរ។

លោក James Rodehaver ប្រធានការិយាល័យសិទ្ធិរបស់មីយ៉ាន់ម៉ា បានប្រាប់អ្នកយកព័ត៌មាននៅទីក្រុងហ្សឺណែវ(Geneva) ថា៖ «ការបោះឆ្នោតដែលបានធ្វើឡើងនេះ មិនបានរារាំងអំពើហិង្សាដែលបន្តពេញក្នុងឆ្នាំ២០២៥ ទេ»។

ថ្លែងពីទីក្រុងបាងកក លោកបានគូសបញ្ជាក់ថា៖ «ឆ្នាំ២០២៥ គឺជាឆ្នាំដែលជនស៊ីវិលស្លាប់ដោយសារការវាយប្រហារតាមអាកាសច្រើនជាងគេទាំងអស់ ចាប់តាំងពីឆ្នាំ ២០២១ មក ហើយការវាយប្រហារតាមផ្លូវអាកាសនៅតែបន្តរហូតដល់ថ្ងៃបោះឆ្នោត»។

អង្គការសហប្រជាជាតិបានបន្តទៀតថា៖ « ប្រភពគួរឱ្យទុកចិត្តបានផ្ទៀងផ្ទាត់ថា យ៉ាងហោចណាស់ ជនស៊ីវិល ១៧០នាក់ ត្រូវបានសម្លាប់នៅក្នុងការវាយប្រហារតាមអាកាសរបស់យោធាចំនួន ៤០៨ លើក។ ត្រូវបានរាយការណ៍ ដោយប្រភពច្បាស់លាស់អំឡុងពេលបោះឆ្នោតដែលមានរយៈពេលជិតពីរខែ ចាប់ពីដើមខែធ្នូ»។

លោក Rodehaver ឱ្យដឹងទៀតថា៖ «ចំនួនអាចកើនឡើង ដោយចង្អុលបង្ហាញថាការផ្ទៀងផ្ទាត់តួរលេខ មានភាពស្មុគស្មាញចាប់តាំងពី ធ្វើទំនាក់ទំនងត្រូវបានកាត់ផ្តាច់ និងភាពភ័យខ្លាចរបស់ពលរដ្ឋ នៅក្នុងទីតាំងមួយចំនួនដែលពិបាកនិយាយមកកាន់យើង»៕

ប្រែសម្រួល៖ ណឺ មិនា

The post របាយការណ៍UN៖ មុនបោះឆ្នោត យោធាមីយ៉ាន់ម៉ា បាញ់៤០០លើក សម្លាប់ជនស៊ីវិលយ៉ាងតិច១៧០នាក់ appeared first on Kampuchea Thmey Daily.

យោធាមីយ៉ាន់ម៉ា វាយប្រហារលើពិធីបុណ្យព្រះពុទ្ធសាសនាសម្លាប់មនុស្ស៣២នាក់

Bun sopheap — Wed, 08 Oct 2025 03:56:20 +0000

យ៉ាងហោចណាស់មនុស្ស ៣២ នាក់ រួមទាំងកុមារជាច្រើននាក់បានស្លាប់ និងជាង ៥០ នាក់បានរងរបួស ដោយសារយោធាមីយ៉ាន់ម៉ាបើកការវាយប្រហារតាមអាកាសលើកន្លែងប្រារព្ធពិធីបុណ្យពន្លឺរបស់ព្រះពុទ្ធសាសនា ឬពិធីបុណ្យThadingyutនៅទីប្រជុំជន Chaung-U ក្នុងតំបន់ Sagaing។ នេះបើយោងតាមការចេញផ្សាយរបស់សារព័ត៌មាន The Irrawaddy កាលពីថ្ងៃទី០៧ខែតុលា។

ពិធីបុណ្យThadingyut

សាក្សីបាននិយាយថា គ្រាប់បែកពីរគ្រាប់ត្រូវបានទម្លាក់ដោយទាហារបបយោធានៅម៉ោង ៧ យប់ទៅលើហ្វូងមនុស្សដែលប្រមូលផ្តុំគ្នាក្នុងពិធីបុណ្យ។ ប៉ុន្មាននាទីក្រោយមក យន្តហោះបានត្រលប់មកទម្លាក់គ្រាប់បែកចំនួនពីរគ្រាប់ទៀត ធ្វើឱ្យមានមនុស្សស្លាប់បន្ថែមទៀត។

របាយការណ៍ក្នុងស្រុកបាននិយាយថា ជនរងគ្រោះរួមមានជនស៊ីវិល សមាជិកក្រុមប្រដាប់អាវុធ និងសកម្មជនយុវជនបួននាក់មកពីគណៈកម្មាធិការអហិង្សា Monywa-Amyint Lan ។ បើតាមវីដេអូដែលបានចែករំលែកនៅលើបណ្តាញសង្គមបានបង្ហាញពីទិដ្ឋភាពមនុស្សភ័យស្លន់ស្លោ រត់រកសមាជិកគ្រួសារពួកគេក្រោយការវាយប្រហារ។

ក្រៅពីនេះក៏មានការវាយប្រហារដាច់ដោយឡែកមួយទៀតនៅយប់ដដែលនោះ ដោយរបបយោធាបានទម្លាក់គ្រាប់បែកលើតំបន់នានាក្នុងរដ្ឋ Shan ភាគខាងជើងដែលគ្រប់គ្រងដោយកងទ័ពរំដោះជាតិតាអុង (TNLA) ។

គួរបញ្ជាក់ថារបបយោធាមីយ៉ាន់ម៉ាដឹកនាំដោយ ឧត្តមសេនីយ៍ មីន អ៊ុងឡាំង បានបង្កើនការវាយប្រហាររបស់ខ្លួនដណ្ដើមគ្រប់គ្រងតំបន់ជាច្រើនមកវិញមុនការបោះឆ្នោតនៅចុងឆ្នាំនេះ ដែលបង្គឲ្យមានអ្នកស្លាប់ របួស និងការបំផ្លិចបំផ្លាញកើនឡើង៕

ការវាយរបស់យោធាមីយ៉ាន់ម៉ាក្នុងរដ្ឋ Shan

អត្ថបទ៖ ប៊ុន សុភាព

The post យោធាមីយ៉ាន់ម៉ា វាយប្រហារលើពិធីបុណ្យព្រះពុទ្ធសាសនាសម្លាប់មនុស្ស៣២នាក់ appeared first on Kampuchea Thmey Daily.

យោធាមីយ៉ាន់ម៉ា បើកការវាយប្រហារតាមអាកាសផ្ទួនៗដ៏រន្ធត់សម្លាប់ជនស៊ីវិល១១នាក់ក្នុងរដ្ឋKachin

Bun sopheap — Thu, 02 Oct 2025 08:18:46 +0000

យ៉ាងហោចណាស់ជនស៊ីវិល ១១ នាក់ រួមទាំងកុមារអាយុ ៥ ឆ្នាំពីរនាក់ត្រូវបានសម្លាប់ ក្នុងការវាយប្រហារតាមអាកាសរបស់យោធាមីយ៉ាន់ម៉ាផ្ទួនៗចំនួនពីរលើក្រុង Sadone ក្នុងរដ្ឋ Kachin កាលពីថ្ងៃទី ២៩ ខែកញ្ញា នេះបើយោងតាមកងទ័ពឯករាជ្យ Kachin (KIA) ។

គ្រាប់បែកបានវាយប្រហារផ្សារជិតសាលារៀន ដោយការវាយប្រហារលើកដំបូងបានកើតឡើងនៅពេលរសៀល ហើយបានសម្លាប់មនុស្ស ៨ នាក់ភ្លាមៗ។ ក្រោយមក នៅពេលដែលមនុស្សកំពុងព្យាយាមជួយសង្គ្រោះអ្នករបួស យោធាមានទម្លាក់គ្រាប់បែកមួយទៀត។ មនុស្សបីនាក់ទៀតដែលរងរបួសធ្ងន់ក្រោយមកបានស្លាប់ដោយសារការវាយប្រហារលើកទី២។ ជនរងគ្រោះ៦នាក់ទៀត រួមទាំងកុមារ ស្ថិតក្នុងស្ថានភាពធ្ងន់ធ្ងរនៅឡើយ។

អ្នកនាំពាក្យរបស់ KIA បានថ្កោលទោសការវាយប្រហារនេះថាជាការវាយប្រហារដោយចេតនាលើតំបន់ជនស៊ីវិល និងក្រុមជួយសង្គ្រោះ ដោយហៅការវាយប្រហារនេះថាជា «អមនុស្សធម៌» និងជាឧក្រិដ្ឋកម្មសង្គ្រាម ដោយសារក្រុង Sadone មិនមែនជាសមរភូមិសកម្មទេ។ ក្រុង Sadone ត្រូវបានគ្រប់គ្រងដោយកងទ័ពឯករាជ្យ Kachin (KIA) ចាប់តាំងពីខែមិថុនា ឆ្នាំ ២០២៤។ វាស្ថិតនៅជិតព្រំដែនជាមួយប្រទេសចិន។

ទោះបីជាមិនមានការប្រយុទ្ធគ្នានៅក្នុងក្រុង Sadone នៅពេលដែលគ្រាប់បែកបានធ្លាក់ចុះក៏ដោយ ការប្រយុទ្ធគ្នារវាង KIA និងយោធានៅតែកើតឡើងនៅក្នុងតំបន់ Waingmaw ក្បែរនោះ។ រហូតមកទល់ពេលនេះ យោធាមីយ៉ាន់ម៉ាមិនបានផ្តល់សេចក្តីថ្លែងការណ៍ណាមួយអំពីការវាយប្រហារនោះទេ៕

អត្ថបទ៖ ប៊ុន សុភាព

The post យោធាមីយ៉ាន់ម៉ា បើកការវាយប្រហារតាមអាកាសផ្ទួនៗដ៏រន្ធត់សម្លាប់ជនស៊ីវិល១១នាក់ក្នុងរដ្ឋKachin appeared first on Kampuchea Thmey Daily.

អ៊ីស្រាអែលបង្កើនការវាយលុកលើហ្គាហ្សា ខណៈប្រទេសជាច្រើនត្រៀមទទួលស្គាល់រដ្ឋប៉ាឡេស្ទីន

Bun sopheap — Sun, 21 Sep 2025 01:32:37 +0000

យោងតាមការចេញផ្សាយរបស់សារព័ត៌មាន Al Jazeera យ៉ាងហោចណាស់ជនជាតិប៉ាឡេស្ទីន ៩១នាក់ត្រូវបានសម្លាប់កាលពីថ្ងៃសៅរ៍ នៅក្នុងការបង្កើនការវាយប្រហារតាមអាកាសរបស់អ៊ីស្រាអែលទូទាំងតំបន់ហ្គាហ្សា ខណៈប្រទេសជាច្រើនត្រៀមទទួលស្គាល់រដ្ឋប៉ាឡេស្ទីន។

(រូបភាព៖ Anadolu)

កងកម្លាំងអ៊ីស្រាអែលបានវាយកម្ទេចអគារប្រហែល ២០ ប្លុកក្នុងប៉ុន្មានសប្តាហ៍ថ្មីៗនេះ ខណៈកំពុងព្យាយាមបង្ខំអ្នកស្រុកឱ្យជម្លៀសចេញ។ ជិតពាក់កណ្តាលនៃចំនួនប្រជាជននៅទីក្រុងហ្គាហ្សា មានប្រហែល ៤៥ ម៉ឺននាក់បានភៀសខ្លួនចាប់តាំងពីអ៊ីស្រាអែលបានប្រកាសផែនការដណ្តើមយកតំបន់នោះ។

សាក្សី និងគ្រូពេទ្យបានរាយការណ៍ថា ការវាយប្រហារដោយយន្តហោះគ្មានមនុស្សបើក បានសំដៅលើមនុស្សនៅពេលពួកគេរត់គេចខ្លួន ដែលធ្វើជនស៊ីវិលស្លាប់កាន់តែច្រើន។ ទន្ទឹមនឹងនេះ លក្ខខណ្ឌនៅ al-Mawasi ដែលអ៊ីស្រាអែលកំណត់ថាជា «តំបន់សុវត្ថិភាព» នៅតែមានវិបត្តិធ្ងន់ធ្ងរ។ គ្រួសារដែលផ្លាស់ទីលំនៅរស់នៅក្នុងតង់ចង្អៀតមានទឹកនិងអាហារតិចតួចប៉ុណ្ណោះ។ ក្រុមជំនួយ ពិពណ៌នាថា ការរស់រានរបស់ប្រជាជនហ្គាហ្សាកាន់តែយ៉ាប់យឺនទៅៗ ខណៈការប្រហាររបស់អ៊ីស្រាអែលមិនបានឈប់ និងរឹតតែកើនឡើង។

(រូបភាព៖ Reuters)

គួរបញ្ជាក់ថាការបង្កើនការវាយលុករបស់អ៊ីស្រាអែលនេះកើតឡើងចំពេលដែលប្រទេសលោកខាងលិចមួយចំនួនដូចជាចក្រភពអង់គ្លេស បារាំង កាណាដា និងអូស្ត្រាលី រៀបចំដើម្បីទទួលស្គាល់ភាពជារដ្ឋរបស់ប៉ាឡេស្ទីននៅឯមហាសន្និបាតអង្គការសហប្រជាជាតិ។ ប្រទេសព័រទុយហ្គាល់បានអះអាងថា ខ្លួននឹងទទួលស្គាល់ប៉ាឡេស្ទីនជាផ្លូវការនៅថ្ងៃអាទិត្យនេះ។ ទោះយ៉ាងណាយោធាអ៊ីស្រាអែលនិយាយថា ប្រតិបត្តិការរុះរើហេដ្ឋារចនាសម្ព័ន្ធក្រុមហាម៉ាសនៅហ្គាហ្សាអាចមានរយៈពេលជាច្រើនខែ ដោយមិនមានបទឈប់បាញ់នៅចំពោះមុខឡើយ៕

(រូបភាព៖ Reuters)

អត្ថបទ៖ ប៊ុន សុភាព

The post អ៊ីស្រាអែលបង្កើនការវាយលុកលើហ្គាហ្សា ខណៈប្រទេសជាច្រើនត្រៀមទទួលស្គាល់រដ្ឋប៉ាឡេស្ទីន appeared first on Kampuchea Thmey Daily.

ការវាយប្រហារតាមអាកាស Archives - Kampuchea Thmey Daily

របាយការណ៍ស៊ើបអង្កេត​៖​​ មីស៊ីល​អាមេរិកប្រើ​វាយ​ប្រហារ​ចំសាលា​កុមារ​ សម្លាប់​មនុស្ស​១៧០នាក់នៅអ៊ីរ៉ង់​

អ៊ីស្រាអែល​​​វាយ​ប្រហារ​​​​នៅហ្គាហ្សា​សម្លាប់​ជនជាតិ​ប៉ា​ឡេស្ទីន​យ៉ាងហោចណាស់១៣នាក់

អ៊ី​ស្រាអែល​​ជា​ប្រទេស​​​សម្លាប់​អ្នក​កាសែត​​​ច្រើន​បំផុត​​​ក្នុង​​​ឆ្នាំ២០២៥​៖ CPJ

​ក្រោយ​បោះឆ្នោត ​ជនស៊ីវិល​​យ៉ាងហោច​ណាស់​ ១៧នាក់ស្លាប់​ និង​របួស ១៤នាក់​នៅមីយ៉ាន់ម៉ា​

របាយការណ៍UN៖ មុន​បោះឆ្នោត យោធា​មីយ៉ាន់ម៉ា​ បាញ់​៤០០លើក​ សម្លាប់​ជនស៊ីវិល​​យ៉ាងតិច​១៧០​នាក់

យោធាមីយ៉ាន់ម៉ា វាយប្រហារលើពិធីបុណ្យព្រះពុទ្ធសាសនាសម្លាប់មនុស្ស៣២នាក់

យោធា​មីយ៉ាន់ម៉ា បើកការ​វាយ​ប្រហារ​តាម​អាកាសផ្ទួនៗដ៏រន្ធត់​​សម្លាប់​ជន​ស៊ីវិល​១១​នាក់​ក្នុង​រដ្ឋ​Kachin

អ៊ីស្រាអែលបង្កើនការវាយលុកលើហ្គាហ្សា ខណៈប្រទេសជាច្រើនត្រៀមទទួលស្គាល់រដ្ឋប៉ាឡេស្ទីន

របាយការណ៍ស៊ើបអង្កេត៖ មីស៊ីលអាមេរិកប្រើវាយប្រហារចំសាលាកុមារ សម្លាប់មនុស្ស១៧០នាក់នៅអ៊ីរ៉ង់

អ៊ីស្រាអែលវាយប្រហារនៅហ្គាហ្សាសម្លាប់ជនជាតិប៉ាឡេស្ទីនយ៉ាងហោចណាស់១៣នាក់

អ៊ីស្រាអែលជាប្រទេសសម្លាប់អ្នកកាសែតច្រើនបំផុតក្នុងឆ្នាំ២០២៥៖ CPJ

ក្រោយបោះឆ្នោត ជនស៊ីវិលយ៉ាងហោចណាស់ ១៧នាក់ស្លាប់ និងរបួស ១៤នាក់នៅមីយ៉ាន់ម៉ា

របាយការណ៍UN៖ មុនបោះឆ្នោត យោធាមីយ៉ាន់ម៉ា បាញ់៤០០លើក សម្លាប់ជនស៊ីវិលយ៉ាងតិច១៧០នាក់

យោធាមីយ៉ាន់ម៉ា បើកការវាយប្រហារតាមអាកាសផ្ទួនៗដ៏រន្ធត់សម្លាប់ជនស៊ីវិល១១នាក់ក្នុងរដ្ឋKachin