គម្រោងទាំងនេះត្រូវបានគណៈប្រតិភូក្រុមហ៊ុន China Energy International Group Co., Ltd ដែលដឹកនាំដោយ លោក Qiao Xubin ប្រធានក្រុមប្រឹក្សាភិបាលក្រុមហ៊ុន ទទួលជួបពិភាក្សាការងារជាមួយ លោកបណ្ឌិតសភាចារ្យ ហ៊ាន សាហ៊ីប ប្រធានក្រុមការងារជំរុញការវិនិយោគក្នុងភូមិភាគឦសាន កាលពីរសៀលថ្ងៃទី ២៧ ខែមីនា ឆ្នាំ ២០២៦ នៅទីស្តីការក្រសួងសេដ្ឋកិច្ច និង ហិរញ្ញវត្ថុ។

ក្នុងឱកាសនោះ លោក Qiao Xubin បានថ្លែងអំណរគុណចំពោះ លោកបណ្ឌិតសភាចារ្យ ដែលបានដឹកនាំក្រុមការងារក្នុងការពិនិត្យផ្តល់ការលើកទឹកចិត្តពិសេស ការអនុគ្រោះ និង ការសម្រួលនីតិវិធីរបស់គម្រោងវិនិយោគក្នុងខេត្តទាំងបួននៅភូមិភាគឦសាន ជាពិសេសបានជួយសម្រួលដល់គម្រោងសាងសង់កំពង់ផែ និង សាងសង់ផ្លូវរបស់ក្រុមហ៊ុន ក្នុងខេត្តក្រចេះ។

ជាមួយគ្នានេះ លោក Qiao Xubin បានជម្រាបជូន លោកបណ្ឌិតសភាចារ្យ អំពីប្រវត្តិព័ត៌មានអាជីវកម្ម និង បទពិសោធរបស់ក្រុមហ៊ុន ព្រមទាំងបានបង្ហាញនូវគោលបំណងរបស់ក្រុមហ៊ុន ក្នុងការពង្រីកការវិនិយោគលើវិស័យថាមពលអគ្គិសនី និង ការវិនិយោគលើគម្រោងប្រព្រឹត្តកម្មទឹកកខ្វក់។

លោកបណ្ឌិតសភាចារ្យ ហ៊ាន សាហ៊ីប បានស្វាគមន៍ចំពោះគណៈប្រតិភូក្រុមហ៊ុនដែលបានអញ្ជើញមកសិក្សាស្វែងយល់អំពីកាលានុវត្តភាពវិនិយោគក្នុងខេត្តទាំងបួននៅភូមិភាគឦសាន ព្រមទាំងពិនិត្យលទ្ធភាពក្នុងការពង្រីកការវិនិយោគលើវិស័យថាមពលអគ្គិសនី និង គម្រោងប្រព្រឹត្តកម្មទឹកកខ្វក់។

លោកបណ្ឌិតសភាចារ្យ បានលើកទឹកចិត្តដល់គណៈប្រតិភូក្រុមហ៊ុន ក្នុងការចាប់យកកាលានុវត្តភាពវិនិយោគ ក្នុងខេត្តទាំងបួននៅភូមិភាគឦសាន។ ជាមួយនេះ ក្រុមការងារ នឹងបន្តផ្តល់ការសម្របសម្រួល និងកិច្ចសហការល្អ សំដៅជំរុញឱ្យដំណើរការវិនិយោគរបស់ក្រុមហ៊ុន អាចដំណើរការបានដោយរលូន និង ទាន់ពេល។

លោកបណ្ឌិតសភាចារ្យ ហ៊ាន សាហ៊ីប បានគូសរំលេចជូនគណៈប្រតិភូក្រុមហ៊ុនថា «កម្មវិធីពិសេសជំរុញការវិនិយោគក្នុងខេត្តទាំងបួននៅភូមិភាគឦសាន នៃព្រះរាជាណាចក្រកម្ពុជា ឆ្នាំ ២០២៥-២០២៨» គឺជាយន្តការសម្របសម្រួលពិសេស ដែលមានសមាសភាពអន្តរក្រសួង-ស្ថាប័ន ដើម្បីផ្តល់ការលើកទឹកចិត្តពិសេស ការអនុគ្រោះ និង ការសម្រួលនីតិវិធី ទាំងផ្នែកសារពើពន្ធ និង មិនមែនសារពើពន្ធ សម្រាប់គម្រោងវិនិយោគ និង ធុរកិច្ច ក្នុងខេត្តទាំងបួននៅភូមិភាគឦសាន នៃព្រះរាជាណាចក្រកម្ពុជា, ដោយប្រកាន់ខ្ជាប់នូវការដោះស្រាយ និង ការអនុវត្តការងាររួមគ្នាជាកញ្ចប់ ក្នុងអភិក្រម “ជវភាព នៃប្រព័ន្ធតួអង្គតែមួយ” សំដៅជំរុញការវិនិយោគ និង សកម្មភាពសេដ្ឋកិច្ចក្នុងខេត្ត៕
អត្ថបទ ៖ សំអឿន

The post ក្រុមហ៊ុនចិនមួយ មានបំណងពង្រីកការវិនិយោគលើវិស័យថាមពលអគ្គិសនី និងប្រព្រឹត្តកម្មទឹកកខ្វក់ នៅខេត្តភូមិភាគឦសាន appeared first on Kampuchea Thmey Daily.

លោកសាស្ត្រាចារ្យ តេតស៊ូយ៉ា វ៉ាតាណាបេ បានលើកឡើងក្នុងពេលជួបពិភាក្សាការងារជាមួយសម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា នៅព្រឹកថ្ងៃទី ០៩ ខែកុម្ភៈ ឆ្នាំ ២០២៦ នៅវិមានសន្ដិភាព។

លោកសាស្ត្រាចារ្យ បានរាយការណ៍ជូនសម្ដេចធិបតី អំពីលទ្ធផលនៃការស្រាវជ្រាវស្ដីពី «ការបង្កើតតំបន់សេដ្ឋកិច្ចពិសេស​​បៃតងកម្ពុជា-ជប៉ុន (C-J GSEZ)»។

លោកសាស្ត្រាចារ្យ ក៏បានលើកឡើងពីសក្ដានុពល និងឱកាសរបស់កម្ពុជាក្នុងការទាក់ទាញវិនិយោគិនជប៉ុន ជាពិសេសលទ្ធភាពរបស់កម្ពុជាក្នុងការប្រែក្លាយខ្លួនទៅជា «មូលដ្ឋានផលិតកម្មឧស្សាហកម្មថ្មី» ដែលការណ៍នេះមិនត្រឹមតែរួមចំ​ណែក​ដល់កំណើនសេដ្ឋកិច្ចរបស់កម្ពុជាប៉ុណ្ណោះទេ ប៉ុន្តែថែមទាំងរួមចំណែកដល់ខ្សែច្រវាក់ផលិតកម្មឧស្សាហកម្មតំបន់ និង សកល​។​

លោកសាស្ត្រាចារ្យ បន្ថែមថា វិនិយោគិនជប៉ុនចាប់អារម្មណ៍ក្នុងការវិនិយោគបន្ថែម នៅកម្ពុជា ក៏ដូចជាការរៀបចំនូវវេទិកាធុរកិច្ចកម្ពុជា-ជប៉ុន នាពេលខាងមុខ ដើម្បីចូលរួមចំណែកក្នុងការទាក់ទាញវិនិយោគិនជប៉ុនមកកាន់កម្ពុជាឱ្យកាន់តែច្រើន។

បច្ចុប្បន្ននេះ បណ្ដាក្រុមហ៊ុនជប៉ុនកំពុងស្វែងរកឱកាសក្នុងការផ្លាស់ប្ដូរទីតាំងផលិតកម្ម (Re-​location)​ នៅក្នុងតំបន់ ហើយបាននិងកំពុងសម្លឹងមើលឱកាសក្នុងការវិនិយោគថ្មីៗនៅកម្ពុជាបន្ថែមទៀត។

សម្ដេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានវាយតម្លៃខ្ពស់ចំពោះលទ្ធផលនៃការសិក្សាសមិទ្ធិលទ្ធភាពរបស់វិទ្យាស្ថាន ERIA។

រាជរដ្ឋាភិបាលកម្ពុជាកំពុងផ្ដោតការយកចិត្តទុកដាក់លើការបង្កើតតំបន់សេដ្ឋកិច្ចពិសេសបៃតង (Green SEZ) និងការបង្កើតតំបន់សេដ្ឋកិច្ចពិសេសសម្រាប់ប្រទេសជាក់លាក់ និងឧស្សាហកម្មជាក់លាក់ ជាដើម។​

សម្ដេចធិបតីបានលើកទឹកចិត្តឱ្យលោកសាស្ត្រាចារ្យបន្តផ្សារភ្ជាប់ទំនាក់ទំនង និងពិភាក្សាលម្អិតបន្ថែមទៀតជាមួយក្រសួង-ស្ថាប័នពាក់ព័ន្ធរបស់រាជរដ្ឋាភិបាល ជាពិសេសក្រុមប្រឹក្សាអភិវឌ្ឍន៍កម្ពុជា (CDC) និងវិស័យឯកជន ទាំងនៅជប៉ុន និង​កម្ពុជា សំដៅពិនិត្យលទ្ធភាពក្នុងការជ្រើសរើសនូវម៉ូដែលសម្រាប់គម្រោងបង្កើតតំបន់សេដ្ឋកិច្ចពិសេសទ្វេភាគី ឬត្រីភាគី៕

The post អ្នកជំនាញសេដ្ឋកិច្ចអះអាង កម្ពុជាមានសក្ដានុពលខ្ពស់ក្នុងការទាក់ទាញវិនិយោគិនជប៉ុន appeared first on Kampuchea Thmey Daily.

នៅ​ក្នុង​កិច្ចប្រជុំ​ពិភាក្សា​អំពី​ការ​គ្រប់គ្រង​ទិន្នន័យ និង​ព័ត៌មាន​វិនិយោគ​, និង​ការ​គ្រប់គ្រង​សម្បទាន​ដី​សេដ្ឋកិច្ច សម្រាប់​ជំរុញ​ការ​វិនិយោគ​ក្នុង​ខេត្ត​ទាំង ៤ នៃ​ភូមិភាគ​ឦសាន​ កាលពី​ថ្ងៃទី​ ១១ ​ធ្នូ លោកបណ្ឌិត​សភា​ចា​រ្យ ហ៊ាន សា​ហ៊ី​ប ទីប្រឹក្សា​សម្តេច​ធិបតី​នាយករដ្ឋមន្ត្រី​ , រដ្ឋលេខាធិការ​ក្រសួង​សេដ្ឋកិច្ច និង​ហិរញ្ញវត្ថុ និង ជា​ប្រធាន​ក្រុមការងារ​ជំរុញ​ការវិនិយោគ​ក្នុងភូមិ​ភាគ​ឦសាន (​ក​.​វ​.​ឦសាន​)​ បាន​លើកឡើងថា ​រដ្ឋបាល​ខេត្ត​ទាំង​បួន ​ត្រូវ​បន្ត​យកចិត្តទុកដាក់​ពិនិត្យ​លើ​កិច្ចការ​សម្បទាន​ដី​សេដ្ឋកិច្ច ក្នុង​ដែន​សមត្ថកិច្ច​របស់ខ្លួន ដោយ​សម្បទានិក​ដែល​បាន​អនុវត្ត​ការងារ​របស់​ខ្លួន​ហើយ ត្រូវ​បន្ត​ជំរុញ​ទៅមុខ​បន្ថែម​ទៀត ​, ហើយ​សម្បទា​និក​ដែល​បាន​អភិវឌ្ឍន៍​សម្បទាន​ដី​សេដ្ឋកិច្ច​បាន​តិចតួច ឬ មិនទាន់បាន​អនុវត្ត​ការងារ​សោះ ត្រូវ​ជំរុញ​ឱ្យ​អនុវត្ត​ការងារ​ឱ្យ​បាន​សកម្ម​ផុលផុស ដើម្បី​ធានា​ឱ្យ​បាន​ថា ធនធាន​ដែលមាន ត្រូវបាន​ប្រើប្រាស់​អស់​សក្តានុពល និង មាន​ផលិតភាព​សេដ្ឋកិច្ច​ខ្ពស់។

លោក​បណ្ឌិតសភា​ចា​រ្យ បាន​ណែនាំ​ក្រសួង​-​ស្ថាប័ន​ពាក់ព័ន្ធ និង រដ្ឋបាលខេត្ត​ទាំង​បួន ឱ្យ​ពង្រឹង​កិច្ច​សហការ​ល្អ ក្នុងការ​រៀបចំ និង ការគ្រប់គ្រង​ប្រព័ន្ធ​ទិន្នន័យ​វិនិយោគ និង ការចែករំលែក​ព័ត៌មាន ក្រោម​ការសម្របសម្រួល​រួម​របស់ ក​.​វ​.​ឦសាន សំដៅ​រួមគ្នា​ដោះស្រាយ​បញ្ហា​ជា​កញ្ចប់ ដោយ​គិតគូរ​អំពី​ផលប្រយោជន៍​សង្គម​-​សេដ្ឋកិច្ច​ជាតិ ​, ជាពិសេស ត្រូវ​ធានា​ឱ្យបាន​ថា វិនិយោគិន​ នឹង​ទទួលបាន​នូវ​ការ​គាំទ្រ​វិនិយោគ ឬ ធុរកិច្ច បាន​យ៉ាង​ពេញលេញ និង ទាន់ពេលវេលា និង អាច​ទាញយក​អត្ថប្រយោជន៍​ជា​អតិបរមា ពី​កាលានុវត្តភាព​សេដ្ឋកិច្ច​ដ៏​ធំធេង នៃ​ភូមិភាគ​ឦសាន។

ជាមួយគ្នានេះ លោក​បណ្ឌិតសភា​ចា​រ្យ បាន​គូស​រំលេច​អំពី​តួនាទី​ស្នូល​របស់ ក​.​វ​.​ឦសាន ដែល​ជា «ច្រក​ចេញ​ចូល​តែមួយ​» ក្នុង​អភិក្រម​ជវភាព ​នៃ​ប្រព័ន្ធ​តួអង្គ​តែមួយ ដើម្បី​ផ្តល់​ការ​សម្របសម្រួល​ជា​កញ្ចប់​នូវ​ព័ត៌មាន​វិនិយោគ ​, ការសម្រួល​នីតិវិធី​ពាក់ព័ន្ធ និង ការដោះស្រាយ​បញ្ហា​ប្រឈម​នានា ​នៃ​ការ​វិនិយោគ​ឯកជន ប្រកបដោយ​ប្រសិទ្ធភាព សំដៅ​ផ្តល់​ភាព​កក់ក្តៅ និង ទំនុក​ចិត្ត​ខ្ពស់ ដល់​វិនិយោគិន​/​ក្រុមហ៊ុន​វិនិយោគ ឱ្យមក​បណ្តាក់​ទុនវិនិយោគនៅ​ភូមិភាគ​ឦសាន។

គួរ​បញ្ជាក់ថា​ កិច្ចប្រជុំ​នេះ មានការ​ចូលរួម​ពី​តំណាង​ក្រសួង-ស្ថាប័ន​ពាក់ព័ន្ធ និង រដ្ឋបាលខេត្ត​ទាំង​បួន នៃ​ភូមិភាគ​ឦសាន ដើម្បី​ពង្រឹង​យន្តការ​សម្របសម្រួល ​, គ្រប់គ្រង​ព័ត៌មាន​/​ទិន្នន័យ​វិនិយោគ និង គ្រប់គ្រង​ដី​សម្បទាន​សេដ្ឋកិច្ច ឱ្យមាន​ភាពស៊ីចង្វាក់​គ្នា រវាង​តួអង្គ​ពាក់ព័ន្ធ​ទាំងអស់ ក្នុង​អភិក្រម​នៃ “​ជវភាព​ប្រព័ន្ធ​តួអង្គ​តែមួយ​” ដើម្បី​ឆ្លើយតប​ទៅនឹង​តម្រូវការ និង កង្វល់​របស់​វិស័យ​ឯកជន ពាក់ព័ន្ធ​នឹង​ការស្វែងរក និង ការទទួលបាន​នូវ​ព័ត៌មាន​/​ទិន្នន័យ​ដីធ្លី​សម្រាប់​ការវិនិយោគ ដែលមាន​លក្ខណៈ​រហ័ស ច្បាស់លាស់ និង គ្រប់​ជ្រុងជ្រោយ ដែល​ជា​ធាតុ​ចូល​ដ៏​សំខាន់​សម្រាប់​ការ​សម្រេច​ចិត្ត​វិនិយោគ និង អាជីវកម្ម។ លើសពីនេះ ការពង្រឹង​យន្តការ​សម្របសម្រួល​ព័ត៌មាន នឹង​ពង្រឹង​សហ​ថាមពល ​នៃ​ការ​ប្រមូលផ្ដុំ​ឧស្សាហកម្ម ដែល​ផ្សារភ្ជាប់​ខ្សែ​ច្រវាក់​ផលិតកម្ម និង ផ្គត់ផ្គង់ ស្រប​តាម​សក្ដានុពល​សេដ្ឋកិច្ច​ នៃ​តំបន់​ភូមិភាគ​ឦសាន៕

អត្ថបទ ៖ សំអឿន

The post មន្ត្រីជាន់ខ្ពស់ ជំរុញឱ្យរដ្ឋបាលខេត្តទាំងបួនក្នុងភូមិភាគឦសាន ពិនិត្យលើកិច្ចការសម្បទានដីសេដ្ឋកិច្ច ដើម្បីទាក់ទាញការវិនិយោគ appeared first on Kampuchea Thmey Daily.

បើតាមទិន្នន័យពី​អគ្គនា​យក​ដ្ឋាន​​គយ និង​រដ្ឋាករ​កម្ពុជា ​(GDCE) ក្នុងរយៈពេល១០ខែ នៃ​ឆ្នាំ ២០២៥   ទំហំ​ពាណិជ្ជ​កម្មទ្វេ​ភាគីកម្ពុជា-កាណាដា សម្រចបានក្នុងទំហំ១.១ពាន់លានដុល្លារសហរដ្ឋអាម៉េរិក ក្នុងកម្ពុជានាំចេញទៅកាណាដាក្នុងទំហំជាង១ពាន់លានដុល្លារ ចំណែកកម្ពុជានាំចូលពីកាណាដាវិញក្នុងទំហំជាង៥៩លានដុល្លារ។

សម្ដេច ហ៊ុន សែន ក៏បានលើកឡើងនៅចំពោះមុខឯកអគ្គរដ្ឋទូតកាណាដាថា ការដែលកម្ពុជា និងកាណាដានៅឆ្ងាយគ្នា ប៉ុន្តែសម្រេចការដោះដូរទំនិញបានក្នុងទំហំជាង១ពាន់លានដុល្លារទៅបាន គឺកើតឡើងពីការប្ដេជ្ញាចិត្ត និងការខិតខំប្រឹងប្រែងរួមគ្នា។

ត្បិតទំនាក់ទំនងលើវិស័យពាណិជ្ជកម្មកើនឡើងក៏ដោយ ក៏ឯកអគ្គរដ្ឋទូតកាណាដា ប្ដេជ្ញាជំរុញទំនាក់ទំនងនៅក្នុងវិស័យពាណិជ្ជកម្មរវាងកម្ពុជា និងកាណាដាកាន់តែមានភាពសកម្មបន្ថែមទៀត ក៏ដូចជាជំរុញអ្នកវិនិយោគកាណាដាមកវិនិយោគនៅកម្ពុជាបន្ថែម  ព្រោះលោកថា បើនិយាយពីការវិនិយោគរបស់កាណាដានៅកម្ពុជា គេនឹងនឹកឃើញដល់ធនាគារ ABA ជាធនាគាររបស់កាណាដា ដែលនេះជាផ្លែផ្កាមួយ។

ក្នុងជំនួបនោះ សម្ដេចតេជោ ហ៊ុន សែន ប្រធានព្រឹទ្ធសភាកម្ពុជា សង្ឃឹមថា កម្ពុជា និងកាណាដា នឹងរួមសហការគ្នាបន្ថែមទៀតដើម្បីពូនជ្រុំទំនាក់ទំនង ជាប្រវត្តិសាស្ត្រយូរមកហើយរវាងប្រទេសទាំងពីរ ដែលបច្ចុប្បន្ននៅតែរក្សាបាននូវទំនាក់ទំនងដ៏ល្អ ដើម្បីជាផ្នែកនៃការរុញច្រាននៃទំនាក់ទំនងដទៃទៀត ទាំងផ្នែកពាណិជ្ជកម្ម និងវិនិយោគ ពិសេសនៅក្នុងផ្នែកវិនិយោគនៅកម្ពុជាបន្ថែមទៀត។

កម្ពុជា-កាណដា ស្ថិតនៅទ្វីបខុសគ្នា ដែលមានចម្ងាយឆ្ងាយពីគ្នាជិត១ម៉ឺន២ពាន់គីឡូម៉ែត្រ។ កាណាដា  បានចងភ្ជាប់ទំនាក់ទំនងការទូតជាផ្លូវការជាមួយកម្ពុជា នៅក្នុងឆ្នាំ១៩៥២​ ពោលគឺមុនពេលដែលកម្ពុជាទទួលបានឯករាជ្យពេញលេញពីបារាំងម៉្លេះ។  ចូលមកដល់ឆ្នាំ២០២៥ ទំនាក់ទំនងការទូតនៃប្រទេសទាំងពីរឈានដល់វ័យ៧៣ឆ្នាំ៕

ដោយ៖ ង៉ិល ណារ៉ាត់

The post កម្ពុជា-កាណាដាឆ្ងាយគ្នាជាង១ម៉ឺនគីឡូម៉ែត្រ តែទំហំពាណិជ្ជកម្មធំជាង១ពាន់លានដុល្លារ សម្ដេចតេជោថាជារឿងមិនធម្មតា appeared first on Kampuchea Thmey Daily.

តំណាងក្រុមហ៊ុន Esport Holding បានលើកឡើងថា «សម្រាប់ខេត្តសៀមរាប ដែលជាខេត្តទេសចរណ៍ដ៏សំខាន់របស់កម្ពុជានោះ វាក៏ជាឱកាសមួយនៅក្នុងការផ្សព្វផ្សាយសក្តានុពលទេសចរណ៍របស់ខ្លួនតាមរយៈព្រឹត្តិការណ៍កីឡានានាផងដែរ»។ បើតាមតំណាងក្រុមហ៊ុន បានបញ្ជាក់ថា កីឡាអ៊ីស្ប៉ត មិនមែនជាប្រភេទល្បែងពន្វក់ស្មារតីនោះទេ ប៉ុន្តែវាជាប្រភេទកីឡាដែលទាមទារឱ្យអ្នកប្រកួតមានការហ្វឹកហាត់ច្បាស់លាស់ សម្រាប់ការប្រកួត ។ លោកថា បើទោះបីវាជាប្រភេទកីឡាមួយថ្មី ប៉ុន្តែវាត្រូវបានទទួលស្គាល់ជាសាកល ដោយក្នុងនោះកីឡាអ៊ីស្ប៉តត្រូវបានដាក់បញ្ចូលជាវិញ្ញាសារកីឡាក្នុងព្រឹត្តិការណ៍លំដាប់ពិភពលោកផងដែរ។

សូមជម្រាបថា នៅកម្ពុជា សហព័ន្ធកីឡាអេឡិចត្រូនិកកម្ពុជា អក្សរកាត់ «សអក»ត្រូវបានបង្កើតឡើងនៅឆ្នាំ២០១៤ ហើយត្រូវបានទទួលស្គាល់ជាផ្លូវការដោយគណៈកម្មាធិការជាតិអូឡាំពិកកម្ពុជា និងក្រសួងអប់រំ យុវជន និងកីឡា ព្រមទាំងជាសមាជិកពេញសិទ្ធិរបស់សហព័ន្ធកីឡាអេឡិចត្រូនិកអាស៊ីអាគ្នេយ៍ សហព័ន្ធកីឡាអេឡិចត្រូនិកអាស៊ី និងសហព័ន្ធកីឡាអេឡិចត្រូនិកអន្តរជាតិផងដែរ។

លោក លី សារី អភិបាលរងខេត្តសៀមរាប បានសម្តែងនូវការស្វាគមន៍យ៉ាងកក់ក្តៅចំពោះការជ្រើសរើសយកខេត្តសៀមរាប សម្រាប់ជាទីតាំងវិនិយោគ។  លោកបន្តថា នៅខេត្តសៀមរាបក្រៅពីវិស័យទេសចរណ៍ ខេត្តក៏មានសក្តានុពលផ្សេងៗជាច្រើន ដែលបង្កបរិយាកាសល្អដល់អ្នកវិនិយោគមកពីបណ្តាប្រទេសនានា ដូចជាអាកាសយានដ្ឋានអន្តរជាតិសៀមរាបអង្គរ ដែលអាចទទួលបានការចុះចតរបស់យន្តហោះធំៗ។ ជាមួយគ្នានេះ រាជរដ្ឋាភិបាលក៏មានគម្រោងសាងសង់ផ្លូវល្បឿនលឿន និងផ្លូវរថភ្លើងជាដើម ដែលនេះ សុទ្ធជាការបង្កលក្ខណៈងាយស្រួលដល់ការវិនិយោគនៅក្នុងខេត្តសៀមរាប។ 

លោកអភិបាលរងខេត្ត ក៏បានបង្ហាញក្តីរំពឹងថា ការចូលរួមរបស់វិស័យឯកជននេះ នឹងជួយរួមចំណែកធំដល់ការផ្សព្វទេសចរណ៍កីឡា ដែលអាចទាក់ទាញកីឡាករមកពីគ្រប់ទិសទីចូលមកកាន់ប្រទេសកម្ពុជា ជាពិសេសខេត្តសៀមរាប ។ ប៉ុន្តែបើទោះជាយ៉ាងនេះក្តី លោកអភិបាលរងក៏បានជំរុញដល់ភាគីក្រុមហ៊ុនត្រូវគោរពនូវគោលការណ៍ច្បាប់ និងលិខិតបទដ្ឋានគតិយុត្តិនានារបស់កម្ពុជាផងដែរ៕

ដោយ៖គឿន វេត

The post ក្រុមហ៊ុនមកពីកូរ៉េ កំពុងសម្លឹងរកឱកាសវិនិយោគទីតាំងកីឡាអេឡិចត្រូនិកនៅកម្ពុជា appeared first on Kampuchea Thmey Daily.

ក្នុង​ឱកាស​ជំនួប​ពិភាក្សា​ការងារ​ នា​ថ្ងៃ​ទី​២៦ ខែ​មីនា នេះ លោក នុត អ៊ុនវ័ណរ៉ា បាន​សង្ខេបអំពីតួនាទីភារកិច្ច និង​រចនាសម្ព័ន្ធ​របស់​ក្រុមប្រឹក្សា​អភិវឌ្ឍន៍​កម្ពុជា, ច្បាប់​ស្តីពី​វិនិយោគ, ផែនទី​បង្ហាញ​ផ្លូវ​សម្រាប់​ការ​អភិវឌ្ឍ​វិស័យ​យានយន្ត និង​អេឡិចត្រូនិក, ការ​លើក​ទឹកចិត្ត​វិនិយោគ, សក្តានុពល​ក្នុង​វិស័យ​ផលិតកម្ម​ឧបករណ៍​អគ្គិសនី និងអេឡិចត្រូនិក, និងស្ថានភាព​បច្ចុប្បន្ននៃ​ការវិនិយោគក្នុង​វិស័យឧបករណ៍អគ្គិសនី និង​អេឡិចត្រូនិកនៅកម្ពុជា ។

ជាការឆ្លើយតប លោក​ Ting Sik Wa Thomas ប្រធាន​សមាគម​ឧស្សាហកម្ម​ហុងកុង បាន​បង្ហាញ​ពី​ការ​ចំណាប់​អារម្មណ៍​របស់​ខ្លួន​ក្នុង​ការ​វិនិយោគ​លើ​វិស័យ​អគ្គិសនី​នៅ​កម្ពុជា។ លោក​ថា កម្ពុជា​ជា​ប្រទេស​សក្ដានុពល​មួយ​ក្នុង​ចំណោម​បណ្ដា​ប្រទេស​នៅ​ក្នុង​តំបន់​អាស៊ីអាគ្នេយ៍ ជាពិសេស​សម្រាប់​អ្នក​វិនិយោគ​ហុងកុង ដែល​កំពុង​សម្លឹង​រក​ទីតាំង​សមស្រប​មក​ធ្វើការ​បណ្តាក់​ទុន។

លោក​ Ting Sik Wa Thomas បាន​អះអាង​ថា «តាមរយៈ​ជំនួប​ពិភាក្សា​នាពេលនេះ​បានផ្តល់នូវ​ព័ត៌មាន​ជាច្រើន​ដល់គណៈប្រតិភូ​បានស្វែងយល់បន្ថែមពីសក្តានុពលនៃការវិនិយោគ និងការរីកចម្រើន​នៅកម្ពុជា​»។

ទន្ទឹម​នេះ ភាគី ហុងកុង ក៏​បាន​សំណូមពរ​បន្ថែម​ដល់​ក្រុម​ប្រឹក្សា​អភិវឌ្ឍន៍​កម្ពុជា​បន្តផ្តល់​កិច្ចសហការ​ជាមួយ​សមាគម​ដើម្បីលើក​កម្ពស់​ការ​ទាក់ទាញ​វិនិយោគ​ហុងកុង​ក្នុង​វិស័យ​អគ្គិសនី និង​អេឡិចត្រូនិកមកកម្ពុជា។

សូម​បញ្ជាក់​​ដែរថា គិត​មក​ត្រឹមថ្ងៃ​នេះ សមាគម​ឧស្សាហកម្មឧបករណ៍អគ្គិសនី-អេឡិចត្រូនិក ហុងកុងមាន​សមាជិក​ចំនួន ២០២ក្រុមហ៊ុន។ សមាគម​ត្រូវបានបង្កើតឡើងនៅឆ្នាំ១៩៩៨ ក្នុងនាម​ជាស្ថាប័ន​ឯករាជ្រមិនរក​ប្រាក់ចំណេញ ដើម្បី​ធ្វើជា​ក្រុម​តំណាង​ឱ្យឧស្សាហកម្មឧបករណ៍អគ្គិសនីហុងកុង៕

The post ហុងកុង ចាប់អារម្មណ៍ចង់បណ្តាក់ទុនវិនិយោគបន្ថែមក្នុងវិស័យឧបករណ៍អគ្គិសនីនៅកម្ពុជា appeared first on Kampuchea Thmey Daily.

ក្នុងឱកាសទទួលជួបពិភាក្សាការងារជាមួយ គណៈប្រតិភូប្រទេសអូម៉ង់ ថ្ងៃទី១៨ ខែមីនា ឆ្នាំ២០២៥ នេះ លោក សរ សិនិរ៉ា អគ្គលេខាធិការរងគណៈកម្មាធិការវិនិយោគកម្ពុជា បានលើកឡើងពីភាពបើកចំហរនៃរបបវិនិយោគនៅកម្ពុជា ដោយវិនិយោគិន​បរទេស​ក៏អាច​វិនិយោគ ១០០% ក្នុងវិស័យ​ជាច្រើនដែលរួមមាន វិស័យកសិកម្ម កម្មន្តសាល ទេសចរណ៍ និង ការ​អភិវឌ្ឍ​ហេដ្ឋារចនាសម្ព័ន្ធ​រូបវន្ត ដោយ​ទទួល​បាន​នូវការលើកទឹកចិត្តយ៉ាងសន្ធឹកសន្ធាប់ ដូចវិនិយោគិនកម្ពុជាដែរ។

ជាពិសេស កត្តាដែលកម្ពុជាទទួលបានភាពទាក់ទាញនៅក្នុងការវិនិយោគផ្ទាល់ពីបរទេស ខណៈស្ថានភាពនៅតំបន់មជ្ឈឹមបូព៌ាកំពុងស្ថិតក្នុងវិបត្តិនៃសង្គ្រាម។

ជាការឆ្លើយតប លោក Nguyen Xuan Giao នាយកប្រតិបត្តិ ភ្នាក់ងារវិនិយោគអូម៉ង់-វៀតណាម បាន​បង្ហើប​ឱ្យដឹងថា ​ខ្លួន​ក៏កំពុងពិចារណាលើ​ការ​វិនិយោគ​បន្ថែម​លើ​វិស័យ​ចំនួន ៣ នៅ​កម្ពុជា ដូចជា ការ​កែច្នៃ​ម្ហូបអាហារ និង​វិស័យ​ថាមពល​បៃតង ជា​ពិសេស​ឆន្ទៈ​នៅ​នៅ​ក្នុង​ការ​ស្វែង​រក​ដៃគូ​វិនិយោគ​បន្ថែម​ផង​ដែរ​។

គួរ​ជម្រាប​ថា ជាងមួយទសវត្សមកនេះ អាជ្ញាធរវិនិយោគអូម៉ង់ បាននិងកំពុងវិនិយោគលើគម្រោងមួយចំនួន នៅក្នុងតំបន់ក្នុងវិស័យ ហេដ្ឋារចនាសម្ព័ន្ធរូបវន្ត និង ភស្តុភារកម្ម អចលនទ្រព្យ ទឹកស្អាត បច្ចេកវិទ្យា និង សេវាកម្មលក់រាយជាដើម ដោយទុនវិនិយោគទាំងនេះ គឺជា​ទុនបម្រុង​ពីការលក់ប្រេង​របស់​រដ្ឋាភិបាល​អូម៉ង់​ផ្ទាល់​តែម្តង​៕

The post អូម៉ង់-វៀតណាម ពិចារណាវិនិយោគលើវិស័យកសិកម្ម ការកែច្នៃម្ហូបអាហារ និងថាមពលបៃតង នៅកម្ពុជា appeared first on Kampuchea Thmey Daily.

សាជីវកម្ម San Miguel របស់ហ្វីលីពីនចាប់អារម្មណ៍បណ្ដាក់ទុនវិនិយោគលើវិស័យហេដ្ឋារចនាសម្ព័ន្ធធំៗ

លោក Ramon S. Ang ប្រធាន និងជានាយកប្រតិបត្តិនៃសាជីវកម្ម​San Miguel​  ដែលជាក្រុមហ៊ុនឈានមុខគេ​ ក្នុងវិស័យហេដ្ឋារចនាសម្ព័ន្ធរូបវន្ត, អាហារ​ និងភេសជ្ជៈ​,​ ថាមពល​​ និង​ចំរាញ់ប្រេង​ ធ្លាប់បានសាងសង់​ និង​​​គ្រប់គ្រងអាកាសយានដ្ឋានអន្តរជាតិ Ninoy Aquino បានជម្រាបជូនសម្ដេចបវរធិបតីថា ក្រុមហ៊ុនចាប់អារម្មណ៍លើការបណ្ដាក់ទុនវិនិយោគលើវិស័យហេដ្ឋារចនាសម្ព័ន្ធធំៗនៅកម្ពុជា តាមរយៈការពង្រីកកិច្ចសហការឱ្យកាន់តែច្រើនជាមួយក្រុមហ៊ុននៅកម្ពុជា។ លោកប្រធានក្រុមហ៊ុនបានលើកឡើងថា កម្ពុជា ជាប្រទេសមានគុណសម្បត្តិប្រកួតប្រជែងខ្ពស់ ក្នុងនោះកម្ពុជា ជាប្រទេសដែលមានដីមានជីជាតិល្អ, កម្លាំងពលកម្មមានជំនាញ, ភូមិសាស្ត្រអំណោយផលដែលអាចឱ្យកម្ពុជាតភ្ជាប់ខ្លួនទៅកាន់បណ្ដាប្រទេសនៅក្នុងតំបន់ និងសកលលោកបានយ៉ាងល្អ។ 

ជាការឆ្លើយតប, សម្ដេចបវរធិបតីបានស្វាគមន៍ចំពោះចំណាប់អារម្មណ៍បណ្ដាក់ទុនវិនិយោគនៅកម្ពុជា ហើយសម្ដេចបវរធិបតីបានគូសបញ្ជាក់ពីសក្ដានុពល និងឱកាសនៃការវិនិយោគលើគម្រោងហេដ្ឋារចនាសម្ព័ន្ធធំៗ ដូចជាផ្លូវល្បឿនលឿនដែលតភ្ជាប់នៅក្នុងកម្ពុជា​ ក៏ដូចទៅក្នុងបណ្ដាប្រទេសក្នុងតំបន់។ ជាមួយគ្នានេះ, សម្ដេចបវរធិបតីក៏បានជម្រាបជូនក្រុមហ៊ុនអំពីវិស័យគន្លឹះ និងយុទ្ធសាស្ត្ររបស់កម្ពុជា ដែលជាកាលានុវត្តភាពសម្រាប់ការវិនិយោគរបស់ក្រុមហ៊ុន។ សម្ដេចបវរធិបតីបានសង្កត់ធ្ងន់ថា វិស័យសិកម្មដែលជាវិស័យយុទ្ធសាស្ត្ររបស់កម្ពុជា គឺជាវិស័យដែលក្រុមហ៊ុនគួរយកចិត្តទុកដាក់ និងពិនិត្យមើលឱកាសវិនិយោគក្នុងដំណាក់កាលណាមួយ​ នៅក្នុងខ្សែច្រវាក់ផ្គត់ផ្គង់​ ភ្ជាប់ទៅកាន់តំបន់​ និងពិភពកលោក។ សម្ដេចបវរធិបតីបានបន្ថែមទៀតថា រាជរដ្ឋាភិបាលកម្ពុជា គាំទ្រ, បង្កលក្ខណៈងាយស្រួល ក៏ដូចជាបង្កើតបរិយាកាសអំណោយផល និងកិច្ចសម្របសម្រួលនានា សំដៅជំរុញការវិនិយោគ និងភាពជោគជ័យរបស់ក្រុមហ៊ុន នៅកម្ពុជា។

ក្រុមហ៊ុន Excellent Associates Group Limited បង្ហាញពីចំណាប់អារម្មណ៍ស្វែងរកឱកាសវិនិយោគ

លោក Dai Jianlaing ប្រធានក្រុមហ៊ុន Excellent Associates Group Limited បានជម្រាបជូនសម្តេចបវរធិបតីអំពីប្រតិបត្តិការ និងវឌ្ឍនភាពរបស់ក្រុមហ៊ុន និងបានបង្ហាញពីចំណាប់អារម្មណ៍ស្វែងរកឱកាសវិនិយោគនៅកម្ពុជា​ ដែលរួមមា​ន​ ការវិនិយោគសួនឧស្សាហកម្ម និងកសិ-ឧស្សាហ​កម្ម ព្រមទាំងការកែច្នៃ ​និងនាំចេញអង្ករទៅកាន់ទីផ្សារសំខាន់ៗមួយចំនួនដូចជា៖ ហុងកុង ប្រទេសចិន និងទីផ្សារដទៃទៀតនាពេលអនាគត​ ព្រោះតែអង្ករកម្ពុជាមានគុណភាពខ្ពស់ និង ទទួលបានចំណាត់ថ្នាក់ល្អច្រើនឆ្នាំ ជាប់ៗគ្នា។

ជាការឆ្លើយតប សម្តេចបវរធិបតី បានបង្ហាញក្តីសោមនស្សចំពោះចំណាប់អារម្មណ៍របស់ក្រុមហ៊ុនក្នុងការស្វែងរកឱកាសវិនិយោគនៅកម្ពុជា។ សម្តេចបវរធិបតី​ បានបញ្ជាក់អំពីការដាក់ចេញនូវគោលនយោបាយ​ និង​វិធានការរបស់រាជរដ្ឋាភិបាលក្នុងការគាំទ្រដល់ការរៀបចំបង្កើតតំបន់សេដ្ឋកិច្ចពិសេស។​ ពាក់ព័ន្ធនឹង​វិស័យកសិ-ឧស្សាហកម្ម​ សម្តេចបវរធិបតី បានលើកទឹកចិត្តឱ្យក្រុមហ៊ុនពិចារណាការវិនិយោគលើទំនិញកសិ-ឧស្សាហកម្មមួយចំនួនបន្ថែមទៀត ដែលអាចចូលរួមបំពេញតម្រូវការក្នុងច្រវាក់ផលិតកម្មនៃវិស័យកសិកម្ម ក៏ដូចជា ការផលិតជីបែបធម្មជាតិ និងជីគីមី ជាដើម។

ក្រុមហ៊ុន World Citi Group បង្ហាញចំណាប់អារម្មណ៍វិនិយោគលើវិស័យអប់រំផ្នែកសុខាភិបាល

លោកបណ្ឌិត Raymond Patrick V. Guico ប្រធានក្រុមហ៊ុន World Citi Group បានជម្រាបជូនសម្ដេចបវរធិបតីអំពីការស្វែងរកកិច្ចសហការជាមួយដៃគូនៅកម្ពុជា។ ជាក់ស្ដែង​ ក្រុមហ៊ុនបានចុះអនុស្សារណៈនៃការយោគយល់គ្នាជាមួយសាកលវិទ្យាល័យអាស៊ីអឺរ៉ុប​ ដែលការណ៍នេះបង្ហាញយ៉ាងច្បាស់អំពីបំណង និងចំណាប់អារម្មណ៍របស់ក្រុមហ៊ុន ក្នុងការស្វែងរកឱកាសវិនិយោគ និងការពង្រីកអាជីវកម្មនៅក្នុងវិស័យអប់រំ និងបណ្តុះបណ្តាលវិជ្ជាជីវៈ ពិសេសក្នុងវិស័យសុខាភិបាល។ លោកប្រធានក្រុមហ៊ុនក៏បានបង្ហាញអំពីចក្ខុវិស័យនៃការអភិវឌ្ឍន៍វិស័យអប់រំផ្នែកសុខាភិបាល​ នៅកម្រិតឧត្តមសិក្សាឱ្យមានភាពរីកចម្រើន និងឈានមុខគេនៅក្នុងតំបន់អាស៊ី នាពេលអនាគត។ ក្នុងន័យនេះ, ការចាប់ដៃគូជាមួយនឹងវិនិយោគិនកម្ពុជា​ គឺជាកិច្ចការស្នូល ដែលនាំឱ្យក្រុមហ៊ុនទទួលបានជោគជ័យ។ លោកប្រធានក្រុមហ៊ុនជឿជាក់ថា​ តាមរយ:ការគាំទ្ររបស់សម្ដេចបវរធិបតី​ និងភាពជាដៃគូល្អ ក្រុមហ៊ុននឹងទទួលបានជោគជ័យ ​នៅកម្ពុជា។ បន្ថែមលើនេះ បន្ទាប់ពីសម្រេចបាននូវដំណើរទស្សនកិច្ចប្រកបដោយផ្លែផ្កា នាឱកាសនៃការចូលរួមវេទិកាធុរកិច្ចកម្ពុជា-ហ្វីលីពីន និងការចូលជួបសម្ដែងការគួរសមជាមួយសម្ដេចបវរធិបតី ពីសំណាក់ក្រុមប្រឹក្សាភិបាលនៃធុរជនស្ត្រីរបស់ហ្វីលីពីន នាខែមករា កន្លងទៅ​ នៅរាជធានីភ្នំពេញ, លោកប្រធានក្រុមហ៊ុនបានគោរពជម្រាបជូនសម្ដេចបវរធិបតីអំពីគម្រោងនៃការធ្វើទស្សនកិច្ចរបស់ប្រតិភូក្រុមហ៊ុននៅកម្ពុជាសាជាថ្មី នាពេលខាងមុខដ៏ខ្លីនេះ។

ជាការឆ្លើយតប, សម្ដេចបវរធិបតីបានសម្ដែងនូវការអបអរសាទរចំពោះការចុះអនុស្សារណៈនៃការយោគយល់គ្នា រវាងក្រុមហ៊ុន World Citi Group និងសាកលវិទ្យាល័យអាស៊ីអឺរ៉ុប នៃប្រទេសកម្ពុជា នៅក្នុងព្រឹត្តិការណ៍នៃការបើកវេទិកាធុរកិច្ចហ្វីលីពីន-កម្ពុជា។ សម្ដេចបវរធិបតីបានវាយតម្លៃខ្ពស់ចំពោះចំណាប់អារម្មណ៍របស់ក្រុមហ៊ុនក្នុងការវិនិយោគនៅកម្ពុជា ពិសេសក្នុងវិស័យអប់រំផ្នែកសុខាភិបាល និងបណ្ដុះបណ្ដាលវិជ្ជាជីវៈនានា។ សម្ដេចបវរធិបតីបានគូសបញ្ជាក់អំពីអាទិភាពរបស់រាជរដ្ឋាភិបាលកម្ពុជាលើវិស័យសុខាភិបាល ស្របពេលដែលកម្ពុជានឹងមានតម្រូវការខ្ពស់ចំេពាះអ្នកជំនាញការផ្នែកសុខាភិបាល ជាពិសេសគិលានុបដ្ឋាយិកា សម្រាប់បម្រើ និងផ្ដល់សេវាសុខាភិបាលជូនដល់ប្រជាពលរដ្ឋ រួមទាំងជនចាស់ជរា។ ដោយសារវិស័យសុខាភិបាលស្ថិតនៅក្នុងមុខវិជ្ជាវិទ្យាសាស្ត្រពិត, សម្ដេចបវរធិបតីបានសង្កត់ធ្ងន់អំពីសារៈសំខាន់នៃកំណត់គុណភាព​ និងស្តង់ដារអប់រំក្នុងវិស័យនេះ និងបានលើកទឹកចិត្តឱ្យក្រុមហ៊ុនបន្តទំនាក់ទំនង និងសហការជាមួយនឹងដៃគូក្នុងស្រុក ក៏ដូចជាក្រសួង-ស្ថាប័នពាក់ព័ន្ធ ជាពិសេសក្រសួងសុខាភិបាល ដែលមានសមត្ថកិច្ចក្នុងការកំណត់គុណភាព និងស្ដង់ដារច្បាស់លាស់ក្នុងការអភិវឌ្ឍធនធានមនុស្សក្នុងវិស័យសុខាភិបាលនេះ៕

The post ក្រុមហ៊ុន៣ របស់ហ្វីលីពីន ចាប់អារម្មណ៍វិនិយោគលើហេដ្ឋារចនាសម្ព័ន្ធធំៗ កសិ-ឧស្សាហកម្ម សុខាភិបាល នៅកម្ពុជា appeared first on Kampuchea Thmey Daily.