ការហាមឃាត់ Archives - Kampuchea Thmey Daily

ហាមលក់ដូរផាវ កាំជ្រួច និងគ្រឿងផ្ទុះគ្រប់ប្រភេទនៅតាមទីផ្សាររដ្ឋ នាឱកាសបុណ្យចូលឆ្នាំខ្មែរ

អ៊ិន ពិសី — Fri, 03 Apr 2026 07:16:29 +0000

ការលក់ដូរផាវ កាំជ្រួច និងគ្រឿងផ្ទុះគ្រប់ប្រភេទ នៅតាមទីផ្សាររដ្ឋ ត្រូវបានហាមឃាត់ដាច់ខាត ក្នុងឱកាសបុណ្យចូលឆ្នាំថ្មី ប្រពៃណីជាតិខ្មែរ ខាងមុខនេះ។

លោក ឡយ ស៊ាងអាង ប្រធានគណៈកម្មការគ្រប់គ្រងផ្សារអូរឫស្សី បានឲ្យដឹងថា កាន់តែកៀកថ្ងៃបុណ្យចូលឆ្នាំថ្មី មានប្រជាពលរដ្ឋជាច្រើន បានអញ្ជើញមកទិញទំនិញនៅផ្សារអូរឫស្សី ដូច្នេះហើយ បញ្ហាសន្តិសុខសុវត្ថិភាព និងការសម្របសម្រួលដល់លំហូរចរាចរណ៍ធ្វើដំណើរជុំវិញបរិវេណផ្សារ ជាការងារចាំបាច់ដែលត្រូវយកចិត្តទុកដាក់។

លោកបន្តទៀតថា យោងតាមសេចក្តីណែនាំរបស់រដ្ឋបាលរាជធានីភ្នំពេញ កម្លាំងអាជ្ញាធរ ក៏ដូចជាកម្លាំងគណៈកម្មការផ្សារ បានចុះផ្សព្វផ្សាយជាប្រចាំផងដែរ ដោយមិនអនុញ្ញាតដាច់ខាត មិនឲ្យមានការនាំចូលចែកចាយ ឬ ដុតផាវ កាំជ្រួច និង គ្រឿងផ្ទុះនានា។ បន្ថែមនោះ ហាមលេងបាញ់ទឹក ជះទឹក គប់ស្បោងទឹក ប្រើកាំភ្លើងបាញ់ទឹក ដែលធ្វើឲ្យប៉ះពាល់ដល់ការធ្វើដំណើររបស់ពលរដ្ឋលើដងផ្លូវសាធារណៈនោះឡើយ ក្នុងឱកាសបុណ្យចូលឆ្នាំថ្មី ប្រពៃណីជាតិខ្មែរ។

ដោយឡែក អាជីវករវិញ បានបង្ហាញក្តីរីករាយចំពោះការលក់ដូរ ព្រោះមានអតិថិជនច្រើនមកជាវសម្ភារ និងអីវ៉ាន់ សម្រាប់យកទៅប្រើប្រាស់ការសែនព្រេន ក៏ដូចជាយកទៅរៀបចំតុបតែងលម្អ ក្នុងកម្មវិធីសង្ក្រាន្តនានាជាដើម។ ពួកគាត់ ថា ឆ្នាំនេះ លក់ដូរដាច់ជាងឆ្នាំមុនៗ ដោយមានប្រជាពលរដ្ឋច្រើនមកទិញ។

កាលពីថ្ងៃទី ០២ ខែមេសា ឆ្នាំ ២០២៦ ម្សិលមិញ កម្លាំងសមត្ថកិច្ចប្រឆាំងបទល្មើសសេដ្ឋកិច្ច នៃស្នងការដ្ឋាននគរបាលរាជធានីភ្នំពេញ សហការជាមួយគណៈកម្មការគ្រប់គ្រងផ្សារអូរឫស្សី បានចុះត្រួតពិនិត្យ និងផ្សព្វផ្សាយអប់រំណែនាំបណ្តាអាជីវករ ដាច់ខាតមិនអនុញ្ញាតឲ្យមានការលក់ដូរគ្រឿងរំសេវទាំងឡាយណា ដែលអាចយកទៅប្រើប្រាស់បង្កភាពអនាធិបតេយ្យដល់សណ្តាប់ធ្នាប់សង្គមក្នុងឱកាសបុណ្យចូលឆ្នាំថ្មីនេះនោះទេ៕
អត្ថបទ ៖ សុភា

The post ហាមលក់ដូរផាវ កាំជ្រួច និងគ្រឿងផ្ទុះគ្រប់ប្រភេទនៅតាមទីផ្សាររដ្ឋ នាឱកាសបុណ្យចូលឆ្នាំខ្មែរ appeared first on Kampuchea Thmey Daily.

ឥណ្ឌូណេស៊ីហាមឃាត់ប្រើប្រាស់បារីអេឡិចត្រូនិកចំពោះយុវជនក្រោម២១ឆ្នាំ

Minea Neu — Fri, 27 Feb 2026 07:40:41 +0000

សមាគមចែកចាយបារីអេឡិចត្រូនិចក (Vape) ប្រទេសឥណ្ឌូណេស៊ី (Arvindo) បានណែនាំហាងជាសមាជិកទាំងអស់ឈប់លក់បារីអេឡិចត្រូនិកដល់អតិថិជនអាយុក្រោម២១ឆ្នាំ និងតម្រូវឱ្យអ្នកលក់រាយបង្ហាញស្លាកសញ្ញាថា អាយុ ២១ឆ្នាំឡើង ដោយត្រូវផ្ទៀងផ្ទាត់អាយុជាមួយនឹងអត្តសញ្ញាណប័ណ្ណដែលមានសុពលភាព។ នេះបើយោងតាម VN Express ចុះផ្សាយថ្ងៃទី២៦ ខែកុម្ភៈឆ្នាំ២០២៦ ។

ហាងលក់បារីអេឡិចត្រូនិកនៅឥណ្ឌូណេស៊ី។ រូបភាព៖ VOL.id

លោក Fachmi Kurnia ប្រធានសមាគម Arvindo លើកឡើងថា៖ «ចលនានេះគាំទ្រដល់កិច្ចខិតខំប្រឹងប្រែងរបស់រដ្ឋាភិបាលក្នុងការទប់ស្កាត់ការប្រើប្រាស់របស់យុវជន ដែលជាជំហរមួយគាំទ្រដោយចលនាគ្មានផ្សែងបារី និងជ័រ (Gebrak) ។ បន្ថែមពីនេះ ផលិតផលដែលអាចជំនួសថ្នាំជក់បាន គួរតែត្រូវត្រៀមទុកសម្រាប់អ្នកជក់បារីពេញវ័យ»។

សមាគម Arvindo ក៏ជំរុញឱ្យអ្នកធ្វើគោលនយោបាយអនុម័តបទប្បញ្ញត្តិមានមូលដ្ឋានលើវិទ្យាសាស្ត្រ និងពិចារណាពីសក្តានុពលនៃការកាត់បន្ថយគ្រោះថ្នាក់នៃការជក់បារីអេឡិចត្រូនិក។

លើសពីនេះការសិក្សារបស់ក្រុមបណ្តាញ JAMA Network ឆ្នាំ២០២៥ បានបង្ហាញថា បារីអេឡិចត្រូនិកក្នុងចក្រភពអង់គ្លេស មានអ្នកប្រើប្រាស់ច្រើន ជំនួសឱ្យប្រើប្រាស់វិធីសាស្រ្តផ្សេងទៀត។

ទន្ទឹមនឹងនេះ លោក Garindra Kartasasmita ប្រធានក្រុមហ៊ុន Gebrak និយាយថា៖ «អ្នកលក់រាយបារីអេឡិចត្រូនិកគួរតែដើរតួនាទីយ៉ាងសកម្ម ក្នុងការអប់រំអ្នកប្រើប្រាស់អំពីហានិភ័យសុខភាពនៃផ្សែង និងជ័រ ខណៈគួរផ្តល់ព័ត៌មានពេញលេញពីផលិតផលដែលអាចជំនួសវាបាន»។

ការអំពាវនាវនេះធ្វើឡើងពេលដែលប្រទេសឥណ្ឌូណេស៊ីប្រឈមមុខនឹងអ្នកអត្រាជក់បារីខ្ពស់ថេរ ដោយទិន្នន័យរបស់រដ្ឋាភិបាលប៉ាន់ប្រមាណថាមានអ្នកជក់បារីសកម្មចំនួន ៧០លាននាក់ រួមទាំងអត្រារីករាលដាលនៃយុវវ័យលើបារីអេឡិចត្រូនិកយ៉ាងច្រើនផងដែរ។

ទិន្នន័យស្ទង់មតិយុវជនសកលមួយបង្ហាញថាអត្រារីករាលដាលនៃការជក់បារីក្នុងចំណោមសិស្សមានអាយុពី ១៣ទៅ១៥ឆ្នាំ បានកើនឡើងពី១៨.៣% ក្នុងឆ្នាំ២០១៦ ដល់១៩.២% ក្នុងឆ្នាំ២០១៩ ដោយមានអត្រាខ្ពស់បំផុតក្នុងចំណោមអ្នកដែលមានអាយុពី១៥ទៅ ១៩ឆ្នាំ៕

ប្រែសម្រួល៖ ណឺ មិនា

The post ឥណ្ឌូណេស៊ីហាមឃាត់ប្រើប្រាស់បារីអេឡិចត្រូនិកចំពោះយុវជនក្រោម២១ឆ្នាំ appeared first on Kampuchea Thmey Daily.

រដ្ឋខ្លះនៅឥណ្ឌាចាប់ផ្តើមរកវិធានការហាមឃាត់ក្មេងក្រោម ១៦ ប្រើប្រាស់បណ្តាញសង្គម

Minea Neu — Thu, 05 Feb 2026 10:14:40 +0000

ការជជែកដេញដោលជុំវិញការហាមប្រាមការប្រើប្រាស់ប្រព័ន្ធផ្សព្វផ្សាយសង្គមតាមទូរសព្ទ ឬកំព្យូទ័រ សម្រាប់កុមារនិងយុវជនអាយុក្រោម១៦ឆ្នាំ កំពុងមានសន្ទុះនៅក្នុងប្រទេសឥណ្ឌា ដោយរដ្ឋមន្ត្រីក្នុងរដ្ឋជាច្រើន លើកឡើងថា ពួកគេកំពុងរៀបចំច្បាប់ ហាមកុមារពីបណ្តាញសង្គម ដែលទើបចូលជាធរមាននៅក្នុងប្រទេសអូស្ត្រាលី។

រដ្ឋមន្ត្រីក្រសួងព័ត៌មាន លោក Nara Lokesh. India News

រដ្ឋមន្ត្រីនៅរដ្ឋភាគខាងត្បូងប្រទេសឥណ្ឌាពីរនាក់បានលើកឡើងនាពេលថ្មីៗនេះថាពួកគេកំពុងពិនិត្យមើល ថាតើការហាមឃាត់នឹងមានប្រសិទ្ធភាព នាំឱ្យកុមារចេញឆ្ងាយពីប្រព័ន្ធផ្សព្វផ្សាយសង្គមដែរឬយ៉ាងណា។

កាលពីសប្តាហ៍មុន ការស្ទង់មតិដែលធ្វើឡើងដោយប្រធានទីប្រឹក្សាសេដ្ឋកិច្ចរបស់ប្រទេសឥណ្ឌា បានផ្តល់អនុសាសន៍ថា រដ្ឋាភិបាល គួរពិចារណាលើអាយុ ដែលអាចអនុញ្ញាត្តឱ្យប្រើប្រាស់ប្រព័ន្ធផ្សព្វផ្សាយសង្គមសម្រាប់កុមារ។

គួរឱ្យដឹងថា ថ្មីៗនេះ ប្រទេសអូស្ត្រាលីបានក្លាយជាប្រទេសដំបូងគេក្នុងពិភពលោក ដែលហាមឃាត់កុមារលើប្រព័ន្ធផ្សព្វផ្សាយសង្គម សម្រាប់កុមារអាយុក្រោម ១៦ ឆ្នាំ។

ការធ្វើបែបនេះជារឿងចាំបាច់ ដើម្បីផ្ទៀងផ្ទាត់អាយុរបស់អ្នកប្រើប្រាស់ និងបិទគណនីដោយអ្នកប្រើប្រាស់មិនទាន់គ្រប់អាយុ។

កាលពីសប្តាហ៍មុន សមាជិកសភានៅក្នុងសភាជាន់ទាបរបស់ប្រទេសបារាំងបានអនុម័តច្បាប់ដែលនឹងហាមឃាត់ការចូលប្រើប្រព័ន្ធផ្សព្វផ្សាយសង្គមសម្រាប់ក្មេងអាយុក្រោម ១៥ ឆ្នាំ។

ចំណែកចក្រភពអង់គ្លេសក៏កំពុងពិចារណាលើការហាមឃាត់នេះផងដែរ។

នៅក្នុងប្រទេសឥណ្ឌា លោក LSK Devarayalu សមាជិកសភាមកពីគណបក្ស Telugu Desam និងជាមនុស្សជិតស្និទ្ធជាមួយនាយករដ្ឋមន្ត្រី លោក Narendra Modi បានស្នើច្បាប់ ដើម្បីស្វែងរកការរារាំងកុមារអាយុក្រោម ១៦ ឆ្នាំ ពីការប្រើប្រាស់ប្រព័ន្ធផ្សព្វផ្សាយសង្គម កាលពីសប្តាហ៍មុន។

ចំណែករដ្ឋមន្ត្រីក្រសួងព័ត៌មាន លោក Nara Lokesh បាននិយាយនៅលើ X កាលពីសប្តាហ៍មុនថា៖ «កុមារកំពុងចូលទៅប្រើប្រាស់បណ្តាញសង្គមឥតឈប់ឈរ ដែលប៉ះពាល់ដល់អារម្មណ៍ និងការអប់រំរបស់ពួកគេ»។

លោកបានបន្ថែមថា៖ « យើងនឹងធានាថាប្រព័ន្ធផ្សព្វផ្សាយសង្គមក្លាយជាកន្លែងដែលមានសុវត្ថិភាពជាងមុន និងកាត់បន្ថយផលប៉ះពាល់ដ៏អាក្រក់ចំពោះជនរងគ្រោះ ជាពិសេសសម្រាប់ស្ត្រី និងកុមារ»។

មិនតែប៉ុណ្ណោះ រដ្ឋផ្សេងទៀតក៏ចំណាប់អារម្មណ៍ចំពោះវិធានការនេះផងដែរ។

ការសិក្សានាពេលថ្មីៗនេះដោយអង្គការក្រៅរដ្ឋាភិបាលបានស្ទង់មតិថាក្មេងជំទង់ឥណ្ឌា ចំនួន ១ ២៧៧នាក់ អាចការរឹតបន្តឹងតាមអាយុ និងប្រព័ន្ធផ្ទៀងផ្ទាត់បាន ហើយវានឹងក្លាយជាឧបសគ្គបន្ថែមនៅក្នុងប្រពន្ធ័ឌីជីថលរបស់ប្រទេសឥណ្ឌា៕

ប្រែសម្រួល៖ ណឺ មិនា

The post រដ្ឋខ្លះនៅឥណ្ឌាចាប់ផ្តើមរកវិធានការហាមឃាត់ក្មេងក្រោម ១៦ ប្រើប្រាស់បណ្តាញសង្គម appeared first on Kampuchea Thmey Daily.

រដ្ឋបាលខេត្តកណ្តាល ហាមដាច់ខាតមិនឱ្យដុតផាវ កាំជ្រួច ក្នុងឱកាសពិធីបុណ្យចូលឆ្នាំចិន ខាងមុខ

Ken Malis — Fri, 30 Jan 2026 09:15:44 +0000

រដ្ឋបាលខេត្តកណ្តាល ហាមដាច់ខាត មិនឱ្យមានការដុតផាវ កាំជ្រួច ឬបង្កសម្លេងផ្ទុះគ្រាប់គ្រប់ប្រភេទ និងមិនឱ្យមានការលេងល្បែងស៊ីសងគ្រប់ប្រភេទ ក៏ដូចជាការហែក្បួនផ្សេងៗទាំងបែបសាសនា ឬប្រពៃណីដែលគ្មានការអនុញ្ញាត ក្នុងឱកាសពិធីបុណ្យចូលឆ្នាំចិន និងរៀតណាម ដែលនឹងប្រព្រឹត្តទៅចាប់ថ្ងៃទី១៦ ដល់ថ្ងៃទី១៩ ខែកុម្ភៈ ឆ្នាំ២០២៦ ខាងមុខនេះ។ ការហាមឃាត់នេះ គឺដើម្បីរក្សាបាននូវសន្តិសុខ សុវត្ថិភាព សណ្តាប់ធ្នាប់ និងរបៀបរៀបរយសាធារណៈក្នុងខេត្តកណ្តាល។

តាមរយៈសេចក្តីជូនដំណឹងរបស់រដ្ឋបាលខេត្ត នៅថ្ងៃទី៣០ ខែមករា ឆ្នាំ២០២៦ នេះ បានបញ្ជាក់ថា ចាប់ពីពេលនេះតទៅ អាជ្ញាធរមានសមត្ថកិច្ចគ្រប់លំដាប់ថ្នាក់ត្រូវចាត់វិធានការឱ្យបានម៉ឺងម៉ាត់បំផុត កុំឱ្យមានការនាំចូលផាវ កាំជ្រួច ជាតិផ្ទុះគ្រប់ប្រភេទតាមច្រកចូលខេត្តកណ្តាល និងត្រូវត្រួតពិនិត្យដកហូតវត្ថុទាំងនេះ ដែលមានតាំងលក់នៅតាមទីផ្សារ និងនៅគ្រប់ទីកន្លែង ក្នុងខេត្តកណ្តាល។

លើសពីនេះ នៅគ្រប់កន្លែងកម្សាន្តសប្បាយនានា មន្ទីរ-អង្គភាព សមាគម អង្គការមិនមែនរដ្ឋាភិបាល រោងចក្រ សហគ្រាស ក្រុមហ៊ុន គេហដ្ឋាន ត្រូវរក្សាសន្តិសុខ សុវត្ថិភាព សណ្ដាប់ធ្នាប់សាធារណៈ សេចក្តីថ្លៃថ្នូរ និងត្រូវប្រុងប្រយ័ត្នក្នុងការអុជទៀនធូប ក្រដាសសែន ភ្លើងចង្ក្រាន ចរន្តអគ្គិសនី ដែលអាចបង្កឱ្យមានគ្រោះអគ្គិភ័យកើតឡើងជាយថាហេតុ។ ដោយឡែក ការដុតក្រដាស សែនត្រូវប្រើធុងដែក ឬឆ្នាំងដី ដើម្បីធ្វើការដុត ហាមដាច់ខាងមិនឱ្យដុតលើចិញ្ចើមផ្លូវ ឬ ទ្រូងផ្លូវសាធារណៈឡើយ។

រដ្ឋបាលក្រុង-ស្រុក និងមន្ទីរ-អង្គភាពជុំវិញខេត្ត ត្រូវផ្សព្វផ្សាយណែនាំដល់មន្ត្រីរាជការ ក្រោមឱវាទ និងប្រជាពលរដ្ឋក្នុងមូលដ្ឋានឱ្យអនុវត្តតាមការណែនាំនេះ ឱ្យមានប្រសិទ្ធភាព។ ចំណែកមន្ទីរអប់រំ យុវជន និងកីឡាខេត្ត ត្រូវណែនាំដល់គ្រប់គ្រឹះស្ថានសិក្សារដ្ឋ និងឯកជន ឱ្យ យកចិត្តទុកដាក់ណែនាំសិស្សានុសិស្ស និស្សិត មិនត្រូវយកថ្ងៃនេះលេងសប្បាយផ្សេងៗ ដែលប្រាសចាកពីទំនៀមទំលាប់ប្រពៃណី។

សម្រាប់មន្ទីរទេសចរណ៍ខេត្ត ត្រូវណែនាំរំលឹកដល់ម្ចាស់សណ្ឋាគារ ផ្ទះសំណាក់ ភោជនីយដ្ឋាន និងផ្នែកសេវាកម្មទេសចរណ៍ទាំងអស់ ត្រូវរក្សាតម្លៃលក់ឱ្យបានសមរម្យ ដោយមានសេវាកម្ម និងអនាម័យល្អសម្រាប់ភ្ញៀវទេសចរជាតិ និងអន្តរជាតិ ដែលអញ្ជើញមកសម្រាកកម្សាន្ត ក្នុងឱកាសថ្ងៃបុណ្យចូលឆ្នាំថ្មី ប្រពៃណីចិន និងវៀតណាម។ រីឯមន្ទីរធម្មការ និងសាសនាខេត្ត ត្រូវអញ្ជើញបណ្តាសមាគមចិន និងវៀតណាម ដើម្បីផ្សព្វផ្សាយ នូវខ្លឹមសារខាងលើឱ្យបានទូលំទូលាយ។

ចំពោះជនណានៅតែបំពាន ឬប្រព្រឹត្តល្មើសមិនគោរពតាមការណែនាំខាងលើ បង្កឱ្យមានចលាចលក្នុងសង្គម ប៉ះពាល់ដល់សន្តិសុខ សុវត្ថិភាព សណ្ដាប់ធ្នាប់ និងរៀបរយសាធារណៈ ត្រូវទទួលទោសទណ្ឌតាមច្បាប់ជាធរមាន៕

The post រដ្ឋបាលខេត្តកណ្តាល ហាមដាច់ខាតមិនឱ្យដុតផាវ កាំជ្រួច ក្នុងឱកាសពិធីបុណ្យចូលឆ្នាំចិន ខាងមុខ appeared first on Kampuchea Thmey Daily.

វៀតណាមនឹងផាកពិន័យអ្នកប្រើប្រាស់បារីអេឡិចត្រូនិកក្នុងទីសាធារណៈ

Minea Neu — Sun, 04 Jan 2026 00:42:12 +0000

អ្នកប្រើប្រាស់បារីអេឡិចត្រូនិក ឬផលិតផលថ្នាំជក់ដែលបំភាយផ្សែងនៅទីសាធារណៈក្នុងប្រទេសវៀតណាម ប្រឈមមុខនឹងការផាកពិន័យចាប់ពី ៣លានដុងទៅ៥លានដុង (១១៤ដល់ ១៩០ដុល្លារ) និងតម្រូវឱ្យបំផ្លាញចោលទាំងអស់ ក្នុងករណីប៉ូលិសចាប់បាននៅកន្លែងណាមួយ។ នេះជាការប្រកាសរបស់រដ្ឋាភិបាលដែលបានកំណត់។

យោងតាមអនុក្រឹត្យលេខ ៣៧១ ដែលចូលជាធរមាននៅថ្ងៃទី ៣១ខែធ្នូ បុគ្គលណាដែលប្រើប្រាស់បារីអេឡិចត្រូនិក ឬផលិតផលថ្នាំជក់បំភាយផ្សែងក្នុងបរិវេណណាមួយដោយខ្លួនឯង ឬក្រុម នឹងត្រូវពិន័យជាប្រាក់ចន្លោះពី ៥លានដុង ទៅ ១០លានដុង។

សារព័ត៌មាន VN Express បានផ្សាយថា បារីអេឡិចត្រូនិក និងផលិតផលថ្នាំជក់ត្រូវបានគេចាត់ទុកថាជាផលិតផលជំនាន់ថ្មី ដែលដំណើរការដោយកម្តៅវត្ថុរាវដែលមានជាតិនីកូទីន ឬរសជាតិដែលរំលាយនៅក្នុងសារធាតុគីមី propylene glycol ឬគ្លីសេរីន។ យ៉ាងហោចណាស់មានសមាសធាតុគីមីចំនួន៦០ប្រភេទ ត្រូវបានរកឃើញនៅក្នុងវត្ថុរាវ បារីអេឡិចត្រូនិក (e-cigarette) រួមជាមួយនឹងសារធាតុពុលជាច្រើនដែលមាននៅក្នុង aerosol ឬផ្សែងដែលបានផលិត។

មិនតែប៉ុណ្ណោះវៀតណាមគឺជាប្រទេសទីប្រាំមួយនៅអាស៊ីអាគ្នេយ៍ និងជាប្រទេសមួយក្នុងចំណោមប្រទេសចំនួន៤៣ ទូទាំងពិភពលោកដែលហាមឃាត់ការប្រើប្រាស់បារីអេឡិចត្រូនិក និងផលិតផលថ្នាំជក់។

ជាពិសេសក្នុងចំណោមសិស្សដែលមានអាយុពី ១៣ទៅ១៧ឆ្នាំ ការប្រើប្រាស់បារីអេឡិចត្រូនិកបានកើនឡើងពី ២.៦ភាគរយ ក្នុងឆ្នាំ២០២៩ ដល់ ៨.១ភាគរយ ក្នុងឆ្នាំ២០២៣។ ការស្ទង់មតិបឋមដែលធ្វើឡើងនៅក្នុង ១១ខេត្ត-ក្រុង បានរកឃើញថា ៤.៣ភាគរយ នៃក្មេងស្រីដែលមានអាយុពី ១១ដល់១៨ឆ្នាំ បានប្រើប្រាស់បារីអេឡិចត្រូនិចកក្នុងឆ្នាំ២០២៣។

ជាក់ស្តែងក្រសួងសុខាភិបាលព្រមានថា ការប្រើប្រាស់នេះបង្កហានិភ័យធ្ងន់ធ្ងរដល់យុវជន។

ក្នុងនោះនៅឆ្នាំ២០២៣ មនុស្ស ១ ២២៤នាក់ នៅក្នុងប្រទេសវៀតណាមត្រូវបានសម្រាកព្យាបាលនៅមន្ទីរពេទ្យដោយសារតែការពុលនឹងបារីអេឡិចត្រូនិក និងផលិតផលថ្នាំជក់៕

ប្រែសម្រួល៖ ណឺ មិនា

The post វៀតណាមនឹងផាកពិន័យអ្នកប្រើប្រាស់បារីអេឡិចត្រូនិកក្នុងទីសាធារណៈ appeared first on Kampuchea Thmey Daily.

បារាំងគ្រោងអនុម័តច្បាប់ហាមឃាត់កុមារក្រោម ១៥ឆ្នាំ ប្រើប្រាស់ទូរសព្ទដៃចល័ត

Minea Neu — Fri, 02 Jan 2026 10:09:44 +0000

ប្រទេសបារាំងគ្រោងនឹងហាមឃាត់កុមារអាយុក្រោម១៥ឆ្នាំពីការចូលមើលគេហទំព័រប្រព័ន្ធផ្សព្វផ្សាយសង្គម និងហាមមិនឱ្យប្រើទូរស័ព្ទនៅក្នុងវិទ្យាល័យ ចាប់ពីខែកញ្ញាឆ្នាំ២០២៦។ នេះបើតាមសារព័ត៌មានក្នុងស្រុកមួយឱ្យដឹងកាលពីថ្ងៃពុធ។ មិនត្រឹមតែប៉ុណ្ណោះ អាណាព្យាបាល បានសម្តែងការព្រួយបារម្ភចំពោះផលប៉ះពាល់នៃគ្រោះថ្នាក់ដែលមិនអាចដឹងតាមអ៊ីនធឺណិតលើអនីតិជន។

ប្រធានាធិបតីបារាំង លោក Macron។ Reuters

យោងតាមសារព័ត៌មានរ៉យទ័រ ប្រធានាធិបតី លោក Emmanuel Macron បានចង្អុលបង្ហាញជារឿយៗទៅលើប្រព័ន្ធផ្សព្វផ្សាយសង្គម ថាជាកត្តាមួយដ៏គ្រោះថ្នាក់ ដែលបន្ទោសជនរងគ្រោះពីអំពើហិង្សានានា កើតឡើងចំពោះយុវជននិងកុមារ ហើយប្រធានាធិបតីរូបនេះក៏ចង់បង្ហាញថា ខ្លួនចង់ឱ្យប្រទេសបារាំងមានច្បាប់ដូចប្រទេសអូស្ត្រាលីដែរ។

គួរឱ្យដឹងផងដែរថាអូស្រា្តលី ជាប្រទេសដំបូងគេលើពិភពលោកដែលហាមឃាត់កុមារក្រោម១៦ឆ្នាំ ពីការលេងបណ្តាញសង្គម ដូចជា Facebook, TikTok, Snapchat, YouTube និងមួយចំនួនទៀត កាលពីខែធ្នូយ៉ាងកំហិត។

យោងតាមសារព័ត៌មានក្នុងស្រុក Le Monde និង France Info បានរាយការណ៍ថា រដ្ឋាភិបាលរបស់លោកនឹងបញ្ជូនសេចក្តីព្រាងច្បាប់សម្រាប់ការត្រួតពិនិត្យជាផ្លូវច្បាប់នៅដើមខែមករា។

លោក Macron មិនបានយោងទៅលើការជំរុញផ្នែកច្បាប់នៅក្នុងសុន្ទរកថានៅថ្ងៃចូលឆ្នាំសកលនោះទេ ប៉ុន្តែលោកបានសន្យាថា នឹងការពារកុមារនិងក្មេងជំទង់របស់ប្រទេសបារាំង ពីប្រព័ន្ធផ្សព្វផ្សាយសង្គម និងអេក្រង់ទូរសព្ទ។

គួរឱ្យដឹងផងដែរថាទូរស័ព្ទចល័តត្រូវបានហាមឃាត់នៅក្នុងសាលាបឋម និងមធ្យមសិក្សារបស់ប្រទេសបារាំងចាប់តាំងពីឆ្នាំ២០១៨ ហើយការផ្លាស់ប្តូរថ្មីដែលបានរាយការណ៍នេះនឹងពង្រីកការហាមឃាត់ដល់វិទ្យាល័យ។

តែយ៉ាងណាប្រទេសបារាំងបានអនុម័តច្បាប់មួយកាលពីឆ្នាំ២០២៣ដែលតម្រូវឱ្យការលេងបណ្តាញសង្គមទទួលការយល់ព្រមពីមាតាបិតាសម្រាប់ក្មេងអាយុក្រោម ១៥ឆ្នាំ ដើម្បីបង្កើតគណនីផ្ទាល់ខ្លួន ទោះបីជាមានបញ្ហាប្រឈមផ្នែកបច្ចេកទេសនានាបានរារាំងការអនុវត្តនេះក៏ដោយ៕

ប្រែសម្រួល៖ ណឺ មិនា

The post បារាំងគ្រោងអនុម័តច្បាប់ហាមឃាត់កុមារក្រោម ១៥ឆ្នាំ ប្រើប្រាស់ទូរសព្ទដៃចល័ត appeared first on Kampuchea Thmey Daily.

វៀតណាម ផាកពិន័យនិងដាក់ពន្ធនាគារចំពោះអ្នកដែលបំពានច្បាប់ លក់សត្វមានជំងឺលើទីផ្សារ

សាង ស្រីល័ក្ខ — Wed, 02 Jul 2025 07:13:51 +0000

ប្រទេសវៀតណាមបានដាក់បម្រាមចាប់ពីថ្ងៃទី ១ ខែកក្កដា ដល់អាជីវកររូបណាក៏ដោយដែលដឹងថា សត្វងាប់ដោយសារជំងឺ ឬមានផ្ទុកសារធាតុគីមីហាមឃាត់ ហើយយកមកលក់ឬកែច្នៃអាហារ នឹងត្រូវពិន័យជាប្រាក់ពី ១០០ទៅ ៤០០ លានដុង ឬដាក់ពន្ធនាគារពី ២ ទៅ ៥ ឆ្នាំ។

រូបភាព៖plo.vn

ក្រមព្រហ្មទណ្ឌដែលបានកែសម្រួលដែលចូលជាធរមាននៅថ្ងៃនេះ បានបង្កើនការពិន័យចំពោះការរំលោភលើសុវត្ថិភាពចំណីអាហារ ក៏ដូចជាឧក្រិដ្ឋកម្មបរិស្ថាន និងគ្រឿងញៀនមួយចំនួនទៀត។ នេះត្រូវបានគេចាត់ទុកថាសមរម្យសម្រាប់តម្រូវការនៃការទប់ស្កាត់ និងការត្រួតពិនិត្យឧក្រិដ្ឋកម្មនាពេលបច្ចុប្បន្ន និងក្នុងឆ្នាំបន្ទាប់។

អាស្រ័យហេតុនេះ ការផាកពិន័យត្រូវបានបង្កើនទ្វេដងសម្រាប់អ្នកដែលប្រព្រឹត្តល្មើសនឹងបទប្បញ្ញត្តិសុវត្ថិភាពចំណីអាហារដែលមានចែងក្នុងប្រការ ១ មាត្រា ៣១៧។ ការផាកពិន័យពី ១០០ ទៅ ៤០០ លានដុង ឬដាក់ពន្ធនាគារពី ២ ទៅ ៥ ឆ្នាំ។

ជាងនេះទៀតដែរ សម្រាប់បុគ្គលរូបណាក៏ដោយដែលបំពានដូចជា ការប្រើប្រាស់សារធាតុ សារធាតុគីមី ថ្នាំអង់ទីប៊ីយោទិច ថ្នាំពេទ្យសត្វ ថ្នាំសម្លាប់សត្វល្អិត សារធាតុបន្ថែម ដោយដឹងថាពួកគេត្រូវបានហាមឃាត់ ឬមិនមាននៅក្នុងបញ្ជីនៃការប្រើប្រាស់ដែលត្រូវបានអនុញ្ញាតក្នុងការផលិតអាហារ។ ប្រើប្រាស់សត្វដែលស្លាប់ដោយសារជំងឺ ឬជំងឺរាតត្បាត ឬសត្វដែលត្រូវបានបំផ្លាញដោយច្បាប់ ដើម្បីកែច្នៃអាហារ ឬផ្គត់ផ្គង់ និងលក់អាហារ (ដែលគេដឹងថាមានប្រភពមកពីសត្វដែលស្លាប់ដោយសារជំងឺ ឬជំងឺរាតត្បាត) ដើម្បីកែច្នៃអាហារដែលមានតម្លៃផលិតផលចាប់ពី ១០លានដុង ដល់តិចជាង ១០០លានដុង។

ដូចគ្នានេះដែរ ច្បាប់ដែលបានធ្វើវិសោធនកម្មក៏បានចែងថា សកម្មភាពនាំចូល ផ្គត់ផ្គង់ ឬលក់អាហារដោយចេតនាមានផ្ទុកសារធាតុ គីមី សារធាតុបន្ថែមអាហារ ឬជំនួយកែច្នៃអាហារ ដែលត្រូវបានហាមឃាត់ ឬមិនមានក្នុងបញ្ជីសារធាតុអនុញ្ញាត ឬមិនទាន់អនុញ្ញាតឲ្យប្រើប្រាស់ ឬចរាចរ ដែលមានតម្លៃផលិតផលចាប់ពី ១០ ទៅ ១០០លានដុង នឹងត្រូវទទួលផលចំណេញលើសពី ៥០លានដុង។

អ្នកដែលប្រព្រឹត្តអំពើណាមួយខាងលើ ឬកែច្នៃ ផ្គត់ផ្គង់ ឬលក់ចំណីអាហារ ដោយដឹងថា អាហារមិនសមស្របតាមស្តង់ដារបច្ចេកទេស ឬបទប្បញ្ញត្តិសុវត្ថិភាពចំណីអាហារ បណ្តាលឲ្យពុល ប៉ះពាល់ធ្ងន់ធ្ងរដល់សុខភាពមនុស្ស ៥ទៅ២០នាក់ ឬបង្កគ្រោះថ្នាក់ដល់សុខភាពអ្នកដ៏ទៃ ដែលមានអត្រារបួសរាងកាយពី ៣១% ទៅ ៦០%។

លើសពីនេះ អ្នកដែលប្រព្រឹត្តបទឧក្រិដ្ឋនេះ ក្រោមបទប្បញ្ញត្តិនៃច្បាប់ដែលបានធ្វើវិសោធនកម្ម ក៏អាចនឹងត្រូវទទួលទោសទណ្ឌបន្ថែម ក្នុងទម្រង់នៃការផាកពិន័យទ្វេដងពី ៤០ ទៅ ២០០លានដុង និងរយៈពេលហាមឃាត់មិនឲ្យកាន់មុខតំណែង ប្រកបវិជ្ជាជីវៈ ឬធ្វើការងារមួយចំនួនពី ១ឆ្នាំ ទៅ ៥ឆ្នាំ។

ចំពោះឧក្រិដ្ឋកម្មនៃការផលិត និងជួញដូរអាហារក្លែងក្លាយ គ្រឿងឧបភោគបរិភោគ និងសារធាតុបន្ថែមអាហារ (មាត្រា ១៩៣) ច្បាប់ដែលបានធ្វើវិសោធនកម្មក៏កំណត់ការផាកពិន័យទ្វេដងសម្រាប់បុគ្គល និងនីតិបុគ្គលដែលប្រព្រឹត្តបទឧក្រិដ្ឋនេះ។ ការផាកពិន័យខ្ពស់បំផុតសម្រាប់នីតិបុគ្គលគឺ ៣៦ ពាន់លានដុង (ច្បាប់ចាស់គឺ ៩ ពាន់លានដុង)។

រូបភាព៖congly.vn

អត្ថបទ៖ សាង ស្រីល័ក្ខ

ចុចអាន៖ប្រេងចំណីសត្វរាប់ពាន់តោននៅ វៀតណាម កំពុងចែកចាយដោយសម្ងាត់ ជាអាហារឲ្យមនុស្សទទួលទាន

The post វៀតណាម ផាកពិន័យនិងដាក់ពន្ធនាគារចំពោះអ្នកដែលបំពានច្បាប់ លក់សត្វមានជំងឺលើទីផ្សារ appeared first on Kampuchea Thmey Daily.

ក្រសួងសុខាភិបាល ហាមឃាត់មិនឱ្យប្រើប្រាស់ឱសថ ២ប្រភេទ ដែលបង្កគ្រោះថ្នាក់ដល់ជីវិត

Ken Malis — Tue, 25 Feb 2025 02:05:09 +0000

ក្រសួងសុខាភិបាល នៅថ្ងៃទី២៥ ខែកុម្ភៈ ឆ្នាំ២០២៥ នេះ បានប្រកាសហាមឃាត់មិនឱ្យប្រើប្រាស់ឱសថចំនួន ២ប្រភេទ ដែលកំពុងផ្សព្វផ្សាយលក់តាមរយៈបណ្តាញទំនាក់ទំនងសង្គម ដោយសារមានផ្ទុកសារធាតុ Sildenafil ដែលអាចបណ្តាលឱ្យមានផលប៉ះពាល់ដល់បេះដូង និងគ្រោះថ្នាក់ដល់អាយុជីវិតជាយថាហេតុ។

ការហាមឃាត់នេះ ក្រោយការស្រាវជ្រាវរបស់ភ្នាក់ងារត្រួតពិនិត្យឱសថ និងលទ្ធផលរបស់មជ្ឈមណ្ឌលជាតិពិសោធន៍សុខាភិបាល នៃក្រសួងសុខាភិបាល បានរកឃើញថា ផលិតផលចំនួន ២មុខ ឈ្មោះ ១.SUPER XL ២.AMOUR ដែលបាន និងកំពុងផ្សព្វផ្សាយលក់តាមរយៈបណ្តាញទំនាក់ទំនងសង្គម មានផ្ទុកសារធាតុ Sildenafil ដែលជាឱសថប្រើ សម្រាប់វិបត្តិសរីរាង្គភេទបុរស។ បន្ទាប់ពីបានធ្វើការស្រាវជ្រាវ មន្ត្រីជំនាញ នៃក្រសួងសុខាភិបាល បានសហការជាមួយអង្គភាព និងអាជ្ញាធរ ពាក់ព័ន្ធ ចុះធ្វើនិយ័តកម្មនៅទីតាំងចំនួន ២កន្លែង នៅរាជធានី ភ្នំពេញ ដោយបានកសាងសំណុំរឿងបញ្ជូនជនពាក់ព័ន្ធទៅតុលាការតាមនីតិវិធីផងដែរ។

ដើម្បីចៀសវាងការប៉ះពាល់ដល់សុខភាពធ្ងន់ធ្ងរ ឬឈានដល់ការបាត់បង់អាយុជីវិត ក្រសួងសុខាភិបាល បានអំពាវនាវឱ្យប្រជាពលរដ្ឋទាំងអស់បញ្ឈប់ការទិញ និងប្រើប្រាស់ផលិតផល SUPER XL និង AMOUR ទាំងនេះជាបន្ទាន់។ ទន្ទឹមនេះដែរ ក្រសួងសុខាភិបាល បានឱ្យដឹងថា រាល់ផលិតផលជំនួយផ្លូវភេទ គ្រប់ប្រភេទ ដែលកំពុងផ្សព្វផ្សាយលក់តាមប្រព័ន្ធអនឡាញ គឺពុំមានការអនុញ្ញាតឱ្យធ្វើការផ្សព្វផ្សាយពីក្រសួង សុខាភិបាលនោះទេ ហើយតាមការស្រាវជ្រាវកន្លងមកភាគច្រើន នៃផលិតផលទាំងនោះមិនមែនជាផលិតផល បំប៉នសុខភាពនោះទេ គឺជាទូទៅមានដាក់សារធាតុឱសថសម័យ ដែលអាចធ្វើឱ្យប៉ះពាល់ធ្ងន់ធ្ងរដល់សុខភាព អ្នកប្រើប្រាស់ ឬឈានដល់បាត់បង់អាយុជីវិតទៀតផង។ ដូច្នេះ សូមប្រជាពលរដ្ឋមានការប្រុងប្រយ័ត្ន និងឈប់ជឿលើការផ្សព្វផ្សាយទាំងនោះទៀត។

ជាមួយគ្នានេះ ក្រសួងសុខាភិបាល តម្រូវឱ្យបុគ្គលដែលនៅតែបន្តចែកចាយ ឬលក់ផលិតផលទាំង២ ខាងលើ ឬផលិតផល ជំនួយផ្លូវភេទគ្មានលេខបញ្ជីកាផ្សេងទៀត ត្រូវបញ្ឈប់ការនាំចូល ចែកចាយ ឬលក់ផលិតផលទាំងនេះជាបន្ទាន់។ ក្រសួងសុខាភិបាល នឹងមានវិធានការតឹងរ៉ឹងទៅតាមផ្លូវច្បាប់ចំពោះជនណាដែលបន្តចែកចាយ ឬលក់ផលិតផល ប៉ះពាល់សុខភាពគ្មានលេខបញ្ជីកាខាងលើ ឬផលិតផលគ្មានលេខបញ្ចិកាផ្សេងទៀត ទៅតាមច្បាប់ ស្តីពីវិសោធន កម្មច្បាប់ ស្តីពីការគ្រប់គ្រងឱសថជាធរមាន៕

The post ក្រសួងសុខាភិបាល ហាមឃាត់មិនឱ្យប្រើប្រាស់ឱសថ ២ប្រភេទ ដែលបង្កគ្រោះថ្នាក់ដល់ជីវិត appeared first on Kampuchea Thmey Daily.

ការហាមឃាត់ Archives - Kampuchea Thmey Daily

ហាមលក់ដូរផាវ កាំជ្រួច និងគ្រឿងផ្ទុះគ្រប់ប្រភេទនៅតាមទីផ្សាររដ្ឋ នាឱកាសបុណ្យចូលឆ្នាំខ្មែរ

ឥណ្ឌូណេស៊ី​ហាម​ឃាត់ប្រើប្រាស់​បារីអេឡិចត្រូនិក​​ចំពោះ​យុវជន​ក្រោម​២១ឆ្នាំ​​

រដ្ឋ​ខ្លះ​នៅ​ឥណ្ឌា​​ចាប់ផ្តើម​រកវិធានការ​ហាមឃាត់​ក្មេង​ក្រោម ១៦ ប្រើប្រាស់បណ្តាញ​សង្គម​

រដ្ឋបាលខេត្តកណ្តាល ហាមដាច់ខាតមិនឱ្យដុតផាវ កាំជ្រួច ក្នុងឱកាសពិធីបុណ្យចូលឆ្នាំចិន ខាងមុខ

វៀតណាម​នឹង​ផាក​ពិន័យ​អ្នក​ប្រើប្រាស់​​បារី​អេឡិចត្រូនិក​​ក្នុងទីសាធារណៈ​​​

បារាំង​គ្រោង​អនុម័ត​ច្បាប់​ហាម​ឃាត់​កុមារ​ក្រោម ១៥ឆ្នាំ ​​​ប្រើប្រាស់​ទូរសព្ទដៃ​ចល័ត​

វៀតណាម ​ផាកពិន័យនិងដាក់ពន្ធនាគារចំពោះអ្នកដែលបំពានច្បាប់ លក់សត្វ​មានជំងឺលើទីផ្សារ ​

ក្រសួងសុខាភិបាល ហាមឃាត់មិនឱ្យប្រើប្រាស់ឱសថ ២ប្រភេទ ដែលបង្កគ្រោះថ្នាក់ដល់ជីវិត

ឥណ្ឌូណេស៊ីហាមឃាត់ប្រើប្រាស់បារីអេឡិចត្រូនិកចំពោះយុវជនក្រោម២១ឆ្នាំ

រដ្ឋខ្លះនៅឥណ្ឌាចាប់ផ្តើមរកវិធានការហាមឃាត់ក្មេងក្រោម ១៦ ប្រើប្រាស់បណ្តាញសង្គម

វៀតណាមនឹងផាកពិន័យអ្នកប្រើប្រាស់បារីអេឡិចត្រូនិកក្នុងទីសាធារណៈ

បារាំងគ្រោងអនុម័តច្បាប់ហាមឃាត់កុមារក្រោម ១៥ឆ្នាំ ប្រើប្រាស់ទូរសព្ទដៃចល័ត

វៀតណាម ផាកពិន័យនិងដាក់ពន្ធនាគារចំពោះអ្នកដែលបំពានច្បាប់ លក់សត្វមានជំងឺលើទីផ្សារ