ការអប់រំកូន Archives - Kampuchea Thmey Daily

នាយករដ្ឋមន្ត្រីបញ្ជាឱ្យបង្ក្រាបក្មេងទំនើងឱ្យអស់

hun sirivadh — Mon, 23 Dec 2024 06:32:57 +0000

នាយករដ្ឋមន្ត្រី សម្ដេចធិបតី ហ៊ុន ម៉ាណែត ថាសម្ដេចសម្រេចមិនអនុញ្ញាតឱ្យមានការស្នើសុំបន្ថូរបន្ថយ និងលើកលែងទោសដល់ក្មេងទំនើងដែលត្រូវបានឃុំឃាំងនោះទេ ក្នុងន័យបន្សុទ្ធយកតែមនុស្សល្អសម្រាប់សង្គមជាតិ។

ថ្លែងក្នុងពិធីសំណេះសំណាលជាមួយសិស្សនិទ្ទេស A ព្រឹកថ្ងៃច័ន្ទ ទី២៣ ខែធ្នូ ឆ្នាំ២០២៤ នៅ រាជធានីភ្នំពេញ សម្ដេចធិបតី ហ៊ុន ម៉ាណែត បានផ្ដាំទៅក្មេងទំនើងទាំងអស់ដែលមិនទាន់ត្រូវបានសមត្ថកិច្ចឃាត់ខ្លួនសូមកែខ្លួនឱ្យល្អឡើងវិញ ព្រោះថាសម្ដេចបានបញ្ជាទៅគ្រប់ខេត្តរាជធានីទាំងអស់ «ក្មេងទំនើងចេញមកត្រូវតែបង្ក្រាប»។

សម្ដេចថា៖ «ចេញមកបង្ក្រាបៗទាល់តែអស់តែម្ដងទុកតែអ្នកដែលល្អនៅក្នុងសង្គមបានហើយ»។

សម្ដេចថារដ្ឋាភិបាលពិតជាមិនចង់ដាក់វិធាននេះនោះទេ តែប្រសិនជាគ្មានវិធានការគឺក្មេងទំនើងទាំងនេះនឹងបន្តខូច ហើយធ្វើឱ្យប៉ះពាល់ដល់សណ្ឋាប់ធ្នាប់សង្គម និងពលរដ្ឋផ្សេងទៀតដែរ។

បើតាមសម្ដេចធិបតី បច្ចុប្បន្នមានក្មេងទំនើងជាង២០០នាក់ត្រូវបានតុលាការសម្រេចឃុំខ្លួននៅមណ្ឌលអប់រំកែប្រែ។

សម្ដេចនាយករដ្ឋមន្ត្រីថារដ្ឋាភិបាលក្នុងអាណត្តិថ្មីបានដាក់ចេញគោលនយោបាយពង្រឹងឥរិយាបថក្មេងៗនៅក្នុងសាលាជាពិសេសនៅថ្នាក់បឋម។

សម្ដេចថា៖ «៦ឆ្នាំនេះ(ថ្នាក់បឋម)បើបានអប់រំល្អគឺកាត់បន្ថយភាពឈឺក្បាលនៅ៦ឆ្នាំក្រោយនៅអនុវិទ្យាល័យ នៅវិទ្យាល័យ។ ហើយបើ១២ឆ្នាំនេះលែងសូវឈឺក្បាលរឿងរញ៉េរញ៉ៃរឿងឥរិយាបថចប់ទី១២យើងនឹងបានធនធានមនុស្សដែលល្អនិងរឹងមាំដែលអាចគិតគូរនូវអ្វីដែលអាក្រក់ ដែលអាចចូលរួមកាន់តែសកម្មក្នុងសង្គមជាតិកាន់តែល្អប្រសើរ»។

សម្ដេចជំរុញការភ្ជាប់ទំនាក់ទំនងរវាងគ្រូនិងអាណាព្យាបាលដើម្បីចែករម្លែកព័ត៌មាន និងបង្កើនជំនឿទុកចិត្ត ដែលត្រូវពង្រឹងឱ្យបានដើម្បីកែប្រែក្មេងៗដើរផ្លូវត្រូវឡើងវិញ៕

អត្ថបទដោយ ហ៊ុន សិរីវឌ្ឍន៍

The post នាយករដ្ឋមន្ត្រីបញ្ជាឱ្យបង្ក្រាបក្មេងទំនើងឱ្យអស់ appeared first on Kampuchea Thmey Daily.

ក្រសួងអប់រំផ្លាស់ប្តូរមណ្ឌលប្រឡងមួយកន្លែងនៅខេត្តកំពង់ចាមមកសាខាសាកលវិទ្យាល័យជាតិ ជា ស៊ីម កំចាយមារ វិញ

Sokhom Khon — Sun, 06 Oct 2024 14:13:26 +0000

ក្រសួងអប់រំយុវជននិងកីឡាបានសម្រេចធ្វើការផ្លាស់ប្តូរមណ្ឌលប្រឡងវិទ្យាល័យសម្បួរមាសមកសាខាសាកលវិទ្យាល័យជាតិ ជា ស៊ីម កំចាយមារខេត្តកំពង់ចាម វិញដោយសារបញ្ហាទឹកជំនន់។

លោកស្រី ឃួន វិច្ឆិកា អ្នកនាំពាក្យក្រសួងអប់រំយុវជន និងកីឡាបានមានប្រសាសន៍នៅរសៀលថ្ងៃទី០៦តុលានេះថាក្រសួងអប់រំតែងតែជ្រើសរើសមណ្ឌលប្រឡងនីមួយៗយ៉ាងល្អិតល្អន់ដោយផ្តោតលើទីតាំងភូមិសាស្ត្រដែលមិនមានការរងនូវហានិភ័យលេចទឹក ភាពលំបាកនិងភាពងាយស្រួលសម្រាប់បេក្ខជនធ្វើដំណើរមកប្រឡង។

សុវត្តិភាពភាពនៃដំណើរការប្រឡង និងពិនិត្យទៅលើហេដ្ឋារចនាសម្ព័ន្ធដូចជាបន្ទប់ប្រឡងជាដើមដើម្បីឱ្យដំណើរការប្រឡងប្រព្រឹត្តិទៅដោយរលូននិងមិនមានផលប៉ះពាល់ណាមួយមកពីបញ្ហាទឹកជំនន់។

យ៉ាងណាក៏ដោយលោកស្រីបានបន្តថា ក្រសួងនៅតែបង្កើតក្រុមការងារដោយសហការជិតស្និតជាមួយអាជ្ញាធរដែនដីនិងមន្ទីរអបរំរាជធានីខេត្តដើម្បីដោះស្រាយបញ្ហាប្រឈមនានាឱ្យបានទាន់ពេលវេលាដើម្បីធានាឱ្យបាននូវការប្រឡងនៅថ្ងៃទី៨ តុលាខាងមុខនេះ។

ជាក់ស្តែងកាលពីថ្ងៃទី៣០ខែកញ្ញាឆ្នាំ២០២៤ក្រសួងបានសម្រេចផ្លាស់ប្តូរមណ្ឌលប្រឡងចំនួនមួយនៅខេត្តកំពង់ចាមពីវិទ្យាល័យសម្បួរមាសមកសាខាសាកលវិទ្យាល័យជាតិ ជា ស៊ីម កំចាយមារខេត្តកំពង់ចាមវិញ។

ជាមួយគ្នានេះដែរ ក្រសួងបានជ្រើសរើសមណ្ឌលប្រឡងនានាតាមរួមខេត្ត និងស្រុកមួយចំនួនដើម្បីជួយសម្រួលនិងបង្កលក្ខណដល់ប្អូនៗចូលរួមប្រឡងទាំងការហូបចុកនិងស្នាក់នៅហើយមានផ្ទះសំណាក់មួយចំនួនប្រកាសបញ្ចុះតម្លៃស្នាក់ចំពោះបេក្ខជន ផ្តល់ទីកន្លែងស្នាក់នៅដោយឥតគិតថ្លៃ ខេត្តខ្លះបានប្រកាសរៀបចំសម្រួលចរាចរណ៍ និងរៀបចំចតយានយន្ត ម៉ូតូ កង់ដោយឥតគិតថ្លៃ។

លោកស្រីបានអំពាវនាវដល់ប្អូនៗបេក្ខជនប្រឡងសូមយកចិត្តទុកការពារសុខភាពឱ្យបានល្អត្រូវបរិភោគចំណីអាហារនិងសម្រាកឱ្យបានគ្រប់គ្រាន់និងរំលឹកមេរៀនពិសេសទៅមើលឈ្មោះនិងលេខតុឱ្យបានច្បាស់លាស់ដើម្បីឱ្យដំណើរការប្រឡងបានរលូននិងធ្វើដំណើរទៅប្រឡងប្រកបដោយសុខសុវត្តិភាពនិងត្រូវភ្ញាក់ពីព្រឹកព្រលឹមជៀសវាងប្រញាប់ប្រញ៉ាអាចជួបកក្តាប្រឈមមួយចំនួននិងសូមជូនពរឱ្យប្អូនៗទទួលបានជោគជ័យក្នុងដំណើរការប្រឡង។

លោកស្រីបានបញ្ជាក់ថាការប្រឡងសញ្ញាបត្រមធ្យមសិក្សាទុតិយភូមិ សម័យប្រឡង៖ ០៨ តុលា ២០២៤ មានបេក្ខជនចុះឈ្មោះ ប្រឡងសរុបចំនួន ១៣៧ ០៤០ នាក់ (ស្រី ៧៤ ៨៨២ នាក់) ក្នុងនោះ៖ បេក្ខជនថ្នាក់វិទ្យាសាស្ត្រ មានចំនួន ៣៩ ៣៥៨ នាក់ (ស្រី ២៣ ៧១៥ នាក់) បេក្ខជនថ្នាក់វិទ្យាសាស្ត្រសង្គម មានចំនួន ៩៧ ៦៨២ នាក់ (ស្រី ៥១ ១៦៧ នាក់)។ បេក្ខជនត្រូវបានរៀបចំ ចំនួន២៥នាក់ ក្នុងមួយបន្ទប់ ទៅតាមមណ្ឌលសំណេរនីមួយៗ តាមរាជធានី ខេត្ត លើកលែងតែបន្ទប់ចុងក្រោយ និងបន្ទប់ដែលមានបេក្ខជនមកពីវិទ្យាល័យអប់រំពិសេស។មណ្ឌលសំណេរមានចំនួនសរុប ២៣០ មណ្ឌល ត្រូវជា ៥ ៥៣៣ បន្ទប់ ក្នុងនោះ៖ ថ្នាក់វិទ្យាសាស្ត្រ មាន ចំនួន ៧៣ មណ្ឌល ត្រូវជា ១ ៦០២ បន្ទប់ និងថ្នាក់វិទ្យាសាស្ត្រសង្គម មានចំនួន ១៥៧ មណ្ឌល ត្រូវជា ៣ ៩៣១ បន្ទប់៕

អត្ថបទ៖សំអឿន

The post ក្រសួងអប់រំផ្លាស់ប្តូរមណ្ឌលប្រឡងមួយកន្លែងនៅខេត្តកំពង់ចាមមកសាខាសាកលវិទ្យាល័យជាតិ ជា ស៊ីម កំចាយមារ វិញ appeared first on Kampuchea Thmey Daily.

បណ្ឌិត លី ឆេង ៖ គ្មានក្តីសប្បាយណា សប្បាយដូចជោគជ័យបានមកពីសមត្ថភាពរបស់ខ្លួនឯង

Sokhom Khon — Sat, 16 Dec 2023 10:46:53 +0000

លោកបណ្ឌិត លី ឆេង តំណាងរាស្រ្តមណ្ឌលរាជធានីភ្នំពេញ ស្ថាបនិក និងជាអគ្គនាយក ប៊ែលធី គ្រុបបានថ្លែងថា គ្មានក្តីសប្បាយណា សប្បាយដូចជោគជ័យ ដែលបានមកពីសមត្ថភាពរបស់ខ្លួនឯងទេ។ ក្នុងឱកាសអបអរសាទរពិធីប្រគល់សញ្ញាប័ត្រមធ្យមសិក្សាបឋមភូមិប៊ែលធី ជូនដល់សិស្សថ្នាក់ទី៩ ជំនាន់ទី១៨ សរុបចំនួន ៣,១៦៦នាក់ លោកបណ្ឌិតបានថ្លែងកោតសរសើរចំពោះក្មួយៗ ដែលបានខិតខំយកចិត្តទុកដាក់ ប្រឹងប្រែងសិក្សារៀនសូត្រ គោរពបទបញ្ជាផ្ទៃក្នុង មានវិន័យ សីលធម៌ និងគុណធម៌ល្អ មិនបង្កផលលំបាកដល់គ្រួសារ និងសង្គមជាតិ រហូតទទួលបានជោគជ័យ ប្រឡងជាប់សញ្ញាប័ត្រ មធ្យមសិក្សាបឋមភូមិ (ឌីប្លូម) នាពេលនេះ។

លោក ប៊ុត ឌីម៉ង់ ប្រធានការិយាល័យចំណេះទូទៅ បានឱ្យដឹងថា បច្ចុប្បន្ននេះសាលាប៊ែលធី អន្តរជាតិមាន២៩សាខា (២៦សាខា កំពុងដំណើរការ និង៣សាខាកំពុងសាងសង់) ដែលមានបុគ្គលិកបម្រើការសរុបចំនួន ២,៤៤៦នាក់ (នារី ៩៧៨នាក់) និងមានសិស្សានុសិស្សកំពុងសិក្សា សរុបចំនួន ៦០,៥៥៩នាក់ (នារី ២៩,២៩២នាក់)។

ក្នុងឆ្នាំសិក្សា២០២២-២០២៣ នេះ សាលា ប៊ែលធី អន្តរជាតិ មានសិស្សថ្នាក់ទី៩ ដែលបានប្រឡងបញ្ចប់សញ្ញាបត្រ មធ្យមសិក្សាបឋមភូមិ (ឌីប្លូម) ចំនួន ៣,១៩៥នាក់ (បីពាន់មួយរយកៅសិបប្រាំនាក់) ក្នុងនោះជាប់ ៣,១៦៦នាក់ (បីពាន់មួយរយហុកសិបប្រាំមួយនាក់) ស្មើនឹង ៩៩.០៩%។

ដោយសិស្សមានចំនួនច្រើន ពិធីប្រគល់សញ្ញាប័ត្រមធ្យម សិក្សាបឋមភូមិនេះ ត្រូវបានរៀបចំជា៣លើក គឺលើកទី១៖ ថ្ងៃទី១៦ ធ្នូ ២០២៣ ចំនួន ១,០១៤នាក់ មកពី១០សាខា, លើកទី២៖ ថ្ងៃទី៣០ ធ្នូ ២០២៣ ចំនួន ១,១១១នាក់ មកពី ៦សាខា និងលើកទី៣៖ ថ្ងៃទី១៣ មករា ២០២៤ ចំនួន ១,០៤១នាក់ មកពី ៨សាខា។ ចំពោះសិស្សដែលបានប្រឡងជាប់សញ្ញាបត្រមធ្យមសិក្សា បឋមភូមិទាំងអស់នឹងទទួល បានសញ្ញាប័ត្រពីរ ហើយសញ្ញាប័ត្រទាំងពីរនេះ ត្រូវបានដាក់បញ្ចូល (Upload) ទៅក្នុងវេបសាយរបស់ប៊ែលធី ដើម្បី ទុកជាកាលប្បវត្តិសម្រាប់សិស្សគ្រប់រូបទាញយក (Download) ប្រើប្រាស់ជាផ្លូវការផងដែរ។

ជាចុងក្រោយលោកបណ្ឌិត លី ឆេង ក៏បានផ្តាំផ្ញើដល់ក្មួយៗទាំងអស់ ឱ្យខិតខំយកចិត្តទុកដាក់ បន្តការសិក្សារៀនសូត្របន្ថែមទៀតនៅ ថ្នាក់ទី១០-១១ និងទី១២ ដើម្បីប្រឡងជាប់សញ្ញាប័ត្រមធ្យមសិក្សាទុតិយភូមិ (បាក់ឌុប) និងទទួលបាននិទ្ទេសល្អ ហើយអាចបន្តទៅសិក្សានៅថ្នាក់ ឧត្តមសិក្សាឱ្យបានគ្រប់ៗគ្នា។

The post បណ្ឌិត លី ឆេង ៖ គ្មានក្តីសប្បាយណា សប្បាយដូចជោគជ័យបានមកពីសមត្ថភាពរបស់ខ្លួនឯង appeared first on Kampuchea Thmey Daily.

រដ្ឋបាលរាជធានីបង្កើត ក្រុមតេឡេក្រាមរវាងសាលារៀន និងអាជ្ញាធរមានសមត្ថកិច្ចដើម្បីសាលារៀនមានសន្តិសុខល្អ គ្មានគ្រឿងញៀននិងបងតូច បងធំ

Kang Tola — Sat, 02 Dec 2023 06:43:22 +0000

រដ្ឋបាលរាជធានីភ្នំពេញ បានបង្កើតក្រុមតេឡេក្រាមមួយ ដោយភ្ជាប់គ្នារវាងសាលារៀនជាមួយនឹងអាជ្ញាធរ និងកងកម្លាំងមានសមត្ថកិច្ចមូលដ្ឋាន ដើម្បីធ្វើយ៉ាងណា ឱ្យនៅតាមសាលារៀនមានសន្តិសុខល្អ មិនមានគ្រឿងញៀន និងមិនមានក្រុមបងតូចបងធំ ដើម្បីឲ្យក្មួយៗ សិស្សានុសិស្សបានសិក្សារៀនសូត្រ ក្លាយជាទំពាំងស្នងឬស្សីរបស់ជាតិនាពេលអនាគត។នេះជាការលើកឡើងរបស់ លោកឃួង ស្រេង អភិបាលនៃគណៈអភិបាលរាជធានីភ្នំពេញ ខណៈលោកអញ្ជើញជាអធិបតិភាព ក្នុងពិធីបើកបវសនកាលឆ្នាំសិក្សា២០២៣-២០២៤ និងចែករង្វាន់ដល់សិស្សពូករាជធានីភ្នំពេញ នៅវិទ្យាល័យ ជា ស៊ីម ឈូកវ៉ា ក្នុងសង្កាត់គោករកា ខណ្ឌ ព្រែកព្នៅ នាព្រឹកថ្ងៃទី ០១ ខែធ្នូ ឆ្នាំ២០២៣នេះ។

លោកឃួង ស្រេង បានមានប្រសាសន៍បន្តថា៖ ក្នុងរបបប្រល័យពូជសាសន៍ប៉ុលពត វិស័យអប់រំត្រូវបានលុបចោលទាំងស្រុង ជាមួយនឹងការកាប់សម្លាប់គ្រូបង្រៀននិងអ្នកចេះដឹងអស់ស្ទើរដល់ឬសគល់។ក្រោយការរំដោះប្រទេសពីរបបនេះ នៅថ្ងៃទី២៤ខែមករាឆ្នាំ១៩៧៩ កម្ពុជាបានបើកបវសនកាលឡើងវិញ ដោយពេលនោះ កម្ពុជាបានអនុវត្ត គឺអ្នកចេះច្រើនបង្រៀនអ្នកចេះតិច អ្នកចេះតិច បង្រៀនអ្នកមិនចេះសោះ។

លោកឃួង ស្រេង បានសូមក្មួយៗសិស្សានុសិស្សទាំងអស់ ព្យាយាមរៀនសូត្រ ដោយកុំដើរលេងកម្សាន្តច្រើនជាងការរៀនសូត្រ នាំឲ្យសោកស្ដាយនៅពេលអនាគត ខណៈដែលក្មួយៗ មានឱកាសក្នុងការសិក្សារៀនសូត្រ ក្រោមម្លប់នៃសន្តិភាព។ សម្ដេចបវរធិបតីហ៊ុន ម៉ាណែត បានយកចិត្តទុកដាក់ខ្លាំងណាស់ ដោយរកអស់គ្រប់មធ្យោបាយ ដើម្បីធ្វើយ៉ាងណាឲ្យ កម្ពុជាមានភាពរីកចម្រើនរុងរឿង ក្លាយជាប្រទេស ដែលមានចំណូលកម្រិតខ្ពស់នៅឆ្នាំ២០៥០។

លោកឃួង ស្រេង បានបន្តទៀតថា ការខិតខំប្រឹងប្រែងរៀនសូត្ររបស់ក្មួយៗ គឺដើម្បីខ្លួនឯងផង ដើម្បីគ្រួសារផង និងពិសេសគឺដើម្បីសង្គមជាតិរបស់យើងទាំងមូល ដោយពេលនេះក្មួយៗមានលទ្ធភាពគ្រប់គ្រាន់ក្នុងការសិក្សារៀនសូត្រ ពោលគឺក្មួយៗអាចរៀនសូត្របានតាមប្រព័ន្ធអ៊ីនធឺណែតថែមទៀតផង។

លោកបានបញ្ជាក់ថា ការទទួលបានមេដាយរបស់ក្មួយៗ គឺជាកិត្តិយសរបស់ក្មួយៗ កិត្តិយសរបស់អាណាព្យាបាល ឪពុកម្ដាយរបស់ក្មួយៗ ហើយក៏ជាកិត្តិយសរបស់ជាតិយើងផងដែរ។សម្រាប់អាជ្ញាធររាជធានីភ្នំពេញតែងតែជួយគាំទ្រ ទាំងសម្ភារៈ និងថវិកា ជាមួយនឹងការតម្រង់ទិសក្មួយៗឲ្យដើរផ្លូវត្រូវ ជៀសវាង ការប្រព្រឹត្តនៅអបាយមុខផ្សេងៗ ។

លោក ហែម ស៊ីណារ៉ត ប្រធានមន្ទីរអប់រំ យុវជន និងកីឡារាជធានីភ្នំពេញ បានលើកឡើងផងដែរថា ក្នុងពិធីនេះ រដ្ឋបាលរាជធានីភ្នំពេញ បានជូនរង្វាន់ដល់សិស្សានុសិស្សពូកែ តាមថ្នាក់មានចំណាត់ថ្នាក់លេខ១ ដល់លេខ៣ ពីថ្នាក់ទី៩ ដល់ថ្នាក់ទី១២ តាមគ្រឹះស្ថានមធ្យមសិក្សាសាធារណៈ មានចំនួន ៣,៨៩៤នាក់ ស្រី២,៣៤៨នាក់ ក្នុងនោះចំណាត់ថ្នាក់លេខ១ចំនួន ១២៩៨នាក់ ស្រី ៨០៥នាក់ ។ចំណាត់ថ្នាក់លេខ២ ចំនួន ១២៩៨នាក់ចំណាត់ថ្នាក់លេខ៣ ចំនួន ១២៩៨នាក់ ស្រី ៧៧៩នាក់ ស្រី ៧៦៥នាក់ ។

លោកបន្តថា រាជធានីភ្នំពេញ បានរៀបចំប្រឡងជ្រើសរើសសិស្សពូកែទូទាំងរាជធានី ផ្នែក អក្សរសិល្បខ្មែរ គណិតវិទ្យា និងរូបវិទ្យា ថ្នាក់ទី៩ និងថ្នាក់ទី១២ ដែលមកពីគ្រប់គ្រឹះស្ថានមធ្យមសិក្សាសាធារណៈ និងឯកជនទូទាំងរាជធានី មានចំនួន ៨៧១នាក់ ស្រី៥១៨នាក់ បានជាប់ចំណាត់ថ្នាក់រាជធានីចំនួន ៦៦នាក់ ក្នុងនោះយុវតី៣៣នាក់ ។ មន្ទីរអប់រំ យុវជន និងកីឡារាជធានីភ្នំពេញ បានបញ្ជូនសិស្សពូកែរាជធានី ចំនួន ៦៦នាក់ ក្នុងនោះយុវតី៣៣នាក់ ទៅចូលរួមប្រឡងជ្រើសរើសសិស្សពូកែទូទាំងប្រទេស នាថ្ងៃទី១២ ខែមិថុនា ឆ្នាំ២០២៣នៅ មណ្ឌលវិទ្យាល័យនេតយ៉ង់ ខេត្ត បាត់ដំបង ដែលបេក្ខជនមកពីគ្រប់រាជធានី-ខេត្ត ចំនួន៤៨០នាក់។ ជាលទ្ធផល រាជធានីភ្នំពេញ ដណ្ដើមបានជ័យលាភីចំនួន ៧នាក់ យុវតី០២នាក់ ក្នុងនោះ មេដាយមាស ០២ លើមេដាយមាសទូទាំងប្រទេស៦។ បេក្ខជនជ័យលាភីសិស្សពូកថ្នាក់អន្តរជាតិ ក្រសួងអប់រំ យុវជន និងកីឡា បានបញ្ជូនបេក្ខជនជាសិស្សពូកែទូទាំងប្រទេស ទៅចូលរួមប្រកួតប្រជែងថ្នាក់អន្តរជាតិ ក្នុងនោះសិស្សានុសិស្សរបស់រាជធានីភ្នំពេញ ចំនួន៨០នាក់ ទទួលមេដាយមាសចំនួន៨៥នាក់ ស្រី៥១នាក់ មេដាយប្រាក់ចំនួន៤៥នាក់ ស្រី១៩នាក់ មេដាយសំរឹទ្ធិចំនួន៥៧នាក់ ស្រី២៣នាក់ ៕

អត្ថបទ៖ ស្រីរ័ត្ន

The post រដ្ឋបាលរាជធានីបង្កើត ក្រុមតេឡេក្រាមរវាងសាលារៀន និងអាជ្ញាធរមានសមត្ថកិច្ចដើម្បីសាលារៀនមានសន្តិសុខល្អ គ្មានគ្រឿងញៀននិងបងតូច បងធំ appeared first on Kampuchea Thmey Daily.

៥ យ៉ាង អតីតសាស្ត្រាចារ្យមួយរូប ចង់ឲ្យអាណាព្យាបាលនិស្សិតយល់ដឹង

Boa Sokunveary — Fri, 03 Mar 2023 04:50:00 +0000

អ្នកស្រី Rachel Garlinghouse ធ្លាប់ជាសាស្ត្រាចារ្យបង្រៀនថ្នាក់បរិញ្ញាបត្រនៅសាកលវិទ្យាល័យមួយអស់រយៈពេល ៩ ឆ្នាំ គាត់តែងតែរៀបចំរួចរាល់សម្រាប់តទល់ជាមួយសិស្សជានិច្ច ប៉ុន្តែបញ្ហាចម្បងនៅពីក្រោយធំនោះគឺមកពីអាណាព្យាបាលទៅវិញ ។ ខាងក្រោមនេះជារឿង ៥ យ៉ាងដែលអ្នកស្រី Rachel ចង់ឲ្យអាណាព្យាបាលយល់ដឹង ៖

១. ត្រូវស្គាល់ពីកូនឲ្យច្បាស់

អ្នកស្រីនិយាយថា “ឪពុកម្ដាយឧស្សាហ៍ទូរស័ព្ទមកស្ដីឲ្យខ្ញុំពីនិទ្ទេសកូនៗរបស់ពួកគេ ឬវិន័យក្នុងថ្នាក់របស់ខ្ញុំ អ្វីដែលពិបាកបំផុតគឺនិស្សិតមួយចំនួនមិនសូវចូលរៀនហើយសាលាមិនអាចប្រាប់ពីអវត្តមានរបស់សិស្សទៅកាន់អាណាព្យាបាលបានទេ” Rachel បន្តទៀតថា ពួកគេចូលចិត្តប្រើពាក្យ “ខ្ញុំបង់ប្រាក់ឲ្យអ្នកដើម្បីបង្រៀនកូនខ្ញុំ” ដែលជាពាក្យសម្ដីគំរោះគំរើយបំផុត សាកលវិទ្យាល័យមិនមែនជាសាលាមត្តេយ្យនោះទេ ដូច្នេះរាល់បញ្ហាអ្នកគប្បីប្រឹក្សានិងឈ្វេងយល់ជាមួយកូនផ្ទាល់ទើបល្អ ។

២. យុវវ័យមិនចាំបាច់រៀនបន្ត ៤ ឆ្នាំទេ បើពួកគេមិនចង់

ឪពុកម្ដាយមួយចំនួនធំសុទ្ធតែរៀបចំឲ្យកូនរៀនសាកលវិទ្យាល័យរយៈពេល ៤ ឆ្នាំ ប៉ុន្តែនិស្សិតតែងតែត្អូញត្អែរពីសម្ពាធដែលឪពុកម្ដាយបង្ខំឲ្យរៀនសាកលវិទ្យាល័យ ខ្លះថែមទាំងគំរាមកាត់កាលទៀតផង យ៉ាងណា Rachel ច្បាស់ក្នុងចិត្តថាសិស្សនឹងមានអនាគតល្អជាងនេះបើពួកគេធ្វើអ្វីដែលជាខ្លួនឯង ។

៣. ត្រូវយកចិត្តទុកដាក់ជាមួយផ្លូវចិត្តកូន

កូនសិស្ស Rachel ភាគច្រើនមានបញ្ហាផ្លូវចិត្តដូចជាជំងឺថប់បារម្ភ និងបាក់ទឹកចិត្ត ប៉ុន្តែពួកគេនៅតែខំប្រឹងបញ្ចប់ការសិក្សាដើម្បីបំពេញចិត្តឪពុកម្ដាយ ។ បើផ្លូវចិត្តមិនរឹងមាំហើយ គ្មានអ្វីធ្វើឲ្យជីវិតមនុស្សប្រសើរឡើងទេ ។

៤. មិនគួរប្រលែងកូនពេលពេញវ័យ

មនុស្សអាយុទើបតែ ១៨ ឆ្នាំមិនទាន់រឹងមាំនៅឡើយទេ ពួកគេនៅត្រូវការអ្នកឧបត្ថម្ភដដែលរហូតដល់អាយុ ២៥ ឆ្នាំទើបខួរក្បាលមនុស្សដំណើរការពេញលេញ ។

៥. ឪពុកម្ដាយជាគ្រូបង្រៀនទី ១ របស់កូន

ថ្នាក់សាកលមិនមែនជាបញ្ហាតែមួយសម្រាប់និស្សិតទេ ផ្លូវចិត្ត ផ្លូវកាយ និងទំនាក់ទំនងសង្គមកំពុងរុំព័ទ្ធកូនរបស់លោកអ្នកលើកទីមួយ មានតែឪពុកម្ដាយប៉ុណ្ណោះដែលអាចបង្រៀនកូនពីជីវិតក្នុងអំឡុងពេលអភិវឌ្ឍខ្លួន ៕

ប្រែសម្រួល ៖ វារី

ប្រភព ៖ Insider

ចុចអាន ៖ ជាកំហុសធ្ងន់! បើនៅតែយល់ថា ឪពុកម្តាយប្រកបការងារអ្វី កូនត្រូវតែធ្វើការងារនោះដែរ

The post ៥ យ៉ាង អតីតសាស្ត្រាចារ្យមួយរូប ចង់ឲ្យអាណាព្យាបាលនិស្សិតយល់ដឹង appeared first on Kampuchea Thmey Daily.

ជាកំហុសធ្ងន់! បើនៅតែយល់ថា ឪពុកម្តាយប្រកបការងារអ្វី កូនត្រូវតែធ្វើការងារនោះដែរ

Chan Sotheavy — Mon, 13 Feb 2023 09:54:38 +0000

ជាកំហុសធ្ងន់ណាស់របស់ឪពុកម្តាយ ដែលយល់ថា ខ្លួនជាអ្នកប្រកបរបររកស៊ី ហើយកូនត្រូវតែជាអ្នករកស៊ីដែរ បើឪពុកម្តាយធ្វើការអ្វី កូនត្រូវតែធ្វើការងារបែបនោះដែរ។ លោកសាស្ត្រាចារ្យ ហោ ប៊ុន ឡេង លើកឡើងបែបនេះ នៅក្នុងបទសម្ភាស កម្មវិធី ៣០នាទីជាមួយគ្រូយើង។

លោកសាស្ត្រាចារ្យ ពន្យល់ថា អាណាព្យាបាលអាចបណ្តុះទស្សនៈរបស់កូន ធ្វើអ្វីតាមការចង់បានរបស់ខ្លួន ប៉ុន្តែអ្វីដែលអាណាព្យាបាលគ្រប់រូប ចាំបាច់ដឹងនោះគឺ គាត់អាចធ្វើទៅបានក៏ពិតមែន តែមិនអាចធ្វើរឿងនោះ ឱ្យអស្ចារ្យបានឡើយ។ លោកថា វាផ្ទុយពីការធ្វើកិច្ចការផ្តើមចេញពីទេពកោសល្យ ដែលកូនអាចធ្វើអស់ពីសមត្ថភាព និងថែមទាំងអាចបញ្ចូលទាំងការច្នៃប្រឌិតបានច្រើនមិនធម្មតា។

លោកសាស្ត្រាចារ្យ ហោ ប៊ុនឡេង បន្ថែមទៀតថា ឪពុកម្តាយមាននាទីជាអ្នកអភិបាល និងដឹកនាំកូន ពោលគឺតាមដានពីទេពកោសល្យធម្មជាតិរបស់កូន បន្ទាប់មកជួយអភិវឌ្ឍនដុងពីកំណើតនោះ ឱ្យទៅជាជំនាញពិតប្រាកដមួយ ព្រោះពួកគេនៅតូច មិនទាន់អាចរកជំនាញខ្លួនឯងបានឡើយ ដែលទាមទារឱ្យមានជួយជ្រោមជ្រែងពីឪពុកម្តាយ។

បើតាមលោកសាស្ត្រាចារ្យ ក្នុងនាមជាអាណាព្យាបាល ចាំបាច់ណាស់ ក្នុងការសង្កេតពីទេពកោសល្យ ធម្មជាតិរបស់កូន ថាតើ កូនរបស់ខ្លួន មានទំនោរទៅរកអ្វី ហើយពូកែខាងអ្វី ដើម្បីអាចជួយច្នៃ ទេពកោសល្យនោះឲ្យក្លាយជាទៅជាការពិត ពិសេសជម្រុញកូនឱ្យឈានទៅដល់ផែនការ ដែលពួកគេគ្រោងទុក៕

អត្ថបទដោយ៖ សុធាវី

The post ជាកំហុសធ្ងន់! បើនៅតែយល់ថា ឪពុកម្តាយប្រកបការងារអ្វី កូនត្រូវតែធ្វើការងារនោះដែរ appeared first on Kampuchea Thmey Daily.

អ្នកជំនាញថា បើមិនយកចិត្តទុកដាក់លើចំណុចតូចតាច នៃការអប់រំកូនទេ នោះនឹងក្លាយជាចំណាប់ខ្មាំងរបស់កូនមិនខាន

Chan Sotheavy — Tue, 24 Jan 2023 05:49:42 +0000

អាណាព្យាបាលមិនត្រូវបណ្តែតបណ្តាយកូនខ្លាំងពេក ហើយពឹងផ្អែកតែលើគ្រូបង្រៀន និងសាលារៀន ដើម្បីអប់រំបុត្រធីតាខ្លួននោះទេ ព្រោះមាតាបិតាបាននៅជិតកូនៗ ច្រើនជាងគ្រូនៅសាលា ហើយបើមិនយកចិត្តទុកដាក់លើចំណុចតិចតួច នៃការអប់រំកូនទេនោះ អាណាព្យាបាលនឹងក្លាយជាចំណាប់ខ្មាំងរបស់កូន នៅពេលណាមួយមិនខាន។
លោក យិន សុភាព នាយកសាលារៀនគ្រូយើង ណែនាំបែបនេះ នៅក្នុងកម្មវិធី “៣០នាទី ជាមួយគ្រូយើង” ដែលរៀបចំឡើងដោយ កម្ពុជាថ្មី ។

យោងតាមបទពិសោធន៍ច្រើនឆ្នាំ ក្នុងវិស័យអប់រំ នាយកសាលារូបនេះ លើកឡើងថា ក្មេងវ័យជំទង់ងាយដើរផ្លូវខុសខ្លាំងបំផុត ដែលច្រើនតែគេចសាលាមិនចូលរៀន វាយតប់គ្នា ឬឈានដល់ការសេពគ្រឿងញៀន បើធ្ងន់ធ្ងរជាងនេះ គឺអាចចូលដល់ដំណាក់កាល ប្រព្រឹត្តទង្វើមិនល្អក្នុងសង្គមតែម្តង។ តែមុននឹងឈានដល់ ដំណាក់កាលនេះ លោកថា ច្រើនតែមកពីមាតាបិតាបណ្តែតបណ្តោយខ្លាំងពេក ដូចជាផ្តល់មធ្យោបាយធ្វើដំណើរ (ម៉ូតូ)។

លោកបន្តថា បញ្ហាគឺនៅត្រង់ថា អាណាព្យាបាលភាគច្រើនយល់ថា ការបណ្តាយកូនឱ្យទៅសាលាដោយខ្លួនឯង ព្រោះតែខ្លួនមិនមានពេល ឬព្រោះតែទុកចិត្តកូន ជាហេតុផលចម្បង ដែលជំរុញកូនងាយដើរខុសផ្លូវ ព្រោះក្មេងងាយធ្វើអ្វីតាមគ្គ្នាណាស់ បើសិនជាសេពគប់ប៉ះមិត្តមិនល្អ នោះនឹងបង្កជារូបភាពអវិជ្ជមានច្រើនផ្សេងទៀត។ ក្នុងនោះ មានច្រើនករណីមកហើយ នៅពេលដើរផ្លូវខុស ទើបអាណាព្យាបាលចាប់ផ្តើមរឹតត្បិត ធ្វើឱ្យក្មេងមិនសប្បាយចិត្ត ចាប់ផ្តើមចេះគំរាមមិនទៅរៀន គំរាមចេញពីផ្ទះ និងដល់ថ្នាក់គំរាមសម្លាប់ខ្លួនទៀត។

លោកនាយក ណែនាំថា មុននឹងអ្វីៗហួសពេល អាណាព្យាបាលគ្រប់រូប ត្រូវយកចិត្តទុកដាក់ខ្លាំងបំផុតលើអប់រំ ពិសេស
ត្រូវតាមដានការសិក្សាកូន ដោយសហការជិតស្និតជាមួយសាលារៀន ក្នុងន័យដើម្បីដឹងថា គាត់ពិតជាបានទៅរៀនដែរទេ ឬល្អបំផុត អាចប្រើមធ្យោបាយឡានសាលាជូនកូន ឬអ្នកដែលទុកចិត្ត ដើម្បីការពារករណីនេះកើតមានឡើង។ លើសពីនេះ លោកថា ការសហការជាមួយសាលាដើម្បីតាមដានការសិក្សាកូន ជាវិធីសាស្ត្រល្អបំផុត ដើម្បីអាចដឹង និងដោះស្រាយបានទាន់ពេលវេលា បើចាប់ផ្តើមមានអកប្បកិរិយាមិនល្អ ឈ្លើយ កោងកាច ឬប្រើហិង្សាជាដើម ព្រោះថា បើមិនយកចិត្តទុកដាក់ពីចំណុចតិចតួចនេះទៅទេ កូននឹងត្រូវអស់អនាគត ត្រូវពិបាកទាំងគ្រួសារ និងសង្គម៕

The post អ្នកជំនាញថា បើមិនយកចិត្តទុកដាក់លើចំណុចតូចតាច នៃការអប់រំកូនទេ នោះនឹងក្លាយជាចំណាប់ខ្មាំងរបស់កូនមិនខាន appeared first on Kampuchea Thmey Daily.

សាស្ត្រាចារ្យ ហោ ប៊ុនឡេង៖ កុំបង្រៀនកូនឱ្យគ្រាន់តែចេះសុំ ត្រូវបង្រៀនកូនឱ្យស្គាល់ពីតម្រូវការ

Chan Sotheavy — Thu, 12 Jan 2023 08:58:48 +0000

ឯកឧត្តមសាស្ត្រាចារ្យមហាបរិញ្ញា ហោ ប៊ុនឡេង ទីប្រឹក្សាបច្ចេកទេសសាលារៀនគ្រូយើង ណែនាំមាតាបិតា ឬអាណា ព្យាបាលទាំងអស់ ឱ្យយកចិត្តទុកដាក់ចំពោះការអប់រំកូនៗ ដោយកុំបង្រៀនកូនឱ្យគ្រាន់តែចេះសុំ តែត្រូវបង្រៀនកូន ឱ្យស្គាល់ពីតម្រូវការ។ លោកសាស្រ្តាចារ្យមហាបរិញ្ញា លើកឡើងបែបនេះ នៅក្នុងកម្មវិធី “៣០នាទី ជាមួយគ្រូយើង” ។

បើតាមលោកសាស្ត្រាចារ្យ ការអប់រំកូនឱ្យក្លាយជាធនធានមនុស្សដ៏សំខាន់ គឺមានការរួមចំណែកខ្លាំង ពីអាណាព្យាបាលផ្ទាល់ ដោយបង្រៀនកូនឱ្យយល់ និងស្គាល់ពីអ្វីគួរ ឬមិនគួរ ពិសេសភាពចាំបាច់នៃតម្រូវការនីមួយៗ របស់ពួកគេ។

ទោះយ៉ាងណាក៏ដោយ លោកសាស្ត្រាចារ្យណែនាំថា មុននឹងបំពេញតាមតម្រូវការកូន មាតាបិតា ត្រូវសួរកូនពីមូលហេតុនៃការចង់បានរបស់ ពួកគេសិន ថាចង់បានអ្វី? ដើម្បីអ្វី? ដើម្បីបង្រៀនពួកគេឱ្យយល់ថា មុននឹងទាមទារអ្វីមួយ គឺមិនមែនគ្រាន់តែជាការចង់បានប៉ុណ្ណោះទេ តែការទាមទារនោះ គឺត្រូវតែផ្តល់ជាប្រយោជន៍ ហើយសមស្របនឹងលក្ខខណ្ឌអភិវឌ្ឍពួកគេ។ លោកពន្យល់ថា បើសិនជាកូនៗទាមទារកុំព្យូរទ័រមួយគ្រឿង អាណាព្យាបាលត្រូវរកហេតុផលនៃការចង់បាននោះ ថាតើអ្វីដែលគាត់កំពុងត្រូវការ គឺយកដើម្បីតម្រូវការនៃការសិក្សារបស់គាត់ ឬគ្រាន់តែជាការលេងកម្សាន្ត។

ការអប់រំកូនឱ្យស្គាល់ពីភាពចាំបាច់នៃតម្រូវការ គឺជារឿងសំខាន់ ហេតុនេះហើយ សាស្ត្រាចារ្យរូបនេះ ប្រាប់មាតាបិតា និងអាណាព្យាបាលគ្រប់រូប កុំចេះតែផ្តល់អ្វីតាមការចង់បានរបស់កូន ដោយមិនខ្វល់ពីចំណុចលទ្ធផល ព្រោះទង្វើនេះ អាចដឹកនាំកូន ឱ្យក្លាយជាមនុស្សដែលមានទម្លាប់សុំ៕

The post សាស្ត្រាចារ្យ ហោ ប៊ុនឡេង៖ កុំបង្រៀនកូនឱ្យគ្រាន់តែចេះសុំ ត្រូវបង្រៀនកូនឱ្យស្គាល់ពីតម្រូវការ appeared first on Kampuchea Thmey Daily.

ការអប់រំកូន Archives - Kampuchea Thmey Daily

នាយករដ្ឋមន្ត្រីបញ្ជាឱ្យបង្ក្រាបក្មេង​ទំនើងឱ្យអស់

បណ្ឌិត លី ឆេង​ ៖ ​គ្មាន​ក្តី​សប្បាយ​ណា​ ​សប្បាយ​ដូច​ជោគជ័យ​​បាន​មក​ពី​សមត្ថភាព​របស់​ខ្លួន​ឯង​​

៥ យ៉ាង អតីតសាស្ត្រាចារ្យមួយរូប ចង់ឲ្យអាណាព្យាបាលនិស្សិតយល់ដឹង

ជាកំហុសធ្ងន់! បើនៅតែយល់ថា ឪពុកម្តាយប្រកប​ការងារ​អ្វី កូនត្រូវតែធ្វើការងារនោះដែរ

អ្នកជំនាញថា បើមិនយកចិត្តទុកដាក់លើចំណុចតូចតាច នៃការអប់រំកូនទេ នោះនឹងក្លាយជាចំណាប់ខ្មាំងរបស់កូន​មិនខាន

សាស្ត្រាចារ្យ ហោ ប៊ុន​ឡេង៖ កុំបង្រៀនកូនឱ្យគ្រាន់​តែ​ចេះ​សុំ ត្រូវបង្រៀនកូន​ឱ្យស្គាល់ពីតម្រូវ​ការ

នាយករដ្ឋមន្ត្រីបញ្ជាឱ្យបង្ក្រាបក្មេងទំនើងឱ្យអស់

បណ្ឌិត លី ឆេង ៖ គ្មានក្តីសប្បាយណា សប្បាយដូចជោគជ័យបានមកពីសមត្ថភាពរបស់ខ្លួនឯង

ជាកំហុសធ្ងន់! បើនៅតែយល់ថា ឪពុកម្តាយប្រកបការងារអ្វី កូនត្រូវតែធ្វើការងារនោះដែរ

អ្នកជំនាញថា បើមិនយកចិត្តទុកដាក់លើចំណុចតូចតាច នៃការអប់រំកូនទេ នោះនឹងក្លាយជាចំណាប់ខ្មាំងរបស់កូនមិនខាន

សាស្ត្រាចារ្យ ហោ ប៊ុនឡេង៖ កុំបង្រៀនកូនឱ្យគ្រាន់តែចេះសុំ ត្រូវបង្រៀនកូនឱ្យស្គាល់ពីតម្រូវការ