ការអប់រំ Archives - Kampuchea Thmey Daily

ថ្នាក់កុំព្យូទ័រនៅតាមបឋមសិក្សាក្នុងទីជនបទជំរុញការអប់រំឌីជីថល បង្កើនគុណភាពនៃការអប់រំ

hun sirivadh — Mon, 08 Dec 2025 01:30:00 +0000

អង្គការ អេដ អេ អាក់ស្យុង បានបន្តផ្ដល់ជំនួយជាកុំព្យូទ័រសម្រាប់សាលាបឋមសិក្សានៅតាមទីជនបទដើម្បីជំរុញការសិក្សាផ្នែកឌីជីថល បន្ទាប់ពីបានជំរុញការបង្កើតថ្នាក់កុំព្យូទ័របែបនេះនៅតាមសាលាបឋមសិក្សាជាង១៥០សាលារួចហើយ។

នៅថ្ងៃទី៧ ខែធ្នូ ឆ្នាំ២០២៥ អង្គការនេះបានបន្តផ្ដល់កុំព្យូទ័រដល់សាលាចំនួន២ទៀត គឺសាលាបឋមសិក្សាភូមិកណ្ដាល និងសាលាបឋមសិក្សាវាលកន្សែង នៅក្នុងស្រុកឆ្លង ខេត្តក្រចេះ បន្ទាប់ពីបានចុះវាយតម្លៃដោយផ្ទាល់រួច។ សាលានីមួយៗត្រូវបានផ្ដល់កុំព្យូទ័រចំនួន១០គ្រឿងសម្រាប់ការរៀបចំថ្នាក់កុំព្យូទ័រក្នុងសាលា។

នាយកសាលាភូមិកណ្ដាល លោក អន សិទ្ធី បានថ្លែងអំណរគុណចំពោះការផ្ដល់ជូននេះដោយតាមរយៈជំនួយនេះសាលានឹងមានលទ្ធភាពបណ្ដុះបណ្ដាលគ្រូ និងបង្កើតថ្នាក់កុំព្យូទ័រសម្រាប់សិស្សនៅសាលាបឋមលោកតែម្ដង។

លោកថា៖ «បើយើងមានកុំព្យូទ័រហើយយើងនឹងបង្កើតជាកម្មវិធីទៀត អាចថាក្នុងមួយសប្ដាហ៍អាចមាន១ម៉ោង ឬ២ម៉ោង ដើម្បីឱ្យសិស្សបានចូលសិក្សាថ្នាក់កុំព្យូទ័រនេះ។ បន្ទប់នេះរៀបទុកយូរហើយរង់ចាំសំណាងមកដល់ឥឡូវបានមកដល់មែន។ ខ្ញុំត្រេកអរណាស់!»។

ទោះជាយ៉ាងណាដើម្បីធានាដល់ការបង្រៀនថ្នាក់កុំព្យូទ័រសម្រាប់កុមារនៅជនបទនេះក្នុងមួយថ្នាក់តម្រូវយ៉ាងហោច៣០កុំព្យូទ័រ ដោយប្រធានអង្គការ អេដ អេ អាក់ស្យុង ប្រចាំកម្ពុជាលោក វន សំភាស់ បានជំរុញដល់សាលាគួរបង្កើតមូលនិធិសាលា និងសហគមន៍មួយដើម្បីរ៉ៃអង្គាសថវិកាបន្ថែមទិញបន្ថែមដោយមានជំនួយពីអង្គការ ដោយសហគមន៍៥០% និងអង្គការជួយ៥០%។

លោកបានឱ្យអ្នកសារព័ត៌មានដឹងថា៖ «យើងកំពុងនាំកូនគាត់ទៅក្នុងប្រព័ន្ធឌីជីថលដែលកូនគាត់អាចប្រើប្រាស់បច្ចេកវិទ្យាជាផ្លូវវិជ្ជមានជាស្ពានឱ្យមានចំណេះជំនាញមានការងារធ្វើ។ គាត់(ឪពុកម្ដាយ) គាត់មានការទទួលខុសត្រូវមួយដែលគាត់មានចំណែកហើយគាត់ជាម្ចាស់នៃការអភិវឌ្ឍនេះ យើងគ្រាន់តែមានចំណែកដើម្បីជួយពួកគាត់។ អ៊ីចឹងយើងចង់ឃើញថា១០គ្រឿងនេះនឹងក្លាយជា៣០គ្រឿងដោយក្នុងនោះគឺបានពីលោកគ្រូអ្នកគ្រូជួយមួយចំណែក សហគមន៍ឪពុកម្ដាយសហគមន៍ជួយមួយចំណែកអ៊ីចឹងកុំព្យូទ័រយើងនឹងមានអ្វីដែលជារបស់សហគមន៍»។

តាមការបង្ហោះលើគេហទំព័រ អេដ អេ អាក់ស្យុង បានលើកឡើងពីភាពចាំបាច់នៃការអប់រំតាមប្រព័ន្ធឌីជីថលក្នុងពេលដែលពិភពមានទំនាក់ទំនងកាន់តែខ្លាំងដូចពេលបច្ចុប្បន្ន។ អង្គការនេះបានចុះហត្ថលេខាភាពជាដៃគូជាមួយក្រសួងអប់រំកាលពីខែមេសា ឆ្នាំ២០២៥ ដើម្បីជំរុញបង្កើនគុណភាពអប់រំបឋមសិក្សាការរៀនឌីជីថលនៅកម្ពុជា ដោយបង្កើតថ្នាក់បណ្ដុះបណ្ដាលកុំព្យូទ័រនៅតាមសាលាបឋមសិក្សាតែម្ដង ដោយមិនត្រឹមតែផ្ដល់នូវសម្ភារៈទ្រទ្រង់ការសិក្សាប៉ុណ្ណោះទេ អង្គការនេះនឹងបណ្ដុះបណ្ដាលលោកគ្រូអ្នកគ្រូពីចំណេះដឹងកុំព្យូទ័រ និងផ្ដល់ការគាំទ្របច្ចេកទេសផងដែរ។

បើតាមលោក វន សំភាស មកដល់បច្ចុប្បន្នអង្គការលោកបានបំពាក់កុំព្យូទ័រដល់សាលាជាង១៥០សាលាក្នុងចំនួនជាង២ពាន់គ្រឿងរួចហើយ និងបច្ចុប្បន្នកំពុងបន្ថែម១ពាន់គ្រឿងបន្ថែមទៀតទៅក្នុងសាលាបឋមតាមជនបទនៅកម្ពុជា។ លោកចង់ឃើញនាថ្ងៃអនាគតសិស្សនៅតាមសាលានៅតាមទីជនបទនឹងមានគុណភាព ហើយតាមទីជនបទមានមូលធនមនុស្សដែលមានគុណភាព និងសហគមន៍មានមោទនភាពចំពោះការរួមចំណែករបស់ខ្លួនដល់ការអប់រំ និងអនាគតរបស់ក្មេងៗ៕

អត្ថបទដោយ ហ៊ុន សិរីវឌ្ឍន៍

The post ថ្នាក់កុំព្យូទ័រនៅតាមបឋមសិក្សាក្នុងទីជនបទជំរុញការអប់រំឌីជីថល បង្កើនគុណភាពនៃការអប់រំ appeared first on Kampuchea Thmey Daily.

មន្ត្រីជាន់ខ្ពស់កិច្ចការព្រំដែនជំរុញឪពុកម្ដាយជួយកូនៗឱ្យស្រលាញ់ការសិក្សាតម្រង់ទិសឱ្យក្លាយជាធនធានមានតម្លៃចំពោះជាតិ

hun sirivadh — Sun, 30 Nov 2025 04:49:29 +0000

រដ្ឋលេខាធិការកិច្ចការព្រំដែនលោក សៀន សុវណ្ណា បានជំរុញដល់មាតាបិតា អាណាព្យាបាលសិស្សទាំងអស់ ជួយអប់រំកូន ក្មួយ នៅផ្ទះរៀងខ្លួនដើម្បីឱ្យពួកគាត់ស្រលាញ់ការសិក្សា មានសីលធម៌ និងយកចិត្តទុកដាក់លើការរៀនសូត្រ។ លោកថាការអភិវឌ្ឍជាតិគឺចាំបាច់ត្រូវការធនធានដែលមានគុណភាពអប់រំល្អ។

ថ្លែងក្នុងពិធីប្រគល់វិញ្ញាបនបត្របណ្តោះអាសន្នមធ្យមសិក្សាបឋមភូមិ មធ្យមសិក្សាទុតិយភូមិ និងផ្ដល់រង្វាន់លើកទឹកចិត្តជូនសិស្សានុសិស្សជ័យលាភីនៃសាលាអន្តរជាតិភ្យូឆឺរប្រាយ ឆ្នាំសិក្សា២០២៤-២០២៥ នៅថ្ងៃទី២៩ ខែវិច្ឆិកា ឆ្នាំ២០២៥ លោក សៀន សុវណ្ណា បានរដ្ឋាភិបាលបានយកចិត្តទុកដាក់ខ្ពស់លើគុណភាពនៃការអប់រំដើម្បីអភិវឌ្ឍធនធានមនុស្ស សំដៅឱ្យយុវជនកម្ពុជា ក្លាយជាទំពាំងស្នងឬស្សីសម្រាប់ចូលរួមអភិវឌ្ឍប្រទេស ទាំងពេលបច្ចុប្បន្ន និងអនាគត។

លោកបន្ថែមថាការពង្រឹងគុណភាពនៅតាមសាលាគឺជារឿងមួយ តែការអប់រំកូន ក្មួយនៅផ្ទះគឺជាសំខាន់មួយទៀតដែលត្រូវការការចូលរួមពីអាណាព្យាបាលគ្រប់រូបដើម្បីតម្រង់ទិសពួកគេឱ្យយកចិត្តទុកដាក់លើការសិក្សា។

លោកថា៖ «សូមមាតាបិតា ឬអ្នកអាណាព្យាបាលសិស្សទាំងអស់ ត្រូវអប់រំកូនៗនៅផ្ទះរៀងៗខ្លួន ដើម្បីឱ្យពួកគាត់ស្រលាញ់ការសិក្សា និងយកចិត្តទុកដាក់ខ្ពស់លើការសិក្សា»។

លោកក៏បានលើកទឹកចិត្តដល់សិស្សានុសិស្សផងដែរឱ្យខិតខំរៀនសូត្រនិងចាប់យកឱកាសការងារល្អៗដើម្បីជួយដោះស្រាយជីវភាពនៅក្នុងគ្រួសារ និងជួយលើកស្ទួយកំណើនសេដ្ឋកិច្ចជាតិ ជាពិសេសកាត់បន្ថយភាពក្រីក្រនៅកម្ពុជា។

លោកបានអបអរសាទរ ចំពោះសិស្សានុសិស្សជ័យលាភីទាំងអស់ ដែលបានខិតខំរៀនសូត្ររហូតទទួលបានជោគជ័យ ដែលទទួលសញ្ញាបត្របណ្តោះអាសន្ននាពេលនេះ និងសូមកោតសរសើរចំពោះគណៈគ្រប់គ្រង បុគ្គលិក និងលោកគ្រូ អ្នកគ្រូ នៃសាលា អន្តរជាតិភ្យូឆឺរប្រាយទាំងអស់ ដែលបានបណ្តុះបណ្តាលសិស្សានុសិស្ស ចាប់ពីថ្នាក់មត្តេយ្យសិក្សា ដល់ថ្នាក់ទី១២ ប្រកបដោយគុណភាពអប់រំខ្ពស់៕

ដោយ៖ គឿនវេត

The post មន្ត្រីជាន់ខ្ពស់កិច្ចការព្រំដែនជំរុញឪពុកម្ដាយជួយកូនៗឱ្យស្រលាញ់ការសិក្សាតម្រង់ទិសឱ្យក្លាយជាធនធានមានតម្លៃចំពោះជាតិ appeared first on Kampuchea Thmey Daily.

ប្រឡងឌីប្លូម នៅព្រឹកថ្ងៃទី១មណ្ឌលភ្នំពេញមានបេក្ខជនអវត្តមានជាង២០០នាក់

កម្ពុជាថ្មី — Mon, 14 Jul 2025 06:20:26 +0000

ការប្រឡងសញ្ញាបត្រមធ្យមសិក្សាបឋមភូមិ ឬឌីប្លូមនៅព្រឹកថ្ងៃទី១នេះ មានបេក្ខជនអវត្តមានជាង២០០នាក់ក្នុងនោះបរុបមាន១.២៥% ស្រី ០.៩២%ក្នុងចំណោមបេក្ខជនសរុបជាង១៧០០០នាក់។

លោក ហែម ស៊ីណារ៉េត ប្រធានមន្ទីរអប់រំ យុវជន និងកីឡារាជធានីភ្នំពេញ បានឱ្យដឹងនៅព្រឹកថ្ងៃទី១៤ ខែកក្តដានេះថា ប្រឡងឌីប្លូមនៅឆ្នាំនេះនៅមណ្ឌលប្រឡងរាជធានីភ្នំពេញមានបេក្ខជនសរុប១៧៦៦៥នាក់ ក្នុងនោះមានបេក្ខជនមកប្រឡងចំនួន១៧៤៤៣នាក់ ស្រី៨៨៥២នាក់អវត្តមាន២២២នាក់ស្រី៨៣នាក់ ក្នុងនោះបរុសមាន១.២៥% ស្រី ០.៩២% ។

លោកបានបន្តថា ឆ្នាំនេះមានបេក្ខជនចូលរួមប្រឡងឌីប្លូមតិចជាងឆ្នាំមុន ដែលមានបេក្ខជនដាក់ពាក្យចំនួន ១៨ ៥២៦ នាក់ ស្រី ៩៤៩៨ នាក់ចែកជា៦៨ មណ្ឌលត្រូវជា ៧៧៧ បន្ទប់។

លោកបានបន្តទៀតថា សម្រាប់ដំណើរការប្រឡងតាមមណ្ឌលសំណេរនីមួយៗទាំង៦៥មណ្ឌល សម្រាប់ព្រឹកថ្ងៃទី១៤ កក្កដា២០២៥នេះ បានប្រព្រឹត្តទៅមានលក្ខណៈល្អប្រសើរ មានភាពស្ងប់ស្ងាត់ និងអនុវត្តបានត្រឹមត្រូវតាមសេចក្តីណែនាំរបស់ក្រសួង។

ការប្រឡងសញ្ញាបត្រមធ្យមសិក្សាបឋមភូមិ ក្រសួងអប់រំ បន្តប្រគល់សិទ្ធិអំណាច និងការទទួលខុសត្រូវទាំងស្រុង ជូនគ្រឹះស្ថានមធ្យមសិក្សានីមួយៗរៀបចំការប្រឡងចាប់តាំង ពីការរៀបចំវិញ្ញាសា ដំណើរការសំណេរ កំណែ ស្រង់បូកពិន្ទុ និងប្រកាសលទ្ធផលនៅតាមគ្រឹះស្ថានមធ្យមសិក្សានីមួយៗ។ គ្រឹះស្ថានមធ្យមសិក្សានីមួយៗត្រូវប្រើប្រាស់បុគ្គលិកអប់រំ នៅក្នុងគ្រឹះស្ថានមធ្យមសិក្សារបស់ខ្លួនធ្វើជាមេប្រយោគប្រឡង។ មន្ទីរអប់រំ យុវជន និងកីឡា មានភារកិច្ចបញ្ជូនមន្ត្រីជំនាញ ដើម្បីត្រួតពិនិត្យតាមមណ្ឌលប្រឡងមួយចំនួន ក្នុងករណី ចាំបាច់ដោយប្រើប្រាស់ថវិកាកម្មវិធីរបស់អង្គភាព និងមានភារកិច្ចចេញវិញ្ញាបនបត្របណ្តោះអាសន្នមធ្យមសិក្សាបឋមភូមិ ជូនដល់បេក្ខជនទាំងអស់ដែលប្រឡងជាប់។

ចំពោះមុខវិជ្ជា ដែលត្រូវប្រឡងមានចំនួន ១០មុខវិជ្ជា ត្រូវជា១១ វិញ្ញាសា រួមមានតែងសេចក្ដី .គីមីវិទ្យា .ផែនដី និងបរិស្ថានវិទ្យា .រូបវិទ្យា .ភូមិវិទ្យា សីលធម៌-ពលរដ្ឋវិជ្ជាគណិតវិទ្យា ការសរសេរតាមអាន ជីវវិទ្យា ប្រវត្តិវិទ្យា និងភាសាបរទេស។

គួរបញ្ជាក់ថា ដំណើរការប្រឡងសញ្ញាបត្រមធ្យមសិក្សាបឋមភូមិ ឬឌីប្លូមសម្រាប់ឆ្នាំសិក្សា ២០២៤-២០២៥ មានរយៈពេល២ថ្ងៃចាប់ពីថ្ងៃទី១៤ និង១៥កក្តដា ឆ្នាំ២០២៥នេះតទៅនិងប្រកាសលទ្ធផលនៅថ្ងៃទី២១កក្តដាខាងមុខ៕

អត្ថបទ ៖ សំអឿន

The post ប្រឡងឌីប្លូម នៅព្រឹកថ្ងៃទី១មណ្ឌលភ្នំពេញមានបេក្ខជនអវត្តមានជាង២០០នាក់ appeared first on Kampuchea Thmey Daily.

សមាគមបណ្ណាល័យគំនិតប្រគេនសៀវភៅធម៌ដល់សមណសិស្សនៃពុទ្ធិកបឋមសិក្សាមួយក្នុងក្រុងភ្នំពេញ

hun sirivadh — Tue, 17 Jun 2025 05:51:49 +0000

សមាគមបណ្ណាល័យគំនិត បាននាំយកសៀវភៅសិក្សាមួយចំនួនដែលជាជំនួយរបស់សប្បុរសជននានាប្រគេនជូនដល់សមណសិស្សដែលកំពុងគង់នៅនិងសិក្សានៅពុទ្ធិកបឋមសិក្សាកម្ពុជរដ្ឋវត្តវារិន្ទព្រែកលៀប នារសៀល ថ្ងៃទី១៥ ខែមិថុនា ឆ្នាំ២០២៥។

តាមរយៈសមាគមបណ្ណាល័យគំនិត សៀវភៅសិក្សាភាសាបាលីវេយ្យាករណ៍ សៀវភៅធម៌ និងសៀវភៅចំណេះដឹងទូទៅសរុបចំនួន៤៦៥ក្បាល ត្រូវបាននាំយកទៅប្រគេនសមណសិស្សចំនួន១៦០អង្គដែលកំពុងគង់នៅនិងសិក្សាគង់នៅនិងសិក្សានៅពុទ្ធិកបឋមសិក្សាកម្ពុជរដ្ឋ ស្ថិតនៅក្នុងវត្តវារិន្ទព្រែកលៀប ក្រុងភ្នំពេញ។

ព្រះប្រធានសមាគមបណ្ណាល័យគំនិត ព្រះតេជគុណសីលរក្ខិតោ រឹម ឈាវ មានសង្ឃដីកាប្រាប់ថា កម្មវិធីនេះត្រូវបានប្រព្រឹត្តឡើងក្នុងគោលបំណងជួយទ្រទ្រង់ការសិក្សារបស់សាមណេរ និងលើកស្ទួយវិស័យពុទ្ធិកសិក្សា ពិសេសពុទ្ធិកបឋមសិក្សានៅកម្ពុជា។

ព្រះតេជគុណសីលរក្ខិតោ រឹម ឈាវ៖ “ពុទ្ធិកសិក្សាគឺជាឆ្អឹងខ្នងរបស់ពុទ្ធសាសនាខ្មែរ ហើយវត្តអារាមគឺជាឃ្លាំងមរតក ប្រពៃណី វប្បធម៌ខ្មែរ”។

ព្រះតេជគុណ រឹម ឈាវ បានមានសង្ឃដីកាបន្ថែមថា សកម្មភាពនេះក៏បានជួយថែរក្សា ការពារ និងលើកកម្ពស់ប្រពៃណីវប្បធម៌ពុទ្ធសាសនាខ្មែរ ព្រមទាំងផ្សព្វផ្សាយដល់ពុទ្ធបរិស័ទនានាឈ្វេងយល់ពីតួនាទីវត្តអារាមនិងព្រះសង្ឃក្នុងសង្គមខ្មែរ។

របាយការណ៍អំពីលទ្ធផលការងារពុទ្ធិកសិក្សា ឆ្នាំសិក្សា២០២៣-២០២៤ និងទិសដៅការងារបន្ត ឆ្នាំសិក្សា២០២៤-២០២៥ ចេញផ្សាយដោយអគ្គាធិការដ្ឋានពុទ្ធិកសិក្សាជាតិ បានបង្ហាញថា សាលាពុទ្ធិកបឋមសិក្សាតាមបណ្ដារាជធានីខេត្តសរុបចំនួន៩៥០ ដោយមានសមណសិស្សនិងសិស្សសរុបចំនួន២៥០៤៥អង្គនាក់ ក្នុងនោះ ថ្នាក់ទី១ មានចំនួន១៤៨៦៣អង្គនាក់ ថ្នាក់ទី២ មានចំនួន៥៩១២អង្គនាក់ និងថ្នាក់ទី៣ មានចំនួន៤២៧០អង្គនាក់៕

The post សមាគមបណ្ណាល័យគំនិតប្រគេនសៀវភៅធម៌ដល់សមណសិស្សនៃពុទ្ធិកបឋមសិក្សាមួយក្នុងក្រុងភ្នំពេញ appeared first on Kampuchea Thmey Daily.

ទិវាជាតិអប់រំបណ្ដុះបណ្ដាលបច្ចេកទេស និងវិជ្ជាជីវៈលើកទី៨ ឆ្នាំ២០២៥ នឹងប្រារព្ធទូទាំងប្រទេសនៅថ្ងៃស្អែកនេះ

Kang Tola — Sat, 14 Jun 2025 14:27:32 +0000

ទិវាជាតិអប់រំបណ្ដុះបណ្ដាលបច្ចេកទេស និងវិជ្ជាជីវៈលើកទី៨ ឆ្នាំ២០២៥ នឹងប្រារព្ធទូទាំងប្រទេសនៅថ្ងៃស្អែកនេះ ដែលមានរយៈពេលពីរថ្ងៃនៅថ្ងៃទី ១៥ និង១៦ ខែមិថុនាឆ្នាំ២០២៥ ក្រោមប្រធានបទ «TVET បង្កើតឱកាសការងារ សាងក្តីសង្ឃឹមដល់យុវជន» ខណៈដែលរាជធានីភ្នំពេញ ប្រារព្ធនៅមជ្ឈមណ្ឌលសន្និបាត និងពិព័រណ៍កោះពេជ្រ ចាប់ពីម៉ោង ០៨:០០នាទី ដល់ម៉ោង ២០:០០នាទីយប់។

រាជរដ្ឋាភិបាលកម្ពុជាបានកំណត់យកថ្ងៃទី១៥ ខែមិថុនាជារៀងរាល់ឆ្នាំសម្រាប់ប្រារព្ធទិវាជាតិអប់រំបណ្តុះបណ្តាល បច្ចេកទេស និងវិជ្ជាជីវៈ ក្នុងគោលបំណងដើម្បីលើកកម្ពស់ការអប់រំបណ្តុះបណ្តាលបច្ចេកទេស និងវិជ្ជាជីវៈ និងធ្វើការផ្សព្វផ្សាយទៅដល់សិស្សានុសិស្ស និស្សិត យុវជន មាតាបិតា អាណាព្យាបាល និងវិស័យឯកជនឱ្យបានយល់អំពីសារៈសំខាន់នៃ«ការអប់រំបណ្តុះបណ្តាលបច្ចេកទេស និងវិជ្ជាជីវៈ (Technical Vocational Education and Training) ហៅថា ធីវេត (TVET)» ក្នុងការជំរុញការបណ្តុះបណ្តាលកម្លាំងពលកម្មជំនាញ ប្រកបដោយគុណភាព និងប្រសិទ្ធភាពឱ្យឆ្លើយតបទៅនឹងតម្រូវការទីផ្សារការងារទាំងក្នុង និងក្រៅប្រទេស។ នេះបើយោងតាមសារាចរណែនាំរបស់រាជរដ្ឋាភិបាលចុះថ្ងៃទី ២៣ ខែឧសភា ឆ្នាំ២០២៥។

សារាចរណែនាំរបស់រាជរដ្ឋាភិបាលបានឱ្យដឹងថា ទិវាជាតិនេះស្របតាមយុទ្ធសាស្ត្របញ្ចកោណ ដំណាក់កាលទី១ ដែលបានកំណត់យកអាទិភាពគន្លឹះទី១ គឺមនុស្ស ដោយបានផ្តោតសំខាន់ លើការកសាង និងអភិវឌ្ឍមូលធនមនុស្សប្រកបដោយគុណភាព សមត្ថភាព ជំនាញវិជ្ជាជីវៈច្បាស់លាស់ គំនិតច្នៃប្រឌិត និងភាពប្រកួតប្រជែងខ្ពស់ ដើម្បីសម្រេចឱ្យបាននូវគោលដៅ «ពលរដ្ឋម្នាក់មានជំនាញមួយយ៉ាងតិចប្រចាំជីវិត»។

កម្មវិធីនេះនឹងប្រារព្ធ ក្រោមអធិបតីភាពរបស់ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួង អប់រំ យុវជន និងកីឡា តំណាងដ៏ខ្ពង់ខ្ពស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា៕

The post ទិវាជាតិអប់រំបណ្ដុះបណ្ដាលបច្ចេកទេស និងវិជ្ជាជីវៈលើកទី៨ ឆ្នាំ២០២៥ នឹងប្រារព្ធទូទាំងប្រទេសនៅថ្ងៃស្អែកនេះ appeared first on Kampuchea Thmey Daily.

សាកលវិទ្យាល័យ ប៊ែលធី អន្តរជាតិ រៀបចំពិព័រណ៍អប់រំនៃសន្និសីទកិច្ចសហប្រតិបត្តិការអន្តរជាតិ ប៊ែលធី លើកទី៨ (ប៊ី អាយ ស៊ី ស៊ី) និងវេទិកាស្រាវជ្រាវ លើកទី២ ឆ្នាំ២០២៥ ជាមួយសាកលវិទ្យាល័យដៃគូចំនួន ៣០ មកពី ១៤ប្រទេសជុំវិញពិភពលោក

Kang Tola — Sat, 07 Jun 2025 03:14:00 +0000

នាថ្ងៃទី៦-៧ ខែមិថុនា ឆ្នាំ២០២៥ សាកលវិទ្យាល័យ ប៊ែលធី អន្តរជាតិ បានរៀបចំពិព័រណ៍អប់រំនៃសន្និសីទកិច្ចសហប្រតិបត្តិការអន្តរជាតិ ប៊ែលធី លើកទី៨ ឆ្នាំ២០២៥-The 8th BICC – Education Fairs 2025 ស្តីពី “ឱកាសអាហារូបករណ៍ និងការរៀបចំជីវិតសិក្សានៅក្រៅប្រទេស-The Scholarship Opportunities and Preparation for Overseas Study Life” និងវេទិកាស្រាវជ្រាវ លើកទី២ ឆ្នាំ២០២៥-The 2nd BICC - Research Forum 2025 ស្តីពី“តួនាទីរបស់គ្រឹះស្ថានឧត្តមសិក្សាក្នុងការលើកកម្ពស់ការសិក្សាពេញមួយជីវិត-Roles of Higher Education Institutions in Promoting Lifelong Learning” ក្រោមអធិបតីភាព ឯកឧត្តមបណ្ឌិត លី ឆេង តំណាងរាស្ដ្រមណ្ឌលរាជធានីភ្នំពេញ ស្ថាបនិក-អគ្គនាយកប៊ែលធីគ្រុប និងជាប្រធានក្រុមប្រឹក្សាភិបាលសាកលវិទ្យាល័យ ប៊ែលធី អន្តរជាតិ និងដោយមានការអញ្ជើញចូលរួមពី ឯកឧត្តម លោកជំទាវ តំណាងក្រសួង-ស្ថាប័ន ព្រមទាំងមានការធ្វើបទបង្ហាញពីសាកលវិទ្យាល័យដៃគូចំនួន៣0 មកពី ១៤ប្រទេសជុំវិញពិភពលោក (កម្ពុជា អូស្ត្រាលី កាណាដា ចិន ជប៉ុន កូរ៉េខាងត្បូង ឡាវ ម៉ាឡេស៊ី ប៉ូឡូញ សិង្ហបុរី ស្វីស ថៃ អង់គ្លេស និងសហរដ្ឋអាម៉េរិក) ជូនសិស្ស-និស្សិតប៊ែលធី និងអ្នកអាណាព្យាបាល សរុបជាង ៥,០០០នាក់។

លោក លី ណាវុឌ្ឍ សាកលវិទ្យាធិការ សាកលវិទ្យាល័យ ប៊ែលធី អន្តរជាតិ បានមានប្រសាសន៍ថា BICC គឺជាសន្និសីទ អន្តរជាតិ ដែលរៀបចំដោយសាកលវិទ្យាល័យ ប៊ែលធី អន្តរជាតិ ក្នុងគោលបំណងពង្រឹងកិច្ចសហប្រតិបត្តិការជាមួយសាកលវិទ្យាល័យដៃគូនៅឯក្រៅប្រទេសដែលបានចុះអនុស្សារណៈយោគយល់គ្នា (MoU) ដើម្បីរួមចំណែកលើកកម្ពស់គុណភាពវិស័យអប់រំនៅកម្ពុជាឱ្យមានការទទួលស្គាល់ជាអន្តរជាតិ ដែលផ្តោតលើ ៧ចំណុចសំខាន់ៗ៖

១-ផ្សព្វផ្សាយអំពីវប្បធម៌ ការរីកចម្រើនលើវិស័យអប់រំ និងសេដ្ឋកិច្ច ក៏ដូចជាវិស័យផ្សេងៗរបស់កម្ពុជាទៅកាន់ពិភពលោក

២-បង្កើន និងពង្រឹងកិច្ចសហប្រតិបត្តិការភាពជាដៃគូជាមួយគ្រឹះស្ថានអប់រំឯកជន និងសាធារណៈទាំងក្នុងប្រទេស និងក្រៅប្រទេស

៣-ផ្សព្វផ្សាយពីគ្រឹះស្ថានដៃគូល្បីៗនៅតាមប្រទេសនានាជូនដល់សិស្ស-និស្សិតកម្ពុជា ជាពិសេសសិស្ស-និស្សិតប៊ែលធី

៤-បង្កើតនូវវេទិកាទំនាក់ទំនងសម្រាប់គ្រឹះស្ថានទាំងអស់ដែលបានចូលរួម

៥-ជំរុញ និងបង្កើនចំនួនសិស្ស-និស្សិតកម្ពុជាទៅសិក្សានៅក្រៅប្រទេសឱ្យបានកាន់តែច្រើន

៦-ផ្សព្វផ្សាយពីឱកាសទទួលបានអាហារូបករណ៍ជូនដល់សិស្ស-និស្សិតប៊ែលធី ក៏ដូចជាសិស្ស-និស្សិតទូទាំងប្រទេសទៅបន្តការសិក្សានៅបរទេស

៧-ចូលរួមចំណែកអភិវឌ្ឍមូលធនមនុស្សនៅកម្ពុជាជាមួយរាជរដ្ឋាភិបាល ដែលមានក្រសួងអប់រំ យុវជន និងកីឡាជាសេនាធិការ។

លោកសាកលវិទ្យាធិការ បានបន្ថែមថា ដើម្បីចូលរួមលើកកម្ពស់គុណភាពនៃការសិក្សាស្រាវជ្រាវ ឱ្យកាន់តែមានប្រសិទ្ធភាព និងស្តង់ដារដែលមានការទទួលស្គាល់ជាអន្តរជាតិ សាកលវិទ្យាល័យក៏បានរៀបចំ “វេទិកាស្រាវជ្រាវ លើកទី”២” ដោយមានការអញ្ជើញចូលរួមធ្វើបទបង្ហាញ និងកិច្ចពិភាក្សាចែករំលែកបទពិសោធន៍ និងស្នាដៃសិក្សាស្រាវជ្រាវពីវាគ្មិនជាតិ-អន្តរជាតិជាច្រើនរូបផងដែរ។

នៅក្នុងពិធីបិទសន្និសីទនេះ ក៏មានការចែករំលែកបទពិសោធន៍អំពីជីវិតសិក្សានៅក្រៅប្រទេសរបស់អតីតសិស្សនិទ្ទេស-A ជានិស្សិតអាហារូបករណ៍ឧកញ៉ា លី ឆេង គឺកញ្ញា ទេព មល្លិកា ដែលបានបញ្ចប់ការសិក្សាពីសាកលវិទ្យាល័យបាងកក នៃព្រះរាជាណាចក្រថៃ លើជំនាញយុទ្ធសាស្ត្រទំនាក់ទំនង និងផ្នត់គំនិត ផងដែរ។

ក្នុងឱកាសនោះ លោកបណ្ឌិត លី ឆេង បានជម្រាបជូនអង្គសន្និសីទអំពី សន្តិភាព ស្ថិរភាពនយោបាយ និងការរីកចម្រើនលើគ្រប់វិស័យរបស់កម្ពុជា រួមទាំងវិស័យអប់រំ និងសេដ្ឋកិច្ច ជាពិសេសភាពលេចធ្លោនៃកិត្តិនាមនៅលើឆាកអន្តរជាតិរបស់កម្ពុជា ក្រោមការដឹកនាំដ៏ត្រឹមត្រូវរបស់រាជរដ្ឋាភិបាល នីតិកាលទី៧ ដែលមាន សម្តេចមហាបវរធិបតី ហ៊ុន ម៉ាណែត ជានាយករដ្ឋមន្ត្រី និងថ្នាក់ដឹកនាំជាច្រើនរូបទៀតដែលមានចំណេះដឹងខ្ពង់ខ្ពស់ ប្រកបដោយសីលធម៌ និងគុណធម៌ខ្ពស់ ដែលនឹងបន្តដឹកនាំប្រទេសជាតិឆ្ពោះទៅសម្រេចទស្សនវិស័យអភិវឌ្ឍន៍កម្ពុជា ជាប្រទេសមានចំណូលមធ្យមកម្រិតខ្ពស់ត្រឹមឆ្នាំ២០៣០ និងមានចំណូលខ្ពស់នៅឆ្នាំ២០៥០។ លោកបណ្ឌិត ក៏បានថ្លែងអំណរគុណគ្រឹះស្ថានសិក្សាទាំង៣០ ដែលបានចំណាយពេលវេលាដ៏មានតម្លៃអញ្ជើញចូលរួមសន្និសីទដ៏មានសារៈសំខាន់នេះ និងបានធ្វើបទបង្ហាញចែករំលែកព័ត៌មានសិក្សារបស់សាកលវិទ្យាល័យខ្លួនជូនដល់សិស្ស-និស្សិតកម្ពុជា។ ឯកឧត្តមបណ្ឌិត បានបន្ថែមថា សន្និសីទ BICC នឹងរួមចំណែកយ៉ាងធំធេងក្នុងការបង្កើនមូលធនមនុស្សប្រកបដោយសមត្ថភាពនៅកម្ពុជាក្នុងសម័យឌីជីថល ស្របតាមយុទ្ធសាស្ត្របញ្ចកោណរបស់រាជរដ្ឋាភិបាល ដែលបានកំណត់វិស័យអាទិភាពគន្លឹះ៥ គឺ មនុស្ស ផ្លូវ ទឹក ភ្លើង និង បច្ចេកវិទ្យា។

ជាទីបញ្ចប់ លោកបណ្ឌិត ក៏បានលើកទឹកចិត្តដល់សាកលវិទ្យាល័យដៃគូទាំងអស់ បន្តចូលរួមសន្និសីទ BICC លើកទី៩ និងវេទិកាស្រាវជ្រាវ លើកទី៣ ឆ្នាំ២០២៦ ដើម្បីរួមគ្នាពង្រឹងគុណភាពអប់រំទាំងថ្នាក់ជាតិ-អន្តរជាតិ ជាពិសេសបន្តពង្រឹងកិច្ចសហប្រតិបត្តិការល្អជាមួយគ្នាឱ្យបានកាន់តែប្រសើរបន្ថែមទៀត៕

អត្ថបទ៖ សុខា

The post សាកលវិទ្យាល័យ ប៊ែលធី អន្តរជាតិ រៀបចំពិព័រណ៍អប់រំនៃសន្និសីទកិច្ចសហប្រតិបត្តិការអន្តរជាតិ ប៊ែលធី លើកទី៨ (ប៊ី អាយ ស៊ី ស៊ី) និងវេទិកាស្រាវជ្រាវ លើកទី២ ឆ្នាំ២០២៥ ជាមួយសាកលវិទ្យាល័យដៃគូចំនួន ៣០ មកពី ១៤ប្រទេសជុំវិញពិភពលោក appeared first on Kampuchea Thmey Daily.

សម្ដេចតេជោនិងគ្រួសារសម្រេចផ្ដល់ដី ២ហិកតានៅជ្រោយចង្វារសាងសង់អាគារអន្តេវាសិកដ្ឋានសម្រាប់និស្សិតស្រី

hun sirivadh — Wed, 04 Jun 2025 07:43:40 +0000

ប្រធានព្រឹទ្ធសភា សម្ដេចតេជោ ហ៊ុន សែន បានឱ្យដឹងថាបន្ទាប់ពីបានពិភាក្សាជាមួយភរិយា និងកូនស្រី បានសម្រេចផ្ដល់ដី២ហិកតានៅជ្រោយចង្វារប្រគល់ឱ្យក្រសួងកិច្ចការនារីដើម្បីយកទៅសាងសង់អន្តេវាសិកដ្ឋានសម្រាប់និស្សិតស្រីមកពីបណ្ដាខេត្តដើម្បីបន្តការសិក្សានៅរាជធានីភ្នំពេញ។

ដី២ហិកតាដែលយកមកសាងសង់នេះគឺជាដីរបស់ស្ថានីយទូរទស្សន៍បាយ័នដែលមានតម្លៃជាង១០លានដុល្លារ។

តាមការបង្ហោះលើបណ្ដាញសង្គមនៅរសៀលថ្ងៃទី៤ ខែមិថុនា ឆ្នាំ២០២៥នេះ សម្ដេចតេជោ បានបញ្ជាក់ថា អាគារអន្តេវាសិកដ្ឋានមានចំនួន១២០បន្ទប់ ដែលអាចទទួលនិស្សិតស្នាក់នៅបាន៥០០នាក់ ព្រមទាំងមានប៉ុស្ដិសុខភាពនៅជាន់ផ្ទាល់ដីសម្រាប់ពិនិត្យជម្ងឺ និងបន្ទប់សម្រាប់គ្រូពេទ្យប្រចាំការផងដែរ។

អ្នកនាំពាក្យព្រឹទ្ធសភាលោក ជា ធីរិទ្ធ បានឱ្យដឹងថាការបង្កើតអន្តរវាសិកដ្ឋាននេះគឺជាបន្ទុកចំណាយរបស់ក្រុមគ្រួសារសម្ដេចតេជោទាំងស្រុងមិនពាក់ព័ន្ធនឹងថវិការរបស់រដ្ឋាភិបាលទេ ហើយក្រោយពីសាងសង់រួចសម្ដេចនឹងប្រគល់ឱ្យក្រសួងកិច្ចការនារីដើម្បីគ្រប់គ្រង និងទទួលនិស្សិតស្រីដើម្បីស្នាក់នៅ។

លោកថា៖ «ការរៀបចំអន្តេវាសិកដ្ឋាននេះគឺមិនពាក់ព័ន្ធនឹងថវិការបស់រដ្ឋាភិបាលនោះទេ! គឺជាថវិការនៃក្រុមគ្រួសាររបស់លោកដែលសម្ដេចតេជោ ក្នុងឋានៈលោកជាប្រធានព្រឹទ្ធសភា និងក្នុងឋានៈជាអ្នកធ្លាប់ពលីកម្មជូនប្រទេសជាតិ។ លោកចង់បង្កើតនូវមរតកនេះបន្ថែមទៀតសម្រាប់និស្សិតស្រីក្នុងព្រះរាជាណាចក្រកម្ពុជាដើម្បីទទួលបាននូវរស់នៅល្អប្រសើរពេលគេរស់នៅសិក្សាក្នុងរាជធានីភ្នំពេញ»។

គួរឱ្យដឹងដែលថាការសម្រេចនេះគឺក្នុងពេលដែលសម្ដេចតេជោ ហ៊ុន សែន ដឹកនាំការប្រជុំក្រុមប្រឹក្សាជាតិដើម្បីស្ត្រីនៅព្រឹកថ្ងៃពុធនេះ ដោយសម្ដេចតេជោសង្ឃឹមថាអន្តេវសិកដ្ឋាននេះនឹងជួយកាត់បន្ថយការលំបាករបស់និស្សិតជាស្ត្រី និងជួយពន្លឿនដល់ការវិយោគកសាងសមត្ថភាពរបស់ស្រ្តី និងការចូលរួមរបស់ស្រ្តីក្នុងការកសាងប្រទេសជាតិ៕

អត្ថបទដោយ ហ៊ុន សិរីវឌ្ឍន៍

The post សម្ដេចតេជោនិងគ្រួសារសម្រេចផ្ដល់ដី ២ហិកតានៅជ្រោយចង្វារសាងសង់អាគារអន្តេវាសិកដ្ឋានសម្រាប់និស្សិតស្រី appeared first on Kampuchea Thmey Daily.

បណ្ឌិត លី ឆេង អរគុណយ៉ាងជ្រាលជ្រៅចំពោះ សម្តេច ហ៊ុន សែន ដែលគាំទ្រ និងផ្តល់ឱកាសយ៉ាងពេញលេញដល់វិស័យអប់រំផ្នែកឯកជន

Kang Tola — Sun, 13 Apr 2025 15:03:18 +0000

នៅចំពោមុខលោកគ្រូ-អ្នកគ្រូ និងបុគ្គលិកប្រមាណ ៣០០០នាក់ លោកបណ្ឌិត លី ឆេង តំណាងរាស្រ្តមណ្ឌលភ្នំពេញ ស្ថាបនិក និងជាអគ្គនាយក ប៊ែលធី គ្រុប បានគោរពថ្លែងអំណរគុណយ៉ាងជ្រាលជ្រៅចំពោះ សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា និងជាអតីតនាយករដ្ឋមន្ត្រី ដែលតែងតែគាំទ្រ និងផ្តល់ឱកាសយ៉ាងពេញលេញដល់វិស័យអប់រំផ្នែកឯកជន បានចូលរួមចំណែកក្នុងការបណ្តុះបណ្តាលធនធានមនុស្សជាមួយរាជរដ្ឋាភិបាល។ ជាពិសេស នៅក្នុងនីតិកាលទី៧ នេះ រាជរដ្ឋាភិបាលដឹកនាំដោយ សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី បានដាក់ចេញនូវយុទ្ធសាស្ត្របញ្ចកោណ ដោយកំណត់យក “មនុស្ស” ជាអាទិភាពទី១ ក្នុងចំណោម អាទិភាពគន្ធឹះចំនួន ៥គឺ មនុស្ស ផ្លូវ ទឹក ភ្លើង និងបច្ចេកវិទ្យា។

អបអរសាទរបុណ្យចូលឆ្នាំថ្មី និងពិសាអាហារសាមគ្គីជាមួយបុគ្គលិក ៣០០០នាក់ នៅសាកលវិទ្យាល័យ ប៊ែលធី អន្តរជាតិទី២ (ស្ពានអាកាសចោមចៅ)នារសៀលថ្ងៃទី១២ ខែមេសា ឆ្នាំ២០២៥ ប៊ែលធី គ្រុបលោកបណ្ឌិត លី ឆេង បានថ្លែងអំណរគុណ និងកោតសរសើរ គណៈគ្រប់គ្រង បុគ្គលិកសាស្រ្តាចារ្យ និងលោកគ្រូ-អ្នកគ្រូគ្រប់ផ្នែកទាំងអស់នៃប៊ែលធី គ្រុប ដែលបានខិតខំប្រឹងប្រែងយកអស់ កម្លាំងកាយ កម្លាំងចិត្ត ក្នុងការបំពេញតួនាទីភារកិច្ច និងការទទួលខុសត្រូវរបស់ខ្លួនរយៈពេលពេញ១ឆ្នាំ ទាំងផ្នែកប៊ែលធីសំណង់ ប៊ែលធីទេសចរណ៍ និងប៊ែលធីអប់រំ ដែលធ្វើឱ្យ ប៊ែលធី គ្រុប មានការរីកចម្រើនជាបន្តបន្ទាប់ ចាប់តាំងពីប៊ែលធីមានតែ ១ទីតាំង រហូតដល់បច្ចុប្បន្នមាន ៣៦ទីតាំង ក្នុងនោះ៖

១-ស្នាក់ការកណ្តាលប៊ែលធី គ្រុប (BELTEI Group Headquarters) មានកម្ពស់ ៣២ជាន់ ស្ថិតនៅតាមបណ្តោយផ្លូវព្រះនេរុហ៍ (ផ្លូវ២១៥) ខណ្ឌទួលគោក រាជធានីភ្នំពេញ។

២-សាលា ប៊ែលធី អន្តរជាតិ៖ មាន ៣២ទីតាំង (៣០សាខាកំពុងដំណើរការ និង ២សាខាកំពុងសាងសង់គឺ ប៊ែលធីទី៣១-វត្តទួល និងប៊ែលធីទី៣២-ក្រាំងធ្នង់) មានសិស្សកំពុងសិក្សា ៥៤,១២៤នាក់ មានកម្មវិធីសិក្សា ៥ធំៗគឺ៖ ១-ចំណេះទូទៅ (ថ្នាក់ទី១ – ១២), ២-ភាសាអង់គ្លេសទូទៅ – ESL Program (កម្រិត Starter, Preschool, Level 1 – 12), ៣-កម្មវិធី ភាសាចិនទូទៅ – CSL Program (កម្រិត Starter, Preschool, Level 1 – 12), ៤-កម្មវិធីអភិវឌ្ឍបញ្ញា IMA (កម្រិតទី ១-១២) និង ៥-ថ្នាក់ត្រៀមប្រឡងតេស្តអន្តរជាតិ។

៣-សាកលវិទ្យាល័យ ប៊ែលធី អន្តរជាតិ៖ មាន ៣ទីតាំង (២ទីតាំងកំពុងដំណើរការគឺ ទី១-ទួលស្លែង, ទី២-ស្ពានអាកាសចោមចៅ និង ១ទីតាំងកំពុងសាងសង់គឺ ទីតាំងទី៣-ទួលពង្រ) មាននិស្សិតកំពុងសិក្សា ៨,១០៧នាក់ មានកម្មវិធីសិក្សាជាភាសាជាតិ និងអន្តរជាតិ និងមានកម្រិតសិក្សា៥ធំៗ៖ ១-ថ្នាក់បំប៉នភាសាអង់គ្លេស-ចិន-កុំព្យូទ័រ, ២-បរិញ្ញាបត្ររង, ៣-បរិញ្ញាបត្រ, ៤-បរិញ្ញាបត្រជាន់ខ្ពស់ និង៥-ថ្នាក់បណ្ឌិត។ សាកលវិទ្យាល័យ មាន ១៣មហាវិទ្យាល័យ ៤៥ជំនាញ ក្នុងនោះ៖ ១-គ្រប់គ្រងពាណិជ្ជកម្ម, ២-ហិរញ្ញវត្ថុនិងធនាគារ, ៣-សេដ្ឋកិច្ច, ៤-ច្បាប់, ៥-អប់រំ សិល្បៈ និងមនុស្សសាស្ត្រ, ៦-ទេសចរណ៍និងបដិសណ្ឋារកិច្ច, ៧-ព័ត៌មានវិទ្យានិងវិទ្យាសាស្ត្រ, ៨-បច្ចេកវិទ្យាឌីជីថល និងទូរគមនាគមន៍, ៩-វិស្វកម្ម, ១០-ស្ថាបត្យកម្ម, ១១-ទំនាក់ទំនងអន្តរជាតិ, ១២-អាកាសចរស៊ីវិល និង ១៣-ភាសាចិន។

ហើយថ្មីៗនេះ ប៊ែលធី គ្រុប ក៏បានបង្កើត ប៊ែលធី ស្រាវជ្រាវ និងបោះពុម្ព (BELTEI University Press) ដើម្បីឆ្លើយតបទៅនឹងតម្រូវការ និងការរីកចម្រើនរបស់ប៊ែលធី ក៏ដូចជាសង្គមជាតិ និងពិភពលោក ជាពិសេសលើកកម្ពស់ការសិក្សាស្រាវជ្រាវ និងនិពន្ធ ផងដែរ។

ជាទីបញ្ចប់លោកបណ្ឌិត និងលោកជំទាវ បានជូនពរដល់បុគ្គលិកទាំងអស់ ក្នុងឱកាសពិធីបុណ្យចូលឆ្នាំថ្មី ប្រពៃណីជាតិខ្មែរ ដែលនឹងចូលមកដល់ខាងមុននេះ ព្រមទាំងបានអញ្ជើញចូលរួមរាំលេងកម្សាន្ត និងចាប់ឆ្នោតផ្សងសំណាង ជូនបុគ្គលិកទាំងអស់ផងដែរ៕

អត្ថបទ៖ ឃិត សុខា

The post បណ្ឌិត លី ឆេង អរគុណយ៉ាងជ្រាលជ្រៅចំពោះ សម្តេច ហ៊ុន សែន ដែលគាំទ្រ និងផ្តល់ឱកាសយ៉ាងពេញលេញដល់វិស័យអប់រំផ្នែកឯកជន appeared first on Kampuchea Thmey Daily.

ការអប់រំ Archives - Kampuchea Thmey Daily

ថ្នាក់​កុំព្យូទ័រ​នៅ​តាមបឋមសិក្សាក្នុង​ទី​ជនបទ​​​ជំរុញ​ការ​អប់រំ​ឌីជីថល បង្កើនគុណភាព​នៃការអប់រំ

ប្រឡងឌីប្លូម ​នៅ​ព្រឹក​ថ្ងៃ​ទី​១មណ្ឌល​ភ្នំពេញ​មាន​បេក្ខជន​អវត្តមានជាង២០០នាក់

សមាគមបណ្ណាល័យគំនិតប្រគេនសៀវភៅធម៌ដល់សមណសិស្សនៃពុទ្ធិកបឋមសិក្សាមួយក្នុងក្រុងភ្នំពេញ

សម្ដេចតេជោនិង​គ្រួសារសម្រេចផ្ដល់ដី ២ហិកតានៅជ្រោយចង្វារសាងសង់អាគារអន្តេវាសិកដ្ឋានសម្រាប់និស្សិតស្រី

ថ្នាក់កុំព្យូទ័រនៅតាមបឋមសិក្សាក្នុងទីជនបទជំរុញការអប់រំឌីជីថល បង្កើនគុណភាពនៃការអប់រំ

ប្រឡងឌីប្លូម នៅព្រឹកថ្ងៃទី១មណ្ឌលភ្នំពេញមានបេក្ខជនអវត្តមានជាង២០០នាក់

សម្ដេចតេជោនិងគ្រួសារសម្រេចផ្ដល់ដី ២ហិកតានៅជ្រោយចង្វារសាងសង់អាគារអន្តេវាសិកដ្ឋានសម្រាប់និស្សិតស្រី