ថ្លែងក្នុងពិធីសម្ពោធសៀវភៅ “ជម្នះរស់” កាលពីថ្ងៃទី ១៤ ខែមីនា ឆ្នាំ ២០២៦ ឯកឧត្តម ខៀវ កាញារីទ្ធ បានលើកពីសារៈសំខាន់នៃការអាន ដោយគូសបញ្ជាក់ថា ការអានធ្វើឱ្យយើងដឹងច្រើនណាស់ បង្កើនការគិត ច្នៃប្រឌិត និងត្រិះរិះពិចារណាបានត្រឹមត្រូវ។ ឯកឧត្តមមានប្រសាសន៍ថា៖« អានសៀវភៅធ្វើឱ្យខួរក្បាលយើងរីក ចេះគិត បន្តបន្ទាប់គ្នារហូត។ ការអានខុសអំពីការស្តាប់ និងមើលរូប។ ពេលអានយើងឈប់ពេលណាក៏បាន ឃើញពាក្យមួយឃ្លាល្អ ឬថ្មី យើងឈប់ ហើយខួរក្បាលយើងគិត ចឹងការអានពង្រីកខួរក្បាល»។

ឆ្លងកាត់បទពិសោធន៍ជាច្រើនឆ្នាំនៃការអានសៀវភៅ ដោយបច្ចុប្បន្ន ឯកឧត្តមមានអាយុ ៧៥ឆ្នាំ ទទួលស្គាល់ថា ការអានមានផលប្រយោជន៍ជាងមើល និងស្តាប់ ប៉ុន្តែមិនមែនមានន័យថា ការមើលហើយស្តាប់អត់ប្រយោជន៍ទេ គឺមានប្រយោជន៍ដូចគ្នា គ្រាន់តែការអានមិនត្រឹមបង្កើនចំណេះដឹងថែមទាំងបង្កើនរបៀបគិត។ ឯកឧត្តមបញ្ជាក់ថា៖« ចឹងការអានពង្រីកការគិត គំនិតខួរក្បាលនេះវាធ្វើឱ្យខួរក្បាលរីកចម្រើន ដុះឬសបានច្រើនជាងយើងអង្គុយគិតធម្មតា»។
ក្នុងន័យនេះ ឯកឧត្តមបានលើកទឹកចិត្តពលរដ្ឋកម្ពុជាអានសៀវភៅឱ្យបានច្រើនក្លាយជាធនធានមនុស្សសម្រាប់កសាងសង្គមជាតិ ដោយបានលើកករណីជាក់ស្តែងថា ប្រជាជនអ៊ីស្រាអែលមានចំនួនតិច ប៉ុន្តែពលរដ្ឋពោរពេញដោយសមត្ថភាព មានខួរក្បាលខ្លាំងដោយសារពួកគេទទួលបានការអប់រំ ​និងចូលចិត្តអានសៀវភៅ។

បើតាមឯកឧត្តម ៖«សម្រាប់ខ្ញុំការរៀន៥០%បានមកពីគ្រូ និង៥០%ទៀតបានមកពីការអាន។ ការអានធ្វើឱ្យយើងដឹងច្រើនណាស់។ ខ្ញុំចូលចិត្តអានសៀវភៅគ្រប់មុខ ប៉ុន្តែទម្លាប់ខ្ញុំអត់មើលសៀវភៅស្រាវជ្រាវមុនពេលចូលគេងទេ ព្រោះធ្វើឱ្យខួរក្បាលយើងរវល់»។ យ៉ាងណាមិញ ឯកឧត្តម ក៏បានកត់សម្គាល់ថា យុវជនកម្ពុជាមួយចំនួននាពេលបច្ចុប្បន្នមានគំនិតច្នៃប្រឌិតខ្ពស់ និងចេះសាមគ្គីគ្នា បើទោះបីជាយុវជនមួយចំនួនទៀតមិនសូវបានទទួលការអប់រំក្តី។

ឯកឧត្តម ក៏បានចែករំលែកគន្លឹះនៃការអានថា៖« យើងអានសៀវភៅដែលចូលចិត្ត បើយើងចូលចិត្តអានចាំបានយូរ បើមិនចូលចិត្ តចាំអត់យូរទេ បើមើលសៀវភៅស្រាវជ្រាវត្រូវមានកំណត់ហេតុ និងស្រង់ពាក្យ ត្រូវគូសទុក។ កាលខ្ញុំនៅរៀនអត់ពូកែចាំ ភ្នែក ត្រចៀកទេ គឺខ្ញុំសរសេរ និងអាន»។

ដើម្បីបន្សល់ទុកស្នាដៃដល់អ្នកជំនាន់ក្រោយ ឯកឧត្តម ខៀវ កាញារីទ្ធ អតីតរដ្ឋមន្រ្តីក្រសួងព័ត៌មាន បាននិពន្ធសៀវភៅមានចំណងជើងថា «ជម្នេះរស់» ដែលមានគោលបំណងឱ្យអ្នកជំនាន់ក្រោយបានស្គាល់ និងយល់ដឹងអំពីការប្រែប្រួលនៃសង្គមខ្មែរ ពីមួយជំនាន់ទៅមួយជំនាន់។ ឯកឧត្តមសង្កត់ធ្ងន់ថា ខ្លឹមសារនៅក្នុងសៀវភៅនេះ មិនមែនជាការវិភាគនយោបាយ ឬវិភាគសង្គមនោះទេ ប៉ុន្តែជាកំណត់ត្រាបទពិសោធន៍ផ្ទាល់ខ្លួនរបស់អ្នកនិពន្ធ ដែលចង់ចែករំលែកឱ្យប្រជាជនកម្ពុជាបានដឹង និងយល់ខ្លះៗអំពីសង្គមកម្ពុជាក្នុងអំឡុងពេលនានា៕

The post ឯកឧត្តម ខៀវ កាញារីទ្ធ លើកទឹកចិត្តប្រជាជនឱ្យអានសៀវភៅ បង្កើនការច្នៃប្រឌិត និងត្រិះរិះបានត្រឹមត្រូវ appeared first on Kampuchea Thmey Daily.

សម្តេចកិត្តិសង្គហបណ្ឌិត ម៉ែន សំអន លើកឡើងបែបនេះ ក្នុងឱកាសប្រារព្ធទិវាជាតិអំណានលើកទី១១ ក្រោមប្រធានបទ “សំណេរនិងអំណានក្នុងបរិបទថ្មី” ដែលរៀបចំដោយក្រសួងអប់រំ យុវជន និងកីឡា នៅវិទ្យាស្ថានបច្ចេកវិទ្យាកម្ពុជា (សាលាតិចណូ) នាព្រឹកថ្ងៃទី១១ ខែមីនា ឆ្នាំ២០២៦។ សម្តេចកិត្តិសង្គហបណ្ឌិត បានលើកឡើងថា ការអាន ធ្វើឱ្យមនុស្សមានសុខភាពខួរក្បាលល្អ កាត់បន្ថយភាពស្ត្រេស ចេះត្រិះរិះពិចារណាបានស៊ីជម្រៅ មានចំណេះដឹងទូលំទូលាយ បង្កើតភាពច្នៃប្រឌិត និងទទួលបានគំនិតល្អៗទាន់សម័យកាល សម្រាប់ប្រើជាប្រយោជន៍ដល់ជីវិតប្រចាំថ្ងៃ និងផ្តល់ប្រយោជន៍ដល់សង្គមជាតិ។

ដើម្បីលើកកម្ពស់ការអានឱ្យមានប្រសិទ្ធភាព សម្តេចកិត្តិសង្គហបណ្ឌិត ម៉ែន សំអន សំណូមពរដល់អ្នកនិពន្ធបង្កើនការបោះពុម្ពស្នាដៃបន្ថែមឱ្យកាន់តែសម្បូរបែប ជាពិសេស គឺការបោះពុម្ពស្នាដៃជាភាសាខ្មែរ។ ចំពោះក្រសូង ស្ថាប័នពាក់ព័ន្ធ បន្តរៀបចំឱ្យមានបណ្ណាល័យ ឬមជ្ឈមណ្ឌលរក្សាឯកសារឌីជីថល ក្នុងការសម្រួលដល់ការរកឯកសារ និងសៀវភៅសម្រាប់អាន។

សម្តេច ម៉ែន សំអន ក៏បានលើកទឹកចិត្តដល់ក្រសួងអប់រំ យុវជន និងកីឡា ត្រូវបន្តពង្រីកការអនុវត្តឧត្តមានុវត្តន៍នៃកម្មវិធីអំណានថ្នាក់ដំបូងនៅបឋមសិក្សា កម្មវិធីកុមាររៀនកុមារចេះ កម្មវិធីអក្ខរកម្មនៅតាមរោងចក្រ សហគ្រាស ពន្ធនាគារជាដើម។ បន្ថែមពីនេះ នៅតាមគ្រឹះស្ថានសិក្សា មណ្ឌលសិក្សា តាមវត្តអារាមទាំងអស់ សម្តេចបានស្នើសូមឱ្យបន្តខិតខំឱ្យអស់លទ្ធភាពក្នុងការបង្កើតបណ្ណាល័យ ឬជ្រុងអំណាន ដើម្បីឱ្យសិស្សនិស្សិត យុវជនគ្រប់រូបអាចស្វែងរកសៀវភៅ ឬឯកសារផ្សេងៗសម្រាប់អានបាន។

សម្រាប់សិស្ស និស្សិត យុវជនកម្ពុជាវិញ សម្តេច ម៉ែន សំអន អំពាវនាវឱ្យខិតខំចំណាយពេលវេលាឱ្យកាន់តែច្រើនក្នុងការអានសៀវភៅ ឬឯកសារនានា ទោះបីជាអានម្នាក់ឯង ឬអានជាក្រុមក៏ដោយ។ ចំណែកមាតា បិតា អាណាព្យាបាលវិញ សម្តេច ក៏ស្នើឱ្យសូមជួយជំរុញដល់កូនៗក្នុងការអានសៀវភៅ និងលៃលកការចំណាយក្នុងគ្រួសារសម្រាប់ទិញសម្ភារសិក្សា សៀវភៅអាន ឧបករណ៍សម្រាប់អំណានដល់កូន ដើម្បីជួយបង្កើនចំណេះដឹង និងផ្តល់អនាគតដ៏ល្អសម្រាប់ពួកគេតាមរយៈចំណេះវិជ្ជានេះ៕  

The post សម្តេច ម៉ែន សំអន ណែនាំ ៦ចំណុច ដើម្បីលើកកម្ពស់ការអានឱ្យមានប្រសិទ្ធភាព appeared first on Kampuchea Thmey Daily.

ការលើកឡើងរបស់រដ្ឋមន្ត្រីក្រសួងអប់រំ ក្នុងឱកាសក្រសួងបានរៀបចំពិធីអបអរទិវាជាតិអំណានលើកទី១១ ក្រោមប្រធានបទ៖ «សំណេរ និងអំណានក្នុងបរិបទថ្មី» ក្នុងនោះ ក៏មានការពិព័រណ៍សៀវភៅផងដែរ។ បណ្ឌិតសភាចារ្យ បានលើកឡើងថា៖ “ការអាន និងការសរសេរ គឺជាមធ្យាបាយដ៏មានប្រសិទ្ធភាពបំផុត ក្នុងការសិក្សាជំនាញ ការលើកកម្ពស់ភាសាជាតិ ការលើកកម្ពស់លទ្ធផលសិក្សា និងការយល់ដឹងពិភពលោក”។ ជាពិសេស លោកបណ្ឌិតថា ក្នុងបរិបទថ្មីនេះ ការរិះរកមធ្យាបាយសម្រាប់ការអានមានច្រើនជម្រើស​ដូចជា ការអានសៀវភៅ ការអានលើឧបករណ៍អេឡិកត្រូនិក ការអានលើទូរសព្ទវៃឆ្លាត និងការអានលើឧបករណ៍ឌីជីថល។

លោក ហង់ជួន ណារ៉ុន មានប្រសាសន៍ថា៖ “ម្យ៉ាងទៀត អំណានដោយប្រើមធ្យោបាយបច្ចេកវិទ្យា ចំណាយពេលតិច ងាយស្រួលអាន និងជួយដល់បរិស្ថានផងដែរ។ នាពេលបច្ចុប្បន្ន សិស្ស និស្សិត និងយុវជនកម្ពុជាដែលស្រឡាញ់ការអាន កំពុងតែប្រើប្រាស់មធ្យោបាយអានទាំងនេះផងដែរ”។ ត្រង់ចំណុចនេះ លោករដ្ឋមន្ត្រី បានបន្តថា ប្រទេសជឿនលឿន ទោះបីជាបច្ចេករីកចម្រើនខ្លាំងយ៉ាងណា ក៏ការអានសៀវភៅនៅតែមានសន្ទុះខ្លាំងក្លា ហេតុនេះ ទើបក្រសួងអប់រំបន្តរៀបចំទិវាជាតិអំណានឡើង។

ទិវាជាតិអំណានលើកទី១១ នេះ ក៏មានការរៀបចំពិព័រណ៍សៀវភៅ រហូតដល់រយៈពេល ៥ថ្ងៃ ចាប់ពីថ្ងៃទី១១ ដល់ថ្ងៃទី១៥ ខែមីនា ឆ្នាំ២០២៦ ដើម្បីអបអរទិវាជាតិអំណានលើកទី១១ ក្រោមប្រធានបទ៖ «សំណេរ និងអំណានក្នុងបរិបទថ្មី» ក្នុងគោលបំណងជំរុញការអាននកម្ពុជាឱ្យកាន់តែប្រសើរ។ ពិពិរណ៍សៀវភៅចាប់ផ្តើមពីម៉ោង ៨ព្រឹក ដល់ម៉ោង ៨យប់ នៅវិទ្យាស្ថានបច្ចេកវិទ្យា (សាលាតិចណូ)។

ទាក់ទងនឹងប្រធានបទ «សំណេរ និងអំណានក្នុងបរិបទថ្មី» លោក កុក រស់ ប្រធាននាយកដ្ឋានសៀវភៅ និងការអាន នៃក្រសួងវប្បធម៌ និងវិចិត្រសិល្បៈ បានប្រាប់ កម្ពុជាថ្មី ថា ការអានមិនមែនផ្តោតតែទៅលើការអានតាមសៀវភៅនោះទេ ពោល គឺអាចអានតាមឧបករណ៍អេឡិកត្រូនិកក៏បាន។ លោក កុក រស់ និយាយថា៖ “ពេលដែលយើងអានច្រើនទៅគឺចំណេះដឹងយើង សតិបញ្ញាយើងហ្នឹងក៏កាន់តែរីកចម្រើន កាន់តែអភិវឌ្ឍន៍ដែរ”។

ជាមួយគ្នានេះ លោក កុក រស់ បានអំពាវនាវដល់កូនខ្មែរគ្រប់រូប ជាពិសេស គឺអាណាព្យាបាលតែម្តង ត្រូវតែជំរុញកូនៗឱ្យអានសៀវភៅឱ្យបានច្រើន ដូចជាសៀវភៅទាក់ទងនឹងមេរៀន ឬមានពេលទំនេរ អាចអានសៀវភៅប្រភេទផ្សេងៗឱ្យបានច្រើន ដើម្បីជាប្រយោជន៍ដល់ខ្លួនឯង។

“បើនិយាយពីអំណាន អានអីក៏មានប្រយោជន៍ដែរ។ អានអ្វីដែលអវិជ្ជមានក៏មានប្រយោជន៍ដែរ យើងចៀសវាងអ្វីដែលអវិជ្ជមាន។ ប៉ុន្តែបើយើងអានវិជ្ជមានច្រើន គឺធ្វើឱ្យគំនិតយើងហ្នឹងមានភាពវិជ្ជមាន” ។ នេះ បើតាមប្រសាសន៍លោក កុក រស់៕

The post រដ្ឋមន្ត្រីអប់រំ៖ ការអាន និងសរសេរ ជាមធ្យោបាយដ៏មានប្រសិទ្ធភាព ក្នុងការលើកកម្ពស់ភាសាជាតិ appeared first on Kampuchea Thmey Daily.

ការលើកឡើងរបស់សម្តេច ម៉ែន សំអន ធ្វើឡើងនាព្រឹកថ្ងៃទី១១ ខែមីនា ឆ្នាំ២០២៦ ក្នុងទិវាជាតិអំណានលើកទី១១ ក្រោមប្រធានបទ “សំណេរនិងអំណានក្នុងបរិបទថ្មី” នៅសាលាតិចណូ។ សម្តេចកិត្តិសង្គហបណ្ឌិត ម៉ែន សំអន មានប្រសាសន៍ថា៖  “ការកសាងប្រទេសជាតិ មិនត្រឹមតែត្រូវការហេដ្ឋារចនាសម្ព័ន្ធ និងកំណើនសេដ្ឋកិច្ចប៉ុណ្ណោះទេ វាតម្រូវឱ្យមានពលរដ្ឋមានចំណេះដឹង មានការគិតគូរ និងមានទំនួលខុសត្រូវ។ ការអាន និងការសរសេរបណ្តុះគុណសម្បត្តិទាំងនេះយ៉ាងច្បាស់លាស់”។

ដើម្បីសម្រេចបានចក្ខុវិស័យខាងលើ សម្តេច ម៉ែន សំអន បានលើកឡើងថា ត្រូវតែធ្វើការរួមគ្នារវាងស្ថាប័នរាជរដ្ឋាភិបាល អ្នកអប់រំ ដៃគូអភិវឌ្ឍន៍ សង្គមស៊ីវិល ដើម្បីលើកកម្ពស់វប្បធម៌អក្ខរកម្មទូទាំងប្រទេស។ សម្តេចកិត្តិសង្គហបណ្ឌិត ក៏បានលើកទឹកចិត្តសាលារៀននីមួយៗប្រែក្លាយជាសគមន៍អ្នកអាន។ ជាមួយគ្នានេះ សម្តេចសូមឱ្យមានការផ្តល់អំណាចដល់គ្រូបង្រៀនគ្រប់រូប ដើម្បីជំរុញសេចក្តីស្រឡាញ់ការអាន និងសរសេរ ព្រមទាំងស្នើឱ្យមានការជំរុញយុវជនកម្ពុជាគ្រប់រូបស្វែងយល់ពីអំណាចពាក្យសម្តី។

ក្នុងទិវាជាតិអំណានលើកទី១១ នេះ សម្តេច ម៉ែន សំអន ក៏បានលើកឡើងពីសារសំខាន់នៃការអាន និងសរសេរ ដែលអាចឱ្យមនុស្សមានចំណេះដឹងទូលំទូលាយ មានលទ្ធភាពបន្តការសិក្សាដល់ថ្នាក់ខ្ពស់ មានការគិតប្រកបដោយការត្រិះរិះ មានទំនាក់ទំនងប្រកបដោយប្រសិទ្ធភាព និងចូលរួមចំណែកយ៉ាងមានអត្ថន័យដល់សង្គមជាតិ។

សម្តេច ម៉ែន សំអន ក៏បានលើកឡើងទៀតថា៖ “ការអានពង្រីកគំនិងរបស់យើង ការសរសេរធ្វើឱ្យការគិតរបស់យើងកាន់តែមុតស្រួច។ តាមរយៈការអាន យើងទទួលបានចំណេះដឹង និងការយល់ដឹងអំពីពិភពលោក។ តាមរយៈការសរសេរ យើងចែករំលែកគំនិត ជំរុញការផ្លាស់ប្តូរ និងរួមចំណែកដល់វឌ្ឍនភាព”។ សម្តេចបញ្ជាក់ថា សម្រាប់សិស្ស និងយុវជនដែលអានបានច្រើន នឹងអាចស្វែងរកឱកាសជំនាញថ្មីៗ និងសម្របខ្លួនទៅនឹងកាលៈទេសៈដែលកំពុងផ្លាស់ប្តូរ។ ចំណែកបុគ្គលដែលសរសេរបានល្អ នឹងអាចបង្កើតទំនាក់ទំនងប្រកបដោយទំនុកចិត្ត ព្រមទាំងអាចចូលរួមចំណែកដោះស្រាយបញ្ហាប្រឈមក្នុងសហគមន៍ថែមទៀតផង។

បន្ថែមពីនេះ ការអាន និងការសរសេរបានដើរតួនាទីយ៉ាងសំខាន់ក្នុងការបង្កើតភាពជាពលរដ្ឋល្អ ដោយសិស្ស និងយុវជនអាចយល់ដឹងពីបញ្ហាសង្គម​ និងអាចចូលរួមកិច្ចការសង្គមបានល្អដើម្បីជាចំណែកជួយដល់ការអភិវឌ្ឍន៍សង្គមជាតិ។ នេះ បើតាមការលើកឡើងរបស់សម្តេច ម៉ែន សំអន។

សូមជម្រាបថា ក្នុងទិវាជាតិអំណានលើកទី១១ នេះ ក៏មានការរៀបចំពិព័រណ៍សៀវភៅ រហូតដល់រយៈពេល ៥ថ្ងៃ ចាប់ពីថ្ងៃទី១១ ដល់ថ្ងៃទី១៥ ខែមីនា ឆ្នាំ២០២៦ ដើម្បីអបអរទិវាជាតិអំណានលើកទី១១ ក្រោមប្រធានបទ៖ «សំណេរ និងអំណានក្នុងបរិបទថ្មី» ក្នុងគោលបំណងជំរុញការអាននកម្ពុជាឱ្យកាន់តែប្រសើរ។ ពិពិរណ៍សៀវភៅចាប់ផ្តើមពីម៉ោង ៨ព្រឹក ដល់ម៉ោង ៨យប់ នៅវិទ្យាស្ថានបច្ចេកវិទ្យា (សាលាតិចណូ)។

បើតាមក្រសួងអប់រំ រាជរដ្ឋាភិបាលកម្ពុជាបានសម្រេចជ្រើសរើសយកថ្ងៃទី១១ ខែមីនា ដែលជាថ្ងៃខែកំណើតរបស់សម្តេចព្រះសង្ឃរាជ ជួន ណាត ដើម្បីប្រារព្ធទិវាជាតិអំណាននេះឡើងរៀងរាល់ឆ្នាំ ក្នុងគោលបំណងរំឭកដល់វីរភាពរបស់ សម្តេចព្រះសង្ឃរាជ ដែលបានខិតខំតស៊ូ ពុះពារការពារមរតកវប្បធម៌អក្សរសាស្រ្តខ្មែរពីអាណានិគមនិយមបារាំង និងក្នុងគោលបំណងបណ្តុះទម្លាប់អាន ជំរុញវប្បធម៌អាន លើកកម្ពស់សមត្ថភាពអាន និងការតែងនិពន្ធ សំដៅរួមចំណែកការពារ និងពង្រឹងវប្បធម៌ អរិយធម៌ខ្មែរ៕

The post សម្តេច ម៉ែន សំអន៖ ការកសាងប្រទេសជាតិមិនត្រឹមតែត្រូវការហេដ្ឋារចនាសម្ព័ន្ធ និងសេដ្ឋកិច្ចទេ ក៏ត្រូវការពលរដ្ឋដែលមានចំណេះដឹង appeared first on Kampuchea Thmey Daily.

លោកស្រីបញ្ជាក់ថា៖« ក្នុងរយៈពេល ៣០ ឆ្នាំមកនេះ អង្គការស៊ីប៉ា បានអនុវត្តគម្រោងជាច្រើនដូចជា គម្រោងបណ្ណា​ល័យចល័ត, គម្រោងអប់រំក្នុងពន្ធនាគារ, គម្រោងអភិវឌ្ឍយុវជន និងកម្មវិធីបោះពុម្ពផ្សាយជាដើម»។ បន្ថែមលើនេះ លោកស្រី អគ្គលេខាធិការក្រុមប្រឹក្សាភិបាល ក៏បានជម្រាបជូនអំពីវឌ្ឍនភាពការងាររបស់អង្គការ និងបានស្នើសុំកិច្ចពិភាក្សា ដើម្បីពង្រឹងកិច្ចសហប្រតិបត្តិការរវាងភាគីទាំងពីរបន្ថែមទៀតនាពេលអនាគត។

ជាការឆ្លើយតប លោករដ្ឋមន្រ្តី ហង់ជួន ណារ៉ុន បានថ្លែងអំណរគុណយ៉ាងជ្រាលជ្រៅដល់អង្គការស៊ីប៉ា ចំពោះកិច្ចខិតខំប្រឹងប្រែង និងការចូលរួមចំណែកដ៏មានតម្លៃក្នុងការអភិវឌ្ឍវិស័យអប់រំនៅកម្ពុជាតាមរយៈគម្រោងជាច្រើន ក្នុងគោលដៅឱ្យកុមារ និង​យុវជន​ទាំង​អស់​ទទួល​បាន​ការ​អប់រំ​ប្រកប​ដោយ​គុណភាព ដើម្បី​លុប​បំបាត់​អនក្ខរភាព និង​បណ្ដុះ​ទម្លាប់​អាន​សៀវភៅ​ដល់​ពួក​គេ។ លោកក៏បានគូសបញ្ជាក់ថា ការគាំទ្រ និងជំរុញពីសំណាក់មាតាបិតា អ្នកអាណាព្យាបាលឱ្យកូនៗចាប់ផ្តើមអាន គឺជាកិច្ចការចាំបាច់មួយដើម្បីបណ្តុះទម្លាប់ល្អនេះតាំងពីក្មេងទៅផងដែរ។

ជាមួយគ្នានេះ លោកឧបនាយករដ្ឋមន្ត្រី បានលើកឡើងពីតួនាទីនៃភាសាបារាំងក្នុងប្រទេសកម្ពុជា ជាពិសេសចំពោះការខិតខំប្រឹងប្រែងរបស់ក្រសួងអប់រំក្នុងការបណ្តុះបណ្តាលបន្ថែមដល់គ្រូបង្រៀនភាសាបារាំង ការពង្រឹង និងលើកកម្ពស់ដល់ការសិក្សាភាសាបារាំងក្នុងកម្មវិធីសិក្សានៅសាលារៀនជំនាន់ថ្មី ការបង្រៀនភាសាបារាំង និងមុខវិជ្ជាវិទ្យាសាស្ត្រជាភាសាបារាំងនៅក្នុងកម្មវិធីថ្នាក់ពីរភាសាបារាំង-ខ្មែរ កម្មវិធីសិក្សាភាសាបារាំងជាជីវភាសាទី១-ទី២ និងនៅតាមគ្រឹះស្ថានអប់រំនានាដែលប្រើប្រាស់ភាសាបារាំង។

ជាពិសេសបានសហការជាមួយស្ថានទូតបារាំងប្រចាំនៅកម្ពុជា និងទីភ្នាក់ងារឧត្តមសិក្សាប្រើប្រាស់ភាសាបារាំង (AUF) ក្នុងគោលបំណងពង្រឹងគុណភាព និងលើកកម្ពស់ការបណ្ដុះបណ្ដាលភាសាបារាំងដល់អ្នកសិក្សា និងយុវជន រួមទាំងការប្រើប្រាស់បច្ចេកវិទ្យាបញ្ញាសិប្បនិម្មិត (AI) នៅក្នុងក្របខណ្ឌនៃការបង្រៀនភាសាបារាំងផងដែរ។

តាងនាមក្រសួងអប់រំ យុវជន និងកីឡា លោក ហង់ជួន ណារ៉ុន បានវាយតម្លៃខ្ពស់ចំពោះរកិច្ចសហប្រតិបត្តិការរវាងភាគីទាំងពីរក្នុងរយៈពេលជាច្រើនឆ្នាំកន្លងមកនេះ ដោយក្រសួងអប់រំត្រៀមខ្លួនជានិច្ចក្នុងការបន្តគាំទ្រ និងសហការជាមួយអង្គការ Sipar លើគម្រោងអប់រំផ្សេងៗ ជាពិសេសគម្រោងដែលផ្តោតលើការលើកកម្ពស់វប្បធម៌នៃការអាន និងការអភិវឌ្ឍធនធានមនុស្ស។

បន្ថែមលើនេះ លោកក៏បានបង្ហាញនូវឆន្ទៈក្នុងការពិនិត្យលទ្ធភាពនៃការធ្វើសមាហរណកម្មគម្រោងមួយចំនួនរបស់អង្គការ Sipar ទៅក្នុងកម្មវិធីសិក្សារបស់សាលារៀន ដើម្បីពង្រីកវិសាលភាព និងផលជះវិជ្ជមាន ក៏ដូចជាបានសង្ឃឹមយ៉ាងមុតមាំថា កិច្ចសហប្រតិបត្តិការដ៏ល្អនេះនឹងបន្តរីកចម្រើនទៅមុខទៀតដើម្បីអនាគតដ៏ភ្លឺស្វាងនៃវិស័យអប់រំនៅកម្ពុជា៕

The post ក្នុងរយៈពេល៣០ឆ្នាំ អង្គការស៊ីប៉ា​ បានអនុវត្តគម្រោងជាច្រើនជួយដល់វិស័យអប់រំកម្ពុជា appeared first on Kampuchea Thmey Daily.

ការសំណូរពរនេះ ស្របពេលដែលនៅកម្ពុជាមានការបង្កើតបណ្ណាល័យជាបន្តបន្ទាប់ និងធ្វើទំទើបកម្មស្របទៅតាមសតវស្សទី ២១ ជាពិសេស ក៏មានបណ្ណាល័យចល័តនៅតាមទីសាធារណៈផងដែរ។ តួយ៉ាង បណ្ណាល័យសម្តេចព្រះសង្ឃរាជ ជួន ណាត ស្ថិតក្នុងបរិវេណវិទ្យាស្ថានជាតិអប់រំ មានកម្ពស់ ៥ជាន់ បានបំពាក់បច្ចេកវិទ្យាទំនើបៗ និងកុំព្យូទ័រ ត្រូវបានបង្កើតឡើងដើម្បីជំរុញគរុសិស្ស គរុនិស្សិត និងសិស្សានុសិស្ស សិក្សាស្រាវជ្រាវ និងជំរុញការអាន។

លោក ប្រាជ្ញ ច័ន្ទសុខា បញ្ជាក់ថា៖«ការអានសៀវភៅធ្វើឱ្យយើងស្ងប់អារម្មណ៍ បើសិនជាយើងកាន់តែទូរស័ព្ទ ពេលខ្លះព័ត៌មាននៅលើបណ្តាញសង្គមមិនល្អទាំងអស់នោះទេ ចឹងទេ! ការអានសៀវភៅវាជាចំណីខួរក្បាលឱ្យមានអាយុយ៉ឺនយូរដែរ»។

«ដើម្បីឆ្លើយតបទៅនឹងការបង្កើនប្រាក់ចំណូលកម្រិតខ្ពស់នៅថ្ងៃអនាគតគឺយើងត្រូវចាប់ផ្តើមពីវិស័យអប់រំ ហើយទីតាំងនេះជាកន្លែងបណ្តុះបណ្តាលគ្រូទូទាំងប្រទេស ដូច្នេះដើម្បីពង្រឹងវិស័យអប់រំទាមទារឱ្យថ្នាក់ដឹកនាំ បង្កើតជាបណ្ណាល័យដើម្បីមានធនធានសៀវភៅគ្រប់គ្រាន់សម្រាប់ឱ្យអ្នកសិក្សាស្រាវជ្រាវ និងជំរុញការអានផងដែរ»។ នេះបើតាមលោក ប្រាជ្ញ ច័ន្ទសុខា។

បណ្ណាល័យសម្តេចព្រះសង្ឃរាជ ជួន ណាត ត្រូវបានរចនាឡើង ដោយឈរលើទស្សនាទានបីរួមគ្នាគឺ អប់រំ វប្បធម៌ និងសាសនា។ អគារនេះមានទម្រង់ ជាអក្សរ «រ» នៅពីលើអក្សរ «អ» ដែលតំណាងឱ្យការអប់រំ ដោយប្រើប្រាស់ខឿន និងផ្កាភ្ញីប្រាសាទអង្គរ ដែលតំណាងឱ្យវប្បធម៌ជាតិ និងមានដំបូលលើមាត់ទ្វាររាងដូច ដំបូលព្រះវិហារ ដែលតំណាងឱ្យព្រះពុទ្ធសាសនា។

បណ្ណាល័យបានប្រមូលផ្តុំឯកសារ ស្តីពីការអប់រំរបស់កម្ពុជា ចាប់តាំងពីមុនសម័យអណានិគមបារាំង រហូតដល់ពេលបច្ចុប្បន្ន និងរួមទាំងបណ្ណាល័យទូរនិម្មិត ដែលសិស្ស និស្សិត គ្រូបង្រៀន និងអ្នកស្រាវជ្រាវអាចចូលមើល និងស្រាវជ្រាវបានដោយសេរី បណ្ណាល័យមានបំពាក់សៀវភៅពាក់ព័ន្ធនឹងការអប់រំជាង ២ម៉ឺនក្បាល សាលអានដែលមានច្រើនទម្រង់ បន្ទប់ស្វ័យសិក្សា និងធ្វើការជាក្រុម បន្ទប់ស្ទីឌីយ៉ូសម្រាប់ស្តាប់ និងមើលវីដេអូ បន្ទប់ កុំព្យូទ័រសម្រាប់ស្រាវជ្រាវឯកសារ បន្ទប់ប្រជុំ ការិយាល័យធ្វើការរបស់បណ្ណារក្ស បន្ទប់ រក្សាឯកសារក្រោមដី បន្ទប់ថែទាំទារកសម្រាប់ស្ត្រីមានកូនតូច៕

The post អ្នកសិក្សា៖ ការអានសៀវភៅធ្វើឱ្យស្ងប់​អារម្មណ៍​ និងជាចំណីខួរក្បាលបង្កើនអាយុ appeared first on Kampuchea Thmey Daily.

កញ្ញា គីម សុខងីម បានប្រាប់មកកាន់ កម្ពុជាថ្មី ថា បណ្ណាល័យទី១ ដែលបានបង្កើតមានឈ្មោះថា បណ្ណាល័យសាធារណៈ ពោធិព្រឹក្ស ត្រូវបានបង្កើតនៅខែវិច្ឆិកា ឆ្នាំ២០២២ ដែលមានទីតាំងស្ថិតនៅក្នុងសាលាបឋមសិក្សាពោធិព្រឹក្ស តែម្តង ដែលនៅស្រុកកៀនស្វាយ ខេត្តកណ្តាល។ បណ្ណាល័យទី១នេះ ត្រូវបានបង្កើតដោយ ខ្លួន និងមិត្តភក្តិជាច្រើនទៀត ដើម្បីផ្តល់ឱកាសដល់សិស្សនៅទីនោះបានអានសៀវភៅ។ ចំណែកបណ្ណាល័យទី២ មានឈ្មោះថា បណ្ណាល័យសាធារណៈភូមិ ដែលកញ្ញាបានបង្កើតអំឡុងខែមេសា ដែលស្ថិតនៅក្នុងភូមិព្រែកប៉ុល ឃុំបន្ទាយដែក ស្រុកកៀនស្វាយ ខេត្តកណ្តាល ដើម្បីឱ្យក្មេងៗ នៅក្នុងសហគមន៍អាចអានសៀវភៅដោយភាពរីករាយ។ ចំពោះបណ្ណាល័យទី២នេះ សុខងីម ប្រាប់ថា ទទួលបានការគាំទ្រពីក្រុមគ្រួសារ មិត្តភក្តិ និងគ្រូបង្រៀននៅសាលាបឋមសិក្សាពោធិព្រឹក្ស។

មូលហេតុដែលបណ្តុះគំនិតឱ្យកញ្ញាបង្កើតបណ្ណាល័យទាំង២ឡើងមក ព្រោះខ្លួនចង់ឱ្យក្មេងៗមានឱកាសអាន និងបង្កើនទម្លាប់អានរបស់ពួកគេឱ្យបានច្រើន។ ទន្ទឹមនោះ សុខងីម យល់ឃើញថា ការអានជួយកុមារយ៉ាងច្រើន ក្នុងការបង្កើនចំណេះដឹង ការគិត និងកាត់បន្ថយពេលវេលារបស់ពួកគេជាមួយទូរសព្ទ។ កញ្ញា បញ្ជាក់ថា៖ “ខ្ញុំចង់ឱ្យក្មេងៗមានឱកាសអាន និងបង្កើនទម្លាប់អាន។ ខ្ញុំទទួលបានការគាំទ្រពីក្រុមគ្រួសារ មិត្តភក្តិ និងលោកគ្រូ អ្នកគ្រូ”។ សុខងីម បានបន្ថែមពីអ្វីដែលខ្លួនចង់ឃើញនោះគឺ ៖ “ខ្ញុំចង់ឱ្យគ្រប់ភូមិទាំងអស់ មានបណ្ណាល័យយ៉ាងហោចណាស់ ១”។

បណ្ណាល័យទាំង២ មានសៀវភៅជាច្រើនក្បាល ដូចជាសៀវភៅប្រភេទរឿងនិទាន សៀវភៅចំណេះដឹងទូទៅអំពីធម្មជាតិ វប្បធម៌ មនុស្ស និងសៀវភៅភាសាអង់គ្លេសជាដើម។ សម្រាប់កុមារដែលចូលអានសៀវភៅភាគច្រើន មានអាយុចន្លោះពី ៨ឆ្នាំ ទៅ១២ ឆ្នាំ។ ចំណែគសៀវភៅនៅក្នុងបណ្ណាល័យ មួយចំនួន គឺទទួលបានពីការបរិច្ចាគពីសប្បុរសជន រីឯ មួយចំនួនទៀត គឺ សុខងីម បានទិញដាក់ក្នុងបណ្ណាល័យដោយខ្លួនឯង។ នេះបើតាមការបញ្ជាក់ពី កញ្ញា គីម សុខងីម៕

អត្ថបទ៖ អុន ស្រីមាន

The post ស្ត្រីម្នាក់ បង្កើតបណ្តាល័យចំនួន២ ក្នុងសហគមន៍របស់ខ្លួនដើម្បីផ្តល់ឱកាស និងទម្លាប់អានសៀវភៅដល់ក្មេងៗ appeared first on Kampuchea Thmey Daily.

ថ្លែង​ក្នុង​ពិធី​បើក​កម្មវិធី​ប្រកួត​សរសេរ​តាម​អាន “​សំណេរ​អង្គរ​” លើក​ទី ២ នៅ​ស្ពាន​ហាល ប្រាសាទ​អង្គរវត្ត កាលពី​ព្រឹក​ថ្ងៃ​ទី ១៩ មករា ដោយ​មាន​ការ​ចូលរួម​ពី លោក ហ៊ុន ម៉ានី ឧបនាយករដ្ឋមន្ត្រី រដ្ឋមន្ត្រី​ក្រសួង​មុខងារ​សាធារណៈ និង​តំណាង​មូលនិធិ​ម៉ានី ព្រះ​បញ្ញា​មុនី​ញាណ ហាក់ សៀង​ហៃ​, លោកស្រី​បណ្ឌិត​សភាចា​រ្យ ភឿង ស​កុ​ណា រដ្ឋមន្ត្រីក្រសួង​វប្បធម៌ និង​វិចិត្រសិល្បៈ​, លោក លឹម ប៊ុន​ហុក រដ្ឋលេខាធិការ និង​ជាទី​ប្រឹក្សា ​នៃ​ក្រសួងព្រះបរមរាជវាំង និង​ជា​ស្ថាបនិក​សំណេរ​អង្គរ​, លោក​បណ្ឌិតសភា​ចា​រ្យ ឧបនាយករដ្ឋមន្ត្រី បានបង្ហាញ​ក្តីរំភើប​រីករាយ​ដែល​បាន​ចូលរួម​អាន​អត្ថបទ​ជូន​បក្ខជន​សរសេរ ក្នុងការ​ប្រកួត​សរសេរ​តាម​អាន «​សំណេរ​អង្គរ​» លើក​ទី ​២ ដែលជា​ព្រឹត្តិការណ៍​ដ៏​មាន​សារៈសំខាន់ និង​ទទួលបាន​ក្តី​សាទរ​ និង​ចូលរួម​ពី​គ្រប់​មជ្ឈដ្ឋាន ក្នុង​បុព្វហេតុ​លើកតម្កើង​អក្សរសាស្ត្រ​ខ្មែរ ជាពិសេស​បាន​ជួយ​ដាស់​ស្មារតី​ឱ្យ​ប្រជាពលរដ្ឋ​គ្រប់រូប​យកចិត្តទុកដាក់​កែប្រែ​ទម្លាប់​ នៃ​ការសរសេរ​អក្ខរាវិរុទ្ធ និង​អាន​ពាក្យ​ខ្មែរ​ឱ្យ​កាន់តែ​ប្រសើរ​ឡើង។

បន្ថែម​ពី​នេះ លោក​បណ្ឌិតសភា​ចា​រ្យ ឧបនាយករដ្ឋមន្ត្រី បានឱ្យដឹងថា ការពង្រឹង​ការអាន ការ​សរសេរ​ភាសា​ខ្មែរ​តាំងពី​កម្រិត​ថ្នាក់ដំបូង គឺជា​មូលដ្ឋានគ្រឹះ​ក្នុង​ការចាប់យក​មុខវិជ្ជា​ដទៃទៀត​មក​សិក្សា និង​ធានា​ភាពជោគជ័យ​ក្នុងការ​សិក្សា​នៅ​កម្រិត​ថ្នាក់​បន្តបន្ទាប់​ទៀត។ ក្នុងន័យនេះ ក្រសួង​អប់រំ យុវជន និង​កីឡា បាននិងកំពុង​អនុវត្ត​យ៉ាងសកម្ម ប្រកបដោយ​ជវភាព​នូវ​កញ្ចប់​សម្ភារៈ​អំណាន​ថ្នាក់ដំបូង ដែលជា​យុទ្ធសាស្ត្រ​កំណែទម្រង់​ដ៏​មុត​ស្រួច​បំផុត សម្រាប់​ការលើកកម្ពស់​គុណភាព​អប់រំ​បឋមសិក្សា។

លោក​បណ្ឌិតសភា​ចា​រ្យ ឧបនាយករដ្ឋមន្ត្រី បាន​បន្ត​ថា ការរៀបចំ​ព្រឹត្តិការណ៍​ក្នុងការ​ប្រកួត​សរសេរ​តាម​អាន ក្រោម​ប្រធានបទ «​សំណេរ​អង្គរ​» នាពេលនេះ ក៏​ឆ្លុះបញ្ចាំង​ពី​ការ​យកចិត្តទុកដាក់​របស់​ប្រមុខ​រាជរដ្ឋាភិបាល ក៏ដូចជា​ក្រសួង​អប់រំ យុវជន និង​កីឡា ក្រសួង​ស្ថាប័ន​ពាក់ព័ន្ធ ពិសេស​អ្នក​ស្រលាញ់​ចូលចិត្ត​ការសរសេរ​អក្សរ​ខ្មែរ សំដៅ​លើកកម្ពស់​សមត្ថ​ភាព​ការសរសេរ​ឱ្យបាន​ត្រឹមត្រូវ​តាម​អក្ខរាវិរុទ្ធ ក្បួនខ្នាត​វេយ្យាករណ៍ និង​ចេះ​ពី​របៀប​សរសេរ​អត្ថបទ​ឱ្យបាន​ច្បាស់លាស់ ដែល​ទាំងអស់នេះ​ជា​បំ​ណិ​ន​ដ៏​សំខាន់​ក្នុងការ​សិក្សា​ភាសា​ខ្មែរ និង​អក្សរសាស្ត្រ​ខ្មែរ។

លោក​បណ្ឌិតសភា​ចា​រ្យ ឧបនាយករដ្ឋមន្ត្រី បាន​លើកទឹកចិត្ត​ដល់​គ្រប់​ក្រសួង ស្ថាប័ន រដ្ឋបាល​គ្រប់​លំដាប់​ថ្នាក់ ជាពិសេស​គណៈ​គ្រប់គ្រង​សាលា លោកគ្រូ អ្នកគ្រូ ឱ្យ​រៀបចំ​ការប្រឡងប្រណាំង​អំ​ណាន និង​សំណេរ ឬ​បង្កើត​ព្រឹត្តិការណ៍​អប់រំ​នានា ដើម្បី​ជំរុញ​ដល់​ការរៀនសូត្រ​របស់​សិស្សានុសិស្ស និង​អ្នក​ចូលចិត្ត​អក្សរសាស្ត្រ​ខ្មែរ អាច​បញ្ចេញ​សមត្ថភាព​ប្រកបដោយ​ភាពក្លាហាន ទំនុកចិត្ត និង​ទទួលយក​ការពិត​អំពី​សមត្ថភាព​ពិតប្រាកដ​ដែល​ខ្លួន​មាន ព្រមទាំង​ខិតខំ​ប្រឹងប្រែង​សិក្សា​រៀនសូត្រ និង​ពង្រឹង​ការអាន សរសេរ និង​និពន្ធ​បន្ថែមទៀត សម្រាប់​ត្រៀមខ្លួន​ក្នុងការ​ប្រឡងប្រណាំង​នានា​ក្នុងពេល​ខាងមុខ។

លោក​បណ្ឌិតសភា​ចា​រ្យ ឧបនាយករដ្ឋមន្ត្រី បាន​កោតសរសើរ និង​វាយតម្លៃ​ខ្ពស់​ចំពោះ​ក្រុមការងារ​ដែល​បានរៀបចំ​ព្រឹត្តិការណ៍​នេះ​ឡើង ប្រកបដោយ​បរិយាកាស​រីករាយ និង​ការចូលរួម​គាំទ្រ​ពី​គ្រប់​មជ្ឈដ្ឋាន ដែល​ពិតជា​ឆ្លុះបញ្ចាំង​ពី​អត្តសញ្ញាណ​ជាតិ សាមគ្គីភាព និង​ការលើកតម្កើង​អក្សរសាស្ត្រ​ខ្មែរ​ដ៏​ប្រណីត ដែល​បុព្វបុរស​របស់​យើង​បាន​បន្សល់​ទុកឱ្យ ព្រមទាំង​សូម​កោតសរសើរ​ចំពោះ​ការលះបង់ និង​ភាពក្លាហាន​របស់​បេក្ខជន​បរទេស ក៏ដូចជា​មាតាបិតា​បេក្ខជន​ដែលមាន​អាយុ​ក្រោម​១៨​ឆ្នាំ ដែល​បាន​លើកទឹកចិត្ត​ និង​ជូន​កូនៗ​មក​ចូលរួម​ការប្រកួត​នាពេលនេះ និង​សូម​បួងសួង​ឱ្យ​សេចក្ដីស្រឡាញ់​អក្សរសាស្ត្រ​ខ្មែរ​យើង​រឹងមាំ ប្រៀប​ដូច​ប្រាង្គ​ប្រាសាទ​ដែល​កំពុង​ឈរ​យ៉ាង​ស្កឹមស្កៃ។

គួរ​បញ្ជាក់ដែរថា ការប្រកួត​សរសេរ​តាម​អាន «​សំណេរ​អង្គរ​» លើក​ទី​ ២​ នេះ មាន​បេក្ខជន សរុប​ចំនួន ១ ២២០​ អង្គ​/​នាក់ ក្នុងនោះ​រួមមាន​បរទេស​ផងដែរ និង​មាន​ព្រះសង្ឃ ៨២​ អង្គ និមន្ត​ពី​ខេត្ត​បាត់ដំបង​មាន​ច្រើនជាងគេ​ចំនួន​ ២៤​ អង្គ​, សៀមរាប​ ១៦ ​អង្គ​, បន្ទាយមានជ័យ ​៩ ​អង្គ​,​រាជធានី​ភ្នំពេញ​ ៦ ​អង្គ​, កំពង់ចាម​ ៥​ អង្គ កណ្ដាល និង​ត្បូងឃ្មុំ​ ៤​ អង្គ​ ដូចគ្នា។ បេក្ខជន​ចាស់​ជាងគេ​អាយុ ៨១ ឆ្នាំ និង​បេក្ខជន​ក្មេង​ជាងគេ​អាយុ ៦ ឆ្នាំ។ ការប្រកួត​នេះ មាន​គណៈកម្មការ​ចូលរួម​កែ​វិញ្ញាសា​ចំនួន ៦០ នាក់ ដោយ​ជ្រើសរើស​ម្ចាស់​ជ័យលាភី​ចំនួន ៦ នាក់ ដែល ៣​ នាក់ ​សម្រាប់​បេក្ខជន​អាយុ​ចាប់ពី​ ១៩ ​ឆ្នាំ​ឡើង និង​ ៣ ​នាក់​ សម្រាប់​បេក្ខជន​អាយុ​ចាប់ពី ​១៨​ ឆ្នាំ ចុះក្រោម៕

អត្ថបទ ៖ សំអឿន

The post រដ្ឋមន្ត្រីអប់រំ ៖ ការពង្រឹងការអាន ការសរសេរ ភាសាខ្មែរ ពីកម្រិតថ្នាក់ដំបូង ជាមូលដ្ឋានគ្រឹះធានាភាពជោគជ័យក្នុងការសិក្សា appeared first on Kampuchea Thmey Daily.