សេដ្ឋកិច្ចកម្ពុជាត្រូវបានគេរំពឹងថានឹងមានការកើនឡើងចំនួន ៦.១ ភាគរយនៅក្នុងឆ្នាំ២០២៤ នេះដែលជាប់ចំណាត់ថ្នាក់ ទី ៣ ដែលមានអាត្រាកើនឡើងខ្ពស់នៅក្នុងតំបន់អាស៊ី។ ការកើនឡើងចំនួន ៦,១ ភាគរយនេះគឺ ជាតួលេខ ខ្ពស់ជាងគេលំដាប់លេខរៀងទី១ នៅតំបន់អាស៊ានតាម ពីក្រោយដោយប្រទេសភីលីពីនដែលមានកំណើនសេដ្ឋ កិច្ច ៥,៩ភាគរយ និងប្រទេសវៀតណាមមានកំណើន សេដ្ឋកិច្ច ៥,៨ ភាគរយ។

​លោកហុង អ៊ុយ ប្រធានក្រុមប្រឹក្សាភិបាលនៃក្រុមហ៊ុន ហ្គោលដេន ទ្រីបានថ្លែងនៅក្នុងរបាយការណ៍ហិរញ្ញវត្ថុរបស់ខ្លួនដែលបានផ្ញើរទៅកាន់ផ្សារមូលបត្រកម្ពុជាថា៖« បើទោះបីជាមានការព្យាករណ៍កំណើនសេដ្ឋកិច្ចល្អប្រសើរក៏ដោយ វិស័យអគារការិយាល័យ ពុំមានការបញ្ចេញគម្រោងថ្មីនោះទេ ប៉ុន្តែគម្រោង អគារការិយាល័យដែលមានស្រាប់ នៅតែបន្ត អនុវត្តបញ្ចប់គម្រោងតាមធម្មតា»។

លោកបានថ្លែងថា​ ការព្យាករ​ដោយក្រុមហ៊ុន​​CBRE ទំហំអគារការិយាល័យដែលនឹងត្រូវបន្ថែមទៅក្នុងទី ផ្សារ (ក្រោយចប់គម្រោង) សម្រាប់ឆ្នាំ ២០២៤ មានប្រមាណ ១៩៨ពាន់ ម៉ែត្រការ៉េ និងសម្រាប់ ឆ្នាំ ២០២៥ គឺប្រមាណ ២៦៨ពាន់ ម៉ែត្រការ៉េ។

ការព្យាករទំហំអគារការិយាល័យសរុបសម្រាប់ឆ្នាំ ២០២៤ (ទាំងមាន ស្រាប់នឹងបន្ថែម) មានប្រមាណជិត ១.២០០ពាន់ ម៉ែត្រការ៉េ និងសម្រាប់ឆ្នាំ ២០២៥ មានប្រមាណជាង ១.៤០០ពាន់ ម៉ែត្រការ៉េ។ អត្រាជួលសម្រាប់អគារការិយាល័យត្រូវបានគេរំពឹងថានឹងមិនមានការប្រែប្រួលខ្លាំងគួរឱ្យកត់សម្គាល់នោះទេ រហូតដល់ត្រីមាសទី៤ ឆ្នាំ២០២៤។

លោកបានគូសបញ្ជាក់ទៀតថា៖«សម្រាប់និន្នាការនៃការជួលអគារទំនើប ក្នុងការជួលការិយាល័យនៅតែបន្តកើនឡើងនៅក្នុង រាជធានីភ្នំពេញ ដោយក្រុមហ៊ុនអន្តរជាតិ និងក្រុមហ៊ុនធំមធ្យម និយមជួលអគារការិយាល័យកម្រិត A ដែលមានតម្លៃ ជួលក្នុងមួយខែចាប់ពី ២៨ ដុល្លារ ដល់ ៣០ ដុល្លារ ក្នុងមួយម៉ែត្រការ៉េ» ។

សម្រាប់អចលនទ្រព្យកម្រិត A បានបង្ហាញពីការកើន ឡើងនៃការជួល ២.៩ ភាគរយ បន្ទាប់មកដោយអចលនទ្រព្យកម្រិត B ដែលបានកើនឡើង ៥.៥ ភាគរយ ។ ម្យ៉ាងវិញ ទៀត អគារការិយាល័យកម្រិត B និងកម្រិត Cមើលឃើញថាមានកំណើនរាបស្មើ ឬធ្លាក់ចុះ។ គម្លាតតម្លៃជួលអគារ ការិយាល័យដែលបានផ្សព្វផ្សាយ (Quoting Rent) និងតម្លៃជួលពិតប្រាកដមានការកើនឡើងខ្លាំង ដោយសារទីផ្សារ កាន់តែប្រកួតប្រជែងខ្លាំង ស្របពេលម្ចាស់អគារចង់ចរចាតម្លៃដើម្បីទាក់ទាញ និងបង្កើនអ្នកជួលឱ្យបានច្រើន។

ជាមួយគ្នានេះដែរ ចំពោះវិស័យអាផាតមិនសេវាកម្មវិញនៅមានស្ថាន ភាពល្អប្រសើរ។ គិតត្រឹមត្រីមាសទី១ ឆ្នាំ២០២៤ ច្រើនជាង ៤.២០០ យូនីតត្រូវបានសាងសង់នៅក្នុងខណ្ឌបឹងកេងកង ចំការមននិងដូនពេញ។

​ចំពោះតម្លៃជួលអាផាតមិនជាមធ្យមមានការកើនឡើងតិចតួច។ តម្លៃ ជួលជាមធ្យមសម្រាប់អាផាតមេនសេវាកម្មកម្រិត A ក្នុងរាជ ធានីភ្នំពេញ គឺមួយខែ ប្រហែល ២០ដុល្លារ ក្នុងមួយម៉ែត្រការ៉េ ខណៈតម្លៃអតិបរមា ៤០ដុល្លារក្នុងមួយម៉ែត្រការ៉េ។ តម្លៃជួលជាមធ្យមសម្រាប់អគារសេវាកម្មកម្រិត B គឺមួយខែប្រហែល ១៣ ដុល្លារ ក្នុងមួយម៉ែត្រការ៉េ ខណៈដែលតម្លៃអតិបរមាលើសពី ៣៥ ដុល្លារ ក្នុងមួយម៉ែត្រការ៉េ។

នៅក្នុងរាជធានីភ្នំពេញមានខុនដូជាង ៤១ ​០០០ យូនីត ហើយការផ្គត់ផ្គង់សរុបត្រូវបានគេប៉ានប្រមាណថានឹង កើនដល់ ៨៣​ ០២៣ យូនីតត្រឹមឆ្នាំ ២០២៨៕

The post ស្ថានភាពនៃវិស័យអគារការិយាល័យនៅកម្ពុជាហាក់ពុំទាន់ល្អប្រសើរ​គិតត្រឹម​ដំណាច់ឆមាស​ទី១ឆ្នាំនេះ appeared first on Kampuchea Thmey Daily.

ការិយាល័យប្រជាពលរដ្ឋរាជធានី-ខេត្ត គឺជាយន្តការអព្យាក្រឹត្យមួយដែលបង្កើតឡើងនៅរដ្ឋបាលរាជធានី-ខេត្តនីមួយៗសម្រាប់ទទួល និងសម្រុះសម្រួលដោះស្រាយបណ្តឹងក្រៅប្រព័ន្ធតុលាការដែលពាក់ព័ន្ធនឹងការផ្តល់សេវាសាធារណៈ និងការគ្រប់គ្រងរដ្ឋបាលនៅថ្នាក់រាជធានី-ខេត្ត។

ការិយាល័យប្រជាពលរដ្ឋរាជធានី-ខេត្ត មានតួនាទី ភារកិច្ច៖ ១)ទទួល និងប្រមូលពាក្យបណ្តឹងនានា។ ២) ជ្រើសរើស និងវាយតម្លៃពាក្យបណ្តឹងដែលទទួលបាន ហើយបញ្ជូនពាក្យបណ្តឹងទាំងឡាយទៅកាន់ស្ថាប័នមានសមត្ថកិច្ច។ ៣) តាមដានការដោះស្រាយ ដើម្បីជូនព័ត៌មានត្រឡប់ទៅម្ចាស់បណ្តឹងវិញ។ ៤) សម្រុះសម្រួល ស៊ើបអង្កេត និងដោះស្រាយបណ្តឹងដែលស្ថិតនៅក្នុងដែនសមត្ថកិច្ចរបស់ខ្លួន។ ៥) ផ្សព្វផ្សាយអំពីច្បាប់ និងលិខិតបទដ្ឋានគតិយុត្តនានាដល់ប្រជាពលរដ្ឋ។

ដោយឡែក ការិយាល័យប្រជាពលរដ្ឋក្រុង-ស្រុក-ខណ្ឌ គឺជាអង្គភាពធ្វើសកម្មភាពដោយអព្យាក្រឹត្យក្នុងការទទួលពាក្យបណ្តឹងពីប្រជាពលរដ្ឋពាក់ព័ន្ធភាពមិនប្រក្រតី ឬកំហុសឆ្គងរបស់បុគ្គលិកដែលបម្រើការងារក្នុងរដ្ឋបាលក្រុង-ស្រុក-ខណ្ឌ និងសម្រុះសម្រួលដោះស្រាយបណ្តឹងទំាងនោះ ព្រមទាំងតាមដានការព្រួយបារម្ភរបស់ប្រជាពលរដ្ឋ។ ការិយាល័យប្រជាពលរដ្ឋក្រុង-ស្រុក-ខណ្ឌ មានគោលបំណងធ្វើឲ្យរដ្ឋបាលកាន់តែមានប្រសិទ្ធភាព តម្លាភាព គណនេយ្យភាព កាត់បន្ថយអំពើពុករលួយ បង្កើនភាពពេញចិត្ត និងទំនុកចិត្តរបស់ប្រជាពលរដ្ឋចំពោះរដ្ឋបាលក្រុង-ស្រុក-ខណ្ឌ។ ការិយាល័យប្រជាពលរដ្ឋក្រុង-ស្រុក-ខណ្ឌ ក៏បានបង្កើនយន្តការនៃការចូលរួម និងផ្តល់ឱកាសសម្រាប់ប្រជាពលរដ្ឋបញ្ចេញមតិយោបល់ជាមួយរដ្ឋបាលក្រុង-ស្រុក-ខណ្ឌ។

ពាក្យបណ្តឹងតវ៉ាដែលអាចលើកឡើងឲ្យការិយាល័យប្រជាពលរដ្ឋក្រុង-ស្រុក-ខណ្ឌ គឺពាក់ព័ន្ធនឹងករណីនៃការសម្រេចចិត្ត ឬអាកប្បកិរិយារបស់មន្ត្រីដែលផ្ទុយនឹងគោលការណ៍ច្បាប់ ក៏ដូចជាការបដិសេធ ឬការស្ទាក់ស្ទើរក្នុងការទទួលយកពាក្យស្នើសុំត្រឹមត្រូវតាមច្បាប់របស់ប្រជាពលរដ្ឋ។ ក្នុងនោះ ការមិនបានផ្តល់លទ្ធផល ឬដំណោះស្រាយសមស្របតាមពេលវេលាមួយដែលបានកំណត់ មន្ត្រីមានឥរិយាបទមិនអាចទទួលយកបាន តាមរយៈការបំភិតបំភ័យ ឬការប្រម៉ាតមើល ងាយដល់ប្រជាពលរដ្ឋ។ បន្ថែមពីនេះ ត្រូវធានាឲ្យបានថា បញ្ហានានារបស់ប្រជាពលរដ្ឋត្រូវបានដោះស្រាយដោយមន្ត្រីរបស់រដ្ឋបាលក្រុង-ស្រុក-ខណ្ឌ ស្របតាមលក្ខខណ្ឌច្បាប់ និងលិខិតបទដ្ឋាននានា ដោយគ្មានបែបបទរដ្ឋបាលច្រើន និងគ្មានការពន្យារពេល និងការផ្សព្វផ្សាយ-ផ្តល់ព័ត៌មាននានាអំពីសេវារបស់ការិយាល័យច្រកចេញចូលតែមួយ ការអភិវឌ្ឈន៍ក្រុង-ស្រុក-ខណ្ឌ ព្រមទាំងការប្រឆាំងនឹងអំពើពុករលួយរបស់មន្ត្រីរាជការនៃរដ្ឋបាលក្រុង-ស្រុក-ខណ្ឌ។

និយាយជារួម ប្រជាពលរដ្ឋគ្រប់រូបមានសិទ្ធិដាក់ពាក្យបណ្តឹង និងផ្តល់ព័ត៌មានផ្សេងៗដែលពាក់ព័ន្ធនឹងការផ្តល់សេវាសាធារណៈ និងការគ្រប់គ្រងរដ្ឋបាលនៅថ្នាក់ក្រោមជាតិមកការិយាល័យប្រជាពលរដ្ឋនៃរដ្ឋបាលរាជធានី-ខេត្ត-ក្រុង-ស្រុក-ខណ្ឌ ដោយពុំមានបង់ថ្លៃសេវាឡើយ។ ប្រជាពលរដ្ឋគ្រប់រូបមានសិទ្ធិដាក់ពាក្យបណ្តឹង និងផ្តល់ព័ត៌មានផ្សេងៗទៅកាន់ការិយាល័យប្រជាពលរដ្ឋរាជធានី-ខេត្ត-ក្រុង-ស្រុក-ខណ្ឌ តាមមធ្យោបាយនានា ជាអាទិ៍៖ អញ្ជើញទៅផ្ទាល់ដល់ការិយាល័យប្រជាពលរដ្ឋ ទំនាក់ទំនងតាមប្រព័ន្ធទូរស័ព្ទ តាមប្រអប់សំបុត្ររបស់ការិយាល័យប្រជាពលរដ្ឋ ឬតាមប្រព័ន្ធអេឡិចត្រូនិចផ្សេងៗទៀត៕

ដោយ៖ ធឿន វ៉ាន់សុង

The post អ្វីទៅជា«ការិយាល័យប្រជាពលរដ្ឋនៅថ្នាក់ក្រោមជាតិ»? appeared first on Kampuchea Thmey Daily.

១ ឈឺ​សាច់​ដុំ​ផ្សេងៗ

ប្រសិនបើអ្នកមានការឈឺចាប់ នៅក្នុងសាច់ដុំ​ មិនថា​ឈឺស្មា ឈឺខ្នង ឈឺក ឈឺដៃ ឈឺកដៃទេ វាអាចទៅរួចដែលអ្នកបាន​ចាប់ផ្តើម​ទទួលរង​ពីជំងឺ​ការិយាល័យ​នៅ​ដំណាក់កាលដំបូង។ មូលហេតុដែលអ្នកឈឺចុកចាប់ក្នុងខ្លួន គឺដោយសារតែអ្នកអាចអង្គុយ​នៅកន្លែងធ្វើការ​ដដែលៗ​ជា​រៀង​រាល់​ថ្ងៃ រហូត​ដល់​មាន​រោគ​សញ្ញា​កកកុញ។ ការឈឺចាប់ទាំងនេះនឹង​ក្លាយ​ទៅ​ជា​រ៉ាំរ៉ៃ ទោះបីជាអ្នកមិនអង្គុយធ្វើការក៏ដោយ ​តែ​នៅ​តែឈឺចាប់​រហូត។

២ ឈឺក្បាល

ការឈឺក្បាលធម្មតា ឬយូរៗឈឺម្ដងកាលមិនបាន​ចាត់ថ្នាក់​ជាដំណាក់កាល​ដំបូង​នៃ​រោគ​សញ្ញា​ការិយាល័យ​នោះទេ។ ប៉ុន្តែ​ប្រសិន​បើ​ការឈឺក្បាល​របស់​អ្នក ​វា​កើតឡើងញឹកញាប់​ នោះ​មិនមែនជាការឈឺក្បាលធម្មតា​ទេ។ ប៉ុន្តែ​វា​ជា​ការ​ឈឺក្បាល​ដែល​មាន​អារម្មណ៍​ឈឺចាប់​ខ្លាំង​ដល់​ភ្នែក រួម​ទាំង​អ្នក​ដែល​ធ្វើ​ការ​ខ្លាំង ​រហូត​ដល់​គ្មាន​ពេល​សម្រាក គេង​តិច និង​មាន​ភាព​តានតឹង​ជា​ច្រើន​។ នេះ​ក៏​ជា​មូលហេតុ​ដំបូង​នៃ​មនុស្ស​ដែល​ទទួល​រង​ពី​ជំងឺ​ការិយាល័យ​ដែរ។

៣ ម្រាមដៃ​នឹង​ជាប់គាំង​ឬ​ជាប់​សសៃ

ធ្វើការនៅមុខកុំព្យូទ័ររាល់ថ្ងៃ ប្រាកដណាស់​អ្នក​ត្រូវប្រើដៃវាយអក្សរគ្រប់ពេល​​ រួម​ទាំង​ការ​ប្រើ​ដៃ​កាន់​ទូរសព្ទ​ក្នុង​ទីតាំង​ដដែល​រយៈ​ពេល​យូរ។ នេះជា​មូលហេតុ​ដែល​ម្រាមដៃពេលខ្លះឈឺ ឬពិបាកធ្វើ​ចលនា​ ឥរិយាបថ​នេះ​អាច​នាំឲ្យ​មាន​ការ​រលាក​សរសៃ​ពួរ រួម​ទាំង​ការ​រលាក​នៅ​ក្នុង​សរសៃពួរ​នៃ​ម្រាមដៃ ធ្វើឲ្យ​សរសៃពួរកាន់​តែក្រាស់។ សម្រាប់​ហេតុផលនេះ វា​នាំ​ឲ្យ​ម្រាមដៃ​របស់​យើង ​មិន​អាច​លាតសន្ធឹង​បាន​ធម្មតា​នោះទេ។

សម្រាប់​បុគ្គលិក​ដែល​​ធ្វើ​ការ​ដូច​គ្នា​ជា​រៀង​រាល់​ថ្ងៃ​ អាច​មាន​ជំងឺ​ការិយាល័យ​ដូច​ដែល​បាន​រៀបរាប់​ខាងលើ​នេះ។ ដូច្នេះ​ហើយ យើង​គួរ​សង្កេត​មើល​រោគ​សញ្ញា​ដំបូង​នៃ​ជំងឺ​នេះ​ឲ្យ​បាន​ល្អ។ ប្រសិនបើ​មាន​រោគ​សញ្ញា​ណាមួយ​កើត​ឡើង អ្នក​ត្រូវ​ប្រញាប់​ព្យាបាល​ជាបន្ទាន់​ ជាមួយ​វិធីសាស្ត្រ​វេជ្ជសាស្ត្រ​តាម​ការណែនាំ​ពី​គ្រូពេទ្យ៕

ប្រែសម្រួល៖ សាង ស្រីល័ក្ខ

ចុចអាន៖តើការផឹកទឹកត្រជាក់ ពិតជាគ្រោះថ្នាក់ដល់សុខភាពមែនទេ?

ចុចអាន៖អ្នកជំងឺខ្សោយបេះដូង គួរកាត់បន្ថយការញ៉ាំមឹក

The post បុគ្គលិកធ្វើការក្នុងអូហ្វីស បើចេញរោគសញ្ញា ៣ នេះប្រញាប់ជួបពេទ្យ appeared first on Kampuchea Thmey Daily.

​ CDC ព្រមានថា ហានិភ័យនៃការបញ្ជូនវីរុស Covid-19 នៅក្នុងខ្យល់មិនថយចុះនៅឡើយ ​ពោលគឺគ្រប់គ្នាអាចឆ្លងកូវីដបានគ្រប់ពេល ប្រសិនមិនប្រកាន់ខ្ជាប់វិធានសុខាភិបាលនោះទេ។

ដូច្នេះ នៅពេលអ្នកវិលត្រឡប់ចូលកន្លែងធ្វើការវិញ ឬទៅការិយាល័យ វេជ្ជបណ្ឌិតជំនាញណែនាំឱ្យបន្តរក្សាគម្លាតយ៉ាងហោច ១.៥ ម៉ែត្រ ឬ ២ ម៉ែត្រ ដើម្បីធានាសុវត្ថិភាពសម្រាប់ខ្លួនឯងនិងមិត្តរួមការងារផងដែរ។

លោកបណ្ឌិត Anthony Fauci មកពី CDC មានប្រសាសន៍ថា នៅពេលអ្នករក្សាគម្លាតបានខ្ជាប់ខ្ជួន ការចម្លងពីមនុស្សម្នាក់ទៅមនុស្សម្នាក់នឹងត្រូវកាត់បន្ថយ។ យ៉ាងណាមិញមនុស្សនៅតែអាចឆ្លងវីរុស Covid-19 ទោះបីជានៅឆ្ងាយពីអ្នកដទៃក៏ដោយ។ ហេតុនេះការសំខាន់មួយទៀតដែលមិនគួរបំភ្លេចចោល គឺបន្តពាក់ម៉ាស គ្រប់ពេលចេញពីផ្ទះ ជាពិេសសនៅកន្លែងធ្វើការតែម្ដង ព្រោះជាទីតាំងប្រមូលផ្ដុំមនុស្ស និងមានខ្យល់ចេញចូលមិនគ្រប់គ្រាន់។

គួរធ្វើបែបណាទើបអាចទុកចិត្តបានថា កន្លែងការងារឬការិយាល័យ មានសុវត្ថិភាព?

ការរៀបចំឱ្យមានខ្យល់ចេញចូលបានល្អ នៅតាមទីតាំងធ្វើការដែលបិទជិត ជាវិធីសាស្ត្រល្អដើម្បីការពារកំហាប់មេរោគនៅក្នុងខ្យល់និងកាត់បន្ថយហានិភ័យនៃការប៉ះពាល់វីរុស។ តាមអគារ គួរតែប្រើម៉ាស៊ីនត្រជាក់ឱ្យបានតិច និងបើកចំហរទ្វារបង្អួចតាមដែលអាចធ្វើបាន។

ទីភ្នាក់ងារ CDC ក៏ផ្តល់អនុសាសន៍បន្ថែមផងដែរនូវដំណោះស្រាយផ្សេងទៀតដូចជា ផ្លាស់ប្តូរវេនគ្នាធ្វើការដើម្បីកាត់បន្ថយការប្រមូលផ្ដុំ ហើយបើមានការប្រជុំគួរតែធ្វើឡើងនៅខាងក្រៅបន្ទប់។ រីឯអគារធ្វើការដែលប្រើជណ្តើរយន្ត គួូរតែដើរឡើងតាមជណ្តើរជើងវិញ ទើបជាការល្អ។ មួយវិញទៀត កុំភ្លេចសម្អាតដៃឱ្យបានញឹកញាប់ផង!

ប្រែសម្រួល៖ សន្យា

ប្រភព៖ CNBC

ចុចអាន៖ កូវីដ-១៩ អាចរស់នៅបរិយាកាសខាងក្រៅបានប៉ុន្មានម៉ោង?

ចុចអាន៖ ពាក់ម៉ាសនិងរក្សាគម្លាតខ្ជាប់ខ្ជួន អាចការពារហានិភ័យចម្លងកូវីដ សឹង១០0ភាគរយ

The post វិធានការសុវត្ថិភាពមិនអាចរំលង សម្រាប់អ្នកត្រឡប់ចូលធ្វើការវិញ appeared first on Kampuchea Thmey Daily.

ពិត​ណា​ថា ធ្វើការ​នៅ​ផ្ទះ​គឺ​ជា​សេចក្ដី​សុបិន​របស់​មនុស្ស​ជាច្រើន ជា​ពិសេស​ស្ត្រី​មេផ្ទះ ហើយ​អរគុណ​ចំពោះ​បច្ចេកវិទ្យា​បណ្ដាញ ដែល​ឥឡូវ​បាន​ធ្វើ​ឲ្យ​ក្ដី​សុបិន​នេះ​កំពុង​ក្លាយ​ជា​ការ​ពិត​សម្រាប់​មនុស្ស​កាន់​តែ​ច្រើន​ជាង​មុន។

ការងារ​ដែល​អាច​ធ្វើ​នៅ​ផ្ទះ​ឬ​ក្រៅ​ការិយាល័យ​នា​ថ្ងៃ​អនាគត​មាន​ដូចជា៖

១ អ្នកបកប្រែ

យោង​ទៅ​តាម​ការិយាល័យ​ស្ថិតិ​ការងារ អ្នក​បកប្រែ​ភាគច្រើន​ធ្វើ​ការងារ​ពីផ្ទះ ហើយ​ជារឿយៗ ស្ថិតនៅ​ក្រោម​ពេល​វេលា​កំណត់​តាម​កិច្ចព្រមព្រៀង។ បើ​ចង់​ចាប់​យក​អាជីព​នេះ តម្រូវការ​សំខាន់​បំផុត គឺ​អ្នក​បកប្រែ​ត្រូវការ​​ឲ្យ​ស្ទាត់ជំនាញយ៉ាងហោចណាស់ពីរភាសា ឧទាហរណ៍ ខ្មែរ​និង​អង់គ្លេស។ល។

ប្រហែល 22% នៃ​អ្នក​បកប្រែបាន​ចាប់ផ្តើម​ជ្រើស​ការ​ធ្វើការ​ដោយ​ខ្លួនឯង​ចាប់ពីឆ្នាំ 2016 មក មិន​ថា​ក្នុង​ឧស្សាហកម្ម​សេវាកម្ម​វិជ្ជាជីវៈ​វិទ្យាសាស្ត្រ​និង​បច្ចេកទេស  សេវា​អប់រំ​រដ្ឋ​និង​ឯកជន សេវា​វេជ្ជសាស្ត្រ​ខាង​មន្ទីរពេទ្យ និង​បែបបទ​រដ្ឋាភិបាល​ក្ដី ។

ពួកគេ​អាច​ទទួលកម្រៃ​តាម​ម៉ោង តាម​សន្លឹក​អត្ថបទឬតាមកិច្ចព្រមព្រៀងគម្រោង។​

២ អ្នក​អភិវឌ្ឍន៍​គេហទំព័រ

វា​ងាយស្រួល​ណាស់​ក្នុង​ការ​បង្កើត​គេហទំព័រ​ផ្ទាល់ខ្លួន​គ្រាន់​តែ​សិក្សា​ដោយ​ឥតគិតថ្លៃ​តាម​អ៊ិនធើណេត។ ទោះយ៉ាងណា ភាគច្រើនមិនមាន​លទ្ធភាពដូច​មាន​អ្នក​បង្កើត​គេហទំព័រ​ជួយនោះទេ។ អាជីព​នេះ​អ្នក​នៅតែ​អាច​ចាប់​យក​ជា​អនាគត​ល្អ​មួយ​ទៅ​មុខ​បានដដែលដោយ​អាច​ធ្វើការ​នៅ​ផ្ទះ​ឬ​ពី​កន្លែង​ណា​ផ្សេងទៀត​ឲ្យ​តែ​មាន​កុំព្យូទ័រ​យួរ​ដៃ​និង​ភ្ជាប់​អ៊ីនធើណិត​ក្នុង​ល្បឿន​យ៉ាង​លឿន។

រឹត​តែ​ល្អ​ថែម​ទៀត​ប្រាក់ឈ្នួល​ជា​មធ្យម​របស់​ជាតិ​សម្រាប់​អ្នក​បង្កើត​គេហទំព័រគឺ ៦៦,១៣០ ដុល្លារ​ក្នុង​ឆ្នាំ ២០១៦ ដែល ១០% ទទួល​បាន​ជា​មធ្យម ១១៩.៥៥០ ដុល្លារ។ ហើយ​ជា​ធម្មតា​អ្នក​មិន​ត្រូវ​ការ​សញ្ញាប័ត្រ​កម្រិតខ្ពស់​ដើម្បី​ចាប់ផ្ដើម​ធ្វើការ​នៅ​ក្នុង​វិស័យ​នេះ​ទេ។ អ្វី​ដែល​អ្នក​ត្រូវ​ការ​គឺ​ការ​អប់រំ​ក្រោយ​មធ្យម​សិក្សា​បទពិសោធន៍​អនុវត្ត​និង​ផលប័ត្រនៃ​គេហទំព័រ​ជោគជ័យ​ដែល​អ្នក​បាន​បង្កើត​និង​គ្រប់គ្រង។ មាន​ជំរំ​ចាប់ផ្ដើម​សរសេរ​កូដ​ដែល​ត្រូវ​បាន​រចនា​ឡើង​ដើម្បី​បង្រៀន​ជំនាញ​សរសេរ​កម្មវិធី​ក្នុង​រយៈពេល​តែ​ប៉ុន្មាន​ខែ​ខ្លី​ប៉ុណ្ណោះ។

៣ អ្នក​បញ្ចូល​ទិន្នន័យ

អាជីវកម្ម​ជាច្រើន​ត្រូវការបុគ្គលិកផ្នែកបញ្ចូលទិន្នន័យផ្សេងៗទៅក្នុងប្រព័ន្ធរបស់ពួកគេ មិន​ថា​ទិន្នន័យ​នោះ សម្រាប់​ប្រើ​ដើម្បី​តាមដាន​សារពើ​ភណ្ឌ ឬ​ការ​នាំចេញ ការ​បង្កើត​ផែនការ​អាជីវកម្ម​ឬ​វាស់​ស្ទង់​លទ្ធផល។ល។ អាជីព​នេះ អាច​ធ្វើការ​នៅ​ផ្ទះ​បាន ដោយ​ត្រូវការ​តែ​ជំនាញ​កុំព្យូទ័រ​និង​ការ​វាយ​អក្សរ​បាន​លឿន ។ ការងារ​នេះ​អាច​បាន​ប្រាក់​ច្រើន អាស្រ័យ​លើ​ទំហំ​លទ្ធផល ពោល​គឺ​ធ្វើ​ច្រើន​បានច្រើន​ ធ្វើ​តិចបានតិច។ ប៉ុន្តែ​តម្រូវការចាំ​បាច់គឺត្រូវមាន​ភាព​ម៉ត់ចត់​លើគ្រប់ទិន្នន័យ​ដែលផ្សាយ​ចេញ។

៤ អ្នកតំណាងមជ្ឈមណ្ឌលទូរស័ព្ទ

អាជីវកម្មជាច្រើនត្រូវការកម្មករដែលអាចឆ្លើយទូរស័ព្ទបានគ្រប់២៤​ម៉ោងដល់អតិថិជន និងកត់ត្រា រាល់ដំណើរការ បញ្ជា​ទិញឬដោះស្រាយ​ជាមួយការផ្តល់យោបល់​ត្រឡប់មក​វិញ​របស់អតិថិជន។ ការងារ​បែបនេះ​នឹង​មាន​កាន់តែច្រើនឡើង ៗ ទៅអនាគត​ដោយបុគ្គលិក​គ្រាន់​តែ​កាន់​ទូរសព្ទ​របស់​ក្រុមហ៊ុនទៅ​ជាមួយ។ អ្វី​ដែល​ជំនាញ​នេះ​ត្រូវការ គឺ​មធ្យោបាយ​ឆ្លងឆ្លើយ​អត់ធ្មត់ និងដោះស្រាយបញ្ហា​បានរហ័ស។ សំឡេង​ផ្អែម​ពិរោះ​និង​និយាយ​ភាសា​បាន។

៥ អ្នកនិពន្ធ​និង​ស្រាវជ្រាវ

សរសេរ​ប្លក់ សរសេរ​សៀវភៅ អត្ថបទ​ព័ត៌មាន​ ការ​កសាង​ទស្សនិកជន​លើ​បណ្ដា​គេហទំព័រ រួមមាន​ទាំង​ការផ្សាយពាណិជ្ជកម្ម ការ​សរសេរ​លក់​ផលិតផល​ក្ដី​កាន់​តែ​មាន​ទីផ្សារ​ហើយ​ធ្វើការ​ពី​កន្លែង​ណា​មក​ក៏បាន។

ការងារស្រាវជ្រាវរឹតតែ​សំខាន់ណាស់សម្រាប់គ្រប់វិស័យទៅអនាគតខាងមុខ ដែល​ត្រូវ​ដឹង​ច្បាស់​ថា​យើង​កំពុង​សិក្សាអំពីអ្នកណា ប្រធានបទអ្វី ស្រាវជ្រាវ​ប្រើពាក្យគន្លឹះអ្វី? ឯកសារ​យោង​ទំាង​អស់​នឹង​ស្តុក​នៅលើអ៊ីនធើណេត  ដែល​អាចឲ្យ​​យើងធ្វើការ​នេះ​នៅផ្ទះបាន។

៦ ភ្នាក់ងារ​ទេសចរណ៍​ផ្ទាល់ខ្លួន

ទោះបីជាតម្រូវការភ្នាក់ងារទេសចរ ត្រូវបានគេរំពឹងថា នឹងថយចុះក្នុងរយៈពេលមួយទសវត្សរ៍​ខាងមុខ​ក៏ដោយ ក៏​ឱកាសនៅតែ​មានសម្រាប់ភ្នាក់ងារទេសចរណ៍រូបណា ដែលអាច​ទាញ​យក​ទីផ្សារ​លើ​អ៊ិនធើណេតដើម្បីរកប្រាក់ចំណូលតាមរយៈ​ការ​រៀបចំផែនការដំណើរ​ផ្សងព្រេង​គួរ​ឲ្យ​ចាប់ចិត្ត​នានា។ នេះការងារប្រហែលជាល្អបំផុតសម្រាប់យុវវ័យ​ ដែល​មាន​ជំនាញ​ស្គាល់​នៅ​តំបន់​ជាក់លាក់​ណាមួយ មិនថាទីនោះល្បីឬអត់​បើអ្នកមាន​អ្វីមួយ​ទាក់ទាញ​ភ្ញៀវ​អ្នក​នឹង​អាច​ធ្វើ​បាន។

៧ អ្នក​ឌីសាញ

ការងារ​រចនា​រូបភាព​នឹងកាន់តែមាន​សេរីភាពថែមឡើង។ ឥឡូវនេះ កាន់​តែ​តិច​ទៅៗ​ហើយ​សម្រាប់​អ្នក​ដែល​មាន​បំណង​ចង់ធ្វើការ​នៅមួយ​កន្លែង​ផ្នែក​នេះ។​ ពួកគេ​អាច​ធ្វើការ​ពី​ផ្ទះ​មក​ប៉ុន្តែ ពួកគេ​អាច​កសាង​បណ្ដាញ​ដើម្បី​ចែករំលែក​បទពិសោធន៍​ដល់​គ្នា​ទៅវិញទៅមកបាន។

ការ​សិក្សាមួយកាល​ពីឆ្នាំ ២០១៧ ពី Upwork និង Freelancer Union បាន​ព្យាករណ៍​ឃើញ​ថា​កម្លាំង​ពលកម្ម​ច្រើន​ជាង​ពាក់​កណ្ដាល​នៃ​មនុស្ស​ពេញវ័យ នឹង​ពេញចិត្ត​ជ្រើស​ធ្វើការងារ​ឯករាជ្យ​នៅ​ទសវត្សរ៍​ក្រោយ​ៗ​នេះ ដោយ​គេ​តម្កល់​សេរីភាព​ស្មើ​នឹង​ការ​ច្នៃប្រឌិត៕

ចុចអាន៖ជួប​សមាជិក​ក្រុម​ដែល​ពិបាក​ធ្វើការ​ជាមួយ ​ក្នុងនាម​ជា​មេក្រុម ​គួរ​ធ្វើ​យ៉ាងម៉េច?

The post អាជីព​មិន​ត្រូវការ​ការិយាល័យ​ ​ មាន​មិន​ខ្វះ​ទេ​សម្រាប់​អ្នក​ស្រលាញ់​សេរីភាព appeared first on Kampuchea Thmey Daily.

អ្នក​ជំនាញ​ខ្លះ បាន​ចាត់ទុកគោល​នយោបាយ​ប្រឆាំង​ការ​ចែចង់​នៅ​ការិយាល័យ​ថា ជា​ផ្នែក​បន្ថែម​នៃ​គោលនយោបាយ​ហើយ​ការណាត់ជួប Dating នៅ​កន្លែង​ធ្វើការ​និង​ជំរុញ​ឲ្យ​ទំនាក់ទំនង​នៅ​កន្លែង​ធ្វើការ​ក្លាយ​ជា​ឯកជន​ជា​ជាង​វិជ្ជាជីវៈ​មាន​ក្រម​សីលធម៌។

អាកប្បកិរិយា​ទាំងនោះ មាន​ទំនោរ​ទៅ​ជា​អាកប្បកិរិយា​ខាង​សភាវគតិ​រំខានការងារ​និង​សាមគ្គី​ផ្ទៃក្នុង​អង្គភាព សូម្បី​តែ​ក្នុង​ចំណោម​អ្នកដែល​មាន​ទំនាក់ទំនង​ស្នេហា​ភេទដូចឬ​ផ្ទុយគ្នា​ក៏ដោយ។

ចំណៃកការសិក្សាស្រាវជ្រាវថ្មីមួយក៏បានបង្ហាញដែរថា ការចែចង់​នៅ​កន្លែង​ធ្វើការ​រំខាន​និង​បង្កើត​អារម្មណ៍​វិជ្ជមាន និង​ភាព​ធ្វេសក្នុងការផ្តោតអនុវត្តតួនាទី។

អ្នកនិពន្ធការសិក្សា Leah Sheppard ជាសាស្ត្រាចារ្យ​គ្រប់គ្រង​ផ្នែក​គ្រប់គ្រង​នៅ​សាកលវិទ្យាល័យ Washington State បែរ​ជា​និយាយ​ថា នៅ​ពេល​ការ​ចែចង់​កើត​មាន​ មនុស្ស​បង្កើន​អារម្មណ៍​ល្អលើខ្លួនឯង ពួកគេ​មានអារម្មណ៍​ទាក់ទាញ រួមទាំង​អ្នក​មាន​អំណាច​ដែល​ទាំងនេះ​គឺ​ជា​ធនធាន​ផ្លូវចិត្ត​នាំ​ឲ្យ​មានការកាត់បន្ថយភាពតានតឹង ប៉ុន្តែ​តើ​ពួកគេ​នៅរវើរវាយ​នឹក​រឿង​រៀបការ ការរួមភេទ ឬបំពេញការងារ?

នៅ​ក្នុង​ការសិក្សាចំនួន ៣ ដែលត្រូវបាន​បោះពុម្ពផ្សាយ​នៅក្នុង​ទស្សនាវដ្តី Organizational Behavior and Decision Processes, លោកស្រី Sheppard សហអ្នកនិពន្ធ​បាន​វិភាគ​ការ​ស្ទង់មតិ​ពី​កម្មកររាប់រយនាក់នៅ​សហរដ្ឋអាមេរិក កាណាដា​និង​ហ្វីលីពីន អំពី​បទ ពិសោធ​របស់​ពួកគេ​ក្នុង​ការ​ទទួល​បាន“ អាកប្បកិរិយា​ផ្លូវ​ភេទ​ឬ​ចែចង់” ដែល​រវាង​និយោជិក​ពីរ​នាក់​ឬ​ច្រើន​នាក់ យល់ថា ត្រូវ​បាន​គេ​មើលងាយ​ឬ​អាម៉ាស់មុខ ខ្លះ​យល់ថា​អារម្មណ៍ល្អ​ ខ្លះ​មិន​ចង់​មក​ធ្វើការ​។

ពួកគេ​បានសរសេរថា“ សំខាន់​បំផុត​អាកប្បកិរិយា​ទាំងនេះ​មិន​តែងតែ​ត្រូវ​បាន​ជំរុញ​ដោយ​ការ​ចាប់អារម្មណ៍​ពី​មនោសញ្ចេតនា​នោះទេ ហើយ​ទំនោរ​ទៅជា​អាកប្បកិរិយា​ខាង​សភាវគតិ​សូម្បី​តែ​ក្នុង​ចំណោម​អ្នក​ដែល​មាន​ទំនាក់ទំនង​ផ្លូវ​ភេទ​ផ្ទុយគ្នា​ក៏ដោយ” ។

ពួកគេក៏បានវាយតម្លៃពីកម្រិតស្ត្រេសរបស់និយោជិកនិងសិក្សាថា តើ​អាកប្បកិរិយា​ផ្លូវភេទ​ក្នុងសង្គមការងារ អាច​ដើរតួជា​អ្នកការពារប្រឆាំងនឹងផលវិបាកនៃស្ត្រេសផ្សេងៗដែរឬទេ។

អ្នកនិពន្ធបានបែងចែកអាកប្បកិរិយាផ្លូវភេទសង្គម ដែលត្រូវបាន​គេ​ចាត់ថ្នាក់​នៅ​ទីនេះ​ថា​ជា​ការចែចង់ (ឧទាហរណ៍​ដូចជាការបង្កហេតុឬត្រូវបានគេសរសើរថា ស្អាតឬសង្ហារ) និង​និទាន​រឿងផ្លូវភេទ (នរណាម្នាក់ចែករំលែករឿងផ្ទាល់ខ្លួន​អំពី​បទពិសោធន៍​ផ្លូវភេទ​ពីមុនឬប្រាប់រឿង​កំប្លែងដែល​ស្រដៀងពីទម្រង់នៃការយាយី​ទាញចូលរឿង​ផ្លូវ​ភេទ​ដែល​អ្នក​រួម​ការងារ​មិន​ចង់​ឮ​ជា​អាកប្បកិរិយាផ្លូវភេទ​នៅការិយាល័យ​។

កម្មករមាននិន្នាការមិនចូលចិត្តការចែចង់ពីថៅកែ

ក្នុង​ចំណោមការរកឃើញ​នេះផងដែរ បុគ្គលិក​កម្មករ​ជាច្រើន​មាននិន្នាការ​មិនចូលចិត្ត​អាកប្បកិរិយា​ផ្លូវ​ភេទកើតចេញពីនរណាម្នាក់ដែលមានអំណាចលើពួកគេដាច់ខាត។ ពួកគេ​យល់ថា វាបាន បង្កើតផលប៉ះពាល់​អវិជ្ជមាន​និង ភាពអយុត្តិធម៌នៅកន្លែងធ្វើការ បង្កើត​ស្ត្រេស​គេង​មិន​លក់និងភាពតានតឹងការងារ ការមិន​ឲ្យ​តម្លៃស្ថាប័ន។

បុគ្គលិក​ដែល​ភ្ជាប់​វប្បធម៌​ចែចង់​ពី​កន្លែង​ផ្សេងចូលមក

មាន​មនុស្ស​ខ្លះបានមកដល់ហើយ​បង្ករឿងនេះកើតឡើងដែលមិនធ្លាប់មាន​ពីមុនមក។ ពួកគេ​ផ្ញើសារ​ទៅគោលដៅ តែងខ្លួន​ដូច​ដើរលេង​សមុទ្រ ហើយ​ពេលប្រជុំមិនមាន​លក្ខណៈអាជីព បង្កើតបរិយាកាស​ទន់ទាបកើតមានឡើង។ ការណែនាំនៃសៀវភៅដដែល​គឺ​បុគ្គល​ដែល​មាន​បញ្ហា​​គួរត្រូវបានជូនដំណឹង ហើយ​ពួកគេ​មាន​ភាគរយ​តិច​ណាស់​ដែល​អាច​កែខ្លួន​បានព្រោះ​នោះ​ពុំមែន​ជាជំនាញ តែចរិតមាយាទ ដែល​អ្នក​គ្រប់គ្រង​ត្រូវមធ្យ័ត​សាកសួរនាំ​ច្បាស់​មុន​ពេល​រើស​ចូល​មក៕

ប្រែសម្រួល៖​​ សុភា

ប្រភព marketwatch

ចុចអាន៖ភាព​ជា​អ្នកដឹកនាំ៖ ដំណោះស្រាយ​ជាមួយ​បុគ្គលិក​កេង​បន្លំ

ចុចអាន៖មិនទៅការិយាល័យ ធ្វើការងារ​ពីផ្ទះយ៉ាងណាឱ្យ​មានប្រសិទ្ធិភាព?​

The post ភាព​ជា​អ្នកដឹកនាំ៖ យល់​អំពី​ផលវិបាក​នៃ​វប្បធម៌​ចែចង់​នៅ​ការិយាល័យ appeared first on Kampuchea Thmey Daily.