កីឡាករបាល់ទាត់ Archives - Kampuchea Thmey Daily

កែវ សុខផេង ប្រាប់ថា នៅមិនសុខចង់ចូលទីលានអាជីពវិញ

chean virakbot — Tue, 11 Jun 2024 01:47:06 +0000

អតីតកីឡាករបាល់ទាត់ដ៏ឆ្នើម កែវ សុខផេង ចង់វិលចូលទីលានបាល់ទាត់អាជីពវិញ បន្ទាប់ពីរូបគេបានប្រកាសចូលនិវត្តន៍កាលពីខែមេសា ឆ្នាំ២០២៣ ដោយសាររបួសរ៉ាំរៃបង្ខំចិត្តឲ្យរូបគេព្យួរស្បែកជើងទាំងវ័យក្មេង។

ជួបជាមួយសារព័ត៌មាន«កម្ពុជាថ្មី»យប់ថ្ងៃអាទិត្យ ទី៩ ខែមិថុនា ឆ្នាំ២០២៤ ក្នុងព្រឹត្តិការណ៍ប្រកួតបាល់ទាត់សប្បុរសធម៌ដើម្បីមន្ទីរពេទ្យគន្ធបុប្ផា កែវ សុខផេង បានប្រាប់ថា បន្ទាប់ពីចូលនិវត្តន៍ពេលឃើញកីឡាករដទៃលេងនៅលើទីលានទាំង ក្លិប និងជម្រើសជាតិ រូបគេបានពិតជាចង់ចូលលេងមែនទែន។ រូបគេមានអារម្មណ៍មិនសុខស្រួលសោះគឺចិត្តចង់ចូលលេងតែម្តង។

កីឡាករបាននិយាយថា ៖«ពីមុនខ្ញុំលេងទាំងក្លិប និងជម្រើសជាតិ។ ឥឡូវនេះពេលឃើញគេលេង ខ្ញុំមានអារម្មណ៍ដូចជារមាស់ដៃ រមាស់ជើង ចង់ចូលលេងដែរ តែដោយសារបញ្ហាសុខភាព។ ណាមួយខ្ញុំឈឺច្រើនផង អីចឹងអត់អាចលេងអាជីពបានទេ»។

នៅពេលសួរថា តើអាចនឹងវិលចូលទីលានបាល់ទាត់អាជីពវិញទេ ដោយសារវ័យក្មេង? កែវ សុខផេង បានឆ្លើយថា ៖«ខ្ញុំអត់ទាន់ច្បាស់ទេ ហើយក៏មិនទាន់ហ៊ាននិយាយចូលនិវត្តន៍១០០%ដែរ។ បើខ្ញុំប្រាប់ថា ខ្ញុំនឹងលេងវិញ តែសុខភាពខ្ញុំនៅតែមិនល្អគឺនៅតែមិនអាចលេងបាន។ ប៉ុន្តែបើពេលណាមួយសុខភាពខ្ញុំល្អប្រសើរ ហើយចូលលេងវិញ នោះគឺខុសនឹងសំដីខ្លួនឯងថា ចូលនិវត្តន៍១០០%»។

សម្រាប់ការបង្ហាញខ្លួននៅលើទីលានជាថ្មីក្នុងការប្រកួតបាល់ទាត់មិត្តភាពសប្បុរសធម៌ដើម្បីមន្ទីរពេទ្យគន្ធបុប្ផា កែវ សុខផេង លេងឲ្យក្រុមបាល់ទាត់ សសយក ដែលសុទ្ធតែថ្នាក់ដឹកនាំ និងមន្ត្រីជាន់ខ្ពស់ រួមជាមួយនឹងមិត្តរួមអាជីពចាស់ដូចជា ចាន់ វឌ្ឍនាកា និង ប្រាក់ មុន្នីឧត្តម។

កែវ សុខផេង បានលើកឡើងថា កម្មវិធីសប្បុរសធម៌នេះរៀបចំបានល្អ។ រូបគេពិតជារំភើបរីករាយដែលថ្នាក់ដឹកនាំផ្តួចផ្តើមឲ្យមានកម្មវិធីនេះមានមនុស្សច្រើនចូលរួម។ រូបគេមានមោទនភាពដែលបានជាចំណែកតូចមួយចូលរួមសកម្មភាពដើម្បីកុមារកម្ពុជា។

កែវ សុខផេង ត្រូវបានចាត់ទុកជាកីឡាករបាល់ទាត់កម្ពុជាម្នាក់ទទួលបានជោគជ័យទាំងក្នុងជម្រើសជាតិ និងក្លិប ចាប់តាំងពីរូបគេបានលេងបាល់ទាត់អាជីពនៅឆ្នាំ២០១២។ ពីឆ្នាំ២០១២ ដល់ ២០១៥ រូបគេបង្ហាញខ្លួនបាន៣៧ដងនៅលើទីលាន និងរកបាន២១គ្រាប់ឲ្យបឹងកេត។ ពីឆ្នាំ២០១៥-២០១៧ រូបគេលេងឲ្យភ្នំពេញក្រោនដោយបង្ហាញខ្លួនលើទីលាន៥១ដង រកបាន២៧គ្រាប់។

នៅឆ្នាំ២០១៨ កែវ សុខផេង បានលេងនៅក្លិបលីគកំពូលម៉ាឡេស៊ី PKNP ហើយលេងបានតែ៤ដងប៉ុណ្ណោះ ប៉ុន្តែរកបាន១គ្រាប់ដែលបានក្លាយជាកីឡាករកម្ពុជាទី១រកបានគ្រាប់បាល់ក្នុងលីគកំពូលម៉ាឡេស៊ី។ ឆ្នាំ២០១៨ រូបគេបានចូលរួមជាមួយវិសាខាដោយបង្ហាញខ្លួនលើទីលាន៩៤ដង រកបាន៥១គ្រាប់។

កែវ សុខផេង ត្រូវបានកោះហៅចូលតំណាងជាតិលើឆាកអន្តរជាតិតាំងពីឆ្នាំ២០១៥ទាំងក្រុមធំ និងក្រុមយុវជន។ ការបង្ហាញខ្លួនឲ្យក្រុមយុវជនអាយុក្រោម២៣ និងក្រុមធំ៦២លើក រកបាន១៥គ្រាប់ក្នុងព្រឹត្តិការណ៍សំខាន់ជាច្រើនដូចជា ជម្រុះជើងឯកពិភពលោក ជម្រុះជើងឯកអាស៊ី ជើងឯកអាស៊ាន កីឡាស៊ីហ្គេម និងមិត្តភាពអន្តរជាតិជាដើម។

ចាប់តាំងពីចុងឆ្នាំ២០២២ កែវ សុខផេង បានរបួសញឹកញាប់ និងមិនសូវបានចូលលេងទេ។ នៅថ្ងៃទី៥ ខែមេសា ឆ្នាំ២០២៣ រូបគេបានប្រកាសជាផ្លូវការពីការចូលនិវត្តន៍ក្នុងវ័យ៣១ឆ្នាំ៕

អត្ថបទ៖ វីរបុត្រ

The post កែវ សុខផេង ប្រាប់ថា នៅមិនសុខចង់ចូលទីលានអាជីពវិញ appeared first on Kampuchea Thmey Daily.

លក្ខណៈពិសេស៣ធ្វើឲ្យកីឡាករខ្មែរ-បារាំង គួច ដានី ជាប់ចិត្តកម្ពុជា

chean virakbot — Fri, 23 Feb 2024 03:32:30 +0000

កីឡាករបាល់ទាត់កម្ពុជា និងព្រះខ័នរាជស្វាយរៀង គួច ដានី បានកំពុងប្រកបអាជីពបាល់ទាត់នៅកម្ពុជារយៈពេលជាង១០ឆ្នាំហើយគិតចាប់តាំងពីឆ្នាំ២០១២ជាពេលរូបគេចូលរួមក្លិបភ្នំពេញក្រោនជាលើកដំបូង។

ការស្នាក់នៅក្នុងប្រទេសកម្ពុជារយៈពេលជាង១០ឆ្នាំកន្លងទៅ គួច ដានី ពិតជាចូលចិត្ត និងស្រឡាញ់របៀបរស់នៅក្នុងប្រទេសកម្ពុជា។ កីឡាករបានលើកឡើងពីលក្ខណៈពិសេស៣យ៉ាងដែលរូបគេពេញចិត្តបំផុតនៅក្នុងទឹកដីកំណើតរបស់ឪពុកម្តាយខ្លួន។

គួច ដានី បានរៀបរាប់ក្នុងបទសម្ភាសជាសារព័ត៌មាន«កម្ពុជាថ្មី»ថា ៖«ទី១កម្ពុជាមានអាកាសធាតុល្អ។ បើប្រៀបធៀបជាមួយស្រុកបារាំងនៅខែរងាពិបាកខ្លាំង។ ពិបាកទ្រាំ ពីព្រោះខ្ញុំចាញ់រងា។ អីចឹងហើយបានជាខ្ញុំជ្រើសរើសប្រទេសកម្ពុជា»។

«ទី២ មនុស្សស្លូត ហើយរួសរាយ ហើយទី៣ម្ហូបឆ្ងាញ់។ ពីដំបូងឡើយ ខ្ញុំសាកភ្លក្សម្ហូបខ្មែរតាមមិត្តភក្តិ។ ពេលភ្លក្សទៅចេះតែឆ្ងាញ់ដូចសម្លម្ជូរគ្រឿងសាច់គោ តុងយ៉ាំ ឡុកឡាក់ជាពិសេស។ ប្រជាជនកម្ពុជារួសរាយរាក់ទាក់ បង្ហាញភាពកក់ក្តៅស្រឡាញ់ដាក់គ្នា ចេះជួយគ្នាទៅវិញទៅមក»។

ថ្វីបើឪពុកម្តាយជាជនជាតិខ្មែរ ប៉ុន្តែបុរសកើតនៅប្រទេសបារាំងរូបនេះមិនចេះនិយាយភាសាខ្មែរទេពីដំបូង។ ការចូលមកប្រទេសកម្ពុជាកាលពីឆ្នាំ២០១២ រូបគេមិនចេះនិយាយភាសាខ្មែរ។ ទោះបីជាយ៉ាងណា បន្ទាប់ពីព្យាយាមនិយាយជាមួយមនុស្សជុំវិញខ្លួន និងតាមរយៈ Google translate បានធ្វើឲ្យរូបគេចេះនិយាយភាសាខ្មែរយ៉ាងច្បាស់។

ខ្សែបម្រើការពាររបស់ព្រះខ័នរាជស្វាយរៀងបច្ចុប្បន្នបាននិយាយថា ៖«មុនមកស្រុកខ្មែរ ខ្ញុំអត់ចេះនិយាយភាសាខ្មែរទេ។ ពេលមកដល់មិត្តភក្តិបង្រៀននិយាយខ្មែរ។ ដំបូងឡើយនិយាយជាមួយមិត្តភក្តិជាភាសាអង់គ្លេស បន្ទាប់មកពួកគាត់ជួយបង្រៀននិយាយខ្មែរម្តងៗតិច ហើយខ្ញុំប្រើ Google translate ផង យូរៗទៅក៏ចេះនិយាយខ្មែរ»។

រហូតដល់ពេលនេះ គួច ដានី បានលេងឲ្យក្លិបកម្ពុជាចំនួន៤ហើយ បន្ទាប់ពីមកប្រទេសកម្ពុជាលើកដំបូងជាមួយក្រុមបាល់ទាត់ខ្មែរ-បារាំង បែកហ្ស៊ិក-នូវែលហ្សេឡុងសម្រាប់ការប្រកួតមិត្តភាពជាមួយភ្នំពេញក្រោន។ នៅពេលនោះ ភ្នំពេញក្រោនបានចាប់ចិត្តហើយយករូបគេរហូតដល់ឆ្នាំ២០១៦។ រដូវកាល២០១៧-១៨ រូបគេបានចូលរូមជាមួយអង្គរថាយហ្គឺរ និង២០១៧-២២ជាមួយណាហ្គាវើលដ៍ ហើយចុងក្រោយជាមួយព្រះខ័នរាជស្វាយរៀងចាប់ពីឆ្នាំ២០២៣។ រូបគេបានឈ្នះជើងឯកលីគកំពូលកម្ពុជា២លើកគឺជាមួយភ្នំពេញក្រោន និងណាហ្គាវើលដ៍៕

ទស្សនាវីដេអូ សូមចូល

https://www.facebook.com/kptdaily/videos/770915838302386

អត្ថបទ៖ វីរបុត្រ

The post លក្ខណៈពិសេស៣ធ្វើឲ្យកីឡាករខ្មែរ-បារាំង គួច ដានី ជាប់ចិត្តកម្ពុជា appeared first on Kampuchea Thmey Daily.

ទីបំផុត កីឡាករថៃ ចេញមុខបញ្ជាក់មូលហេតុ ដែលខ្លួនគប់មេដាយ និងតុក្កតាស៊ីហ្គេម ទៅកាន់អ្នកគាំទ្រ

Sok Sovann — Thu, 18 May 2023 00:46:47 +0000

ប្រជាជនកម្ពុជា មិនពេញចិត្តទាល់តែសោះចំពោះអាកប្បកិរិយារបស់កីឡាករថៃ Jonathan Khemdee ដែលបានគប់តុក្កតា និងមេដាយប្រាក់ ទៅកាន់អ្នកគាំទ្រ ក្រោយការប្រកួតបាល់ទាត់វគ្គផ្តាច់ព្រ័ត្រស៊ីហ្គេម រវាងក្រុមបាល់ទាត់អាយុក្រោម២២ឆ្នាំថៃ ជាមួយ ឥណ្ឌូណេស៊ី។

ថៃ បានប្រកួតចាញ់ឥណ្ឌូណេស៊ី ក្នុងលទ្ធផល ៥-២ នៅម៉ោងបន្ថែម១៥នាទីពីរដង ហើយហេតុផលនៅពីក្រោយទង្វើរបស់ខ្សែការពារកូនកាត់រូបនេះ គឺដោយសារតែគាត់មិនពេញចិត្តនឹងការកាត់ក្តីរបស់អាជ្ញាកណ្តាល ក្នុងការប្រកួត។

ទោះបីជាយ៉ាងណាក៏ដោយ ក្រោយពីមានការរិះគន់យ៉ាងចាស់ដៃ Jonathan Khemdee បានចេញមុខបកស្រាយ ដោយបង្ហោះក្នុងគណនី Instagram របស់ខ្លួនថា “សួស្តី អ្នកទាំងអស់គ្នា ខ្ញុំបានឲ្យមេដាយប្រាក់ និងតុក្កតាទៅអ្នកគាំទ្រ ព្រោះខ្ញុំចង់ថ្លែងអំណរគុណចំពោះហ្វេន ដែលបានមកគាំទ្រខ្ញុំដូចកាលពីស៊ីហ្គេមកន្លងទៅ ហើយខ្ញុំគ្មានចេតនា មិនគោរពដល់ការប្រកួត និងមេដាយដែលខ្ញុំបានឈ្នះនោះទេ។ ជាចុងក្រោយ ខ្ញុំសូមអរគុណដល់អ្នកទាំងអស់គ្នាដែលតែងតែគាំទ្រខ្ញុំ”។

ពាក់ព័ន្ធនឹងបញ្ហានេះ Jonathan Khemdee ក៏បង្ហើបផងដែរថា រូបគេអាចសម្រាកពីក្រុមជម្រើសជាតិថៃ ប្រមាណ ២ទៅ៣ឆ្នាំ ប៉ុន្តែថា រូបគេមិនទាន់ច្បាស់ទេថា តើនឹងចាកចេញពីក្រុមដំរីសឹក ឬក៏យ៉ាងណា៕

ប្រែសម្រួល៖ Vann Vann

ប្រភព៖ Thairath

ចុចអាន៖ មកស្គាល់កីឡាករថៃ ដែលគប់ចោលមេដាយ និងតុក្កតាស៊ីហ្គេម ក្រោយប្រកួតចាញ់ ឥណ្ឌូណេស៊ី

The post ទីបំផុត កីឡាករថៃ ចេញមុខបញ្ជាក់មូលហេតុ ដែលខ្លួនគប់មេដាយ និងតុក្កតាស៊ីហ្គេម ទៅកាន់អ្នកគាំទ្រ appeared first on Kampuchea Thmey Daily.

មកស្គាល់កីឡាករថៃ ដែលគប់ចោលមេដាយ និងតុក្កតាស៊ីហ្គេម ក្រោយប្រកួតចាញ់ ឥណ្ឌូណេស៊ី

Sok Sovann — Wed, 17 May 2023 07:02:02 +0000

ប្រជាជនកម្ពុជា មិនពេញចិត្តទាល់តែសោះចំពោះអាកប្បកិរិយារបស់កីឡាករថៃ ដែលបានគប់តុក្កតា និងមេដាយប្រាក់ ទៅកាន់អ្នកគាំទ្រ ក្រោយការប្រកួតបាល់ទាត់វគ្គផ្តាច់ព្រ័ត្រស៊ីហ្គេម រវាងក្រុមបាល់ទាត់អាយុក្រោម២២ឆ្នាំថៃ ជាមួយ ឥណ្ឌូណេស៊ី។

កីឡាករថៃ រូបនេះ មានឈ្មោះ Jonathan Khemdee ពាក់អាវលេខ៤ កាន់តួនាទីជាខ្សែការពារកណ្តាល។ គាត់គឺជាកីឡាករបាល់ទាត់អាជីព បច្ចុប្បន្នលេងឲ្យក្លិប Ratchaburi ក្នុងក្របខ័ណ្ឌកំពូលរបស់ប្រទេសថៃ។

Jonathan Khemdee

Khemdee កើតនៅថ្ងៃទី៩ខែឧសភាឆ្នាំ២០០២ ក្នុងខេត្ត សុរិន្ទ នៃប្រទេសថៃ ប៉ុន្តែធំធាត់ឡើងក្នុងប្រទេសដាណឺម៉ាក។ នៅថ្ងៃទី១០ខែមីនាឆ្នាំ២០២១ Khemdee បានបង្ហាញខ្លួនលើកដំបូងឲ្យក្លិប OB ក្នុងវគ្គ៨ក្រុមចុងក្រោយនៃពានរង្វាន់ ដាណឺម៉ាក ខាប់ ជាមួយក្លិប Midtjylland។

គាត់បានចុះកិច្ចសន្យាអាជីពលើកដំបូងរបស់ខ្លួន ជាមួយក្លិបនេះក្នុងខែកក្កដាឆ្នាំ២០២១។ នៅថ្ងៃទី១៥ខែតុលា ឆ្នាំ២០២១ Khemdee ត្រូវបានកោះហៅចូលក្រុមជម្រើសជាតិថៃអាយុក្រោម២៣ឆ្នាំ សម្រាប់វគ្គជម្រុះ AFC U-23 Asian Cup ឆ្នាំ២០២២។

ហើយនៅថ្ងៃទី២១ខែមករាឆ្នាំ២០២៣ ក្លិប Ratchaburi បានប្រកាសទិញយក Khemdee ដោយធ្វើការបង្ហាញរូបគេ នៅចំពោះមុខអ្នកគាំទ្រនៅកីឡដ្ឋាន Dragon Solar Park៕

ប្រែសម្រួល៖ Vann Vann

ប្រភព៖ Wiki

ចុចអាន៖ Thiago បង្ហោះសារមួយ ក្រោយខ្សែការពារថៃ Jonathan គប់មេដាយទៅអ្នកគាំទ្រ

The post មកស្គាល់កីឡាករថៃ ដែលគប់ចោលមេដាយ និងតុក្កតាស៊ីហ្គេម ក្រោយប្រកួតចាញ់ ឥណ្ឌូណេស៊ី appeared first on Kampuchea Thmey Daily.

សម្ដេចតេជោ ហ៊ុន សែន ណែនាំឲ្យរៀបចំកន្លែងព្យាបាលកីឡាករ-កីឡាការនីរងរបួសក្រោយការប្រកួត ដោយឥតគិតថ្លៃ

sopheak khoun — Wed, 15 Feb 2023 03:17:54 +0000

សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា បានពិភាក្សាជាមួយរដ្ឋមន្ត្រីក្រសួងសុខាភិបាល ដើម្បីរៀបចំទីកន្លែងសម្រាប់ព្យាបាលកីឡាករ-កីឡាការិនី ដែលរងរបួសក្រោយការប្រកួត ហើយការព្យាបាលនោះ មិនតម្រូវឲ្យមានការបង់ប្រាក់ ឡើយ។

សម្ដេចតេជោ ហ៊ុន សែន បានសរសេរនៅលើទំព័រហ្វេសប៊ុក នាព្រឹកថ្ងៃទី ១៥ ខែកុម្ភៈ ឆ្នាំ ២០២៣នេះថា កន្លងមកមានកីឡាករ-កីឡាការិនីមួយចំនួន បានរងរបួសដោយការប្រកួត ជាពិសេសកីឡាបាល់ទាត់ និងប្រដាល់ តែម្ដង។ ក្រោយត្រូវរបួស កីឡាករ-កីឡាការិនីទាំងនោះ ជួបការលំបាកក្នុងការព្យាបាលនៅតាមមន្ទីរពេទ្យរដ្ឋ និងឯកជនដោយរាប់ទាំងការលំបាក លើថវិកាសម្រាប់ការព្យាបាលផង ដែលជាញឹកញាប់ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ដែលជាភរិយារបស់សម្ដេច បានផ្តល់នូវការឧបត្ថម្ភសម្រាប់ការព្យាបាល ចំពោះកីឡាករប្រដាល់មួយចំនួន ផងដែរ។

សម្ដេចតេជោ ហ៊ុន សែន បានឲ្យដឹងបែបនេះថា «ដោយមើលឃើញនូវការលំបាកបែបនេះព្រឹកនេះ ខ្ញុំបានពិភាក្សាជាមួយឯកឧត្តម ម៉ម ប៊ុនហេង និងលោកជំទាវ យក់ សម្បត្តិ ដើម្បីរៀបចំទីកន្លែងសម្រាប់ព្យាបាលកីឡាករ-កីឡាការិនី នៅមន្ទីរពេទ្យជាតិតេជោសន្តិភាព ដែលមានចំនួនគ្រែពី ១០០ទៅ ២០០គ្រែ»។

សម្ដេចតេជោ ហ៊ុន សែន បានបញ្ជាក់ថា ការព្យាបាលកីឡាករ-កីឡាការិនី ដែលរងរបួសក្រោយការប្រកួត មិនតម្រូវឲ្យមានការបង់ប្រាក់នោះទេ ហើយមន្ទីរពេទ្យព្យាបាលត្រូវមានឯកទេសគ្រប់គ្រាន់ស្របតាមស្ថានភាពរបួស។

ប្រមុខរាជរដ្ឋាភិបាល បានណែនាំដល់ក្រសួងសុខាភិបាល រៀបចំឲ្យបានឆាប់ ដែលនឹងអាចចូលរួមផងដែរ ដល់ការប្រកួតស៊ីហ្គេមនាពេលខាងមុខ។ ជាមួយគ្នានេះ សម្ដេចតេជោ ហ៊ុន សែន ប្រាប់ឲ្យកីឡាករ-កីឡាការិនី ទទួលយកនូវសេវាព្យាបាល នៅមន្ទីរពេទ្យជាតិតេជោសន្តិភាព ក្រោយពេលរៀបចំរួចដោយការពេញចិត្ត៕

The post សម្ដេចតេជោ ហ៊ុន សែន ណែនាំឲ្យរៀបចំកន្លែងព្យាបាលកីឡាករ-កីឡាការនីរងរបួសក្រោយការប្រកួត ដោយឥតគិតថ្លៃ appeared first on Kampuchea Thmey Daily.

ជាម្ចាស់ទ្រព្យរាប់លានដុល្លារ តែ Ronaldo ប្រារព្ធខួបកំណើតយ៉ាងសាមញ្ញ នៅអារ៉ាប៊ីសាអូឌីត

Sonya — Tue, 07 Feb 2023 12:44:00 +0000

កាលពីថ្ងៃទី៥ ខែកុម្ភៈ ជាថ្ងៃកំណើតគម្រប់ខួប ៣៨ឆ្នាំរបស់តារាបាល់ទាត់ Cristiano Ronaldo ខណៈខួបឆ្នាំនេះលោកបានប្រារព្ធឡើងយ៉ាងសាមញ្ញជាមួយមិត្តស្រី និងមិត្តភក្តិប៉ុន្មាននាក់ នៅប្រទេសអារ៉ាប់ប៊ីសាអូឌីត។

នៅលើផេកផ្ទាល់ខ្លួន ខ្សែប្រយុទ្ធសញ្ជាតិព័រទុយហ្គាល់រូបនេះ បានបង្ហោះរូបភាពបីបួនសន្លឹក អមជាមួយជាភាសាអារ៉ាប់ ដើម្បីអបអរខួបកំណើតគម្រប់ ៣៨ឆ្នាំរបស់ខ្លួន។ តាមរយៈរូបភាព អ្នកគាំទ្របានឃើញពិធីជប់លៀងដ៏កក់ក្ដៅ សាមញ្ញ ជាមួយនឹងអាហារ និងនំខួបកំណើត និងវត្តមានមិត្តស្រី Georgina ព្រមទាំងមិត្តជិតស្និទ្ធរបស់លោកបួនប្រាំនាក់។

ខួបកំណើតនេះត្រូវបានគេចាត់ទុកជាថ្ងៃខួបកំណើតដ៏ពិសេសមួយ និងជាលើកដំបូងរបស់ CR7 និងក្រុមគ្រួសារ ដែលប្រារព្ធក្នុងប្រទេសថ្មី ខណៈពិធីទាំងមូលពិតជាមានភាពសាមញ្ញជាទីបំផុត បើទោះបីតារាបាល់ទាត់រូបនេះ មានទ្រព្យសម្បត្តិមហាសាលយ៉ាងណាក្ដី។

ជាមួយគ្នានោះ នៅលើផេកហ្វេកប៊ុកផ្លូវការរបស់ក្លឹប Al Nassr ក៏បានបង្ហោះវីដេអូដើម្បីអបអរសាទរខួបកំណើតរបស់ CR7 ផងដែរ ដែលគេបានឃើញសមាជិកក្លិបបង្កការភ្ញាក់ផ្អើលឱ្យ CR7 នៅលើទីលានបាល់ទាត់៕

ប្រែសម្រួល៖ សន្យា

ចុចអាន៖ កីឡាករ Man United មិនចង់ឲ្យ Greenwood ត្រលប់មករួមក្រុមវិញ

ចុចអាន៖ Messi បង្ហាញពេលវេលាត្រឡប់ទៅ Barcelona ខណៈការបន្តកុងត្រាជាមួយ PSG ត្រៀមអូសបន្លាយ

The post ជាម្ចាស់ទ្រព្យរាប់លានដុល្លារ តែ Ronaldo ប្រារព្ធខួបកំណើតយ៉ាងសាមញ្ញ នៅអារ៉ាប៊ីសាអូឌីត appeared first on Kampuchea Thmey Daily.

អាវផាយដែល Messi ពាក់លើកពាន World Cup ថ្ងៃមុន ជារង្វាន់ពីឥស្សរជនជាន់ខ្ពស់មួយរូប

សាង ស្រីល័ក្ខ — Sun, 25 Dec 2022 02:05:00 +0000

តាមពិតអាវផាយឈ្មោះ Bisht ដែល Messi ពាក់ពេលលើកពាន World Cup គឺជារង្វាន់របស់លោក Ahmed Al Barwani បានផ្ដល់ជូនដ៏ធំនេះ ដល់ខ្សែប្រយុទ្ធអាហ្សង់ទីន។

តាមរយៈបណ្ដាញ Twitter លោក Ahmed Al Barwani ជាមេធាវី និងជាសមាជិកសភាក្នុងប្រទេសអូម៉ង់បានសរសេរថា “ពីស៊ុលតង់នៃប្រទេសអូម៉ង់ ខ្ញុំសូមអបអរសាទរអ្នកសម្រាប់ការឈ្នះការប្រកួត World Cup Qatar 2022។ The Arabic Bisht ជានិមិត្តរូបនៃភាពក្លាហាន និងប្រាជ្ញា។ ខ្ញុំផ្ដល់ឲ្យអ្នកនូវប្រាក់មួយលានដុល្លារ ជាថ្នូរនឹងអាវផាយ Bisht”។

បន្ថែមពីនេះសមាជិកសភា Ahmed បានប្រាប់កាសែត The National ថា “ខ្ញុំនៅកីឡដ្ឋានមើលការផ្សាយផ្ទាល់ នៅពេលនោះអធិរាជនៃប្រទេសកាតាបានផ្ដល់នូវ Bisht ដល់ Messi ។ សូមប្រាប់ពិភពលោកថា យើងនៅទីនេះ ហើយនេះ ជាវប្បធម៌របស់យើង សូមដឹងឲ្យច្បាស់”។

ទោះយ៉ាងណា អាវពិសេសចំនួនពីរត្រូវបានបង្កើតឡើងសម្រាប់ Messi និអ្នកចាំទីបារាំង Hugo Lloris ក្នុងព្រឹត្តិការណ៍ដែលបារាំងចេញមកទទួលជ័យជម្នះជំនួសអាហ្សង់ទីន ខណៈអាវផាយប្រភេទនេះមានតម្លៃ ១ លានដុល្លារឯណោះ។

សូមបញ្ជាក់ថា Bisht គឺជាអាវផាយដែលព្រះអង្គម្ចាស់កាតា Sheikh Tamim bin Hamad Al Thani ទ្រង់បំពាក់ឲ្យ Messi ដើម្បីជាកិត្តិយសដល់ប្រធានក្រុមជម្រើសជាតិ ដែលបានឈ្នះក្លាយជាជើងឯកពិភពលោក។ ចំពោះបុរសដែលពាក់អាវផាយបានតែក្នុងឱកាសពិសេសដែលមានសំណាង ហើយមិនមែនគ្រប់គ្នាមានសិទ្ធិប្រើវាបានទេ។ ព្រោះ Bisht ទុកសម្រាប់តែឥស្សរជនជាន់ខ្ពស់ពាក់ជាសញ្ញានៃការដឹងគុណ និងការគោរពប៉ុណ្ណោះ៕

ប្រែសម្រួល៖ សាង ស្រីល័ក្ខ

ប្រភព៖Goal

ចុចអាន៖តើអាវផាយ ដែល Messi ពាក់ពេលលើកពាន World Cup គឺជាអ្វី?

The post អាវផាយដែល Messi ពាក់លើកពាន World Cup ថ្ងៃមុន ជារង្វាន់ពីឥស្សរជនជាន់ខ្ពស់មួយរូប appeared first on Kampuchea Thmey Daily.

រឿងរ៉ាវផ្ទាល់ខ្លួន ៥យ៉ាងពីជីវិតកីឡាករ Kylian Mbappe ម្ចាស់ពានស្បែកជើងមាស World Cup 2022

Sonya — Thu, 22 Dec 2022 12:31:00 +0000

កំពូលខ្សែប្រយុទ្ធ Kylian Mbappe ជាកីឡាករវ័យក្មេងដែលមានតម្លៃខ្លួនថ្លៃបំផុតលើលោក និងត្រូវបានគេចាត់ទុកជាបុរសដ៏មានទេពកោសល្យកម្រក្នុងវិស័យបាល់ទាត់បារាំង។ អ្វីដែលកាន់តែគួរឱ្យចាប់អារម្មណ៍ ដោយយោងតាមទស្សនាវដ្ដី Forbes បានឱ្យដឹងថា កីឡាកររូបនេះទទួលបានប្រាក់បៀវត្សរ៍រហូតដល់ ១២០លានដុល្លារអាមេរិកឯណោះ សម្រាប់ការលេងនៅរដូវកាល ២០២២/២៣ ឱ្យក្លឹប PSG ។

ចំនួននេះមានច្រើនជាងតារាបាល់ទាត់ល្បីៗរបស់ពិភពលោកទាំងពីររូបគឺ Messi និង Ronaldo ទៅទៀត។ ដោយសារតែមិត្តរួមក្រុម PSG របស់ Mbappe គឺ Messi ទទួលបានប្រាក់ខែប្រហែល ១២០លានដុល្លារប៉ុណ្ណោះ ខណៈដែល Ronaldo ទទួលបាន ១០០លានដុល្លារ កាលពីពេលនៅលេងឱ្យ Manchester United ។

បច្ចុប្បន្ននេះ យោងតាមគេហទំព័រ caknowledge.com ទ្រព្យសម្បត្តិសុទ្ធរបស់កីឡាករវ័យ ២៤ឆ្នាំរូបនេះ មានចំនួនប្រហែល ១៨០លានដុល្លារ។ ក្រៅពីទទួលបានប្រាក់បៀវត្សរ៍ដ៏ច្រើនពីកីឡាបាល់ទាត់ កីឡាករវ័យក្មេងរូបនេះក៏មានប្រាក់ចំណូលពីប្រភពជាច្រើនទៀតរួមមាន អាជីវកម្ម ការវិនិយោគ និងទូតសុឆន្ទៈតំណាងឱ្យម៉ាកយីហោល្បីៗលើពិភពលោក។

ខាងក្រោមជារឿងរ៉ាវគួរឱ្យចាប់អារម្មណ៍ចំនួន ៥យ៉ាង ពីកំពូលខ្សែប្រយុទ្ធ Kylian Mbappe របស់ក្រុមមាន់គកបារាំង៖

១. Kylian Mbappe ជាកំពូលតារា ប៉ុន្តែប្រើជីវិតសាមញ្ញបំផុត

និយាយដល់ប្រាក់ចំណូលដ៏ខ្ពស់កប់ពពក ប្រិយមិត្តអាចនឹងគិតថា Mbappe ចូលចិត្តចាយជីវិតហាយសូរមិនខាន។ ផ្ទុយទៅវិញកីឡាកររូបនេះ មិនភ្លើតភ្លើនខ្ជះខ្ជាយប្រាក់ទៅលើរថយន្តទំនើប វីឡាប្រណីត ម៉ាកយីហោល្បីៗ ឬឧបករណ៍កីឡាផ្សេងៗឡើយ។

អ្នកគាំទ្រកម្រឃើញ Mbappe ថតរូបជាមួយរថយន្តទំនើប ឬអួតពីជីវិតដ៏ប្រណីតរបស់លោកនៅលើបណ្តាញសង្គមណាស់។ លោកផ្តោតពេលវេលាស្ទើរតែទាំងស្រុងលើការអភិវឌ្ឍជំនាញបាល់ទាត់ ហើយពេលទៅណាមកណា ហ្វេនៗឃើញលោកស្លៀកពាក់ធម្មតាៗប៉ុណ្ណោះ។

យ៉ាងណាមិញ ក្នុងនាមជាកំពូលកីឡាករបាល់ទាត់ពិភពលោក គេដឹងថា Mbappe មានរថយន្តទំនើបពីរបីគ្រឿងដែរ ហើយលោកធ្លាប់ចំណាយប្រាក់ ៧០០០ដុល្លារក្នុងមួយម៉ោង ដើម្បីជួលយន្តហោះឯកជន សម្រាប់ការធ្វើដំណើរជុំវិញពិភពលោក។

២. Kylian Mbappe ជាមនុស្សស្រឡាញ់ស្បែកជើង និងនាឡិកាដៃ

Mbappe ជាមនុស្សគ្មានចំណង់ចំណូលចិត្តលើរថយន្តស្ព័រដូចអ្នកមានៗផ្សេងនោះទេ ដែលជាហេតុនាំឱ្យលោកកម្រចែករំលែករូបថតជាមួយរថយន្តទំនើប។ យ៉ាងណាមិញ ខ្សែប្រយុទ្ធវ័យ ២៤រូបនេះហាក់មានការចាប់អារម្មណ៍ខ្លាំងចំពោះនាឡិកាដៃ និងស្បែកជើង។ លោកជាម្ចាស់បណ្តុំនៃនាឡិកាទាន់សម័យបំផុត ដែលគេតែងប្រទះឃើញលោកបង្ហាញវាញឹកញាប់។

រាល់ពេលដែលលោកបង្ហាញវត្តមាននៅពីមុខកាមេរ៉ា ខ្សែប្រយុទ្ធរូបនេះផ្តោតការយកចិត្តទុកដាក់យ៉ាងខ្លាំងលើការតុបតែងខ្លួន ដោយលោកតែងតែផ្លាស់ប្តូរម៉ូដនាឡិកា និងស្បែកជើងផ្សេងៗគ្នាពីម៉ាកយីហោល្បីៗ និងមានតម្លៃថ្លៃក្នុងពិភពលោកដូចជា Sneakers, Hublot, Nike និង Rolex ជាដើម។ យ៉ាងណាមិញ ស្បែកជើង និងនាឡិការបស់លោកភាគច្រើនត្រូវបានឧបត្ថម្ភដោយម៉ាកយីហោដែលលោកតំណាងឱ្យ ដូច្នេះលោកមិនចាំបាច់ចំណាយលុយទិញវានោះទេ។

៣. Kylian Mbappe ជាវិនិយោគិនលើវិស័យអចលនទ្រព្យ

ពេលឆ្លើយនៅចំពោះមុខសារព័ត៌មានបារាំង Mbappe ធ្លាប់និយាយថា លោកយកចិត្តទុកដាក់ជាពិសេសចំពោះការវិនិយោគលំនៅដ្ឋាន ព្រោះលោកចង់ឱ្យគ្រួសារមានផ្ទះធំទ្រនំខ្ពស់ សម្រាប់ពួកគាត់រស់នៅយ៉ាងសុខស្រួល។

ក្រោយវិនិយោគជោគជ័យ គេបានដឹងថា Mbappe មានវីឡាដ៏ប្រណីតតម្លៃ ១០លានដុល្លារ នៅកណ្ដាលក្រុងប៉ារីស ដែលវាមានបន្ទប់គេង ១២បន្ទប់ ជាមួយនឹងទីលានបាល់បោះ បណ្ណាល័យ កន្លែងហាត់ប្រាណ និងបន្ទប់អាហារ។ លើសពីនេះលោកមានផ្ទះលំហែមួយនៅប្រទេស ម៉ូណាកូ (Monaco) ផងដែរ។

៤. Kylian Mbappe ចូលចិត្តដើរកម្សាន្តជាមួយធម្មជាតិ

ថ្វីត្បិតតែខ្លួនក្លាយជាសេដ្ឋីហើយក្ដី និងមានលុយចាយមិនខ្វះយ៉ាងណាក៏ដោយ ប៉ុន្តែ Mbappe មិនដែលចំណាយលុយលើការសប្បាយដើរលេងក្លឹបរាត្រី ឬសេពគ្រឿងស្រវឹងឡើយ។ ម្ចាស់ពានស្បែកជើងមាសរូបនេះ ហាក់នៅឆ្ងាយពីទម្លាប់អវិជ្ជមាន ហើយលោកតែងត្រូវគេកោតសរសើរនូវរបៀបរស់នៅដែលមានសុខភាពល្អ។ នៅពេលវិស្សមកាលម្ដងៗ លោកឧស្សាហ៍ចំណាយប្រាក់សម្រាកលំហែជាមួយក្រុមគ្រួសារ និងមិត្តភក្តិ ហើយជារឿយៗលោកតែងតែទៅលេងឆ្នេរសមុទ្រ និងរមនីយដ្ឋានធម្មជាតិ។

៥. Kylian Mbappe ចូលចិត្តធ្វើសប្បុរសធម៌

ទង្វើនេះ ជាទង្វើដែលធ្វើឱ្យហ្វេនៗរាប់លាននាក់រឹតតែស្រឡាញ់គាំទ្រ Mbappe ព្រោះបុរសរូបនេះមិនភ្លេចឡើយនូវសកម្មភាពមនុស្សធម៌ ក្នុងការលើកស្ទួយកុមារក្រីក្រ។ ប្រហែលនេះជាចំណង់ចំណូលចិត្ត ដែលកើតចេញពីអតីតកាលរបស់ Mbappe ព្រោះកាលនៅវ័យកុមារ លោកមានជីវភាពក្រីក្រ និងលំបាក រកព្រឹកខ្វះល្ងាច។ យោងតាមកាសែតបារាំង L’Equipe កំពូលខ្សែប្រយុទ្ធរូបនេះធ្លាប់បានជួយកុមារពិការ កុមារឈឺរ៉ាំរ៉ៃ និងកុមារក្រខ្សត់ ដោយលោកតែងតែបរិច្ចាគប្រាក់រង្វាន់របស់ខ្លួនទាំងអស់ពីការប្រកួតបាល់ទាត់ពិភពលោកជូនមូលនិធិ។

ដោយឡែក ក្នុងព្រឹត្តិការណ៍ World Cup 2022 ថ្មីៗនេះ Kylian Mbappe ក៏បានប្រកាសយកប្រាក់រង្វាន់ទាំងអស់ ដែលមានតម្លៃប្រហែល ៤សែនដុល្លារ ផ្តល់ដល់កុមារក្រីក្រនៅអាហ្វ្រិកផងដែរ ហើយ Mbappe នឹងរក្សាទម្លាប់ប្រើប្រាស់ប្រាក់រង្វាន់ទាំងអស់នៅក្នុងក្លឹប និងការប្រកួតធំៗ ដើម្បីបរិច្ចាគដល់អង្គការសប្បុរសធម៌រហូតទៅ។

តើប្រិយមិត្តយល់យ៉ាងណា ចំពោះរឿងរ៉ាវទាំង ៥យ៉ាង របស់ Kylian Mbappe? សូមចែករំលែកជាមួយ កម្ពុជាថ្មី!