កីឡាការិនី ស្រួង ភាវី Archives - Kampuchea Thmey Daily

ស្រួង ភាវី ទទួលបានពានពិសេសមួយសម្រាប់ស្លៀកឈុតប្រពៃណីខ្មែរលេចធ្លោ

chean virakbot — Wed, 18 Mar 2026 03:23:18 +0000

កីឡាការិនីប៊ីយ៉ា និងស្នូឃ័រកម្ពុជា ស្រួង ភាវី ទទួលបានពានរង្វាន់កិត្តិយសពិសេសមួយសម្រាប់ការស្លៀកឈុតប្រពៃណីខ្មែរលេចធ្លោចូលរួមក្នុងកម្មវិធីប្រគល់ពានរង្វាន់កីឡាប៊ីយ៉ាការ៉ុមប្រចាំឆ្នាំនៅប្រទេសកូរ៉េខាងត្បូង។

ស្រួង ភាវី បានរៀបរាប់ថា សហព័ន្ធកីឡាប៊ីយ៉ារ៉ុមអន្តរជាតិបានរៀបចំកម្មវិធីប្រគល់ពានរង្វាន់ និងប្រាក់រង្វាន់ប្រចាំឆ្នាំ ដល់កីឡាករ កីឡាការិនីដែលបានខិតខំប្រែងយ៉ាងខ្លាំងក្នុងការចូលរួមប្រកួតពេញមួយឆ្នាំនៅក្នុងខែមីនា ឆ្នាំ ២០២៦ ដែលមានកីឡាករ កីឡាការិនីមកពីបណ្តាប្រទេសផ្សេងៗ។ ក្នុងនោះអ្នកនាងក៏បានចូលរួមក្នុងកម្មវិធីដ៏ពិសេសនេះដែរ។

កីឡាការិនីដែលមានដើមកំណើតនៅខេត្តត្បូងឃ្មុំបានប្រាប់ថា អ្នកនាងទទួលបានពានមួយនៅក្នុងកម្មវិធីប្រគល់ពានរង្វាន់ប្រចាំឆ្នាំនៅក្នុងខែមីនានេះ។ សហព័ន្ធកីឡាប៊ីយ៉ាការ៉ុម បានប្រគល់ពាន និងថវិកាជាច្រើនដល់កីឡាករ កីឡាការិនីគ្រប់បណ្តាប្រទេសដែលជាកាដូលើកទឹកចិត្តដែលពួកគាត់បានខិតខំប្រកួតយ៉ាងស្វាហាប់ក្នុងមួយៗឆ្នាំ។

ស្រួង ភាវី បានបន្តថា ៖«សម្រាប់នាងខ្ញុំ ឆ្នាំនេះអត់បានពានរង្វាន់ពិសេសអ្វីទេ ដោយសារខ្ញុំធ្លាក់ទឹកដៃ លទ្ធផលមិនសូវល្អ។ ទោះជាយ៉ាងណា ខ្ញុំនឹងខិតខំហ្វឹកហាត់បន្ថែមទៀតដើម្បីស្វែងរកពានរង្វាន់ និងកេរ្តិ៍ឈ្មោះឲ្យខ្ពស់ជាងនេះ»។

«សម្រាប់ពាននេះតំណាងឲ្យឈុតប្រពៃណីខ្មែរដែលខ្ញុំបានស្លៀកពាក់។ ខ្ញុំគិតថា ខ្ញុំអត់បានពានទេ ខ្ញុំស្លៀកឈុតនេះគឺគ្រាន់តែចង់បង្ហាញអត្តសញ្ញាណខ្មែរឲ្យប្រទេសគេបានឃើញ តែមិននឹកស្មានថា ខាងកម្មវិធីបានផ្តល់ពាននេះដើម្បីតំណាងឲ្យឈុតប្រពៃណីខ្មែរដែលខ្ញុំស្លៀកថ្ងៃនេះ គេពេញចិត្ត និងលេចធ្លោជាងគេ»។

នៅចុងឆ្នាំ២០២៥ និងដើមឆ្នាំ ២០២៦ ស្រួង ភាវី មិនសូវទទួលបានលទ្ធផលល្អទេសម្រាប់ចូលរួមប្រកួតសំខាន់ៗ។ ទោះបីជា កីឡាការិនីកម្ពុជា រូបនេះបានឈ្នះជើងឯក LPBA Charity Championship 2025-26 កាលពីខែសីហា ឆ្នាំ ២០២៥ ដោយទទួលបានប្រាក់រង្វាន់ ៤០លានវ៉ុន (ជិត៣ម៉ឺនដុល្លារអាមេរិក។

ពេលនោះ ស្រួង ភាវី រកបានប្រាក់រង្វាន់ច្រើនជាងគេគឺ សរុប ៨១លានរ៉ុន ឈរចំណាត់ថ្នាក់លេខ១ នៅក្នុងរដូវកាល ២០២៥-២៦ បន្ទាប់ពីបានឈ្នះជើងឯកចំនួន ៣ លើក ប៉ុន្តែស្ថិតនៅចំណាត់ថ្នាក់លេខ២ ក្នុងតារាងកីឡាការិនីរកបានប្រាក់រង្វាន់ច្រើនបំផុតគ្រប់សម័យកាល (All Season Money Ranking) (ប្រហែល ២៥ម៉ឺនដុល្លារអាមេរិក) បន្ទាប់ពីកីឡាការិនីកូរ៉េខាងត្បួង Ga-young Kim ឈរលេខ១ (រកបានប្រហែល៥០ម៉ឺនដុល្លារអាមេរិក)៕

អត្ថបទ៖ វិរបុត្រ

The post ស្រួង ភាវី ទទួលបានពានពិសេសមួយសម្រាប់ស្លៀកឈុតប្រពៃណីខ្មែរលេចធ្លោ appeared first on Kampuchea Thmey Daily.

ស្រួង ភាវី ឈ្នះជើងឯក LPBA ឆ្នាំ ២០២៥-២៦ មានបេក្ខនារី ១២៨នាក់ អមដោយប្រាក់រង្វាន់ជិត ៣ម៉ឺនដុល្លារ

chean virakbot — Mon, 11 Aug 2025 08:21:06 +0000

កីឡាការិនីបីយ៉ាការ៉ុមជម្រើសជាតិកម្ពុជា ស្រួង ភាវី បានឈ្នះជើងឯក LPBA Charity Championship ឆ្នាំ ២០២៥-២៦ ដោយទទួលបានប្រាក់រង្វាន់ ៤០លានវ៉ុន (ជិត៣ម៉ឺនដុល្លារអាមេរិក។

ព្រឹត្តិការណ៍ប្រកួតបីយ៉ាការ៉ុមលំដាប់ពិភពលោកនេះមានកីឡាការិនីជម្រើសឈានមុខចំនួន ១២៨នាក់ដែលត្រូវប្រកួតប្រជែងជាច្រើនដំណាក់កាល និងតឹងតែងបំផុតមុនពេលឈានដល់វគ្គ ៣២ នាក់ចុងក្រោយ។

នៅវគ្គ៣២នាក់ កីឡាការិនីកម្ពុជា ស្រួង ភាវី បានទម្លាក់កីឡាការិនី Oh Do-hee ដោយពិន្ទុ ៣-១ ដើម្បីឡើងទៅកាន់វគ្គ ១៦ នាក់ចុងក្រោយ។ នៅវគ្គ១៦នាក់នេះ កីឡាការិនីកម្ពុជា បានយកឈ្នះកីឡាការិនី Kim Ye-eun ដោយពិន្ទុ ៣-២ ដើម្បីឡើងទៅកាន់វគ្គ ៨ នាក់ចុងក្រោយ ដែលបានទម្លាក់កីឡាការិនី Park Ye-won ដោយពិន្ទុ ៣-០។

នៅវគ្គពាក់កណ្តាលផ្តាច់ព្រ័ត្រ ស្រួង ភាវី បានយកឈ្នះកីឡាការិនី Han Ji-eun ដោយពិន្ទុ ៣-២ ដើម្បីឡើងទៅកាន់វគ្គផ្តាច់ព្រ័ត្រ ជួបដៃគូចាស់ដ៏ស្វិតស្វាញគឺកីឡាការិនី Kim Min-a ប៉ុន្តែកីឡាការិនីកម្ពុជាមិនបានខកចិត្តឡើយ។ កីឡាការិនីកម្ពុជាបានយកឈ្នះដោយពិន្ទុ ៤-១ ដើម្បីគ្រងជើងឯក។

នេះជាជើងឯក LPBA លើកទី ៩ របស់ ស្រួង ភាវី បន្ទាប់ពីធ្លាប់ឈ្នះចំនួន ៨ ដងមកហើយ។ ជាពិសេសកីឡាការិនីកម្ពុជាបានយកឈ្នះនារីខ្លាំង Kim Min-a ដែលធ្លាប់ធ្វើឲ្យកីឡាការិនីកម្ពុជាធ្លាប់រងបរាជ័យពីរដងក្នុងអាជីព។

កីឡាការិនី ស្រួង ភាវី រកបានប្រាក់រង្វាន់ច្រើនជាងគេគឺ សរុប ៨១លានរ៉ុន ឈរចំណាត់ថ្នាក់លេខ១ នៅក្នុងរដូវកាល ២០២៥-២៦ បន្ទាប់ពីបានឈ្នះជើងឯកចំនួន ៣ លើក ប៉ុន្តែស្ថិតនៅចំណាត់ថ្នាក់លេខ២ ក្នុងតារាងអ្នករកបានប្រាក់រង្វាន់ច្រើនបំផុតគ្រប់សម័យកាល (All Season Money Ranking) ជាមួយប្រាក់រង្វាន់ ៣៦២លានវ៉ុន (ប្រហែល ២៥ម៉ឺនដុល្លារអាមេរិក) បន្ទាប់ពីកីឡាការិនីកូរ៉េខាងត្បួង Ga-young Kim ឈរលេខ១ដែលរកបាន ៧២៧លានវ៉ុន (ប្រហែល៥០ម៉ឺនដុល្លារអាមេរិក)៕

ចំណាត់ថ្នាក់ឆ្នាំ ២០២៥-២៦

ចំណាត់ថ្នាក់គ្រប់សម័យ

អត្ថបទ៖ វីរបុត្រ

The post ស្រួង ភាវី ឈ្នះជើងឯក LPBA ឆ្នាំ ២០២៥-២៦ មានបេក្ខនារី ១២៨នាក់ អមដោយប្រាក់រង្វាន់ជិត ៣ម៉ឺនដុល្លារ appeared first on Kampuchea Thmey Daily.

ស្វែងយល់ជើងឯកពិភពលោក LPBA ស្រួង ភាវី ឈ្នះលើកទី៧ម្សិលមិញ

chean virakbot — Mon, 12 Feb 2024 02:30:38 +0000

កីឡាការិនីស្នូកឃ័រ និងប៊ីយ៉ាកម្ពុជា ស្រួង ភាវី បានឈ្នះជើងឯកពិភពលោកប៊ីការ៉យមវិញ្ញាសា LPBA (Women’s Professional Billiard Association) ឆ្នាំ២០២៤ បន្ទាប់ពីបានយកឈ្នះកីឡាការិនីរ៉េខាងត្បូង Jung-suk Lim នៅវគ្គផ្តាច់ព្រ័ត្រកាលពីរសៀលថ្ងៃអាទិត្យ ទី១១ ខែកុម្ភៈ ឆ្នាំ២០២៤។ នេះជាការឈ្នះលើកទី៧របស់កីឡាការិនីកម្ពុជា។

PBA គឺជាសមាគមកីឡាប៊ីឡាដអាជីពដែលស្ថិតក្រោមសមាគមកីឡាប៊ីយ៉ា និងស្នូឃ័រអាជីពពិភពលោក WPBSA ដែលត្រូវបានបង្កើតឡើងតាំងពីឆ្នាំ១៩៤៦។ និយាយដោយឡែកតែ PBA មានវិញ្ញាសាចំនួន៤គឺវិញ្ញាសាឯកតជន PBA សម្រាប់បុរស វិញ្ញាសាឯកតជន LPBA សម្រាប់នារី វិញ្ញាសាឯកតជន Dream សម្រាប់បុរស និងវិញ្ញសាឯកតជន Challenge សម្រាប់បុរស។

វិញ្ញាសាឯកតជននារី LPBA ប្រជុំដោយកីឡាការិនីទូទាំងពិភពលោកចូលរួមប្រកួតប្រជែងជារៀងរាល់ឆ្នាំ។ រហូតដល់ពេលនេះកីឡាការិនីកម្ពុជា ស្រួង ភាវី បានឈ្នះ៧ដង។ គិតត្រឹមដើមឆ្នាំ២០២៤នេះ កីឡាការិនីកម្ពុជាកំពុងឈរចំណាត់ថ្នាក់លេខ២ក្នុងតារាងដែលមានកីឡាការិនីទូទាំងពិភពលោកចំនួន១២៥នាក់។

ចំណាត់ថ្នាក់លេខ១កំពុងកាន់កាប់ដោយកីឡាការិនីជប៉ុន Ayako Sakai ប៉ុន្តែនៅមិនទាន់ដឹងច្បាស់ថាតើ តារាងចំណាត់ថ្នាក់នឹងប្រែប្រួលយ៉ាងណា បន្ទាប់ពីកីឡាការិនីកម្ពុជា ស្រួង ភាវី បានឈ្នះជើងឯកលើកទី៧ ខណៈកីឡាការិនីជប៉ុនមិនមានវត្តមានទេ។

ចំណែកកីឡាការិនីកូរ៉េខាងត្បូង Jung-sum Lim ដែលចាញ់ ស្រួង ភាវី ម្សិលមិញនេះស្ថិតនៅចំណាត់ថ្នាក់លេខ៧។

ក្រៅពីវិញ្ញាសា LPBA ដែលបានឈ្នះ៧ដង ស្រួង ភាវី ធ្លាប់ឈ្នះជើងឯកវិញ្ញាសា 3-Cushion ក្នុងការប្រកួតជើងឯកអាស៊ី ZANCA 1^st Asian Championship ឆ្នាំ២០១៨ នៅប្រទេសកូរ៉េខាង និងចំណាត់ថ្នាក់លេខ៣ ពិភពលោកវិញ្ញាសាដដែលនេះនៅប្រទេសតួកគីឆ្នាំ២០១៨ និង២០១៩។ វិញ្ញាសាដដែលនេះ ភាវី បានឈ្នះមេដាយមាសស៊ីហ្គេម ឆ្នាំ២០២៣ និងបានឈ្នះមេដាយសំរិទ្ធស៊ីហ្គេម ឆ្នាំ២០២៣ សម្រាប់វិញ្ញាសា 1-Cushion៕

អត្ថបទ៖ វីរបុត្រ

The post ស្វែងយល់ជើងឯកពិភពលោក LPBA ស្រួង ភាវី ឈ្នះលើកទី៧ម្សិលមិញ appeared first on Kampuchea Thmey Daily.

អបអរសាទរ! ស្រួង ភាវី ទទួលបានពាន Asia Special Award នៅកូរ៉េខាងត្បូង

chean virakbot — Tue, 07 Nov 2023 10:14:11 +0000

កីឡាការិនីស្នូកឃើរ និងប៊ីយ៉ាជម្រើសជាតិកម្ពុជា ស្រួង ភាវី ត្រូវបានជ្រើសរើសផ្តល់ពានរង្វាន់ពិសេស Asia Special Award 2023 ដែលរៀបចំដោយ Asia Model Festival នៅថ្ងៃទី០៥ ខែវិច្ឆិកា ឆ្នាំ២០២៣ នៅប្រទេសកូរ៉េខាងត្បូង។

ស្រួង ភាវី បានរៀបរាប់ថា ៖«រាល់ពេលទទួលបានពានរង្វាន់នៅឆាកអន្តរជាតិកន្លងមក នៅពេលគេហៅឈ្មោះ ស្រួង ភាវី ឡើងទៅលើវេទិកាដើម្បីទទួលពានរង្វាន់ អារម្មណ៍នាងខ្ញុំគ្រាន់តែឮ ត្រឹមតែដឹងថា គេបានហៅខ្ញុំហើយ ប៉ុន្ដែនៅពេលឮគេហៅថា Cambodia Cambodia ឡើងទៅលើហើយ»។

«អារម្មណ៍របស់ខ្ញុំពិតជារំភើបប្រកបដោយសេចក្ដីសោមនស្សរីករាយ និងមោទនភាពជាពន់ពេក។ ព្រោះថា ស្រួង ភាវី មកពីប្រទេសកម្ពុជា សូមអញ្ជើញឡើងមកលើវេទិកា គឺក្នុងចិត្តខ្ញុំគិតថា គេកំពុងតែហៅប្រជាជនកម្ពុជាទាំងអស់ឡើងទៅលើវេទិកាដើម្បីទទួលនូវកិត្តិយសដ៏ថ្លៃថ្លាឧត្តុង្គឧត្តមនៅឆាកអន្តរជាតិ»។

កម្មវិធី Asia Model Festival ជាវេទកាវប្បធម៌សកលដែលផ្តោតលើឧស្សាហកម្មវប្បធម៌ និងសិល្បៈឈានមុខនៅអាស៊ី ជំរុញផ្សព្វផ្សាយម៉ូដែល ហ្វេហ្ស៊ិន និងសម្រស់។ កម្មវិធីនេះឧបត្ថម្ភដោយក្រសួងវប្បធម៌ កីឡា និងទេសចរណ៍របស់ប្រទេសកូរ៉េខាងត្បូង។

កាលពីដើមខែតុលា ឆ្នាំ២០២៣ ស្រួង ភាវី ត្រូវបានរដ្ឋាភិបាលនៃប្រទេសកូរ៉េខាងត្បូងផ្តល់ពានរង្វាន់ «វប្បធម៌បង្រួបបង្រួមជាតិពហុវប្បធម៌ និងពានរង្វាន់ពីក្រសួងព័ត៌មាន ក៏ដូចជាកាសែត និងទស្សនាវដ្តី» ក្នុងចំណោមជយលាភី៦រូប៕

អត្ថបទ៖ វីរបុត្រ

The post អបអរសាទរ! ស្រួង ភាវី ទទួលបានពាន Asia Special Award នៅកូរ៉េខាងត្បូង appeared first on Kampuchea Thmey Daily.

ស្រួង ភាវី អះអាង រាល់សកម្មភាពជួយជាតិនិងប្រជាជន កើតចេញពីបេះដូងក្នុងនាមជាខ្មែរ

Din Thary — Tue, 17 Oct 2023 07:43:49 +0000

កីឡាការិនី ស្រួង ភាវី ដែលត្រូវបានគេស្គាល់ថាជាកីឡាការិនីស្នូកឃ័រដើមកំណើតខ្មែរមួយរូបដែលមានឈ្មោះបោះសំឡេងទាំងក្នុង និងក្រៅប្រទេសបានអះអាងថា រាល់សកម្មភាពដែលនាងបានធ្វើ និងលះបង់នាពេលកន្លងមក គឺនាងធ្វើដើម្បីប្រទេសជាតិ និងប្រជាជន ដែលកើតចេញពីបេះដូងក្នុងនាមជាកូនខ្មែរមួយរូប។

អ្នកនាង ស្រួង ភាវី បានលើកឡើងបែបនេះ បន្ទាប់ពីនាងទទួលបានគ្រឿងឥស្សរិយយសសម្ដេចព្រះមហាក្សត្រិយានី ព្រះស៊ីសុវត្ថិ មុនីវង្ស កុសុមៈនារីរ័ត្ន ថ្នាក់មហាសេរីវឌ្ឍន៍ពីព្រះមហាក្សត្រនៃព្រះរាជាណាចក្រកម្ពុជា។

អ្នកនាង ស្រួង ភាវី សង្កត់ធ្ងន់ដែរថា «តាមពិតទៅការទទួលបាននូវគ្រឿងឥស្សរិយយសក្ដី មេដាយក្ដី ពានក្ដី មិនមែនជាអ្វីដែលខ្ញុំប្រាថ្នាចង់បាននោះទេ។ អ្វីៗដែលខ្ញុំធ្វើគឺគ្រាន់តែដើម្បីជាតិ និងប្រជាជនដែលកើតចេញពីបេះដូងក្នុងនាមជាកូនខ្មែរមួយរូបបានកើតលើទឹកដីសុវណ្ណភូមិដ៏ល្អមួយនេះ»។

បន្ថែមពីនេះកីឡាការិនី ស្នូកឃ័រ រូបនេះអះអាងបន្តថា «ខ្ញុំធ្វើតាមសុឆន្ទៈ ខ្ញុំធ្វើតាមបេះដូង ខ្ញុំធ្វើតាមមនសិការ ព្រោះអ្វីៗទាំងអស់នេះគឺជាការងារចាំបាច់របស់ខ្ញុំក្នុងជីវិតនេះ»។

គួរជម្រាបថា នាពេលកន្លងមក ស្រួង ភាវី តែងតែបញ្ចេញសកម្មភាពសប្បុរសធម៌ជួយដល់កុមារ ក្មេងកំព្រា ចាស់ជរា និងជនក្រីក្រ នៅក្នុងប្រទេសកម្ពុជា ដែលត្រូវការជំនួយ និងកំពុងត្រូវការស្វែងអនាគតផងដែរ៕

The post ស្រួង ភាវី អះអាង រាល់សកម្មភាពជួយជាតិនិងប្រជាជន កើតចេញពីបេះដូងក្នុងនាមជាខ្មែរ appeared first on Kampuchea Thmey Daily.

អបអរសាទរ! ស្រួង ភាវី ត្រូវបានរដ្ឋាភិបាលកូរ៉េផ្តល់ពានរង្វាន់មួយដ៏ថ្លៃថ្លា

chean virakbot — Thu, 05 Oct 2023 12:14:59 +0000

កីឡាការិនីស្នូកឃ័រ និងប៊ីយ៉ាជម្រើសជាតិកម្ពុជា ស្រួង ភាវី ត្រូវបានរដ្ឋាភិបាលនៃប្រទេសកូរ៉េខាងត្បូងផ្តល់ពានរង្វាន់ «វប្បធម៌បង្រួបបង្រួមជាតិពហុវប្បធម៌ និងពានរង្វាន់ពីក្រសួងព័ត៌មាន ក៏ដូចជាកាសែត និងទស្សនាវដ្តី» ក្នុងចំណោមជយលាភី៦រូប។

ពានរង្វាន់ដ៏មហាកិត្តិយសនេះ បន្ទាប់ពីកីឡាការិនីកម្ពុជារូបនេះចូលរួមយ៉ាងសកម្មក្នុងបុព្វហេតុមនុស្សធម៌ទាំងនៅក្នុងប្រទេសកូរ៉េ និងជាពិសេសនៅប្រទេសកម្ពុជា។ នាងបានធ្វើជាទូតសុច្ឆន្ទៈជាបន្តបន្ទាប់ឲ្យអង្ការ និងស្ថាប័នសប្បុរសធម៌ ក៏ដូចជាចូលរួមសកម្មនានាជាច្រើន។

ជាពិសេស ស្រួង ភាវី ជាកីឡាការិនីឆ្នើមផ្នែកកីឡាស្នូកឃ័រ និងប៊ីយ៉ា នៅប្រទេសកូរ៉េខាងត្បូងដែលត្រូវបានស្ថាប័នព័ត៌មានទូទាំងប្រទេសកូរ៉េចាប់អារម្មណ៍ដើម្បីផ្សព្វផ្សាយ ហើយមានពលរដ្ឋកូរ៉េស្រឡាញ់ចូលចិត្តច្រើន។ ក្នុងឆ្នាំ២០២៣នេះ នាងបានឈ្នះមេដាយមាសជូនជាតិ នៅពេលកម្ពុជាធ្វើម្ចាស់ផ្ទះរៀបចំការប្រកួតកីឡាស៊ីហ្គេម។

ស្រួង ភាវី បាននិយាយថា ៖«អ្នកដែលទទួលបានពានរង្វាន់«វប្បធម៌បង្រួបបង្រួមជាតិពហុវប្បធម៌»នេះគឺជាបុគ្គលដែលទទួលជោគជ័យក្នុងជីវិត និងធ្វើកិច្ចការដែលមានគុណតម្លៃសម្រាប់ជាតិ និងប្រជាជន ហើយបានធ្វើឱ្យជាតិរីកចម្រើន ព្រមទាំងបានលើកកិត្យានុភាពជាតិឱ្យមានភាពល្បីល្បាញថែមទៀតផង។ សម្រាប់រូបនាងខ្ញុំបានលើកកិត្យានុភាពជាតិទាំងពីរ ជាតិកំណើត និងជាតិស្នាក់អាស្រ័យ»៕

អត្ថបទ៖ វីរបុត្រ

The post អបអរសាទរ! ស្រួង ភាវី ត្រូវបានរដ្ឋាភិបាលកូរ៉េផ្តល់ពានរង្វាន់មួយដ៏ថ្លៃថ្លា appeared first on Kampuchea Thmey Daily.

អ្នកនាង ស្រួង ភាវី លើកឡើងថា គួរតែខ្វាយខ្វល់បញ្ហាសង្គម ជាងបញ្ហាបុគ្គល

អុន ស្រីមាន — Tue, 01 Aug 2023 03:00:21 +0000

អ្នកនាង ស្រួង ភាវី កីឡាការិនីប៊ីយ៉ាការ៉ុម និងជាស្ត្រីម្នាក់ដែលតែងតែជួយដល់កុមារកម្ពុជា បានសរសេរនៅលើហ្វេសប៊ុកអ្នកនាង នៅថ្ងៃទី៣០ ខែកក្កដា ថាគួរខ្វាយខ្វល់បញ្ហាសង្គមឱ្យបានច្រើន ជាងបញ្ហានានារបស់បុគ្គល។

រូបភាពពី៖ Sruong Pheavy

ការលើកឡើងរបស់អ្នកនាង ស្រួង ភាវី បែបនេះ បន្ទាប់ពីកន្លងមក និងបច្ចុប្បន្ន ប្រជាជនកម្ពុជាដែលនិយមលេងបណ្តាញសង្គម ហ្វេសប៊ុក មួយចំនួន ចូលចិត្តចង់ដឹងចង់ឮបញ្ហារបស់បុគ្គល ដូចជាទំនាស់ក្នុងគ្រួសារ ទំនាស់បងប្អូន ប្តីប្រពន្ធ ឬ ជេរប្រមាថគ្នា ជាងបញ្ហាសង្គមជាតិ។

ដោយមើលឃើញបែបនេះ អ្នកនាង ស្រួង ភាវី បានសរសេរសំណេរនៅលើហ្វេសប៊ុកថា៖ “រស់នៅក្នុងសង្គម គួរតែខ្វាយខ្វល់អំពីសង្គមឱ្យបានច្រើន កុំខ្វាយខ្វល់រឿងឯកជនគេខ្លាំងពេក ខាតពេលខ្លួនឯង ខាតគិតប្រយោជន៍រួមសម្រាប់ជាតិ”។

រូបភាពពី៖ Sruong Pheavy

ស្របគ្នានេះ អ្នកនាងក៏បានសរសេរនៅក្នុងការបញ្ចេញមតិយោបល់ថា សម្រាប់អ្នកនាងផ្ទាល់ នៅពេលលេងបណ្តាញសង្គមម្តងៗ គឺឃើញទាំងបញ្ហាសង្គម និងរឿងរ៉ាវរបស់បុគ្គលផ្សេងៗ។ ប៉ុន្តែ អ្នកនាងតែងតែយកបញ្ហាសង្គមមកគិត និងរកដំណោះស្រាយ ព្រោះ គឺជាប្រយោជន៍របស់ជាតិ។ ជាមួយនឹងការបង្ហោះសំណេរមួយនេះ ក៏មានមនុស្សជាច្រើន បានសរសើរ និងគាំទ្រចំពោះមតិដែលអ្នកនាងស្រួង ភាវី បានលើកឡើងផង៕

The post អ្នកនាង ស្រួង ភាវី លើកឡើងថា គួរតែខ្វាយខ្វល់បញ្ហាសង្គម ជាងបញ្ហាបុគ្គល appeared first on Kampuchea Thmey Daily.

អ្នកស្រី ស្រួង ភាវី គ្រោងនាំគ្រូពេទ្យជំនាញកូរ៉េ មកព្យាបាលកុមារកម្ពុជា នៅចុងសប្ដាហ៍ក្រោយ

Ken Malis — Fri, 16 Jun 2023 02:48:59 +0000

កីឡាការិនី ស្នូកឃ័រ ប៊ីយ៉ាការ៉ុម ជម្រើសជាតិកម្ពុជា ដែលធ្លាប់ជួយដល់កុមារកម្ពុជា ទាំងថវិកា ទាំងកម្លាំងកាយចិត្ត ពេលនេះ អ្នកស្រី ស្រួង ភាវី ត្រៀមនាំគ្រូពេទ្យជំនាញស្ម័គ្រចិត្តកូរ៉េ ដើម្បីចុះទៅពិនិត្យព្យាបាលកុមារនៅកម្ពុជាបន្ថែមទៀត។

តាមរយ:ការបង្ហោះនៅលើផេកហ្វេសប៊ុករបស់អ្នកស្រី ស្រួង ភាវី នាពេលថ្មីៗនេះ បានឱ្យដឹងថា អ្នកស្រីនឹងដឹកនាំក្រុមគ្រូពេទ្យជំនាញស្ម័គ្រចិត្តកូរ៉េ ចុះទៅពិនិត្យព្យាបាលប្អូនៗកុមារនៅកម្ពុជា នៅថ្ងៃទី២៣ និង២៤ ខែមិថុនា ឆ្នាំ២០២៣ មានទីតាំងនៅមណ្ឌលអង្គការ មែកឈើ ភូមិលិចវត្ត សង្កាត់កំបូល ខណ្ឌកំបូល រាជធានីភ្នំពេញ ពោលគឺពេលធ្វើដំណើរដល់ផ្លូវបែកជា៤ ផ្សារបែកចាន ត្រូវបត់ទៅស្ដាំតាមផ្លូវបេតុងលេខ៤២ ប្រហែលជិត ៣គីឡូម៉ែត្រ។

អ្នកស្រី ស្រួង ភាវី បានបញ្ជាក់បន្ថែមថា ការពិនិត្យព្យាបាលផ្នែកជំងឺមានដូចជា៖ ១. ពិនិត្យផ្នែករាងកាយកុមារចំនួន ១០០ នាក់ ២. ពិនិត្យឆ្អឹងកុមារចំនួន ៤០នាក់ ទៅ ៥០នាក់ ៣. ពិនិត្យព្យាបាលធ្មេញកុមារចំនួន ៤០នាក់ ទៅ ៥០នាក់ ៤. វះកាត់ព្យាបាលបំបាត់ស្លាកស្នាមលើផ្ទៃមុខអាយុ ១៥ឆ្នាំឡើង និងមានវះកាត់កែត្របកភ្នែកកុមារ ដែលមិនប្រក្រតីចំនួន ២នាក់ (៥ម៉ោង មើល ១នាក់ក្នុង ១ថ្ងៃ)។

សូមបញ្ជាក់ថា សម្រាប់កុមារដែលមានបញ្ហាសុខភាពណាមួយខាងលើ អាចធ្វើការទាក់ទងតាមរយ:ទូរសព្ទលេខ៖ ០៨៦ ២០០ ៦៤០ / ០១១ ៣០៩ ២៧៦ ដើម្បីបានបញ្ចូលឈ្មោះក្នុងបញ្ជីត្រួតពិនិត្យ៕

The post អ្នកស្រី ស្រួង ភាវី គ្រោងនាំគ្រូពេទ្យជំនាញកូរ៉េ មកព្យាបាលកុមារកម្ពុជា នៅចុងសប្ដាហ៍ក្រោយ appeared first on Kampuchea Thmey Daily.

កីឡាការិនី ស្រួង ភាវី Archives - Kampuchea Thmey Daily

ស្រួង ភាវី ទទួល​បាន​ពាន​ពិសេស​មួយ​សម្រាប់​ស្លៀក​ឈុត​ប្រពៃណី​ខ្មែរ​លេច​ធ្លោ

ស្រួង ភាវី ឈ្នះ​ជើង​ឯក LPBA ឆ្នាំ ២០២៥-២៦ មាន​បេក្ខនារី ១២៨​នាក់ អម​ដោយ​ប្រាក់​រង្វាន់ជិត ៣​ម៉ឺន​ដុល្លារ​

ស្វែង​យល់​ជើងឯកពិភពលោក LPBA ស្រួង ភាវី ឈ្នះលើកទី៧ម្សិលមិញ

អបអរសាទរ! ស្រួង ភាវី ទទួលបានពាន Asia Special Award នៅកូរ៉េខាងត្បូង

ស្រួង ភាវី អះអាង​ រាល់សកម្មភាពជួយ​ជាតិ​និងប្រជាជន កើតចេញពីបេះដូងក្នុងនាមជាខ្មែរ

អបអរសាទរ! ស្រួង ភាវី ត្រូវបានរដ្ឋាភិបាលកូរ៉េផ្តល់ពានរង្វាន់មួយដ៏ថ្លៃថ្លា

អ្នកនាង ស្រួង ភាវី លើកឡើងថា គួរតែខ្វាយខ្វល់បញ្ហាសង្គម ជាងបញ្ហាបុគ្គល

អ្នកស្រី ស្រួង ភាវី គ្រោងនាំគ្រូពេទ្យជំនាញកូរ៉េ មកព្យាបាលកុមារកម្ពុជា នៅចុងសប្ដាហ៍ក្រោយ

ស្រួង ភាវី ទទួលបានពានពិសេសមួយសម្រាប់ស្លៀកឈុតប្រពៃណីខ្មែរលេចធ្លោ

ស្រួង ភាវី ឈ្នះជើងឯក LPBA ឆ្នាំ ២០២៥-២៦ មានបេក្ខនារី ១២៨នាក់ អមដោយប្រាក់រង្វាន់ជិត ៣ម៉ឺនដុល្លារ

ស្វែងយល់ជើងឯកពិភពលោក LPBA ស្រួង ភាវី ឈ្នះលើកទី៧ម្សិលមិញ

ស្រួង ភាវី អះអាង រាល់សកម្មភាពជួយជាតិនិងប្រជាជន កើតចេញពីបេះដូងក្នុងនាមជាខ្មែរ