កីឡាគុនចម្រុះ Archives - Kampuchea Thmey Daily

ឡុង ឡា ឡើងសង្វៀន GMA ជាថ្មីត្រូវប្រកួតគូឯកទៀតផងថ្ងៃទី២៥ មេសា ២០២៦ នៅវៀតណាម

Sina Noun — Wed, 22 Apr 2026 03:43:24 +0000

កីឡាករកម្ពុជាពីររូបគឺ ឡុង ឡា និង អធិជ័យ ច័ន្ទរាជ្យ នឹងត្រូវឡើងសង្វៀន GMA ជាថ្មីនៅថ្ងៃទី២៥ ខែមេសា ឆ្នាំ២០២៦ លើទឹកដីវៀតណាមដោយត្រូវតទល់ជាមួយជើងខ្លាំងរបស់ម្ចាស់ផ្ទះ និងប្រកួតក្នុងតំណែងគូឯកប្រចាំកម្មវិធីទៀតផង។

កីឡាករ ឡុង ឡា

សម្រាប់ការប្រកួតនៅឯប្រទេសវៀតណាមលើកនេះគឺកីឡាករ ឡុង ឡា របស់កម្ពុជានឹងត្រូវប្រកួតក្នុងតំណែងជាគូឯកប្រចាំកម្មវិធី GMA ដែលនេះជាមោទកភាពសម្រាប់កម្ពុជាផងដែរ។ ការប្រកួតដែលមិនអាចមើលរំលងមួយនេះច្បាស់ណាស់នឹងជក់ចិត្តសម្រាប់អ្នកគាំទ្រ ព្រោះសមត្ថភាពម្ចាស់ផ្ទះវៀតណាមដែលជាដៃគូចាស់របស់ រិន សារ័ត្ន រូបនេះមានកម្លាំងខ្លាំង និងស៊ូក្នុងការប្រកួត។ ការប្រកួតប្រជែងនឹងមានភាពតានតឹងទម្រាំអាចរកឃើញអ្នកឈ្នះរវាងអ្នកទាំងពីររូបនេះ។

ចំណែកមួយគូទៀតគឺកីឡាករ អធិជ័យ ច័ន្ទរាជ្យ នឹងត្រូវប៉ះកីឡាករវៀតណាម Thong Lu Anh Kiet លើប្រភេទទម្ងន់ ៥៩គីឡូក្រាម។ បើទោះជាការប្រកួតកន្លងទៅសិស្សគុនរបស់ក្លឹប Cambodian Top Team រូបនេះធ្វើមិនសូវបានល្អយ៉ាងណាក្ដី ប៉ុន្តែរូបគេនៅតែបន្តខំប្រឹងប្រែងហ្វឹកហាត់ និងបានប្ដេជ្ញាចិត្តដណ្ដើមយកជ័យជម្នះជាថ្មីជូនអ្នកគាំទ្រកម្ពុជា។

កីឡាករ អធិជ័យ ច័ន្ទរាជ្យ

បញ្ជាក់ដែរថា ការប្រកួតគុនចម្រុះ (MMA) នៅសង្វៀន GMA នេះនឹងធ្វើឡើងនៅថ្ងៃទី២៥ ខែមេសា ឆ្នាំ២០២៦ នៅឯទីក្រុងហូជីមិញ ប្រទេសវៀតណាម។ ការប្រកួតនេះនឹងចាប់ផ្ដើមពីម៉ោង ៧យប់តទៅ។ កីឡាករកម្ពុជាពីររូបដែលនឹងត្រូវប្រកួតនេះគឺ ឡុង ឡា ប៉ះ Nguyen Vu Phuong Hoai ចំណែក អធិជ័យ ច័ន្ទរាជ្យ ប៉ះ Thong Lu Anh Kiet ៕

កម្មវិធីប្រកួតថ្ងៃទី២៥ មេសា ២០២៦

អត្ថបទដោយ៖ នួន ស៊ីណា

The post ឡុង ឡា ឡើងសង្វៀន GMA ជាថ្មីត្រូវប្រកួតគូឯកទៀតផងថ្ងៃទី២៥ មេសា ២០២៦ នៅវៀតណាម appeared first on Kampuchea Thmey Daily.

ធ្ងន់បន្តិចហើយសហព័ន្ធគុនចម្រុះ ចេញ ៥នាក់ចាញ់ទាំង ៥ ក្នុងការប្រកួត AMMA នៅប្រទេសចិន

Sina Noun — Mon, 12 Jan 2026 02:24:57 +0000

ក្រុមគុនចម្រុះកម្ពុជាដែលចេញទៅប្រកួតតាមរយៈសហព័ន្ធអំឡុងថ្ងៃទី៩ ដល់ ១១ ខែមករា ឆ្នាំ២០២៥ នៅឯប្រទេសចិន ក្នុងកម្មវិធី 3rd AMMA Championship កន្លងទៅនេះកីឡាករ កីឡាការិនី ៥នាក់គឺចាញ់ទាំង ៥តែម្ដង និងអស់ឱកាសឡើងទៅជុំបន្តនៅកីឡាអាស៊ី លើកទី២០ នៅជប៉ុន និងព្រឹត្តិការណ៍សំខាន់ផ្សេងទៀត។

កីឡាករ គោរមៈ ច័ន្ទរាជ្យ ចាញ់ចិន

បើតាមការលើកឡើងរបស់កីឡាករ ផេង សុបញ្ញា ឬមហាជនតែងហៅថា គោរមៈ ច័ន្ទរាជ្យ នោះគឺក្រុមកម្ពុជាទាំង ៥នាក់នោះគឺចាញ់ទាំងអស់តែម្ដងរួមទាំងខ្លួនផងដែរ។ ប៉ុន្តែរូបគេចាញ់ត្រឹមពិន្ទុប៉ុណ្ណោះស្របពេលមិត្តរួមក្រុមផ្សេងៗទៀតសុទ្ធតែចាញ់ដោយបោះបង់ការប្រកួត។

អ្នកប្រដាល់រូបនេះបន្តទៀតថា ចំពោះការប្រកួតនៅឯប្រទេសចិនក្នុងកម្មវិធី 3rd AMMA Championship គឺពិតជាមានការពិបាកខ្លាំងសម្រាប់ក្រុមកម្ពុជាលើបច្ចេកទេសមិនដល់គេ កម្លាំង និងការហ្វឹកហាត់នៅមានកម្រិតនៅឡើយ។ កីឡាករបរទេសដែលចូលរួមការប្រកួតនេះគឺម្នាក់ៗបច្ចេកទេសល្អ លឿន និងកម្លាំង។ និយាយជារួមកីឡាករ កីឡាការិនីរបស់គេគឺល្អមួយឈុតតែម្ដង។

រូបភាព Olympic Cambodia

បញ្ជាក់ដែរថា ក្រុមគុនចម្រុះកម្ពុជា រួមមាន ផេង សុបញ្ញា ស៊ា វិច្ឆិកា ខៀវ ចិន្តារ័ត្ន ចេង ដាលីន គន្ធ វណ្ណនីតា និង ម៉ាប់ សុខហួយគឺសុទ្ធតែចាញ់ការប្រកួតនៅឯប្រទេសចិននេះទាំងអស់។ ក្រុមរបស់កម្ពុជាអស់ឱកាសឡើងទៅជុំបន្តនៃព្រឹត្តិការណ៍ កីឡាអាស៊ី លើកទី២០ ឯប្រទេសជប៉ុន និងការប្រកួតកីឡាអាស៊ីក្នុងសាល និងយុទ្ធគុនលើកទី៧ អារ៉ាប៊ីសាអូឌីត នោះឡើយ៕

អត្ថបទដោយ៖ នួន ស៊ីណា

The post ធ្ងន់បន្តិចហើយសហព័ន្ធគុនចម្រុះ ចេញ ៥នាក់ចាញ់ទាំង ៥ ក្នុងការប្រកួត AMMA នៅប្រទេសចិន appeared first on Kampuchea Thmey Daily.

មិនទាន់បានសម្រាកស្រួលបួលផង គោរមៈ ច័ន្ទរាជ្យ ទៅដល់ប្រទេសចិន និងកំពុងត្រៀមប្រកួត AMMA ទៀតហើយ

Sina Noun — Fri, 09 Jan 2026 02:09:24 +0000

កីឡាករវ័យក្មេង និងកំពុងល្បីឈ្មោះខ្លាំង គោរមៈ ច័ន្ទរាជ្យ សម្រាកមិនទាន់បានប៉ុន្មានថ្ងៃផងឥលូវនេះរូបគេត្រូវប្រកួតកម្មវិធីធំ AMMA Championship នៅថ្ងៃនេះហើយដោយប៉ះជាមួយម្ចាស់ផ្ទះចិន។

គោរមៈ ច័ន្ទរាជ្យ និងលោក ហ៊ុន ច័ន្ទរាជ្យ

កីឡាករ គោរមៈ ច័ន្ទរាជ្យ បានលើកឡើងថា ឥលូវនេះរូបគេបានថ្លឹងទម្ងន់រួចរាល់ហើយនៅមុននេះ និងកំពុងញុំអាហារប៉ូវកម្លាំងដើម្បីត្រៀមការប្រកួតនៅម៉ោង ១០ព្រឹកខាងមុខនេះ។ រូបគេនឹងត្រូវប្រកួតមុនគេទាំងអស់ក្នុងចំណោមកីឡាករ កីឡាការិនីដែលទៅចូលរួមព្រឹត្តិការណ៍ AMMA Championship នេះ។

ដោយសារតែអាកាសធាតុត្រជាក់ខ្លាំងគឺបានផ្ដល់ការលំបាកខ្លាំងដល់ក្រុមកម្ពុជាអំឡុងពេលប៉ុន្មានថ្ងៃដែលទៅដល់ឯប្រទេសចិននេះ។ យ៉ាងណាកូនសិស្សលោក ហ៊ុន ច័ន្ទរាជ្យ រូបនេះសង្ឃឹមថានឹងធ្វើបានល្អ ឬដណ្ដើមជ័យជម្នះក្នុងការប្រកួតសំខាន់ដណ្ដើមសិទ្ធចូលរួមនៅកម្មវិធីបន្ទាប់ទៀត។

គោរមៈ ច័ន្ទរាជ្យ

បញ្ជាក់ដែរថា ការប្រកួត AMMA Championship លើកទី៣ នេះធ្វើឡើងចាប់ពីថ្ងៃទី៩ ដល់ ១១ ខែមករា ឆ្នាំ២០២៦ នៅឯប្រទេសចិន។ បន្ទាប់ពីធ្វើដំណើរទៅប្រទេសចិន និងថ្លឹងទម្ងន់រួចរាល់ហើយនោះក្រុមកម្ពុជាទាំង ៥នាក់នឹងត្រូវប្រកួតនៅថ្ងៃនេះហើយ។ គោរមៈ ច័ន្ទរាជ្យ ទើបតែបញ្ចប់ភារកិច្ចដណ្ដើមខ្សែក្រវាត់នៅឯប្រទេសវៀតណាមក្នុងកម្មវិធី GMA កាលពីថ្ងៃទី២៧ ខែធ្នូ ឆ្នាំ២០២៥ នេះប៉ុណ្ណោះ៕

អត្ថបទដោយ៖ នួន ស៊ីណា

The post មិនទាន់បានសម្រាកស្រួលបួលផង គោរមៈ ច័ន្ទរាជ្យ ទៅដល់ប្រទេសចិន និងកំពុងត្រៀមប្រកួត AMMA ទៀតហើយ appeared first on Kampuchea Thmey Daily.

ព្រឹត្តិការណ៍ប្រកួតកីឡាយុវជនអាស៊ី៖ កីឡាគុនចម្រុះកម្ពុជាចាប់ផ្ដើមប្រកួតនៅរសៀលនេះហើយ

Sina Noun — Thu, 23 Oct 2025 03:42:50 +0000

បន្ទាប់ពីចាប់គូរួចរាល់ហើយនោះផ្នែកកីឡាគុនចម្រុះ (MMA) នឹងត្រូវប្រកួតប្រជែងដើម្បីស្វែងរកមេដាយជូនប្រទេសរៀងៗខ្លួនហើយនៅរសៀលថ្ងៃទី២៣ ខែតុលា ឆ្នាំ២០២៥ នេះក្នុងព្រឹត្តិការណ៍កីឡាយុវជនអាស៊ី លើកទី៣ ដែលកំពុងធ្វើឡើងនៅឯប្រទេសបារ៉ែន។

ក្រុមគុនចម្រុះកម្ពុជា (MMA)

នេះជាសមាសភាពក្រុមកីឡាគុនចម្រុះកម្ពុជាត្រូវប៉ះដៃគូរួមមាន៖

កីឡាករ សុខ ដេវីត vs Sharifov Umar ទម្ងន់ 50kg ប្រទេសតាហ្ស៊ីគីស្ថាន

កីឡាករ រី កែវសំណាង vs Himara BMA ទម្ងន់ 55kg ប្រទេសឥណ្ឌូនេស៊ី

កីឡាការិនី ខន វិចិត្រចាន់ត្រា vs Ratcliff Charlie ទម្ងន់ 45kg ប្រទេសហ្វីលីពីន

កីឡាការិនី ទេព ស្រីនិច vs Takada Atsuhi ទម្ងន់ 55kg ប្រទេសជប៉ុន

លើប្រភេទកីឡាគុនចម្រុះ (MMA) ធ្វើការប្រកួតចាប់ពីថ្ងៃទី ២៣ ដល់ ២៦ ខែតុលា ឆ្នាំ២០២៥ ទើបបិទបញ្ចប់ និងអាចរកឃើញកីឡាករ កីឡាការិនី រូបណាឈ្នះមេដាយជូនប្រទេសរបស់ខ្លួន។ ការប្រកួតកីឡាយុវជន អាស៊ី លើកទី៣ ដែលកំពុងប្រារព្ធឡើងនៅប្រទេសបារ៉ែននេះដំណើរការចាប់ពីថ្ងៃទី២២ ដល់ ៣១ ខែតុលា ឆ្នាំ២០២៥។ ព្រឹត្តិការណ៍នេះមាន ២៦ប្រភេទកីឡា និងត្រូវជា ២៧២វិញ្ញាសាប្រកួតប្រជែង៕

គូប្រកួតនៅរសៀលនេះ

អត្ថបទដោយ៖ នួន ស៊ីណា

The post ព្រឹត្តិការណ៍ប្រកួតកីឡាយុវជនអាស៊ី៖ កីឡាគុនចម្រុះកម្ពុជាចាប់ផ្ដើមប្រកួតនៅរសៀលនេះហើយ appeared first on Kampuchea Thmey Daily.

ទើបលេចមុខជាថ្មី ស៊ឹម ប៊ុនស្រ៊ន់ មានឱកាសប្រកួតគុនចម្រុះដណ្ដើមខ្សែក្រវាត់ក្នុងកម្មវិធីធំនៅវៀតណាម

Sina Noun — Wed, 08 Oct 2025 02:08:47 +0000

ស៊ឹម ប៊ុនស្រ៊ន់ បន្ទាប់ពីបង្ហាញមុខក្នុងវិស័យប្រដាល់ និងបានបង្កើតក្លឹបផ្ទាល់ខ្លួនមួយ ឥលូវនេះរូបគេឈានដល់ការឡើងប្រកួតហើយ ខណៈនេះជាការប្រកួតដណ្ដើមខ្សែក្រវាត់គុនចម្រុះក្នុងកម្មវិធីធំ GMA នៅឯប្រទេសវៀតណាម ថ្ងៃទី១១ ខែតុលា ២០២៥។

ដៃគូនៅវៀតណាម

បើតាមការឲ្យដឹងពីកីឡាករ ស៊ឹម ប៊ុនស្រ៊ន់ ថារូបគេបានចូលហ្វឹកហាត់មួយរយៈពេលហើយជាមួយកីឡាករផ្សេងៗក្នុងក្លឹប Cambodian Top Team របស់លោក ហ៊ុន ច័ន្ទរាជ្យ។ ដោយសារខានឡើងប្រកួតយូរ ដូច្នេះមិនដឹងថាសមត្ថភាពយ៉ាងណានោះឡើយ។

ប៊ុនស្រ៊ន់ រត់ធ្វើទម្ងន់

ម្ចាស់កសិដ្ឋានលក់ដើមឈើរូបនេះបន្ថែមទៀតថា ឥលូវនេះគឺកំពុងបារម្ភអំពីការធ្វើទម្ងន់ ព្រោះលើសច្រើនមិនដឹងថាធ្វើបានដល់កម្រិតណានោះទេ។ យ៉ាងណា ប៊ុនស្រ៊ន់ នឹងខំប្រឹងប្រែងឲ្យអស់ពីសមត្ថភាពសម្រាប់ការប្រកួតនៅឯប្រទេសវៀតណាម។

សង្វៀននៅ GMA

បញ្ជាក់ដែរថា កីឡាករ ស៊ឹម ប៊ុនស្រ៊ន់ បាត់មុខពីវិស័យប្រដាល់គុនខ្មែរជាយូរឆ្នាំមកហើយដោយចាប់យករបរលក់ដើមឈើ កាហ្វេ នៅឯខេត្តកំពង់ចាម។ យូរៗម្ដងគេឃើញអ្នកប្រដាល់រូបនេះឡើងប្រកួតនៅតាមសង្វៀនខ្លះដែរ។ នៅថ្ងៃទី១១ ខែតុលា ឆ្នាំ២០២៥ នេះ ប៊ុនស្រ៊ន់ នឹងឡើងប្រកួតគុនចម្រុះជាថ្មីដណ្ដើមខ្សែក្រវាត់ជាមួយកីឡាករវៀតណាម Nguyen Hoang Thach នៅថ្ងៃទី១១ ខែតុលា ឆ្នាំ២០២៥ ក្នុងកម្មវិធី GMA នៅទីក្រុងហូជីមិញ៕

ប៊ុនស្រ៊ន់ នៅហាងកាហ្វេរបស់គេ

អត្ថបទដោយ៖ នួន ស៊ីណា

The post ទើបលេចមុខជាថ្មី ស៊ឹម ប៊ុនស្រ៊ន់ មានឱកាសប្រកួតគុនចម្រុះដណ្ដើមខ្សែក្រវាត់ក្នុងកម្មវិធីធំនៅវៀតណាម appeared first on Kampuchea Thmey Daily.

ដៃគូប្រកួតរបស់អត្តពលិកកម្ពុជាថ្ងៃនេះ ជើងឯកគុនចម្រុះអាស៊ី

chean virakbot — Fri, 12 Jul 2024 03:44:47 +0000

ការប្រកួតគុនចម្រុះជើងឯកអាស៊ី លើកទី២ ឆ្នាំ២០២៤ នៅលើទឹកដីកម្ពុជា ឈានដល់ថ្ងៃទី២ ហើយក្នុងការប្រកួតវគ្គជម្រុះ និងមានកីឡាករខ្លះឈានដល់វគ្គពាក់កណ្តាលផ្តាច់ព្រ័ត្រ។ កីឡាករកម្ពុជាមួយចំនួនទទួលបានជ័យជម្នះ ខណៈមួយចំនួនក៏បរាជ័យក្នុងការប្រកួតថ្ងៃទី១កាលពីម្សិលមិញ។

សម្រាប់ថ្ងៃទី២នេះ កីឡាករ កីឡាការិនីកម្ពុជាទាំងអស់ត្រូវបន្តការប្រកួតទៀត។ ខាងក្រោមជាដៃគូរបស់កីឡាករ កីឡាការិនីកម្ពុជា។

កីឡាការិនី ទួន ស្រីភីន vs Sitohang Melpida (ឥណ្ឌូណេស៊ី)
កីឡាការិនី អ៊ុំ ថារ័ត្ន vs Kwan Holly Hoi Ling (ហុងកុង) លើកទី២
កីឡាការិនី នៅ ស្រីពៅ vs Putri Aprillia Eka (ឥណ្ឌូណេស៊ី)
កីឡាករ ផេង បញ្ញា vs Catalan Rene (ហ្វីលីពីន) លើកទី២
កីឡាករ ហ៊ុន គឹមហៀង vs Pandaan Arthur Andre (សិង្ហបុរី)
កីឡាករ សែន ចន្ទរិទ្ធីគុណ vs Yang Ji-Hua (ឆាយនីសតៃប៉ិ)
កីឡាការិនី ខៀវ ចិន្តារ័ត្ន vs Puspitasari Nurdiana (ឥណ្ឌូណេស៊ី)
កីឡាករ រិន សារ័ត្ន vs Lee Chilu (ឆាយនីសតៃប៉ិ)
កីឡាករ អាត ធាន vs Safarov Yoqubjon (កាហ្សាស្ថាន)
កីឡាករ រិន សារ័ត្ន vs Zhi Hao Teo (ម៉ាឡេស៊ី) ប្រកួតទី២
កីឡាករ ឡុង ឡា vs Tse Brian Sheung Chi (ហុងកុង)
កីឡាការិនី គន្ធ វ៉ាន់នីតា vs Sze Teng Pang (ម៉ាឡេស៊ី)

អត្ថបទ៖ វីរបុត្រ

The post ដៃគូប្រកួតរបស់អត្តពលិកកម្ពុជាថ្ងៃនេះ ជើងឯកគុនចម្រុះអាស៊ី appeared first on Kampuchea Thmey Daily.

ល្ងាចនេះ កម្ពុជាសម្តែងយុទ្ធគុនខ្មែរបុរាណ៦ប្រភេទដល់ភ្ញៀវ១៨ប្រទេស

chean virakbot — Thu, 11 Jul 2024 00:57:52 +0000

កម្ពុជានឹងសម្តែងបង្ហាញយុទ្ធគុនខ្មែរបុរាណចំនួន៦ប្រភេទផ្សេងគ្នាដល់ភ្ញៀវអន្តរជាតិ១៨ប្រទេសដែលបានចូលរួមក្នុងព្រឹត្តិការណ៍ប្រកួតគុនចម្រុះជើងឯកអាស៊ី លើកទី២ នាល្ងាចថ្ងៃទី១១ ខែកក្កដា នៅវិមានពហុកីឡដ្ឋានជាតិអូឡាំពិក ក្រោមអធិបតីភាពសម្តេចធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា។

ក្នុងពិធីបើកការប្រកួតគុនចម្រុះអាស៊ីជាផ្លូវការ នឹងមានរបាំជូនពរ ពិធីដង្ហែគណៈប្រតិភូ គោរពទង់ជាតិនៃព្រះរាជាណាចក្រកម្ពុជា និងពិធីសច្ចាប្រណិធានរបស់អត្តពលិក និងអាជ្ញាកកណ្តាល។ បន្ទាប់មកមានការថ្លែងសុន្ទរកថារបស់លោកទេសរដ្ឋមន្ត្រី ថោង ខុន ទទួលបន្ទុកអភិវឌ្ឍចលនាកីឡា សុន្ទរកថារបស់លោក Gordon Tang អនុប្រធានក្រុមប្រឹក្សាអូឡាំពិកអាស៊ី និងជាប្រធានសមាគមកីឡាគុនចម្រុះអាស៊ី និងជាពិសេសសុន្ទរកថា និងគោះឃ្មោះដើម្បីបើកជាផ្លូវការរបស់សម្តេចធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា។

បន្ទាប់មកនឹងមានពិធីសម្តែងយុទ្ធគុនខ្មែរបុរាណដែលមាន៦ផ្សេងគ្នាគឺ ការសម្តែងគុនខ្មែរ យុទ្ធក្រមខម ក្បាច់គុនកងយោធពលខេមរភូមិន្ទ គុនចំបាប់ខ្មែរបុរាណ គុនខែល និងគុនល្បុក្កតោ ហើយចុងក្រោយជាការសម្តែងរួមគ្នា។

នេះជាលើកទី១ហើយដែលកម្ពុជាសម្តែងបង្ហាញយុទ្ធគុនខ្មែរជាច្រើនប្រភេទក្នុងព្រឹត្តិការណ៍ផ្លូវការធំៗ។ កន្លងមកភាគច្រើនសម្តែងតែល្បុក្កតោ ក្បាច់គុនកងយោធពលខេមរភូមិន្ទ ក៏ដូចជាសិល្បៈផ្សេងៗ។

ការប្រកួតគុនចម្រុះអាស៊ី លើកទី២ នៅថ្ងៃទី១១-១២-១៤ ខែកក្កដា ឆ្នាំ២០២៤ ដែល១៨ប្រទេសចូលរួមនេះរៀបចំដោយគណៈកម្មាធិការជាតិអូឡាំពិកកម្ពុជា សហព័ន្ធកីឡាយុទ្ធគុនចម្រុះអាស៊ី (AMMA) និងសហព័ន្ធកីឡាយុទ្ធគុនចម្រុះកម្ពុជា។ គោលបំណងធំបំផុតនៃការរៀបចំព្រឹត្តិការណ៍នេះដើម្បីជំរុញ ផ្សព្វផ្សាយ និងលើកកម្ពស់តម្លៃកីឡាគុនចម្រុះឲ្យក្លាយជាកីឡាផ្លូវការ ស្តង់ដាត្រឹមត្រូវដើម្បីចូលក្នុងព្រឹត្តិការណ៍កីឡាអាស៊ី និងកីឡាអូឡាំពិក។

ការប្រកួតគុនចម្រុះជើងឯកអាស៊ី លើកទី២ នៅប្រទេសកម្ពុជា ក៏ជាការប្រកួតជម្រុះដើម្បីជ្រើសរើសជ័យលាភីទៅចូលរួមប្រកួតក្នុងព្រឹត្តិការណ៍«កីឡាក្នុងសាល និងក្បាច់គុនអាស៊ី (Asian Indoor and Martial Arts Games) នាខែវិច្ឆិកា ឆ្នាំ២០២៤ នៅប្រទេសថៃ។

កម្ពុជាបានត្រៀមអត្តពលិកទាំង១៦រូបរួចហើយគឺកីឡាករ ផេង សុបញ្ញា, ឡុង ឡា, រិន សារ័ត្ន, ហ៊ុន គឹមហៀង, មាស ម៉ើ, សែន ច័ន្ទឫទ្ធិគុន, ហ៊ុន ចន្ទរាជ, ធាន អាន, ចាន់ រតនា, អេ វីរៈខាំឈីតភូថង, ហាត ភី ខណៈកីឡាការិនីមានដូចជា ខៀវ ចិន្ដារ័ត្ន, នៅ ស្រីពៅ, គុណ វ៉ាន់នីតា, សំ ថារ័ត្ន និង ទួន ស្រីភីន៕

អត្ថបទ៖ វីរបុត្រ

The post ល្ងាចនេះ កម្ពុជាសម្តែងយុទ្ធគុនខ្មែរបុរាណ៦ប្រភេទដល់ភ្ញៀវ១៨ប្រទេស appeared first on Kampuchea Thmey Daily.

កម្ពុជានឹងបង្ហាញ ទស្សនីយភាពប្លែកមិនធ្លាប់មានក្នុងពិធីបើក MMA ថ្ងៃស្អែក

chean virakbot — Wed, 10 Jul 2024 03:33:11 +0000

កម្ពុជាក្នុងនាមជាម្ចាស់ផ្ទះបានគ្រោងបង្ហាញទស្សនីយភាពពិសេសប្លែក និងមិនធ្លាប់មានសម្រាប់ពិធីបើកការប្រកួតគុនចម្រុះជើងឯកអាស៊ី លើកទី២ ឆ្នាំ២០២៤ ល្ងាចថ្ងៃទី១១ ខែកក្កដា នៅវិមានពហុកីឡដ្ឋានជាតិអូឡាំពិក ក្រោមអធិបតីភាពសម្តេចធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា។

លោក វ៉ាត់ ចំរើន រដ្ឋលេខាធិការក្រសួងអប់រំ យុវជន និងកីឡា និងជាអគ្គលេខាធិការនៃគណៈកម្មាធិការជាតិអូឡាំពិកកម្ពុជា បានឲ្យដឹងថា រហូតដល់ពេលនេះ កម្ពុជាបានត្រៀមរួចរាល់ហើយសម្រាប់ការរៀបចំព្រឹត្តិការណ៍ប្រកួតគុនចម្រុះអាស៊ី លើកទី២។ ក្នុងនាមជាម្ចាស់ផ្ទះ កម្ពុជានឹងបង្ហាញផ្ទាំងទស្សនីយភាពពិសេសប្លែក និងមិនធ្លាប់បានបង្ហាញពីមុន។

ក្រោយពេលចុះពិនិត្យផ្ទាល់នៅកន្លែងរៀបចំនៅវិមានពហុកីឡដ្ឋានជាតិកាលពីល្ងាចថ្ងៃទី៩ ខែកក្កដា លោក វ៉ាត់ ចំរើន បានប្រាប់ដល់អ្នកសារព័ត៌មានថា ៖«យើងមានការសម្តែងក្នុងពិធីបើកនេះខុសប្លែកពីមុនគឺសម្តែងពីភាពសំបូរបែបនៃយុទ្ធគុនខ្មែរបុរាណ។ ចូលរួមជាមួយនឹងការរៀបចំឲ្យមានទស្សនីភាពប្លែកៗ និងអ្វីដែលមិនធ្លាប់មានពីមុន។ ដូចជាការសម្តែងវាយខែល យើងមិនធ្លាប់សម្តែងទេពីមុន តែឥឡូវនេះ យើងយកមកបង្ហាញដល់បងប្អូន ក៏ដូចជាភ្ញៀវអន្តរជាតិ១៨ប្រទេសដែលបានមកកម្ពុជា»។

អ្វីដែលកាន់តែពិសេសទៀតនោះ កម្ពុជាទទួលបានបទពិសោធ និងចំណេះដឹងច្រើនពីអ្នកជំនាញគុនចម្រុះអន្តរជាតិ។ លោក វ៉ាត់ ចំរើន បានឲ្យដឹងថា ខាងភាគីគុនចម្រុះអន្តរជាតិបាននាំយកអ្នកជំនាញការគ្រប់ទាំងអស់ដើម្បីធ្វើការជាមួយម្ចាស់ផ្ទះកម្ពុជាទាំងការងាររៀបចំ និងបច្ចេកទេស។

លោក វ៉ាត់ ចំរើន បានលើកឡើងថា ៖«ជាពិសេស ការងារបច្ចេកទេសមិនមែនជាការប្រកួតធម្មតា ដូច្នេះត្រូវការរៀបចំប្រព័ន្ធឌីជីថលទំនើបមួយដើម្បីបញ្ជាក់ពីយុត្តិធម៌ និងភាពត្រឹមត្រូវនៃកីឡា។ ពួកគេមានប្រព័ន្ធដាក់ពិន្ទុ ប្រព័ន្ធទិន្នន័យ ដែលចេញពិន្ទុដោយស្វ័យប្រវត្តិ ហើយមានការហាត់រៀបចំច្បាស់លាស់ណាស់។ ភាពប្រាកដប្រជាក្នុងបច្ចេកទេសដាក់ពិន្ទុគឺជារឿងសំខាន់»។

លោករដ្ឋលេខាធិការក្រសួងអប់រំ យុវជន និងកីឡារូបនេះបានបន្ថែមថា ខាងភាគីអន្តរជាតិក៏បានយកចិត្តទុកខ្លាំងលើប្រព័ន្ធផ្សព្វផ្សាយ។ ដូច្នេះភាគីកម្ពុជាជាម្ចាស់ផ្ទះ និងប្រព័ន្ធផ្សព្វផ្សាយដូចជាទូរទស្សន៍ជាដើមគឺបានរៀនសូត្រច្រើនណាស់ពីជំនាញការអន្តរជាតិដែលបានមកជួយកម្ពុជា។

តាមកម្មវិធីគ្រោងទុក នៅថ្ងៃទី១១ ខែកក្កដា ឆ្នាំ២០២៤ ដែលជាថ្ងៃទី១ គឺមានការប្រកួតជម្រុះជុំទី១គ្រប់វិញ្ញាសាទាំងអស់ចាប់ពីម៉ោង៩ព្រឹកដែលអ្នកគាំទ្រអាចចូលទស្សនាដោយសេរី។ នៅពេលល្ងាចគឺជាពិធីបើកផ្លូវការក្រោមអធិបតីភាពសម្តេចធិបតីនាយករដ្ឋមន្ត្រីនៃកម្ពុជា ប៉ុន្តែមិនអនុញ្ញាតឲ្យមហាជនចូលទស្សនាផ្ទាល់ទេ។

នៅថ្ងៃទី២ពោលគឺនៅថ្ងៃទី១២ ខែកក្កដា ជាការប្រកួតវគ្គពាក់កណ្តាលផ្តាច់ព្រ័ត្រ និងថ្ងៃទី៣ ត្រូវនឹងថ្ងៃទី១៣ ខែកក្កដា គឺជាការប្រកួតវគ្គផ្តាច់ព្រ័ត្រ ពិធីបំពាក់មេដាយ និងពិធីបិទ។

អត្ថបទ៖ វីរបុត្រ
រូបថត៖ Cambodia 2023

The post កម្ពុជានឹងបង្ហាញ ទស្សនីយភាពប្លែកមិនធ្លាប់មានក្នុងពិធីបើក MMA ថ្ងៃស្អែក appeared first on Kampuchea Thmey Daily.

កីឡាគុនចម្រុះ Archives - Kampuchea Thmey Daily

ឡុង​ ឡា​ ​ឡើង​សង្វៀន​ GMA​ ជា​ថ្មី​ត្រូវ​ប្រកួតគូឯក​ទៀត​ផងថ្ងៃ​ទី២៥​ មេសា​ ២០២៦​ នៅ​វៀតណាម​

ធ្ងន់​បន្តិច​ហើយ​សហព័ន្ធ​គុន​ចម្រុះ ​ចេញ​ ៥​នាក់​ចាញ់​ទាំង​ ៥​ ក្នុង​ការ​ប្រកួត​ AMMA នៅ​ប្រទេស​ចិន​

ព្រឹត្តិការណ៍​ប្រកួត​កីឡាយុវជន​អាស៊ី​៖​ កីឡា​គុន​ចម្រុះ​កម្ពុជា​ចាប់​ផ្ដើម​ប្រកួត​នៅ​រសៀល​នេះ​ហើយ​

ដៃ​គូ​ប្រកួត​របស់​អត្តពលិក​កម្ពុជា​ថ្ងៃ​នេះ ជើង​ឯក​គុន​ចម្រុះ​អាស៊ី

ល្ងាចនេះ កម្ពុជាសម្តែង​យុទ្ធ​គុន​ខ្មែរបុរាណ​៦​ប្រភេទ​ដល់ភ្ញៀវ១៨ប្រទេស

កម្ពុជា​នឹងបង្ហាញ​ ទស្សនីយភាព​​​ប្លែក​មិន​ធ្លាប់​មាន​ក្នុង​ពិធី​បើក MMA ថ្ងៃស្អែក

ឡុង ឡា ឡើងសង្វៀន GMA ជាថ្មីត្រូវប្រកួតគូឯកទៀតផងថ្ងៃទី២៥ មេសា ២០២៦ នៅវៀតណាម

ធ្ងន់បន្តិចហើយសហព័ន្ធគុនចម្រុះ ចេញ ៥នាក់ចាញ់ទាំង ៥ ក្នុងការប្រកួត AMMA នៅប្រទេសចិន

ព្រឹត្តិការណ៍ប្រកួតកីឡាយុវជនអាស៊ី៖ កីឡាគុនចម្រុះកម្ពុជាចាប់ផ្ដើមប្រកួតនៅរសៀលនេះហើយ

ដៃគូប្រកួតរបស់អត្តពលិកកម្ពុជាថ្ងៃនេះ ជើងឯកគុនចម្រុះអាស៊ី

ល្ងាចនេះ កម្ពុជាសម្តែងយុទ្ធគុនខ្មែរបុរាណ៦ប្រភេទដល់ភ្ញៀវ១៨ប្រទេស

កម្ពុជានឹងបង្ហាញ ទស្សនីយភាពប្លែកមិនធ្លាប់មានក្នុងពិធីបើក MMA ថ្ងៃស្អែក