កីឡាទ្រីយ៉ាត្លុង Archives - Kampuchea Thmey Daily

ម្ចាស់មេដាយប្រាក់កីឡាឆ្នេរខ្សាច់អាស៊ី លើកទី៦ របស់កម្ពុជា បន្តមានភារកិច្ចសំខាន់ៗ ៣កម្មវិធីទៀតនៅខែឧសភា

Sina Noun — Tue, 28 Apr 2026 07:01:32 +0000

កីឡាការិនី ម៉ាហ្គត មរកត ហ្គារ៉ាប៊ីឌៀន របស់កម្ពុជាដែលជាម្ចាស់មេដាយប្រាក់កីឡាឆ្នេរខ្សាច់ លើកទី៦ ឆ្នាំ២០២៦ ប្រទេសចិន នៅមានភារកិច្ចសំខាន់ៗចំនួន ៣កម្មវិធីទៀតក្នុងខែឧសភាខាងមុខនេះពិសេសការសន្សំពិន្ទុឆ្ពោះទៅព្រឹត្តិការណ៍កីឡាអូឡាំពិក សហរដ្ឋអាមេរិក ។

ម៉ាហ្គត មរកត ហ្គារ៉ាប៊ីឌៀន ពេលមកដល់កម្ពុជា

នេះបើតាមការឲ្យដឹងពីលោក ងិន សុបញ្ញា អគ្គលេខាធិការសហព័ន្ធបានបញ្ជាក់ថា កីឡាការិនី ម៉ាហ្គត មរកត ហ្គារ៉ាប៊ីឌៀន នៅមិនទាន់បានសម្រាកនោះទេ ពោលមកដល់កម្ពុជាវិញនេះត្រូវបន្តហ្វឹលហាត់រយៈពេលមួយខែបន្តទៀតដើម្បីត្រៀមខ្លួនចូលរួមការប្រកួតសំខាន់ៗអំឡុងខែឧសភា ២០២៦។

អគ្គលេខាធិការខាងលើនេះបន្ថែមទៀតថា ការប្រកួតគឺមាន ៤កម្មវិធីអំឡុងខែក្រោយនេះរួមមាន 1. Triathlon Cup 02-05-26 ប្រទេសហ្វីលីពីន 2.World Cup Chengdu 09-05-26 ប្រទេសចិន 3. Asian Triathlon Cup Liangungang 23-05-26 ប្រទេសវៀតណាម 4. Asian Triathlon Cup Taizhou 30-05-26 ប្រទេសចិន។ ប៉ុន្តែសហព័ន្ធនឹងពិនិត្យមើលលើលទ្ធភាពជាក់ស្ដែង និងប្រហែលបញ្ជូនឲ្យចូលរួមប្រកួតត្រឹមតែ ៣កម្មវិធីប៉ុណ្ណោះទេ។ ការប្រកួតទាំងនេះគឺសុទ្ធតែសន្សំពិន្ទុដើម្បីឆ្ពោះទៅរកការជាប់ជម្រុះបានលេងនៅព្រឹត្តិការណ៍កីឡាអូឡាំពិកឯសហរដ្ឋអាមេរិក ឆ្នាំ២០២៨ ខាងមុខនេះ។

កីឡាការិនី ម៉ាហ្គត មរកត ហ្គារ៉ាប៊ីឌៀន

បញ្ជាក់ដែរថា កីឡាការិនី ម៉ាហ្គត មរកត ហ្គារ៉ាប៊ីឌៀន ទើបតែឈ្នះមេដាយប្រាក់ ១គ្រឿងក្នុងព្រឹត្តិការណ៍កីឡាឆ្នេរខ្សាច់ លើកទី៦ ដែលកំពុងធ្វើនៅឯទីក្រុង Sanya ប្រទេសចិន។ កីឡាការិនីកម្ពុជារូបនេះប្រកួតឈ្នះលើវិញ្ញាសា Aquathlon ដោយត្រូវរត់ 2.5km + ហែលទឹក 1km + រត់ 2.5 kmដោយធ្វើបានក្នុងថេរវេលា 31.34នាទី។ នៅខែក្រោយអំឡុងពីថ្ងៃទី២ ទៅនេះគឺកីឡាការិនី ម៉ាហ្គត មរកត ហ្គារ៉ាប៊ីឌៀន នឹងមមាញឹកខ្លាំងលើការប្រកួត៕

អត្ថបទដោយ៖ នូន ស៊ីណា

The post ម្ចាស់មេដាយប្រាក់កីឡាឆ្នេរខ្សាច់អាស៊ី លើកទី៦ របស់កម្ពុជា បន្តមានភារកិច្ចសំខាន់ៗ ៣កម្មវិធីទៀតនៅខែឧសភា appeared first on Kampuchea Thmey Daily.

កីឡាទ្រីយ៉ាត្លុងកម្ពុជា នេះជាលើកទី១ ចូលរួមការប្រកួតកីឡាឆ្នេរខ្សាច់អាស៊ី ថែមទាំងអាចដណ្ដើមមេដាយជូនជាតិទៀតផង

Sina Noun — Thu, 23 Apr 2026 07:23:24 +0000

តំណាងសហព័ន្ធកីឡាទ្រីយ៉ាត្លុងកម្ពុជា នេះជាលើកទី១ ហើយដែលក្រុមកីឡារបស់ខ្លួនបានចូលរួមក្នុងព្រឹត្តិការណ៍កីឡាឆ្នេរខ្សាច់អាស៊ី លើកទី៦ ដែលកំពុងធ្វើឡើងនៅឯប្រទេសចិន និងជាមោទកភាពមួយដែលអាចស្វែងរកមេដាយប្រាក់ ១គ្រឿងជូនជាតិនៅពេលនេះ។

កីឡាការិនី ម៉ាហ្គត មរកត ហ្គារ៉ាប៊ីឌៀន

លោក ងិន សុបញ្ញា អគ្គលេខាធិការសហព័ន្ធកីឡាទ្រីយ៉ាត្លុងកម្ពុជា បានឲ្យដឹងថា ការចូលរួមកីឡាឆ្នេរខ្សាច់នេះគឺជាលើកទី១ ហើយសម្រាប់សហព័ន្ធរបស់លោក។ ក្នុងនាមសហព័ន្ធពិតជាសប្បាយរីករាយខ្លាំងដែលកីឡាការិនី ម៉ាហ្គត មរកត ហ្គារ៉ាប៊ីឌៀន បានដណ្ដើមមេដាយប្រាក់ ១គ្រឿងជូនជាតិមាតុភូមិកាលពីព្រឹកមិញនេះ។ សមិទ្ធិផលនេះបានបង្ហាញពីការខំប្រឹងប្រែងរបស់ក្រុមកីឡាករ កីឡាការិនីទ្រីយ៉ាងត្លុងនាពេលកន្លងមក។

មេដាយប្រាក់ ១គ្រឿងនេះដែរជាមោទភាពមួយសម្រាប់ប្រទេសកម្ពុជានៅក្នុងព្រឹត្តិការណ៍កម្រិតអាស៊ីលើកទី៦ នេះ។ បណ្ដាថ្នាក់ដឹកនាំ និងអ្នកមជ្ឈដ្ឋានកីឡាមានគ្រូបង្វឹក កីឡាករ កីឡាការិនី រួមទាំងសាធារណៈជនដែលគាំទ្រវិស័យកីឡាបានស៊ែចែករំលែកច្រើនអំពីជ័យជម្នះរបស់កីឡាទ្រីយ៉ាត្លុងកម្ពុជានៅព្រឹកមិញនេះ។

កីឡាការិនី ម៉ាហ្គត មរកត ហ្គារ៉ាប៊ីឌៀន

បញ្ជាក់ដែរថា ព្រឹត្តិការណ៍កីឡាឆ្នេរខ្សាច់អាស៊ី លើកទី៦ ឆ្នាំ២០២៦ នេះបានបើកដំណើរការប្រកួតជាផ្លូវការហើយកាលពីថ្ងៃទី២២ ឧសភា ម្សិលមិញ។ កម្ពុជាបានឈ្នះមេដាយប្រាក់ ១គ្រឿងលើប្រភេទកីឡាទ្រីយ៉ាត្លុងដោយកីឡាការិនី ម៉ាហ្គត មរកត ហ្គារ៉ាប៊ីឌៀន បន្ទាប់ពីធ្វើបានក្នុងរយៈពេល ៣២.០០ នាទីនៅពីក្រោយកីឡាការិនីចិន ជាប់ចំណាត់ថ្នាក់លេខ១ ទទួលបានមេដាយមាស ធ្វើបានរយៈពេល ៣១.៣៤នាទី។

បញ្ជាក់ដែរថា ព្រឹត្តិការណ៍ប្រកួតកីឡាឆ្នេរខ្សាច់អាស៊ី លើកទី៦ ឆ្នាំ២០២៦ នេះកម្ពុជាបញ្ជូនតែ ៤ប្រភេទកីឡា និងមានអត្តពលិកតែជាង ២០នាក់ប៉ុណ្ណោះ។ ក្នុង ៤ប្រភេទគីឡានោះរួមមានកីឡាជឺជីតស៊ូ ទ្រីយ៉ាត្លុង បាល់ទាត់លើតុ និងចំបាប់។ កម្ពុជាឈ្នះបានមេដាយ ១គ្រឿងហើយក្នុងព្រឹត្តិកាណ៍កម្រិតអាស៊ីនេះ៕

អត្ថបទដោយ៖ នួន ស៊ីណា

The post កីឡាទ្រីយ៉ាត្លុងកម្ពុជា នេះជាលើកទី១ ចូលរួមការប្រកួតកីឡាឆ្នេរខ្សាច់អាស៊ី ថែមទាំងអាចដណ្ដើមមេដាយជូនជាតិទៀតផង appeared first on Kampuchea Thmey Daily.

មកដឹងពីសមត្ថភាព និងវិញ្ញាសាក្រុមកីឡាទ្រីយ៉ាត្លុងកម្ពុជា ប្រកួតនៅកីឡាឆ្នេរខ្សាច់ប្រទេសចិន

Sina Noun — Wed, 22 Apr 2026 02:10:39 +0000

ក្រុមកីឡាទ្រីយ៉ាត្លុងកម្ពុជា បានចេញដំណើរទៅប្រទេសចិនតាំងពីថ្ងៃទី២០ ខែមេសា ឆ្នាំ២០២៦ នេះមកម្ល៉េះដើម្បីត្រៀមខ្លួនចូលរួមប្រកួតប្រជែងមេដាយនៅព្រឹត្តិការណ៍កីឡាឆ្នេរខ្សាច់ លើកទី៦ ខណៈបច្ចុប្បន្នកំពុងហ្វឹកហាត់ពង្រឹងសមត្ថភាពនៅទីនោះ។

ក្រុមទ្រីយ៉ាត្លុងកម្ពុជា

លោក ងិន សុបញ្ញា អគ្គលេខាធិការសហព័ន្ធបានឲ្យដឹងថា ការប្រកួតកីឡាឆ្នេរខ្សាច់នៅឆ្នាំនេះគឺសម្រាប់ប្រភេទកីឡាទ្រីយ៉ាត្លុងបានបញ្ជូនកីឡាការិនីពីររូបគឹ ផល ស្រីភួង និងកីឡាការិនីបារាំង-ខ្មែរ ម៉ាហ្គត មរកត ហ្គារ៉ាប៊ីឌៀន។ អ្នកទាំងពីរនឹងលេងវិញ្ញាសារតែមួយជាមួយគ្នាគឺ Aquathlon ដោយត្រូវរត់ 2.5km + ហែលទឹក 1km + រត់ 2.5 km ទៀត។

ក្រុមទ្រីយ៉ាត្លុងកម្ពុជា

ចំពោះសមត្ថភាពវិញកីឡាការិនីកូនកាត់ ម៉ាហ្គត មរកត ហ្គារ៉ាប៊ីឌៀន ជាអតីតម្ចាស់មេដាយមាសស៊ីហ្គេម ឆ្នាំ២០២៣ ដែលធ្វើឡើងនៅកម្ពុជា។ រូបគេមានសមត្ថភាពខ្លាំង និងធ្លាប់ឆ្លងកាត់ការប្រកួតកម្រិតខ្ពស់នៅលើឆាកអន្តរជាតិជាច្រើនដងផងដែរ។ កីឡាករម្នាក់នេះមានសមត្ថភាពហែលទឹកបានលឿនល្អក្នុងការហ្វឹកហាត់ និងប្រកួតកន្លងទៅ។ ក្នុងនាមសហព័ន្ធជឿជាក់ថាក្រុមទ្រីយ៉ាត្លុងកម្ពុជានឹងធ្វើបានល្អនៅការប្រកួតឯប្រទេសចិននេះ។

បញ្ជាក់ដែរថា កម្ពុជាបានបញ្ចូន ៤ប្រភេទកីឡាទៅចូលរួមព្រឹត្តិការណ៍កីឡាឆ្នេរខ្សាច់លើកទី៦ ចាប់ពីថ្ងៃទី២២ ដល់ ៣០ ខែមេសា ឆ្នាំ២០២៦ នេះនៅឯប្រទេសចិន។ ដោយឡែកសម្រាប់កីឡាទ្រីយ៉ាត្លុងនឹងត្រូវប្រកួតនៅថ្ងៃទី២៣ ខែមេសា ដោយមានកីឡាការិនីពីររូបលេងលើវិញ្ញាសា Aquathlon ៕

ក្រុមទ្រីយ៉ាត្លុងទៅដល់កន្លែងប្រកួត

អត្ថបទដោយ៖ នួន ស៊ីណា

The post មកដឹងពីសមត្ថភាព និងវិញ្ញាសាក្រុមកីឡាទ្រីយ៉ាត្លុងកម្ពុជា ប្រកួតនៅកីឡាឆ្នេរខ្សាច់ប្រទេសចិន appeared first on Kampuchea Thmey Daily.

នេះជាកម្មវិធីប្រកួតនៅឯក្រៅប្រទេស ៦ព្រឹត្តិការណ៍ធំៗឆ្នាំ២០២៦ របស់កីឡាទ្រីយ៉ាត្លុងកម្ពុជា

Sina Noun — Tue, 31 Mar 2026 02:13:32 +0000

សហព័ន្ធកីឡាទ្រីយ៉ាត្លុងរួមទាំងផ្សេងៗសរុប ៤០ នឹងត្រូវប្រមូលផ្ដុំក្រុមជម្រើសឈុតធំ និងថ្នាល នៅដើមខែមេសា ឆ្នាំ២០២៦ នេះហើយដើម្បីត្រៀមចូលរួមការប្រកួតប្រជែងមេដាយ ឬពានរង្វាន់អន្តរជាតិ។ នេះជាកម្មវិធីប្រកួតកម្រិតអន្តរជាតិទាំង ៦ព្រឹត្តិការណ៍ធំៗរបស់សហព័ន្ធកីឡាទ្រីយ៉ាត្លុង ឆ្នាំ២០២៦ នេះ។

ការប្រកួតកន្លងទៅ

ព្រឹត្តិការណ៍ទាំង ៦នោះរួមមាន៖

ទី 1 ការប្រកួត Asian Beach Games 20/04/2026 ប្រទេសចិន

ទី 2 ការប្រកួត Triathlon Cup 02/05/2026 ប្រទេសហ្វីលីពីន

ទី 3 ការប្រកួត World Cup Chengdu 09/05/2026 ប្រទេសចិន

ទី 4 ការប្រកួត Asian Triathlon Cup Liangungang 23/05/2026 ប្រទេសចិន

ទី 5 ការប្រកួត Asian Triathlon Cup Taizhou 30/05/2026 ប្រទេសចិន

ទី 6 ការប្រកួត Asia Games 20/09/2026 ប្រទេសជប៉ុន

នេះមិនរាប់បញ្ចូលព្រឹត្តិការណ៍ប្រកួតនៅក្នុងស្រុកផង ដូច្នេះនៅឆ្នាំ២០២៦ នេះសហព័ន្ធមានកម្មវិធី និងមមាញឹកច្រើនក្នុងការចូលរួមប្រកួតប្រជែងមេដាយជូនជាតិតមាតុភូមិ។ សម្រាប់សហព័ន្ធកីឡាទ្រីយ៉ាត្លុងការប្រមូលផ្ដុំក្រុមជម្រើសជាតិឆ្នាំនេះមានឈុត ៨នាក់ និងថ្នាល ២នាក់៕

ការហ្វឹកហាត់កន្លងទៅ

អត្ថបទដោយ៖ នួន ស៊ីណា

The post នេះជាកម្មវិធីប្រកួតនៅឯក្រៅប្រទេស ៦ព្រឹត្តិការណ៍ធំៗឆ្នាំ២០២៦ របស់កីឡាទ្រីយ៉ាត្លុងកម្ពុជា appeared first on Kampuchea Thmey Daily.

សហព័ន្ធកីឡាទ្រីយ៉ាត្លុង ទទួលស្គាល់ក្លិបកីឡារត់ជីរ៉ាន់-កម្ពុជាសមាជិកពេញសិទ្ធិ

chean virakbot — Mon, 02 Mar 2026 06:41:28 +0000

កាលពីថ្ងៃទី១ ខែមីនា ឆ្នាំ ២០២៦ សហព័ន្ធកីឡាទ្រីយ៉ាត្លុងកម្ពុជា បានប្រកាសទទួលស្គាល់ក្លិបកីឡារត់ជីរ៉ាន់-កម្ពុជា (GeeRun Cambodia) ជាសមាជិកពេញសិទ្ធិរបស់ខ្លួន បន្ទាប់ពីឃើញក្លិបនេះរួមចំណែកជួយអភិវឌ្ឍកីឡារត់នៅកម្ពុជា។

ពិធីប្រកាសជាផ្លូវការបានធ្វើឡើងនៅសាលប្រជុំនៃគណៈកម្មាធិការជាតិអូឡាំពិកកម្ពុជា ដែលមានលោកស្រី បេង ប៊ុននេត អនុប្រធានសហព័ន្ធទ្រីយ៉ាត្លុងកម្ពុជា និងកញ្ញា យ៉ាន់ សុជី ស្ថាបនិកក្លិប កីឡារត់ជីរ៉ាន់-កម្ពុជា ព្រមទាំងមានភ្ញៀវកិត្តិយសជាច្រើននាក់។

លោកស្រី បេង ប៊ុននេត បានលើកឡើងថា ក្លិប ជីរ៉ាន់-កម្ពុជា បានកំពុងធ្វើសកម្មភាពយ៉ាងសកម្មភាពក្នុងសកម្មភាពកីឡា និងជួយលើកកម្ពស់សុខភាពប្រជាពលរដ្ឋ។ ក្លិបនេះដំណើរការរតាមគោលការណ៍កីឡាជាតិ ហេតុដូច្នេះហើយទើបសហព័ន្ធកីឡាទ្រីយ៉ាត្លុងកម្ពុជា សម្រេចឱ្យចូលជាសមាជិកពេញសិទ្ធរបស់សហព័ន្ធ។ ការចូលជាសមាជិករបស់ក្លិប ជីរ៉ាន់-កម្ពុជា នាពេលនេះ បានបង្ហាញពីការវិវឌ្ឍ និងជាសញ្ញាវិជ្ជមានមួយក្នុងវិស័យកីឡាជាតិ ដើម្បីសុខភាពសាធារណៈ និងឆ្ពោះទៅរកកីឡាកម្រិតខ្ពស់នាពេលអនាគត។

ចំណែក កញ្ញា យ៉ាន់ សុជី ប្រធានក្លិបកីឡារត់ជីរ៉ាន់-កម្ពុជា បានប្រាប់ថា ក្លិបរបស់កញ្ញាបង្កើតឡើងដំបូងក្នុងឆ្នាំ ២០២៣ ក្នុងគោលបំណងលើកកម្ពស់សុខមាលភាពសង្គមតាមរយៈកីឡារត់។ ក្លិបមានចក្ខុវិស័យប្រែក្លាយទៅជាក្លិបមានទាំងការបង្ហាត់កីឡាទ្រីយ៉ាត្លុង ឌូអាត្លុង និង អាគ័រត្លុង។ សព្វថ្ងៃនេះក្លិបមានកូនសិស្សជាច្រើនទាំងមនុស្សពេញវ័យ និងកុមារ ទាំងប្រុស-ស្រីបានចូលរួមហ្វឹកហាត់ ហើយមានសិស្សជាច្រើនបានចូលរួមរត់ក្នុងព្រឹត្តិការណ៍ប្រកួតជាច្រើនក្នុងរយៈពេលប៉ុន្មានឆ្នាំចុងក្រោយនេះ។

ក្លិបនេះមានកម្មវិធីហ្វឹកហាត់រាល់ល្ងាចថ្ងៃចន្ទ ពុធ និងសុក្រ ព្រមទាំងមានការហ្វឹកហាត់ដោយឥតគិតថ្លៃដល់សាធារណជននៅរាល់ព្រឹកថ្ងៃសៅរ៍ និងថ្ងៃអាទិត្យ៕

អត្ថបទ៖ វិរបុត្រ

The post សហព័ន្ធកីឡាទ្រីយ៉ាត្លុង ទទួលស្គាល់ក្លិបកីឡារត់ជីរ៉ាន់-កម្ពុជាសមាជិកពេញសិទ្ធិ appeared first on Kampuchea Thmey Daily.

កូនស្រី ទ្រី ដាណា ក្លាហានមែនចូលហាត់ទ្រីយ៉ាត្លុងដែលជាប្រភេទកីឡាលំបាកមួយ

Sina Noun — Tue, 16 Sep 2025 04:29:24 +0000

កាលពីពេលថ្មីនេះកូនស្រីលោកស្រី ទ្រី ដាណា បានបង្ហោះវីដេអូមួយស្ដីការចូលរួមហ្វឹកហាត់កីឡាទ្រីយ៉ាត្លុងដែលជាប្រភេទកីឡាលំបាក និងកម្រិខ្ពស់មួយជាមួយគ្រូជម្រើសជាតិកម្ពុជា និងបង្ហាញចំណាប់របស់ខ្លួនបន្ទាប់ពីការលេងកីឡាមួយនេះទៀតផង។

កញ្ញា ដាណា ភីន

កញ្ញា ដាណា ភីន ដែលគេស្គាល់ថាជាកូនស្រីច្បងរបស់លោកស្រី ទ្រី ដាណា បង្ហាញចំណាប់ក្នុងវីដេអូហ្វឹកហាត់របស់ខ្លួនថា ដោយសារតែខ្លួនចូលចិត្តខាងវិស័យកីឡាផងនោះទើបសម្រេចសាកល្បងលេងកីឡាទ្រីយ៉ាត្លុងនេះ និងចង់ជួយផ្សព្វផ្សាយផងដែរ។ បើទោះជាខ្លួនមិនមែនជាអ្នកកីឡាជំនាញក្ដី ប៉ុន្តែខ្លួនបានសាកល្បង និងធ្វើបានគ្រប់ផ្នែកទាំង ៣នៃទ្រីយ៉ាធ្លុងនេះដូចជា ហែលទឹក ជិះកង់ និងចុងក្រោយរត់ចម្ងាយ។

កញ្ញា ដាណា ភីន

កញ្ញាបានបន្ថែមទៀតថា កីឡាមួយប្រភេទនេះមានដើមកំណើតតាំងពីឆ្នាំ១៩៧០ មកម្ល៉េះ និងជាប្រភេទកីឡាអូឡាំពិក ដូច្នេះវាលំបាកបន្តិចត្រូវលេងរហូតដល់ទៅ ៣ប្រភេទកីឡាបញ្ចូលគ្នា។ អ្នកដែលមកលេងត្រូវមានកម្លាំងរឹងមាំទើបអាចហ្វឹកហាត់បាន។

កញ្ញា ដាណា ភីន

ចំណែកលោក នាង ពេជ្រពិសិដ្ឋ គ្រូជំនួយជម្រើសជាតិកីឡាទ្រីត្លុងកម្ពុជា បានឲ្យដឹងដែរថា កញ្ញា ដាណា ភីន ពិតជាបានមកហ្វឹកហាត់កីឡាមួយនេះជាមួយលោកមែន។ លោករីករាយណាស់ដែលកញ្ញាចាប់អារម្មណ៍ និងបានជួយធ្វើវីដេអូផ្សព្វផ្សាយពីកីឡាទ្រីយ៉ាត្លុងនេះឲ្យបានដល់ស្រទាប់មហាជនទូទៅ។

កញ្ញា ដាណា ភីន និងលោក នាង ពេជ្រពិសិដ្ឋ

គ្រូជម្រើសជាតិខាងលើបន្តទៀតថា កូនស្រីរបស់លោកស្រី ទ្រី ដាណា ពិតជាចាប់អារម្មណ៍ជាមួយកីឡាទ្រីយ៉ាត្លុងនេះ ព្រោះតែវាប្លែកខុសពីកីឡាផ្សេងដោយសារមាន ៣ប្រភេទកីឡាលេងបញ្ចូលគ្នាផង និងជាប្រភេទកីឡាដែលត្រូវការកាយសម្បទារឹងមាំកម្លាំងខ្លាំងក្លាទើបអាចចូលលេងកីឡាមួយនេះបាន។ វាស័ក្តិសមជាមួយអ្នកដែលចង់សាកប្រភេទកីឡាដែលលំបាក និងកម្រិតខ្ពស់ផង។

កញ្ញា ដាណា ភីន និងលោក នាង ពេជ្រពិសិដ្ឋ

បញ្ជាក់ដែរថា ការហ្វឹកហាត់ទ្រីយ៉ាត្លុងរបស់កញ្ញា ដាណា ភីន ដែលជាអ្នកល្បីក្នុងប្រព័ន្ធសង្គមមួយរូប និងជាកូនស្រីរបស់លោកស្រី ទ្រី ដាណា នេះអំឡុងថ្មីៗនេះនៅពហុកីឡដ្ឋានមរកតតេជោ។ កីឡាទ្រីយ៉ាត្លុងត្រូវបានចូលមកប្រទេសកម្ពុជាប្រហែល១០ឆ្នាំមកហើយ ប៉ុន្តែដូចដឹងស្រាប់ហើយថាជាប្រភេទកីឡាកម្រិតខ្ពស់ ដូច្នេះមិនសូវមានអ្នកស្គាល់ ឬលេងកីឡាមួយនេះដូចជាប្រភេទកីឡាផ្សេងៗនាពេលបច្ចុប្បន្ននេះទេ៕

កញ្ញា ដាណា ភីន និងលោក នាង ពេជ្រពិសិដ្ឋ

អត្ថបទដោយ៖ នួន ស៊ីណា

The post កូនស្រី ទ្រី ដាណា ក្លាហានមែនចូលហាត់ទ្រីយ៉ាត្លុងដែលជាប្រភេទកីឡាលំបាកមួយ appeared first on Kampuchea Thmey Daily.

អ្នកជំនាញទ្រីយ៉ាត្លុង បញ្ជាក់ពីមូលហេតុចំៗកីឡានេះមិនសូវមានអ្នកលេង ឬអ្នកហាត់ដូចកីឡាដទៃ

Sina Noun — Fri, 18 Jul 2025 02:42:51 +0000

ថ្នាក់ដឹកនាំ និងជាអ្នកជំនាញផ្នែកកីឡាទ្រីយ៉ាត្លុង បានបញ្ជាក់មូលហេតុដែលកីឡាមួយនេះមិនសូវមានអ្នកលេង ឬអ្នកហាត់នោះដោយសារវាពិបាកខ្លាំងពេកហើយត្រូវចេះជំនាញកីឡារហូតដល់ទៅ ៣ប្រភេទ ហែលទឹក ជិះកង់ រត់ប្រណាំង ផ្សេងៗគ្នាឯណោះ។

លោក ងិន សុបញ្ញា

លោក ងិន សុបញ្ញា អគ្គលេខាធិការសហព័ន្ធបានឲ្យដឹងថា ទ្រីយ៉ាត្លុងជាប្រភេទកីឡាអូឡាំពិកហ្គេម និងជាកីឡាដែលពិបាកក្នុងការលេងមិនដូចកីឡាមួយចំនួនមានភាពងាយស្រួល ឬលេងបែបកម្សាន្តបាននោះឡើយ។ ដោយសារតែមានការលំបាកនេះហើយទើបទ្រីយ៉ាត្លុងមិនពេញនិយមចំពោះមហាជន ឬប្រជាជនកម្ពុជា។ ប៉ុន្តែនៅបណ្ដាអ៊ឺរ៉ុបគេចូលចិត្ត និងលេងច្រើនប្រភេទកីឡាមួយនេះ។

ទិដ្ឋភាពថ្នាលកំពុងហ្វឹកហាត់

អ្នកជំនាញរូបនេះបន្ថែមទៀតថា អ្នកលេងទ្រីយ៉ាត្លុងបានលុះត្រាចេះជំនាញ ៣ប្រភេទកីឡាទី១ ហែលទឹក ទី២ ជិះកង់ និងរត់ប្រណាំង។ អ្នកលេងត្រូវហែលទឹកយ៉ាងហោច ១៥០០ម៉ែត្រ ជិះកង់ ៤០Km និងរត់ប្រណាំង ១០Km។ មួយវិញទៀតសម្ភារលេងក៏មានតម្លៃថ្លៃៗផងដែរដូចជា ស្បែកជើងត្រូវប្រើ ២ប្រភេទផ្សេងគ្នា ស្បែកសម្រាប់ជិះកង់ និងស្បែកជើងសម្រាប់រត់ប្រណាំង។ ចំណែកវ៉ែនតាក៏ត្រូវប្រើ ២ផ្សេងគ្នាដែរ វ៉ែនតាសម្រាប់ហែលទឹក និងវ៉ែនតាសម្រាប់ជិះកង់។ មួកពាក់ក៏ត្រូវមាន ២ផងដែរគឺមួកហែលទឹក និងមួកជិះកង់។ កង់សម្រាប់ប្រកួតទ្រីយ៉ាត្លុងក៏មានតម្លៃថ្លៃៗរហូតរាប់ម៉ឺនដុលារក៏មានដែរ។ សម្លៀកបំពាក់ក៏មានលក្ខណៈពិសេសដាច់ដោយឡែកពីកីឡាផ្សេងៗផងដែរដែលធន់ល្អប្រើប្រាស់បានទាំងក្នុងសមុទ្រ និងលើគោក។

ទិដ្ឋភាពថ្នាលកំពុងហ្វឹកហាត់

ចំណុចដែលលើកឡើងនៅខាងលើនេះហើយដែលនាំឲ្យកីឡាទ្រីយ៉ាត្លុងមិនសូវមានអ្នកហាត់ ឬមិនសូវសំបូរធនធានកីឡាករ កីឡាការិនីឲ្យមានចំនួនច្រើនដូចប្រភេទកីឡាផ្សេងៗ។ តែយ៉ាងណាសហព័ន្ធតែងតែព្យាយាមរកយុទ្ធសាស្ត្រ និងបង្កើនការផ្សព្វផ្សាយឲ្យបានដល់មហាជនរកអ្នកដែលមាននិស្ស័យដើម្បីបានហ្វឹកហាត់ជាមួយសហព័ន្ធ។

ទិដ្ឋភាពថ្នាលកំពុងប្រកួត

បញ្ជាក់ដែរថា សហព័ន្ធកីឡាទ្រីយ៉ាត្លុង បានចូលមកកម្ពុជាបានប្រមាណ ១០ឆ្នាំមកហើយ និងមានជាសហព័ន្ធដំណើរការប្រកួតក្នុងជាបន្តបន្ទាប។ ក្រៅពីនោះសហព័ន្ធក៏តែងតែបញ្ជូនកីឡាករ កីឡាការិនីរបស់ខ្លួនចូលរួមព្រឹត្តិការណ៍សំខាន់ៗនៅក្រៅប្រទេសផងដែរ។ អំឡុងខែសីហា និងខែធ្នូ ឆ្នាំ២០២៥ នេះសហព័ន្ធក៏នឹងបញ្ជូនក្រុមជម្រើសជាតិទៅចូលរួមប្រកួតផងដែរគឺនៅវៀតណាម និងប្រទេសថៃ៕

ទិដ្ឋភាពប្រកួតកន្លងទៅ

អត្ថបទដោយ៖ នួន ស៊ីណា

The post អ្នកជំនាញទ្រីយ៉ាត្លុង បញ្ជាក់ពីមូលហេតុចំៗកីឡានេះមិនសូវមានអ្នកលេង ឬអ្នកហាត់ដូចកីឡាដទៃ appeared first on Kampuchea Thmey Daily.

លោក ងិន សុបញ្ញា៖ សមត្ថភាពកីឡាការិនីកម្ពុជាម្នាក់នេះខ្លាំងមិនធម្មតារំពឹងរក្សាកំណត់ត្រាមេដាយមាសស៊ីហ្គេមនៅប្រទេសថៃ

Sina Noun — Mon, 14 Jul 2025 03:42:00 +0000

លោក ងិន សុបញ្ញា ថាស៊ីហ្គេម លើកទី៣៣ ឯប្រទេសថៃនេះ ទ្រីយ៉ាត្លុងកម្ពុជារំពឹងរក្សាកំណត់ត្រាយ៉ាងហោចណាស់ឈ្នះមេដាយមាស១ គ្រឿង ព្រោះកីឡាការិនីខ្មែរ-បារាំង ម៉ាហ្គតមរតក ហ្គារ៉ាប៊ីឌៀន (Margot Garabedian) មានសមត្ថភាពមិនធម្មតានោះឡើយ។

កីឡាការិនី ម៉ាហ្គតមរតក ហ្គារ៉ាប៊ីឌៀន

អគ្គលេខាធិការសហព័ន្ធទ្រីយ៉ាត្លុងកម្ពុជា លោក ងិន សុបញ្ញា បានឲ្យដឹងថា កាលស៊ីហ្គេមនៅកម្ពុជា ទ្រីយ៉ាត្លុង បានឈ្នះមេដាយមាស២ ប្រាក់១ គ្រឿង។ ក្នុងនោះកីឡាការិនី ម៉ាហ្គតមរតក ហ្គារ៉ាប៊ីឌៀន (Margot Garabedian) ឈ្នះមេដាយមាស២គ្រឿងម្នាក់ឯង។

កីឡាការិនី ម៉ាហ្គតមរតក ហ្គារ៉ាប៊ីឌៀន

លោក ងិន សុបញ្ញា បន្ថែមទៀតថា ស៊ីហ្គេម ចុងឆ្នាំ២០២៥ នៅឯប្រទេសថៃនេះសហព័ន្ធជឿជាក់ថាយ៉ាងហោចណាស់រក្សាបានមេដាយមាស១ គ្រឿងជូនកម្ពុជាតាមរយៈសមត្ថភាពដ៏ល្អរបស់កីឡាការិនី ម៉ាហ្គតមរតក ហ្គារ៉ាប៊ីឌៀន។

កីឡាការិនីខាងលើនេះកាលឈ្នះមេដាយមាសនៅស៊ីហ្គេមនៅកម្ពុជា គឺកំណត់ត្រាពេលវេលាឈ្នះដាច់លើដៃគូទាំងពីរវិញ្ញាសាតែម្ដង មិនថាវិញ្ញាសាធំ ទ្រីយ៉ាត្លុង ឬវិញ្ញាសា អាគ័រត្លុងនោះទេ។ មួយវិញទៀតបច្ចុប្បន្ននេះរូបគេកំពុងហ្វឹកហាត់ជាប់លាប់នៅឯប្រទេសបារាំងជាមួយគ្រូជំនាញកម្រិតខ្ពស់ដែលជាកន្លែងប្រភពដើមនៃកីឡាមួយនេះទៀតផង។

កីឡាការិនី ម៉ាហ្គតមរតក ហ្គារ៉ាប៊ីឌៀន

ក្រៅតែពីការហ្វឹកហាត់បានល្អហើយនោះ ម៉ាហ្គតមរតក ហ្គារ៉ាប៊ីឌៀន ក៏បានចូលរួមប្រកួត Triathlon World Cup នៅឯប្រទេសបារាំង និងបានឡើងដល់វគ្គពាក់កណ្ដាលផ្ដាច់ព្រ័ត្រទៅទៀត។ ដូច្នេះតាមរយៈស្ថិតិនេះបានបញ្ជាក់ថា កីឡាការិនីរបស់កម្ពុជារូបនេះមានសមត្ថភាពរីកចម្រើនខ្លាំងកម្រិតពិភពលោកទៅហើយ។ យ៉ាងណាបើប្រៀបធៀបនៅតំបន់អាស៊ាននោះគឺខុសគ្នាឆ្ងាយ។ ហេតុដូចនេះហើយសហព័ន្ធជឿជាក់ថានឹងអាចរក្សាកំណត់ត្រាមេដាយមាសយ៉ាងហោច ១គ្រឿងនៅស៊ីហ្គេម ឯប្រទេសថៃលើកនេះ។

លោក ងិន សុបញ្ញា

បញ្ជាក់ដែរថា កីឡាការិនីកម្ពុជា ម៉ាហ្គតមរតក ហ្គារ៉ាប៊ីឌៀន (Margot Garabedian) កាលឈ្នះមេដាយមាស២ គ្រឿងនៅស៊ីហ្គេម លើកទី៣២ កម្ពុជាជាម្ចាស់ផ្ទះនោះគឺលេងលើវិញ្ញាសាអាគ័រត្លុង (ហែលទឹក ៥០០m និងរត់ប្រណាំង ២៥០០Km) និងវិញ្ញាសា ទ្រីយ៉ាត្លុង (ហែលទឹក ៧៥០m ជិះកង់ ២០Km និងរត់ ៥Km)។ ស៊ីហ្គេម លើកទី៣៣ ឯប្រទេសថៃ កីឡាការិនី ម៉ាហ្គតមរតក ហ្គារ៉ាប៊ីឌៀន នឹងលេងវិញ្ញាសា ទ្រីយ៉ាត្លុង (នារី) ដដែល។ ស៊ីហ្គេមលើកនេះប្រភេទកីឡាទ្រីយ៉ាត្លុង គឺម្ចាស់ផ្ទះថៃដាក់ភាគច្រើនវិញ្ញាសាលេងជាក្រុម។ ព្រឹត្តិការណ៍នៅតំបន់អាស៊ាន លើកទី៣៣ ឯប្រទេសថៃនេះនឹងចាប់ផ្ដើមពីថ្ងៃទី៩ ដល់ ២០ ខែធ្នូ ឆ្នាំ២០២៥ ដែលមាន ៥០ប្រភេទកីឡានឹងដាក់ឲ្យប្រកួតប្រជែង៕

ក្រុមទ្រីយ៉ាត្លុងកម្ពុជាអំឡុងស៊ីហ្គេម ២០២៣

អត្ថបទដោយ៖ នួន ស៊ីណា

The post លោក ងិន សុបញ្ញា៖ សមត្ថភាពកីឡាការិនីកម្ពុជាម្នាក់នេះខ្លាំងមិនធម្មតារំពឹងរក្សាកំណត់ត្រាមេដាយមាសស៊ីហ្គេមនៅប្រទេសថៃ appeared first on Kampuchea Thmey Daily.

កីឡាទ្រីយ៉ាត្លុង Archives - Kampuchea Thmey Daily

សហព័ន្ធ​កីឡា​ទ្រីយ៉ាត្លុង ទទួល​​ស្គាល់​ក្លិប​​កីឡា​រត់ជីរ៉ាន់-កម្ពុជា​សមាជិកពេញសិទ្ធិ​

កូន​ស្រី​​ ទ្រី ដាណា​ ក្លាហានមែន​ចូល​ហាត់ទ្រីយ៉ាត្លុង​ដែល​ជា​ប្រភេទ​កីឡា​លំបាក​មួយ​

សហព័ន្ធកីឡាទ្រីយ៉ាត្លុង ទទួលស្គាល់ក្លិបកីឡារត់ជីរ៉ាន់-កម្ពុជាសមាជិកពេញសិទ្ធិ

កូនស្រី ទ្រី ដាណា ក្លាហានមែនចូលហាត់ទ្រីយ៉ាត្លុងដែលជាប្រភេទកីឡាលំបាកមួយ