កីឡាប្រដាល់គុនចម្រុះ Archives - Kampuchea Thmey Daily

រិន សារ័ត្ន ឆ្លើយតបទៅកីឡាករវៀតណាមឆ្លងកាត់ ឡុង ឡា សិនចាំមកដណ្ដើមខ្សែក្រវាត់ GMA របស់ខ្លួន

Sina Noun — Thu, 02 Apr 2026 01:53:36 +0000

បន្ទាប់ពីឃើញកីឡាករវៀតណាម Phuong Hoai ចង់ឡើងប្រកួតដណ្ដើមខ្សែក្រវាត់ GMA របស់ខ្លួន រិន សារ័ត្ន បានផ្ដាំផ្ញើទៅវិញថា ខំប្រឹងប្រកួតឲ្យឈ្នះសិស្សប្អូន ឡុង ឡា សិនចាំមកឡើងមកប៉ះជាមួយរូបគេនាឱកាសក្រោយៗទៀត។

សារ័ត្ន និងដៃគូ

កីឡាករ រិន សារ័ត្ន បានថតជាវីដេអូឆ្លើយតបជាមួយអ្នកគុនចម្រុះវៀតណាម Phuong Hoai ថាកុំអាលទាន់ឡើងមកដណ្ដើមខ្សែក្រវាត់ GMA របស់ខ្លួនអី។ ខំប្រឹងប្រែងហ្វឹកហាត់ និងប្រកួតជាមួយសិស្សប្អូនខ្លួនគឺកីឡាករ ឡុង ឡា ឆាប់ៗខាងមុខនេះសិនទៅ។

សារ័ត្ន និងដៃគូ

អ្នកប្រដាល់មកពីខេត្តព្រៃវែងរូបនេះបន្ថែមទៀតថា ប្រសិនបើ Phuong Hoai បានហើយរូបគេក៏មិនទុកខ្សែក្រវាត់ចោលដែរ ពោលនឹងដាក់ឲ្យចូលមកដណ្ដើម។ រិន សារ័ត្ន បញ្ជាក់បន្តទៀតថា ប្រសិនបើកីឡាករវៀតណាមខាងលើនេះមិនខំប្រឹងប្រែងហ្វឹកហាត់ ឬសមត្ថភាពដូចមុននោះទេលទ្ធផលគឺមិនអាចយកឈ្នះលើរូបខ្លួនឡើយ។

សារ័ត្ន ពេលឈ្នះខ្សែក្រវាត់ GMA

បញ្ជាក់ដែរថា កីឡាករ រិន សារ័ត្ន បានយកឈ្នះកីឡាករ Phuong Hoai អំឡុងចុងខែធ្នូ ឆ្នាំ២០២៥ កន្លងទៅក្រសោបបានខ្សែក្រវាត់ GMA ទម្ងន់ ៦៣គីឡូក្រាមមួយគ្រឿង។ Phuong Hoai កីឡាកររបស់វៀតណាមរូបនេះនឹងត្រូវប្រកួតជាមួយ ឡុង ឡា ឆាប់ៗនេះនៅសង្វៀន GMA ។ រង់ចាំមើលថាតើអ្នកទាំងពីរខាងលើអាចជួបគ្នាជាថ្មីដណ្ដើមខ្សែក្រវាត់ GMA នេះម្ដងទៀតទេ៕

អត្ថបទដោយ៖ នួន ស៊ីណា

The post រិន សារ័ត្ន ឆ្លើយតបទៅកីឡាករវៀតណាមឆ្លងកាត់ ឡុង ឡា សិនចាំមកដណ្ដើមខ្សែក្រវាត់ GMA របស់ខ្លួន appeared first on Kampuchea Thmey Daily.

ក្លឹបប្រដាល់របស់ ស៊ឹម ប៊ុនស្រ៊ន់ ចាប់ផ្ដើមទទួលសិស្សចូលហ្វឹកហាត់បណ្ដើរៗហើយ

Sina Noun — Wed, 11 Mar 2026 03:49:07 +0000

អតីតអ្នកប្រដាល់គុនចម្រុះ និងគុនខ្មែរ ស៊ឹម ប៊ុនស្រ៊ន់ ទើបបង្កើតក្លឹបថ្មី និងចាប់ផ្ដើមទទួលសិស្សចូលហ្វឹកហាត់ជាបណ្ដើរៗហើយសម្រាប់អ្នកចង់ចាប់អាជីពកីឡាមួយនេះ និងអ្នកចង់ហាត់បែបសុខភាពនៅម្ដុំផ្លូវវាងស្គន់ ស្រុកជើងព្រៃ ខេត្តកំពង់ចាម។

លោក ស៊ឹម ប៊ុនស្រ៊ន់

លោក ស៊ឹម ប៊ុនស្រ៊ន់ បានឲ្យដឹងថា នៅពេលនេះក្លឹបដែលបានសាងសង់នោះគឺរួចរាល់ស្ទើរ ១០០% ទៅហើយ ពោលនៅតែបន្ថែមសម្ភារហ្វឹកហាត់មួយចំនួនទៀតប៉ុណ្ណោះ។ សម្ភារហ្វឹកហាត់ដូចជាស៊ីប បាវសាក់ តាប់ពី ហ្គង់ គឺមានល្មមសម្រាប់ហ្វឹកហាត់ ដូច្នេះសិស្សៗអាចមកបានចាប់ពីឥលូវនេះ។

ទីតាំងក្លឹប

អតីតអ្នកប្រដាល់រូបនេះបន្ថែមទៀតថា ទីកន្លែងហ្វឹកហាត់របស់ខ្លួននេះអាចទទួលអ្នកមកហាត់បានចន្លោះពី ១០ ទៅ ១៥នាក់។ ចំពោះការទទួលសិស្សមកស្នាក់នៅហ្វឹកហាត់បែបអាជីពរូបគេថាអាចទទួលបានត្រឹម ៥-៦នាក់សិនប៉ុណ្ណោះដោយអាចផ្គត់ផ្គង់បាយទឹកបាន។ ប្រសិនបើលើសនេះប្រហែលមិនអាចទទួលបាននោះទេ ព្រោះថវិកានៅមានកំណត់ខ្លាចខ្វះខាតបាយទឹក។ យ៉ាងណាអ្នកចង់ហ្វឹកហាត់បែបអាជីពនៅឯខាងកំពង់ចាមនេះអាចទំនាក់ទំនងមកបាន និងអ្នកហាត់បែបសុខភាពក៏ដូចគ្នាដែរចាប់ពីពេលនេះទៅ។

ទីតាំងក្លឹប

បញ្ជាក់ដែរថា ក្លឹបប្រដាល់របស់ ស៊ឹម ប៊ុនស្រ៊ន់ នេះគឺមានទីតាំងនៅផ្លូវវាងស្គន់ ភូមិប៉ាណា ឃុំសូទិព្ទ ស្រុកជើងព្រៃ ខេត្តកំពង់ចាម។ ប៊ុនស្រ៊ន់ ជាអតីតអ្នកប្រដាល់គុនចម្រុះ គុនខ្មែរ និងធ្លាប់ប្រឡូកលើសង្វៀន ONE ជាច្រើនឆ្នាំ។ ប្រសិនបើមានអ្នកចាប់អារម្មណ៍ចង់ហ្វឹកហាត់ជាមួយរូបគេនៅម្ដុំផ្លូវវាងស្គន់នេះអាចទំនាក់ទំនងទៅកាន់ហ្វេសបុករបស់គេគឺ Sim Bunsrun បាន៕

ទីតាំងក្លឹប

អត្ថបទដោយ៖ នួន ស៊ីណា

The post ក្លឹបប្រដាល់របស់ ស៊ឹម ប៊ុនស្រ៊ន់ ចាប់ផ្ដើមទទួលសិស្សចូលហ្វឹកហាត់បណ្ដើរៗហើយ appeared first on Kampuchea Thmey Daily.

រិន សារ័ត្ន មិនប្រកួតមួយខែ ដើម្បីត្រៀមខ្លួនដណ្តើមខ្សែក្រវាត់ជាមួយកីឡាករថៃ ថ្ងៃសៅរ៍នេះ

chean virakbot — Fri, 01 Aug 2025 01:30:08 +0000

កីឡាករ រិន សារ័ត្ន ដើម្បីត្រៀមខ្លួនឲ្យបានល្អមិនទទួលការប្រកួតតាមស្ថានីយទូរទស្សន៍ផ្សេងៗរយៈពេល ១ខែដើម្បីសម្រុកហ្វឹកហាត់ត្រៀមដណ្ដើមខ្សែក្រវាត់ GMA ជាមួយកីឡាករថៃ នៅថ្ងៃទី២ ខែសីហា ឆ្នាំ២០២៥ ។

អ្នកលេងគុនខ្មែរ រិន សារ័ត្ន បានឲ្យដឹងថា បន្ទាប់ពីទទួលដំណឹងពីការប្រកួតដណ្ដើមខ្សែក្រវាត់ជាមួយកីឡាករថៃលើកនេះខ្លួនមិនទទួលការប្រកួតតាមស្ថានីយទូរទស្សន៍ផ្សេងៗនោះឡើយដើម្បីយកពេលវេលាឲ្យបានគ្រប់គ្រាន់ក្នុងការហ្វឹកហាត់ត្រៀម។

ដោយសារមួយរយៈពេលនេះកម្ពុជាកំពុងមានបញ្ហាជាមួយថៃ ស្របពេលខ្លួនត្រូវប៉ះគ្នាជាមួយកីឡាករមកពីប្រទេសនោះទៀត រិន សារ័ត្ន ហាក់មានអារម្មណ៍តានតឹងផង និងមានអារម្មណ៍សប្បាយរីករាយផង ព្រោះបានប្រកួតដណ្ដើមខ្សែក្រវាត់។

កីឡាករដើមកំណើតពីខេត្តព្រៃវែងរូបនេះបន្ថែមទៀតថា ការប្រកួតមួយនេះសំខាន់ខ្លាំងចំពោះរូបគេ ដូច្នេះផ្ដោតខ្លាំងលើការហ្វឹកហាត់ទាំងការហាត់យកកម្លាំងស៊ុហ្វ បច្ចេកទេសឈរវាយរួម និងបច្ចេកទេសលេងលើកម្រាលជាដើម។

សារ័ត្ន ដាក់ក្ដីសង្ឃឹមរហូត ៧០% ទទួលបានជ័យជម្នះក្នុងការប្រកួតជាកីឡាករថៃ នៅថ្ងៃទី២ សីហា នេះដោយសារតែបានហ្វឹកហាត់ត្រៀមខ្លួនបានល្អផង និងបានដឹងពីបច្ចេកទេស រួមទាំងត្រៀមស្នៀតរួចជាស្រេចសម្រាប់ការប្រកួតដណ្ដើមខ្សែក្រវាត់ខាងលើ។

កីឡាករ រិន សារ័ត្ន នឹងត្រូវប្រកួតគុនចម្រុះ (MMA) ដណ្ដើមខ្សែក្រវាត់ GMA ជាមួយកីឡាករថៃ Chayut Rojanakat ថ្ងៃទី២ ខែសីហា ឆ្នាំ២០២៥។

កីឡាករកម្ពុជាទាំង ៣រូប រួមមាន គោរមៈ ច័ន្ទរាជ្យ រិន សារ័ត្ន ឡុង ឡា រួមទាំងលោក ហ៊ុន ច័ន្ទរាជ្យ ក្រុមការងារ Cambodian Top Team បានមកដល់ប្រទេសវៀតណាមហើយដើម្បីត្រៀមការប្រកួត។ ការប្រកួតដណ្ដើមខ្សែក្រវាត់ GMA នេះនឹងធ្វើឡើងនៅទីក្រុងហូជីមិញ ប្រទេសវៀតណាម ចាប់ពីម៉ោង ៧យប់តទៅ៕

អត្ថបទ៖ វីរបុត្រ

The post រិន សារ័ត្ន មិនប្រកួតមួយខែ ដើម្បីត្រៀមខ្លួនដណ្តើមខ្សែក្រវាត់ជាមួយកីឡាករថៃ ថ្ងៃសៅរ៍នេះ appeared first on Kampuchea Thmey Daily.

សង្វៀន ONE ជួបវិបត្តិ រហូតកាត់បន្ថយបុគ្គលិក ជាច្រើននាក់

chean virakbot — Thu, 17 Oct 2024 07:35:53 +0000

ស្ថាប័នប្រដាល់គុនចម្រុះលំដាប់អាស៊ី ONE Championship បានកាត់បន្ថយបុគ្គលិកបន្ថែមទៀតហើយ បន្ទាប់ពីប៉ុន្មានឆ្នាំចុងក្រោយហាក់មានការថយចុះក្នុងការរៀបចំព្រឹត្តិការណ៍ប្រកួតនៅតំបន់អាស៊ី។

តាមការផ្សាយរបស់សារព័ត៌មាន The Straits Times បានបង្ហាញថា ក្រុមហ៊ុនត្រូវកាត់បន្ថយបុគ្គលិកប្រមាណ២០នាក់គិតចាប់ពីពាក់កណ្តាលខែតុលា ឆ្នាំ២០២៤។ បុគ្គលិកទាំងនោះក៏មាននៅការិយាល័យកណ្តាលក្នុងប្រទេសសិង្ហបុរីផងដែរ។ ការកាត់បន្ថយបុគ្គលិកនេះគឺដើម្បីកាត់បន្ថយលើការចំណាយ។

តាមសេចក្តីរាយការណ៍ បុគ្គលិកដែលត្រូវបានកាត់បន្ថយគឺនៅផ្នែកផ្សព្វផ្សាយ ផ្នែកកីឡាអេឡិចត្រូនិក ផ្នែកហិរញ្ញវត្ថុ ទីផ្សារ និងទំនាក់ទំនងសាធារណៈ។ សង្វៀនប្រដាល់ដ៏មានការិយាល័យនៅតាមបណ្តាប្រទេសផ្សេងៗដូចជា នៅទីក្រុងតូក្យូ ឡូសអេនជឺឡេស ញូវយ៉ក ឡុងដ៍ សៀងហៃ មីឡាន បាងកក ម៉ានីល ហ្សាកាតា និង Bengaluru។

យោងលើកិច្ចប្រជុំតាមអនឡាញកាលពីថ្ងៃទី១៦ ខែតុលា លោក Chatri Sityodtong នាយកប្រតិបត្តិ បានប្រកាសពីការកាត់បន្ថយបុគ្គលិកនេះ។ លោកបានសរសេរតាមអីម៉ែលថា ៖«សូមជ្រាប់ថា ថ្នាក់ដឹកនាំ និងខ្ញុំបានធ្វើការសម្រេចចិត្តដ៏លំបាក ជាមួយនឹងការឈឺចាប់បំផុត»។ ការកាត់បន្ថយបុគ្គលិកនេះដោយសារតែស្ថានភាពសេដ្ឋកិច្ចដ៏លំបាក»។

នៅចាំបានថា កាលពីឆ្នាំ២០២០ ពួកគាត់បានកាត់ប្រាក់ខែរបស់បុគ្គលិក ហើយបន្ទាប់មកបានកាត់បន្ថយបុគ្គលិកអស់ប្រមាណ២០%ទៀត៕

ប្រែសម្រួល៖ វីរបុត្រ

The post សង្វៀន ONE ជួបវិបត្តិ រហូតកាត់បន្ថយបុគ្គលិក ជាច្រើននាក់ appeared first on Kampuchea Thmey Daily.

កីឡាករគុនចម្រុះប្រេស៊ីល Bomba ទទួលមរណភាពក្នុងវ័យ៣៨ឆ្នាំ

Pha Rothana — Thu, 17 Oct 2024 05:11:00 +0000

កីឡាករ Guilherme “Bomba” Vasconcelos ជាអ្នកប្រយុទ្ធគុនចម្រុះ (MMA) របស់ប្រេស៊ីលដែលមានការធ្លាប់ប្រឡុកក្នុងសង្វៀន UFC និង Bellator បានទទួលមរណភាពក្នុងវ័យ៣៨ឆ្នាំ។

ព័ត៌មាននៃការស្លាប់របស់គាត់ត្រូវបានចែករំលែក ដោយមិត្តភក្តិនៅលើប្រព័ន្ធផ្សព្វផ្សាយសង្គមរួមទាំងគ្រូបង្វឹក Cristiano Lazzarini និង Vinicius Magalhaes។ ចំពោះមូលហេតុនៃការស្លាប់មិនត្រូវបានគេបង្ហាញឲ្យដឹងឡើយ។

Guilherme Bomba បានចាប់ផ្តើមអាជីព MMA ដំបូងនៅក្នុងការប្រកួតនៅទីក្រុង Rio de Janeiro ប្រទេសប្រេស៊ីលជាមួយនឹងជ័យជម្នះលើកីឡាករជើងចាស់ Wendell Oliveira។ រូបគេត្រូវអ្នកគាំទ្រកាន់តែស្គាល់ខ្លាំងនៅក្នុងឆ្នាំ២០១៤ បន្ទាប់ពីយកឈ្នះកីឡាករ Elizeu Zaleski។ ក្រោយមកកីឡាករទាំងពីរបានទៅប្រកួតនៅសង្វៀន UFC ។

គ្រូបង្វឹករបស់កីឡាករ Guilherme Bomba លោក Lazzarini បានសរសេរលើបណ្ដាញសង្គមថា ៖«ក្នុងចំណោមសិស្សទាំងអស់ដែលខ្ញុំមាន អ្នកគឺជាអ្នកក្លាហានបំផុត។ ជាពិសេសគ្មានការភ័យខ្លាចនិងមិនខ្លាចបរាជ័យ។ អ្នកប្រៀបដូចជាម៉ាស៊ីនដែលយកឈ្នះអ្វីៗគ្រប់យ៉ាង។ ក្នុងការប្រកួត MMA ដំបូងរបស់អ្នកគឺបានយកឈ្នះកីឡាករដែលប្រកួតឈ្នះ១០លើកជាប់គ្នា និងធ្លាប់ប្រកួត១៩លើក។ គ្រាដ៏រីករាយបំផុតក្នុងជីវិតរបស់ខ្ញុំក្នុងវិស័យកីឡាគឺយើងមានដំណើរកម្សាន្តជាមួយគ្នា ផ្ដើមពីប្រកួតពីខ្សែក្រវាត់ពណ៌ខៀវដល់ខ្សែក្រវាត់ខ្មៅ។ ខ្ញុំស្រលាញ់អ្នកខ្លាំងណាស់»។

ក្រៅពីអាជីពប្រដាល់ កីឡាករ Vasconcelos ទទួលបានការចាប់អារម្មណ៍ពីទំនាក់ទំនងស្នេហាជាមួយតារាចម្រៀង Demi Lovato ក្នុងឆ្នាំ២០១៧។ លោកបានបញ្ចប់អាជីព MMA នៅឆ្នាំ២០១៩ ជាមួយនឹងកំណត់ត្រាឈ្នះ៣ដងក្នុងការប្រកួតនៅសង្វៀន Bellator ចំនួន៦លើក៕

ប្រែសម្រួល៖ ផា រតនា

The post កីឡាករគុនចម្រុះប្រេស៊ីល Bomba ទទួលមរណភាពក្នុងវ័យ៣៨ឆ្នាំ appeared first on Kampuchea Thmey Daily.

ដើម្បីជាតិ កញ្ញា ទួន ស្រីភីន មិនខ្វល់រឿងគ្រោះថ្នាក់ក្នុងការប្រកួតគុនចម្រុះអាស៊ី

chean virakbot — Fri, 05 Jul 2024 03:45:25 +0000

កីឡាការិនីប្រដាល់គុនខ្មែរ ទួន ស្រីភីន មិនធ្លាប់បានហ្វឹកហាត់កីឡាគុនចម្រុះ (MMA) មុនពេលសហព័ន្ធកីឡាគុនចម្រុះកម្ពុជាជ្រើសរើសយកកញ្ញាជាកីឡាការិនីជម្រើសជាតិចូលរួមប្រកួតគុនចម្រុះអាស៊ី លើកទី២ ឆ្នាំ២០២៤ ដែលកម្ពុជាធ្វើជាម្ចាស់ផ្ទះ។

ទួន ស្រីភីន បានប្រាប់ថា បន្ទាប់ពីវិលត្រឡប់មកពីប្រកួតគុនខ្មែរនៅប្រទេសបារាំងកាលពីថ្ងៃទី២ ខែមិថុនា និងដល់ថ្ងៃធ្វើសន្និសីទសារព័ត៌មានអំពីការប្រកួតចម្រុះអាស៊ី កាលពីថ្ងៃទី១២ ខែមិថុនា មក កញ្ញាមិនទាន់បានហ្វឹកហាត់គុនចម្រុះម្តងណាសោះ បើទោះបីជាមានឈ្មោះចូលរួមប្រកួតគុនចម្រុះអាស៊ីក៏ដោយ។

ចាប់ពីថ្ងៃទី១៣ ខែមិថុនា ទើបកញ្ញា បានចូលជំរំហ្វឹកហាត់គុនចម្រុះជាមួយកីឡាករ កីឡាការិនីជម្រើសជាតិផ្សេងទៀតនៅក្លិប Cambodian Top Team ដែលមានលោកគ្រូ ហ៊ុន ចន្ទរាជ និងគ្រូជំនាញគុនចម្រុះជាច្រើនរូបទៀត។ កីឡាការិនី ទួន ស្រីភីន បានប្រាប់ថា សម្រាប់ការហ្វឹកហាត់ និងប្រកួតគុនចម្រុះលើកដំបូងនេះគឺប្លែក ពិបាកសម្រាប់នាង ពីព្រោះមិនមែនជាជំនាញរបស់ខ្លួន។

ស្រីភីន បាននិយាយថា ៖«ខ្ញុំធ្លាប់តែវ៉ៃឈរ តែមកហ្វឹកហាត់វ៉ៃឈរ ដេក អង្គុយ អីចឹងទៅវាពិបាក តែអារម្មណ៍ខ្ញុំអត់ភ័យខ្លាចអ្វីទេ។ ខ្ញុំធ្វើចិត្តឲ្យសប្បាយៗ ជិតដល់ថ្ងៃប្រកួតហើយ»។

ជាពិសេសទៀតនោះ ការជាប់ជម្រើសជាតិគឺជាក្តីស្រមៃរបស់នាងតាំងពីតូចមិនថាកីឡាអ្វីនោះទេគឺជាអ្វីដែលកញ្ញាលះបង់គ្រប់បែបយ៉ាងដើម្បីជាតិ។ កញ្ញាបានលើកឡើងថា ៖«ខ្ញុំដឹងថា ពិបាក តែប្រកួតតំណាងជាតិ យើងជាម្ចាស់ផ្ទះ។ សហព័ន្ធគុនចម្រុះផ្តល់ឱកាសឲ្យខ្ញុំគឺខ្ញុំត្រូវតែលះបង់គ្រប់បែបយ៉ាងដើម្បីជាតិ។ ទោះបីជាខ្ញុំជួបបញ្ហា ឧបសគ្គគ្រោះថ្នាក់យ៉ាងណា ក៏ខ្ញុំមិនសោកស្តាយដែរគឺលះបង់ដើម្បីជាតិដែរ»។

កីឡាការិនីគុនខ្មែររូបនេះសង្កត់ធ្ងន់ថា ៖«វាមានតម្លៃធំធេងណាស់សម្រាប់ខ្ញុំក្នុងនាមជាកីឡាការិនីតំណាងជាតិ។ ពាក្យថា តំណាងជាតិ ឬជម្រើសជាតិគឺជាក្តីសុបិនតាំងពីតូច»។

កញ្ញា ទួន ស្រីភីន បន្ថែមថា ៖«ក្បាច់គុន យើងមិនត្រូវចេះតែមួយមុខទេគឺយើងត្រូវចេះច្រើនមុខ ពីព្រោះយើងត្រូវវ៉ៃគុនខ្មែរ គុនចម្រុះ ឃីកបុកស៊ីងជាដើម។ ការបន្ថែមបច្ចេកទេសកីឡាកាន់ច្រើន គឺកាន់តែល្អ»។

នេះជាកីឡាទី២ដែលកីឡាការិនី ទួន ស្រីភីន ទទួលបានឱកាសប្រកួតឲ្យតំណាងជាតិ បន្ទាប់ពីកញ្ញាធ្លាប់ជាប់ជម្រើសជាតិគុនខ្មែរសម្រាប់ការចូលរួមប្រកួតក្នុងកីឡាស៊ីហ្គេម ឆ្នាំ២០២៣ ដែលកម្ពុជាជាម្ចាស់ផ្ទះ។ នៅពេលនោះ កញ្ញាទទួលបានមេដាយប្រាក់។

ទួន ស្រីភីន ស្ថិតក្នុងចំណោមកីឡាការិនី៥រូបគឺ ខៀវ ចិន្ដារ័ត្ន, នៅ ស្រីពៅ, គុណ វ៉ាន់នីតា, សំ ថារ័ត្ន និងកីឡាករ១១រូបគឺ ផេង សុបញ្ញា, ឡុង ឡា, រិន សារ័ត្ន, ហ៊ុន គឹមហៀង, មាស ម៉ើ, សែន ច័ន្ទឫទ្ធិគុន, ហ៊ុន ចន្ទរាជ, ធាន អាន, ចាន់ រតនា, អេ វីរៈខាំឈីតភូថង និង ហាត ភី សម្រាប់់ការប្រកួតគុនចម្រុះអាស៊ី លើកទី២ នៅថ្ងៃទី១១-១២-១៣ ខែកក្កដា ឆ្នាំ២០២៤ នៅវិមានពហុកីឡដ្ឋានជាតិអូឡាំពិក។

ទួន ស្រីភីន ទទួលបានមេដាយប្រាក់ស៊ីហ្គេម

គោលបំណងធំបំផុតនៃការរៀបចំព្រឹត្តិការណ៍គុនចម្រុះនេះដើម្បីជំរុញ ផ្សព្វផ្សាយ និងលើកកម្ពស់តម្លៃកីឡាគុនចម្រុះឲ្យក្លាយជាកីឡាផ្លូវការ ស្តង់ដាត្រឹមត្រូវដើម្បីចូលក្នុងព្រឹត្តិការណ៍កីឡាអាស៊ី និងកីឡាអូឡាំពិក។

ការប្រកួតគុនចម្រុះជើងឯកអាស៊ី លើកទី២ នៅប្រទេសកម្ពុជា ក៏ជាការប្រកួតជម្រុះដើម្បីជ្រើសរើសជ័យលាភីទៅចូលរួមប្រកួតក្នុងព្រឹត្តិការណ៍«កីឡាក្នុងសាល និងក្បាច់គុនអាស៊ី (Asian Indoor and Martial Arts Games) នាខែវិច្ឆិកា ឆ្នាំ២០២៤ នៅប្រទេសថៃ៕

អត្ថបទ៖ វីរបុត្រ

The post ដើម្បីជាតិ កញ្ញា ទួន ស្រីភីន មិនខ្វល់រឿងគ្រោះថ្នាក់ក្នុងការប្រកួតគុនចម្រុះអាស៊ី appeared first on Kampuchea Thmey Daily.

ជំនួបក្នុងទ្រុងរវាង Musk និង Zuckerberg អាចនឹងរកចំណូលបានច្រើនបំផុតក្នុងប្រវត្តិសាស្ត្រUFC

chean virakbot — Mon, 26 Jun 2023 08:00:42 +0000

លោក Dana White ប្រធានស្ថាប័នប្រដាល់ក្នុងទ្រុងដ៏ល្បីលើលោក Ultimate Fighting Championship បានប្រាប់សារព័ត៌មាន TMZ Sports នៅសប្តាហ៍នេះថា ការប្រកួតគុនចម្រុះក្នុងទ្រុងដែលបានស្នើឡើងរវាងមហាសេដ្ឋីបច្ចេកវិទ្យា Elon Musk និង Mark Zuckerberg នឹងក្លាយជាការប្រកួតដែលរកបានប្រាក់ចំណេញច្រើនបំផុតក្នុងប្រវត្តិសាស្ត្រ។

លោក Dana White បាននិយាយថា ការផ្សាយ “នឹងបំបែកកំណត់ត្រាបង់ប្រាក់ក្នុងការមើលម្ដង” ដោយសំដៅទៅលើសេវាទូរទស្សន៍ស្តង់ដាដែលប្រើដើម្បីចាក់ផ្សាយការប្រកួត UFC។

លោក White បានព្យាករថា ៖«នេះនឹងក្លាយជាការប្រយុទ្ធដ៏ធំបំផុតមិនធ្លាប់មាននៅក្នុងប្រវត្តិសាស្រ្តពិភពលោក។ ធំជាងអ្វីទាំងអស់ដែលមិនធ្លាប់បានធ្វើ»។

តម្លៃទស្សនារបស់ UFC PPV (Pay Per View) ស្តង់ដាមាន៨០ដុល្លារ ប៉ុន្តែលោក White បាននិយាយថា លោកនឹងគិតតម្លៃរហូតដល់ ១០០ដុល្លារសម្រាប់ការប្រកួតរវាង Musk និង Zuckerberg ។

លោក White បាននិយាយថា រហូតមកដល់ពេលនេះ PPV ដ៏ធំបំផុតក្នុងប្រវត្តិសាស្ត្រគឺជាការប្រកួតប្រដាល់រវាង Floyd Mayweather និងកំពូលតារាគុនចម្រុះ Conor McGregor កាលពីឆ្នាំ២០១៧។ ការប្រកួតនោះបង្កើតបានចំណូល ៤.៣លានដុល្លារតាមរយៈការទិញ PPV ក្នុងស្រុកនិងច្រើនជាង ៦០០លានដុល្លារនៅក្នុងប្រាក់ចំណូលសរុប។

«ខ្ញុំគ្រាន់តែគិតថា [ការប្រកួត Musk-Zuckerberg] កើនឡើងតម្លៃ៣ដងនូវអ្វីដែលយើងបានធ្វើកន្លងមក»។ ប្រធាន UFC បាននិយាយ និងរំពឹងគិតថា ការប្រកួតនេះអាចរកចំណូលបានជាង ១.៨ពាន់លានដុល្លារ។

លោកបានបន្ថែមថា គ្មានដែនកំណត់ចំពោះអ្វីដែលអាចធ្វើបាននោះទេ។ Elon Musk និង Mark Zuckerberg ដែលជាមហាសេដ្ឋីលំដាប់លេខ១ និងលេខ១០ នៅលើពិភពលោកបានធ្វើការជួញដូរនៅលើប្រព័ន្ធផ្សព្វផ្សាយសង្គមអស់រយៈពេលជាច្រើនថ្ងៃ បន្ទាប់ពីមានព័ត៌មានអំពីផែនការរបស់ Zuckerberg (ម្ចាស់ Facebook) ដើម្បីចាប់ផ្តើមប្រជែងជាមួយ Twitter។ លទ្ធផលទៅមករបស់ពួកគេបានធ្វើឱ្យលោក Musk ប្រកួតប្រជែងជាមួយ Zuckerberg ទៅ “ការប្រកួតក្នុងទ្រុង”គួរឲ្យចាប់អារម្មណ៍។

បន្ទាប់មក លោក Musk បានសរសេរថា “Vegas Octagon” ដែលជាសង្វៀនដ៏ល្បីល្បាញសម្រាប់រៀបចំការប្រកួត UFC។ ការប្រកួតនេះរំពឹងផ្ទុះលើបណ្តាញសង្គម ប៉ុន្តែម្តាយរបស់លោក Musk គឺលោកស្រី Maye Musk បានអំពាវនាវដល់សាធារណជនកុំឱ្យ “លើកទឹកចិត្តចំពោះការប្រកួតនេះ” កាលពីថ្ងៃព្រហស្បតិ៍។

យោងតាមលោក White បាននិយាយថា លោកបាននិយាយជាមួយលោក Musk និង Zuckerberg។ ពួកគេទាំងពីរពិតជាយកចិត្តទុកដាក់ចំពោះការប្រកួតនេះ។ ពួកគាត់ស្ថិតនៅក្នុង “ដំណាក់កាលដំបូង” នៃការរៀបចំការប្រកួតរួចហើយ ប៉ុន្តែបដិសេធប៉ាន់ស្មានថាតើវាអាចនឹងកើតឡើងនៅពេលណា៕

ប្រែសម្រួល៖ មន្នីរ័ត្ន
ប្រភព៖ RT.COM

The post ជំនួបក្នុងទ្រុងរវាង Musk និង Zuckerberg អាចនឹងរកចំណូលបានច្រើនបំផុតក្នុងប្រវត្តិសាស្ត្រUFC appeared first on Kampuchea Thmey Daily.

កីឡាប្រដាល់គុនចម្រុះ Archives - Kampuchea Thmey Daily

រិន​ សារ័ត្ន​ ឆ្លើយតបទៅកីឡាករវៀតណាមឆ្លងកាត់ ឡុង​ ឡា​ សិនចាំមកដណ្ដើមខ្សែក្រវាត់​ GMA របស់ខ្លួន

ក្លឹប​ប្រដាល់​របស់​ ស៊ឹម​ ប៊ុនស្រ៊ន់​ ចាប់​ផ្ដើម​ទទួល​សិស្ស​ចូល​ហ្វឹកហាត់​បណ្ដើរៗ​ហើយ​

រិន សារ័ត្ន មិន​ប្រកួតមួយ​ខែ ដើម្បី​ត្រៀម​ខ្លួន​ដណ្តើម​ខ្សែក្រវាត់ជាមួយកីឡាករ​ថៃ ថ្ងៃ​សៅរ៍នេះ

សង្វៀន​ ONE ជួបវិបត្តិ រហូត​កាត់បន្ថយបុគ្គលិក ជា​ច្រើននាក់

កីឡាករគុនចម្រុះប្រេស៊ីល Bomba ទទួល​មរណភាព​ក្នុងវ័យ៣៨ឆ្នាំ

ដើម្បី​ជាតិ កញ្ញា ទួន ស្រីភីន មិនខ្វល់​រឿង​គ្រោះ​ថ្នាក់ក្នុងការប្រកួតគុនចម្រុះអាស៊ី

ជំនួប​ក្នុងទ្រុងរវាង Musk និង Zuckerberg អាច​នឹង​​រកចំណូលបានច្រើនបំផុតក្នុងប្រវត្តិសាស្ត្រUFC

រិន សារ័ត្ន ឆ្លើយតបទៅកីឡាករវៀតណាមឆ្លងកាត់ ឡុង ឡា សិនចាំមកដណ្ដើមខ្សែក្រវាត់ GMA របស់ខ្លួន

ក្លឹបប្រដាល់របស់ ស៊ឹម ប៊ុនស្រ៊ន់ ចាប់ផ្ដើមទទួលសិស្សចូលហ្វឹកហាត់បណ្ដើរៗហើយ

រិន សារ័ត្ន មិនប្រកួតមួយខែ ដើម្បីត្រៀមខ្លួនដណ្តើមខ្សែក្រវាត់ជាមួយកីឡាករថៃ ថ្ងៃសៅរ៍នេះ

សង្វៀន ONE ជួបវិបត្តិ រហូតកាត់បន្ថយបុគ្គលិក ជាច្រើននាក់

កីឡាករគុនចម្រុះប្រេស៊ីល Bomba ទទួលមរណភាពក្នុងវ័យ៣៨ឆ្នាំ

ដើម្បីជាតិ កញ្ញា ទួន ស្រីភីន មិនខ្វល់រឿងគ្រោះថ្នាក់ក្នុងការប្រកួតគុនចម្រុះអាស៊ី

ជំនួបក្នុងទ្រុងរវាង Musk និង Zuckerberg អាចនឹងរកចំណូលបានច្រើនបំផុតក្នុងប្រវត្តិសាស្ត្រUFC