កីឡាស៊ីហ្គេម Archives - Kampuchea Thmey Daily

ចែកសំបុត្រដោយឥតគិតថ្លៃ សម្រាប់ទស្សនាការចាក់បញ្ចាំងពិធីបើកកីឡាស៊ីហ្គេម ២០២៣

chean virakbot — Tue, 21 Apr 2026 09:13:31 +0000

គណៈកម្មាធិការជាតិអូឡាំពិកកម្ពុជា នឹងរៀបចំការចាក់បញ្ចាំងពិធីបើកកីឡាស៊ីហ្គេម លើកទី៣២ ឆ្នាំ ២០២៣ នៅរោងភាពយន្តដើម្បីរម្លឹកខួបអនុស្សាវរីយដ៍ ៣ ឆ្នាំ ដែលកម្ពុជាទទួលរៀបចំធ្វើម្ចាស់ផ្ទះនូវមហាព្រឹត្តិការណ៍កីឡាដ៏អស្ចារ្យប្រកបដោយជោគជ័យ។

ដើម្បីឲ្យងាយស្រួលក្នុងការចូលរួមទស្សនា គណៈកម្មាធិការជាតិអូឡាំពិកកម្ពុជា នឹងចែកសំបុត្រចូលទស្សនាដោយឥតគិតថ្លៃនៅថ្ងៃទី៥ ខែឧសភា ឆ្នាំ ២០២៦។ សំបុត្រចំនួន ៥០០ សន្លឹក ចែកជូននៅរោងភាពយន្ត Sabay Cinema ផ្សារទំនើបអ៉ីអនមានជ័យ។ សំបុត្រចំនួន ២៥០ សន្លឹក ចែកជូននៅរោងភាពយន្ត Legend Cinema នៅផ្សារទំនើបអូឡាំព្យា និង សម្រាប់កីឡាករ កីឡាការិនី គ្រូបង្វឹក និងសាច់ញាតិចែកជូនដោយមានចំំនួនកំណត់នៅថ្ងៃទី២៣ ខែមេសា ឆ្នាំ ២០២៦។

ព្រឹត្តិការណ៍កីឡាស៊ីហ្គេម លើកទី៣២ ឆ្នាំ ២០២៣ គឺជាប្រវត្តិសាស្ត្រដំបូងដែលបានកើតមាននៅលើទឹកដីកម្ពុជា។ ពិធីបើកត្រូវបានចាត់ទុកជាការរៀបចំយ៉ាងពិសេសអស្ចារ្យបំផុតមួយក្នុងប្រវត្តិសាស្ត្រកីឡាស៊ីហ្គេមដែលបានបង្ហាញពីសក្តានុពលរបស់កម្ពុជា ទាំងសិល្បៈ វប្បធម៌ ប្រពៃណី និងប្រាង្គប្រាសាទបុរាណដ៏សំបូរបែប។

ក្នុងនាមជាម្ចាស់ផ្ទះលើកដំបូង កម្ពុជាទទួលបានជោគជ័យធំធេងបំផុតសម្រាប់ការរៀបចំមហាព្រឹត្តិការណ៍កីឡាតំបន់អាស៊ីអាគ្នេយ៍មួយនេះទាំងផ្នែករៀបចំដ៏អស្ចារ្យទាំងសម័យទំនើប និងបុរាណ។ ដើម្បីរម្លឹកអនុស្សាវរីយ៍រយៈពេល ៣ ឆ្នាំ កន្លងទៅ និងស្វះស្វែងរកការឧបត្ថម្ភគាំទ្រដល់អត្តពលិកកម្ពុជា ឆ្ពោះទៅកីឡាអូឡាំពិក ឆ្នាំ ២០២៨ កម្ពុជាបានសម្រេចដាក់បញ្ចាំងឡើងវិញនូវពិធីបើកកីឡាស៊ីហ្គេម លើកទី៣២ នៅរោងភាពយន្ត។

គោលបំណងសំខាន់គឺ ទី១ រម្លឹកពីជោគជ័យជាប្រវត្តិសាស្ត្រ ដែលខ្មែរបានរង់ចាំអស់ ៦៤ ឆ្នាំសម្រាប់ ស៊ីហ្គេម ដំបូងនៅកម្ពុជា។ ទី២ ដើម្បីដាស់ស្មារតីចងចាំ«ខ្មែរធ្វើបាន ហើយធ្វើបានដ៏អស្ចារ្យថែមទៀត»។ ទី៣ ចង់ឲ្យព្រឹត្តិការណ៍អន្តរជាតិដ៏អស្ចារ្យ កើតឡើងជាថ្មី នៅឆ្នាំ ២០៣១។ ទី៤ ផ្តល់ការឧបត្ថម្ភគាំទ្រដល់យុទ្ធនាការរកជំនួយឧបត្ថម្ភដល់អត្តពលិកកម្ពុជាសម្រាប់ដំណើរឆ្ពោះទៅកីឡាអូឡាំពិក ឆ្នាំ ២០២៨ នៅសហរដ្ឋអាមេរិក និងទី៥ រួមគ្នាដើម្បីក្រុមកីឡាអូឡាំពិកកម្ពុជា។

អត្ថបទ៖ វិរបុត្រ

The post ចែកសំបុត្រដោយឥតគិតថ្លៃ សម្រាប់ទស្សនាការចាក់បញ្ចាំងពិធីបើកកីឡាស៊ីហ្គេម ២០២៣ appeared first on Kampuchea Thmey Daily.

NOCC ដាក់បញ្ចាំងពិធីបើកកីឡាស៊ីហ្គេម ២០២៣ ឡើងវិញដើម្បីជួយដល់អត្តពលិកត្រៀមកីឡាអូឡាំពិក

chean virakbot — Sat, 11 Apr 2026 01:01:00 +0000

គណៈកម្មាធិការជាតិអូឡាំពិកកម្ពុជា គ្រោងនឹងចាក់បញ្ចាំងឡើងវិញនូវពិធីបើកព្រឹត្តិការណ៍កីឡាស៊ីហ្គេម លើកទី៣២ ឆ្នាំ ២០២៣ ដើម្បីស្វែងរកការឧបត្ថម្ភគាំទ្រដល់កីឡាករ កីឡាការិនីកម្ពុជាសម្រាប់ការត្រៀមខ្លួនឆ្ពោះទៅកីឡាអូឡាំពិក ឆ្នាំ ២០២៨ នៅសហរដ្ឋអាមេរិក។

ការចាក់ផ្សាយនៅរោងភាពយន្តសប្បាយ (Sabay Cinema) នៅថ្ងៃទី ៥ ខែឧសភា ឆ្នាំ ២០២៦ ដោយឥតគិតថ្លៃ ពោលអ្នកចូលរួមទស្សនាដោយមិនអស់ថវិកា ប៉ុន្តែចំនួនមានកំណត់។ បន្ទាប់មក ចាប់ពីថ្ងៃទី៨ ខែឧសភា អ្នកចូលទស្សនាអាចបរិច្ចាគថវិកា ១២.០០០ រៀល (៣ដុល្លារ) និង ២០.០០០ រៀល (៥ដុល្លារ)។ ថវិកាដែលទទួលបាននឹងចូលទៅក្នុងមូលនិធិទ្រទ្រង់អត្តពលិកកម្ពុជាដើម្បីហ្វឹកហាត់សម្រាប់ការប្រកួតជម្រុះឆ្ពោះទៅសិទ្ធិចូលរួមប្រកួតកីឡាអូឡាំពិក នៅសហរដ្ឋអាមេរិក៕

អត្ថបទ៖ វិរបុត្រ

The post NOCC ដាក់បញ្ចាំងពិធីបើកកីឡាស៊ីហ្គេម ២០២៣ ឡើងវិញដើម្បីជួយដល់អត្តពលិកត្រៀមកីឡាអូឡាំពិក appeared first on Kampuchea Thmey Daily.

អ្នកគាំទ្រហ្វីលីពីន ហួសចិត្តនឹងថៃ ប្រមូលយកមេដាយមាសតែឯងផ្នែកប្រដាល់សកលក្នុងកីឡាស៊ីហ្គេម ព្រោះតែ…

chean virakbot — Wed, 24 Dec 2025 02:56:11 +0000

ថៃក្នុងនាមជាម្ចាស់ផ្ទះកីឡាស៊ីហ្គេម លើកទី៣៣ ឆ្នាំ ២០២៥ បានដាក់ចំនួន ១៧ វិញ្ញាសា ក្នុងប្រភេទកីឡាប្រដាល់សកល ហើយចុងបញ្ចប់ថៃទទួលបានមេដាយមាស ១៤ គ្រឿង ខណៈ វៀតណាម ឥណ្ឌូណេស៊ី និង ហ្វីលីពីន ទទួលបានមេដាយមាស ម្នាក់១គ្រឿងប៉ុណ្ណោះ។

កីឡាករហ្វីលីពីនយំ ក្រោយលើកដៃឲ្យចាញ់ ដោយចៅក្រមមិនឲ្យពិន្ទុសោះ

ថៃឡើងវគ្គផ្តាច់ព្រ័ត្រ ១៦ វិញ្ញាសា ក្នុងចំណោម ១៧ វិញ្ញាសា ហើយមានតែ ២ នាក់ប៉ុណ្ណោះចាញ់វគ្គផ្តាច់ព្រ័ត្រ ខណៈវៀតណាមចាញ់វគ្គផ្តាច់ព្រ័ត្រ ៥ នាក់ ឥណ្ឌូណេស៊ី ចាញ់ វគ្គផ្តាច់ព្រ័ត្រ ៤ នាក់ និង ហ្វីលីពីន ចាញ់ វគ្គផ្តាច់ព្រ័ត្រ ៣នាក់។

កាលពីថ្ងៃទី២៣ ខែធ្នូ ឆ្នាំ ២០២៥ មានផេកមួយឈ្មោះ SEA Heritage & History បានបង្ហោះថា ថៃជាស្តេចកីឡាប្រដាល់សកលនៅអាស៊ាន បន្ទាប់ពីឈ្នះមេដាយមាសដាច់គេក្នុងកីឡាស៊ីហ្គេម លើកទី ៣៣។

ការលើកឡើងថា ថៃជាស្តេចប្រដាល់សកលនៅអាស៊ានបានធ្វើឲ្យអ្នកគាំទ្រទូទាំងតំបន់មានខឹងសម្បារយ៉ាងខ្លាំង។ ជាពិសេសអ្នកគាំទ្រហ្វីលីពីនតែម្តងដែលបានបញ្ចេញមតិមិនពេញចិត្ត និងរិះគន់ចាស់ដៃលើម្ចាស់ផ្ទះថៃដែលរៀបចំកីឡាស៊ីហ្គេម លើកទី៣៣ ដើម្បីប្រមូលយកមេដាយមាសតែម្នាក់ឯង បើទោះហ្វីលីពីនជាប្រទេសខ្លាំងផ្នែកប្រដាល់សាកលកម្រិតពិភពលោក ប៉ុន្តែទទួលបានមេដាយមាសតែ១គ្រឿងគត់។

អ្នកបញ្ចេញមតិម្នាក់បានលើកឡើងថា ៖«ខ្ញុំជាជនជាតិហ្វីលីពីន។ ខ្ញុំយល់ស្របដែលថៃល្អក្នុងកីឡាប្រដាល់សកល ប៉ុន្តែរឿងដែលមិនអាចប្រកែកបានគឺ ចៅក្រមលំអៀងទៅលើថៃ។ អ្នកប្រដាល់ត្រូវដៃគូវ៉ៃចំយ៉ាងច្បាស់ៗ ប៉ុន្តែពួកគេនៅតែឈ្នះ។ សូម្បីតែនៅវគ្គពាក់កណ្តាលផ្តាច់ព្រ័ត្រ ពួកគេឲ្យអ្នកខ្សោយឈ្នះដើម្បីឡើងទៅវគ្គផ្តាច់ព្រ័ត្រដែលថៃងាយស្រួលឈ្នះ»។

អ្នកគាំទ្រម្នាក់ទៀតបានលើកឡើងថា ៖«ខ្ញុំអាចទទួលយកចំពោះកីឡាករ ថៃឈ្នះមេដាយមាស ក្នុងកីឡាមួយថៃ ប៉ុន្តែប្រដាល់សកលវិញ????? ហ៊ឹម… មានរឿងស្មោគក្រោកច្រើនណាស់… យើងដឹងច្បាស់ហើយថា អ្នកប្រដាល់សាកលហ្វីលីពីនល្អៗ មិនត្រឹមតែកម្រិតអាស៊ាន អាស៊ី ទេ ប៉ុន្តែកម្រិតពិភពលោក…»។

អ្នកគាំទ្រម្នាក់ទៀតបាននិយាយថា ៖«អូខេ តើកីឡាប្រដាល់សកលថៃកម្រិតពិភពលោក? សូមបង្ហាញខ្ញុំមើលតើមាន អ្នកប្រដាល់សកលថៃជើងឯកពិភពលោក WBC, WBA, WBO និង IBF ទេ? នៅហ្វីលីពីនមានកីឡាករ Manny Pacquiao, Mark Magnifico Magsayo, Nonito Donaire, និង Eumir Marcial គឺសុទ្ធជាកីឡាករប្រដាល់សកលកម្រិតពិភពលោក។ ចុះថៃ គ្មានទេ សូម្បីកម្រិតអាស៊ី»។

អ្នកគាំទ្រម្នាក់ទៀតបានលើកឡើងថា ៖«បាទ ដោយសារតែអ្នកទី ៣ នៅក្នុងសង្វៀន និងចៅក្រម ៣ នាក់ ដូច្នេះដៃគូម្ខាងទៀតពិបាកឈ្នះ។ ជម្រើសតែមួយគត់គឺវាយឲ្យកីឡាករថៃសន្លប់ទើបឈ្នះ។ អ្នកថា ថៃលេខ ១ នៅអាស៊ី ហេតុអ្វីពួកគេគ្មានកីឡាករណាម្នាក់ជាជើងឯកពិភពលោក»។

«ស្តេចលំអៀងបំផុតនៃការប្រកួតប្រដាល់សកលក្នុងកីឡាស៊ីហ្គេមនៅថៃ។ វាជាការប្រកួតដ៏កខ្វក់បំផុត»។ អ្នកគាំទ្រម្នាក់ទៀតបាននិយាយ។

អ្នកគាំទ្រម្នាក់ទៀតនិយាយថា ៖«តើថៃមានជើងឯកប្រដាល់សកលពិភពលោក និងមេដាយមាសកីឡាអូឡាំពិកផ្នែកប្រដាល់សកលទេ? ខ្ញុំគិតថា ពួកគេគ្មានទេ គឺពួកគេជាកង្កែបក្នុងអណ្តូង»៕

អត្ថបទ៖ វីរបុត្រ

The post អ្នកគាំទ្រហ្វីលីពីន ហួសចិត្តនឹងថៃ ប្រមូលយកមេដាយមាសតែឯងផ្នែកប្រដាល់សកលក្នុងកីឡាស៊ីហ្គេម ព្រោះតែ… appeared first on Kampuchea Thmey Daily.

AFC គ្រោងចាត់វិធានការធ្ងន់ធ្ងរលើអាជ្ញាកណ្តាលក្នុងកីឡាស៊ីហ្គេម នៅថៃ

chean virakbot — Tue, 23 Dec 2025 02:25:24 +0000

សហព័ន្ធកីឡាបាល់ទាត់ទ្វីបអាស៊ី នឹងពិនិត្យមើលនូវការកាត់សេចក្តីរបស់ក្រុមអាជ្ញាកណ្តាលសម្រាប់ការប្រកួតវគ្គផ្តាច់ព្រ័ត្រ ដណ្តើមមេដាយមាស ក្នុងកីឡាស៊ីហ្គេម លើកទី៣៣ នៅប្រទេសថៃ រវាងក្រុមបាល់ទាត់ជម្រើសជាតិនារីវៀតណាម និងក្រុមជម្រើសជាតិនារីហ្វីលីពីន កាលពីថ្ងៃទី១៧ ខែធ្នូ ឆ្នាំ ២០២៥។

លោកស្រីអាជ្ញាកណ្តាល Rebecca Durcau

គ្រប់អ្នកដែលបានមើលវីដេអូនៃការប្រកួតនោះសុទ្ធតែឃើញយ៉ាងច្បាស់ពីបាល់ស្ថិតនៅក្នុងជំហរល្បែង (On Side) ប៉ុន្តែអាជ្ញាកណ្តាល និងជំនួយការអាជ្ញាកណ្តាលបានចាប់កំហុសបាល់ក្រៅជំហរល្បែង (Off Side) ដែលបានដកគ្រាប់បាល់របស់ក្រុមនារីវៀតណាមធ្វើឲ្យការប្រកួតនោះបញ្ចប់ដោយលទ្ធផលស្មើគ្នា ០-០ ហើយការទាត់ប៉េណាល់ទីកាត់សេចក្តី ហ្វីលីពីន បានឈ្នះ ដោយលទ្ធផល ៦-៥ ដើម្បីទទួលបានមេដាយមាស ខណៈ វៀតណាម ទទួលបានមេដាយប្រាក់។

អ្នកស្រី Phutsavan Chanthavong ជាជំនួយការ

ការកាត់សេចក្តីរបស់អាជ្ញាកណ្តាលបានទទួលរងការរិះគន់យ៉ាងខ្លាំង ជាពិសេសពីអ្នកគាំទ្រវៀតណាមតែម្តង។ អាជ្ញាកណ្តាលដែលដឹកនាំការប្រកួតនោះគឺលោកស្រី Rebecca Durcau ជាជនជាតិអូស្ត្រាលី ខណៈជំនួយការអាជ្ញាកណ្តាលគឺអ្នកស្រី Phutsavan Chanthavong ជាជនជាតិឡាវ។

សហព័ន្ធកីឡាបាល់ទាត់អាស៊ី (AFC) គ្រោងនឹងពិនិត្យឡើងវិញ និងអាចចាត់វិធានការធ្ងន់ធ្ងរលើអាជ្ញាកណ្តាល និងជំនួយការអាជ្ញាកណ្តាល ដោយផ្អែកលើរបាយការណ៍បច្ចេកទេសរបស់លោក Yongmei Cui ដែលជាអ្នកវាយតម្លៃអាជ្ញាកណ្តាល។

តាមការឲ្យដឹងពី សហព័ន្ធកីឡាបាល់ទាត់វៀតណាម ថា តំណាង គណៈកម្មាធិការអាជ្ញាកណ្តាលរបស់ AFC បានសុំទោសជាលក្ខណៈបុគ្គលដល់សហព័ន្ធកីឡាបាល់ទាត់វៀតណាម និងក្រុមបាល់ទាត់នារីវៀតណាមចំពោះកំហុសដ៏ធ្ងន់ធ្ងរដែលបានបង្កើតឡើងដោយជំនួយការអាជ្ញាកណ្តាល Phutsavan Chanthavong។

ចំណាត់ការលំអិតយ៉ាងណា នៅមិនទាន់សម្រេចឡើយ ដោយត្រូវរង់ចាំពិនិត្យមើលឡើងវិញឲ្យច្បាស់លាស់ជាមុនសិន៕

អត្ថបទ៖ វីរបុត្រ

The post AFC គ្រោងចាត់វិធានការធ្ងន់ធ្ងរលើអាជ្ញាកណ្តាលក្នុងកីឡាស៊ីហ្គេម នៅថៃ appeared first on Kampuchea Thmey Daily.

ម៉ាឡេស៊ី ប្តេជ្ញានាំយកស្មារតីកីឡាស៊ីហ្គេមមកវិញ ក្រោយថៃធ្វើឲ្យខូចមុខមាត់

Rann Reuy — Mon, 22 Dec 2025 03:32:07 +0000

នាយករដ្ឋមន្ត្រីម៉ាឡេស៊ី លោក អាន់វ៉ា អ៊ីប្រាហ៊ីម បានបង្ហោះសារបង្ហាញការបេ្តជ្ញារៀបចំព្រឹត្តិការណ៍កីឡាអាស៊ានលើកទី៣៤ ដែលម៉ាឡេស៊ីនឹងក្លាយជាម្ចាស់ផ្ទះរៀបចំឲ្យបានហ្មត់ចត់និងយុត្តិធម៌ បន្ទាប់ពីព្រឹត្តិការណ៍ស៊ីហ្គេមលើកទី៣៣នៅប្រទេសថៃ រងការរិះគន់ចំពោះភាពអយុត្តិធម៌ និងការរៀបចំដ៏អន់ថយ នាំឲ្យអាប់ឱនដល់ព្រឹត្តិការណ៍ដ៏សំខាន់នេះ។

អត្តពលិកម៉ាឡេស៊ីដែលបានចូលរួមប្រកួតកីឡាស៊ីហ្គេមនៅប្រទេសថៃ។ FB/Anwar

នៅក្នុងសារអបអរចំពោះអត្តពលិកម៉ាឡេស៊ីដែលទទួលបានជោគជ័យក្នុងការចូលរួមប្រកួតកីឡាស៊ីហ្គេមនៅប្រទេសថៃដែលទើបបញ្ចប់កាលថ្ងៃទី២០ខែធ្នូនេះ លោក អាន់វ៉ា បានសរសេររៀបរាប់ពីការប្រកាន់ភ្ជាប់នូវវិន័យខ្ពស់ ការលះបង់ និងស្មារតីតស៊ូរបស់អត្តពលិក គ្រូបង្វិក និងមន្ត្រីដឹកនាំក្រុមអត្តពលិក ដែលមិនចុះញ៉មក្នុងការនាំយកឈ្មោះប្រទេសឲ្យមានភាពយុត្តិធម៌ក្នុងតំបន់។

ការលើកឡើងរបស់នាយករដ្ឋមន្ត្រីម៉ាឡេស៊ី លោក អាន់វ៉ា អ៊ីប្រាហ៊ីម ក្រោយពេលដែលក្រុមអត្តពលិកម៉ាឡេស៊ី និងគ្រូបង្វិក ប្រភេទកីឡាបញ្ចសីលា បានផ្ទុះការតវ៉ាយ៉ាងខ្លាំងចំពោះភាពអយុត្តិធម៌របស់ក្រុមអាជ្ញាកណ្តាលសម្រាប់ការប្រកួតនៅក្នុងព្រឹត្តិការណ៍ស៊ីហ្គេមក្នុងប្រទេសថៃ។

ម៉ាឡេស៊ី ទទួលទង់កីឡាអាស៊ីអាគ្នេយ៍ជាផ្លូវការ

ព្រឹត្តិការណ៍កីឡាប្រចាំតំបន់អាស៊ាននេះលើកទី៣៣ក្នុងប្រទេសថៃ ត្រូវបានគេរិះគន់យ៉ាងខ្លាំង ថាជាព្រឹត្តិការណ៍អន់បំផុតក្នុងប្រវត្តិសាស្ត្រ៦៦ឆ្នាំ ដែលប្រារព្វធ្វើឡើងលើកដំបូងក្នុងឆ្នាំ១៩៥៩ ក្នុងទីក្រុងបាងកក ប្រទេសថៃនោះដែរ។

ដើម្បីស្តារមុខមាត់ព្រឹត្តិការណ៍កីឡាអាស៊ីអាគ្នេយ៍នេះវិញ លោក អាន់វ៉ា អ៊ីប្រាហ៊ីម បានលើកឡើងថា «ជាមួយគ្នានេះ យើងនឹងធានាថា ការរៀបចំធ្វើជាម្ចាស់ផ្ទះកីឡាស៊ីហ្គេមឆ្នាំ ២០២៧ ត្រូវបានរៀបចំយ៉ាងហ្មត់ចត់ ប្រតិបត្តិតាមអ្វីដែលបានគ្រោងទុក និងតាមបែបបទ មិនត្រឹមតែពីចំណុចចាប់ផ្តើម និងការធ្វើជាម្ចាស់ផ្ទះប៉ុណ្ណោះទេ ប៉ុន្តែក្នុងការកសាងប្រព័ន្ធអេកូកីឡាប្រកបដោយនិរន្តរភាព ក៏ដូចជាការផលិតទេពកោសល្យលំដាប់ពិភពលោក»។

លោក អាន់វ៉ា បានបន្ថែមទៀតថា៖‍«ជាងនេះទៅទៀត កីឡាគឺជាបណ្តុំសម្រាប់មនុស្សរួបរួមគ្នា ដែលប្រមូលផ្តុំចម្រុះជាតិសាសន៍ គ្រប់តំបន់ និងគ្រប់មជ្ឈដ្ឋាន ក្នុងស្មារតីរួមគ្នា និងមោទនភាពជាតិតែមួយ។ នេះគឺជាកម្លាំងពិតរបស់ម៉ាឡេស៊ី ដែលត្រូវតែបន្តរក្សា និងផ្តល់អំណាច»។

អ្នកជំនាញក្នុងវិស័យកីឡា បានមើលឃើញថា ការរៀបចំព្រឹត្តិការណ៍ស៊ីហ្គេមលើកទី៣៣របស់ប្រទេសថៃ ដែលបានប្រព្រឹត្តកំហុសធំៗជារួមចំនួន៣ គឺ ទី ១-កំហុសខាងបច្ចេកទេស ទី២-កំហុសដោយចេតនារបស់អត្តពលិកថៃ
និង ទី៣-ការកាត់សេចក្តីមានការលំអៀង។ កំហុសទាំងនោះ ត្រូវបានគេមើលឃើញថា បានកើតមានជាមួយប្រទេសស្ទើរទាំងអស់ក្នុងប្រភេទវិញ្ញាសាប្រកួតសំខាន់ៗ៕

រ៉ាន់ រើយ

លោក អាន់វ៉ា អ៊ីប្រាហ៊ីម។

The post ម៉ាឡេស៊ី ប្តេជ្ញានាំយកស្មារតីកីឡាស៊ីហ្គេមមកវិញ ក្រោយថៃធ្វើឲ្យខូចមុខមាត់ appeared first on Kampuchea Thmey Daily.

កីឡាការិនីថៃ Naphat ប្រព្រឹត្តខុសគោលការណ៍ Fair Play យ៉ាងធ្ងន់ធ្ងរក្នុងកីឡាស៊ីហ្គេម

chean virakbot — Wed, 17 Dec 2025 02:31:35 +0000

កីឡាការិនីអេឡិចត្រូនិកជម្រើសជាតិថៃ Naphat Warasin ត្រូវបានរកឃើញកំហុសយ៉ាងធ្ងន់ធ្ងរដែលផ្ទុយពីគោលការណ៍យុត្តិធម៌ (Fair Play)ក្នុងព្រឹត្តិការណ៍កីឡាស៊ីហ្គេម លើកទី៣៣ ឆ្នាំ ២០២៥ នៅប្រទេសថៃ។

នៅពេលក្រុមកីឡាការិនីជម្រើសជាតិថៃ ប្រកួតជាមួយ ក្រុមកីឡាការិនីវៀតណាម កីឡាការិនីថៃ Naphat Warasin ដែលត្រូវបានគេស្គាល់ជា Tokyogurl បានប្រើប្រាស់ប្រព័ន្ធ software ជាជនទី៣ ឲ្យលេងជំនួសសម្រាប់ការប្រកួតកីឡាអេឡិចត្រូនិកវិញ្ញាសានារី Arena of Valor កាលពីថ្ងៃទី១៥ ខែធ្នូ ឆ្នាំ ២០២៥។

បន្ទាប់ពីការស៊ើបអង្គេតរួចរាល់ គណៈកម្មការរៀបចំការប្រកួតកីឡាអេឡិចត្រូនិកបានរកឃើញកីឡាការិនី Naphat Warasin បានប្រព្រឹត្តកំហុសយ៉ាងធ្ងន់ធ្ងរដែលផ្ទុយពីគោលការណ៍យុត្តិធម៌។ នេះជាកំហុសដែលប្រព្រឹត្តឡើងដោយចេតនាពិតប្រាកដ និងមិនអនុគ្រោះបាន។

គណៈកម្មការរៀបចំការប្រកួតបានសម្រេចបណ្តេញចេញកីឡាការិនីរូបនេះពីការប្រកួត ហើយក្រុមកីឡាការិនីថៃក៏ត្រូវបានឲ្យចាញ់។ គណៈកម្មការរៀបចំការប្រកួតក៏បានដាក់លិខិតជាផ្លូវការអំពីការសម្រេចនេះទៅគណៈកម្មាធិការជាតិអូឡាំពិកថៃ។

ដំណឹងនេះបានផ្ទុះការចាប់អារម្មណ៍យ៉ាងខ្លាំងទូទាំងអាស៊ាន ហើយគណៈកម្មាធិការជាតិអូឡាំពិកថៃក៏បានចេញលិខិតទទួលស្គាល់ និងបញ្ជាក់ពីការបណ្តេញចេញកីឡាការិនីរូបនេះពីការប្រកួត។

ជាមួយគ្នានេះ សហព័ន្ធកីឡាអេឡិចត្រូនិកងៃ (TESF) ក៏បានចេញសេចក្តីថ្លែងការណ៍ពីការទទួលស្គាល់ចំពោះកំហុសរបស់កីឡាការិនីខ្លួនពិតប្រាកដមែន។ ពួកគេសន្យាមិនឲ្យមានបញ្ហាកើតមានទៀតទេនៅថ្ងៃ ក្រោយ។

សូមបញ្ជាក់ថា វិញ្ញាសានារី Arena of Valor បានបញ្ចប់ហើយដោយក្រុមកីឡាការិនីវៀតណាមឈ្នះមេដាយមាស ក្រុមកីឡាការិនីឡាវឈ្នះមេដាយប្រាក់ និងក្រុមកីឡាការិនីទីម័រខាងកើតបានឈ្នះមេដាយសំរិទ្ធ។

ខាងលើនេះគ្រាន់តែជារឿងអាស្រូវមួយរបស់ម្ចាស់ផ្ទះថៃប៉ុណ្ណោះ ប៉ុន្តែមានរឿងរ៉ាវអាក្រក់ជាច្រើនទាំងកំហុសដោយអចេតនា និងបច្ចេកទេសទាំងការពិធីបើក ក៏ដូចជាការប្រកួតនៅតាមទីលាននានា៕

អត្ថបទ៖ វីរបុត្រ

The post កីឡាការិនីថៃ Naphat ប្រព្រឹត្តខុសគោលការណ៍ Fair Play យ៉ាងធ្ងន់ធ្ងរក្នុងកីឡាស៊ីហ្គេម appeared first on Kampuchea Thmey Daily.

ក្ដៅចិត្តខ្លាំង គ្រូម៉ាឡេស៊ីចង្អុលមុខគណៈកម្មការពីការលំអៀងទៅម្ចាស់ផ្ទះថៃ ក្នុងការប្រកួតកីឡាបញ្ចស៊ីឡាត់

Sina Noun — Tue, 16 Dec 2025 07:59:51 +0000

ផ្ទុះការតវ៉ាយ៉ាងខ្លាំងរហូតតម្រួតថៃចេញមុខមកអន្តរាគមន៍ ស្របពេលគ្រូបង្វឹកកីឡាបញ្ចស៊ីឡាត់ របស់ប្រទេសម៉ាឡេស៊ី ខឹងសម្បាររហូតចង្អុលមុខគណៈកម្មការរៀបចំការប្រកួតភ្លាមៗ និងទាញសិស្សចេញពីកន្លែងប្រកួតតែម្ដងដោយសារតែការលំអៀងទៅលើកីឡាការិនីម្ចាស់ផ្ទះថៃ។

នេះបើតាមការបង្ហោះនៅលើបណ្ដាញសង្គម Tik Tok ឈ្មោះថា Leo.commentator គឺបង្ហាញពីការមិនពេញចិត្តចំពោះលទ្ធផល និងការលំអៀងរបស់គណៈកម្មការទៅលើម្ចាស់ផ្ទះថៃជាខ្លាំងរហូតដល់មានការតវ៉ា និងមានចលាចលក្នុងបរិវេណប្រកួតថែមទៀតផង។ ក្នុងវីដេអូចំនួន ២នោះគឺមានការតវ៉ារហូតដល់តម្រួតថៃចេញមុខមកសម្របសម្រួល និងក្រុមការងារទាញភាគីតវ៉ាផ្សេងៗចេញទើបក្នុងសាលប្រកួតនោះស្ងប់ស្ងាត់ទៅវិញ។

គេឃើញអ្នកគាំទ្រម្ចាស់ផ្ទះថៃហាក់មិនហ៊ានមាត់កអ្វីឡើយក្នុងពេលនោះ និងបានត្រឹមឈរកាន់ទង់ជាតិនៅស្ងៀមប៉ុណ្ណោះ។ ចំណែកគ្រូបង្វឹក និងគ្រូជំនួយរបស់កីឡាការិនីម៉ាឡេស៊ី ប្រតិកម្មខ្លាំងមែនទែនចំពោះការកាត់សេចក្ដីអំឡុងពេលប្រកួតខ្លាំងរហូតជង្អុលមុខគណៈកម្មការរៀបចំ និងទាញសិស្សចេញភ្លាមៗមិនឲ្យនៅយូរនោះឡើយ ព្រោះស្អប់ខ្ពើមចំពោះការលំអៀងទៅលើម្ចាស់ផ្ទះថៃ។

រូបភាពតវ៉ាការប្រកួត

ចំណែកការប្រកួតបាល់ទះក្នុងសាលផ្នែកនារី នៅវគ្គផ្ដាច់ព្រ័ត្ររវាង ថៃ និងវៀតណាម ក៏ផ្អើលក្នុងបណ្ដាញសង្គមផងដែរ ពិសេសគឺ Tik Tok តែម្ដង។ បើទោះជាលទ្ធផលបានបញ្ចប់ហើយក្ដី ប៉ុន្តែការមិនពេញចិត្ត និងមិនអស់ចិត្តលើគ្រាប់បាល់ចុងក្រោយដែលកាត់សេចក្ដីឲ្យម្ចាស់ផ្ទះឈ្នះមេដាយមាស។ ស្របពេលការប្រកួតនោះដូចជាមិនបង្ហាញវីដេអូសាឡើងវិញ (Video Challenge) នោះទេ។ គ្រាន់តែអាជ្ញាកណ្ដាលទង់លើកបង្ហាញថា បាល់ចេញភ្លាម គ្រូបង្វឹករបស់ក្រុមបាល់ទះផ្នែកនារីវៀតណាម សម្ដែងការហួសចិត្តរហូតលើកមេដៃដាក់ រួចហើយលើកដៃមកសំពះអាជ្ញាកណ្ដាលកាន់ទង់ភ្លាមៗនោះទៀតផង និងដើរចេញដោយហួសចិត្ត។

បណ្ដាសារព័ត៌មានវៀតណាម និងអាខោន Tik Tok វៀតណាមជាច្រើនបានបង្ហោះពីការហួសចិត្តចំពោះការកាត់សេចក្ដីនៅគ្រាប់បាល់ចុងក្រោយនេះ និងមានការបង្ហាញអំពីការខកចិត្តជាខ្លាំងចំពោះការចាញ់ដោយមិនអស់ចិត្តក្នុងវគ្គដណ្ដើមមេដាយមាស៊ីហ្គេម លើកទី៣៣ ដែលកំពុងធ្វើនៅប្រទេសថៃ។ បញ្ចប់ការប្រកួតយ៉ាងតានតឹងរហូតដល់ ៥សិតគឺថៃយកឈ្នះវៀតណាម ៣-២ សិត ដោយសិតចុងក្រោយពិន្ទុប្រដេញគ្នារហូត ២៥-២៣។

នេះលើកយកត្រឹមតែពីរប្រភេទកីឡាប៉ុណ្ណោះមានការរិះគន់ និងការមិនពេញចិត្តជាខ្លាំងចំពោះលទ្ធផល និងការរៀបចំរបស់ម្ចាស់ផ្ទះថៃ ក្នុងព្រឹត្តិការណ៍ស៊ីហ្គេម លើកទី៣៣ ឆ្នាំ២០២៥ ប៉ុន្តែក៏នៅមានការប្រកួតកីឡាផ្សេងៗទៀតដែលមានបញ្ហា៕

អត្ថបទដោយ៖ នួន ស៊ីណា

The post ក្ដៅចិត្តខ្លាំង គ្រូម៉ាឡេស៊ីចង្អុលមុខគណៈកម្មការពីការលំអៀងទៅម្ចាស់ផ្ទះថៃ ក្នុងការប្រកួតកីឡាបញ្ចស៊ីឡាត់ appeared first on Kampuchea Thmey Daily.

ឱកាសបងប្អូនទិញវត្ថុអនុស្សាវរីយ៍កីឡាស៊ីហ្គេម ២០២៣ ថវិកាជួយដល់ជនភៀសសឹក

chean virakbot — Sat, 13 Dec 2025 11:48:57 +0000

ភ្នាក់ងារគ្រប់គ្រងវត្ថុអនុស្សាវរីយ៍នៃមហាព្រឹត្តិការណ៍កីឡាស៊ីហ្គេម លើកទី៣២ ឆ្នាំ ២០២៣ នៅកម្ពុជាបានបើកលក់វត្ថុអនុស្សាវរីយ៍ដើម្បីរម្លឹកដល់កីឡាស៊ីហ្គេម ដែលកម្ពុជាទទួលធ្វើម្ចាស់ផ្ទះដ៏ជោគជ័យ ហើយថវិកាដែលទទួលបានពីការលក់ នឹងផ្តល់ជូនទៅជនរងផលប៉ះពាល់ដោយជម្លោះព្រំដែន១០០%។

កាលពី២ឆ្នាំមុន កីឡាស៊ីហ្គេម លើកទី៣២ ឆ្នាំ ២០២៣ បានរៀបចំជាប្រវត្តិសាស្ត្រនៅព្រះរាជាណាចក្រកម្ពុជាដែលបាននាំប្រជាជនកម្ពុជាជួបជុំគ្នាចូលរួមផ្ទាល់ និងឃើញពីចម្ងាយដើម្បីជាសក្ខីភាពនៃមហាព្រឹត្តិការណ៍លើកដំបូងនៅកម្ពុជាដែលទទួលបានជោគជ័យបំផុតតាមរយៈសាមគ្គីភាព ការរួបរួមកម្លាំងកាយចិត្ត និងសេចក្តីសង្ឃឹម។

តាមរយៈពាក្យស្លោកដ៏មានអត្ថន័យគឺ កីឡារស់ក្នុងសន្តិភាព ព្រឹត្តិការណ៍កីឡាជាប្រវត្តិសាស្ត្រទទួលបានការកោតសរសើរ និងចាប់អារម្មណ៍ពីមនុស្សទូទាំងពិភពលោក។ រយៈពេល២ឆ្នាំកន្លងផុតទៅ ដើម្បីរម្លឹកដល់អនុស្សាវរីយ៍ដ៏អស្ចារ្យមិនធ្លាប់មាន ក្រុមហ៊ុន Pathmazing ដែលជាភ្នាក់ងារធំរួមចំណែកក្នុងការរៀបចំកាលពីឆ្នាំ ២០២៣ បើកលក់វត្ថុអនុស្សាវរីយ៍ផ្សេងៗនៃកីឡាស៊ីហ្គេម ហើយថវិកាដែលទទួលបាននឹងផ្តល់ជូនទៅជនរងគ្រោះ ជនភៀស និងវិរកងទ័ពពីសង្គ្រាមនៅព្រំដែន។

បច្ចុប្បន្ន ជម្លោះព្រំដែនបានធ្វើឲ្យប្រជាជនរាប់សែននាក់បានចាកចោលផ្ទះសម្បែង ចោលការងាររកស៊ី ចោលការសិក្សា ដើម្បីទៅរកទីជ្រក់កោនមានសុវត្ថិភាព។ ពួកគាត់ប្រឈមជំងឺឈឺថ្កាត់ ខ្វះសម្ភារប្រើប្រាស់ គ្រឿងឧបភោគ និងបរិភោគជាដើម។ ក្នុងការគ្រាដ៏លំបាកនេះ រឿងសំខាន់បំផុតគឺរួបរួមសាមគ្គីគ្នាដើម្បីជួយគ្នាក្នុងគ្រាលំបាកស្របតាមមូលបទក្នុងកីឡាស៊ីហ្គេម ឆ្នាំ ២០២៣ គឺ«ឯកភាព ក្តីមេត្តា និងសន្តិភាព។ កម្ពុជាចង់បានសន្តិភាព ហើយប្រទេសជាតិក្រោកឈររួមគ្នាដើម្បីជួយគ្នា។

ដូច្នេះហើយបានជាទីភ្នាក់ងារបានសម្រេចរៀបចំលក់វត្ថុអនុស្សាវរីយ៍នៃកីឡាស៊ីហ្គេម ឆ្នាំ ២០២៣ ដើម្បីថវិកាជួយដល់ជូនរងគ្រោះ។ បងប្អូនដែលជាវ ទទួលបានវត្ថុអនុស្សាវរីយ៍នៃកីឡាស៊ីហ្គេម និងរម្លឹកពីភាពជោគជ័យរបស់ខ្មែរយើងទាំងអស់គ្នា។ បងប្អូនទទួលបានវត្ថុអនុស្សាវរីយ៍ ហើយរួមចំណែកជួយដល់ជនរងផលប៉ះពាល់ពីសង្គ្រាមនៅព្រំដែន។

គោលដៅនៃការបើកលក់នេះគឺសាមញ្ញ និងបន្ទាន់«ដើម្បីរៃអង្គាសថវិកាឲ្យបានយ៉ាងហោចណាស់ ១០០០០ដុល្លារដើម្បីជួយដល់ជនភៀសសឹក។ រាល់វត្ថុអនុស្សាវរីយ៍ដែលទិញនឹងក្លាយជាជំនួយដល់ជនភៀសសឹក១០០%។

សម្រាប់ការបើកលក់ថ្ងៃទី១ ទទួលបានការចាប់អារម្មណ៍យ៉ាងច្រើនពីប្រជាពលរដ្ឋខ្មែរ។

ពេលវេលានៃការលក់ពីថ្ងៃទី១២ ដល់ ទី២១ ខែធ្នូ ឆ្នាំ ២០២៥ ចាប់ពីម៉ោង ៨ ព្រឹកដល់ ម៉ោង ៨យប់ នៅជាន់ផ្ទាល់ដីនៃអគារ Connexion កោះពេជ្រ។ សូមបញ្ជាក់ថា វត្ថុអនុស្សាវរីយ៍មានកំណត់៕

អត្ថបទ៖ វីរបុត្រ

The post ឱកាសបងប្អូនទិញវត្ថុអនុស្សាវរីយ៍កីឡាស៊ីហ្គេម ២០២៣ ថវិកាជួយដល់ជនភៀសសឹក appeared first on Kampuchea Thmey Daily.

កីឡាស៊ីហ្គេម Archives - Kampuchea Thmey Daily

ចែក​សំបុត្រ​ដោយ​ឥត​គិត​ថ្លៃ សម្រាប់​ទស្សនា​ការចាក់​បញ្ចាំង​ពិធី​បើក​កីឡាស៊ីហ្គេម ២០២៣

NOCC ដាក់​បញ្ចាំង​ពិធី​បើក​កីឡា​ស៊ីហ្គេម ២០២៣ ឡើង​វិញ​ដើម្បី​ជួយ​ដល់​អត្តពលិក​ត្រៀម​កីឡាអូឡាំពិក

AFC គ្រោង​ចាត់​វិធានការ​ធ្ងន់​ធ្ងរលើ​​​អាជ្ញាកណ្តាល​​​ក្នុង​កីឡា​ស៊ីហ្គេម នៅ​ថៃ

​​ម៉ាឡេស៊ី ប្តេជ្ញា​​នាំ​យក​ស្មារតី​កីឡា​​ស៊ីហ្គេម​​មកវិញ ក្រោយ​ថៃ​ធ្វើឲ្យខូច​មុខមាត់​