កីឡាស្នូកឃ័រ Archives - Kampuchea Thmey Daily

Legend កីឡាស្នូកឃ័រលោក នាង តុលា សម្រេចចិត្តចូលនិវត្តន៍ពីជម្រើសជាតិទុកឱកាសដល់អ្នកជំនាន់ក្រោយ

Sina Noun — Thu, 26 Mar 2026 07:12:58 +0000

កីឡាករជើងខ្លាំងផ្នែកកីឡាស្នូកឃ័រ លោក នាង តុលា បានចូលនិវត្តន៍ពីក្រុមជម្រើសជាតិហើយ ព្រោះប្រឡូកក៏យូរឆ្នាំដែរ និងជាការទុកឱកាសដល់អ្នកជំនាន់ក្រោយៗបង្កើតស្នាដៃជូនជាតិមាតុភូមិបន្តពីលោកតទៅទៀតចេញប្រកួតលើឆាកអន្តរជាតិ។

លោក នាង តុលា

លោក នាង តុលា ដែលគេស្គាល់ថាជាកីឡាករជើងចាស់ និងមានប្រវត្តិខ្លាំងលើវិស័យកីឡាស្នូកឃ័រ បានចូលនិវត្តន៍ពីក្រុមជម្រើសជាតិហើយនៅពេលនេះ។ ដោយសារតែលោកចំណាយពេលជាមួយក្រុមជម្រើសជាតិនេះយូរឆ្នាំមកហើយ ដូច្នេះសមល្មមសម្រាកដើម្បីផ្ដល់ឱកាសដល់កីឡាករជំនាន់ក្រោយបង្កើតស្នាដៃជូនជាតិបន្តទៅទៀតផងដែរ។

អតីតជើងខ្លាំងរូបនេះបន្ថែមទៀតថា លោកនៅលេងកម្សាន្តសប្បាយផ្នែកក្រៅជម្រើសជាតិ និងអាចចេញលេងជាឯកជនដដែលទេ ដូច្នេះអ្នកចង់ជួបលោកក៏អាចទៅកាន់ក្លឹបផ្ទាល់ខ្លួនរបស់លោកនៅមុខវិទ្យាល័យបាក់ទូកបាន។ លោកអរគុណចំពោះអ្នកគាំទ្រកន្លងមកដែលស្រឡាញ់ចូលចិត្តតាំងពីដើមរហូតដល់លោកបានចូលនិវត្តន៍នៅពេលនេះ។

លោក នាង តុលា

បញ្ជាក់ដែរថា លោក នាង តុលា ជាអតីតកីឡាករស្នូកឃ័រដែលមានសមត្ថភាព និងមានភាពល្បីល្បាញជាយូរឆ្នាំមកហើយនៅកម្ពុជា។ រូបលោកធ្លាប់បានដណ្ដើមមេដាយលើឆាកអន្តរជាតិ និងបានធ្វើឲ្យបណ្ដាប្រទេសផ្សេងៗបានស្គាល់ពីកម្ពុជាផងដែរ។ ថ្មីៗនេះសហព័ន្ធកីឡាប៊ីយ៉ាកម្ពុជាបានប្រកាសពីការចូលនិវត្តន៍ពីក្រុមជម្រើសជាតិរបស់លោក នាង តុលា ផងដែរ៕

The post Legend កីឡាស្នូកឃ័រលោក នាង តុលា សម្រេចចិត្តចូលនិវត្តន៍ពីជម្រើសជាតិទុកឱកាសដល់អ្នកជំនាន់ក្រោយ appeared first on Kampuchea Thmey Daily.

លោក នាង តុលា ការខ្វះអ្នកឧបត្ថម្ភទើបធ្វើឲ្យវិស័យកីឡាស្នូកឃ័រស្ងប់ស្ងាត់

Sina Noun — Wed, 22 Oct 2025 02:02:55 +0000

លោក នាង តុលា ថាការខ្វះអ្នកឧបត្ថម្ភគាំទ្រធ្វើឲ្យវិស័យកីឡាស្នូកឃ័រនៅកម្ពុជាស្ងប់ស្ងាត់មិនសូវចេញមុខមាត់ ឬមានការប្រកួតដូចកីឡាផ្សេងៗរយៈពេលប៉ុន្មានឆ្នាំមកនេះ។

លោក នាង តុលា និងលោក ម៉ារ៉ា សុជាតិ អគ្គលេខាធិការ

អតីតជើងខ្លាំងផ្នែកស្នូកឃ័រ និងជាកីឡាករជម្រើសជាតិ លោក នាង តុលា បានឲ្យដឹងថា អំឡុងស៊ីហ្គេម ឆ្នាំ២០២៣ កម្ពុជាជាម្ចាស់ផ្ទះកីឡាមួយនេះហាក់មានសន្ទុះគាំទ្រ និងមានមហាជនឃើញខ្លះ។ ប៉ុន្តែក្រោយបញ្ចប់ស៊ីហ្គេមនោះមកវិស័យកីឡាស្នូកឃ័រក៏បានស្ងាត់ទៅវិញដែរ។

លោក នាង តុលា

ជើងខ្លាំងអំឡុងឆ្នាំ២០០២ រូបបន្ថែមទៀតថា តាមការយល់ឃើញរបស់លោកគឺដោយសារខ្វះការឧបត្ថម្ភពីសប្បុរសជន បណ្ដាក្រុមហ៊ុនផ្សេងៗដល់សហព័ន្ធ។ ការខ្វះថវិកាធ្វើឲ្យសហព័ន្ធមិនមានលទ្ធភាពក្នុងការបង្កើតពានរង្វាន់នានា ឬបង្កើតជាការប្រកួតតូច-ធំ ឡើងដែលនេះជាចំណុចសំខាន់ក្នុងការដុះខាត់សមត្ថភាពកីឡាករផង និងជាការពង្រីកផ្សព្វផ្សាយកីឡាមួយនេះដល់ស្រទាប់មហាជនផង។

លោក នាង តុលា អំពាវនាវដល់សប្បុរសជន ឬក្រុមហ៊ុនឯកជនទាំងអស់ដែលស្រឡាញ់ចង់រួមអភិវឌ្ឍន៍វិស័យកីឡាស្នូកឃ័រកម្ពុជាឲ្យមានភាពរីកចម្រើនសូមជួយដល់សហព័ន្ធដើម្បីឲ្យមានលទ្ធភាពក្នុងការរៀបចំព្រឹត្តិការណ៍ប្រកួតផ្សេងៗឲ្យបានជាបន្តបន្ទាប់។

លោក នាង តុលា

បញ្ជាក់ដែរថា សហព័ន្ធកីឡាស្នូកឃ័រនាបច្ចុប្បន្ននេះគឺហាក់ស្ងប់ស្ងាត់ខ្លាំង និងមានសូវទទួលបានប្រជាប្រិយភាពពីមហាជននោះឡើយ។ ការស្ងប់ស្ងាត់នេះបានធ្វើឲ្យមហាជនមួយចំនួនស្ទើរមិនដឹងថាសហព័ន្ធកីឡាមួយនេះនៅមានដំណើរការទៀតផង៕

អត្ថបទដោយ៖ នួន ស៊ីណា

The post លោក នាង តុលា ការខ្វះអ្នកឧបត្ថម្ភទើបធ្វើឲ្យវិស័យកីឡាស្នូកឃ័រស្ងប់ស្ងាត់ appeared first on Kampuchea Thmey Daily.

អតីតជើងខ្លាំងផ្នែកស្នូកឃ័រ នាង តុលា ស្វាគមន៍អ្នកចង់សាកល្បងសមត្ថភាព ឬហ្វឹកហាត់

Sina Noun — Tue, 14 Oct 2025 04:08:06 +0000

អតីតជើងខ្លាំងផ្នែកស្នូកឃ័រប្រចាំប្រទេសកម្ពុជាកាលពីជាង ១០ឆ្នាំមុនលោក នាង តុលា ថាខ្លួនស្វាគមន៍ជានិច្ចចំពោះអ្នកគាំទ្រចង់ជួប ចង់ប្រកួតសាកល្បងសមត្ថភាព ឬចង់ហ្វឹកហាត់អាចមកកន្លែងក្លឹបរបស់លោកបាននៅមុខវិទ្យាល័យបាក់ទូក។

លោក នាង តុលា

លោក នាង តុលា បានឲ្យដឹងថា ការបាត់មុខពីប្រភពកីឡាស្នូកឃ័រជាច្រើនឆ្នាំកន្លងទៅនោះគឺលោកមិនបានទៅណា ឬរស់នៅឯក្រៅប្រទេសអ្វីនោះទេ ពោលរស់នៅក្នុងប្រទេសកម្ពុជាជាមួយគ្រួសារ និងប្រកបរបរបើកក្លឹបស្នូករឃ័រជាធម្មតា។

ការដែលបាត់មុខរហូតដល់ ២០១៧ នោះគឺលោកផ្អាកលេងជាច្រើនឆ្នាំដែរទើបវិលត្រឡប់ចូលក្នុងវិស័យកីឡាស្នូកឃ័រមួយនេះវិញ។ កាលនោះវិស័យកីឡាស្នូកឃ័រហាក់បាត់ដំណឹង ឬបាត់ប្រជាប្រិយភាពគឺដោយសារមិនមានកម្មវិធីប្រកួតផ្សេងៗមិនមានម្ចាស់ឧបត្ថម្ភនានារៀបចំឲ្យមានសកម្មភាពសោះឡើយទើបធ្វើឲ្យបាត់មុខរហូតដល់ស៊ីហ្គេម ឆ្នាំ២០២៣ កម្ពុជាជាម្ចាស់ផ្ទះនេះទើបបានកក្រើកឡើងវិញខ្លះប៉ុណ្ណោះ។

លោក នាង តុលា

យ៉ាងណាលោក នាង តុលា បានបញ្ជាក់ថាលោកមិនបានទៅណាចោលអ្នកគាំទ្រ ឬអ្នកស្រឡាញ់ចូលចិត្តលោកនោះទេ។ ដូច្នេះអ្នកដែលចង់ជួបលោក ចង់លេងសាកល្បងសមត្ថភាពជាមួយលោក ឬមានបំណងចង់ហាត់ជាអាជីពអាចមកកាន់វិនស្នូកឃ័រក្លឹប (Win Snooker Club Cambodia) ទល់មុខវិទ្យាល័យបាក់ទូកបាន។

លោក នាង តុលា

បញ្ជាក់ដែរថា លោក នាង តុលា ជាអតីតជើងខ្លាំងផ្នែកកីឡាស្នូកឃ័រនេះអំឡុងឆ្នាំ២០០២ រហូតដល់ ២០១២ ដែលល្បីឈ្មោះជាខ្លាំង និងជាប់លេខ១ រយៈពេល១០ឆ្នាំជាប់គ្នា។ បច្ចុប្បន្នលោកជាកីឡាករជម្រើសជាតិផ្នែកកីឡាស្នូកឃ័រផងដែរ៕

ទីតាំងក្លឹបស្នូកឃ័រលោក នាង តុលា

អត្ថបទដោយ៖ នួន ស៊ីណា

The post អតីតជើងខ្លាំងផ្នែកស្នូកឃ័រ នាង តុលា ស្វាគមន៍អ្នកចង់សាកល្បងសមត្ថភាព ឬហ្វឹកហាត់ appeared first on Kampuchea Thmey Daily.

កីឡាករ នាង តុលា ជំនាន់លោកល្បីខ្លាំងជាប់លេខ១ រយៈពេល ១០ឆ្នាំ

Sina Noun — Mon, 06 Oct 2025 04:20:14 +0000

កីឡាករជើងខាំងផ្នែកកីឡាស្នូកឃ័រ លោក នាង តុលា រំលឹកអតីតកាលជំនាន់មានកេរ្តិ៍ឈ្មោះល្បីខ្លាំងនោះគឺចាប់ពីឆ្នាំ២០០២ រហូតដល់ ឆ្នាំ២០១២ ចូលរួមការប្រកួតផ្សេងៗជាប់ចំណាត់ថ្នាក់លេខ១ រយៈពេល ១០ឆ្នាំ ពោលប្រកួតមិនដែលចាញ់។

លោក នាង តុលា

កីឡាករ នាង តុលា បានឲ្យដឹងថា បើរំលឹកពីអតីតកាលវិញគឺលោកចាប់ផ្ដើមលេងកីឡាស្នូកឃ័រនេះតាំងពីឆ្នាំ១៩៩៥ មកម្ល៉េះ ប៉ុន្តែប្រឡូកចូលរួមការប្រកួតប្រជែងផ្សេងៗនៅឆ្នាំ១៩៩៧។ យ៉ាងណាការចូលប្រឡូកការប្រកួតប្រជែងជាផ្លូវការអំឡុងឆ្នាំ១៩៩៧ ដំបូងៗនោះគឺមិនទទួលបានភាពជោគជ័យនោះឡើយរហូតដល់ឆ្នាំ២០១០ ទើបមានឈ្មោះល្បីចាប់ផ្ដើមមហាជនស្គាល់។

លោក នាង តុលា

កីឡាករជម្រើសជាតិស្នូកឃ័ររូបនេះបន្ថែមទៀតថា អំឡុងពេលដែលលោកមានឈ្មោះល្បីខ្លាំង និងមានស្គាល់ច្រើននោះគឺអំឡុងឆ្នាំ២០១០ រហូតដល់ ឆ្នាំ២០១២ ដោយសារលោកប្រកួតជាប់លេខ១ រហូតមករយៈពេល ១០ឆ្នាំឯណោះ។ មិនថាការប្រកួតតូច-ធំ ឬពានរង្វាន់អ្វីនោះទេគឺលោកតែងតែទទួលបានជោគជ័យជានិច្ចទើបធ្វើឲ្យកេរ្តិ៍ឈ្មោះរបស់លោកកាលនោះមានភាពល្បីខ្លាំង។

លោក នាង តុលា

ភាពល្បីល្បាញជំនាន់នោះបានធ្វើឲ្យលោករវល់ច្រើនពិសេសការចង់មកជួបប្រកួតសាកល្បងសមត្ថភាពពីអ្នកលេងកីឡាស្នូកឃ័រខ្លាំងៗនៅតាមបណ្ដាខេត្ត-ក្រុង ព្រោះបានឃើញក៏ដូចជាដឹងថាសមត្ថភាពល្អរបស់លោក ដូច្នេះទើបមានអ្នកសុំលេងជាមួយជាបន្តបន្ទាប់មិនឈប់។

លោក នាង តុលា ប្រកួតកន្លងទៅ

បញ្ជាក់ដែរថា លោក នាង តុលា ជាកីឡាករស្នូកឃ័រល្បីឈ្មោះជាខ្លាំងនៅជំនាន់មុនរហូតមានការផ្សព្វផ្សាយតាមទូរទស្សន៍ កាសែត ជាហូរហែអំឡុងឆ្នាំ ២០១០។ បច្ចុប្បន្ននេះលោកក៏ជាកីឡាករជម្រើសជាតិផ្នែកកីឡាស្នូកឃ័រផងដែរ និងបានប្រកួតតាមកម្មវិធីផ្សេងៗតំណាងប្រទេសកម្ពុជា។ បច្ចុប្បន្ននេះលោកមានវ័យ ៤៥ឆ្នាំ មានភរិយា និងកូន ៣នាក់។ លោកក៏ជាម្ចាស់ក្លឹបស្នូកឃ័រមួយកន្លែងក្បែរវិទ្យាល័យបាក់ទូកផងដែរ៕

លោក នាង តុលា ចេញទៅប្រកួតកន្លងទៅ

អត្ថបទដោយ៖ នួន ស៊ីណា

The post កីឡាករ នាង តុលា ជំនាន់លោកល្បីខ្លាំងជាប់លេខ១ រយៈពេល ១០ឆ្នាំ appeared first on Kampuchea Thmey Daily.

ស្រួង ភាវី ឈ្នះជើងឯក LPBA ឆ្នាំ ២០២៥-២៦ មានបេក្ខនារី ១២៨នាក់ អមដោយប្រាក់រង្វាន់ជិត ៣ម៉ឺនដុល្លារ

chean virakbot — Mon, 11 Aug 2025 08:21:06 +0000

កីឡាការិនីបីយ៉ាការ៉ុមជម្រើសជាតិកម្ពុជា ស្រួង ភាវី បានឈ្នះជើងឯក LPBA Charity Championship ឆ្នាំ ២០២៥-២៦ ដោយទទួលបានប្រាក់រង្វាន់ ៤០លានវ៉ុន (ជិត៣ម៉ឺនដុល្លារអាមេរិក។

ព្រឹត្តិការណ៍ប្រកួតបីយ៉ាការ៉ុមលំដាប់ពិភពលោកនេះមានកីឡាការិនីជម្រើសឈានមុខចំនួន ១២៨នាក់ដែលត្រូវប្រកួតប្រជែងជាច្រើនដំណាក់កាល និងតឹងតែងបំផុតមុនពេលឈានដល់វគ្គ ៣២ នាក់ចុងក្រោយ។

នៅវគ្គ៣២នាក់ កីឡាការិនីកម្ពុជា ស្រួង ភាវី បានទម្លាក់កីឡាការិនី Oh Do-hee ដោយពិន្ទុ ៣-១ ដើម្បីឡើងទៅកាន់វគ្គ ១៦ នាក់ចុងក្រោយ។ នៅវគ្គ១៦នាក់នេះ កីឡាការិនីកម្ពុជា បានយកឈ្នះកីឡាការិនី Kim Ye-eun ដោយពិន្ទុ ៣-២ ដើម្បីឡើងទៅកាន់វគ្គ ៨ នាក់ចុងក្រោយ ដែលបានទម្លាក់កីឡាការិនី Park Ye-won ដោយពិន្ទុ ៣-០។

នៅវគ្គពាក់កណ្តាលផ្តាច់ព្រ័ត្រ ស្រួង ភាវី បានយកឈ្នះកីឡាការិនី Han Ji-eun ដោយពិន្ទុ ៣-២ ដើម្បីឡើងទៅកាន់វគ្គផ្តាច់ព្រ័ត្រ ជួបដៃគូចាស់ដ៏ស្វិតស្វាញគឺកីឡាការិនី Kim Min-a ប៉ុន្តែកីឡាការិនីកម្ពុជាមិនបានខកចិត្តឡើយ។ កីឡាការិនីកម្ពុជាបានយកឈ្នះដោយពិន្ទុ ៤-១ ដើម្បីគ្រងជើងឯក។

នេះជាជើងឯក LPBA លើកទី ៩ របស់ ស្រួង ភាវី បន្ទាប់ពីធ្លាប់ឈ្នះចំនួន ៨ ដងមកហើយ។ ជាពិសេសកីឡាការិនីកម្ពុជាបានយកឈ្នះនារីខ្លាំង Kim Min-a ដែលធ្លាប់ធ្វើឲ្យកីឡាការិនីកម្ពុជាធ្លាប់រងបរាជ័យពីរដងក្នុងអាជីព។

កីឡាការិនី ស្រួង ភាវី រកបានប្រាក់រង្វាន់ច្រើនជាងគេគឺ សរុប ៨១លានរ៉ុន ឈរចំណាត់ថ្នាក់លេខ១ នៅក្នុងរដូវកាល ២០២៥-២៦ បន្ទាប់ពីបានឈ្នះជើងឯកចំនួន ៣ លើក ប៉ុន្តែស្ថិតនៅចំណាត់ថ្នាក់លេខ២ ក្នុងតារាងអ្នករកបានប្រាក់រង្វាន់ច្រើនបំផុតគ្រប់សម័យកាល (All Season Money Ranking) ជាមួយប្រាក់រង្វាន់ ៣៦២លានវ៉ុន (ប្រហែល ២៥ម៉ឺនដុល្លារអាមេរិក) បន្ទាប់ពីកីឡាការិនីកូរ៉េខាងត្បួង Ga-young Kim ឈរលេខ១ដែលរកបាន ៧២៧លានវ៉ុន (ប្រហែល៥០ម៉ឺនដុល្លារអាមេរិក)៕

ចំណាត់ថ្នាក់ឆ្នាំ ២០២៥-២៦

ចំណាត់ថ្នាក់គ្រប់សម័យ

អត្ថបទ៖ វីរបុត្រ

The post ស្រួង ភាវី ឈ្នះជើងឯក LPBA ឆ្នាំ ២០២៥-២៦ មានបេក្ខនារី ១២៨នាក់ អមដោយប្រាក់រង្វាន់ជិត ៣ម៉ឺនដុល្លារ appeared first on Kampuchea Thmey Daily.

ម្ចាស់មេដាយមាសស៊ីហ្គេម ម៉ែន សុផានិត ក្លាយជា BA ក្លិប Lux98 Billiard មានសម្ភារៈហ្វឹកហាត់ទំនើប

chean virakbot — Wed, 18 Dec 2024 06:18:52 +0000

កីឡាករស្នូកឃ័រជម្រើសជាតិកម្ពុជា ម៉ែន សុផានិត បានក្លាយជាតំណាងផ្សព្វផ្សាយ (BA) របស់ក្លិបកីឡាស្នូកឃ័រ និងប៊ីយ៉ា Lux98 Billiard ដែលជាមានសម្ភារៈហ្វឹកហាត់ទំនើបកម្រិតស្តង់ដាអន្តរជាតិ។

កាលពីរសៀលថ្ងៃទី១៧ ខែធ្នូ ឆ្នាំ២០២៤ ក្នុងសន្និសីទសារព័ត៌មានស្តីពីការចុះហត្ថលេខាជាមួយកីឡាករ កញ្ញា ហេង ចាង នាយកគ្រប់គ្រងក្លិប Lux98 Billiard បានលើកឡើងថា គោលដៅសំខាន់ចំនួន៣ដែលជ្រើសរើសយកកីឡាករជម្រើសជាតិ ម៉ែន សុផានិត ជាតំណាងផ្សព្វផ្សាយឲ្យក្លិប។ ទី១. ផ្តល់ឲ្យកីឡាករទទួលបានទីកន្លែងហ្វឹកហាត់ពេញជាមួយសម្ភារៈទំនើប និងស្តង់ដាអន្តរជាតិ។ ការផ្តល់ជូននេះគឺដើម្បីអភិវឌ្ឍ ដុសខាត និងសម្រួចសមត្ថភាពសម្រាប់ត្រៀមការប្រកួតទាំងក្នុងស្រុក និងក្រៅប្រទេស។ ជាពិសេស ក្លិបទើបតែបាននាំចូលតាបប៊ីយ៉ា Legend Billiard ថ្មីទំនើបផ្តល់ឲ្យកីឡាករហ្វឹកហាត់ដិតដល់ស្របតាមស្តង់ដាអន្តរជាតិ។

ទី២. ក្រៅពីការហ្វឹកហាត់ផ្ទាល់ខ្លួន កីឡាករ ម៉ែន សុផានិត ក៏នឹងជួយបណ្តុះបណ្តាលថ្នាលយុវជនជំនាន់ក្រោយដែលមានចំណង់ចំណូលចិត្តក្លាយជាអត្តពលិកអាជីព។ យុវជនទាំងនៅរាជធានីភ្នំពេញ និងមកតាមពីបណ្តាខេត្តនានា ប្រសិនបើចង់ហ្វឹកហាត់កីឡាស្នូកឃ័រ និងប៊ីយ៉ាក្លាយជាអាជីពគឺអាចមកហ្វឹកហាត់នៅក្លិបរបស់កញ្ញាបាន។ ក្លិបផ្តល់ជូនគ្រូបង្ហាត់ និងទីកន្លែងហ្វឹកហាត់ដោយឥតគិតថ្លៃ ប៉ុន្តែការចំណាយផ្សេងៗទទួលខុសត្រូវដោយខ្លួនឯង។

ទី៣. កីឡាករ ម៉ែន សុផានិត នឹងមានបេសកកម្មផ្សព្វផ្សាយពីកីឡាស្នូកឃ័រ និងប៊ីយ៉ានៅក្នុងប្រទេសកម្ពុជាតាមរយៈក្លិប Lux98 Billiard ដែលមានតាបប៊ីយ៉ា Legend Billiard ឲ្យយុវជនបានស្គាល់ ដឹង និងចាប់អារម្មណ៍លេងកីឡានេះ។

កញ្ញា ហេង ចាង សង្ឃឹមថា តាមរយៈកិច្ចសហប្រតិបត្តិការនេះ វិស័យកីឡាស្នូកឃ័រ និងប៊ីយ៉ាកម្ពុជានឹងកាន់តែរីកចម្រើនខ្លាំងឡើងដើម្បីប្រកួតប្រជែងលើឆាកអន្តរជាតិ និងនាំមេដាយជូនជាតិ។

ជាមួយគ្នានេះ កីឡាករ ម៉ែន សុផានិត បានបង្ហាញអារម្មណ៍សប្បាយរីករាយដែលទទួលបានការងារដ៏សំខាន់ដែលរួមចំណែកជួយដល់វិស័យកីឡាស្នូកឃ័រ និងប៊ីយ៉ា។ កាលពីមុនលោកហ្វឹកហាត់នៅតាបប៊ីយ៉ាមិនសូវត្រូវតាមកម្រិតស្តង់ដាអន្តរជាតិ ដូច្នេះនៅពេលចេញទៅប្រកួតនៅក្រៅប្រទេសដែលមានតាបទំនើបស្តង់ដាគឺបានធ្វើឲ្យលោកហាក់ដូចជាថ្មីប្លែក។

លោកបាននិយាយថា ៖«ពេលខ្ញុំក្លាយជា BA ឲ្យក្លិប Lux98 Billiard ដែលមានសម្ភារៈហ្វឹកហាត់ទំនើបត្រូវតាមស្តង់ដាគឺធ្វើឲ្យសមត្ថភាពរបស់ខ្ញុំកាន់តែរីកចម្រើន។ ជាពិសេសពេលចេញទៅប្រកួតនៅក្រៅប្រទេសគឺអាចផ្តល់ឲ្យខ្ញុំមានទំនុកចិត្តក្នុងការលេងនៅលើតាបដែលយើងហ្វឹកហាត់រាល់ថ្ងៃ។ ខ្ញុំពិតជាអរគុណណាស់ដែលក្លិបបានផ្តល់តម្លៃដល់ខ្ញុំក្នុងនាមជាកីឡាករអាជីពម្នាក់នៅកម្ពុជា»។

សូមបញ្ជាក់ថា កីឡាករ ម៉ែន សុផានិត បានឈ្នះមេដាយ២គ្រឿងគឺមាស១ និងសំរិទ្ធ១ ក្នុងព្រឹត្តិការណ៍កីឡាស៊ីហ្គេម លើកទី៣២ ឆ្នាំ២០២៣ ដែលកម្ពុជាធ្វើជាម្ចាស់ផ្ទះ។ លោកបានឈ្នះមេដាយមាសលើវិញ្ញាសាគូបុរស Men’s Snooker Doubles និងមេដាយសំរិទ្ធ លើវិញ្ញាសាបុរសឯកត្តជន Men’s Snooker Singles។ កីឡាករក៏បានឈ្នះមេដាយមាស ប្រាក់ និងសំរិទ្ធពីការប្រកួតក្នុងស្រុក និងក្រៅប្រទេសជាច្រើន។ សមិទ្ធផល និងស្នាដៃជូនជាតិទាំងនេះហើយទើបបានជាក្លិប Lux98 Billard ផ្តល់តម្លៃ និងជ្រើសរើសលោកធ្វើជាតំណាងផ្សព្វផ្សាយរបស់ខ្លួនដើម្បីជាគំរូដល់យុវជនជំនាន់ក្រោយ៕

អត្ថបទ៖ វីរបុត្រ

The post ម្ចាស់មេដាយមាសស៊ីហ្គេម ម៉ែន សុផានិត ក្លាយជា BA ក្លិប Lux98 Billiard មានសម្ភារៈហ្វឹកហាត់ទំនើប appeared first on Kampuchea Thmey Daily.

ស្វែងយល់ជើងឯកពិភពលោក LPBA ស្រួង ភាវី ឈ្នះលើកទី៧ម្សិលមិញ

chean virakbot — Mon, 12 Feb 2024 02:30:38 +0000

កីឡាការិនីស្នូកឃ័រ និងប៊ីយ៉ាកម្ពុជា ស្រួង ភាវី បានឈ្នះជើងឯកពិភពលោកប៊ីការ៉យមវិញ្ញាសា LPBA (Women’s Professional Billiard Association) ឆ្នាំ២០២៤ បន្ទាប់ពីបានយកឈ្នះកីឡាការិនីរ៉េខាងត្បូង Jung-suk Lim នៅវគ្គផ្តាច់ព្រ័ត្រកាលពីរសៀលថ្ងៃអាទិត្យ ទី១១ ខែកុម្ភៈ ឆ្នាំ២០២៤។ នេះជាការឈ្នះលើកទី៧របស់កីឡាការិនីកម្ពុជា។

PBA គឺជាសមាគមកីឡាប៊ីឡាដអាជីពដែលស្ថិតក្រោមសមាគមកីឡាប៊ីយ៉ា និងស្នូឃ័រអាជីពពិភពលោក WPBSA ដែលត្រូវបានបង្កើតឡើងតាំងពីឆ្នាំ១៩៤៦។ និយាយដោយឡែកតែ PBA មានវិញ្ញាសាចំនួន៤គឺវិញ្ញាសាឯកតជន PBA សម្រាប់បុរស វិញ្ញាសាឯកតជន LPBA សម្រាប់នារី វិញ្ញាសាឯកតជន Dream សម្រាប់បុរស និងវិញ្ញសាឯកតជន Challenge សម្រាប់បុរស។

វិញ្ញាសាឯកតជននារី LPBA ប្រជុំដោយកីឡាការិនីទូទាំងពិភពលោកចូលរួមប្រកួតប្រជែងជារៀងរាល់ឆ្នាំ។ រហូតដល់ពេលនេះកីឡាការិនីកម្ពុជា ស្រួង ភាវី បានឈ្នះ៧ដង។ គិតត្រឹមដើមឆ្នាំ២០២៤នេះ កីឡាការិនីកម្ពុជាកំពុងឈរចំណាត់ថ្នាក់លេខ២ក្នុងតារាងដែលមានកីឡាការិនីទូទាំងពិភពលោកចំនួន១២៥នាក់។

ចំណាត់ថ្នាក់លេខ១កំពុងកាន់កាប់ដោយកីឡាការិនីជប៉ុន Ayako Sakai ប៉ុន្តែនៅមិនទាន់ដឹងច្បាស់ថាតើ តារាងចំណាត់ថ្នាក់នឹងប្រែប្រួលយ៉ាងណា បន្ទាប់ពីកីឡាការិនីកម្ពុជា ស្រួង ភាវី បានឈ្នះជើងឯកលើកទី៧ ខណៈកីឡាការិនីជប៉ុនមិនមានវត្តមានទេ។

ចំណែកកីឡាការិនីកូរ៉េខាងត្បូង Jung-sum Lim ដែលចាញ់ ស្រួង ភាវី ម្សិលមិញនេះស្ថិតនៅចំណាត់ថ្នាក់លេខ៧។

ក្រៅពីវិញ្ញាសា LPBA ដែលបានឈ្នះ៧ដង ស្រួង ភាវី ធ្លាប់ឈ្នះជើងឯកវិញ្ញាសា 3-Cushion ក្នុងការប្រកួតជើងឯកអាស៊ី ZANCA 1^st Asian Championship ឆ្នាំ២០១៨ នៅប្រទេសកូរ៉េខាង និងចំណាត់ថ្នាក់លេខ៣ ពិភពលោកវិញ្ញាសាដដែលនេះនៅប្រទេសតួកគីឆ្នាំ២០១៨ និង២០១៩។ វិញ្ញាសាដដែលនេះ ភាវី បានឈ្នះមេដាយមាសស៊ីហ្គេម ឆ្នាំ២០២៣ និងបានឈ្នះមេដាយសំរិទ្ធស៊ីហ្គេម ឆ្នាំ២០២៣ សម្រាប់វិញ្ញាសា 1-Cushion៕

អត្ថបទ៖ វីរបុត្រ

The post ស្វែងយល់ជើងឯកពិភពលោក LPBA ស្រួង ភាវី ឈ្នះលើកទី៧ម្សិលមិញ appeared first on Kampuchea Thmey Daily.

អបអរសាទរ! ស្រួង ភាវី ត្រូវបានរដ្ឋាភិបាលកូរ៉េផ្តល់ពានរង្វាន់មួយដ៏ថ្លៃថ្លា

chean virakbot — Thu, 05 Oct 2023 12:14:59 +0000

កីឡាការិនីស្នូកឃ័រ និងប៊ីយ៉ាជម្រើសជាតិកម្ពុជា ស្រួង ភាវី ត្រូវបានរដ្ឋាភិបាលនៃប្រទេសកូរ៉េខាងត្បូងផ្តល់ពានរង្វាន់ «វប្បធម៌បង្រួបបង្រួមជាតិពហុវប្បធម៌ និងពានរង្វាន់ពីក្រសួងព័ត៌មាន ក៏ដូចជាកាសែត និងទស្សនាវដ្តី» ក្នុងចំណោមជយលាភី៦រូប។

ពានរង្វាន់ដ៏មហាកិត្តិយសនេះ បន្ទាប់ពីកីឡាការិនីកម្ពុជារូបនេះចូលរួមយ៉ាងសកម្មក្នុងបុព្វហេតុមនុស្សធម៌ទាំងនៅក្នុងប្រទេសកូរ៉េ និងជាពិសេសនៅប្រទេសកម្ពុជា។ នាងបានធ្វើជាទូតសុច្ឆន្ទៈជាបន្តបន្ទាប់ឲ្យអង្ការ និងស្ថាប័នសប្បុរសធម៌ ក៏ដូចជាចូលរួមសកម្មនានាជាច្រើន។

ជាពិសេស ស្រួង ភាវី ជាកីឡាការិនីឆ្នើមផ្នែកកីឡាស្នូកឃ័រ និងប៊ីយ៉ា នៅប្រទេសកូរ៉េខាងត្បូងដែលត្រូវបានស្ថាប័នព័ត៌មានទូទាំងប្រទេសកូរ៉េចាប់អារម្មណ៍ដើម្បីផ្សព្វផ្សាយ ហើយមានពលរដ្ឋកូរ៉េស្រឡាញ់ចូលចិត្តច្រើន។ ក្នុងឆ្នាំ២០២៣នេះ នាងបានឈ្នះមេដាយមាសជូនជាតិ នៅពេលកម្ពុជាធ្វើម្ចាស់ផ្ទះរៀបចំការប្រកួតកីឡាស៊ីហ្គេម។

ស្រួង ភាវី បាននិយាយថា ៖«អ្នកដែលទទួលបានពានរង្វាន់«វប្បធម៌បង្រួបបង្រួមជាតិពហុវប្បធម៌»នេះគឺជាបុគ្គលដែលទទួលជោគជ័យក្នុងជីវិត និងធ្វើកិច្ចការដែលមានគុណតម្លៃសម្រាប់ជាតិ និងប្រជាជន ហើយបានធ្វើឱ្យជាតិរីកចម្រើន ព្រមទាំងបានលើកកិត្យានុភាពជាតិឱ្យមានភាពល្បីល្បាញថែមទៀតផង។ សម្រាប់រូបនាងខ្ញុំបានលើកកិត្យានុភាពជាតិទាំងពីរ ជាតិកំណើត និងជាតិស្នាក់អាស្រ័យ»៕

អត្ថបទ៖ វីរបុត្រ

The post អបអរសាទរ! ស្រួង ភាវី ត្រូវបានរដ្ឋាភិបាលកូរ៉េផ្តល់ពានរង្វាន់មួយដ៏ថ្លៃថ្លា appeared first on Kampuchea Thmey Daily.

កីឡាស្នូកឃ័រ Archives - Kampuchea Thmey Daily

លោក​ នាង​ តុលា​ ការ​ខ្វះ​អ្នក​ឧបត្ថម្ភ​ទើប​ធ្វើ​ឲ្យ​វិស័យ​កីឡា​ស្នូកឃ័រ​ស្ងប់ស្ងាត់​

អតីតជើងខ្លាំងផ្នែកស្នូកឃ័រ នាង តុលា ស្វាគមន៍អ្នកចង់សាកល្បងសមត្ថភាព ឬហ្វឹកហាត់

កីឡាករ​ នាង​ តុលា​ ជំនាន់​លោក​ល្បីខ្លាំង​ជាប់​លេខ១​ រយៈពេល​​ ១០ឆ្នាំ​

ស្រួង ភាវី ឈ្នះ​ជើង​ឯក LPBA ឆ្នាំ ២០២៥-២៦ មាន​បេក្ខនារី ១២៨​នាក់ អម​ដោយ​ប្រាក់​រង្វាន់ជិត ៣​ម៉ឺន​ដុល្លារ​

ម្ចាស់​មេដាយមាស​ស៊ីហ្គេម ម៉ែន សុផានិត ក្លាយ​ជា BA ក្លិប Lux98 Billiard មាន​សម្ភារៈហ្វឹកហាត់ទំនើប

ស្វែង​យល់​ជើងឯកពិភពលោក LPBA ស្រួង ភាវី ឈ្នះលើកទី៧ម្សិលមិញ

អបអរសាទរ! ស្រួង ភាវី ត្រូវបានរដ្ឋាភិបាលកូរ៉េផ្តល់ពានរង្វាន់មួយដ៏ថ្លៃថ្លា

លោក នាង តុលា ការខ្វះអ្នកឧបត្ថម្ភទើបធ្វើឲ្យវិស័យកីឡាស្នូកឃ័រស្ងប់ស្ងាត់

កីឡាករ នាង តុលា ជំនាន់លោកល្បីខ្លាំងជាប់លេខ១ រយៈពេល ១០ឆ្នាំ

ស្រួង ភាវី ឈ្នះជើងឯក LPBA ឆ្នាំ ២០២៥-២៦ មានបេក្ខនារី ១២៨នាក់ អមដោយប្រាក់រង្វាន់ជិត ៣ម៉ឺនដុល្លារ

ម្ចាស់មេដាយមាសស៊ីហ្គេម ម៉ែន សុផានិត ក្លាយជា BA ក្លិប Lux98 Billiard មានសម្ភារៈហ្វឹកហាត់ទំនើប

ស្វែងយល់ជើងឯកពិភពលោក LPBA ស្រួង ភាវី ឈ្នះលើកទី៧ម្សិលមិញ