កីឡាហែលទឹក Archives - Kampuchea Thmey Daily

ហែមថុន វិទិនី៖ អាងទឹកខេត្តបាត់ដំបងអាចហាត់បែបអាជីពក៏បានចូលហែលលេងក៏បានតម្លៃ ១ម៉ឺនរៀលប៉ុណ្ណោះ

Sina Noun — Tue, 26 May 2026 04:29:16 +0000

គ្រូបង្វឹកកីឡាហែលទឹក កញ្ញា ហែមថុន វិទិនី ប្រកាសដល់សាធារណៈជនពិសេសអ្នកខេត្តបាត់ដំបង ឬអាណាព្យាបាលដែលមានបំណងចង់ឲ្យកូនៗក្លាយជាកីឡាករហែលទឹកអាជីពអាចចូលហ្វឹកហាត់នៅអាងទឹកក្នុងសកលវិទ្យាល័យបាត់ខេត្តដំបងបាន ខណៈអ្នកចង់ចូលហែលកម្សាន្តក៏បានដូចគ្នាតម្លៃ ១ម៉ឺនរៀលប៉ុណ្ណោះ។

គ្រូហែលទឹក ហែមថុន វិទិនី

កញ្ញា ហែមថុន វិទិនី គ្រូបង្វឹកហែលទឹកជម្រើសជាតិបានលើកឡើងថា អាងទឹកក្នុងសកលវិទ្យាល័យខេត្តបាត់ដំបងជាអាងទឹកបែបស្ដង់ដាអន្តរជាតិ និងមានទេសភាពព័ន្ធជុំវិញយ៉ាងស្រស់ស្អាតដែលអំណោយផលដល់អ្នកមកហែលលេងតែម្ដង។

គ្រូបង្វឹកដែលមានបទពិសោធជោកជាំខាងលើនេះបន្ថែមទៀតថា អាងទឹកនេះក៏បើកបង្រៀនដល់សិស្សផងដែរដែលមានបំណងចង់ហ្វឹកហាត់តាមបែបស្ដង់ដា។ ដូច្នេះប្រសិនបើអាណាព្យាបាលដែលចង់ឲ្យកូនៗក្លាយជាកីឡាករអាជីពនៅថ្ងៃខាងមុខ និងចង់ឲ្យកូនក្លាយជាកីឡាករតំណាងខេត្តបាត់ដំបង តំណាងឲ្យប្រទេសកម្ពុជា អាចទំនាក់ទំនងមកកាន់កញ្ញាផ្ទាល់ដើម្បីហ្វឹកហាត់ក៏បាន ឬទៅកាន់ទីតាំងអាងទឹកផ្ទាល់ក៏បានដើម្បីសាកសួរព័ត៌មាន។

អាងទឹកនៅខេត្តបាត់ដំបង

ចំពោះអ្នកដែលចង់ទៅហ្វឹកហាត់លេងមួយពេលៗ ឬហែលកម្សាន្តសប្បាយនោះក៏អាចចូលបានដែរដោយគ្រាន់តែទិញសំបុត្រ ១ម៉ឺនរៀលសម្រាប់មនុស្សពេញវ័យ និង ៦,០០០រៀលសម្រាប់ក្មេងៗតែប៉ុណ្ណោះ។ បញ្ជាក់ដែរថា អាងទឹកនៅឯខេត្តបាត់ដំបងនេះគឺស្ថិតនៅក្នុងទីតាំងសកលវិទ្យាល័យខេត្តបាត់ដំបងតែម្ដង។ អាងទឹកនេះផងដែរមានអាងសម្រាប់ហែលធំ-តូច ចំនួន ២ និងអាងសម្រាប់លោតទឹកចំនួន ១៕

គ្រូហែលទឹក ហែមថុន វិទិនី

អត្ថបទដោយ៖ នួន ស៊ីណា

The post ហែមថុន វិទិនី៖ អាងទឹកខេត្តបាត់ដំបងអាចហាត់បែបអាជីពក៏បានចូលហែលលេងក៏បានតម្លៃ ១ម៉ឺនរៀលប៉ុណ្ណោះ appeared first on Kampuchea Thmey Daily.

កីឡាករ លឹម នរវិទូ ឈ្នះមេដាយ ៥គ្រឿងម្នាក់ឯងក្នុងចំណោម ១៦គ្រឿងដែលកម្ពុជាឈ្នះនៅម៉ាឡេស៊ី

Sina Noun — Mon, 25 May 2026 07:43:36 +0000

កីឡាករយុវជនជម្រើសជាតិ លឹម នរវិទូ ពិតជាមានសមត្ថភាពមិនធម្មតាមែន ពោលម្នាក់ឯឈ្នះមេដាយ ៥គ្រឿងក្នុងចំណោមមេដាយសរុប ១៦គ្រឿងដែលកម្ពុជាចូលរួមការប្រកួតកីឡាហែលទឹកពាក់ជើងទានៅប្រទេសម៉ាឡេស៊ី (The 2nd International Bunga Raya Children & Junior Finswimming Competition -Leg1 2026) ។

កីឡាករ លឹម នរវិទូ

លោក ហែមថុន ពន្លឺ គ្រូបង្វឹកជម្រើសជាតិផ្នែកកីឡាហែលទឹកពាក់ជើងទា បានឲ្យដឹងថា ក្នុងចំណោមមេដាយសរុបទាំង ១៦គ្រឿងមានមាស១៥ និងប្រាក់ ១គ្រឿងនេះគឺកីឡាករ លឹម នរវិទូ ឈ្នះមេដាយច្រើនគ្រឿងជាងគេបង្អស់។ មេដាយដែលរូបគេឈ្នះនោះគឺមានមេដាយមាស៤ និងប្រាក់ ១គ្រឿង។ រូបគេលេងលើវិញ្ញាសា 50m AP & 50m Bi-Fins & 50m, 100m Surface (មេដាយមាស) និងមេដាយប្រាក់ ១គ្រឿង លើវិញ្ញាសា 100m Bi-Fins (ឯកត្តជន) និងវិញ្ញាសា 4x50m Mixed SB Relay (ជាក្រុមមេដាយមាស)។

កីឡាករ លឹម នរវិទូ

បញ្ជាក់ដែរថា លទ្ធផលមេដាយសរុប ១៦គ្រឿងដែលក្រុមយុវជនជម្រើសជាតិហែលទឹកពាក់ជើងទាកម្ពុជាឈ្នះនេះគឺនៅក្នុងព្រឹត្តិការណ៍ The 2nd International Bunga Raya Children & Junior Finswimming Competition -Leg1 2026 នៅប្រទេសម៉ាឡេស៊ី។ ការប្រកួតនេះធ្វើឡើងកាលពីថ្ងៃទី២៣ ខែឧសភា ឆ្នាំ២០២៦។ កម្ពុជាបានបញ្ជូនគ្រូបង្វឹក កីឡាករ កីឡាការិនីសរុប ៦រូបចូលរួមប្រកួតប្រជែងមេដាយជូនជាតិមាតុភូមិ៕

ក្រុមយុវជនជម្រើសជាតិហែលទឹកពាក់ជើងទា

អត្ថបទដោយ៖ នួន ស៊ីណា

The post កីឡាករ លឹម នរវិទូ ឈ្នះមេដាយ ៥គ្រឿងម្នាក់ឯងក្នុងចំណោម ១៦គ្រឿងដែលកម្ពុជាឈ្នះនៅម៉ាឡេស៊ី appeared first on Kampuchea Thmey Daily.

លោក ហែម គីរី ចង់ឲ្យមានកម្មវិធីប្រកួតសម្រាប់កុមារៗបែបនេះឲ្យបានច្រើនទៀត

Sina Noun — Mon, 11 May 2026 01:54:20 +0000

លោក ហែម គីរី អគ្គលេខាធិការសហព័ន្ធខ្មែរកីឡាហែលទឹក ថាលោកចង់ឲ្យមានការប្រកួតសម្រាប់កុមារតូចៗបែបនេះឲ្យបានច្រើនថែមទៀត ព្រោះជាការបណ្ដុះមូលដ្ឋានផ្នែកកីឡានេះល្អណាស់ និងជាការរួមចំណែកបង្កើនធនធានកីឡាករ កីឡាការិនីនៅថ្ងៃអនាគត។

ទិដ្ឋភាពប្រកួត

អគ្គលេខាធិការលោក ហែម គីរី បានឲ្យដឹងថា នេះជាលើកទី៣ ហើយដែលកីឡាហែលទឹកត្រូវបានដាក់បញ្ចូលក្នុងកម្មវិធីប្រកួតកីឡាសិស្សបឋមសិក្សាថ្នាក់ជាតិ។ ការរៀបចំពីមួយឆ្នាំទៅមួយឆ្នាំចំនួនកីឡាករ កីឡាការិនីដែលជាកុមារៗចូលរួមកាន់តែច្រើនឡើងៗ។

ទិដ្ឋភាពប្រកួត

ក្នុងនាមសហព័ន្ធចង់ឲ្យមានការប្រកួតបែបកុមារនេះឲ្យបានច្រើនថែមទៀត ព្រោះការប្រកួតនេះបណ្ដុះនូវមូលដ្ឋានគ្រឹះដល់ពួកគេ។ កីឡាហែលទឹកនេះត្រូវការបណ្ដុះបណ្ដាលរយៈពេលវែង និងត្រូវការបំផុតអ្នកដែលមានមូលដ្ឋានពីវ័យក្មេងៗទើបឈានទៅរកការហ្វឹកហាត់ស្ដង់ដាពីមួយកម្រិតទៅមួយកម្រិតទៀតបាន។

ទិដ្ឋភាពប្រកួត

បញ្ជាក់ដែរថា សហព័ន្ធខ្មែរកីឡាហែលទឹកបានបិទបញ្ចប់ការប្រកួតរបស់ខ្លួនដោយរលូន និងជោគជ័យកាលពីថ្ងៃទី៨ ខែឧសភា ឆ្នាំ២០២៦ ក្នុងព្រឹត្តិការណ៍កីឡាសិស្សបឋមសិក្សាថ្នាក់ជាតិ។ ចំណាត់ថ្នាក់លេខ១ បានលើខេត្តព្រៃវែង ឈ្នះមេដាយសរុប ៦គ្រឿង មាស២ ប្រាក់៣ សំរឹទ្ធ១។ លេខ២ បានលើរាជធានីភ្នំពេញ ឈ្នះមេដាយសរុប ៤គ្រឿង មាស២ ប្រាក់២។ លេខ៣ បានលើខេត្តកណ្ដាល ឈ្នះមេដាយសរុប ៣គ្រឿង មាស២ សំរឹទ្ធ១៕

ទិដ្ឋភាពប្រកួត

អត្ថបទដោយ៖ នួន ស៊ីណា

The post លោក ហែម គីរី ចង់ឲ្យមានកម្មវិធីប្រកួតសម្រាប់កុមារៗបែបនេះឲ្យបានច្រើនទៀត appeared first on Kampuchea Thmey Daily.

សហព័ន្ធខ្មែរកីឡាហែលទឹក ប្រកាសទទួលការចុះឈ្មោះចូលរួមការប្រកួតវ័យចាស់ឆ្នាំ ២០២៦ ចាប់ពីពេលនេះតទៅ

Sina Noun — Thu, 09 Apr 2026 02:37:38 +0000

សហព័ន្ធខ្មែរកីឡាហែលទឹក បានប្រកាសដល់សាធារណៈជន និងកីឡាករ អំពីព័ត៌មានលំអិតផ្សេងៗពីការប្រកួតហែលទឹកវ័យចាស់ដែលនឹងធ្វើឡើងនៅថ្ងៃទី២ ខែឧសភា ឆ្នាំ២០២៦ នៅអាងទឹកក្នុងពហុកីឡដ្ឋានជាតិ និងចាប់ទទួលពាក្យពីពេលនេះតទៅ។

វិញ្ញាសាប្រកួត

នេះបើតាមសេចក្ដីប្រកាសរបស់លើហ្វេសបុកផេកសហព័ន្ធខ្មែរកីឡាហែលទឹក បានបញ្ជាក់ថា ការប្រកួតហែលទឹកវ័យចាស់នៅឆ្នាំនេះនឹងចាប់ផ្ដើមនៅថ្ងៃទី២ ខែឧសភា ឆ្នាំ២០២៦ ខាងមុខនេះហើយ។ អ្នកដែលមានបំណងចង់ចូលរួមការប្រកួតនេះសូមពិនិត្យកម្រិតអាយុ និងវិញ្ញាសាប្រកួតនៅលើ Poster ដែលសហព័ន្ធបានផ្សព្វផ្សាយនេះ។

រូបភាពសហព័ន្ធ

សាធារណៈជន កីឡាករ ទាំងអស់ដែលចង់ចុះឈ្មោះចូលរួមការប្រកួតនេះអាចទំនាក់ទំនងទៅកាន់ហ្វេសបុកផេកសហព័ន្ធ ឬអញ្ជើញទៅទីតាំងសហព័ន្ធផ្ទាល់បាន។ អ្នកចុះឈ្មោះនឹងទទួលបាន អាវ១ និងលិខិតបញ្ជាក់ការចូលរួមមួយប្រកួតផងដែរ។ ការប្រកួតនេះមាន ៨កម្រិតអាយុគឺ ២៥-២៩, ៣០-៣៤, ៣៥-៣៩, ៤០-៤៤, ៤៥-៤៩, ៥០-៥៤, ៥៥-៥៩, និងអាយុ ៦០ឡើង៕

អត្ថបទដោយ៖ នួន ស៊ីណា

The post សហព័ន្ធខ្មែរកីឡាហែលទឹក ប្រកាសទទួលការចុះឈ្មោះចូលរួមការប្រកួតវ័យចាស់ឆ្នាំ ២០២៦ ចាប់ពីពេលនេះតទៅ appeared first on Kampuchea Thmey Daily.

គ្រូបង្វឹកហែលទឹក ហែមថុន វិទិនី នឹងចូលរួមបរិច្ឆាគឈាមជាមួយសមាគមសប្បុរសធម៌មេត្តាសង្គ្រោះជីវិតកុមារ

Sina Noun — Wed, 08 Apr 2026 02:09:36 +0000

គ្រូបង្វឹកកីឡាហែលទឹកកម្ពុជា កញ្ញា ហែមថុន វិទិនី នៅព្រឹកនេះនឹងចូលរួមបរិច្ឆាគឈាមជាមួយសមាគមស្បុរសធម៌មេត្តា នៅឯផ្សារទំនើបអូឡាំព្យា ដើម្បីទុកសម្រាប់ជួយសង្គ្រោះជីវិតប្រជាពលរដ្ឋដែលត្រូវការចាំបាច់ និងជួយដល់កុមារផងដែរ។

កញ្ញា ហែនថុន វិទិនី

កញ្ញា ហែនថុន វិទិនី គ្រូបង្វឹកហែលទឹកជម្រើសជាតិកម្ពុជា បានលើកឡើងថា ឈាមគឺពិតជាមានសារសំខាន់ចំពោះមនុស្សគ្រប់គ្នាមិនថាជាកីឡាករ កីឡាការិនីនោះឡើយ។ ប្រសិនបើនរណាម្នាក់មិនមានឈាមគ្រប់គ្រាន់នោះទេអាចនឹងប្រឈមជាមួយគ្រោះថ្នាក់ផ្សេងៗផងដែរ។

នៅព្រឹកថ្ងៃទី៨ នេះកញ្ញានឹងចូលរួមជាមួយសមាគមសប្បុរសធម៌មេត្តាដើម្បីបរិច្ឆាគឈាមទុកជួយសង្គ្រោះដល់អាយុវជីវិតប្រជាពលរដ្ឋដែលត្រូវការចាំបាច់ និងសម្រាប់ជួយសង្គ្រោះជីវិតកុមារតូចៗ។ គ្រូបង្វឹករូបនេះអំពាវនាវដល់សាធារណៈជនឲ្យចូលរួមក្នុងព្រឹត្តិការណ៍បរិច្ឆាគឈាមនៅថ្ងៃនេះទាំងអស់គ្នា។

កម្មវិធីបរិច្ឆាគ និង QR បំពេញព័ត៌មាន

បញ្ជាក់ដែរថា កម្មវិធីបរិច្ឆាគឈាមដែលរៀបចំដោយសមាគមសប្បុរសធម៌មេត្តានេះធ្វើឡើងជាលើកទី៥ ហើយនៅថ្ងៃទី៨ ខែមេសា ឆ្នាំ២០២៦ ។ ទីតាំងបរិច្ឆាគឈាមនេះគឺកំពុងធ្វើឡើងនៅឯផ្សារទំនើបអូឡាំព្យា ជាប់ពហុកីឡដ្ឋានជាតិ។ សូមចូលរួមបរិច្ឆាគឈាមទាំងអស់គ្នាដើម្បីជួយសង្គ្រោះជីវិតកុមារកម្ពុជា។ កាន់តែមានភាពងាយស្រួលក្នុងការបរិច្ឆាគឈាមនៅក្នុងកម្មវិធីនេះលោកអ្នកអាចស្កេន QR Code ខាងក្រោមខាងលើបានដើម្បីបំពេញព័ត៌មានផ្សេងៗ។ កម្មវិធីនេះធ្វើឡើងចាប់ពីម៉ោង ៩ព្រឹក ដល់ ៤ល្ងាចតទៅ៕

អត្ថបទដោយ៖ នួន ស៊ីណា

The post គ្រូបង្វឹកហែលទឹក ហែមថុន វិទិនី នឹងចូលរួមបរិច្ឆាគឈាមជាមួយសមាគមសប្បុរសធម៌មេត្តាសង្គ្រោះជីវិតកុមារ appeared first on Kampuchea Thmey Daily.

មកដឹងពីទីតាំងអាងហែលទឹកធំៗ ៤របស់សហព័ន្ធដែលបម្រើដល់ការបណ្ដុះធនធាននៅទូទាំងប្រទេស

Sina Noun — Wed, 11 Mar 2026 08:57:55 +0000

សហព័ន្ធខ្មែរកីឡាហែលទឹកចាត់ចូលជាសហព័ន្ធមួយមានភាពរីកចម្រើនខ្លាំងទាំងហេដ្ឋារចនាសម្ព័ន្ធ រួមទាំងការបណ្ដុះធនធានបានច្រើននាពេលកន្លងមក។ បច្ចុប្បន្ននេះមហាជនទាំងតូច-ធំ ចូលចិត្តហែលទឹកកម្សាន្ត និងហ្វឹកហាត់ច្រើនពិសេសនៅរាជធានីភ្នំពេញ។

ឥឡូវនេះយើងស្គាល់អាងហែលទឹកធំៗទាំង ៤របស់សហព័ន្ធខ្មែរកីឡាហែលទឹកដែលបម្រើដល់ការមហាជនហែលកម្សាន្តផង និងហ្វឹកហាត់បែបស្ដង់ដាផង។

អាងហែលទឹកនៅភ្នំពេញ

ទី១ ហែលទឹកនៅក្នុងពហុកីឡដ្ឋានជាតិ៖ អាងមួយនេះមានជាយូរណាស់មកហើយ ប៉ុន្តែត្រូវបានជួសជុលឡើងវិញតាមបែបស្ដង់ដាអន្តរជាតិនាពេលបច្ចុប្បន្ន និងបានបន្ថែមខ្សែបន្ទាត់ បំពាក់នូវឧបករណ៍ថែទាំទឹក និងសម្ភារយ៉ាងទំនើបៗជាច្រើនទៀត។ អាងទឹកនេះបើកទទួលសាធារណៈជនចូលហែលលេងកម្សាន្ត និងហាត់រៀនផងដែរទៅតាមពេលវេលាកំណត់របស់សហព័ន្ធ។

អាងហែលទឹកនៅកំពង់ចាម

ទី២ មណ្ឌលកីឡាហែលទឹកតេជោសែន៖ អាងហែលទឹកមួយនេះគឺស្ថិតនៅឯខេត្តកំពង់ចាម និងបានសាងសង់ឡើងអស់ប្រមាណ ២លានដុល្លារអាមេរិក និងបានសម្ពោធឲ្យប្រើប្រាស់ជាផ្លូវការអំឡុងចុងឆ្នាំ២០១៥។ ទីនោះក៏បើកឲ្យសាធារណៈជនចូលហែលលេងកម្សាន្តផងដែរ។ ក្រៅពីនោះក៏មានបង្ហាត់បង្រៀនបណ្ដុះធនធានដល់យុវជនជាច្រើននាពេលកន្លងមក។

អាងហែលទឹកនៅបាត់ដំបង

ទី៣ មណ្ឌលហែលទឹកបាត់ដំបង៖ អាងហែលទឹកមួយនេះគឺស្ថិតនៅក្នុងសកលវិទ្យាល័យបាត់ដំបង និងបានសាងសង់ឡើងអស់តម្លៃប្រហែល ២លានដុល្លារអាមេរិក និងបានសម្ពោធឲ្យប្រើប្រាស់អំឡុងឆ្នាំ២០២២។ អាងទឹកមួយនេះស្អាត និងធំទូលាយ។ សាធារណៈជនក៏អាចចូលហែងលេងកម្សាន្តបានផងដែរ និងអាចចូលហ្វឹកហាត់តាមបែបស្ដង់ជាកីឡាករអាជីពដូចគ្នា។

អាងហែលទឹកនៅកោះធំ

ទី៤ អាងហែលទឹកស្រុកកោះធំ៖ អាងទឹកនៅស្រុកកោះធំ ខេត្តកណ្ដាលមួយនេះអាចចាត់ទុកជាអាងកូនពៅ ព្រោះជាសមិទ្ធផលចុងក្រោយរបស់សហព័ន្ធដែលបានសាងសង់រួច និងសម្ពោធឲ្យប្រើប្រាស់នៅចុងក្រោយគេ។ អាងនេះធ្វើពិធីសម្ពោធអំឡុងខែកុម្ភៈ ឆ្នាំ២០២៦ ថ្មីៗនេះនោះទេ។ កន្លែងហែលទឹកនេះក៏បានដាក់ឲ្យសាធារណៈជនបានចូលហែលលេងកម្សាន្តដូចគ្នា។ ជាមួយគ្នានេះដែរក៏ជាអាងមួយដែលបណ្ដុះធនធានយុវជនឲ្យមានសមត្ថភាពចេញពីខេត្តកណ្ដាលនេះផងដែរ។

អាងហែលទឹកនៅមរតកតេជោ

មែនទែនទៅអាងហែលទឹកធំៗនៅកម្ពុជាគឺមានមួយទៀតនៅក្នុង ពហុកីឡដ្ឋាមមរតកតេជោ ខណ្ឌព្រែកព្នៅ រាជធានីភ្នំពេញ។ ប៉ុន្តែអាងមួយនេះមិនស្ថិតក្រោមការគ្រប់គ្រងរបស់សហព័ន្ធខ្មែរកីឡាហែលទឹកនោះឡើយ។ អាងទឹកនេះត្រូវបានគេដឹងថាក៏បើកឲ្យសាធារណៈជនចូលហែលលេងផងដែរទៅតាមពេលវេលាលក់សំបុត្ររបស់ផ្នែកគ្រប់គ្រងនៅទីនោះ។ ដូច្នេះសរុបអាងហែលទឹកធំៗនៅកម្ពុជាគឺមាន ៤ទីតាំងក្រោមការគ្រប់គ្រងរបស់សហព័ន្ធខ្មែរកីឡាហែលទឹក និង ១ ទីតាំងក្នុងពហុកីឡដ្ឋានមរតកតេជោ ដែលគេដឹងថាគ្រប់គ្រងដោយក្រសួងសេដ្ឋកិច្ច និងហិរញ្ញវត្ថុ៕

អាងហែលទឹកនៅមរតកតេជោ

អត្ថបទដោយ៖ នួន ស៊ីណា

The post មកដឹងពីទីតាំងអាងហែលទឹកធំៗ ៤របស់សហព័ន្ធដែលបម្រើដល់ការបណ្ដុះធនធាននៅទូទាំងប្រទេស appeared first on Kampuchea Thmey Daily.

អបអរសារទរ សហព័ន្ធខ្មែរកីឡាហែលទឹកទទួលបានការឧបត្ថម្ភជាឈុតកីឡារយៈពេល ២ឆ្នាំពី CHN Sports

Sina Noun — Fri, 27 Feb 2026 10:12:54 +0000

សហព័ន្ធខ្មែរកីឡាហែលទឹក ទទួលបានឧបត្ថម្ភគាំទ្រពីក្រុមហ៊ុនចិន CHN Sports រយៈពេល ២ឆ្នាំដើម្បីចូលរួមអភិវឌ្ឍន៍កីឡាមួយនេះឲ្យកាន់តែរីកចម្រើន និងជួយសម្រាលថវិកាលើការចំណាយចំពោះឯកសណ្ឋាន និងសម្ភារមុនចេញទៅប្រកួតផ្សេងៗ។

លោក ហែម គីរី និងតំណាង CHN Sports

លោក ហែម គីរី អគ្គលេខាធិការសហព័ន្ធបានប្រាប់ឲ្យដឹងថា សហព័ន្ធខ្មែរកីឡាហែលទឹកពិតជាមានកិត្តិយសដែលបានចុះអនុស្សារណៈ(MOU)ជាមួយ CHN Sports ដែលជាក្រុមហ៊ុនលក់សម្ភារកីឡាម៉ាក Peak ដ៏ធំរបស់ប្រទេសចិនលើពិភពលោក។ គោលបំណងទី១ របស់សហព័ន្ធគឺចង់មានដៃគូសហការច្បាស់លាស់មួយដែលបានផ្តល់នូវឯកសណ្ឋាន និងសម្ភារកីឡាស្តង់ដារ។ ទី២ ចង់បង្ហាញអំពីការខិតខំប្រឹងប្រែងរបស់សហព័ន្ធ និងក្រុមហ៊ុនបានចូលរួមជួយវិស័យកីឡាហែលទឹកក្នុងប្រទេសកម្ពុជា។

លោក ហែម គីរី និងតំណាង CHN Sports

អគ្គលេខាធិការខាងលើបន្ថែមទៀតថា សហព័ន្ធចង់សហការ និងជំរុញម៉ាកយីហោ Peak នេះឲ្យមានការរីកចម្រើនយ៉ាងខ្លាំងក្នុងប្រទេសកម្ពុជា។ ចាប់ពីពេលនេះក្រុមជម្រើសជាតិ និងក្រុមកីឡាករ-កីឡាការិនីរបស់សហព័ន្ធខ្មែរកីឡាហែលទឹកមានឯកសណ្ឋានដ៏ស្រស់ស្អាតក្នុងការចូលរួមការប្រកួតកម្រិតជាតិ និងអន្តរជាតិ។ តាមរយៈការឧបត្ថម្ភនេះជាការចូលរួមចំណែកដ៏សំខាន់ជួយដល់សហព័ន្ធខ្មែរកីឡាហែលទឹកមិនត្រូវការចំណាយលើឯកសណ្ឋាន និងសម្ភារទៀតទេ។ ការគាំទ្រ និងឧបត្ថម្ភរបស់ក្រុមហ៊ុនបានលើទឹកចិត្តដល់ក្រុមកីឡាករ-កីឡាការិនីដើម្បីត្រៀមចូលរួមប្រកួតអន្តរជាតិនានា។

ក្រុមគ្រូបង្វឹក កីឡាករ កីឡាការិនីហែលទឹក

ចំណែកលោក Liu Ru Bing តំណាងក្រុមហ៊ុន CHN Sports បានលើកឡើងថា ក្រុមហ៊ុនបានបើកដំណើរការតាំងពីឆ្នាំ២០១៨ មកម្ល៉េះ។ នេះជាជំហានជំបូងដែលលោកបានធ្វើអាជីវកម្មក្នុងប្រទេសកម្ពុជា។ លោកស្រលាញ់ចូលចិត្តប្រជាជនខ្មែរ និងចង់ចូលរួមជួយអភិឌ្ឍន៍ការវិស័យកីឡានៅកម្ពុជាទើបធ្វើឲ្យរូបលោកចាប់ដៃគូជាមួយសហព័ន្ធខ្មែរកីឡាហែលទឹកតែម្តងទៅ។

លោកសង្ឈឹមថា កីឡាករ-កីឡាការិនីហែលទឹកកម្ពុជានឹងកាន់តែបង្កើននូវសមត្ថភាពខ្លួនឯង និងទទួលបានលទ្ធផលកាន់ខ្ពស់រហូតដល់ដណ្តើមបានមេដាយបន្ថែមទៀត។ លោកនឹងខិតខំប្រឹងប្រែងជួយឧបត្ថម្ភគាំទ្រនូវផ្នែកផ្សេងៗទៀតប្រសិនអាចធ្វើទៅបាន។

ទិដ្ឋភាពក្រុមកីឡាហែលទឹកដើរមើលក្នុងហាង

បញ្ជាក់ដែរថា កាលពីថ្ងៃទី២៦ ខែកុម្ភៈ ឆ្នាំ២០២៦ នេះសហព័ន្ធខ្មែរកីឡាហែលទឹក និង CHN Sports ចុះអនុស្សារណៈ(MOU)លើការឧបត្ថម្ភគាំទ្ររយៈពេល ២ឆ្នាំជាឈុតសំលៀកបំពាក់សរុប ៤០០ឈុតដើម្បីជួយសម្រួលដល់ការចេញទៅប្រកួតផ្សេងៗទាំងនៅក្នុងស្រុក និងអន្តរជាតិ៕

ទិដ្ឋភាពក្រុមកីឡាហែលទឹកដើរមើលក្នុងហាង

អត្ថបទដោយ៖ នួន ស៊ីណា

The post អបអរសារទរ សហព័ន្ធខ្មែរកីឡាហែលទឹកទទួលបានការឧបត្ថម្ភជាឈុតកីឡារយៈពេល ២ឆ្នាំពី CHN Sports appeared first on Kampuchea Thmey Daily.

លោកហែម គីរី សុំអ្នកគាំទ្រអធ្យាស្រ័យកីឡាករ សុវណ្ណអារុន ខណៈគេនៅក្មេង អនាគតវែងឆ្ងាយ

Kosal Sem — Sat, 13 Dec 2025 08:45:29 +0000

លោកហែម គិរី អគ្គលេខាធិការសហព័ន្ធកីឡាហែលទឹក កម្ពុជា បានស្នើសុំការអធ្យាស្រ័យពីសំណាក់អ្នកគាំទ្រ កម្ពុជា ចំពោះកំហុសឆ្គងរបស់កីឡាករហែលទឹក កម្ពុជា វ័យក្មេង មនត្រស ផានសុវណ្ណអារុន។

លោកហែម គិរី

កីឡាករហែលទឹក មនត្រស ផានសុវណ្ណអារុន បានរងការរិះគន់យ៉ាងខ្លាំងពីសំណាក់អ្នកគាំទ្រ ក៏ដូចជាប្រជាជន កម្ពុជា ទាំងមូល បន្ទាប់ពីរូបគេបង្ហោះសារ ដោយអារម្មណ៍ខកចិត្ត ដែលមិនបានចូលរួមប្រកួតក្នុងព្រឹត្តិការណ៍កីឡាស៊ីហ្គេមលើកទី ៣៣ នៅ ថៃ ក្រោយ កម្ពុជា ប្រកាសដកខ្លួនចេញ ដោយសារបារម្ភអំពីសុខសុវត្ថិភាព។

កីឡាករ មនត្រស ផានសុវណ្ណអារុន (Cr. សហព័ន្ធកីឡាហែលទឹក កម្ពុជា)

ផានសុវណ្ណអារុន បានបង្ហោះសារនៅលើបណ្តាញសង្គម IG របស់ខ្លួនដូច្នេះ ថា៖ «ខ្ញុំមកក្នុងព្រឹត្តិការណ៍ទាំងនេះ ដើម្បីប្រកួតប្រជែង ហើយនិងជួបគ្រូបង្វឹកចាស់របស់ខ្ញុំ និងមិត្តភក្តិរបស់ខ្ញុំ។ ប៉ុន្តែជាអកុសល ខ្ញុំមិនទទួលបានឱកាសនេះនោះទេ។ ទោះបីជាយ៉ាងណា គ្រប់យ៉ាងបានកើតឡើងរួចទៅហើយ។ ខ្ញុំចង់អរគុណទៅកាន់អ្នកស្មគ្រចិត្ត និងបុគ្គលិករបស់ ថៃ ទាំងអស់គ្នា សម្រាប់ការរាក់ទាក់ និងធានាសុវត្ថិភាពជូនពួកយើង»។

សំណេររបស់កីឡាករ មនត្រស ផានសុវណ្ណអារុន

លោកហែម គិរី អគ្គលេខាធិការសហព័ន្ធកីឡាហែលទឹក កម្ពុជា បានចេញមុខសូមទោសជំនួសកីឡាករហែលទឹកវ័យ ២២ ឆ្នាំខាងលើ ក្រោយសំណេររបស់គេ បានរងការរិះគន់ខ្លាំងពីសំណាក់ប្រជាជន កម្ពុជា។ លោកបានទទូចឱ្យអ្នកគាំទ្រយោគយល់អធ្យាស្រ័យចំពោះកីឡាកររូបនេះ ព្រោះនេះជាកំហុសដោយអចេតនា ហើយកីឡាករកំពុងស្ថិតក្នុងវ័យក្មេង ដោយរូបគេនៅមានអនាគតវែងឆ្ងាយទៀត ដើម្បីតំណាងឱ្យ កម្ពុជា។ យ៉ាងណា លោកក៏បានបញ្ជាក់ផងដែរ ថាលោកជាចាស់ទុំបានណែនាំកីឡាកររួចហើយ ដើម្បីកុំឱ្យមានកំហុសឆ្គងលើកក្រោយទៀត។

ជុំវិញរឿងខាងលើ លោក ហែម គិរី បានសរសេរនៅលើបណ្តាញសង្គម Facebook ថា៖ «ខ្ញុំសូមអធ្យាស្រ័យជំនួសក្មេងៗដែលមានកំហុសឆ្គងដោយអចេតនា ពួកគាត់ពិតជាមិនចង់អោយមានបញ្ហាកើតឡើងបែបនេះទេ គ្នានៅក្មេងៗណាស់អនាគតវែងឆ្ងាយ សូមចិត្តបងប្អូនបន្ធូបន្ថយអោយគ្នាផង ក្នុងនាមជាចាស់ទុំបានណែនាំពួកគាត់ហើយដើម្បីកុំអោយមានការខុសឆ្គងបន្តទៀត ពេលនេះប្រជាជនយើងកំពុងតែពិបាកណាស់ទៅហើយយើងត្រូវសាមគ្គីគ្នា ខ្មែរជួយគ្នា សង្ឃឹមបងប្អូនខ្មែរយោគយល់»៕

សំណេររបស់លោកហែម គិរី

អត្ថបទ៖ សេម កុសល

The post លោកហែម គីរី សុំអ្នកគាំទ្រអធ្យាស្រ័យកីឡាករ សុវណ្ណអារុន ខណៈគេនៅក្មេង អនាគតវែងឆ្ងាយ appeared first on Kampuchea Thmey Daily.

កីឡាហែលទឹក Archives - Kampuchea Thmey Daily

កីឡាករ លឹម នរវិទូ ឈ្នះ​មេដាយ​ ៥គ្រឿង​ម្នាក់​ឯង​ក្នុងចំណោម​​ ១៦​គ្រឿង​ដែល​កម្ពុជា​ឈ្នះ​នៅ​ម៉ាឡេស៊ី​

លោក​ ហែម​ គីរី​ ចង់​ឲ្យ​មាន​កម្មវិធី​ប្រកួត​សម្រាប់​កុមារ​ៗ​បែប​នេះ​ឲ្យ​បាន​ច្រើនទៀត

មក​ដឹង​ពី​ទីតាំងអាង​ហែលទឹក​ធំៗ ៤​របស់​សហព័ន្ធ​ដែល​បម្រើ​ដល់​ការ​បណ្ដុះ​ធនធាន​នៅ​ទូទាំង​ប្រទេស​

អបអរសារទរ​ សហព័ន្ធ​ខ្មែរ​កីឡា​ហែលទឹក​ទទួល​បាន​ការ​ឧបត្ថម្ភ​ជា​ឈុត​កីឡា​រយៈពេល​ ២ឆ្នាំ​ពី​ CHN Sports

លោកហែម គីរី សុំអ្នកគាំទ្រអធ្យាស្រ័យកីឡាករ សុវណ្ណអារុន ខណៈគេនៅក្មេង អនាគតវែងឆ្ងាយ

កីឡាករ លឹម នរវិទូ ឈ្នះមេដាយ ៥គ្រឿងម្នាក់ឯងក្នុងចំណោម ១៦គ្រឿងដែលកម្ពុជាឈ្នះនៅម៉ាឡេស៊ី

លោក ហែម គីរី ចង់ឲ្យមានកម្មវិធីប្រកួតសម្រាប់កុមារៗបែបនេះឲ្យបានច្រើនទៀត

មកដឹងពីទីតាំងអាងហែលទឹកធំៗ ៤របស់សហព័ន្ធដែលបម្រើដល់ការបណ្ដុះធនធាននៅទូទាំងប្រទេស

អបអរសារទរ សហព័ន្ធខ្មែរកីឡាហែលទឹកទទួលបានការឧបត្ថម្ភជាឈុតកីឡារយៈពេល ២ឆ្នាំពី CHN Sports