កីឡាអូឡាំពិក Archives - Kampuchea Thmey Daily

ក្រៅពីថវិកាខ្ទង់លានដុល្លារ ម្ចាស់មេដាយមាសអូឡាំពិកដំបូងនឹងមានរូបចម្លាក់ស្ទើរទូទាំងប្រទេស

chean virakbot — Fri, 16 Jan 2026 01:08:12 +0000

គណៈកម្មាធិការជាតិអូឡាំពិកកម្ពុជា ស្វែងរកបានដៃគូហើយសម្រាប់ដំណើរឆ្ពោះទៅរកមេដាយលើកដំបូងក្នុងព្រឹត្តិការណ៍កីឡាអូឡាំពិក ដោយបានចុះអនុស្សរណៈនៃការយោគយល់គ្នាជាមួយ សភាពាណិជ្ជកម្មអាមេរិកប្រចាំកម្ពុជា (AMCHAM) ដែលក្រុមហ៊ុនអាមេរិកនឹងជួយទំនុកបម្រុងអត្តពលិកកម្ពុជាដើម្បីត្រៀមខ្លួនទៅប្រកួតកីឡាអូឡាំពិក ឆ្នាំ ២០២៨ នៅសហរដ្ឋអាមេរិក។

នៅក្នុងប្រវត្តិសាស្ត្ររបស់ខ្លួន កម្ពុជាមិនធ្លាប់ទទួលបានមេដាយឡើយទាំង សំរិទ្ធ ប្រាក់ និងមាស ហើយមិនត្រឹមតែប៉ុណ្ណោះកីឡាករ កីឡាការិនីកម្ពុជាកម្របានជាប់ក្នុងវគ្គជម្រុះដើម្បីទទួលបានសិទ្ធិពេញលេញក្នុងការចូលរួមប្រកួតកីឡាអូឡាំពិក។ ភាគច្រើនបំផុត កីឡាហែលទឹក និងអត្តពលកម្ម ទទួលបានការអនុគ្រោះទៅចូលរួមប្រកួតប៉ុណ្ណោះ។ អតីតវិរកីឡាការិនីកម្ពុជា ស៊ន សៀវម៉ី ជាអត្តពលិកកម្ពុជាដំបូងគេបង្អស់ដែលបានជាប់ជម្រុះក្នុងតំបន់ ហើយបានទៅប្រកួតកីឡាអូឡាំពិកដោយពេញសិទ្ធិកាលពីឆ្នាំ ២០១៦ នៅប្រទេសប្រេស៊ីល។

ហេតុដូច្នេះហើយបានជាកម្ពុជាដាក់គោលដៅធំបំផុតគឺស្វែងរកមេដាយឲ្យបានជាលើកដំបូងក្នុងកីឡាអូឡាំពិក។ ការដាក់គោលដៅនេះ កម្ពុជាត្រូវស្វះស្វែងរកដៃគូឧបត្ថម្ភគាំទ្រដើម្បីពង្រឹងសមត្ថភាពកីឡាករ កីឡាការិនីសម្រាប់ការត្រៀមខ្លួនឲ្យបានឈានដល់កម្រិតខ្ពស់។

លោក Casey Barnett ប្រធានសភាពពាណិជ្ជកម្មអាមេរិកប្រចាំកម្ពុជា បានថ្លែងពីការប្តេជ្ញាចិត្តរបស់ក្រុមហ៊ុនអាមេរិកក្នុងការជួយឧបត្ថម្ភគាំទ្រដល់កីឡាករ កីឡាការិនីកម្ពុជាឲ្យមានសមត្ថភាពកម្រិតខ្ពស់ និងសម្រេចឲ្យបាននូវគោលដៅរបស់កម្ពុជាក្នុងការស្វែងរកឲ្យបានមេដាយដំបូងក្នុងព្រឹត្តិការណ៍កីឡាអូឡាំពិក។

បុរសជនជាតិអាមេរិករូបនេះបានបញ្ជាក់ថា ប្រជាជនខ្មែរមួយចំនួនមិនដឹងនៅសហរដ្ឋអាមេរិក ក្រុមហ៊ុនឯកជនជាអ្នកឧបត្ថម្ភដល់ការហ្វឹកហាត់របស់កីឡាករ កីឡាការិនី។ ពួកគេមិនពឹងលើប្រាក់ឧបត្ថម្ភរបស់ជាតិទាំងស្រុងនោះទេ ពីព្រោះមិនគ្រប់គ្រាន់។ លោកសង្ឃឹមថា កម្ពុជាអនុវត្តដូចនៅអាមេរិកដែរគឺ ក្រុមហ៊ុនឯកជនទំនុកបម្រុងដល់កីឡាករ កីឡាការិនីសម្រាប់ការត្រៀមខ្លួនប្រកួតលើឆាកអន្តរជាតិ។

ជាមួយគ្នានេះ លោក វ៉ាត់ ចំរើន រដ្ឋលេខាធិការក្រសួងអប់រំ យុវជន និងកីឡា និងជាអគ្គលេខាធិការនៃគណៈកម្មាធិការជាតិអូឡាំពិកកម្ពុជា បានលើកឡើងថា គោលដៅធំបំផុតរបស់កម្ពុជាគឺស្វែងរកការបង្កើតប្រវត្តិសាស្ត្រដំបូងក្នុងការទទួលបានមេដាយកីឡាអូឡាំពិក មិនថាមេដាយសំរិទ្ធ ប្រាក់ ឬមាសទេ។ អត្តពលិកណាដែលទទួលបានមេដាយមាសកីឡាអូឡាំពិកលើកដំបូងនឹងមានកិត្តិយសធំធេងណាស់សម្រាប់ជាតិ។

លោកមានប្រសាសន៍ថា ៖«តាមអនុក្រឹត្យ ប្រាក់រង្វាន់សម្រាប់មេដាយ«មាស»កីឡាអូឡាំពិកគឺទទួលបាន ៣ ម៉ឺនដុល្លារ ហើយមេដាយប្រាក់ ឬសំរិទ្ធ ក៏ទទួលបានតាមលំដាប់ តែខ្ញុំជឿថា នឹងមានការឧបត្ថម្ភផ្សេងៗច្រើនណាស់ មិនក្រោមលានដុល្លារអាមេរិកទេ»។

«អ្វីដែលកាន់តែមានតម្លៃជាងថវិកាទៀតនោះគឺ កិត្តិយស។ អ្នកឈ្នះមេដាយ«មាស»លើកដំបូងនឹងមានកិត្តិយសធំធេងណាស់ សម្រាប់ខ្លួនគាត់ផ្ទាល់ សម្រាប់គ្រួសារ។ គាត់នឹងត្រូវបានធ្វើរូបចម្លាក់ដាក់តម្កល់ស្ទើរទូទាំងប្រទេស។ ទីកន្លែងណាដែលមានការហ្វឹកហាត់ត្រឹមត្រូវនឹងធ្វើរូបចម្លាក់គាត់ដាក់ដើម្បីជាគំរូ ជាការទឹកចិត្ត និងជាមហាកិត្តិយសសម្រាប់គាត់ដែលបានសាងស្នាដៃជូនជាតិ»៕

អត្ថបទ៖ វិរបុត្រ

The post ក្រៅពីថវិកាខ្ទង់លានដុល្លារ ម្ចាស់មេដាយមាសអូឡាំពិកដំបូងនឹងមានរូបចម្លាក់ស្ទើរទូទាំងប្រទេស appeared first on Kampuchea Thmey Daily.

ចលនាកីឡាអូឡាំពិកអន្តរជាតិផ្តល់ជំនួយដល់ជនភៀសសឹកកម្ពុជា

chean virakbot — Fri, 26 Dec 2025 08:03:13 +0000

ចលនាកីឡាអូឡាំពិកអាស៊ី និងអូឡាំពិកអន្តរជាតិ តាមរយៈគណៈកម្មាធិការជាតិអូឡាំពិកកម្ពុជា បានផ្តល់ជំនួយមនុស្សធម៌ដើម្បីជួយដល់ប្រជាជនកម្ពុជាដែលកំពុងរងផលប៉ះពាល់ពីសង្គ្រាមឈ្លានពានរបស់ថៃមកលើទឹកដីកម្ពុជា។

លោក វ៉ាត់ ចំរើន រដ្ឋលេខាធិការក្រសួងអប់រំ យុវជន និងកីឡា និងជាអគ្គលេខាធិការនៃគណៈកម្មាធិការជាតិអូឡាំពិកកម្ពុជា បានឲ្យដឹងថា គណៈកម្មាធិការជាតិអូឡាំពិកកម្ពុជា បានទទួលអំណោយដែលជាមូលនិធិជនភៀសសឹកកីឡាអូឡាំពិក។ ការផ្តល់អំណោយជនភៀសសឹកនេះគឺជាគម្រោងពិសេសមួយរបស់ចលនាកីឡាអូឡាំពិកអន្តរជាតិ និងក្រុមប្រឹក្សាកីឡាអូឡាំពិកអាស៊ី។ ចលនាកីឡាអូឡាំពិកអន្តរជាតិបានពិនិត្យមើលច្បាស់លាស់ណាស់មុនពេលសម្រេចផ្តល់ជូន។ ការផ្តល់ជូននេះគឺក្នុងស្មារតីសាមគ្គីគ្នារវាង គណៈកម្មាធិការអូឡាំពិកអន្តរជាតិដែលបានចុះអនុស្សរណៈនៃការយោគយល់គ្នាជាមួយ អង្គការសហប្រជាជាតិ ដែលមាន ឧត្តមស្នងការអង្គការសហប្រជាជាតិទទួលបន្ទុកជនភៀសខ្លួន (UNHCR)។

«គោលបំណងរបស់អូឡាំពិកអន្តរជាតិគឺចូលរួមជាមួយអង្គការសហប្រជាជាតិដើម្បីជួយសម្រាលបន្ទុកដល់ជនរងគ្រោះពីសង្គ្រាម។ ជួយសម្រាលទុក្ខលំបាក ឬលើកទឹកចិត្តដល់កុមារ ជនភៀសសឹកឲ្យពួកគាត់មានឱកាសរសរានមានជីវិត មានឱកាសលេងកីឡា ឬសិក្សារៀនសូត្រជាដើម។ ជាពិសេសគឺការលេងកីឡា ពីព្រោះបើទោះជាពួកគាត់ផ្លាស់ទីលំនៅ ឬទៅដល់ទីកន្លែងណាក៏ដោយ ក៏ពួកគាត់ត្រូវតែមានសិទ្ធិលេងកីឡា។ ក្នុងចំណោមជនភៀសសឹក ក៏មានកីឡាករ កីឡាការិនីដែរ ដូច្នេះពួកគាត់ត្រូវមានឱកាសលេងកីឡា»។ លោក វ៉ាត់ ចំរើន មានប្រសាសន៍។

លោកបានបញ្ជាក់ថា ៖«ពួកគាត់មានឱកាសលេងកីឡាដើម្បីរក្សាភាពលំនឹងទាំងផ្លូវកាយ ផ្លូវចិត្ត ហើយបង្កើនភាពកក់ក្តៅ កាត់បន្ថយការភ័យខ្លាច។ ជាអត្ថន័យខ្លឹមសារ គឺឃើញថា យើងទទួលបានការទទួលស្គាល់ពីអន្តរជាតិ ជាចលនាមួយដ៏មានប្រសិទ្ធភាពនៅក្នុងជំរុញការគាំទ្រនេះមកដល់កម្ពុជាផ្ទាល់តែម្តង។ នេះជាកត្តាសាមគ្គីភាព ជាស្មារតីរបស់អង្គការសហប្រជាជាតិតាមរយៈអូឡាំពិកអន្តរជាតិដែលតែងតែគាំទ្រដល់ជនភៀសសឹកទូទាំងពិភពលោក។ ចំពោះកម្ពុជាគឺជាពិសេសមួយដែលគេយកចិត្តទុកដាក់។ គេទទួលបានព័ត៌មានភ្លាម គេផ្តល់នូវជំនួយទាំងអស់នេះយ៉ាងលឿន»។

លោកអគ្គលេខាធិការគណៈកម្មាធិការជាតិអូឡាំពិកកម្ពុជា បានបន្ថែមថា ចលនាកីឡាអូឡាំពិកបានទទួលស្គាល់ជនភៀសសឹកកម្ពុជាគឺជាជនរងគ្រោះដោយសារសង្គ្រាម ដូច្នេះហើយបានជាគណៈកម្មាធិការអូឡាំពិកអន្តរជាតិផ្តល់ជំនួយពិសេសដល់ជនភៀសសឹកកម្ពុជា។

លោក វ៉ាត់ ចំរើន បានឲ្យដឹងថា ជំនួយមនុស្សធ៌ទាំងនេះមានគ្រឿងឧបភោគ បរិភោគ ថ្នាំពេទ្យ សម្ភារសិក្សា និងសម្លៀកបំពាក់កីឡា សម្ភារកីឡា ជាដើម។ មួយផ្នែកត្រូវយកទៅចែកជូនផ្ទាល់ដល់ដៃជនភៀសសឹកនៅខេត្តឧត្តរមានជ័យ ហើយមួយផ្នែកធំទៀតមានទាំងថវិកាចំនួន ៨ លានរៀលផង យកទៅជូនក្រសួងអប់រំ យុវជន និងកីឡាសម្រាប់យកទៅជួយដល់សិស្សានុស្សជាដើម។

ជំនួយមនុស្សធម៌របស់ចលនាកីឡាអូឡាំពិកមិនពាក់ព័ន្ធនឹងកងកម្លាំងប្រដាប់អាវុធដែលប្រយុទ្ធគ្នានៅជួរមុខទេ ពីព្រោះកីឡាមិនពាក់ព័ន្ធនឹងនយោបាយ។ ទោះបីជាយ៉ាងណា ស្ថាប័នកីឡាអូឡាំពិកអន្តរជាតិអំពាវនាវឲ្យមានបទឈប់បាញ់គ្នា បង្កើតសន្តិភាព និងសេចក្តីសុខសាន្តសម្រាប់មនុស្សជាតិ។ ហេតុដូច្នេះហើយបានជាអូឡាំពិកអន្តរជាតិមានចលនាមនុស្សធម៌ជួយដល់មនុស្សម្នាដែលទទួលរងគ្រោះពីសង្គ្រាម និងគ្រោះមហន្តរាយផ្សេងៗ៕

អត្ថបទ៖ វីរបុត្រ

The post ចលនាកីឡាអូឡាំពិកអន្តរជាតិផ្តល់ជំនួយដល់ជនភៀសសឹកកម្ពុជា appeared first on Kampuchea Thmey Daily.

អត្តពលិក និងសិស្សានុសិស្ស ៥៥០នាក់ចូលរួម ទិវាអូឡាំពិក លើកទី ១៣១

Kosal Sem — Mon, 23 Jun 2025 02:39:18 +0000

កាលពីថ្ងៃ អាទិត្យ ទី ២២ ខែមិថុនា ឆ្នាំ២០២៥ គណៈកម្មាធិការជាតិអូឡាំពិកកម្ពុជា បានរៀបចំកម្មវិធីកីឡាមួយចំនួន ដើម្បីអបអរសាទរ ទិវាអូឡាំពិក (Olympic Day) និងវេទិកាអត្តពលិកជាតិ លើកទី១ ដែលមានវាគ្មិន ជាអតីតកីឡាករ កីឡាការិនីអូឡាំពិកចំនួន៥រូប ដែលធ្លាប់តំណាងឱ្យកម្ពុជាចូលរួមប្រកួតក្នុងព្រឹត្តិការណ៍កីឡាអូឡាំពិក។

លោក ថោង ខុន

ពាក់ព័ន្ធនឹងគោលបំណងនៃការប្រារព្វខួបលើកទី១៣១ នៃទិវាអូឡាំពិក ឆ្នាំ២០២៥ លោក ថោង ខុន ទេសរដ្ឋមន្រ្តីទទួលបន្ទុកជំរុញការអភិវឌ្ឍចលនាកីឡា និងជាប្រធានគណៈកម្មាធិការជាតិអូឡាំពិកកម្ពុជា បានមានប្រសាសន៍ថា ៖ «ថ្ងៃនេះគឺជាថ្ងៃពិសេសសម្រាប់ចលនាអូឡាំពិកកម្ពុជា ក៏ដូចជាចលនាអូឡាំពិកទូទាំងពិភពលោកក្នុងការ ប្រារព្វខួបលើកទី១៣១ នៃទិវាអូឡាំពិក ដើម្បីរម្លឹកអំពីការបង្កើតចលនាអូឡាំពិកសម័យទំនើប (២៣ មិថុនា ១៨៩៤ – ២៣ មិថុនា ២០២៥) ដែលផ្តួចផ្តើមបង្កើតឡើងវិញដោយស្ថាបនិកជនជាតិបារាំងគឺលោក Pierre de Coubertin។ ពិធីអបអរសាទរខួបលើកទី១៣១ នៃទិវាអូឡាំពិក ឆ្នាំ២០២៥ រៀបចំឡើងក្រោមមូលបទ “ធ្វើចលនាទាំងអស់គ្នា – Let’s Move” ជាមួយយុទ្ធនាការជាតិ “យុវជនម្នាក់ ចេះកីឡាមួយប្រភេទយ៉ាងតិច ប្រចាំជីវិត” ដែលបានដាក់ចេញនៅក្នុងយុទ្ធបញ្ចកោណ-ដំណាក់ទី១ របស់រាជរដ្ឋាភិបាល នីតិកាលទី៧ នៃរដ្ឋសភាព ក្រោមការដឹកនាំដ៏ត្រឹមត្រូវ និងឈ្លាសវៃ ប្រកបដោយថាមពលរបស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា»។

បន្ថែមពីលើនៃការប្រារព្ធទិវាអូឡាំពិក (Olympic Day) គណៈកម្មាធិការជាតិអូឡាំពិកកម្ពុជា ក៏បានរៀបចំ «វេទិកាអត្តពលិកជាតិ លើកទី១» ផងដែរ ដែលបានអនុញ្ញាតឱ្យអតីតកីឡាករ កាឡារិនីអូឡាំពិកចំនួន៥រូប ធ្លាប់តំណាងឱ្យកម្ពុជាចូលរួមក្នុងព្រឹត្តិការណ៍ប្រកួតកីឡាអូឡាំពិកហ្គេមនាពេលកន្លងមក បានផ្តល់នូវចំណេះដឹងអំពីប្រវត្តិកីឡាអូឡាំពិក ការចែករំលែកបទពិសោធផ្ទាល់ខ្លួន បំផុសស្មារតី ការចងចាំនៃព្រឹត្តិការណ៍កីឡាអូឡាំពិក និងភាពជោគជ័យ ក្រោយអាជីពកីឡា។

វេទិកាអត្តពលិកជាតិ

លោក វ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិកកម្ពុជា បានឱ្យដឹងថា វេទិកាអត្តពលិកជាតិ គឺរៀបចំឡើង ដើម្បីផ្តល់ឱកាសឱ្យអតីតកីឡាករ កីឡាការិនីកម្ពុជាចំនួន ៥ នាក់បានចែករម្លែកនូវបទពិសោធ ចំណេះដឹង ក្នុងគោលបំណងបំផុសស្មារតីទៅដល់សិស្សានុសិស្ស និងអត្តពលិកជម្រើសជាតិជំនាន់ក្រោយឱ្យស្គាល់ពីតម្លៃនៃការតស៊ូ តម្លៃនៃការគោរពវិន័យ តម្លៃនៃការខិតខំប្រឹងប្រែង ដែលអាចឆ្ពោះទៅរកភាពជោគជ័យបាន។

គួរបញ្ជាក់ថា វេទិកាអត្តពលិកជាតិ លើកទី១ បានចូលរួមដោយអតីតកីឡាករ កីឡាការិនី កម្ពុជាចំនួន ៥ រូបដូចជា៖

១. លោក វ៉ាត់ ចំរើន អត្តពលិកកីឡាចំបាប់ចូលរួមការប្រកួតកីឡាអូឡាំពិក ទីក្រុង Atlanta សហរដ្ឋអាមេរិក ឆ្នាំ១៩៩៦
២. លោក ហែម គីរី អត្តពលិកកីឡាហែលទឹកចូលរួមការប្រកួតកីឡាអូឡាំពិក
៣. អ្នកស្រី ចូវ សុធារ៉ា អត្តពលិកកីឡាចំបាប់ចូលរួមការប្រកួតកីឡាអូឡាំពិក
៤. កញ្ញា ហែមថុន វីទិនី អត្តពលិកកីឡាហែលទឹកចូលរួមការប្រកួតកីឡាអូឡាំពិក ទីក្រុងប៉េកាំង
៥. លោក ឈុន ប៊ុនថន អត្តពលិកកីឡាអត្តពលកម្មចូលរួមការប្រកួតកីឡាអូឡាំពិក។

កម្មវិធីបានប្រព្រឹត្តឡើង នៅវិមានពហុកីឡដ្ឋានជាតិមរតកតេជោ ដោយមានការចូលរួមពី សិស្សានុសិស្ស ចំនួន ៤០០នាក់ មកពី វិទ្យាល័យឫស្សីកែវ ២០០នាក់ និងវិទ្យាល័យ ជាស៊ីម ចំរើនរដ្ឋ ២០០នាក់ បូករួមទាំងក្រុម កីឡាករ-កីឡាការិនីជម្រើសជាតិ និងមន្ត្រីកីឡា ១៥០នាក់ទៀតសរុប ៥៥០នាក់៕

រូបភាព

អត្ថបទ៖ សេម កុសល

The post អត្តពលិក និងសិស្សានុសិស្ស ៥៥០នាក់ចូលរួម ទិវាអូឡាំពិក លើកទី ១៣១ appeared first on Kampuchea Thmey Daily.

ភ្លើងឆេះព្រៃនៅរដ្ឋកាលីហ្វ័រញ៉ា បង្កការភ័យខ្លាចដល់ កីឡាអូឡាំពិក២០២៨

chean virakbot — Fri, 17 Jan 2025 10:26:44 +0000

ភ្លើងឆេះព្រៃដ៏កំណាចបំផ្លិចបំផ្លាញនៅរដ្ឋកាលីហ្វ័រញ៉ា សហរដ្ឋអាមេរិក កំពុងបំផ្លាញសង្កាត់នានា និងបង្កសំឡេងរោទិ៍សម្រាប់គណៈកម្មាធិការរៀបចំកីឡាអូឡាំពិក ទីក្រុង Los Angeles ឆ្នាំ២០២៨ ជាមួយនឹងទីលានវាយកូនហ្គោល Riviera Country Club និង Sepulveda Basin ស្ថិតនៅក្រោមការគំរាមកំហែង បញ្ហាប្រឈមនៃការធានាសុវត្ថិភាពហ្គេមកាន់តែខ្លាំងឡើង។

ទីក្រុង Los Angeles ដែលជាមជ្ឈមណ្ឌលវប្បធម៌ និងកីឡាដ៏ល្បីល្បាញបំផុតមួយរបស់សហរដ្ឋអាមេរិក កំពុងស៊ូទ្រាំនឹងរឿងរ៉ាវដែលត្រូវបានចាត់ទុកជាសុបិនអាក្រក់បំផុត គិតចាប់តាំងពីថ្ងៃអង្គារ ទី០៧ ខែមករាមក។ ភ្លើងឆេះព្រៃដ៏ធំមួយបានលេបត្របាក់តំបន់នេះ បំផ្លាញផ្ទះសម្បែង ទីកន្លែងនានា និងបានឈានចូលដល់ទីតាំងមួយចំនួនដែលគ្រោងនឹងរៀបចំសម្រាប់ការប្រកួតកីឡាអូឡាំពិក ឆ្នាំ២០២៨។ អាក្រក់ជាងនេះទៅទៀត ចំនួនអ្នកស្លាប់ដោយសារភ្លើងឆេះនៅរដ្ឋកាលីហ្វ័រញ៉ា បានកើនឡើងដល់ជាង១០នាក់ និងផ្ទៃដីជាង ៣៥,០០០ ហិកតា ត្រូវបានក្លាយទៅជាផេះ។

ដោយមានភ្លើងឆេះដ៏សកម្មចំនួនប្រាំមួយ ការបំផ្លិចបំផ្លាញបានរាលដាលពាសពេញទីក្រុង។ អាជ្ញាធរក្នុងតំបន់រាយការណ៍ពីការជម្លៀសមនុស្សយ៉ាងច្រើន ជាមួយនឹងរចនាសម្ព័ន្ធសំខាន់ៗស្ថិតនៅក្រោមការគំរាមកំហែង។ ទោះបីជាយ៉ាងណា ចំពេលមានភាពវឹកវរភ្លាមៗនោះ មានការព្រួយបារម្ភរយៈពេលវែងមួយ ពាក់ព័ន្ធនឹងជោគវាសនានៃអូឡាំពិកឆ្នាំ២០២៨។

ក្នុងចំណោមតំបន់ដែលរងផលប៉ះពាល់ខ្លាំងជាងគេគឺទីលានវាយកូនហ្គោល Riviera Country Club ដ៏ល្បីល្បាញ ដែលគ្រោងនឹងរៀបចំការប្រកួតកីឡាវាយកូនហ្គោលអូឡាំពិក។ ដំបូងឡើយ នៅខាងក្រៅតំបន់ជម្លៀស ការរីករាលដាលយ៉ាងឆាប់រហ័សនៃភ្លើង Palisades ត្រូវបានជំរុញដោយខ្យល់បក់ឡើងដល់ ១៦០គីឡូម៉ែត្រក្នុងមួយម៉ោង បានធ្វើឱ្យទីលានស្ថិតក្នុងភាពគ្រោះថ្នាក់។

ទីតាំងសំខាន់មួយទៀតគឺតំបន់កម្សាន្ត Sepulveda Basin Recreation Area ដែលរៀបចំសម្រាប់ព្រឹត្តិការណ៍កីឡាបាញ់ធ្នូ កីឡាករកង់ក្បាច់ និងកីឡាជិះស្គី។ ខណៈអ្នកពន្លត់អគ្គីភ័យក្នុងតំបន់បានរាយការណ៍ថា មិនមានការខូចខាតរចនាសម្ព័ន្ធ ឬរបួសទេរហូតមកដល់ពេលនេះ។ ស្ថានភាពនៅតែប្រែប្រួលដោយមានលក្ខខណ្ឌដែលអាចផ្លាស់ប្តូរភ្លាមៗ។ ហានិភ័យមិនត្រូវបានកំណត់ចំពោះកន្លែងទាំងនេះទេ។ កីឡដ្ឋាន Rose Bowl ដែលគ្រោងនឹងរៀបចំការប្រកួតបាល់ទាត់ក្នុងអំឡុងពេលហ្គេម ក៏ស្ថិតនៅក្នុងតំបន់ជម្លៀសផងដែរ។

លើសពីកន្លែងអូឡាំពិក វិបត្តិបរិស្ថានបានប៉ះពាល់យ៉ាងខ្លាំងដល់អត្តពលិក និងក្រុមអាជីពនៅទូទាំងលីគកីឡាផ្សេងៗ។ តំបន់ដែលរងផលប៉ះពាល់ជាច្រើនគឺជាជម្រករបស់អត្តពលិកបច្ចុប្បន្ន និងអតីត រួមទាំងអតីតកីឡាករហែលទឹក Gary Hall Jr. ដែលបានបាត់បង់ផ្ទះរបស់ខ្លួន និងមេដាយអូឡាំពិកចំនួន ១០ នៅក្នុងភ្លើង Palisades។ តារាបាលបោះរបស់ក្លិប Clippers កីឡាករ Kawhi Leonard បានត្រឡប់ទៅទីក្រុង Los Angeles ដើម្បីផ្គត់ផ្គង់គ្រួសាររបស់ខ្លួន បន្ទាប់ពីការជម្លៀសរបស់ពួកគេ។ ទន្ទឹមនឹងនេះដែរ គ្រូបង្វឹកក្រុមបាល់បោះ Warriors លោក Steve Kerr បានបាត់បង់ផ្ទះកុមារភាពរបស់លោក ទោះបីជាម្តាយរបស់លោកត្រូវបានជួយសង្គ្រោះទាន់ពេលវេលាក៏ដោយ។

គណៈកម្មាធិការរៀបចំកីឡាអូឡាំពិក ទីក្រុង Los Angeles ឆ្នាំ២០២៨ បានលើកឡើងអំពីស្ថានភាពនៅលើប្រព័ន្ធផ្សព្វផ្សាយសង្គម ដោយសម្តែងការដឹងគុណដល់អ្នកពន្លត់អគ្គីភ័យ អ្នកស្ម័គ្រចិត្ត និងក្រុមផ្សេងទៀតដែលបានប្តេជ្ញាចិត្តក្នុងកិច្ចខិតខំប្រឹងប្រែងសង្គ្រោះ។ ពួកគេបានចែករំលែកធនធានដើម្បីជួយដល់អ្នកដែលត្រូវការជំនួយ រួមមានកាកបាទក្រហមអាមេរិក Los Angeles មូលនិធិ LAFD មូលនិធិអ្នកពន្លត់អគ្គីភ័យរដ្ឋកាលីហ្វ័រញ៉ា និងជំនួយលំនៅដ្ឋានបន្ទាន់របស់ Airbnb សម្រាប់អ្នកដែលផ្លាស់ទីលំនៅដោយសារអគ្គីភ័យ។

យ៉ាងណាក៏ដោយ គ្រោះមហន្តរាយកំពុងស្ថិតក្នុងការចោទជាសំណួរកាន់តែជ្រៅ។ ត្រឹមតែជាង ៣ឆ្នាំទៀតប៉ុណ្ណោះ រហូតដល់ភ្លើងអូឡាំពិកបំភ្លឺទីក្រុង ភាពមន្ទិលសង្ស័យក៏នៅតែបន្ត។ តើ LA 2028 អាចធានាសុវត្ថិភាពនៃទីកន្លែងរបស់ខ្លួននៅក្នុងតំបន់ដែលងាយរងគ្រោះដោយសារភ្លើងឆេះព្រៃដែរឬទេ? តើគ្រោះមហន្តរាយនេះនឹងមានឥទ្ធិពលយ៉ាងណាទៅលើការរៀបចំផែនការព្រឹត្តិការណ៍ និងការយល់ឃើញជាសកល? នៅពេលដែលអណ្តាតភ្លើងបន្តលេបត្របាក់រាប់ហិកតានៅទូទាំងទីក្រុង Los Angeles ផ្លូវទៅកាន់ការប្រកួតកីឡាអូឡាំពិកឆ្នាំ២០២៨ ប្រឈមមុខនឹងបញ្ហាដែលមិនធ្លាប់មានពីមុនមក៕

ប្រែសម្រួល៖ មន្នីរ័ត្ន
ប្រភព៖ Inside The Games

The post ភ្លើងឆេះព្រៃនៅរដ្ឋកាលីហ្វ័រញ៉ា បង្កការភ័យខ្លាចដល់ កីឡាអូឡាំពិក២០២៨ appeared first on Kampuchea Thmey Daily.

អភិបាលក្រុងប៉ារីសនឹងហែលទឹកទន្លេ Seine មុនការប្រកួតអូឡាំពិក២០២៤

chean virakbot — Tue, 16 Jan 2024 09:59:15 +0000

លោកស្រី Anne Hidalgo អភិបាលក្រុងប៉ារីស នឹងហែលទឹកទន្លេ Seine មុនការប្រកួតកីឡាអូឡាំពិករដូវក្តៅឆ្នាំនេះ។

លោកស្រី Palais Ephemere

បច្ចុប្បន្នទន្លេ Seine គឺអាចងូតបានជាមធ្យមក្នុងរដូវក្តៅ ប៉ុន្តែទីក្រុងប៉ារីសសង្ឃឹមថា នឹងធ្វើឱ្យប្រសើរឡើងបន្ថែមទៀតនូវគុណភាពទឹកនៅពេលព្រឹត្តិការណ៍កីឡាអូឡាំពិក ឆ្នាំ២០២៤ ចាប់ផ្តើម។

គោលដៅចម្បងគឺធ្វើឱ្យទន្លេស្អាតគ្រប់គ្រាន់សម្រាប់ហែលទឹកនៅឆ្នាំ២០២៥ ហើយព្រឹត្តិកីឡាអូឡាំពិកនឹងជំរុញដំណើរការនេះ បើទោះបីជាព្រឹត្តិការណ៍កីឡានៅលើទន្លេ Seine ត្រូវបានលុបចោលកាលពីឆ្នាំមុន ដោយសារស្តង់ដារសុខភាពមិនត្រូវបានឆ្លើយតប បន្ទាប់ពីមានភ្លៀងធ្លាក់ខ្លាំង និងបញ្ហាប្រព័ន្ធលូជាដើម។

លោកស្រី Hidalgo បាននិយាយនៅក្នុងពិធីចូលឆ្នាំថ្មីនៅឯសាលាក្រុងដោយបានអញ្ជើញចៅហ្វាយខេត្ត Marc Guillaume ថា ៖«យើងនឹងងូតទឹកនៅទន្លេ Seine។ ការជ្រមុជទឹកជាប្រវត្តិសាស្ត្រនេះជាង៣០ឆ្នាំ បន្ទាប់ពីការសន្យារបស់អតីតប្រធានាធិបតី លោក Chirac អតីតអភិបាលក្រុងបារីស”។ អតីតអភិបាលក្រុងប៉ារីសលោក Chirac ក្នុងឆ្នាំ១៩៨៨ បានសន្យាថាលោកនឹងហែលទឹកទន្លេ Seine”នៅចំពោះមុខសាក្សី”។

ទិដ្ឋភាពកីឡាហែលទឹក

ព្រឹត្តិការណ៍កីឡាអូឡាំពិក ដែលរួមមានកីឡាលើទឹក និងកីឡាទ្រីយ៉ាថ្លុង គ្រោងនឹងធ្វើឡើងនៅលើទន្លេ Seine នេះ អំឡុងពេលកីឡាអូឡាំពិក ឆ្នាំ២០២៤៕

ប្រែសម្រួល៖ មន្នីរ័ត្ន
ប្រភព៖ Reuters

The post អភិបាលក្រុងប៉ារីសនឹងហែលទឹកទន្លេ Seine មុនការប្រកួតអូឡាំពិក២០២៤ appeared first on Kampuchea Thmey Daily.

ហ្វីលីពីនបានស្នើជាពិសេសទៅ IOC ដើម្បីឲ្យ Pacquiao បានប្រកួតអូឡាំពិក២០២៤

chean virakbot — Thu, 12 Oct 2023 04:28:57 +0000

គណៈកម្មាធិការជាតិអូឡាំពិកហ្វីលីពីន (POC) បានធ្វើសំណើពិសេស”ទៅគណៈកម្មាធិការអូឡាំពិកអន្តរជាតិ (IOC) ដើម្បីអនុញ្ញាតឱ្យវីរបុរសប្រដាល់របស់ខ្លួនគឺ Manny Pacquiao ឡើងសង្វៀននៅព្រឹត្តិការណ៍កីឡាអូឡាំពិកប៉ារីស ឆ្នាំ២០២៤ ក្នុងវ័យ៤៥ឆ្នាំ។

លិខិតមួយច្បាប់ត្រូវបានផ្ញើទៅកាន់គណៈកម្មាធិការអូឡាំពិកអន្តរជាតិ ដើម្បីពិនិត្យមើលថាតើម្ចាស់ខ្សែក្រវ៉ាត់ពិភពលោកទម្ងន់មធ្យមអាចចូលរួមប្រកួតបានដែរឬទេ។ ទោះយ៉ាងណាក៏ដោយ Pacquiao ប្រឈមមុខនឹងការខកចិត្ត ដោយសារការកំណត់អាយុអតិបរមាសម្រាប់អ្នកប្រដាល់អូឡាំពិកគឺត្រឹម៤០ឆ្នាំ។

ប្រសិនបើទទួលបានការលើកលែង រូបគេនឹងត្រូវកក់កៅអីនៅទីក្រុងប៉ារីស តាមរយៈការប្រកួតជម្រុះមួយក្នុងចំណោមការប្រកួតជម្រុះចំនួន២លើកដែលនឹងធ្វើឡើងនាឆ្នាំក្រោយក្នុងប្រទេសអ៉ីតាលី និងប្រទេសថៃ។

ជម្រើសមួយទៀតសម្រាប់ Pacquiao អាចទទួលបាន គឺតាមរយៈកៅអី ‘universality’ ពី IOC ដែលជាធម្មតាត្រូវបានបម្រុងទុកសម្រាប់ប្រទេសដែលអ្នកប្រដាល់តស៊ូដើម្បីប្រកួតជម្រុះ។

Pacquiao បាននិយាយថា លោកមិនចាស់ពេកទេក្នុងការប្រកួតនោះ។ «ខ្ញុំដឹងគុណដល់គណៈកម្មាធិការអូឡាំពិកហ្វីលីពីន ក្រោមការដឹកនាំរបស់ លោក Abraham Tolentino ដែលបានផ្តល់អនុសាសន៍ដល់ IOC ដើម្បីដំណើរការសិទ្ធិរបស់ខ្ញុំក្នុងការប្រកួតកីឡាអូឡាំពិក ទីក្រុងប៉ារីស ឆ្នាំ២០២៤។ ខ្ញុំជឿថា វាមិនយឺតពេលទេក្នុងការបំពេញក្តីស្រមៃរបស់ខ្ញុំក្នុងការនាំយកមេដាយមាសកីឡាប្រដាល់ពីអូឡាំពិក សម្រាប់ប្រទេសហ្វីលីពីន»។

លោក Abraham Tolentino ក៏បាននិយាយផងដែរថា ៖«Pacquiao មានកាយសម្បទារឹងមាំល្អជាងអត្តពលិកដទៃទៀត»។

Pacquiao មិនធ្លាប់បានចូលរួមប្រកួតក្នុងព្រឹត្តិការណ៍កីឡាអូឡាំពិកទេ ប៉ុន្តែលោកធ្លាប់កាន់ទង់ជាតិហ្វីលីពីនក្នុងពិធីបើកការប្រកួត នៅទីក្រុងប៉េកាំង ឆ្នាំ២០០៨។

ជាមួយកំណត់ត្រាឈ្នះ ៦២ដង និងចាញ់ ៨ដង ហើយការប្រកួតចុងក្រោយក្នុងឆ្នាំ២០២១ លោកបានចាញ់ កីឡាករ Yordenis Ugás ក្នុងការប្រកួតដណ្តើមខ្សែក្រវាត់ Super welterweight។ លោកបានចូលប្រឡូកក្នុងឆាកនយោបាយ និងឈរឈ្មោះក្នុងការបោះឆ្នោតប្រធានាធិបតីហ្វីលីពីន ឆ្នាំ២០២២ ដោយទទួលបានសំឡេងឆ្នោតច្រើនជាងគេលំដាប់ទីបី។ លោកធ្លាប់ជាសមាជិកព្រឹទ្ធសភាហ្វីលីពីន និងជាសមាជិកសភាតំណាងរាស្រ្តផងដែរ៕

ប្រែសម្រួល៖ មន្នីរ័ត្ន
ប្រភព៖ insidethegames.biz

The post ហ្វីលីពីនបានស្នើជាពិសេសទៅ IOC ដើម្បីឲ្យ Pacquiao បានប្រកួតអូឡាំពិក២០២៤ appeared first on Kampuchea Thmey Daily.

«ក្តីសុបិនធំបំផុត»របស់កីឡាកម្ពុជានៅមិនទាន់បានសម្រេច

chean virakbot — Thu, 14 Sep 2023 07:17:48 +0000

ក្តីសុបិនធំបំផុតក្នុងវិស័យកីឡាកម្ពុជានៅមិនទាន់បានសម្រេចទេសម្រាប់ការចូលរួមព្រឹត្តិការណ៍កីឡាអូឡាំពិក បើទោះបីជាធ្លាប់ចូលរួមប្រកួត១០លើកហើយក៏ដោយ។

លោក វ៉ាត់ ចំរើន រដ្ឋលេខាធិការក្រសួងអប់រំ យុវជន និងកីឡា និងជាអគ្គលេខាធិការនៃគណៈកម្មាធិការជាតិអូឡាំពិកកម្ពុជាបានលើកជាសំណួរថា តើកីឡាករ កីឡាការិនីកម្ពុជាណានឹងក្លាយជាវីរបុរសនៅក្នុងកីឡាអូឡាំពិក?

«សុបិនធំបំផុតរបស់កីឡាយើងគឺចង់បានមេដាយមាសអូឡាំពិក។ យើងមិនធ្លាប់ទទួលបានមេដាយណាមួយពីកីឡាអូឡាំពិកទេ។ អីចឹងបើកីឡាករ កីឡាការិនីកម្ពុជាណាបានឈ្នះមេដាយអូឡាំពិកនឹងក្លាយជាវីរអត្តពលិកឆ្នើមជាងគេ និងមុនគេបំផុតនៅក្នុងប្រវត្តិសាស្ត្រកីឡាកម្ពុជា»។ លោក វ៉ាត់ ចំរើន មានប្រសាសន៍ក្នុងសន្និសីទសារព័ត៌មានស្តីពីព្រឹត្តិការណ៍រត់ប្រណាំង AIA Pink Run កាលពីថ្ងៃទី៥ ខែកញ្ញា ឆ្នាំ២០២៣។

បើតាមកំណត់ត្រាក្នុងកីឡាអូឡាំពិក កម្ពុជាធ្លាប់បានបញ្ជូនអត្តពលិកចូលរួមប្រកួតចំនួន១០លើកមកហើយក្នុងព្រឹត្តិការណ៍ដែលរៀបចំឡើងរាល់៤ឆ្នាំមក។

ឆ្នាំ១៩៥៦ កម្ពុជាបញ្ជូនអត្តពលិក២នាក់ (កីឡាប្រណាំងសេះ)
ឆ្នាំ១៩៦៤ អត្តពលិក១១នាក់ (ប្រដាល់សកល ជិះកង់ ទូកក្តោង)
ឆ្នាំ១៩៧២ អត្តពលិក១០នាក់ (អត្តពលកម្ម ប្រដាល់សកល ហែលទឹក)
ឆ្នាំ១៩៩៦ អត្តពលិក៥នាក់ (អត្តពលកម្ម ហែលទឹក ចំបាប់)
ឆ្នាំ២០០០ អត្តពលិក៤នាក់ (អត្តពលកម្ម ហែលទឹក)
ឆ្នាំ២០០៤ អត្តពលិក៤នាក់ (អត្តពលកម្ម ហែលទឹក)
ឆ្នាំ២០០៨ អត្តពលិក៤នាក់ (អត្តពលកម្ម ហែលទឹក)
ឆ្នាំ២០១២ អត្តពលិក៦នាក់ (អត្តពលកម្ម ហែលទឹក យូដូ តេក្វាន់ដូ)
ឆ្នាំ២០១៦ អត្តពលិក៦នាក់ (អត្តពលកម្ម ហែលទឹក ចំបាប់ តេក្វាន់ដូ)
ឆ្នាំ២០២០ អត្តពលិក៣នាក់ (អត្តពលកម្ម ហែលទឹក)
ឆ្នាំ២០២៤ នៅទីក្រុងបារីស ប្រទេសបារាំង

សម្រាប់ការចូលរួមទាំង១០លើកខាងលើ កម្ពុជាមិនធ្លាប់ទទួលបានមេដាយឡើយទាំងមាស ប្រាក់ ឬសំរិទ្ធ។ ភាគច្រើនកម្ពុជាបញ្ជូនកីឡាហែលទឹក និងអត្តពលកម្មចូលរួមប្រកួត ពីព្រោះកីឡាទាំងពីរប្រភេទនេះជាប្រភេទកីឡាអនុគ្រោះដែលសមាជិកអូឡាំពិកទាំងអស់ត្រូវបំពេញកាតព្វកិច្ចចូលរួមប្រកួត ទោះជាមិនជាប់វគ្គជម្រុះក៏ដោយ។

កីឡាការិនី ស៊ន សៀវស៊ី បានក្លាយជាអត្តពលិកកម្ពុជាទី១ដែលបានជាប់ជម្រុះចូលរួមប្រកួតកីឡាអូឡាំពិក កាលពីឆ្នាំ២០១៦ នៅប្រទេសប្រេស៊ីល លើប្រភេទកីឡាតេក្វាន់ដូ ដែលបានចូលរួមប្រកួតក្នុងនាមជាអត្តពលិកកម្ពុជាមិនមែនអនុគ្រោះ។

ស៊ន សៀវម៉ីន ក៏ជាអត្តពលិកកម្ពុជាទី១ដែលបានឈ្នះមេដាយមាសកីឡាទ្វីបអាស៊ី ដែលឈ្នះនៅឆ្នាំ២០១៤ នៅកូរ៉េខាងត្បូង បន្ទាប់មកមានកីឡាករ សាលី អ៊ូម៉ើត និងកីឡាការិនី ខាន់ ចេសា បានឈ្នះមេដាយមាសកីឡាទ្វីបអាស៊ី ឆ្នាំ២០១៩ នៅឥណ្ឌូណេស៊ី៕

អត្ថបទ៖ វីរបុត្រ

The post «ក្តីសុបិនធំបំផុត»របស់កីឡាកម្ពុជានៅមិនទាន់បានសម្រេច appeared first on Kampuchea Thmey Daily.

អភិបាលក្រុង Kyiv និយាយថា អត្តពលិករុស្ស៊ី ត្រូវតែបរិហារប្រទេសខ្លួនឯង ដើម្បីអាចចូលរួមប្រកួតកីឡាអូឡាំពិក ២០២៤

អ៊ិន ពិសី — Tue, 14 Feb 2023 04:28:18 +0000

អត្តពលិករុស្ស៊ី គួរតែបរិហារជាសាធារណៈចំពោះសង្គ្រាម ប្រសិនបើពួកគេត្រូវបានអនុញ្ញាតឲ្យចូលរួមក្នុងកីឡាអូឡាំពិក ឆ្នាំ ២០២៤ នៅទីក្រុងប៉ារីស ប្រទេសបារាំង នេះបើយោងតាមសម្ដីរបស់ អភិបាលក្រុង Kyiv និងជាអតីតជើងឯកប្រដាល់ពិភពលោក លោក Vitali Klitschko បានប្រាប់ AFP កាលពីថ្ងៃចន្ទ ទី ១៣ ខែកុម្ភៈ។

លោក Klitschko បាននិយាយថា «អត្តពលិករុស្ស៊ី និងបេឡារុស មិនអាចចូលរួមក្នុងការប្រកួតកីឡាអូឡាំពិកនៅទីក្រុងប៉ារីសបានទេ ប្រសិនបើពួកគេមិននិយាយថា “ទេ” ចំពោះសង្គ្រាម។

“ប្រសិនបើពួកគេបង្ហាញជាសាធារណៈប្រឆាំងនឹងសង្គ្រាមនេះ ពួកគេអាច (ចូលរួម)។ ប៉ុន្តែពួកគេខ្លាច»។

ប្រទេសរុស្សី និងសម្ព័ន្ធមិត្ត បេឡារុស ដែលអនុញ្ញាតឲ្យទឹកដីរបស់ខ្លួន ប្រើប្រាស់ជាកន្លែងបាញ់បង្ហោះ នៅពេលដែលទីក្រុងម៉ូស្គូ ចាប់ផ្ដើមការលុកលុយអ៊ុយក្រែន កាលពីខែកុម្ភៈកន្លងទៅនោះ ត្រូវបានដកចេញពីកីឡាអូឡាំពិកជាច្រើន ចាប់តាំងពីសង្គ្រាមបានចាប់ផ្ដើម។

ប្រធានាធិបតីអ៊ុយក្រែន លោក Volodymyr Zelensky បានអំពាវនាវឲ្យធ្វើពហិការកីឡាអូឡាំពិក ទីក្រុងប៉ារីស ឆ្នាំ ២០២៤ ប្រសិនបើអត្តពលិករុស្ស៊ី ត្រូវបានអនុញ្ញាតឲ្យចូលរួម។

លោក Klitschko បានអំពាវនាវដល់អត្តពលិកឲ្យ “ប្រាប់រដ្ឋាភិបាលរបស់អ្នកឲ្យបញ្ឈប់សង្គ្រាមដែលគ្មានន័យនេះ”។

ទីក្រុង Kyiv បានប្រតិកម្មយ៉ាងខឹងសម្បាចំពោះការប្រកាសរបស់គណៈកម្មាធិការអូឡាំពិកអន្តរជាតិ (IOC) កាលពីខែមុន ដែលថាខ្លួនកំពុងស្វែងរក “ផ្លូវ” ដើម្បីអនុញ្ញាតឲ្យគូប្រជែងរុស្ស៊ី និងបេឡារុស ចូលរួមក្នុងការប្រកួតកីឡាអូឡាំពិក ប៉ារីស ២០២៤ ក្រោមទង់ជាតិអព្យាក្រឹត។

ប្រធានអូឡាំពិក លោក Thomas Bach បាននិយាយកាលពីថ្ងៃអាទិត្យថា លោកបានចែករំលែក “ទុក្ខសោក និងទុក្ខវេទនារបស់មនុស្ស” របស់អត្តពលិកអ៊ុយក្រែន ប៉ុន្តែបាននិយាយថា វាមិនមែនអាស្រ័យលើរដ្ឋាភិបាលនីមួយៗក្នុងការសម្រេចចិត្តថា តើអ្នកណាចូលរួមក្នុងការប្រកួតកីឡាអន្តរជាតិនោះទេ។

លោក Klitschko និយាយទៀតថា «ខ្ញុំពិតជារីករាយណាស់ក្នុងការអញ្ជើញ លោក Thomas Bach មកកាន់ទីក្រុង Kyiv ប្រទេសអ៊ុយក្រែន ដូច្នេះគាត់អាចឃើញដោយខ្លួនឯងនូវភូមិដែលត្រូវបានបំផ្លាញ ទីក្រុងនានា ដើម្បីមើលថាតើមានមនុស្សប៉ុន្មាននាក់ត្រូវបានសម្លាប់»។

រដ្ឋមន្ត្រីកីឡាប៉ូឡូញ Kamil Bortniczuk កាលពីថ្ងៃព្រហស្បតិ៍បាននិយាយថា លោករំពឹងថា នឹងមានប្រទេសចំនួន ៤០ នឹងចេញមកប្រឆាំងនឹងការដាក់បញ្ចូលអត្តពលិកមកពីប្រទេសរុស្ស៊ី និងបេឡារុស នៅក្នុងហ្គេម ឆ្នាំ ២០២៤៕

ប្រភព ៖ AFP

អត្ថបទ ៖ មន្នីរ័ត្ន

The post អភិបាលក្រុង Kyiv និយាយថា អត្តពលិករុស្ស៊ី ត្រូវតែបរិហារប្រទេសខ្លួនឯង ដើម្បីអាចចូលរួមប្រកួតកីឡាអូឡាំពិក ២០២៤ appeared first on Kampuchea Thmey Daily.