នាព្រឹកថ្ងៃទី២៦ អគារសិក្សាចំនួន ៥ខ្នង មាន២១បន្ទប់ ត្រូវបានសម្ពោធដាក់ឱ្យប្រើប្រាស់ជាផ្លូវការ ក្រោមអធិបតីបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ ដែលប្រព្រឹត្តទៅ ក្នុងបរិវេណសាលាបឋមសិក្សាសំបូរ ខេត្តព្រះវិហារ ។ អគារសិក្សាចំនួន ៥ខ្នង នេះ រួមមានអគារសិក្សា នៅសាលាបឋមសិក្សាសំបូរ បឋមសិក្សារំដោះ បឋមសិក្សាបង្កន បឋមសិក្សាអូរក្សាន្ត និងបឋមសិក្សាកំប្រាក់ ដែលស្ថិតក្នុងស្រុកគូលែន ស្រុកជាំក្សាន្ត និងស្រុករវៀង ខេត្តព្រះវិហារ។

បើតាមក្រសួងអប់រំ បណ្ឌិតសភាចារ្យ ហង់ជួន ណារ៉ុន បានបង្ហាញសេចក្តីរីករាយ ចំពោះការដាក់ឱ្យប្រើប្រាស់ជាផ្លូវការអគារសិក្សាថ្មីចំនួន ៥ខ្នង។ រដ្ឋមន្ត្រីបញ្ជាក់ថា សមិទ្ធផលថ្ងៃនេះ ពិតជាបានឆ្លុះបញ្ចាំងពីតួនាទីដ៏មានសារៈសំខាន់របស់ដៃគូអភិវឌ្ឍន៍ និងសហគមន៍មូលដ្ឋានដែលបានរួមគ្នាអភិវឌ្ឍធនធានមនុស្ស ដើម្បីធ្វើឱ្យកុមារគ្រប់រូប ជាពិសេស កុមារដែលរស់នៅទីជនបទដាច់ស្រយាល មានឱកាសទទួលបានការអប់រំប្រកបដោយគុណភាព និងទទួលបានអារម្មណ៍កក់ក្តៅចេញពីសហគមន៍មូលដ្ឋាន។

ជាមួយគ្នានេះ លោក ជេនេស អ៉ីម៉ានូអ៊ែល ហ្គីនទីញ នាយកប្រចាំប្រទេសអង្គការទស្សនៈពិភពលោកអន្តរជាតិ ប្រចាំនៅកម្ពុជា បានលើកឡើងថា ៖ “អគារសិក្សាទាំងនេះ ដែលមានទីតាំងនៅតំបន់ដាច់ស្រយាល និងពិបាកទៅដល់ គឺជាខ្សែជីវិតសម្រាប់កុមារ។ រួមគ្នាជាមួយដៃគូរបស់យើង យើងធានាថាកុមារគ្រប់រូបមានកន្លែងសុវត្ថិភាពក្នុងការសិក្សាររៀនសូត្រ ការស្តារឡើងវិញ និងការកសាងអនាគតកាន់តែប្រសើរ។ នេះមិនត្រឹមតែជាការវិនិយោគលើហេដ្ឋារចនាសម្ព័ន្ធប៉ុណ្ណោះទេ ប៉ុន្តែនៅក្នុងក្តីសង្ឃឹម ភាពធន់ និងការផ្លាស់ប្រែជីវិត”។

បើតាមអង្គការទស្សនៈពិភពលោក អាគារសិក្សានេះ ត្រូវបានសាងសង់នៅតំបន់ដាច់ស្រយាលបំផុតមួយចំនួន ហើយរំពឹងថានឹងគាំទ្រដល់ការរៀនសូត្ររបស់កុមារជាង ៥០០ នាក់ នៅក្នុងភូមិចំនួន ៥ ជារៀងរាល់ឆ្នាំ រួមទាំងអ្នកដែលរងផលប៉ះពាល់ដោយជម្លោះព្រំដែននាពេលថ្មីៗនេះ ដែលជាមូលដ្ឋានគ្រឹះដ៏រឹងមាំសម្រាប់ការសិក្សា និងអនាគតរបស់ពួកគេ។ ជាមួយគ្នានេះ តាមរយៈអាគារសិក្សាទាំងនេះនឹងផ្តល់កន្លែងសិក្សាប្រកបដោយសុវត្ថិភាព ងាយស្រួលដល់កុមារ និងមានភាពធន់សម្រាប់កុមារដែលប្រឈមមុខនឹងការរំខានដោយសារតែការផ្លាស់ទីលំនៅ និងអស្ថិរភាព។ បន្ថែមពីនេះ គម្រោងនេះ ក៏បានបំពាក់អគារសិក្សាជាមួយនឹងប្រព័ន្ធថាមពលពន្លឺព្រះអាទិត្យ និងបង្គន់អនាម័យ ធានាឱ្យមានចរន្តអគ្គិសនីប្រើប្រាស់ និងលើកកម្ពស់អនាម័យសម្រាប់សិស្សានុសិស្ស និងលោកគ្រូអ្នកគ្រូផងដែរ។ សាលារៀនត្រូវបានគេរំពឹងថា នឹងជួយបង្កើនអត្រាចុះឈ្មោះចូល កាត់បន្ថយអត្រាបោះបង់ការសិក្សា និងបង្កើនលទ្ធផលសិក្សានៅក្នុងសហគមន៍ដែលខ្វះខាត។

ក្នុងឱកាសនោះ ក្រសួងអប់រំ បានដាក់ចេញអនុសាសន៍ ៤ ចំណុច ដើម្បីលើកកម្ពស់គុណភាពការអប់រំ នៅកម្រិតបឋមសិក្សា។ ទី១.ខិតខំកសាង «បណ្តាញគ្រូបង្រៀនល្អ-នាយកល្អ តាមស្រុកខេត្ត» ឱ្យបានរឹងមាំ ដើម្បីលើកទឹកចិត្តដល់ការផ្លាស់ប្តូរបទពិសោធឧត្តមានុវត្តន៍ និងការដោះស្រាយបញ្ហាប្រឈមប្រកបដោយទស្សនច្នៃប្រឌិត លើការងារដឹកនាំគ្រប់គ្រងសាលារៀន និងវិធីសាស្ត្របង្រៀនថ្មីៗ។ ទី២ ជំរុញ និងលើកទឹកចិត្តការចូលរួមរបស់ដៃគូអភិវឌ្ឍ មាតាបិតា អ្នកអាណាព្យាបាល និងសហគមន៍ក្នុងការអប់រំ ស្របតាមពាក្យស្លោក «ភាពជាដៃគូរដ្ឋ និងសហគមន៍» ដើម្បីការអប់រំនៅក្នុងមូលដ្ឋាន។ ទី៣ បន្តកសាងប្រព័ន្ធលើកទឹកចិត្តនៅថ្នាក់ក្រោមជាតិ ដើម្បីលើកទឹកចិត្តដល់គ្រូល្អ នាយកល្អនៅតាមសាលារៀនក្នុងតំបន់របស់ខ្លួន។ ចំណុចចុងក្រោយ ក្រសួងនឹងនៅតែបន្តជំរុញ និងពង្រឹងភាពជាដៃគូរវាងស្ថាប័នពាក់ព័ន្ធជាមួយសាលានៅតាមព្រំដែន ដើម្បីផ្ដល់អាទិភាព និងឱកាសដល់ការអភិវឌ្ឍសាលារៀននៅតាមតំបន់ព្រំដែនឱ្យមានភាពរីកចម្រើន។ ជាមួយគ្នានេះ រដ្ឋបាលខេត្តព្រះវិហារដែលជាអាណាព្យាបាល សូមចូលរួមសម្របសម្រួល និងគាំទ្រ បន្ថែម ដើម្បីធានាការអនុវត្តអនុស្សរណៈនៃយោគយល់គ្នានេះ ឱ្យមានប្រសិទ្ធភាពផងដែរ៕

The post អគារ​សិក្សាថ្មី​​ ​៥ខ្នង ត្រូវបានផ្តល់ជូនសាលារៀននៅតំបន់ដាច់ស្រយាលចំនួន ៥ ក្នុងខេត្តព្រះវិហារ appeared first on Kampuchea Thmey Daily.

យោងតាមទិន្នន័យរបស់ UNICEF ដែលផ្សាយដោយសារព័ត៌មាន Al Jazeera, មានកុមាររហូតដល់ទៅ ១៩២នាក់ត្រូវបានសម្លាប់ក្នុងសង្គ្រាមនេះ ខណៈរាប់រយនាក់ទៀតរងរបួស។

ក្នុងចំណោមកុមារទាំង១៩២នាក់នោះ មាន១៨១នាក់ទៅហើយដែលស្លាប់ក្នុងប្រទេសអ៊ីរ៉ង់ ជាពិសេសការវាយប្រហារលើសាលារៀននៅសាលាបឋមសិក្សាកុមារី Shajareh Tayyebeh ក្នុងក្រុង Minab រីឯ៧នាក់ស្លាប់លីបង់ ៣នាក់នៅអ៊ីស្រាអែលនិងម្នាក់នៅគុយវ៉ែត។ 

យោងតាមរបាយការណ៍ដដែលនោះ, ភាគច្រើននៃកុមារដែលស្លាប់ គឺមានអាយុចន្លោះពី ៧ ដល់ ១២ ឆ្នាំ ហើយសាលារៀនយ៉ាងតិច ២០ និងមន្ទីរពេទ្យ ១០ បានរងការខូចខាត។

ជុំវិញបញ្ហានេះ UNICEF និយាយថា៖ «កុមារមិនមែនជាអ្នកបង្កសង្គ្រាមទេ ប៉ុន្តែពួកគេបែរជាអ្នកដែលរងទុក្ខធំ ដែលមិនអាចទទួលយកបានទៅវិញ។ ការកើនឡើងនូវអំពើយោធានៅទូទាំងតំបន់មជ្ឈិមបូព៌ា បានជះឥទ្ធិពលយ៉ាងធ្ងន់ធ្ងររួចទៅហើយដល់កុមារ»។

យ៉ាងណា ពាក់ព័ន្ធសោកនាដកម្មនៅសាលា Shajareh Tayyebeh, រដ្ឋាភិបាលទីក្រុងវ៉ាស៊ីនតោន បានប្រកាសបើកការស៊ើបអង្កេតជាផ្លូវការរួចហើយ។

រដ្ឋមន្ត្រីការពារជាតិអាមេរិក Pete Hegseth បានចេញមុខមកបកស្រាយថា ខាងក្រសួងការពារជាតិកំពុងតាមដាន និងពិនិត្យមើលរឿងនេះយ៉ាងដិតដល់បំផុត ប៉ុន្តែលោកសង្កត់ធ្ងន់យ៉ាងម៉ឺងម៉ាត់ថា កងទ័ពអាមេរិកប្រកាន់ខ្ជាប់នូវគោលការណ៍មិនកំណត់គោលដៅលើទីតាំងស៊ីវិលឡើយ។

ទោះបីជាមានការបកស្រាយបែបនេះក្តី ក៏អភិបាលក្រុង Minab លោក Mohammad Radmehr បានបញ្ជាក់យ៉ាងច្បាស់ថា គ្រាប់បែកបានធ្លាក់ចំកណ្តាលអាគារសាលារៀនពេញទំហឹង។

រដ្ឋាភិបាលក្រុងតេហេរ៉ង់បានចោទប្រកាន់ចំៗទៅលើសហរដ្ឋអាមេរិក និងអ៊ីស្រាអែលថា ជាអ្នកនៅពីក្រោយ «ឧក្រិដ្ឋកម្មសង្រ្គាម» ដ៏សាហាវឃោរឃៅមួយនេះ៕

អត្ថបទ៖ សុខ សុវណ្ណ

The post UNICEF៖ កុមារជិត ២០០នាក់ ស្លាប់ក្នុងសង្គ្រាមអ៊ីរ៉ង់  appeared first on Kampuchea Thmey Daily.

លោក ង៉ែត ឡឹង ប្រធាន​មន្ទីរអប់រំ យុវជន និង​កីឡា​ខេត្ត​កោះកុង ថ្លែង​ថា កុមារ មាន​ប្រព័ន្ធ​រាងកាយ និង​បញ្ញា​កំពុង​អភិវឌ្ឍន៍ និង​មិន​មាន​សមត្ថភាព​ល្អ​ដូច​មនុស្ស​ពេញវ័យ​ទេ ក្នុង​ករណី​ខ្លះ កុមារ ត្រូវ​បាន​បោះបង់​ការ​សិក្សា ដើម្បី​ចូលរួម​បង្កើន​ប្រាក់ចំណូល​សម្រាប់​គ្រួសារ ជា​ក្រុម​ងាយ​ទទួល​រង​ហានិភ័យ​នឹង​ជំងឺ និង​ហានិភ័យ ផ្សេងៗ ដែល​បណ្តាល​មកពី​ការ​ប្រែប្រួល​អាកាសធាតុ។

ក្នុង​សិក្ខាសាលា​បិទ​បញ្ចប់​គម្រោង​លើក​កម្ពស់​ជីវភាព​ពលរដ្ឋ​ប្រកប​ដោយ​ភាព​ធន់ និងបន្សុំាការ​ប្រែប្រួល​អាកាសធាតុ លោក ង៉ែត ឡឹង បាន​បន្ត​ទៀត​ថា ទោះ​យ៉ាងណា ក្នុង​បរិបទ​នេះ វិស័យ​អប់រំ និង​វិស័យ​បរិស្ថាន មាន​ការ​ភ្ជាប់​គ្នា​យ៉ាង​ជិតស្និទ្ធ។ សាលារៀន ជា​កន្លែង​ដែល​ងាយ​រងគ្រោះ​ពី​ហានិភ័យ​អាកាសធាតុ ប៉ុន្តែ​ក៏​ជា​កន្លែង​សំខាន់​សម្រាប់​ការ​កសាង​ចំណេះដឹង ការ​យល់ដឹង​ក្នុង​ការ​សាង​ធនធាន​មនុស្ស​ប្រកប​ដោយ​គុណភាព ដើម្បី​ចូលរួម​ដោះស្រាយ​បញ្ហា​កំពុង​កើតមានឡើង និង​នវានុវត្តន៍​ថ្មីៗ ផង​ដែរ។ ដូច្នេះ ការ​ពង្រឹង​ប្រព័ន្ធ​អប់រំ​ឲ្យ​មាន​ភាព​ធន់​នឹង​អាកាសធាតុ គឺជា​ផ្នែក​សំខាន់ នៃ​ការ​ឆ្លើយតប​នូវ​ផែនការ និង​គោលនយោបាយ ក៏ដូចជា​គោលដៅ​អភិវឌ្ឍន៍​ដោយ​ចីរភាព​របស់​ពិភពលោក។

បច្ចុប្បន្ន ខេត្ត​កោះកុង កំពុង​ផ្តល់​ផល​ប៉ះពាល់​ដោយសារ​តែ​ការ​ប្រែប្រួល​អាកាសធាតុ​ទៅ​លើ​កុមារ និង​ប្រព័ន្ធ​អប់រំ​នៅ​សកលលោក រួម​ទាំង​ប្រទេស​កម្ពុជា ដោយសារ​កុមារ គឺជា​ក្រុម​មនុស្ស​ងាយ​រង​គ្រោះ​វ័យក្មេង និង​ត្រូវការ​អភិវឌ្ឍន៍​ខ្លួន​ជាប្រចាំ។ ការ​កើន​ឡើង​ហានិភ័យ នៃ​អាកាសធាតុ ដូចជា រលក​កម្ដៅ , ទឹកជំនន់ , គ្រោះ​រាំងស្ងួត និង​ខ្យល់ព្យុះ មាន​ឥទ្ធិពល​យ៉ាង​ខ្លាំង​លើ​សុខភាព សន្តិភាព និង​សេដ្ឋកិច្ច​សង្គម​ទូទៅ ជាពិសេស​ប៉ះពាល់​ដល់​សកម្មភាព​របស់​កុមារ​ក្នុង​ការ​ទទួល​បាន​ការ​អប់រំ​ប្រកប​ដោយ​និរន្តរភាព និង​សេវា​សុខភាព។

ដោយឡែក លោក រស់ ច័ន្ទ​បូរិទ្ធ ប្រធាន​អភិវឌ្ឍន៍​កម្មវិធី​គុណភាព និង​ផល​ជះ នៃ​អង្គការ Save the Children បាន​ឲ្យ​ដឹង​ថា អង្គការ​របស់​លោក សហការ​ជាមួយ​ភាគី​ពាក់ព័ន្ធ បាន​អនុវត្ត​លើ​ការ​សម្រប​ខ្លួន​នឹង​ការ​ប្រែប្រួល​អាកាសធាតុ​នៅ​តាម​សាលារៀន បង្កើន​ផល​កសិកម្ម​ស្វែងរក​ប្រាក់ចំណូល និង​ការ​សន្សំ​ប្រាក់​ក្នុង​ចំណោម​ស្ត្រី និង​កសិករ​វ័យ​ចាស់​ដែល​ជួយ​ពង្រឹង​ភាព​ធន់ នៃ​សេដ្ឋកិច្ច​គ្រួសារ។

លោក រស់ ច័ន្ទ​បូរិទ្ធ អះអាង​ថា លោក និង​ដៃគូ​អភិវឌ្ឍន៍ នឹង​បន្ត​ពង្រឹង​សកម្មភាព​នេះ ទៅកាន់​សហគមន៍ និង​ពង្រឹង​បន្សុំា​ខ្លួន​នឹង​អាកាសធាតុ​កាន់តែ​ច្រើន​បន្ថែម​ទៀត ដើម្បី​និរន្តរភាព នៃ​ការ​សិក្សា និង​សុវត្ថិភាព​កុមារ។

លោកស្រី ឈី វ៉ា អភិបាល​ខេត្ត​កោះកុង ថ្លែង​កោតសរសើរ​ពី​លទ្ធផល​ការងារ​សម្រេច​បាន​កន្លង​ទៅ រយៈពេល ២ ឆ្នាំ ចុងក្រោយ គ្រប់​ភាគី​ពាក់ព័ន្ធ បាន​ខិតខំ​ប្រឹងប្រែង​យ៉ាង​សកម្ម​ចំពោះ​ការ​ចូលរួម​ចំណែក​ឆ្លើយតប​ទៅ​នឹង​គោលនយោបាយ​ជាតិ ដើម្បី​កាត់បន្ថយ​ភាព​ក្រីក្រ ការ​កាត់បន្ថយ និង​បន្សុំា​ទៅ​នឹង​ការ​ប្រែប្រួល​អាកាសធាតុ​នៅ​ក្នុង​ប្រទេស​កម្ពុជា និង​ខេត្ត​កោះកុង។

លោកស្រី ឈី វ៉ា ចាត់ទុកថា ជា​ការ​កសាង​ធនធាន​មនុស្ស​នៅ​កម្រិត​មូលដ្ឋាន លើ​ចំណេះដឹង និង​ជំនាញ​បច្ចេកទេស ដើម្បី​ជំរុញ​កំណើន​សេដ្ឋកិច្ច​គ្រួសារ និង​ការ​ដោះស្រាយ​រួមគ្នា​ចំពោះ​និន្នាការ​ការ​ប្រែប្រួល​អាកាសធាតុ និង​គ្រោះ​មហន្តរាយ​នៅ​កម្ពុជា និង​ក្នុង​ខេត្ត​កោះកុង។

លោកស្រី​អភិបាលខេត្ត​កោះកុង រំលេច​ដែរ​ថា រាជរដ្ឋាភិបាល​កម្ពុជា លើកទឹកចិត្ត​ឲ្យ​មាន​ការ​ចូលរួម​ពី​គ្រប់​ភាគី​ពាក់ព័ន្ធ ដើម្បី​រួមគ្នា​ក្នុង​ការ​ឆ្លើយតប​ទៅ​នឹង​តម្រូវការ​របស់​ប្រជាជន ដោយ​យល់ថា​ វិស័យ​កសិកម្ម វិស័យ​អប់រំ វិស័យ​ឧស្សាហកម្ម ជា​វិស័យ​អាទិភាព​សម្រាប់​ជំរុញ​កំណើន​សេដ្ឋកិច្ច​ប្រជាពលរដ្ឋ និង​សេដ្ឋកិច្ច​ជាតិ៕

អត្ថបទ ៖ សិរីវឌ្ឍនៈ

The post ការប្រែប្រួលអាកាសធាតុ កំពុងធ្វើឲ្យប្រព័ន្ធរាងកាយ និងស្មារតីកុមារ ចុះថយសមត្ថភាព appeared first on Kampuchea Thmey Daily.

ឆ្លើយតបទៅនឹងកុមារ និងគ្រួសារដែលរងគ្រោះដោយសារវិបត្តិនេះ អង្គការយូនីសេហ្វប្រចាំកម្ពុជា ក្រោមកិច្ចសហការជាមួយ ក្រសួងសង្គមកិច្ច អតីតយុទ្ធជន និងយុវនីតិសម្បទា កំពុងបង្កើត «ទីកន្លែងកុមារមេត្រី» ជាកន្លែងដែលអនុញ្ញាតឱ្យកុមារភៀសសឹកអាចលេងកម្សាន្ត រៀនសូត្រ និងមានអារម្មណ៍សុវត្ថិភាពឡើងវិញ។ នេះតាមការបង្ហោះរបស់ទំព័រហ្វេសប៊ុក UNICEF Cambodia កាលពីថ្ងៃទី២៤ ខែធ្នូ ឆ្នាំ២០២៥។

អង្គការយូនីសេហ្វ បានឱ្យដឹងថា បុគ្គលិកសង្គមកិច្ចកំពុងទទួលបានការគាំទ្រ និងការបណ្តុះបណ្តាលដើម្បីគ្រប់គ្រងទីតាំងទាំងនេះប្រកបដោយប្រសិទ្ធភាព ដើម្បីពិគ្រោះយោបល់ និងផ្តល់ប្រឹក្សា ដើម្បីលើកកម្ពស់សុខភាពផ្លូវចិត្ត កាត់បន្ថយភាពតានតឹងរបស់កុមារ និងគ្រួសារ។

ដោយឡែក តាមរយៈកិច្ចសហការជាមួយ ក្រសួងអភិវឌ្ឍន៍ជនបទ Ministry of Rural Development យូនីសេហ្វ បាននឹងកំពុងចែកចាយសម្ភារៈអនាម័យ ទឹកស្អាត និងជំរុញការអនុវត្តអនាម័យឱ្យបានត្រឹមត្រូវ ដើម្បីជួយការពារសុខភាពរបស់គ្រួសារភៀសសឹកផងដែរ។

ទន្ទឹមនឹងនេះ យូនីសេហ្វ ក៏កំពុងសហការជាមួយក្រសួងអប់រំ យុវជន និងកីឡា MoEYS Cambodia ដើម្បីរៀបចំទីកន្លែងសិក្សាបណ្តោះអាសន្ន ដោយបាននាំយកសម្ភារៈបង្រៀន និងរៀនសូត្រទៅកាន់ជំរំភៀសសឹកនានា ដើម្បីឱ្យកុមារអាចបន្តទទួលបានការសិក្សា ទោះបីជាស្ថិតក្នុងកំឡុងពេលដែលមានវិបត្តិក៏ដោយ៕

The post យូនីសេហ្វបង្កើត«ទីកន្លែងកុមារមេត្រី» សម្រាប់កុមារភៀសសឹកលេងកម្សាន្ត និងរៀនសូត្រ appeared first on Kampuchea Thmey Daily.

នៅក្នុង​សេចក្តីប្រកាស​ព័ត៌មាន​ស្តីពី​ការរកឃើញ​ការកើនឡើង​ នៃ​ជំងឺ​ពងបែក ដៃ ជើង និង​មាត់ ចេញផ្សាយ​កាលពី​ល្ងាច​ថ្ងៃទី ​១៦ ​កញ្ញា ក្រសួងសុខាភិបាល ​បាន​ណែនាំ​ដល់​ប្រជាពលរដ្ឋ​ ត្រូវ​ប្រកាន់​ខ្ជាប់​នូវ​ការ​អនុវត្ត​អនាម័យ លាង​សម្អាត​ដៃ​ឱ្យ​បាន​ញឹកញាប់ ជាមួយ​សាប៊ូ និង​ទឹក លាងដៃ​កុមារ​ឱ្យ​បាន​ញឹកញាប់​ជាមួយ​ទឹក ​និង​សាប៊ូ ឬ​ជាមួយ​អាល់កុល ​ជាពិសេស​ក្រោយ​ប៉ះ​ពងបែក ឬ ដំបៅ មុន​ពេល​រៀបចំ​អាហារ មុនពេល​បរិភោគ មុន​បញ្ចុក​ចំណី​ដល់​ទារក ឬ កុមារ ក្រោយ​ប្រើប្រាស់​បង្គន់​អនាម័យ និង​ក្រោយ​ប្តូរ​ទ្រនាប់​គូទ​ទារក ឬ​ជូត​សម្អាត​រាងកាយ​កុមារ លាង​សំអាត​ផ្ទៃ​ និង​របស់ ដែល​ប្រឡាក់​ដោយ​ទឹក ​និង​សាប៊ូ​ ចៀសវាង​ការ​ប៉ះពាល់​ស្និទ្ធស្នាល (​ថើប ឱប ប្រើប្រាស់​សម្ភារៈ​សម្រាប់​បរិភោគ​រួមគ្នា។ល។​) ជាមួយ កុមារ​ដែលមាន​ជំងឺ​ពងបែក ដៃ ជើង និង​មាត់ ប្រើ​ស្លាបព្រា និង​ចាន ដាច់ដោយឡែក សម្រាប់​កុមារ​ម្នាក់ៗ និង​សូម​ឱ្យ​កុមារ​នៅផ្ទះ​នៅ​ពេល​មាន​ជំងឺ កុំ​ទៅ​សាលារៀន ​ឬ​មណ្ឌល​ទារកដ្ឋាន។

លើសពីនេះ​ ឪពុកម្តាយ ​និង​អ្នក​ថែទាំ​កុមារ ត្រូវ​រក្សា​ការ​ប្រុងប្រយ័ត្ន​ចំពោះ​រោគសញ្ញា​ នៃ​ជំងឺ ដើម្បី​រក​ឱ្យ​ឃើញ​ទាន់​ពេល ស្វែងរក​ការពិគ្រោះ​យោបល់ និង​ការពិនិត្យ​ព្យាបាល នៅ​មណ្ឌល​សុខភាព ឬ​មន្ទីរពេទ្យ ដែល​នៅ​ជិត​ជាបន្ទាន់ ចៀសវាង​ការពន្យារពេល​ធ្វើឱ្យ​ប្រឈម​នឹង​ហានិភ័យ​ខ្ពស់ ​នៃ​ផល​វិបាក​ជំងឺ ផ្តល់​អាហារ​មាន​ជីវជាតិ​ច្រើន និង​ទឹក​ឱ្យ​បាន​ច្រើន​ដល់​កុមារ​ និង​សូម​កុំ​ទៅ​ជួបជុំ ឬ​ទីប្រជុំជន​មាន​មនុស្ស​ច្រើន នៅពេល​មាន​ជំងឺ​ពងបែក​ដៃ ជើង និង​មាត់។

បើតាម​ក្រសួងសុខាភិបាល​ ជំងឺ​ពងបែក​ដៃ ជើង និង​មាត់ គឺជា​ជំងឺឆ្លង​មួយ​ប្រភេទ​បង្ក​ដោយ​ពពួក​អង់​តេ​រ៉ូ​វីរុស ជា​ញឹកញាប់​ គឺ ពួក​វីរុស​កុក​សា​គី ភាគច្រើន​កើត​លើ ទារក និង​កុមារ ប៉ុន្តែ​ក៏​អាច​កើត​លើ​មនុស្ស​ពេញវ័យ​ផង​ដែរ។

ជំងឺ​ពងបែក ដៃ ជើង និង​មាត់ អាច​ឆ្លង​ពី​មនុស្ស​ម្នាក់​ទៅ​មនុស្ស​ម្នាក់ទៀត តាមរយៈ​ការ​ប៉ះពាល់​ដោយ​ផ្ទាល់​ជាមួយ​នឹង​វត្ថុ​រាវ​ នៃ​ផ្លូវ​ដង្ហើម (​ទឹកមាត់ កំហាក និង​សំបោរ​) ទឹករងៃ ដែល​ចេញពី​ពង​បែក លាមក​អ្នកជំងឺ​។ អ្នកជំងឺ​អាច​ចម្លង​ខ្លាំង​បំផុត​ក្នុង​សប្ដាហ៍​ទីមួយ​។ ជំងឺ​ពងបែក ដៃ ជើង និង​មាត់ មិន​ឆ្លង​ពី​មនុស្ស ទៅ​សត្វ​ ឬ​ពី​សត្វ​មក​មនុស្ស​ឡើយ។

ជំងឺ​នេះ​មាន​រោគសញ្ញា​ដូច​ជា​មាន​គ្រុនក្តៅ មាន​ដំបៅ​ឈឺ​ក្នុង​មាត់ និង មាន​ពង​កន្ទួល​លើ​បាតដៃ បាត​ជើង និង កំប៉េះគូទ ជំងឺ​ពងបែក ដៃជើង និង​មាត់ ភាគច្រើន​មាន​ស្ថានភាព​ស្រាល អ្នកជំងឺ​ស្ទើរ​តែ​ទាំងអស់​ជាសះស្បើយ ក្នុង​រយៈពេល​ពី ៧ ​ថ្ងៃ ទៅ ​១០ ​ថ្ងៃ ហើយ​កម្រ​មាន​ផលវិបាក​ណាស់។ ប៉ុន្តែ​អ្នកជំងឺ​អាច​ត្រូវការ​ថ្នាំ​បញ្ចុះ​កម្ដៅ ថ្នាំ​បំបាត់​ការ​ឈឺចាប់ ដែល​បណ្តាល​មកពី​ពងបែក​ក្នុង​មាត់ តែ​មិន​ត្រូវ​ប្រើ​ថ្នាំ អាស្ពីរីន (aspirin) ដើម្បី​បញ្ចុះ​កម្ដៅ​ឡើយ។

ក្រសួងសុខាភិបាល បាន​បញ្ជាក់​ថា ជា​កម្រ ជំងឺ​ពងបែក ដៃ ជើង និង​មាត់ អាច​បង្ក​ឱ្យ​មាន​ផលវិបាក​ធ្ងន់ធ្ងរ​មួយ​ចំនួន រួមមាន រោគសញ្ញា ប្រព័ន្ធ​ប្រសាទ (​សន្លឹម ប្រកាច់ ឬ កន្ត្រាក់​ដៃជើង​) និង​រោគសញ្ញា​ផ្លូវ​ដង្ហើម (​ពិបាក​ដកដង្ហើម ហត់​) សូម​បញ្ជាក់​ ៖ អ្នកជំងឺ​ដែល​មាន​ផលវិបាក​ធ្ងន់ធ្ងរ​ខាង​លើ​នេះ ត្រូវ​ប្រញាប់​បញ្ជូន​ជាបន្ទាន់​ទៅ​មណ្ឌល​សុខភាព ឬ​មន្ទីរពេទ្យ ដែល​នៅ​ជិត​បំផុត ចៀសវាង​ការ​ពន្យារពេល ធ្វើ​ឱ្យ​ប្រឈម​នឹង​ហានិភ័យ​ខ្ពស់ នៃ​ជំងឺ៕

អត្ថបទ ៖ សំអឿន

The post ក្រសួងសុខាភិបាល ឱ្យបង្កើនការប្រុងប្រយ័ត្នជំងឺពងបែកដៃ ជើង និងមាត់ ខណៈជំងឺនេះកើនឡើងខ្ពស់នៅលើកុមារ appeared first on Kampuchea Thmey Daily.

ពាក់ព័ន្ធនឹងការឈ្លានពានរបស់ថៃ លើបូរណភាពទឹកដីកម្ពុជា បណ្ឌិត យង់ ពៅ អ្នកជំនាញភូមិសាស្ត្រនយោបាយ បានសរសេរលើហ្វេសប៊ុក នៅព្រឹកថ្ងៃតី១៩ ខែសីហា ឆ្នាំ២០២៥ ថា ថៃ នៅតែមានមហិច្ឆតាឈ្លានពានកម្ពុជា ហេតុនេះ ត្រូវអប់រំកុមារតូចៗនូវស្មារតីប្រយុទ្ធ ស្មារតីជាតិ ដើម្បីឱ្យពួកគេក្លាហាន រឹងមាំ ប្រកបដោយមនិសិការជាតិ។ លោកបន្តថា តាមរយៈការបណ្តុះនេះ ក្នុងកម្មវិធីអប់រំកាយ គួរបញ្ចូលក្បួនក្បាច់គុនខ្មែរ ឱ្យកុមារហ្វឹកហាត់ពីក្មេងៗ ហើយប្រយោជន៍នៃការហ្វឹកហាត់រាងកាយនេះ នឹងធ្វើឱ្យពួកគេរឹងមាំ ព្រមទាំងលើកកម្ពស់គុនខ្មែរផងដែរ។ មួយវិញទៀត អ្នកជំនាញរូបនេះ លើកឡើងថា ស្ថានភាពពិភពលោកបច្ចុប្បន្នមានការប្រែប្រួល កម្ពុជា ក៏មិនអាចរំពឹងលើការជួយពីអន្តរជាតិទាំងស្រុងដែរ ពោល គឺត្រូវរឹងមាំខ្លួនឯងជាមុនសិនទើបបរទេសអាចជួយតាមក្រោយបាន។

លោកបណ្ឌិត យង់ ពៅ ថា៖ “កម្មវិធីអប់រំកាយ គួរបានបញ្ចូលក្បួនក្បាច់យុទ្ធគុនខ្មែរ ឱ្យកុមារហ្វឹកហាត់ពីក្មេងៗ ប្រយោជន៍ហ្វឹកហាត់រាងកាយរឹងមាំ និងលើកកម្ពស់គុនខ្មែរ។ ប្រទេសក្បែរខាងកម្ពុជា មិនចោលមហិច្ឆតា ឈ្លានពានទេ ប្រសិនបើយើងនៅតែទន់ខ្សោយនឹងបន្តបាត់បង់ រងនូវការប្រមាថបន្តទៀត។ ម្យ៉ាងទៀត ខណៈនេះសណ្ដាប់ធ្នាប់ពិភពលោកក៏ប្រែប្រួលនិងផុយស្រួយ ដូច្នេះអន្តរជាតិមិនអាចជួយយើងបាននោះទេ ប្រសិនបើយើងទន់ខ្សោយពេកទេ”។

លោកបានសង្កត់ធ្ងន់ថា យុវជនត្រូវមានភាពរឹងមាំ និងក្លាហានជាមុន ទើបអន្តរជាតិអាចជួយបាន ហេតុនេះ ត្រូវបណ្តុះបណ្តាលយុវជនឱ្យមានភាពខ្លាំងក្លា។

ចំណែក លោកបណ្ឌិត គិន ភា ប្រធានវិទ្យាស្ថានទំនាក់ទំនងអន្តរជាតិកម្ពុជា នៃរាជបណ្ឌិត្យសភាកម្ពុជា ក៏លើកឡើងមិនខុសពីបណ្ឌិត យង់ ​ពៅ ដែរ។ លោកបណ្ឌិតថា កម្ពុជា ត្រូវបណ្តុះស្មារតីកុមារតាំងពីក្មេងៗទៅតាមរយៈប្រព័ន្ធអប់រំ។ ការបណ្តុះបណ្តាលស្មារតីជាតិក្នុងប្រព័ន្ធអប់រំ នឹងធ្វើឱ្យពួកគេ មានស្មារតីជាតិ មោទនភាពជាតិរឹងមាំ និងស្មោះត្រង់ចំពោះជាតិ។ នេះ បើតាមការសរសេរលើហ្វេសប៊ុក នៅថ្ងៃទី១៨ ខែសីហា ឆ្នាំ២០២៥។

បណ្ឌិត គិន ភា បញ្ជាក់ឱ្យកូនខ្មែរចាំថា៖ “ទឹកដីនេះ នៅកន្លែងណាក៏មានដំណក់ឈាមដូនតាយើងដែរ យើងត្រូវរួមគ្នាការពារឱ្យខាងតែបាន។ ទឹកដីយើងនៅសល់តូចណាស់ទៅហើយ យើងមិនអាចឱ្យបរទេសក្បែរខាងបន្តលេបត្របាក់ទឹកដីយើងតទៅទៀតបានទេ”៕

The post អ្នកជំនាញ៖ ត្រូវអប់រំបណ្តុះបណ្តាលកុមារតាំងពីតូច ដើម្បីឱ្យពួកគេមានភាពរឹងមាំ និងស្មារតីជាតិ appeared first on Kampuchea Thmey Daily.

លោក​វេជ្ជបណ្ឌិត បាន​បន្ត​ថា គិត​ត្រឹម​ខែ​កក្កដា ឆ្នាំ ២០២៥ នេះ ចំនួន​អ្នកជំងឺ​មក​ពិគ្រោះ​ជំងឺ​ក្រៅ​នៅ​មន្ទីរពេទ្យ​កុមារ​ជាតិ​បាន​កើនឡើង ១០% បើ​ធៀប​ទៅនឹង​រយៈពេល ៧ ខែ ដូចគ្នា កាលពី​ឆ្នាំ ២០២៤។ ក្នុងនោះ មាន​អ្នកជំងឺ​ចូល​សម្រាក​ពេទ្យ​ថ្មី​មាន​ប្រមាណ ១៤០ ទៅ ១៥០ នាក់ ក្នុង ១ ថ្ងៃ ហើយ​អ្នកជំងឺ​ប្រភេទ​ជំងឺគ្រុនឈាម ៥០ នាក់ កើន​ឡើង​ទ្វេដង។

លោក​វេជ្ជបណ្ឌិត បន្ត​ទៀតថា ក្នុងចំណោម​អ្នកជំងឺ​មក​ពិគ្រោះ​ជំងឺ​ក្រៅ និង​សម្រាក​ពេទ្យ ក្នុងនោះ អ្នកជំងឺ​បង់ថ្លៃ​សេវា​ធម្មតា ៥០% អ្នកជំងឺ​ប្រើ​បណ្ណ ប​.​ស​.​ស ២៦% អ្នក​ប្រើ​បណ្ណ​មូលនិធិ​សមធម៌​មាន ២០% អ្នកជំងឺ ៣ ទៅ ៤% មិន​មាន​លទ្ធភាព​បង់​ប្រាក់​ត្រូវ​បាន​មន្ទីរពេទ្យ​អនុគ្រោះ ឬ​លើកលែង​ផ្ទាល់។

គួរ​បញ្ជាក់​ថា ឆ្នាំ ២០២៤ មន្ទីរពេទ្យ បាន​ពិនិត្យ​ពិគ្រោះ​ជំងឺ​ក្រៅ​ចំនួន ២០៨,១៧៨ ករណី កើន​ឡើង​ចំនួន ១៥,៨១៤ ស្មើនឹង ៨% អ្នកជំងឺ​សម្រាក​ពេទ្យ​មាន ៣៨,៦៥២ ករណី កើន​ឡើង​ចំនួន ១,២៨៥ ស្មើនឹង ៣% អត្រា​ប្រើប្រាស់​គ្រែ​នៅ​មន្ទីរពេទ្យ​មាន ១០៥% ដោយមាន​គ្រែ​សម្រាក​អ្នកជំងឺ ៤០០ គ្រែ និង​អត្រា​មរណភាព​ក្នុង​មន្ទីរពេទ្យ ឆ្នាំ ២០២៤ ថយ​មក​នៅ​ត្រឹម ០.៦៦% ខណៈ​ឆ្នាំ ២០២៣ មាន ០.៦៩%៕

អត្ថបទ ៖ សំអឿន

The post ក្នុង ១ ថ្ងៃ មានកុមារជាង ១ ២០០ នាក់ ទៅពិគ្រោះជំងឺក្រៅនៅមន្ទីរពេទ្យកុមារជាតិ ភាគច្រើនជាជំងឺរលាកផ្លូវដង្ហើម appeared first on Kampuchea Thmey Daily.

លោក​បណ្ឌិត ហេង សុផាន់ណារិទ្ធ អគ្គនាយករង ប​.​ស​.​ស និង​ជា​អ្នកនាំពាក្យ​ក្រសួង​ការងារ និង​បណ្ដុះបណ្ដាល​វិជ្ជាជីវៈ បាន​មានប្រសាសន៍​នៅ​រសៀល​ថ្ងៃ​ទី ២ កក្កដា នេះ​ថា ក្នុង​ឆមាស​ទី ១ ឆ្នាំ ២០២៥ នេះ មាន​ស្ត្រី​មាន​ផ្ទៃពោះ​ទទួល​បាន​ប្រាក់ឧបត្ថម្ភ​ពី​រាជរដ្ឋាភិបាល​សរុប​ចំនួន ៨៣ ៤៣០ នាក់ កូន​ចំនួន ១២៨ ៧៣៣ នាក់ ដោយ​ចំណាយ​ថវិកា​អស់​ប្រមាណ​ជា ៥៣ ពាន់ ៨៨០ លាន​រៀល ស្មើ​ប្រមាណ​ជា ១៣,៤៧ លាន​ដុល្លារ។

លោក​បណ្ឌិត បាន​បន្ត​ថា ប៉ុន្តែ​បើ​គិត​ចាប់តាំងពី​កម្មវិធី​នេះ​បាន​អនុវត្ត​នៅ​ថ្ងៃទី ១ ខែមករា ឆ្នាំ ២០១៨ គិត​មកដល់​ឆមាស​ទី ១ ឆ្នាំ ២០២៥ នេះ មាន​ស្ត្រី​មាន​ផ្ទៃពោះ​ទទួល​បាន​ប្រាក់ឧបត្ថម្ភ​សរុប​ចំនួន ៦៥៧ ៣១៩ នាក់ កូន​ចំនួន ៦៩០ ៧៩៣ នាក់ ដោយ​ចំណាយ​ថវិកា​អស់​ប្រមាណ​ជា ៣៥០ ពាន់ ៤៤៧ លាន​រៀល ស្មើនឹង​ប្រមាណ ៨៧,៦ លាន​ដុល្លារ។

លោក​បណ្ឌិត បាន​បន្ថែម​ថា រាជរដ្ឋាភិបាល បាន​ផ្តល់​កម្មវិធី​ឧបត្ថម្ភ​សាច់ប្រាក់​ជូន​កម្មករ​-​និយោជិត​ស្ត្រី​មាន​ផ្ទៃពោះ និង​កុមារ​ក្រោម​អាយុ ២ ឆ្នាំ ទាំង​មុន​សម្រាល ពេល​សម្រាល និង​ក្រោយ​សម្រាល ក្នុងនោះ មុនពេល​សម្រាលកូន​ក​ម្មករ​-​និយោជិត​ស្ត្រី​មាន​ផ្ទៃពោះ​ទទួលបាន​ប្រាក់ឧបត្ថម្ភ​ចំនួន ៤ លើក ដោយ ១ លើក ទទួលបាន​ថវិកា ៨ ម៉ឺន​រៀល។ ពេល​សម្រាលកូន ទទួលបាន​ប្រាក់ឧបត្ថម្ភ ដោយ​កូន ១ ទទួលបាន​ថវិកា ៨០ ម៉ឺន​រៀល កូនភ្លោះ ២ ទទួលបាន ១ លាន ២ សែន​រៀល និង​កូនភ្លោះ ៣ ទទួលបាន ១ លាន ៦ សែន​រៀល និង​ទទួលបាន​ការឧបត្ថម្ភ​ពិសេស​បន្ថែម​ពី សម្ដេច​អគ្គមហាសេនាបតី​តេ​ជោ ហ៊ុន សែន និង​សម្ដេច​កិត្តិ​ព្រឹទ្ធ​បណ្ឌិត ចំនួន ៥ លាន​រៀល ទៀតផង​ដែរ។

លោក​បណ្ឌិត បាន​បន្ត​ឱ្យដឹងទៀតថា ក្រោយពេល​សម្រាលកូន​ក​ម្មករ​-​និយោជិត​ស្ត្រី​មាន​ផ្ទៃពោះ​ទទួលបាន​ប្រាក់ឧបត្ថម្ភ​ចំនួន ១០ លើក ដោយ ១ លើក ទទួលបាន ៨ ម៉ឺន​រៀល ក្នុងនោះ ៣ លើក នៅពេល​ទៅ​ទទួល​សេវា​ពិនិត្យ​សុខភាព ក្រោយពេល​សម្រាលកូន និង ៧ លើក​ទៀត នៅពេល​យក​កូន​ទៅ​ទទួល​ថ្នាំ​បង្ការ​រហូតដល់​អាយុ ២ ឆ្នាំ។

លោក​បណ្ឌិត បាន​បញ្ជាក់​ថា កម្មវិធី​ផ្តល់ប្រាក់​ឧបត្ថម្ភ​សម្រាប់​សមាជិក ប​.​ស​.​ស ជា​ស្ត្រី​មាន​ផ្ទៃពោះ និង​កុមារ​អាយុ​ក្រោម ២ ឆ្នាំ គឺជា​គោលនយោបាយ​របស់​រាជរដ្ឋាភិបាល​ក្នុង​គោលបំណង​លើកកម្ពស់​សុខុមាលភាព​មាតា និង​ទារក ព្រមទាំង​រួមចំណែក​ដោះស្រាយ​កង្វះ​អាហារូបត្ថម្ភ​របស់​កុមារ​ចាប់​តាំងពី​កូន​នៅ​ក្នុង​ផ្ទៃ​រហូតដល់​កូន​មាន​អាយុ ២ ឆ្នាំ៕

អត្ថបទ ៖ សំអឿន

The post ៦ ខែ ឆ្នាំនេះ រដ្ឋ ចំណាយថវិកាជាង ១៣ លានដុល្លារ ជូនសមាជិក ប.ស.ស ជាស្ត្រីមានផ្ទៃពោះ និងកុមារអាយុក្រោម ២ ឆ្នាំ appeared first on Kampuchea Thmey Daily.