កូរ៉េខាងជើង Archives - Kampuchea Thmey Daily

យោធាកូរ៉េខាងត្បូង អះអាងថា កូរ៉េខាងជើងបាញ់មីស៊ីលផ្លោងច្រើនគ្រាប់ចូលផែនសមុទ្រជប៉ុន

Minea Neu — Tue, 26 May 2026 08:52:09 +0000

យោធាកូរ៉េខាងត្បូង បានអះអាងថា កូរ៉េខាងជើងបានបាញ់មីស៊ីលផ្លោង«បាលីស្ទិក» រយៈចម្ងាយខ្លីច្រើនគ្រាប់សំដៅទៅសមុទ្រខាងកើតនៃឧបទ្វីបកូរ៉េ (សមុទ្រជប៉ុន) នៅថ្ងៃអង្គារ ដែលជាការបង្ហាញពីសមត្ថភាពអាវុធជាបន្តបន្ទាប់ចុងក្រោយបង្អស់ដោយទីក្រុងព្យុងយ៉ាងនាឆ្នាំនេះ។

យោងតាមភ្នាក់ងារសារព័ត៌មាន AP និង CBS ផ្សាយថ្ងៃទី២៦ ខែឧសភា ឆ្នាំ២០២៦ នាយសេនាធិការចម្រុះកូរ៉េខាងត្បូងនិយាយថា មីស៊ីលទាំងនោះត្រូវបានបាញ់ចេញពីទីក្រុង Jongju នៅឆ្នេរសមុទ្រភាគខាងលិចរបស់កូរ៉េខាងជើង។ ផ្ទៃទឹកនៅទីនោះត្រូវបានគេស្គាល់ថាជាសមុទ្រលឿង ឬសមុទ្រខាងលិច ហើយជាផ្លូវបំបែករវាងឧបទ្វីបរវស់កូរ៉េទាំងពីរនិងប្រទេសចិន។

មីស៊ីលកូរ៉េខាងជើង។ រូបភាព៖ Reuters

សេចក្តីថ្លែងការណ៍ពីនាយសេនាធិការចម្រុះកូរ៉េខាងត្បូងថ្លែងថា ក្រុមយោធាយើងបានពង្រឹងឥរិយាបថឃ្លាំមើល ហើយកំពុងផ្លាស់ប្តូរព័ត៌មានពាក់ព័ន្ធយ៉ាងជិតស្និទ្ធជាមួយសហរដ្ឋអាមេរិក និងជប៉ុន។

គួរបញ្ជាក់ថា ហេតុការណ៍នេះគឺជាការបាញ់បង្ហោះអាវុធលើកដំបូងរបស់កូរ៉េខាងជើង ចាប់តាំងពីថ្ងៃទី១៩ ខែមេសា ពេលទីក្រុងព្យុងយ៉ាងបានបាញ់មីស៊ីលរយៈចម្ងាយខ្លីជាច្រើនគ្រាប់ បង្ហាញពីក្បាលគ្រាប់នុយក្លេអ៊ែរចង្កោម។

យ៉ាងណា មេដឹកនាំកូរ៉េខាងជើង លោក គីម ជុងអ៊ុន បានផ្តោតលើការពង្រីកឃ្លាំងអាវុធនុយក្លេអ៊ែរនិងមីស៊ីលរបស់ខ្លួន ចាប់តាំងពីការចរចាផ្នែកទូតចំពោះកម្មវិធីនុយក្លេអ៊ែរជាមួយប្រធានាធិបតីសហរដ្ឋអាមេរិក លោក ដូណាល់ ត្រាំ ដួលរលំ នៅឆ្នាំ២០១៩ ។

លោក ត្រាំ បង្ហាញគោលបំណងម្តងហើយម្តងទៀតក្នុងការបន្តការចរចាជាមួយ លោក គីម ជុងអ៊ុន ប៉ុន្តែមកទល់ពេលនេះទីក្រុងព្យុងយ៉ាងបានព្រងើយកន្តើយ ចំពោះសំណើនោះ។

នៅព្រឹកថ្ងៃអង្គារ ប្រធានាធិបតីកូរ៉េខាងត្បូង លោក Lee Jae Myung បានអំពាវនាវអំឡុងពេលកិច្ចប្រជុំគណៈរដ្ឋមន្ត្រីសម្រាប់កិច្ចខិតខំប្រឹងប្រែងកាន់តែខ្លាំងឡើង ដើម្បីជំរុញវិស័យយោធារបស់ខ្លួន។

លោកសង្កត់ធ្ងន់លើបញ្ញាសិប្បនិម្មិត(AI) និងសមត្ថភាពដ្រូន ជាពិសេសសក្តានុពលនៃការទិញនាវាមុជទឹកដើរដោយថាមពលនុយក្លេអ៊ែរ តែវាជាបញ្ហាផ្នែកការទូតមួយរបស់កូរ៉េខាងត្បូងជាមួយទីក្រុងវ៉ាស៊ីនតោន៕

សម្រួល៖ ណឺ មិនា

The post យោធាកូរ៉េខាងត្បូង អះអាងថា កូរ៉េខាងជើងបាញ់មីស៊ីលផ្លោងច្រើនគ្រាប់ចូលផែនសមុទ្រជប៉ុន appeared first on Kampuchea Thmey Daily.

សិង្ហបុរី ពង្រឹងវិស័យទូតជាមួយកូរ៉េខាងជើង ស្របពេលការប្រឈមក្នុងពិភពលោក

Rann Reuy — Mon, 25 May 2026 12:00:00 +0000

រដ្ឋមន្ត្រីការបរទេសសិង្ហបុរី បានទៅទស្សនកិច្ចដ៏កម្រទៅកាន់ប្រទេសកូរ៉េខាងជើងដ៏កម្រក្នុងរយៈពេលជិត១ទសវត្សរ៍ចុងក្រោយ បន្ទាប់ពីការផ្លាស់ប្តូរទស្សនកិច្ចចុងក្រោយកាលពីឆ្នាំ១០១៨ ក្នុងអំឡុងពេលនៃការរៀបចំជំនួបកំពូលរបស់មេដឹកនាំអាមេរិក លោក ដូណាល់ ត្រាំ ក្នុងអាណត្តិទី១ និងមេដឹកនាំកូរ៉េខាងជើង លោក គីម ជុងអ៊ុន កាលពីខែមិថុនាឆ្នាំ២០១៨។

បន្ទាប់ពីការពង្រីកទស្សនកិច្ចទៅកាន់ប្រទេសជាច្រើននៅអាមេរិកខាងត្បូង ក្នុងដំណើរទស្សនកិច្ចរួមទៅកាន់អាស៊ីខាងជើង ដោយរួមបញ្ចូលការឈៀងចូលប្រទេសកូរ៉េខាងជើងនោះ ប្រទេសសិង្ហបុរីកំពុងធ្វើពិពិធកម្មវិស័យការទូតដ៏ខ្លាំងក្លាមួយ ស្របពេលដែលពិភពលោកកំពុងតែប្រឈមនិងការបែកបាក់ដ៏ខ្លាំងមិនធ្លាប់មានជាច្រើនទសវត្សរ៍មកហើយ។

រដ្ឋមន្ត្រីការបរទេសសិង្ហបុរី វីវៀន បាឡាគ្រីសណាន់ ចាប់ដៃលោក គីម ជុងអ៊ុន កាលពីឆ្នាំ២០១៨។ ST

សិង្ហបុរី ជាសម្ព័ន្ធមិត្តដ៏ល្អនិងជិតស្និទ្ធរបស់សហរដ្ឋអាមេរិកនៅអាស៊ីអាគ្នេយ៍ ប៉ុន្តែក្នុងសង្គ្រាមពន្ធបដិការដែលប្រធានាធិបតីសហរដ្ឋអាមេរិក លោក ដូណាល់ ត្រាំ ដាក់ចេញ ដើម្បីប្រឆាំងនិងឱនភាពពាណិជ្ជកម្មជាមួយបណ្តារដ្ឋផ្សេងៗ នាយករដ្ឋមន្ត្រីសិង្ហបុរី លោក Lawrence Wong យល់ថា «ច្បាប់ពាណិជ្ជកម្មសេរី» ក្នុងសកលលោក «បានចប់ហើយ»។

ក្នុងបរិបទនៃសង្គ្រាម ដែលបង្កឡើងដោយមហាអំណាច ទាំងនៅអ៊ុយក្រែន និងអ៊ីរ៉ង់ ថ្នាក់ដឹកនាំសិង្ហបុរីមើលឃើញថា សណ្តាប់ធ្នាប់ពិភពលោកដែលពឹងផ្អែកដោយច្បាប់ «ចប់សព្វគ្រប់ហើយ»។

រដ្ឋមន្ត្រីការបរទេសសិង្ហបុរី វីវៀន បាឡាគ្រីសណាន់ (Vivian Balakrishnan) ជាអ្នកនយោបាយជើងចាស់របស់សិង្ហបុរី កំពុងបំពេញទស្សនកិច្ចការងាររយៈពេលប្រាំថ្ងៃ ទៅកាន់ប្រទេសអាស៊ីខាងជើងចំនួនបី ចាប់ពីថ្ងៃអាទិត្យថ្ងៃទី ២៤ ខែឧសភា។

នៅក្នុងសេចក្តីថ្លែងការណ៍មួយ ដែលដកស្រង់ដោយសារព័ត៌មាន Asia One ក្រសួងការបរទេស (MFA) សិង្ហបុរី បាននិយាយថា ដំណើរទស្សនកិច្ចទៅកាន់ប្រទេសចិន សាធារណរដ្ឋប្រជាធិបតេយ្យប្រជាមានិតកូរ៉េ (DPRK) ដែលគេហៅ «កូរ៉េខាងជើង» និងកូរ៉េខាងត្បូង គឺជាផ្នែកមួយនៃកិច្ចខិតខំប្រឹងប្រែងជាបន្តបន្ទាប់របស់ប្រទេសសិង្ហបុរី ដើម្បីចូលរួមជាមួយដៃគូខាងក្រៅ ចំពេលមានបញ្ហាប្រឈមជាសកល។

លោក បាឡាគ្រីសណាន់ ត្រូវបានគេរំពឹងថានឹងជួបជាមួយសមភាគីរបស់លោកនៅក្នុងប្រទេសទាំងបី ដើម្បីបញ្ជាក់ជាថ្មីអំពីចំណងមិត្តភាពទ្វេភាគី។ លោកក៏នឹងផ្លាស់ប្តូរទស្សនៈជាមួយសមភាគីរបស់លោកលើការអភិវឌ្ឍក្នុងតំបន់ និងអន្តរជាតិផងដែរ។

នេះជាលើកទីបួនហើយ ដែលមន្ត្រីនយោបាយសិង្ហបុរីម្នាក់ បានទៅទស្សនកិច្ចប្រទេសកូរ៉េខាងជើង ចាប់តាំងពីការបង្កើតទំនាក់ទំនងការទូតនៅឆ្នាំ ១៩៧៥ ដែលដំណើរទស្សនកិច្ចចុងក្រោយរបស់ រដ្ឋមន្ត្រីការបរទេសសិង្ហបុរី បាឡាគ្រីសណាន់ បានរៀបចំឡើងនៅខែមិថុនា ឆ្នាំ ២០១៨ មុនប៉ុន្មានថ្ងៃនៃកិច្ចប្រជុំកំពូល ត្រាំ-គីម៕

រ៉ាន់ រើយ

The post សិង្ហបុរី ពង្រឹងវិស័យទូតជាមួយកូរ៉េខាងជើង ស្របពេលការប្រឈមក្នុងពិភពលោក appeared first on Kampuchea Thmey Daily.

លោក វ៉ាង យី សរសើរការលួតលាស់នៅកូរ៉េខាងជើង ទោះបីរងការគាបសង្កត់ពីអាមេរិក

Minea Neu — Fri, 10 Apr 2026 09:43:45 +0000

រដ្ឋមន្ត្រីការបរទេសចិន លោក វ៉ាង យី (Wang Yi) បានលើកសរសើរកូរ៉េខាងជើងដែលសម្រេចសមិទ្ធផលដ៏ច្រើនគួរឱ្យកត់សម្គាល់ បើទោះបីជាមានការដាក់សម្ពាធពីសហរដ្ឋអាមេរិកនិងកងកម្លាំងលោកខាងលិច ធ្វើឱ្យទីក្រុងព្យុងយ៉ាងឯកោជាយូរមកហើយក៏ដោយ។ នេះបើយោងតាមទីភ្នាក់ងារសារព័ត៌មានផ្លូវការរបស់កូរ៉េខាងជើង KCNA ដែលស្រង់ផ្សាយបន្តដោយភ្នាក់ងារសារព័ត៌មានរ៉យទ័រនៅថ្ងៃសុក្រ ទី១០ ខែមេសា ឆ្នាំ២០២៦ ។

រដ្ឋមន្ត្រីការបរទេសចិន លោក វ៉ាង យី និង លោកស្រី Choe Son Hui រូបភាព៖ KCNA via Reuters

លោក វ៉ាង ជាមួយសមភាគីកូរ៉េខាងជើង លោកស្រី Choe Son Hui បានសាទរចំពោះមេដឹកនាំរបស់ពួកគេទាំងពីរ សម្រាប់ការបើកសម័យកាលថ្មីមួយក្នុងទំនាក់ទំនងមិត្តភាពនៃប្រទេសទាំងពីរ។ ជាពិសេសសន្យាថានឹងធ្វើឱ្យទំនាក់ទំនងប្រសើរឡើងបន្ថែមទៀត ដើម្បីផលប្រយោជន៍របស់ប្រជាជនទាំងសងខាង។

គួរបញ្ជាក់ថា រដ្ឋមន្ត្រីការបរទេសចិន លោក វ៉ាង យី ទៅដល់រដ្ឋធានីព្យុងយ៉ាងរបស់កូរ៉េខាងជើងកាលពីថ្ងៃព្រហស្បតិ៍ ហើយក៏ចួបពិភាក្សាជាមួយរដ្ឋមន្រ្តីក្រសួងកាបរទេស លោកស្រី Choe ផងដែរ។

លោក វ៉ាង លើកឡើងថា៖ « សមិទ្ធផលថ្មីៗក្នុងការកសាងសង្គមនិយមរបស់កូរ៉េខាងជើងកាន់តែមានភាពល្អប្រសើរ ទោះបីជាមានការដាក់សម្ពាធកាន់តែខ្លាំង ជាពិសេសការគាបសង្កត់របស់សហរដ្ឋអាមេរិកនិងកងកម្លាំងលោកខាងលិចក៏ប្រទេសនេះទទួលផ្លែផ្កា […] ក្រោមការដឹកនាំដ៏ឈ្លាសវៃរបស់ លោក គីម ជុងអ៊ុន»។

ភ្នាក់ងារសារព័ត៌មាន KCNA លើកឡើងថាអ្នកកាទូតទាំងពីរបញ្ជាក់ជំហរដ៏រឹងមាំរបស់រដ្ឋាភិបាលប្រទេសទាំងពីរ ឱ្យកាន់តែប្រសើរ ដើម្បីអភិវឌ្ឍទំនាក់ទំនងបន្ថែមទៀត ទោះបីជាមានភាពចលាចលនៅក្នុងបរិយាកាសពិភពលោកបច្ចុប្បន្នក៏ដោយ៕

ប្រែសម្រួល៖ ណឺ មិនា

The post លោក វ៉ាង យី សរសើរការលួតលាស់នៅកូរ៉េខាងជើង ទោះបីរងការគាបសង្កត់ពីអាមេរិក appeared first on Kampuchea Thmey Daily.

អ្នកជំនាញ ថា អ៊ីរ៉ង់ប្រើគំរូមីស៊ីលផ្លោងរបស់កូរ៉េខាងជើងបាញ់មូលដ្ឋានយោធាអាមេរិក

Minea Neu — Mon, 06 Apr 2026 11:35:00 +0000

អ្នកជំនាញសហរដ្ឋអាមេរិក បានប្រាប់សារព័ត៌មាន Fox News នៅថ្ងៃចន្ទថា ផ្នែកដ៏សំខាន់មួយនៃឃ្លាំងអាវុធមីស៊ីលបាលីស្ទិកផ្លោងរបស់អ៊ីរ៉ង់គឺជាមីស៊ីលទទួលបានពីកូរ៉េខាងជើង រួមទាំងអាវុធនិងប្រពន្ធ័ការពារសំខាន់ៗជាច្រើនទៀត។

លោក Bruce Bechtol ជាអ្នកនិពន្ធសៀវភៅ «Rogue Allies: ភាពជាដៃគូយុទ្ធសាស្ត្ររវាងអ៊ីរ៉ង់និងកូរ៉េខាងជើង» ជាមួយលោក Anthony Celso ប្រាប់ Fox News ថា៖ «មីស៊ីលដែលបាញ់ចេញពីទីតាំង Diego Garcia គឺជាមីស៊ីល Musudan របស់កូរ៉េខាងជើង។ អ៊ីរ៉ង់ទិញមីស៊ីលចំនួន ១៩គ្រាប់ ពីកូរ៉េខាងជើងហើយទទួលនៅឆ្នាំ ២០០៥ ។ ពួកគេមានសមត្ថភាពទាំងនេះតាំងពីឆ្នាំ ២០០៥ មកម្ល៉េះ វាមិនមែនជាអាវុធសម្ងាត់ទេ»។

មីស៊ីលកូរ៉េខាងជើង។ រូបភាព៖ Mossad Commentary

អ៊ីរ៉ង់បានបាញ់មីស៊ីលផ្លោងពីរគ្រាប់ទៅលើមូលដ្ឋានយោធារួមគ្នារបស់សហរដ្ឋអាមេរិកនិងចក្រភពអង់គ្លេសនៅលើកោះ Diego Garcia កាលពីថ្ងៃទី២១ ខែមីនា ឆ្នាំ២០២៦ ។

គួរបញ្ជាក់ថា មូលដ្ឋាន Diego Garcia មានទីតាំងស្ថិតនៅចម្ងាយប្រហែល ៤ ០០០ គីឡូម៉ែត្រពីអ៊ីរ៉ង់ វាជាចម្ងាយទ្វេដងនៃចម្ងាយ ២ ០០០ គីឡូម៉ែត្រដែលរដ្ឋមន្ត្រីការបរទេសអ៊ីរ៉ង់ លោក Abbas Araghchi និយាយថា មីស៊ីលផ្លោងរបស់អ៊ីរ៉ង់បានបាញ់កាលពីខែមុន។ នេះបើយោងតាមកាសែត Wall Street Journal រាយការណ៍នៅយប់ថ្ងៃសុក្រ ដោយដកស្រង់សម្តីមន្ត្រីអាមេរិកច្រើនរូប។

លោក Bechtol ក៏ធ្លាប់ផ្តល់សម្ភាសន៍ឱ្យ Fox News ម្តងហើយថា មីស៊ីលផ្លោងរយៈចម្ងាយខ្លីដែលអ៊ីរ៉ង់បាញ់ទៅកាន់គោលដៅរបស់សហរដ្ឋអាមេរិកក្នុងរដ្ឋឈូងសមុទ្រគឺពឹងផ្អែកលើប្រព័ន្ធ QIAM បង្កើតឡើងដោយកូរ៉េខាងជើង។

លោកបន្ថែមថា៖ « មីស៊ីល Shahab-៣ ថ្មី របស់អ៊ីរ៉ង់គឺស្ទើរតែជាច្បាប់ចម្លងពិតនៃមីស៊ីល No Dong [របស់កូរ៉េខាងជើង]»។

លោក Bechtol ពន្យល់ថា៖ «កូរ៉េខាងជើងបានចែករំលែកប្រព័ន្ធ No Dong ប្រហែល ១៥០គ្រឿងទៅកាន់អ៊ីរ៉ង់នៅចុងទសវត្សរ៍ឆ្នាំ ១៩៩០ ។ ជាក់ស្តែង អ៊ីរ៉ង់ពេញចិត្តយ៉ាងខ្លាំងជាមួយនឹងសមត្ថភាពមីស៊ីលដែលកូរ៉េខាងជើងបានផ្តល់ឱ្យពួកគេ ដោយធ្វើតាមគំរូមុននៃរោងចក្រ Scud C ចុះកិច្ចសន្យាជាមួយទីក្រុងព្យុងយ៉ាង(Pyongyang) ដើម្បីសាងសង់រោងចក្រ No Dong ក្នុងប្រទេសអ៊ីរ៉ង់។ កូរ៉េខាងជើងក៏បានជួយអ៊ីរ៉ង់អភិវឌ្ឍប្រព័ន្ធមីស៊ីល Emad និង Ghadr ប្រើប្រាស់ដើម្បីកំណត់គោលដៅអ៊ីស្រាអែលនិងរដ្ឋនៅឈូងសមុទ្រ នៅឯរោងចក្រ No Dong ក្នុងទីក្រុងតេហេរ៉ងផងដែរ»។

លោក Bechtol សង្ខេបទំនាក់ទំនងរវាងប្រទេសទាំងពីរ ដោយនិយាយថា៖ « កូរ៉េខាងជើងជាអ្នកលក់ហើយអ៊ីរ៉ង់ជាអ្នកទិញ។ កូរ៉េខាងជើងអភិវឌ្ឍគ្រឿងបន្លាស់ទាំងអស់នៃប្រព័ន្ធអាវុធ ហើយអ៊ីរ៉ង់បង់ប្រាក់ដោយប្រើលុយសុទ្ធនិងប្រេង»៕

ប្រែសម្រួល៖ ណឺ មិនា

The post អ្នកជំនាញ ថា អ៊ីរ៉ង់ប្រើគំរូមីស៊ីលផ្លោងរបស់កូរ៉េខាងជើងបាញ់មូលដ្ឋានយោធាអាមេរិក appeared first on Kampuchea Thmey Daily.

កូរ៉េខាងជើង អភិវឌ្ឍនិងបាញ់សាកល្បងម៉ាស៊ីនរុញកម្លាំងមីស៊ីលដែលអាចបាញ់ដល់អាមេរិក

Minea Neu — Mon, 30 Mar 2026 13:30:00 +0000

មេដឹកនាំកូរ៉េខាងជើង លោក គីម ជុងអ៊ុន (Kim Jong Un) បានសង្កេតមើលការបាញ់សាកល្បងម៉ាស៊ីនជំរុញកម្លាំងឲ្យកាន់តែខ្លាំងដែលប្រើប្រាប់ឥន្ធនៈរឹង ព្រមទាំងអបអរសាទរពីការអភិវឌ្ឍថ្មីមួយ ដើម្បីជំរុញសមត្ថភាពយោធាជាយុទ្ធសាស្ត្ររបស់ប្រទេសខ្លួន។ នេះបើតាមប្រព័ន្ធផ្សព្វផ្សាយរដ្ឋ KCNA តាមរយៈ ABC News កាលពីថ្ងៃអាទិត្យ ទី២៩ ខែមីនា ឆ្នាំ២០២៦។

ការសាកល្បងនេះទំនងបង្ហាញថា លោក គីម ជុងអ៊ុន មានបំណងពង្រីកនិងធ្វើទំនើបកម្មឃ្លាំងអាវុធមីស៊ីលដែលមានសមត្ថភាពទៅដល់ដីគោកសហរដ្ឋអាមេរិក។

ម៉ាស៊ីនរុញកម្លាំងខ្លាំងដែលប្រើប្រាប់ឥន្ធនៈរឹង។ រូបភាព៖ KCNA

សេចក្តីរាយការណ៍នៅថ្ងៃអាទិត្យរបស់ទីភ្នាក់ងារសារព័ត៌មានមជ្ឈិមកូរ៉េ បានកើតឡើងប៉ុន្មានថ្ងៃបន្ទាប់ពី លោក គីម ជុងអ៊ុន ថ្លែងសុន្ទរកថាមួយនៅឯសភាកូរ៉េខាងជើង ដោយសន្យាថានឹងពង្រឹងឋានៈប្រទេសកូរ៉េខាងជើងជាមហាអំណាចនុយក្លេអ៊ែរ។

មិនតែប៉ុណ្ណោះ មេដឹកនាំរូបនេះចោទប្រកាន់សហរដ្ឋអាមេរិកពីបទភេរវកម្ម និងការឈ្លានពានរបស់រដ្ឋជាសកលទៀតផង ដោយសំដៅទៅលើសង្គ្រាមនៅមជ្ឈិមបូព៌ា។

យោងតាម KCNA លោក គីម បានមើលការធ្វើតេស្តម៉ាស៊ីនបាញ់ចេញពីដីនិងសរសើរពីទម្ងន់ជាអតិបរមារបស់ម៉ាស៊ីនចំនួន ២ ៥០០ គីឡូតោន កើនឡើងពី ១ ៩៧១គីឡូតោនដែលបានធ្វើតេស្តម៉ាស៊ីនឥន្ធនៈរឹងស្រដៀងគ្នានេះកាលពីខែកញ្ញា។

អ្នកសង្កេតការណ៍ បានមើលឃើញថា ការជំរុញថាមពលម៉ាស៊ីននេះទំនងជាជាប់ទាក់ទងនឹងការដាក់ក្បាលគ្រាប់ឱ្យបានច្រើនក្នុងមីស៊ីលតែមួយ និងបង្កើនឱកាសកម្ចាត់ភាពម្ចាស់ការរបស់សហរដ្ឋអាមេរិក។

យ៉ាងណា KCNA មិនបានរាយការណ៍ថាការធ្វើតេស្តនេះបានកើតឡើងនៅពេលណា និងកន្លែងណានោះទេ។

គួរបញ្ជាក់ថាការសាកល្បងម៉ាស៊ីនខាងលើ ធ្វើឡើងជាផ្នែកមួយនៃកម្មវិធីបង្កើនសមត្ថភាពយោធារយៈពេលប្រាំឆ្នាំរបស់ប្រទេសកូរ៉េខាងជើង។ ឯកសារយោងខាងលើថាជាមីស៊ីលផ្លោងអន្តរទ្វីបដែលមានសមត្ថភាពដូចនុយក្លេអ៊ែរ វាអាចកំណត់គោលដៅដល់ដីគោកសហរដ្ឋអាមេរិក។

លោក គីម បន្តថា៖ « ការធ្វើតេស្តម៉ាស៊ីនចុងក្រោយនេះមានសារៈសំខាន់យ៉ាងខ្លាំងក្នុងការបង្កើនកម្លាំងឱ្យយោធា ដែលជាយុទ្ធសាស្ត្រកម្រិតខ្ពស់បំផុតក្នុងប្រទេស»៕

ប្រែសម្រួល៖ ណឺ មិនា

The post កូរ៉េខាងជើង អភិវឌ្ឍនិងបាញ់សាកល្បងម៉ាស៊ីនរុញកម្លាំងមីស៊ីលដែលអាចបាញ់ដល់អាមេរិក appeared first on Kampuchea Thmey Daily.

លោក គីម ជុងអ៊ុន និងកូនស្រី បង្ហាញខ្លួនជិះរថក្រោះយោធា អំឡុងពេលទាហានហ្វឹកហាត់

Minea Neu — Fri, 20 Mar 2026 04:05:17 +0000

ការបង្ហាញមុខជាសាធារណៈរួមគ្នាចុងក្រោយបំផុតរបស់មេដឹកនាំកូរ៉េខាងជើង លោក គីម ជុងអ៊ុន និងកូនស្រីវ័យជំទង់គឺអ្នកនាង គីម ជូអេ (Kim Ju Ae) បានជិះរថក្រោះជាមួយគ្នា អមដោយកងកម្លាំងប្រដាប់អាវុធ ប៉ុន្មានថ្ងៃបន្ទាប់ពីពួកគេទៅមើលការបាញ់រ៉ុក្កែត និងបាញ់កាំភ្លើងខ្លី។ នេះបើយោងប្រព័ន្ធផ្សព្វផ្សាយរដ្ឋ KCNA នៅថ្ងៃសុក្រនេះ។

លោក គីម និងកូនស្រីជិះរថក្រោះជាមួយទាហាន។ រូបភាព៖ KCNA via AP

ទីភ្នាក់ងារសារព័ត៌មានកណ្តាលកូរ៉េផ្លូវការ (KCNA) រាយការណ៍ថា លោក គីម បានត្រួតពិនិត្យការបាញ់ប្រហារ និងសមយុទ្ធផ្សេងទៀតពាក់ព័ន្ធនឹងអង្គភាពរថក្រោះ និងកងទ័ពថ្មើរជើងកាលពីថ្ងៃព្រហស្បតិ៍។

រូបភាពពី KCNA បានបង្ហាញថា លោក គីម និងកូនស្រី សុទ្ធតែស្លៀកអាវស្បែកខ្មៅ ជិះរថក្រោះពណ៌បៃតងអូលីវជាមួយទាហានដទៃទៀត អំឡុងពេលហ្វឹកហាត់នៅថ្ងៃព្រហស្បតិ៍។

ក្មេងស្រីនេះ ត្រូវបានគេរាយការណ៍ថាមានឈ្មោះ គីម ជូអេ និងមានអាយុល្បាក់ ១៣ឆ្នាំ បានអមដំណើរឪពុករបស់នាងទៅកាន់ព្រឹត្តិការណ៍យោធាល្បីៗ និងព្រឹត្តិការណ៍ផ្សេងទៀតជាច្រើនចាប់តាំងពីចុងឆ្នាំ ២០២២ នាំឱ្យមានការសង្ស័យពីខាងក្រៅថានាងជាអ្នកស្នងមរតកពីឪពុក។

ប្រព័ន្ធផ្សព្វផ្សាយរដ្ឋកូរ៉េខាងជើងហៅនាងថា៖ «ជាកូនគួរឱ្យស្រឡាញ់បំផុត និងគួរឱ្យគោរព របស់ លោក គីម ជុងអ៊ុន»។

គួរបញ្ជាក់ថា កាលពីសប្តាហ៍មុន អ្នកទាំងពីរបានបាញ់កាំភ្លើងខ្លី អំឡុងពេលទស្សនកិច្ចក្នុងរោងចក្រផលិតគ្រាប់រំសេវស្រាលមួយ និងមើលការសាកល្បងបាញ់គ្រាប់ពិតនៃប្រព័ន្ធបាញ់រ៉ុក្កែតជាច្រើន។

កាលពីខែកញ្ញាឆ្នាំមុន ក្មេងស្រីនេះបានទៅទីក្រុងប៉េកាំងជាមួយឪពុករបស់នាង។

មេដឹកនាំកូរ៉េខាងជើង។ រូបភាព៖ KCNA

ការហ្វឹកហ្វឺនយោធារបស់កូរ៉េខាងជើងបានកើតឡើង ពេលដែលសហរដ្ឋអាមេរិក និងកូរ៉េខាងត្បូងកំពុងចូលរួមក្នុងសមយុទ្ធយោធាប្រចាំឆ្នាំរបស់ពួកគេដែលបានចាប់ផ្តើមកាលពីសប្តាហ៍មុន៕

ប្រែសម្រួល៖ ណឺ មិនា

The post លោក គីម ជុងអ៊ុន និងកូនស្រី បង្ហាញខ្លួនជិះរថក្រោះយោធា អំឡុងពេលទាហានហ្វឹកហាត់ appeared first on Kampuchea Thmey Daily.

កូរ៉េខាងត្បូងផ្តើមអភិវឌ្ឍប្រព័ន្ធការពារ និងប្រព័ន្ធរ៉ាដាថ្មីផ្ទាល់ខ្លួន ក្រោយអាមេរិកដកប្រព័ន្ធការពារមីស៊ីល Patriot និង THAAD

Minea Neu — Tue, 17 Mar 2026 10:34:50 +0000

កាលពីសប្តាហ៍មុនកូរ៉េខាងជើងបាញ់មីស៊ីលផ្លោងចំនួន ១០គ្រាប់ចូលទៅក្នុងសមុទ្រជប៉ុន បង្ហាញពីតម្រូវការរបស់កូរ៉េខាងត្បូងស្វែងរកប្រព័ន្ធការពារមីស៊ីលដែលអាចទុកចិត្តបាន។

ជាអកុសល ការផ្លោងនេះស្របពេលជាមួយនឹងរបាយការណ៍ថា សហរដ្ឋអាមេរិកកំពុងដកប្រព័ន្ធការពារមីស៊ីលមួយចំនួនចេញពីកូរ៉េខាងត្បូង ដើម្បីបង្កើនសមត្ថភាពរបស់ខ្លួននៅមជ្ឈិមបូព៌ា អំឡុងពេលសង្គ្រាមដែលកំពុងបន្តជាមួយអ៊ីរ៉ង់។

យោងតាមកាសែត The Washington Post រាយការណ៍នៅថ្ងៃទី៩ខែមីនា ថា មន្ទីរបញ្ចកោណកំពុងផ្ទេរប្រព័ន្ធការពារមីស៊ីល Patriot និងប្រព័ន្ធការពារមីស៊ីលកម្រិតខ្ពស់ (THAAD) ពីកងកម្លាំងអាមេរិកនៅកូរ៉េខាងត្បូង (USFK) ទៅកាន់មជ្ឈិមបូព៌ា។

ប្រព័ន្ធការពារមីស៊ីលកម្រិតខ្ពស់ (THAAD) របស់កូរ៉េខាងត្បូង។ រូបភាព៖ Reuters

ចំណែកប្រព័ន្ធផ្សព្វផ្សាយកូរ៉េខាងត្បូងក៏បានរាយការណ៍ពីចំនួនជើងហោះហើរខ្ពស់មិនធម្មតាដោយយន្តហោះដឹកជញ្ជូនយោធាអាមេរិកពីមូលដ្ឋានទ័ពអាកាស Osan ទោះបីជាសហរដ្ឋអាមេរិករក្សាការសម្ងាត់អំពីសកម្មភាពក៏ដោយ។

ប្រធានាធិបតី Lee Jae-myung លើកឡើងកាលថ្ងៃទី១០ ខែមីនា ថាកងកម្លាំងសហរដ្ឋអាមេរិក (USFK) អាចនឹងបញ្ជូនប្រព័ន្ធការពារដែនអាកាសមួយចំនួន ទៅក្រៅប្រទេសស្របតាមតម្រូវការយោធារបស់គេ។

ក្នុងអត្ថបទមួយកាលពីថ្ងៃពុធ ដោយកាសែត The Korea Herald និយាយថា៖ «ប្រព័ន្ធ Patriot និង THAAD គឺជាចំណុចកណ្តាលនៃខែលការពារអាមេរិក-កូរ៉េខាងត្បូងប្រឆាំងនឹងមីស៊ីលផ្លោងរបស់កូរ៉េខាងជើង ដូច្នេះការដកខ្លួនរបស់ពួកគេនឹងមានផលវិបាកសន្តិសុខធ្ងន់ធ្ងរសម្រាប់ទីក្រុងសេអ៊ូល»។

ក្តីបារម្ភមួយទៀតគឺថា ប្រព័ន្ធទាំងនេះប្រហែលជាមិនវិលត្រឡប់មកប្រទេសកូរ៉េខាងត្បូងវិញទេ ពេលដែលវិបត្តិនៅមជ្ឈិមបូព៌ាបានថយចុះ ខណៈរដ្ឋបាលប្រធានាធិបតីអាមេរិក ដូណាល់ ត្រាំ ដាក់សម្ពាធលើសម្ព័ន្ធមិត្តឱ្យទទួលខុសត្រូវលើវិស័យការពារជាតិផ្ទាល់ខ្លួន។

គួរបញ្ជាក់ថាអាមេរិកបានដាក់ពង្រាយប្រពន្ធ័ការពារមីស៊ីជាន់កម្រិតខ្ពស់ THAAD ក្នុងកូរ៉េខាងត្បូងក្នុងឆ្នាំ ២០១៧ ដោយលើកឡើងពីការគំរាមកំហែងពីកូរ៉េខាងជើង។

ទោះបីអាមេរិកដកប្រព័ន្ធការពារដែនអាកាសទាំងនោះក្តី ក៏កូរ៉េខាងត្បូងកំពុងពន្លឿនកម្មវិធីការពារមីស៊ីល និងដែនអាកាសកូរ៉េ (KAMD) ផ្តោតលើការកសាងប្រព័ន្ធការពារក្នុងស្រុក ជាជាងពឹងផ្អែកទាំងស្រុងលើទ្រព្យសម្បត្តិយោធាសហរដ្ឋអាមេរិក។ នេះបើយោងតាម DW ផ្សាយថ្ងៃទី១៦ ខែមីនា ឆ្នាំ២០២៦ ។

មួយទៀតផ្នែកទៀត ប្រទេសនេះកំពុងអភិវឌ្ឍប្រពន្ធ័ការពារថ្មី រួមបញ្ចូលទាំងមីស៊ីលដីទៅអាកាសរយៈចម្ងាយឆ្ងាយ បណ្តាញរ៉ាដាទំនើប ប្រព័ន្ធបញ្ជា និងត្រួតពិនិត្យត្រូវបានរចនាឡើងដើម្បីស្ទាក់ចាប់មីស៊ីលផ្លោងរបស់កូរ៉េខាងជើង។

វិធីសាស្រ្តការពារជាស្រទាប់ៗ ទីក្រុងសេអ៊ូលមានបំណងបង្កើតខែលពហុស្រទាប់រួមបញ្ចូលគ្នានូវប្រព័ន្ធដែលមានស្រាប់អាមេរិក (ដូចជា THAAD) ជាមួយនឹងប្រព័ន្ធស្ទាក់ចាប់ដែលផលិតនៅកូរ៉េ។

មិនតែប៉ុណ្ណោះប្រទេសនេះមានឯករាជ្យភាពជាយុទ្ធសាស្ត្រ ពីការដកប្រព័ន្ធ Patriot ជាការដាស់តឿនមួយ ជំរុញឱ្យកូរ៉េខាងត្បូងវិនិយោគកាន់តែច្រើនក្នុងឧស្សាហកម្មការពារជាតិរបស់ខ្លួន អាចរក្សាការទប់ស្កាត់បាន ទោះបីជាការគាំទ្ររបស់សហរដ្ឋអាមេរិកផ្លាស់ប្តូរទៅតំបន់ផ្សេងទៀតក៏ដោយ៕

ប្រែសម្រួល៖ ណឺ មិនា

The post កូរ៉េខាងត្បូងផ្តើមអភិវឌ្ឍប្រព័ន្ធការពារ និងប្រព័ន្ធរ៉ាដាថ្មីផ្ទាល់ខ្លួន ក្រោយអាមេរិកដកប្រព័ន្ធការពារមីស៊ីល Patriot និង THAAD appeared first on Kampuchea Thmey Daily.

អ្នកជំនាញ៖ ការវាយប្រហារលើអ៊ីរ៉ង់ពេលនេះ នឹងពង្រឹងមហិច្ឆតាអាវុធនុយក្លេអ៊ែរកូរ៉េខាងជើង

Minea Neu — Tue, 03 Mar 2026 03:34:28 +0000

អ្នកជំនាញនិងអតីតមន្ត្រីកូរ៉េខាងត្បូង បានលើកឡើងថា ការវាយប្រហារដោយយោធារបស់សហរដ្ឋអាមេរិក និងអ៊ីស្រាអែលលើអ៊ីរ៉ង់នឹងពង្រឹងមហិច្ឆតានុយក្លេអ៊ែររបស់មេដឹកនាំកូរ៉េខាងជើងទៅវិញទេ ខណៈការយកចិត្តទុកដាក់បានផ្តោតថាតើ មេដឹកនាំកូរ៉េខាងជើងអាចនឹងវិលត្រឡប់មកចរចាជាមួយប្រធានាធិបតី ដូណាល់ ត្រាំ វិញឬយ៉ាងណា។

លោក ដូណាល់ ត្រាំ និង លោក គីម ជុងអ៊ុន។ រូបភាព៖ Reuters

យោងតាមរ័យទ័រចុះផ្សាយថ្ងៃទី០២ខែមីនា ឆ្នាំ២០២៦, ការចរចាដើម្បីដោះស្រាយឃ្លាំងអាវុធនុយក្លេអ៊ែរ និងមីស៊ីលផ្លោងរបស់ទីក្រុងព្យុងយ៉ាង ស្ថិតក្រោមទណ្ឌកម្មអន្តរជាតិយ៉ាងធ្ងន់ធ្ងរត្រូវបានបរាជ័យ ទោះបីជាមានកិច្ចប្រជុំកំពូលរវាងលោក គីម ជុងអ៊ុន និងលោក ត្រាំ ក្នុងឆ្នាំ ២០១៨ និង ២០១៩ លើរឿងនេះក៏ដោយ ប៉ុន្តែការវាយប្រហារលើប្រទេសអ៊ីរ៉ង់អាចជំរុញឱ្យប្រទេសកូរ៉េខាងជើងអាចពិចារណាឡើងវិញ។

ការវាយប្រហាររបស់អ៊ីរ៉ង់ បានសម្លាប់មេដឹកនាំកំពូល លោក អាយ៉ាតូឡាស អាលី ខាមេណៃ (Ayatollah Ali Khamenei) កើតឡើងប្រហែលពីរខែ បន្ទាប់ពីប្រធានាធិបតីវ៉េណេស៊ុយអេឡា លោក នីកូឡាស ម៉ាឌូរ៉ូ (Nicolas Maduro) ជាមេដឹកនាំម្នាក់ទៀតដែលគ្មានអាវុធនុយក្លេអ៊ែរ តែត្រូវបានចាប់ខ្លួនដោយការវាយឆ្មក់របស់កងកម្លាំងពិសេសសហរដ្ឋអាមេរិក តាមការបញ្ជារបស់ លោក ដូណាល់ ត្រាំ។

លោក Song Seong-jong សាស្ត្រាចារ្យនៅសាកលវិទ្យាល័យ Daejeon និងជាអតីតមន្ត្រីនៃក្រសួងការពារជាតិកូរ៉េខាងត្បូងលើកឡើងថា៖ «លោក គីមប្រាកដជាគិតថាអ៊ីរ៉ង់ត្រូវបានវាយប្រហារបែបនោះ ព្រោះតែគ្មានអាវុធនុយក្លេអ៊ែរ»។

ចំណែកអ្នកនាំពាក្យក្រសួងការបរទេសកូរ៉េខាងជើងលើកឡើងក្នុងសេចក្តីថ្លែងការណ៍មួយ ចេញផ្សាយដោយប្រព័ន្ធផ្សព្វផ្សាយរដ្ឋ កាលពីថ្ងៃអាទិត្យថា៖ «ប្រតិបត្តិការយោធានេះគឺជៀសមិនរួច ដោយសារតែអំណាចនយោបាយនិងភាពឃោរឃៅរបស់សហរដ្ឋអាមេរិក»។

ត្រឹមតែប៉ុន្មានថ្ងៃមុនការវាយប្រហារនេះ លោកគីមបានសន្យាថានឹងសាងសង់អាវុធនុយក្លេអ៊ែរបន្ថែមទៀតក្នុងសមាជបក្សកាន់អំណាចកាលពីសប្តាហ៍មុន ទោះបីជាលោកបានទុកទ្វារចំហសម្រាប់ការចរចាក៏ដោយ វាអាស្រ័យលើអាកប្បកិរិយារបស់ទីក្រុងវ៉ាស៊ីនតោនប៉ុណ្ណោះ។

ចំណែកលោកត្រាំ លើកឡើងម្តងហើយម្តងទៀតថា លោកចង់ធ្វើកិច្ចចរចាថ្មី ជំរុញឱ្យមេដឹកនាំទាំងពីរអាចជួបគ្នាពេលដែលលោកធ្វើដំណើរទៅកាន់ប្រទេសចិនចាប់ពីថ្ងៃទី៣១ ខែមីនា ដល់ថ្ងៃទី២ ខែមេសាខាងមុខ៕

ប្រែសម្រួល៖ ណឺ មិនា

The post អ្នកជំនាញ៖ ការវាយប្រហារលើអ៊ីរ៉ង់ពេលនេះ នឹងពង្រឹងមហិច្ឆតាអាវុធនុយក្លេអ៊ែរកូរ៉េខាងជើង appeared first on Kampuchea Thmey Daily.

កូរ៉េខាងជើង Archives - Kampuchea Thmey Daily

យោធាកូរ៉េ​ខាង​ត្បូង ​អះអាង​ថា ​កូរ៉េ​ខាង​ជើង​បាញ់​មីស៊ីល​ផ្លោងច្រើន​គ្រាប់​​​ចូល​ផែន​​សមុទ្រ​ជប៉ុ​ន​

​សិង្ហបុរី​ ពង្រឹង​វិស័យ​ទូត​ជាមួយ​​កូរ៉េខាងជើង ស្របពេល​ការ​ប្រឈម​ក្នុង​ពិភពលោក​

លោក វ៉ាង យី សរសើរ​​​ការ​លួតលាស់​នៅ​កូរ៉េ​ខាង​ជើង ទោះ​បីរងការ​គាប​សង្កត់​ពី​អាមេរិក​

អ្នក​ជំនាញ​​ ​ថា​ អ៊ីរ៉ង់​ប្រើ​គំរូមីស៊ីល​ផ្លោង​របស់​កូរ៉េ​ខាង​ជើង​បាញ់​មូល​ដ្ឋានយោធាអាមេរិក​

​កូរ៉េខាង​ជើង​​ អភិវឌ្ឍនិង​បាញ់​សាក​ល្បង​​​​ម៉ាស៊ីន​រុញកម្លាំង​​មីស៊ីល​ដែលអាច​បាញ់ដល់​អាមេរិក

​លោក គីម​ ជុង​អ៊ុន និង​កូនស្រី​ បង្ហាញខ្លួន​ជិះ​រថ​ក្រោះ​​យោធា​​ អំឡុង​ពេលទាហាន​​​​ហ្វឹកហាត់​

អ្នកជំនាញ៖ ​ការ​វាយ​ប្រហារ​​លើ​​អ៊ីរ៉ង់​ពេល​នេះ​ នឹង​ពង្រឹង​មហិច្ឆតាអាវុធនុយក្លេអ៊ែរ​កូរ៉េខាងជើង

យោធាកូរ៉េខាងត្បូង អះអាងថា កូរ៉េខាងជើងបាញ់មីស៊ីលផ្លោងច្រើនគ្រាប់ចូលផែនសមុទ្រជប៉ុន

សិង្ហបុរី ពង្រឹងវិស័យទូតជាមួយកូរ៉េខាងជើង ស្របពេលការប្រឈមក្នុងពិភពលោក

លោក វ៉ាង យី សរសើរការលួតលាស់នៅកូរ៉េខាងជើង ទោះបីរងការគាបសង្កត់ពីអាមេរិក

អ្នកជំនាញ ថា អ៊ីរ៉ង់ប្រើគំរូមីស៊ីលផ្លោងរបស់កូរ៉េខាងជើងបាញ់មូលដ្ឋានយោធាអាមេរិក

កូរ៉េខាងជើង អភិវឌ្ឍនិងបាញ់សាកល្បងម៉ាស៊ីនរុញកម្លាំងមីស៊ីលដែលអាចបាញ់ដល់អាមេរិក

លោក គីម ជុងអ៊ុន និងកូនស្រី បង្ហាញខ្លួនជិះរថក្រោះយោធា អំឡុងពេលទាហានហ្វឹកហាត់

អ្នកជំនាញ៖ ការវាយប្រហារលើអ៊ីរ៉ង់ពេលនេះ នឹងពង្រឹងមហិច្ឆតាអាវុធនុយក្លេអ៊ែរកូរ៉េខាងជើង