សហគមន៍នេះ​ មានទីតាំងស្ថិតនៅភូមិសំភិន​ ឃុំកំពង់ចាម ស្រុកសំបូរ​ ខេត្តក្រចេះ​ មាន​ចម្ងាយ​ប្រមាណជា​ ៤៥ គីឡូម៉ែត្រពីទីរួមខេត្តក្រចេះ។ ដើម្បីទៅដល់សហគមន៍​ទេសចរណ៍​មួយនេះ ភ្ញៀវទេសចរត្រូវធ្វើដំណើរតាមផ្លូវគោកចម្ងាយ​ប្រមាណ​ជា ៣៨ គីឡូម៉ែត្រ ពីទីរួមខេត្តក្រចេះ​ទៅកាន់ស្រុកសំបូរ និងបន្តដំណើរតាមទូកពីស្រុកសំបូរទៅ​កាន់​កោះ​រងាវ​ រួចបន្ត​ដំណេីរប្រមាណជា​ ៦ គីឡូម៉ែតទៀត​ ទេីបទៅដល់​គោលដៅទេសចរសហគមន៍​។

នៅក្នុងតំបន់នេះសម្បូរទៅដោយធនធានធម្មជាតិដូចជា សត្វផ្សោតទន្លេមេគង្គ ព្រៃឈើលិចទឹក ទន្លេ ព្រែក អូរ សត្វព្រៃ សត្វស្លាប និងត្រីជាច្រើនប្រភេទ​។ ប្រជាជននៅទីនោះ​រស់នៅតាមបែបទំនៀមទម្លាប់បុរាណ។

លោក ប្រាក់​ វិកុល​ ប្រធានការិយាល័យ​ឧស្សាហកម្មទេសចរ​នៃមន្ទីរទេសចរខេត្ត​​ក្រចេះ​បានឲ្យដឹងថា​ សហគមន៍អេកូទេសចរណ៍កោះផ្តៅ​មានផ្ដល់សេវាកម្ម​ និងការកម្សាន្តក្នុងសហគមន៍​ដូចជា ផ្ទះឈើបែបខ្មែរបុរាណសម្រាប់ស្នាក់នៅជាមួយប្រជាជនក្នុងតម្លៃសមរម្យ,​ មានម្ហូបអាហារតាមទម្លាប់អ្នកភូមិ​ស្រុកស្រែដែលចម្អិនដោយស្នាដៃអ្នកភូមិផ្ទាល់​ ហេីយអ្នកទេសចរអាចជិះទូកទស្សនាសត្វផ្សោត​ និង សត្វស្លាបច្រើនប្រភេទ មើលទេសភាពថ្ងៃលិចតាមមាត់ទន្លេ ជិះម៉ូតូ​ឌុប​សហគមន៍ ជួលកង់ជិះទស្សនាជុំវិញកោះជាដេីម។ 

លោកបន្តថា​ ក្រៅពីនោះ​ ភ្ញៀវទេសចរអាចចូលរួមសកម្មភាពធ្វេីកសិកម្ម​​និងកសិ-ឧស្សាហកម្មជាមួយប្រជាពលរដ្ឋក្នុង​សហគមន៍​ ដូចជា ភ្ជួរ​ស្រែ​ ស្ទួងស្រូវ​ ច្រូតស្រូវ​ ជីកស្រះចិញ្ចឹមត្រី ចិញ្ចឹមកង្កែប​ ធ្វើទ្រុងមាន់ ទា និងសកម្មភាពដាំដុះ​ បន្លែផ្លែឈេីផ្សេងៗដ៏សំបូរបែបផងដែរ៕

អត្ថបទ៖ ប្រុញ វិធិន

The post កោះផ្តៅ​ចម្ងាយ​ជាង ៤៥ គីឡូម៉ែត្រ​ពី​ក្រុង​ក្រចេះរដូវប្រាំង​កាន់តែ​ស្រស់ត្រកាល ​​ទាក់ទាញទេសចរ​​បែបធម្មជាតិ​ appeared first on Kampuchea Thmey Daily.

ផ្លូវបេតុង​នេះ​ជាគម្រោងវិនិយោគឃុំកំពង់ចាម ២០២៥ ដែល​អនុវត្តគម្រោងដោយក្រុមហ៊ុន មឿង សារ៉ុម លើទំហំទឹកប្រាក់សរុប ២១៥,២៥០,០០០ រៀល។ នេះបើ​តាមការឱ្យដឹងពីលោក ឈិត ណន មេឃុំកំពង់ចាម។

ឃុំកំពង់ចាម មានភូមិចំនួន ៧ ភូមិ រួមមាន៖ ភូមិយាវ ទន្សោងធ្លាក់ អាជេន សំភិន​ កោះផ្តៅ កំបង់ក្របី និងភូមិអំពិលទឹក​។

លោក ឈិត ណន មេឃុំកំពង់ចាមបន្តថា ក្នុងអាណត្តិទី ៧ របស់ក្រុមប្រឹក្សាឃុំបានធ្វើផ្លូវបេតុងមួយខ្សែនៅលើកោះរងាវ​។ លោកថា នាពេលកន្លងមកឃុំបានអនុវត្តធ្វើតែគម្រោងផ្លូវលំក្រាលគ្រួសក្រហមតែប៉ុណ្ណោះ ដោយភ្ជាប់ពីភូមិមួយទៅ​ភូមិមួយ ស្ថិតនៅត្រើយខាងលិចទន្លេមេគង្គ ដែលមាន ៣ ភូមិ គឺភូមិយាវ ទន្សោងធ្លាក់ អាជេន ជាប់ខេត្តកំពង់ធំ។ ដោយឡែក នៅឆ្នាំ២០២៥ រដ្ឋបាល​ឃុំបានលើកគម្រោងមកអភិវឌ្ឍន៍ធ្វើផ្លូវបេតុងប្រវែង ១ ៥០០ ម៉ែត្រ នៅលើកោះរងាវវិញម្តងនៅចំកណ្តាលទន្លេមេគង្គ ដែលមានភូមិចំនួន ៤ គឺភូមិសំភិន​ កោះផ្តៅ កំបង់ក្របី និងភូមិអំពិលទឹក។

កោះរងាវ មាន ៤ ភូមិ រួមមាន ភូមិសំភិន​ កោះផ្តៅ កំបង់ក្របី និងភូមិអំពិលទឹក មានប្រជាពលរដ្ឋរស់នៅប្រមាណជាង ៨០០ គ្រួសារ និងមានផ្ទៃដីប្រមាណជាង ២ពាន់ហិកតា ប្រជាពលរដ្ឋរស់នៅលើកោះរងាវ ភាគច្រើនប្រកបរបរធ្វើស្រែ និងនេសាទត្រី ហើយខ្លះទៀតពួកគាត់ចេញទៅរកស៊ីឈ្នួលគេនៅក្រៅស្រុក៕

អត្ថបទ ប្រុញ វិធិន

The post គម្រោងផ្លូវបេតុង​ប្រវែង​ ១៥០០ម៉ែត្រ សមិទ្ធផលប្រវត្តិសាស្ត្រ​ថ្មី​លេីដីកោះ​រងាវតាមដងទន្លេមេគង្គ​លើ​​ក្នុង​ខេត្តក្រចេះ appeared first on Kampuchea Thmey Daily.