សម្រាប់ការជ្រើសរើសមន្ត្រីនៃក្រសួង ស្ថាប័នទាំង៤ ដែលនឹងរៀបចំការប្រឡងប្រជែងជ្រើសរើសមន្រ្តី រួមមាន៖ ទី១)មន្ត្រីកសិកម្មឃុំ ក្របខណ្ឌក្រសួងកសិកម្ម រុក្ខាប្រមាញ់ និងនេសាទ។ ទី២)មន្ត្រីសុខាភិបាល នៃក្រសួងសុខាភិបាល ផ្អែកលើកិច្ចព្រមព្រៀងការងារ។ ទី៣)មន្ត្រីក្របខណ្ឌ ក្រសួងការបរទេស និងសហប្រតិបត្តិការអន្តរជាតិ និងទី៤)មន្រ្តីផ្នែកច្បាប់ នៃទីស្តីការគណៈរដ្ឋមន្រ្តី។

ដើម្បីពិភាក្សាស្តីពីការរៀបចំដំណើរការប្រឡងប្រជែងជ្រើសរើសមន្រ្តីរាជការ និងមន្រ្តីផ្អែកលើកិច្ចព្រមព្រៀងការងារ ឱ្យចូលបម្រើការងារតាមក្រសួង ស្ថាប័នចំនួន៤ សម្រាប់ក្របខណ្ឌឆ្នាំ២០២៥ នៅព្រឹកថ្ងៃទី២៥ ខែមីនា ឆ្នាំ២០២៥ នេះ  លោក យក់ ប៊ុនណា រដ្ឋមន្រ្តីស្តីទីក្រសួងមុខងារសាធារណៈ បានដឹកនាំកិច្ចប្រជុំជាមួយក្រសួង ស្ថាប័នពាក់ព័ន្ធ ។ កិច្ចប្រជុំនេះ ប្រព្រឹត្តទៅនៅសាលាភូមិន្ទរដ្ឋបាល ដោយមានការអញ្ជើញចូលរួមពី តំណាងក្រសួង ស្ថាប័នសាមីទាំង៤ តំណាងក្រសួងសេដ្ឋកិច្ច និងហិរញ្ញវត្ថុ ថ្នាក់ដឹកនាំនិងមន្រ្តីជំនាញក្រសួងមុខងារសាធារណៈ ជាច្រើនរូប។

អង្គប្រជុំបានធ្វើបទបង្ហាញ និងមានការពិភាក្សាចូលរួមមតិយោបល់លើការរៀបចំដំណើរការប្រឡងប្រជែងជ្រើសរើស គិតចាប់ពីការរៀបចំផ្សព្វផ្សាយសេចក្តីជូនដំណឹង ការទទួលការដាក់ពាក្យចូលរួមប្រឡងប្រជែង ដំណើរការប្រឡងប្រជែងនិងកំណែវិញ្ញាសា រហូតដល់ការប្រកាសលទ្ធផលនិងបែងចែកទៅតាមអង្គភាពគោលដៅ ធ្វើយ៉ាងណាត្រូវអនុវត្តឱ្យស្របតាមគោលការណ៍របស់រាជរដ្ឋាភិបាលនីតិកាលទី៧ នៃរដ្ឋសភា «រើសឱ្យចំ បំពេញឱ្យត្រូវ រក្សាឱ្យនៅ» និងនិយាមនីតិវិធីប្រតិបត្តិការប្រឡងប្រជែង «គុណាធិបតេយ្យ តម្លាភាព យុត្តិធម៌ បរិយាបន្ន និងប្រសិទ្ធភាព»។

សម្រាប់សាធារណជនដែលមានបំណងដាក់ពាក្យចូលរួមប្រឡងប្រជែង សូមតាមដានព័ត៌មាន និងភ្ជាប់ជាមួយបណ្តាញផ្សព្វផ្សាយផ្លូវការនានារបស់ក្រសួងមុខងារសាធារណៈ តាមតំណមានជូនភ្ជាប់ខាងក្រោម៖ បណ្តាញផ្សព្វផ្សាយឈ្មោះ «ក្រសួងមុខងារសាធារណៈ» ១.Telegram (https://t.me/mcsgovkh)

២.Facebook (https://www.facebook.com/CivilServiceCambodia)

បណ្តាញផ្សព្វផ្សាយឈ្មោះ «ព័ត៌មានមុខងារសាធារណៈ» ១.Telegram (https://t.me/CivilServiceNews31) ២.Facebook (https://www.facebook.com/Civil.Service.New

The post ឆាប់ៗនេះ រដ្ឋនឹងរៀបចំប្រឡងរើសមន្ត្រីកសិកម្ម គ្រូពេទ្យ មន្ត្រីក្រសួងការបរទេស និងមន្រ្តីផ្នែកច្បាប់ នៃទីស្ដីការគណៈរដ្ឋមន្ត្រី appeared first on Kampuchea Thmey Daily.

ក្នុងជំនួបជាមួយថ្នាក់ដឹកនាំ មន្ត្រីរាជការ នៃមន្ទីរមុខងារសាធារណៈខេត្តរតនគិរី នារសៀលថ្ងៃទី០៩ ខែតុលា ឆ្នាំ២០២៤ ឯកឧត្តម ហ៊ុន ម៉ានី ឧបនាយករដ្ឋមន្ត្រី រដ្ឋមន្ត្រីក្រសួងមុខងារសាធារណៈ បានជំរុញលើកទឹកចិត្តឱ្យមន្ទីរបន្តផ្សព្វផ្សាយគោលការណ៍នៃការរៀបចំការប្រឡងប្រជែងជ្រើសរើសមន្ត្រីរាជការស៊ីវិល ប្រកបដោយគុណាធិបតេយ្យ តម្លាភាព យុត្តិធម៌ បរិយាបន្ន និងប្រសិទ្ធភាព ដែលក្រសួងបានអនុវត្តចំនួន៩ដងកន្លងមក។

ឧបនាយករដ្ឋមន្ត្រី ហ៊ុន ម៉ានី បានគូសបញ្ជាក់ថា រាជរដ្ឋាភិបាលកម្ពុជា នីតិកាលទី៧ បានផ្តល់អាទិភាពលើការកែទម្រង់រដ្ឋបាលសាធារណៈ ដែលក្នុងនោះ ការកែលម្អប្រព័ន្ធជ្រើសរើសមន្ត្រីរាជការស៊ីវិល តាមរយៈការប្រឡងប្រជែង គឺជាវិធានការគន្លឹះមួយក្នុងចំណោមវិធានការផ្សេងៗទៀត ដោយធ្វើយ៉ាងណា ធានាថា បេក្ខជនអាចចូលរួមប្រឡងប្រជែងក្លាយជាមន្ត្រីរាជការស៊ីវិល មកពីគ្រប់ទីកន្លែង គ្រប់ស្រទាប់ ដោយស្មើភាពគ្នា និងទទួលបានឱកាសច្រើនដង។

ភ្ជាប់ទៅនឹងការជំរុញដល់មន្ទីរមុខងារសាធារណៈខាងលើ ឯកឧត្តមឧបនាយករដ្ឋមន្ត្រី ក៏បានអំពាវនាវដល់បេក្ខជន និងសាធារណជនឱ្យប្រុងប្រយ័ត្ន និងជ្រៀសឱ្យឆ្ងាយពីជនឆ្លៀតឱកាស ក្នុងចេតនាក្លែងបន្លំ បោកប្រាស់ ឬ ការធានាដោយប្រការណាមួយពាក់ព័ន្ធនឹងការប្រឡងចូលក្របខណ្ឌមន្ត្រីរាជការស៊ីវិល។ ឯកឧត្តម បានសង្កត់ធ្ងន់ថា ការប្រឡងប្រជែងជ្រើសរើសមន្ត្រីរាជការស៊ីវិល ត្រូវពឹងផ្អែកលើសមត្ថភាពនៃចំណេះដឹងរបស់បេក្ខជនតែមួយគត់ ដោយត្រូវដើរស្របតាមគោលការណ៍គុណាធិបតេយ្យ តម្លាភាព យុត្តិធម៌ បរិយាបន្ន និងប្រសិទ្ធភាព ពោលគឺ «ចេះ គឺជាប់ ជាប់ដោយមោទនៈ ធ្លាក់ដោយអស់ចិត្ត»។

ការរៀបចំប្រព័ន្ធប្រឡងនេះ ក៏ជាការផ្តល់ឱកាស និងក្តីសង្ឃឹមដល់យុវជនទាំងទីប្រជុំជន និងជនបទមានឱកាសស្មើៗគ្នា ក្នុងការប្រឡងប្រជែងក្លាយជាមន្ត្រីរាជការស៊ីវិល។ នេះជាការបន្ថែមរបស់ឯកឧត្តមឧបនាយករដ្ឋមន្ត្រី ហ៊ុន ម៉ានី៕

The post ឯកឧត្តម ហ៊ុន ម៉ានី អំពាវនាវសាធារណជនប្រុងប្រយ័ត្នជនបោកប្រាស់ជុំវិញការប្រឡងចូលមន្ត្រី appeared first on Kampuchea Thmey Daily.

ការសម្រេចផ្ដល់ក្របខ័ណ្ណមួយនេះ ធ្វើឡើងបន្ទាប់ពី លោក គង់ បុរាណ បង្ហោះលើគណនីហ្វេសប៊ុកស្នើសុំក្របខ័ណ្ឌរដ្ឋ ពីសំណាក់ប្រមុខថ្នាក់ដឹកនាំ ដើម្បីបានបម្រើប្រទេសជាតិក្នុងវិស័យសិល្បៈចាប៉ីដងវែង និងដើម្បីទ្រទ្រង់ជីវភាពទៅថ្ងៃខាងមុខបន្តទៀត។

សម្ដេចធិបតី ហ៊ុន ម៉ាណែត បង្ហោះលើគណនីហ្វេសប៊ុក ដូច្នេះ ៖« ខ្ញុំបានឃើញសាររបស់ប្អូនប្រុស គង់ បុរាណ ដែលត្រូវជាកូនប្រុសបង្កើតរបស់លោកតា គង់ ណៃ ដែលប្អូនបានស្នើសុំចូលបម្រើក្នុងក្របខ័ណ្ឌរដ្ឋ ដើម្បីបានដើរតាមគន្លងរបស់លោកឪពុក ហើយជាពិសេសប្អូនមានជំនាញចាប៉ី ដែលអាចបន្តវេនពីលោកឪពុករបស់ប្អូន។ ខ្ញុំឯកភាពតាមសំណើរបស់ប្អូនប្រុស គង់ បុរាណ »។

ដើម្បីឱ្យកិច្ចការបញ្ចូលឈ្មោះ លោក គង់ បុរាណ ទៅក្នុងក្របខ័ណ្ឌរដ្ឋ ដំណើរការរលូន ស្រ​បតាមនីតិវិធី សម្ដេចធិបតីនាយករដ្ឋមន្ត្រី បានប្រគល់ភារកិច្ចជូនឯកឧត្តម ហ៊ុន ម៉ានី ឧបនាយករដ្ឋមន្ត្រី រដ្ឋមន្ត្រីក្រសួងមុខងារសាធារណៈ និង រដ្ឋមន្ត្រីក្រសួងវប្បធម៌ និងវិចិត្រសិល្បៈ រៀបចំកិច្ចការងារនេះ។

ជាចុងក្រោយ សម្ដេចធិបតី បញ្ចប់សំណេរលើគណនីហ្វេសប៊ុកផ្ទាល់ខ្លួន ជាមួយនឹងពាក្យជូនពរ ឱ្យលោក គង់ បុរាណ ជាកូនប្រុសតែមួយរបស់លោកតា គង់ ណៃ ដែលចេះសិល្បៈចាប៉ីដងវែង ទទួលបានជោគជ័យក្នុងការបន្តវេនចាប៉ីពីលោកតា គង់ ណៃ។

លោក គង់ បុរាណ គឺជាកូនទី៩ ក្នុងចំណោមកូនទាំង១០ របស់អតីតព្រឹទ្ធាចារ្យកោសល្យវោហារ គង់ ណៃ និងលោកយាយ តាត់ ឆេន។

សូមរម្លឹក​ថា ព្រឹទ្ធាចារ្យកោសល្យវោហារ គង់ ណៃ ទទួលអនិច្ចកម្ម កាលថ្ងៃទី២៨ ខែមិថុនា ឆ្នាំ២០២៤ ដោយជរាពាធ ក្នុងជន្មានយុ៨០ ឆ្នាំ នៅគេហដ្ឋាន ក្នុងភូមិដូង ឃុំស្វាយទង ស្រុកកំពង់ត្រាច ខេត្តកំពត៕

ដោយ៖ ង៉ិល ណារ៉ាត់

The post សម្ដេចធិបតី ផ្ដល់ក្របខ័ណ្ឌរដ្ឋជូនកូនលោកតា គង់ ណៃ ដើម្បីបន្តវេនសិល្បៈចាប៉ី តាមឳពុក appeared first on Kampuchea Thmey Daily.

ការប្រកាសរបស់សម្ដេចធិបតី ហ៊ុន ម៉ាណែត បែបនេះ ក្រោយទទួលបានសំណើពីយុវជនម្នាក់ ឈ្មោះ ជាសំណាង រស្មីសត្យា ដែលជាកូនប្រុសរបស់យោធិនពលីម្នាក់ក្នុងចំណោម យោធិនពលីជីវិតទាំង២០នាក់ កាលពីកន្លងទៅថ្មីៗនេះ ក្នុងការស្នើសុំចូលក្របខ័ណ្ឌកងយោធពលខេមរភូមិន្ទបន្តពីឪពុករបស់ខ្លួន។ ឆ្លើយតបនឹងសំណើរសុំនេះ សម្ដេចធិបតី ក៏ទទួលឯកភាពឱ្យយុវជនរូបនេះចូលបម្រើក្នុងជួរកងទ័ព ព្រមទាំងប្រកាស់ផ្តល់ក្របខ័ណ្ឌដល់សាច់ញាតិបង្កើត របស់យោធិនពលីដទៃទៀតផងដែរ។

សម្ដេចធិបតី បានលើកឡើងដូច្នេះថា៖ «ខ្ញុំបានឃើញសាររបស់ក្មួយ ជាសំណាង រស្មីសត្យា ជាកូនបង្កើតរបស់វរសេនីយ៍ទោ ជា សំណាង ជាយោធិនដែលបានពលីក្នុងឧបទ្ទវហេតុផ្ទុះគ្រាប់នៅយោធភូមិភាគទី៣ ដោយក្មួយបានស្នើសុំក្របខ័ណ្ឌ ចូលបម្រើក្នុងជួរកងយោធពលខេមរភូមិន្ទដើម្បីបានបន្តវេន្តពីឪពុក។ ខ្ញុំឯកភាពតាមសំណើរបស់ក្មួយប្រុស រស្មីសត្យា»។

សម្ដេចបានបន្តដូច្នេះ «មិនត្រឹមតែសម្រាប់ក្មួយប្រុស រស្មីសត្យា តែម្នាក់ទេ ខ្ញុំនឹងផ្តល់ក្របខ័ណ្ឌជូនដល់សាច់ញាតិបង្កើត របស់យោធិនពលីទាំង ២០នាក់ (អាចជាកូន ជាចៅ ឬជាបងប្អូនបង្កើត និងអាចជាស្រី ឬជាប្រុសក៏បាន) ដើម្បីអាចបានចូលបម្រើក្នុងជួរកងទ័ពបន្តវេនពីឳពុក ឬបងប្អូនរបស់គាត់»។

គួររំលឹកថា កាលពីថ្ងៃសៅរ៍ ទី២៧ ខែមេសា នៅយោធភូមិភាគទី៣ ខេត្តកំពង់ស្ពឺ មានឧបទ្ទវហេតុផ្ទុះឃ្លាំងស្តុកគ្រាប់មួយបានកើតឡើង បណ្ដាលឱ្យយោធិនចំនួន២០រូប បានបាត់បង់ជីវិត និងមានយោធិនឯទៀតរងរបួស។

មរណភាពរបស់យោធិនទាំង២០រូប រាប់ចាប់តាំងពីរាស្ត្រ មន្ត្រី ប្រធាន សមាជិករដ្ឋសភា ប្រធានព្រឹទ្ធសភា នាយករដ្ឋមន្ត្រី​ ព្រះរាជា សុទ្ធតែបានសម្ដែងនូវសេចក្ដីតក់ស្លុត និងរំលែកទុក្ខជូនចំពោះក្រុមគ្រួសារនៃសព ក៏ដូចជាបានជូនពរឱ្យអ្នករងរបួសឆាប់ជាសះស្បើយ៕

The post សម្ដេច ហ៊ុន ម៉ាណែត ប្រកាសផ្ដល់ក្របខ័ណ្ឌឱ្យសាច់ញាតិនៃយោធិនពលីក្នុងឧបទ្ទវហេតុផ្ទុះគ្រាប់ appeared first on Kampuchea Thmey Daily.

លោកបណ្ឌិត ពេជ្រ ស្រស់ ប្រធានគណបក្សយុវជនកម្ពុជា មានប្រសាសន៍ប្រាប់កម្ពុជាថ្មី នៅព្រឹកថ្ងៃទី ១៣ ខែកញ្ញានេះថា ការធ្វើកំណែទម្រង់សម្រាប់ការប្រឡងចូលក្របខណ្ឌរដ្ឋ ឲ្យមានយុត្តិធម៌ និងមានភាពត្រឹមត្រូវ គឺជារឿងដ៏ល្អប្រសើរមួយ ដើម្បីជ្រើសរើសយកមន្ត្រីដែលមានចំណេះដឹង ជំនាញ និងគុណភាព ពិតប្រាកដ។ ប្រធានគណបក្សយុវជនកម្ពុជា បានបន្តថា ប្រសិនបើការធ្វើកំណែទម្រង់នេះ ទទួលបានជោគជ័យ គឺមន្ត្រីរាជការទាំងអស់​ សុទ្ធតែជាមន្ត្រីរាជការប្រកបដោយចំណេះដឹង ជំនាញ និងបំពេញកិច្ចការងារប្រកបដោយគុណភាព​។

តែយ៉ាងណាក៏ដោយលោកបណ្ឌិត ពេជ្រ ស្រស់ បានស្នើបែបនេះថា «ការកំណែទម្រង់បែបនេះ ខ្ញុំលើកទឹកចិត្តឲ្យកំណែទម្រង់ ឲ្យមានតម្លាភាព​ពិតប្រាកដមែនទែន ហើយឲ្យមានយុត្តិធម៌ និងត្រឹមត្រូវ កុំឲ្យមានជនឆ្លៀតឱកាស រឹតបន្តឹងហើយ បើកច្រកកន្លែងផ្សេង ដើម្បីប្រព្រឹត្តអំពើពុករលួយ នោះធ្វើឲ្យកើតនូវរឿងផ្សេងទៀត»។

ចំណែកឯលោក ញឿន រ៉ាដែន អ្នកនាំពាក្យគណបក្សហ៊្វុនស៊ិនប៉ិចវិញ ក៏បានប្រកាសការសាទរយ៉ាងខ្លាំង ចំពោះការប្រកាសធ្វើកំណែទម្រង់ ការប្រឡងចូលក្របខណ្ឌរដ្ឋរបស់រាជរដ្ឋាភិបាល អាណត្តិទី ៧នេះ។ លោក រ៉ាដែន មានប្រសាសន៍ប្រាប់កម្ពុជាថ្មីដែរថា លោក សាទរយ៉ាងក្រៃលែងចំពោះកំណែទម្រង់ ប្រកបដោយភាពជាក់លាក់ ក្នុងយន្តការ នៃការប្រឡងថ្នាក់ជាតិ ដោយយុត្តិធម៌ និងតម្លាភាព។

អ្នកនាំពាក្យគណបក្សហ៊្វុនស៊ិនប៉ិច បានបន្ថែមបែបនេះថា «ជាការពិតណាស់ មិនមែនតែសម្រាប់រូបខ្ញុំទេ ប្រាកដណាស់ សិស្ស និស្សិត បញ្ញវន្ត និងអាណាព្យាបាលគ្រប់រូបរីករាយ ចំពោះការប្រកាសនេះ ព្រោះថា ក្នុងកំណែទម្រងនេះ យើងនឹងស្វែងរកបាន នូវអ្នកមានចំណេះ ជំនាញច្បាស់លាស់ ក្នុងស្ថាប័ន ក្រសួងមួយ និងប្រសិទ្ធិភាពការងារ។ ព្រះរាជា ណាចក្រកម្ពុជា កាន់តែវិវត្តទៅមុខ ប្រកបដោយការរីកចម្រើន លូតលាស់ ជាពិសេសយុវជនមានការងារធ្វើ និងមានជំនាញច្បាស់លាស់»។

ក្នុងពិធីជួបសំណេះសំណាលជាមួយកម្មករ-កម្មការនី កាលពីថ្ងៃទី ៩ ខែកញ្ញា ឆ្នាំ ២០២៣កន្លងទៅនេះ សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា បានប្រកាសអំពីការធ្វើកំណែទម្រង់ការប្រឡងចូលក្របខណ្ឌរដ្ឋ ដោយឈរលើគោលការណ៍ «ចេះ គឺជាប់»​ ដោយសម្ដេចបានមានប្រសាសន៍បែបនេះថា «យើងត្រូវពិនិត្យធ្វើយ៉ាងណា ឲ្យត្រឹមត្រូវតម្លាភាព យុត្តិធម៌ ធានាថាអ្នកចេះជាប់ នេះហើយជាគោលការណ៍របស់យើង»។

ចំណែកឯឯកឧត្ដម ហ៊ុន ម៉ានី រដ្ឋមន្ត្រីក្រសួងមុខងារសាធារណៈ ក៏បានបញ្ជាក់កាលពីពេលថ្មីៗនេះដែរថា កំណែទម្រង់ការប្រឡងក្របខណ្ឌមន្ត្រីរាជការ៖ «មិនចាំបាច់ត្រូវស្គាល់អ្នកធំ មិនចាំបាច់ត្រូវមានខ្សែ តែត្រូវមានសមត្ថភាព»។

ឯកឧត្ដម ហ៊ុន ម៉ានី បានបញ្ជាក់ទៀតថា ឯកឧត្ដម មានតួនាទី និងទំនួលខុសត្រូវខ្ពស់ចំពោះសម្តេចមហាបវរធិបតីនាយករដ្ឋមន្ត្រី ក្នុងនាមជារដ្ឋមន្ត្រីមុខងារសាធារណៈ នៅក្នុងការសម្រេចកិច្ចការកែទម្រង់លើការប្រឡងនេះ ឲ្យបានហ្មត់ចត់ជាទីបំផុត និងជាពិសេសក្នុងគោលដៅដើម្បីសមធម៌ និងយុត្តិធម៌សង្គម​ ឆ្ពោះទៅកាន់កំណែទម្រង់មួយ ដែលអាចទទួលបានទាំងអស់គ្នា៕

The post បក្សនយោបាយ សាទរចំពោះការធ្វើកំណែទម្រង់ការប្រឡងចូលក្របខណ្ឌរដ្ឋ ដោយឈរលើគោលការណ៍ «អ្នកចេះ គឺជាប់»​ appeared first on Kampuchea Thmey Daily.