ថ្លែងក្នុងពិធីទស្សនាទានព្រះពុទ្ធសាសនា ក្រោមប្រធានបទ «តម្លៃសីលធម៌យុវជនក្នុងសង្គមខ្មែរ» ដែលរៀបចំនៅវិទ្យាល័យមិត្តភាពកម្ពុជា-កំពត ក្រុងកំពត នាថ្ងៃទី២ ខែមិថុនា ឆ្នាំ២០២៦ លោក ប៉ែន វិបុល មានប្រសាសន៍ថា ក្នុងយុគសម័យបច្ចេកវិទ្យាឌីជីថល និងបណ្ដាញសង្គមដែលកំពុងរីកចម្រើនយ៉ាងឆាប់រហ័ស យុវជនត្រូវមានការប្រើប្រាស់បច្ចេកវិទ្យាដោយការទទួលខុសត្រូវ និងមានការពិចារណាឲ្យបានត្រឹមត្រូវ ព្រោះបច្ចេកវិទ្យាអាចផ្តល់ទាំងគុណប្រយោជន៍ និងផលប៉ះពាល់ ប្រសិនបើប្រើប្រាស់មិនបានសមស្រប។

លោកបានលើកឡើងថា បច្ចុប្បន្ននេះ មានសិស្សានុសិស្សមួយចំនួនបានងាកចេញពីគន្លងអប់រំល្អ ដោយមិនសូវស្តាប់ដំបូន្មានរបស់ឪពុកម្តាយ លោកគ្រូ អ្នកគ្រូ និងចាស់ព្រឹទ្ធាចារ្យ ព្រមទាំងចំណាយពេលច្រើនលើការកម្សាន្តក្នុងបណ្ដាញសង្គម រហូតប៉ះពាល់ដល់ការសិក្សា និងការអភិវឌ្ឍខ្លួនឯង។ ដូច្នេះ យុវជនត្រូវចេះជ្រើសរើសព័ត៌មានល្អៗ ស្វែងរកចំណេះដឹងថ្មីៗ និងប្រកាន់ខ្ជាប់នូវគុណធម៌ សីលធម៌ ដើម្បីក្លាយជាពលរដ្ឋល្អសម្រាប់សង្គមជាតិ។

លោក ប៉ែន វិបុល បញ្ជាក់ថា ព្រះពុទ្ធសាសនាបានបង្រៀនមនុស្សឲ្យប្រព្រឹត្តល្អ លះបង់អំពើអាក្រក់ និងខិតខំកសាងគុណធម៌ក្នុងខ្លួន។ ការគោរពឪពុកម្តាយ និងគ្រូបង្រៀន គឺជាគុណតម្លៃដ៏សំខាន់ដែលយុវជនគ្រប់រូបត្រូវប្រកាន់ខ្ជាប់ ព្រោះអ្នកទាំងនេះជាអ្នកផ្តល់កំណើត ផ្តល់ចំណេះដឹង និងតម្រង់ទិសជីវិតឲ្យទទួលបានភាពជោគជ័យ និងការតបស្នងសងគុណដ៏ប្រសើរបំផុត គឺការខិតខំរៀនសូត្រ ក្លាយជាកូនល្អ សិស្សល្អ និងពលរដ្ឋល្អសម្រាប់សង្គម។

ជាមួយគ្នានេះ លោក ប៉ែន វិបុល ក៏បានលើកទឹកចិត្តដល់យុវជនឲ្យយល់ដឹងអំពីកាតព្វកិច្ចចំពោះជាតិ និងប្រជាជន ដោយត្រូវមានស្មារតីស្នេហាជាតិ ស្រឡាញ់សន្តិភាព និងត្រៀមខ្លួនចូលរួមបំពេញកាតព្វកិច្ចយោធាតាមច្បាប់កំណត់។

រដ្ឋលេខាធិការក្រសួងធម្មការ និងសាសនាបានចាត់ទុកថា ការចូលរួមបម្រើក្នុងវិស័យការពារជាតិ មិនត្រឹមតែជាកាតព្វកិច្ចរបស់ប្រជាពលរដ្ឋប៉ុណ្ណោះទេ ប៉ុន្តែក៏ជាការបង្ហាញពីការទទួលខុសត្រូវចំពោះប្រទេសជាតិ និងការចូលរួមថែរក្សាសុខសន្តិភាព ស្ថិរភាព និងអធិបតេយ្យភាពជាតិឲ្យបានគង់វង្សផងដែរ។

លោកក៏បានអំពាវនាវឱ្យសិស្សានុសិស្សទាំងអស់ ត្រូវបន្តប្រកាន់ខ្ជាប់នូវពាក្យប្រៀនប្រដៅរបស់ព្រះពុទ្ធសាសនា រស់នៅដោយសុចរិតភាព វិន័យ និងការទទួលខុសត្រូវ ជៀសឲ្យឆ្ងាយពីគ្រឿងញៀន ល្បែងស៊ីសង អំពើហិង្សា និងអំពើអបាយមុខនានា ដើម្បីក្លាយជាធនធានមនុស្សប្រកបដោយគុណភាព មានចំណេះដឹង សមត្ថភាព និងស្មារតីស្នេហាជាតិ រួមចំណែកអភិវឌ្ឍប្រទេសជាតិឲ្យមានការរីកចម្រើនប្រកបដោយចីរភាព នាពេលអនាគ៕

អត្ថបទ៖ សឹង រ៉ាត់

The post មន្ត្រីជាន់ខ្ពស់ក្រសួងធម្មការលើកទឹកចិត្តសិស្សឲ្យខិតខំរៀនសូត្រ និងត្រៀមខ្លួនបំពេញកាតព្វកិច្ចយោធា appeared first on Kampuchea Thmey Daily.

ជាកិច្ចស្វាមគមន៍ ព្រះវិន័យសំវរ រិន សុផុន ព្រះចៅអធិការវត្ត បានថ្លែងអំណរព្រះគុណនិងអរគុណដល់សម្តេច លោករដ្ឋមន្ត្រី ព្រមទាំងឯកឧត្តម លោកជំទាវ លោក លោកស្រីទាំងអស់ ដែលបានឆ្លៀតពេលដ៏មមាញឹក អញ្ជើញមកពិនិត្យមើលការដាំដំណាំ និងបន្លែបង្ការនៅក្នុងវត្ត។ ព្រះវិន័យសំវរមានព្រះសង្ឃដីការប្រគេននិងបញ្ជាក់ជូនអំពីស្ថានភាពទូទៅរបស់វត្តថា វត្តធម្មវិបស្សនារាម (ហៅវត្តតាភេម) បានកសាងឡើងតាំងពីឆ្នាំ១៨៣០(អាយុកាល១៩៦ឆ្នាំ) លើផ្ទៃដីទំហំ ៥ហិកតា ៣២អារ ៦៩ម៉ែត្រក្រឡា។ បច្ចុប្បន្នវត្តមានព្រះសង្ឃសរុបចំនួន ៦៥ព្រះអង្គ តាជី យាយជីសរុបចំនួន៤០នាក់ និងក្មេងវត្តសរុបចំនួន៥នាក់។ កន្លងមក អាស្រ័យដោយមានសទ្ធាជ្រះថ្លាដ៏ខ្ពង់ខ្ពស់ពីសំណាក់សម្តេចអគ្គមហាសេនាបតីតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែនទើបធ្វើឱ្យការកសាងសមិទ្ធផលនានានៅក្នុងវត្តមានការរីកចម្រើនជាលំដាប់។

ក្រៅពីសមិទ្ធផលដែលជាសំណង់ហើយនោះ ផ្ទៃដីវត្តមួយចំនួនបានប្រើប្រាស់ទៅលើការរធ្វើកសិកម្មដាំបន្លែ បង្ការ និងដើមឈើហូបផ្លែ។ ព្រះតេជគុណបានបញ្ជាក់ថា ការផ្តួចផ្តើមគំនិតឱ្យព្រះសង្ឃ អាចារ្យ និងគណៈកម្មការវត្តដាំដុះបន្លែ បង្ការ នេះ ដើម្បីផ្គត់ផ្គង់ជាចង្ហាន់ប្រចាំថ្ងៃដល់ព្រះសង្ឃ តាជី យាជី និងកូនសិស្ស ដែលគង់និងស្នាក់នៅសិក្សារៀនសូត្រ ប្រតិបត្តិធម៌នៅក្នុងវត្ត បានឆាន់និងទទួលទាន។ ម្យ៉ាងទៀតក៏ទទួលបាននូវបន្លែផ្លែឈើធម្មជាតិ ដែលមានគុណភាពខ្ពស់ គ្មានជាតិគីមី ជាគុណប្រយោជន៍ចំពោះព្រះសុខភាពនិងសុខភាព។ ចំណែកបន្លែ ផ្លែឈើមួយចំនួនទៀត ក៏ត្រូវបានផ្ដល់ជាទានសម្រាប់បរិស័ទចំណុះជើងវត្ត ផងដែរ។

ក្នុងឱកាសនោះ លោករដ្ឋមន្ត្រី មានប្រសាសន៍ថា កន្លងមកក្រសួងធម្មការនិងសាសនា សហការជាមួយគណៈសង្ឃនាយកទាំងពីរគណៈ បានធ្វើការណែនាំដល់ព្រះមន្ត្រីសង្ឃមូលដ្ឋានគ្រប់លំដាប់ថ្នាក់ មន្ទីរធម្មការនិងសាសនាគ្រប់រាជធានី-ខេត្ត ជាពិសេសព្រះចៅអធិការគ្រប់វត្តនៅទូទាំងប្រទេស គប្បីយកព្រះទ័យនិងយកចិត្តទុកដាក់ខ្ពស់ក្នុ ងការរៀបចំ វត្តអារាមនីមួយៗ ឱ្យមានការដាំដំណាំនិងបន្លែបង្ការលើផ្ទៃដីវត្ត តាមលទ្ធភាពដែលអាចធ្វើទៅបាន ក្នុងនោះមានដូចជា ស្ពៃគ្រប់មុខ ខាត់ណា សាលាដ ត្រសក់ ត្រកួន ត្រឡាច ល្ពៅ និងដំណាំជីគ្រប់ប្រភេទ ដើម្បីធានាដល់ការប្រើប្រាស់ សម្រាប់បំពេញតម្រូវការជីវភាពប្រចាំថ្ងៃ និងដើម្បីសម្រាលដល់ការទ្រទ្រង់ចង្ហាន់ប្រចាំថ្ងៃរបស់ព្រះសង្ឃ  និងពុទ្ធបរិស័ទចំណុះជើងវត្ត ទទួលបានបន្លែបង្ការធម្មជាតិ ដែលមានគុណប្រយោជន៍ដល់សុខភាព និងពង្រឹងសាមគ្គីភាព ព្រមទាំងការទំនុកបម្រុងរវាងព្រះសង្ឃនិងពុទ្ធបរិស័ទ ទៅវិញទៅមក។

សម្តេចព្រះពុទ្ធជ័យមុនី និងលោករដ្ឋមន្ត្រី បានកោតសរសើរចំពោះព្រះវិន័យសំវរ រិន សុផុន ព្រះចៅអធិការវត្តធម្មវិបស្សនារាម (វត្តតាភេម)ដែលបានយកព្រះទ័យទុកដាក់ចាត់ឱ្យអាចារ្យ គណៈកម្មការ ក្មេងវត្ត ជួយរៀបចំឈូសឆាយដីនិងធ្វើរងសម្រាប់ដាំដំណាំនិងបន្លែបង្ការបន្ទាប់បន្សំ ដើម្បីផ្គត់ផ្គង់ជាចង្ហាន់ដល់ព្រះសង្ឃ មិនតែប៉ុណ្ណោះ ព្រះអង្គថែមទាំងបំផុសឱ្យពុទ្ធបរិស័ទចំណុះជើងវត្តចូលរួមនូវសកម្មភាពដាំបន្លែនៅតាមគេហដ្ឋានដែលមានដីទំនេររៀងៗខ្លួនផងដែរ។ សកម្មភាពទាំងនេះ ពិតជាឆ្លើយតបបានយ៉ាងសមស្របទៅនឹងសភាពការណ៍បច្ចុប្បន្នដែលពិភពលោកកំពុងជួបប្រទះនូវវិបត្តិជាសាកល ហើយក៏ស្របទៅនឹងទ្រឹស្តី មត្តញ្ញុតាធម៌ (ការរស់នៅដោយភាពស្គាល់ប្រមាណ) របស់ព្រះសម្មាសម្ពុទ្ធជាអង្គម្ចាស់ ដែលទ្រង់សម្តែងឱ្យពុទ្ធបរិស័ទញ៉ាំងជីវិតប្រព្រឹត្តិទៅក្នុងភាពស្គាល់ប្រមាណនិងស្គាល់ភាពគ្រប់គ្រាន់។ ចំណែកបច្ចេកទេសដាំដុះបន្លែបង្ការ គណៈសង្ឃរាជធានី-ខេត្ត មន្ទីរធម្មការនិងសាសនា ព្រមទាំងពុទ្ធបរិស័ទទាំងអស់ ត្រូវសហការជាមួយអាជ្ញាធរ ពាក់ព័ន្ធ ជាពិសេស ជំនាញផ្នែកកសិកម្ម ដើម្បីជួយផ្នែកបច្ចេកទេស ដាំដុះ ការប្រើប្រាស់ពូជ និងជីធម្មជាតិជាដើម សំដៅធានាបាននូវបច្ចេកទេសត្រឹមត្រូវក្នុងដំណើរការដាំដំណាំនិងបន្លែបង្ការឱ្យមានភាពល្អប្រសើរនិងវឌ្ឍនភាពទៅមុខជានិច្ច។

សម្តេចព្រះសង្ឃនាយករងទី៣ និងលោករដ្ឋមន្រ្តី បានជំរុញលើកទឹកព្រះទ័យ ទឹកចិត្តឱ្យព្រះគ្រូចៅអធិការ និងព្រះសង្ឃគ្រប់ព្រះអង្គ ព្រមទាំងពុទ្ធបរិស័ទចំណុះជើងវត្តទាំងអស់ យកព្រះទ័យ និងយកចិត្តទុកដាក់ ខិតខំប្រឹងប្រែងបន្តនិរន្តភាពនៃការដាំដុះនេះឱ្យកាន់តែផលផុស ដើម្បីអភិវឌ្ឍវត្តឱ្យប្រែក្លាយទៅជារមណីយដ្ឋានបៃតង ជាវត្តគំរូសម្រាប់ឱ្យវត្តដទៃៗទៀតនៅទូទាំងប្រទេសបានយកតម្រាបតាម និងដើម្បី រក្សាបានសុខមាលភាពល្អទាំងផ្លូវកាយ និងផ្លូវចិត្ត ស្របតាមព្រះពុទ្ធដីការ ទ្រង់សម្តែងទុកថា អរោគ្យាបរមា លាភា ភាពមិនមានរោគ ជាលាភដ៏ប្រសើរ។ លើសពីនេះ សម្តេចព្រះសង្ឃនាយករងទី៣ និងលោករដ្ឋមន្ត្រី បានស្នើឱ្យគ្រប់វត្តអារាមនៅទូទាំងព្រះរាជាណាចក្រកម្ពុជា ចូលរួមអនុវត្តតាមសេចក្តីណែនាំរបស់ក្រសួងធម្មការនិងសាសនា រួមជាគណៈសង្ឃនាយក ស្តីពីការដាំបន្លែ បង្ការ និងដើមឈើហូបផ្លែ លើផ្ទៃដីវត្តដែលទំនេរ ហើយចូលរួមបង្កើនបរិស្ថានស្អាត ស្របតាមអភិក្រម ស៣ របស់ក្រសួងធម្មការនិងសាសនាដែលបានដាក់ឱ្យអនុវត្តសម្រាប់វត្តអារាមនៅទូទាំងប្រទេស។

លើសពីនេះ សម្តេចព្រះពុទ្ធជ័យមុនីបណ្ឌិត និងលោករដ្ឋមន្រ្តី បានចម្រើនពរនិងអញ្ជើញពុទ្ធបរិស័ទទាំងទីជិតទីឆ្ងាយព្រមទាំងយុវជនយុវនារីឱ្យចូលមកធ្វើបុណ្យសុន្ទរទាននៅក្នុងវត្តធម្មវិបស្សនារាម (ហៅវត្តតាភេម) ព្រមទាំងទស្សនាសួនបន្លែសរីរាង្គដែលតាជីយាយជី និងក្មេងវត្ត ព្រមទាំងព្រះសង្ឃបានដាំ ក្រោមព្រះគំនិតផ្តួចផ្តើមរបស់ព្រះវិន័យសំវរ រិន សុផុនព្រះចៅអធិការ ស្របតាមសេចក្តីណែនាំរបស់គណៈសង្ឃនាយកទាំងពីរគណៈ និងក្រសួងធម្មការនិងសាសនា។

នាឱកាសនោះដែរ លោករដ្ឋមន្រ្តីក៏បានប្រគេនទេយ្យវត្ថុ បច្ច័យ គ្រឿងបរិក្ខារមួយចំនួន និង ជីសរីរាង្គបូកាឈីរ៉ា (BOKACHIRA) ដែលជាផលិតផលខ្មែរ ផលិតនៅក្នុងស្រុកកំពង់ត្របែក ខេត្តព្រៃវែង ដល់ព្រះចៅអធិការវត្ត ព្រះសង្ឃគ្រប់ព្រះអង្គ  ព្រមទាំងអាចារ្យ គណៈកម្មការវត្ត លោកតា លោកយាយ ព្រមទាំងបានប្រគេនពរ ជូនពរសូមឱ្យបានសមប្រកបដោយពុទ្ធពរបួនប្រការគឺ អាយុ វណ្ណៈ សុខៈ ពលៈ កុំបីប្រែក្លាយជាបការៈដទៃឡើយ៕

The post រដ្ឋមន្ត្រី​ធម្មការ​និង​សាសនា ចុះ​ពិនិត្យ​ការ​ដាំ​បន្លែ​នៅ​វត្ត​តាភេម និង​ស្នើ​ដល់​វត្ត​ផ្សេង​ទៀត​អនុវត្ត​តាម  appeared first on Kampuchea Thmey Daily.

ថ្លែង​ក្នុង​ពិធី​អបអរ​សាទរ​ខួប​ទី​១១៥ ទិវា​អន្តរជាតិ​នារី ព្រឹក​ថ្ងៃ​ទី​៩ ខែ​មីនា ឆ្នាំ​២០២៥ នៅ​ទីស្ដីការ​ក្រសួង​ធម្មការ លោក​រដ្ឋមន្ត្រី ចាយ បូរិន មាន​ប្រសាសន៍​ថា ការ​រីក​ចម្រើន​របស់​ស្ត្រី​ក្នុង​ការងារ​មិន​ត្រឹមតែ​ផ្ដល់​នូវ​ការ​រីក​ចម្រើន​ដល់​ស្ត្រី​ខ្លួន​ឯង​​ប៉ុណ្ណោះ​ទេ ថែម​ទាំង​ជួយ​ដល់​ស្ថាប័ន និង​ធ្វើ​ឱ្យ​គ្រួសារ​រីកចម្រើន និង​មាន​សុភមង្គល​ផង​ដែរ។ លោក​បាន​​ជំរុញ​ដល់​ស្ត្រី​ទាំង​អស់​បន្ត​កសាង​សមត្ថភាព​របស់​ខ្លួន​ ទាំង​ចំណេះ​ ជំនាញ វិជ្ជាជីវៈ​ផ្សេង​បន្ថែម​ទៀត។

លោក​បាន​រម្លឹក​ប្រសាសន៍​របស់​ជំទាវ​ទី១​កម្ពុជា​លោកស្រី ពេជ ចន្ទ​មុន្នី​ហ៊ុនម៉ាណែត ដែល​ថា៖ «នៅ​ក្នុង​ផ្ទះ បើ​មិន​មាន​ភរិយា​ខ្លាំង មិន​មាន​ម្ដាយ​ល្អ នោះ​ស្វាមី និង​ឪពុក​ក៏​ពិបាក​នឹង​មាន​ឱកាស​គ្រប់គ្រាន់​ធ្វើ​រឿង​ជោគ​ជ័យ​នៅ​ខាង​ក្រៅ​ដែរ​»​។

ជា​មួយ​គ្នា​នេះ​លោក​រដ្ឋមន្ត្រី​ក៏​បាន​ជំរុញ​ដល់​បុរស​ ដែល​ជា​ស្វាមី ឪពុក មិត្ត​រួម​ការងារ​ជាមួយ​ស្ត្រី​ទាំង​អស់​ត្រូវ​ធ្វើ​ជា​បង្អែក​ដ៏​រឹងមាំ និង​ជា​ដៃ​គូ​សន្តិភាព​មិន​អាច​ខ្វះ​បាន​ក្នុង​ការ​ផ្ដល់​តម្លៃ និង​ការពារ​សន្ដិសុខ​សម្រាប់​ស្ត្រី​ក្នុង​គ្រួសារ អង្គភាព និង​សង្គម​ជាតិ​។ លោក​ក៏​អំពាវ​នាវ​ឱ្យ​មាន​ការ​បង្កើន​ការ​យល់​ដឹង និង​ទប់​ស្កាត់​ការ​បៀតបៀន​ស្ត្រី​តាម​ប្រព័ន្ធ​អន​ឡាញ​​ផង​ដែរ​ដើម្បី​ធានា​ថា​ ស្ត្រី​និង​ក្មេង​ស្រី អាច​ប្រើប្រាស់​បច្ចេកវិទ្យា​ដើម្បី​អភិវឌ្ឍ​ខ្លួន​ដោយ​គ្មាន​ការ​គំរាម​កំហែង​។

រាជរដ្ឋាភិបាល​កម្ពុជា​អាណត្តិ​ទី​៧ ​បាន​កំណត់​យក​ «មនុស្ស» ជា​អាទិភាព​ចម្បង​ ក្នុង​នោះ បញ្ចកោណ​ទី១ ផ្តោត​សំខាន់​ទៅ​លើ​ «ការអភិវឌ្ឍមូលធនមនុស្ស» ដែលគិតគូរ​ទៅលើការលើក​កម្ពស់​សុខភាព និង​សុខុមាលភាព ប្រជាជន និងការពង្រឹងប្រព័ន្ធគាំពារសង្គម។ បញ្ចកោណ​មុំទី៤.១ ស្តីពី «ការអភិវឌ្ឍប្រកបដោយភាពធន់ ចីរភាព និងបរិយាបន្ន» បានផ្តោត​សំខាន់​លើការ​លើក​កម្ពស់​សមភាពយេនឌ័រ និងបានទប់ស្កាត់ គ្រប់ទម្រង់នៃអំពើហិង្សាទាក់ទងនឹងយេនឌ័រ តាមរយៈការបង្កើនការ វិនិយោគលើយេនឌ័រ ការបង្កើនភាពអង់អាចដល់ស្ត្រីលើគ្រប់វិស័យ បង្កលក្ខណៈ​អំណោយផលដល់ស្ត្រី ក្នុងការអនុវត្តសិទ្ធិ ភាពជាអ្នកដឹកនាំ ដើម្បីកាត់បន្ថយ​អំពើ​ហិង្សា ទាក់ទងនឹងយេនឌ័រ ការរៀបអាពាហ៍ ពិពាហ៍នៅវ័យក្មេង ការមានផ្ទៃពោះវ័យជំទង់ ព្រមទាំងលើកកម្ពស់ សុខភាពសាធារណៈ ដូចជាបញ្ហាកង្វះអាហារូបត្ថម្ភនារីនិងកុមារ៕

អត្ថបទដោយ ហ៊ុន សិរីវឌ្ឍន៍

The post លោក​រដ្ឋមន្ត្រី ចាយ បូរិន ជំរុញ​ស្ត្រី​គ្រប់​រូប​បន្ត​កសាង​សមត្ថភាព ​ដើម្បី​ភាព​ជោគជ័យ​ក្នុង​គ្រួសារ​ និង​សង្គមជាតិ appeared first on Kampuchea Thmey Daily.

លោក​រដ្ឋមន្ត្រី​បាន​លើក​ឡើង​ថា​ដោយ​ជំរុញ​ឱ្យ​មានការ​ពង្រឹង​លើ​តួនាទី​សាសនា​ដែល​មាន​នាទី​ផ្សព្វផ្សាយ​នូវ​សាសនូវាទ ធ្វើ​ឱ្យ​ប្រជាជន​កម្ពុជា មាន​បញ្ញាស្មារតីប្រកប​ដោយ​ព្រហ្ម​វិហារ​ធម៌ កាត់​បន្ថយ​អំពើ​អនាចារ អបាយមុខ អំពើ​ហិង្សា អសីលធម៌ និង​ចូលរួម​ជួយ​ឱ្យ​សង្គម​ជាតិ​មាន​សុខដុមរមនា និង​ពង្រឹង​សាមគ្គីធម៌។

លោក​ក៏​បាន​ណែនាំទៅ​អគ្គនាយកដ្ឋាន​កិច្ច​ការ​សាសនា​​នៃ​ក្រសួង​ធម្មការ​ ពង្រឹង​ការតាម​ដាន និង​គ្រប់គ្រង​រាល់​សកម្មភាព​សាសនា​ដែល​ខុសច្បាប់ ឬ​សកម្មភាព​ដែល​ឆ្លៀត​ឱកាស​ប្រើប្រាស់​ជំនឿ​ដើម្បី​បោក​ប្រាស់​ប្រជាពលរដ្ឋ​ផង​ដែរ​។

នាយករដ្ឋមន្ត្រី​កម្ពុជា សម្ដេច​ធិបតី ហ៊ុន ម៉ាណែត កាល​ពី​ខែ​ឧសភា ឆ្នាំ​២០២៥ ធ្លាប់​បាន​លើក​ឡើង​ក្នុង​កិច្ច​ប្រជុំ​គណៈរដ្ឋមន្ត្រី​ដោយ​បាន​ណែ​នាំ​ទៅ​ក្រសួង​ធម្មការ​ និង​សាសនា​ គ្រប់គ្រង​អ្នក​ដែល​អះអាង​ថា​មាន​បារមី​ឱ្យ​បាន​ត្រឹមត្រូវ​បន្ទាប់​ពី​ឃើញ​មាន​និន្នាការ​កើន​ឡើង​កាន់​តែ​ច្រើន។ សម្ដេច​បាន​បញ្ជាក់​ថា​ជំនឿ​សាសនា​គឺ​ជា​សិទ្ធិ​បុគ្គល​ម្នាក់​មិន​ខុស​ច្បាប់​ទេ តែ​ក្នុង​ករណី​ដែល​យក​សាសនា​ដើម្បី​ធ្វើ​អាជីវកម្ម ឬ​ឆបោក​​នោះ​គឺ​ជា​បទ​ល្មើស​៕

អត្ថបទដោយ ហ៊ុន សិរីវឌ្ឍន៍ ​

The post លោករដ្ឋមន្ត្រី ចាយ បូរិន ណែនាំឱ្យពង្រឹងការត្រួតពិនិត្យលើសកម្មភាពយកសាសនាទៅបោកប្រាស់ពលរដ្ឋ appeared first on Kampuchea Thmey Daily.

ថ្លែង​ក្នុង​ពិធី​បិទ​សន្និបាត​ការងារ​ឆ្នាំ​២០២៥ នៅ​សាល​សន្និសីទ​ចតុម្មុខ​រសៀល​ថ្ងៃ​ទី​២៦ ខែ​កុម្ភៈ ឆ្នាំ​២០២៦ លោក​រដ្ឋមន្ត្រី ចាយ បូរិន មាន​ប្រសាសន៍​ថា អភិក្រម ស៣ ដែល​ដាក់​ចេញ​ដោយ​ក្រសួង​ធម្មការ​មាន ស្អាត ស្វាង និង​ស្ងប់ ដែល​ជា​​អភិក្រម​ក្នុង​ការ​ការ​កែ​ប្រែ​​គ្រប់​អារាម​សាសនា​ទាំង​អស់​ទៅ​ជា​កន្លែង​ទេសចរណ៍​សាសនា​​​​។ លោក​ក៏​ជំរុញ​ឱ្យ​មាន​ការ​ដាំ​ដើម​ឈើ និង​បន្លែ​នៅ​តាម​វត្ត​អារាម​នានា​ផងដែរ​។

លោក​រដ្ឋមន្ត្រី​បាន​បញ្ជា​ទៅ​អគ្គនាយកដ្ឋាន​កិច្ចការ​សាសនា​ឱ្យ​ពង្រឹង​លើ​ការងារ​នេះ។

គួរ​ឱ្យ​ដឹង​ផង​ដែរ​ថា​ដើម្បី​ជំរុញ​លើក​កម្ពស់​ទេសចរណ៍​សាសនា​នៅ​កម្ពុជា ក្រសួង​ធម្មការ និង​សាសនា ទើប​តែ​ចុះ​អនុស្សរណៈ​នៃ​ការ​យោគយល់​គ្នា​ជាមួយ​ក្រសួង​ទេសចរណ៍​កាល​ពី​ចុង​ខែ​មករា កន្លង​ទៅ​ដើម្បី​ជំរុញ​កំណើន​ទេសចរណ៍​ផ្ទៃ​ក្នុង និង​ទាក់ទាញ​ភ្ញៀវ​ទេសចរ​អន្តរជាតិ​មក​ទស្សនា​កម្ពុជា​កាន់​តែ​ច្រើន​៕

អត្ថបទ​ដោយ ហ៊ុន សិរីវឌ្ឍន៍ ​​

The post រដ្ឋមន្ត្រី​ក្រសួង​ធម្មការ​ជំរុញ​ការ​ប្រែ​ក្លាយ​គ្រប់​វត្ត​អារាម​ទៅ​​ជា​កន្លែង​ទេសចរណ៍​សាសនា appeared first on Kampuchea Thmey Daily.

​​​​ថ្លែង​ក្នុង​ពិធី​បិទ​សន្និបាត​ការងារ​ឆ្នាំ​២០២៥ របស់​ក្រសួង​ធម្មការ និង​សាសនា​ នៅ​សាល​សន្និសីទ​ចតុម្មុខ រសៀល​ថ្ងៃ​ទី​២៦ ខែ​កុម្ភៈ ឆ្នាំ​២០២៦ លោក​រដ្ឋមន្ត្រី​ ចាយ បូរិន មាន​ប្រសាសន៍​ថា​ ក្នុង​ស្ថានភាព និង​ការ​ប្រែប្រួល​ក្នុង​​សង្គម​បច្ចុប្បន្ន​នេះ​ វិស័យ​សាសនា​កាន់​តែ​ដើរតួ​សំខាន់​ក្នុង​ការ​ចូលរួម​ថែ​រក្សា​ស្ថិរភាព​នយោបាយ សណ្ដាប់​ធ្នាប់​សង្គម សន្តិសុខ និង​ការ​អភិវឌ្ឍ​សង្គម​-សេដ្ឋកិច្ច​។ លោក​បន្ថែម​ដោយ​ជំរុញ​ដល់​គ្រប់​ក្រសួង​ស្ថាប័ន​ពាក់ព័ន្ធ​ និង​វិស័យ​ឯក​ជន​ បន្ត​សហការ​ជាមួយ​ក្រសួង​ធម្មការ​និង​សាសនា ដើម្បី​លើក​កម្ពស់​សាសនា និង​សីលធម៌​សង្គម​ និង​ណែនាំ​ដល់​ស្ថាប័ន​ក្រោម​ឱវាទ​ក្រសួង​ស្វែង​រក​កិច្ចសហការ​ជាមួយ​ក្រសួង​អប់រំ​ដើម្បី​បញ្ចូល​កម្មវិធី​អប់រំ​សីលធម៌​ គុណធម៌ ដល់​យុវជន​នៅ​តាម​គ្រឹះស្ថាន​សិក្សា និង​សហគមន៍​ផង​ដែរ​។

រដ្ឋាភិបាល​អាណត្តិ​ទី​៧ ដែល​ដឹក​នាំ​ដោយ​សម្ដេច​ធិបតី ហ៊ុន ម៉ាណែត បាន​ចាត់​ទុក​ការ​អភិវឌ្ឍ​​មូលធន​មនុស្ស​ទៅ​ក្នុង​គោល​នយោបាយ​បញ្ចកោណ​ដើម្បី​ជំរុញ​ដល់​ពលរដ្ឋ​ឱ្យ​​មាន​ចំណេះ​ដឹង​ ចំណេះ​ធ្វើ​ និង​សីលធម៌​ក្នុង​ការ​រស់​នៅ​ជា​សំខាន់​។ សម្ដេច​ធិបតី​ក៏​បាន​បញ្ជា​ឱ្យ​មាន​វិធាន​ការ​ជា​បន្តបន្ទាប់​បង្ក្រាប​រាល់​សកម្មភាព​ក្មេង​ទំនើង អប់រំ​ណែនាំ​​ធ្វើ​សម្បទា​ដើម្បី​ធ្វើ​ឱ្យ​សង្គម​មាន​សណ្ដាប់ធ្នាប់ និង​រក្សា​តម្លៃ​សីលធម៌​ក្នុង​សង្គម​ខ្មែរ​ផង​ដែរ​។

តាម​របាយការណ៍​ក្រសួង​មហាផ្ទៃ​ក្នុង​ឆ្នាំ​២០២៥ នគរបាល​ជាតិ​បាន​បង្ក្រាប​ក្មេង​ទំនើង​បាន​៩៩១​ករណី ឃាត់​ខ្លួន​បាន​៣ ៦០៧នាក់ និង​បញ្ជូន​ទៅ​តុលាការ​ចំនួន ២ ៣៥៥នាក់៕ ​

អត្ថបទ​ដោយ ហ៊ុន សិរីវឌ្ឍន៍

The post រដ្ឋមន្ត្រី​ក្រសួង​ធម្មការ​ណែ​នាំ​ឱ្យ​មាន​កិច្ច​សហការ​ជាមួយ​ក្រសួង​អប់រំលើ​កម្មវិធី​អប់រំ​សីលធម៌​ដល់​យុវជន appeared first on Kampuchea Thmey Daily.

លោក សៀ សុភ័ក្ត្រ មាន​ប្រសាសន៍​ថា ពិធី​នេះ ត្រូវ​បាន​គ្រោង​តាំងពី​ឆ្នាំមុន​មក​ម្ល៉េះ តែ​គួរ​ឲ្យ​សោកស្ដាយ ដោយសារ​មាន​ការ​ប៉ះទង្គិច​រវាង​កងទ័ព​នៅ​តាម​បណ្ដោយ​ព្រំដែន​កម្ពុជា​-​ថៃ ធ្វើ​ឲ្យ​មាន​ការ​ផ្លាស់ប្ដូរ​មួយ​ចំនួន នៃ​ពិធី​ដែល​បាន​គ្រោង។ ទោះបី​យ៉ាងណា ពិធី​នា​ពេលនេះ យើង​អាច​ជួបជុំ​គ្នា អធិស្ឋាន​ជាមួយគ្នា សម្រាប់​ប្រទេសជាតិ​យើង សម្រាប់​ប្រជាជន​ខ្មែរ នា​ដំណាក់កាល​នេះ និង​ក្រុម​ជំនុំ​នៅ​តាម​បណ្ដោយ​ព្រំដែន​ផង​ដែរ។ យើង​មាន​ព្រះ​យេស៊ូវ​តែមួយ ក្នុង​ប្រជាជាតិ​តែមួយ យើង​ជា​ចំណែក​រួមគ្នា​ក្នុង​ព្រះ​គ្រិស្ត យើង​នៅ​ជាមួយគ្នា យើង​ឈរ​ជាមួយគ្នា។

លោក​បន្ត​ថា នៅ​ក្នុង​ព្រះ​គ្រិស្ត យើង​ជា​គ្រួសារ​តែមួយ អ្វី​ដែល​យើង​គួរ​ចាប់ផ្ដើម គឺ ឯកភាព​គ្នា ចុះ​សម្រុង​នឹង​គ្នា ជ្រោមជ្រែង​គ្នា ពង្រីក​ទំនាក់ទំនង​គ្នា ពង្រឹង​សាមគ្គីភាព បង្ហាញ​សិរី​ល្អ​របស់​ព្រះ បង្ហាញ​ភាព​ជា​ក្រុម​គ្រួសារ​ដ៏​រឹងមាំ។ គ្រិស្តបរិស័ទ ជា​កម្លាំង​មហា​សាមគ្គី ក្នុង​ការ​រួមចំណែក​ក្នុង​បុព្វហេតុ​ព្រះនាម​ព្រះ​យេស៊ូ​វ​គ្រិស្ត​ក្នុង​បុព្វហេតុ​គ្រិស្តបរិស័ទ រួមចំណែក​ក្នុង​សង្គមជាតិ ក្នុង​ព្រះនាម​ព្រះ​យេស៊ូ​វ​គ្រិស្ត។

ក្នុង​នាម​តំណាង​ឲ្យ​គ្រិស្តបរិស័ទ​កម្ពុជា លោក​សូម​សម្តែង​ការ​អរគុណ​ដល់​សមាគម​ដំណឹង​ល្អ ប៊ី​លី​ហ្ក្រា​ហាំ ពិសេស​លោកគ្រូ​គង្វាល Franklin Graham និង​សហការី ដែល​បាន​សហការ​ជាមួយ​គ្រិស្ត​បរិស័ទ​ខ្មែរ ពិសេស​គឺ​ជ្រោមជ្រែង​ទាំងស្រុង ទាំង​ថវិកា និង​បច្ចេកទេស ដល់​ការ​រៀបចំ​ពិធី​អាហារ​សាមគ្គី​នា​ពេលនេះ និង​ឆ្ពោះ​ទៅ​ប្រារព្ធ​ពិធី​មហោស្រព​សៀមរាប​ជាទី​ស្រលាញ់ នា​ថ្ងៃ​ទី ២៤-២៥ ខាង​មុខ។

លោក Franklin Graham ប្រធាន និង​ជា​នាយក​ប្រតិបត្តិ នៃ​សមាគម ផ្សព្វផ្សាយ​ដំណឹង​ល្អ Billy Graham (BGEA) មាន​ប្រសាសន៍​ថា ប្រទេស​កម្ពុជា ពិត​ជា​មាន​ការ​អភិវឌ្ឍ​រីកចម្រើន​យ៉ាង​ខ្លាំង បើ​ប្រៀបធៀប​កាលពី​ជាង ២០ ឆ្នាំមុន ដោយ​ពេលនេះ មាន​អគារ​ខ្ពស់ៗ យ៉ាង​ច្រើន។ យើង​ទាំងអស់ សូម​អធិស្ឋាន​ដល់​ថ្នាក់ដឹកនាំ​កំពូលៗ របស់​កម្ពុជា និង​អធិស្ឋាន​ដល់​ថ្នាក់ដឹកនាំ​នៅ​ថ្នាក់​ក្រោម​ជាតិ​ទាំងអស់៕

អត្ថបទ ៖ ស្រីរ័ត្ន

The post តំណាងគ្រិស្តបរិស័ទកម្ពុជា ៖ អ្វីដែលគួរចាប់ផ្ដើម គឺ ឯកភាពគ្នា ចុះសម្រុងគ្នា ជ្រោមជ្រែងគ្នា ពង្រីកទំនាក់ទំនងគ្នា ពង្រឹងសាមគ្គីភាព appeared first on Kampuchea Thmey Daily.

តាមសេចក្តីប្រកាស ក្រសួងបានបញ្ជាក់ថា សកម្មភាពនេះបានប៉ះពាល់យ៉ាងធ្ងន់ធ្ងរដល់អារម្មណ៍ និងជំនឿសាសនារបស់សាសនិកនៅទូទាំងពិភពលោក ព្រោះរូបសំណាកព្រះវិស្ណុ ត្រូវបានគោរពបូជាយ៉ាងខ្ពង់ខ្ពស់ដោយប្រជាពលរដ្ឋទូទៅ ហើយ​ជាផ្នែកមួយ​នៃបេតិកភណ្ឌអារ្យធម៌រួមរបស់មនុស្សជាតិ។ ក្រសួងបានចាត់ទុកទង្វើនេះថា ជាការរំលោភយ៉ាងធ្ងន់ធ្ងរលើសាសនា វប្បធម៌ និងតម្លៃមនុស្សធម៌សកល។

ជាមួយគ្នានេះ ក្រសួងធម្មការ និងសាសនា បានអំពាវនាវឱ្យសាសនិក​ទូទាំង​ពិភពលោក និង​សហគមន៍អន្តរជាតិ ចូលរួមថ្កោលទោសសកម្មភាព​ដែល​ត្រូវបានពិពណ៌នាថា ជាទង្វើទមិឡឥតសាសនារបស់កងទ័ពឈ្លានពានថៃ។

សេចក្តី​ប្រកាស​បានបន្ថែមថា កង​ទ័ពថៃ​បាន​បន្ត​ធ្វើសកម្មភាពឈ្លានពានលើដែនអធិបតេយ្យភាពកម្ពុជា ដោយប្រើប្រាស់អាវុធធុនតូច និងធុនធំ យន្តហោះគ្មានមនុស្សបើក យន្តហោះទម្លាក់គ្រាប់បែក គ្រាប់បែកចង្កោម ផ្សែងពុល និងនាវាចម្បាំង បាញ់ប្រហារ និងទម្លាក់គ្រាប់យ៉ាងកំរោល មិនរើសគោលដៅ បណ្តាល​ឱ្យប្រជាជនស៊ីវិលស្លូតត្រង់ស្លាប់ និងរងរបួសជាច្រើននាក់។

បន្ថែមពីនេះ ផ្ទះសម្បែង សាលារៀន មន្ទីរពេទ្យ វត្តអារាម ផ្លូវថ្នល់ ស្ពាន ប្រាសាទបុរាណ និងរូបសំណាកសម្រាប់ការគោរពសក្ការបូជា ត្រូវបានបំផ្លិចបំផ្លាញយ៉ាងធ្ងន់ធ្ងរ ខណៈសិស្សសាលា កុមារ មនុស្សចាស់ ប្រុស ស្រី ជាច្រើន ត្រូវបានបង្ខំឱ្យភៀសខ្លួនរកទីជម្រកសុវត្ថិភាពជាបន្ទាន់ ដោយមិនបានត្រៀមលក្ខណៈជាមុន។

ក្នុងសេចក្តីប្រកាសដដែលនេះ ក្រសួងធម្មការ និងសាសនា បានអំពាវនាវឱ្យភាគីថៃ បញ្ឈប់រាល់អរិភាព និង​ការ​បំផ្លិចបំផ្លាញ​រូប​សំណាក​សម្រាប់​ការ​គោរពបូជារបស់មនុស្សជាតិជាបន្ទាន់ ហើយងាកមកគោរពកិច្ចព្រមព្រៀងបទឈប់បាញ់ សេចក្តីថ្លែងការណ៍រួមស្តីពីកិច្ចព្រមព្រៀងសន្តិភាពទីក្រុងកូឡាឡាំពួ និងកាតព្វកិច្ចទាំងឡាយក្រោមច្បាប់អន្តរជាតិ ឱ្យបានម៉ឺងម៉ាត់ ស្មោះត្រង់ និងដោយសុច្ឆន្ទៈពិតប្រាកដ។

ក្រសួងបានបញ្ជាក់ជាថ្មីថា កម្ពុជាប្តេជ្ញាប្រកាន់ខ្ជាប់នូវការដោះស្រាយជម្លោះដោយសន្តិវិធី ស្របតាមច្បាប់អន្តរជាតិ សន្ធិសញ្ញា អនុសញ្ញា និងកិច្ចព្រមព្រៀងដែលមានស្រាប់ ហើយប្រឆាំងដាច់ខាតនឹងការប្រើប្រាស់កម្លាំងអាវុធ ដើម្បីស្វែងរកដំណោះស្រាយមួយប្រកបដោយយុត្តិធម៌ ត្រឹមត្រូវ និងយូរអង្វែង៕

The post កម្ពុជា​ចាត់​ទុក ការវាយកម្ទេចរូបសំណាកព្រះវិស្ណុ ដោយ​ទាហាន​ឈ្លាន​ពានថៃ ជា​ការ​រំលោភ​ជំនឿ​សាសនា និង​អារ្យធម៌​មនុស្សជាតិ appeared first on Kampuchea Thmey Daily.