អ្នក​នាំពាក្យ​ក្រសួង​សង្គម​កិច្ច​លោក តូច ចាន់នី បាន​ឱ្យ​កម្ពុជា​ថ្មី​ដឹង​នៅ​ថ្ងៃ​ទី​២៦ ខែ​មីនា ឆ្នាំ​២០២៦ ​ថា​ ក្រសួង​បាន​រៀបចំ​មជ្ឈមណ្ឌល​ត្រៀម​ទទួល​​ទាំង​នេះ​ជាង​១ឆ្នាំ​មក​ហើយ​ ដោយ​មាន​ក្នុង​រាជធានី​ភ្នំពេញ និង​នៅ​តាម​ខេត្ត​មួយ​ចំនួន​ដោយ​យក​មណ្ឌល​ហ្វឹកហ្វឺន​អ្នក​​ថែ​ទាំ​មនុស្សចាស់​ និង​ស្ដារ​នីតិសម្បទា​ជន​អនាថា​របស់​ក្រសួង​សង្គម​កិច្ច​ដើម្បី​ទទួល​ស្នាក់នៅ បណ្ដុះបណ្ដាល និង​ស្វែងរក​ការងារ​ជូន​។

លោក​ថា៖ «ជា​ការ​គិត​គូរ​របស់​រាជរដ្ឋាភិបាល​ បើ​គាត់​មាន​ជំនាញ​ហើយ​យើង​រក​ការងារ​ឱ្យ​គាត់​ធ្វើ បើ​អ្នក​ដែល​មិន​ទាន់​មាន​ជំនាញ​​យើង​ឱ្យ​គាត់​រៀន​ជំនាញ​តាម​ការ​ស្ម័គ្រ​ចិត្ត​របស់​គាត់​យើង​មាន​ក្រសួង​ការងារ និង​ក្រសួង​សង្គម​កិច្ច​សហការ​គ្នា​»។

ទោះ​ជា​យ៉ាង​ណា​លោក​មិន​ទាន់​អាច​បញ្ជាក់​បាន​ទេ​ថា​មាន​ពលរដ្ឋ​ខ្មែរ​ដែល​ត្រូវ​បាន​អាមេរិក​បញ្ជូន​មក​វិញ​នោះ​ក្នុង​ចំនួន​ប៉ុន្មាន​ និង​នៅ​ពេល​ណា​នៅ​ឡើយ​ទេ​ដោយ​រង់​ចាំ​ព័ត៌មាន​ពី​សហរដ្ឋ​អាមេរិក​សិន​។

កាលពី​ថ្ងៃ​ទី​២៦ ខែ​មីនា ឆ្នាំ​២០២៦ រដ្ឋមន្ត្រី​ក្រសួង​សង្គម​កិច្ច​ លោក ជា សុមេធី បាន​ចុះ​ពិនិត្យ​ទីតាំង​មជ្ឈមណ្ឌល​ត្រៀម​សម្រាប់​ទទួល​ពលរដ្ឋ​ខ្មែរ​មាតុភូមិនិវត្តន៍​ពី​សហរដ្ឋ​អាមេរិក​នៅ​ទីតាំង​មួយ​កន្លែង​ក្នុង​រាជធានី​ភ្នំពេញ​ ដោយ​លោក​បាន​បញ្ជាក់​លើ​បណ្ដាញ​សង្គម​របស់​លោក​ថា​ «មណ្ឌល​នេះ​នឹង​ទុកដាក់​ថែទាំ​ផ្ដល់​សេវា​សង្គម​កិច្ច​​ដល់​អ្នក​ទាំង​នោះ​មុន​នឹង​បញ្ជូន​ទៅ​ជួប​ជុំ​គ្រួសារ​នៅ​សហគមន៍​វិញ»។

ប្រធាន​វិទ្យាស្ថាន​ប្រជាធិបតេយ្យ​កម្ពុជា​ លោក​បណ្ឌិត ប៉ា ច័ន្ទរឿន គាំទ្រ​ចំពោះ​ការ​រៀបចំ​របស់​រដ្ឋាភិបាល​កម្ពុជា​ក្នុង​ការ​ត្រៀម​ទទួល និង​បណ្ដុះបណ្ដាល​វិជ្ជាជីវៈ ព្រម​ទាំង​ស្វែង​រក​ការងារ​ដល់​ពលរដ្ឋ​ខ្មែរ​ដែល​ត្រូវ​អាមេរិក​បណ្ដេញ​មក​ប្រទេស​កំណើត​វិញ​នេះ​។

លោក​ថា៖ «នេះ​គឺ​ជា​គម្រោង​ចាំ​បាច់​និង​ជា​ជំនួយ​វិជ្ជមាន​ផង​ដែរ សម្រាប់​ពលរដ្ឋ​ដែល​ត្រូវ​បាន​គេ​បញ្ជូន​ពី​អាមេរិក​មក​វិញ​ហ្នឹង។ ព្រោះ​ការ​រៀបចំ​បែប​នេះ​ជា​ការ​ឆ្លើយ​តប​នឹង​តម្រូវ​ការ​មូលដ្ឋាន​សម្រាប់​ពួកគាត់​នៅ​ពេល​ដែល​​​​ត្រលប់​មក​ដល់​ស្រុក​ខ្មែរ​វិញ​»។

ទោះ​ជា​យ៉ាង​ណា​លោក​បណ្ឌិត ប៉ា ច័ន្ទរឿន បាន​ឱ្យ​ជា​យោបល់​ដល់​រដ្ឋ ​គួរ​មាន​ការ​គិត​គូរ​បន្ថែម​លើ​ការ​គាំពារ​ផ្លូវ​ចិត្ត ព្រម​ទាំង​យក​ចិត្ត​ទុកដាក់​តម្រង់​ទិស​ពី​ជំនាញ​​និង​ការងារ ឬ​​បណ្ដុះ​បណ្ដាល​ជំនាញ​ថ្មី​ដែល​អាច​ប្រើប្រាស់​បាន​នៅ​កម្ពុជា​ ធ្វើការ​រៀបចំ​ឱ្យ​មាន​ឯកសារ​រដ្ឋបាល​​ជូន​ពួកគាត់​​ ជា​ពិសេស​គឺ​​ការ​បង្កើត​ឱ្យ​មាន​បណ្ដាញ​ពលរដ្ឋ​ខ្មែរ​ដែល​ត្រូវ​បាន​អាមេរិក​បញ្ជូន​មក​វិញ​ពី​មុនៗ​ដើម្បី​ឱ្យ​ពួកគេ​អាច​ចែក​រំលែក​បទ​ពិសោធន៍​ជួយ​គ្នា​បាន​ ក៏​ដូច​ជា​​ត្រូវ​បង្កើត​ឱ្យ​មាន​ទំនាក់ទំនង​ជាមួយ​វិស័យ​ឯកជន​ដើម្បី​ងាយ​ស្រួល​ស្វែង​រក​ការងារ​ជូន​ពួកគាត់​ផង​ដែរ​។

យោង​តាម​ឯកសារ​របស់​ភ្នាក់ងារ​អនុវត្ត​ច្បាប់​អន្តោប្រវេសន៍​ និង​គយ​របស់​អាមេរិក​កាល​ពី​ដើម​ឆ្នាំ​២០២៥ បាន​ឱ្យ​ដឹង​ថា​មាន​ពលរដ្ឋ​កម្ពុជា​ចំនួន​ ១ ៧៤៧នាក់ ស្ថិត​ក្នុង​តារាង​ដែល​សហរដ្ឋ​អាមេរិក​នឹង​ចាប់​បញ្ជូន​មក​កម្ពុជា​បន្ទាប់​ពី​ប្រទេស​នេះ​បញ្ចប់​​នីតិវិធី​ចុងក្រោយ​នៃ​ការ​បញ្ជូន​ចេញ​៕

អត្ថបទដោយ ហ៊ុន សិរីវឌ្ឍន៍ ​​​​​​​​​

The post ក្រសួង​សង្គមកិច្ច​រៀបចំ​កន្លែង​ត្រៀម​ទទួល​ពលរដ្ឋ​ខ្មែរ​ដែល​អាមេរិក​បញ្ជូន​ត្រលប់​មក​វិញ appeared first on Kampuchea Thmey Daily.

ជីវិតកុមារភាពរបស់ចិន្តា មិនងាយស្រួលឡើយ។ កើតជាស្ត្រី មានពិការភាព ហើយស្ថិតក្នុងគ្រួសារក្រីក្រ បានធ្វើឱ្យអ្នកស្រីប្រឈមមុខនឹងឧបសគ្គជាច្រើន ទាំងការរស់នៅ និងការសិក្សា។ នៅពេលនោះ ការយល់ដឹងអំពីវិស័យពិការភាពនៅសង្គមកម្ពុជានៅមានកម្រិត គ្រូបង្រៀន និងមិត្តរួមថ្នាក់មួយចំនួនមិនទាន់យល់ពីការសម្របសម្រួលដើម្បីជួយសិស្សមានបញ្ហាគំហើញឱ្យទទួលបានការអប់រំស្មើភាពគ្នានោះទេ។

ចិន្តា ត្រូវបានម្តាយបានបញ្ជូនទៅរៀននៅសាលារដ្ឋតាំងពីនៅវ័យកុមារ។ ប៉ុន្តែដោយសារមើលមិនសូវច្បាស់ អ្នកស្រីត្រូវប្រឹងប្រែងខ្លាំងជាងសិស្សដទៃ។ រាល់ពេលគ្រូសរសេរមេរៀនលើក្តាខៀន អ្នកស្រីត្រូវដើរទៅជិតដើម្បីមើលឱ្យច្បាស់បន្តិច បន្ទាប់មករត់ត្រឡប់មកកន្លែងអង្គុយដើម្បីចម្លងចូលសៀវភៅ។ ការធ្វើបែបនេះចំណាយពេលយូរ ហើយពេលខ្លះត្រូវមិត្តរួមថ្នាក់ស្តីបន្ទោសថា “ទៅបាំងគេ”។ មានពេលខ្លះអ្នកស្រីពឹងមិត្តភក្តិឱ្យជួយហៅមេរៀនឱ្យស្តាប់ ប៉ុន្តែមិនមែនគ្រប់ពេលដែលទទួលបានជំនួយទេ។ ពេលខ្លះត្រឡប់ទៅផ្ទះដោយគ្មានមេរៀនពេញលេញ ទាំងដែលបានចូលរៀនពេញម៉ោង។

អ្នកស្រីរៀបរាប់ថា៖«រាល់ពេលចូលថ្នាក់រៀន ដើម្បីកត់ត្រាមេរៀន ខ្ញុំតែងទៅជិតក្តាខៀនរួចរត់មកតុវិញដើម្បីចម្លងដាក់សៀវភៅ ទម្រាំចម្លងមេរៀនហើយម្តងៗប្រើពេលយូរ ហើយមិត្តភក្តិគេស្រែកឱ្យថាទៅបាំងគេ»។ អំឡុងពេលនៅរៀន មានអ្នកខ្លះនិយាយបែបលេងសើចថា ពិការភ្នែកចឹងរៀនពិបាកណាស់ ទៅច្រៀងនៅតាមផ្លូវអាចរកចំណូលបាន។ ត្បិតតែនេះជាការនិយាយលេង ប៉ុន្តែគឺជាពាក្យសម្តីមួយដែលបង្អាក់ដំណើររបស់ចិន្តា ប៉ុន្តែសម្តីទាំងនោះមិនបានបង្អាក់រូបគាត់ទេ ព្រោះចិន្តានៅមានភាពចង់ដឹង ចង់ឭ ហើយនៅតែខំរៀន។

ទោះជាយ៉ាងណា ចិន្តាមិនដែលបោះបង់ការសិក្សា។ ការលំបាក និងការមិនទទួលបានភាពស្មើគ្នានៅក្នុងសង្គម មិនបានបំបាក់ទឹកចិត្តអ្នកស្រីទេ តែបម្លែងវាជាកម្លាំងជំរុញឱ្យខិតខំប្រឹងប្រែងកាន់តែខ្លាំង។ អ្នកស្រីបន្តការសិក្សារហូតដល់ថ្នាក់ឧត្តមសិក្សា នៅសាកលវិទ្យាល័យភូមិន្ទភ្នំពេញ បន្ទាប់មកទទួលបានអាហារូបករណ៍សិក្សាបញ្ចប់ថ្នាក់អនុបណ្ឌិតផ្នែកគោលនយោបាយ និងការអនុវត្តពិការភាព នៅប្រទេសអូស្ត្រាលី ក្នុងឆ្នាំ២០២៤ ក្លាយជាស្ត្រីខ្មែរដំបូងគេដែលមានពិការភាពភ្នែក បញ្ចប់ការសិក្សាកម្រិតនេះក្នុងវិស័យខាងលើ។

បច្ចុប្បន្ន អ្នកស្រី មិន ចិន្តា បម្រើការងារជាមន្ត្រីនៅមូលនិធិជាតិជំនួយសង្គម នៃក្រសួងសង្គមកិច្ច អតីតយុទ្ធជន និងយុវនីតិសម្បទា ដោយយកបទពិសោធន៍ផ្ទាល់ខ្លួន និងចំណេះដឹងវិជ្ជាជីវៈ មកចូលរួមលើកកម្ពស់សិទ្ធិ និងគុណភាពជីវិតរបស់ជនមានពិការភាពនៅកម្ពុជា។ បច្ចុប្បន្ន អ្នកស្រីមានស្វាមីពិការភាពដូចគ្នានិងមានកូនក្នុងបន្ទុកផងដែរ។

រឿងរ៉ាវជីវិតរបស់អ្នកស្រី គឺជាគំរូនៃការតស៊ូ និងជាសារបំផុសគំនិតដល់យុវជន ជាពិសេសជនមានពិការភាពថា ទោះបីមានឧបសគ្គប៉ុនណាក៏ដោយ ប្រសិនបើយើងមានឆន្ទៈ និងការព្យាយាម អាចឈានដល់គោលដៅដែលខ្លួនប្រាថ្នាបាន៕

The post ស្រ្តីខ្មែរមានពិការភាពភ្នែកតស៊ូរហូតទទួលបានអាហារូបករណ៍សិក្សាបញ្ចប់ថ្នាក់អនុបណ្ឌិតនៅអូស្រ្តាលី appeared first on Kampuchea Thmey Daily.

បើតាមទំព័រហ្វេរប៊ុករបស់ ក្រសួងសង្គមកិច្ច អតីតយុទ្ធជន និងយុវនីតិសប្បទា បានឱ្យដឹងថា មន្ត្រីសង្គមកិច្ច​ នៅតែអនុវត្តសកម្មភាពជាប្រចាំរបស់ខ្លួនតាមកម្មវិធី​ រួមមាន ការប្រឹក្សាផ្លូវចិត្តបឋម​ ដល់ពលរដ្ឋនិងកុមារ នាំកុមារលេងល្បែងកម្សាន្ត​ (Play game) បង្រៀនអក្សរ​ និងលេខដល់កុមារ ណែនាំកុមារគូរូប​ និងផាត់ពណ៌ និទានរឿងកុមារស្តាប់កម្សាន្ត​ និងសកម្មភាពអប់រំផ្សេងៗទៀត។ ក្រៅពីសកម្មភាពទាំងនេះក៏មានផ្តល់អាហារសម្រន់ជូនដល់កុមារផងដែរ។

ក្រសួងបានបញ្ជាក់ថា «ដោយសារស្ថានភាពបានធូរស្រាល​នៃការអនុវត្តបទឈប់បាញ់​ ប្រជាពលរដ្ឋជាច្រើនបានត្រឡប់ទៅផ្ទះនៅភូមិឋានពួកគាត់វិញ​ ដូច្នេះ​ បច្ចុប្បន្ន​ស្តង់កុមារមេត្រី​ នៅដំណើការផ្តល់សេវាដល់កុមារ​ នៅក្នុងខេត្តចំនួន៥​ដោយឡែកខេត្តបាត់ដំបង​ និងខេត្តកោះកុង​ ស្តង់កុមារមេត្រី​ បានផ្អាកសកម្មភាពបណ្តោះអាសន្ន»។

ជាមួយគ្នាំនោះ ក្រសួងសង្គមកិច្ច ក៏បានថ្លែងអំណរគុណដល់ អង្គការដៃគូពាក់ព័ន្ធ​ ព្រមទាំងសប្បុរសជន​ ដែលចូលរួមឧបត្ថម្ភគាំទ្រសម្ភារៈសិក្សា​ សម្ភារៈ​លេងកម្សាន្ត​ អាហារសម្រន់​ និងសម្ភារៈចាំបាច់ផ្សេងទៀត​ សម្រាប់ចែកជូនដល់កុមារ​នៅតាមស្តង់កុមារមេត្រី៕

The post មន្ត្រីសង្គមកិច្ច បន្តចុះផ្តល់សេវាសង្គមកិច្ចដល់កុមារតាមជំរុំភៀសសឹក ដែលមិនទាន់អាចវិលទៅលំនៅឋានវិញ​បាន appeared first on Kampuchea Thmey Daily.

សំណើរនេះ ត្រូវបានលើកឡើងនៅក្នុង វគ្គបណ្តុះបណ្តាលស្តីពីការអនុវត្តមុខងារនៃវិស័យសង្គមកិច្ច អតីតយុទ្ធជន និងយុវនីតិសម្បទា សម្រាប់មន្ត្រីទទួលបន្ទុកជាបុគ្គលិកសង្គមកិច្ច “អ្នកអាជីពសង្គមកិច្ច»នៅខេត្តរតនគិរី កាលពីថ្ងៃទី ២ ខែតុលា ឆ្នាំ ២០២៥។ វគ្គបណ្តុះបណ្តាលនេះ ប្រព្រឹត្តឡើង ក្រោមអធិបតីភាព លោក សូ សុខប៊ុនថេត អនុរដ្ឋលេខាធិការ ក្រសួងសង្គមកិច្ច អតីតយុទ្ធជន និងយុវនីតិសម្បទា ដោយមានការចូលរួមពីមន្រ្តីជំនាញថ្នាក់ជាតិ រដ្ឋបាលខេត្ត ក្រុង ស្រុក និងអង្គការដៃគូជាច្រើនរួប។

នាឱកាសនោះ លោកស្រី ញាន ទិត្យចិន្តា បានលើកឡើងពីគោលនយោបាយជាតិស្តីពីប្រព័ន្ធកិច្ចការពារកុមារ ដែលបានកំណត់នូវសរសរស្តម្ភជាយុទ្ធសាស្ត្រសំខាន់ៗមួយចំនួន ដោយផ្តោតទៅលើការបង្ការនិងទប់ស្កាត់ ការអន្តរាគមន៍ និងការផ្តល់សេវាឆ្លើយបត។ ជាមួយគ្នានេះផងដែរ ក៏បានកំណត់នូវ សកម្មភាពជាក់លាក់សម្រាប់ក្រសួងស្ថាប័នដែលបំពេញការងារ ក្នុងការលើកកម្ពស់សិទ្ធិកុមារ ដើម្បីដល់ការ អនុវត្តគោលនយោបាយជាតិស្តីពីប្រព័ន្ធកិច្ចការពារកុមារប្រកបដោយប្រសិទ្ធិភាព និងទទួលបានជោគជ័យ។

តាមរយៈវេទិកានេះ លោកស្រីអភិបាលរងខេត្ត បានស្នើឱ្យគ្រប់ស្ថាប័នពាក់ព័ន្ធធ្វើការតាមដានត្រួតពិនិត្យ និងវាយតម្លៃ និងធ្វើបច្ចុប្បន្នកម្មជាប្រចាំដើម្បីឆ្លើយតបទៅ និងស្ថានភាពជាក់ស្តែងរបស់កុមារ ហើយតាមរយៈការអនុវត្តគោលនយោបាយនេះ កុមារកម្ពុជាកាន់តែទទួលបាននូវការផ្តល់សេវា និងការយកចិត្តទុកដាក់ជាពហុវិស័យ បន្ថែមទៀត មានន័យថាធ្វើសកម្មភាពផ្សេងៗគ្នា ដើម្បីឈានទៅសម្រេចគោលបំណងរួមតែមួយ។

ពាក់ព័ន្ធវិស័យសង្គមកិច្ចវិញ លោក សូ សុខប៊ុនថេត អនុរដ្ឋលេខាធិការ បានថ្លែងថា យោងតាមកម្មវិធីជាតិសម្រាប់ការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិ ដំណាក់កាលទី២ក្នុងរយៈពេ១០ឆ្នាំខាងមុខ២០២១-២០៣០ មានគោលដៅធ្វើឱ្យប្រសើរឡើងនូវរចនាសម្ព័ន្ធ និងប្រព័ន្ធអភិបាលកិច្ចរបស់ រដ្ឋបាលថ្នាក់ក្រោមជាតិឱ្យមានលក្ខណៈទំនើប ស្វ័យភាព ប្រសិទ្ធភាព តម្លាភាព និងគណនេយ្យភាព ក្នុងការផ្តល់សេវាសាធារណៈ និងការអភិវឌ្ឍមូលដ្ឋានឆ្លើយតបទៅនឹងតម្រូវការជាអាទិភាព របស់ប្រជាពលរដ្ឋប្រកបដោយបរិយាបន្ន និងសមធម៌សង្គមក្នុងដែនសមត្ថកិច្ចរបស់រដ្ឋបាលថ្នាក់ក្រោមជាតិ នីមួយៗ។

លោកបញ្ជាក់ទៀតថា វគ្គបណ្តុះបណ្តាលនេះ នឹងផ្តល់នូវចំណេះដឹង ជំនាញ និងធាតុចូលយ៉ាងសំខាន់ ដើម្បីពង្រឹងសមត្ថភាព និងប្រសិទ្ធិភាពក្នុងការបំពេញមុខងារ លើការផ្តល់សេវាសង្គមកិច្ចរបស់អ្នកអាជីពសង្គមកិច្ចរង ក្រុង ស្រុក និងដៃគូអភិវឌ្ឍន៍ ដោយសង្ឃឹមថា សិក្ខាកាមទាំងអស់ដែលទទួលបានចំណេះដឹង និងជំនាញពីគ្រូឧទ្ទេស ដើម្បីយកចំណេះដឹងទៅបម្រើដល់បងប្អូនប្រជាពលរដ្ឋនៅក្នុងមូលដ្ឋានរៀងៗខ្លួនឲ្យបានកាន់តែប្រសើឡើង៕

អត្ថបទ៖ ខៀវ ចាប

The post អភិបាលរងខេត្តរតនគិរី ស្នើស្ថាប័នពាក់ព័ន្ធយកចិត្តទុកដាក់ និងឆ្លើយតបតម្រូវការចំពោះកុមារ appeared first on Kampuchea Thmey Daily.

ពិធីនេះ ប្រព្រឹត្តិទៅក្រោមអធិបតីភាពលោក ជា សុមេធី រដ្ឋមន្រ្តីក្រសួងសង្គមកិច្ច អតីតយុទ្ធជន និងយុវនីតិ​សម្បទា និងមានការអញ្ជើញចូលរួម ពីលោក លោកស្រី ប្រតិភូអមដំណើរ អភិបាលរងខេត្ត លោក លោកស្រីប្រធានមន្ទីរ អង្គភាពពាក់ព័ន្ធ អង្គការដៃគូ លោកគ្រូ អ្នកគ្រូ សិស្សានុសិស្ស និងបងប្អូន​មាន​ពិការ​ភាព ចំនួន ១៥០នាក់។

ក្នុងឱកាសនោះ លោក ជា សុមេធី បានថ្លែងអំណរគុណចំពោះក្រសួង ស្ថាប័ន ពាក់ព័ន្ធ វិស័យឯកជន អង្គការជាតិ អន្តរជាតិ និងដៃគូអភិវឌ្ឍន៍ ទាំង​ថ្នាក់ជាតិ និងថ្នាក់ក្រោមជាតិ ដែលបានផ្តល់កិច្ចសហការកន្លងមកក្នុងការអនុវត្តផែនការណ៍យុទ្ធសាសន៍ របស់​ក្រសួង ក្នុងទិសដៅលើកកម្ពស់វិស័យសង្គមកិច្ច អតីតយុទ្ធជន និងយុវនីតីសម្បទា ពិសេសការផ្តល់សេវា​សង្គមកិច្ច​ប្រកបដោយប្រសិទ្ធភាពនិងប្រសិទ្ធផលតាមរយៈពង្រឹងគុណភាព និងសេវាអោយគៀកនិងប្រជាជន ស្របតាមតម្រូវ​ការ​ជាក់ស្តែង និងគោលនយោបាយរបស់រាជរដ្ឋាភិបាល។

លោករដ្ឋមន្រ្តី បានគូសបញ្ជាក់ថា ការប្រារព្ធទិវានេះ ក្នុងគោលបំណង​ដើម្បីរំលឹកអំពីបច្ចេកទេស និង​សារៈសំខាន់របស់ឧបករណ៍​ជំនួយ​សម្រាប់​​​​ជនមាន​ពិការភាព ​​ដូចជា ​រទេះរុញ ឈើច្រត់ ​អវ:យវៈសិប្បនិមិ្មត ​វ៉ែនតា ឧបករណ៍ជំនួយ​ស្តាប់ ដែល​បាន​ជួយ​​​ស្តារលទ្ធភាពពលកម្មរបស់ជនមានពិការភាព ដើម្បីឱ្យពួកគាត់រស់នៅដោយ​ឯករាជ្យ​ ក្នុងសង្គមប្រកប​ដោយ​សេចក្តីថ្លៃថ្នូរ និងបរិយាបន្ន។​

ចំណែក លោកស្រី ប៉ាង ដានី អភិបាលរងខេត្ត និងជាប្រធាន​ក្រុមប្រឹក្សាសកម្មភាព​ជនពិការខេត្ត តំណាងដ៏ខ្ពង់​ខ្ពស់​ លោក អ៊ុន ចាន់ដា ​អភិបាលខេត្តកំពង់ចាម បានលើកឡើងថា ក្នុងនីតិកាលទី៧នៃរដ្ឋសភា រាជរដ្ឋាភិបាលកម្ពុជា ក្រោមការដឹកនាំប្រកបដោយទស្សនៈ វែងឆ្ងាយ របស់សម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា និងជាប្រធានកិត្តិយសក្រុមប្រឹក្សាសកម្មភាពជនពិការ បានដាក់ចេញនូវយុទ្ធសាស្ត្រ បញ្ចកោណ ដំណាក់កាលទី១ ក្នុងនោះរួមមាន យុទ្ធសាស្ត្រគាំពារសង្គមសម្រាប់ជនជនរងគ្រោះ និងជនងាយរងគ្រោះ ជាគោលនយោបាយអាទិភាពរបស់រាជរដ្ឋាភិបាល ដែលធានា ឱ្យបងប្អូន ទទួលបាននូវផលប្រយោជន៍ពីគោលនយោបាយនេះ ប្រកបដោយបរិយាបន្ន និង សមធម៌។

លោកស្រីបន្តថា រាជរដ្ឋាភិបាល ក៏បានបង្កើតច្បាប់ ស្តីពីកិច្ចការពារ និងលើកកម្ពស់សិទ្ធិជនពិការ ហើយច្បាប់នេះ គឺកំពុងធ្វើវិសោធនកម្ម រួមនឹងលិខិតបទដ្ឋានគតិយុត្តនានាជាច្រើនទៀត ដែលបានស្តែងឱ្យឃើញពីការយកចិត្តទុកដាក់ខ្ពស់ អំពីសុខទុក្ខជីវភាពរស់នៅរបស់បងប្អូនមានពិការភាព និងគ្រួសារ ឱ្យមានភាពប្រសើរឡើង ក្នុងការគោរពភាពថ្លៃថ្នូរពីកំណើត និងការរស់នៅដោយឯករាជ្យ ព្រមទាំងសុខុមាលភាពពេញលេញ ដោយលើកកម្ពស់ភាពស្មើគ្នាចំពោះមុខច្បាប់ និងការទទួលបានសេវាយុត្តិធម៌ ការចាកផុតពីការធ្វើទារុណកម្ម ការរំលោភបំពាន ការកេងប្រវ័ញ្ច អំពើហិង្សា និងដំណោះស្រាយគ្រាមានអាសន្ន ព្រមទាំងលើកស្ទួយសមភាពស្ត្រីពិការ កុមារពិការ និងជនមានពិការភាពគ្រប់ប្រភេទ។

នាឱកាសនោះដែរ គណៈអធិបតីបានប្រគល់កញ្ចប់អំណោយ ជូនអ៊ំ ពូ មីង និងក្មួយៗសិស្សានុសិស្ស មាន​ពិការភាព និងបន្តអញ្ជើញទស្សនាការប្រកួតកីឡាបាល់បោះរទេះរុញជនមានពិការភាព លោក ជា សុមេធី រដ្ឋមន្រ្តីក្រសួង​សង្គម​កិច្ច អតីតយុទ្ធជន និងយុវនីតិ​សម្បទា ក៍បានប្រគល់រង្វាន់​ជ័យលាភី​ដល់ក្រុមកីឡាករដែលទទួលបានជ័យជម្នះ ទទួលបានថវិកា ចំនួន ២០០ដុល្លារ និងក្រុមកីឡាករដែលមិនទទួលបានជ័យជម្នះ ទទួលបានថវិកាលើកទឹកចិត្ត ចំនួន ២០០ដុល្លារផងដែរ៕

The post ក្រសួងសង្គមកិច្ច រៀប​ចំ​ទិវាពិភពលោកលើកទី២ ស្តីពីបច្ចេកវិទ្យា ជំនួយ​សម្រាប់ជនមានពិការភាព នៅខេត្តកំពង់ចាម appeared first on Kampuchea Thmey Daily.

ការផ្តល់អនុសាសន៍ ត្រូវបានលើកឡើងនៅក្នុងសមាជរដ្ឋសភា-ព្រឹទ្ធសភាជាលើក​ទី១នៅ​កម្ពុជា​ កាលពីថ្ងៃទី ២ ខែឧសភា ឆ្នាំ ២០២៥ ដើម្បីពិភាក្សាលើរបៀបវារៈចំនួនបីរួមមាន ប្រព័ន្ធការពារសង្គម សេដ្ឋកិច្ចក្រៅប្រព័ន្ធ និងវិស័យកសិកម្មជាដើម។ ការរៀបចំសមាជនេះ បានផ្តល់ឱកាសដល់សមាជិករដ្ឋាភិបាល លើកជាយោបល់ និងបញ្ហាប្រឈម ដើម្បីដោះស្រាយរួមគ្នា សំដៅលើកកម្ពស់សុខមាលភាពសង្គម និងសេដ្ឋកិច្ចគ្រួសារ ជាដើម។

ក្នុងនោះ លោក គង់ មូនីកា សមាជិកព្រឹទ្ធសភាមកពីគណបក្សឆន្ទៈខ្មែរ បានឡើងថ្លែងកោតសរសើរគោលនយោបាយ និងការអនុវត្តរបស់រដ្ឋាភិបាលមានភាពល្អប្រសើរ មានវឌ្ឍនភាពទៅមុខ ពាក់ព័ន្ធប្រព័ន្ធការពារសង្គម ដូចជាការផ្តល់បណ្ណក្រីក្រជាដើម។ ប៉ុន្តែទន្ទឹមនឹងនេះ លោកសង្កេតឃើញបញ្ហាមួយចំនួនដែលមិនទាន់មានតម្លាភាព គឺការផ្តល់បណ្ណក្រីក្រដោយមានភាពលម្អៀង។ លោកថ្លែងថា៖«ការកំណត់នូវអត្តសញ្ញាណកម្មជនក្រីក្រនៅមានបញ្ហាប្រឈមច្រើននៅឡើយ ព្រោះអ្នកក្រីក្រពិតប្រាកដគាត់មិនបានទទួលការគាំពារ ទៅជាអ្នកមិនសូវចូលទៅក្នុងគោលការណ៍វិនិច្ឆ័យបែរជាទទួលបានការគាំពារ»។

លោកទទួលស្គាល់ថា រាជរដ្ឋាភិបាល ខិតខំកាត់បន្ថយភាពមិនប្រក្រតីទាំងអស់នេះ ប៉ុន្តែបញ្ហានៅតែបន្តកើតមាននៅតាមចំណុចមូលដ្ឋានមួយចំនួន ខណៈស្នើឱ្យរាជរដ្ឋាភិបាលទទួលយកចំណុចនេះពិនិត្យពិចារណាឡើងវិញ ជំរុញកាត់បន្ថយបញ្ហាដែលកើតមាន។

ជាការឆ្លើយតប សម្តេចតេជោ ផ្តល់អនុសាសន៍ជូននាយករដ្ឋមន្រ្តី ដោយសង្ឃឹមថារដ្ឋាភិបាល នឹងទទួលយកមតិនេះ សម្រាប់ការអនុវត្តជាបន្ត ព្រោះវាជាការដែលត្រូវពិចារណាបំផុត អំពីលក្ខខណ្ឌដែលពលរដ្ឋត្រូវបានទទួល។ សម្តេចបន្តថា៖« មានកន្លែងជាច្រើនហើយដែលទទួលបានស្របទៅតាមលក្ខខណ្ឌ ប៉ុន្តែបើយោងទៅលើអ្វីដែលជាការសិក្សាក៏មានលក្ខខណ្ឌដែលមិនស្រប គឺអ្នកមិនត្រូវទទួល បែរជាទទួលបាន។ អ្នកដែលត្រូវទទួល អត់បានទទួល រឿងនេះជារឿងពិត កើតមានពិតដោយកន្លែង អ្នកមានម៉ូតូជិះទៅជាបានទទួលបណ្ណក្រីក្រ ស្មើនឹងយើងជួយចាក់សាំងឱ្យគេជិះម៉ូតូ មិនបានជួយសម្រាប់ទៅអ្នកក្រីក្រដើម្បីទិញអង្ករ» ។

«ដោយសារមានការផ្សាយបន្តផ្ទាល់គ្រប់ទីកន្លែងបានជាខ្ញុំត្រូវលើករឿងនេះថែម ហើយភរិយាខ្ញុំគាត់តាមដាន ក្នុងឋានៈជាប្រធានសមាគមកាកបាទក្រហម។ ចឹងគាត់តាមដានលើកិច្ចការងារនេះច្រើន គាត់តែងតែរអ៊ូរទាំ កុំថាឯកឧត្តម គង់ មូនីកា សូម្បីប្រពន្ធខ្ញុំក៏ត្អូញត្អែរលើរឿងនេះដែរ។ ព្រោះមានអ្នកខ្លះ មានម៉ូតូជិះ ទទួលបានបណ្ណក្រីក្រ ដល់អ្នកអត់បាយស៊ីអត់ទទួលបាន រឿងនេះសូមឱ្យយកចិត្តទុកដាក់ទៅលើចំណុចនេះជាពិសេស ក្នុងការអនុវត្តនាពេលខាងមុខ»។ នេះជាការលើកឡើងបន្ថែមរបស់សម្តេចតេជោ ហ៊ុន សែន។

គួរជម្រាបថា គ្រួសារដែលមានបណ្ណសមធម៌ដែលជាគ្រួសារក្រីក្ត នឹងទទួលបានអត្ថប្រយោជន៍មួយចំនួនដូចជា សេវាថែទាំ និងព្យាបាលជំងឺដោយឥតគិតថ្លៃ នៅតាមមូលដ្ឋានសុខាភិបាលសាធារណៈ ទទួលបានប្រាក់ឧបត្ថម្ភក្រោមក្របខណ្ឌកម្មវិធីជាតិជំនួយសង្គមក្នុងកញ្ចប់គ្រួសារ និងអន្តរាគមន៍មួយចំនួនទៀត៕

The post សម្តេចតេជោ ស្នើឱ្យពិនិត្យឡើងវិញករណីពលរដ្ឋក្រីក្រពិតប្រាកដមិនទទួលបានបណ្ណគាំពារសង្គម ខណៈអ្នកមានជីវភាពធូរធារទទួលបាន appeared first on Kampuchea Thmey Daily.

លោក យៀប ម៉ាលីណូ អគ្គនាយកនៃអគ្គនាយកដ្ឋានគោលនយោបាយសង្គមកិច្ច បានឱ្យដឹងនៅថ្ងៃទី២៩ ខែឧសភា ឆ្នាំ២០២៥ថា ក្របខណ្ឌស្តង់ដារគុណភាពសម្រាប់ការផ្តល់សេវាសង្គមកិច្ច ជាឯកសារដែលរៀបចំឡើងដើម្បីផ្តល់ជាមគ្គុទេសបង្ហាញផ្លូវ និងជាគោលការណ៍ស្តង់ដារសម្រាប់ការបន្តផ្តល់សេវាកម្មសង្គមកិច្ច អនុលោមតាមច្បាប់ លិខិតបទដ្ឋានគតិយុត្ត គោលនយោបាយ និងផែនការយុទ្ធសាស្រ្តរបស់រាជរដ្ឋាភិបាល និងអនុសញ្ញាអង្គការសហប្រជាជាតិពាក់ព័ន្ធសម្រាប់មជ្ឈមណ្ឌល មណ្ឌល និងកន្លែងផ្តល់សេវាសង្គមកិច្ចទាំងអស់។

លោក យៀប ម៉ាលីណូ បន្តទៀតថា ក្របខណ្ឌស្តង់ដារគុណភាពសម្រាប់ការផ្តល់សេវាសង្គមកិច្ចនឹងជួយសម្របសម្រួលដល់ការងារផ្តល់សេវាកម្មសង្គមកិច្ចអោយបានល្អប្រសើរជាងមុន និងផ្តោតលើការជួយជនរងគ្រោះអោយចាកផុតពីភាពរងគ្រោះ និងងាយរងគ្រោះលឿនបំផុត តាមដែលអាចធ្វើទៅបាន មាននិរន្តរភាពសម្រាប់ការរស់នៅរយៈពេលវែង។ ម៉្យាងទៀត សម្រាប់មន្រ្តីសមត្ថកិច្ច និងអ្នកផ្តល់សេវាសង្គមកិច្ច នឹងជួយស្ថាប័នផ្តល់មូលនិធិ ឬម្ចាស់ជំនួយយល់ដឹងរបៀបការផ្តល់សេវា ឬផ្តល់ជំនួយតាមរយៈអ្នកសង្គមកិច្ចអាជីព អ្នកស្ម័គ្រ ឬស្ថាប័នឯកជនស្របច្បាប់។ កន្លងមក មានការខ្វះចន្លោះរបស់មន្រ្តីមានសមត្ថកិច្ច និងអាជ្ញាធរពាក់ព័ន្ធចំពោះការអនុវត្តផងដែរសម្រាប់ការផ្លាស់ទីជនរងគ្រោះចេញពីទីតាំងគ្មានសុវត្ថិភាពទៅរកសវាថែទាមានសុវត្ថិភាព។

ក្នុងសិក្ខាសាលាដាក់ឱ្យអនុវត្តក្របខណ្ឌស្តង់ដារគុណភាពជាតិសម្រាប់ការផ្តល់សេវាសង្គមកិច្ច លោកស្រី ឈី វ៉ា អភិបាលស្តីទីខេត្តកោះកុង បង្ហាញការគាំទ្រចំពោះការដាក់ឱ្យអនុវត្តក្របខណ្ឌស្តង់ដារគុណភាពជាតិសម្រាប់ការផ្តល់សេវាសង្គមកិច្ច ក្នុងគោលបំណងដើម្បីផ្តល់សេវាសង្គមកិច្ច មានគុណភាព ប្រក្រតីភាព និងឆ្ពោះទៅរកការអភិវឌ្ឍប្រកបដោយនិរន្តរភាព ធានាសិទ្ធិមនុស្ស និងសុខុមារភាពអ្នកទទួលសេវា និងបង្កើតវិធានការវាយតម្លៃ និងត្រួតពិនិត្យ ដែលអាចវាស់វែងបានរួមនិងការពង្រឹងទំនាក់ទំនង រវាងអាជ្ញាធរ មណ្ឌល និងអង្គការពាក់ព័ន្ធ។

ទាក់ទិននឹងវិស័យសង្គមកិច្ច លោកស្រីអភិបាលស្តីទីខេត្ត ត្រូវបានមើលឃើញថា វិស័យសង្គមកិច្ច បច្ចុប្បន្នខេត្តមានមណ្ឌលកុមារកំព្រារដ្ឋចំនួន ១ មណ្ឌល មានកុមារសរុបចំនួន ១៣ នាក់ ស្រី ៦នាក់។ គិតចាប់ពីខែមករា រហូតដល់ខែឧសភា ឆ្នាំ២០២៥ ជនចាស់ជរា គ្រួសាររងគ្រោះ ទីទ័លក្រ ដោយ គ្រោះធម្មជាតិ និងគ្រោះអន្តរាយដោយយថាហេតុ នៅតាមសហគមន៍ បានទទួលជំនួយសង្គ្រោះ បន្ទាន់ពីមន្ទីរសង្គមកិច្ច អតីតយុទ្ធជន និងយុវនីតិសម្បទា ចំនួន ១០៩ គ្រួសារ។

បច្ចុប្បន្នខេត្តកោះកុង មានសមាគមមនុស្សចាស់ ចំនួន ៥ឃុំ ២សង្កាត់ស្មើនឹង ១១ភូមិ ដែលកំពុង ដំណើរការ ទៅតាមស្ថានភាពជាក់ស្តែងនៃឃុំ សង្កាត់នីមួយៗ។ សមាគមមនុស្សចាស់ មានសមាជិក ចំនួន ៥៦៧នាក់ ស្ត្រីចំនួន ៣៥៦នាក់ គិតមកដល់ពេលនេះសមាគម មានថវិកាចំនួនជាង៤លានរៀល។ ថវិកាទាំងនេះបានមកពីប្រាក់ភាគទានបង់ប្រចាំខែ របស់សមាជិក នៃសមាគម។

ក្រៅពីនេះ ក៏មានវិស័យស្តារសម្បទា សាខាមូលនិធិជនពិការ និងសាខាមូលនិធិជាតិជំនួយសង្គមផងដែរ។
ទន្ទឹមនឹងសមិទ្ធផលសំខាន់ៗ ដែលបានលើកឡើងខាងលើ លោកស្រីអភិបាលស្តីទីខេត្តកោះកុង អះអាងថា ក៏នៅមានបញ្ហាប្រឈម ជា ច្រើនទៀតដូចជាភាពក្រីក្រ នៅក្នុងខេត្តកោះកុង ដែលយើងត្រូវបន្តយកចិត្តទុកដាក់ជួយសង្គ្រោះ និងបង្កឱកាសឱ្យពួកគាត់ អាចស្តារ និងកសាងជីវភាពគ្រួសារបានប្រសើរឡើង។ ការប្រែប្រួល អាកាសធាតុ គ្រោះធម្មជាតិ និងគ្រោះមហន្តរាយសង្គមផ្សេងៗ នៅក្នុងភូមិសាស្ត្រខេត្តកោះកុង បានបង្កើតឱ្យមានភាពងាយរងគ្រោះ ដូចជាការចំណាកស្រុក ជនអនាថា ជនចាស់ជរាក្រីក្រគ្មានទីពឹង ជនពិការក្រីក្រ កុមារកំព្រា និងកុមារងាយរងគ្រោះ។ល។ ដែលកំពុងរង់ចាំទទួលសេវាសង្គមកិច្ច និងជំនួយសង្គម។

ឆ្លើយតបនឹងបញ្ហាប្រឈមខាងលើ រដ្ឋបាលខេត្ត នឹងបន្តសហការយ៉ាងជិតស្និទ្ធ ជាមួយមន្ទីរ អង្គភាពពាក់ព័ន្ធ ក៏ដូចជាអង្គការមិនមែនរដ្ឋាភិបាល សមាគមពាក់ព័ន្ធនានា ដើម្បីសម្របសម្រួល និងផ្តល់សេវា ដល់មុខសញ្ញា ដែលជាជនរងគ្រោះ និងងាយរងគ្រោះ នៅក្នុងភូមិសាស្ត្ររបស់ខេត្តកោះកុង៕

អត្ថបទ៖ សិរីវឌ្ឍនៈ

The post ក្រសួងសង្គមកិច្ច ដាក់ឱ្យអនុវត្តក្របខណ្ឌស្តង់ដារគុណភាពសម្រាប់ការផ្តល់សេវាសង្គមកិច្ច appeared first on Kampuchea Thmey Daily.

លោក ជា សុមេធី បាន​លើក​ឡើង​ក្នុង​វេទិការ​ផ្សព្វផ្សាយស្ដីពីប្រព័ន្ធ​គាំពារសង្គម​នៅ​កម្ពុជាកាលពី​ថ្ងៃទី១៩ ខែឧសភា ឆ្នាំ២០២៥ នៅ​អាគារ​រដ្ឋបាលសភាថ្មី​ថា ក្រៅពី​ប្រាក់​សោធនិវត្តន៍ទាប​បំផុតដែល​មាន​ប្រមាណ​ជាង​២០០ដុល្លារ​ដល់​មន្ត្រី​ចូលនិវត្តន៍​នេះ រដ្ឋក៏មាន​បើក​ផ្ដល់​តាម​មូលនិធិជាតិ​ជំនួយ​សង្គមលើ​របបសន្តិសុខសង្គមចំនួន​២លើក​ក្នុង​មួយខែ រួម​នឹង​ការ​ផ្ដល់​ប្រាក់​ធានារ៉ាប់រង​សង្គម និងប្រាក់​បូជាសពក្នុងពេល​មរណភាពដល់​មន្ត្រី​ចូល​និវត្តន៍ផងដែរ។

លោកថា៖ «ការ​ដាក់អនុវត្តន៍​នូវ​របប​សន្តិសុខសង្គម​នេះគឺជា​ការ​គិត​គូរនិង​ឆ្លើយតប​ពី​សំណាក់​រាជរដ្ឋាភិបាលចំពោះ​គុណូបការៈរបស់​អតីត​មន្ត្រីរាជការ​ស៊ីវិល និង​អតីតយុទ្ធជន ដែល​បា​ន​ខិត​ខំ​ប្រឹងប្រែង​បំពេញ​ការ​ងារ​កន្លង​មក​ ក៏ដូចជាធ្វើពលិកម្ម​បូជា​សាច់ស្រស់ឈាម​ស្រស់ សម្រាប់បុព្វហេតុ​សង្គមជាតិ ក្នុងស្មារតីរួមចំណែក​កសាង និង​អភិវឌ្ឍនប្រទេសជាតិឱ្យមាន​ភាពរីក​ចម្រើន និង​មាន​សុខសន្តិភាព​ដូចសព្វថ្ងៃនេះ»។

បើតាម​រដ្ឋមន្ត្រីសង្គមកិច្ចបច្ចុប្បន្ន​មាន​អតីត​មន្ត្រីរាជការ​ស៊ីវិល​សរុប​ចំនួន ៥៦ ៤៧៥នាក់ និង​អតីតយុទ្ធជន​សរុប​ចំនួន ១១៥ ២៩៦នាក់។ ថ្មី​ៗនេះ​ប្រធានព្រឹទ្ធសភា និងប្រធានសមាគមអតីយុទ្ធជនកម្ពុជា សម្ដេចតេជោ ហ៊ុន សែន ក៏បាន​ផ្ដល់អនុសាសន៍ឱ្យធ្វើពង្រាងវិសោធនកម្មលក្ខន្តិកៈសមាគមអតីតយុទ្ធជន ឲ្យមានវិសាលភាពគ្របដណ្តប់ទៅលើនិវត្តជនទាំងអស់ដែលមានន័យ​ថាទាំង​មន្ត្រីរាជ​ការ​ស៊ីវិល និង​ប្រដាប់អាវុធ ក៏នឹង​ទទួល​បាន​ការ​គាំទ្រពីសមាគមបន្ថែមទៀត​ដែរ៕

អត្ថបទដោយ ហ៊ុន សិរីវឌ្ឍន៍

The post ប្រាក់សោធនិវត្តន៍ទាបបំផុតត្រឹមខែមេសា ឆ្នាំ២០២៥ មានជាង៨០ម៉ឺនរៀល appeared first on Kampuchea Thmey Daily.