លោកវរៈសេនីយ៍ឯក យស់ ចាន់វិចិត្រ អធិការនគរបាលក្រុងខេមរភូមិន្ទ បានឱ្យដឹងរសៀលថ្ងៃទី១៥ ខែមករា ឆ្នាំ២០២៦នេះថា ជនសង្ស័យទាំង៦នាក់ខាងលើ បានធ្វើសកម្មភាពលួចម៉ូតូមួយគ្រឿងរបស់ជនរងគ្រោះ ឈ្មោះ យី ពៅ ភេទប្រុស អាយុ៥២ឆ្នាំ មុខរបររត់ម៉ូតូឌុប ទីលំនៅភូមិ៤ សង្កាត់ដងទង់ កាលពីថ្ងៃទី១៤ខែ ខែមករា ឆ្នាំ២០២៦ វេលាម៉ោង១១និង៥០នាទី ខណៈពេលជនរងគ្រោះបានទុកម៉ូតូចោលមុខផ្ទះមិនបានដកសោរ។

លោកអធិការនគរបាលក្រុងខេមរភូមិន្ទ បានបន្តទៀតថា កាលពីថ្ងៃទី១១ ខែមករា ជនសង្ស័យមានគ្នា៥ នាក់បានជិះម៉ូតូពីគ្រឿងចេញពីខេត្តកំពត ជិះមកដល់វាលរិញ ស្រុកព្រៃនប់ម៉ោងប្រមាណ១៩និង០០នាទី ក៏ចូលដេកផ្ទះសំណាក់មួយយប់។ លុះថ្ងៃទី១២ ខែឆ្នាំដដែលម៉ោង១៣:៣០នាទី ជនសង្ស័យទាំង៥នាក់បានជិះម៉ូតូ២គ្រឿងចេញពីវាលរិញមកខេត្តកោះកុង ជិះដល់ក្រុងខេមរភូមិន្នម៉ោង១៨:៣០នាទី ឃើញផ្ទះគេ១កន្លែងទុកចោលក៏ដេកនៅទីនោះ(មិនស្គាល់ទីតាំង)បាន២យប់ រួចក៏បានធ្វើសកម្មភាពលួចតែម្តង។

ក្រោយលួចម៉ូតូបាន ពួកគាត់មានផែនការរត់គេចខ្លួនជាបន្តបន្ទាប់ ដោយដឹងសភាពការណ៍លោកអធិការនគរបាលក្រុងខេមរភូមិន្ទ ក៏សុំកិច្ចអន្តរាគមន៍ទៅកាន់អធិការដ្ឋាននគរបាលស្រុកកោះកុង ដើម្បីប្រតិបត្តិការបង្រ្កាបបានទាន់ពេលវេលាផងដែរ។

ជនសង្ស័យទាំង៦មានឈ្មោះ សន តុលា អាយុ១៧ឆ្នាំ មុខរបរមិនពិតប្រាកដ ស្នាក់នៅភូមិត្រពាំងកន្លែត ឃុំសំរោង ស្រុកទឹកឈូ ខេត្តកំពត, ឈ្មោះរ៉ាន់ វីរៈ  អាយុ១៧ឆ្នាំ ស្នាក់នៅភូមិក្រែល៊ក ឃុំប្រឡាយ ស្រុកស្ទង ខេត្តកំពង់ធំ, ឈ្មោះស៊ុគ សុភា អាយុ១៨ឆ្នាំ ស្នាក់នៅភូមិត្រពាំងឆែត ឃុំកំពង់សំរោង ស្រុកទឹកឈូ ខេត្តកំពត, ឈ្មោះនឹម ចំណាប់  អាយុ១៧ឆ្នាំ សញ្ជាតិខ្មែរ មុខរបរមិនពិតប្រាកដ នៅភូមិព្រែកស្វាយ សង្កាត់ស្ទឹងវែង, ឈ្មោះសាង ប៊ុនញ៉ា  អាយុ១៧ឆ្នាំ មុខរបរមិនពិតប្រាកដ រស់នៅភូមិស្ទឹងវែ សង្កាត់ស្ទឹងវែង, ឈ្មោះឌូង សំណាង  អាយុ១៦ឆ្នាំ រស់នៅភូមិបឹងតារោង ឃុំព្រៃឃុំ ស្រុកទឹកឈូ ខេត្តកំពត។ វត្ថុតាងដកហូត មានម៉ូតូមួយគ្រឿងម៉ាកWAVE ពណ៌ស្វាយ ស៊េរីឆ្នាំ២០១៨ ម៉ូតូហុងដាឌ្រឺម គ្មានស្លាកលេខ និងអាវ ០២គ្រឿង។ម៉ូតូមួយគ្រឿងម៉ាកWAVE ពណ៌ស្វាយ ស៊េរីឆ្នាំ២០១៨ ទូរសព្ទ័vivio ០២គ្រឿង។

បច្ចុប្បន្ន ជនសង្ស័យទាំង៦នាក់នេះ ត្រូវបានកសាងសំណុំរឿងបញ្ជូនទៅការិយាល័យជំនាញនៃស្នងការនគរបាលខេត្ត ដើម្បីចាត់ការបន្តតាមនីតិវិធី៕ អត្ថបទៈសិរីវឌ្ឍនៈ

The post កម្លាំងសមត្ថកិច្ចស្រាវជ្រាវ ឃាត់ខ្លួនក្រុមជនសង្ស័យ៦នាក់ ពាក់ព័ន្ធករណីលួចម៉ូតូពលរដ្ឋនៅក្រុងខេមរភូមិន្ទ appeared first on Kampuchea Thmey Daily.

លោក អ៊ូច ពន្លក នាយកទីចាត់ការផែនការ និងវិនិយោគសាលាខេត្តកោះកុង បានឱ្យដឹងនៅថ្ងៃទី១៤ ខែមករា ឆ្នាំ២០២៤ ថា ផ្លូវកៅស៊ូ៤ខ្សែដែលនឹងកែលម្អ ទី១ ពីរង្វង់មូលយាយរែកផ្លែឈើ ទៅកែងផ្លូវទល់មុខផ្សារក្តាម ទី២ ពីកែងផ្លូវផ្ទះពេទ្យម៉ឹង ទៅទល់កំពង់ផែក្រុងខេមរភូមិន្ទ ទី៣ ចាប់ពីផ្លូវកែងអគារធនាវឌ្ឍនៈទៅកែងផ្លូវពន្ធដារខេត្ត និងទី៤កែងផ្លូវ៤៨ ឆ្ពោះទៅកាន់ខាងលិចផ្សារដងទង់។

បើតាមលោក អ៊ូច ពន្លក គម្រោងលើកកម្រិតគុណភាពផ្លូវដែលហួសសុពលភាពប្រើប្រាស់លំបាកការធ្វើដំណើរចរាចរណ៍ទៅមករបស់ប្រជាពលរដ្ឋ និងអ្នកទេសចរមកលេងកម្សាន្តក្នុងខេត្ត។ ហើយគម្រោងកែលម្អផ្លូវទាំង៤ខ្សែលើកជាកញ្ចប់ថវិកាប្រើប្រាស់របស់រដ្ឋបាលខេត្ត។

ដោយឡែកលោក វីរៈ និងអ្នកស្រី លក្ខ័ណ ជាប្រជាពលរដ្ឋរស់នៅសងខាងផ្លូវដែលកំពុងជួសជុល បានសម្តែងក្តីរីករាយ បន្ទាប់ពីមានការកែលម្អផ្លូវដែលរងខូចខាតឡើងវិញ ដើម្បីងាយស្រួលធ្វើដំណើរចរាចរណ៍ដោយសុវត្ថិភាព។ ទោះយ៉ាងណាពួកគាត់ស្នើដល់រដ្ឋបាលខេត្ត និងមន្ទីរពាក់ព័ន្ធបន្តពិនិត្យកែលម្អផ្លូវដ៏ទៃទៀតក្នុងក្រុងខេមរភូមិន្ទ ព្រោះថាវាក៏ខូចខាតខ្លះផងដែរ៕

អត្ថបទ៖ សិរីវឌ្ឍនៈ

The post ផ្លូវ៤ខ្សែក្នុងក្រុងខេមរភូមិន្ទ ត្រូវបានកែលម្អលើកកម្ពស់គុណភាពប្រើប្រាស់ appeared first on Kampuchea Thmey Daily.

ប្រាប់ កម្ពុជាថ្មី នារសៀលថ្ងៃទី៧ ខែឧសភា ឆ្នាំ២០២៥នេះ គឺលោក ភូថង សេរីវុឌ្ឍី អភិបាលក្រុងខេមរភូមិន្ទ បានគូសបញ្ជាក់ថា ប្រជាពលរដ្ឋរបស់លោកមានសរុបចំនួន១១៩គ្រួសារ មិនទាន់មានការតបណ្ដាញទឹកស្អាតជូនពួកគាត់បានត្រឹមត្រូវនៅឡើយទេ។ ក្នុងនោះសង្កាត់ស្មាច់មានជ័យ ភូមិ៣ ក្រោយវត្តថ្មី ចំនួន ១១គ្រួសារ សង្កាត់ស្ទឹងវែង ក្នុងភូមិស្ទឹងវែង(ឆ្មាបាត់)៤៥ គ្រួសារ និងនៅខេងខូង ៦៣គ្រួសារ ម្ដុំស្ពានកោងសាងស្នេហ៍ ៩៩គ្រួសារ និងភូមិព្រែកស្វាយ ៣១ គ្រួសារ។

លោកអភិបាលក្រុងខេមរភូមិន្ទ ក៏បានស្នើសុំក្រុមហ៊ុនផ្តត់ផ្គង់ទឹកស្អាតខេត្តកោះកុង ជួយពន្លឿនការរៀបចំបណ្ដាញទឹកដល់ប្រជាពលរដ្ឋ ពិសេសបណ្តាញអគ្គិសនីផងដែរ ខណៈកំពុងមានតម្រូវការច្រើនពី១ឆ្នាំទៅ១ឆ្នាំ។

បញ្ហានេះ ត្រូវបានលោក ផាត់ ប៊ុនហួរ តំណាងក្រុមហ៊ុន LYP Group និងក្រុមហ៊ុនផ្គត់ផ្គង់ទឹកស្អាតខេត្តកោះកុង អះអាងក្នុងកិច្ចប្រជុំដើម្បីពិភាក្សា អំពីបញ្ហាប្រឈម និងវិធានការដោះស្រាយបញ្ហាកង្វះទឹកស្អាតប្រើប្រាស់កាលពីថ្ងៃទី៦ ខែឧសភា ឆ្នាំ២០២៥ ថា លោកទទួលយកសំណើនេះ ហើយពន្លឿនការរៀបចំតភ្ជាប់បណ្ដាញទឹកស្អាតជូនប្រជាពលរដ្ឋទៅតាមផែនការរបស់ក្រុមហ៊ុន ដោយផ្តើមពីចំណុច(ខេងឃោង)មុនគេ បន្ទាប់មកក្នុងភូមិស្មាច់មានជ័យ ប្រហែលជាចុងក្រោយ គឺនៅក្នុងភូមិស្ទឹងវែង។

បើតាមលោក ផាត់ ប៊ុនហួរ ក្រុមហ៊ុននឹងប្រឹងប្រែងកែលម្អប្រព័ន្ធបណ្ដាញទឹកដែលចាស់ៗ រៀបចំទុយោទឹកថ្មីដែលមានគុណភាពខ្ពស់ ដើម្បីធានាបាននូវការផ្គត់ផ្គង់ទឹកមិនមានការបែកធ្លាយបាត់បង់ទឹកបន្តទៅទៀត។ កន្លងទៅ ក្រុមហ៊ុនទឹកស្អាតកោះកុង និយាយថា ខ្លួនបានលើកលែងការផាកពិន័យរយៈពេល ៣ខែ គឺចាប់ពីខែមេសា ឧសភា ដល់ខែមិថុនា ការតបបណ្ដាញរួចមិនទាន់បានប្រើប្រាស់។ លើការថែទាំកុងទ័រទឹក និងការលើសថ្ងៃនៃការកំណត់ការបង់ប្រាក់របស់ក្រុមហ៊ុន។

ឆ្នាំនេះពលរដ្ឋរស់នៅក្នុងក្រុងខេមរភូមិន្ទ និងស្រុកមណ្ឌលសីមា បានជួបប្រទះការខ្វះខាតទឹកស្អាតប្រើប្រាស់គួរឱ្យកត់សម្គាល់ ក្រោមហេតុរបស់ក្រុមហ៊ុនផ្គត់ផ្គង់ទឹកស្អាតកោះកុង ប្រភពទឹកសាបជ្រោះតាប៉នរីងស្ងួត ខូសម៉ាស៊ីមបូម ចំនួនអ្នកប្រើប្រាស់កើនឡើងទ្វេរដង និងកំពុងរកប្រភពទឹកសាបថ្មី ដើម្បីដោះស្រាយបូមទឹកបញ្ចូលក្នុងអាងទឹកជ្រោះតាប៉ន។

ប្រជាពលរដ្ឋបានរិះគន់យ៉ាងខ្លាំងចំពោះការគ្មានទឹកស្អាតប្រើប្រាស់បានគ្រប់គ្រាន់ពេញលេញ ដោយទាមទារឱ្យក្រុមហ៊ុនត្រូវយកចិត្តទុកដាក់ខ្ពស់ពីការរក្សាផលិតទឹកចែកចាយជូនប្រជាពលរដ្ឋ ជៀសវាងបង្កការរំខានដល់ការរស់នៅ និងធ្វើអាជីវកម្មរបស់ពួកគាត់៕

អត្ថបទ៖ សិរីវឌ្ឍនៈ

The post ប្រជាពលរដ្ឋក្រុងខេមរភូមិន្ទជាង១០០គ្រួសារ មិនទាន់មានបណ្តាញទឹកស្អាតប្រើប្រាស់ត្រឹមត្រូវ appeared first on Kampuchea Thmey Daily.

ផ្លូវ​កៅស៊ូ​សិរី​កា ស្ថិត​ក្នុង​សង្កាត់​ស្ទឹង​វែង ក្រុង​ខេមរភូមិន្ទ ដែល​កំពុង​រង​ការ​ខូចខាត បាន​បង្ក​ការ​រំខាន​ដល់​ការ​ធ្វើដំណើរ​ដឹកជញ្ជូន​ទិន្នផល​នេសាទ និង​ទៅ​លេង​កម្សាន្ត​នៅ​តំបន់​អេកូ​ទេសចរណ៍​ធម្មជាតិ​ព្រៃ​កោងកាង​ពាម​ក្រសោប ជាប់​នឹង​ស្រុក​មណ្ឌលសីមា។

តំណាង​ប្រជាពលរដ្ឋ​តែងតែ​អាស្រ័យ​ការ​បើកបរ​ទៅ​មក​លើ​កំណាត់​ផ្លូវ​កៅស៊ូ​នេះ បាន​ត្អូញត្អែរ​កាលពី​ថ្ងៃ​ទី ១៩ ខែ​កញ្ញា ឆ្នាំ ២០២៤ ថា ពួកគាត់​ពិតជា​ពិបាក​ធ្វើដំណើរ​ដោយ​មាន​ជង្រុក​ធំ​ជ្រៅៗ ងាយ​គ្រោះថ្នាក់​ផ្សេងៗ។ ដូច្នេះ ពួកគាត់​ក៏​ស្នើសុំ​ជាថ្មី​ម្តង​ទៀត​ដល់​អាជ្ញាធរ​ខេត្ត និង​មន្ទីរ​ជំនាញ មេត្តា​ជួយ​ពិនិត្យ​ជួសជុល​កែលម្អ​ផ្លូវ​កៅស៊ូ ១ ខ្សែ​នេះ ឲ្យ​បាន​ល្អ​ប្រសើរ ងាយស្រួល​ចរាចរណ៍​ឡើង​វិញ​ផង។

ពាក់ព័ន្ធ​បញ្ហា​ចង់​បាន​ផ្លូវ​ល្អ​ងាយស្រួល​ធ្វើដំណើរ ត្រូវ​បាន លោក សំ ឃិតវៀន អភិបាលរង​ខេត្ត​កោះកុង អះអាង​នៅ​ថ្ងៃ​ទី ២០ ខែ​កញ្ញា ឆ្នាំ ២០២៤ ថា រដ្ឋបាល​ខេត្ត​កោះកុង ទទួល​យក​សំណើ​របស់​ពលរដ្ឋ ហើយ​ដឹង​ពី​ការ​លំបាក​ធ្វើដំណើរ​របស់​ពលរដ្ឋ ក៏ដូចជា​អ្នកទេសចរ មិន​ថា​តែ​រដូវវស្សា ឬ​ប្រាំង។

លោក​អភិបាលរង​ខេត្ត​កោះកុង បន្ត​ទៀត​ថា មិន​យូរ​នោះ​ទេ ឲ្យ​តែ​មេឃ​រាំង ភ្លៀង​ដាច់​គ្រាប់ ក្រុម​ការងារ​មន្ទីរ​សាធារណការ និង​ដឹកជញ្ជូន​ខេត្ត នឹង​ដាក់​គ្រឿងចក្រ​ចុះ​ជួសជុល​ឲ្យ​ល្អ មាន​សុវត្ថិភាព​វិញ​ហើយ ក្រោម​គម្រោង​អភិវឌ្ឍន៍​មូលនិធិ​កញ្ចប់​ថវិកា​របស់​រដ្ឋបាល​ខេត្ត តាមរយៈ​ការ​អ៊ុត​កៅស៊ូ​ប្រភេទ AC។

លោក អន ដាវុធ ប្រធាន​មន្ទីរ​សាធារណការ និង​ដឹក​ជញ្ជូន​ខេត្ត​កោះកុង ក៏បាន​ឲ្យ​ដឹង​ដែរ​ថា ក្រុម​ការងារ​របស់​លោក នឹង​អ៊ុត​កៅស៊ូ​លើ​កំណាត់​ផ្លូវ​សិរី​កា​ដែល​រង​ខូចខាត​មាន​ប្រវែង​ជិត ២ គីឡូម៉ែត្រ ទទឹង ៧ ម៉ែត្រ និង​កម្រាស់ ៧ ហ៊ុន បន្ទាប់ពី​ទទួល​សហការ​កិច្ចសន្យា​ជាមួយ​រដ្ឋបាល​ខេត្ត ដើម្បី​លើក​កម្ពស់​គុណភាព​ផ្លូវ​ខាងលើ។ ប៉ុន្តែ​ទោះ​យ៉ាងណា លោក​ក៏​សូម​អធ្យាស្រ័យ​ពី​ប្រជាពលរដ្ឋ និង​អ្នក​ទេសចរ​ទាំងអស់ កំពុង​ជួប​ការ​លំបាក​ធ្វើដំណើរ​ទៅ​មក​លើ​កំណាត់​ផ្លូវ ១ ខ្សែ អំឡុង​រដូវវស្សា ដោយ​សង្ឃឹមថា អ្នក​ពាក់ព័ន្ធ​នឹង​យោគយល់​ពី​បញ្ហា​ប្រឈម​ដោយសារ​អាកាសធាតុ​នេះ។

នៅ​ពេល​ដែល​ដឹង​ដំណឹង​ថា នឹង​មាន​ការ​ជួសជុល​ផ្លូវ​ជាង ២ គីឡូម៉ែត្រ​នេះ ពលរដ្ឋ​បង្ហាញ​ការ​រីករាយ ដោយ​ជឿជាក់​ថា ពេល​ជួសជុល​ហើយ នឹង​មាន​សុវត្ថិភាព​សម្រាប់​ការ​ធ្វើ​ចរាចរណ៍ ពិសេស​បង្កើន​ភាព​ទាក់ទាញ​អ្នកទេសចរ​មកលេង​កម្សាន្ត​នៅ​ខេត្ត​កោះកុង​កាន់តែ​ច្រើន៕

អត្ថបទ ៖ សិរីវឌ្ឍនៈ

The post ផ្លូវកៅស៊ូសិរីកា ប្រវែងប្រមាណ ២ គីឡូម៉ែត្រ កំពុងរងការខូចខាត រំខានដល់ការធ្វើដំណើររបស់ពលរដ្ឋនៅក្រុងខេមរភូមិន្ទ appeared first on Kampuchea Thmey Daily.

ក្រុម​កម្លាំង​ជំនាញ​ដែល​មាន​ជា​ឯកសណ្ឋាន និង​ជា​ស៊ីវិល​ផង​នោះ បាន​ត្រៀម​លក្ខណៈ​គ្រប់​ពេលវេលា ដើម្បី​ចុះ​បង្ក្រាប​ក្រុម​ក្មេង​ទំនើង​ធ្វើ​សកម្មភាព​អំពើ​ហិង្សា ឬ​ប្រព្រឹត្ត​ផ្សេងៗ ក្នុង​មូលដ្ឋាន​ភូមិសាស្ត្រ​បាន​កំណត់។

លោក​វរសេនីយ៍ឯក យស់ ចាន់វិចិត្រ អធិការ​នគរបាល​ក្រុង​ខេមរភូមិន្ទ បាន​ឱ្យ​កម្ពុជា​ថ្មី​ដឹង​នៅ​ថ្ងៃ​ទី ៣០ ខែ​ឧសភា ឆ្នាំ ២០២៤ នេះ​ថា សព្វថ្ងៃ ស្ថានភាព​ក្នុង​មូលដ្ឋាន​ល្អ​ប្រសើរ​ណាស់ មិន​មាន​ក្មេង​ទំនើង​ធ្វើ​សកម្មភាព​អុកឡុក​ហិង្សា​ធ្ងន់ធ្ងរ​ដូច​នៅ​រាជធានី​ភ្នំពេញ ឬ​ខេត្ត​ដែល​មាន​ប្រជាពលរដ្ឋ​ច្រើន​នោះ​ទេ។

លោក​អធិការ​នគរបាល​ក្រុង​ខេមរភូមិន្ទ បន្ថែម​ថា សមត្ថកិច្ច​របស់​លោក​បាន​គ្រប់គ្រង និង​កំណត់​មុខ​សញ្ញា​បាន​ចំពោះ​ក្រុម​ក្មេង​ទំនើង និង​ទីតាំង​គោលដៅ​ពួកគេ​តែងតែ​ធ្វើ​សកម្មភាព ទោះបីជា​ក្រុម​ក្មេង​ទំនើង​មួយ​ចំនួន បាន​ចេញ​ពី​ពន្ធនាគារ​ខ្លះ​ហើយក៏​ដោយ។

លោក ចាន់​វិចិត្រ លើកឡើង​ទៀត​ថា ៣ ឆ្នាំមុន មាន​ក្រុម​ក្មេង​ទំនើង​ជាច្រើន បាន​បែងចែក​ឈ្មោះ​ក្រុម ៣២ ក្រុម ៣៨០ និង​ក្រុម​ខារ៉ាប៉ាវ ធ្វើ​សកម្មភាព​ប្រើ​អំពើ​ហិង្សា​បង្ក​ការ​ភ័យខ្លាច​ដល់​ប្រជាពលរដ្ឋ ប៉ុន្តែ​ពួកគេ​ក៏​ត្រូវ​បាន​បង្ក្រាប​ចាប់​បញ្ជូន​ទៅ​ពន្ធនាគារ​អស់ហើយ​ដែរ។

ឆ្លើយតប​នឹង​បទបញ្ជា​របស់​ប្រមុខ​រាជរដ្ឋាភិបាល​កម្ពុជា ក្រសួងមហាផ្ទៃ អគ្គស្នងការ​នគរបាល​ជាតិ និង​ស្នងការ​នគរបាល​ខេត្ត​កោះកុង កងកម្លាំង​ជំនាញ​អធិការ​ក្រុង​ខេមរភូមិន្ទ និង​ប៉ុស្តិ៍​នគរបាល​រដ្ឋបាល​ទាំង ៣ នឹង​បន្ត​ល្បាត​កំណត់​មុខសញ្ញា​បន្ថែម​ទៀត​ចំពោះ​ក្មេង​ទំនើង៕

អត្ថបទ ៖ សិរីវឌ្ឍនៈ

The post គោលដៅក្រុមក្មេងទំនើងនៅក្រុងខេមរភូមិន្ទ ត្រូវបានកម្លាំងជំនាញកំណត់រួចរាល់ហើយ appeared first on Kampuchea Thmey Daily.

ទន្ទឹម​នោះ ប្រជាពលរដ្ឋ ក៏បាន​ស្នើសុំ​ជាថ្មី​ដល់​អាជ្ញាធរ​ខេត្ត-ក្រុង មន្ទីរ​ពាក់ព័ន្ធ និង​ក្រុមហ៊ុន​ប្រមូល​សំរាម សូម​កុំ​បន្ត​អនុញ្ញាត​ឱ្យ​ចាក់សំរាម​នៅ​ទីលាន​ចាស់ ព្រោះ​ពួកគាត់​កំពុង​ប្រឈម​នឹង​ផល​ប៉ះពាល់​ជាច្រើន​ដល់​សុខភាព​សាធារណៈ និង​មិន​អាច​បន្ត​ទ្រាំទ្រ​ក្លិន​ផ្សែង នៃ​ការ​ដុត ឬ ភាព​ស្អុយ​រលួយ​សំរាម​គ្រប់​ប្រភេទ​បាន​ទៀត​ទេ។

តំណាង​ប្រជាពលរដ្ឋ អះអាង កាលពី​ថ្ងៃ​ទី ៣ ខែ​ឧសភា កន្លងទៅ ថា ពួកគាត់​ពិបាក​ដកដង្ហើម​ណាស់ ព្រោះ​ការ​ដុត​គំនរ​សំរាម​ខែប្រាំង​នេះ ប្រសិនបើ​ត្រឹមតែ​ចាក់​សំរាម​ពេញ​ទីលាន​ជាក់ស្ដែង​ពិបាក​មួយ​ទៅ​ហើយ។ ជួនកាល​ពេលខ្លះ​មិន​អាច​ទ្រាំទ្រ​នឹង​ក្លិន​ផ្សែង​សំរាម​បាន រហូតដល់​នាំ​កូន​ចៅ​រត់​កន្លែង​ផ្សេង​ជា​បណ្ដោះអាសន្ន​ក៏​មាន​ដែរ។ ដូច្នេះ​សូម​អាជ្ញាធរ​មេត្តា​ណែនាំ​ដល់​ក្រុមហ៊ុន​ដឹក​សំរាម​ទៅ​ចាក់​ទីលាន​សំរាម​ថ្មី​ដែល​មាន​ទំហំ​ជាង ៥០ ហិតា នៅ​ក្បែរ​ផ្លូវជាតិ​លេខ ៤៨ ស្ថិត​នៅ​ឃុំ​ទួល​គគីរ ស្រុក​មណ្ឌលសីមា ជំនួស​វិញ ដោយសារតែ​ទីលាន​ចាស់​នេះ​លែង​អាច​ផ្ទុក​សំរាម​បាន​ទៀត​ហើយ។

រដ្ឋបាល​ខេត្ត​កោះកុង កាលពី​ថ្ងៃ​ទី ២៩ ខែ​មេសា ឆ្នាំ ២០២៤ កន្លងទៅ យោង​លិខិត​រដ្ឋបាល​របស់​ខ្លួន បាន​ចេញមុខ​អះអាង​ថា អាជ្ញាធរ​បាន​យកចិត្តទុកដាក់​គិតគូរ​ពី​ការ​គ្រប់គ្រង​សំរាម​សំណល់​រឹង​នៅ​ទីប្រជុំជន ពិសេស​កាកសំណល់​វេជ្ជសាស្ត្រ ដោយ​បាន​រៀបចំ​ឡ​នៅ​តាម​មន្ទីរពេទ្យ​សម្រាប់​ដុត​សម្លាប់​មេរោគ មុននឹង​យក​ទៅ​កម្ទេច​ចោល ដោយ​រៀបចំ​ទីលាន​សំរាម​ថ្មី​ទំហំ ៥០ ហិតា។ ចំណែក​ទី​កន្លែង​ចាក់សំរាម​ចាស់​នៅ​ក្រុង​ខេមរភូមិន្ទ​មិន​ត្រូវ​បាន​អនុញ្ញាត​ឱ្យ​បន្ត​ចាក់សំរាម​ទៀត​ឡើយ ព្រោះ​មាន​ប្រជាជន​រស់នៅ​ច្រើន​ដែល​អាច​បង្ក​ផល​ប៉ះពាល់​ដល់​សុខភាព ពិសេស​កុមារ។

អាជ្ញាធរ​ខេត្ត​កោះកុង ក៏​បដិសេធ​ផង​ដែរ​ចំពោះ​ក្រុម​មាតា​ធម្មជាតិ ដែល​បាន​បង្ហោះ​វីដេអូ​មួយ​លើ​បណ្ដាញ​សង្គម​បញ្ជាក់​ពី​ការ​មិន​យកចិត្តទុកដាក់​របស់​អាជ្ញាធរ​រដ្ឋបាល​ខេត្ត​កោះកុង​លើ​គំនរ​សំរាម​ក្នុង​ដែន​ជម្រក​សត្វព្រៃ។ តែ​អ្វី​ដែល​ក្រុម​មាតា​ធម្មជាតិ​ចង់​ទាញ​ចំណាប់អារម្មណ៍ និង​បង្ហាញ​តាមរយៈ​វីដេអូ​របស់​ខ្លួន គឺ​ផល​ប៉ះពាល់​ដល់​បរិស្ថាន មនុស្ស និង​សត្វ​ដែល​ស្ថិត​នៅ​ក្បែរ​គំនរ​សំរាម​នោះ៕

អត្ថបទ ៖ សិរីវឌ្ឍនៈ

The post ពលរដ្ឋខេត្តកោះកុង ស្នើបញ្ឈប់ការចាក់សំរាមនៅទីលានចាស់ ដោយបែរទៅទីតាំងថ្មីជំនួសវិញ appeared first on Kampuchea Thmey Daily.

លោកស្រី អ៊ី នារីនេត អភិបាលរងខេត្តកោះកុង គូសបញ្ជាក់ថា សារៈសំខាន់ នៃការចុះបញ្ជីនាវានេសាទនេះ គឺក្នុងគោលដៅចម្បង ទី១. ធ្វើបច្ចុប្បន្នភាពក្នុងការគ្រប់គ្រងចំនួននាវានេសាទឱ្យបានជាក់លាក់ និងច្បាស់លាស់ ទី២. កាត់បន្ថយការនេសាទខុសច្បាប់ ទី៣. កាត់បន្ថយការនេសាទហួសក​ម្រិត ទី៤. ធានាបានការគ្រប់គ្រងផលស្តុកក្នុងធម្មជាតិ និង ទី៥. ដករបាំងពាណិជ្ជកម្មពីសហគមន៍អឺរ៉ុប។

លោកស្រីអភីបាលរងខេត្ត បន្ថែមទៀតថា ក្រុមការងារពាក់ព័ន្ធទាំងអស់បានរួមគ្នាបង្ខិតសេវាឱ្យកៀកជាមួយប្រជាពលរដ្ឋដោយសម្របសម្រួលនីតិវិធី និងឯកសារឱ្យមានភាពសាមញ្ញា តែមានប្រសិទ្ធភាព។ កាត់បន្ថយការចំណេញពេលវេលា និងសាហ៊ុយធ្វើដំណើរ ស្នាក់នៅឡើងចុះច្រើនដង តាមរយៈច្រកចេញចូលសាលាខេត្ត។

អាជ្ញាធរខេត្តកោះកុង លើកឡើងដែរថា ប្រជានេសាទ ឬម្ចាស់ជលយានទាំងអស់ នឹងទទួលបានសិទ្ធិស្របច្បាប់ជាម្ចាស់កម្មសិទ្ធ ងាយស្រួលក្នុងការស្នើសុំប្រកបអាជីវកម្មផ្សេងៗ និងងាយស្រួលដល់ការស្រាវជ្រាវរក ក្នុងករណីមានចោរលួច ឬបាត់បង់ ក្រោយបានបំពេញកាតព្វកិច្ចរបស់ខ្លួនរួចរាល់។ តែករណីអ្នកជាប់កាតព្វកិច្ចពុំបានចុះបញ្ជីទេនោះ នឹងត្រូវទទួលខុសត្រូវចំពោះមុខច្បាប់ជាធរមាន។

អាជ្ញាធរខេត្តកោះកុង និងក្រុមមន្រ្តីជំនាញពាក់ព័ន្ធ បើកយុទ្ធនាការពិនិត្យចុះបញ្ជីជលយាននៅក្នុងក្រុងខេមរភូមិន្ទរយៈពេល ១២ថ្ងៃ ចាប់ពីថ្ងៃទី២២ ខែមេសា ដល់ថ្ងៃទី៣ ខែឧសភា ក្រោយមកបន្តចុះទៅស្រុកគោលដៅចំនួន៥ ទៀតក្នុងភូមិសាស្រ្តខេត្ត។

លោក ណូ រ៉ាស៊ី និង លោក ចាន់ សុផល ជាម្ចាស់ទូកនេសាទបែបលក្ខណៈគ្រួសារ នៅក្នុងក្រុងខេមរភូមិន្ទ គាំទ្រចំពោះចំណាត់ការផ្នែកច្បាប់នេះតាមរយៈមកចូលរួមចុះបញ្ជីទូក និងធ្វើបណ្ណអាជីវកម្មនេសាទក្នុងដែនសមុទ្រ។ កន្លងទៅ មានពលរដ្ឋខ្លះបានចុះបញ្ជី និងខ្លះទៀតមិនបានចុះបញ្ជីទៀត ដែលជាហេតុផលមិនសូវយល់ដឹងពីច្បាប់ពាក់ព័ន្ធជលយាន។

តំណាងប្រជានេសាទទាំងពីររូបនេះបន្តថា  ពួកគាត់យកឯកសារដែលមន្រ្តីតម្រូវឱ្យមកបំពេញបែបបទទៅតាមច្បាប់ដែលមានចែង ចំពោះតម្លៃសេវាកម្មអនុវត្តទៅការកំណត់មិនចំណាយច្រើនឡើយ។ នៅពេលមានការចុះបញ្ជី និងច្បាប់ធ្វើអាជីវកម្មនេសាទរួចរាល់ត្រឹមត្រូវ នឹងលែងមានភាពព្រួយបារម្ភខ្លាចខុសច្បាប់ហើយ។

ទិន្នន័យរបស់រដ្ឋបាលជលផល បង្ហាញថា នៅឆ្នាំ២០១៨ ខេត្តកោះកុង មាននាវានេសាទសមុទ្រសរុបចំនួន ៣ ៣៩៦ គ្រឿង ក្នុងនោះមាននាវានេសាទខ្នាតតូចជាង ២ ០០០ គ្រឿង នាវានេសាទខ្នាតមធ្យម ៩៦២ គ្រឿង និងនាវានេសាទខ្នាតធំ ១០ គ្រឿង៕

អត្តបទ៖ សិរីវឌ្ឍនៈ

The post អាជ្ញាធរខេត្តកោះកុង បើកយុទ្ធនាការពិនិត្យចុះបញ្ជីជលយានគ្រប់ប្រភេទ appeared first on Kampuchea Thmey Daily.

ប្រជាពលរដ្ឋរស់នៅតាមសង្កាត់៣ទាំងក្នុងក្រុងខេមរភូមិន្ទ ខេត្តកោះកុង លើកឡើងនៅថ្ងៃទី១៨ ខែវិច្ឆិកា នេះថា បើធៀបកាលពី៣ឆ្នាំមុន ស្ថានភាពផ្លូវមិនខូចខាតខ្លាំងដូចឆ្នាំនេះទេ ពិសេសកំណាត់ផ្លូវមុខវត្តទេពនិមិត្ត ទៅកាន់កែងផ្លូវអគារសាខាពន្ធដារខេត។ និងផ្លូវបេតុងចាស់ទ្រុឌទ្រោមពីមុខវត្តទេពនិមិត្តទៅកែងផ្លូវជាតិលេខ៤៨ សុទ្ធលំបាកធ្វើដំណើរ។

បើតាមពលរដ្ឋដដែលអះអាងថា ពេលមានភ្លៀងម្តងៗទឹកដក់លិចផ្លូវដែលមានជង្ហុកជ្រៅៗបង្កគ្រោះថ្នាក់ដល់អ្នកបើកបរទៅមក និងហូរចូលផ្ទះពួកគាត់ស្ទើរជារៀងរាល់ថ្ងៃពិបាករស់នៅធ្វើអាជីវកម្ម។ ដូច្នេះពួកគាត់ស្នើសុំដល់អាជ្ញាធរ និងមន្រ្តីជំនាញខេត្តធ្វើយ៉ាងណាចុះពិនិត្យជួសជុលកែលម្អថ្មីឱ្យល្អប្រសើរឡើងវិញ ព្រោះនេះជាសេចក្តីចង់បានរបស់ពលរដ្ឋទូទៅ។ កន្លងទៅ ពួកគាត់មិនដែលឃើញអាជ្ញាធរមន្រ្តីណាចុះពិនិត្យដោះស្រាយពីបញ្ហាផ្លូវខូចនេះទេ ខណៈផ្លូវទាំងនោះផ្តល់ផលប្រយោជន៍ដល់ពលរដ្ឋ និងដឹកទំនិញអាជីវកម្មឆ្លងកាត់ជាប្រចាំ។

ទាក់ទងនឹងបញ្ហានេះ ត្រូវបានលោក វ៉ែន សុខា នាយកទីចាត់ការផែនការ និងវិនិយោគខេត្តកោះកុង និយាយថា រដ្ឋបាលខេត្តកោះកុង តែងយកចិត្តទុកដាក់ខ្ពស់ពីសេចក្តីត្រូវការរបស់ពលរដ្ឋក្នុងមូលដ្ឋានពីការចង់បានផ្លូវថ្នល់ស្អាត ប្រឡាយលូរំដោះទឹក ទឹកស្អាត និងភ្លើងអគ្គិសនីជាដើម។ ចំពោះបញ្ហាផ្លូវក្នុងក្រុងខេមភូមិន្ទ ឆ្នាំនេះ ខេត្តលើកជាគម្រោងកែលម្អជាច្រើនផងដែរ ជាក់ស្តែងដូចផ្លូវពីមុខវត្តទេពនិមិត្តទៅកែងផ្លូវចម្រុះជ្រូកភូមិ៣ សង្កាត់ស្មាច់មានជ័យ នឹងមានការកែលម្អជូនហើយដោយប្រវែង៤៥០ម៉ែត្រ ទទឹង៧ម៉ែត្រ និងដាក់លូរំដោះទឹកអមសងខាងផ្លូវផងដែរ។

លោក វ៉ែន សុខា បន្ថែមថា ក្រៅពីគម្រោងផ្លូវ១ខ្សែខាងលើ រដ្ឋបាលខេត្តក៏បានកំពុងសាងសង់ស្ពាន១កន្លែង ប្រវែង១០ម៉ែត្រ ទទឹង១១ម៉ែត្រ កម្រាស់២.៥០ម៉ែត្រនៅក្បែរសណ្ឋាគារកោះកុងបេ។ ទោះយ៉ាងណាកំណាត់ផ្លូវបេតុងចាប់ពីមុខវត្តទេពនិមិត្តទៅកែងផ្លូវជាតិលេខ៤៨ អាជ្ញាធរខេត្តកោះកុងកំពុងពិនិត្យពិចារណារកកញ្ចប់ថវិកាអភិវឌ្ឍន៍ណាមួយជួសជុលឱ្យល្អប្រសើរនៅឆ្នាំ២០២៤តែមិនធនាថាទទួលបានគម្រោងកែលម្អនោះទេ៕

អត្តបទ៖ សិរីវឌ្ឍនៈ

The post ផ្លូវមួយចំនួនក្នុងក្រុងខេមរភូមិន្ទ កំពុងរងការ​ខូចខាតច្រើនខ្សែ ពលរដ្ឋស្នើសុំជួសជុលកែលម្អជាថ្មី appeared first on Kampuchea Thmey Daily.