ហេតុការណ៍​នេះ​បាន​កើត​ឡើង​កាលពី​ព្រឹក​ថ្ងៃ​ទី ១៣ ខែ​មីនា ឆ្នាំ ២០២៦ ស្ថិតនៅ​ភូមិ​ខ្នារ សង្កាត់​ជ្រាវ ក្រុង​សៀមរាប ខេត្ត​សៀមរាប។

សមត្ថកិច្ច​បាន​ឲ្យ​ដឹង​ថា ផ្ទះ​ខាង​លើ​មាន​ទំហំ​ទទឹង ១៣ ម៉ែត្រ បណ្ដោយ ២៥ ម៉ែត្រ ដំបូល​ប្រក់​ស័ង្កសី ម្ចាស់ផ្ទះ ឈ្មោះ ឈិន ឈាង ភេទប្រុស អាយុ ៥៦ ឆ្នាំ មុខរបរ​ប៉ូលិស​ព្រំដែន​បាន​ជួល​ទៅ​ឲ្យ​ឈ្មោះ នាក់ គារ៉ា ភេទប្រុស អាយុ ៤០ ឆ្នាំ បើក​កន្លែង​លក់​ពូក និង​លក់​បាយ។

សមត្ថកិច្ច​បាន​បន្ត​ថា អគ្គិភ័យ​នេះ​បាន​បង្ក​ការ​ខូចខាត​រួមមាន ៖ ម៉ូតូ ១ គ្រឿង ម៉ាក​ឌ្រីមសង់ ស៊េរី​ឆ្នាំ ២០១៨ , ពូក​ចំនួន ៩០០ ពូក និង កម្រាល​ពូក ៧០ កម្រាល , ម៉ាស៊ីន​ត្រជាក់​ចំនួន ២ គ្រឿង , ប្រាក់​រៀល​ចំនួន ៥០ ០០០ ០០០ លាន​រៀល (ហាសិប​លាន​រៀល) , ចង្ក្រាន​ហ្កាស ចំនួន ១០ ឈុត , អង្ក​ចំនួន ១០ បេ និង​សម្ភារៈ​ប្រើប្រាស់​មួយ​ចំនួន​ទៀត។ ដោយឡែក​ចំពោះ​មូលហេតុ​ដែល​បណ្ដាល​ឲ្យ​កើត​មាន​អគ្គិភ័យ​នេះ​មកពី​ទុស្សេ​ខ្សែភ្លើង​ធ្លាក់​មក​លើ​ពូក​ក៏​ឆាបឆេះ​តែម្ដង៕

អត្ថបទ ៖ ជុន កុសល

The post ទុស្សេខ្សែភ្លើង ឆេះផ្ទះលក់ពូក ១ កន្លែង ខូចខាតសម្ភារៈមួយចំនួនធំ នៅក្រុងសៀមរាប appeared first on Kampuchea Thmey Daily.

អ្នកស្រី ជិន សារុំ កសិករដាំដំណាំម្អម រស់នៅក្នុងភូមិវាល សង្កាត់ជ្រាវ ក្រុងសៀមរាប បានលើកឡើងថា ម្អម គឺជាប្រភេទដំណាំវិលជុំដែលងាយស្រួលដាំដុះ និងអាចប្រមូលផលបានគ្រប់រដូវកាល។ អ្នកស្រីបានបញ្ជាក់ថា របរនេះអាចផ្ដល់ប្រាក់ចំណូលបន្ថែមជូនគ្រួសារចន្លោះពី ៣០ម៉ឺន ទៅ ៥០ម៉ឺនរៀលក្នុងមួយខែ ខណៈដែលតម្លៃលើទីផ្សារក្នុងឆ្នាំនេះក៏មានសភាពសមរម្យផងដែរ។

អ្នកស្រី បានឲ្យដឹងទៀតថា មូលហេតុដែលអ្នកស្រីជ្រើសរើសដាំម្អម ព្រោះអ្នកស្រីមើលឃើញថា បច្ចុប្បន្នដំណាំនេះ កំពុងមានតម្រូវការខ្ពស់សម្រាប់យកទៅធ្វើជាគ្រឿងផ្សំក្នុងមុខម្ហូបខ្មែរ ហើយដំណាំនេះទៀតសោតងាយស្រួលថែទាំ មិនសូវរើសដី និងមិនត្រូវការបច្ចេកទេសស្មុគស្មាញដូចដំណាំដទៃ។ ការដាំនេះដែរ អ្នកស្រីក៏អាចដាំបន្ថែមលើដំណាំរួមផ្សំផ្សេងទៀតដូចជា ស្ពៃ, ត្រកួន, ខ្ទឹម និងជីគ្រប់ប្រភេទ ដើម្បីផ្គត់ផ្គង់ទីផ្សារក្នុងក្រុងសៀមរាបផងដែរ។

អ្នកស្រី ជិន សារុំ បានបញ្ចាក់ទៀតថា ក្នុងមួយថ្ងៃៗ អ្នកស្រីទទួលបានការកុម្ម៉ង់ពីអាជីវករតាមផ្សារនានា ចាប់ពី ១០០បាច់ ទៅ ៤០០បាច់ អាស្រ័យទៅតាមតម្រូវការជាក់ស្ដែង។ ទោះជាយ៉ាងណា ដោយសារតំបន់ដែលអ្នកស្រីរស់នៅប្រឈមនឹងការលិចទឹកក្នុងរដូវវស្សា ទើបខ្ញុំសម្រេចចិត្តដាំម្អមនេះតែក្នុងរដូវប្រាំងប៉ុណ្ណោះ។

កសិករគំរូរូបនេះក៏បានផ្ដាំផ្ញើ និងលើកទឹកចិត្តដល់បងប្អូនប្រជាពលរដ្ឋដែលមានដីទំនេរនៅជុំវិញផ្ទះ គួរងាកមកដាំដំណាំរួមផ្សំផ្សេងៗ ជាជាងការទូកដីឱ្យទំនេរចោល ព្រោះការធ្វើបែបនេះ មិនត្រឹមតែជួយកាត់បន្ថយការចំណាយប្រចាំថ្ងៃក្នុងគ្រួសារប៉ុណ្ណោះទេ ប៉ុន្តែថែមទាំងអាចបង្កើតជាប្រភពចំណូលបន្ថែម កាត់បន្ថយការនាំចូលបន្លែពីក្រៅ និងធានាបាននូវបន្លែសុវត្ថិភាពសម្រាប់បរិភោគទៀតផង៕

ដោយ៖ គឿនវេត

The post ដំណាំម្អមនៅតែមានទីផ្សារល្អ និងផ្ដល់ចំណូលបន្ថែមបានយ៉ាងល្អប្រសើរ ដល់កសិករក្នុងក្រុងសៀមរាប appeared first on Kampuchea Thmey Daily.

គម្រោងសាងសង់​ផ្លូវវាងក្រុងសៀមរាប (Green Siem Reap Urban Bypass Project) មាន​ប្រវែង ៤៦,៥៥ គីឡូម៉ែត្រ ត្រូវបានសិក្សាតម្រាយប្លង់ទីតាំងលម្អិតរួចរាល់ និងកំពុងស្វែងរក​ក្រុមហ៊ុន​សាងសង់ដើម្បីអាច​​ឈាន​ទៅ​បើក​ការដ្ឋាន​សាងសង់​នៅពេលដ៏ខ្លី​ខាងមុខ។

មន្រ្តី​ក្រសួងសាធារណការ និងដឹកជញ្ជូន និងអាជ្ញាធរ​រដ្ឋបាល​ខេត្តសៀមរាប កន្លងទៅនេះ​បាន​ចុះពិនិត្យតម្រាយប្លង់ទីតាំង​លម្អិតនៃគម្រោងផ្លូវវាងក្រុងសៀមរាប (Green Siem Reap Urban Bypass Project) ចំណុចចាប់ពីភូមិអន្លង់ពីរ ឃុំត្រពាំងធំ ស្រុកប្រាសាទបាគង រហូតដល់ភូមិពួកថ្មី ឃុំពួក ស្រុកពួកនៃខេត្តសៀមរាប ((PK0+000 – PK46+570) មុនឈានដល់ដំណាក់កាលបើកការដ្ឋានសាងសង់ ដោយប្រើប្រាស់​មូលនិធិសហប្រតិបត្តិការអភិវឌ្ឍន៍សេដ្ឋកិច្ច (EDCF) នៃសាធារណរដ្ឋកូរ៉េ។

ការចុះពិនិត្យគម្រោងផ្លូវវាងក្រុងនេះ គឺដើម្បីកំណត់នូវនិយាមកាច្បាស់លាស់ ពិនិត្យលើតម្រាយប្លង់ទីតាំងលម្អិតនៃផ្លូវ និងឈានដល់ការវាយតម្លៃ ធ្វើយ៉ាងណាកាត់បន្ថយផលប៉ះពាល់និងការចំណាយឱ្យមានកម្រិតទាប៕

The post ផ្លូវវាងក្រុងសៀមរាប​តម្លៃ​ជាង ៧០ លាន​ដុល្លារ​ ឈានដល់​ប្រកាស​​រកក្រុមហ៊ុន​​ដេញថ្លៃ​សាង​សង់​ appeared first on Kampuchea Thmey Daily.

ប្រជាពលរដ្ឋ​ក្នុង​មូលដ្ឋាន​ខាងលើ បាន​បង្ហាញ​ការ​សាទរ និង អរគុណ​ដល់​អាជ្ញាធរ​ខេត្ត​សៀមរាប ដែល​ជួសជុល​ផ្លូវ ១ ខ្សែ​នេះ ឡើងវិញ បង្ក​ភាព​ងាយស្រួល​ដល់​ពួកគាត់​ក្នុង​ការ​ធ្វើដំណើរ ប្រកប​អាជីវកម្ម​នានា ជាពិសេស​ជួយ​កាត់បន្ថយ​ការ​លំបាក​ប្រចាំថ្ងៃ។ បន្ថែម​នោះ អាច​ជួយ​លើក​កម្ពស់​សេដ្ឋកិច្ច​ក្នុង​តំបន់ ខណៈ​ផ្លូវ​ខាងលើ​នេះ កាលពីមុន មាន​ការ​ខូចខាត​ខ្លាំង ពិបាក​ក្នុង​ការ​ធ្វើ​ដំណើរ ជាពិសេស​ក្នុង​រដូវវស្សា​ផ្ដល់​ការ​លំបាក និង​បង្ក​ឲ្យ​មាន​គ្រោះថ្នាក់​ចរាចរណ៍​ថែម​ទៀត​ផង។

លោក ក្អោប រ៉ន ចៅសង្កាត់​ជ្រាវ បាន​ថ្លែងអំណរគុណ​ដល់​លោក ប្រាក់ សោភ័ណ និង អ្នកឧកញ៉ា សៀង ណាំ ដែល​​យកចិត្តទុកដាក់​ខ្ពស់​ពី​សុខទុក្ខ​ពលរដ្ឋ​ក្នុង​មូលដ្ឋាន និង​បាន​ជួសជុល​ផ្លូវ ១ ខ្សែ នេះ ជា​សរសៃឈាម​សេដ្ឋកិច្ច​របស់​ពលរដ្ឋ​ក្នុង​ការ​ដឹក​កសិផល​ទៅកាន់​ទីផ្សារ និង​ការ​ធ្វើដំណើរ​ឆ្លង​កាត់ ជាពិសេស​ភ្ញៀវ​ទេសចរ។

ទន្ទឹម​នោះ លោក​ក៏បាន​អំពាវនាវ​ដល់​ប្រជាពលរដ្ឋ សូម​ចូលរួម​ថែរក្សា​ផ្លូវ​នេះ​ឲ្យ​បាន​គង់វង្ស យូរអង្វែង និង​មិន​ត្រូវ​ដឹកទំនិញ​លើស​ទម្ងន់​កំណត់​ឡើយ។

ជាមួយ​នេះ លោក​ចៅសង្កាត់​ជ្រាវ ក្រុង​សៀមរាប ក៏បាន​បញ្ជាក់​ថា អាជ្ញាធរ​សង្កាត់ នឹង​ធ្វើការ​ប្រជុំ​ជាមួយ​ប្រជាពលរដ្ឋ ដើម្បី​រៀបចំ​សណ្ដាប់ធ្នាប់​នៅ​តាម​បណ្ដោយ​ដង​ផ្លូវ​នេះ ឲ្យ​មាន​សោភ័ណភាព និង​ដាក់​ភ្លើង​សូ​ឡា​បំភ្លឺ​ផ្លូវ​នៅ​ពេល​យប់​ថែម​ទៀត​ផង៕

អត្ថបទ ៖ គឿនវេត

The post ពលរដ្ឋសាទរ ក្រោយផ្លូវតុលាការខេត្តសៀមរាបស្ថាបនារួច សម្រួលការធ្វើដំណើរ appeared first on Kampuchea Thmey Daily.

សមត្ថកិច្ចបានឲ្យដឹងថា មានករណីភ្លើងឆេះផ្ទះសរុបអស់ ១១ល្វែង មាន ១-ផ្ទះល្វែងលក់មួកការពារសុវត្ថិភាព ចំនួន ០២ ល្វែង (ខូចខាតមួយចំនួនធំ)។២-ផ្ទះលក់ខោអាវជជុះក្បាលគីប ចំនួន ០១ល្វែង (ខូចខាតមួយចំនួនធំ) ។
៣-ផ្ទះលក់ ពូក ខ្នើយ ចំនួន ០៣ល្វែង (ខូចខាតមួយចំនួនធំ)។៤-ផ្ទះលក់ផ្លែឈើចំនូន ០២ល្វែង (ខូចខាតមួយចំនួនធំ)។៥-ផ្ទះលក់ ចាន ឆ្នាំង ចង្រ្កាន ចំនួន ០២ ល្វែង (ខូចខាចអស់មួយចំនួនធំ) ។៦-ផ្ទះល្វែងបិទទ្វារទុកចោលមិនមានអ្នកជួល ចំនួន ០១ ល្វែង (ខូចខាតអាគារ) ។

ប្រតិបត្តិការពន្លត់អគ្គិភ័យបានរលត់អស់ទៅវិញនៅម៉ោង១និង៤៩នាទីយប់ថ្ងៃដដែល។ ចំពោះមូលហេតុដែលបង្កឱ្យកើតមានអគ្គិភ័យនេះ ការិយាល័យជំនាញកំពុងធ្វើការស្រាវជ្រាវ។ ចំពោះទីតាំងទាំង១១នេះ គឺម្ចាស់បើកអាជីកម្មបានចាក់សោរទ្វារទាំងអស់ហើយទៅសម្រាកនៅផ្ទះផ្ទាល់ខ្លួនរៀងៗខ្លួន។

ករណីនេះមិនមានប៉ះពាល់ដល់អាយុជីវិត ឬបង្កឱ្យមានស្នាមរបួសដល់ប្រជាពលរដ្ឋណាម្នាក់នោះទេ គឺឆេះតែសម្ភារៈសម្រាប់លក់ដូរអស់មួយចំនួនធំប៉ណ្ណោះ៕

អត្ថបទ៖ ជុន កុសល

The post យប់មិញអគ្គិភ័យឆេះផ្ទះអស់១១ល្វែងនៅក្រុងសៀមរាប appeared first on Kampuchea Thmey Daily.

គេហទំព័រ TravelBag បញ្ជាក់ថា ការផ្តល់ចំណាត់ថ្នាក់លេខ២នេះ គឺតាមរយៈការបោះឆ្នោតពីភ្ញៀវទេសចរអន្តរជាតិរាប់លាននាក់ ដែលធ្លាប់មកលេងកម្សាន្ត នៅផាប់ស្រ្តីត ខេត្តសៀមរាប។ TravelBag បន្តថា ផ្សាររាត្រីនៅតំបន់ផាប់ស្រ្តីត បានផ្តល់ជូនអ្នកធ្វើដំណើរនូវការលាយបញ្ចូលគ្នារវាងការកម្សាន្តពេលរាត្រីដ៏អ៊ូអរ ជាមួយម្ហូបអាហារតាមដងផ្លូវ និងវប្បធម៌ក្នុងតំបន់ដ៏សម្បូរបែប បន្ទាប់ពីអ្នកទេសចរអន្តរជាតិចំណាយពេលពេញមួយថ្ងៃ ស្វែងយល់ពីអច្ឆរិយភាពនៅតំបន់រមណីយដ្ឋានអង្គរ។

ក្រៅពីបរិយាកាសដ៏សម្បូរបែបនេះ Pub Street ក៏ត្រូវបានគេចាត់ទុកថា មានសុវត្ថិភាព និងងាយស្រួលសម្រាប់អ្នកទេសចរគ្រប់ជាតិសាសន៍។

តាមរយៈការធ្វើចំណាត់ថ្នាក់របស់ TravelBag បានឆ្លុះបញ្ចាំងថា Pub Street មិនត្រឹមតែជាគោលដៅទេសចរណ៍មួយដែលល្បីតែនៅក្នុងខេត្តសៀមរាបប៉ុណ្ណោះទេ ប៉ុន្តែថែមទាំងត្រូវបានគេទទួលស្គាល់ថា ជាទីផ្សារអន្តរជាតិដ៏ទូលំទូលាយមួយ ដែលអូសទាញភ្ញៀវទេសចរមកកម្សាន្តរាប់លាននាក់មកកាន់ប្រទេសកម្ពុជានៅក្នុង១ឆ្នាំ៕

អត្ថបទ៖ ជុន កុសល

The post តំបន់ Pub Street ក្រុងសៀមរាប ជាប់ចំណាត់ថ្នាក់ទី២ ជាផ្សាររាត្រីដ៏ទាក់ទាញនៅទូទាំងពិភពលោក appeared first on Kampuchea Thmey Daily.

លោក​មេភូមិ​បុស្ស​ក្រឡាញ់ និង​ប្រជាពលរដ្ឋ បាន​លើក​ឡើង​ថា ការ​បុក​អំបុក​សាមគ្គី​នេះ ពិតជា​មាន​ន័យ​ខ្លាំង​ណាស់​សម្រាប់​ប្រជាជន​ខ្មែរ ព្រោះ​វា​ជា​ការ​បង្ហាញ​ពី​ស្មារតី «​ខ្មែរ​ជួយ​ខ្មែរ ខ្មែរ​រួបរួម​គ្នា ខ្មែរ​បេះដូង​តែមួយ​»។ សកម្មភាព​នេះ បាន​កើត​ឡើង​ស្រប​ពេល​ដែល សម្តេច​តេ​ជោ ហ៊ុន សែន នាយ​ឧត្ដមសេនីយ៍​ផុត​លេខ​ផ្កាយ​មាស ៥ និង​ជា​មគ្គទេសក៍​ឯក​សន្តិភាព បាន​លើក​ឡើង​នូវ​ពាក្យស្លោក​ដ៏​មាន​អត្ថន័យ​ថា «​ទទួលទាន​អំបុក​ស្រូវ​ថ្មី​វាយ​សត្រូវ​ឈ្លានពាន​»។ ការ​អំពាវនាវ​របស់ សម្តេច​តេ​ជោ បាន​ធ្វើ​ឱ្យ​ប្រជាពលរដ្ឋ​ទូទាំង​ប្រទេស​មាន​ការ​ផុសផុល​គាំទ្រ​យ៉ាង​ខ្លាំង ដោយ​នាំ​គ្នា​បុក​អំបុក និង​ទិញ​អំបុក​ស្រូវ​ថ្មី យក​ទៅ​ផ្ដល់​ជូន​វីរ​កងទ័ព​នៅ​ជួរ​មុខ​ជា​បន្តបន្ទាប់ ដើម្បី​ចូលរួម​ផ្ដល់​កម្លាំងចិត្ត​បន្ថែម​ដល់​កងទ័ព​កម្ពុជា​កំពុង​វាយបក​ទៅ​លើ​យោធា​ថៃ​ដែល​បាន​ឈ្លានពាន​បូរណភាព​ទឹកដី​របស់​ខ្មែរ។

ប្រជាពលរដ្ឋ បាន​គូស​បញ្ជាក់​ថា ក្នុងនាម​ជា​ប្រជាពលរដ្ឋ​នៅ​សមរភូមិ​ក្រោយ ពួកគាត់​បង្ហាញ​នូវ​ជំហរ​គាំទ្រ​ជានិច្ច​ចំពោះ​វីរ​កងទ័ព​កម្ពុជា​ក្នុង​ការ​ការពារ​មាតុភូមិ និង​ប្រជាជន​កម្ពុជា។

គួរ​រំលឹក​ថា សម្តេច​តេ​ជោ ហ៊ុន សែន បាន​អំពាវនាវ​ដល់​ប្រជាពលរដ្ឋ និង​សប្បុរសជន ឱ្យ​ជួយ​ទិញ​អំបុក​ស្រូវ​ថ្មី​យក​ទៅ​ចែក​ជូន​កងកម្លាំង​ដែល​ឈរជើង​នៅ​ជួរមុខ។ ទន្ទឹម​នោះ​ កាលពី​ព្រឹក​ថ្ងៃ​ទី ១០ ខែ​ធ្នូ ឆ្នាំ ២០២៥ សម្តេច​តេ​ជោ ក៏បាន​បង្ហោះ​សារ​លើ​បណ្ដាញ​សង្គម​ដែល​មាន​ខ្លឹមសារ​ដូចតទៅ “​សូម​ផ្ដាំផ្ញើ​ការ​សាកសួរ​សុខទុក្ខ​ចំពោះ​កងកម្លាំងប្រដាប់អាវុធ​គ្រប់​ប្រភេទ​ដែល​បាន​និង​កំពុង​ឈរជើង​ការពារ​ទឹកដី​ដ៏​អង់អាច​ក្លាហាន​ដើម្បី​ប្រយុទ្ធ​ប្រឆាំង​ជាមួយ​ពួក​ចោរ​ឈ្លានពាន​ទឹកដី​”។ បន្ទាប់ពី​សារ​នេះ​ត្រូវ​បាន​បង្ហោះ ប្រជាពលរដ្ឋ​គ្រប់ទិសទី បាន​រួម​គ្នា​បុក​អំបុក​សាមគ្គី ព្រមទាំង​ទិញ​អំបុក​ស្រូវ​ថ្មី ដាក់​ជាមួយ​គ្រឿង​ផ្សេងៗ​ ផ្ញើ​ជូន​វីរ​កងទ័ព​ជា​បន្តបន្ទាប់ ស្រប​តាម​ពាក្យស្លោក​ថា «ទទួល​ទាន​អំបុក​ស្រូវ​ថ្មី​វាយ​សត្រូវ​ឈ្លានពាន​»៕

អត្ថបទ ៖ គឿនវេត

The post ពលរដ្ឋក្រុងសៀមរាប រួមគ្នាបុកអំបុកសាមគ្គី ផ្ដល់ជូនជនភៀសសឹក និងវីរកងទ័ពជួរមុខ appeared first on Kampuchea Thmey Daily.

ក្នុងឱកាស​នោះ លោក លី សារី អភិបាលរង​ខេត្ត បាន​សម្តែង​នូវ​ក្តីរំភើប និង​ការ​ដឹងគុណ​យ៉ាង​ជ្រាលជ្រៅ​បំផុត​ចំពោះ​ព្រះ​មេត្តាធម៌ និង​ការលះបង់​ដ៏​ថ្លៃថ្លា​របស់​ព្រះ​តេជគុណ ព្រះគ្រូ​ចៅអធិការ​វត្ត​ទាំងអស់ ព្រមទាំង​គណៈកម្មការ​អាចារ្យវត្ត ដែល​បាន​បើកទ្វារ​វត្ត​អារាម ផ្តល់​ទីជម្រក​ដ៏​កក់ក្តៅ និង​ផ្តល់​អាហារ​ប្រចាំថ្ងៃ​ជូន​ដល់​ជនភៀសសឹក​ដែល​បាន​ភៀសខ្លួន​មកពី​តំបន់​មាន​ជម្លោះ​ដោយសារ​សង្គ្រាម។ លោក​ថា​ សកម្មភាព​ដ៏​ប្រពៃ​នេះ ពិតជា​ឆ្លុះ​បញ្ចាំង​យ៉ាង​ច្បាស់​អំពី​គំរូ​វីរភាព​មនុស្សធម៌ តាម​គន្លង​ព្រះពុទ្ធសាសនា ដែល​តែងតែ​បណ្ដុះ​នូវ​សេចក្ដីស្រឡាញ់ ការ​អាណិតអាសូរ និង​ការ​ជួយ​សង្គ្រោះ​ដល់​អ្នក​ដែល​កំពុង​ជួប​ទុក្ខលំបាក។

លោក លី សារី មានប្រសាសន៍ថា វត្ត​អារាម​ មិន​ត្រឹមតែ​ជា​ទី​សក្ការបូជា​ប៉ុណ្ណោះ​ទេ តែ​បាន​ក្លាយជា “​ផ្ទះ​ទី​ពីរ​”​ ឬ ទីជម្រក​សុវត្ថិភាព​” សម្រាប់​ពលរដ្ឋ​ដែល​កំពុង​រង​ទុក្ខ​វេទនា​ទាំង​ផ្លូវកាយ និង​ផ្លូវចិត្ត។ ការ​សម្រេច​ព្រះទ័យ​របស់​ព្រះ​តេជគុណ​គ្រប់​ព្រះអង្គ ក្នុងការ​លះបង់ និង​ផ្តល់ជំនួយ​ទាន់ពេលវេលា​នេះ បាន​ជួយ​ឱ្យ​​ជនភៀសសឹក​ជាច្រើន​មាន​កម្លាំងចិត្ត និង​ក្ដី​សង្ឃឹម​ឡើងវិញ។ លោក​ក៏បាន​ណែនាំ​ដល់​អាជ្ញាធរ​ទាំងអស់ បន្ត​សហការ​យ៉ាង​ជិតស្និទ្ធ​ជាមួយ​ព្រះសង្ឃ និង​គ្រប់ភាគី​ពាក់ព័ន្ធ ធានា​ឱ្យ​បាន​នូវ​សណ្ដាប់ធ្នាប់ សុខ​សុវត្ថិភាព និង​ការ​ផ្គត់ផ្គង់​ចាំបាច់​នានា ដល់​ជនភៀសសឹក​ឱ្យបាន​សមរម្យ និង​ថ្លៃថ្នូរ​។ លោក​បន្ថែម​ថា «យើង​ទាំងអស់​គ្នា នឹង​ខិតខំ​ប្រឹងប្រែង​រហូតដល់​ស្ថានការណ៍​មាន​លក្ខណៈ​ល្អ​ប្រសើរ​ឡើងវិញ»។

សម្ដេចព្រះ​ព្រហ្ម​រតន​មុនី ពិន សែម សិរី​សុ​វ​ណ្ណោ បាន​មាន​ថេរ​ដីកា​ថា ស្ថិតនៅក្នុង​កាលៈទេសៈ​ដែល​ប្រទេសជាតិ​កំពុង​ទទួលរង​នូវ​ការ​រំលោភបំពាន និង​ការគំរាមកំហែង​យ៉ាងធ្ងន់ធ្ងរ លើ​បូរណភាព​ទឹកដី​ពី​សំណាក់​យោធា​ថៃ សូមឱ្យ​ប្រជាពលរដ្ឋ​ខ្មែរ​ទាំងអស់ ត្រូវ​រួបរួមសាមគ្គី​ជួយ​គ្នា​ក្នុង​គ្រា​លំបាក មានទុក្ខ​រួមទុក្ខ មាន​សុខ​រួមសុខ គ្មាន​អ្វីដែល​ល្អប្រសើរ​ជាង​ពេល​បានឃើញ​ប្រទេសជាតិ​មាន​សន្តិភាព​នោះ​ទេ។

សម្ដេចព្រះ​ព្រហ្ម​រតន​មុនី ពិន សែម បាន​មាន​ថេរ​ដីកា​លើកឡើងថា សង្គ្រាម​មិនដែល​ផ្តល់​សុភមង្គល ភាព​រីកចម្រើន ការជួបជុំ​គ្រួសារ​ដូច​សម័យ​មាន​សន្តិភាព​នេះ​ទេ គឺ​សង្គ្រាម​មានតែ​ធ្វើឱ្យ​ពួកគាត់​ឈឺចាប់​ខ្លោចផ្សា​មិនអាច​គណនា​បាន ដូច្នេះហើយ​បើ​សង្គមជាតិ​មាន​សុខសន្តិភាព ទើប​សាសនា​រស់នៅ​សុខ​ស្ងប់​បាន​ផងដែរ។ ស្រប​នឹង​ស្ថានការណ៍​នេះ វត្ត​អារាម គឺជា​របស់​យើង​ទាំងអស់​គ្នា ហើយ​នៅទីនេះ​គឺជា​ទីស្នាក់អាស្រ័យ ​នៃ​សេចក្ដី​ស្ងប់ ជាទី​ដែល​យើង​បានរស់នៅ​ដោយ​ផ្អែកលើ​ធម៌​មេត្តា និង ធម៌​ករុណា​របស់​ព្រះសង្ឃ​។ ព្រះអង្គ សូម​សម្តែង​នូវ​ការ​អាណិតអាសូរ​យ៉ាង​ជ្រាលជ្រៅ​បំផុត​ចំពោះ​ការបាត់បង់ និង​ការឈឺចាប់​ទាំងឡាយ​ដែល​ពលរដ្ឋ​បាន​ជួបប្រទះ។

សូម​បញ្ជាក់​ថា គិត​ត្រឹម​ល្ងាច​ថ្ងៃទី ​១០ ខែធ្នូ ឆ្នាំ​ ២០២៥ ជនភៀសសឹក​ដែល​បានមក​ស្នាក់នៅ​ក្នុង​វត្ត​ប្រាសាទ​គោកចក មាន​ចំនួន ១៥៣​ គ្រួសារ ស្មើ​ចំនួន ៤៩៩ នាក់ ​, វត្ត​ច​ន្លោ​ង មាន​ចំនួន ៧០ ​គ្រួសារ ស្មើនឹង ៣០០ ​នាក់​ , វត្ត​អារញ្ញ​សាគរ មាន​ចំនួន ១៤៧​ គ្រួសារ ស្មើនឹង ៥៤០ ​នាក់ និង​ជនភៀសសឹក​ដែល​បានមក​ស្នាក់​តាម​ផ្ទះ​ពលរដ្ឋ​នៅក្នុង​សង្កាត់​សាលា​កំរើក មាន​ចំនួន ១៤២ គ្រួសារ ស្មើនឹង ៤៦២ នាក់៕

អត្ថបទ ៖ គឿនវេត

The post ជនភៀសសឹកស្នាក់នៅតាមបណ្ដាវត្ត ក្នុងក្រុងសៀមរាប ទទួលបានអំណោយពី សម្ដេចព្រះព្រហ្មរតនមុនី ពិន សែម និងអាជ្ញាធរខេត្តសៀមរាប appeared first on Kampuchea Thmey Daily.