ក្រុមបាល់ទាត់ ឡាយហ្វ Archives - Kampuchea Thmey Daily

ក្លិប៣កំពុង កសាងមូលដ្ឋានគ្រឹះអ្នកគាំទ្រផ្ទាល់ខ្លួនយ៉ាងល្អនៅតាមខេត្ត

chean virakbot — Thu, 30 Jan 2025 02:15:16 +0000

ក្លិប៣នៅក្នុងលីគកំពូលកម្ពុជាដែលស្ថិតនៅខេត្តកំពុងទទួលបានការចាប់អារម្មណ៍ខ្លាំងពីអ្នកគាំទ្រ និងថ្នាក់ដឹកនាំរបស់ខ្លួនក្នុងរយៈពេលប្រមាណ២ឆ្នាំចុងក្រោយ។ ទាំងនេះបង្ហាញឲ្យឃើញពីភាពវិជ្ជមាននៃអ្នកគាំទ្រដែលមិនត្រឹមតែប្រមូលផ្តុំគ្នានៅក្នុងរាជធានីប៉ុណ្ណោះទេ ប៉ុន្តែឈានទៅដល់ការសាងមូលដ្ឋានគ្រឹះយ៉ាងសំខាន់សម្រាប់អ្នកគាំទ្រនៅតាមបណ្តាខេត្តនានា។

សកម្មភាពអ្នកគាំទ្រតាមបណ្តាខេត្តទាំងនេះ ស្របទៅនឹងគោលដៅរបស់សហព័ន្ធកីឡាបាល់ទាត់កម្ពុជាដែលបានដាក់ចក្ខុវិស័យរបស់ខ្លួនថា ខេត្តមួយមានក្លិបអាជីពមួយ និងកីឡដ្ឋានស្តង់ដាមួយ ដើម្បីប្រមូលផ្តុំធនធានកីឡាករ ថ្នាក់ដឹកនាំ និងអ្នកគាំទ្រប្រចាំខេត្តរៀងៗខ្លួន។

ក្លិបបាល់ទាត់ឡាយហ្វ ខេត្តព្រះសីហនុ

ក្លិបបាល់ទាត់ឡាយហ្វ ខេត្តព្រះសីហនុ ទើបតែបង្ហាញខ្លួនជាក្រុមអាជីព និងមានកីឡដ្ឋានត្រឹមត្រូវក្នុងរយៈពេល២ឆ្នាំចុងក្រោយប៉ុណ្ណោះ ប៉ុន្តែក្លិបមួយនេះបានឈ្នះជើងឯកលីគទី២កាលពីរដូវកាល២០២៣-២៤ដើម្បីទទួលបានកៅអីចូលរួមប្រកួតលីគកំពូល។

នៅពេលមានឈ្មោះចូលរួមប្រកួតលីគកំពូល ក្លិបឡាយហ្វ ខេត្តព្រះសីហនុ កាន់តែជំរុញក្នុងការពង្រឹងក្រុម និងរៀបចំហេដ្ឋានរចនាសម្ព័ន្ធនៃកីឡដ្ឋានឲ្យកាន់តែប្រសើរឡើង។ ធ្វើសកម្មភាពទាក់ទាញអ្នកគាំទ្រក្នុងខេត្តឲ្យចូលរួមលើកទឹកចិត្តកាន់តែច្រើន។ ទីបំផុត ស្ថានភាពអ្នកគាំទ្រប្រចាំខេត្តមួយនេះកំពុងកើនឡើងជាលំដាប់។ ទាំងនេះហើយជាអ្វីដែលក្លិបបាល់ទាត់តាមបណ្តាខេត្តចង់ឃើញ។ នៅពេលក្រុមកាន់តែល្អ កីឡាករកាន់តែល្បី កីឡដ្ឋានកាន់តែស្អាត នោះអ្នកគាំទ្រកាន់តែច្រើន។

ក្លិបបាល់ទាត់អង្គរថាយហ្គឺរ

ប្រមាណពីរបីឆ្នាំចុងក្រោយ ក្រុមបាល់ទាត់ដែលមានមូលដ្ឋាននៅខេត្តសៀមរាបមួយនេះបានធ្វើសកម្មភាពប្រមូលអ្នកគាំទ្រក្នុងខេត្តយ៉ាងសកម្ម បើទោះជាកាលពីមុនមិនទាន់មានកីឡដ្ឋានផ្ទាល់ខ្លួនក៏ដោយ។ នៅរដូវកាល២០២៤-២៥ អង្គរថាយហ្គឺរ មានកីឡដ្ឋានផ្ទាល់ខ្លួនរឹតតែងាយស្រួលក្នុងការទាក់ទាញអ្នកគាំទ្ររបស់ខ្លួន។

រាល់ការប្រកួតនៅកីឡដ្ឋានរបស់អង្គរថាយហ្គឺរក្នុងរដូវកាលនេះតែងតែមានអ្នកគាំទ្រចូលរួមទស្សនាផ្ទាល់យ៉ាងច្រើនកុះករ។ ទាំងនេះជាកម្លាំងចិត្តដ៏សំខាន់បំផុតសម្រាប់ម្ចាស់ក្លិបដែលជាជនជាតិជប៉ុន។ នៅពេលអ្នកគាំទ្រទិញសំបុត្រចូលទស្សនាផ្ទាល់ ក្លិបក៏អាចរកចំណូលពីអ្នកគាំទ្រ ហើយជាពិសេស ក្លិបក៏ងាយស្រួលក្នុងការស្វែងរកដៃគូឧបត្ថម្ភតាមរយៈអ្នកគាំទ្រច្រើន។ អ្វីដែលសំខាន់បំផុត កីឡាករមានកម្លាំងចិត្តក្នុងការលេងនៅលើទីលានចំពោះមុខអ្នកគាំទ្រ។

ក្លិបបាល់ទាត់ខេត្តស្វាយរៀង

ពីររដូវកាលចុងក្រោយ កីឡដ្ឋានបាល់ទាត់ខេត្តស្វាយរៀងអាចត្រូវបានជាទីកន្លែងមានអ្នកគាំទ្រចូលទស្សនាផ្ទាល់ច្រើនជាងគេបំផុតរាល់ការប្រកួត។ រាល់ការប្រកួតនៅកីឡដ្ឋានខេត្តស្វាយរៀងហោចណាស់ក៏មានអ្នកគាំទ្រចូលទស្សនាផ្ទាល់ជាង២០០០នាក់ដែរ។

ដោយមើលឃើញពីកំណើនអ្នកគាំទ្រកើនឡើងជាលំដាប់ ម្ចាស់ក្លិបព្រះខ័នរាជស្វាយរៀង បានកែលំអ និងបង្កើនទីកន្លែងសម្រាប់អ្នកគាំទ្ររដូវដល់ជាង៤០០០នាក់កាលពីដើម្បីរដូវកាលនេះ។ ស្របពេលក្រុមព្រះខ័នរាជស្វាយរៀងកំពុងល្អ កីឡដ្ឋានកាន់តែស្អាត និងអ្នកគាំទ្រកាន់តែច្រើន គឺជាមូលដ្ឋានគ្រឹះដ៏សំខាន់ក្នុងការបោះជំហានទៅរកភាពរីកចម្រើនកាន់តែខ្លាំង។

ជាមួយគ្នានេះ ក្លិបបាល់ទាត់ណាហ្គាវើលដ៍ ស្ថិតនៅខេត្តកំពង់ស្ពឺ និងក្លិបគិរីវង់សុខសែនជ័យ ស្ថិតនៅខេត្តតាកែវ ក៏មានអ្នកគាំទ្រផ្ទាល់ខ្លួនច្រើនដែរ ប៉ុន្តែមិនសូវផុលផុសខ្លាំងទេ បើប្រៀបធៀបនឹងកីឡដ្ឋាននៅខេត្តទាំង៣ខាងលើ។ នៅរាជធានីភ្នំពេញវិញ កីឡដ្ឋានរបស់ក្លិប អាយអេសអាយ ដង្កោសែនជ័យ កំពុងស្រួបទាញអ្នកគាំទ្រច្រើន។ កីឡដ្ឋានរបស់ភ្នំពេញក្រោន និងវិសាខា មានអ្នកគាំទ្រច្រើនស្រាប់ហើយ ខណៈ បឹងកេត ជាក្លិបដែលមានអ្នកគាំទ្រស្រឡាញ់ពេញចិត្តច្រើនណាស់ ប៉ុន្តែនៅពេលនេះមិនទាន់មានកីឡដ្ឋានផ្ទាល់ខ្លួនជាអចិន្ត្រៃយ៍ឡើយ៕

អត្ថបទ៖ វីរបុត្រ

The post ក្លិប៣កំពុង កសាងមូលដ្ឋានគ្រឹះអ្នកគាំទ្រផ្ទាល់ខ្លួនយ៉ាងល្អនៅតាមខេត្ត appeared first on Kampuchea Thmey Daily.

ក្រុមសាកលវិទ្យាល័យ ឡាយហ្វ រំពឹងឡើងវគ្គផ្តាច់ព្រ័ត្រកីឡាឧត្តមសិក្សាថ្នាក់ជាតិ

chean virakbot — Tue, 21 May 2024 04:22:41 +0000

ប្រធានក្រុមបាល់ទាត់សាកលវិទ្យាល័យ ឡាយហ្វ កីឡាករ វី ចាន់ដារ៉ា រំពឹងឈានដល់វគ្គផ្តាច់ព្រ័ត្ររហូតដល់៩០%សម្រាប់ការប្រកួតកីឡាឧត្តមសិក្សា និងមធ្យមសិក្សាបច្ចេកទេស ថ្នាក់ជាតិឆ្នាំ២០២៤។

កីឡាករ វី ចាន់ដារ៉ា បានលើកឡើងថា ការចូលរួមប្រកួតកីឡាឧត្តមសិក្សា និងមធ្យមសិក្សាបច្ចេកទេស ថ្នាក់ជាតិឆ្នាំ២០២៤ពិតជាមានសារៈសំខាន់សម្រាប់ពួកគាត់ ពីព្រោះកីឡាករដែលបានចូលរួមប្រកួតជានិស្សិតជំនាញ«គ្រប់គ្រងកីឡា ឬ Sport Management»។ ក្រៅពីការសិក្សាថ្នាក់ពីជំនាញគ្រប់គ្រងកីឡា កីឡាករបានហ្វឹកហាត់បាល់ទាត់ និងចេញអនុវត្តជាក់ស្តែងដូចជាការចូលរួមប្រកួត កីឡាឧត្តមសិក្សា និងមធ្យមសិក្សាបច្ចេកទេស ថ្នាក់ជាតិ ជាដើមគឺរឹតតែធ្វើឲ្យនិស្សិតកីឡាកាន់តែល្អប្រសើរ។

បូករួមជាមួយកីឡាករដែលជានិស្សិតជំនាញគ្រប់គ្រងកីឡា និងកីឡាករខ្លះជាសមាជិកក្រុមបាល់ទាត់ ឡាយហ្វ ដែលបានឈ្នះជើងឯកលីគកម្ពុជាទី២បានធ្វើឲ្យក្រុមបាល់ទាត់សាកលវិទ្យាល័យ ឡាយហ្វ រំពឹងទទួលបានល្អប្រសើរ ជាពិសេសអាចនឹងឈានដល់វគ្គផ្តាច់ព្រ័ត្រថែមទៀត។

កីឡាករ វី ចាន់ដារ៉ា ក្នុងនាមជាប្រធានក្រុមបាននិយាយថា ៖«យើងមកនេះគឺដាក់ក្តីសង្ឃឹមនាំលទ្ធផលល្អជូនអ្នកគាំទ្រនៅខេត្តព្រះសីហនុ។ យើងខ្ញុំប្តេជ្ញាធ្វើឲ្យបានល្អ ហើយសង្ឃឹម៩០%ដែលអាចឈានដល់វគ្គផ្តាច់ព្រ័ត្រ»។

ការរំពឹងខ្ពស់បែបនេះ បន្ទាប់ពី៣ប្រកួតនៅវគ្គសន្សំពិន្ទុក្នុងពូល ក្រុមបាល់ទាត់សាកលវិទ្យាល័យ ឡាយហ្វ ធ្វើបានល្អខ្លាំងមែនទែនដោយទទួលបានជ័យជម្នះទាំង៣ប្រកួត និងកំពុងឈរលើកំពូលតារាងពូល A។

ការប្រកួតទី១ ពួកគេបានយកឈ្នះក្រុមបាល់ទាត់សាកលវិទ្យាល័យជាតិមានជ័យ ដោយលទ្ធផល ៥-១ កាលពីថ្ងៃទី១៩ ខែឧសភា និងការប្រកួតទី២ បានយកឈ្នះក្រុមបាល់ទាល់សាកលវិទ្យាល័យ ជាតិបាត់ដំបង ដោយលទ្ធផលលទ្ធផល ៧-១ កាលពីថ្ងៃទី២០ ខែឧសភា និងការប្រកួតទី៣បានយកឈ្នះក្រុមបាល់ទាត់សាកលវិទ្យាល័យគ្រប់គ្រង និងសេដ្ឋកិច្ចដោយលទ្ធផល ៦-០ នៅព្រឹកថ្ងៃទី២១ ខែឧសភា ឆ្នាំ២០២៤។

ឥឡូវនេះ ក្រុមបាល់ទាត់សាកលវិទ្យាល័យ ឡាយហ្វ បានឡើងទៅកាន់វគ្គ៨ក្រុមចុងក្រោយក្នុងនាមជាក្រុមកំពូលតារាងពូល A ត្រូវប៉ះក្រុមនៅពូល B ដើម្បីរកឱកាសទៅវគ្គពាក់កណ្តាលផ្តាច់ព្រ័ត្រ៕

អត្ថបទ៖ វីរបុត្រ

The post ក្រុមសាកលវិទ្យាល័យ ឡាយហ្វ រំពឹងឡើងវគ្គផ្តាច់ព្រ័ត្រកីឡាឧត្តមសិក្សាថ្នាក់ជាតិ appeared first on Kampuchea Thmey Daily.

ក្រុមបាល់ទាត់ ឡាយហ្វ Archives - Kampuchea Thmey Daily

ក្លិប៣​កំពុង កសាង​មូលដ្ឋានគ្រឹះ​​អ្នក​គាំទ្រផ្ទាល់​ខ្លួន​យ៉ាង​ល្អ​​នៅតាម​ខេត្ត

ក្រុមសាកលវិទ្យាល័យ ឡាយហ្វ រំពឹងឡើងវគ្គផ្តាច់ព្រ័ត្រកីឡាឧត្តមសិក្សាថ្នាក់ជាតិ

ក្លិប៣កំពុង កសាងមូលដ្ឋានគ្រឹះអ្នកគាំទ្រផ្ទាល់ខ្លួនយ៉ាងល្អនៅតាមខេត្ត