ថ្លែង​នៅ​ក្នុង​សិក្ខា​សាលា​វិបស្សនា​របស់​អគ្គនាយកដ្ឋាន​គោលនយោបាយ និង​យុទ្ធសាស្ត្រ លោក ជួប ប៉ារីស៍ បាន​គូស​បញ្ជាក់​ថា ក្រុម​ប្រឹក្សា​ជាតិ​អភិវឌ្ឍន៍​ដោយ​ចីរភាព (ក.ជ.អ.ច.) ​ត្រូវ​បាន​បង្កើត​ឡើង ដើម្បី​លើក​កម្ពស់​ការ​អភិវឌ្ឍ​ដោយ​ចីរភាព សំដៅ​រក្សា​បាន​នូវ​តុល្យភាព​រវាង​សេដ្ឋកិច្ច បរិស្ថាន សង្គម និង​វប្បធម៌​នៅ​កម្ពុជា។ ក្នុង​នោះ ក.ជ.អ.ច. ក៏​មាន​ក្រុម​ការងារ​បច្ចេកទេស​ចំនួន ៧ គឺ​ការ​ប្រែប្រួល​អាកាសធាតុ វិទ្យាសាស្ត្រ បច្ចេកវិទ្យា និង​នវានុវត្តន៍ ជីវៈ​ចម្រុះ ទីក្រុង​និរន្តរភាព ថាមពល​និរន្តរភាព ផលិតកម្ម និង​ការ​ប្រើប្រាស់​ដោយ​ចិរភាព និង​ថាមពល​នុយក្លេអ៊ែរ ដែល​ក្រុម​ការងារ​នីមួយ​ៗ​មាន​សមាសភាព​មក​ពី​អន្តរ​ក្រសួង​​កម្រិត​បច្ចេកទេស មាន​តួនាទី​ផ្ដល់​យោបល់​ផ្នែក​បច្ចេកទេស​ជូន​ដល់ ក.ជ.អ.ច. ក្នុង​ការ​កសាង​គោលនយោបាយ និង​ផែនការ​យុទ្ធសាស្ត្រ​ជាតិ​។

លោករដ្ឋលេខាធិការ​​ បាន​បន្ត​ថា អគ្គនាយកដ្ឋាន​គោល​នយោបាយ និង​យុទ្ធសាស្ត្រ ក៏​បាន​ត្រៀម​ខ្លួន​រួច​ជា​ស្រេច​នៅ​ក្នុង​ការ​សម្រប​ទៅ​នឹង​ការ​ផ្លាស់​ប្ដូរ​បរិបទ​ នៃ​ការ​អភិវឌ្ឍ​ទាំង​ក្នុង​ក្របខណ្ឌ​ជាតិ និង​អន្តរជាតិ ដើម្បី​រួម​ចំណែក​ជំរុញ​សមាហរណកម្ម​វិធានការ​គោលនយោបាយ​ជាតិ​ជា​​យុទ្ធសាស្ត្រ ប្រកប​ដោយ​មហិច្ឆតា​​របស់​រាជរដ្ឋាភិបាល។

លើស​ពី​នេះ​ទៀត​ នៅ​ក្នុង​វិស័យ​បរិស្ថាន និង​ការ​អភិវឌ្ឍ​ដោយ​ចីរភាព តាមរយៈ​ការ​បង្កើន​ប្រសិទ្ធភាព និង​យន្តការ​អនុវត្ត​ឲ្យ​បាន​កាន់​តែ​ប្រសើរ សំដៅ​ធានា​បាន​​នូវ​គុណភាព​បរិស្ថាន តុល្យភាព ​នៃ​ប្រព័ន្ធ​អេកូឡូស៊ី សុខុមាលភាព​សង្គម និង​ការ​រស់​នៅ​ប្រកប​ដោយ​ចីរភាព​សម្រាប់​ជា​ឧត្ដម​ប្រយោជន៍​ដ៏​យូរ​អង្វែង​របស់​ប្រជាជន​កម្ពុជា​គ្រប់រូប និង​គ្រប់​ជំនាន់៕

The post ក្រុមប្រឹក្សាជាតិអភិវឌ្ឍន៍ចីរភាព បង្កើតឡើងដើម្បីរក្សាតុល្យភាព សេដ្ឋកិច្ច បរិស្ថាន សង្គម និងវប្បធម៌ appeared first on Kampuchea Thmey Daily.