លោក យន់ សុផា ប្រធាននាយកបច្ចេកទេស នៃក្រុមហ៊ុនផលិតជីធម្មជាតិ ហ៊ុយយន់  អេហ្គ្រីខលឈ័រ បានប្រាប់ កម្ពុជាថ្មី ថា ក្រុមហ៊ុនផលិតជីខ្នាតតូចរបស់លោក បានចាប់ផ្ដើមឡើងតាំងពីឆ្នាំ ២០១៣ មកម្ល៉េះ។ លោក បន្តថា ​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​បច្ចុប្បន្ន ក្រុមហ៊ុន មានសមត្ថភាពផលិតជីសម្រាប់ផ្គត់ផ្គង់ទីផ្សារក្នុងមួយថ្ងៃប្រមាណជាង ៣០០ ទៅ៤០០តោន ដើម្បីចែកចាយទៅតាមបណ្ដាខេត្តនានាក្នុងប្រទេសកម្ពុជា។

លោក បន្ថែមទៀតថា ទាក់ទងនឹងជី ដែលផលិតក្នុងរោងចក្ររបស់លោក នាពេលបច្ចុប្បន្ននេះ មានប្រមាណជាង ៥​ប្រភេទ ក្នុងនោះមានដូចជា៖ ប្រភេទម្សៅកំបោរ ថ្នាំប៉ូវ ជីគ្រាប់ ជីម្សៅ និងប្រភេទដី សម្រាប់ការធ្វើកសិកម្មដាំបន្លែផ្ទះសំណាញ់ជាដើម។

លោក យន់ សុផា បានបញ្ជាក់ទៀតថា សម្រាប់វត្ថុធាតុដើមក្នុងដំណើរការផលិតជីនេះ ក្រុមហ៊ុនរបស់លោកបានប្រមូល​កាកសំណល់នៅតាមផ្សារ និងទីប្រជុំជននានា ក្នុងរាជធានីភ្នំពេញ និងមួយចំណែកទៀត បានប្រមូលចេញកសិដ្ឋានចិញ្ចឹមគោ ដើម្បីយកមកកែច្នៃចេញជាជីធម្មជាតិ សម្រាប់ចែកចាយទៅកាន់ប្រជាកសិករវិញ។

លោក យន់ សុផា បានប្រាប់ឱ្យដឹងទៀតថា សម្រាប់ទីផ្សារនាពេលបច្ចុប្បន្ននេះ ក្រុមហ៊ុនអាចផលិតជី និងផ្គត់ផ្គង់ក្នុងទីផ្សារបានប្រមាណជាង ៣០០តោនក្នុងមួយថ្ងៃ និងបានចុះកិច្ចសហការជាមួយម្ចាស់កសិដ្ឋានផ្សេងៗ ដែលត្រូវការជី សម្រាប់ដំណាំកសិកម្ម បែបផ្ទះសំណាញ់។

សម្រាប់ពេលបច្ចុប្បន្ន ក្រុមហ៊ុន ផលិតជីធម្មជាតិ ហ៊ុយយន់ អេហ្គ្រីខលឈ័រ បានចូលរួមចំណែកជួយឱ្យមនុស្សមានការងារធ្វើជាង ៣០០នាក់ និងបានចូលរួមចំណែកសម្អាតបរិស្ថានសង្គម និងកាត់បន្ថយការនាំជីពីក្រៅប្រទេសចូលមកប្រទេសកម្ពុជាបានមួយចំណែក ផងដែរ៕

អត្ថបទ ៖ សួស សិត

The post ក្រុមហ៊ុនក្នុងស្រុកមួយបោះទុនជាង ៤លានដុល្លារ ផលិតជីធម្មជាតិ​ appeared first on Kampuchea Thmey Daily.