ក្រុមហ៊ុនអាមេរិក Archives - Kampuchea Thmey Daily

តើមានក្រុមហ៊ុនអាមេរិកប៉ុន្មាននៅចិន និងក្រុមហ៊ុនចិនប៉ុន្មាននៅអាមេរិក?

Huon Dina — Wed, 09 Apr 2025 08:45:26 +0000

ពន្ធគយបដិការរបស់ប្រធានាធិបតីសហរដ្ឋអាមេរិក លោក ដូណាល់ ត្រាំ បានចូលជាធរមាននៅថ្ងៃពុធនេះ ដោយលោកបានដាក់ពន្ធបន្ថែម ៥០ ភាគរយ លើគ្រប់មុខទំនិញនាំចូលពីចិន ដែលធ្វើឱ្យអត្រាពន្ធសរុបឡើងដល់ ១០៤ ភាគរយ។ ការណ៍នេះ កើតឡើងក្រោយចិនប្ដេជ្ញា «ប្រយុទ្ធដល់ទីបញ្ចប់» ដោយមិនទម្លាក់ចោលនូវពន្ធសងសឹក ៣៤ ភាគរយ លើទំនិញរបស់អាមេរិក។

នេះបង្ហាញពីភាពកាន់តែតានតឹងនៃសង្រ្គាមពាណិជ្ជកម្មរវាងមហាយក្សអាមេរិក និងចិន ដែលជាមហាអំណាចសេដ្ឋកិច្ចកំពូលៗរបស់ពិភពលោក។ ចិន ក៏ដូចជាប្រទេសដែលរងគ្រោះដោយពន្ធគយបដិការ និងពន្ធផ្សេងៗទៀតរបស់លោក ត្រាំ បានព្រមាននាពេលកន្លងមកថា គោលនយោបាយការពារនិយមរបស់សហរដ្ឋអាមេរិក នឹងធ្វើឱ្យប៉ះពាល់ដល់ភាគីពាក់ព័ន្ធទាំងអស់ ហើយធ្ងន់កទាំងសហរដ្ឋអាមេរិកខ្លួនឯងផ្ទាល់។

មែនទែនទៅ ចិនគឺជាប្រភពនាំចូលធំទី២របស់អាមេរិកកាលពីឆ្នាំមុន ដោយមានទំនិញសរុបចំនួន ៤៣៩ ប៊ីលានដុល្លារ ទៅកាន់សហរដ្ឋអាមេរិក ខណៈសហរដ្ឋអាមេរិក បាននាំចេញទំនិញមានតម្លៃ ១៤៤ ប៊ីលានដុល្លារទៅកាន់ប្រទេសចិន។ អ្នកវិភាគមើលឃើញថា ការដាក់ពន្ធគយគ្នាទៅវិញទៅមក គំរាមកំហែងដល់ឧស្សាហកម្មក្នុងស្រុករៀងៗខ្លួន ហើយនឹងឈានដល់ការបញ្ឈប់ ឬកាត់បន្ថយការងារ។

ការណ៍គួរឱ្យកត់សម្គាល់នោះ គឺផលប៉ះពាល់ជាអវិជ្ជមានដល់ក្រុមហ៊ុនអាជីវកម្មនៃភាគីទាំងសងខាង ខណៈបណ្ដាក្រុមហ៊ុនសហរដ្ឋអាមេរិកភាគច្រើន ចង់ឱ្យអាមេរិកបន្ត ឬបង្កើនទំនាក់ទំនងជាមួយចិន។ នេះបើតាមលទ្ធផលស្ទង់មតិរបស់មូលនិធិសភាពាណិជ្ជកម្មសហរដ្ឋអាមេរិក ដែលចេញផ្សាយនាពេលថ្មីៗនេះ។

តើមានក្រុមហ៊ុនសហរដ្ឋអាមេរិកប៉ុន្មាន កំពុងប្រតិបត្តិការនៅក្នុងប្រទេសចិន? ហើយមានក្រុមហ៊ុនចិនប៉ុន្មាននៅអាមេរិកវិញ?

គិតត្រឹមឆ្នាំ ២០២៤ មានក្រុមហ៊ុនអាមេរិកជាង ៧៣ ០០០ បានបង្កើតអាជីវកម្មនៅក្នុងប្រទេសចិនជាមួយនឹងការវិនិយោគសរុបលើសពី ១,២ ទ្រីលានដុល្លារ ដែលគ្របដណ្តប់លើវិស័យដូចជាអេឡិចត្រូនិក និងទំនាក់ទំនង ការផលិតរថយន្ត ទំនិញប្រើប្រាស់ និងសេវាកម្មហិរញ្ញវត្ថុ។ នេះបើតាមការចុះផ្សាយរបស់កាសែតបក្សកុម្មុយនិស្តចិន People’s Daily កាលពីដើមឆ្នាំ ២០២៥។

កាសែតដដែលបន្តថា អាជីវកម្មរបស់ក្រុមហ៊ុនអាមេរិកនៅចិន ផ្ដល់ប្រាក់ចំណេញដោយផ្ទាល់ និងផលប្រយោជន៍ដល់ប្រជាជននៃប្រទេសទាំង ២។ ខណៈចិនជំរុញទំនើបកម្មរបស់ចិន ហើយសហរដ្ឋអាមេរិកធ្វើឱ្យសេដ្ឋកិច្ចរបស់ខ្លួនមានភាពរស់រវើក ប្រទេសទាំង២ត្រូវការកិច្ចសហប្រតិបត្តិការទ្វេភាគី។

យោងតាមទស្សនាវដ្តី China Briefing ឯណោះវិញ គិតត្រឹមឆ្នាំ ២០២២ ក្រុមហ៊ុនចិនប្រមាណ ៥ ០០០ កំពុងប្រតិបត្តិការនៅក្នុងសហរដ្ឋអាមេរិក ដែលគ្របដណ្ដប់លើឧស្សាហកម្មផ្សេងៗ រួមទាំងបច្ចេកវិទ្យា ការផលិត ហិរញ្ញវត្ថុ និងអចលនទ្រព្យ។ យ៉ាងណាមិញ និន្នាការថ្មីៗបង្ហាញពីការធ្លាក់ចុះទាំងចំនួន និងកម្រិតសេដ្ឋកិច្ចរបស់ក្រុមហ៊ុនទាំងនេះ។

ក្រសួងពាណិជ្ជកម្មរបស់ប្រទេសចិនបានបង្ហាញថា ការវិនិយោគក្រៅប្រទេសទៅកាន់សហរដ្ឋអាមេរិករបស់ចិន បានធ្លាក់ចុះ ៥,២ ភាគរយ ក្នុងឆ្នាំ ២០២៣ ទោះបីជាការវិនិយោគទៅកាន់ប្រទេសផ្សេងទៀតទាំងអស់ បានកើនឡើង ៨,៧ ភាគរយ ក៏ដោយ។ នេះបើតាមការចុះផ្សាយរបស់សារព័ត៌មាន Bloomberg កាលពីសប្ដាហ៍មុន ដែលស្រង់ព័ត៌មានថា ក្រុមហ៊ុនចិនបានវិនិយោគ ៦,៩ ប៊ីលានដុល្លារនៅសហរដ្ឋអាមេរិក គិតតែក្នុងឆ្នាំ ២០២៣។ Bloomberg បានរាយការណ៍បន្តថា ចិនបានចាត់វិធានការដើម្បីរឹតបន្តឹងក្រុមហ៊ុនក្នុងស្រុក ពីការបណ្តាក់ទុននៅសហរដ្ឋអាមេរិក ដើម្បីជាវិធានការចរចាពាណិជ្ជកម្មមួយ ជាមួយលោក ត្រាំ។

តើវិធានការពន្ធគយចុងក្រោយ នឹងប៉ះពាល់ដល់ក្រុមហ៊ុនទាំងសងខាង បែបណា?

ជាទូទៅវិធានការពន្ធគយប៉ះពាល់ដល់ក្រុមហ៊ុនអាជីវកម្មក្នុងរបៀបផ្សេងៗ ដូចជាការបង្កើនថ្លៃដើម រំខានដល់ខ្សែច្រវ៉ាក់ផ្គត់ផ្គង់ និងការផ្លាស់ប្តូរយុទ្ធសាស្រ្តទីផ្សារ ខណៈការដំឡើងតម្លៃនាំចូលដោយសារពន្ធ នឹងប៉ះពាល់ដល់ការប្រកួតប្រជែងជាដើម។

ការវិវត្តចុងក្រោយ បង្កផលអវិជ្ជមានទាំងសម្រាប់ក្រុមហ៊ុនអាមេរិកក្នុងស្រុក និងនៅចិនផ្ទាល់។ ចំពោះក្រុមហ៊ុនក្នុងស្រុកដែលនាំចេញទៅចិន ត្រូវប្រឈមមុខនឹងវិធានការសងសឹកពីរដ្ឋាភិបាលក្រុងប៉េកាំង ដែលកន្លងមក បានកំណត់គោលដៅខ្លាំងជាពិសេសលើផលិតកម្មកសិកម្មអាមេរិក ដែលមានចិនជាទីផ្សារនាំចេញកំពូល។

ខណៈចិនដាក់ពន្ធសងសឹក ៣៤ ភាគរយ លើគ្រប់មុខទំនិញអាមេរិក ទីភ្នាក់ងារសារព័ត៌មានរ៉យទ័របានផ្សាយនៅថ្ងៃពុធ (៩ មេសា) នេះថា ក្រុមហ៊ុនក្នុងស្រុកអាមេរិកដែលងាយរងគ្រោះជាងគេ គឺក្រុមហ៊ុនមកពីវិស័យអាកាសចរណ៍ (ក្រុមហ៊ុនផលិតយន្តហោះ) បន្ទះឈីប ឧបករណ៍កសិដ្ឋាន និងកសិកម្មជាពិសេស។ ការសងសឹករបស់ចិន នឹងផ្ដល់ប្រយោជន៍ទៅវិញ សម្រាប់ក្រុមហ៊ុនចិនក្នុងវិស័យទាំងនោះ។

ក្រុមហ៊ុនអាមេរិកប្រតិបត្តិការនៅចិន ក៏កាន់តែរងផលប៉ះពាល់ធ្ងន់ធ្ងរ ជាពិសេសក្រុមហ៊ុនដែលធ្វើការនាំចេញទៅសហរដ្ឋអាមេរិក។ ជាឧទាហរណ៍ ក្រុមហ៊ុនបច្ចេកវិទ្យា Apple ពឹងផ្អែកខ្លាំងលើផលិតកម្មទូរស័ព្ទ iPhone និងឧបករណ៍អេឡិចត្រូនិកផ្សេងទៀតក្នុងប្រទេសចិន ដែលនេះនឹងធ្វើឱ្យមានផលប៉ះពាល់ធ្ងន់ដល់ការផ្គត់ផ្គង់ និងការប្រកួតប្រជែងនៅសហរដ្ឋអាមេរិក ដែលជាទីផ្សារធំរបស់ Apple។ ក្រុមហ៊ុនស្បែកជើង Nike ដែលពឹងផ្អែកខ្លាំងលើផលិតកម្មធំនៅចិន និងក្រុមហ៊ុនលក់រាយ Walmart ដែលអាស្រ័យលើទំនិញប្រើប្រាស់ផលិតនៅចិន ក៏នឹងជួបប្រទះនូវបញ្ហាប្រឈមដូចគ្នា ដោយពន្ធរបស់ ត្រាំ នឹងបង្កើនតម្លៃមុខទំនិញពីក្រុមហ៊ុនទាំងនេះ សម្រាប់អ្នកប្រើប្រាស់អាមេរិក។

ពន្ធលើទំនិញនាំចូលពីបរទេស រួមទាំងចិន របស់ ត្រាំ ក៏នឹងបង្កើនបន្ទុកចំណាយផងដែរ សម្រាប់ក្រុមហ៊ុនដែលត្រូវការវត្ថុធាតុដើម ឬគ្រឿងផលិតកម្មបន្ទាប់បន្សំពីបរទេស។ តួយ៉ាង ក្រុមហ៊ុន Tesla ផលិតរថយន្តលក់ក្នុងស្រុកអាមេរិកច្រើន ប៉ុន្តែត្រូវការគ្រឿងបន្លាស់រថយន្តពីបរទេស ដែលត្រូវជាប់ពន្ធ ២៥ ភាគរយ ក្រោមពន្ធលើរថយន្ត និងគ្រឿងបន្លាស់នាំចូល ដែល ត្រាំ ប្រកាសឡើងកាលពីចុងខែមីនា។

សូម្បីតែក្រុមហ៊ុនអាមេរិក ដែលដាក់ផលិតកម្ម ឬប្រតិបត្តិការនៅចិន សម្រាប់ទីផ្សារយក្សក្នុងស្រុកចិន ក៏អាចទទួលរងនូវសម្ពាធពីសង្រ្គាមពាណិជ្ជកម្មផងដែរ។ ជាទូទៅ លក្ខខណ្ឌបែបនេះ តែងតែបង្កើនទំនោរជាតិនិយម ដែលបង្កការធ្វើពហិការផ្សេងៗលើផលិតផលក្រុមហ៊ុនអាមេរិក (ជាឧទាហរណ៍ ការធ្វើពហិការប្រឆាំងក្រុមហ៊ុន Tesla នៅកាណាដា និងសហភាពអឺរ៉ុបជាដើម។ ការលក់ Tesla នៅចិនក៏ធ្លាក់ចុះផងដែរ នាដើមឆ្នាំនេះ)។ នេះមិនរាប់បញ្ចូលការណ៍ដែលថា ក្រុមហ៊ុនរបស់អាមេរិកក្នុងស្រុកចិន ងាយនឹងរងចំណាត់ការណាមួយពីរដ្ឋាភិបាលចិនផង។

កន្លងមក ចិនបានបើកការស៊ើបអង្កេតប្រឆាំងការផ្ដាច់មុខលើក្រុមហ៊ុនអាមេរិក និងដាក់ក្រុមហ៊ុនបច្ចេកវិទ្យាអាមេរិករាប់សិប ទៅក្នុងបញ្ជីគ្រប់គ្រងការនាំចេញ។ ក្រៅពីនេះ ការរឹតត្បឹតរបស់ចិនលើរ៉ែកម្រនាំចេញទៅអាមេរិក ដើម្បីឆ្លើយតបនឹងវិធានការពន្ធរបស់ ត្រាំ ក៏បង្កឧបសគ្គដល់ក្រុមហ៊ុនអាមេរិក ដែលមានចិនជាប្រភពផ្គត់ផ្គង់ផងដែរ។ ទោះយ៉ាងណាក៏ដោយ កាលពីខែមីនា ប្រធានាធិបតី ស៊ី ជិនពីង បានជួបប្រជុំជាមួយក្រុមហ៊ុនបរទេស និងអាមេរិកធំៗជាច្រើន ដោយផ្ដល់ពួកគេនូវការធានាផ្សេងៗ ចំពោះប្រតិបត្តិការនៅចិនថាជាកន្លែងសុវត្ថិភាព។

ចិនក៏នឹងរងផលប៉ះពាល់ធ្ងន់ធ្ងរដូចគ្នា។ ដោយសារតែកម្សោយតម្រូវការក្នុងស្រុក និងបញ្ហាសេដ្ឋកិច្ចមួយចំនួនទៀត ចិនត្រូវពឹងផ្អែកខ្លាំងលើការនាំចេញដើម្បីជំរុញកំណើនសេដ្ឋកិច្ច ហើយសហរដ្ឋអាមេរិក គឺជាទីផ្សារដ៏សំខាន់បំផុតមួយ។

ទោះបីជាចិនអាចធ្វើពិពិធកម្មទីផ្សារក៏ដោយ អ្នកជំនាញលើកឡើងថា ការដាក់ពន្ធធ្ងន់ធ្ងរលើចិន នឹងធ្វើឱ្យផលិតកម្មចុះខ្សោយ និងអាចឈានទៅដល់ការបញ្ចប់ ឬកាត់បន្ថយការងារ ចំពេលដែលការអត់ការងារធ្វើសម្រាប់យុវជនជាច្រើននៅចិន គឺជាបញ្ហារួចស្រាប់ទៅហើយ។

អ្នកជំនាញបានគូសបញ្ជាក់ថា ក្រុមហ៊ុនរបស់ចិនក្នុងវិស័យដូចជាអេឡិចត្រូនិក វាយនភណ្ឌ និងទំនិញប្រើប្រាស់ នឹងឡើងថ្លៃលើទីផ្សារអាមេរិក ដែលប៉ះពាល់ដល់តម្រូវការ និងប្រាក់ចំណេញសម្រាប់ក្រុមហ៊ុនចិន។ ការណ៍នេះ ឆ្ពោះទៅការចុះខ្សោយនៃសកម្មភាពរោងចក្រ ចំពេលការប្រកួតប្រជែងនៅទីផ្សារនាំចេញអន្តរជាតិផ្សេងៗក៏កាន់តែខ្លាំងឡើងៗ ក្នុងបរិបទដែលវិធានការការពារនិយមរបស់ ត្រាំ ផ្លាស់ប្ដូរលំនាំពាណិជ្ជកម្មសកល ពោលគឺខ្សែច្រវ៉ាក់ផ្គត់ផ្គង់សកល។

ក្រុមហ៊ុនអាមេរិកសំខាន់ៗនៅចិន៖

ក្រុមហ៊ុនរបស់សហរដ្ឋអាមេរិកធំៗជាច្រើនដាក់ប្រតិបត្តិការនៅចិន ឬមានទំនាក់ទំនងនៃខ្សែច្រវ៉ាក់ផ្គត់ផ្គង់ពីក្នុងប្រទេសចិន ដោយគ្របដណ្ដប់លើវិស័យជាច្រើន រាប់តាំងពីបច្ចេកវិទ្យា រហូតដល់រថយន្តយន្ត វាយនភណ្ឌ និងចំណីអាហារ។

Apple: ក្រុមហ៊ុនបច្ចេកវិទ្យាអាមេរិក មួយនេះមានរោងចក្រផលិតកម្ម និងដំឡើងជាច្រើននៅក្នុងប្រទេសចិន រួមទាំងផលិតកម្មទូរស័ព្ទម៉ាក iPhone។ ក្រុមហ៊ុននេះមានអាមេរិកជាទីផ្សារនាំចេញសំខាន់ ខណៈចិនក៏ជាទីផ្សារយក្សសម្រាប់ខ្លួនផងដែរ។
Tesla: ក្រុមហ៊ុនផលិតរថយន្តអគ្គិសនីរបស់លោក អេឡុន ម៉ាសក៍ Tesla មានរោងចក្រផលិត និងដំឡើងក្នុងស្រុកចិន ដែលមានសមត្ថភាពផលិតរថយន្តប្រមាណ ៩៥០ ០០០ គ្រឿង ក្នុងឆ្នាំ ២០២៣។
General Motors (GM): ប្រតិបត្តិការបណ្តាក់ទុនរួមគ្នាជាមួយក្រុមហ៊ុនចិន ជាច្រើនដូចជា SAIC Motor និង Wuling Motors ដោយផលិតរថយន្តជាច្រើនប្រភេទ រួមទាំងរថយន្តអគ្គិសនីផងដែរ ភាគច្រើនសម្រាប់ទីផ្សារចិន។
ក្រុមហ៊ុន Microsoft មានវត្តមានយ៉ាងសំខាន់នៅក្នុងប្រទេសចិន តាមរយៈសេវាកម្មសុសវ៉ែររបស់ខ្លួន រួមមានបច្ចេកវិទ្យាពពក ហ្គេម និងការលក់កម្មវិធី Windows និង Office ជាដើម។ កម្មវិធី និងសេវាកម្មពពករបស់ Microsoft គឺផ្តោតជាចម្បងលើទីផ្សារពិភពលោក ភាគច្រើននៅសហរដ្ឋអាមេរិក អឺរ៉ុប និងតំបន់ផ្សេងៗទៀត។
Nike: ក្រុមហ៊ុននេះមានប្រតិបត្តិការផលិតកម្ម និងលក់រាយយ៉ាងច្រើននៅចិន។ ផលិតផលស្បែកជើង សម្លៀកបំពាក់ និងឧបករណ៍ជាច្រើន ត្រូវបានផលិតនៅក្នុងប្រទេសចិន ឬមានប្រភពមកពីអ្នកផ្គត់ផ្គង់ចិន។ Nike នាំចេញផលិតផលរបស់ខ្លួនទូទាំងពិភពលោក ដោយសហរដ្ឋអាមេរិក គឺជាទីផ្សារធំបំផុត។
Starbucks មានហាងរាប់ពាន់នៅទូទាំងប្រទេសចិន ដែលធ្វើឱ្យចិន ក្លាយជាទីផ្សារដ៏ធំបំផុតមួយសម្រាប់ខ្សែច្រវ៉ាក់ផ្គត់ផ្គង់កាហ្វេ នៅខាងក្រៅសហរដ្ឋអាមេរិក។
ក្រៅពីនេះ គឺឃើញមានក្រុមហ៊ុនសំខាន់ៗជាច្រើនដូចជា Amazon, Intel, McDonald’s, Caterpillar, Johnson & Johnson និង Boeing ជាដើម។

ក្រុមហ៊ុនចិនសំខាន់ៗនៅសហរដ្ឋអាមេរិក៖

ក្រុមហ៊ុនចិន មានប្រតិបត្តិការសំខាន់ៗនៅសហរដ្ឋអាមេរិក រាប់ចាប់ពីវិស័យបច្ចេកវិទ្យា និងពាណិជ្ជកម្មអេឡិចត្រូនិក រហូតដល់រថយន្ត ថាមពល និងគ្រឿងអេឡិចត្រូនិក។

Alibaba ប្រតិបត្តិការនៅសហរដ្ឋអាមេរិក តាមរយៈវេទិកាពាណិជ្ជកម្មអេឡិចត្រូនិក ដូចជា AliExpress ដែលអនុញ្ញាតឱ្យអ្នកប្រើប្រាស់អាមេរិកទិញផលិតផលដោយផ្ទាល់ពីក្រុមហ៊ុនផ្គត់ផ្គង់ចិន។ ក្រុមហ៊ុននេះ ប្រតិបត្តិការិយាល័យ និងមជ្ឈមណ្ឌលទិន្នន័យ រួមទាំងសេវាកម្មបច្ចេកវិទ្យាពពក នៅសហរដ្ឋអាមេរិក ខណៈផ្តោតលើការទាក់ទាញអាជីវកម្មខ្នាតតូចនៅសហរដ្ឋអាមេរិក និងអឺរ៉ុប។ នេះបើយោងតាមបណ្ដាញទូរទស្សន៍ CNBC ។
Lenovo គឺជាក្រុមហ៊ុនផលិតកុំព្យូទ័រផ្ទាល់ខ្លួនដ៏ធំបំផុតមួយនៅទូទាំងពិភពលោក ហើយមានវត្តមានយ៉ាងសំខាន់នៅក្នុងសហរដ្ឋអាមេរិក។ ក្រុមហ៊ុននេះនាំចេញផលិតផលរបស់ខ្លួនទៅទូទាំងពិភពលោក ដោយមានចំណែកទីផ្សារដ៏រឹងមាំនៅសហរដ្ឋអាមេរិក អឺរ៉ុប និងអាស៊ី។
BYD គឺជាក្រុមហ៊ុនផលិតរថយន្តអគ្គិសនីចិន ដែលមានរោងចក្រផលិតរថយន្តក្រុងនៅទីក្រុង Lancaster រដ្ឋកាលីហ្វ័រញ៉ា ដែលជារោងចក្ររថយន្តក្រុងអគ្គិសនីធំជាងគេនៅអាមេរិកខាងជើង និងជារោងចក្ររថយន្តក្រុងដែលគ្រប់គ្រងដោយចិនដំបូងគេ នៅសហរដ្ឋអាមេរិក។
TCL: ជាក្រុមហ៊ុនអេឡិចត្រូនិកដ៏ធំមួយនៅក្នុងប្រទេសចិន ដែលផលិតទូរទស្សន៍ ស្មាតហ្វូន និងឧបករណ៍ប្រើប្រាស់ក្នុងផ្ទះ។ ក្រុមហ៊ុននេះ មានវត្តមានលក់រាយដ៏រឹងមាំនៅសហរដ្ឋអាមេរិក ដោយលក់ទូរទស្សន៍ និងគ្រឿងអេឡិចត្រូនិចផ្សេងទៀតរបស់ខ្លួន តាមរយៈអ្នកលក់រាយធំៗនៅសហរដ្ឋអាមេរិក។
ក្រៅពីនេះ មានក្រុមហ៊ុនផ្សេងៗទៀត ដូចជាក្រុមហ៊ុនក្នុងវិស័យហ្គេមដូចជា Tencent និងក្រុមហ៊ុនបណ្ដាញសង្គម និងពាណិជ្ជកម្មអេឡិចត្រូនិក TikTok របស់ Bytedance និងក្រុមហ៊ុនផលិតដ្រូន Autel Robotics ជាដើម៕

The post តើមានក្រុមហ៊ុនអាមេរិកប៉ុន្មាននៅចិន និងក្រុមហ៊ុនចិនប៉ុន្មាននៅអាមេរិក? appeared first on Kampuchea Thmey Daily.

ពលរដ្ឋអាមេរិកមួយចំនួនចាប់ផ្ដើមពហិការផលិតផលក្រុមហ៊ុនដែលដកកម្មវិធី DEI

Huon Dina — Fri, 21 Mar 2025 04:04:51 +0000

ការប្រឆាំងតវ៉ារបស់ក្រុមអភិរក្សនិយមនៅសហរដ្ឋអាមេរិក រួមទាំងលោកប្រធានាធិបតី ដូណាល់ ត្រាំ បានឈានទៅដល់ការលុបចោលកម្មវិធីពិពិធភាព សមធម៌ និងបរិយាបន្ន (DEI: Diversity, Equity, Inclusion) ដែលសំដៅលើក្របខ័ណ្ឌស្ថាប័នការងារដែលលើកកម្ពស់មនុស្សគ្រប់គ្នា ជាពិសេសក្រុមមនុស្សដែលរងការរើសអើងដោយសារតែអត្តសញ្ញាណ ឬពិការភាពរបស់ពួកគេជាដើម។

ក្រុមហ៊ុនអាមេរិកនានា រួមទាំងក្រុមហ៊ុន Target, Walmart, McDonald’s និង Amazon បានប្រកាសផែនការកាត់បន្ថយ ឬលុបចោលកម្មវិធី DEI នៅក្នុងប្រតិបត្តិការអាជីវកម្មរបស់ពួកគេ។ ការណ៍បានផ្តល់ជាសញ្ញាដល់ពលរដ្ឋអាមេរិកមួយចំនួន រួមទាំងជនជាតិស្បែកខ្មៅ ឱ្យគិតគូរឡើងវិញអំពីផលិតផលដែលពួកគេគួរចំណាយប្រាក់ដើម្បីប្រើប្រាស់។

បណ្ដាញទូរទស្សន៍អាមេរិក NBC News បានធ្វើបទសម្ភាសន៍ជាមួយជនជាតិស្បែកខ្មៅប្រហែល ២០ នាក់ នៅទូទាំងប្រទេស ដោយនិយាយអំពីមូលហេតុដែលពួកគេធ្វើពហិការលើក្រុមហ៊ុនមួយចំនួន និងផលប៉ះពាល់ពីការលុបចោលនៃ DEI លើទម្លាប់នៃការចំណាយរបស់ពួកគេ។

ជុំវិញបញ្ហានេះ សាស្ត្រាចារ្យផ្នែកសេដ្ឋកិច្ចនៅសាកលវិទ្យាល័យ Ohio State លោក Trevon Logan បាននិយាយថា បញ្ហា DEI មិនមែនតែជាកត្តាដែលបង្កពហិការតែមួយមុខនោះទេ វាក៏ជំរុញផងដែរដោយការបោះបង់ចោលនូវការសន្យាផ្សេងៗរបស់ក្រុមហ៊ុនអាមេរិក ដែលបានធ្វើឡើងក្រោយបាតកម្មដ៏ធំពាក់ព័ន្ធនឹងការស្លាប់របស់ជនជាតិស្បែកខ្មៅលោក George Floyd ក្នុងឆ្នាំ ២០២០ ផងដែរ។

លោក Logan និយាយថា៖ «ក្រុមហ៊ុនជាច្រើនដែលត្រូវបានគេកំណត់គោលដៅ មិនត្រឹមតែពឹងផ្អែកខ្លាំងលើអតិថិជនជនជាតិស្បែកខ្មៅប៉ុណ្ណោះទេ ប៉ុន្តែពួកគេក៏ជាក្រុមហ៊ុនដែលជួលបុគ្គលិកជាជនជាតិស្បែកខ្មៅមួយចំនួនធំផងដែរ។រ»។

យោងតាមការប៉ាន់ប្រមាណមួយចំនួន ជនជាតិអាមេរិកស្បែកខ្មៅ មានអំណាចនៃការទិញប្រចាំឆ្នាំចំនួន ១,៣ ទ្រីលានដុល្លារ។ សាស្ត្រាចារ្យផ្នែកគោលនយោបាយសាធារណៈនៅសាកលវិទ្យាល័យ Duke លោក Vicki Bogan បាននិយាយថា អំណាចទិញសរុបរបស់អ្នកប្រើប្រាស់អាមេរិក គឺច្រើនជាង ១៧ ទ្រីលានដុល្លារ។

ទាំងលោក Logan និងលោក Bogan បាននិយាយថា ដើម្បីឱ្យការធ្វើពហិការមានផលប៉ះពាល់ធ្ងន់ធ្ងរ វាត្រូវតែមានជាប់ជាប្រចាំ និងលើសពីអ្នកប្រើប្រាស់ជាជនជាតិស្បែកខ្មៅ។

Bogan បាននិយាយថា ប្រសិនបើមានការចូលរួមពីក្រុមប្រជាជនផ្សេងៗទៀត នោះវានឹងធ្វើឱ្យសម្ពាធគ្រប់គ្រាន់ឱ្យក្រុមហ៊ុនអាមេរិកផ្លាស់ឥរិយាបថ។ លោក Logan បានកត់សម្គាល់ថា មិនមែនតែជនជាតិស្បែកខ្មៅប៉ុណ្ណោះទេដែលធ្វើពហិការ ប៉ុន្តែវាភាគច្រើនចាប់ផ្ដើមពីពួគគេ ដែលរងផលប៉ះពាល់ខ្លាំងជាងគេ៕

The post ពលរដ្ឋអាមេរិកមួយចំនួនចាប់ផ្ដើមពហិការផលិតផលក្រុមហ៊ុនដែលដកកម្មវិធី DEI appeared first on Kampuchea Thmey Daily.

ក្រុមហ៊ុនអាមេរិកទាមទារឱ្យបង្រ្កាបលើ ក្រុមហ៊ុនចិនដែលប្រើប្រទេសទី៣ ដើម្បីគេចពន្ធ

Huon Dina — Thu, 06 Mar 2025 09:30:48 +0000

បណ្ដាក្រុមហ៊ុនសហរដ្ឋអាមេរិក កាលពីថ្ងៃពុធ បានទាមទារឱ្យមានការពង្រឹងលើច្បាប់ពាណិជ្ជកម្ម និងធានាឱ្យបាននូវការកាត់ទោសព្រហ្មទណ្ឌចំពោះក្រុមហ៊ុនចិន ដែលគេចវេសពន្ធរបស់សហរដ្ឋអាមេរិក ដោយការដឹកជញ្ជូនទំនិញឆ្លងកាត់ប្រទេសទី៣។ នេះបើតាមការចុះផ្សាយរបស់ទីភ្នាក់ងារសារព័ត៌មានរ៉យទ័រ។

នាយកប្រតិបត្តិមកពីក្រុមហ៊ុនឧស្សាហកម្មខ្នាតមធ្យមផ្សេងៗ រួមទាំងក្រុមហ៊ុនផលិតបំពង់ដែកថែប ទូផ្ទះបាយ និងទូដាក់ខោអាវ បានលើកឡើងក្នុងព្រឹត្តិការណ៍មួយជាមួយសមាជិកសភានៅវិមាន Capitol Hill ថា អស់ជាច្រើនឆ្នាំមកនេះ សហរដ្ឋអាមេរិកបានបាត់បង់ចំណូលពន្ធគយ ហើយក្រុមហ៊ុនអាមេរិកត្រូវដកខ្លួនចេញពីអាជីវកម្ម ដោយសារតែការរំលោភលើច្បាប់ពាណិជ្ជកម្មរបស់ក្រុមហ៊ុនចិន។ ពួកគេបន្តថា កម្សោយនៃការអនុវត្តច្បាប់ ធ្វើឱ្យក្រុមហ៊ុនមានផ្លូវគេចវិធានការពន្ធ។

អនុប្រធានប្រតិបត្តិនៃក្រុមហ៊ុនផលិតបំពង់ដែក Zekelman Industries លោក Tom Muth បានថ្លែងយ៉ាងដូច្នេះថា៖ «យើងត្រូវបានគេបង្ខំឱ្យបិទរោងចក្រ កាត់បន្ថយការងារ និងកាត់បន្ថយការវិនិយោគ»។ លោកបន្តថា៖ «ការនាំចូលមិនមែនមានមកតែពីប្រទេសចិនដោយផ្ទាល់នោះទេ ប៉ុន្តែដោយប្រយោល។ វាមកពីប្រទេសផ្សេងៗដូចជា អូម៉ង់ ថៃ វៀតណាម និងអារ៉ាប់រួមជាដើម»។ លោកបន្តថា៖ «ប្រទេសទាំងនេះគឺជាអ្នកនាំចូលដ៏ធំនៃដែកថែបរមូរក្ដៅ ដែលទទួលបានការឧបត្ថម្ភធន និងសម្រាប់ការលក់បង្ខូចតម្លៃពីប្រទេសចិន»។

នាយកប្រតិបត្តិនៃក្រុមហ៊ុនឧបករណ៍ព្យួរសម្លៀកបំពាក់សម្រាប់ឧស្សាហកម្មវាយនភណ្ឌ M&B Metal Products Company, Inc លោក Milton Magnus បានថ្លែងថា ក្រុមហ៊ុនរបស់លោកបានឈ្នះក្ដីលើសំណុំរឿងលក់បង្ខូចតម្លៃលើក្រុមហ៊ុនចិននៅឆ្នាំ ២០០៨ ប៉ុន្តែក្រោយពីនោះ គ្មានប្រសិទ្ធិភាពនោះទេ។

លោក Magnus បាននិយាយថា ចិនបានប្រើប្រទេសផ្សេងទៀតដើម្បីដឹកជញ្ជូនទំនិញរបស់ខ្លួន ប្ដូរឈ្មោះក្រុមហ៊ុន និងផ្លាស់ប្ដូរការដឹកជញ្ជូនជាដើម ដើម្បីដើរមុនគេ។

ក្រុមនាយកប្រតិបត្តិអាមេរិកទាំងនេះ គាំទ្រច្បាប់ទ្វេភាគីរបស់សភា ដែលនឹងបង្កើនការកាត់ទោសលើការគេចវេសពន្ធ និងថ្លៃពាណិជ្ជកម្មផ្សេងទៀត ដែលនោះ គឺ «ច្បាប់ស្ដីពីការការពារឧស្សាហកម្ម និងការងាររបស់អាមេរិកពីឧក្រិដ្ឋកម្មពាណិជ្ជកម្មអន្តរជាតិ»។ ការដាក់ស្នើឡើងវិញនូវច្បាប់ ដែលបរាជ័យមិនបានអនុម័តកាលពីឆ្នាំមុនមួយនេះ ធ្វើឡើងនៅពេលដែលប្រធានាធិបតីអាមេរិក លោក ដូណាល់ ត្រាំ ចាប់ផ្តើមសង្រ្គាមពន្ធថ្មីជាមួយប្រទេសចិន ក៏ដូចជាម៉ិកស៊ិក និងកាណាដាផងដែរ។

នាយិកាប្រតិបត្តិនៃសមាគមអ្នកផលិតទូរផ្ទះបាយ អ្នកស្រី Betsy Natz បាននិយាយថា៖ «ខ្ញុំឃើញថា រោងចក្ររបស់អាមេរិកបិទទ្វារ មិនមែនដោយសារតែពួកគេបរាជ័យនោះទេ ប៉ុន្តែដោយសារតែការអនុវត្តច្បាប់បានបរាជ័យ។ វាមិនអាចទទួលយកបានទេ»។ អ្នកស្រីបន្តថា ក្រុមហ៊ុនរបស់ខ្លួនបានចំណាយប្រាក់ ១០ លានដុល្លារ លើរឿងក្ដីប្រឆាំងការលក់បង្ខូចទ្រង់ទ្រាយធំ ដែលបណ្តាលឱ្យមានការដាក់ពន្ធ ២៦០ ភាគរយ លើក្រុមហ៊ុនចិន។ ប៉ុន្តែចុងក្រោយ ក្រុមហ៊ុនចិនបានប្រើវៀតណាម ម៉ាឡេស៊ី កម្ពុជា និងឥណ្ឌូណេស៊ី ដើម្បីគេចពន្ធ៕

The post ក្រុមហ៊ុនអាមេរិកទាមទារឱ្យបង្រ្កាបលើ ក្រុមហ៊ុនចិនដែលប្រើប្រទេសទី៣ ដើម្បីគេចពន្ធ appeared first on Kampuchea Thmey Daily.

ការស្ទង់មតិ៖ ពាក់កណ្ដាលនៃក្រុមហ៊ុនអាមេរិកនៅចិន ព្រួយបារម្ភពីជម្លោះពាណិជ្ជកម្ម ខ្ពស់បំផុតក្នុងរយៈពេល ៥ ឆ្នាំ

Huon Dina — Thu, 23 Jan 2025 03:27:09 +0000

ជាងពាក់កណ្ដាលនៃក្រុមហ៊ុនអាមេរិកនៅក្នុងប្រទេសចិន ដែលជាកម្រិតខ្ពស់បំផុតក្នុងរយៈពេល ៥ ឆ្នាំ បានព្រួយបាម្ភកាន់តែខ្លាំងអំពីភាពកាន់តែតានតឹងនៃជម្លោះពាណិជ្ជកម្មទ្វេភាគីរវាងចិន និងសហរដ្ឋអាមេរិក។ នេះបើតាមការចុះផ្សាយរបស់ទីភ្នាក់ងារសារព័ត៌មានរ៉យទ័រ ដែលស្រង់ទិន្នន័យស្ទង់មតិរបស់សភាពាណិជ្ជកម្មអាមេរិកប្រចាំប្រទេសចិន (AmCham)។

ការស្ទង់មតិដែលចេញផ្សាយនាថ្ងៃព្រហស្បតិ៍នេះ បានបង្ហាញថា ៥១ ភាគរយ នៃក្រុមហ៊ុនអាមេរិកដែលបានឆ្លើយតបនៃការស្ទង់មតិ មានមានការព្រួយបារម្ភអំពីការកាន់តែធ្លាក់ចុះនៃទំនាក់ទំនងរវាងសហរដ្ឋអាមេរិក និងចិន នាពេលអនាគត។

របាយការណ៍ស្ទង់មតិនេះ ចុះផ្សេងក្រោយលោកប្រធានាធិបតីអាមេរិក ដូណាល់ ត្រាំ ឡើងកាន់ស្បថចូលកាន់តំណែងកាលពីថ្ងៃចន្ទ ជាមួយនឹងការគំរាមកំហែងកាន់តែខ្លាំងលើការដាក់ពន្ធគយលើប្រទេសផ្សេងៗ រួមទាំងចិន។

ប្រធាន AmCham ប្រចាំចិន លោក Alvin Liu បានលើកឡើងថា៖ «ទំនាក់ទំនងដែលប្រកបដោយស្ថិរភាព និងការស្ថាបនា គឺជាមូលដ្ឋាននៅក្នុងទំនាក់ទំនងសេដ្ឋកិច្ច និងពាណិជ្ជកម្ម ដែលមានសារៈសំខាន់មិនត្រឹមតែសម្រាប់ភាពរុងរឿងនៃប្រទេសទាំង២របស់យើងប៉ុណ្ណោះទេ ប៉ុន្តែក៏សម្រាប់ស្ថិរភាពសេដ្ឋកិច្ចពិភពលោកផងដែរ»។

ការស្ទង់មតិរបស់ AmCham China រកឃើញថា ភាពតានតឹងផ្នែកភូមិសាស្ត្រនយោបាយ ភាពមិនច្បាស់លាស់នៃគោលនយោបាយផ្សេងៗ និងជម្លោះពាណិជ្ជកម្ម គឺជាក្តីកង្វល់ដ៏ធំរបស់ធុរកិច្ចអាមេរិកនៅក្នុងប្រទេសចិន។

គួរគូសបញ្ជាក់ថា អាណត្តិមុនរបស់លោក ត្រាំ ត្រូវបានគេកំណត់ថាជា ការផ្ទុះឡើងនៃសង្រ្គាមពាណិជ្ជកម្មរវាងសហរដ្ឋអាមេរិក និងចិន និងការធ្លាក់ចុះជាទូទៅនៃសុច្ឆន្ទៈការទូតរវាងប្រទេសទាំង២។ ហើយបញ្ហានេះ មិនសូវជាមានភាពប្រសើរឡើងនោះទេ ក្រោយអតីតប្រធានាធិបតី លោក ចូ បៃដិន ឡើងកាន់តំណែងបន្ទាប់ក្នុងខែមករា ឆ្នាំ ២០២១។

កាលពីថ្ងៃអង្គារ លោក ត្រាំ បាននិយាយថា រដ្ឋបាលរបស់លោកកំពុងពិភាក្សាអំពីពន្ធគយ ១០ ភាគរយ លើទំនិញនាំចូលរបស់ចិន ដែលអាចនឹងត្រូវអនុវត្តចាប់ពីថ្ងៃទី ១ ខែកុម្ភៈ ដោយសារតែតួនាទីរបស់ចិនលើខ្សែចង្វាក់ផ្គត់ផ្គង់ហ្វេនតានីល ដែលជាថ្នាំញៀនសម្លាប់ពលរដ្ឋអាមេរិកជាច្រើននាក់ក្នុងមួយឆ្នាំៗ៕

The post ការស្ទង់មតិ៖ ពាក់កណ្ដាលនៃក្រុមហ៊ុនអាមេរិកនៅចិន ព្រួយបារម្ភពីជម្លោះពាណិជ្ជកម្ម ខ្ពស់បំផុតក្នុងរយៈពេល ៥ ឆ្នាំ appeared first on Kampuchea Thmey Daily.

ឥណ្ឌូណេស៊ីទាញការវិនិយោគជិត ៧០ ប៊ីលានដុល្លារពីក្រុមហ៊ុនអាមេរិក ប៉ុន្តែច្បាប់ក្នុងស្រុកនៅតែរឹតត្បឹត

Huon Dina — Wed, 27 Nov 2024 04:32:08 +0000

របាយការណ៍ថ្មីមួយបង្ហាញថា ក្រុមហ៊ុនអាជីវកម្មអាមេរិកបានវិនិយោគសរុបជាទឹកប្រាក់ប្រមាណ ៦៧ ប៊ីលានដុល្លារ ក្នុងប្រទេសឥណ្ឌូណេស៊ី នៅរយៈពេល ១០ ឆ្នាំចុងក្រោយនេះ ប៉ុន្តែច្បាប់ដែលតម្រូវឱ្យក្រុមហ៊ុនបរទេសផលិតក្នុងស្រុករបស់ប្រទេសនេះ នៅតែជាឧបសគ្គដើម្បីទាក់ទាញការវិនិយោគបន្ថែម។ នេះបើតាមការចុះផ្សាយរបស់កាសែត Jakarta Globe។

សភាពាណិជ្ជកម្មអាមេរិកនៅឥណ្ឌូណេស៊ី (AmCham Indonesia) និងសភាពាណិជ្ជកម្មអាមេរិក បានបង្ហាញក្នុងរបាយការណ៍ចុងក្រោយថា ការវិនិយោគរបស់សហរដ្ឋអាមេរិកនៅឥណ្ឌូណេស៊ី មានចំនួនសរុប ៦៧ ប៊ីលានដុល្លារ ចន្លោះឆ្នាំ ២០១៤-២០២៣។ ការវិនិយោគបានជួយដល់សេដ្ឋកិច្ចប្រមាណ ១៣០ ប៊ីលានដុល្លារ ដែលលើសពីការបង្កើតការងារ។

ទោះបីជាតួលេខនេះធំក៏ដោយ ក្រុមហ៊ុនផលិតរបស់អាមេរិក ជាពិសេសក្រុមហ៊ុនដែលត្រូវការសមាសធាតុផលិតដែលគ្មានក្នុងស្រុកឥណ្ឌូណេស៊ី នៅតែឃើញថា ច្បាប់របស់ឥណ្ឌូណេស៊ីគឺជាបញ្ហាសម្រាប់ពួកគេ។

អ្នកស្រី Lydia Ruddy នាយិកាគ្រប់គ្រង AmCham Indonesia បានប្រាប់អ្នកសារព័ត៌មានក្នុងទីក្រុងហ្សាការតាកាលពីថ្ងៃអង្គារ៖ «ក្រុមហ៊ុនភាគច្រើន គឺជាផ្នែកមួយនៃខ្សែចង្វាក់ផ្គត់ផ្គង់ពិភពលោក។ ប្រសិនបើពួកគេគ្មានគ្រឿងផលិតដែលត្រូវការដើម្បីផលិតផលិតផលរបស់ពួកគេនៅទីនេះទេនោះ នោះពួកគេក៏គ្មានភាពសុខស្រួលដើម្បីវិនិយោគនៅទីនេះដែរ»៕

គួរគូសបញ្ជាក់ថា ឥណ្ឌូណេស៊ីបានកំណត់ឱ្យក្រុមហ៊ុនផលិតផ្សេងៗ ត្រូវប្រើប្រាស់គ្រឿងផ្សំដែលមានប្រភពពីប្រទេសឥណ្ឌូណេស៊ីផ្ទាល់ ដើម្បីបង្កើនសេដ្ឋកិច្ច និងជំរុញការបង្កើតការងារ។ ចុងក្រោយនេះ រដ្ឋាភិបាលបានរារាំងក្រុមហ៊ុនបច្ចេកវិទ្យាយក្សរបស់អាមេរិក Apple ពីការលក់ iPhone 16 នៅក្នុងប្រទេសរបស់ខ្លួន ដោយសារតែក្រុមហ៊ុនអាមេរិកមួយនេះ មិនអាចបំពេញតាមតម្រូវការច្បាប់របស់ឥណ្ឌូណេស៊ី។

The post ឥណ្ឌូណេស៊ីទាញការវិនិយោគជិត ៧០ ប៊ីលានដុល្លារពីក្រុមហ៊ុនអាមេរិក ប៉ុន្តែច្បាប់ក្នុងស្រុកនៅតែរឹតត្បឹត appeared first on Kampuchea Thmey Daily.

ក្រុមហ៊ុនសេវាហោះហើរឯកជនរបស់អាមេរិកបង្ហាញចំណាប់អារម្មណ៍ចំពោះទីផ្សារអាកាសចរណ៍កម្ពុជា

Ngoeul Narath — Wed, 16 Oct 2024 09:57:29 +0000

ក្រុមហ៊ុន Gulfstream Aerospace Corporation ដែលជាក្រុមហ៊ុនសេវាហោះហើរឯកជនរបស់អាមេរិក មានបំណងចូលរួមអភិវឌ្ឍវិស័យអាកាសចរណ៍នៅកម្ពុជា តាមរយ:ការរួមចំណែកក្នុងការពង្រឹង និងពង្រីកការតភ្ជាប់ និងទេសចរណ៍ជាមួយតំបន់ និងពិភពលោក។

លោក Julien Nargeot អនុប្រធានក្រុមហ៊ុន Gulfstream Aerospace Corporation បានបង្ហាញចំណាប់អារម្មណ៍ដូច្នេះ ក្នុងពេលសម្តេចមហាបវរធិបតីហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា បានអនុញ្ញាតឱ្យ ចូលជួបសម្ដែងការគួរសម និងពិភាក្សាការងារ នៅវិមានសន្ដិភាព នារសៀលថ្ងៃទី១៦ ខែតុលា ឆ្នាំ២០២៤ ។

ក្នុងឱកាសនៃជំនួប លោក Julien Nargeot បានសម្ដែងនូវការកោតសរសើរចំពោះការអភិវឌ្ឍរីកចម្រើនយ៉ាងឆាប់រហ័សលើគ្រប់វិស័យនៅកម្ពុជា និងការចាប់អារម្មណ៍ចំពោះទីផ្សារអាកាសចរណ៍នៅកម្ពុជា។

លោក Julien Nargeot បានគោរពជម្រាបជូនសម្ដេចធិបតីថា ក្រុមហ៊ុន Gulfstream Aerospace Corporation គឺជាក្រុមហ៊ុនផ្ដល់សេវាហោះហើរឯកជនឈានមុខរបស់អាមេរិក ដោយផ្តោតលើការផ្តល់សេវាហោះហើរជាលក្ខណៈឯកជន សម្រាប់អ្នកដំណើរ និងធុរជន។

ជាការឆ្លើយតប សម្ដេចបវរធិបតីបានស្វាគមន៍ចំណាប់អារម្មណ៍របស់ក្រុមហ៊ុន ចំពោះទីផ្សារនៅកម្ពុជា។ សម្ដេចបវរធិបតីបានគូសបញ្ជាក់ថា តាមរយៈកំណើនសេដ្ឋកិច្ចប្រកបដោយភាពធន់ ក៏ដូចជាសម្ទុះនៃការអភិវឌ្ឍលើគ្រប់វិស័យរបស់កម្ពុជា ការធ្វើធុរកិច្ចក្នុងវិស័យអាកាសចរណ៍នៅកម្ពុជា នឹងផ្តល់ឱកាសដល់ក្រុមហ៊ុន ព្រោះទីផ្សារកម្ពុជាត្រូវបានផ្សារភ្ជាប់ជាមួយតំបន់ និងពិភពលោក។

បន្ថែមលើនេះ សម្ដេចបវរធិបតីក៏បានលើកទឹកចិត្តឱ្យក្រុមហ៊ុនបន្តពិភាក្សាជាមួយក្រសួង ស្ថាប័ន និងដៃគូពាក់ព័ន្ធនានា ដើម្បីស្វែងយល់លម្អិតបន្ថែមអំពីសក្តានុពលនៃការវិនិយោគនៅក្នុងទីផ្សារអាកាសចរណ៍នៅកម្ពុជាផងដែរ៕

The post ក្រុមហ៊ុនសេវាហោះហើរឯកជនរបស់អាមេរិកបង្ហាញចំណាប់អារម្មណ៍ចំពោះទីផ្សារអាកាសចរណ៍កម្ពុជា appeared first on Kampuchea Thmey Daily.

ចំនួនក្រុមហ៊ុនក្ស័យធននៅអាមេរិក កើនលើសកម្រិតកំពូលអំឡុងវិបត្តិកូវីដ កាលពីខែមិថុនា

Huon Dina — Mon, 15 Jul 2024 09:59:05 +0000

ចំនួនក្រុមហ៊ុនដែលបានចុះបញ្ជីក្ស័យធននៅសហរដ្ឋអាមេរិកប្រចាំខែមិថុនា បានហក់ឡើងលើសកម្រិតខ្ពស់បំផុតក្នុងអំឡុងវិបត្តិជំងឺរាតត្បាតកូវីដ១៩ ដែលធ្វើឱ្យសេដ្ឋកិច្ចសកលធ្លាក់ចុះដុនដាបនាពេលនោះ។ នេះបើតាមការចុះផ្សាយរបស់ទស្សនាវដ្តីពាណិជ្ជកម្មសកលអាមេរិក Fortune។

របាយការណ៍ចេញផ្សាយនៅថ្ងៃចន្ទនេះ ពីក្រុមហ៊ុនផ្ដល់ទិន្នន័យហិរញ្ញវត្ថុ និងឧស្សាហកម្ម S&P Global Market Intelligence បានបង្ហាញថា នៅខែមិថុនា មានក្រុមហ៊ុនចំនួន ៧៥ បានដាក់ឯកសារចុះឈ្មោះក្ស័យធន ដោយកើនឡើងពីចំនួន ៦២ ក្រុមហ៊ុន នៅខែឧសភា និងលើសកម្រិតកំពូល ៧៤ ក្រុមហ៊ុន នៅខែកក្កដា ឆ្នាំ ២០២០។

រាប់ចាប់តាំងពីដើមឆ្នាំរហូតដល់ចុងខែមិថុនា ក្រុមហ៊ុនអាមេរិកសរុបប្រមាណ ៣៥៦ បានដាក់ពាក្យក្ស័យធន ដែលនេះលើសពីចំនួនក្នុងរយៈពេលដូចគ្នាកាលពីឆ្នាំ ២០២០ និងខ្ពស់ជាងទិន្នន័យរយៈពេលដូចគ្នាណាៗទាំងអស់ ក្នុងរយៈពេល ១៣ ឆ្នាំចុងក្រោយនេះ។

ក្រុមហ៊ុន S&P Global បាននិយាយថា៖ «អត្រាការប្រាក់ខ្ពស់ បញ្ហាខ្សែសង្វាក់ផ្គត់ផ្គង់ និងការថយចុះនៃការចំណាយរបស់អ្នកប្រើប្រាស់ បន្តដាក់សម្ពាធទៅលើក្រុមហ៊ុនដែលកំពុងជួបការលំបាក»។

ក្រុមហ៊ុនដដែលបន្តថា ឆ្នាំ ២០២៣ គឺជាឆ្នាំដែលក្រុមហ៊ុនសាជីវកម្មអាមេរិកក្ស័យធនច្រើនបំផុតរាប់តាំងពីវិបត្តិហិរញ្ញវត្ថុសកល (២០០៧-២០០៨) ហើយតួលេខឆ្នាំ ២០២៤ កំពុងស្ថិតនៅលើផ្លូវឆ្ពោះទៅរកការបំបែកកំណត់ត្រាឆ្នាំ ២០២៣។

កំណើនដ៏គួរឱ្យព្រួយបារម្ភនេះ គឺជាសញ្ញាមួយផ្សេងទៀតដែលថា អត្រាការប្រាក់ខ្ពស់តឹងតែងរបស់ធនាគារកណ្ដាលអាមេរិក កំពុងទម្លាក់បន្ទុកធ្ងន់ធ្ងរលើសេដ្ឋកិច្ចអាមេរិក ខណៈលោក Jerome Powell ដែលជាប្រធានធនាគារផ្ទាល់ ក៏កត់សម្គាល់ពីការធ្លាក់ចុះនៃទីផ្សារការងារ។

ទន្ទឹមនឹងនេះដែរ ក្រុមហ៊ុនអាមេរិករាប់ពាន់ផ្សេងទៀតក៏ស្ថិតនៅក្នុងស្ថានភាពត្រដាបត្រដួស។ ការវិភាគពីទីភ្នាក់ងារសារព័ត៌មាន Associated Press កាលពីខែមុន បានរកឃើញថា ចំនួនក្រុមហ៊ុនសាធារណៈដែលធ្លាក់ចុះប្រាក់ចំណូល (Zombie Companies) បានកើនឡើងដល់ជិត ៧ ០០០ នៅទូទាំងពិភពលោក។ ក្នុងនោះ មាន ២ ០០០ ក្រុមហ៊ុន ស្ថិតនៅសហរដ្ឋអាមេរិក។

គេមើលឃើញផងដែរថា កំណើននៃការដាក់ពាក្យក្ស័យធន កើតឡើងខណៈអ្នកខាងជំនួញនៅសង្កាត់ហិរញ្ញវត្ថុ Wall Street បានបង្កើនការព្រួយបារម្ភកាន់តែខ្លាំងឡើងៗពីសេដ្ឋកិច្ចរបស់សហរដ្ឋអាមេរិក៕

The post ចំនួនក្រុមហ៊ុនក្ស័យធននៅអាមេរិក កើនលើសកម្រិតកំពូលអំឡុងវិបត្តិកូវីដ កាលពីខែមិថុនា appeared first on Kampuchea Thmey Daily.

សម្ដេចតេជោ ហ៊ុន សែន ស្វាគមន៍ក្រុមហ៊ុនអាមេរិកចំពោះការបង្កើតរោងចក្រ ដំឡើងរថយន្តនៅខេត្តពោធិ៍សាត់

sopheak khoun — Thu, 05 May 2022 05:23:25 +0000

សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា បានសម្ដែងការស្វាគមន៍របស់ក្រុមហ៊ុនរបស់អាមេរិក ចំពោះការបង្កើតរោងចក្រ ដំឡើងរថយន្តនៅខេត្តពោធិ៍សាត់ ហើយលើកទឹកចិត្តឲ្យក្រុមហ៊ុននានា បន្តវិនិយោគនៅកម្ពុជា បន្ថែមទៀត។

ការស្វាគមន៍នេះ គ្រាដែលសម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា នៅព្រឹកថ្ងៃទី ៥ ខែឧសភា ឆ្នាំ ២០២២នេះ បានទទួលជួបពិភាក្សាការងារ ជាមួយក្រុមប្រឹក្សាធុរកិច្ចសហរដ្ឋអាមេរិក-អាស៊ាន ដឹកនាំដោយលោកឯកអគ្គរដ្ឋទូតអាមេរិក, លោក ម៉ៃខើល មីចាឡាក់ ( Michael Michlalk ) អនុប្រធានជាន់ខ្ពស់ នៃនាយកគ្រប់គ្រងប្រចាំតំបន់ នៃក្រុមប្រឹក្សាធុរកិច្ចអាមេរិក-អាស៊ាន។

ក្នុងជំនួបនោះលោក Michael Michlalk បានថ្លែងអំណរគុណជូនចំពោះសម្តេចតេជោ ដែលបានជួយគាំទ្រក្រុមប្រឹក្សាធុរកិច្ចសហរដ្ឋអាមេរិក-អាស៊ាន ហើយបានសម្តែងនូវការគាំទ្រ និងអបអរសាទរចំពោះការធ្វើជាប្រធានអាស៊ានរបស់កម្ពុជា។

លោក Michael Michlalk បានបន្ថែមថា ភាពដឹកនាំរបស់សម្ដេចតេជោ បានដើរតួនាទីបានយ៉ាងល្អសម្រាប់តំបន់ ជាពិសេសសម្រាប់បញ្ហានៅមីយ៉ាន់ម៉ា។ ជាមួយគ្នានេះលោក បានវាយតម្លៃខ្ពស់ចំពោះការចាត់វិធានការ ទប់ស្កាត់ការរីករាលដាលជំងឺកូវីដ-១៩ នៅកម្ពុជា ដែលទទួលបានជោគជ័យ និងនាំទៅដល់ការបើកឡើងវិញនៃសេដ្ឋកិច្ចកម្ពុជា និងអនុញ្ញាតឲ្យមានជំនួបដោយផ្ទាល់នាថ្ងៃនេះ។

នៅក្នុងជំនួបដដែលនេះលោក Michael Michlalk បានដឹកនាំក្រុមហ៊ុនចំនួន ១៣ ហើយបានបែងចែកចេញជា ៣ក្រុម និងបានលើកមកពិភាក្សាលើបញ្ហាថាមពល ការបង្កើតរោងចក្រដំឡើងរថយន្តនៅខេត្តពោធិ៍សាត់ ការជំរុញសេដ្ឋកិច្ច ឌីជីថល និងវិស័យសុខាភិបាល។

ជាការឆ្លើយតបសម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា បានអរគុណដល់សហរដ្ឋអាមេរិក ដែលបានផ្ដល់វ៉ាក់សាំងកូវីដ-១៩ Johnson &Johnson និង Pfizer ដល់កម្ពុជា ហើយបានជម្រាបជូនប្រតិភូទាំងមូល នូវស្ថានភាពថាមពលរបស់កម្ពុជា។ ក្នុងនោះ ប្រទេសកម្ពុជាកំពុងតែប្រើប្រាស់អគ្គិសនី ផលិតដោយវារីអគ្គិសនី សរុបទាំងអស់មាន ៦៤,៣៩% អំពីសូឡា៤.១% និងជីវឧស្ម័នចំនួន ០,២៨%។

ក្នុងឱកាសនោះផងដែរ សម្ដេចតេជោនាយករដ្ឋមន្ត្រី លោកបានសម្ដែងនូវការស្វាគមន៍ ចំពោះការដំឡើងរោងចក្រ ដំឡើងរថយន្តនៅខេត្តពោធិ៍សាត់ ហើយបានលើកទឹកចិត្តឲ្យក្រុមហ៊ុនទាំងអស់បន្តវិនិយោគ និងស្វែងរកសក្តានុពលផ្សេងៗទៀត ដើម្បីវិនិយោគនៅកម្ពុជានាពេលខាងមុខ៕

អត្ថបទ៖ ឃួន សុភ័ក្រ

The post សម្ដេចតេជោ ហ៊ុន សែន ស្វាគមន៍ក្រុមហ៊ុនអាមេរិកចំពោះការបង្កើតរោងចក្រ ដំឡើងរថយន្តនៅខេត្តពោធិ៍សាត់ appeared first on Kampuchea Thmey Daily.