រាជដំណាក់ព្រះមហាក្សត្រខ្មែរ លើកំពូលភ្នំបូកគោ រង់ចាំអនុញ្ញាតពីព្រះបរមរាជវាំង ជួសជុលតាមគំរូដើមឡើងវិញ

Din Thary — Fri, 21 Jun 2024 04:34:08 +0000

លោក សាយ សុភក្ត្រា នាយកផ្នែកលក់ និងទីផ្សារក្រុមហ៊ុន សុខា អូតែល បានឱ្យដឹងថា ក្រុមហ៊ុនសុខា អូតែល កំពុងរង់ចាំការឆ្លើយតបពីព្រះបរមរាជវាំង ដើម្បីធ្វើការជួសជុលនិងកែលំអព្រះរាជដំណាក់ស្លាខ្មៅនៅលើកំពូលភ្នំបូកគោឱ្យមានភាពល្អប្រសើរឡើងវិញ។

ឆ្លើយតបសំណួរ «កម្ពុជាថ្មី» ក្នុងដំណើរទស្សនកិច្ចរបស់ក្រុមអ្នកសារព័ត៌មាននៅឧទ្យាជាតិព្រះមុនីវង្សបូកគោកាលពីពេលថ្មីៗនេះ លោក សាយ សុភក្ត្រា បានឱ្យដឹងថា ពាក់ព័ន្ធទៅនឹងគម្រោងកែលំអដំណាក់ស្លាខ្មៅ ដែលស្ថិតនៅរមណីយដ្ឋានឋានសួគ៌បូកគោ កន្លងមកខាងក្រុមហ៊ុនបានក្រាបបង្គំគាល់ទៅខាងព្រះបរមរាជវាំង ដើម្បីសុំការអនុញ្ញាតក្នុងការជួសជុល ប៉ុន្តែរហូតមកដល់ពេលនេះមិនទាន់ទទួលបានការឆ្លើយតបនៅឡើយទេ។

សម្រាប់គម្រោងជួសជុលដំណាក់ស្លាខ្មៅនេះទៀតសោត លោក សាយ សុភក្ត្រា បានអះអាងថា មិនចេះតែធ្វើនោះទេព្រោះទីតាំងនេះជាទីតាំងអតីតព្រះរាជដំណាក់របស់ព្រះមហាក្សត្រ ហេតុដូចនេះត្រូវរង់ចាំការអនុញ្ញាតពីព្រះបរមរាជវាំងជាមុនសិន ទើបក្រុមហ៊ុនហ៊ានជួសជុល។

«ខាងក្រុមហ៊ុនបានក្រាបបង្គំគាល់ទៅខាងព្រះបរមរាជវាំង ដើម្បីសុំការអនុញ្ញាតជួសជុល ប៉ុន្តែនៅមិនទាន់ទទួលបានការឆ្លើយតបមកវិញ ហេតុដូចនេះក៏មិនហ៊ានរៀបចំអ្វីនោះដែរ គ្រាន់តែជួយរៀបចំ ថែរក្សា សម្អាត សំរាម ឱ្យបានស្អាត នៅពេលមានអ្នកទៅទស្សនាតែប៉ុណ្ណោះ។ សម្រាប់ការជួសជុលនេះទៀតសោត ត្រូវធ្វើតាមប្លង់ស្ថាបត្យកម្មដើមដែលមានពីមុនមក»។ លោក សាយ សុភក្ត្រា បញ្ជាក់។

លោក លោក សាយ សុភក្ត្រា បានបន្ថែមថា បច្ចុប្បន្នក្រុមការងារគ្រាន់តែជួយកាត់សម្អាតស្មៅម្ដងម្កាល ក៏ដូចជាសម្អាតសំរាមជុំវិញបរិវេណព្រះរាជដំណាក់តែប៉ុណ្ណោះ ហើយសកម្មភាពផ្សេងលើសពីនេះលុះត្រាតែមានការអនុញ្ញាតពីព្រះបរមរាជវាំង។

លោក សាយ សុភក្ត្រា ក៏សង្ឃឹមដែរថា ព្រះបរមរាជវាំងនឹងយល់ព្រមអនុញ្ញាត ដើម្បីអាចជួសជុលនិងកែលំអដំណាក់ស្លាខ្មៅនេះជូនព្រះរាជវាំងឡើងវិញផងដែរ។

គួរជម្រាបថា ដំណាក់ស្លាខ្មៅមានទីតាំងស្ថិតនៅក្បែររូបសំណាកលោកយាយម៉ៅ ស្ថិតនៅត្រង់គីឡូម៉ែត្រទី ២០ តាមបណ្ដោយផ្លូវឡើងចុះរមណីយដ្ឋានឋានសួគ៌បូកគោ។ ដំណាក់នេះសាងសង់ឡើងពីបាយអរ និងបិទឈើស្លាខ្មៅនៅក្នុងឆ្នាំ១៩៣៦ សម្រាប់ជាព្រះរាជដំណាក់សម្រាកលំហែព្រះកាយរបស់ព្រះបរមរតនកោដ ព្រះបាទនរោត្តម សីហនុ នៅក្នុងសម័យសង្គមរាស្ត្រនិយម។

ដោយសារសង្គ្រាមស៊ីវិលរាប់ទស្សវត្ស ដំណាក់ស្លាខ្មៅរងការខូចខាត និងទុកចោលរហូតមកដល់បច្ចុប្បន្ន។ បើទោះបីជា អាគារដំណាក់ទុកចោលជាឆ្នាំក៏ពិតមែន ប៉ុន្តែអាគារសំណាក់ទាំងមូលនៅមានសភាពរឹងមាំ គ្រាន់តែទ្វារបង្អួចបានបាត់បង់អស់។ ដំណាក់នេះបែរមុខឆ្ពោះមករកផ្លូវ រីឯខាងក្រោយដំណាក់ អាចគយគន់ទេសភាពមាត់ជ្រោះ និងថ្ងៃលិចដ៏អស្ចារ្យ៕

The post រាជដំណាក់ព្រះមហាក្សត្រខ្មែរ លើកំពូលភ្នំបូកគោ រង់ចាំអនុញ្ញាតពីព្រះបរមរាជវាំង ជួសជុលតាមគំរូដើមឡើងវិញ appeared first on Kampuchea Thmey Daily.

ទំនប់ស្ទាក់ទឹកស្អាតដ៏ធំមួយលើភ្នំបូកគោ បញ្ចប់សាងសង់នៅ ២ ខែទៀត អាចផ្ទុកទឹកបាន ១ លានម៉ែត្រគីប

Dy Bunnara — Mon, 03 Jun 2024 04:28:26 +0000

ទំនប់ស្ទាក់ទឹកស្អាតដ៏ធំមួយនៅលើឧទ្យានជាតិព្រះមុនីវង្សបូកគោ កំពុងឈានទៅសម្រេចបញ្ចប់ការសាងសង់ក្នុងពេលដ៏ខ្លីខាងមុខនេះ។

លោក កែវ សិទ្ធ នាយកផ្នែកលក់ក្រុមហ៊ុនសុខា អូតែល បានគូសបញ្ជាក់ប្រាប់ដល់បណ្តាញក្រុមអ្នកសារព័ត៌មានក្នុងដំណើរទស្សនកិច្ចនៅឧទ្យានជាតិបូកគោកាលពីសប្តាហ៍មុនថា ទំនប់ទឹកនេះមានលទ្ធភាពអាចផ្ទុកទឹកបានរហូតដល់ ១ លានម៉ែត្រគីប។

បើតាមផែនការគ្រោងបញ្ចប់ការសាងសង់រយៈពេល ៣ ឆ្នាំ ប៉ុន្តែលទ្ធផលជាក់ស្ដែងគិតត្រឹមពេលនេះ អាចរួចរាល់ក្នុងរយៈពេលពីរទៅបីខែខាងមុខទៀត។ នេះបើតាមលោក កែវ សិទ្ធ។

លោកបន្តថា ទំនប់ទឹកដែលចាយថវិកាសាងសង់ជាង ៥ លានដុល្លារ នឹងជួយបង្កើនសមត្ថភាពក្នុងការផ្គត់ផ្គត់ទឹកស្អាតមិនឲ្យខ្វះខាត ខណៈកន្លងទៅទឹកស្អាតដែលប្រើប្រាស់ទូទៅមានប្រភពពីបឹងធម្មជាតិមួយនៅលើភ្នំបូកគោ។

បើតាមលោក កែវ សិទ្ធិ ទីតាំងទំនប់នេះថ្ងៃក្រោយ ក៏នឹងអាចក្លាយជាគោលដៅទេសចរណ៍បន្ថែមទៀត ដោយសារវិសាលភាពផ្ទៃទឹកដ៏ធំល្វឹងល្វើយព័ទ្ធជុំវិញដោយធម្មជាតិយ៉ាងស្រស់បំព្រង៕

The post ទំនប់ស្ទាក់ទឹកស្អាតដ៏ធំមួយលើភ្នំបូកគោ បញ្ចប់សាងសង់នៅ ២ ខែទៀត អាចផ្ទុកទឹកបាន ១ លានម៉ែត្រគីប appeared first on Kampuchea Thmey Daily.

ក្រុមហ៊ុន សុខា ហូតែល Archives - Kampuchea Thmey Daily